Biomolekul
Biomolekul atau molekul biologis adolah istilah nan digunoan sacaro longga untuak manyabuik molekul di dalam tubuh organisme nan baparan penting dalam satu proses biologis tatantu atau labiah, saparti pambalahan sel, morfogenesis, atau pakambangan.[1] Biomolekul nan mancakup makromolekul gadang (atau polianion) saparti protein, karbohidrat, lipid, jo asam nukleat, sarato molekul ketek saparti metabolit primer, metabolit sekunder, jo produk alami. Nama nan labiah umum untuak kalompok iko adolah materi biologis. Biomolekul marupoan elemen nan penting bagi organisme iduik, nan acok basifek endogen,[2] atau diproduksi di dalam organisme itu sendiri.[3] Tatapi, organisme biasony mambutuahan biomolekul eksogen, misalnyo nutrisi tatantu, untuak batahan iduik. Biologi jo cabang ilmunyo, biokimia jo biologi molekuler, mampalajari biomolekul jo reaksinyo. Sabagian gadang biomolekul marupoan senyawa organik nan hanyo ampek unsur—oksigen, karbon, hidrogen, jo nitrogen—nan manyusun 96% massa tubuh manusia. Tatapi, banyak elemen lain, saparti babagai biometal, ditamuan dalam jumlah nan ketek.
Kasaragaman dari jinih-jinih biomolekul jo lintasan metabolisme marupoan ciri nan indak baubah di antaro kaanekaragaman bantuak kahidupan; jo demikian, biomolekul jo lintasan metabolisme iko disabuik sabagai "universal biokimia"[4] atau "teori kasatuan material makhluk iduik", sabuah konsep pamarsatu dalam biologi, basamo jo teori sel jo teori evolusi.[5]
Sakarida
[suntiang | suntiang sumber]Monosakarida (mono- artinyo ‘ciek’, -sakarida artinyo ‘gulo’) marupoan bantuak karbohidrat nan paliang sadarano barupo ciek gulo. Dalam strukturnyo, monosakarida manganduang gugus aldehida (kalompok iko disabuik aldosa) atau gugus keton (kalompok iko disabuik ketosa).[6] Monosakarida jo tigo atom karbon disabuik triosa, jiko atom karbonnyo ampek disabuik tetrosa, limo disabuik pentosa, anam disabuik heksosa, jo sataruihnyo.[7] Contoh monosakarida adolah glukosa, fruktosa, galaktosa, ribosa, jo deoksiribosa. Katiko dimakan, glukosa jo fruktosa mamiliki tingkek pangosongan lambuang nan babeda, diserap sacaro babeda, nan mamiliki nasib metabolik nan babeda, sahinggo mambukak banyak paluang bagi duo jinih sakarida untuak mampangarauhi asupan makanan sacaro babeda. Sabagian gadang sakarida dijadian bahan baka untuak respirasi seluler. Disakarida tabantuak katiko duo monosakarida mambantuak ikatan glikosidik nan mambuang molekul aia. Satu molekul disakarida dapek juo dipisahan manjadi duo molekul monosakarida malalui hidrolisis. Contoh disakarida yaitu sukrosa, maltosa, jo laktosa.[8]
Lipid
[suntiang | suntiang sumber]Lipid sacaro umum adolah ester dari asam lamak, nan baparan sabagai bahan pambangun dasa membran biologis sarato panyimpanan energi (misalnyo trigliserida). Sabagian gadang lipid tadiri dari bagian kapalo nan basifek polar atau hidrofilik (biasonyo barupo gliserol) nan bagian ikua barupa satu sampai tigo molekul asam lamak nan basifek nonpolar atau hidrofobik. Karano kaduo sifek iko, lipid disabuik sabagai molekul amfifilik. Asam lamak tadiri dari rantai atom karbon indak bacabang nan dihubuangkan dek ikatan tunggal (jinih iko disabuik asam lamak jenuh) atau dek ikatan tunggal jo ganda (jinih iko disabuik asam lamak tak jenuh). Rantai biasonyo tadiri dari 14 sampai 24 kalompok karbon, jo bilangan iko salalu ganok. Untuak lipid nan ado di membran biologis, kapalo hidrofiliknyo barasa dari salah satu dari tigo kalompok: (1) glikolipid, nan kapalonyo manganduang oligosakarida jo 1–15 residu sakarida; (2) fosfolipid, nan kapalonyo manganduang gugus bamuatan positif nan dihubuangan ka ikua dek gugus fosfat nan bamuatan negatif; atau (3) sterol, nan kapalonyo manganduang cincin steroid planar, misalnyo kolesterol. Lipid lain di antaronyo prostaglandin jo leukotrien nan kaduonyo disintesis dari asam arakidonat, salah satu jinih asam lamak.[9]
Rujuakan
[suntiang | suntiang sumber]- ↑ Bunge, M. (1979)."Treatise on Basic Philosophy". Diakses tanggal 13 April 2021.
- ↑ Voon, C. H.; Sam, S. T. (2019). "2.1 Biosensors" (dalam bahaso en). Nanobiosensors for Biomolecular Targeting. Elsevier. ISBN 978-0-12-813900-4.
- ↑ endogeny. (2011) Segen's Medical Dictionary. The Free Dictionary by Farlex. Farlex, Inc. Accessed June 27, 2019.
- ↑ Green, D. E.; Goldberger, R. (1967). Molecular Insights into the Living Process. New York: Academic Press. https://books.google.com/books?hl=&id=xi6FAAAAIAAJ.
- ↑ Gayon, J. (1998). "La philosophie et la biologie". di dalam Mattéi, J. F.. Encyclopédie philosophique universelle. vol. IV, Le Discours philosophique. Presses Universitaires de France. pp. 2152–2171. https://books.google.com/books?hl=&id=CWcKAQAAMAAJ.
- ↑ Slabaugh, Michael R.; Seager, Spencer L. (2007). Organic and Biochemistry for Today (edisi ke-6th). Pacific Grove: Brooks Cole. ISBN 0-495-11280-1.
- ↑ Campbell, Neil A.; Williamson, Brad; Heyden, Robin J. (2006). Biology: Exploring Life. Boston, Massachusetts: Pearson Prentice Hall. ISBN 978-0-13-250882-7. http://www.phschool.com/el_marketing.html.
- ↑ Slabaugh, Michael R.; Seager, Spencer L. (2007). Organic and Biochemistry for Today (edisi ke-6th). Pacific Grove: Brooks Cole. ISBN 0-495-11280-1.
- ↑ Azhar, Minda (2016). "Biomolekul Sel Karbohidrat, Protein, dan Enzim" (PDF). UNP Press. Diakses tanggal 13 April 2021.