Malatia

Sto putelo el presenta la tìpica erusion maculare, segno e sìntomo recognossìbile a partire da 3-5 dì dal'inissio de la malatia ciamada fersa (o stràgolo). Se trata de na malatia infetiva tolta respirando el morbillivirus, el nome del qualo xe dovuo al fato che ne la mazoransa dei casi sto malano el passa dopo na stemana e qualche dì, da sola e sensa conseguense; inte na menoransa de casi, invesse, poe capitare conpleganse che, anca se rare, no le xe prevedìbili e fassilmente mortali, come polmonite e encefalite, st'ultima anca a distansa de tanti ani (panencefalite subacuta sclerosante). Par sto motivo, in prevension de la fersa, xe consejada (o obligada a seconda de le lege dei vari stati) par tuti i puteli la vacinassion conbinada contro fersa, rosolia e parotite.

Quela de malatia, anca dita malan o malano, xe n'idea più sénpleze da capire che da descrìvare a parole. Studiada da la siensa mèdega ciamada patologia, la poe èssare pensada come na deviansa da quelo che xe considarà come salute in tèrmeni de anatomia e fisiologia, o sia n'alterasion de la strutura e/o de la funsion de n'organismo. Sta roba la poe capitare al stesso tenpo ai vari liveli studiai in patologia: molecolare, selulare, tessudale, orgànico e sistèmico. A fianco de la definision patològica, bisogna tore in considarasion come basilare l'aspeto de la clìnica de la malatia, che la revarda el desturbo che la causa al passiente che el vien colpio da ela. La sofarensa causada da na malatia la poe èssare atuale, o oncora potensiale, co recadude de disabilità e mortalità.

Conpagna a la definision de malatia va da difarensiasion de ela da altri conceti vissini.

• I primi xe queli de trauma (fìsico come psìchico) e infortunio, che, par intùito e anca par definision legale, i calca su la natura violenta del'inissio e su la causa esterna de la lesion: va dito che i poe anca fenire in malatia, che par contrario la poe gavere un inissio manco evidente e cause più interne che esterne al corpo.
• Malatia, in zonta, no'l xe un sinònimo de condision mèdega, parché el dotor se intaressa de fisiologia oncora prima de patologia. N'esenpio ciaro xe rapresentà da la graviansa.
• A volte sìndrome e malatia i vien squasi doparai come sinònimi, anca se el primo xe un conceto "manco conpleto". Infati el se referisse a na concordansa de sìntomi e signi clìnissi (e anca altre caraterìsteghe come signi de laboratorio, de imàzene, ecc.) che i se ripete in più passienti: se st'insieme se cata in associasion a na sola possìbile causa o mecanismo se poe parlare de la sìndrome come de na malatia (par esenpio, la sìndrome de Down, che la se cata solo co l'alterasion cromosòmica dita trisomia 21), in caso contrario no se poe parché a la sìndrome se associa più malatie (par esenpio, la sìndrome coronàrica acuta la se presenta par infarto miocàrdico acuto ma anca par n'altro malano che el xe l'angina instàbile).

Par struco, la definision e'l studio de na malatia (nosografia) le toe in considarassion:

1. Nosologia: come che se poe classifegare in maniera rassionale el quadro de malatia.
2. Epidemiologia: el studio co stumenti statìsteghi de la distribusion de la malatia inte una o più popołasion. Vien tulti in anàlisi anca aspeti stòreghi e geogràfeghi, in relasion a studi descritivi (quanto na malatia xe frequente, disabilitante, mortale, ecc.) e anca analìteghi, che i prova a métare in relasion na malatia coi sui faturi de ris-cio e protession.
3. Eziologia: studio de le cause de le malatie. Ste qua le poe èssare sénplezi (o a càusa sìngola, come molte malatie genètiche) o conplesse (o co tante cause). St'ultimo caso el rapresenta la majoransa de le malatie, soratuto quele più frequenti: anca le infession de frecuente no le poe èssare considarae malatie sénplezi parché poe no bastare la presensa del microrganismo par dare la malatia. Donca se mete in relasion la malatia, cussì dita multifatoriale, co faturi de ris-cio e protesion individuai col'epidemiologia. Cognóssare l'eziologia parmete de studiare strategie de prevension.
4. Patogènesi: studio dei mecanismi de malatia, ùtile pa l'individuasion de la terapia più bona.
5. Aspeti de anatomia patològica e fisiopatologia, o sia che tipo de alterasion struturali/funsionali se xe vegnue a creare.
6. Clìnica: o sia le manifestassion (sìntomi sojetivi dei quali el passiente se lagna, segni/signi ojetivi osservai dal dotor) e le conpleganse de la malatia. In base ai tenpi de sviluppo de sti aspeti le malatie le se destingue in acute (brevi, le se poe resòlvare anca da sole) e cròniche (longhe, in gènere le progredisse sensa possibilità de recùparo).
7. Prevension: strategie de controlo de la malatia prima che la se svilupa (primaria), de contrasto al'inissio de la so storia naturale (secondaria), o oncora de contrasto a le so conpleganse (tersiaria). de frecuente la vien fata in òtica de popołasion invesse che solo un un sìngolo passiente.
8. Diàgnosi: o sia i mètodi e i strumenti che el dotor el ga a desposision par individuare la malatia.
9. Prògnosi: o sia la prevision del dotor sul ndamento de la malatia e de le so possìbiłi conpleganse in futuro.
10. Terapia: che la poe èssere destinta prima de tuto mèdega o cerósega, par poi anca prevedere protocoli de reabilitassion e assistensa al malà conplessi.

Altri progetti

• Wikimedia Commons

• Wikimedia Commons el detien imàjini o altri file so Malatia
• el detien schemi gràfeghi so