Opportunity
Opportunity esis vehilo, parto di projeto di NASA por explorar la geologio di la planeto Marso. Ol lansesis ye la 7ma di julio 2003, e ye la 25ma di januaro 2004 ol atingis la surfaco di Marso en Meridiani Planum, tri semani pos l'arivo di olua jemela vehilo Spirit ye altra loko sur la planeto.
Ye arivo la vehilo situesis en kratero, proxim olua bordo. To esis interesiva por la ciencisti di la projeto; li iniciis explorado di la petri e sulo en la kratero. La vehilo pose departis de la kratero e komencis explorado di la regiono.
Li expektis ke la misiono durus dum 90 marsala dii (un marsala dio esante kelke plu kam un terala dio); tamen ol funcionis til 2018. De 2006 till 2008 ol exploris kratero Victoria. En agosto 2013 ol atingis ula saliajo di la bordo di la kratero Endeavour, nomizita Solander Point. Pos altra exploradi, e posvivante plura polvo-tempesti, ol hivernis dum la planetala polvo-tempesto di 2018. Komuniki faliis pos ca periodo, forsan pro ke polvo kovris olua sunala paneli. Ye 13 di februaro 2019, NASA anuncis ke la misiono esas kompleta. La vehilo funcionabis dum 5111 marsala dii, e kovrabis totala disto 45,16 km.