Omama.'s Reviews > مرزا غالب: ایک سوانحی منظر نامہ

ہوئی مدت کہ غالبؔ مر گیا پر یاد آتا ہے
وہ ہر اک بات پر کہنا کہ یوں ہوتا تو کیا ہوتا

یہ ہندوستان کے سب سے مشہور اردو شاعروں میں سے ایک ، مرزا غالب کی ایک یادگار کہانی ہے۔ اس میں غالب کی زندگی ، اُنکی مختلف مشکلات اور آخری مغلیہ دور کے حالات کی تفصیل ہے جس میں وہ زندہ رہے۔ اس کہانی کے مختلف پہلو ہیں۔ مرزا کی اپنی اہلیہ سے محبت اور ان کی ایک دوسرے کے ساتھ لازوال عقیدت۔ الفاظ کے ساتھ ان کا نہ ختم ہونے والا جذباتی پن، شہردہلی کے لیے غالب کی عقیدت، جو اُنہیں آزماتا ہے ، اُنہیں عاجز بھی کر دیتا ہے اور آخر میں اُنہیں قبول بھی کرتا ہے ۔
دوسری طرف ، اُن کی زندگی کے تلخ پہلو ہیں۔ جوئے اور شراب سے اُن کا لگاؤ، اور اُس سے اُن کے لواحقین کو پہنچنے والی تکلیف، عدالت کی سیاست؛ غالب کے لئے کوٹھے والی کی بلاجواز محبت ، اور اس کی موت جب وہ صرف ایک ہی ملاقات کی آرزو مند تھی۔
کہانی میں جابجا غالب کے اشعار اور غزلیں ہیں جن سے بلا شُبہ اِس کی خوبصورتی دو بالا ہو گئی ہے۔

یاسیت، غُربت، اور غم سے بھرپور یہ زندگی ایک ایسے وقت کی عکاسی کرتی ہے جب برطانوی ہندوستان پر تقریباً قابض ہوچُکے ہیں،اور غالب کی زندگی ٹوٹ پھوٹ کا شکار ہے، اُنہوں نے غدر کا سانحہ دیکھا، اپنے محبوب شہر دہلی کو لُٹتے دیکھا، اور عظیم مُغلیہ سلطنت کا سورج غروب ہوتے دیکھا، 1869 میں غالب کا جسم اس دنیا سے رخصت ہوگیا۔ لیکن کیا اُن کی روح اور میراث اس دنیا کو کبھی چھوڑ دے گی؟

یہ کہانی سردیوں کی دوپہر میں کھڑکی سے چھن کر آنے والی دھوپ کی مانند محسوس ہوئی، جیسے ایک عجیب سی اُداسی نے اپنی گرفت میں لے لیا ہو، بہت پہلے گزرے ہوئے ماضی کا ایک نامعلوم سا نوسٹلجیا۔