Clovis I

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Clovis, Chlodwig of Chlodowech I (465-511) waas d'n ieëste keuning vanne Franke. Hae waas 'ne zoon van Childeric I, 'ne generaal vanne Salische Franke dae wersjienlik deendje óngere Romeinse legeraanveurder Aegidius enne Wès-Romeinse keizer Marcianus. In 481 völgdje Clovis zie vader op en wirkdje zich op toet keuning vanne Salische Franken in Doornik. Hae kieërdje zich taenge 't Gallo-Romeins Riek en versloog Syagrius in 486 bie Soissons. Aangemeujig door det succes bevóch t'r vanaaf 496 ouch de anger Franke en leet t'r alle in vereuverdje gebiede de ganse mennelike hieërsjerslien oetreuje, veur zoea 'n ónbetwösjdje hieërsjappie te bekómme. In detzelvendje jaor bekieërdje d'r zich oet opportunistische motieve toet 't Christendóm, zoeadet zie brutaal optraeje gedougsteun kreeg vanne Kirk. Ónger 't goodkäörendj oug vanne kirkeleik mach in Roeame, det ernstig woort bedreig dore Visigote, vergruuedje d'r noe ouch zie Frankisch Riek inne zujelike richting.

In 500 versloog t'r de Bourgondiërs en in 507 de Visigotische keuning Alaric II inne Slaag van Vouillé; daomit brach t'r gans Gallië, det vanaaf den Frankriek is gaon heite, ónger zie gezag. Ziene status woort nammieë vergruuetj doordet t'r van keizer Anastasius, dae haopdje óm 'm es bóndjgenoeat te winne inne stried taenge de Ostrogote, 'nen diadeem en 'ne mantjel kreeg gegaove, det 'm ouch inne ouge vanne Gallo-Romeinse óngerdane 'n zeker legitimiteit versjafdje. OEtènjelik vool in 510 ouch 't litste ónaafhenkelik Frankisch keuningshoes, 't Kölsje, in zien henj, naodet t'r door intriges 'nen opstandj wós te waeg te bringe, woring d'n aje keuning door zienen eige zoon woort vermaordj.

Naodet Clovis I stórf woort 't Frankisch Riek, nao 't Salisch rech, verdeildj ónger zien mennelike naokómmelinge: Theuderik I (Austrasië, Reims), Chlodomer (Orléans), Childebert I (Peries) en Chlotarius I (Neustrië, Soissons).

Trivia

De naam Clovis kump oet 't Oergermaans *Hlūdawīgą en is verwantj mitte name Lodewiek, Ludwig en Lwie (Louis).