Kaspiisk
Lidnanznam
| |
| Valdkund | Venäma |
| Eläjiden lugu (2022) | 133,581 ristitud |
| Pind | 32,94 km² |
| |
| Pämez' | Boris Goncov (kül'mku 2020—) |
| Telefonkod | +7−87 246-xx-xxx |
| Avtokod | 05 |
| Aigvö | UTC+3 (MSK+0) |
Kaspiisk (ven.: Каспи́йск, darg. i lezg.: Каспийск, avar.: Каспиялъухъ, lak.: Ккасппи) om Venäman lidn da lidnümbrik Dagestanan Tazovaldkundan keskuzpalan päivnouzmas, Mahačkalan suvipäivnouzmaine kaimdailidn.
Istorii
[vajehta | vajehtada lähtetekst]Eländpunktan aluz om pandud vl 1932 kuti Dvigatel'stroi-žilo pästamha likutimid laivoiden täht. Se sai lidnan statusad nügüdläiženke nimenke vl 1947. Eziauguižešti eländpunkt venänikoiden enambusenke (vl 1959 kaks' koumandest), lidn šingotase teravas, vspäi 1959 sen ristitišt ližadui 4,5 kerdha.
Kaspiiskan ižandusen päsarakod oma transport- (dizel'likutimed, mašiništ laivoiden täht) da tarkoiged mašinoidensauvomine, azegišt (meritorpedod).
Geografijan andmused
[vajehta | vajehtada lähtetekst]Lidn seižub Kaspijan meren randal, mail'man valdmeren pindal, sijadase Mahačkalan röunan taga ani. Matkad lidnan keskusespäi Mahačkalan keskushesai om 16 km avtotedme lodeheze.
Kaspiisk om lidnümbrikon üks'jäine eländpunkt.
Eläjad
[vajehta | vajehtada lähtetekst]Vn 2010 kaiken Venäman rahvahanlugemižen mödhe eläjiden lugu oli 100 129 ristitud. Vl 2017 lidnan ristitišt oli 113 348 eläjad.
Rahvahad (enamba 1% vl 2010): lezgilaižed — 21,4%, darginalaižed — 20,7%, avarad — 14,6%, lakalaižed — 14,2%, kumikad — 9,7%, venälaižed — 9,0%, tabasaranalaižed — 5,4%, agulalaižed — 1,7%, rutulalaižed — 1,2%, toižed rahvahad — 1,9%, rahvahuden ozutandata — 0,2%.
Islaman kümne pühäpertid oma avaitud lidnas. Hristanuskondan kaks' pühäpertid oma saudud: Kazanin Jumalanmaman jumalanpert'[1] (ortodoksine hristanuskond, om letud vll 1994−2000) i seičemenden päivän adventistoiden loičendpert'.
Professionaližen opendusen aluzkundad: mašiništonsauvomižen da holitusen kolledž Sergo Ordžonikidzen nimed[2] (enččel mehanine tehnikum, inženerine kolledž), energetine kolledž[3], Kaspiiskan medicinine kolledž[4], Kaspiiskan medicinine škol A. Alievan nimed[5], Piterin policijan kolledžan alajaguz, Dagestanan valdkundaližen tehnižen universitetan filial.
Edeline lidnümbrikon pämez' om Magomed Abdulaev (eloku 2015 — kül'mku 2020).
Transport
[vajehta | vajehtada lähtetekst]Maršruttaksid oma kundaližeks transportaks lidnas, trolleibusad i avtobusad ühtenzoittas lidnad Mahačkalanke. Meriport om lidnas.
Kaspiisk-raudtestancii om kahesakilometrižen sarakon lopstancijaks «Mahačkal — Derbent»-keskustaspäi. Matkad Mahačkal-Port-päraudtestancijhasai om 23 km.
Galerei
[vajehta | vajehtada lähtetekst]-
Mečet' Sajid Acaevan nimed, vn 2013 nägu -
Kazanin Jumalanmaman jumalanpert' -
«Anži»-aren (2014) -
Sportan i norišton pert'kulu Ali Alievan nimed (2019) -
Lun'-ekranoplan vl 2010
Homaičendad
[vajehta | vajehtada lähtetekst]- ↑ Kaspiiskan pühäpertid sobory.ru-saital. (ven.)
- ↑ Mašiništonsauvomižen da holitusen kolledžan sait (рикдагестан.рф). (ven.)
- ↑ Kaspiisk-lidnan Energetižen kolledžan sait (energo-college.ru). (ven.)
- ↑ Kaspiiskan medicinižen kolledžan sait (kaspmedcollege.ru). (ven.)
- ↑ Kaspiiskan medicinižen školan sait (kmu1955.ru). (ven.)
Irdkosketused
[vajehta | vajehtada lähtetekst]- Lidnan tobmuden sait (kaspiysk.org). (ven.)
- Tedonandmused lidnas Dagestanan municipaližiden ühtnikoiden dagmo.ru-saital. (ven.)
 |
Kaspiisk Vikiaitas |
| Dagestanan Tazovaldkundan lidnad | ||
| Buinaksk | Dagestanan Lämoid | Derbent | Hasavürt | Izberbaš | Kaspiisk | Kizilürt | Kizlär | Mahačkal | Suvisuhokumsk | ||