Charles Manson

Charles Manson
Manson árið 2017.
Fæddur	12. nóvember 1934 Cincinnati, Ohio, Bandaríkjunum
Dáinn	19. nóvember 2017 (83 ára) Bakersfield, Kaliforníu, Bandaríkjunum
Dánarorsök	Hjartastopp
Maki	Rosalie Willis (g. 1955; skilin 1958) Leona Stevens (g. 1959; skilin 1963)
Börn	4
Foreldrar	W. H. Scott Sr. og Kathleen Maddox
Undirskrift

Charles Milles Manson (f. 12. nóvember 1934 sem Charles Milles Maddox, d. 19. nóvember 2017) var bandarískur glæpamaður og fyrrum leiðtogi hinnar svokölluðu Manson-fjölskyldu. Manson og fylgjendur hans myrtu níu manns á aðeins fimm vikum sumarið 1969. Árið 1971 var hann sakfelldur fyrir að fyrirskipa morðin á sjö manns en þeir sem voru drepnir voru leikkonan Sharon Tate og fjórir aðrir á heimili leikkonunnar. Daginn eftir voru svo hjónin Leno og Rosemary Labianca drepin.

Manson trúði á það sem hann kallaði Helter Skelter en það var að hans sögn, yfirvofandi dómsdagsstríð milli hvítra og svarta. Heitið kemur frá samnefndu lagi með Bítlunum af The White Album en Manson þóttist skilja að það væru hin raunverulegu skilaboð lagsins. Morðin sem voru framin að hans undirlagi áttu að flýta fyrir þessu stríði. Söfnuður hans, Manson fjölskyldan, hugðist svo fela sig í helli í eyðimörkinni á meðan svartir menn útrýmdu þeim hvítu, og koma svo fram og drottna yfir blökkumönnum að því loknu. Manson varð seinna meir að einskonar tákmynd fyrir geðveiki, ofbeldi og hið ógnvekjandi. Lögmaðurinn sem sótti hann til saka, Vincent Bugliosi, gaf seinna meir út bókina Helter Skelter þar sem hann skrifar um Manson og umrædd morð.

Áður en Manson stofnaði Manson-fjölskylduna var hann atvinnulaus fyrrum fangi og hafði eytt helmingi ævi sinnar í betrunarvist fyrir ýmis brot. Áður en morðin voru framin var hann söngvari og lagasmiður í Los Angeles en hann átti smávinsældir sínar Dennis Wilson, trommara og einum af stofnanda Beach Boys, að þakka. Eftir sakfellinguna voru lög sem hann hafði samið og flutt gefin út á almennum markaði. Margir tónlistarmenn eins og Redd Kross, Guns N' Roses, White Zombie, Devandra Banhart, og Marilyn Manson, hafa gert sínar útgáfur af þessum lögum og gefið út.

Manson var dæmdur til dauða en þeim dómi var síðan breytt í lífstíðardóm eftir að hæstiréttur Kaliforníu afnam dauðarefsingar árið 1972. Þrátt fyrir að Kalifornía hafi aftur tekið upp dauðarefsingar þá hafði það ekki áhrif á fangelsisdóm Mansons. Hann sat í fangelsi með nífaldan lífstíðardóm í ríkisfangelsinu í Corcoran í Kaliforníu þar til hann lést.

Heimildir

• Fyrirmynd greinarinnar var „Charles_Manson“ á ensku útgáfu Wikipedia. Sótt 17. apríl 2016.