Գայանե Փայտյան

Գայանե Փայտյան;
Ծնվել է	հունիսի 30, 1974
Ծննդավայր	Երևան, Հայկական ԽՍՀ, ԽՍՀՄ
Մահացել է	հոկտեմբերի 27, 2022 (48 տարեկան)
Մահվան վայր	Երևան, Հայաստան
Քաղաքացիություն	Հայաստան
Կրթություն	ԵՊՀ հայ բանասիրության ֆակուլտետ
Մասնագիտություն	լրագրող, սցենարիստ, հեռուստահաղորդավարուհի և դասախոս

Գայանե Ալբերտի Փայտյան (հունիսի 30, 1974(1974-06-30), Երևան, Հայկական ԽՍՀ, ԽՍՀՄ - հոկտեմբերի 27, 2022(2022-10-27)^[1], Երևան, Հայաստան^[2]), լրագրող, սցենարիստ, հեռուստահաղորդավար, դասախոս։

Կենսագրություն

Գայանե Ալբերտի Փայտյանը ծնվել է 1974 թվականի հունիսի 30-ին, Երևանում։ Մայրը մասնագիտությամբ մանկավարժ է, հայրը՝ ինժեներ-ավտոմեխանիկ։

1991 թվականին ընդունվել է Երևանի պետական համալսարանի բանասիրական ֆակուլտետի ժուռնալիստիկայի բաժին և սկսել է թղթակցել «Ավանգարդ» թերթին։ Ուսմանը զուգահեռ՝ աշխատել է Հայաստանի ազգային հեռուստաընկերությունում, 1991-1992 թվականներին եղել է Հայաստանի ազգային հեռուստաընկերության «Մայրաքաղաք» հաղորդման մեկնաբանը, 1992-1994 թվականներին` «Ա1» հեռուստաընկերության «Թափանցիկ դռներ», «Հաու դու յու դու», «Մամուլի ակումբ» հաղորդումների թղթակիցը, հեղինակը և հաղորդավարը^[3]։

1993 թվականին սրտի կաթվածից մահացել է հայրը, ով նրա կյանքում առանձնահատուկ դեր է ունեցել։

1994 թվականին մասնակցել է Ֆրանսիայի Պոր դը Բուկ քաղաքում անցկացվող ամենամյա միջազգային կինոփառատոնին և Երևանի կենդանաբանական այգու մասին պատմող տեսաֆիլմով ընդգրկվել մասնակիցների լավագույն հնգյակում։

1996 թվականին Գայանե Փայտյանն ավարտել է համալսարանը, աշխատանքի անցել «Նորք» հեռուստաընկերությունում (հետագայում՝ հայկական երկրորդ պետական հեռուստաընկերություն), 1998-1999 թվականներին եղել «Նորք» հեռուստաընկերության «Լուրեր» ծրագրի տնօրենը և «Արտ 13» հեռուստաընկերության խմբագիրը, հեղինակել և վարել է «Ծանոթ անծանոթ» հաղորդաշարը^[3]։

Որպես լրատվական մեկնաբան՝ 1995-1999 թվականներին աշխատել է Հայաստանի ազգային հեռուստաընկերությունում, 1999-2015 թվականներին՝ Հայկական երկրորդ հեռուստաալիքի «Լրաբեր» լրատվական ծրագրում։ 2000-2008 թվականներին եղել է ՀՀ Ազգային Ժողովի հասարակայնության հետ կապերի վարչության գլխավոր մասնագետը։ 2004 թվականից եղել է միջազգային հեռուստատեսային ակադեմիայի անդամ։ 2006 թվականին Հայկական երկրորդ հեռուստաալիքով հեղինակել և վարել է «Կախման կետեր», 2017 թվականից՝ «Զրույց Փայտյանի հետ» հաղորդաշարերը։

2006 թվականին ԱՄՆ Պետդեպարտամենտի լրատվամիջոցների համար հատուկ ծրագրով վերապատրաստվել և որակավորվել է ԱՄՆ-ում, իսկ 2009 թվականին դարձյալ ԶԼՄ ներկայացուցիչների համար հատուկ ծրագրով վերապատրաստվել է Եգիպտոսում, մասնակցել է միջազգային դասընթացների եվրոպական մի շարք երկրներում։

Տարբեր տարիներին դասախոսել է Հայաստանում ֆրանսիական և Երևանի Խ. Աբովյանի անվան պետական մանկավարժական համալսարաններում^[4]։ 2008 թվականին հիմնադրել և ղեկավարել է հաղորդավարների և լրագրողների մասնագիտացված «TV Իդեալ» դպրոց-ստուդիան։

Բազմաթիվ դոկումենտալ ֆիլմերի հեղինակ է` «Հայաստանի և Արցախի պատմական վանքերն ու հուշարձանները», «Հնդկաստան», «Իրանի Իսլամական Հանրապետություն», «Մեր հարևանները», «Իրաք», «Բաբելոնի գաղտնիքները», «Բահրեյնի թագավորության հրաշքը», «Քուվեյթ», «Ալբանիա. պատերազմ և խաղաղություն», «Հռոմ՝ հավերժական քաղաք», «Փարիզ. սեր ու գույն», և այլն։

Գայանե Փայտյանը մահացել է 2022 թվականի հոկտեմբերի 27-ին՝ ծանր հիվանդությունից հետո։

Մրցանակներ

Հեռուստատեսության բնագավառում երկարամյա անբասիր աշխատանքի համար 2018 թվականին պարգևատրվել է Երևանի քաղաքապետի շնորհակալագրով^[5]^[6]։

Ընտանիք

2009 թվականին Գայանե Փայտյանն ամուսնացել է մասնագիտությամբ ինժեներ Էդուարդ Միհրանյանի հետ։ 2017 թվականին ունեցել են երկվորյակ դստրեր՝ Էվա և Էլլա^[7]^[8]։

Կրտսեր քույրը՝ Մարիաննա Փայտյանը, լրագրող է, վավերագրական հեռուստաֆիլմերի սցենարիստ^[9]։

Ծանոթագրություններ

Աղբյուրներ

Գայանե Փայտյանի մասին zarkfoundation.com կայքում
Գայանե Փայտյան, "Ճակատագրեր" ֆիլմաշար
Գայանե Փայտյան, "Կեսգիշերնանց" հեռուստաշարք
Երևանի մամուլի ակումբ, Գայանե Փայտյան
Գայանե Փայտյան, Մեր մեջ ասած հաղորդաշար

[_0bf58487d237a1e1-1] 1,0 ^1,1 ^1,2 Մահացել է լրագրող-հեռուստամեկնաբան Գայանե Փայտյանը

[2] «Մահացել է լրագրող-հեռուստամեկնաբան Գայանե Փայտյանը».

[ypc-3] 3,0 ^3,1 Երևանի մամուլի ակումբ, Գայանե Փայտյան

[4] Գայանե Փայտյանի - Zark Foundation

[5] «Երևանի քաղաքապետի շնորհակալագրեր՝ հեռուստահաղորդավարներ Գայանե Փայտյանին, Տաթևիկ Բաղդասարյանին, Քրիստինե Մելքոնյանին և Էռնա Էլիզբարյանին» — Երևանի քաղաքապետարան

[6] «Երևանի քաղաքապետի շնորհակալագրեր՝ հեռուստահաղորդավարներ Գայանե Փայտյանին, Տաթևիկ Բաղդասարյանին, Քրիստինե Մելքոնյանին և Էռնա Էլիզբարյանին» — Slaq.am

[7] Գայանե Փայտյան.«2017-ը կյանքիս լավագույն տարին էր»

[8] «Կյանքից հեռացել է Գայանե Փայտյանը» — iravaban.net

[9] Մարիաննա Փայտյան, Mediamax.am

[1]

[2]

[3]

[4]

[5]

[6]

[7]

[8]

[9]