Sint Antoniusbank

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Bieëmeles, es te dit dialek sjpriks.

---

Sint Antoniusbank ies 'n buurtsjap van Bemele in de gemeinte Èèsjde-Mergraote in 't heuvelland van Zuud-Limburg. Tot 1827 laog 't in de gemeinte Heer en Keer. De vièrtig hoezer zint gesitueerd langs de waeg Sint Antoniusbank. Dao wone ca. 110 luuj.

't Gehuchske waor tiedens 't liènsjtèlsel 'n eige hièrlikheid, waarsjienlik ónder commandeursjap van Antonius van Mesjtreech. In 1828 kaom 't bie de dan nuuj gemeinte Cadier en Keer. Officieel haet Antoniusbank noats bie Bemele gehuèrd, terwiel 't geografisch en kèrkelik dao waal mèt verbónge waor. Nao de herindeiling van 1982 kaome zoawaal Bemele es Cadier en Keer bie de gemeinte Mergraote. Sint Antoniusbank haet 'n eige plaatsnaambord.

Waterpöthuuske in St. Antoniusbank

Bezeenswaerdig

• Twiè carréboerderieje van 't gesjlote type
• De monumentale haof Sint Antoniusbank op nummer 27 dateert oarsjprónkelik oet de 17e ièw, de hudige boew ies oet de 19e ièw.
• Op nummer 42 bevingk ziech 't veurmalig Europahoes. Vreuger functies waore kloaster en volkshoagesjoal. Noe zint 'r woonappartemente in gevestig.
• Beusdalshaof, geneump nao de eigenaere oet 1750, de familie Colin de Beusdael. Op 'n kaart oet 1658 aangeduud es de Velssenhof.

In de wei aan de weskant sjteit 't restant van 'ne veerkentige tore. Ouch is dao nog 'n pöthuuske te zeen.

Baevaart

De verièring veur de heilige Antonius Abt (Teunis) vingk veural plaats op 17 januari es de baevaartgengersj nao Bemele kómme veur de zegening van 't Teunisbroad en de viering van de winterkèrmes.

Vereiniging

• De Ruterclub Vrie en blie organiseert op 'ne zóndig in augustus 'n oriëntatierit en 'n koetsjeroute.