EDGE

Enhanced Data rates for GSM Evolution (EDGE) atawa Enhanced GPRS (EGPRS), mangrupa salah sahiji téknologi telepon sélulér digital anu ngamungkinkeun laju pangiriman data anu leuwih gancang kalayan tingkat kapercayaan (réliabilitas) pangiriman data anu leuwih bisa diandelkeun. Sanajan sacara téknis mangrupa 3G, EDGE umumna sacara teu resmi digolongkeun salaku standar 2.75G, lantaran laju datana anu leuwih laun. EDGE geus mitembeyen dipaké dina jaringan GSM di sakuliah dunya mimiti taun 2003, awalna di Amérika Kalér.

EDGE bisa dipaké pikeun panerapan (aplikasi) packet switched saperti sambungan Internét. Aplikasi data dina laju nu gancang saperti layanan vidéo jeung multimédia lianna bisa boga kapasitas data anu leuwih gedé ku jasana EGPRS. EDGE Circuit Switched mangrupa hiji objék anu bisa dimekarkeun dina waktu ka hareup.

Évolusi EDGE terus lumangsung nepi ka ngahasilkeun standar 3GPP Release 7 anu ngahasilkeun unjuk gawé anu dua kali leuwih alus.

Téknologi

EDGE/EGPRS bisa jalan dina jaringan naon waé anu geus dipasangan GPRS asal operator ngaronjatkeun kamampuh jaringanana saperluna.

Sanajan EDGE henteu merlukeun robahna hardware jeung software dina jaringan inti GSM, base stationna kudu dirobah. Dina base station kudu dipasangan unit transceiver anu luyu (kompatibel) jeung EDGE sarta base station subsystem (BSS) perlu ditingkatkeun kamampuhna supaya bisa narima EDGE. Hardware jeung software terminal ogé kudu nimukeun kodeu jeung ngodeukuen (decode/encode) pola modulasi jeung pangkodeuan (modulation and coding schemes) anyar sarta bisa mawa data kalayan laju anu leuwih gancang.

Téknik transmisi

sajaba maké cara modulasi Gaussian minimum-shift keying (GMSK), EDGE ogé ngagunakeun higher-order PSK/8 phase shift keying (8PSK) pikeun lima nu di luhur tina salapan pola modulasi jeung pangkodeuanana. EDGE ngahasilkeun kecap 3-bit pikeun tiap parobahan dina fase gelombang pamawana. Hal ieu sacara éféktif ningkatkeun laju data tilu kali leuwih gancang manan anu ditawarkeun ku GSM. EDGE, saperti GPRS, maké algoritma adaptasi laju anu ngaluyukeun pola modulasi jeung pangkodeuan (modulation and coding scheme - MCS) nurutkeun kualitas channel radiona, sarta ogé laju bit jeung katahanan transmisi data tina gangguan. EDGE maké téknologi anyar anu teu kapanggih dina GPRS, nyaéta Incremental Redundancy, anu henteu ngirimkeun deui pakét anu kaganggu tapi ngirim leuwih loba informasi anu bakal dicampurkeun dina receiver (alat panarima sinyal). Hal ieu ngaronjatkeun probabilitas decoding (nimukeun deui kode asal) anu bener.

EDGE bisa mawa data kalayan laju nepi ka 236.8 kbit/det pikeun 4 timeslot (sacara téori maksimum 473.6 kbit/det pikeun 8 timeslot) dina mode pakét antukna baris nyumponan sarat International Telecommunications Union (ITU pikeun jaringan 3G, sarta geus ditarima ku ITU salaku bagian tina kulawarga standar IMT-2000. EDGE nambahkeun mode data sirkuit anu katelah HSCSD, anu bisa ningkatkeun laju data.

Pola modulasi jeung pangkodeuan (Modulation and Coding Scheme - MSC) EGPRS

Coding and modulation  scheme (MCS)	Laju  (kbit/det/slot)	Modulasi
MCS-1	8.80	GMSK
MCS-2	11.2	GMSK
MCS-3	14.8	GMSK
MCS-4	17.6	GMSK
MCS-5	22.4	8-PSK
MCS-6	29.6	8-PSK
MCS-7	44.8	8-PSK
MCS-8	54.4	8-PSK
MCS-9	59.2	8-PSK

Klasifikasi

EDGE bisa digolongkeun kana 2G atawa 3G gumantung kana panerapanana. Sanajan alat-alat EDGE kelas 3 jeung nu sahandapeunana jelas lain 3G, tapi alat-alat kelas 4 jeung saluhureunana jalan dina rubakpita anu leuwih panjang manan téknologi lianna anu sacara konvénsional dianggap 2G saperti 1xRTT). Lantaran loba macemna, EDGE ilaharna digolongkeun kana téknologi jaringan 2.75G.

Évolusi EDGE

Évolusi EDGE hasil ngahadéan téknologina. Latency bisa dikurangan ku cara nurunkeun selang waktu transmisi nepi ka satengahna (ti 20 mdet jadi 10 mdet). Laju bit bisa ditingkatkeun nepi ka laju puncak 1 MBit/s sarta letency turun jadi 100 mdet ku cara ngagunakeun dua gelombang pamawa, laju simbol nu leuwih gancang sarta modulasi orde nu leuwih luhur (32QAM jeung 16QAM lain 8-PSK), sarta turbo code pikeun ngahadéan error correction. Kualitas sinyal ogé dihadéan ku cara ngagunakeun dua anteneu.

Jaringan

EDGE dirojong ku para operator GSM di Amérika Kalér. Sabagian operator GSM di patempatan lianna nganggap UMTS salaku puncakna kamajuan sarta milih jalan henteu maké EDGE samasakali atawa maké EDGE ngan di luar wilayah anu kawengku ku UMTS. Sanajan kitu, mahal jeung kendorna pamasangan UMTS geus ngakibatkeun réa nu meuli EDGE di pasar GSM/GPRS.

Tempo ogé

• UMTS
• WiFi

Tumbu luar

• GSM World: EDGE Platform
• 3g-generation.com: GPRS and EDGE Archived 2005-04-04 di Wayback Machine
• Ericsson.com: EDGE Description (PDF file - White Paper explains EGPRS) Archived 2005-03-16 di Wayback Machine
• Moldcell: brief comparison of EDGE vs GPRS and other benefits. Archived 2007-09-27 di Wayback Machine
• 3GPP Vocabulary
• Teledict:EDGE