Nozo
Nozos inclui cualce spesie de arbor en la jenera Juglans, la semes de cual es nomida nozas. Tota spesies es caducas, 10 -40 m en altia, con folias plumin. La 21 spesies en la jenera estende tra la norde temperada de la emisfero este de Europa sude-este a Japan, e plu vasta en la emisfero ueste de Canada sude-este a California e sude a Arjentina. Xina produi un dui de tota nozas de la mundo. La du spesies la plu importante comersial es J. regia per lenio e nozas, e J. nigra per lenio. Ambos ave nesesas simil per cultiva en la zonas temperada. Nozos es spesies cual nesesa multe lus e benefia de proteje de la venta. Los es ance dur contra seca.
La frutas de la nozo es un tipo de fruta conoseda como un pseudodrupa: La covre esterna de la fruta es derivada de un spiral de brateas sirca la flor. La interna de la noza de tota spesies es comable, ma la nozas la plu comun vendeda per come es de la J. regia, a sola spesie cual ave un noza grande con un casco magra. En la SUA, J. nigra nozas es ance produida.
La nozas es ance comeda par otra animales, como muses e scurales. En California e en Suiz, corvones ia es oservada prendente noza en sua becos, volante a 20 metres de altia en la aira, e cade los a la solo per craci la cascos per come la noza interna.
La nozo comun e la nozo negra es importante per sua lenio atraosa, cual es dur, densa, con un pelo streta, e pote es briliada multe lisa. La colores varia de un blanca cremin en a lenio de sava a la brun de xocolada oscur en la lenio de cor. Lo es desirada per sua color, duria e pelo per fabrica mobilas e siselis. La nodas de nozos es usada comun per crea boles o otra pesos turnadorida. Xapa taliada de un noda de nozo es un de la plu valuada par fabricores de armarios.