Gregòri III
.jpg)
Gregòri III (mòrt lo 28 de novembre de 741) foguèt lo 90en papa de la Glèisa Catolica Romana dau 11 de febrier de 731 au 28 de novembre de 741. Succediguèt a Gregòri II (715-731) e foguèt remplaçat per Zacàrias (741-752).
Son pontificat foguèt marcat per la perseguida deis esfòrç d'evangelizacion de Germania ambé la creacion d'un arquediocèsi e d'unei diocèsis. Pasmens, son afaire pus important foguèt sa condamnacion e sa lucha còntra l'iconoclasme defendut per l'emperaire bizantin Leon III. Aquò entraïnèt una desgradacion importanta dei relacions entre Roma e Constantinòble. Unei representents dau papa foguèron arrestats e estremats en Constantinòble. L'emperaire assaièt tanben de demenir lo poder papau e mandèt una flòta en Itàlia atacar lei domenis pontificaus en Sicília e en Calàbria. Per s'aparar còntra aquela menaça, Gregòri III demandèt l'ajuda e la proteccion dei Francs de Carles Martèl. Aquò foguèt a l'origina de l'aliança entre lei papas e lei Carolingians.