Franz Keller

Franz Keller
Statsborgarskap	Tyskland
Fødd	19. januar 1945 (79 år) Nesselwang
Yrke	skihoppar, kombinertløpar
Språk	tysk

Franz Keller (fødd 19. januar 1945) er ein tysk, tidlegare kombinertløpar og skihoppar frå Nesselwang. Han var medlem av SK Nesselwang og deltok internasjonalt for Vest-Tyskland. Keller vart olympisk meister i kombinert i Grenoble i 1968. Under VM i Oslo to år tidlegare vann han sølvmedaljen bakom landsmannen Georg Thoma. Keller vart vesttysk meister i kombinert i 1967 og 1970-1973, samt spesielt hopp i 1966.

Aktiv

Keller vart i 1965 nummer tolv både i hopprennet i Bischofshofen og i kombinertrennet i Lahti. Året etter vann han kombinertsølvet i ski-VM i Oslo, like bak landsmannen Georg Thoma, og vart elles nummer 11 i normalbakken og 17 i storbakken i spesielt hopp. Han imponerte som skihoppar i den tysk-austerrikske hoppveka 1966/67, der han i Innsbruck einast vart slått av Bjørn Wirkola. Samanlagt fekk Keller ein sjetteplass. I mars 1967 vann han kombinertrennet i Holmenkollen.

Keller nådde høgdepunktet i si tid som aktiv då han vann OL-gull i kombinert i Grenoble i 1968, vel eitt poeng føre sveitsaren Alois Kälin. I Holmenkollen måtte han same året nøye seg med ein fjerdeplass i kombinertøvinga. Året etter var Keller tilbake på sigerspallen i Holmenkollen, der han vart nummer to, langt bakom den nye flinke kombinertrennaren frå Finland, Rauno Miettinen. Keller vart nummer elleve i kombinert i verdsmeisterskapen på ski i 1970, året etter kom han på fjerdeplass i kombinerttevlinga i Holmenkollen.

I OL i Sapporo i 1972 vart Keller berre nummer 33 i kombinert. Han kom i 1973 på tredjeplassen i Holmenkollen, slått av den suverene vinnaren Rauno Miettinen og nordmannen Stein Gullikstad.

Keller vart tildelt Holmenkollmedaljen i 1973.

Kjelder

• Sportsboken, aktuelle årgangar
• Sports Reference: Franz Keller Arkivert 2011-01-21 ved Wayback Machine.
• FIS: Resultat Arkivert 2007-09-29 ved Wayback Machine.