Tuir Prezidente KI, Virgílio Guterres, hatete, karta notifikasaun husi SIKN Ia refleta valor sira luta libertasaun nasional iha ne'ebé jornalista no mídia mós kontribui maka'as ba luta direitu umanu no kontribui ba povu Timor-Leste ninia ukun rasik-an iha tempu okupazaun Indonezia nian.
Nia fundamenta, tuir loloos notifikasaun polisia nian ne'e ba politika ka governante sira ne'ebé foin dadauk ne'e halo intervensaun ba instituisaun seluk nia servisu, la'os haruka ba fali notifikasaun ne'e ba Xefe Redasaun no Jornalista Diáriu INDEPENDENTE nian, tanba publiku dadauk ne'e hein hela prosesu legal ba kazu intervensaun ne'e.
Ho nune'e, KI hakarak hato'o ninia pozisaun katak, lamenta no kondena notifikasaun ne'ebé Servisu Investigasaun Kriminal Nasional haruka ba Xefe Redasaun no Jornalista Jornal INDEPENDENTE, tanba ida-ne'e sei afeita ranking index liberdade imprensa ne'ebé dadauk ne'e Timor-Leste hetan.
"Husu ba Komando Jeral PNTL atu retira notifikasuan ne'ebe Servisu Investigasaun Kriminal Nasional haruka ba Redasaun Diáriu INDEPENDENTE, tanba la tuir ninia dalan loloos hanesan haktuir iha Lei Komunikasaun Sosial, artigu 34 kona-ba direitu resposta no retifikasaun, laos uza fali Kodigu Penal hodi notifika no kondena jornalista no mídia sira, tanba sira nia obra jornalistiku,"dehan nia iha konferensia imprensa iha salaun KI, Kintal Boot, tersa ne’e (25/10).
Nia hatutan, KI haree katak, aktu uza kodigu penal hodi notifika jornalista ka kanal mídia ida, tanba deit ninia produtu jornalistiku, ida ne’e la tuir dalan lolos ka salah kamar.
Tanba ne’e, KI mós konsidera katak, karta notifikasaun ne'e Ia reflete prinsipiu no valor sira demokrasia ne'ebe pais ne'e opta hanesan haktuir iha Konstituisaun RDTL, Artigu 40 no 41 nomes konvensaun sira internasional ne'ebe pais ne'e ratifika atu garante sidadaun hotu nia direitu fundamental sira nu'udar konstituisaun garante.
Ho nune'e, Konsellu Imprensa (KI) haree katak, notisia ne'ebé Diariu INDEPENDENTE publika iha loron 12 no 13 Outubru 2022, ho titulu “Ejizensia Demite Gastao, Komisariu Mateus: PNTL Simu Karta husi Vise MJ no Vise MOP no notisia ho titulu “Deskonfia Vise MJ haruka karta ba Komando PNTL atu Demite Gastão, nu'udar produtu jornalistiku ne'ebé bazeia ba faktu no verasidade jornalizmu tuir Kodigu Etika Jornalistika no prinsipiu sira jornalizmu nian.
Entretantu, ho karta notifikasaun ne'e, pozisaun hosi KI prontu sai mediador atu halo mediasaun ba kazu desputa entre PNTL no Jornal INDEPENDENTE hodi hetan solusaun ida-ne'ebé justu no loloos ba parte rua tuir Lei Komunikasaun Sosial.
Enkuantu, Konsellu Imprensa mós husu ba entidade Estadu hotu atu respeita jornalista no mídia nia servisu iha kontestu kobertura no publikasaun notisia, tanba jornalista no mídia hala'o ninia papel kontrolu sosial nu'udar pilar demokrasia iha país demokratiku hanesan Timor-Leste.
