សុភាពនារីណាខ្លះកំពុងមានបញ្ហាឡើងមុនពេញខ្នងយូរឆ្នាំ មិនបាត់?ជាទូទៅ មុនខ្នងគឺជាបញ្ហាធំមួយសម្រាប់នារីអាចថាជា បញ្ហាខ្លាំងជាងកើតមុននៅលើមុខទៅទៀត ពិបាកទាំងការស្លៀកពាក់ ប៉ះពាល់ទាំងអារម្មណ៍ អ្វីដែលពិបាកបំផុតនោះ ព្យាបាលមិនជានៅកើតពេញខ្នងមិនព្រមបាត់រាប់ឆ្នាំ។

ជាការពិតណាស់ យោងតាមរយៈកិច្ចសម្ភាសន៍របស់ក្រុមការងារចាបបៃតង ជាមួយវេជ្ជបណ្ឌិត អ៊ុន សូលីដា ជាវេជ្ជបណ្ឌិត ឯកទេសសើស្បែកជំនាន់ទី៤នៅសាលាវិទ្យាសាស្រ្តសុខាភិបាលបានចែករំលែកទាក់ទងនិងប្រធានបទ ជំងឺមុនខ្នង ។

វេជ្ជបណ្ឌិត អ៊ុន សូលីដា បានរៀបរាប់ថា មូលហេតុនៃការកើតមុនខ្នង ជាទូទៅមានបែងចែកជាពីប្រភេទមូលហេតុទី1 បង្ករឡើងដោយការរលាកដោយពពួកមេរោគ ដូចជា (បាតេរី វីរ៉ុស ផ្សិត រឺ ប៉ារាសុីត )។ ទី២មុខខ្នងបង្កឡើងពីការប្រើប្រាស់ផលិតផលមួយចំនួនដែលបណ្ដាលឱ្យកកើតមុនខ្នងឡើងមក ដែលមិនមែនទាក់ទងនឹងការឆ្លងរោគឡើយ។

ទី៣បង្កឡើងដោយការរស់នៅប្រចាំថ្ងៃ (ឧស្សាហ៍បែកញើសឬចូលចិត្តប្រើប្រាស់ទឹកក្ដៅ និងស្ទឹម) ដែលជាហេតុបង្កឱ្យរលាកគល់រោម នាំឱ្យកកើតមុនខ្នងឡើងមក តែករណីនេះ មិនមែនអ្នកកើតមុនខ្នងមិនអាចទៅស្ទីមសូនា បាននោះឡើយ តែត្រូវកាត់បន្ថយមានន័យថា ប្រសិនណា កំពុងតែឡើងមុនខ្លាំងអាចព្យាបាលឱ្យជាសះឬក៏ធូរស្បើយជាងមុន ចាំទៅស្ទីមពេលក្រោយចៀសវាងមានហានិភ័យខ្លាំងជាងមុនឡើងមក។ វេជ្ជបណ្ឌិតបានណែនាំមកបន្ថែមថា ប្រសិនណាមានករណីឡើងមុនខ្នងខ្លាំងខុសធម្មតា មានទំហំធំ​ឡើងពេញខ្នង សូមប្រញាប់មកជួបជាមួយគ្រូពេទ្យជំនាញដើម្បីធ្វើការពិនិត្យឱ្យបានត្រឹមត្រូវ ព្រោះអាចជាសញ្ញានៃជំងឺផ្សេងៗ ដូចជាជំងឺមហារីក ជំងឺអេដសន៍ជាដើម សូមកុំទុកនិងធ្វើការព្យាបាលមុនខ្នងដោយខ្លួនឯង ។

ចំពោះការព្យាបាលមុនខ្នងជាទូទៅ ប្រសិនណាកើតមុនខ្លាំងពេញខ្នង គឺមិនអាចព្យាបាលដោយការប្រើប្រាស់ផលិតផលអាចជាសះស្បើយនោះទេ សូមបងប្អូនត្រូវដឹង ទាល់តែមកជួបជាមួយគ្រូពេទ្យជំនាញផ្នែកសើស្បែកជាមុនសិន ដើម្បីព្យាបាលឱ្យបានត្រឹមត្រូវ ព្រោះវេជ្ជបណ្ធិតបានបញ្ជាក់ថា ប្រសិនណាមុនធំ មានផ្ទុះជាដើម កុំបារម្ភអាចព្យាបាលឆាប់បាត់នោះទេ យូរតែការព្យាបាលស្នាមមុនតែប៉ុណ្ណោះដូច្នេះសូមកុំព្យាយាមកេះមុន។ មួយវិញទៀត អ្នកដែលមានបញ្ហាកើតមុនខ្នងគឺជាប្រភេទស្បែកដែលងាយឡើងប្រេង ដូច្នេះនៅពេលមានបែកញើសសូមប្រញាប់លាងសម្អាតខ្លួនជាមួយសាប៊ូឱ្យបានស្អាត​តែសូមប្រើប្រាស់ប្រភេទសាប៊ូ ដែលអាចកាត់បន្ថយជាប្រេងលើស្បែក និង កុំព្យយាមកេះ ព្រោះអាចបណ្ដាលឱ្យបានកើតស្នាមពិបាកព្យាបាលជាងមុនទ្វេដង។ ម្យ៉ាងវិញទៀត កុំព្យាយាមប្រើប្រាស់ផលិតផល តាមគ្នា ព្រោះប្រភេទស្បែករបស់យើងមិនដូចគ្នា នោះទេ ទោះបីជាគេប្រើប្រាស់ផលិតផលនេះត្រូវតែយើងមិនប្រាកដថាប្រើនប្រាស់ត្រូវដូចគេនោះទេ៕

ជាចុងក្រោយប្រសិនណាមានបញ្ហាមុនខ្នងសូមបងប្អូន ប្រញាប់មកជួបជាមួយគ្រូពេទ្យជំនាញដើម្បីធ្វើការព្យាបាលត្រឹមត្រូវ កុំព្យាយាមព្យាបាលដោយខ្លួនឯង កុំប្រើប្រាស់ផលិតផលតាមគ្នាហើយ​ ពេលបែកញើសត្រូវព្យាយាមងូតទឹកសម្អាតខ្លួនឱ្យបានលឿនបំផុត ៕

អត្ថបទដោយ៖ ប៉ែត ធីតា