Caioua
La caioua es un tribu de americanes orijinal e la Planos Grande de la SUA. Los ia migra a sude de Montana ueste a la Montes Rocosa en Colorado en la sentenios 17 e 18, e ultima a la Planos Sude per la sentenio 19 tarda. En 1867, la caioua ia es moveda a un reserva en Oklahoma sude-ueste. Oji, los es un tribu reconoseda par la governa federal de la SUA, con sua xeferia en Carnegie, Oklahoma. A 2011, los ave 12,000 membros. La lingua de la caioua (cual los nomi cáuijògà) e un parte de la familia de linguas tanoan, e es ancora parlada oji.
La sosia de la caioua segue un desende biladal, per dise, ambos la linias - madral e padral - ia es sinifiante. Los no ave clanes, ma ave sistemes complicada de relata, e sosias dependente de eda e jenero.
Tipis, abitadas cono construida de pelo o, plu tarda, lona, furni abitadas lejera e portable. Los ia xasa e colie comedas savaje, e ia comersia con tribus de cultivores visina per vejetales. La caioua ia migra par la saison, seguente la bisones, car lo ia es sua fonte xef de comeda. Los ia ance xasa antilocapras, servos, pavos, e otra animales savaje. La femes ia colie bacas savaje e otra frutas e prepara los con carne per fabrica pemican. Canes ia es usada per trae travuas e parflexes de pel cru cual ia conteni benes per campa. La caioua ia tende sta en areas per periodos longa.
Cuando los ia adota la cultur de cavalos, pos oteni los de ranxos espaniol sude de la Rio Grande, la caioua ia revolui sua modos de vive. Los ia ave estendes multe plu grande per sua xasas saisonal, e cavalos ia pote porta alga de sua benes de campa. La caioua e la apatxe ia funda un teritorio grande en la planos sude a lado de la Rio Arkansas en Colorado sude-ueste e Kansas ueste, e la drena de la Rio Roja de Texas norde-ueste e Oklahoma ueste.
Istorial, la caioua ia ave un sosia nomada xasante-coliente. Los ia comparte un cosina simil con sua tribus visina, como la numunu (acc comantxi). La fonte de comeda la importante per la caioua e sua visinas sur la planos es la bison. Ante la introdui de cavalos, bison ia es xasada sur pedes e ia nesesa ce la xasor veni tan prosima posible ante spara con flexas o sua lansas longa. A veses, los ia porta la pelos de lupos o coiotes per oscur sua prosimi a la manadas de la bisones.
La forma xef de abitada usada par la caioua ia es la tipi, fabricada de la pelos de bisones formida e coseda con lunlotra en un forma cono. Palos de lenio entre 4 e 8 m de longia es usada per suporta la tipi. La palos ia es colieda de juniperes e pinos. Tipis ave a min un ala de entra, e alas per fumas ia es locada a alta per permete la fumas de la caveta de foco a en. La solo de la tipi ia es foreda con pelos per calda e comforta. La tipi ia es desiniada per es sufisinte calda en la inverno e sufisinte fria en la estate. La tipis ia es fasil colasada e pote es levada en minutos, donce los es un strutur la plu bon per popla nomada como la caioua e otra nasiones de la planos. La palos de la tipi ia es usada per construi un travua en tempos de viaja. Depintas sur pel decora comun la interna e esterna de la tipis, con sinifias spesial liada a alga desinias.
Ante la introdui de la cavalo a America Norde, la caioua e otra popla de la planos ia usa canes domada per porta e trae sua poseses. La tipis e poseses e an enfantes peti, ia es portada sur la travua, un strutur triangulo usante la palos de la tipi, e traeda prima par la canes e plu tarda la cavalos.
La introdui de la cavalos a la sosia caioua ia revolui sua modo de vive. Los ia gania cavalos par ataca la ranxos en Mexico e otra tribus de americanes orijinal ci ia ave ja cavalos, como la dine e la popla de la pueblos. Con la cavalo, los pote transporta cargas plu grande, xasa plu bisones tra un estende plu grande e plu fasil, e viaja plu longa e plu distante. La caioua ia deveni gerores potiosa e capas ci ia condui atacas de distantias longa contra sua enemis. La caioua ia es videda como entre la cavalores la plu bon. La ricia de un om ia es mesurada xef par la grandia de sua manada de cavalos, con individuas multe rica avente manadas de multe sentos de cavalos. Cavalos ia es ance la ojetos de catura en la atacas. La caioua ia vide lo como un onora si on pote fura cavalos de enemis, e tal atacas ia funsiona comun como un rituo de pasa per gerores joven.
Gerores de la caioua ia usa un combina de armas tradisional e nova, incluinte lansas longa, arcos e flexas, axetas, coteles, e bastones de gera, e ance otra armas plu nova, como fusiles, pistoles, e spadas. Scermos ia es fabricada de pelos dur de la bison, estende sur un strutur de lenio, o fabricada de la cranio de un bison, cual resulta en un scermo peti ma forte. Scermos e armas ia es decorada con plumas, pelos, e partes de animales como talones de agilas per intendes ritual.
La caioua ia ave un governa tribal bon struturida, como la plu de tribus de la planos. Los ia ave un congrega anial per la Dansa de Sol, e un xef-de-xefes elejeda ci ia es videda como la xef simbolinte de la nasion intera. Sosias de gerores e sosias relijiosa ia es importante per la sosia e ia ave roles spesifada. Xefes ia es elejeda per sua coraje en batalia, ma ance per sua intelijentia, jenerosia, esperia, capasias de comunica, e compatia a otras.
En la tradisiones de la caioua, moria ia ave asosias forte con spiritos oscur e fortias negativa, cual sinifia ce la mori de un person ia es videda como un esperia traumal. Teme de spiritos en comunias de la caioua ia resulta de la crede ce la spiritos ta resiste la fini de sua vive fisical. La spiritos ia es crededa como resta sirca la loca de entera, e ance infesta la locas e poseses de sua vive pasada. Spiritos persistente ia ance es crededa como coraji e aida la morinte per crusi de la mundo fisical a la vive pos mori.
La femes ia gania onora e prestijia xef tra la atenis de sua sposos, fios, e padres, o tra sua propre atenis en la artes. Femes de la caioua i prepara, cose, pinta desinias jeometrial sur parflexas e cose perletas e spinas de porcospinas per decora peles. La femes ia maneja la campa cuando la omes ia es a via. Los ia colie e prepara comedas per la menses de inverno, e ia partisipa en avenis ritual clavin. Omes de la caioua ia abita con la familias estendeda de sua sposas (matrilocalia), cual tende aida la manteni de bon relatas entre sposes.
Lias esterna
[edita | edita la fonte]- Wikimedia Commons – fotos de stradas e canales