Егейске море

Егейске море
Выгляд з Козмосу
Полога
Континент	Европа, Азия
Координаты	39°N 25°E
Розмѣры
Розлога	191 000 км2
Глубина мкс	3544 м
Соленость	37–39‰
Тип объекта	море
Егейске море на Викискладѣ

Еге́йске мо́ре, грец. Αιγαίο πέλαγος, тур. Ege Denizi — полузакрыте море з множеством островох (около 2000) в восточной части Середоземного моря, меджи Балканскым полуостровом, полуостровом Мала Азия и островом Крета.

География

Егейске море на сѣверѣ через Дарданелы звязане з Мраморным морьом, на югу через многы проливы меджи островами — зоз Середоземным морьом. В Егейском морю переважають сѣверны вѣтры. Дно складене з вапняка и вулканичных горнин. Найвекша глубина Егейского моря была найдена на восток од Креты, 3544 м. Иншак в морю переважають глубины од 200 до 1000 м, котры ся поступно звекшують ку югу.

История

Множество островох в старовѣку улегшило плавбу, коли еще шифы и навигация были лем в зародку. Тото была причина, же регион звязав три континенты и став ся колысков людской цивилизации. Самы островы были в геологичной минулости вершинами обширного горского пасма, котре пак занурило ся под воду.

Газдовство

Рыбарство: сардина, макрела и др. Главны приставы: Пиреус, Салоникы (Греция), Измир (Турция). Розвиты купелництво и туристика, але екология огрожена.

Интересны факты

В середновѣку Егейске море тыж называли Архипелагом од дгр. Ἀρχιπέλαγος 'главне море' (ἄρχι- — главный, πέλαγος — море).

Жерела и одказы

• Трёшников А.Ф. Географический энциклопедический словарь: Географические названия. /Гл. ред. А. Ф. Трёшников. — 2-е изд., доп. — М.: Сов. энциклопедия, 1989.— 592 с. ISBN 5-85270-057-6 русс. С. 560.
• Эгейское море //Большая российская энциклопедия. Том 35. Москва, 2017, сс. 214–215. русс. [1]
• Aegean Sea (по англицкы). Encyclopaedia Britannica. https://www.britannica.com/place/Aegean-Sea. [перевірено 2020-03-04].