Kaaimaneilen

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Kaaimaneilen
Gebeedsdeil van	Vereineg Keuninkriek
Basisgegaevens
Officieel taal	Ingels
Hoofsjtad	George Town
Sjtaotsvörm	Brits euverzies territorium
Sjtaotshoof	Elizabeth II
gouvernäör	Helen Kilpatrick
premier	Alden McLaughlin
[[{{{titelhoofregering2}}}]]	{{{naamhoofregering2}}}
Opperflaakde – % water	264 km² 1,6%
Inwoeners – Deechde:	56.092 2015 212,5/km²
Biekómmende gegaeves
Munteinheid	Kaaimaneilen-dollar (KYD)
Tiedzaone	UTC -5
Nationale fiesdaag	ierste maondag in juli
Vouksleed	God save the King, Beloved Isle Cayman
Web | Code | Tel.	.ky | CYM | +1-345

Kaart

De Kaaimaneilen (Ingels: Cayman Islands) zien 'n klein arsjipel in de Caribische Zie die es euverzies gebeedsdeil oonder de Britse kroen vèlt. Ze ligke in 't weste vaan 't Caribisch gebeed, in relatief isolatie, hoonderde kilometers eweg vaan de kortbijste eilen. 't Gebeed is e belastingparadies; daodoor heet 't 'ne bleujende financiële sector opgebouwd en kint 't 'ne hoegere levesstandaard es de aander Caribische len.

Bestuurleke indeiling

De Kaaimaneilen weure verdeild in zes distrikte, die allein administratief weerde höbbe. Vijf daovaan ligke op Grand Cayman.

• George Town
• West Bay
• Bodden Town
• North Side
• East End
• Little Cayman en Cayman Brac

Fysische geografie

De Kaaimaneilen ligke zuielek vaan Cuba en wesnoordwestelek vaan Jamaica; vaan allebei ligke ze hoonderde kilometers eweg. De eilen zien koelek 'n geografische einheid: in 't ooste ligke kort nevenein de eilendsjes Little Cayman en Cayman Brac, mie es hoonderd kilometer westeleker ligk Grand Cayman. De eilen bestoon oet leistein, aongevöld mèt koraol, en steke wieneg bove de zie oet. 'n Oetzundering is The Bluff op Cayman Brac, wat op 43 meter huugde kump.

Levende natuur

Zoogdiere zien op dees eilen (um begriepeleke reies) beperk tot zes soorte vleermuis, die dèks mèt Cuba en/of Jamaica weure gedeild, versjèllende ziezoogdiere en de Midde-Amerikaansen agoeti (Dasyprocta punctata), dee is ingeveurd. De veugel umvatte 230 soorte; boevaan 'rs 131 zeldzaom of daolgas zien, en twie endemisch: d'n Amerikaonse roedstart (Setophaga ruticilla) en 't Cubaons dikbeekske (Melopyrrha nigra). De roedougliester (Turdus ravidus) waor ouch endemisch (op Grand Cayman) en is oetgestorve. Versjèllende aander soorte koume boete de Kaaimaneilen allein veur op Cuba en/of Jamaica. 'n Intrèssant reptiel is de blauwe leguaon (Cyclura lewisi), dee endemisch is op Grand Cayman en kritiek bedreig weurt.

Cultuur en demografie

De euvergroete mierderheid vaan de bevolking, die oongeveer 55.000 lui tèlt, woent op Grand Cayman; de aander twie eilen höbbe mer good 2.000 inwoeners.

Etnische gróppe

De Kaaimaneilen kinne 'n groete diversiteit aon nationaliteite: oongeveer de hèlf vaan de bevolking is geine Kaaimaneilander. Oongeveer 69% vaan de bevolking is creools.

Taol

De officieel taol vaan 't territorium is 't Ingels. De eilanders spreke dao 'ne variant vaan dee door Ethnologue neet es apaarte taol weurt gezeen, meh es Ingels dialek; dit in tegestèlling tot aander creooltaole in de regio.

Religie

De bevolking is in groete mierderheid christelek. Versjèllende genoetsjappe zien vertroje, meh de presbyteraone en kathelieke zien de groetste gróppe.

Historie

Op zien lèste reis, in 1503, deeg Columbus de Kaaimaneilen aon; heer zaog ze tenminste ligke, en neumde ze Islas de las Tortugas, nao de sjèldpadde die heer op 't eiland voont. De eilen hadde gein inheimse bewoening en bleve ouch de koumende iewe gooddeils oonbereurd. Wel dege aander zielui ze nog aon, wie Francis Drake in 1586. Heer herneumde de eilen Cayman Islands. Mesjiens bedoelden 'r de groete blauwe leguaon (zuug bove); kaaimane koume in eder geval op dees eilen neet veur. Pas roond 't midde vaan de zeventienden iew kaome ziech Britte op de eilen vestege, die vaanaof 't ieder vereuverde Jamaica kaome. Bij 't Verdraag vaan Madrid in 1670 naome de Britte dees eilen officieel in. Pas in de jaore 1730 kaome de bewoening en economie vaan de eilen pas good op geng; roond deen tied woorte ouch de ierste slaove nao de eilen gehaold. Tot 1962 maakde de eilen politiek deil oet vaan Jamaica; wie dat eiland 'n oonaofhenkelek Commonwealth realm woort, koppelde me de Kaaimaneilen los en woorte ze 'n otonoom gebeed. Sinds deen tied höbbe de eilen ziech sterk oontwikkeld es belastingsparadies, wat de vesteging vaan boetelandse bedrieve aontrèkkelek maakde. Bedreiging veur 't land en ziene veurspood blieve de orkaone die de eilen um de paar jaor rake.

Bronne

Dit artikel is gebaseerd op, meh neet vertaold oet, 't corresponderend Ingelstaoleg artikel, en wel in dees versie; wijer koume bittekes informatie vaan en:List of birds of the Cayman Islands en en:List of mammals of the Cayman Islands.