Vila Vèrnia

	Vos an lenga piemontèisa
	Për amprende a dovré 'l sistema dle parlà locaj ch'a varda sì.

Vila Vèrnia Stat: Italia Region: Piemont Provincia: Provincia ëd Lissandria Nòm 'n italian: Villalvernia Coordinà: Latitudin: 44° 49′ 00.3′′ N Longitudin: 8° 51′ 25.3′′ E Autëssa: 193 m s.l.m. Surfassa: 4,47 km² Abitant: 940 (2017) Comun dj'anviron: Carzòu, Cassan, Posseu, Torton-a CAP: 15050 Prefiss tel.: 0131 Còdes ÌSTAT: 006183 Còdes fiscal: L963  Sant protetor: Madòna dël Rosari  Festa dël borgh: 7 d'otóber  Sit istitussional Vila Vèrnia (Villalvernia an italian) a l'é un comun dël Piemont ëd 940 abitant , ant la provinsa ëd Lissandria. As treuva an sle colin-e an sla drita dla Scrivia, ant la region dij Còj Tortonèis ch'a fan part dël pre-Apenin lìgur-piemontèis. Stòria La cesa parochial ëd l'Assunta A l'é probàbil ch'ël pais ëd Vila a l'abia orìgin roman-e e che sò nòm a sia dovù a l'esistensa 'd na vila patrissia an sla strà che da Génoa a mnava a Derthona an passand d'aranda a le colin-e. Ant l'Età 'd Mès, Vila a l'era sota la giurisdission dël vësco 'd Torton-a, contut ch'a fasèissa nen part an forma istitussionalisà dle tere feodaj dl'ansidit Vëscovà. Vàire famije a tnisìo 'l pais an feod sota forma 'd consòrsi: ij Dla Tor, ij Bussé, ij Feracan. Intrà ansema a tut ël Tortonèis sota al contròl dël Ducà 'd Milan, dël 1413 Flip Maria Viscont a conced Vila an feod a Guillaume de la Tour d'Auvergne. La famija Alvernia a l'avrà 'l contròl ëd Vila për 167 agn e a lasserà sò nom al pais, che për sòn a l'é ciamà Vila Vèrnia. Dël 1580 Vila a passa an feod a jë Spìnola përché Antònia Alvernia, ùltima dissendent ëd la famija, a l'avìa marià Gioann Fransesch Spìnola. Dël 1653, giumai sota la dominassion djë spagneuj, ël re Flip IV dë Spagna a eleva 'l feod a Marchisà. Con l'estinsion ëd la branca djë Spìnola 'd Vila, ël feod a ven assignà al Maistr ëd Camp Pier Lois Passalacqua. Dël 1735, ël Tortonèis a passa sota 'l contròl dij Savòja: Carl Emanuel III a conferma 'l tìtol ëd marchèis ai Passalacqua. D'apress a l'época dla dominassion fransèisa ëd Napoleon Bon-a-part, Vila Vèrnia a torna al Regn ëd Sardëgna, ant la Divison (peui Provinsa) ëd Lissandria, ant la Provinsa (peui Sircondari) ëd Torton-a e a cap d'ën Mandament ch'a comprendìa 'dcò Carzòu, Cassan, Castlanìa, Còsta, Gavassàuna, Paderna, Sant'Àgata, Sandijan e Spinegh. L'ùltim dij Passalacqua a sarà Giuseppe Passalacqua, general ëd l'esèrcit dël Regn ëd Sardëgna, ch'a meur dël 1849 ant la bataja 'd Noara ant la Prima Guera d'Indipendensa. Ant la Sconda Guèra Mondial, dël 1m dë dzèmber 1944 Vila Vèrnia a l'é bombardà da l'aviassion american-a përché a ospitava j'ufissi feroviari ch'a j'ero stàit trasferì da Génoa: 114 civil a meuiro e 235 a resto ferì. Vila Vèrnia a l'ha arseivù për sòn la Midaja al Mérit Civil. Aministrassion Ël sìndich a l'é Franc Persi (dal 25/06/2014). Anliure esterne Sit istitussional Arferiment Na contrà dël pais

Aiuto per la lettura Ayuda para la lectura Help for Reading Rintré ant la Piòla Contaté j'Aministrator Lìber për Amprende Coression ortogràfica Tastadura piemontèisa Portaj e Proget Agiut pr'ij Contributor Travajòt sempi