Kembang sungsang

Kembang sungsang duwéni jeneng élmiah Gloriosa superba. Ana uga kang ngarani kembang iki kanhi jeneng kembang Mandalika. Kembang kang dimangerténi lumebu kulawarga Liliaceae iki kalebu tanduran sakmangsa ya iku urip nalika wiwit mangsa rendheng. Wit iki dhuwuré 2 mèter lan duwé godhong ijo tunggal kang alus dawané 10–20 cm lan ambané 3–6 cm. Kembangé majemuk awerna kuning pucuké warna jingga. Benang sariné metu lan melengkung mendhuwur kang dawane 5–8 cm. Kembang sungsang kang wis tuwa duwé woh alus uga empuk sing wernané ijo kesoklatan. Oyoté serabut lan nutupi umbi kang bunder.^[1]

Ékologi

Kembang sungsang minangka tetuwuhan asli saka bawana Afrika lan Asia. Banjur dibudhidhayakaké ing tlatah Florida lan Hawaii. Kembang sungsang biasané ditandur ing pot utawa dadi tanduran pager. Tanduran iki thukul ing dharatan cendhek nganti duwur 600 mèter ing sadhuwuring sagara. Cara nandur ya iku kanthi umbiné kang diwénéhake ing lemah lan wanci paling apik ya iku wiwit mangsa rendheng.

Kandhutan kimia

Kembang sungsang ngandhut senyawa alkaloida kang sipaté racun. Menawa ora segaja mangan umbiné bisa nyebabaké rasa kobong ing gurung, lambe lan ilat bengkak. Sakwisé iku dadi mencret, muntah, semaput, bisa uga nganti tilar donya.

Referènsi

↑ Widiyastuti, Yuli (2009). Mengenal Tumbuhan Berbahaya di sekitar kita. Tawangmangu karanganyar: Balai Besar Penelitian dan Pengembangan Tanaman Obat dan Obat Tradisional. ISBN 978-979-985722-4.

[1] Widiyastuti, Yuli (2009). Mengenal Tumbuhan Berbahaya di sekitar kita. Tawangmangu karanganyar: Balai Besar Penelitian dan Pengembangan Tanaman Obat dan Obat Tradisional. ISBN 978-979-985722-4.

[1]