Gemeen Neenkerken

Wapen/Flagg

Koort

Basisdaten

Bundsland: Neddersassen

Landkreis: Heidkreis

Flach:

96,68 km²

Inwahners:

5749 (31. Dezember 2022)

69 m över de See

29643

05195

Koordinaten:52° 2′ N, 9° 42′ O52° 2′ N, 9° 42′ O

Grenzen bi OSM:

1809015

Gemeenslötel:

03 3 58 017

Öörd in de Gemeen:

10

Börgermeester:

Carlos Burnkhorst (CDU)

Websteed:

www.gemeinde-neuenkirchen.de

Koort

Kreis

Neenkerken (hoochdüütsch Neuenkirchen) is en Oort un Eenheitsgemeen in’n Landkreis Heidkreis, Neddersassen. Se hett 5749 Inwahners (Stand 31. Dezember 2022) un liggt an’n westlichen Rand vun de Lümborger Heid twüschen Rodenborg (Wümm) un Soltau.

Blangen den Hauptoort Neenkerken höört ok noch en Reeg annere Dörper mit to de Gemeen.

Geologie

En Översicht över de Geologie un Entstahn vun dat Rebeet vun’n helen Landkreis is in den Artikel Landkreis Heidkreis beschreven un kann dor naleest waarn.

An’n Morgen vun’n 20. Oktober 2004 hett dat in de Gemeen en Eerdbeven geven, dat sien Epizentrum in de Neeg vun Neenkerken harr. Dat Beven harr en Richter-Magnitude vun 4,5. Dat is för Noorddüütschland al teemlich dull. Dorna, wat Seismologen över den Heerdvörgang rutfunnen hebbt, leeg dat Epizentrum in en Deep vun 5 km op de so nöömten Scheeßl-Fambossel-Störzoon, de Noordnoordwest–Süüdsüüdoost utricht is.^[1].

Geografie

Neenkerken liggt in’n nöördlichen Deel an’n Westrand vun’n Heidkreis un togliek ok an Westrand vun de Lümborger Heid. Na Noorden un Noordoosten to grenzt dat Rebeet an de Eenheitsgemeen Snevern, wieter na Süüden slutt sik de Eeenheitsgemeen Soltau an. Na Westen hen liggt de Landkreis Rodenborg (Wümm): In’n Süüden mit de Eenheitsgemeen Visselhöövd un in’n Westen mit de Gemeen Hemslingen. In’n Noordwesten grenzt mit en lütten Tippel noch de Eenheitsgemeen Scheeßl an.

De Landschop in de Eenheitsgemeen is prägt vun wiete Wischen, Woolden, Heidrebeden un Moorland. Blangen den Oort Neenkerken, de sik sülvst ok as Snuckendörp betekent^[2], höört noch negen Heiddörper to de Gemeen. Sünners in de Moorrebeden dröpt een ok op vele Beken un Gravensystemen.

Historie

De Eenheitsgemeen Neenkerken is an’n 1. März 1974 in’n Rahmen vun de Rebeetsreform nee grünnt worrn, as de ehmolig sülvststännigen Gemeenen un hüütige Oortsdelen tosamenfaat weern.

Dat Rebeet mutt as teemlich fröh besiedelt worrn wesen, as Funnen ut de Steentiet wiesen doot. Eerste Oorkunnen geev dat aver eerst teemlich laat. Man geiht dorvun ut, dat Delsen (fröher: Delmeshusen) toeerst besiedelt weer un dormols ok de Middelpunkt vun’t latere Kaspel wesen is. Ok de annern Oortsdelen schüllt öller wesen as de hüütige Oort in de Mitt. To dat Kaspel hebbt fröher ok noch de Öörd Hemslingen un Söhlingen tohöört.

In’t Middelöller weer Neenkerken en Freebann, d. h. dat de Gerichtsborkeit nich in de Hannen vun en Bischop oder Hertog legen hett, man vun de Buernschop sülvst bestimmt weer. De Gemeen liggt op dat Rebeet wat histoorsch bit 1859 to dat Hertogdoom Veern rekent weer un dorna to dat Förstendom oder Hartogdom Bronswiek-Lümborg höörn de. De meisten Buernhöff weern free un somit nich höörig oder Liefegene vun’n Adel.^[3]

To’t Grünnen vun den Oort Neenkerken gifft dat en Legenn, de sik ok in’t Wapen vun de Eenheitsgemeen wedderfinnt: Dorna schüll en ne’e Kark in Delsen boet warrn. Man sowiet keem dat nich, vunwegen dat de kark noch wiel den Bo dreemol daalbrennt is. De Lüüd hebbt nu dacht, dat de Düvel in disse Steed tohuus weer, man op en annere Steed in Delsen künn man sik nich eenig warrn. De Karkenklock is denn op en Wagen laadt un en Peerd dorför spannt worrn. Vunwegen dat dat Peerd ahn Teel dör de Gegend lopen schüll, hett man em de Ogen vebrunnen. Dat is denn loslopen un bleev nipp un nau an’n Hahnenbeek stahn. Dor künn man nu slecht de Kark henboen, un so hebbt de Lüüd dat Peerd nochmol andreven, bit dat op en feine gröne Wisch stahnbleven is. Dor is denn de Kark ahn wietere Lasten boet worrn un steiht ok vundaag noch dor. Un dorvun kummt ok de Naam Neenkerken.

Politik un Verwalten

Oortsdelen

Blangen Neenkerken sülvst höört wietere negen Dörper to de Eenheitsgemeen:

Behningen
Brochdörp (mit Hartböhn un Rutenmöhl)
Delsen
Jilbern (mit Levern un Limbeek)
Grauen (mit Nersum)
Jillhorn (mit Kempen)
Neenkerken (mit Hertel un Holtmannshoff)
Sprengel (mit Liest, Königshoff un Vahlzen)
Schworgen
Täwel (mit Jerusalem, de Kreugerei, Platenkamp un Siek)

Gemeenraat

De Gemeenraat besteiht blangen den Börgermeester ut sössteihn wählte Liddmaten, de sik as folgt opdeelt:

Partei	2011	2006
CDU	10	10
SPD	3	3
FDP	2	2
parteilos	1	1

Börgermeesters

Tied	Naam	Partei
1. März 1974–	Heinz Söhnholz	CDU
1. Juli 2004–10. Dezember 2009	Dieter Leinecker	CDU
20. Mai 2010–	Carlos Brunkhorst	CDU

Gemeendirekters

Tied	Naam
1. März 1974–30. Juni 2004	Jürgen Rymarczyk

Weertschop un Infrastruktur

De Hauptoord Neenkerken gellt na dat Regionale Ruumordnungsprogramm as Grundzentrum för de Öörd in de Ümgegend.

Neenkerken hett von dat Land Neddersassen dat Prädikat Erholungsort kregen.^[4]

Verkehr

Dör de Gemeen Neenkerken is fröher de Bahnlien Soltau–Neenkerken verlopen, de vun de Oosthannobersche Iesenbahnen GmbH bedreven worrn is. Intwüschen is de Bahnstreck aver afboet worrn.

De bedüdenste Straat, de dör dat Rebeet vun de Eenheitsgemeen verlöpt, is de B 71, de de Städer Soltau un Rodenborg (Wümm) verbinnen deit. Achter Soltau gifft se Ansluss an de BAB 7, un en Stück achter Rodenborg kummt een na de BAB 1. Midden dör de Gemeen verlöpt ok de L 171, de in’n Noorden vun Snevern kummt un över Neenkarken wieter na Visselhöövd föhrt. De L 171 föhrt wieter bit na Veern, woneem ok Ansluss an de BAB 27 besteiht. In’n Noorden geiht denn ok noch de L 170 en lütt Stück dör de Eenheitsgemeen, de vun Snevern över den Oortsdeel Grauen na Hemslingen verlöpt, woneem se in de B 71 münnt.

Borns

Weblenken

Neenkerken. Mehr Biller, Videos oder Audiodateien to’t Thema gifft dat bi Wikimedia Commons.

Städer un Gemenen in den Landkreis Heidkreis

[1] Informatschoonssiet to dat Eerdbeven vun de BGR

[2] Tourismus-Siet op de Gemeenwebsteed

[3] Historie vun de Gemeenwebsteed

[4] Staatlich anerkannte Kur- und Erholungsorte in Niedersachsen

[1]

[2]

[3]

[4]