See von Ochotsk

Laag von de See in Oostasien

Koort von de Deepd von de See von Ochotsk

De See von Ochotsk is en Blangensee von’n Pazifik. De See warrt afgrenzt von de Halvinsel Kamschatka in’n Oosten, den fasten Wall von Sibirien in’n Noorden, Sachalin in’n Westen un de Inselkeed von de Kurilen in’n Süden. Över den Tatarensund un de Straat La Pérouse is de See mit de Japaansche See verbunnen. Alltohoop hett de See en Grött von bi 1,53 Milljonen km², is an de deepste Steed 3372 m un in’n Dörsnidd 971 m deep.

Dör de Laag in’n hogen Noorden freert en goden Deel von de See in’n Winter to oder hett Drievies.

Rebeed

De Internationale Hydrograafsche Organisation leggt de Grenzen von de See von Ochotsk so fast:

In’n Süüdwesten. De noordoosten un noorden Grenzen to de Japaansche See [In de Straat La Perouse. En Lien von Sôni Misaki un Nishi Notoro Misaki (45°55′ N). Von Kap Tuik (51°45′ N) na Kap Sushcheva].

In’n Süüdoosten. En Lien von Nosyappu Saki (43°23′ N) op dat Eiland Hokkaidō dör de Kurilen na Kap Lopatka (Süüdspitz von Kamschatka) so dat all de engsten Waterweeg twüschen Hokkaidō un Kamschatka Deel von de See von Ochotsk sünd.

Eilannen

Dat Iony-Eiland is dat eenzigste Eiland, dat nich an de Küst liggt, man in de apen See. Dat is en lütt unbewahnt Eiland op dat en Kolonie von Steller-Seelöwen leevt. De gröttsten Eilannen sünd de Schantar-Eilannen.

Geschicht

För Europa opdeckt hebbt de See de Russen Iwan Moskwitin un Wassili Pojarkow in de Johren 1640. Maarten Gerritszoon de Vries hett 1643 de See von Süden her utkunnt. 1643 weer dat ok, dat de Kossack Semjon Schelkownikow an’t Enn von de Sibiersche Stroomruut an de Küst den Oort Ochotsk grünnen deed, wat för en Tied de wichtigste Haven in’n russ’schen Feernen Oosten weer. Na den Oort hett de See von Ochotsk den ehren Naam kregen.

Wichtige Havens

• Abashiri, Hokkaidō, Japan
• Magadan, Oblast Magadan, Russland
• Monbetsu, Hokkaidō, Japan
• Palana, Kamschatka, Russland
• Wakkanai, Hokkaidō, Japan
• Korsakow, Oblast Sachalin, Russland