Silva, Pol

Para outras páxinas con títulos homónimos véxase: Silva.

Silva
Igrexa parroquial
Concello	Pol
Provincia	Lugo
Coordenadas	43°08′44″N 7°21′54″O
Área	5,52 km²
Poboación	156 hab. (2020)
Densidade	28,26 hab./km²
Entidades de poboación	11
[ editar datos en Wikidata ]

Santiago de Silva é unha parroquia do concello de Pol na provincia de Lugo. Segundo o IGE, en 2014 tiña 152 habitantes (73 homes e 79 mulleres).

Teñen especial vinculación con Silva os lugares de Cuenza, O Bento (desaparecido no século XX), A Rigueira, Gargallán, e A Carreira Blanca (Sitieles), que administrativamente pertencen a Castro de Rei (son os chamados Medianeiros). Medianeiros que tamén se poden incluír en Santa Mariña de Ramil-Castro de Rei.

Houbo muíño en Gargallán no lugar de Muíño Albeiro -no río Azúmara- e outros mais antigos dos cales non quedan restos (A Rigueira -no Rego de Doncide-, A casa do Muíño de Gargallán -no río Azúmara-)

No occidente da parroquia de Silva, o monte de Andraíde convoca na parte máis alta (592 metros) os termos municipais de Pol e Castro de Rei, arriba da paraxe das Louseiras.

Hidrografía

O río Azúmara (Congostro ou Pontedá) percorre a parroquia procedente de Mosteiro e o río Pol (Silva ou Ribeiro) con destino ao río Miño. O rego de Doncide desemboca no Azúmara por Cuenza-Pontedá.

Monumentos e lugares de interese

• Ara vialis de Bouzoá
• Mosaico Romano de Doncide
• Calzada romana de Fonfría
• Monte das Croas en Andión
• Medorras dos Medianeiros (Pedro Canto)
• Granda de Andión
• A Penourenta. Canteiras de Andión: laxes de lousa verde con incrustacións de pirita de ferro (o que dá nome á Penourenta pola semellanza co ouro que presenta a pirita de ferro.
• Capela de Doncide baixo advocación de Santo Antonio de Padua e San Francisco Xavier (tamén o Santo Anxo da Guarda). Foi feita sendo donos do lugar de Doncide o Licenciado Antonio López Danllo e a súa muller Francisca Saavedra, na primeira metade do século XVII.
• Igrexa de Silva baixo advocación de Santiago Apóstolo desde tempo antigo, documentado como Santo Jacobo no século XII
• Muíño de Llanes en Andión no río Azúmara .
• Muíño de Ventín no mesmo río Azúmara .
• Campo da festa en Andión.
• Escola de Fonfría, pechada.
• Escola de Bouzoá, reconvertida en vivenda.
• Casa grande de Eiras.

Festas

San Brais (3 de febreiro), Santiago (25 de xullo), Nosa Señora do Rosario (7 de outubro -2º domingo de outono-).

Orixe do apelido Silva

Paio Froila, señor de Silva, casou cunha filla de Vermudo II (982-999), dando orixe a catorce casas nobiliarias repartidas por toda a Península.

Unha Filla de Paio Froila, neta do Rei Vermudo II de León, estando próxima a morrer deu testamento en 1058, na cidade de León (capital do reino) nomeando testamenteiro ao bispo galego Alvito de Mondoñedo, bispo da cidade. Este santo Alvito foi restaurador da igrexa de Cirio en Pol, sendo "o presbítero Aloitus". Da "nobilisima señora dona Fronilde" quedou en hebreo un documento de compra que fixo en León a Josef bar Joab Escapat, o xoves día 20 do mes Marhesvan do ano 814 (4 de novembro de 1053).

Véxase tamén

Outros artigos

• Lugares de Pol