ابو بکر مروذی

ابو بکر مروذی
معلومات شخصیت
وفات	16 ستمبر 888ء   بغداد
وجہ وفات	طبعی موت
شہریت	دولت عباسیہ
مذہب	اسلام
فرقہ	اہل سنت
عملی زندگی
ابن حجر کی رائے	ثقہ
ذہبی کی رائے	ثقہ
استاد	احمد بن حنبل
نمایاں شاگرد	خلال ،  بربہاری
پیشہ	فقیہ ،  محدث
شعبۂ عمل	فقہ ،  علم حدیث

ابو بکر مروذی (متوفی 275ھ/888ء) مشہور محدث، فقیہ، امام اور شیخ الاسلام ہیں، امام احمد بن حنبل کے شاگرد ہیں، ان کے والد خوارزمی اور والدہ مروذیہ (مرو الروذ سے) تھیں، سنت کے امام اور سخت پابند تھے، بغداد میں ان کی الگ شان تھی۔

ولادت

ابو بکر مروذی دوسری صدی ہجری کے آس پاس پیدا ہوئے، امام احمد بن حنبل کی شاگردی اختیار کی اور انھیں کی صحبت میں رہے، ان کے اجل تلامذہ میں شمار ہوتے تھے۔ اور دیگر محدثین و فقہا ائمہ سے بھی استفادہ کیا۔

اساتذہ

• ہارون بن معروف
• محمد بن منہال ضریر
• عبید اللہ بن عمر قواریری
• سریج بن یونس
• محمد بن عبد اللہ بن نمیر
• عثمان بن ابی شیبہ
• عباس بن عبد العظیم
• محمد بن عبد العزیز بن ابو رزمہ

تلامذہ

• ابو بکر خلال
• محمد بن عیسی بن ولید
• محمد بن مخلد عطار
• عبد اللہ خرقی، ابو قاسم کے والد
• ابو حامد احمد بن عبد اللہ حذاء

سیرت

امام احمد بن حنبل کے اجل تلامذہ میں شمار ہوتا ہے، ان سے خوب استفادۂ علم کیا اور امام صاحب کی وفات تک ان کے ساتھ رہے، بہت سی روایات ان سے مروی ہیں، حدیث، سنت اور فقہ میں ان کی بہت سی تصنیفات ہیں، انھوں نے ہی امام احمد بن حنبل کی تجہیز و تکفین کی تھی۔

خطیب کہتے ہیں: «وہ (ابو بکر مروذی) اپنے تقویٰ اور ورع کی وجہ سے امام احمد کے تمام شاگردوں میں فائق تھے، امام صاحب ان سے بہت انسیت اور محبت رکھتے تھے، انھوں نے ہی امام صاحب کی وفات پر ان کی تجہیز و تکفین کی تھی، امام احمد کے بہت سے مسائل ان سے مروی ہیں»۔

جن محدثین شیوخ سے روایات بیان کی

علی بن جعد، ابو نصر تمار، ابراہیم بن حجاج سامی، یحییٰ بن معین، کامل بن طلحہ، سوید بن سعید، منصور بن ابو مزاحم اور عبید اللہ قواریری جیسے طبقات محدثین سے روایات لی ہے۔

جن محدثین نے ان سے روایات لی

امام نسائی، ابو عوانہ، ابن جوصا، ابو علی بن معروف، ابو قاسم طبرانی، ابو احمد بن ناصح، احمد بن عبید حمصی اور ابو عبد اللہ بن مروان جیسے کبار محدثین نے ان سے روایات لی ہیں۔

علما کی آرا

ابو علی بن معروف کہتے ہیں: «ابو بکر احمد بن علی قرشی سے ہم سے بیان کیا کہ (ابو بکر مروذی) دمشق اور حمص کے قاضی تھے اور وہ بنو امیہ بن عبد شمس سے تھے»۔

ذہبی کہتے ہیں: «دمشق میں وہاں کے قاضی ابو زرعہ محمد بن عثمان کی نیابت کی»۔

خطیب لکھتے ہیں: «مجھے معلوم ہوا کہ وہ "بغداد" کے رہنے والے ہیں اور ان کی اصل "مرو" سے ہے»۔

نسائی فرماتے ہیں: «ثقہ ہیں»۔

وفات

6 جمادی الاولی سنہ 275 ہجری میں وفات پائی اور امام احمد بن حنبل کے بغل میں مدفون ہوئے۔