Feipo o Bello

ZE-P	Sta paggina chie a l'è scrita in zeneize, co' ina grafia tipo quella do Prian do 1745

Detallio da 'na miniatua do 1315

O Feipo IV dito o Bello (Fontainebleau, 1268 - 1314), o fu re de França da-o 1285 scin a-a morte.

Figgio do Feipo III l’Ardio e da Zabella d’Aragon, into 1284 o spozò a Zana regiña de Navara e contessa de Champagne. Asceizo a-o trono do 1285, o Feipo o dovette subbito afrontâ di difiççili e gravi problemi polittichi e econommichi: a guæra contra l’Aragon in arembo a-i Angioin de l'Itallia meridionâ, impegnæ inta guæra do Vespo contra i Siçilien; i contrasti delongo averti co-o re d’Inghiltæra Edoardo I, ch'o l'açetò de rendighe omaggio (1286), ma sença riconosce e confische compie da-o Feipo II à danno di so predecessoî; infin e pezante condiçioin do banço stremao da anni de guære. Mentre l’apoggio a-i Angioin o se realizò essençiamente insci-o cian dipromattico, zonzendo a sotrâ a-i Siçilien l’agiutto militâ e polittico de l'Aragon (Paxe de Tarascoña, 1291, e tratao d'Anagni, 1291), i atriti con l’Inghiltæra curminon ben fito inte 'na guæra, inta quæ o Feipo o l'ebbe commi aliao o Zane de Baliol, re de Scoççia, mentre l'Edoardo I o se zovò de l'agiutto de numioxi fœüdatai françeixi tra-i quæ, importante, o Guiddo de Dampere, conte de Fiandra. A lotta, scciupâ into 1294, a duò con âtèrne vexende scin à quande 'na decixon arbitrâ de pappa Bonifaççio VIII a feççe sospende i ostilitæ (1298) e stipulâ 'na paxe (tratao de Montreuil, 1299). Contra à França, zœumoæ stanca e finançiaiamente stremâ da-a guæra, se ribelavan aoa e Fiandre («mattiñe de Bruges», 1302). A lotta, ch'a vidde a gran vittoia fiaminga de Courtrai (1302), a se protrasse scin a-o 1305, e a se concruze (Paxe de Athis-sur-Orge) co-o riconoscimento françeize de varrie aotonomie a-a fœüdalitæ do paize. E dificortæ econommiche da França fun otr'a ço motivo d'atre ancon ciu grave decixoin polittiche do Feipo, saiv'a dî a lotta co-o Bonifaççio VIII e a soprescion de l'orde di Templæ. O contrasto co-o pappa o l'originò co-a decixon do re de percepî e imposte da-a ceexîa ascì: a questa decixon o Bonifaççio VIII o rispoze co-a bolla Clericis laicos (1296) co-a qua o comminava a scominniga a-i laichi ch'avessan preteizo da-i ceeghi o pagamento d'imposte e a-i ceeghi che l'avessan pagæ. O Feipo (sostegnuo in questo ascì da-o Doardo d’Inghiltæra) o rispoze proibindo a sciortia de l’óo e de l’argento da-o regno. O pappa alloa co' in’atra bolla, l'Ineffabilis amoris dulcedine, o feççe quarche concescion, ch'a l'atenuò momentaniamente i contrasti. Ma questi riesplodettan ciu violenti che mai quande o Feipo o feççe arestâ o legato pontifiççio, Benardo Saisset, vesco de Pamiers (Senlis, 1301); o pappa o rispoze co-a bolla Ausculta fili, convocando un concillio (1301); à so votta o re o radunò in assembrea in gio a lê, pi-a primma votta, i raprezentanti de tutte e classe polittiche françeixi (fœüdalitæ, ceexia e borghexia çittadiña) e o troncò ogni raporto co-o papato. A-a ciu solenne afermaçion pontifiççia da bolla Unam Sanctam (18 novembre 1302) o Feipo o rispoze co-a violença, ordinando de tradue o Bonifaççio a-o conspeto de 'n concillio ch'o-o ponesse sotta acuza e o-o destituisse. De tâ cattua fu incaregao un influente conseggê do re, o Ghigermo de Nogaret, ch'o chinò alloa in Itallia e, con l’agiutto di Colonna, o detègne pe quarche giorno o pappa, preizo prexonê à Anagni («scciaffo d'Anagni», 1303). Morto o Bonifaççio VIII e doppo o breve pontificato do Beneito XI, o Feipo o l'ótegne l’eleçion de 'n pappa à lê favoeive, o Cremente V, che, cedendo a-e so prescioin, o se transfèi à Avignon, o creò numioxi cardenæ françeixi e o consentì a-a soprescion di Templæ vosciua da-o re pe impadronîse de inmense riccheççe de l'orde e into contempo desbaraçâsene in quante so prinçipâ creditô; ma mentre a lotta contra i Templæ a l'ea ancon into pin do so sviluppo o Feipo o moiva.

Continoando e direttive polittiche d'espanscion teritoiâ e d'unificaçion da França tramandæghe da-o Feipo II, o Feipo o seppe vaise de l'œuvia d'asperti conseggê, pe-o ciu valenti giuristi e banchê borgheixi e picceni fœüdatai (comme o mercante fiorentin Musciatto Franzesi e dapœu Enguerrando de Marigny, Peo Flote, Ghigermo de Nogaret), aviandose à transformâ o so Stato inte 'na monarchia acentratrixe e naçionâ, graççie à 'na serrie de riforme burocrattiche e finançiaie (raforçamento da cançelaja, ampliamento de fonçioin di boæi e di senescarchi, riforma da tezoaja do 1314, riorganizzaçion de imposte).

Bibliografia

• (IT) Enciclopedia Treccani.

Atri progetti

Altri progetti

• Wikimedia Commons

• Wikimedia Commons a contêgne di files in sce Feipo o Bello