Berözovskii (Sverdlovskan agj)

Berözovskii
Берёзовский

Lidnanznam	Flag
Valdkund	Venäma
Eläjiden lugu (2021)	60,334 ristitud
Pind	38 km²
Pämez'	Jevgenii Piscov (tal'vku 2011—, Евгений Писцов)
Telefonkod	+7−34 369-xx-xxx
Avtokod	66, 96, 196
Aigvö	UTC+5 (MSK+2)

Sil sanal voib olda toižid znamoičendoid; miše nähta niid, tulgat tänna.

Berözovskii (ven.: Берёзовский) om Venäman lidn Sverdlovskan agjan suves. Se om Jekaterinburgan pohjoižpäivnouzmaine, kahtenz' surtte ezilidn, Berözovskijan lidnümbrikon administrativine keskuz.

Istorii

Eländpunktan aluz om pandud vl 1748 kuti Berözovskii-tegim samha kuldad kaivuzmahtusel (ezmäine statj Venämas), nimitihe jogen mödhe. Žilo kändihe radnikžiloks vl 1928, sai lidnan statusad vl 1938.

Berözovskii-lidn šingotase kuldan da sen kaimmineraloiden samižel tähäsai, raudühthesuladusiden tegimel, mašiništonsauvomižel (tor'venpanijad, ühthekeitandmašiništ, katl'ad, avtodetalid) i sauvondmaterialiden pästandal (raudbetonkonstrukcijad, kuivsegoitused, sauvondmujud), mugažo kouranfabrik radab.

Geografijan andmused

Lidn sijadase Berözovk-jogen randal (ven.: Берёзовка, Obin bassein), 250 m ü.m.t. keskmäižel korktusel. Röunatab Jekaterinburgan Kirovan rajonanke. Berözovskii-lidnan Novoberözovskii-pala om Jekaterinburgan rengazavtoten südäimes. Toine lähembaine lidn om Üläpišm (ühtenz' surtte Jekaterinburgan ezilidn) 15 km lodeheze Jekaterinburgan rengazavtotedme.

Kaik 17 žilod mülüdas lidnümbrikho Berözovskijan ližaks. Lidnümbrikon pind — 1126 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 51 651 ristitud, lidnümbrikon — 68 772 ristitud. Kaikiš suremb lidnan i lidnümbrikon ristitišt om nügüd'. Vl 2017 kaik 57 194 ristitud elihe lidnas i 74 344 ristitud kaikes lidnümbrikos.

Ortodoksižen hristanuskondan koume jumalanpertid i islaman «Aigul'»-pühäpert' oma olmas lidnas.

Berözovskijan «Profi»-tehnikum om professionaližen opendusen aluzkundaks.

Galerei

• 
  Muštnik Vägestusen puištos vl 2013
• 
  Jumalanmaman Emäganpäivän jumalanpert' (tagamal) i ortodoksižen hristanuskondan keskuz (ezimal), vn 2017 nägu
• 
  Bobuštuzkeskuz Listvennai-mägenno suks'pautkenke (2012)
• 
  «Sovremennik»-kul'turkeskuz (2016, Aigalaine) Novoberözovskii-rajonas
• 
  Leninan irdal (2019)

Tetabad sündnuded

• Pavel Čistopolov (sünd. 1984) — Venäman futbolist, minifutbolan ezirivenvändai.
• Aleksandr Žestkov (sünd. 1978) — Venäman lehtezmez', TV-vedai.

Irdkosketused

• Lidnümbrikon tobmuden aluzkundoiden oficialine portal (березовский.рф). (ven.)
• Berözovskijan lidnümbrik Sverdlovskan agjan oficialižel midural.ru-saital. (ven.)
• Lidnan kundaliž-informacine portal (berezovskii.ru). (ven.)