2 Timoteus 1, 1-14 Sermon Parhalado
2 Timoteus 1, 1-14 Sermon Parhalado
2 Timoteus 1, 1-14 Sermon Parhalado
1
Bahan Sermon Parhalado HKBP Cibubur
Kamis, 22 September 2022
mabiar jala na mangirput na boi manundati gogo patupahon ulaon na denggan na sian Debata.
Hagogoon, i ma huaso na sian Debeta laho mangadopi angka musu dohot ragam ni pamaraan,
na manghabengethon dohot manghamonanghon angka pangunjunan, hamaolon dohot
pangaleleon. Haholongon, i ma gogo ni harohaon na patauhon jolma manghaholongi Debata
dohot donganna jolma; na patauhon mangolu na marpananginangian (dengar-dengaran),
marhaporseaon, dohot marhahirimon tu Debata; na padaohon biar (pat.1 Joh.4:18) jala na patoguhon
roha. Jala Pangarajaion diri, i ma pingkiran na toras (na tang/dewasa) na patauhon sasahalak
patundukhon (menertibkan) dohot mangarajai (menguasai) dirina; marhamanaton jala
marhabisuhon (berhati-hati, bijaksana). Dirajumi ala ni i do asa tarbahen malua si Timoteus sian
ragam ni hatahuton na songgop tu dirina. Ala poso dope ibana hatiha i, dapot roha do molo
adong di ibana hagangguon, ai ingkon uluhononna sada huria na balga na tongon marungkil
maradophon parpoda haliluon. Di ay. 8, pargasipan do i di halak Jahudi jala haotoon di sipelebegu
anggo Barita na Uli i (1 Kor.1:23). Di roha ni na deba, poda ni Kristus i mapejethu do; ndang hona tu
poda gnostik na bagas jala na timbo (gnostik i do na manosak tu huria Epesus di tingki ni si
Timoteus). Ala ni i, boi do gabe maila halak manghatindanghon Barita na Uli i. Laos i ma na
dipodahon tu si Timoteus, didok: “Unang ho maila manghatindanghon Tuhanta i.” Sabalikna,
naeng ma dohot ibana manghophop Barita na Uli i. Manghophop, lapatanna ambil bagian di
sitaonon ala ni Barita na Uli i. Ido ulaon i, tusi do si Paulus dipabangkit. Parjolo, gabe parjamita,
na pangiarhon soarana mamaritahon barita haluaon na sian Tuhan i dohot uhum pamalosonNa.
Paduahon, gabe apostel, lapatanna na sinuru sian Debata laho patubegehon hata dohot lomo ni
rohaNa tu hajolmaon. Parpudi, gabe pangajari, i ma parorot manang panogunogu na
patureturehon na porsea i asa lam magodang jala matoras di bagasan haporseaon jala
marpangalaho di bagasan hasintongan. Ala ni hajongjongan dohot ulaon i do si Paulus
marsitaonon, tarrante jala tarhurung. Alai ndang maila ibana disi. Hatuaon do jambar tu na
manghaporseai Ibana, jala hasangapon do na mangoloi dohot mangulahon parsuruonNa, nang pe
ingkon marsitaonon.
Sipahusorhuron
“On pe, unang ho maila manghatindanghon Tuhanta i, dohot ma ho tahe manghophop Barita na
Uli i!” ninna si Paulus tu si Timoteus di suratna on. Ndang holan tu si Timoteus i, alai joujou do
i tu sandok na porsea na di huria dohot di sude tingki dohot inganan. Ndang ulaon na neang i, na
dokdok situtu do; gok parmaraan, parungkilon, dohot sitaonon. Sian na robi sahat tu nuaeng
nunga mansai godang na manangihon joujou i. Ditaon nasida do ragam ni parungkilon dohot
sitanonon, torop tahe na ingkon agoan hosa manang na mate martyr. Nuaeng, dipasahat do
joujou i dohot tu hita. Boha do asa unang maila, alai asa las jala hiras rohanta mangulahon i?
1. Ingkon torang do di hita taringot tu gogo di panindangion i. Hagogoon ni Debata do gogo di
panindangion i. Dibasabasahon Debata do tu angka sitindangi i ragam ni silehonlehon na
marguna tu ulaon i, i ma huaso ni Tondi Porbadia. Dilehon do huhut hagogoon, haholongon,
dohot pangarajaion diri. Marhite angka i malua do angka sitindangi i sian hatahuton.
2. Ingkon torang do di hita taringot tu sihatindanghonon i. “Unang ho maila manghatindanghon
Tuhanta i, dohot ma ho tahe manghophop Barita na Uli i!” ninna si Paulus. Jesus Kristus do
sintuhu ni Barita na Uli i. Na manghatindanghon Jesus Kristus dos do i tu na
manghatindanghon Barita na Uli, jala na manghatindanghon Barita na Uli dos do i tu na
manghatindanghon Jesus Kristus.
3. Ingkon torang do di hita taringot tu hamonangan ni na tahatindanghon i. Haluaon na sian
Debata na dipapatar di bagasan Kristus Jesus i ndang na laho sahat i tu agia ise pe ia so
marhite panindangion. Dipabangkit Debata do angka apostel, parjamita, dohot pangajari
(partohonan). Tu nasida ma dipalumehon Barita na Uli i asa ni radotan jala
hatindanghononna. Ibana sandiri do jaminan ni hahohot dohot hamonangan ni Barita na Uli i.
Molo taboto hamonangan ni Barita na Uli i, las jala hiras ma rohanta manghatindanghon,
manghopohop, manjamitahon, dohot mangajarhonsa. Tahobasi ma ulaonta i, ai ndang
marpansohotan Asi ni RohaNa tu na manghalojohon ulaonNa i. Amen.