James Tissot

I James Tissot, solon' anarana an' i Jacques-Joseph Tissot, dia mpanao hosodoko, mpanao sokitra frantsay teraka tamin' ny 15 Ôktôbra 1836 tao Nantes (any Frantsa) ary maty tamin' ny 8 Aogositra 1902 tao Chenecey-Buillon (any Frantsa). Nandany ny ampahany tamin' ny androm-piainany tany Angletera izy, izay nankafizan' ny olona azy amin' ny maha mpanao hosodoko azy tamin' ny vanim-potoana nanapahan' ny mpanjakavavy Victoria.

Taorian' ny fianarany tao amin' ny École des beaux-arts de Paris, dia nampiseho sanganasa somary nentim-paharazana tao amin' ny Salon an' ny taona 1859 izy talohan' ny naha mpanao hosodoko ho an' ny môdelim-behivavy sy ny fiaraha-monina izao tontolo izao tamin' ny faran' ny Empira Frantsay Faharoa. Taorian' ny ady frantsay-alemana tamin' ny taona 1870 sy ny Commune de Paris, dia nifindra tany Lôndra izy tamin' ny taona 1871 ary nahomby tamin' ny maha mpanao hosodoko ny hatsaran-tarehim-behivavy azy sy tamin' ny maha mpanao sariitatra ho an' ny gazety Vanity Fair azy.

Rehefa maty tamin' ny taona 1882 i Kathleen Newton sakaizany, dia niverina tany Paris izy ary nampiseho tamim-pahombiazana ny sarim-behivavy avy amin' ny toe-piainana ara-tsôsialy isan-karazany teo amin' ny tontolo iainan' izy ireo andavanandro.

Nanomboka tamin' ny taona 1888 dia niaina fanambaràna ara-pivavahana izy ary nanomboka teo ka hatramin' ny fiafaran' ny fiainany dia nanokana ny tenany ho amin' ny lohahevitra momba ny Baiboly, namelona ny zavakantony tamin' ny fandinihana nataony nandritra ny diany tany Palestina sy Jerosalema: ireo sanganasa kristiana navoaka tamin' ny teny frantsay sy anglisy ireo dia nahatona azy halaza.