Ковоньвалкс
Ковоньвалкс — те ие-иень ковкерькс.
Эрзятне кода лия раськетнеяк шканть явить иес, конасонть ниле пелькст: тундо, кизэ, сёксь, теле. Эрьва ие пельксенть колмо ковонзо, весемезэ иесэ 12-во ковт. Эрьва ковсонть ниле таргот. Кезэрень пингетнестэ иесь ушодовиль аволь якшамковсто, ушодовиль эйзюрковсто — тунда. Эдь раськень ойме марямо чисэ иесь сюлмавозь ломаненть эрямо лувонзо марто. Ломанесь ушодсы эрямопингензэ чачомсто: тундонь шкане ушоды пертьпельксэнть сыргоземазо ды од чачома-касома, те прок ломанень эйкакшпинге; кизесь мазый, весе тевтне эрямо ёнкстнэ лаказь-лакить — те прок од ломанень шка; сёксесь — иенть кенерезь, превиязь шказо, прок ломанесь, коната эрямосонзо чапсь кудо, таштась сюпавчи, кастась ды тонавтсь эйкакшт; телесь прок шержей пря ломань, кона пурны оймсеме.
Ковонь лемест
[витнемс | витнемс лисьмапрянть]Эрзятне свал озныть чилисема ёнов, кудокеншнеяк эрси теезь чилисема ёнов, те тундо одс чачома оймсэ-тевсэ мезеньгяк ушодома. Кулознень калмильть пряст ульнесть пелеве ёнкс ёнов, теленть, оймсеманть ёнов.
Ушодтано эйкашпингестэ — тундонь ковтнэстэ:
Чипаесь чиде-чис эжди яла виевстэ, читне кармить кувалгадомо, телень сундерькстнэ потамо. Чикуншкасто латочиретнестэ ушоды солы ведень кольгема, чопоньбелев сынь кельмить ды теевить эйзюрокс нама кода чарькодиде те ковось лемдяви эйзюрковокс. Те ковстонть ютавтовить покшчить ды кенярьксчить конатат алтазь норовжорчонь-нармунень тедемантень, ды телень якшамотнень панемантень, ды теленть меельцеде арнемантень кирякстневеманзо алашасо.
Вана телесь ушоды потамо, пандо прятнестэ саезь ловось ушоды соламо, паксятне видсттне ушодыть сыргозема. Солы ведесь, пештясынзе лейтнень, латкотнень чадыведте. Нама те ковонть лемдить чадыковокс — те ковстонть панжсынзе эсензэ цецянзо эрьбась, ушоды пувамо варма. Сась шка ютавтомс Эрьба чинть, Вармаавантень Озксонть. Ушосонть кельме модась карми эжеме, ушодыть чувтнесэ пургондовкст. Васенце тундонь балягинетне прок чипайнеть оймелгавтыть ломаненть, сась шка пертьпельксэнтень вельмема, кода эрзянь раськентеньгак чадыковонь 16-це чистенть Модамасторлангсо эриця эрзятне ютавтыть Эрзянь Келень, Эрзянь Оймень, Эрзянь Лувонь вельмевтема Покшчи. Ялатеке вень перть пракшныть кельметь, ды нама эряви Кельме Атянтень сюконямс каванямс куслядо илинзе чаво кельмсэ озиптнень, ды пургондыця чувтотнень, нама сась шка вешнемс седе курокке тундонть. Серьгедемс, тердемс. Васенцеде кудазортне ливтьсызь ракшаст ушов, теледенть мейле, ёвтыть сюкпрят Кардаз-Сярконтень, Авняавантень. Вана вень кельметне прядовить, весе модамасторось пешкеди од касовксто, эряви ливамс покштятнень-сэрдятнень лемест. Сы модамасторонь сыргозема Инечись, паряк кучомс вастоманзо од ломантнень.
Инечись сы васолдо, ды туи мартонозо эрьва кодат мазый тюсонь казнеть, панжсы корьмакай Мастораванть. Сельме икеле касыть ды панжить пургондавкстнэ, эрьва чувтось. куракшось. Тикшесэльгинесь бажи-венсти сырнензе Чипаентень, Масторавась сыргозсь панжовсь те ковонть лемезэ панжиков. Эрзятне ютавтыть Покшчить Инечинть. Атянь-Авань пуре озкстнень, ливтема-совавтома озкстнэнь, видемадо икеле озкстнэнь, кавто таргонь перть молить покшчитне. Ильтясызь ды ёвтыть сюкпрят Инечинтень. Ушодыть сокамо-видеме, ковонть прядовомс малав весе видематне прядовить ды ютавтови видемадо мейле озкс, теить од тол.
Вана нармутне, калтнэ, идем ды кудо ракшатне ушодыть раштамо, сынст токшемс а эряви, оцинямс, калонь кундсемс а эряви эдь кундат чават ды кадат урозокс пиштяка ракша-нармунь левкст, сынь тетя-ававтомо кулыть, теят кода сынест истя эстеть зыян, эдь мейле оцинямс а ки лангс карми. Ды паксясояк семс важодема тевть арась, сась шка топатомс кудонь-аштема тевтнень, ленгень анокстамо, викшнеме-стамо, сурень кодамо, эйкакшнень истямо тевс тонавтомо, эрзянь койтнень марто содавтомо секскак нама те ковонть лемезэ аштемков. Те ковонть прядовома лангсо Чипаесь ушоды Аштеме, ветне тунь нурькалгадыть. Сась шка ютавтомс вейсэнь велень Покшчитнень, Озкстнэнь, васняяк тердемс Кизэнть, Ливамс Сэрдятнень лемест, аштемковонь 21-це чистенть ушодыть покш чить.
Вана Масторавинесь карми каземе ломантненень эрьва кодат казнеть тантейкакт, мастумарть, кстыйть, якстере ды раужо чукшторовонь тансть, Вирьавась пангинесэяк ушоды ломантнень каванямо, мешктне бизмолдозь кандыть пизэзэст медь, шта. Пекшень цецятнестэ а ёвтавияк кодамо таньсть зэхель качады вейке валсо мертяно те ковось тантей ды сась шка васенце меденть саемась, секскак те ковонть лемезэ медьков те ковстонть нама поладови эрзянь Покшчитнень ютавтомась. Те Килей озкс, Перя озкс, бабань каша, ды седе тов.
Вана умартне ушодыть тердеме каванямо ломантнень умарьсэст, Эрзятне ютавтыть Умарь озкс, ковоньгак лемдизь покштянок умарьковокс, умарьковонь прядовомсто ушодыть видеме розь, знярдо те тевест прядови ютавтови лишмень озкс. Ломантне поладыть норовонь, пирень паксянь касовксонь пурнамо, ды путомо сонензэ ванстомо таштамо.
Эдь раськенть эрямозо сюлмавозь ярсамопеленть улема марто. Сёксень васенце ковонть прядовомас ярсамопелень таштамось малав прядовиль, таргавилть якстерькайтне, модамартне, пурькатне, урядави канстесь. Аштемковонь 14-це чистэ ютавтови Нороваванень Озкс. Те ковонть нама кода чарькодиде лемдить таштамковокс.
Ушодыть пиземеть, читне яла нурькиньгадыть, васенце кельметь ушодыть токамо Мастораванок, натой мик ки васенце ловонтькак аламнес ацакшносы модамасторонть. Чувттнэ ды куракштнэ оршнить сырнень оршамопельть, весе сынь мазы ожо-якстере тюссо, секскак, нама, те ковдонть мерить ожоков.
Вана читне допрок нурькалгадыть, пувить кельме вармат, менелганть уить стакат теке кивень пельть, конатнень пачк Чипаенть налтнэнень пек стака вадяшамс Масторавань, чинь-чоп прок свалшкань сундерькс секскак нама те ковонть покштянок лемдизь сундерьковокс.
Састынькине сы телесь, Кельме атянть марто, мода масторонь ацасы ашо палясо ловсо, иляст кельме видевкстнэ ды чувттнэ. Те ковонть эрзятне лемдить ацамковокс. Те ковонть прядовома лангсо маряви весь допрок изнясы чинть, читне пек нурькинеть, 21-це чистэ ушоды чинь Раштамось, эрзятне ушодыть ютавтомо эрьва кодат койть конат лездыть раштыця чинть азорксчинзе виевгавтоманзо, ютавтневить озкс, панить пачалксеть, кирякснить.
Куш чизе велявты кизенть ёнов, якшаматясь седеяк виелгавтсы коронзо, сы сехте кельме-якшамо ковось якшамков. Эрзятне пряст а максыть ютавтыть ламо покшчить ды озкст кельменть панемга Тавунсяй, Калядат, Од иень покшчить, Шаньгат, мунямкат, ноготонь каямкат.
Вана пелеве ёндо варматне кармить полавтомо пувамост эрьва ёнов, кандыловось тейни ловонь кард, китнень валясынзе, сондензэ мерить даволков, мерекшныть таго «кичкере кинь шка», якшамоськак невтни меельце пеензе, ялатеке а куватьс кадовсь тензе азаргалемс, кавто колмо таргонь ютазь чипаесь изнясы. Вана истят лемест эрзякс ковтнэнь, нама сынь седе домкасто невтить иень ковкерьксэнть лемтнень эрзянь раськенть эрямолувонзо ды пертьпельксенть марто сюлмавоманть. Знярдо бути иетнень леместкак ульнесть эсест аволь неень шкань ладсо, мертяно ютазь иестэ чачокшность пек ламо пештеть, лемдилизь ютазь иенть Пеште ие, ды седе тов. Таргось-недлясь, эрзянь кельсэ нама улить таргонь читнень эсест лемест. Седе кезэреньсетне стувтовсть, ансяк вана малав 20 иеть, ладявсь таргонь лемненть эрзякс лемдямо лувось.