Brennivín
Brennivín er íslenskt brennt vín bruggað úr gerjuðum kartöflum, líkt og vodki, og kryddaður með kúmeni. Það er stundum kallað „svarti dauði“. Brennivín er með 37,5% áfengisinnihald. Flöskurnar eru grænar með svörtum miða með hvítum eða silfruðum hring og nafninu yfir. Inni í hringnum stóð áður skammstöfunin ÁTVR en nú er þar útlínumynd af Íslandi. Tilgangurinn með svarta miðanum var upphaflega sá að gera flöskuna fráhrindandi. Lengst af hefur brennivín þótt vera vondur drykkur, bæði vegna mikils áfengisinnihalds og vegna þess að það var ódýrasta sterka vínið sem fékkst á Íslandi. Þetta orðspor hefur smám saman verið að breytast. Brennivín er nú oftast drukkið sem snafs en áður fyrr var algengt að drekka það blandað með vatni eða kóki. Heitið brennivín var áður notað um ýmiss konar brennt vín sem danskir kaupmenn fluttu inn til landsins á tímum einokunarverslunarinnar og var yfirleitt bruggað úr rúgi. Áfengishlutfall þessa víns var yfirleitt hátt, því þá mátti selja það á hærra verð miðað við magn, sem gerði flutninginn hagkvæmari. Nafnið er notað í bæði Danmörku (brændevin) og Svíþjóð (brännvin) yfir ákavíti.
Upphaflega framleiddi Áfengis- og tóbaksverslun ríkisins íslenskt brennivín, allt frá lokum áfengisbannsins 1. febrúar 1935 til 26. júní 1992 þegar Vífilfell tók við framleiðslunni. Ölgerðin framleiðir nú upprunalega brennivínið en þó hafa önnur íslensk eimunarhús hafið framleiðslu á sinni eigin útgáfu af brennivíni.
Tengill
[breyta | breyta frumkóða]- Íslenskt brennivín - íslenskur menningararfur? Geymt 18 september 2010 í Wayback Machine, grein á vefritinu Hugsandi.is