Nolinsk

Nolinsk
Нолинск
Lidnanznam;	Flag;
Valdkund	Venäma
Eläjiden lugu (2021)	8,262 ristitud
Pind	10 km²
Pämez'	Dmitrii Kudrävcev; (sügüz'ku 2022—)
Telefonkod	+7−83 368-xx-xxx
Avtokod	43
Aigvö	UTC+3 (MSK+0)

Nolinsk (ven.: Ноли́нск, nitmar.: Нольо) om Venäman lidn da lidnankund Kirovan agjan suvipalas. Se om Nolinskan rajonan administrativižeks keskuseks da palaks.

Istorii

Eländpunktan aluz om pandud vl 1668 kuti Nikol'skoje (Noli)-žilo ortodoksižen hristanuskondan ph. Mikulain päjumalanpertinno läz Vätkan Emäganpäivän ph. Trifonan jumalankodid. Žilo sai makundan lidnan statusad vl 1780 nügüdläiženke nimenke. Vll 1940−1957 lidnan nimituz oli Molotov nevondkundaližen valdkundan Väčeslav Molotov-šingotajan kanzannimen mödhe. Vanh torgovanoiden lidn, arhitekturine umbrišt om kaičenus hüvin.

Nolinsk om ümbärtud maižanduzrajonal. Lidn šingotase konditerižel fabrikal (pästab pränikoid, limonadad i mineralvet) i toižel sömtegimištol (lihakombinat, voitegim), maižanduztehnikan kohenduztegimel, puižiden suveniriden edheotandal (matroškad, puižed astjad), punümbriradai kombinat tegeb meblid. Ende omblendfabrik radoi mugažo.

Geografijan andmused

Lidn sijadase rajonan keskuzpalan päivnouzmas, Voi-jogen oiktal randal (ven.: Воя 174 km pitte), 20 kilometras sen lanktendan sijaspäi Vätkha huralpäi, 110 m ü.m.t. keskmäižel korktusel.

Matkad agjan Kirov-pälidnhasai om 117 km pohjoižhe orhal vai 140 km R169-avtotedme. Lähembaižed lidnad oma Sovetsk 58 km päivlaskmha orhal vai 120 km avtotedme i Uržum 50 km suvhe orhal vai 58 km avtotedme.

Klimat om ven kontinentaline. Voden keskmäine lämuz om +2,8 C°, kezakun-elokun +16,5..+18,9 C°, tal'vkun-uhokun −10,4..−12,9 C°. Ekstremumad oma −48 C° (tal'vku) i +37,8 C° (heinku). Kezaaigan minimum om −1,1 C° (kezaku), tal'vaigan maksimum om +7,3 C° (tal'vku). Ei voi panda halad heinkus vaiše. Paneb sadegid 647 mm vodes, enamba kezakus-redukus (62..76 mm kus), vähemba uhokus-sulakus (30..38 mm kus).

Tobmuz

Nolinsk om lidnankundan üks'jäižeks eländpunktaks.

Lidnankundan tobmuden pämez' om sen Administracijan pamez'. Edeline lidnan Administracijan pämez' om Jelena Uspenskaja (kül'mku 2012 — sügüz'ku 2022). Lidnan Duman ezimez' om Sergei Bušmelev vn 2023 vilukuspäi. Oleg Kosticin radoi lidnan Duman edeližen ezimehen (sulaku 2018 — viluku 2023).

Eläjad

Vn 2010 Venäman rahvahanlugemižen mödhe lidnan eläjiden lugu oli 9 554 ristitud, rajonan pol', vn 2021 — 8 262 ristitud. Kaik 9 720 eläjad oli lidnas vl 2017. Kaikiš suremb lidnan ristitišt oli 11 637 eläjad vl 1979.

Ortodoksižen hristanuskondan koume pühäpertid^[1] oma kaičenus i saudud lidnas: ph. Mikulai-čudonsädajan päjumalanpert' (saudihe vodele 1724, ei ole väges), Pühän Jumalanmaman Emäganpäivän jumalanpert' (om letud vl 1843 i om avaitud), ph. Ioann-edelkävujan jumalanpert' (enččenno hengeliženno školanno, om saudud vl 1899 vai sen aigemba, ei rada). Niiden ližaks Kaikiden Pühämehiden jumalanpert' i ph. Aleksandr Nevalaižen časoun' ei ole kaičenus.

Lapsiden opendusen aluzkundad oma viž päivkodid, kaks' keskškolad i kaks' školad invalidoiden täht, čomamahtoiden škol, sportškol. Professionaližen opendusen aluzkundad oma Nolinskan maižandusen mehanizacijan tehnikum^[2] i Nolinskan politehnine tehnikum^[3].

Galerei

Sodakomissariat (2019)
Ph. Mikulai-čudonsädajan päjumalanpert', vn 2021 olend
Pühän Jumalanmaman Emäganpäivän jumalanpert', vn 2019 nägu
Lidnan kirjišt (2021)
Tehnikuman norišton keskuz (2019)

Homaičendad

Irdkosketused

Lidnankundan tobmuden sait (nolinsk-adm.gosuslugi.ru). (ven.)

	Kirovan agjan lidnad
	Jaransk \| Kirov \| Kirovo-Čepeck \| Kirs \| Kotel'nič \| Luz \| Malmiž \| Muraši \| Nolinsk \| Omutninsk \| Orlov \| Slobodskoi \| Sosnovk \| Sovetsk \| Zujevk \| Uržum \| Vauged Holunic \| Vätkan Poläni

[1] Nolinskan pühäpertid sobory.ru-saital. (ven.)

[2] Nolinskan maižandusen mehanizacijan tehnikuman sait (ntmsh.ru). (ven.)

[3] Nolinskan politehnižen tehnikuman sait (npt-nolinsk.ru). (ven.)

[1]

[2]

[3]