რილა
| რილა | |
|---|---|
| |
| კოორდინატები: 42°06′00″ ჩ. გ. 23°33′00″ ა. გ. / 42.10000° ჩ. გ. 23.55000° ა. გ. | |
| ქვეყანა |  ბულგარეთი
|
| უმაღლესი წერტილი | მუსალა |
| სიმაღლე | 2925 მ |
| ფართობი | 2629 კმ² |
| სიგრძე | 75 კმ |
| სიგანე | 50 კმ |
  | |
რილა, რილა-პლანინა (ბულგ. Рила) — ქედი ბულგარეთის სამხრეთ-დასავლეთ ნაწილში; უმაღლესია ბულგარეთსა და საერთოდ, ბალკანეთის ნახევარკუნძულზე. დასავლეთიდან აღმოსავლეთისაკენ გადაჭიმულია 75 კმ-ზე, ხოლო ჩრდილოეთიდან-სამხრეთისაკენ 50 კმ-ზე. საშუალო სიმაღლე 1487 მ, მაქსიმალური სიმაღლე 2925 მ (მთა მუსალა).[1]
უმთავრესად აგებულია ძველი კრისტალური და მეტამორფული ქანებით. დამახასიათებელია წვეტიანი მწვერვალები, რელიეფის მყინვარული ფორმები, ტბები. ქედიდან სათავეს იღებენ მდინარეები: ისკირი, მარიცა, მესტა. რილის ქედის ფარგლებშია დაახლოებით 200 მყინვარული წარმოშობის ტბა, რომელთა შორის გამოირჩევა რილის შვიდი ტბა. არის ცხელი წყაროები, მათ შორის სამხრეთ-აღმოსავლეთ ევროპის უმხურვალესი ცხელი წყარო საპარევა-ბანია.[1]
რილის ქედის დიდი ნაწილი უკავია რილის ეროვნულ პარკს. აქვეა რილის მონასტერის ბუნების პარკი. კალთები შემოსილია მუხის, წიფლისა და წიწვოვანი ტყით, 2000–2100 მ-ის ზევით სუბალპური და ალპური მდელოებია. განვითარებულია ხე-ტყის დამუშავება, საძოვრო მესაქონლეობა. არის არქიტექტურული ძეგლები. კურორტები, ტურიზმი, ალპინიზმი, სათხილამურო სპორტი. სამხრეთ-დასავლეთ განშტოებებზეა X საუკუნის რილის მონასტერი.[2]
