Witu (Wiru) Bible Papua New Guinea

Weneya Totono Keraisu Yesunomo
1 Korine
00
11
22
33
44
55
66
77
88
99
10 10
11 11
12 12
13 13
14 14
15 15
16 16
This version of Total HTML Converter is unregistered.
1 Korine 1 Korine
<<
00
>>
^
1 Korine
Poloyo Akolali-pala Ke Wa Akenemo
Yesuno Agale Yakoa Motane Yename
Oa Takoa Kakete Pili Pili Tanemo
Keraisu Akolaline Tele Patu Kautakoa
Kakome One Peku Nootapea Agale Oko
Keraisu Yesu Yomo Lekaneyake Tuanemo
Akolaline Peku
Akolalinele Takakete Toatekomo
Keraisuno Aposelo Ali-kitike Akenemo
Korine Take Poanele Tane Agoke Akenemo
Keraisuno Ali Atoa Ete Oto Wa
Koiso-nali Yotekete Tanemo
Pamoko Mea Eni Poanele Toameamene
Adona Mekete Toatikimo
Akolaliyo Kiwi Kayo Oa Motokale
Mekoina Toa Pa Edikoa Meamene
Ali Atoa Peya Mane Mane Akenemo
Iponoke Padeya Mea Lodo Yotaneleke
Pale Yakanemo
Aposelo Ali-kitike Akenemo
Poloyo Akolalinele Takama Yakome Tanemo
Yu Yenane Kaua-mikiti Etepea Pekenemo
Kekaneya Latikaneleke Akenemo
Losu Yapu Oboa Mekete Toatekomo
Gerepi Po Ku Ue-pala Palawe Waneta
Nakete Toatekomo
Epetane Yominiyo Peku Lawetekomo
Kawa Yono Eya Koukalogoapa Ali Wa Okomo
Eko Ali Atoake Wene Mekakete Toatekomo
Losuke Akolalinele Wedetekoa Takatikimo
Yesu Tuaneyake Akolaliyo Kamotokanemo
Akolaliyo Tuane Ali Atoa Kamotokatekamo
AdamKeraisutame Tokala Tanemo
Padele Tane Tigini Kakeneya
Kamoa Poatekomo
Ponopene Yu Yene Kue Tatia Metanemo
Poloyo Korine Yene Tamene Wa Kowitanemo
Poloyo Wipitikome Akenemo
1 Korine 1 Korine
<<
00
>>
1990, 1992 Wycliffe Bible Translators, Inc.
1 Korine 1 Korine
<<
11
>>
1 KORINE
Poloyo Korine Yeneke
Namolo Takoa Wia Wetekane Pipia
1
1
Polo nopa Akolaliyo no i ago Keraisu Yesuno Aposelo ago moane kakou wa one
wene litikome kayo oa motoka agome uku. Nipa tone oyago Soseni-pala opiane mekene i
pipia wia wetekato wane wiane wetekakilepa
2
Akolaline yene wini Korine take meki-kitike
wetekaku-ye. Keraisu Yesuyo taneleke Akolaliyo kipa one wa takoa moa one-pala
lipukaneya. Nitoa onekele takama pamene wa kayo oa motikilepa eya yene ta piko peya
mekete tone Ali Muno Yesu Keraisuno ibini wedekoa one kowitoai tiki yene kikilikoa kayo
oa motaneya. Keraisu onepa kini Ali Muno mea tone Ali Muno mea toko.
3
Toneketai
Akolali-pala Ali Muno Keraisu Yesutame pewe wia tepe kolotini kilikoa pikamotoane kini
kowitikakene uku-ye.
4
Akolali kowitikene-kama ke wane okala tuku. Nipa anu oya-lawe kiwi Keraisu Yesu-
pala moa lipukakome pewe wia kakolo tekene ni uku.
5
Keraisu-pala eni moa lipukakome
kamo takou toa one peku lawetaneya. Nitikale noa tekete ete onekemo to awea akatapea one
niminimo pine to a wene taneya mea tiki.
6
Keraisunomopa totome okoona toa kime yakoa
mootokoa wedoa litia toma nikili tekene ni uku.
7
Nitoa meapa tone Ali Muno Keraisu Yesu
wakapea nomotoa nepia mekete tiki. Nipa one peku nateya waneka katekameneya noa
tagatapekete kolotine mea nepia mekete tiki.
8
Widikoa nepia mea togamotoa tokome one
tele patu poapeneya kautakoa kamene wa kiwi yopia-kala kawoo. Nipa tone Ali Muno Yesu
Keraisuyo ali atoa takoa enoa akaka-pete Akolaliyo kipa poanele toamene yene tetepo
takamotoa tokome nitoo.
9
Akolaliyopa one mana tone Ali Muno Yesu Keraisu-pala odene
wene pia lipua memotoa tokome kiwi kayo oa motaneya. Nitane agome tou wa oa togotoka
toa-kama taatekoa too.
Oa Takoa Kakete Pili Pili Tanemo
10
Anu oya-lawe, Yesuno ibini wedekoane eya tamene wane kiwi kowitikene uku-ye.
Odene wene-kama pianeya meamene. Ete oto wa pili pili tomotoane wamuku. Nipa ete oto
wa wene odene kotuta kakatakutukoa meamene.
11
Anu oya-lawe kiwi oa takoa pili pili toa
meki wa eya atoa Kelowi-lawene yapu pitiki-kitame akedikili yatekene ni uku-ye.
12
Eya
wane ekene uku. Kiwi padeka-kitame no Polo einagoke lukoane meku wa oa wa padeka-
kitame Apolosike lukoane meku wa oa wa padeka-kitame Pitake lukoane meku wa oa wa
padeka-kitame Keraisuke lukoane meku wa ete oto wa pili pili toa mekete tiki.
13
Beita,
Keraisupa ali atoane nateya nateya wa edoa moke takamotoa-pe. No Polopa kini poaneleke
yomo lekaneyake wia dekaneya tokolo ni iki-pe. Panagome kiwi ue motokakilepa Polo anu
ibini wedekoa ue motokaka tokolo ni iki-pe.
14-15
Anu oya-lawe kiwi kainya ue motokamokouna tekene Akolali-pala ke wane uku.
Panagome-kiti no Polo pinali one ibini wedekoa ali atoa ue motokaka wa akaya tokolo ni
uku. Wida none mekenepa eya agota Kerisepasi Gayasita odene ue motokakou.
16
O'o, eya
ago Sitepanasi one yapu pitiki-kitika ue motokoane tokou. Ali atoa pade-meneka wida ue
motokakou patuno, wene agopa tokoyake uku.
17
Keraisuyo no takoa motokomepa ali atoa
ue motokama poano pa wa wetekamokome onekemo oa aua poano pa wa wetekaneya.
Nipa ali atoame one yomo lekaneyake tuanemo wene kayapeaneya mekete no Polo-kama
wene taneya mekaya tokale eya wa oa toka. Agale muno pewe kakoa wameneya Epetane
Yominiyo wene taka taka toko toa oa aua poano pa wa no moa wetekaka.
Keraisu Akolaline Tele Patu Kautakoa
Kakome One Peku Nootapea Agale Oko
18
Keraisu one yomo lekaneyake tuanemopa tua atua poadete piki ali atoame pamo
tetepo takoa waki. Nitikiyake Keraisuyo toa moma poko-kiti totome eya wa wene toko.
Einakamopa Akolaliyo padele telekole tokome ali atoa toa motanemo eni wa wene toko.
19
Enilekepa Akolaline bokuke eya wa wia mekaneya piko.
Wene muno meane yene kini mane mane olaukakoi toane moane bebo akakala tou.
Agale logoni okoi-kitika kini agale muno pewe kakoa okoi toane pamo tetepo
takoane wakala tou wa Akolaliyo akeneya.
20
Nitaneyano, kiwi pakekepa wene muno meane yene ni pademo pademota wene toa iki
yene ni agale muno pewe kakoa ete taka oto taka toa wene toa pitia yateki yene enika eni
yene edoa kei piato-pe. Itonoke kini kaua-mikitame lawetane pekupa Akolaliyo paya peku
tetepo takoa wakeneyano, kei piamato.
21
Akolaliyo one papete wene toopikana toa taatekoa tikilepa ali atoame kini kaua-
mikitane peku nootokoapa one wene toameneya memotoa taneya. Nipa Keraisunomo mo
wia kakoimo yakoa oneke wene tugakoi-kiti toane moada wa wene pikome taneya. Ete-
kitame enimopa pamo tetepo takaneyake nitaneya.
22
Nitaneyake Yu yenamepa Akolaliyo
padele tubele tokale eneketepa nipa nimini akediki wa oo wa yakamokala tiki. Geriki
yenamepa eya kuya peku noane tagadiyano wene pikete Keraisunomo yakoake pamo
tetepo takoa waki.
23
Nitikiyake anu oya-lawe totomepa Keraisu yomo lekaneyake tuanemo-
kama mo wima yako. Nitikolo yatekete Yu yenamepa winimopa ya tanemo ekete tiki wa
yakoa moamiki. E ku pa yatene ali atoamepa winimopa pamo ekete tiki wa paya nou toa
meki.
24
Nitikilika Akolaliyo one wa takoa motane yene Yu ali atoameka e ku pa yatene ali
atoameka eya wa oa tiki. Keraisu einakago Akolaline tele patu kautakoa kakome one peku
nootapea etene agale logoni okago tadeko wa onekemo yakoa motiki.
25
Akolaliyo mana
tumotoa moa wetekanelepa wene muno meane yename pale tane tetepo takakiyake kime
kotukoa toamatekoile Akolaliyo akole eni taneya. Akolaliyo eni tanelepa telekole-kama tiki
yename taba tanele tetepo takakiyake kime kotukoa toamatekoile Akolaliyo akole eni taneya.
26
Anu oya-lawe kipala imo ukuno yakamene. Akolaliyopa kime Keraisu litia tomotoa
kayo oa motikilepa kipa edane ali atoa takoa motokato-pe. Wene meane-kiti telekole toma
yakoi-kiti ibini akene ali atoa enika eni ali atoa kainya mati takoa motokato-pe. E 'e mena.
Dikane ali atoa one wa takoa motikilepa pa natetekoa takoa motoka.
27
Nipa ete-kitame leau
akene tetepo takoa wakene yene Akolaliyo one wa takoa motaneya. Enipa wene muno
meane yene ya takademe ni taneya. Ete ali atoame tabaya tetepo takoa wakene yene
Akolaliyo one wa takoa motaneya. Enipa telekole toma yakoi yene ya takademe ni taneya.
28
Ponopene yeneka paya tetepo takoa wakene yeneka padeya padeya itonoke wete
witameneya-kitika Akolaliyo one wa takoa motaneya. Itonoke ali atoame padeya padeya
tobou latikakiya peya agopa takoa wawademe tokome nitaneya.
29
One leneke odene agoka
pinali one wa kei piamomotoa tokome taneya.
30
Nitane agome kiwi pa ali atoa mana
Keraisu Yesu-pala moa lipukaneya tokale etenane peku i i wa lawetaneya. Nitikomepa i yene
totopa poanele toamene yene tetepo takoano ta wa one etene yametaneya. Ni etenanele kiyo
akenele takakete toatekole yamea ni tone toko poaneleme toto moa labakanetake toa
motaneya.
31
Nitaneyano, Akolaline bokuke wia mekane toa tatoane uku. Eya wa wia
mekaneya piko. Kini wa kei piameneya Ali Muno-kama kei pia kamene.
1 Korine 1 Korine
<<
11
>>
1 Korine 1 Korine
<<
22
>>
2
Keraisu Yesu Yomo Lekaneyake Tuanemo
1
Kiwi mekoika wida none mekene Akolalinemo i i wane oane metekounapa wene
muno meane ago keneya wamoane agale muno pewe kakoane wamoane tokouna.
2
Nipa
wida kipala opiane mekenepa Keraisu Yesunomo one yomo lekaneyake tuanemo-kama
oane meouno wene piane nekene okouna.
3
Onekemo oane meatekou tele meameneya taba
tekene tokome pitime kolu kolu nokale pa poti mekene okouna.
4
Enimopa mo wiane
kakene ikilepa agale muno pewe kakoane taba po pitikoane tekene okouna mena.
Nitamekene anu ukumopa nimini eni akedeku wa kime wene tomotoane Epetane Yominine
tele patu kautakoane kakene okouna.
5
Nipa kime Keraisunole takama yakilepa kini kauane
peku patu kautakoa kakete tomotoane wamokou. Akolaline tele patu kautakoa kakete
tomotoane okouna.
Akolaline Peku
6
Nimo ukuyake Keraisunole takatiki kotu kakoa tiki-kiti olaukakilepa agale muno pewe
kakoane tuku. Nipa itono peku noa tiki yene ni kini tobou meki yene enika eni yename agale
muno pewe kakoa olaukakina toane wamuku. Eni yename kinikile tikilepa etepea pata pale
toma yaki.
7
Noanu agale muno kakoane olaukakumopa Akolaliyo itono wete latia
piameneyake dikou wa wene toopia kaukoa mema nekenemo uku. Ali atoa one keneya pa
teleta tootapeneya meemoa pomotoa tokome one peku lawetou wa wene toopianemoke
uku.
8
Enimopa ipete tobou meki ali-kiti padameka wene toamokoi. Eni wene toi tokapa
nipa Ali Muno etene Akolali pa tootapeneya mekome peku lawetane ago yomo lekaneyake
wia dekamoi toka.
9
Eni yename Akolaliyo papete wene toopianemo wene toameneyake one
bokuke eya wa wia mekaneya piko.
Akolaliyo oneke wene mekoa meki-kitane padeya padeya nodokoa pikaneya. Nipa kini
leneme enamoa kaleme yakamoa tokoinakeya ni kini namolo wene
toamokoinakeya nodokoa pikaneya wa panagome wia mekaneya.
10
Akolaliyo one eni wene toopikana toapa i i wa totome wene tomotoa tokome one
Epetane Yomini totoke moa wetekaka. Ali atoa-pala kaukoa meaneya peyapa one eni
Yominiyo tetoa enekala toko. Nipa Akolaliyo toto-pala kaukoa meaneya one tepene
pianeyaka tetoa enamele toko.
11
Panagome-kiti eko agono tepene piko toa lekoa enamele
toamokoyake pinaline yominime one tepene piko toa tetoa enamele toko. Eina toa Akolaline
tepene piko toa one Epetane Yominiyo odene tetoa enamele toko.
12
Akolaliyo one eni
Epetane Yomini totoke moa wetekakilepa nipa toto pewe witikome laweteko pekupa i i wa
wene toa noa tomotoa tokome toka. Eni pekupa tone kaua-mikitame lawetane peku mena.
13
Nitaneya tokome totome mane mane ikilepa tone kaua-mikitame peku lawetekoina
toa wamoko. Epetane Yominiyo i i wa wene taka taka toko toa oko. Nipa Epetane Yomini
awitaneya meki-kiti totome takoa mane mane oko.
14
Nitikoyake Epetane Yomini
awiameneya meko agomepa one wene takako toa yakoa moamademe wako. One wene
takakomopa pamo tetepo takakome ni toko. Nipa one wene takako toa pine to a tetoa
enemotoa toko Epetane Yomini einagoke nome awinamokolo tokome oyake yakoa
moamele toamoko.
15
Epetane Yomini awitaneya meko agomepa padele padele tanele peya
takoa enamele toko. Nitikoyake Epetane Yomini awitaneya meko agono tepene piko toa
padameka i i wa takoa enoa akamele toamoko.
16
Enikepa Akolaline bokuke eya wa wia
mekaneya piko.
Ali Muno ago ete wa olaukademepa teyo Ali Munono tepene piko toa tetoa enemotoa-pe.
Nimo wa wia mekaneya pikoyake anu oya-lawe totomepa Keraisuno wene pikole wene
taneya meko.
1 Korine 1 Korine
<<
22
>>
1 Korine 1 Korine
<<
33
>>
3
Akolalinele Takakete Toatekomo
1
Anu oya-lawe kiwi mekoika none agale oane metekilepa kipa Epetane Yomini
awitaneya meane yene tetepo takoane amele toamokale tekene itono peku nakene yene
tetepo takoane okouna. Keraisuno nana mati tetepo takoane okouna.
2
Nipa wetini ali
atoame nakiya nee namele toameneya meane nana mati tetepo takoane adu-kama lawetou
toane okouna. Opika eniya nee namele toameneya pa nana mati keneya mekete tikili uku.
3
Itono peku noai tekete tikili ni uku. Anu oya-lawe kiwi ete oto wa wene poaneya mea
pilitakutukoa mekete tiki. Widikoapa pa itonole toma yakete tiki. Enipa nimini ukutu-pe.
4
Nipa panagome no Poloke lukoane meku wa oa wa panagome Apolosike lukoane meku
wa ikilepa pa itono peku noai tiki-kitame tiki toa ekete tiki.
5
Apolosi totapa edane agota-pe. Totapa Akolaline pupu takakagota pa agota.
Akolaliyo one pupu tutu tutu wa tatikamu tokome Apolosi tota meteka toa takaketepa
Keraisunomo wina oa metekolo tone oya-lawe kime yakoa motokoina.
6
Noanumepa nee
lene matakakouna. Wa naniko Apolosi nome ue nomoa pekoai toa itono ko akakakana.
Totame nitipia pokolo ipe kakoya atepea witakakilepa Akolaliyo-kama toko.
7
No nee lene
matakakou ago-pala ue nomoa pekoai toa itono ko akakaka agota tota kei edekale piei-pe.
Tota kei piameneya ipe kakoya witakako ago Akolali odene kei piamene.
8
Akolaliyopa nee
lene matakakoule-pala e agome itono ko akakaleta odeneleta tane tetepo takoa meko. Nipa
onekele tutu tutu wa takakoo kotu kakoa pupu poi mokala toademe toko.
9
Apolosi totame
one eni pupu takakilepa Akolali-pala kibutua toko. Anu oya-lawe kipa Akolaliyo one ipe wa
tetepo takoa one yapu waka tetepo takoa toko.
10
Akolaliyo no pewe witikome peku
laweteka toane noane tikilepa kodou ago tekene ete yename yapu wiatekoi adeka piane kue
petene wina moane tatikalogakouna. Nitikalogakounata panagome eni kue petene patu
kelekoa yapu ate toa wima poko. Eni yapu wikilepa wedetekoa tamene wane kiwi peya-pala
uku.
11
Kue petene wina moane tatikalogakouna wane ukupa Keraisu Yesu adeka piane uku.
Yapu wiketepa eni kue wawa pade kue moa tatikamele tokoya mena.
12
Eni patu kelekoa
yapu ate toa wikilepa pade-kitame yapuya epetaneya golo silepa enika eni kamo kue takoa
moa tiki. Nitikiyake pade-kitame kini yapuyapa paya yomoka peti youka tua dekoa kakene
kala youka takoa moa wiki.
13
Wipitia ta pataka-petepa toe nokoa kawateka ta patoa pitoo.
Nitikalepa kini wikoina yapu toeme nakome tokale peya kakete enoi.
14
Nitikolipa epetekoa
wikoina yapu peya toeme noamokale enekome Akolaliyo pine yene kei pia pewe wikala too.
15
Wia potokakoina yapu toeme napetapekale pine yene kini enekete anu pupupa igi wiane
yotekene tadeku wa kini yapu nomotoa katepitoa poi. Nipa toe itipono okata mea katepitoa
pou toa poi.
16
Kipa Akolaline yapu tokome one Yomini wini kiwike nome mekono, enipa wene
toamiki-pe.
17
Panagome-kiti Akolaline wikakane yapu ke awea tadekakalepa Akolaliyo oneka
wia atukoo. Eni yapupa one wikakane yapu tokome nitoo. One yapu wane ukupa anu oya-
lawe kiwike uku.
18
Kini wa oa yotokakaya tokolo eya wane uku. Kiwi panagomedo one kauane peku
nootapekouya tekene wene muno meane ago i meku wa wene pikolopa nipa einago-pala
eya wane uku. Leau akene ago tetepo takoa meamene. Nipa wene muno meane ago
meadepa nitamene wane uku.
19
Akolaliyo kini kaua-mikitane pekupa paya tetepo takakolo
tekene ni uku. Enilekepa one bokuke eya wa wia mekaneya piko. Akolaliyopa wene muno
meane ali-kiti kini yukakoina wakoke kini wa labamotoa toko.
20
Eya waka wia mekaneya
piko. Wene muno meane yene kini wene pikilepa pata pale toatiki wene piki wa Ali
Munoyo wene taneya meko.
21
Nitikono, i agoke lukoane meku wa one taneleke mate agale
edoa oadete-pe. Eya kuya peyapa Akolaliyo kini wa yametaneyano, mate agale
wameamene.
22
Apolosi Pita toto-menepa Akolaliyo moa kakakilepa kiwi peyane takoa
taneya. Itonoka kini wa latia pikaneya. Nitane agome padele padele witakakilepa kinikile-
kama takoa toko. Nipa kipa pa memotou wa oa tumotou wa oa tikilepa kiwi auapeou wa
wene pia toko. Opika nanikoka ele kule witakakilepa kiwi auapeademe toko.
23
Ni kipa
Keraisuke-kama lukoa meki. Keraisu onepa Akolalike-kama lukoa meko.
1 Korine 1 Korine
<<
33
>>
1 Korine 1 Korine
<<
44
>>
4
Keraisuno Aposelo Ali-kitike Akenemo
1
Totopa Keraisuno pupu takama yako ali-mene. Akolaliyo one papete kaukoa
meanemo kime to awea akamene wa toto moa kakaka. Totopa dikane ali-kiti wa wene taneya
meamene.
2
Tobou agono pupu yopia meko agomepa tobou agonole wedoa takamedeko.
3
Anu oya-lawe kimeka koiso yatekaki-kitameka anu tobou agonole takakene tukule takoa
enoa akamene piti moamekene atiki toane meku. Anu tokounakalepa pinali anu wa takoane
enoane ipa epetanele ipa poanele tadeku wane amele toamoko.
4
Anu tepeme ne poane ago
tadeko wado no kikoa akamokolopa poanele padeleka toamokou wane amele toamoko.
Anu toma yakule takoa enoa akakilepa Ali Munago oneme odene tamele toko.
5
Nipa
papetepa ipa poanele tadeko ipa epetanele tadeko wa takoa enoa akameamene. Ali Muno
wakapea nokome okale yakato wa nepia meamene. One wakapea nokomepa yomiyomu
keneke taneleka ali atoane tepene piane weneka keleyo witakakala too. Nipetepa ali atoa
peya kini epetanele tokoike Akolaliyo odene odene wa kei pikala too.
6
Anu oya-lawe kipala i ukupa kiwi auapeou wane Apolosi tota-pala tanele adeka piane
uku. Nipa kini totono wia mekane toa litia tamene wa ikina toane pine to weane eya wane
uku. Tikisa ali pade kei pia wa pade tikisa ali kei piameneya paya tetepo takoa teketepa
poanele tekete tikino, toameamene.
7
Kiwi tobou ali-kiti latikete tiki-pe. Kinikiya peyapa
Akolaliyo-kama takoa metaneya. Nitaneya-kiti kini teleme motane tetepo takoapa edeyake
mate agale oadete-pe.
(Anu oya-lawe kipala i ukumomepa kiwi ya takadene wamuku. Anu mati-kiti latikoane
mama motekene mane oane moadene uku.)
8
Eya kuya moada wa wene pikoina toa kime wete mootapekoinano, kipa kamo yene
mekete tiki. Apolosi tota pa kamotoa kiwi ta talo tiki ali-kiti latia ete yene yopia meki patu.
Ae, kime ali atoa yopia memotoane uku. Nipa toto Aposelo ali-kiti kipala kibutua ali atoa
yopiato wane wene pikounake
9
ali atoa edelo ali-kitika kakakoa Akolaliyo toto Aposelo ali-
kiti-pala eya toko. Tobou agome-kiti one-pala poi te iane yene one take wiane tukapou wa
po kakoa ketea kakoa lia aua pou toa Akolaliyo toto Aposelo ali peya paya tetepo takoa
meko.
10
Toto Aposelo ali-kitame Keraisunole takakilepa leau akene tetepo taneya mea
tokoyake anu oya-lawe kime Keraisunole takakilepa wene muno meaneya mea tekete tiki.
Totopa taba taneya mekoyake kimepa telekole toma yakete tiki. Ete-kitamepa kiwi kei
pikiyake toto paya tetepo takoa waki.
11
Opika tone nee ue wananeya mea tone epetaneya
kawateko mamina toameneya pa meko. Ete-kitame toto layo toua wikala tiki. Tone piateko
yapuka toameneya pa pima yako.
12
Tone nee eya moadetepa tone yoname pupu tokoa
kako. Panagome-kiti toto-pala poanemo okolopa agale epetaneya topo toa oko. Pade ali-
kitame tete metekili agale wametekoa poti meko.
13
Panagome-kiti toto pa puputua
akakolopa oya kakoa enekala toko. Opika ete ali atoame toto Aposelo ali-kiti pa kege nee
yabunu eya tetepo takoa wakala tiki.
14
Anu oya-lawe ina ukumomepa kiwi ya takadene wamuku. Anu kolotini mati-kiti
tetepo takoane mane oane motekene uku.
15
Nipa Keraisu Yesunomo olaukakene anu mati-
kiti latikakouna tekene uku. Kini Keraisunole takama yamotoa yopikoi ali-kitido ege egeta
wa-kala kadukoa (10,000) meadekolika kiniketaipa no odene i mekene uku.
16
Nitikuno,
noanume toma yaku toa kime toma yamene wane kiwi wedoane kowitoane uku-ye.
17
Kime
nitimotoane tekene Timosi wini moane wetekaku. Einagopa Ali Muno agonole wedoa
takama yako ago anu mana latikoane wene mekoane meku. Einago Timosi wini nokomepa
Keraisu Yesu patu kautakoane kakene tukumo kiwi wene takakome oo. Nipa losu yapu
kako peyake olaukakule litiane tukumo wene takakome oo.
18
Anu oya-lawe kiwi padeka-kitame no wete noamou wa paya nou toa mekete ikipa
enipa kime ali-kiti latikete iki-pe.
19
Ali Munagome ka yametekalepa wini wete nouno, nepio.
Nekenepa eni yene kini iki agalepa pa agaleme iki patu. Akolaline tele patu kawa kelekoa
mekete iki patu wane enenou.
20
Akolaliyo talo toa mekilepa pa agaleme tokoya mena.
Telekole-pala toa toko.
21
Kiwi meki take nekenepa layo tigini taatekaneya nomotoa iki patu.
Kiwike wene mekoane meane poitali nomotoa iki patu.
1 Korine 1 Korine
<<
44
>>
1 Korine 1 Korine
<<
55
>>
5
Korine Take Poanele Tane Agoke Akenemo
1
Anu oya-lawe widapa panagome mone panagono atoa koua meko wa akedikili
yateku. Eni poanelepa Akolaline agale yakamene yenameka toamatikile toko. Ali padame
one etenane natonopa one natono moa latikako wa akedikili yatekene ni uku.
2
Enile pa toa
memotoake kini wa kei pia mekete tiki. Tumai yapu meou toa mekete eni toko poaneleke
komo oa meamedikiyake tiki. Eni poanele toko agopa kini losuke wa noamoano, pa wa
wetekamene wane uku.
3
Noanupa ta padeka mati i mekeneka kiwike wene kakakoane meku.
Nipa wida kipala opiane meane tetepo taneya mekenepa winagome poanele mati tokake
nami wiane kibu moateku wene kibutupikene ukuno, yakamene.
4
Wida Ali Muno Yesuno
ibini wedekoa oboa mekoi-petepa no-kitika kipala opiane meane tetepo taneya meouno, Ali
Muno Yesuno tele patu kautakoa mekete eya tatoane uku.
5
Eni poanele toko agopa
Setanuyo one tigini wia tukou toa ke enekakoa kamotono, watoane uku. Wipitia ta pataka-
pete Ali Muno Yesu wakapea nokome einagono yomini toa momotoane tekene ni uku.
6
Kini wa kei pikilepa poanele wini tekete tiki. Palawe wane mono mono omotoa yisi
kugu deyaka pitikakilipa mea tagatapekome mono mono oologako. Enipa nimini ukutu-pe.
Winagono poanele kiwi peyake weamutukakaya tokolo ni uku.
7
Kipa weneya palawe yisi
kugu pitikameneya yotane palawe tetepo taneya meamene. Namolo yisi kugu mitikatapea
wawou toa tekete kini namolole wawa wenele toma pamene. (Papete Iserele yatene poane
Idipi ta wete tewitikoa poadetepa palawe yisi kugu pitikameneya pa yotaneya. Nitoapa
edelo agome kiwi wia tukamomotoa tekete sipi sipi kai tine wia kagoke kamate tadekamu
taneya.) Sipi sipi kai tine tou toa Keraisu tone toko poaneleke tuaneya.
8
Nitaneyano, eina
namolo toge kikete tane toa tekete mono mono akene palawe peya yisi kugu-pala dekamoa
mitikoa waou toa tone namolo lene pia poanele tokoonakale wato. Wenele toma patoane
uku. Nipa kiyo akene wene-kama pia niminimo-kama oa tatoane uku.
9
Kiwike pade pipia wiane wini wetekakene eya wane okouna. Pamoko mea enile
poanele tiki yene-pala odeneka yawameamene wane okouna.
10
Nipa Yesunomo yakamene
yeneke wamokouna. Dikane yenamepa atoa lima yawa ni eya kuya moadiya wa tepime
tuaneya mea ni mone panagoneya yotokoa moa ni kini yoname latikoinakeya Akolali tetepo
takoa kowitoai tiki. Enika enile tiki ali atoado tima yaketepa itono tewitikoa poi. Dikane
yeneke wamokouna.
11
Eya yeneke okouna. Yesunole takama yaku wa iki-kitameke atoa
lima yawa ni eya kuya moadiya wa tepime tuaneya mea ni kini yoname latikoinakeya Akolali
tetepo takoa kowitoa ni eko ali atoa akoa agale oa ni bia ue eya noa pia ni panagoneya
yotokoa moa enika enile tiki ali atoake okouna. Nee natono noo wa dikane yene makutukoa
motikileka toameamene.
12-13
Yesunomo yakamoa kipala wida oboamoa tiki-kitipa kini tanele pitiane yakoane
akateku toane mena. Akolaliyo pitia yakoa akoo. Yesunomo yakoa moa kipala oboai tiki ali
atoa kini tikile pitia yakoa akakilepa anu oya-lawe kime toi. Nipa kipala obokala toake
etenane natonopa one natono moa latikakago wini poane ago pa wa tikatapea wamene.
1 Korine 1 Korine
<<
55
>>
1 Korine 1 Korine
<<
66
>>
6
Keraisuno Ali Atoa Ete Oto Wa
Koiso-nali Yotekete Tanemo
1
Kiwi panagome-kiti panago-pala padeya namike koiso oatekale pikalepa Akolaline
agale yakamene ago mekata koiso yatekamotoa edoa aua poadete-pe.
2
Wipitia ta pataka-
pete Akolaline ali atoamepa ete yename toma nekenele pine to a akatikiyano. Ae, papete
natele tokoleka kime pine to a akamele toamoko-pe.
3
Totome Akolaline edelo yatename
toma nekeneleka koiso yakoa akakilepa tubele eni toatekoyano, opi papete natele ali atoame
tikile kime koiso akamele toamoko-pe.
4
Nitamele tokoyake kiwi pakeke padeya namike
koiso oatikile witakolopa Akolaline agale yakameneya pa ali-kiti mekika koiso aua poadete
tiki-pe.
5
Kiwi ya takadene eya wane yatekene uku. Kiwi panagotame padeleke agale toonali
yotikilipa kini koiso wene toa yatekako ago wida meamoko-mo.
6
Pine to a akateko ago
padeka tetepo toamokolo kini kini koiso akanali yokala tekete tiki. Nipa Akolaline agale
yakamene-kiti kakakoa tekete tiki.
7
Kini kini koiso akanali yotekete tikino, Akolalinele takakilepa pata pale tadiki. Eya
toatikiyano. Padame kipala toa potokakalepa ete topo takameneya toa kamotono wamene.
Kinikiyado yotokoa motokalepa momotono wamene.
8
Edikoa epetekoa tamedikiyake kini
kini ete oto wa poanele topo takoa kinikiya ete oto wa yotokoa mokala tiki. Yesuno ali
atoameke ame wa iki ago-palaka edikakala tekete tiki.
9
Edikoa poanele toma yaki-kitipa
Akolaliyo one talo tuku taapa kinino inoe wa yameamoo. Yameamoono, pine yene kini wa
oa yotokoa poanele takayano, eya wa wene taneya meamene-ye. Eya toma yaki ali atoapa
Akolaliyo one talo tuku taapa kinino inoe wa yameamoo. Ali atoa pamoko mea ni kini
yoname latikoinakeya Akolali tetepo takoa kowitoa ni mone padane atoa lia moa ni ali
yatene kini kini wa atoa latikoa koua pia
10
ni panagoneya kode moa ni eya kuya moadiya
wa tepime tuaneya mea ni bia ue eya nokoa kawa ni eko ali atoa pa puputua akoa agale oa
ni panagoneya yotokoa moa enika enile toma yaki-kitipa Akolaliyo one talo tuku taapa
kinino inoe wa yameamoo.
11
Papetepa kiwi padeka-kitame enika eni poanele tokoinake opa
Akolaliyo kini eni tokoi poanele peya ko otapea ni kipa one wa takoa moa ni poanele
toamene yene tetepo takoa wene keaneya mea toko. Nipa kipa Ali Muno Yesu Keraisuno
ibini kautakoa mea tone Akolaline Yomini-pala lipua mea tikili tokome ni toko.
Pamoko Mea Eni Poanele Toameamene
12
Panagomedo ele kule peya tamele tokolo tuku wa nopala okalepa eya wane topo
takoane ou. Ele kule peyame tigini weneta moa epetekakoya mena. Padele padele peya
tamele tokoyake padeleme no moa koigakaya tokolo padele-kiti katekoane toamuku.
13
Padagome-kiti eya waka oo. Akolaliyo imu latikomepa nee ue ponome meatekoya eni
latia ni nee ueta latikomepa imuke ponome meatekoyata eni latia taneya wa oo. Einagome
nimini okoyake Akolaliyo wipitikome nee ueta imu toa takoa wawoo. Tone tigini latikilepa
pamoko mea eni poanele tomotoa taneya mena. Ali Munagonole takamotoa ni latianeya.
Nitoapa tone tigini yopia memotoa Ali Muno moa kakaneya.
14
Einago Ali Muno tuaneya
pikale moa kamotokane toa one eina telekole tanele tokome totoka tuaneyake moa
kamotokoo.
15
Kipa Akolaliyo Keraisuno yono kawa eya tetepo takoa yopiko. Enipa wene toamiki-
pe. Nitikono, Keraisuno yono kawa eya tetepo tane-kiti moa pamoko atoa-pala edoa koua
piato-pe. Koua piamato-li.
16
Panagome-kiti pamoko atoa-pala koua pitikolopa kini tiginita
odene tigini tetepo tootapeko. Enilekepa Akolaline bokuke eya wa wia mekaneya piko.
Kinita odene tigini tetepo tootapeneya meoi wa wia mekaneya.
17
Panago Ali Muno-pala
lipua mekomepa nipa onepala odene wene pia meoo.
18
Pamoko toa enile poanele tikika titi toa pitoa pamene. Panagomedo etele poanele-kiti
tokomepa one tigini toa potokamokoyake pamoko tokomepa pinali one tigini wa toa
potokako.
19
Kini tiginipa Epetane Yomini nome meateko yapuno, eni poanele
toameamedeku wa wene toamiki-pe. Eni Yominipa Akolaliyo moa wetekaneya. Nipa kini
tiginipa kini wa talo tamele toamoko. Kini tigini talo toko agopa Akolali.
20
Kipa one wa oto
toa motokomepa one kamoya ete topo toa mou toa manane kamateme oto toa
motaneyano, kini tiginime ele kule tikilepa ete-kitame Akolali kei pimotada wa tamene.
1 Korine 1 Korine
<<
66
>>
1 Korine 1 Korine
<<
77
>>
7
1
Namolo anu oya-lawe kime nooke pipia pade wia wetekakilepa alime atoa oyake
moamele toko-pe wa pitia yakoa wetekadikino, opi eya wane ukuno, yakamene.
Panagomedo one atoa moameneya pa mekomepa nipa epetoo.
2
Nimo ukuyake eya
waneka uku. Mone koua piamateko alika atoaka koua pia ta-la wa Setanuyo kiwi likoa
enekayano, adona-mikiti latiamene.
3
Adono-mikiti eya tamene wane uku. Kinita mekina toa
koua pikala tamene wane uku.
4
Enipa eyake uku. Pade atoa one tigini pinatoa one wa talo
tamele toamokoyake onekaneyo oyake talo tamele toko. Nika panago one tigini pinali one
wa talo tamele toamokoyake one atoame oyake talo tamele toko.
5
Nipa nekaneka nekatoaka
koua piamene kote moameamene. Akolali wedoa kowitoa meatono, opi-mene koua piamato
wa enipete-mene koua piamokolipa epetoo. Wa naniko Setanuyo likoa enekale eko ali atoa
leneme kode nakaya tokale Akolali kowititikoa meapa nipa kinita mekina toa wa koua pikala
tamene.
6
Enipa anume tikamoane pitikakene enile tamene wane wamuku. Pa kiwi mama
motekene uku.
7
Nopa atoa moameneya pa pima yakuno, kiwi peya idikoa memotadiyano
wene pikuyake amele toamokolo waku. Enipa Akolaliyo toto latikilepa odenele-kama toa
latianeya mena. Panago-kiti atoake wene kamotokoa mea wa panago-kiti atoake wene
kamoameneya mea tomotoa latikala taneya.
8
Tualika tuatoaka nepo atoaka no pa meku toado mekolipa epetoo.
9
Pa meouno wene
piake kini leneme eko alika atoaka kode noa mekolipa nipa ali neme atoa moamene ni atoa
ne alike pamene wane uku. Eko alika atoaka leneme kode noa mekayano, nitamene.
10
Opi adono-mikiti kipala eya wane uku. Nipa Ali Munagome akoano ta wa no wene
takaka toane ukuno, anu weneme wamukuno, yakamene. Ali pekene atoa nekane tewitikoa
wawameamene wane uku.
11
Eni uku toa toameneya nekane tewitikoa wakepa nipa eko alike
poameamene. Pa mea tuamene. Pa meane tuamou wa wene pikepa nipa nekanake wa
wakapea pamene. Atoa motane ago neke natono tewitikoa wawameamene.
12
Opi ete ali atoa-pala eya wane ikilepa Ali Muno agome akoano ta wa okomo
wamuku. Anu weneme titiane ukuno yakamene. Yesunomo yakoa motaneya meko ago-pala
eya wane uku. Neke natono Yesunomo yakoa moameneya mekomeke i ago nepala kouane
meane tuou wa neeke tegetekakoa mekolopa nipa neke eni natono takoa wawameamene.
13
Ni Yesunomo yakoa motaneya meko atoa-pala eya wane uku. Nekane Yesunomo yakoa
moameneya mekomeke i atoa nepala kouane meane tuou wa neeke tegetekakoa mekolopa
nipa nekane tewitikoa wawameamene.
14
Nipa eya wane ekene uku. Pade atoa nekane
Yesunomo yakoa moameneya mekagomeke nepala pa lipua mekolopa nipa Akolaliyo
nekane kitapa one wa takoa yopiko. Eina toa panago-kiti neke natono Yesunomo yakoa
moamene atoameke nepala pa lipua mekolopa nipa Akolaliyo neke natono kitapa one wa
takoa yopiko. Akolaliyo kita yopiamokome too tokapa nipa kini mati-kiti Yesunomo
yakamene mati-kiti tetepo takoa waoo toka. Nitoo tokake eni mati-kiti one wa takoa yopiko.
15
Adono-mikiti alimeka atoameka Yesunomo yakoa moameneya mekome ne wawane pou
wado okalepa kinita letetakutukamele tokono, one pomotamene wane uku. Akolaliyo toto
one wa takoa motikilepa adono-mikiti kilikoata memotoa tokome tokolo ni uku.
16
Atoa-kiti
nekaneyo ne waouno wene pikaake poamade wakepa nipa Akolaliyo one toa momotoane
tuku wa wene pike teke toko patu. Panago-kiti neke natoname ne wawane pouno wene
pikaake poamomotoa lauane lauane tekepa nipa Akolaliyo one toa momotoane tuku wa
wene pike teke toko patu.
Akolaliyo Kiwi Kayo Oa Motokale
Mekoina Toa Pa Edikoa Meamene
17
Akolaliyo kiwi kayo oa motokale mekoina toapa pa edikoa meamene. Papete
Akolaliyo kiwi dikoa memotoa latia kakaneyano, pa edikoa meamene. Enipa Yesuno ali
atoa oboai tiki losu yapu kakoka yakene tamene wane oma yakumo kipalaka uku.
18
Panago-kiti nepa papete Yu yatene ago teke kepene teiganeya mekaka Akolaliyo kayo oa
motoka patuno, eni adekapa koikoa enameamene. Wa panago-kiti nepa papete pa yatene
ago teke neke kepene teigameneya mekaka Akolaliyo kayo oa motoka patuno, kepene
teigamotou wa wene piameamene.
19
Akolaline wene kekadepa oneme ta wa okale-kama litia
tamene. Kepene teiganeya mekoloka kepene teigameneya mekoloka Akolaliyo i ago nepa
one wa talo toa kako.
20
Akolaliyo ne kayo oa motokale mekana toapa pa edikoa meamene.
21
Panago-kiti Akolaliyo ne kayo oa motoka-pete panagono pupu-kama takamotoa kueme
topo toa moa egetaneya meka patuno, wene keda taneya meamoa pinagonole pa takoa
meamene. Wa naniko one eni pupu tewitikoa wawateka ka piadekalepa onekele tewitikoa
wawa nekele toma pamene.
22
Panago nepa kueme topo toa moa egetaneya mekaka Ali
Muno agome kayo oa motikilepa nipa nepa ta pine ago tetepo takakome taneya. Wa
panago-kiti nepa ta pine ago mekaka Ali Muno agome ne kayo oa motikilepa nipa nepa
Keraisuno pupu-kama takateka ago tetepo takakome taneya.
23
Akolaliyo kipa one wa oto
toa motikilepa manane kamateme taneyano, nipa kueme topo toa moa egetane yene tetepo
takoa meameamene.
24
Anu oya-lawe Akolaliyo kiwi kayo oa motokale mekoina toapa pa
edikoa meamene. Nipa one-pala lipua mea nitamene.
Ali Atoa Peya Mane Mane Akenemo
25
Opi ali poamene atoa-kiti atoa moamene ali-kiti eya tamene wane ikilepa Ali Muno
agome akamene wa okamo wamuku. Pa anu weneme uku-ye. Nipa Ali Muno agome ela
moa pewe witiko agome ukuno, yakoa moamediki.
26-27
Opi-mene ke enekako-peteno, eya
tamene. Panago ne-kiti atoa wete motokaneya mekepa nipa neke natono poano pa wa takoa
wetekameamene. Wa panago ne-kiti atoa wete motokameneya pa mekepa nipa atoa
moameamene.
28
Panago neme-kiti atoa mouno wene pia motekepa nipa poanele toameke
too. Wa pade atoa ne ali pekepa nika poanele toameke too. Pade ali atoata adona meketepa
poanele toamekete tiki. Imo ikilepa adono-mikiti ke enekakolo mekaya tokolo mama
motekene uku.
29
Anu oya-lawe kipala ina ukumopa eya wane ekene uku. Tone itonoke meateko toa
pa natetekoa pikono, opi titimoa eya tamene. Atoa motane ali-kitipa atoa moameneya
meane tetepo takoa meamene.
30
Ni komo oa meki yenepa wene keda toameneya meane
tetepo takoa meamene. Ni ulu yau taneya meki yenepa wediameneya meane tetepo takoa
meamene. Ni topo lene kiane yenepa kinikiya toamene tetepo takoa meamene.
31
Ni kamo
toma yaki yenepa kini kamoya-kitike wene piitikaneya meameamene wane uku. Itonoka kini
kamoya-kitika pia kawameneya takoa poademe tokolo ni uku.
32
Kini kepene mama
moameneya memotadiyano wene pikene uku. Eni wene piane mekene kipala eya wane uku.
Atoa moameneya pa mekagome Ali Muno agonole takakilepa Ali Munoke-kama wene
piitikaneya mea toko. Ali Muno ago wedikou wa wene pia mekome ni toko.
33
Atoa motane
agome nitamoko. Einagome one natono wedikou wa itonoleke wene piitikaneya meko.
34
Nipa wene takuta pianeya mekome kilikoa meamele toamoko. Nitikoyake ali poamene
atoamepa Ali Muno agonole-kama takou wa one-pala odene wene pianeya mekome onekele
wedoa takama poko. Ali pekene atoame pade nitameneya, onekane wedikou wa itonoleke
wene pitikaneya meko.
35
Kipala i ukumopa kiwi auapeou wane wene pikene uku. Padele kekanele latikoa
toameamene wane ekene wamuku. Nipa Ali Munagonole takatiki kotu kakoa takakete odene
wene pianeya mea epetanele toma pamene wane ekene uku.
36
Tuali neme-kiti neke tuupiane atoa wetini toma ponokale eneke eke anu tuatoa pa
mea kakayano edeku patu wa wene pikepa eya tamene. Neke eni tuatoake wene kamotokoa
mekepa nipa neke natono latikoa moamene. Kita adonado meketepa poanele toamekete toi.
37
Wa tuali pade neme-kiti wene wedoa kibutukatekoapa neke tuupiane atoa moamou wa
oneke-kama wene kamotokameneya mea moamekepa poanele toameke too.
38
Wa neke
tuupiane atoa motekepa epetanele teke too. Nitameneya moamade wakepa wedoa epetanele
teke too.
39
Ali pekene atoapa nekane tuameneya pa mekolopa nipa nekane-pala lipua meamene.
Wa nekanedo tukolopa tutu pade agoke oyake pamele toko. Nipa Yesunole takako agoke
pomotoane uku. Pa agoke mena.
40
Wa pade atoa nepa nepo atoa meane tuou wa wene pia
mekepa nipa kolotine meoo. Eni agalepa anu weneme ukuyake Akolaline Epetane Yominiyo
no wene takakomo ukuno wene pikene uku.
1 Korine 1 Korine
<<
77
>>
1 Korine 1 Korine
<<
88
>>
8
Iponoke Padeya Mea Lodo Yotaneleke
Pale Yakanemo
1
Ipono eyake lodo yotane nee melepu eya oyake namele toko wa no agale pale
yakadikimoke eya wane uku. Iponameka paya gode-kitameka toto oyake lauane lauane
tamele toamoko wa toto peyame wene toko wa akediki. Eni wene taneya meketepa wene
toamene yene paya tetepo takakayano, dikane ali atoa auapeato wa kiwike wene mekoa
meamene.
2
Panagome-kiti pademo pademo pine to ane wene taneya meku wa wene pia
mekomepa nipa wene toateko kotu kakoa wene toamoko.
3
Panago-kiti Akolalike wene
mekoa mekolopa nipa Akolaliyo einagopa wene taneya meko.
4
Ipono eyake lodo yoa naki melepukepa eya wane uku. Melepu eya mea lodo
yotikilepa nipa paya gode-kitike tiki. Eni gode-kitipa nimini gode mena. Nimini godepa
Akolali odene. One yagono ago pade kawamoko wa totome wene toko.
5
A tibukeka
itonokeka kini gode peya mati kakete tiki wa ete-kitame melepu mea lodo yokala tiki. Paya
gode-kiti paya ali muno-kitika peya mati mekilika
6
tone kowitateko agopa Atai Akolali
odene. One weneke-kama padeya padeya peya alatapekala taneya. One-pala lipua meato wa
onekele takama yako. Ni tone Ali Muno odene ago kako. Einago Yesu Keraisuyo padeya
padeya peya latia kakaneya. Einago patu toto kautakoa kako.
7
Pade ali-kitame paya gode-kitike melepu eya mea lodo yoma-kala nekeneya. Opika
kini namolole wene kayapeameneya mekete eya tiki. Dikane melepu nakete ekete paya
godeke lodo yotane melepu i nakono, kitau oko wa wene katoganeya mekete naki.
8
Anu
oya-lawe toto eniya melepupa noameketeka naketeka edikoapa Akolaline wene oyake
kekamele toamoko. Noamokoloka nakoloka Akolaliyo odenele tane tetepo takoa meko.
9
Dikane melepu oyake namele tokoyake tone oya-lawe padeka-kitame kitau oko wa
namene piti motaneya mekino, kini wene toa potokakaya tokolo kiwi eya wene takakene
uku-ye.
10
Yesunomo wene tootapeane ago ne-kiti lodo yoai tiki yapuke meke eniya melepu
nakale enekome dikane melepu namene piti motane agome eya wa oo. Eni melepupa paya
godeke mea lodo yotaneyake ne i agome nakono, onemeka noada wa naku pokome too.
11
Nipa neke eni oyago Keraisunomo wedoa wene toamene agoke Keraisuyo toa moademe
tuaneyake one kitau okoya neme nakaleme one wene moa bebo akakale tokome etepea atua
poo.
12
Neke oyago Keraisunomo wedoa wene toamene ago edikoado toa potokoa wene
bebo akakepa nipa Keraisu-pala dekoa toa potokake toko.
13
Nitikono, anu nakoulekepa
anu oya ago pade etepea pekedekalepa nipa melepu eya wa noamekene noamadene wakene
waou. One etepea pokaya tokale nitou.
1 Korine 1 Korine
<<
88
>>
1 Korine 1 Korine
<<
99
>>
9
Aposelo Ali-kitike Akenemo
1
Nopa Polo anu wene litikene ele kule tamele tokolo meku. Nopa Aposelo ago. Tone
Ali Muno Yesu enekilepa tokou. Kipa Ali Munago-pala lipua memotoane tikilepa kodou
agome-keneya one yapu wikakou toane tokouna. Nipa one patu kautakoane kakene
tokouna. Enipa nimini ukutu-pe.
2
Ete-kitame no paya Aposelo ago tetepo takoa wakiyake
kiwi Korine yename nitamekete tiki. Kiwi olaukakouna toa litikete Ali Muno agonole wedoa
takakete tiki. Nitikili enekete ete-kitame ekete kiwi olaukane ago Polopa etene Aposelo ago
tadeko wa iki. Nipa kiwi Korine yeneke pikouna adeka enou toa enekete iki.
3
Pade-kitame
no akoa agale ikilika pinali anu wa kei pikenepa eya wane uku.
4
Keraisunole takama yakuke onekemo yakoa motokoi yeneke nee ue eya oyake oiane
moamou wa iki-pe. Oyake mou-li.
5
Ete Aposelo ali-kitameka Ali Munagono wamene-
mikitameka Pita-lawemeka Yesunomo oa aua yaketepa natono Yesunomo yakoa motane
atoa-pala aua yakala tikino, noanumepa natono-pala oyake auane poamuku patu. Auane
pamele too-li.
6
Kimepa ete yene auapekiyake no Polo Banabasita tone nee eya moadetepa
tone yoname pupu toa momotono wene piki-pe.
7
Poyo agome-kiti one noateko nee eya
motikilepa pinali one kue wetekoa motoko patu. Nitamoo-li. Panagome-kiti ipe toa gerepi
po matoa lati lati tokopa nipa ku tukolopa oneme kotia noamoko patu. Kotia noo-li. Wa
meme kai egeteko agome-kiti atoa meme kai adu peia noamoko patu. Adu peia noo-li.
8
Wini adeka piane ikilepa padele padele itonoleke ukuyake enilekepa odenemo keneya
Mosesene totono wia mekane bokuke eya wa wia mekaneya piko.
9
Pitimekawe kaime witi
ku yaku takoa kawame kautoa yakilepa witi ku -pala noma yamotono, timini po
toameamene wa wia mekaneya. Eni wia mekanepa Akolaliyo pitimekawe kai mama motoko
wa okome akeneya patu.
10
Akolaliyo toto mama motoko wa adeka pikome akeneya patu.
E e nimini ni okome akedeko. Panagome-kiti ipe toa itono wetia kugutukama pome wa
panagome eni ipele witakoya wakoa moma pome tokopa nipa takutame eni ipe witakoya
nee padeya moane nou wa wene pia tokala tiki.
11
Wida ipe nee lene matou toa tekete kini
yomini tele takatekomo totome oa metekoonano, kinikiya tone tigini tele takatekoya totome
oyake oia moamoko patu. Oyake oia moo-li.
12
Ete ali-kitame Yesunomo wida oa metikili ke
wa oa kinikiya pade ete tatia meamediki. Nitamedikino, toto keda takoa meamene wa
totome amele toko.
Nimo wa amele tokoyake kinike padeya deya oia motikileka toamokoo. Nipa totome
Keraisunomo oa aua yakilepa padeya-kiti ete memotoa tekete ni tiki wa kime onekemo
yakoa moamokaya tokale totome kinike padeyaka oia moamokoona.
13
Eya wene taneya
meamene. Tobou losu yapu keneke Akolalinele takaki ali-kitame one pikane nee eya pade
takoa moa naki. Ni Akolalike melepu eya mea lodo yotokoai tikita pupu takaki ali-kitame
eniya pade takoa moa naki.
14
Eina toa Ali Munagome tamene wa akene toapa onekemo oa
meteki-kitame oa metekilipa nipa take yename ke wa kinikiya pade takoa meamediki.
15
Nitamedikiyake kinike padeyaka oiane moamokouna. Opika i pipia wiane wetekakilepa
kinikiya pade memotoane tukuya mena. Kobume tuadekolupa oyake tuou wane uku. Nipa
kue eya oiane moamekene Yesunolepa pa takama yaku wane pinali anu wa kei pikoumopa
pata pamo eni akedeko wa padame no akaya tokolo uku.
16
Yesunomo oane auane yakilepa
Akolaliyo tamene wa oka tokolo tukuno, anu weneme toamukuno, pinali anu wa edoane kei
pimotoa-pe. Yesunomodo oane meamokolupa Akolaliyo no kibu moo.
17
Yesunomo anu
wenemedo akama yakenepa eni pupuke nee kue eya oyake oiane moamele toko. Nitamele
tokoyake onekemo akama yakilepa anu weneme toamuku. Akolaliyo onekele takamene wa
oka tokolo tuku.
18
Nipa Yesunomo akama yakukepa edeya motuku patu. Yesunomo oane
metekilepa nami kakamoane tuku wane kolotine yaku. Nipa onekemo akama yakukepa
padeya-kiti oiane moamele tokoyake padeyaka oiane moamuku wane kolotine yaku.
Poloyo Akolalinele Takama Yakome Tanemo
19
Padameka onekele-kama takoano ta wa no-pala amele toamokolo tekene pa atiki
toane meku. No nitane agomeke pade ali atoame Yesunomo yakoa momotoane tekene kini
pupu-kama takateku ago tetepo takoane meku.
20
Nitoane Yu yatene mekika pone mekenepa
eni yename Yesunomo yakoa momotoane tekene kini totono litiane tuku. Ni pade
Mosesene totonome moa lauaneya meki-kiti mekika pone mekenepa noanuka one totonome
moa lauane tetepo takoane mekene kini tikile litiane tuku.
21
Wa e ku pa yatene mekika pone
mekenepa nipa eni yene Mosesene totonome moa lauameneya mea tiki toane tuku. Nipa eni
ali atoameka Yesunomo yakoa momotoane tekene tuku. Enipa Akolaline totonome moa
lauameneya meane tuku wane ekene wamuku. Keraisuno totonome moa lauaneya meane
tuku wane ekene uku.
22
Yesuke wene tugoa meake kini kekanele tamene piti motaneya meki
yene mekika pone mekenepa nipa Yesunole wedoa takama pomotoane tekene kini tikile
litiane tuku. Nitima yakenepa e ku yatene ali atoa padeka-kiti Akolaliyo toa momotoane
tekene kiwi mekika pone mekenepa kini tikile litiane tuku.
23
Yesunomo edikoane oane
pupitikama yakilepa nipa Akolaliyo dikane ali atoa pewe wima pokome noka dekoa pewe
wimotoane tekene tuku.
24
Ali-kiti teyapea pote moa patukanali yotokete tikimo uku. Teyapea-kama peketeka
odene agome odene namolo agome moatekoya wane motoko. Nitikono, eniya wane
moadiyano wene pia tou toa Yesunole wedoa takama pamene.
25
Ele kule toa moa
patukanali yotiki peya kini tigini kini wa wedoa lauane lauane toa meki. Nipa ali atoame
namolo ago kei pia meatikiya wanepa moadiya wa wene pia tiki. Eniya wanepa pa yomo
tatame latiane makai wane tokome wete ala tootapeademe tokoyake tiki. Totome Yesunole
takakilepa oneme kei pia meatekoya pa pia kawatekoya mou wa toko.
26
Noanu teyapeane
pikilepa pone wipitiatekuta lene mekoane puku. Nika yumili mutoa pia winali yotiki ali-
kitame eko ali-kiti odepeta wia pitikadetepa ulu takameneya wedoa wiou toane eya toane-
kala kaku.
27
Anu tiginipa anu wene piku toa litia tomotoane tekene lauane lauane toane
meku. Nipa Yesunomo ete ali atoame yakoa momotoane oane meetekoanedo paka
etepeane pokolupa Akolaliyo no meatekoya meamoo wane tuku.
1 Korine 1 Korine
<<
99
>>
1 Korine 1 Korine
<<
10 10
>>
10
Yu Yenane Kaua-mikiti Etepea Pekenemo
1
Anu oya-lawe Moseseyo tone kaua-mikiti Idipi ta tewitikoa aua pokale tanemo kiwi
wene takakene uku. Eina yene peya ka yametekilepa tibu yali yapu a tibuke todo takama
ponokome taneya. Nitima ponokaka Kiane Kusa Ue ketoa eka lono pootapeneya.
2
Tibu
yali yapu todo takama ponokaka kusa ue ketakilepa nipa Moseseke lukoa mekete one-pala
odeneka bapetaise ue motekete mou toa taneya.
3
Nika Akolaliyo lawetane nee-kama
peyame moa nokala taneya. Maana wa ibini akene neeke uku.
4
Eina toa Akolaliyo yametane
kakene kue pake ue lene togata peyame ue nomoai toa nakeneya. Eni kuepa Keraisuke uku.
Eina kue kipala opia pou toa Keraisuyo kini noatekoiya moa lawetema pekeneya.
5
Enika eni
tubele tokale eneketeke kainya matiyame etepea toma pekeneya. Nitikoli Akolaliyo wene
poaneya mekomepa kibi yati kakene ta ludu pima yawa tua tadatapemotoa wakeneya.
6
Akolaliyo nile-kala tikilepa toto-palaka toateka adeka piipianeya. Nipa eina yename
padeya padeya poaneyake wene piitikaneya mea tane toa totome toamomotoa taneya.
7
Nitaneyano, tone kaua-mikiti padeka-kitame eya kuya yomini latia kakoa kowitane toa
toameamene. Enilekepa Akolaline bokuke eya wa wia mekaneya piko. Ali atoa kini nee ue
koukoa mekete natoe wa noa tagatekoapa kamoa tiabu toa kakeneya wa wia mekaneya
piko.
8
Eina yene padeka-kitame mone koua piamatekoi atoa koua pitane toa toameamene.
Eina yene edikoa meketepa odepeta ege egeta wa-kala kadukoa (23,000) tuutapeneya.
9
Wa
padepete kini poanele tokolepa Akolaliyo enoa kani nako patuno toa enato wa eina yename
toa enekoi-pete kaya-kitame peya mati tania tukakala taneya. Anu oya-lawe toto-palaka enile
takaya kekato.
10
Wa tone kaua-mikiti padeka-kitame eni maana nee kote tokale wakete
Akolali-pala ko oa akene toa toameamene. Nitane ali atoa wia tukatapemotoa Akolaliyo
dikateka edelo ago moa wetekaneya.
11
Akolaliyo tone kaua-mikiti-pala enile-kala tikilepa ete yene-palaka toateka adeka
pikome taneya. Ni toto mane oa moatekamo i i wa one bokuke wia mekamotaneya. Toto
ipete meko-kitipa wipitia ta patatekoya liti tigotokakoa meko.
12
Nitikono, poapeneya kaku
wa wene piko ago neeka etepea pokayano, wedoa yamene.
13
Setanuyo kiwi likoa enekilepa
nipa ete ali atoa peya likoa eneko toa kiwika likakala toko. Nitikolo ete pedekamele
toamokaya tokolo Akolaliyo yopia-kala kako. Ke enekakale meake poapeneya kamotoa
tokome eni poanele titi takoa poatekoi ka yametekala too. Nipa nitou wa oa pikana toa
taatekoa too.
14
Nitoono, ete ali-kitame padeya yomini latikoinakeyake lodo yoa kowitoa tikika titi
toma pamene.
15
Kiwi wene muno meane yene-pala ukuno, wene wedoa kibutukoa
meamene-ye.
16
Gerepi po ku ue meteke mekaneya moa Akolali-pala ke wa ootokoa mekete
naketepa nipa Keraisuno kamate patu kautakoa mekete one-pala odene wene-kama pia
nako. Palawe waneka moa popimoa naketepa Keraisuno tigini patu kautakoa mekete one-
pala odene wene-kama pia nako. Enipa nimini uku-pe.
17
Anu oya-lawe toto kainya mati
mekoyake odene tigini kaaloganeya meou toa mekete nako. Odene palawe wane-kama moa
popimoa nokala tekete ni uku.
18
Iserele yenamepa Akolalike padeya mea lodo yotikilepa padekapa Akolaline takoa
yoa ni padekapa kini wa moa naki. Nipa Akolali-pala odene wene-kama pia tiki.
19
Pa yatene
ali-kitame paya gode-kitike melepu eya mea lodo yotiki wane ukupa nipa paya gode-kiti
meane tetepo takakene uku patu. Ni melepu eyame paya gode-kiti wene kekamele toko
wane ekene uku patu.
20
E 'e mena. Akolalinemo yakamene pa yename melepu eya lodo
yotikilepa ipono eyake mea yokala tiki. Akolalike mena. Edikakilepa ipono-pala odene
wene-kama pia tiki. Anu oya-lawe kiwi ipono-pala odene wene pia meameamene.
21
Ali
Muno agono takane meteke mekane gerepi po ku ue naki yenepa iponane takane gerepi po
ueka namele toamoko. Ali Munagono takane walaike mekete nee naki yenepa iponane
takane nee eya namele toamoko.
22
Ae, Akolalinele-pala iponaneleta odeneka takakete
takakilepa nipa Akolali toto-pala wene poaneya memotoa toa eneki patu. Onepa telekagono,
toto kibu motokalepa one edoa ete pedekato-pe.
Kekaneya Latikaneleke Akenemo
23
Pade-kitame ekete totopa Keraisuno ali atoano, opi tone kekaneya latikakoole peya
tamele toko wa iki. Ae, kini kekaneleka tamele toko wa padele padele peya tikilepa nipa
epetanele-kama tiki-pe. Padele padele peya tikilepa nipa kini oya-mikiti auapekile-kama tiki-
pe.
24
Kinikile-kama toameneya ete-kitaneleka takakala tamene wane uku.
25
Makesike piko
melepu eya iyapa iponaneya patu wa pinago pitia yakamoa pa tatepe toa moa pamene wane
uku. Eniya melepu nakilepa atiki toa mekete nomotoane ni uku.
26
Itonoka itono ludu pia
kawa tokoyaka eniya peyapa Akolalineya wa one bokuke wia mekaneya pikolo uku.
27
Akolalinemo yakamene agome-kiti one yapu nee noano noo wa melepu eya takoa
lawetekalepa nipa iyapa iponaneya patu wa pitia yakamoa pa moa namene. Einagomedo e e
wa okalepa namene ya moono, pa moa namene.
28
Wa panagome-kiti nepala okome i
melepupa iponoke mea lodo yotaneya wa okalepa noameamene. Einago wene keda
takakayano, noameamene.
29
Ne wene keda taneya mekayano, noameamene wane ekene
wamuku. Nepala okago mama motekene uku. Nikepa panagome eya wa-kiti oko. Einagopa
Yesunomo wedoa wene toamene ago tokome eniya melepu namene piti motokome okano,
nitane agono wene edoane litiane tomotoa-pe.
30
Akolali-pala ke wane ootokoanepa oyake
namele toko. Eniya melepu moane nakolupa tone noamatekoya wini nako wa dikane agome
no edoa kikoa akamotoa-pe wa panagome-kiti oko.
31
Nimo wado okalepa eya wane topo takoane ou. Melepu nee ue eya moa nakeka
padele padele tekeka ete-kitame Akolali kei pimotoane tekene tamedeku wa tokala tamene.
32
Yesunomo yakoa motane yene Yu yatene ali atoaka pa yatene ali atoaka wene poaneya
mea etepea pokayano, kini wene moa koigakileka toameamene.
33
Noanume padele padele
tikilepa ali atoa peyane wene epetekoane enoane tokala tukuno, kimeka tamene. Anukule-
kama touno wene pianeya pima yakuya mena. Akolaliyo ete ali atoa toa momotoane tekene
kiwi peyanele takama yaku.
1 Korine 1 Korine
<<
10 10
>>
1 Korine 1 Korine
<<
11 11
>>
11
1
Keraisuyo tane toane litiane tuku toa kime toma pamene.
Losu Yapu Oboa Mekete Toatekomo
2
Kime no wene taneya-kama mea ni anu mane mane oane olaukakounakale wedoa
pikoa kakete tikino, ke wane kiwi kei piane uku-ye.
3
Eya wane kiwi wene takakene uku-ye.
Toto ali yatenepa Keraisuke-kama lukoa meko. Atoa yatenepa kinikaneke-kama lukoa meki.
Keraisu einagopa Akolalike-kama lukoa meko.
4
Panagome nunagu wateaneya kakome
Akolali kowitoa one agale to awea akoa tokomepa one lukoa meko ago Keraisu ya
takakome toko.
5
Pade atoame nunagu wateameneya kakome Akolali kowitoa one agale
to awea akoa tokomepa onekane eni ya takakome toko. Nipa tobou pine pitutapeneya
kakene tetepo takakome toko.
6
Nunagu wateamademe wako atoapa one tobou pine
pitutapemotoane uku. One pine pitukaya wa ya motokomeka teigaya wa ya motokomeka
one nunagu wateaneya-kama memotoane uku.
7
Ali yatename kowitoa kaketepa kini tobou
pine kauatiki toa mena. Akolali pa teleta tootapeneya meko ago adeka pianeya kakili tekene
ni uku. Atoa yatenepa mea epetekane ali yatene adeka pianeya kaki.
8
Akolaliyo ali latikilepa
atoa moa latianeya mena. Wa atoa latikomepa ali moa latianeya.
9
Akolaliyo ali latikomepa
atoane latikaneya menake wa atoa latikome aline latikaneya.
10
Nitaneyano, ipa onekaneke
poti lukoa meadeko wa edelo yatename enekete omotoa tekete atoa yatene nunagu
wateaneya-kama meamediki.
11
Nitamedikiyake Ali Muno-pala lipua meketepa alime atoa
mape moa atoame ali mape moa tiki. Nipa onekele tutu tutu wa takamele toamokolo ete oto
wa mape mootakutukakala tiki.
12
Nimo ikilepa eyake uku. Namolo atoapa alike latianeya.
Opi ali mati opikilepa atoa yatename tokoya. Eniletapa padele padele peya titia toko ago
Akolali oneme titia taneya.
13
Kipala i ukumo wene kibutukoa meamene. Pade atoame-kiti nunagu wateameneya
kakome kowitikomepa nipa epetekoa toko patu. E 'e mena.
14
Panago pine kiliga
kotomaneke pianeya kakilepa nipa ya tanele eni toko.
15
Atoa pade one pinepa lapia
kotomaneke pianepa nipa koniyoya wa totome kei piko. Akolaliyo atoa latikilepa one pine
ludu taneya witakome tobou kaumotoa taneya.
16
Ina ukulekepa panagomedo neno oa
kakalepa eya wane ou. Kipala i ukupa ete Aposelo ali-kitame odenemo-kama oa olaukakala
tiki. Ta piko peyakeka Yesuno yatene ali atoa peyame eni totono litia tiki.
Gerepi Po Ku Ue-pala Palawe Waneta
Nakete Toatekomo
(Matiu 26:26-29, Make 14:22-25, Luke 22:14-20)
17
Kime eya tikilekepa kei piamuku. Kiwi losu yapu keneke oboa meketepa Yesunole
wedoa takamekete toa potokakala tekete tikili uku.
18
Yesunole takoa oboa meketepa neno
oa pili pili tokala tiki wa namolo takoa akoa akedekimo yatekene ni uku. Eni yatekenepa i i
wa akedikimo pade nimini ekete tiki wane wene piku.
19
Neno oa pili pili toa mekilepa
Akolaliyo kei piateko ali atoa i i wa ete-kitame takoa enemotoa tikino, tamele toko.
20
Ae,
palawe wane-pala gerepi po ku ueta noadete koukoa meketepa ali atoake Yesu tuanemo
wene taneya mekete namedikiyake eyaka pale tokala tiki.
21
Pade ali atoa kobume tuaneya pa
memotoa kiwi padeka-kitame nee ue eya wete noa tagatapekala tiki. Nipa gerepi po ku ue
noa pia leau oa mekala tiki.
22
Ae, widikakilepa kini yapu toameneya tokome losu yapu
keneke oboa mekete tiki-pe. Yesunomo yakoa motane ali atoa paya tetepo takoa ni
ponopene ali atoa ya takoa toadete ni tiki-pe. Widikakikepa kipala edemo wane uku patu.
Kiwi kei piane-pe. Kei piamou-li.
23
Ali Muno agome no olaukaka toane kiwi olaukakouna. Likonu Yudaseyo Ali Muno
Yesu one-pala poi te iane yenane yonoke pene moa piameneyake Ali Munagome palawe
wane moa eya taneya.
24
Akolali-pala ke wa ootokoa popimotokome okome ipa anu
tiginino, moa noe. Kiwike tuateku adeka pikene ni uku. Kiwi oboa mekete-kama no wene
taneya mea dikoa moa nokala tamene wa akeneya.
25
Eina toa kini nee nootokoa mekete Ali
Munagome mete moa metekome okome i gerepi po ku ue meteke mekaneya noe wane
metekilepa Akolaliyo oi pedoa pikana toane wenele litia toatiki totono kadimo oane
yametekene tuku. Eni totono taatekoane tikilepa anu kamate ponomotoane tou. I meteke
mekane gerepi po ku ue moa nakete-kama no wene taneya meamene wa Ali Munagome
akeneya.
26
Nitaneyano, Ali Munago wete wakapea noameneyake palawe wane popimoa noa
gerepi po ku ue noa tekete-kama one tukome tanele i i wa ete ali atoa wene takakete toi.
27
Ali Munono palawe wane-pala gerepi po ku ueta paya nou toa moa nakagomepa Ali
Munono tigini kamateta paya tetepo takakome poanele eni tokome too. Nitikalepa Akolaliyo
kibu moo.
28
Nitikayano, eya tamene. Panagome-kiti eni palawe wane popimoa noa mete
moa gerepi po ku ue noa toademe mekomepa pinali one tepene poane wene pikutu patu wa
tetoa enamedeko.
29
Ni edoa-mo. Panagome-kiti palawe-pala gerepi po ku ueta moa
nakilepa Ali Munono tigini wene toameneya mea tokalepa Akolaliyo kibu moamele too.
30
Edikakilekepa anu oya-lawe kiwi kainya mati yene taneya mea tigini motaneya mea tiki. Ni
padeka-kiti tua pokala taneya.
31
Eniya wete noameneyake tone tepene poane wene pikutu
patu wa tetoa enekolopa Akolaliyo toto kibu moamoo.
32
Enika eni ke enekakole enemotoa
tikilepa Ali Munagome toto mane oa motokome toko. Nipa itono peku noai tiki-kiti kibu
motokomepa toto kibu moamademe ni toko.
33
Anu oya-lawe kime Ali Muno agono palawe-pala ueta moa noadete oboa meketepa
kini oya ali atoa peya obonomotoa nepia meamene.
34
Papetedo kobume tuaneya meketepa
nipa pa nee ueta kini kini yapu yapu mekete namene. Noomotekete losu yapu pote koukoa
mekete Ali Muno agono palawe-pala gerepi po ku ueta poti mekete namene. Nitikolipa
Akolaliyo kiwi kibu moateko toa mena.
Kipala pademo oatekumo-kiti pa pikono, wida none mekene ouno, pa nepia meamene.
1 Korine 1 Korine
<<
11 11
>>
1 Korine 1 Korine
<<
12 12
>>
12
1
Anu oya-lawe Epetane Yominiyo peku lawetekomo wene takadene ukuno, yakamene.
2
Papete kiwi pa yatene ali-kitame Yesunomo wete yakoa moameneyake kini yoname
mitikoa latikoinakeya-kitike padeya mea lodo yoai tomotoa Setanuyo lia aua pokala taneya.
3
Nitaneyake opi eya wane wene takakene uku. Epetane Yomini awinome wene takako ago
odenemeka Yesu einagopa Akolaliyo wakene ago wa ikilepa toamoko. Ni Epetane Yomini
awinome wene takakagome odene Yesu einagopa one Ali Muno wa amele toko.
4
Yesunole ele kule takateko pekupa odene ago Epetane Yominiyo-kama lawetekala
toko.
5
Ele kule toateko peku noa teketepa odene ago Ali Munagonole-kama takakala toko.
6
Ele kule tikilepa odene ago Akolaline tele patu-kama kautakoa kakete tokala toko.
7
Epetane Yomini toto peyake tutu tutu wa awinome mekome peku lawetekilepa tone tone
auapenali yomotoa tokome ni toko.
8
Nitoa panago-kiti wene muno meaneya mekome
oateko peku lawetoa wa panago emo kumo pine to a oateko peku lawetoa toko. Enilepa
odene ago Epetane Yominiyo-kama toko.
9
Ni panago-kiti Yesuke wedoa wene tugoa
meateko peku lawetoa wa panago-kiti yene tane ali atoa latekateko peku lawetoa toko.
Enilepa odene ago Epetane Yominiyo-kama toko.
10
Ni panago-kiti ele kule tubele toateko
peku lawetoa wa panago-kiti Akolaline agale to awea akateko peku lawetoa toko. Ni one
peku lawetekolo panagome-kiti eya wa wene toa toko. Ete-kitame ikimo yatekomepa imopa
Epetane Yominiyo aka wa akene toa akedeko, imopa Epetane Yominiyo aka wa akene toa
mena wa wene toa takoa eneko. Ni Epetane Yominiyopa panago-kiti agopa tane agaleke
emo kumo oateko peku lawetoa wa panago-kiti enika enimo pine to a oateko peku lawetoa
toko.
11
Ele kule toatiki peku lawetekilepa odene ago Epetane Yominiyo-kama toko. Nipa
one wene litia tokome kini toatiki peku lawetekilepa odene odene wa takoa moa lawetekala
toko.
Kawa Yono Eya Koukalogoapa Ali Wa Okomo
12
Anu oya neke kawa yono tobou tigini eya tutu tutu wa kawake odeneya
koukalogakoya. Eina toa toto peyapa odene ago Keraisuno tigini tetepo taneya meko.
13
Nipa Yu yene pa yene kueme topo toa moa egetane yene ta pine yene toto peyake odene
ago Epetane Yomini tutu tutu wa awikolokamotoa ue motokaneya. Ue eni motokakilepa
kabe koukoa odene ago Keraisu-pala lipukoa taneya. Nitoapa ue epetaneya nomoai
toatekota yameou toa one peku namene wa Akolaliyo one Epetane Yomini toto metaneya.
14
Tone tiginipa odene tiginike yono kawa enika eni wane kainya tutu tutu wa kako.
15
Nipa neke kawame-kiti nepala okome onepa yono menano, tigini-pala lipukoya wane
mena wado okalepa pinago neke kawapa paya wane tetepo takoa waoo-pe.
16
Neke
kapidime-kiti nepala okome onepa lene menano, tigini-pala lipukoya wane mena wado
okalepa pinago neke kapidipa paya wane tetepo takoa waoo-pe.
17
Anu oya ne-kiti kapidi
eya kawameneya lene-kama kaatapeneya meadekalepa pademo okoimo edoa yakade-pe.
Nika neke timini eya kawameneya kapidi-kama kaatapeneya meadekalepa padeya ka lono
tokoya edoa yakade-pe.
18
Akolaliyo one wene litia tokome lene kapidi timini kabunu yono
kawa eya koukalogoa ali latianeya.
19
Nitameneya lenedo odene latikomepa nipa ipa ali latiku
wa amele toameneya.
20
Neke lene kapidi yono kawa enika eni wane kainya mati kakoyake
nepa odene ali wini kako.
21
Lenemedo yono-pala agaleme okomepa neke toatekole pade piamoko wa paya
tetepo takoa wawamele toamoko. Ni lene timinimedo kawa-pala agaleme okomepa neke
toatekole pade piamoko wa paya tetepo takoa wawamele toamokolo uku.
22
Eya waneka uku. Tone taba tokoya-kitido toamokalepa pa tiobali atoa meoo.
23
Ni
tone paya tetepo takakoya-kitipa mama motekete wedoa kalako. Nipa leneme enamatekoya-
kiti padame enekaya kekoa mamina moa kawa paigako.
24
Nitikoyake tone leneme
enatekoya-kitipa koniyoya tokome maminame kaukoya mena. Enika eni peya latiane ago
Akolaliyo yono kawa lene timini eya kibutukoa ali latikilepa tone paya tetepo takakoya-kiti
mama motekete kalamotoa tokome taneya.
25
Nitikome enika eni peya paya tetepo
takakoya-kitika koniyoya-kitika ete oto wa auapenali yomotoa tokome kibutukoa ali
latianeya.
26
Nitaneyano, yonome-kiti tete motokomepa eteya-kitameka tete odeneka moa
kako. Wa panagome pade wanedo takoa kei pikolopa eteya-kitika odeneka wedia kako.
27
Eina toa Akolaliyo kiwi koukalogakilepa odene ago Keraisuno yono kawa tigini eya
tetepo takoa toko. Nipa onekele tatite toa takamotoa tokome toko.
28
Akolali nitiko agome
tone Yesunole takatekoole tutu tutu wa tatimo tatimo taneya. Nipa namolo takoa Aposelo
ali-kiti moa kakoa ni taku takoa one agale to awea akatekoi yene moa kakoa ni tebolo takoa
onekemo olaukatekoi yene moa kakoa taneya. Ni liti padele padele tubele toatekoi yene moa
kakaneya. Nititikoa eya kuya yene tane ali atoa latekatekoi yene ni ali atoa auapeatekoi yene
ni one ali atoa talo toatekoi yene ni agopa tane agaleke emo kumo oatekoi yene moa
kakakala taneya.
29
Eni peyapa Aposelo ali-kiti mena. Peyame Akolaline agale to awea
akakiya mena. Peyame Akolalinemo olaukakiya mena. Peyame padele padele tubele tamele
tokoya mena.
30
Peyame yene tane ali atoa latekamele tokoya mena. Peyame agopa tane
agaleke amele tokoya mena. Peyame eni agopa tane agaleke akene toa pine i i wa to awea
amele tokoya mena.
31
Padameka enika enile-kama tamele toamokoyake Akolaliyo tobou
kakoa laweteko peku noada wa eni toatikileke wene piitikaneya meamene.
Eteya totono peya moa patukako totono opi i yametekuno, yakamene.
1 Korine 1 Korine
<<
12 12
>>
1 Korine 1 Korine
<<
13 13
>>
13
Eko Ali Atoake Wene Mekakete Toatekomo
1
Ali-kitame yakoa iki agalekeka edelo ali-kitame yakoa iki agalekeka emo kumo agale
muno pewe kakoane amele tokolo ikilepa tekeneke eko ali atoakedo wene mekameneya
meane tadekolupa nipa wagome-kiti do u do u oko toane ni tue kabeke loko pianeya loko
lapa oko toane tekene pata pamo eni ekene tou.
2
Akolaline agale to aweane akateku peku
noane ni one papete kaukoa mema nekenemoka pademo pademotaka wene tootapeane ni
oneke wedoane wene tugakouya tekene tono-kiti padeka to a kapomotoane toane enika
enilepa tekeneke wa eko ali atoakedo wene mekameneya meane tadekolupa nipa paya ago
mekene pata pale eni tekene tou.
3
Ponopeneya-kiti auapekene anukuya peya tatitapeane ni
Yesunole wedoane takama yakilepa no-pala poi te iane yename no toele wia pitikamotoane
toane enika enilepa tekeneke wa eko ali atoakedo wene mekameneya mekene tadekolupa
nipa ipe yolo enadene keneya enipa pata pale tekene tou.
4
Eko ali atoake wene mekoa meateko kotu kakoa wene mekoa mekagomepa nipa eya
toomoa poko. Ete-kitame meteki tetepa ete topo takameneya poti mokoa kawa ni eko ali
atoa mama moa auapea kinikiya tepi moamoa ni mate agale wamoa pinali one wa kei
piamoa toko.
5
Edikoa mekomepa ya tanele toamoa onekele-kama toamoa toko. Ni
mekamotokome pitakome kotimi yoamoa ni ete yename one-pala poanele tikileke oi
moameneya po letu mekamoa toko.
6
Ni ete yename padele padele koiga koiga tikile
enekome wediamokome ni ete-kitame ele kule kiyo akenele tikili enekome wedia meko.
7
Ni
ete-kitame one-pala padele poanele tikilipa kini tanemo i i wa wete to awea wamoa pa
luaneya meko. Naniko epetekoa tiki patuno nepiane enou wa ke enekakolo meake
poapeneya kako.
8
Eko ali atoake wene mekoa meateko kotu kakoa wene mekoa meketepa nipa wene
mekoa mea wawamoko. A tibukeka nitima poo. Opi papete Akolaline agale to awea akateko
peku noa ikilepa tokoyake a tibuke to awea akateko toa mena. Opi agopa tane agaleke
oateko peku noa ikilepa tokoyake naniko a tibuke agopa tane agaleke pademoka wamoo.
Opi emo kumota wene toateko peku nakoyake naniko a tibuke enika enimo wene toateko
toa mena.
9
Opi totome Akolaline agale to awea akakilepa one agalepa nami deya yakou toa
yakoa to awea akako. Emo kumo wene tikilepa nika pa nami deya wene toko.
10
Nipa
Akolaliyo one papete wene topikanakale taatekoa toa togatapekalepa namolo peku
nootokoa tekei tokoonakale totome wa pade toamoo.
11
No dee mati deya mekene agale
oane ni ile tou wane wene piane ni ele kule toatekou wene kibutukoane meane tikilepa anu
yagono mati-kitame tokoile-kama tokou. Opi wetini ago kakene tekene no de mati deya
mekene toma yakounakale tewitikoane wawane wa toamuku.
12
Opi Akolaliyo tokolepa ue
mineke yomini takane tetepo tokolo tokome totome keleyo enamokoyake naniko tone
leneme pogakoa enetapeoo. Opi onekemopa pademo-kiti katekoane wene toamukuyake
naniko wene tootapeou. Nipa no toma yakumo-kama oneme wene tootapeko toane nitou.
13
Eya tebololepa a tibuke pote meketeka pa toma-kala poo. Akolalike wene tugoa mea
ni one peku noane tagatapeada wa nepia mea ni ete oto wa wene mekanali yoa too. Eni
tebolole a tibukeka pa toma peketepa ete oto wa wene mekanali yoma pikile tobou kakoa
too.
1 Korine 1 Korine
<<
13 13
>>
1 Korine 1 Korine
<<
14 14
>>
14
1
Eko ali atoake wene mekoane meateku peku noane tagadiya wa wene pianeya
meamene. Nike lokoa etele toatikileke wene piitikaneya meapa Akolaline agale to aweane
akou wa eni toatiki peku tobou kakoa toa enamene.
2
Agopa tane agaleke oko agome eko ali
atoa-pala okoya mena. Akolali-palapa oko. Nipa papete kaukoa meanemo yominime wene
takako toa oko.
3
Nitikoyake Akolaline agale to awea akakagome eya toko. Akolaline yapu
wikakou toa onekemo i i wa eko ali atoa olaukoa ni ile tamene ile tamene wa mane mane oa
toko. Ni ke enekakolo meki-kitane wene epetekakala toko.
4
Agopa tane agaleke oko agopa
pinali one wa auapeko. Akolaline agale to awea akako agomepa yapu wikou toa Yesuno ali
atoa mape moa auapeko.
5
Kiwi peyame agopa tane agaleke omotoane ukuyake Akolaline
agale to aweane akou wa tobou kakoa omotoane uku. Ni edoa-mo. Panagome-kiti Akolaline
agale to awea akakomepa nipa padele akole tokome agopa tane agaleke oko ago moa
patukako. Wa panagome-kiti agopa tane agaleke pademo kaukoa ootokoa kakome pine ina
wado to awea akakomepa ete ali atoa auapeko.
6
Nipa wida none mekenepa Akolaliyo wene takanemo to aweane wamoane onekemo
pade pine ina wane wene takamoane one agale to aweane akamoane pademo olaukamoane
tekene agopa tane agale-kamado ekenepa kiwi edoane auapemotoa-pe.
7
Panagome-kiti
mo io wiane tulutu oane tuku wa oake oa potokakolopa ete-kitame iya lo oa tadeko wa edoa
wene tomotoa-pe.
8
Wa panagome-kiti poyo ali-kiti poike kamotokademe beta wiake wa
wia potokakolopa nipa poike kamoa pomotoa tokome beta wia tadeko wa teyo poike
poademe nodokamotoa-pe.
9
Enakale toa Akolalinemopa yakatiki toa oa meamekete agopa
tane agalekedo pademo oa meteketepa nipa pupulege popokakome okomo atuponoko toa
pata pamo ekete tiki. Nitikilipa ete-kitame onekemo edoa yakoa momotoa-pe.
10
Ali atoa
kini kini take mea kini yakoa iki agale okala tiki. Nipa kini oya-mikitame yakatiki toa-kama
okala tiki.
11
Panagome-kiti nopala pademo ikilepa tokoyake one yatename yakoa iki
agaledo yakamukulupa einago totapa monekagota tetepo takatakutukoa meko.
12
Kime
nitikaya tokolo eya wane uku. Akolaline peku noane tou wa kime wene pia mekino, one
yapu wikakou toa Yesuno ali atoa wedoa mape wiatiki peku noai tamene.
13
Kipala ina ukulekepa eya waneka uku. Agopa tane agaleke okagomepa einagale pine
to aweane oateku peku lawetamene wa Akolali kowitimotoane uku.
14
Noanume-kiti agopa
tane agalekedo oane kowitikenepa nipa anu yominime wene takaka toane kowitikene tou.
Nipa anu kowitikene okoumo agopa tokale kowitikene tou.
15
Nipa edeku patu. Eya tou.
Anu yominime wene takakalepa agopa tane agaleke kowitikala tou. Wa padepete-kiti noanu
yakoane uku agaleke kowitikala tou. Nika anu yominime wene takakalepa agopa tane
agaleke lo okala tou. Wa padepete-kiti noanu yakoane uku agaleke lo okala tou.
16
Anu oya-
lawe neke yominime wene takako toapa agopa tane agaleke Akolali-pala ke wa oa one kei
pia kowitoa kakoka neke okagale yakamoko agodo nome yatekomepa edemo oko patu.
Nipa neke kowitike okomo yakamokome tokome winimopa nimini oko wa einagome amele
toamoko.
17
Nipa agopa tane agaleke ke wa kowitike okomo epetekoa ekeka einago
auapeamoko.
18
Noanumepa agopa tane agaleke kowitikilepa kiwi moane patukoane lugutukoane
tukuno, Akolali-pala ke wane uku.
19
Nitikuyake eya waneka uku. Yesuno ali atoa koukoa
mekika agopa tane agaleke agale ludukiyado okoane kakenepa ali atoa wedoane
auapeamuku. Nitameneya kini yakatiki toane agale tiginido ekenepa wedoane auapeku. Nipa
Yesuno ali atoa koukoa mekika kini yakatiki toane amedeku wane wene pikene uku.
20
Anu oya-lawe kini toatikile wene kibutua mekilepa papete mati mekete tokoina toa
toameamene. Nitameketeka de matiyame-kiti poanele tamene agopa tokolo meko toa
meamene. Ni pade Akolalinele takatikile wene kibutua meketepa wetini yename tiki toa
tamene.
21
Kini litia toatekoi totono i i wa wia mekane bokuke eya wa wia mekaneya piko.
I yatene ali atoa-palapa mone pa yename kini yakoa okoi agaleke pademo pademo oa
metekapomotoane wetekakoluka yakamadete wakala toi wa Ali Munagome oko
wa papete wia mekaneya.
22
Nitaneyano, panagome-kiti agopa tane agaleke ikilepa nipa ipa Akolaline agale patu
kautakoa kakome akedeko wa Yesunomo yakamene yename wene tomotoa eni oko. Nipa
Yesunomo yakane ali atoa-palapa okoya mena. Panagome-kiti Akolaline agale to awea
akakilepa nipa Yesunomo yakoa motane yename yakatiki toa eni oko. Nipa Yesunomo
yakoa moamene yene-palapa okoya mena.
23
Nipa ali atoa koukoa mekete agopa tane agale-
kitike Akolali odene-pete kowitikete kowitikolido kini agale yakamene yeneka Yesunomo
yakamene yeneka note yateketepa ipa leau ekete iki wa oi.
24-25
Wa peyame Akolaline agale
keleyo to awea akoa kakoika pa agoka Yesunomo yakamene agoka nome yatekome eya wa
oa too. Ae, nimini iki. I agaleme anu tepene piku wene keleyo witakakono, no poane ago
tadeko wa one namolo wene wia wakome one kakata aua pitakome Akolali kei pia kowitoo.
Nitikome okome kiwi pakeke Akolali nimini nome kakedeko wa to awea oo.
Losuke Akolalinele Wedetekoa Takatikimo
26
Anu oya-lawe inapa eya wane ekene uku. Kiwi koukoa mekete-kama eya tokala
tamene. Kini papete wene kibutupikoina teketepa panagome lo agale oa ni panagome mane
mane oa ni panagome Akolaline agale to awea akoa ni panagome agopa tane agaleke
pademo oa ni panagome agopa tane agaleke akene toa pine to a oa tamene. Nipa padele
padele tikilepa Akolaline yapu wikakou toa one ali atoa auapekala tamene.
27
Agopa tane
agaleke oatikimo pikolopa takuta tebolomeka odene odene wa okala tamene. Nitikilipa agale
pine to awea akakagome i i wa ete yename yakamotoa to awea akakala tamene.
28
Pine
to awea akateko ago kawamokolopa nipa Akolaliyo odene yakamotono, kini eni oatikimopa
to awea wameneya kini tepene lukoa meamene.
29
Wa Akolaline agale to awea akatikimo
pikolopa ali takuta tebolomeka i i wa okala tamene. Nitikili yatekete ete-kitame ipa Epetane
Yominiyo wene takakomo iki patu wa takoa enekala tamene.
30
Namolo agome Akolaline
agale to awea akoa kakoka Akolaliyo imo akamene wa one mekoya liti meka ago pade wene
takakolopa nipa namolo agale akakanakagome agale teigoa witipitoa memotoane uku.
31
Nipa Akolaline agale to awea akakilepa kiwi peya wene weye akoa olaukoa toatiki toa
odene odene wa tokala tamene.
32
Akolaline agale to awea akako agopa pinali one wa yopia
kakome uutukoa poti to awea akakala toko.
33
Akolaliyopa kime one agale to awea akakilepa
togo togo wametekoa uutukoa poti akamotoa okono, odene odene wa to awea akakala
tamene.
Yesuno ali atoa ta piko peya koukoa mekete-kama
34
atoa yatename agale wametekoa
poti memotoane uku. Nipa agale wameneya pa yakakoa memotoane uku. Kini totono piko
toa ali yateneke lukoa mekiya tokome nitimotoane uku.
35
Pademo pitia yakatikimo pikolopa
nipa kini kini yapu yapu wakapea pote meketepa kinikane pitia yakakala tamene. Ni edoa-
mo. Atoa yatene losu yapu mekete agale ikilepa ya tanele eni tekete tiki.
36
Beita, Akolaline agale kime wida titia akakoo wa anu agale yakamekete iki patu. One
agalepa ete ta-kitike oa tugameneya kiwi mekita wida odene oa tuganeya waka iki patu.
37
Kiwi panagome-kiti Akolaline agale to aweane akaku ago one meku wa wene pia ni
Epetane Yomini oneke awitaneya meku wa wene pia tokopa nipa i pipia oi motokomepa
eya wa oa tomotoane uku. No Polo einagome kiwike i wia wetekadekomopa Ali Muno
agome akamene wa akene toa akeneya tadeko wa yakoa momotoane uku.
38
Anu i ukumo
yakoa moamokome pamo tetepo takoa wakalepa one okamoka yakoa moameamene wane
uku.
39
Kipala ina ukulekepa Akolaline agale to aweane akadiya wa wene pianeya meamene.
Pade-kitame agopa tane agale oa kakilipa edikoa wameo wa wameamene.
40
Padele padele
koukoa mekete toatikilepa wedetekoa poti tokala tamene.
1 Korine 1 Korine
<<
14 14
>>
1 Korine 1 Korine
<<
15 15
>>
15
Yesu Tuaneyake Akolaliyo Kamotokanemo
1
Anu oya-lawe Yesunomo papete olaukakounakamo opa wene takadene uku.
Onekemo i i wane oane metekolu kime yakoa motokoina. Opa einagale patu poapeneya
kautakoa kakete tiki.
2
Yesunomo i i wane olaukakounakamo wedoa pikoa kakilipa
einagaleme kiwi toa motoko. Paya nou toa yakadekolipa kiwi toa motokoya mena.
3
Noanu yakoane motokou toane tobou kakoane kipala eya wane olaukakouna.
Akolaline bokuke papete wia mekapiane toa taatekoa Yesu nome tukilepa tone tokoo
poaneleke ni taneya.
4
One tigini moa aua pipaneyake ta tebolo takoa pataka-pete Akolaliyo
moa kamotokaneya. Nipa one bokuke papete wia mekapiane toa taatekoa taneya.
5
Nitikale
kamoa pokome one lene timini eya yene yamepokala taneya. Namolo takoa Pita yamea wa
naniko one Aposelo ali-kiti koukoa mekoita pome pono yamea taneya.
6
Nititikaneyake one
oyali atoa ege kadukaka pogi kakoapeta kadukoa (500) koukoa mekoita pome pono
yamepaneya. Einapete pono yametane ali atoapa natetekoa tukoiyake ete peya mati pa meki.
7
Wa naniko one wamene ago Yame mekata pome pono yametekoa one Aposelo ali peya
koukoa mekoita wa pome lene timini yamea taneya.
8
Nititikaneyake wipitikome no-kitika
one Aposelo ago latikome no pono yamenoka. Nopa atoame mati koula lakapea opiane
tetepo tane agoke toka.
9
Papete Akolaline ali atoa tete meemoane pokounake Yesuyo nopa paya ago keku
Aposelo ago tetepo takoa wakinakeya tokake toameadeko.
10
Nopa dikakou agoke
Akolaliyo pewe witikome one Aposelo ago takoa moa kakakilepa pata pale toameadeko.
Papete poane agomeke naniko Akolalinele wedoane takama pekene ete Aposelo ali peya
moane patukatapekou. Nipa anu weneme tokouya mena. Akolaliyo pewe-kama wia yopia
kakale tekene tokou.
11
Ni pade Yesunomopa noanumeka oane meane ete Aposelo ali-
kitameka oa mea tekete odenemo-kama oa mekala toko. Kime yakoa motokoinakamoke
uku.
Akolaliyo Tuane Ali Atoa Kamotokatekamo
12
Toto Aposelo ali-kitame eya wa olaukakoona. Akolaliyopa Keraisu tuaneya pikata
moa kamotokaneya. Nimo wa olaukakoonake kiwi padeka-kitamepa Akolaliyo tuane ali
atoa moa kamotokamoo wa akedikili yateku. Edekolo enimo wa iki-pe.
13
Kini eni
akedikimodo nimini akedekalepa nipa Akolaliyo mana Keraisuka moa kamotokameneya.
14
Ni mana Keraisudo moa kamotokameadekalepa onekemo kipala oa metekoonakamo pata
pamo okoo. Ni Keraisudo kamoa poameadekalepa oneke wene tugoa mekilepa pata pale
tekete tiki.
15
Ni pade Akolaliyopa Keraisu moa kamotokameneyake moa kamotokaneya wa
totomedo eketepa onekemo uku pekete toa kapene agaleka oko. Ni tuane ali atoado moa
kamotokamoo tadekalepa mana Keraisuka moa kamotokameneya.
16
Akolaliyo tuane ali
atoado moa kamotokameadekalepa mana Keraisuka moa kamotokameneya.
17
Ni mana
Keraisudo moa kamotokameadekalepa kini Keraisuke wene tugoa mekilepa pata pale tekete
tiki. Kini tokoi poaneleka kogameneya pa mekete tiki.
18
Nika Akolaliyo Keraisudo moa
kamotokameadekalepa Yesuke wene tugoa mea tuane ali atoa etepea tua atua pekeneya.
19
Papete itonoke mekete Yesuke wene tugoa meatekole pikoyake wa wipitiketedo etepea
tua poo tadekalepa kini Yesuke wene tugakilepa pata pale tadiki wa eko yene peyame toto
ela moa kawei. Nipa ete yene ela motiki toa moa patukoa toto ela mati mokoa kawei.
Adam Keraisutame Tokala Tanemo
20
Mana Keraisu tuaneya pikale Akolaliyo moa kamotokaneya-li. Pegetoa mana moa
kamotokakilepa toto tua pokolo moa kamotokateka adeka eni piipikome taneya.
21
Namolo
ago Adameyo poanele taneleke oneke tagene ali atoa peya tuma-kala nekeneya. Wa
padenakago Keraisu tuake wa kamoa pekeneya tokome toto tuake wa kamoa poo.
22
Toto
peyapa Adam einagono peku noai tekete etepea tuma-kala poko. Nitoake padenakago
Keraisuno peku noai teketepa tuake wa kamoa poo.
23
Kamoa pikilepa pato takoa
toameneya Akolaliyo wene piko toa too. Pegetoapa mana Keraisu tuake kamoa pekeneya.
One wakapea noka-pete oneke lokoapa toto Keraisuke wene tugoa mekoo-kiti kamoa poo.
24
Nititikaneyake Keraisu einagome e ku tobou mekoi yene ta piko peya yopia mekoi toa
moa agopa takatapeoo. Nitoa mea wipitia ta patakakome ika iya nekeno, yopia kamene wa
etene Akolali yameoo.
25
Nitatekoyake papete one-pala poi te ia mekoi peya one kawane
moa lukademe tokome eya kuya peya yopia kawoo.
26
Nitoa mea wipitikome ali atoa
tumotoa tokoya moa agopa takatapeoo.
27
Akolaliyo padeya padeya peya manake-kama
lukoa memotoo wa panagome wia mekapianeya tokome nitoo. Nipa eya wa wia mekakome
okome akeneya mena. Padeya padeya peya manake lukoa memotoa toko ago Akolali oneka
Keraisuke lukoa meoo wa okome akeneya mena.
28
Padeya padeya peya Keraisuke lukoa
mekolipa nipa Keraisuka Akolalike lukoa meoo. Nipa eteya peya oneke lukoa memotoa
toko ago Akolalike lukoa meoo. Akolali odene ako ago memotoa tokome nitoo.
29
Akolaliyo tuane ali atoado moa kamotokameadekalepa pade-kitame tuane ali atoa
luku ue motikilepa edadete tiki-pe. Nipa ue moameneya mea tuane ali atoa luku ue
motikilepa edeya weike tiki-pe.
30
Tuane ali atoa kamoa poamoi tadekalepa nipa
Keraisunomo one moa kamotokanemo ete pia oto pia tete-pala moane oma yakilepa edeya
weike tuku patu.
31
Ta pataka abuna ete-kitame no wia tukamele tokokaka pima yaku.
Nitoanepa tone Ali Muno Yesu Keraisu patu kautakoane kakene tokounakaleke pinali anu
wa kei pikilepa eya wane uku. Onekemo oane metekolu kime wedoa yakoa motokoinano,
wini Korine take Keraisunole takama yakilepa pata pale toameadeku.
32
Epesase take ali wia
nomotoa moa egetane laione kai-kiti-pala poi tou toane dika dika toamene tete moma yaku.
Tuane ali atoado kamoa poamoi tadekalepa Keraisunole tete-pala moane takama yakilepa
edeya weike tuku patuno, pa itonole tekene tadekuno, tokamota wane ou. Nipa podoliyopa
tuatekoyano, opa paya nou toa mekete nee ue eya nokoa kato wane ou.
33
Poanele tiki yene-
pala opia yakilipa kini tiki poaneleme kini wene moa koigako wa kime ikina. Tuane ali atoa
kamoa poamoi wa iki yene titi takoa wamene.
34
Kini namolo epetane wene pianeya mea
tokoina toa wa toomoa pamene. Ele kule poanele toma pikile tewitikoa wamene. Kiwi ya
takadene eya wane uku. Kiwi padeka-kitame Akolali wene toamekete tiki.
Padele Tane Tigini Kakeneya
Kamoa Poatekomo
35
Panagome-kiti eya wa oko patu. Akolaliyo tuane ali atoa moa kamotokakilepa edoa
too-pe. Edane tigini kakeneya kamoa poi wa okale ekene
36
beita, leau akene agome keneya
wini oko. Witi ku eya itono kenekedo lomuameneya pikomepa nipa kadene oyake
tumiamoo.
37
Nika itono ludu witi ku eya matakilepa pa ku deya-kama mataki. Pine
pudunukau tigini pade matakiya mena.
38
Eya kuya nee lene witakomepa Akolaliyo witateka
wene kibututukoa latia piane toa-kama eya kuya tigini kakeneya witakala toko.
39
Ni Akolaliyo eya kuya latikomepa odenele tane tigini-kama kakoa latianeya mena. Ali
latikome ni ali tigini kakoa ni kai ini mou eya latikome eya kuya tigini tutu tutu wa kakoa
latikala taneya.
40
A tibuke kakoya-kiti latia kakoa ni itono patu eya kuya pia kawa tokoya
latia kakoa tikilepa enika eni koniyoya odenele tane tigini-kama kakoa latianeya mena.
41
Lou
tokene tagoi eni koniyoya odenele tane pa toa kakoya mena. Tagoi-kitipa padekapa kikateka
pukateka toa kawa wa padekapa nile toameneya pa tokoa kawa toko.
42
Edikoapa tuane ali atoa kamoa poi. Nipa lomuatekoi tigini kakeneya mea
tuutukaneyake Akolaliyo tuamatekoi tigini-kama kakoa kamotokakala too.
43
Nipa oloyo
keneke paya wane-kiti pianeyake Akolaliyo koniyoya-kiti latia kamotokoo. Ni popeyo
noamatekoi tigini oloyo keneke pianeyake Akolaliyo tele takatapea kamotokoo.
44
Pa itonole
toatekoi tigini kakeneya mea tuaneyake moa kamotokakilepa Akolali-pala opia mea
kawatekoi tigini kakeneya moa kamotokoo.
Itonoke meketepa pa itonole toateko tigini kakeneya mekono, a tibuke meketepa
Akolali-pala opia meateko tigini kakeneya mea kawoo.
45
Enilekepa Akolaline bokuke
papete eya wa wia mekaneya piko. Adam namolo ago latikilepa poome mekoa wene takoa
taneyake padenakago wipitikome nekene Adameinago ali atoa a tibuke meemoa
pomotateka ago latianeya.
46
Akolaliyo tone a tibuke meemoa poateko tiginipa namolo takoa
latianeya mena. Itono patu mea toateko tiginipa namolo takoa latianeya. Wa naniko a tibuke
meemoa poateko tigini latia kakoo.
47
Namolo ago latikilepa itono kugu moa latianeya.
Padenakago nikilepa a tibu kawa nekeneya.
48
Itono kugu moa latiane agome itonole toma
yakene toa one yagono-mikitame itonole toma yaki. Wa padenakago a tibu mea nekene ago
one yagono-mikitame one peku noa one tanele tiki.
49
Papete totopa namolo agono yagono-
mikiti mekoyake naniko padena ago a tibu mea nekene agono yagono-mikiti mea kawoo.
50
Anu oya-lawe kipala eya wane ekene uku. Itonole toateko tigini kakeneya meapa
Akolaliyo pawe toa talo toko take oyake pamele toamoko. Lomuateko tigini kakeneya
meapa meemoa poateko take oyake pote mepamele toamoko.
51
Akolaliyo papete wene
kibutukapia kaukoa meanemo to aweane uku. Toto padeka-kiti wete tuameneyake eya too.
One wipitikome toateka oi ponokale eina eina toto peya moa weneya tigini latia kakakala
too.
52
Nipa beta ka okaka katiapale toko toa too. Beta witika-petepa tuane ali atoa
tuamatekoi tigini kakeneya moa kamotokoo. Nititikoa totoka moa weneya tigini latia
kakakala too.
53
Nipa namolo mamina wawa weneya moa kawou toa tone lomuateko tigini
kotokoa eni luku tuamateko tigini kawoo. Nipa papete itono patu pa tekei meateko tigini
takoa wawapa mea kama poo.
54
Nipete Akolaliyo tuatekoi ali atoa meemoa pamene wa
weneya tigini latia kakakalepa wa tukile toamoi. Enipa Akolaline bokuke papete eya wa wia
mekapiane toa taatekoa too.
Ali atoa tumotoa tokoya-pala Akolaliyo poi toa moa patukatapekoyano,
55
ali atoa
tumotoa tokoyame toto edoa moa atukamotoa-pe. Edoa tete memotoa-pe wa
wia mekaneya piko.
56
Ka lame ali tania tukou toa tone tokoo poaneleme toto wia tukako. Tone toko poaneleme
toto eni moa kautakilepa Akolaline totono litia tootapeamele toamokolo tokome ni toko.
57
Nitikoyake Akolali-pala ke wa atoane uku-ye. Tone Ali Muno Yesu Keraisu patu
kautakoa kaketepa toto tumotoa tokoya moa kawikamele tokolo tekene ni uku.
58
Nitamele tokono, anu kolotini yene kipala i ukumo yakoa moa poapeneya kamene.
Nipa Ali Munagonole wedoa takama pato wa one patu kautakoa kakete tamene. Nitiketepa
onekele takakilepa pata pale tekene tadeku wa oatiki toa mena. Enipa kini wene tikimo
ukuno, nitamene.
1 Korine 1 Korine
<<
15 15
>>
1 Korine 1 Korine
<<
16 16
>>
16
Ponopene Yu Yene Kue Tatia Metanemo
1
Yudea take Yesuno ali atoa ponopeneya meki-kiti auapea kue koukoa wetekatikimo
ukuno, yakamene. Galesia ta ludu Yesuno ali atoa oboa mekika yakene tamene wane okoule
kimeka tamene.
2
Ko mea pupu toamiki-pete-kama eya tamene. Kini kini pupu toa motokoi
kue pade Yudea take meki ponopene ali atoane takoa pikakala tamene. No wete
noameneyake kini kini meatiki toa pikapikala tamene. Nitikolipa wida nokolu kue wa
pitikatekoi toa mena.
3
Eni uku toa tootokaneyake nekenepa eya tou. Kime takoa moa
kakakoi ali-kitane pipia witikoane metekene ekene iya kue Yerusaleme take meki-kitane aua
potokoano, pipia-pala aua pote mepoatino poe wane meane wetekou.
4
Nitikou-pete noka
Yerusaleme take pamedekalepa eni ali-kiti nopala opia ponoi.
Poloyo Korine Yene Tamene Wa Kowitanemo
5
Korine take wida nikilepa Masedonia ta ludu pima yawane nou.
6
Nipa niti toko
tokene-meneke wida meane kawouno wene pikene uku. Wa ta padeka poatekou wene
nokale poadene mekolu nipa poano pa wa kime no auapea wetekamotoane tekene ni uku.
7
Wida pa tekei meemotekene pou wane wene piamekene tekene opi noamuku. Ali Muno
agome wida none meane kawatekou ka yametekalepa nipa nani none meane kawou.
8
Wida noadeneke papete Pedikose wa ibini akene ta pataponomotoane Epesase take
ita pa nepiane meku.
9
Nipa i take meki yene Yesuke wene tugamotoane toateku pupu
Akolaliyo yametekolo tekene i take opi-mene pa meku. Pade-kiti kainya matiyame nopala
poi te ia mekilika tuku.
10
Timosi wida nome mekalepa one tepe kolotini kilikoa pianeya memotoa tamene.
Einagome Ali Munagonole takakilepa noanume takama yaku toa tokono, wedoa makutukoa
moamene.
11
Padameka einago paya tetepo takameneya. Tepe kolotini kilikoa pikoa oto no
mekuta wetekamene-ye. Einago Timosi anu ete oya-lawe-pala opia wakapea nomotoane
nepiane mekene tekene ni uku.
12
Opi anu oyago Apolosike ukuno, yakamene. Anu ete oyali-kiti-pala Korine take ugu
poano pa wane oane kakoluka naniko pamedekalepa nipa pouno, opi oyake pamele
toamoko wa waka.
13
Lene kilikoa piameneya wedoa meamene. Akolalinele takakilepa one patu poapeneya
kautakoa kakete tamene. Kini kepene mama moameneya tele lukatapeneya kamene.
14
Padele padele tikilepa kini oya-laweke-kama wene mekoa mekete tamene.
15
Wini ago Tepanasi one mati atoa mekete tikimo kime wene tekete tiki. Kini Geriki
take ete yene Yesuke wete wene tugameneyake einago one mati atoaka wete wene tugakoi.
Nititikoapa Akolaline ali atoa wedoa auapekala tokoi.
16
Dikanele tiki yeneke poti lukoa mea
auapeamene. Nipa Akolaline ali atoanele takama piki yene peyake lukoa mea auapeamene.
17
Eyago-mene Tepanasi Potunetasita Akaikasi toa no mekuta ugu note mekili tekene ke
wane wediane meku. Eni yene nikilepa kiwi peya nekene tetepo tokolo uku.
18
Einago-
mename no wedikakilepa kiwi namolo wedikakoina toa tiki. Dikaki ali-kiti kei piai tamene.
19
Esia ta pikoka eka kukata Yesuno ali atoame kiwi wini Korine take meki-kiti wete
meamene wa iki-ye. Ni Akuwila natono Perisilatameka kini yapu keneke oboai tiki yenameka
mea epetekamene wa kiwi wene taneya mekete iki. Nipa Ali Munago patu kautakoa kakete
iki.
20
I take tone oya peyameka kiwi Korine take meki-kiti wete meamene wa iki-ye. Wida
koukoa mekete-kama kini kini yono ete oto wa mokala tamene.
21
I agalepa anume oane mema mema tuku toa panagome wia mekakoyake eya wane
wipitikene ukumo no Polo noanu yoname wiane mekakuno, enamene-kutu. Kiwi peya wete
meamene-ye.
22
Padago Ali Muno Keraisuke wene mekoa meamokolopa nipa Akolaliyo one
wakome wamotoane uku.
Ali Muno nepa wete wakapea namene-ye.
23
Ali Muno Yesuyo kiwi pewe wimoa
pomotoane kowitikakene uku-ye.
24
Keraisu Yesu patu kautakoane kakene kiwi peyake
wene mekoane mekene uku. Wete meamene-ye.
Opa anu agale eni.
1 Korine 1 Korine
<<
16 16
>>
1 Yone
00
11
22
33
44
55
1 Yone 1 Yone
<<
00
>>
^
1 Yone
Ali Atoa Meemoa Poatiki Peku
Akolali Onepa Pa Pine Ago
Toto Auapeko Ago Keraisuke Akenemo
Yoneyo Weneya Totono Yametanemo
Keraisu-pala Pine Wia Poi Teigo Ago
Akolaline Mana Kono-mikiti
Ete Oto Wa Wene Mekanali Yoma Pamene
Akolaline Leneke Atiki Toa Meatekomo
Epetane Yominike Akenemo
Akolaliyo Wene Mekanele-kama Tokomo
Yesuke Wene Tugoa Meketepa Itono Peku
Naki-kiti Moa Kautamele Tokomo
Toto Mea Kama Poatekomo
1 Yone 1 Yone
<<
00
>>
1 Yone 1 Yone
<<
11
>>
1 YONE
Yoneyo Namolo Takoa Wia Wetekane Pipia
1
Ali Atoa Meemoa Poatiki Peku
1
I pipia wia mekoa meketepa Akolaline agale wa ibini akene ago Yesu ko oko. Nipa ali
atoa mea kama pomotoko ago ko oko. Tibu itonota wete latia piameneyake einagopa pa
mea kama nekeneya. Einagopa one oka agale tone kaleme yakoa one toma yakale tone
leneme enoa tokoo. Tone leneme-pala nepikoa pia tone yoname mitikoa tokoo.
2
Toto mea
kama pomotoko ago taatekoa nokale tone leneme enekoo. Tone leneme enekoole i wa
kipala to awea oko. Einago pa mea kama nikilepa Atai Akolali-pala odenekata-kama opia
meemoa nekeneya. Ni agopa toto mekoota taatekoa noka.
3
Eni nokapa tone enoa yakoa
tokooya i i wa kipala oa meteko-ye. Nipa toto Aposelo ali-kiti-pala odene wene pianeya
meatoa ni oko-ye. Nipa toto Aposelo ali-kiti Atai Akolali mana Yesu Keraisuta-pala odene
wene piitikoa meko toa nitatoa oko-ye.
4
Kipala i i wa wia mekoa wetekakilepa toto wedia
meateko kotu kakoa meadete toko-ye.
Akolali Onepa Pa Pine Ago
5
Kipala i oa metekomopa einago nokome toto-pala okana i i wa kiwike oa
wetekakona-ye. Eya wa oka. Akolali one pa pine ago tokome yomiyomu dedeyaka
toameneya meko.
6
Akolali one-pala odene wene pianeya meku wa oake wa yomiyomu
kenekedo yawa meketepa nipa kapene agale eni oa niminileka toamoa toko.
7
Nitameketepa
Akolali pa ke-kama yako toa totoka yawa meketepa nipa odene weneta piitakutukoa meko.
Nika mana Yesu Keraisuno kamateme tone tokoo poanele peya moa koikatapeko.
8
Poanele tikileka toamuku wa eketepa tone wa oa yotokakete toko. Nitiketepa
Akolaline agale one nimini peku tone tepene luameneya pa meko.
9
Nitameneya tone toko
poanele Akolali-pala i i wa to awea okolopa nipa kiyo akenele-kama toko ago tokome eya
toko. Tou wa okale-kama tokome tone toko poanele oi moa po letu mekakana keetapea
wawa ni tone eni poanele peya kogatapekala toko.
10
Poanele padeleka toamuku wado
eketepa nipa Akolali kapene ago tetepo takoa one oka agaleka tone tepene moa luameneya
pa meko.
1 Yone 1 Yone
<<
11
>>
1 Yone 1 Yone
<<
22
>>
2
Toto Auapeko Ago Keraisuke Akenemo
1
Anu mati deya-kiti i agale wiane wini wetekakilepa kime padele poanele takaya tokolo
ni tuku. Panagome-kiti poanele tokolopa toto kei piko ago Yesu Keraisu kiyo akenele-kama
toko agome tone kowitikako. Nipa toneketai Akolaliyo yakakoa kowitikako.
2
Keraisu einagome Akolaline wene kekakademepa tone toko poaneleke tuaneya. Nipa
one tigini Akolalike mea lodo you toa tuaneya. Nitoa tone toko poaneleke odene tuaneya
mena. Ta piko peya pitikoi-kitame tokoi poaneleke tuaneya.
3
Akolaliyo tamene wa akene
toa totome litia toma peketepa nipa e e nimini Akolali wene taneya meku wa amele toko.
4
Panagome-kiti Akolali wene taneya meku wa oake oneme tamene wa akene toa tetekoa litia
toamokopa nipa kapene ago eni. Akolaline peku noamokoya tokome ni toko.
5
Panagome-
kiti Akolaliyo tamene wa akene toa litia toma pokomepa Akolalike wene mekoa togateko
kotu kakoa eni toko. One agale-kama yakoa teketepa nipa e e nimini Akolali patu kautakoane
kama puku wa totome wene toko.
6
Panagome-kiti Akolali patu kautakoane kama puku wa
okomepa nipa Yesu Keraisu itonoke mekana toa oneka meamedeko.
Yoneyo Weneya Totono Yametanemo
7
Anu kolotini yene kini toatikimo kiwike wini wiane wetekakupa weneya totono titiane
yameamuku. Kini Yesunole titia takakete yatekoina totono i lokoane uku-ye. Eina namolo
totonopa kime namolo takoa yatekoinakamo uku.
8
Enipa namolo yatekoina totono wane
ukuyake weneya totono keneya yameteku. Yesu itonoke nome mekome titia toka toa kiwika
pa dikoa toomoa pekete tikimoke uku. Nipa yomiyomupa ete toa toma pokome kamotoa
eni nimini pa wete toa kakolo ni uku.
9
Panagome-kiti eni pa ke weneya totono litiane tuku wa oake one oya ago-pala kotimi
yoa mekomepa opika yomiyomu keneke pa yawa meko.
10
Panago-kiti one oya agoke wene
mekoa mekomepa pa ke eni yawa meko. Dikako ago one tepene poane wene piameneya
tokome ogo witikolo ka iapitakaya wa piti moamoko.
11
One oya agopa-pala kotimi yoa
meko agopa yomiyomu keneke yawa meko. Nitoa pameneka agopa tootokaneya yakilepa
eni yomiyomume leneta likatapeneya tokome one poatekoka tatanu po yatekakolo yawa
meko.
12
Anu de mati-kiti i agale tigini kiwike wini wiane wetekakilepa Akolaliyo kini tokoi
poanele oi moa po letu mekakana keetapea wakilepa Keraisuno ibinike tokolo ni wiane
wetekaku.
13
Etene-mikiti kimepa itono tibuta wete latia piameneyake pa mea kama nekene
ago wene taneya mekili tekene i agale ni oane wetekaku. Tuali-kiti kime poane peku pine
ago wete moa kawikaneya tokolo i agale oane wetekaku. Mati yatene i agale kiwike wini
wiane wetekakilepa Atai Akolali wete wene taneya mekili ni tuku.
14
Etene-mikiti kiwike i agale wini oane wetekakilepa padeya padeya wete
latiameneyake pa meemoa nekene agopa kime wene taneya mekili ni tuku. Tuali-kiti kiwike i
agale wini oane wetekakilepa kini eya tikileke ni tuku. Kiwi tele tootapeneya mea ni
Akolaline peku noa toa ni poane ago Setanu moa kawikaneya mea tikili ni tuku.
15
Itonokeka ni itono patu pia kawa tokaya-kitikeka wene piitikaneya meameamene.
Enika eniyakedo wene piitikaneya meketepa nipa Akolali wene toamiki.
16
Poane yename ele
kule poanele toadiya wa wene pia mea ni leneme eya kuya moadiya wa tepi moa ni eya kuya
kamoya i motuku toa kimeka moati wa mate agale oa ni ele kule itonole toa tikilepa Atai
Akolaline peku noameneya itono peku-kama nakete ni tiki.
17
Itonopa takoa poatekoyake
tiki. Nika ali atoa itonoke mekete eya kuya moadiya wa wene pia motikiya-kitika takoa
pootapeoo. Nitatekoyake Akolaline wene pikole litia toko agopa pa mea kama poademe
toko.
Keraisu-pala Pine Wia Poi Teigo Ago
18
Anu mati-kiti wipitia ta patateko tigotoma noko. Keraisu-pala poi te ia meko ago
noademe toko wa oa pianemo kime yatekoina. Eina oa piane toa Keraisu-pala poi teigi yene
kainya mati wete taatekoa nokala taneya. Nitaneyano, wipitia ta patateko tigotoma nekedeko
wa totome wene toko.
19
Eni yene toto pakeke meake tewitikoa wakilepa toto yatene
toameneya tokome ni tokoi. Nitane yenepa toto yatene too tokapa nipa toto-pala odeneya
pa mea kawei tokake e yenepa toto yatene toameadeko wa wene tomotoa tekete ni wawa
pokoi.
20
Anu oya-lawe kime pade edikoa meamiki. Epetane Yomini kiwike awia
tagatapemotoa wetekaneya tokome kiwi peyame Akolaline nimini peku wene toa naki.
21
I
agale wiane wetekakilepa kime one nimini peku wene toameneya meki wane wetekakuya
mena. Kime wene taneya mekino, i agale oyake yakoa moi wane wene tekene wetekaku.
Kapene agalepa nimini pekuke titia noamoko waka wene taneya meki.
22
Kapene wakako ago te-pe. Yesu onepa Akolaliyo kakapiane ago Keraisu mena wa
oko agopa kapene ago eni. Dikane agopa Keraisu-pala poi te ia meko ago. Atai Akolali-pala
mana Keraisuta einagome wakome wako.
23
Mana Keraisu wako agomepa etene Akolali-
pala dekoa wakome wako. Keraisu onepa Akolaline mana wa oko agopa Atai Akolaline
yatene ago eni.
24
Yesunole titia takama pekete yatekoina agalepa kini tepene pa luaneya meamene.
Nitiketepa mana Keraisu Atai Akolalita-pala lipua mekete toi.
25
Keraisuyo kiwi auapekene
dikou wa oa pikilepa toto mea kama poatekomo eni oa pika.
26
Kipala i agale ikilepa kiwi oa yotokoa enoai tiki yeneke uku.
27
Keraisuyo Epetane
Yomini kiwike awia tagamotoa moa wetekaneya. Opika kiwike pa awia mekolokakono,
padameka ipa poanele ipa epetanele wa kiwi wene takatiki toa mena. One Epetane
Yominiyo-kama pademo pademo wene taka taka tokolo ni uku. Wene taka taka tikilepa
niminimo-kama wene takakoya. Kapene agaleka wene takamoko. Keraisu-pala pa lipua
meato wa one eni wene takaka toa litia toma pamene.
28
Opi anu mati deya-kiti kipala eya waneka ukuno, yakamene. One-pala lipua-kala
meamene-ye. Nitoa meketepa one wakapea noka-pete one kakaya liti pamene ya toameneya
atiki toa meoi.
29
Akolali onepa kiyo akenele-kama toko ago wa wene teketepa nipa kiyo
akenele toma yaki peyapa one mana kono-mikiti waka wene toi.
1 Yone 1 Yone
<<
22
>>
1 Yone 1 Yone
<<
33
>>
3
Akolaline Mana Kono-mikiti
1
Atai Akolaliyo totopa one peku mati-kiti wa moa latikakano, totoke etene wedoa
wene mekoa mea tadeko-loo. E e nimini, totopa one mana kono-mikiti. Itonole toma yaki-
kitame totopa dikane ali atoa tadeko wa agopa tokolo pa meki. Nipa Akolali wene
toamekete tekete toto-kitika wene toamiki.
2
Anu kolotini yene totopa Akolaline peku mati-
kiti wa wene tokoyake naniko mekete toatekole i wa agopa tokolo meko. Eni agopa
tokoloka one wakapea nokalepa one keneya latitapeneya meoo wa totome wene toko. Tone
lene pogakoa enekete tekete nitaneya meoo.
3
Keraisu nokale edikaneya meouno, ke wa
nepia meki peya poane wene takoa koikatapeneya meada wa Keraisu meko toa wene kiyo
akeneya meki.
4
Poanele toko agomepa nipa Akolaline totono tetekoa toamoko. Padele padele tokoi
poanele peyapa Akolaline totono tetekanele.
5
Keraisu taatekoa nikilepa tone tokoo poanele
kogatapeademe ni nekeneya. Nitane agome poanele padeleka toameneya wa kime wene tiki.
6
One patu kautakoa meki-kitame poanele tekete-kala meamikiya. Poanele pa tou wa wene
pia toma yako agomepa nipa Keraisu enamoa onepa Akolaline mana wa wene toamoa toko.
7
Anu mati deya-kiti pade-kitame kiwi oa yotokakayano, eya wa wene taneya
meamene. Kiyo akenele toma poko agopa wene kiyo akene ago eni. Keraisuyo kiyo akenele
toma poko toa onemeka toko.
8
Poanele pa toma yako agopa Setanuno yatene ago eni.
Setanu einagome namolo namolo titimoa poanele-kama toma nekeneya. Akolaline mana
taatekoa nikilepa nipa Setanuyo poanele-kala tanele wia agopa takatapeademe ni nekeneya.
9
Akolaline mati-kitame poanele pa toma yawamikiya. Akolaline peku nakeneya tokome
poane totono litia tamele toamoko. Akolaline peku mati-kiti tokome poanele toma yamele
toamoko.
10
Akolaline peku mati i, Setanuno peku mati i wa totome takoa enekilepa eya wa
wene taneya mekete toko. Kiyo akenele toma yawamoa one oya-laweke wene mekamoa
toko agopa Akolaline peku mati mena.
Ete Oto Wa Wene Mekanali Yoma Pamene
11
Tone tone wene mekanali yoma poatekomopa i i wa Yesunomo tititikakete olaukane
toa kime yatekoinano, nitatoane uku.
12
Eya ago Adamene mana Keineyo tane toa toamato.
Keine einago poane agono peku nakene ago tokome wamene ago Ebele wia tukaneya.
Dekale wia tukaneya-pe. Poanele toma yakome tokome epetanele toma yakene ago wamene
ago Ebele-pala wene poaneya mekome ni taneya.
13
Nitane toa itonole toma yaki-kitame kipala kotimi yoa mekolipa wene kainya
piameamene.
14
Totopa tuatekoo peku lawetekagoke lukoa mekoota tewitikoapa meemoa
poateko peku lawetekagoke lukoa menadeko wa totome wene toko. Tone oya-laweke wene
mekoa mekete tamele toko wa wene toko. One oya-laweke wene mekamoko agopa one
tuateko peku lawetekagoke pa lukoa meko.
15
One oya ago-pala kotimi wene luko agopa ali
wia tukaka ago tetepo taneya meko. Ali wia tukakagomepa meemoa poateko peku
noamoko.
16
Yesu Keraisu totoke tuaneya. Nipa ete ali atoake wene mekakete toateko adeka pia
tuaneyano, tone oya ali atoa wateaneya kamotoa totoka edikoa tuamedeko.
17
Kamo agome-
kiti one oya ago ponopene ago padeya-kiti toamokolo enekomeke ela moamoa padeyaka
meamokomepa nipa Akolalike wene mekoane meateku peku naku wa edoa omotoa-pe.
18
Anu kolotini mati-kiti pa kabunume i ago i atoa neeke wene mekoane meku wa wamato.
Neeke wene mekoane meku wa yete pade ali atoa mama moa auapeato.
Akolaline Leneke Atiki Toa Meatekomo
19
Edikama yaketepa nipa nimini peku laweteko agono mati mekene ni tuku wa totome
amele toko. Nika Akolaline leneke tepe kolotini kilikoa pimotoa meamele toko.
20
Nipa tone
tepeme toto kikoa akakoloka Akolaline leneke atiki toa meamele toko. Tone tepeme tone
tokole kiyoke-kama takoa enoa akakile toamokoyake Akolaliyo kiyoke-kama takoa enekala
toko. Padele padele peyapa oneme wene tootapekome tokome toto pa puputua akamoo.
21
Anu kolotini yene tone tepeme toto kikoa akamokolopa Akolaline leneke atiki toa
meamele toko.
22
Nitoa mea i i wa one kowitikolo oneme yakoa tootapekala toko. Oneme
tamene wa oko toa litia toa ni one wedikatekole toa tokolo tokome tone kowitikole yakoa
toko.
23
Eya tamene wa oneme oko. Mana Yesu Keraisuno ibini wedekoa oneke wene tugoa
mea ni Keraisuyo oka toa ete oto wa wene mekanali yoma pamene wa oko.
24
Akolaliyo
tamene wa oko toa litia toko agopa Akolali-pala lipua meko. Akolalika einago-pala lipua
meko. Akolali toto-pala lipua meko wa totome wene tokopa one Epetane Yomini
wetekakale awinome mekome wene taka taka tokolo ni wene toko.
1 Yone 1 Yone
<<
33
>>
1 Yone 1 Yone
<<
44
>>
4
Epetane Yominike Akenemo
1
Anu kolotini yene kipala eya wane pubu uku. Ali kainya matiyamepa Epetane
Yominiyo wene takaka toane uku wa eketeke kapene agale oa pupitikama yaki. Nipa
Epetane Yomini awitaneya mekene uku wa iki-kitipa e e nimini iki wa mekamotekete pitakete
wameamene. Kiwike awitane yominipa Epetane Yomini patu, pa yomini patu wa takoa
enekala tamene.
2
Yesu Keraisu itonoke nikilepa ali latitapea nekeneya wa oko agopa
Akolaline Epetane Yomini oneke awinome mekale tokome ni oko wa totome wene toko.
3
Yesu Keraisu ali latitapeneya nekeneya wa wamademe wako agopa einagoke kapene
yomini awinome mekale ni wakome toko wa totome wene toko. Eni kapene yominipa
Keraisu-pala pine wia poi te ia meko agonono yomini. Einago noono, nepiamene wa pubu
akenemo yatekoina toa eni taatekoa nekedeko.
4
Anu mati deya-kiti kipa Akolaline peku mati-kiti tekete Akolalinemo koigoa kapene
yokoa okoi yene wete moa kautakoi. Nipa itonole tiki yeneke awitane yomini moa patukako
Epetane Yomini kiwike awinome mekale ni tokoi.
5
E kapene yokoa iki yename itono peku
noai tekete itonomo-kama okala tiki. Nimo-kama ikili tekete itonole tiki yenamepa yakato wa
yakoa motiki.
6
Totopa Akolaline peku mati-kiti. Akolali wene tiki yename tone okomo
yakoa motiki. Akolaline peku noamiki yename tone okomo yakoa moamiki. Tone okomo
yateki yenepa nimini peku lawetekagono Yomini kiwike awinome mekale ni yateki wa
totome wene toko. Yakamiki yenepa kapene peku laweteko agono yomini kiwike awinome
mekale ni yakamiki wa totome wene toko.
Akolaliyo Wene Mekanele-kama Tokomo
7
Anu kolotini yene tone tone wene mekanali yoma patoane uku-ye. Panago one oya-
laweke wene mekoa mekilepa nipa Akolaliyo titia tanele eni toko. Nitoa meko agopa
Akolaline mati. Einagomepa Akolali wene toko.
8
Akolali one tanele tokome ali atoake wene
mekoa-kama mekono, one oya-laweke wene mekoa meamoko agomepa Akolali wene
toamoko.
9
Akolaliyo toto meemoa pomotoa tokome mana odene ago itonoke moa
wetekaneyano, totoke wene wedoa mekaka matiyame tadeko-lo.
10
Nilepa ali atoa toto
oneke wene mekakole mena. Totoke wene wedoa mekoa mekome eya taneya. Tone toko
poanele takoa mitikademe pinali one tigini lodo you toa tumotoa one mana moa
wetekaneya.
11
Anu kolotini yene Akolali totoke wene wedoa mekoa mekome enile
taneyano, ke wa tone tone wene mekanali yoma pamedeko.
12
Padameka Akolaline lene
timini enekilepa toameneya. Padameka enamikilika tone tone wene mekanali yoma pokolopa
Akolali toto-pala lipua meko. Lipua mekomepa totoke wene mekoa meateko kotu kakoa
wene mekoa meko.
13
Akolaliyo one Epetane Yomini totoke moa wetekaneya tokolo eya wa wene toko.
Totopa one-pala lipua meko. Onepa toto-pala lipua meko.
14
Nika tone leneme enekoona
eya wa to awea oko. Atai Akolaliyopa itonoke meki yene toa motokoano pa wa mana
Keraisu itonoke moa wetekaka.
15
Yesu onepa Akolaline mana wa to awea oko ago einago-
pala Akolali lipua meko. Einago Akolali-pala lipua meko.
16
Akolali totoke edikoa wene
wedoa mekoa meadeko wa wene tekete one patu kautakoa kako.
Akolali one tanele tokome ali atoake wene mekoa-kama meko. Eko ali atoake wene
mekoa meki yenepa Akolali-pala lipua meki. Nitiki yene-pala Akolali lipua meko.
17
Akolaliyo tone tone wene mekanali yoa tagateko wene toopikana toa eni tomotokopa nipa
ali atoa takoa enoa akateka ta pataka-pete kibu moamene piti moameneya atiki toa memotoa
ni toko. Totopa itonoke Keraisu keneya mekono, kibu motokaya wa piti moateko toa
mena.
18
Eko ali atoake wene mekoa meketepa nipa kibu motokaya wa piti moateko toa
mena. Eko ali atoake wene mekateko kotu kakoa wene mekaketepa nipa piti takaketikoa
wawa kilikoa meko. Panagome-kiti piti moa mekilepa nipa one poanele tokake kibu
motokaya wa piti moa meko. Piti moa meko agopa nipa eko ali atoake wene mekateko kotu
kakoa wene mekamoko.
19
Akolali totoke wene mekoa mekilepa one weneme titia taneya. Nitaneya tokome toto
oneke ete wene mekoa meko.
20
Panagome-kiti Akolalike wene mekoane meku wa oake one
oya ago-pala kotimi wene luaneya mekopa nipa kapene ago eni. One leneme eneko ago-pala
kotimi wene luaneya mekomepa nipa one leneme enamoko ago Akolalike etene oyake wene
mekamele toamoko.
21
Keraisuyo tone litia toateko totono yametekome eya wa oka.
Akolalike wene mekoa meki yenepa kini oya-lawekeka wene mekoa meamediki wa oka.
1 Yone 1 Yone
<<
44
>>
1 Yone 1 Yone
<<
55
>>
5
Yesuke Wene Tugoa Meketepa Itono Peku
Naki-kiti Moa Kautamele Tokomo
1
Yesu onepa eina Keraisu wa papete ibini oa piane ago tadeko wa wene tiki yenepa
Akolaline mana kono-mikiti eni. Nika eteneke wene mekoa meki yenepa one manakeka
wene mekoa meki.
2
Akolalike wene mekoa mea ni oneme tamene wa oka toa litia teketepa
nipa Akolaline mati-kitikeka wene mekoa meadeko wa totome wene toko.
3
Akolaliyo
tamene wa oka toa litia tikilepa nipa oneke wene mekoa mekete tekete ni toko. Oneme
tamene wa okalemepa tone wene moa keda takamoko.
4
Ni edoa-mo. Itonoke ele kuleme ali
atoa likoa enekakole-kiti Akolaline mana kono-mikiti peyame ete pedekamele toko. Nipa
tone Akolalike wene tugoa mekete tekete nitamele toko.
5
Itonoke ele kuleme ali atoa likoa
enekakole-kiti teyo ete pedekamele toko. Yesu einagopa Akolaline mana wa wene toko
agome odene ete pedekamele toko.
6
Yesu Keraisu itonoke nome mekomepa ue moa ni kamate pomotoa tuka. Einagome
ue odene motoka mena. Ue moa ni yomo lekaneyake wia dekakoli kamate ponomotoa tuka.
Enile tokagopa Akolaline mana wa Epetane Yominiyo toto wene takako. Epetane Yominiyo
niminimo-kama oko ago tokome ni toko.
7
Yesu onepa Keraisu wa papete ibini oa piane
ago tadeko wa totome wene tomotoapa eya tebolome tiki.
8
One Epetane Yomini one
motoka ueta one penane kamate toa eniya-mename odenele tane tetepo tokolo onepa
Akolaline mana wa toto wene takakala tiki.
9
Ete yename-kiti kini leneme enekoimo i i wa
to awea ikimopa totome yakoa motoko. Nitikono, Akolaliyo akenemopa totome etene tobou
kakoa yakoa moamedeko. Einago Akolaliyo Yesu einagopa one mana wa akeneya.
10
Akolaline manake wene tugoa meko agomepa Akolaliyo mana Yesuke akenemo nimini
akedeko wa onekemo pikoa kako. Akolaline agale yakoa moamoko agomepa Akolali
kapene wakako ago tetepo takoa meko. Akolaliyo manake akenemo yakoa moamokome
tokome ni toko.
11
Akolaliyo toto-pala mana ko ikilepa kiwi mea kama pomotoane tuku wa
okome taneya. Eni akene toa mana Yesu patu kautakoa kaketepa mea kama poko.
12
Mana
Yesu makutukoa motokagopa mea kama poko. Mana makutukoa moamokagopa mea kama
pikilepa toamoko.
Toto Mea Kama Poatekomo
13
Kipala i i wane wiane wetekakilepa mana Yesuno ibini wedekoa oneke wene tugoa
meki yene kipa etene mea kama poko wa wene tomotoane tekene ni tuku.
14
Akolali
kakakoa kowitikilepa atiki toa mekete kowitiko. Nipa one wene pikole litia kowitikolopa
tone kowitikole-kama yakoa too wa atiki toa mekete kowitiko.
15
Tone kowitikoya-kama
Akolaliyo yakoa too wa totome wene teketepa nipa eni kowitikoyapa Akolaliyo papete wete
yakoa toopianeya waka wene toko.
16
Kini oyagome-kiti padele poanele one yomini moa
atukamatekole tokolo eneketepa einagono kowitikamene. One mea kama pomotono,
nitamene. Pinali one yomini moa atukamateko poanele toko agoke uku. Wa padele poanele
tokoleme pinali one yomini moa atukatekoyano, eni poanele toko agono kowitikamene
wane wamuku.
17
Ali atoame ele kule poanele tikilepa Akolaline totono-kama tetekakete tikili
uku. Nimo ukuyake ali atoame tiki poanele-kiti padekame kini yomini moa atukamokoya.
18
Akolaline mana kono-mikitame poanele toma yawamiki wa totome wene toko.
Akolaline mana Yesuyo eni yene pawe toa talo toko. Nitikono, poane peku laweteko ago
Setanuyo Akolaline eni yene mitikoa ete moamele toamoko.
19
Toto peyapa Akolaline mana kono-mikiti wa totome wene tokoyake eya waka wene
toko. Ete yene ta piko peyake poane ago Setanuke-kama lukoa meki.
20
Totome eya waka wene toko. Akolaline mana taatekoa nome mekome pademo
pademo i i wa toto wene taka taka tikilepa nimini Gode Akolali wene tomotoa toka. Totopa
nimini Gode Akolali-pala lipua mekilepa mana Yesu Keraisu-pala lipua mekete tekete ni
toko. Yesu einagopa oneka nimini Akolali. One patu kautakoa kakete mea kama poko.
21
Anu mati-kiti kapene gode-kiti titi toma yamene-ye.
Opa anu agale eni.
1 Yone 1 Yone
<<
55
>>
1 Pita
00
11
22
33
44
55
1 Pita 1 Pita
<<
00
>>
^
1 Pita
Akolaliyo Wipitia Toatekale Nepia Meato
Kiyo Akenele-kama Toatekomo
Akolaliyo Takoa Motane Yapu Pigi
Akolaline Ali Atoa Mekete Toatikimo
Keraisu Yoto Pitia Tete Moma Poatekomo
Padele Epetanele Tokoike Tete Motanemo
Namolo Wene Wia Wakete Wenele Toatekomo
Tone Keraisuke Toa Tete Moatekomo
Yesuno Ali Atoa Talo Yene-pala Akenemo
Pitayo Wipitikome Lionate Akenemo
1 Pita 1 Pita
<<
00
>>
1 Pita 1 Pita
<<
11
>>
I PITA
Pitayo Namolo Takoa Wia Wetekane Pipia
1
1
No Pita Yesu Keraisuyo one agale oane auane yamotoa takoa moa kakaka Aposelo
agome uku. I agale wiane wetekakilepa anu oya-lawe kiwi eya mone ta-meneke Podase
Galesia Kapadosia Esia Bisinia ta-meneke to a pote mekika wetekaku-ye.
2
Toneketai
Akolaliyo papete wene toopikana toa taatekakome kipa one wa takoa motane yeneke uku.
Nitane yene kiwike one Epetane Yomini awinome mekome kini wene moa kiyo akatapeneya.
Nipa Yesu Keraisuyo okale-kama litia toa ni one kamateme kini namolo poane wene takoa
koikatapeneya mea tomotoa taneya.
Akolaliyo Wipitia Toatekale Nepia Meato
3
Akolali tone Ali Muno Yesu Keraisuno etene one kei piato wane uku-ye. Oneme eya
taneleke ni uku. Mana Yesu Keraisu tuaneya pikale moa kamotokaneya tokome anu oya-
lawe toto one mea kawateko mana kono-mikiti moa latikaneya. Ali atoa toto mama motoka
matiyame taneya. Nitaneya tokolo toto one take mea kawoono, nepiato wa wedia-kama
nepia meko.
4
Nipa a tibuke mea kakete toateko pekupa one mana kono-mikiti kiwi lawetou
wa oa pikana toa taatekoa toatekole nepia meko. One eni peku lawetekome meatekoya-kiti
lomuameneya pioo. Ni padeyameka toa potokameneya pia takoaka poamoa too. Eniya-
kitipa kinikiya wa Akolaliyo a tibuke pikoa metekako.
5
Nipa anu oya-lawe Yesuke wene
tugoa mekili tokome Akolaliyo one tele patu kautakoa meati wa pawe toa talo toko. Nipa
wipitia ta pataka-pete one papete wene toopikouna toane taatekakene kiwi toane mou wa
papete pawe toa talo toko.
6
Nitikono, Akolali-pala ke wa wedia kakete tiki. Opi-mene padele padeleme ke
enekakolo wene keda taneya meketeke pa wedia mekete tiki.
7
Nikepa eya wane uku. Kini
kamoya golo wa akene kuepa toele wia yoa enekala tiki. Nitikili paya kuepa toeme takoa
nootapekoyake kamo kuepa toeme noameneya tutu yeta pa piko. Eni kamo kuepa wipitia ta
pataka-pete takoa poatekoyake tiki. Akolaliyo anu oya-lawe kipa one etene kamoya tetepo
takoa mekome edikoa toa enekala toko. Nitoapa kini Yesuke wene tugoa mekile enekomepa
Keraisu Yesu wakapea noka-pete kiwi kei pia kini ibini kamotokademe toko.
8
Anu oya-
lawe kimepa Yesuno lene timini enamoake oneke pa wene mekoa meki. Opiika one
enameketeke oneke pa wene tugoa meki. Nitikete one-pala ke wa ikilepa edemo wamoo wa
a tibuke wete pa tootapeneya meane tetepo takoa kolotine mekete iki.
9
Nipa kini Yesuke
wene tugoa mea togakolopa kini yominipa one wa toa moo wa kolotine meki.
10
Akolaliyo
one ali atoa kiwi edikoa pewe wiatekamopa one agale to awea akane ali-kitame papete i i wa
to awea akama-kala nekeneya. Nitiketeka ali atoa toa motikilepa edoa toa moademe oko patu
wa pitia yakatekakala toa mea tuma-kala nekeneya.
11
Nitima nekene toa Keraisuno Yomini
kiwike-kala awinokome eya wa wene takaneya. Keraisuyo tete-kala mokoa kawa tuake wa
kamomotokome a tibuke pa teleta tootapeneya pome mepoo wa wene takapikala taneya.
Nitaneyake eni wene takakolepa manipete taatekoa toatekoleke oko patu, edoa taatekoa
toademe oko patu wa pine tuku toa kawa tuma-kala nekeneya.
12
Nitane ali-kiti Akolaliyo eya wa wene takapikala taneya. Enika enilepa kiwi meki-pete
taatekoa toamoko. Nani mati mekoi ali atoa kakoi-pete taatekoa too wa wene takaneya.
Nani mati mekoi ali atoa wapa anu oya-lawe kiwike okome akeneya. Eina papete wene
takapianele opi taatekoa toko. Enilekepa Keraisunomo kipala to awea okoina ali-kitame i i
wa pine to a okoina. Nipa Akolaliyo one Epetane Yomini a tibu meaneya moa wetekakale
awinokome wene takakana toa to awea okoina. Eina okoinapa a tibuke meki edelo ali-
kitameka pine pitiane yakadiya wa wene pianeya meki.
Kiyo Akenele-kama Toatekomo
13
Nikepa eya tamene wane uku. Kini wene moa labakanele tewitikoa wawa utanele-
kama toma yamene. Ni Yesu Keraisu wakapea noka-pete Akolaliyo pewe witikome
toatekaleke wene piitikaneya meamene-ye.
14
Akolaline nimini agale wete yakameneya
mekete ele kule poanele toada wa namolo tokoina toa wa pade toameamene. Oneme ta wa
okale-kama toomoa pamene.
15
Padele padele tikilepa kipa one wa kayo oa motoko ago
Akolaliyo epenele-kama toma poko toa tamene.
16
Akolaline bokuke agale pade eya wa wia
mekane toane ni uku. Akolali nopa epenele-kama tukuyano, kimeka epenele-kama toma
yamene wa akeneya.
17
Ali atoame tanele-kama takoa enoa akako ago Atai Akolaliyo kiwi
peya midi piitapeane tetepo takoa mekome kini tanelepa epetaneleka poaneleka takoa enoa
akakala toko. Nitiko ago-palapa kime kowitikala tikino, itonoke pa tekei meatiki yene tetepo
takoa meato wa oneke nate wene pianeya lukoa meamene.
18
Itonoke mekoi ali atoa kini
kaua-mikitame paya peku lawetanele noa toma nokoika Akolaliyo kiwi oto toa motaneya.
Nipa golo silepa enika eni pia kawamateko kamoya-kitame oto toa motaneya mena.
19
Nitameneya one etene kamoyamepa oto toa motaneya. One etene kamoyapa mana
Keraisuno kamate. Keraisu einagopa ipu kodo dedeyaka piamene sipi sipi kai tine keneya
tukale kamate ponoka.
20
Akolaliyo one mana kiwike tumotono wene toopikilepa itono
tibuta wete latiameneyake taneya. Nitaneyake wipitikome kiwike tuou wa taatekoa nome
tuka.
21
Akolaliyopa mana Keraisu eni tukale moa kamotokakomepa one ibini
kamotokaneya. Nitaneyano, totoka moa kamotokoo wa eni toatekale wedianeya nepia
meketepa oneke wene tugoa meko.
22
Nipa Akolaline nimini peku nootokoapa kini namolo poane wene wia wawa eya
tekete tiki. Wene takuta piametekoa Keraisuno ali atoake wene mekoa mekete tiki. Nitikete
tikino, odene wene piitikoa kini kini ete oto wa wedoa wene mekanali yoma pamene.
23
Akolaliyo mati opiou toa kipa one mana kono-mikiti moa latikaneya tokolo ni uku. One
mati-kiti eni moa latikakilepa pa tua poatekagome mati opikome toko toa mena. Kini mea
kawatiki peku lawetekome taneya. One eni laweteko pekupa Akolaline pia kawateko agaleke
uku.
24
Nikepa Akolaline bokuke eya agale wia mekane toane ukuno, yakamene.
Ali atoa peya itonoke mekilepa ke witoa kako ke tetepo taneya meki. Nipa ibini akene
yenedo tetepo taneya meketepa ke tidiyo kalaneya witoa kawa okoa pitako toa
pa tekei koniyali atoa meki. Ke totoa tuutapea tidiyo okoa pitoa tokoyake
25
Akolaline peku pa pia kama poko wa panagome wia mekaneya.
One eni peku wane ukupa Keraisunomo kini wene epetaneya memotoa to awea akenemoke
uku.
1 Pita 1 Pita
<<
11
>>
1 Pita 1 Pita
<<
22
>>
2
Akolaliyo Takoa Motane Yapu Pigi
1
Kipa Akolaline peku mati-kitino, padele padele poanele tikile peya tewitikoa wamene.
Kapene agale wamoa ni Akolalinele takakilepa wene takuta pianeya mea toamoa ni eko pade
ali-kiti moane patukoane ako meadiya wa eni yene-pala wene poamoa ni akoa agale wamoa
tamene.
2
Akolaliyo one peku lawetekilepa paya peku eletekakileka toamoko. I yene kiwi
one mana kono-mikiti latikakene toane mou wa one peku lawetoono, nana matiyame-kiti
adu nodo tokolo noa kako toa one peku noa piamene.
3
Ali Muno agome one ina pekupa
epetaneya-kama lawetekoya tadeko wa kime wene tekete ni naki.
4
Ali Muno wane uku
agopa mea kama poko ago. Nitiko agoke ali atoamepa ipa poadeko wa yapu wiatekoi
yomo enoa wawou toa wakeneya. Nitaneyake Akolaliyo i agopa one kolotini ago wa takoa
motaneyano, one-pala lipua meamene.
5
Akolaliyo kipa mea kawatiki yomo one losu yapu
wiateko yomo tetepo takoa mea Keraisu-pala moa lipukoai toko. Oneke padeya mea lodo
you toa kinikile wawa toamekete Keraisu patu kautakoa kawa onekele takama pomotoa
tokome ni toko.
6
Ina ukunapa Akolaline bokuke agale tigini pade papete eya wa wia
mekane toane uku.
Anume tukule enoe. Saione takepa tobou kakaku yomo yapu pigi takoane moane wiou
toane anu kolotini ago moane kakaku. Einagoke wene tugoa mekoi-kitame
oneke ya motikileka toamoi wa Akolaliyo akene toa panagome papete wia
mekaneya.
7
Oneke wene tugoa meki-kiti kime eni yapu pigi wane uku agopa tobouya latikakete tiki.
Nitikiyake pade-kitame oneke wene tugoa meamiki. Eni yeneke Akolaline bokuke eya wa
wia mekaneya piko.
I yomopa poadeko wa yapu wiane yename paya tetepo takoa wakeneyake panagome i
yomopa yapu pigi wa moa wianeya wa panagome wia mekaneya.
8
Wa enikepa eya waka wia mekaneya piko.
I yapu pigi wane ukuya pikata ali atoa ogo witikale ka iapitoi. Nipa puku pekete toa
kamedekamotekete pitoi wa panagome wia mekaneya.
Eina wia mekapiane toa taatekoapa eni yene one agale yakoa moamekete tekete pata paka
puku pekete tiki. Nipa Akolaliyo papete wene toopianele eni tiki.
9
Anu oya-lawe kime pade enile toamiki. Akolaliyo kipa one yatene wa takoa motoka
tokolo oneke lukoa meki. Ali Muno agoke lodo you toa onekele takakilepa tobou yene
tetepo tokolo tiki. Akolaliyo kipa one yatene wa talo toa meko. Onekele-kama takoa
memotoa ni toko. Kiwi yomiyomu keneke mekoika one pa takaloganeya meku ta noatino
noe wa kayo oa motoka ago Akolaliyo kiwi takoa motikilepa one padele padele tubele
tanemo i i wa one kei pimotoa tokome ni toka.
10
Namolopa kipa mone ali atoa tetepo
taneya mekoinake opa Akolaliyo takoa motane ali atoa wini mekina. Namolopa Akolaliyo ali
atoa ela motokome tokole wene toameneya mekoinake opa wene taneya wini mekina.
Akolaline Ali Atoa Mekete Toatikimo
11
Anu oya-lawe kipa itonoke pa tekei meatiki yene mone yene tetepo taneya mekino,
eya tamene. Kini tepene ele kule poanele toadiya wa wene piki toa witakome kini yomini-
pala poi teigala tokono, eni poane wene tewitikoa wamene.
12
Nipa mone take Akolaline
agale yakamene ali atoa pake pake dekakoa mekete epetanele-kama tamene. E yenamepa i
yene kime poanele toma yaki wa akoa agale okolika nitamene. Akolaliyo ali atoa takoa
enenoka-pete kini epetanele-kama tokoli enekoinakaleke e yename Akolali kei piatikiyano,
nitamene.
13
Ali Munoke tou wa eya toma pamene. Ta talo tiki yene peyake poti lukoa
meamene. Nipa ako odene tobou meko agome ta piko peya pitiki ali atoa talo tokome
tamene wa oka toa litia tamene.
14
Ako odene meko agoke lukoa meki tobou ali-kitikeka poti
lukoa meamene. Poanele tokoi ali atoa kibu moa ni epetanele tokoi ali atoa kei pia topoatino
poe wa ako agome moa kakoa wetekaneya tokolo ni uku.
15
Paya peku noa tiki yename emo
kumo pamo okoimo teigoa wamotono, epetanele toma pamene. Akolaline wene piko toane
eni uku.
16
Ta pine agono mana kono-mikiti kini take atiki toa meki toa anu oya-lawe kiwi
Keraisuke atiki toa lukoa meamene. Nitoa meketepa ele kule tamele tokono, poaneleka tato
wa wene pia toameamene. Kipa Akolaline pupu takatiki yeneno, onekele takakete toatiki toa
toma yamene.
17
Ali atoa peyapa paya tetepo takamoa kei pikala tamene. Keraisuke wene
tugoa meki-kitike wene mekoa meamene. Akolali piti motaneya mea ni ako odene meko
tobou agoke poti lukoa mea one kei piai tamene.
Keraisu Yoto Pitia Tete Moma Poatekomo
18
Kueme topo toa moa egetaneya meki yene kipala eya wane uku. Ta pine yename
tamene wa talo tekete okoli yoti mitikatekoa mea yakoa tamene. Poti ko akene wene pia talo
toa epetekako agome ta wa oka toa tamene. Ni talo toa potokako agome tamene wa tete-
pala pa puputua metekome okaleka tamene wane uku-ye.
19
Akolalike wene piitikaneya
mekete eni tete poti ko akene wene pia motokolipa nipa Akolaliyo i yene kime toa epetekaki
wa pewe wioo tokolo ni uku.
20
Kime padele poanele tokoike talo agome layo toua
witikaledo ko akene wene pia tete motokolipa kiwi teyo kei pimotoa-pe. Padameka kei
piamoi-li. Wa pine agonole wedoa takakoike pa puputua layo toua witikaleka kime ko akene
wene pia tete motokolipa Akolaliyo kiwi kei pia kawoo.
21
Akolaliyo kipa one yene wa kayo
oa motikilepa kime tete edikoa momotoa tokome ni taneya. Keraisu kiwike tete moa kawa
tukilepa kini itonoke mekete toatekoile adeka pia taneyano, Keraisu yoto pitia tete moma
pamene.
22
Keraisu einagome poanele nateleka toamoa kapene wakoa agaleka wamoa
taneyake tete mokoa kawa tuka.
23
Ete ali-kitame one tea kakolika ete poanemo topo takoa
wamoka. Ni tete metekoli kiwika wiou wa wamoka. Eni yename nitikolika oneme pade
koiso akamoka. Nitameneya kiyoke-kama takoa eneko ago Akolaliyo one koiso yakoo wa
oneke wene tugoa meka.
24
Ni tone namolo poanele tokoole tewitikoa wawa kiyo akenele
toma pomotoa tokome Keraisuyo eya toka. Tone eni tokoo poanele one tiginike
awitikaneya pome yomo lekaneyake tuka. Einago layo toua wikala tanelemepa anu oya-lawe
kiwi latekatapeneya meki.
25
Papetepa sipi sipi kai-kiti etepea pou toa paka pote
atupokoiyake opa kiwi talo toa kini yomini pikoa kawa toko ago mekota wakapea pote
meki.
1 Pita 1 Pita
<<
22
>>
1 Pita 1 Pita
<<
33
>>
3
1-2
Enakale toa atoa yatename kinikaneyo tamene wa okoi toa yakoa tamene. Enipa
atoa pade nekaneyo Akolaline agale yakoa moameneya mekalepa Keraisuke wene
tugamotono, nitamene. Nitikalepa nekaneyo ae anu natoname anu agale yakoa motokono,
Keraisuke wene tugoa mekome ni toko wa oneka Keraisuke wene tugoo. Neke pademoka
wameneya kiyo akenele toa ni yoti mitikatekoa mea tokale enekomepa nitoo.
3
Kini tigini
kalakilepa tou wa enileke wene piitikoa meameamene. Nipa pine puputua pitikamoa ni golo
kue wane kabeke piamoa ni kamo mamina kawamoa tamene.
4
Nitameneya kini yomini
koniyo takou toa tekete poti ko akene wene pianeya meamene. Eni koniyoyapa takoa
poameneya pa kela pia kawoo. Akolaliyo ei kiwi edikoa memotadiya wa wene pianeya
meko.
5
Namolo papete Akolaliyo takoa motane atoa-kiti oneke wene piitikoa meketepa
edikoa kalaneya meou toa kinikaneke poti lukoa meaneya.
6
Ibini akene atoa Serayoka
edikakome onekane Eberamepa Ali Muno wa oa oneke poti lukoa mea taneya. Anu oya
atoa-lawe kime kiyo akenele-kama toa padelekeka piti moameneya mea teketepa Serane
kono-mikiti tetepo taneya meoi.
7
Enakale toa ali yatene eya tamene wane uku. Kini natono koua meketepa nipa i atoa
anu tele kotu kawameneya taba taneya meko wa mama moa kei pia tamene. Akolaliyo kini
natono-kiti kiwi midi piane tetepo takoa pewe witikilepa meata kama pomotoa tokome toko.
Nitikono, kini kowitoa okoimo Akolaliyo yakamokayano, ina ukule tetekameneya litia
tamene.
Padele Epetanele Tokoike Tete Motanemo
8
Eya wane wipitikene ukuno, yakamene. Ete oto wa odene wene-kama pia ela moa
tamene. Nipa ete oto wa wene mekoa mama moa yoti mitikatekoa mea tamene.
9
Poanele
toko ago-pala poaneleme ete topo takamoa ni tea agale oko ago-pala poanemo topo takoa
wamoa tamene. Nitameneya Akolaliyo ne pewe wimotoane uku wa topo takoa amene.
Akolaliyo anu oya-lawe kipa one wa kayo oa motikilepa kiwi pewe wiou wa tokano,
nitamene.
10
Akolaline bokuke panagome eya wa wia mekaneya.
Panagome-kiti itonoke wedianeya yawane piou wa wene pia ni ta pataka abuna meane
epetekou waka wene pia tokomepa poane agale wamoa ete yene oa yotokamoa
tamedeko.
11
Ni padele padele poanele tewitikoa wawa epetanele tamedeko.
Ni ete yene-pala odene wene pianeya meou wa oya kakademe wili toa
kamedekolo uku. Akolaliyo eya tokolo tekene ni uku.
12
Akolaliyopa ki yo
akenele toma yaki-kiti leneme wia mea ni kini kowitikete ikimo-pala kale
piiyakoa mekoyake poanele toma yaki-kiti mukiti yamea wako wa Akolaline
bokuke wia mekaneya piko.
13
Epetanele-kama tou wa wene pianeya yako ago-palapa teyo poaneleme topo takoo-
pe. Padameka poaneleme topo takamoi.
14
Anu oya-lawe kime epetanele toma pokoike
pade-kitame tete metekolika wedia meamene. Akolaliyo pewe wia yopioono, pa ali-kitame
tete metekaya wa piti moamoa kepeneka mama moamoa tamene.
15
Nitoapa Keraisu
einagopa kini Ali Muno wa oneke nate wene pianeya meamene. Keraisu einago wakapea
nomotoa nepia mekete wedia mekino, dekolo tiki-pe wa pade-kitame kiwi pitia yakoino, eni
yene-pala topo takoa oatikimo wene kibutua meamene.
16
Nitoapa i i wa to awea ikilepa yoti
mitikatekoa mea potimo-kama amene. Enipa Keraisu patu kautakete mea epetekakoileke ete-
kitame kipala akoa agale okolipa nipa ae kapene agale inapa ekete tadeko wa eni yene ya
motokamotono, kini tepeme ta wa epetekoa okale-kama litia epetanele toma yamene.
17
Kini
toa epetekakoileke ete yename tete meoi. Akolaliyodo one wene litikome eni tete memotoa
tokalepa epetoo wa poti eni tetepa moma pamene. Kini padele poanele tokoilekedo tete
motokolipa nipa poo tokolo uku.
18
Keraisu kiyo akenele-kama toko agomepa ali atoame
poanele tokoike nami wiane tuou wa tuka tokolo ni uku. Etene Akolalike kiwi koua pome
wetekapademe ni nome tuka. Nitoa nome tukake wa pade tukileka toamoo. One tiginipa wia
tukaneyake one yominipa takoa mea-kama poko.
19
One Yomini takoa pokomepa Akolaliyo
po yapu moa mekane yomini-kiti meane take pomepa ali atoa toa motanemo i i wa mo wia
kakeneya.
20
Eya ali atoane yominike uku. Akolaliyo pubu okana toa Noayo tube ue dipi
pade latia-kala kakeneya. Nitikakoa Akolaliyo one eni pubu akene agale yakoa moamene ali
atoame kini poane wene wia wamotoa poti ko akene wene pianeya mekome nepia meaneya.
Nitikaleka e ali atoame yakamokoli o Noa ti natetekoa ketepo kakoa (8) einakeya keneke
petoa pote mepokoli Akolaliyo e poanele toa yakamene ali atoa peya ue nakoa tumotoa
wakeneya. E yene tumotoa wakeneyake Noa ti toa motaneya.
21
Akolaliyo Noa ti edikoa toa
motikilepa nipa anu oya-lawe kime ue motokoli toa moateka adeka pia taneya. Kime ue
motikilepa kini tiginike kakene kege ko adete tokoiya mena. Nitamekete Akolaliyo kini tepene
poane wene takoa koikakamotoa tekete Akolali nekele-kama takou wa kime ue motaneya.
Nitimotoa tokome mana Yesu Keraisu nome mea tuake kamoa poka.
22
Atibuke Akolaline
nimini yono kouno lono pome kapoko ago Keraisuke uku. Nitiko agoke-kama edelo ali
yateneka eya kuya peya yopia meki yateneka lukoa meki.
1 Pita 1 Pita
<<
33
>>
1 Pita 1 Pita
<<
44
>>
4
Namolo Wene Wia Wakete Wenele Toatekomo
1
Keraisu tono melepu kakeneya nome mea tete mokoa kakano, one tete motokome
toka toa kiwika kepene mama moameneya tete oyake mou wa wene pianeya meamene. Tete
mokoa kako agome-kiti one poanele namolo toma pokanakale tewitikoa wako.
2
Dikako agomepa one namolole tewitikaneya mekomepa papete ele kule poanele
toada wa wene pikana toa litia toamokome Akolaliyo wene piko toane litiane tamedeku wa
kiyo ootokoa meko.
3
Namolopa Akolaline agale yakamene yename ele kule toada wa
etepea toma pokoile kimeka toma pokoi. Nipa oyakeno, wa pade toameamene. Papete eya
ya tanele toma pokoi. Pamoko mea ni koua piamatekoi atoa koua pia ni bia ue eya nokoa
pia ni ali atoame poanele toa oboa mekoika paya ulu toa ni toge kia mekoika gerepi po ku
ue nokoa kawa ni Akolaliyo kote motokole tekete paya gode-kiti kowitoa tokoi.
4
Opa
Akolaline agale yakamene yenamepa kini poanele-kala toa etepea pikika kime koua poamikili
enekete wene kainya pianeya mea kipala poane agale okala tiki.
5
Nilepa kime dekale tokoi-
pe wa Akolaliyo kini koiso akoo. Wete tua pekene yeneka tuameneya pa meki yeneka takoa
enoa akateka agome nitou wa enile toademe nodokakoa meko.
6
Nitatekoya tokome tua
pekene ali atoa-palaka Yesunomo oa metaneya. Nipa Akolali one yomini-pala mea kama
poko toa kini yominika mea kama pomotoa ni taneya. Ali atoa peya itonoke mea tukala toi
wa Akolaliyo kiwi kibu moateka wene toopiane toa tukala taneyake tua pekene yene-palaka
Yesunomo oa metaneya.
7
Itono tibuta takoa poateko tigotokono, Akolali wedoa kowitadetepa utanele-kama toa
poti yawa piamene.
8
Eyaka tamene wane tobou kakoane uku-ye. Kini kini wedoa wene
mekanali yamene. Tone tone wene mekanali yoteketepa nipa toto-pala tane poanelepa ete
oto wa topo takamekete edikoa kaukoa mekete too.
9
Kini oya-lawe kini yapu nee noatino,
noe wa makutukoa moamene. Nipa ko wameneya wedia mea tamene.
10
Akolaliyo kiwi peya
pewe witikome one peku eya kuya tutu tutu wa lawetekanano, one eni peku noa teketepa ele
kule toa yete pade ali atoa auapeamene.
11
Nitoa Akolaline agale to awea akaketepa nipa
Akolaliyo akamene wa oka toa-kama akamene. Yete pade ali atoa auapeketepa nipa
Akolaline tele patu kautakoa kakete tamene. Kini eni toma pokoile-kama enekete ete-kitame
inapa Yesu Keraisuyo etenanele takakome yametanele tiki wa Akolali kei pimotono,
nitamene. Akolaliyo eya kuya peya yopia-kala kama pokono, ke wa one kei piatoane uku.
E e nimini.
Tone Keraisuke Toa Tete Moatekomo
12
Anu kolotini yene kipala i ukumo yakamene. Padeleme ke enekakolo mekete dika
dika toamene tete mokoa wini kakino, edekolo ipa tokoa kakoto patu wa wene kainya
pianeya meameamene.
13
Ipa Keraisu nome mea tete motane toa kimeka mokala toko wa
poti moma pamene. Nipa Keraisu einago pa teleta tootapeneya wakapea nokale ke wa
kolotine meadetepa pa widikoa meamene.
14
Anu oya-lawe kime Keraisunole takama
yakoike pade-kitame tedu mea ya motokakolipa kolotine meamene. Eni yename edikakolipa
Akolaline Yomini kiwi pa teleta takateko Yomini kiwike awinome meadeko wa wene toino,
kolotine meamene.
15
Kiwi padameka ali wia tukamoa ni panagoneya kode moamoa ni ta
talo toko agono agale tagamoa ni kotu kabunu kawamoa tamene. Edikakoikedo tete
moteketepa nipa pata paya moino, toameamene.
16
Nitameneya Keraisu litikoikedo ete-
kitame tete metekolipa nipa ya moameneya inapa Keraisuno yatene ago mekulu ni tikino, ke
wa Akolali kei piamene.
17
Akolaliyo ali atoa takoa enoa akateko oipa opi. One eni toatekole taatekoa tikilepa
namolo takoa one yatene ali atoa totome eni tete momotoa toko. Wa naniko onekemo
yakoa moamokoi ali atoa takoa enoa akakomepa dika dika toamene tete meoo.
18
Enikepa
Akolaline bokuke eya wa wia mekaneya piko.
Akolaliyo ki yo akenele toma yaki yene toa motikilepa wili tokoa kawa toko. Enile tamene
poto toko. Ae, onekele takameneya poanele toma yaki yene edoa toa momotoa-
pe wa panagome wia mekaneya.
19
Nipa Akolaliyo wene pika toa tete moteketepa oneke poti lukoa mekete epetanele
toma pamene. Kiwi latia mekane ago Akolaliyo oneme tou wa oka toa-kama tokome kiwi
tewitikamoono, nitamene.
1 Pita 1 Pita
<<
44
>>
1 Pita 1 Pita
<<
55
>>
5
Yesuno Ali Atoa Talo Yene-pala Akenemo
1
Yesuno ali atoa talo takoa meki ali-kiti kipala i ukuno, yakamene. Nopa eya ago
mekene uku. Kini yagono ago noka Keraisuno ali atoa talo takakuya. Keraisuyo tete moa
mekale anu leneme enekou. No nitikou agopa Keraisu einago pa teleta tootapeneya keleyo
wakapea nokale one-pala opiane meou.
2
No nitateku ago tekene eya tamene wane uku. Akolaliyo one ali atoa talo takamene
wa tatia yametekana ali atoapa sipi sipi kai-kiti tetepo takoa wedoa talo takamene. Nitiketepa
talo takamene kote tokolo mekeneke tuku wa edikoa wene piameamene. Ipa Akolaliyo wene
piko toane tuku wa wedia mea tamene. Kue mou wa kueke-kama wene piitikoa mea
toameamene. Kini weneme wedoa talo tamene.
3
Akolaliyo tatia yametekana ali atoa talo
takakomepa toe toe wa tika tika toameamene. Nitameneya kini wini ali atoa mea epetekatiki
kotu pia meamene.
4
Wa naniko ako odene mekome talo toko ago Keraisu taatekoa
wakapea nokalepa Akolaliyo kiwi kei pikome pa teleta tootapeneya mea kawatekoi peku
lawetoo.
5
Tuali yatene kipala eya wane uku-ye. Wetini yename tamene wa okoi toa litia tamene.
Mamina epetaneya moa kawou toa ete oto wa auapenali yoma pato wa yoti mitikatekoa
meamene. Enikepa Akolaline bokuke eya wa wia mekaneya piko. Akolaliyopa ete yene
paya tetepo takoa meki-kiti kote tokolo wakoyake yoti mitikatekoa meki-kiti pewe wia kako
wa panagome wia mekaneya.
6
Nitaneyano, telekole-kama toko ago Akolalike poti lukoa
mekete yoti mitikatekoa meamene. Nitikolipa Akolaliyo kini ibini kamotokoa kei pioo. Eni
kei piateka-petepa nitoono, oneke poti lukoa meamene.
7
Akolaliyo kiwi mama moa
yopikono, kini wene moa keda takanele peya oneme takoa moa katekamotamene.
8
Uutukoa poti yawa lene kilikoa piameneya wedoa meamene wane uku. Laione kaime
ali kamate abetema yakome ko u oko toa kipala poi te iane ago Setanuyo kiwi wiou wa tuku
toma yakolo ni uku.
9
Kini oya-lawe ta piko peya pitikika odenele tane tete mokala tekete tiki
wa wene taneya mekete Setanu ete pedeka pedeka tamene. Nipa poapeneya kakete
Akolalinele wedoa takama pote nitamene.
10
Eni tete opi-mene mootokaneyake Akolaliyo
kiwi mea epetekatekoi kotu kakoa mekoa mape wia tele takoa too. Pewe-kama wia kako
ago Akolaliyo kiwi mea kawatiki peku lawetou wa kiwi kayo oa moa Keraisu-pala lipukoa
taneyano, nitoo.
11
One telekole-kama tokana toa pa toa-kala kama pokono, ke wa one kei
piatoane uku. E e nimini.
Pitayo Wipitikome Lionate Akenemo
12
I agale tigini deya i i wane oane wini wetekakupa nipa Akolaliyo one ali atoa toto
pewe eteneya wima pokomo to aweane uku. One pewe wia yopikota poapeneya kamene
wane kiwi mama motekene uku. Nitikenepa anu oyago Sailasi Akolalinele wedoa takama
pokoke kei piku ago i agale neme wia mekakoano ta wane uku toa yakoa wia mekakako-ye.
13
Babilone wa aue paigoa akene Lome take pitiki ali atoame wete meamene wa iki.
Nipa Akolaliyo kipala odeneka dekoa takoa motane yename iki. Anu mana latikakounakago
Makeyoka kiwi wete meamene wa oko.
14
Kiwi koukoa mekete-kama i ali i atoa neeke wene
mekoane mekuno, ke wa yono ete oto wa mokala tamene.
Keraisu-pala lipua meki-kiti kiwi peya poti kilikaketikoa memotoane kini kowitikoane
uku-ye.
Opa enina-ye.
1 Pita 1 Pita
<<
55
>>
1 Tesalonaika
00
11
22
33
44
55
1 Tesalonaika 1 Tesalonaika
<<
00
>>
^
1 Tesalonaika
Tesalonaika Yene Yesuke Wene Tuganemo
Polo Tesalonaika Take Mekome Tanemo
Poloyo Tesalonaika Yene Mekoika Wa
Ugu Poadiya Wa Wene Pianeya Meanemo
Timosiyo Tesalonaika Yene Ko Okome
Polono Wene Weye Akoa Tanemo
Akolaline Wene Epetekakete Toatekole
Ali Muno Wakapea Noatekamo
Ali Muno Wakapea Nomotoa Nepia Meamene
<<
00
>>
<<
11
>>
1 TESALONAIKA
Poloyo Tesalonaika Yeneke
Namolo Takoa Wia Wetekane Pipia
1
1
Polo nopa i mekene uku. Sailasi tota Timosi toa i pipia wia mekakilepa Tesalonaika
take Atai Akolali Ali Muno Keraisu Yesuta-pala lipua meki-kiti kini pipia wia mekako-ye.
Akolaliyo kiwi pewe wia tepe kolotini kilikoa pikoa tomotoane kini kowitikoane uku-
ye.
Tesalonaika Yene Yesuke Wene Tuganemo
2
Kiwi peyake Akolali-pala ke wa oa kini ibinika i ali i atoa wa oa kini kowitikakala
toko.
3
Nika tone Atai Akolaline leneke meketepa kini eya tekete tikile wene kibutua meko.
Keraisuke wene tugoa mekete onekele wedoa takama yawa ni yete pade ali atoake wene
mekoa mekete mama moa auapea ni tone Ali Muno Yesu Keraisuyo wipitikome toatekole
nepia meato wa ke enekakolo meketeke wedianeya nepia-kala mekete tiki.
4
Anu oya-lawe Akolaliyo kiwike wene mekoa mekome kipa one kolotini yene wa
takoa motaneyano wene tekete oko.
5
Keraisunomo kiwi mekoika wida oa aua neketepa
tone wene kibutua oko agale wamokoona. Epetane Yominine tele patu kautakoa kakete
ikilepa totome niminimo-kama oko wa wene tekete oa metekoona. Kiwi pakeke nitoa
mekete kiwi auapea tokoonakale kime wene taneya mekete tiki.
6
Kiwi pakeke toma yakoole
enekete kimeka litia tato wa Ali Muno ago tone tokoole kotukoa tokoina. Nitoapa ke-kala
enekakale meketeke Keraisunomo yakoa motokoina. Nipa Epetane Yominiyo wedikakale ke
wa yakoa motokoina.
7
Nitikolipa Keraisuno yatene Masedonia Geriki tata ludu pitikoi
peyame kini wini Tesalonaika tokoinakale adeka moa tokala tokoi.
8
Ali Muno agonomo
wida mo wia kakoimopa talia koume ta kautameou toa Masedonia Geriki tata ludu oa
pupitikatapeneya. Kini Akolalike wene tugoa mekete tikimoka ta piko peyake oa
pupitikatapeneya. Nitaneyano, kinikimopa totome oateko toa mena. Ta piko peya pitiki
yatene ali atoame wete yakatapekete tekete i i wa kiwi Tesalonaika yename tokoi ko okala
tekete tiki.
9
Nipa toto makutukoa motekete tokoi ko ikilepa eya wa ikiya. Tesalonaika
yename nimini mea kama poko ago Akolali onekele takama pato wa kini yoname latia
kowitikoinakeya-kiti wakete onekele-kama takama yakete tiki.
10
Ni one mana Yesu a tibu
mea wakapea nomotoa nepia mekete tiki wa ta piko peya pitiki yatene ali atoame kiwi ko
okala tekete tiki. Kini nepikoa meki ago Yesu einagopa tuaneya pikale Akolaliyo moa
kamotokaneya. Wa naniko Akolaliyo poanele tokoi ali atoa kibu motokalepa toto toa moo.
<<
11
>>
<<
22
>>
2
Polo Tesalonaika Take Mekome Tanemo
1
Anu oya-lawepa toto kini Tesalonaika take wida ugu note meketepa Akolalinele pata
pale takamokoona. Enipa nimini ukutu-pe.
2
Nipa Pilipai take pote mekolo eni yename toto
paya tetepo takoa wakete tete metekoiyake tone Akolaline tele patu kautakoa kakete
onekemo Tesalonaika takeka wida to awea opato wa atiki toa onokoona. Padeka-kitame
yakamato wa toto oa ketekakoiyake wida note to awea onokoona.
3
Opika onekemo yakoa
moamene wa totome olaukakilepa pademo koiganemo olaukakoya mena. Nipa atoa lia enile
toa enato, i yene oa yotokoa enato wa tolopi toamoko.
4
Nitamekete eya toko. I yene
totome onekemo oiake akamele toko wa Akolaliyo takoa moa kakaka tokolo i i wa to awea
oko-ye. Nipa ali atoa wedikadete tekete nitato wa totome tokona mena. Tone tepene piko
wene tetoa enoai toko ago Akolali wedikadete ni toko.
5
Kiwi pakeke mekete taba po
pitikoa wamokoona. Enipa nimini ukutu-pe. Akolaline leneke kakene eya wane uku. Kinikiya
lede moadete onekemo olaukato wa olaukakoona mena.
6
Ni yete pade ali atoameka anu
oya-lawe kimeka toto kei pimotoa toa enamokoo.
7
Totopa Keraisuno Aposelo ali-mene
tekete kinikiya keda takoa meati wa amelepa tokoyake nimo wamokoona. Kiwi pakeke wida
meketepa niname-kiti one mati-kiti mama moa poti pikoa mekome toko toa tokoona.
8
Kiwike wene mekoa mekoo matiyame Keraisunomo oa meato wa oa metekilepa kiwi
auapea mea tuadekolopa oyake tuoo wa tokoona. Kiwike wene mekoa mekoo matiyame
nitikoona.
9
Kiwi pakeke wida mekete eya toa kakoonakale kime wene taneya mekete tiki.
Akolalinemo oa meteketepa kini wene keda takaya tokale kue eya manoe wa oia
moamokoona. Nitamekete tone moatekooya moadetepa ete pia oto pia tone yoname pupu
toa mekoo.
10
Nitoapa Keraisuke wene tugoa meane yene kiwi pakeke wida mekete poane wene
takoa koikatapeneya kiyo akenele-kama tokoona. Nitoa mekete padeya namike ete-kitame
toto koiso akatekoile toamokoo. Enipa Akolaliyoka kimeka enekakoa toma yakoonamo
uku.
11-12
Etename-kiti one mati-kiti mama motokome toko toa totome eyaka tokoona. Kini
kini mekoi toa kini wene weye akoa eya wa mane oa moa toma yakoona. Akolaliyo one talo
tuku take pa teleta tootapeneya mea kawatiki peku lawetou wa kiwi kayo oa motokono, one
yatene meatiki toa meamene wa totome kiwi mama moa tokoona. Enipa nimini ukutu-pe.
13
Ni kime eya tokoinakaleke Akolali-pala ke wa-kama oko-ye. Akolaline agale totome
oa metekolo yakatekoapa pa aline agale tetepo takamoa ipa Akolaline agale tadeko wa moa
lukakoina. One eni agalepa oneke wene tugoa meki-kiti kime yakoa toma pamene wa
laweteka pekuke uku.
14
Yudea take Akolaline ali atoame Keraisu Yesu patu kautakoa kakete
toma yakete tiki toa Tesalonaika yene kime kotukoa tekete tiki. Nipa ete Yu yename o Yu
yene tete-kala metekiyake Yesunole pa takama yaki toapa wini takeka ete yename kiwika
tete-kala metekiyake onekele wida pa takama yakete tiki.
15
Dikane Yu yenamepa Akolaline
agale to awea akane ali-kiti papete wia tukoa Ali Muno Yesuka wia tukoa taneya. Totoka poe
wa litia wetekakoi. Enipa Akolali timini natekoa ete yene peya-pala poi te ia mea tiki.
16
Nipa
Akolaliyo mone pa yatene ali atoa toa motokaya tokolo Yesunomo to awea akateko ka
keteka keteka toa kaki. Kini poanele nitoa toma-kala pote wipitikete poanele pinepa mete
eya kapetekou toa eni tiki. Nitikili tokome Akolaliyo kiwi kibu mouno nepio wa yopikoa
kako.
Poloyo Tesalonaika Yene Mekoika Wa
Ugu Poadiya Wa Wene Pianeya Meanemo
17
Anu oya-lawe kiwi wida memotoa tewitikoa i take pa tekei note mekolopa tone
wenepa wida nekeneyake ikapa kepene pa mekoo. Nipa kini lene timini enadiya wa wene
pianeya mekete wida noadete wili tokoa kakoo-ye.
18
Wida nou wa wene pianeya mekete ni
tokoo. No Polo kiwi meki ta wakapeane noadene wili tokala tokouyake Setanu einagome
toto keteka keteka toa kaka.
19
Kini lene timini enadiya wa toto wedia mekilepa edoa tokoto-
pe. Tone Ali Muno Yesu wakapea nokalepa Tesalonaika yene kini wini epetekoa tokoinakale
i i wa totome Yesu-pala mate agale ou toa to awea okolo yatekome toto kei pioo wa wedia
meko.
20
E e nimini, kini wini tokoinakaleke Akolaliyo toto kei pioo tokolo wene yapekolo
meko-ye.
<<
22
>>
<<
33
>>
3
1
Totome kiwi mama motokoo matiyame eya toatekoo oi pedoa pia tokoo. Sailasi tota
Atena take kidenalita meoono,
2
ne pa wa tone oyago Timosi wida moa wetekakoo. Timosi
einagome Akolalinele takama yakome Keraisuke oa epetekane agale oa aua yako. Einago
wini wetekakilepa kini wene weye akoa Yesuke wedoa wene tugoa mema pomotono, mane
mane akapoano pa wa wetekakoo.
3
Wini take ete yename kipala poi te ia mekoli kiwi odene
agoka etepea pokaya tokale ni tokoo. Toto peya ke-kala enekakolo meamedeko wa kime
wene tekete tiki.
4
Papete kiwi pakeke wida meketepa toto peyame tete mokoa kamedeko
wa ete yename toto-pala poi te iatekoimo oa pikoonakale wida wete taatekoa tokome toko.
Enipa nimini ukutu-pe.
5
Nikepa kiwi mama motokou matiyame Timosi-pala eya wane okou.
Eni yene kipa kiwi likoa eneko ago Setanuyo likoa enekale etepea pokoi patu. Kiwi pakeke
Akolalinele takakilepa ipe yolo enadene keneya pata pale tokou patuno, kini Yesuke wene
tugoa mekete tikile enekapa wane Timosi wini moane wetekakou-ye.
Timosiyo Tesalonaika Yene Ko Okome
Polono Wene Weye Akoa Tanemo
6
Opa Timosi kiwi mekoita wida tewitikoa oto wakapea nokome tone wene
epetekakome eya wa oka. Eni yene kiwi Yesuke wedoa wene tugoa mea kini kini wene
mekanali yoa ni toto wene taneya mea ke wa wedia mekete tiki wa oka. Eya waka oka.
Totome kini lene timini enadiya wa wene taneya meko toa kimeka tone lene timini enadiya
wa wene taneya mekete tiki wa Timosiyo oka.
7
Kini Keraisuke wene tugoa mekete tikimo
totome eni yateketepa ke-kala enekakolo mea tete mokoa kawa teketeka ke wa kini wini
mekete tikileke wene yapekolo meko.
8
Kipa Ali Muno patu kautakoa poapeneya kakete tiki
wa tone wene latai akeneya meko.
9
Widikoa mekoi ko yakatekoa tone Akolaline leneke
wedoa wedia kakono, one-pala ke wa-kama oko-ye.
10
Nitoa ete pia oto pia Akolali kowitoa
meketepa kini lene timini wa enoo wa oa ni onekemo pademo wene toamikimoka ni onekele
padele katekoa takamikileka i i wa kiwi ooyamekutu toma poo wa totome kowitikala toko-
ye.
11
Opa eyagota toneketai Akolali-pala tone Ali Muno Yesu Keraisuta Tesalonaika take
pote meateko ka kitame yamea toe wa totome yakoa kowitiko.
12
Ni kiwike wene wedoa
mekoa meko toko toapa kini kini wedoa wene mekanali yoa yete pade ali atoakeka wene
mekoa mema pomotono ta wane Ali Muno ago kowitikaku-ye.
13
Ni kini wene weye akoano
ta wane kini kowitikakilepa eya tomotono nitamene wane kowitikaku. Neke wene kiyo
akaneya meki yene-pala opia wakapea noka-peteka anu Tesalonaika yene Atai Akolaline
leneke atiki toa kamotono ta. Papete padele poanele toameneya epetekoa-kama tomotono ta
wane kini kowitikaku-ye.
<<
33
>>
<<
44
>>
4
Akolaline Wene Epetekakete Toatekole
1
Anu oya-lawe kipala eya wa wipitikete oko-ye. Akolaline wene epetekakete toatekoile
totome i i wa kiwi mane mane okoona. Eina mane mane okoona toa kime litia tekete tiki.
Opi Ali Muno Yesuno ibini wedekaketepa eya tamene wa kiwi kowitoa oko-ye. Widikoa
meki toa wedoa toomoa pamene.
2
Ile tamene ile tamene wa Ali Muno Yesuno agale patu
kautakoa kakete okoonakale kime wene tekete tiki.
3
Akolaliyopa kiwi wene kiyo akeneya
mea epetekoa toma pomotono wene pia mekono, mone koua piamatiki atoa-kiti-pala koua
piameamene.
4
Nitameneya kini atoa-pala koua mekilepa Akolaline lenekeka ete ali atoane
lenekeka wene kiyo akeneya mea tamene.
5
Nipa Akolali wene toameneya meki ali-kitame
atoa-kiti po i motekete toa potokakete tiki toa toameamene.
6
Neke oyago yotokoa one
natono-pala koua pikile pade toameamene. Enile poanele tiki ali-kitipa Akolaliyo kibu moo.
Kipala papete pubu okoona toa nitoono, toameamene. Ni edoa-mo.
7
Akolaliyo totopa one
wa kayo oa takoa motikilepa eni poanele tomotoa tokoya mena. Onekele epetanele-kama
takamotoa ni toka.
8
Panagome-kiti kipala i ukule wawa toamokomepa nipa aline agalepa
kote tokolo wakoya mena. Akolaline agalepa kote tokolo wakoya. Nipa one Epetane
Yomini kiwike awia mepoano pa wa moa wetekakago Akolaline agale eni wakoya.
9
Keraisuno ali atoake wene mekoa mekete toatikile i i wane wiane mekatekule
toamoko. Kini kini wene mekanali yoma poatekoile Akolaliyo wete olaukatapeneyano,
enileke pademoka wiane mekamuku-ye.
10
E e nimini, wini Masedonia take Yesunomo yakoa
motokoi yene peyake wene mekoa mekete tiki. Widikoa moa patukoa kini oya-laweke
wedoa wene mekoa meemoa pamene wa totome kiwi kowitoa oko-ye.
11
Utanele-kama
toane poti yawou wa wene pianeya yamene. Ni panagome onekele toa mekale eneketepa
dikoa ta dikoa ta wa teiga teiga toameamene. Ni totome mane mane okoona toapa nee eya
moadete kini yoname pupu toa mokala tamene.
12
Yete pade ali atoame kiwi kei pimotono
nitamene. Edikoa meketepa nipa ete ali-kitaneya oia moatiki toa mena.
Ali Muno Wakapea Noatekamo
13
Anu oya-lawe kipala i ukule agopa taneya meamedikili eya wane uku-ye. Yesuke
wene tugoa mea tua pekene ali atoake wene keda taneya meameamene. Nipa tuane ali atoa
wa kamoa poamoi wa wene pianeya meki-kiti tumai mekete tiki toa toameamene. Ni edoa-
mo.
14
Yesu tuake wa kamoa pekenemo einapa nimini akenemo wa totome wene toko.
Tuake kamoa pekeneyano, Yesu-pala lipua mea tukoi peyapa Akolaliyo mana-pala odeneka
wakapea nekete noati wa koua noo waka totome wene toko.
15
Ali Muno agome olaukanemopa totome i okono yakamene. One wakapea noka-pete
toto pa meadekolopa nipa oneke wene tugoa mea tukoi yene naniko nomotoa toto namolo
takoa Yesu kotua pikilepa toamoo.
16
Nitamekete eya too. Titikilepa Akolaline bera ta pa
piitakutukoa kakaka one ako edelo agome kayo telo ootapeoo. Nitikale Ali Muno agome
kotua noe wa kayo oa ketipea noademe nokale Keraisuke wene tugoa mea tukoi ali atoa ate
kamoa poi.
17
Nititikaneyake toto tuameneya pa meko-kitipa one a tibuke kotua pikilepa eni
yene-pala wedo pakeke moa obokaneya pekete poo. Nipa enipete titimoa Ali Muno ago-
pala pa mea kama kawoo.
18
Kipala i ukumomepa kini kini wene weye akanali yoma
pamene-ye.
<<
44
>>
<<
55
>>
5
Ali Muno Wakapea Nomotoa Nepia Meamene
1
Anu oya-lawe ina ukulepa dikoa taatekoa too, ipete taatekoa too wa totome kiwike
pipia wia wetekateko toa mena.
2
Ali Muno ago wakapea nikilepa kode ago keneya
yomiyomu keneke kotikatapea noko toa noono kime wene tekete tiki.
3
Ali atoamepa
ipetepa kipala padele toameneya kilikoa meateko-peteno, atiki toa meato wa paya nou toa
mekoli eya too. Mati kakene atoa kotikatapea mati mukiti nou toa kiwi mekoita poime
keneya tulikatapeoo. Nitikale petoa poatekoika agopa taneya meoi.
4
Ete yene nitoa
meatikiyake anu oya-lawe kipa yomiyomu keneke meamiki. Ali Muno ago wakapea nikilepa
anu oya-lawe kiwi lene kilikoa piameneya mekoika noo.
5
Kiwi peyapa lou pa keneke yaki ali
atoa. Anu oya-lawe totopa yomiyomu keneke yawamoko.
6
Ete ali atoa atu pia meou toa
atiki toa mekino, edikoa meamato. Atu piameneya mea wedetekoa yatoane uku.
7
Ali atoa
atu pitikilepa likonu tiki. Bia ue eya nokoa kawa leau akeneya yakileka likonu tiki.
8
Toto
pade nitamekete lou kako-pete yawa mekono, wedetekoa yakete eya tato. Poyo ago-kiti
pinali one wa kaumotokome palanuke kapa petene moa awitikou toa tekete Akolalike wene
tugoa mea yete pade ali atoake wene mekoa mea tato. Ni poyo ago poike poademe kakome
kapa nunagu moa wateou toa teketepa Akolaliyo toto toa moono, ke wa nepia meato. Ni
edoa-mo.
9
Akolaliyo toto kibu moateka wene toopiamokome eya tou wa wene toopianeya.
Tone Ali Muno Yesu Keraisuyo toatekaleke kiwi toane mou wa wene toopianeya.
10
Keraisu
taatekoa nokome totoke tukilepa eya tomotoa tokome taneya. One wakapea noka-pete toto
wete tua pekedekoloka pa meadekoloka one-pala lipua meemoa pomotoa tokome taneya.
11
Nitaneyano, Akolaline yapu wikakou toa kini kini mama moa auapenali yoma piki toa pa
edikama pamene.
12
Anu oya-lawe kiwi pakeke Akolalinele wedoa takama yaki-kitipa paya tetepo
takameamene. Ali Muno agome i yene kiwi talo toa mane oa moa tamene wa moa kakane
yeneke uku.
13
Wini yename tikileke ke wa kiwi wedoa kei pia wene mekoa mea tamene.
Kini kini odene wene piitakutukoa meamene. Tepe kolotini-pala kilikoa pimotoa meamene.
14
Anu oya-lawe eya tamene wa kiwi kowitoa oko-ye. Kalabo wameneya yawa meki
yene pupu wedoa tamene wa mane oa ni piti motaneya meki yene wene yapetekoa ni
Akolalinele wedoa takama yawamiki yene auapea tamene. Ete yene peya mama moa
uutukoa poti yopiamene.
15
Ete-kitame kipala poanele tokolipa nipa poaneleme ete topo
takameamene wa mane mane amene. Yesuke wene tugoa meki yene-palaka ete ali atoa-
palaka epetanele-kama toa enekala tamene.
16
Ete pia oto pia wedia meamene.
17
Ta pataka
abuna Akolali kowitikala toa
18
ele kuleme ke enekakale meketeka Akolali-pala ke wa oa
tamene. Edikaketepa Akolaline wene motekete toi. Nipa Keraisu Yesu patu kautakoa kakete
nitimotou wa Akolaliyo wene pikale eni tekete toi.
19
Ni toe tugoa mou toa tekete Epetane
Yominiyo ta wa okale tagoa toamokayano, one okale wedoa yakoa tamene.
20
Akolaliyo
one agale to awea akaki ali-kiti imo akamene wa wene takakomopa pamo tetepo takoa
wawameamene.
21
Pademo pademo yateketepa nimini iki patu wa wene kibututukoa meapa
kapenemo takoa wawa niminimo yakoa moa tamene.
22
Ele kule poanele tikile peya titi toma
yamene.
23
Tone tepe kolotini kilikoa pikako ago Akolali-pala totome eya wa kini kowitikoa
oko-ye. Neke wa takoa motokana yename nekele kiyo akenele takatiki kotu kakoa
tomotono ta. Tone Ali Muno Yesu Keraisu wakapea nokaleka kini yomini kini tepene piko
wene kini tigini moa koigameneya meketepa ete-kitame padeya namike akoa agale oatikile
toamomotono ta wa totome kini kowitikako-ye.
24
Kipa one wa kayo oa motoko agome tou
wa oka toa-kama taatekoa tokala tokono, tone ina kowitikakomo yakoa too.
25
Anu oya-
lawe toneka kowitikamene-ye.
26
Tone wini take meki oya-mikiti-pala ke wa kini yono motokamotoane uku-ye.
27
Ali
Muno agono ibini wedekoane eya tamene waneka uku-ye. I wiane wetekaku pipia wida
nokale Keraisuno ali atoa peyame yakamotono, oi motokamene.
28
Tone Ali Muno Yesu
Keraisuyo kiwi peya pewe wia yopimotoane kini kowitikoane uku-ye.
Opa anu agale eni.
<<
55
>>
1 Timosi
00
11
22
33
44
55
66
1 Timosi 1 Timosi
<<
00
>>
^
1 Timosi
Pamo Olaukane Ali-kitike Pubu Akenemo
Losule Wedetekoa Tekete Toatekomo
Akolaline Yene Yopiki-kitame Toatikimo
Yesuno Ali Atoa Yopiko Alike Lokoa Mea
Losule Talo Tiki Ali-kitame Toatikimo
Akolaliyo Papete
Kaukoa Mema Nekenemo
Kapene Tikisa Ali-kitike Pubu Akenemo
Keraisunole Wedoa Takako Ago
Yesuno Ali Atoa Yopikete Toatekomo
Kueke-kama Wene Piitikaneya Meameamene
Poloyo Timosi Mane Mane Akenemo
1 Timosi 1 Timosi
<<
00
>>
1 Timosi 1 Timosi
<<
11
>>
1 TIMOSI
Timosike Namolo Takoa Wia Wetekane Pipia
1
1
Polo nopa Keraisu Yesuno Aposelo ago i mekene uku. Eya agotame toto toa
motoko ago Akolali ni Yesu Keraisu one noatekoya tokolo totome nepia meko agotame no
moa kakakoiya tokolo ni uku-ye.
2
Timosi neke i pipia wiane wini wetekakilepa nepa anu manago tetepo taneya mea
nopala odene wene piitikoa Keraisunole takama yawa toko ago tokolo tuku. Toneketai
Akolali tone Ali Muno Yesu Keraisuta kitame einago nepa pewe wia ela moa tepe kolotini
kilikoa pikoa toe wane neke kowitikakene uku-ye.
Pamo Olaukane Ali-kitike Pubu Akenemo
3
Masedonia take poadene pekene tamene wane okouna wa lokoane uku. Epesase take
pa wida mea kamene. Wini take padeka-kitame Akolaline agale pilia wakete kini wene
kibututukoa okoimo pamo olaukakete tikino, nitamoati wa mane oa moamene.
4
Wini
yenamepa la agale Akolaline agale tetepo takoa oa ni kini kaua-mikitane ibini i i wa ete oto
wa mate agale oa tokala tiki. Enile toa wipitiketepa pa agale-kala oa takoa pili pili toa kawei.
Ali atoame Akolaline wene toopianele toadete oneke wene tugoa memotoa olaukatikiyake
nile-kala toa kaki.
5
I totono neeke wini wiane wetekakilepa ali atoa kini kini wene mekanali
yoma pamene wa neme olaukamotoane tuku. Edikama yawadetepa poane wene takoa
koikatapeneya mea ni tepeme ta wa oa epetekakale-kama toa ni Akolalinele odene wene
piitikoa takoa tamene wa olaukamotoane uku-ye.
6
Pade-kitame i totono litia toake wawa
pata paka pekete pa agale ete oto wa topo takoa ekete tiki.
7
Nipa Akolaline totono olaukou
wa wene pia tikilepa eni totono pine piko toa wene toameketeke tiki. Nitoa i i wa
olaukakimoka kini wene toamenemo olaukakete tiki.
8
Totome eya wa wene toko. Akolaline totono ali atoame litia toatiki toa litia tikilipa
epetikilepa toko.
9
Akolaliyo one totono yametekilepa wene epetaneya meki yene takoa
pubu oa tokoya mena. Eya tiki yene takoa pubu oko. Kini totono tetekoa ni kini tobou ali-
kitane agale tagoa toamoa ni Akolali mukiti yamea wawa ni ele kule poanele toa ni
Akolalinele takamoa kinikile itonole-kama toa ni etene nine wia tukoa ni ete-kitika wia tukoa
tiki yene takoa pubu oko.
10
Ni mone koua piamatiki atoa-pala koua pia ni alime ali yagono
kini natono latikoa koua pia ni kini pupu-kama takamotoa ali kode moa egetoa ni kapene
yokoa ni nimini agale uku wa eketeke oa yotokoa tiki-kiti takoa pubu oko. Nipa mea
epetekakete toatikile olaukanemo yakamekete ele kule poanele tiki-kiti takoa pubu oko.
11
Wedianeya-kama meko Akolali one pa tootapeneya mea epetekakome tokomopa e yene
olaukoano ta wa no moa kakaka. Nitikagome one meko toa kotu kakoa meamiki yene takoa
one totono yamea pubu okoya.
12
Tone Ali Muno Yesu Keraisuyo no i agomepa onekele takamele tokono, one tele
patu kautakoa kake tamene wa no moa kakaka tokolo onepala ke wane uku.
13
Papete one
ibini paya tetepo takoane one agale yakoa motane yene tete meane toane lene piane ago
yakou. Nitikouyake Akolaliyo no ela motokome kibu moamoka. One agale pine piko toane
agopa moane Keraisu wene toamoane tokolu tokome ni kibu moamoka.
14
Kibu moamou
wa tone Ali Muno agome no pewe wia tagatapeka. Nipa Yesu Keraisu-pala lipuane mekene
oneke wene tugoane meane yete pade ali atoake wene mekoane meane tomotoa tokome
toka.
15
Etene nimini okala tane agalepa ukuno, ali atoa peyame yakoa mootapeamediki.
Yesu Keraisuyo poanele tokoi yene toa moademe itonoke nekeneya. Ete ali atoame tokoi
poanele moane patukoane poanele pine wiane tokou ago no i mekene uku.
16
Nopa poanele
pine wiane tokou agoke Keraisu Yesuyo poti ko akene wene-kama pia ela motokome no
toa motoka. Nipa mea kama poadete oneke wene tugatekoi yene peya ela motokome
toateka adeka pia toka.
17
Nitikano, ali atoa eya kuya peya talo toa-kala kama pokago
Akolali kei pia-kala kama patoane uku. One tuameneya pa mea kama poko. Tone leneme
enamele toamoko. Tone Akolali wa oateko agopa one odene meko. Onepa nitane agono,
one ibini kamotoka kamotoka toa-kala kama patoane uku. E e nimini.
18
Anu mana Timosi eya tamene wane ikilepa neeke papete oa piane toane litikene uku.
Eni oa piane agale wene taneya meke poyo agome-kiti tou toa
19
Keraisunole wedoa takoa
togamene. Ni neke tepeme ta wa oa epetekakale-kama litia tamene. Pade-kitame nitamekete
ue dipi pata paka pome ka ua atuou toa etepea pote atutapeneya.
20
Dikane agota Aimeniasi
Alekesadata einagotake Setanu awinome tete memotoane wakou. Nipa einagotame
Akolaline ibini paya tetepo takoake wamotoane tekene tokou.
1 Timosi 1 Timosi
<<
11
>>
1 Timosi 1 Timosi
<<
22
>>
2
Losule Wedetekoa Tekete Toatekomo
1
Eya tobou kakoa tamene wane uku-ye. Ali atoa peyane kowitikakilepa i ago i atoa
auapeano ta, ke wa kowitikakala tamene.
2
Tone ako tobou ali-kitaneka ni kiwike lokoa ta
yopia meki peyaneka kowitikatoane uku. Nipa Akolalinele takoa tonekele uutukoa toa
tikilepa tepe kolotini kilikoa pimotoa poti mea toadete tobou yenane kowitikato wane uku-
ye.
3
Edikoa kowitiketepa epetanele tekete toko. Nitikolo yatekome toto toa motoko ago
Akolaliyo epetanele eni tiki wa wene epetaneya meko.
4
Nipa ali atoa peyame one nimini
agale yakoa momotoane ukuno, toane mou wa wene epetaneya meko.
5-6
Tone Akolali wa
oateko agopa odene ago meko. Ni ali atoame Akolaline yono moa lipumotoa ka patu
kakago odene ago meko. Einago Keraisu Yesuyo toto peya oto toa moademe ali latia nome
tuaneya. Akolaliyo papete wene toopiane toa eni taatekoa tikilepa eni toateka oi ponoka-
pete nitaneya.
7
One eni tanemo mo wiane to aweane omotoa Akolaliyo nopa one Aposelo
ago takoa moa kakaka. Enipa nimini uku. Kapene wakamuku. Nipa e ku pa yatene Yesuke
wene tugoa memotono, kini pitikika onekemo niminimo olaukama yamene wa no moa
kakaka.
8
Ta piko peya pitiki yene nate wene pianeya mea yono ate pitikoa kowitikilepa kotimi
luane wene wawa neno wamoa toa kowitimotoane uku.
9
Atoa yatenepa kini mamina kakilepa kaloa wedoa tukoa kawamoa poti wene pia
tamene. Kini pine puputua pitikoa padeya padeya pine munoke tukoa kini kabeke padeya-
kiti kaloa pia enika eniyake wene piitikaneya meameamene.
10
Nipa Akolalike wene tugoane
meku wa iki atoame toatiki toa yete pade ali atoa mama moa epetanele tamene.
11
Panagome-kiti pademo olaukoa kakaka agale waametekoa poti witimoa yakakoa
meamene.
12
Nipa kini losu yapu oboa mekoika atoa yatename ali yatene Akolalinemo
olaukoa talo toa tomotoane wamuku. Agale waametekoa poti memotoane uku. Ni edoa-mo.
13
Akolaliyo namolo takoa ali pade Adam wa ibini oa latia mekoa wa naniko atoa pade Ipi
latia mekoa taneya.
14
Nitaneyake Setanuyo ali Adam oa yotokamoa atoa Ipi oa yotokaneya.
Nitikale einatoame Akolaline totono tetekakome poanele eni taneya.
15
Nitaneyake atoa
yatename mati opikoli-kama Akolaliyo mama moa auapekala too. Nipa onekele takama
yawa yete pade ali atoake wene mekoa mea epetanele toa poti utanele toa tokolipa nitoo.
1 Timosi 1 Timosi
<<
22
>>
1 Timosi 1 Timosi
<<
33
>>
3
Akolaline Yene Yopiki-kitame Toatikimo
1
Nimini okala tanemo ukuno yakamene. Panagome-kiti Yesuno ali atoa yopiane meou
wa wene pikomepa epetanele toateko wene eni pikome toko.
2
Yesuno ali atoa yopiko
agomepa ete-kitame padeya namike koiso akatikile toamoa ni atoa odene moa koua mea ni
utanele-kama toa poti yawa ni epetekoa mea ni yete pade ali atoa one yapu noe wa
makutukoa moa ni pademo pademo wene toa olaukoa too.
3
Ni gerepi po ku ue nokoa
kawamoa lene piamoa poti ko akene wene pia ete yene-pala neno wamoa kueke wene
pitikaneya meamoa too.
4
Ni one mati atoa talo toa epetekakilepa one mati-kitame one oka
agale yakoa toa one kei-pala pia tomotoa too.
5
Yopikagome nitameneya one mati atoa talo
tokome toatekale agopa tokale mekomepa Yesuno ali atoa edoa talo tomotoa-pe.
6
Yesuke
tepe kolotini pene pekoa pika agopa takoa moa kakameamene. Onepa tube ago kaku wa
yopia potokakayano, takoa moa kakameamene. Setanu onepa etene ako ago kaku wa wene
pikake Akolaliyo wakene toa einagoka wakaya tokolo ni uku.
7
Losu yapu poamiki-kitameke
kei piki alipa takoa moa kakamene. Ete-kitame kei piamiki agopa Setanuyo likoa enekome
labakakolo oneke ya takaya tokolo ni uku.
Yesuno Ali Atoa Yopiko Alike Lokoa Mea
Losule Talo Tiki Ali-kitame Toatikimo
8
Eina toa Yesuno ali atoa yopiko alike lokoa mea losule toatiki ali-kiti takoa moa
kakakilepa ete-kitame kei piki ali-kiti takoa moa kakamene. Dikane pupu toatiki ali-kitipa
dikoa meoi. Keke takuta kawamoa gerepi po ku ue nokoa kawamoa kue eya moadiya wa
yotokoa moamoa tamediki.
9
Ni Akolaliyo ali atoa-pala papete kaukoa mema nekenemo
Keraisu nokome tanemo wedoa yakoa motikilepa kini tepeme ta wa oa epetekaka toa-kama
toa tamediki.
10
Eni ali-kiti wete moa kakameneyake kini toatikile oyake tiki patu wa kini
losule tekete tikile leneme wia pikala tamene. Ni epetaneledo tokoli eneketepa moa
kakamene.
11
Eni ali-kitane natono-kitameka eya toa meoi. Ete-kitame kei piatikile toa yete
pade ali atoa-pala akoa agale wamoa utanele-kama toa tou wa ikile-kama toa tamediki.
12
Eni
ali-kitame atoa odene moa koua mea kini mati atoa kini yapu meki peya talo toa epetekoa
tamedeki.
13
Yopiko agoke lokoa mea losule edikoa wedoa teketepa nipa Yesuno ali atoame
kei piatikile eni tekete tiki. Nipa Keraisu Yesu patu wedoa kautakoa kakete onekemo
akamene piti moameneya atiki toa meki.
Akolaliyo Papete
Kaukoa Mema Nekenemo
14
Timosi neke i pipia wiane mekakilepa ne mekota wini tigotokoane nouno wene piane
tuku.
15
Wete noameadekolupa nipa i pipia moa oi mootokoapa Akolaline yatene toto
mekete toatekole wene toa too. Akolaline yatene wane ukupa mea kama poko Akolaline
losu yateneke uku. One nimini akene agale wedoa pikoa kamotoa tokome yapu pigi takoa
moa wiou toa eni yatene one wa takoa moa kakaneya.
16
Akolaliyo ali atoa-pala papete
kaukoa mema nekene toa Keraisuyo taatekoa tanelepa tubele mati eni tadekono, padameka
enilepa pale tane tetepo takamele toamoko. Enilekepa eya wa wia mekaneya piko.
Keraisu taatekoa nikilepa tono melepu kakeneya nekeneya. Epetane Yominiyopa einagopa
kiyo akenele-kama toko ago wa wene takaneya. Edelo ali-kitamepa einago
enaneya. Onekemopa e ku yatene pitikoi toa oa pupitikatapeneya. Itonoke mekoi-
kitipa oneke wene tugoa meaneya. Akolaliyopa einago one pa taneya mekanata a
tibuke moa kakaneya wa panagome wia mekaneya.
1 Timosi 1 Timosi
<<
33
>>
1 Timosi 1 Timosi
<<
44
>>
4
1
Epetane Yominiyo eya wa keleyo wene takakome oko. Naniko pade-kitame
Akolalinele takoake wakala toi. Nitiketepa keke takuta kakene ipono-kitame oa
yotokanemoka Setanuno poane yatename olaukanemoka yakoa toi.
2
Kini eni yakoa
tokoimopa ali pade-kiti kini tepe kolotini toe kabunume keneya kelianeya meou toa mekete
poaneleka epetaneleka takoa enamoa olaukoi. Niminimo akene tetepo takoa oake kapene
agale oatekoi yene keku.
3
Nitoa olaukakilepa ali yatene tiobali kawa atoa moamato wa oa
padeya padeya nee kekaneya latikoa wawa noamato wa olaukoi. Yesunomo yakoa moa pine
to a wene tokoi-kitame onepala ke wa ootokoa moa nomotoa-kama Akolaliyo latia
pikaneyake nitoi.
4
One latia pikaneya peya epetaneya-kama latianeyano, odeneka kekaneya
latikakile toameamene. Eniya peya onepala ke wa ootokoa namele toko. Ni edoa-mo.
5
Akolaline agale piko toa ke wa kowitiketepa nipa eya kuya nee peya moa namele toko.
Keraisunole Wedoa Takako Ago
6
I agale i i wane oane neeke wetekaku toado Yesuno ali atoa olaukakepa nipa Keraisu
Yesunole wedoa takake too. Oneke wene tugoa meke toatekamo onekemo
olaukakounakamota eni epetane peku lawetekolu noa tokana toa pa toomoa poke
olaukakepa nipa toa epetekake too.
7
Pade-kitame Akolali ko wamekete la agale oa pamo oa
tikino, titi takoa yakameamene. Nitameneya Akolalinele takateko kotu kakoa enekala
tamene. Ni edoa-mo.
8
Tone tigini kamotoa olaukanele teketepa tone wa auapeatekole eni
toko. Akolalinele takaketepa nipa tone wa wedoa auapeatekole eni toko. Nipa itonoke pa
mekokaka a tibuke pote mea kakokaka mea epetekama poo.
9
Niminimo okala tanemo
ukuno, peyame yakoa mootapeamene.
10
Onekele takateko kotu kakoa toa enoai toa
kakilepa mea kama poko Akolaliyo wipitikome toatekole nepia-kala mekete tekete ni toko.
Einagome ali atoa peya toane moadiya wa yopikoa mekome oneke wene tugoa meki peya
toa mokala toko.
11
Wini oane wetekaku toa toe toe wa neke oya-mikiti olaukoa tamene.
12
Panagome-
kiti i ago nepa pa tuali kake toko wa paya tetepo takakayano, pademo pademo oa ele kule
toa tikilepa Yesunomo yakoa motane yene mekete toatikile adeka pia tamene. Nipa yete
pade ali atoake wene mekoa mea ni Keraisunole wedoa takama poke ni poane wene takoa
koikatapeneya mea tamene.
13
Nopa wida wete noameneyake wini ali atoa kakakoa Akolaline
agale oi motokoa ni onekemo i i wa mo wia kawa pine to a olaukoa tamene-ye.
14
Yesuno ali
atoa yopikoi ali-kitame kini yono neke mataike pikoli Akolaliyo onekele takateka tele
lukakana. One eina tele lukakana wene kayapeamoa onekele wedoa takama yamene.
15
Ina
okouna wene kibutukoa mea tokala tamene. Wene kibutukoa mea tikilepa nipa neke namolo
toma yakanakale moa patukoa wedoa toomoa yamene. Peyame enemotono, nitamene.
16
Nepa mea potokoa pata pamo olaukoa takayano, wedetekoa mea olaukoa tamene. Mea
epetekoa olaukakilepa nipa Akolaliyo neeka neke agale yakoa motokoi yeneka toa momotoa
teke too.
1 Timosi 1 Timosi
<<
44
>>
1 Timosi 1 Timosi
<<
55
>>
5
Yesuno Ali Atoa Yopikete Toatekomo
1
Ada agome-kiti poanele tokalepa kikoa akameamene. Nekatai tetepo takoa poti mane
oa moamene. Tualika epene alika neke wamene-mikiti tetepo takoa yopiamene.
2
Atue
deyaka epene atoaka neke nine tetepo takoa yopia ni tuatoa yatene neke laine-mikiti tetepo
takoa mea leneme kode noamoa poane wene takoa koikatapeneya mea yopiamene.
3
Yawale yapu nepo atoa-kiti paya tetepo takamoa wedoa mama moa yopiamene.
4
Nepo meko atoa-kiti one mana kono-mikitika one kaua-mikitika meadekolipa one eni kako
yename Akolalinele takakete toatiki toa eya tomotamene. Kini etene ninetame opia
egetekoinake nami wia kini nepo atoa mama moa egetemotamene. Akolaline wene
epetekatikile enino, nitimotamene.
5
Pade kawameneya yawale yapu egetiniya meko nepo
atoapa kidene mekome tokome Akolalike wene mataneya mea ta ete likoa oto likoa one
auapeano ta wa kowitikala toko.
6
Nepo atoa padame nitameneya one ko la utukole-kama
tou wa etepea toma pokolopa Akolaliyo einatoapa tuane atoa tetepo takoa wako.
7
Nepala i
ukumopa nepo atoa-kitame yakamotono, i i wa mane oa moamene. Ete-kitame kiwi kikoa
akatikile toamomotono, nitamene.
8
One kako ali atoaka one etene nineta one mati atoaka mama moamoko agopa
Yesunole takoake wakene ago eni. Yesunomo yakamadete waki-kitame ele kule poanele tiki
toa einagome moa patukoa poanele tubele eni toko.
9
Yopiki ali-kitame losu bokuke ibini wia mekoa egetatiki nepo atoa-kitipa dikoa
epetanele tiki atoa-kiti. Ana tuutukaneyake pade alike poamoa ni ege odepeta kadukoa wa
tuku melepu kakoa (60) penane mali moa patukoa mea
10
ni ete-kitame kei piatikile toa ni
kini mati-kiti wedoa talo toa tubetekoa ni eko ali atoa kini yapu noe wa makutukoa moa nee
takoa lawetoa ni Yesuno ali atoa kini yapu nomotoa kawake kakene kege ueme kogoa ni ke
enekakolo meki-kiti mama moa auapea ni ele kule epetanele toa tiki. Dikoa meki nepo atoa-
kiti takoa moa egetamene.
11-12
Nepo atoa padekapa tuatoaka epene atoaka takoa wawa kini ibini bokuke wia
mekoa egetameamene. Dikane nepo atoa-kitame Keraisunole-kama takou wa oa togotoake
ali padeke wene kakoa etepea piki. Dikou wa ikile tagoa toamekete pade alike pikilipa ete-
kitame akoa agale amele toko.
13
Dikane nepo atoa-kiti loyo mea yapu yapu yaki. Nitoa eni
poanele moa patukoapa agale ete kotuka oto kotuka toa ni ete yename namene wameneyake
kini okoimo yakadete pokala toa ni pademo pademo wamatikimo oa enika enile tokala tiki.
14
Enilepa Yesuno yatene atoa-kitameke tiki wa toto-pala poi te ia meki-kitame poanemo
akaya tokolo tuatoaka epene atoaka ana tukolopa eya tomotoane uku. Ali padeke pome
mea mati opikoa ana matita mama moa pupu wedoa tomotoane uku.
15
Nepo atoa padeka-
kitame Yesunole takoake wawa Setanunole takama yakili tekene ni uku.
16
Nepo atoa-kitane
oboa pikane kue adamokolo edoane egeteku patu wa yopiki ali-kiti wene keda taneya
mekayano eya tamene. Yesuno agale yakoa motane atoame-kiti one-pala po piane nepo
atoa moa egetemotamene. Nitikolopa yopiki ali-kitame pade kawameneya yawale yapu
egetiniya meki nepo atoa-kiti takoa kue eya adekoa tatia meetapeamele toko.
17
Yesuno ali atoa yopia epetekaki ali-kiti-pala ke wa oa kinikiya tatia keda takoa
meamene. Nitoa metekilepa Keraisunomo mane mane oa olaukoa tiki ali-kiti takoa kinikiya
etene wedoa keda takoa mekala tamene.
18
Enilekepa Akolaline bokuke eya wa wia
mekaneya piko. Witi ku tatianeya pikoka yaku takoa pootapemotoa pitimekawe kai
kawame kauta kauta toa pokome witi ku -pala noma yamotono, timini po toameamene.
Ni panagome-kiti neke pupu takakolopa one eni pupuke kue meateko kotu kakoa
meamene wa padame wia mekaneya.
19
I yopiko agome padele poanele tokale enekou wa
odene agome-kiti akanokalepa one eni okamo yakameamene. Ali tebolo takutame
akanokolipa nipa yakamene.
20
Yopiko ali-kitame padele poanele tadekolipa nipa ali atoane
lene yoto moa kakoa kikoa akamene. Ete-kitame poanele tamene piti motaneya memotono,
nitamene.
21
Akolali Keraisu Yesutaka Akolaline takoa motane edelo ali-kitika kakakoane nepala
ina oane metekule-kiti yakoa tamene wane uku. Nipa ali atoa peya edikoa talo tikilepa kamo
yene ponopene yene takoa enamoa kiyoke-kama tamene.
22
Yesuno ali atoa yopiateko ago
takoa moa kakakilepa mekamoteke pitake toameamene. Einagome padele poanele
tadekalepa one toka poanele neeke weamutukayano, nitameamene. Ele kule poanele titi
takoa toameamene.
23
Timosi nepa yene mokoa kake tokono, neke eni yeneka neke tepene
witakala toko yeneka teigadepa weneya ue-kama noameamene. Gerepi po ku ue deya-pala
nokala tamene.
24
Pade-kitame kini poanelepa keleyo-kama tiki. Kini koiso wete akameneyake kini
poanele tikimo ta peyake oa pupitikamotoa tiki. Pade-kitame nitamekete kini poanelepa
naniko keleyo witamotoa kaukoa tokala tiki.
25
Eina toa panagome-kiti ele kule epetanele
tokolopa peyame keleyo enamele toko. One epetanelepa kaukoa tokoloka kauaneya pia
kawamademe toko.
1 Timosi 1 Timosi
<<
55
>>
1 Timosi 1 Timosi
<<
66
>>
6
1
Kueme topo toa moa egetane yene kime pine ali-kiti kei pia pupu-pala wedoa
takamene. Kipa Yesuno ali atoameke pupu takoa potokaki wa Akolaline ibini paya tetepo
takoa tone olaukakomoka pamo tetepo takoa wakaya tokolo ni uku.
2
Pinago pade Yesuno agale yakoa motane ago tadekalepa nipa i agopa ame wa amele
toko wa taba ago tetepo takamoano, one pupu wedoa takama pamene. Nipa pinagopa
Yesunomo yakoa motane agono, Akolali oneke wene mekoa mekome toko wa one pupu
wedoa takamene.
Kueke-kama Wene Piitikaneya Meameamene
Timosi nepala i ukule-kitika wini yename tamene wa mane mane oa olaukamene.
3
Akolalinele takakete toatikile i i wa tone Ali Muno Yesu Keraisunomo to awea akaki ali-
kitame nimini olaukakimo ete pimotoa panagome-kiti pade olaukakomepa nipa eya tokome
toko.
4
Pademo pademota wenepa tuku wa pinali one wa kei pikomeke nateya weneka
toameneya meko. Dikane agopa ete yene-pala mokota oa neno oa toatekole piamokolopa
wene poaneya meko. One oko agale yateki-kiti ete oto wa wene poaneya mea ni mokota oa
ni poanemo oa ni ete yenepa kipala poi te iane yene tetepo takoa tiki.
5
Nipa wene moa
koiganeya mea niminimo agopa takatapeneya mea tekete ete oto wa agale to onali yoma piki.
Akolalinele takakenepa nipa kamo toma pou wa paya wene pia tiki ali-kitike uku.
6
Panagome-kiti Akolalinele takama yakilepa onekeya oyake piko wa tepe kolotini
kilikoa pimotoa mea takakomepa nipa kamo ago meou toa wedoa meamele toko.
7
Toneka uane tepene mea nokoo-pete padeya deyaka aua noamokoo. Wa naniko itono
tewitikoa tua peketepa tonekeya etene padeya deyaka aua pamele toamoo.
8
Tone noateko
nee-pala tone kawateko maminata pikolopa nipa tonekeya adekoa piko wa epene wene
pianeya meatoane uku. Ni edoa-mo.
9
Kamo tou wa wene pia meki yenepa Setanuyo likoa
enekome one wakoke labakoa mokala toko. Eni yene paya nou toa mea padeya padeya tepi
motuku pekete toapa tua atutapekala toi.
10
Ali atoa kueke-kama wene piitikaneya mekilipa
kini tepene padele padele poanele witoa tagatapekala toko. Ali atoa padeka-kiti kueke-kama
wene piitikaneya meketepa Akolalinele takoake waku pekete toa tepe we taneya meki.
11
Timosi nepa Akolaliyo one wa takoa moa kakako agome enika eni poanele titi takoa
pitoa pamene. Nitoapa eya toatekoleke-kama wene piitikaneya mea tamene. Kiyo akenele
toa ni Akolalinele wedoa takoa ni Keraisuke wene tugoa mea ni eko ali atoake wene mekoa
mea ni ke enekaka-peteka Akolalinele pa takama yawa ni poti ko akene wene pia tamene.
12
Eko ali-kiti-pala teyapea moa patukanali you toa keneya Akolalinele wedoa takamoa
pamene. Ali atoa peya matiyame enekoa kakoika Yesuke wene tugoane mekene tuku wa ue
motoka-pete Akolaliyo nepa mea kama pomotoa tokome one wa kayo oa motaneyano,
meane kama poatekule dekoane mou wa onekele wedoa takamoa pamene.
13
Eya alita,
padeya padeya peya wene takoa yomini mekoa toko ago Akolali ni Podiase Pailase
kakakoa niminimo to awea akene ago Keraisu Yesu einagotane leneke kakene eya tamene
wane nepala uku.
14
Yesuno totono pademoka moa koigamoa padeleka katekoa wawamoa
wedoa pikoa kamene. Ali Muno Yesu Keraisu wakapea nokaleka nitima pamene.
15
One eni
noateka oi ponokalepa Akolaliyo pa wa oto wetekoo. Akolali eya toko agome nitoo. Onepa
wedianeya-kama meko. One odene ako odene tobou ago meko. Ali Muno peya tobou meki
peya oneke-kama lukoa meki.
16
One odene tuameneya mea kama poko. One pa taneya
mekota odene agoka pome kamele toamoko. Padameka one enekile toameneya. Padameka
one enamele toamoko. Onepa dikane agono, toto peya telekole toa yopia kama pamene wa
one kei pia-kala kama patoane uku. E e nimini.
17
Kamo yene eya wa mane mane oa olaukamene. Mate agale wamoa kini kamoya
eyake wene piitikaneya meamoa tamene. Kini kamoya pa pia kawamoono, toto wedia
memotoa pewe witikome padeya padeyata meteko ago Akolali oneke-kama wene
piitikaneya meamene wa olaukamene. Nipa ele kule epetanele tikile kamole tetepo takoa
tamene wa olaukamene.
18
Eyaka tamene wa olaukamene. Ele kule epetanele toa ni yete pade
ali atoa auapea ni kinikiya kamu toameneya wedoa moke toa tamene.
19
Edikaketepa a tibu
meemoa pekete moatiki kamoya nodokoa piou toa tekete toi. Nitiketepa nimini mea kama
poatekoile pikoa kawei wa kamo ali atoa olaukamene.
20
Ae, Timosi Akolaliyo ne yametakana toa-kama wedoa pikoa kamene-ye. Pade-
kitame onekemo wawa pamo-kala ikilepa imopa niminimo-kama uku wa oake ete oto wa
neno oa kapene wakoa iki. Enika enimo titi toa yakameamene.
21
Pade-kitame enika enimo
yakoa motekete tekete Akolalinele takoake wawa pata paka etepea pokoi.
Ne mekota wida meki-kiti kiwi peyapa Akolaliyo pewe wia yopimotoane uku-ye.
Opa anu agale eni.
1 Timosi 1 Timosi
<<
66
>>
2 Korine
00
11
22
33
44
55
66
77
88
99
10 10
11 11
12 12
13 13
2 Korine 2 Korine
<<
00
>>
^
2 Korine
Poloyo Papete Toateka Wene Wia Wakenemo
Korine Yename Poane Ago Ela Moatekoimo
Polo Teroase Take Kilikoa Meamenemo
Weneya Totonoke Akenemo
Akolaline Kamoya Itonome Latianeya
Keneke Lobutua Piko Wa Pedoa Akenemo
Poloyo One Motane Tetepa
Natele Tetepo Takanemo
Tone ATibuke Meateko Yapu
Keraisuyo Ali Atoa One Etene-pala
Oya Patu Kakakome Tanemo
Poloyo Tete Mokala Tanemo
Poloyo Pubu Akenemo
Poloyo Wedia Mekome Akenemo
Kinikiya Moke Tamene Wa Poloyo
Korine Ali Atoa Mane Mane Oa Olaukanemo
Taitasi One Oyagotame Tanemo
Keraisuno Ali Atoa Auapea Toatekomo
Polo Pinali One Wa Kei Pianemo
Kapene Aposelo Ali-kitike Pubu Akenemo
Poloyo Tete Mokoa Kakenemo
Poloyo Pulete Enanemo
Poloyo Korine Yene Mama Motokome Akenemo
Wipitikome Pubu Oa Lionate Oa Tanemo
2 Korine 2 Korine
<<
00
>>
2 Korine 2 Korine
<<
11
>>
2 KORINE
Poloyo Korine Yeneke
Taku Takoa Wia Wetekane Pipia
1
1
Polo nopa tone oyali Timosi-pala opiane mekene i pipia wiane wetekaku-ye. Nipa
Akolaliyo papete wene toopiane toane taatekakene Keraisu Yesuno Aposelo ago mekene
uku. Enipa Akolaline ali atoa wini Korine take meki-kiti ni Geriki ta piko peyake Akolaliyo
one wa takoa motane yene peyake i pipia wiane wetekakuno, yakamene.
2
Tone etene
Akolali-pala Ali Muno Yesu Keraisutame kiwi peya pewe wia tepe kolotini kilikoa pikoa
tamene wane kini kowitikakene uku-ye.
3
Tone Ali Muno Yesu Keraisuno Akolali one etene-pala ke wa-kama oa one kei pia
tatoane uku-ye. Akolali einagome toto peya mama moa auapekala tokolo tekene ni uku.
4
Nitiko agomepa toto ke enekakolo meko-pete-kama auapekala toko. Nipa paapa toamoko.
Ke enekakolo mekolo auapekilepa nipa ete ali atoa ele kuleme ke enekakolo mekili enekete
totome kiwika edikoa ela moa auapemotoa tokome ni toko.
5
Keraisuyo papete tete mokoa
kakene toane noanumeka tete mokoane kakupa nipa Akolaliyo no i agopa mana Keraisu-
pala lipua mekome tokome tete motoko wa padele padele akole toa no wedoa mama moa
auapekala toko.
6
Noanu ke enekakolo memotoa tikilepa Akolaliyo eya wa wene pia toko.
Anu oya-lawe kime tete motiki-pete-kama noanume mama moane auapekene kiwi toa
motaneya poatiki ka yamemotono wene pia toko. Nipa noanume tete-kala motekeneka
onekele poti takoane togaku toa kimeka tete moteketeka nitikala tomotoa tokome Akolaliyo
no mama moa auapekala toko.
7
Nitikono, anu oya-lawe kime nile-kama toi wane wene
taneya meku. Nipa pade-kitame no tete mekala tikina toa kiwika tete mekala tikilipa nipa
Akolaliyo no mama moa auapeko toa kiwika mama moa auapeko wane wene taneya
mekene uku.
8
Eya wa wene taneya meamene wane kiwi wene takadene uku. Esia ta ludu pima
yakenepa tete-pala mokoane kakou matiyame tuateku tigotoko wane wene keda
toologaneya pima yakou.
9
Nipa Akolaliyo anu po-kitika tewitikademe toko wane wene
piane mekou. Akolaliyo eni ke enekakale memotoa tikilepa noanume eya tomotoa tokome
toka. Anu weneme padeleka toamekene one patu-kama kautakoane kamotoa tokome toka.
Tuane ali atoa moa kamotokako ago Akolaliyo nitika.
10
Akolali nitane ago tokome einapete
no tukaya wa toa motokana toa waka tokala toatekoleno, enakale toa wa toa mokala too
wane oneke wedoane wene tuganeya yawane pitiku.
11
Akolaliyo no edikoa auapekala
tomotono, anu kowitikakala tamene. Ali atoa kainya matiyame kowitikakala tokoli yakoa
tokalepa nipa no einago pewe wia kakome tokono, ke wa peya matiyame okala toi.
Poloyo Papete Toateka Wene Wia Wakenemo
12
Pinali anu wa kei piane oatekumopa anu tepeme a wa oko toane atiki toane mekene
ukuno, yakamene. Ali atoa pitikoi toane pima yakene Akolaline weneke titia tanele tikilepa
anu oya-lawe kipala etene wene epetaneya meane kiyo akenele-kama tokouna. Enipa anu
kaua-mikitane peku noane tokouna mena. Akolaliyo pewe witikome yametekale toma
yakouna.
13
Nitima yakou agome i wiane wetekakumopa kime oi motekete wene toatiki
toane-kama uku. Pademoka potipiane oane yotokamuku.
14
Opi papete no mekene tukule
kime nateya wene taneya mekiyake Ali Muno Yesu wakapea noka-pete noanume kiwi kei
pikou toa kimeka no kei piamele too wa wene tootapeadete tiki.
15
Kime no kei pioino etene wene tokouya tekene eya tou wane wene kibutuane mekou.
Masedonia take poadene kiwi mekita wida dekoane pinou.
16
Wida meemotekene
Masedonia take pone meane wida wa none menou. Enipa anu oya-lawe kiwi taku takoane
auapeou wane wene kibutuane mekou. Ni anu oya-lawe kimepa no Yudea take wakapeane
pomotoa auapeoi waneka wene kibutuane mekou.
17
Wida nou wane okounake wete
noamokoupa nipa noanume mekamotokome pitakome akedeko wa kime iki patu. Nipa pa
itonole toma yaki-kitame toamadeteke ile tou wa pamo ekete tiki toane noanumeka akedeko
wa iki patu.
18
Kime eni wene pikaya tokolo eya wane uku. Nou wane ikilepa nipa Akolaliyo
niminimo-kama oko toane okou. Noamadeneke wida none menou wane wiane mekakene
okouna mena.
19
Akolaline mana Yesu Keraisu one ko Sailasi Timosita totome i i wa kipala
oa metekoonakago einagome dikou wa ootokoapa one wene wia wawameneya one oka
toa-kama toko.
20
Nika Akolaliyo dikou dikou wa oka toa-kama mana Yesuyo nitikou ta-la
wa kabe koukoa taatekoa toko. Yesu one nitane ago tokolo tekete Akolaliyo niminimo-
kama oko ago tadeko wa totome one kei piai toko.
21
Anu oya-lawe toto Yesu patu
poapeneya kautakoa kamotoa tikilepa Akolali einagome toko. Nitimotou wa Keraisunole
takamotoa toto takoa motokome eya taneya.
22
Toto-pala wipitikome epetekoa toateka
adeka pikome papete one Yomini totoke moa wetekaneya. Nipa kipa one wa one adeka
tone tepene piou toa taneya.
23
Akolaliyo yakakoane kipala eya wane ukuno, yakamene. Korine take wida nou wane
okounake noamokoupa nipa kini padele poanele tokoike kikoane akakolu ya motokayano,
noamou wane noamokou.
24
Enipa Akolalinele takama yaketepa ile tamene ile tamene wane
tika tika toadene wamuku. Onekelepa kini weneme wedoa takama yakete tikino, eyaka
toadene uku. Onekele wedia mekete takama yamotoane auapenouno, nitima yatoane uku.
2 Korine 2 Korine
<<
11
>>
2 Korine 2 Korine
<<
22
>>
2
1
Nipa eya tuku wane oane togotokou. Wida padepetena nekeneka kiwi kikoane
akakolu tekete wene keda toologaneya mekoina. Wa taku takoane kini wene keda takakaya
tokolo opi wa none meamadene waku.
2
Kiwi wado wene keda takakolupa nipa anu wene
teyo epetekamoo. Anu oya-lawe kime odene anu wene epetekamele toko. Padame pade
mena.
3
Nipa noamekene pipia pade wiane wetekakouna. Nipa no wete wida wa wakapeane
noameneyake anu wene epetekatiki-kiti kime no einagono wene keda takakaya tokolo eina
poanele tewitikoa wato wa kime wamotoane tekene ni wiane wetekakouna. No wediane
mekolupa kiwika wedia meoi wane wene pikene tokouna.
4
Eina pipia wiane wetekakilepa
wene keda toologane mati meane tepe-pala we taneya meane tokouna. Nipa komo oane
mekene wiane wetekakouna. Kiwi wene keda taneya memotoa tekene wiane wetekakouna
mena. Anu oya-lawe no einagome kiwi mama moa kakome ni tadeko wa kime wene
tomotoane tekene tokouna.
Korine Yename Poane Ago Ela Moatekoimo
5
Panagome wene keda takaneleke ikilepa einagome no wene keda takaka wane
wamuku. Kiwi padeka-kiti wene keda takakome toka wane ekene uku. Nipa padele tubele
tane tetepo takamadene tekene einagome kiwi peya wene keda takakome toka wane ukuya
mena.
6
Opa kiwi peya matiyame einago kibu moatekoi kotuke kakoa kibu motekete
tokoino, oyakeno, wa pade kibu moameamene.
7
Opika einago wene kedame moa
pagetekaneya etepea pokome pokaya tokolo one eina poanele tokake nami wiitapeane
tetepo takoa mama moamene.
8
Onekepa namolo wene mekoa mekoina toa opika pa wene
mekoa meadiki wa einagome wene tomotono, nitamene wane kiwi kowitikene uku-ye.
9
Kime tamene wane ukule-kama litia tiki patuno, toane eneku wane wene pikene kini pipia
pade wiane wetekakouna.
10
Padame poanele tokake po letu mekakoina kea wakolipa
noanumeka enakale tou. Tamedekalepa nitou. Nitou wane einagome poanele tokake nami
wiitapeane tetepo takoane mama motikilepa Keraisuno leneke kakene anu oya-lawe kiwike
tuku.
11
Setanuyo toto-kitika etepea pomotoa oa yotokakaya tokolo nitatoane uku-ye.
Einago Setanuyo edikanele ele kule poanele toateko wene pianeya-kama meko wa totome
wene toko.
Polo Teroase Take Kilikoa Meamenemo
12
Keraisunomo oneke epetekoa akene agale mo wima pou wane Teroase take ponene
mekenepa Ali Munagome ena toatekou ka wete patekakaneya tadeko wane wene tokou.
13
Nitikeneke tone oyago Taitasi eida meameadekale enekene eni take yene wete meamene
wane tewitikoane Masedonia take meponokou. Nipa Teroase take tepe kolotini kilikoa
piameneya mekene tokou.
14
Nitikouyake Akolaliyo toto-pala eya tokoleke ke wane uku. Tobou poyo agome
keneya toto moa kawikoa Keraisu-pala lipukoa aua yako. Nipa ta piko peyake meki-kitame
padeya ka lono tokoya yakou toa Keraisunomo yakamotoa tokome toko.
15
One take toa
motaneya poatiki-kitika etepea tuma poatiki-kitika meki toa totome Keraisunomo oa aua
yakolopa Akolaliyo ke wa okomepa Keraisu eni yene pakeke yakome ka lono takama
yakene tetepo takoa wedia meko.
16
E yename Keraisunomopa yateketeke kiwi tua poatiki
kotimi yakane tetepo takoa kote tokolo waki. O yename ipa toto mea kakatekoyano, yakoa
moato wa padeya ka lono tokoya yakane tetepo takoa wedia meki. Ae, Akolalinele edikoa
takakilepa teyo adekoa tamele toko-pe.
17
Pade ali-kitame kue moato wa Akolaline agale pa
itonoya tetepo takoa oa aua yakilepa paya wene pianeya mea tiki. No pade nitamuku.
Keraisu-pala lipuaneya meaneya Akolaliyo onekele takapoano pa wa no moa wetekaka
tokolo tekene one leneke kakene onekemo odene wene pianeya mekene oma yaku.
2 Korine 2 Korine
<<
22
>>
2 Korine 2 Korine
<<
33
>>
3
Weneya Totonoke Akenemo
1
Nimo wane ukupa nipa pinali anu wa kei pikene uku wa kime wene piki-pe. Ni no
nekene okoumo yakoa moamene wa pade take meki-kitame pipia pade kiwike wini wia
wetekamotoa iki-pe. Kimeka pade take meki-kitame no makutukoa momotoa tekete pipia
pade eni yeneke wia wetekadete iki-pe. Ete tikisa ali-kitame dikane pipia moa aua yawa
yameamele tokoyake no pade nitamele toamoko.
2-3
Ete ali atoame no makutukoa momotoa
wia mekane pipiapa anu oya-lawe kiwi. Keraisuyo no moa wetekakale onekemo
olaukanokolu kime yakoa mootokoa mekete tokoinakamoke uku. Einakamopa ete ali atoa
peyame ya wa oi momotoa anu tepene wia lukane tetepo taneya yaku. Nitaneya yakulu
enekete einakamopa Keraisuyo wia lukaneya tadeko wa nimini pipia moa oi mou toa oi
mootokoa no makutukoa mokala tiki. Mosesene totonopa padeya pa takoa poatekayame
kue peteneke wia mekaneya. Nitaneyake Yesunomo kipala olaukakolu yakoa
motokoinakamopa mea kama poko Akolaline Epetane Yominiyo tone tepene wia lukako.
4
Kipala eni ukupa Akolalinele takakilepa Keraisu patu kautakoane kakene tuku wane
Akolaline leneke atiki toane kakene amele tokolo tekene uku.
5
Akolalinele edikoane takama
yakenepa padeleka anu weneme tukuya mena. Akolaliyo one peku lawetekolo nootokoane
tuku.
6
Nipa Akolaliyo one ali atoa i weneya yameteku totono olaukoa ta wa eni toatekou
peku no laweteka. Weneya totono wane ukupa bokuke wia mekanemoke wamuku. Epetane
Yominiyo wene takakomoke uku. Eina namolo totonopa kueke wia mekanepa padameka
litia tootapeamele toamokale tokome ali atoa peya tua atuamediki wa wia mekaneya.
Nitaneyake Epetane Yominiyo weneya totono wene takakilepa mea kama pomotoa tokome
toko.
7
Eina namolo totonopa Akolaliyo kue peteneke wia mekoa Mosese yametekale one pa
Moseseke weamutukaneya. Ali atoame tetekakete tua atuatekoi totono yametaneyake
taneya. Eni pa pa takoa poatekake o Iserele yename Mosesene lene timini nepikoa piamene
piti motaneya kakeneya.
8
Opi Epetane Yominiyo toto mea kawateko totono i i wa wene
takakilepa Moseseyo eina pa tootapeneya kakome tanele natele tetepo takakome padele
akole eni toko.
9
Eina namolo totonopa ali atoame lituku pekete toa tua poatekoike
Akolaliyo papete yametekilepa one tibuke pa teleta tootapeneya mekome tanele nami
yametaneya. Wa wipitikome ali atoame poanele toamene tetepo takoane wene keaneya
meou wa mea kawatiki totono yametekomepa one telekole keleyo yameteko.
10
Nipa eina
namolo totono pa tootapeneya kakome yametanelepa natele tane tetepo takakome padele
akole eni toko.
11
Eina namolo totono pa tekei piatekake yametekilepa pa tootapeneya
kakome taneya. Wa wipitikome pa pia kawateko totono yametekilepa ali atoa totome kei pia
kawatekole akole eni toko.
12
I weneya totonopa pa pia kawatekoya tokolo Yesunomo atiki toane oane auane
yaku.
13
Moseseyo eina namolo totono Iserele yene yametekilepa one lene timini mamina
waname kauaneya kakome taneya. Nipa Iserele yename one lene timini pa takaneya takoa
pokale enekaya tokale nitaneya. Totome pade nitameamedeko.
14
Moseseyo eina totono
edikoa yametekale Iserele yene kolotini lupi taneya mekete wedoa yakoa moameneya.
Opika kiwike tama nekene Yu yename eina totono oi moteketepa kini wenepa mamina
waname kauaneya meou toa wene toameneya mea oi mokala tiki. Keraisu-palado lipuaneya
meketepa eina mamina wane takoa wakene tetepo takoa mea eina totono pine piko toa wene
tootapeoi.
15
Nitamekete opika Mosesene totono oi motekete-kama kini wenepa mamina
waname kauaneya meou toa wene toameneya mea oi mokala tiki.
16
Nitima yakiyake
Akolaline bokuke eya wa wia mekaneya pikono yakamene. Kini tepe kolotini Ali Munoke
pekoa pikolipa kini wene moa kauane mamina wane takoa poo.
17
Ali Muno wane ukupa
Epetane Yominike uku. Eni Yomini ali atoa totoke awinome mekolopa nipa eina namolo
totono eyame toto moa labakanele tewitikoa atiki toa yamele toko.
18
Totopa tone lene timini
moa kauane mamina wane takoa wakeneya meko. Nitaneya meko-kitikepa yomini pokoke
pinaline yomini pome meou toa one Epetane Yomini awinoko. Awinome mekome pa teleta
tootapeneya meateko peku lawetekilepa Keraisu meko kotuke-kama meemoa pomotoa
lawete lawete toko.
2 Korine 2 Korine
<<
33
>>
2 Korine 2 Korine
<<
44
>>
4
Akolaline Kamoya Itonome Latianeya
Keneke Lobutua Piko Wa Pedoa Akenemo
1
Akolaliyo no ela motokome one weneya totono pikoa katekamene wa yametekale
tekene ke enekakale mekeneka onekele pa takama yaku.
2
Nitoanepa pade-kitame paigakoa
mekete ya takanele toamadene wakene pademoka oane yotokamoane onekemo koigamoane
tuku. Nipa Akolaline leneke kakene onekemo ali atoame yakatiki toane to aweane ikilepa
peyame imopa nimini eni oko wa yakamotoane toane enekala tuku.
3
Nitikuyake pade-kiti
kini wenepa mamina waname kauane tetepo takoa mekete yakameneya meki. Etepea tua
atuma piki ali atoake uku.
4
Itono yopia meko ago Setanuyo dikane yene Yesunomo yakoa
moamene yenane lene likatapeneya. Akolaline peku noa tootapeko ago Keraisu einagono pa
enekaya tokale ni taneya. Nipa onekemo yakoa motokaya tokale taneya.
5
Onekemo
olaukakilepa anukumo wamekene Yesu Keraisu einagopa tone Ali Muno wane oane
onekemo-kama olaukoane tuku. Nipa Yesuke tekene anu oya-lawe kinikile takama yakene
uku.
6
Akolaliyo yomiyomu keneke pa toologamene wa akene agome tone tepeka pa
takaloganeya. Nipa one pa teleta tootapeneya kakome lawetane peku mana Keraisuyo
noomotokome nokome tanele totome wene tomotoa tokome taneya. Nipa etene Akolali
onepa dikane ago tadeko wa wene tomotoa ni taneya.
7
Akolaliyo onekemo i i wa toto wene takakilepa one kamoya-kiti kamo itonome latiane
mete keneke paya waneke moa lobutua piou toa toko. Nipa onekemo totome oa aua
yakilepa one tele patu kautakoa kakete tadeki wa ali atoame wene tomotoa tokome toko.
8
Ele kuleme ke enekakolo pima yakuyake eni ke enekakoleme no moa kautamele tomoko.
Padepete-kiti toatekule agopa tokolo mekeneke anu wene moa bebo akatapeneya meamuku.
9
Ete-kitame no tete meadete litikala tikiyake Akolaliyo pade no tewitikoa wawamoko. Pade-
kitame no ne wiouno nepia wa wikala tikiyake wia tukamele toamoko.
10
Yesu wia tukane
toa noka wia tukamotoane nepiane-kala meku. Nitoane tuameneya Keraisu patu kautakoane
mekulu enekete ete-kitame ekete Keraisu einagopa tuake pa meadeko wa wene tiki.
11
Itonoke mekene Yesunole takama yakuke ta pataka abuna pade-kitame no wiadete tokala
tikiyake onekele pa takama yaku. Enipa no tuateku agoke mea kama poko Yesuno tele patu
kautakoane meadeku wa ali atoame wene tomotoane tekene tuku.
12
Anu oya-lawe kiwike
toane tuou wane Yesunole takaku pekene toanepa nipa kiwi mea kama pomotoane tekene
tuku.
13
Akolaline bokuke panagome papete eya wa wia mekane toane eni tuku. Akolalinemo
to aweane ikilepa oneme no auapekala too wane ni tokou wa einagome wia mekaneya.
Nitane toanepa Akolaliyo noka auapekala too wane onekemo i i wane to aweane uku.
14
Nipa
eya waneka wene taneya mekene uku. Ali Muno Yesu Keraisu tuaneya pikata moa
kamotokane ago Akolaliyo noka moa kamotokoo. Nipa Yesu-pala lipuane mekulu tokome
nitoo. Ni pade anu oya-lawe kiwika moa kamotokakome toto peya one mekata odeneya
koukoa mekatapeoo.
15
Ele kule tete motikilepa anu oya-lawe kiwike oyake motuku wane
Keraisunomo oane pupitikama yaku. Nipa eya wane wene taneya mekene tuku. Akolaliyo
kiwi pewe wia kakomo eni okono ke wa peya matiyame kouka kouka toa one kei pikala toi.
Poloyo One Motane Tetepa
Natele Tetepo Takanemo
16
Eni wene taneya mekenepa wawada wane tewitikamuku. Anu tigini idima pokoyake
ta pataka abuna Akolaliyo anu wene weye akakala toko.
17
Opi-mene ke enekakolo mekupa
nipa Akolaliyo one tibuke pa tootapeneya meane kawateku peku noane tomotoa
nodokakome toko wane wene tekene eni tetepa pa natele tetepo takoane meku.
18
Nikepa
itonoke pia kawa tokoya-kitike wene piitikaneya meamekenepa a tibuke opi-mene
enamukuya-kitike wene piitikaneya meku. Itonoke leneme enekuya-kitipa pa tekei pia takoa
poademe toko. Nitatekoyake a tibuke opi-mene enamukuya-kitipa takoa poameneya pa pia
kawademe toko.
2 Korine 2 Korine
<<
44
>>
2 Korine 2 Korine
<<
55
>>
5
Tone A Tibuke Meateko Yapu
1
Kipala ina ukupa eyake uku-ye. Opi-mene pa mamina yapu keneke meou toane
itonoke pa tekei meku. Eni yapu ke aweane mitikou toane tuane pokolupa nipa Akolaliyo a
tibuke latikane yapu anu meane kawateku yapu ipa nekeno, noo wa yameoo.
2
Nipa ae, a
tibuke meane kawateku yapu opi pone mepadiya wane kenemade oane meku.
3
A tibukepa
tigini kawameneya pa yomini meamou. Akolaliyo latikane yapu lobutou toane weneya tigini
kakeneya meane kawou.
4
Anu i mamina yapu keneke opi-mene wene kedame tuaneya
mekene kenemade oane meku. Enipa wete tukene tuada wane ekene ukuya mena. Anu i
takoane wawateku tigini luku a tibuke pa meane kawateku tigini moane kawadiya wane
ekene ukuna.
5
Namolo tigini takoane wawane wa weneya tigini kakeneya meane kamotoa
toko agopa Akolali one. Nitiko agome enile toateka adeka piipikome papete one Yomini
totoke awinome memotoa moa wetekaneya.
6
Nitaneyake eya wane atiki toane yaku. Akolaliyo nitatekoyake papete anu i tigini
kakeneya pima yakene Ali Muno mekota wete pone mepamele toamokolo paka lono pa
meku.
7
Nitikenepa Akolaliyo wipitikome toatekole anu leneme enamekeneka oneme tou wa
okana toa nimini tatekoa too wane oneke pa wene tugoane meku.
8
Nipa anu tigini takoane
wawane Ali Muno-pala opiane mepadiya wane atiki toane meku.
9
Nitoanepa itonoke pa
mekeneka one mekota pone mekeneka one wene epetekamedeku wane onekele-kama
takama yaku.
10
Wipitia ta pataka-pete toto peya Keraisuyo koiso yopia mekota pote
kapamedekolo tekene ni uku. Enipetepa tone tigini kakeneya mekete tokole peya epetekoa
tokooleka toa potokakooleka oneme nami wia topo takakala too.
Keraisuyo Ali Atoa One Etene-pala
Oya Patu Kakakome Tanemo
11
Ali Munoyo tone toma-kala pokooke nami wia topo takoo wane piti tokolo mekene
tekene ali atoame onekemo yakoa momotoane wili toane kaku. Nopa edikakene odene wene
piane tuku wa Akolaliyo wene toko. Anu oya-lawe kimeka Polo nopa dikane ago wa wene
tomotoane uku.
12
Enipa pinali anu wa kei pikene ukuna mena. Pade ali-kitame no akoa
agale okoli yatekete kime i i wa no kei pimotoane tekene ni uku. E yename kini wa kei pia
mate agale ikilepa kini tepene poane wene pimotoake kepeneme epeteku wa agale epeneya-
kiti witoa oa kaki.
13
Padeka-kitame no Polo leau akeneya yakene ni uku wa ikipa nipa ele
kule tukulepa Akolalinele takaku wane topo takoane uku. Wa padeka-kitame no Poloyo
utanele-kama tuku wa ikipa nipa enilepa ali atoa kiwike tuku wane topo takoane uku.
14
Edikakilepa Keraisu totoke wedoa wene mekoa mekome tanele wene tekene ni tuku.
Keraisu odene ago toto peya luku tuaneyano, Akolaliyo toto peya tuane yene tetepo takoa
meko.
15
Ali atoa peya luku eni tukilepa nipa itonoke mekete kinikile-kama toamekete one
wene moa onekeleka takamotoa tokome taneya. Kiwi luku tukale moa kamotokane ago
Keraisuke uku.
16
Onepa nitane agono, opi titimoapa itono peku noai tiki-kitame tikina toa tatoane
wamuku. Nipa panagono tepene meaneya tetoa enameketeke pa tokoo leneme enetekoapa i
agopa dikane ago tadeko wa takoa enoa akatoane wamuku. Noanumeka papete
edikakenepa Keraisu einagopa pa agono wene pikou. Nitikouyake opi eni wene wiane
wakene eya wane uku.
17
Panago Keraisu-pala lipuaneya mekopa nipa one namolo wene wia
wawa weneya ago latitapeko. Nipa one namolole tewitikoa wawa wenele toma yako.
18
Ali
atoa toto weneya yene latikilepa Akolali oneme-kama tokoya. Papete toto peyame one-pala
poi te ia mekoloka poi wiane pitikouno, e yeneke tuano pa wa Keraisu moa wetekaneya.
Nitaneyake ete ali atoaka one-pala wene odene pia lipunomotoa tokome tone eni
takakanakamo kime oa aua pupitikakapoati wa toto moa kakaka.
19
Einakamopa Keraisu
nome tuaneleke Akolaliyo ali atoa ta piko peyake one-pala wene odene pia lipunomotoa
tokome kini poanele toma pokoike po letu mekakana kea wakenemo kekutu. Nipa einakamo
oa aua pupitikakapoatino poe wa toto takoa moa kakaka.
20
Nitikano, tone Keraisuno agale patu kautakoa kama yako. Nitima yaketepa Akolaliyo
kiwi kowitou toa kowitikete one-pala poi teigoa watoe-ye wa kiwi kowitiko. Enipa
Keraisunole takakete ni oko-ye.
21
Keraisu einagopa poanele padeleka toamene agoke
Akolaliyo tone toko poanele kabe koukoa moa oneke awitikaneya. Nipa toto luku poanele
tane ago tetepo takaneya. Akolaliyo edikakomepa kipa one yagono yene latitapeneya
memotoane tukuno, Keraisu-pala lipua meamene wa totopa poanele toamene yene tetepo
takaneya.
2 Korine 2 Korine
<<
55
>>
2 Korine 2 Korine
<<
66
>>
6
1
Akolalinele takakilepa one-pala odeneka tekete toko. Nitikete tekete kipala eya wa
kowitoa oko-ye. Akolaliyo kiwi pewe witikome toa motikilepa pata pale takayano, one eni
tanemo wedoa yakoa moamene-ye.
2
Akolaliyo one eni toatekamo papete oa piane toane
ukuno yakamene.
Kiwi pewe wiatekou-petepa kini kowitikoimo yakoane tou. Kiwi toane moatekou-petepa
auapeane tou wa Akolaliyo akeneya.
Eina oa piane toa taatekoa toateko-petepa opino nepio wane uku-ye.
Poloyo Tete Mokala Tanemo
3
Padele poanele tokouke-kiti ete-kitame Keraisunomo yakoa moamokaya tokale
Akolalinele wedoane takama yaku.
4
Nipa no i agopa Akolalinele takama yaku ago tadeko
wa ete-kitame wene tomotoane tekene eya toma yaku. Ke enekakolo mekeneka tete
mokoane kakeneka wene keda taneya mekeneka onekele ele kule poti takoane togakala
tuku.
5
Padepete-kiti pade-kitame no layo toua wia ni po yapuka moa pitikoa ni no i ago
wiato wa ali atoa oa kamotokoa enika enile tokala tiki. Nitikala tomotoaneke onekele pa
takama yakene padepete-kiti ko meamoane ni atu piamele toameneya meane ni noateku nee
toamokolo pa pima yaku.
6
Nitima yakeneka poane wene piamoane ni Keraisunomo wene
tootapeane ni utanele-kama toane ni epene wene-kama piane tuku. Ni Epetane Yomini nome
awinaneya meane ni ali atoake wene mekoane tagatapeane tuku.
7
Nitoanepa niminimo-kama
to aweane oane Akolaline tele patu kautakoane kawane tuku. Ni Akolaliyo no poanele
toamene ago tetepo takakome olaukanele eni tikilepa nimini yoname lama pikoane kawane
ewa yoname kotokoto pikoane kawane tou toane tuku.
8
Nitoane kaku agopa pade-kitame
no kei pia wa pade-kitame no paya tetepo takoa wakala tiki. Ni padeka-kitame no i agopa
poanele toko ago wa akoa agale oa wa pade-kitame no i agopa epetane ago wa oa tiki.
Nopa niminimo-kama oane auane yaku agoke pade-kitame no kapene ago tetepo takoa
wakala tiki.
9
Nopa ibini akene ago menake anu toma yakumo ta piko peyake oa
pupitikaneya. Pade-kitame no i agopa tuateku ago tadeko wa wakiyake no tuameneya
mekene uku. Ni pade-kitame no i ago wiato wa layo toua witikiyake oyake wia tukamele
toamokolo wakala tiki.
10
Wene keda taneya mekeneke wedianeya-kama meku. Nipa
ponopene ago mekeneke ali atoa peya mati kamo takou toanepa Akolaline peku naku toa
kiwika noatino toe wane lawetekala tuku. No padeya deyaka toamokolo mekeneke
Akolalineya-kama moateku ago i mekene uku-ye.
11
Ae, wini Korine take meki-kiti kipala ina ukupa anu tepene meaneya-kama eni
ya wane ootapeku. Kiwike wene mekoane mekene ni uku.
12
Noanu kiwike wene mekoane
memotoake anu oya-lawe kiwi pade nooke wene mekoa meamekete tiki.
13
Kipala eya wane
ikilepa anu mati-kiti tetepo takakene ni uku. Noanu kiwike wene mekoane meku toa topo
takoa nooke wedoa wene mekoa meamene.
Poloyo Pubu Akenemo
14
Akolalinemo yakoa moameneya meki-kiti-pala lipua meameamene. Wene kiyo
akeneya meki-kiti poanele-kama tiki-kiti-pala edoa lipua memotoa-pe. Pa -pala yomiyomuta
edoa odeneka matutukamotoa-pe.
15
Keraisu-pala Setanuta edoa odene wene pianeya
memotoa-pe. Yesunomo yakoa motane ago-pala onekemo yakoa moamademe wakene
agota edoa odene wene pianeya memotoa-pe.
16
Akolaline wikakane yapu kenekepa iponole
edoa tomotoa-pe. Enipa totopa mea kama poko ago Akolaline wikakane yapuno, iponole
edoa tato-pe. Nikepa Akolaliyo eya wa akeneyano, yakamene.
Anu wane takoane motokouna yatenepa anu yapu tetepo takoane kiwi pakeke none
menou. Nika noanupa kini Akolali wane oane kipa anu yatene wane oane tou
wa Akolaliyo akeneya.
17
Nitaneyake Ali Muno Akolaliyo eya waka akeneya.
Ete-kitame poanele-kama toma yakile tewitikoa wamene. Dikane ali atoame poanele
tikina toa toameamene. Eya kuya poaneya peya titi toa wamene. Nitikolipa
kiwi makutukoane mou.
18
Nipa noanupa kiniketai wane oane kipa anu mana
kono-mikiti wane oane tou wa ali atoa peya telekole-kama toa talo toko ago Ali
Munoyo akeneya.
2 Korine 2 Korine
<<
66
>>
2 Korine 2 Korine
<<
77
>>
7
1
Anu kolotini yene Akolaliyo kiwi auapekene dikou wa oa pianeya tokolo tekete tone
tigini weneta moa koiga koiga tokoya-kiti takoa watoane uku. Nitoapa oneke nate wene
pianeya mekete wene kiyo akeneya meateko kotuke kakoa wili toa meato.
Poloyo Wedia Mekome Akenemo
2
Nopa kini tepene moa mekou toa nooke wene mekoa meamene-ye. Noanumepa kiwi
odene ago-palaka toane potokakouna mena. Ni odene agono wene moane koigoane odene
agoneya yotokoane moane toamokou.
3
Kipala ina ukupa kiwi kikoane akakuna mena.
Kipala namolo okouna toane wa lokoane uku. Nopa kiwike wedoane wene mekoane
mekuno, itonoke pa meamedekolupa nipa kipala odeneka meou wane meou.
Tuamedekolupa nipa kipala odeneka tuou wane tuadene meou.
4
Kiwike wene mataneya
mekene kiwi ko mate ou toane okala tuku. Nipa ele kule ke enekakolo mekeneka tepe
kolotini kilikoa pimotoane wedianeya-kama meku.
5
Masedonia take pone mepokeneka tepe mataketikoa meamele toameneya meku
pekene toane eya kuya keda enamutukala tokou. Nipa pade-kitame nopala neno oa kakoli
ae, Yesunomo olaukakouna yename Yesunole takoake wakaya wanepa tepe we tokale
mekou.
6
Nitoane mekouyake wene keda taneya meki-kiti mama moa auapeko ago
Akolaliyo no mama moa auapekome no mekouta Taitasi moa wetekaneya.
7
Nitikale nokale
enekene wene epetaneya meane ni kiwi ko okamo yatekene wediane kawane tokou. Taitasi
einago eni nokomepa kime one wene epetekakoinakamo i i wa oa eya ko-pala oa toka.
Kime no enadiya wa wene pianeya mea ni no-pala poanele tokoinake elame tuaneya mea ni
no mama moa tokoi ko oka. Nimo okale yatekene anu namolo wedikoane mekouna toane
moane patukoane wedoane wediane kakou.
8
Papete anu pipiame kini wene keda takaneya tadekale wiane wetekamikinakeya wane
wene pikounake opi pade eni wene piamuku.
9
Nopa opi wediane mekene uku. Anu pipiame
kini wene keda takaneyake ukuna mena. Kini wene keda takaneya mekete tekete kini namolo
poane wene tewitikoa wakete tokoinake uku. Kini wene keda takakilepa Akolaline wene
piane toa taneyano, anu eina pipiame kipala toa potokaneya mena.
10
Akolaliyo ali atoa wene
keda taneya memotoa tikilepa nipa kiwi toane mou wa tone poane wene wia wamotoa
tokome toko. Nitikono, one eni tokole kote motuku wa edoa wene piato-pe. Itono peku
noai tiki-kiti wene keda taneya meketepa nipa kini poane wene tewitikoa wawamekete tua
atua pokala tiki.
11
Kime anu eina pipia moa oi mootokoapa Akolaline wene motekete wene
keda taneya mekete eya tokoi. Onekele wedoa takama yawa ni kiwi pakeke ya tanele
tokagome toka toa kime pade nitamokoo wa pinali kini wa kei pia ni poane agome tokake
Akolaliyo kiwika kibu moamedeko wa pitime tuaneya mea tokoi. Nitoapa no Polo kiwi
mekita nomotadiya wa wene pianeya mea ni onepa edoa meko patu wa no mama motaneya
mea ni eina ya tanele tokago kibu moato wa one kibu moatekoi oi pedoa pia tokoi.
Widikakilepa kime poanele tadiki wane akoane oatekouleka toamokoi.
12
Kini eina pipia
wiane wetekakilepa nipa eina ya tanele tane agoka oneme ya takane agoka auapeou wane
wene piane tokouna mena. Kime widikanele tikilepa no Poloke wedoa wene mekakete
tadeko wa kime wene tomotoane tekene ni tokouna. Akolaline wene motekete tadeko wa
tomotoaneka tokouna.
13
Kini wini tekete tikimo yatekouya tekene wene epetaneya mekene
uku.
Nika Taitasi einago no mekouta wedianeya noka matiyame anu wene epetekatapeneya
mekene uku. Kiwi peyame one wedoa auapekete one tepe kolotini kilikoa pikakete tadiki.
14
Papete Taitase-pala kiwi kei pikene mate agale ou toane i i wane okouna toa kotuke kakoa
epetekoa wini tekete tadikino, einapa pamo wamekene tadeku. Kipala niminimo-kama oane
mekala tokouna. Taitasi-pala i i wane kiwi kei pikilepa einakamoka nimini eina ekene tokou.
15
Taitasi einago wida nokale one wene pokaya piti motokakete one okamo yakoa tato wa
kime wedoa makutukoa motokoi. Nitikoina wene kibutukoa mekomepa kiwike wene mekoa
tagatapeko.
16
Ni tamele tadeko wane wedianeya-kama mekene uku.
2 Korine 2 Korine
<<
77
>>
2 Korine 2 Korine
<<
88
>>
8
Kinikiya Moke Tamene Wa Poloyo
Korine Ali Atoa Mane Mane Oa Olaukanemo
1
Anu oya-lawe, Akolaliyo one yene Masedonia take meki-kiti pewe-kala witikome
tokomo ukuno yakamene.
2
Eni yene ele kule ke enekakale meketeka wedoa wedikete eya
tokoi. Etene ponopene ali atoameke kinikiya moke toa meato wa ete yene tatia metekilepa
keda takoa mekala tokoi.
3
Nipa kini pikoya-kiti dedeya pimotoa ako-kama metekilepa kini
weneme tokoi.
4
Nitikete Akolaline yene Yudea take meki-kitipa kime auapeoono ta wa no
wedoa yakoa kowitoai tokoi.
5
Eni yename kuedo meoo wa ekete okoino wene pikouyake
eya toatekoilekeka akedekoi. Kue eyaka meadeteke namolo takoa Akolali nekele takoo wa
pinali-kiti kiwika kini Akolalike metekete metekoi. Nititikoapa Akolaline wene motekete no
Polo neka auapeoo wa oa tokoi.
6
Nitikolipa eya tokou. Taitasi einagome papete ponopene
Yu yene auapeademe anu Korine yene kinike kue eya wida koukoa moa togameneyake pake
teigoa poka. Opa kime titikete epetekoa metekoinakale wipitimotoane tekene Taitasi nepa
Korine take papete titipikanakale peya takatapeano pa wane kowitikou.
7
Kime ele kule
tikilepa wedoa-kama tekete tiki. Nipa Keraisuke wene tugoa mea one agale muno pewe
kakoa oa onekemo yakoa moa onekele takoa nooke wene mekoa mea enika enile wedoa-
kama tekete tiki. Nitima pikina toapa ponopene Yu ali atoa mama motekete meatikiya keda
takoa memotoane uku-ye.
8
Ina ukulepa kime toe wane tika tika toamuku. Masedonia yename kinikiya moke toa
epetekoa metekimo kipala oane metekenepa eni yename tikina toapa Korine yene kini
weneme toamiki patu, kini weneme tiki patu wane wene piane mekene ni uku.
9
Tone Ali
Muno Yesu Keraisuyo ali atoa pewe witikome tanemo ukuno, yakamene. One uu kamo
agomeke kiwi auapeademe ponopene ago latia nekeneya. Ponopene ago latia nome
mekome kiwika kamo takou toa etenane peku lawetaneya. Enipa kini wene tikimo uku.
10
Yena malike ponopene Yu yene auapeato wa kime titikete tadekoinakaleke eya wane
ukuno, yakamene. Yu yene auapekilepa ete yename naniko auapemotoa Korine yene kime
namolo takoa auapeato wa wene pia titia tadekoinano,
11
opi toa pegetetapeamene. Papete
eni toatekoileke wene piitikaneya meadekoinano, opi eina papete wene piadekoina toa
wedoa toa pegetetapeamene. Kini kue eya meatiki kotuke kakoa keda takoa meamene-ye.
12
Panagome-kiti onekeya-kiti pade moke toane meou wa wedia mekome one meatekoya pa
dedeya pikale tokome tubeya meamokalepa Akolaliyopa einagoneya tubeya toamoko wa
wene tokome wene keaneya meoo.
13
Kiwika ponopeneya meatino, kinikiya ete yene meetapeamene wane wamuku. Kiwika
ete yeneka odene kotu kakoa meati wane ekene uku.
14
Opipa Yu yene pa mekili tekete
kinikiya moke toa meamele toko. Wa nanikopa kiwi padeya-kiti toameneya wida pa
mekolipa nipa eni Yu yenamepa kinikiya oyake pikale tekete ete wa meamele too.
15
Edikanelekepa Akolaline bokuke agale dikoa pianeyano, yakamene.
One noateka nee tubeya motoka agomepa one eni motokapa pupitini kawameneya
meka. Wa panagome-kiti pa dedeya motoka agopa kobu toamokale meka wa
panagome wia mekaneya.
Taitasi One Oyagotame Tanemo
16
Kiwi mama motekene auapeou wane wene piane-kama meku. Akolaliyopa Taitasi
no-pala wene odene kotu kakamotoa tokolo onemeka kiwi auapeada wa wene pia mekono,
Akolali-pala ke wane uku.
17
Kiwi wida mekita Taitasi ne poo-pe wane yatekolu nitouno ta
wa oka. Nipa kiwi enadiya wa wene tokoa kakeneya tokome one weneme wida noo.
18
Taitasi wida moane wetekakilepa tone oyago pade one-pala opia nomotoane moane
wetekaku. Einagome Keraisuno ali atoa koukoai tikika onekemo oa aua yakome tokoleke
peyame one kei piai tiki.
19
Nika einagopa Keraisuno eni ali atoame moa kakakete ekete no
Poloyo ponopene Yu yene kue tatia meademe Yerusaleme take aua potokakale i agoka
pomotono tatoe wa einago nooke oto wetekakoi. Eni kue totome moa aua potokakilepa
nipa ponopeneya meki-kiti mama motekete ni aua potokaki wa peyame Ali Muno kei
pimotoa tekete ni toko.
20
Keraisuno ali atoame keda takoa metekoiyapa kime tatia potokakoi wa pade-kitame
toto akoa agale akaya tokale egele moke toameneya tatikatapeoo.
21
Nipa Akolaliyo
enekono, kiyoke-kama tato wa ali atoane lene yoto kakete too.
22
Taitasi-pala tone oyagota Korine take wida moane wetekakenepa panagoka kita-pala
opia pomotoane moane wetekaku. Einagome Akolalinele ele kule takakilepa wedoa-kama
tadeko. Ni ago kiwike wene mataneya mekome tokome oneka wida nou wa wedia meko.
23
Taitasi einagopa no-pala oya patu pikagome kiwi pakeke Akolalinele takoa mekanakagoke
uku. One-pala wida opia niki alitapa Keraisuno ali atoa kini koukoai tikika mekete takoa
moa kakane alita. Einagotame tikilekepa ete-kitame Keraisu kei pikala tiki.
24
Einago-mene
wida nokoli wedoa makutukoa moamene. Nipa kimeneke wene mekoa mekete ni tadiki wa
einago-mename wene tomotono nitamene. Nitikolipa Keraisuno ali atoame e ku take mekete
yatekete ekete e e nimini Korine yene ete yeneke etene wene mekoa meadiki wa oa ni Korine
yene kiwi kei pikoumopa nimini akedeko wa oa toi.
2 Korine 2 Korine
<<
88
>>
2 Korine 2 Korine
<<
99
>>
9
Keraisuno Ali Atoa Auapea Toatekomo
1
Akolaline yene Yudea take ponopeneya meki-kiti auapea kue eya koukoa toatikile
kiwi olaukateku toa mena.
2
Kime enile toadete niko niko toa kakoino wene tokouya tekene
Masedonia yene-pala eya wane okou. Tone Geriki take meki oya-lawe kime eni toatekoile
yena malike titikete tokoi wane mate agale ou toane kiwi kei pikou. Nimo yatekete tekete
Masedonia yene peya matiyame kimeka tou wa tokoi.
3
Nipa wini Geriki take meki-kiti kime
ponopene Yu yenane kue koukoa pikadete tiki wane kiwi kei pikoumopa pata pamo neme
akedeko wa padame nopala akaya tokolo eya tuku. Geriki yename kue koukoa pikamotono
poe wane tone eni oyali-mene wida moane wetekaku.
4
Kiwi wini mekita Masedonia yene
no-pala opia nekete enekoli Geriki yene kime eni kue wete koukoa pikameadekolipa nipa
Geriki yene kiwi kei pata pamo akedeku wane yaame tuou. Korine yene kiwika yaame tuei.
5
Nitikaya tokolo anu i oyali-mene kiwike wini moane wetekaku. Nipa Geriki yene kinikiya
keda takoa koukoa pikapioo wa papete oa lutukoina toa toa pegetetapemotono, kiwi
namolo takoa poe wane wini moane wetekaku-ye. Nipa kue memotoane tika tika tukuya
mena. Pa kini weneme keda takoa memotoane tekene ni tuku.
6
Eya wene taneya meamene. Ipe pinagome-kiti one ipe ludu nee lene natetekoa
matakopa nipa wipitikome one ipe kakoya nee natetekoa noa meoo. Wa panagome-kiti one
ipe ludu nee lene wedoa matakopa nipa wipitikome one ipe kakoya nee tubeya noa meoo.
7
Nipa kinikiyapa iya meou wa kini wene toopikala tokoina toa metekilepa eya tamene.
Panagome tika tika tokolo tuku wa meamoa ni koteme tukuyake tuku wa meamoa tamene.
Wedia mekete tamene. Wedia meteko agopa Akolaline kolotini ago eni.
8
Akolaliyo kiwi
pewe witikome eya kuya ako-kama meamele toko. Nitamele tokono, ta pataka abuna kini
mamina nee enika eniya ako-kama motekete tekete padeya-kiti moke toa ponopene yene
auapea meamele toko.
9
Enikepa Akolaline bokuke eya wa wia mekaneya pikono,
yakamene.
Onekeya-kiti moke toa ponopene yene keda takoa mekala toko. One ki yo akenele pa pia
kawademe toko wa panagome wia mekaneya.
10
Akolaliyo ipe pinago nee lene matatekoya mea ni tone noateko nee mea tokome eyaka
too. Ku tuou toa kinikiya ako-kama moke toa epetekoa mema pomotoa tokome kini
metekoina luku pupitini kakoa mekala too.
11
Nipa kinikiya eya kuya moke toa keda takoa
mekala tomotoa tokome kamo takou toa one eni toatekoi peku lawetekala too. Nitikalepa
toto Aposelo ali-kitame kinikiya moa ponopene ali atoa mekoika aua potokoa metekolo
tekete kainya matiyame Akolali-pala ke wa oi.
12
Kinikiya edikoa moke toa meteketepa nipa
Akolaline ali atoa padeya-kiti toameneya pa mekoli auapekala toi. Nika ali atoa peya
matiyame Akolali-pala ke wa omotoa toi.
13
Edikakolipa kime auapekoi-kitame eya wa oa
toi. Kime Keraisunomo yakoane motokou wa ikilepa nimini akediki. Onekeleka wedoa
takama yakino, kinikiya keda takoa moke toa metekilepa kiwi Yerusaleme take ponopeneya
meko-kiti ete yeneka mama motekete ni tadiki wa Akolali kei pikala toi.
14
Eya waka oa toi.
Akolaliyo kiwi pewe wia tagatapeneya mekete ni tadiki wa kiwike-kama wene piitikaneya
mekete kini kowitikama poi.
15
Akolaliyo toto auapekome Keraisu moa wetekaneyano,
totome ke wa ikilepa edemo wamoo.
2 Korine 2 Korine
<<
99
>>
2 Korine 2 Korine
<<
10 10
>>
10
Polo Pinali One Wa Kei Pianemo
1
No Poloyo kime eya tamene wane kowitikilepa Keraisuyo poti ko akene wene
pianeya mekome ou toane mekene uku. Nipa kiwi kakakoane pa taba ago mekene ukuyake
wa padeka pone mekene kiwike pademo pademo wiane wetekakilepa telekago tetepo
takoane tuku wa iki agome uku.
2
Pa itono peku noai tuku wa no paya tetepo takakete iki-
kiti mekita wida none mekene wedoane kikoane akou. Kipalaka edikoane kikoane
akamouno, wini yename no paya tetepo takakete waki toa toameamene wane kiwi
kowitoane uku-ye.
3
Polo nopa itonoke meku agomeke pa itono peku noai tiki-kitame poi
tekete tiki toane toamuku.
4
Itono peku noai tiki-kitame poyo tue eya pikoa kawa poi
topikiyake anume pade nitamekene Akolaline tele patu kautakoane kaku. Nitoanepa
Setanuyo yopia meko taapa pawe kago ke aweane tadekakatapeku.
5
Nitikenepa eni yename
ali atoa Akolaline peku noamomotono tato wa kini wene kibutua iki agaleme ka ketekakili
kilikatapeku. Nipa ali atoame Keraisunole takama yakete oneke-kama wene piitikaneya
memotoane tuku.
6
Panagome Keraisunole odeneleka kote moa katekoa takameadekalepa
kibu mou. Nitadeneke anu oya-lawe kime Keraisunole takatiki kotuke kakoa takamotoane
nepiane meku.
7
Kiwi padeka-kitame no paya tetepo takakilepa anu tepene meaneya tetoa
enameketeke tiki. E yename kipa Keraisuno yene kako wa wene piketepa nipa no Poloka
one yatene ago kaku waka wene piamediki.
8
Ali Munoyopa one yapu wikakou toane kiwi
auapemotoa tokome no moa kakaka. Nipa poane yapu ke aweane mitikoane wawou toane
kiwi kibu momotoa taneya mena. Nopa dikane ago wane mate agale ou toane okala
tekeneka nimini uku. Nimo wanepa edekolo amene ya momotoa-pe.
9
Kini pipia-mene wiane
wetekakilepa no einagome kiwi piti takademe ni toko wa wene pimotoane tokala toamuku.
10
Kiwi padeka-kitame nooke eya wa iki. No einagome kini pipia witikilepa agale kou takoa
telekomo-kama oa tokoyake kiwi mekota nome mekome pa taba agome keneya pamo okala
toko wa iki.
11
Nimo iki-kiti kipa nipa eya wene toatino, yakamene. No padeka mekene
dikou dikou wane ukuna toanepa kiwi mekoita wini nekeneka odenemo-kama ouno, nepio.
12
Kiwi padeka-kiti kini wa kei pia mekino, no pa keku ago anume tuku toa e yene
kimeka toati wane kini yagono ago tetepo takoane mate agale amene ya motaneya mekene
uku. Kini tokoole ele kule teyo adekoa toko patu wa adeka-nali yotuku pekete toapa pale
tekete tiki.
13
Noanume pade nitamuku. Akolaliyo no toatekoule i i wa yametikilepa Korine
yene auapeamene wa eni pupu kikilikoa yameteka. Pinali anu wa kei piane ikilepa Akolaliyo
yameteka toane tukuleke odene anu wa kei piamele toko.
14
Akolaliyo eni oyameteka
toanepa ete ali-kiti naniko nomotoane kiwi wini mekoita no namolo takoane Keraisunomo
oane auane nokouna. Nitikouna tekene enilekepa mate agale ekene ile tokouna wane amele
tokolo uku.
15-16
Nipa pade ali-kiti namolo takoa pekete tanele anume titiane tane tetepo
takoane mate agale wamuku. Mate agale wamekene eya wane uku. Kime Keraisunole
namolo takama yakete tokoinakale moa patukoa wedoa takama yakolipa Akolaliyo padeka
eko-mene yametekale onekemo eida-kitika oane auane pou. Nipa panagome Keraisunomo
wete opane take pekene onekele takakene dikakou dikakou wane mate agale wamou.
17
Mate agale ikilepa nipa Akolaliyo tokoleke-kama mate agale amene wa Akolaline bokuke
wia mekaneya piko. Eni wia mekane toa tatoane uku-ye.
18
Panagome ile tuku wa pinali one
wa kei pia okopa nipa Akolaliyo einagopa ibini akene ago tetepo takakoya mena. Ali
Munoyo kei piko agopa ibini akene ago eni.
2 Korine 2 Korine
<<
10 10
>>
2 Korine 2 Korine
<<
11 11
>>
11
Kapene Aposelo Ali-kitike Pubu Akenemo
1
Opi leau akene agome keneya kipala eya-mene oatekumo poti yakakoa meamene
wane uku. O'o, kimepa ae no Polo dikane agoke mama moa yakato wa kini weneme
yakoino, yakamene wane wamuku.
2
Akolali kiwike wene mekoa mea mama motokome
toko toane tekene eya wane uku. Etename-kiti one kono ali odene agoke poateko wene
toopikome pade ali-palaka koua piamea wa yopia meko toane kiwi Keraisu odeneke
poatino pade alike eko poameo wane kipa anu kono tetepo takoane yopiane mekene uku.
3
Papete namolo atoa Ipiyopa kayame oa yotokakale yatekome tane toa kimeka nitikaya
tokolo uku. Nipa Keraisuke-kama wene piitikaneya mea onekele wedoa takama yakiyake
panago nome poane peku lawetekolo noa etepea pokaya tokolo ni uku.
4
Ae, dikane ali-kiti
kiwi wida mekika nekete Yesunomo i i wa olaukakilepa noanume olaukakouna toa
olaukamikiyake wete yakoa mokala tekete tiki. Ni Epetane Yomininemo ni Akolaliyo kiwi toa
motokome tanemo i i wa olaukakilepa kiwi olaukakouna toa olaukamikiyake e e nimini iki wa
wete yakoa mokala tekete tiki. Nipa monekemo eni yakoa moa ni mone Yomini kiwike
awitaneya mea tekete tiki.
5
Ekee, enika enimo olaukaki ali-kitipa ibini akene Aposelo ali-kiti
tetepo takoa olaukakiyake no moa patukamele toamokono wene pikene uku.
6
Nopa agale
muno pewe kakoane amele toamokoyake Yesunomo wene tootapeneya mekene uku.
Onekemopa emo kumota keleyo olaukakala tokouna.
7
Yesunomo Akolaliyo kiwi toa motokome tanemo kiwi oane metekilepa kue oiane
moamekene pa tokouna. Nipa kipa ibini akene yene memotoane tekene noanupa paya ago
latiane mekene tokouna. Enilepa poanele tokotu patu.
8
Kiwi pakeke Yesunomo oane mema
yakouka Yesuno yatene ete ta-kitike mekete anu kue moa wetekakala tokoi. Kiwi
auapeadene eni yenaneke kue motokolupa pade-kitame eni kue kode motokouyano wene
pikoi.
9
Ni pade kiwi pakeke mekene anu kue eya toamokaleka kinikiya manoe wane
oikouna mena. Nitamokounake anu moatekouya peya Masedonia take yename aua
notokakala tokoi. Nipa Korine yene kime no Polo kue eya edoa moa meteko patu wa wene
keda taneya mekaya tokolo opika nanikoka kinike padeyaka oiane moamuku.
10
Keraisuno
nimini peku naku agome ukuno yakamene. Geriki ta ludu pima yakene eya wane mate agale
oma yaku-ye. Yesunomo Korine yene kipala oane metekeneka kinike kue dedeyaka
moametekakala tokou wane oma yaku-ye. Padameka enimo wamea wa amele toamoko.
11
Nimo ikilepa kiwike wene mekameneya mekene ni ukutu-pe. E 'e mena. Kiwike wene
mekoane mekuno Akolaliyo wene toko.
12
Yesunomo oane metekilepa kue eya oiane moameneya pa oane meteku toane pa
enakale tou. Nipa ibini akene wa tetepo takoa iki Aposelo ali-kitamepa Yesunomo oa
metekete kue-pala oia moma pikiyake noanume tuku toa kimeka toko wa mate agale
wamomotoane tou.
13
Edikaki ali-kitipa kapene Aposelo ali-kiti. Keraisuno Aposelo ali-kiti
nekete oko wa ikilepa kiwi oa yotokaketeke iki.
14-15
Wini yene kini lukoa meki ago Setanuyo
tokona toa tekete tiki. Enipa tamele tadiki. Setanu einagopa pa tootapeane edelo ago tetepo
takoa meamele toko. Eina toa wini yename Setanunole takakilepa Akolalinele takane tetepo
takoa tekete tiki. Eni namipa kini wia enatikiyano.
Poloyo Tete Mokoa Kakenemo
16
Eya wane lokoane uku. No Polo leau akeneya mekene ni uku wa wene piameamene.
Nopa leau akene ago wado wene piketepa nipa kipala i mate agale oatekumo deya pa
yakakoa meamene.
17
Kipala i mate agale ou toane oatekumopa Ali Munoyo amene wa oka
toane wamuku. Pa leau akene ago tetepo takoane mekene imopa amelepa tokono oada
wane uku.
18
Kiwi pakeke meki ali kainya mati kini itonole toma yakike kini wa kei pikala
tikino, noka mate agale oada.
19
Kipa wene meane yene meko wa wene piketeke wene
meamene yename ikimo yakamene kote tokolo waku wa wamekete pa yakakala tekete tiki.
20
Widikoa mekili padali-kitame kinikile-kama takoe wa tika tika toa ni kinikiya tolopi toa
moa ni kiwi paya tetepo takoa ni kini kabunu kugutukoa wia tikilika pa poitali-kiti mekete
kini ikimo yakoa mokala tekete tiki.
21
Ae, no pa taba ago tekene kipala enika enile tamene
ya moane mekene toamokouna.
Nitamokounake wini yene dika dika wa kini wa kei pia mate agale okolipa pinali anu
wa kei piane mate agale ikilepa odenemo-kama ou. Nipa wene meamene agome keneya eya
wane ou.
22-23
Kipa Iberu ali-kiti wa oa kipa Iserele yatene pitiko wa oa Eberameke ta ma
noko wa oa tiki. Noanupa Iberu ago meku. Noanupa Iserele yatene ago pitiku. Noanupa
Eberameke tagene ago. Kipa Keraisunole takama yako waka ikiyake leau akene agome eya
wane uku. Onekelepa kimepa natele takama pomotoane noanume wedoane takama yaku.
Nipa wini yene moane patukoane eya tete moma yakou. Po yapu moa pitikaneya pa pikala
toane po wapime wia teigala taneya yawane ni lugutukoane tuadene pikala tokou.
24
Ko
kakoa-peta Yu yename no moa po wapime wia teigala tokoi. Nipa eina-pete-kama padeka
tuku melepu (39) kakoa-peta wiai tokoi.
25
Tebolo-peta layome wikala taneya pikala tokou.
Wa padepete padeka yename no ne wiou wa kue katekamoa pitikakala tokoi. Ni tebolo-peta
kusa ue ludu ue dipike meane pokolu ue dipi paka puku pokome toa ueme nakakake
petoane pokala tokou. Wa padepete edikane-pete ta lia patoa tomotoane kusa ue ludu
yonoto piane kawane tukouyake petoane pokou.
26
Nipa ele kule ke enekakale pima yakolu
yotane ueme dekoa aua pome ni kode ali poi pia mekoika patukoane pone ni no yatene Yu
ali-kitameka pa yatene ali-kitameka no ne wiouno nepia wa padele padele toa potokakala
tokoi. Enipa ali atoame ta latia pitikika tayo lonoka kusa ue mukeka ni oya patu piato wa no
oa yotokakoi yene pakekeka tuatekoule tonokaka-kama pima yakou.
27
Padele padele
toatekoule nami kakale ko meameneya pima yakou. Padepete-kiti atu piamele toamokale
noatekou nee ueka toamokale pa pima yakou. Padepete-kiti nee noameneya pupu toane
kawane ni kawatekou maminaka piatekoutaka toamokale nitime tuaneya pima yakou.
28
Nika
Yesuno ali atoa ta piko peyake mekika edoa meki patu wa ta pataka abuna kiwike wene
pitikaneya mekene tepe kolotini kilikoa piameneya pima yaku.
29
Panago-kiti tele meameneya
pa taba ago mekopa nipa dikakago mama motekene noka taba ago tetepo takoane meku.
Wa panagome-kiti panagopa etepea pomotoa likoa enekopa nipa einago likoa eneko ago-
pala wene poaneya meku.
30
Anu wa kei piane mate agaledo ikilepa eya wane ou. Nopa taba agono, ele kule ke
enekakolo mekilepa Keraisuno tele patu-kama kautakoane meku.
31
Ali Muno Yesu
Keraisuno etene ali atoame kei-kama piatiki Akolaliyopa noanume nimo ikilepa kapene agale
wamukuno wene toko.
32
Nipa taba ago mekolu tanemo i ukuno, yakamene. Damasikase
take mekolu ako tobou ago Aretasi oneke lokoa ta yopiko agome no dekoa moademe eya
taneya. One poyo ali pade-mene takoa moa eni ta keteponoke no einago ponoono, nepia
kaponoe wa moa wetekaneya.
33
Nitadekale yatekete anu oya-laweme no ne noo wa eni ta
unukatapeane pawe kago tobou waneke ate lewia aua ponote kakete no tube ka keneke
uutukoa po kakoa keti akolono poti tukaketikakoli itonoke ya atekoane pitoane ponokou.
2 Korine 2 Korine
<<
11 11
>>
2 Korine 2 Korine
<<
12 12
>>
12
Poloyo Pulete Enanemo
1
Ae, kipala mate agale ou toane pinali anu wa kei piane ikilepa pamo akene tetepo
takakene ukuyake Ali Munoyo no pulete pitikouta yametekala tokamo eya wane
amedekuno, yakamene.
2
Akolaliyo Yesu-pala lipuane meku ago no moa keku tibu tiginita
takuta patukatapea tebolo takaka tibuke one mekota dekoa moa aua pome eida
kamotokapoka. Enipa pa pulete pitikouta enekou patu, nimini moa kamotokapoka patu.
Akolaliyo wene tokoyake no pade wene toamuku. Nititikaneyake mali ali leme (14) kakoa
ponaneyake opi einakamo to aweane uku.
3-4
Enimopa wa lokoane uku. No einagopa
Akolaliyo eina Paradaise wa ibini akene tibuke dekoa moa aua poka. Enipa pulete pitikouta
enekou patu. A tibuke pone kapokou patu. Akolaliyo wene tokoyake no pade wene
toamuku. Einata emo kumota yakakoane mekouyake pa alime keamatekomo tokolo tekene
anu lukoane yamedeku.
5
Nopala eni tokamoke mate agale ou toane amelepa tokoyake pinali
anu wa kei piamou. Nitamatekuyake no taba ago ke enekakolo mekene tukuleke mate agale
oada.
6
Mate agaledo ekenepa niminimo ekene tekene leau akene agome keneya ekene
toamouno, ete-kitame no kei ako pikaya tokolo tekene mate agale wamadene waku. Ete-
kitame no kei pikilepa nipa anume tukule leneme enoa anume ukumo kaleme yakoa
tokoinakaleke odene no kei pimotoane uku.
7
Akolaliyopa ako tibuke ele kule tubele-kama yametekale tekene pinali anu wa kei
wedoane pikaya tokale eya toka. Setanuno edelo ago pade no einagono tigini toa
potokaneya memotono, tete metekapa wa yametaneya.
8
Nitaneyake ae, einakeya takoa
wamotoane uku wane tebolo-peta Akolali kowitikala tokouyake
9
eya wa oka. Onekele
takateko kotuke kakoa takamotoanepa ne taba ago takoane tele lukoane pewe wima puku
wa oka. Nimo okano, Keraisuno tele noke awinomotoane tekene nipa nopa taba agomeke
nekele edikoane takou wane mate agale ou toane wediane mekene uku.
10
Nipa Keraisunole
takama yakulu tekete ete-kitame no ya takoa tete mea tiki. Ke enekakolo meane piti tanele
enoane tukuyake kilikoane mekene uku. Nipa no taba agomeke Keraisuno tele patu
kautakoane kakene tekene telekago tetepo taneya mekene uku.
Poloyo Korine Yene Mama Motokome Akenemo
11
Inapa pinali anu wa kei piane ikilepa leau akene agome keneya tokou. Kimeka no kei
piamele taneyake toameadekili tekene ni tokou. No pa agomeke kiwi pakeke kapene wakoa
meki ali-kiti etene moane patukamele tokolo mekene uku. Kime wini yenepa ibini akene
Aposelo ali-kiti tetepo takakiyake uku.
12
Kiwi pakeke wida mekenepa no i agopa Akolaliyo
moa wetekaneya tadeko wa ka oa wene tomotoane tekene etene Aposelo ali-kitame tikina
toane tubele-kama toma yakouna.
13
Kiwi pakeke edikoane mekenepa edele katekoane
toamokotu-pe. Eya odene katekoane toamokouna. Yesuno ali atoa ete ta-kitike mekoika
kinike padeya-kiti oiane motokouyake Korine yene kinike padeyaka oiane moamokouna.
Beita einapa kipa paya tetepo takakene tadekuno, ela toko wane edoane omotoa-pe.
14
Opi wida tebolo takoane ugu noadene meku. Wida none mekene kini kue nee eya
oikilepa toamou. Kini kue eyake wene piitikaneya meamekene kiwike wene piitikaneya
mekene ni uku. Mati deyame etene nineta kue nee eya moke toa meamoko. Etene ninetame
kini mati deya-kiti nee eya moke toa meamediki.
15
Ae, kiwi auapeadene anukuya peya
tatiane meetapeou. Kiwike toane tuamedekolupa nipa tuou. Kiwike dikoane wene wedoane
mekoane tomotoake nooke wene nateya mekoa meki patu.
16
Nipa no Polo kiwi pakeke Keraisunole takama yakene kinike kue eya keleyo oiane
motane tetepo toameneyake kinikiya tolopi toane motekene tokou wa nopala wene pianeya
mekete no akoa iki patu.
17
Kiwi tewitikoane padeka pone mepokenepa kinikiya-kiti
motokapomotoane tekene panago kiwike wini moane wetekakou wa kime no akoa iki patu.
18
Taitasi einago Korine take wida poano pa wane kowitoane wetekakilepa padenakago one-
pala opia nokagoka moane wetekoane tokouno, einago Taitasi wida nokome kinikiya tolopi
toa motoka patu. E 'e mena. Einago tota odene weneta piitikoa mekete odenele-kama toma
yako. Enipa nimini ukutu-pe.
19
Kime koiso yakoa memotoane kakene ou toane pinali anu wa kei pikene ni uku wa
koto wene pianeya meki patu. No pade nitamekene Akolaline leneke kakene ikilepa Keraisu-
pala lipuane kakene uku. Enipa anu kolotini yene kime Keraisunole wedoa takamotoane
tekene auapeou wane mama motekene uku.
20
Wida nekene enekolu kiwi mekete toatekoi
toa mekete toameadekoli enekaya wane ni uku. Kipala wene poaneya noatekouke no
nomotoa wedianeya nepia mekete tadeko wa kime akaya tokolo tekene ni uku. Kini kini ete
oto wa neno oa wene poaneya mea bu wa kotimi taneya mea pili pili toa akoa agale oa kotu
kotu toa kawa ete yene paya tetepo takoa agale oa kamotokoa enika enile toonali
yotokayano wene pikene uku.
21
Wida wa none mekolu kini tokoileke kiwi kakakoa
Akolaliyo no ya takakayano wene piku. Kiwi padeka-kitame kini namolole toma yakoina
tekete eko atoa moa ni motane atoa eko alike pote ni pamoka mea enika eni poanele pa
toma yakete tiki. Ae, enika eni poane wene wia wawameadekoli enekene tumai keneya
meou.
2 Korine 2 Korine
<<
12 12
>>
2 Korine 2 Korine
<<
13 13
>>
13
Wipitikome Pubu Oa Lionate Oa Tanemo
1
Wida wa ugu nikilepa tebolo takoa-peta tou. Akolaline bokuke wia mekapiane toapa
ali takuta tebolome-kiti panagome poanele tokale enekoinakamo i i wa odenemo-kama
akoa okolipa oyake yakoa moamele too.
2
Papete wida taku takoane ugu nekenepa kiwi
padeka-kitame poanele tokoi-kiti ni kiwi peya kikilikoane pubu okounano, opi ta padeka
mekene eya wane lokoane ukuno yakamene. Wida wa nekene poanele tokoi peya kibu
mouno, nepio wane uku.
3
No Polo Keraisuno agale patu kautakoa kakome oko patuno,
one nokome tokale enato wa nepia mekili tekene eya waneka uku. Keraisu einagome kiwi
pakeke taba tokole toamokome telekole-kama witakamotoa toko.
4
Ete yename one yomo
lekaneyake wia dekakoli pa taba ago keneya eni tuaneyake opi Akolaline tele patu kautakoa-
kala kako. Noanuka one keneya taba ago meku. One-pala lipuane ago pa taba agomeke
kinikile takadene one-pala opiane Akolaline tele patu kautakoane kawane meou.
5
Kime Keraisunole takama yako patu wa kini tepene piko wene tetoa enekala tamene.
Einago Keraisu Yesu kipala lipua meko wa wene toamiki-pe. Lipuaneya mekome-li. Enido
wene toameadekalepa nipa onekele pata pale takama yakete tokoi.
6
Wida nekene tokoule
eneketepa no i agome Keraisunole pata pale takamokono, kipa kibu moamele toko wa oino
wene piku-ye.
7
Ni pade Akolali kini kowitikakilepa poanele odeneleka toamomotono ta
wane tuku. Nitikuno, telekole toane kibu moatekoule toamekete kiyo akenele toma
pekedekolipa epetoo. No i ago Keraisuno agale patu kautakoa kakono, poanele tiki-kiti kibu
moamele toko wa kimedo wene toamekete no paya tetepo takoake epetanele tadekolipa
nipa epetoo.
8
Akolaliyo nimini peku lawetekale noa toma pekedekolipa nipa enile toma
poameo wane ka edoane ketekamotoa-pe. Ka ina ina waneka yamema pamedeku.
9
Kime
Keraisunole wedoa takama pikilipa nipa telekole toane kibu moateku toa mena. Enipa wene
epetaneya mekene uku. Kime Keraisunole takama poatiki kotuke kakoa takama pomotono
ta wane kini kowitikakene uku-ye.
10
Akolaliyo one yapu wikakou toane kiwi auapemotoa
tokome no moa kakaka. Nipa poane yapu ke aweane mitikoane wawou toane kiwi kibu
momotoa taneya mena. No dikane agome kini poanele tokoileke kibu moamou wanepa nipa
papete i take mekene pubu oane i pipia wiane wini wetekaku-ye.
11
Anu oya-lawe, i pipia wiane peya takakenepa eya wane uku. Keraisunole takama
poatiki kotuke kakoa toadete wili toma pamene. Kipala i kowitoane ukumo yakoa tamene.
Odene wene-kama pianeya meamene. Tepe kolotini kawia pianeya meamene. Edikoa
mekolipa Akolali totoke wene mekoa mea tone tepe kolotini kilikoa pikoa toko ago kipala
opia mea kawoo.
12
Yesunomo yakoa motane-kiti enekoita yono mano wa kini yono mokala tamene.
13
I take Akolaliyo one wa takoa motane yene peyame kiwi wete kamene wa kiwi
lionate iki.
14
Kiwi peyane eya wane kowitikakene uku-ye. Ali Muno Yesu Keraisuyo pewe-kama
wia ni Akolali kiwike wene mekoa mea ni Epetane Yomini kiwike awinome mekome odene
wene pikoa tomotoane uku.
Opa anu agale eni.
2 Korine 2 Korine
<<
13 13
>>
2 Yone
11
2 Yone 2 Yone
<<
11
>>
2 YONE
Yoneyo Taku Takoa Wia Wetekane Pipia
1
1
Yone nopa Keraisuno ali atoa yopiku agome uku.
Kamo koni atoa Akolaliyo takoa motane atoa neeke ni neke mati-kitikeka i pipia wini
wiane wetekakilepa nimini peku noane tekene kiwike wene mekoane mekene tuku. Kiwike
wene mekoa mekilepa noanu odene mena. Nimini peku naki peya kiwike wene mekoa meki.
2
Kiwike wene mekoa mekilepa nimini peku nakoya tekete ni toko. Eni pekupa takoa
poameneya tone tepene pa pia kawoo.
3
Atai Akolali mana Yesu Keraisutame toto pewe wia
ela moa tepe kilikoa pikoa toi. Nipa nimini peku noa wene mekanali yotokolopa nitoi.
4
Neke mati padeka-kitame nimini peku noa tokoile enekouna tekene wedoane wediane
meku. Atai Akolaliyo tamene wa toto-pala okana toa eni tokoi.
5
Opi kamo koni atoa toto
peya wene mekanali yoomoa pato wane ne kowitoane uku-ye. Nipa weneya totono litia tato
wane ekene wamuku. Yesunole titia takakete yatekoona toa litia toomoa pato wane ekene
uku.
6
Ete oto wa wene mekanali yoma pamene wane ikilepa nipa Akolaliyo tamene wa oka
toa litia tamene wane ekene uku. Eni totono kime titia yatekilepa Akolaliyo ete oto wa wene
mekanali yoma pamene wa okana totono eni yatekoi.
7
Ali atoa oa yotokaki ali kainya matiyame ta piko peyake eya wa oa pupitikama yaki.
Yesu Keraisu itonoke nikilepa nimini ali latia nekeneya mena wa iki. Dikane yename Keraisu-
pala pine wia poi tagoa ali atoa oa yotokoa tiki.
8
Nitikino, Keraisunole takama yakilepa pata
pale takayano, wedoa yamene wane uku. Akolaliyo tone toma yakoole topo takakome pupu
poi wedoa mou toa pewe wia tagatapemotoane tekene ni uku-ye.
9
Keraisuyo i i wa olaukane totono panagome-kiti litia toamokome pademo pademo
pamo yakoa etepea pokomepa nipa Akolali-pala lipua mekoya mena. Keraisuyo olaukane
totono litia toko agopa Atai Akolali mana Keraisuta-pala lipua meko.
10
Panago-kiti kiwi
mekoita wida nokome Keraisuyo olaukane toa olaukamokalepa kini yapu noo wa
makutukoa moameamene. Ke wa yonoka moameamene.
11
Dikane agodo kime makutukoa
moteketepa nipa one-pala kibutua poanele tekete toino, makutukoa moameamene.
12
Kipala pademo pademotaka oadiyano wene pikounake i pipiake wiane mekamuku.
Nitikuno, toto peya wedikete wedia tagatapeatoanepa kiwi mekita wida nekene kiwi
kakakoane ou.
13
Neke wamene atoa Akolaliyo takoa motane atoa one mati-kitamepa kiwi peya wete
meamene wa iki-ye.
Opa anu agale eni.
2 Yone 2 Yone
<<
11
>>
2 Pita
00
11
22
33
2 Pita 2 Pita
<<
00
>>
^
2 Pita
Keraisuyo Kipa One Yene Wa
Kayo Oa Takoa Motanemo
Keraisu Pa Tootapeneya Kakale Enanemo
Ali Muno Ago Wakapeane Nou Wa Oa Pianemo
2 Pita 2 Pita
<<
00
>>
2 Pita 2 Pita
<<
11
>>
2 PITA
Pitayo Taku Takoa Wia Wetekane Pipia
1
1
No Saimone Pita Yesu Keraisu onekele-kama takoane onekemo oane auane yawane
tuku Aposelo agome uku.
Toto peya midi piane tetepo takoa kiyo ootokoa yopiko ago Akolaliyo kiwika oneke
wene tugoa meamele toko wa ka yametane-kiti kipala uku. Akolali wane ukupa toto toa
motoko ago Yesu Keraisuke uku.
2
Akolali tone Ali Muno Yesutame kiwi pewe wia tepe kolotini kilikoa pikoa toa
tagamotoane kini kowitikoane uku-ye. Einagota wene tootapeada wa kini peku noma
pokolipa kini i kowitikakumo yakoa toi.
Keraisuyo Kipa One Yene Wa
Kayo Oa Takoa Motanemo
3
Onekele wedoa mea takamotoapa Keraisu einagopa Akolaline tele patu kautakoa
kakome one peku toto lawetetapeka. One wene taneya mekete tomotoa ni toka. One pa
tootapeneya mea epetekakole eni yametekomepa totopa one wa kayo oa motoka.
4
One
pewe wia tagakome toatekale i i wa eni yamepikilepa Akolali patu kautakoane meku toa
kiwika kautakoa meamele too wa toto kamo takou toa toka. Nipa papete ali atoame itonoke
ele kule poanele toada wa wene pia tokoileme kiwika moa koigakaya kekatekoa petoa
pomotoa tokome ni toka.
5
Keraisuyo nitikano, onekele takama yaketepa meane epetekateku
toane meada wa wili toa meamene. Nitoapa eni toateku peku noada wa noa tamene.
6
Eni
peku noa tikilepa nipa uutukoane poti yawane piou wa wene pia tamene. Ni uutukoa poti
yawa pitikilepa ke enekakolo mekeneka toatekule pa toane togou wa wene pia tamene.
Nitoapa Akolalinele-kama takou wa oneke nate wene pia tamene.
7
Nitoapa Keraisuno ali
atoapa kini wamene laine-mikiti tetepo takoa meamene. Nitou wa ali atoa peyake wene
mekoa meamene.
8
Enika eni toatiki peku noa tagaketepa nipa tone Ali Muno Yesu Keraisu
wene tootapeneya mekete onekele takama yakilepa pata pale takameneya wedoa toi.
9
Enika
eni toateko peku noamoko agopa leneta lianeya meou toa pa mekolo uku. Akolaliyo one
namolo tane poanele moa kogatapekaleka wene kayapeaneya mekolo ni uku.
10
Nikepa anu oya-lawe kipala eya wane uku. Akolaliyo one papete wene toopikanakale
taatekoa tokome kiwi kayo oa takoa motaneyano, kipa one wa pikoa memotono, wedoa
meamene-ye. Nitiketepa oneketa poadete pekete etepea paka pikile toamoi.
11
Nitoa mea
togakolipa toto toa motoko ago Ali Muno Yesu Keraisuyo one talo toane-kala kama puku
take noatino, noe wa kiwi pupu poi mou toa makutukoa moo.
12
Nitoo tokolo tekene einaka einamopa i i wane kiwi wene taka taka tou. Kimepa enika
eni niminimo wete yakoa moa lauane lauane toa mekoiyake nitou.
13
Nipa no tuameneya pa
mekenepa kipala ina ukule tamene wane tika tika tamele tokolo tekene eina niminimo wene
taka taka tou.
14
No tuateku tigotokono wene tekene nitou. Tone Ali Muno Yesu Keraisuyo
no tuatekou wene takaka tokolo ni uku.
15
Nipa no tuutukaneyake kipala i uku toa-kama
agopa moameneya memotoane tekene papete pine i i wane keleyo wiane mekada wane wili
toane meou.
Keraisu Pa Tootapeneya Kakale Enanemo
16
Tone Ali Muno Yesu Keraisuyo telekole toma yakamo-pala one wakapea
noatekamota totome kipala to awea ikilepa tone kaua-mikitame wene kibututukoa akene la
agale wamokoona. Nitamekete toto Aposelo ali-kitame enekoomo-kama okoona. One pa
teleta tootapeneya kakale totome enekoono, yakamene.
17
Einapetepa eya toka. A tibuke pa
patu mekoyame agale ludu witakome okome winagopa anu kolotini ago anu managono, one
tokoleke kolotine meku wa oka. Nipa Atai Akolaliyo one kei eni pikomepa pa takalogaka.
18
A tibuke agale ludu witakome okale totome yatekilepa Akolaliyo mana-pala ko oateku
tono wane i wa takoa motane tono tobou waneke Keraisu-pala odeneka kakete yatekoo.
19
Nipa ipa Akolaline agale to awea akane ali-kitame Keraisuke papete oa piane toa
taatekoa tokono, nimini agale akedeki wa totome yakoa wene tokoo. Koobu tagoi kini
tepene wini witia nou toa kini to awea akane agalemepa labo toleme keneya yomiyomu
keneke poatiki ka i i wa pa takoa ta patakanoono, Keraisu einago wete wakapea
noameneyake nitoono, kini agale yakoa litiamene.
20
Eya waneka tobou kakoane ukuno,
yakamene. Akolaline bokuke wia mekapiane agale pade padameka one weneme pine ina ina
wa amele toamoko wa wene taneya meamene wane uku.
21
One agale to awea akane ali-
kitame einaka einamo oa pikilepa kini weneme toameneyake ni uku. Akolaline agale to awea
akakilepa Epetane Yominiyo wene takane toa-kama to awea akaneya.
2 Pita 2 Pita
<<
11
>>
2 Pita 2 Pita
<<
22
>>
2
1
Papetepa Iserele yatene ali pade-kitame Akolaline agale to aweane akaku wa oake
kapene wakoa okala taneya. Opika kiwi pakeke dikane kapene tikisa ali-kiti paigakoa keneya
note menoi. Nitoapa Keraisunomo moa koigoa i i wa olaukakilepa ali atoa Keraisuke wene
tugoa meake wamotoa toi. Kiwi oto toa motane Ali Muno agoka kote tokale waoi. Nitoa
kakoika Akolaliyo kotikatapea kibu moo.
2
Nitatekoyake ali atoa kainya matiyame e e nimini
iki wa eni yename ya tanele tokoile etepea litia toi. Nitikoli enekete ete-kitamepa Keraisuno
yatenameke tiki wa Keraisu yoto pitia nimini peku noa tikimopa pamo tetepo takoa wakala
toi.
3
Lede kime kue eya memotoa eni kapene tikisa-kitame kini titia okoi agale i i wa kiwi oa
yotokakala toi. Akolaliyo eni ali-kiti kibu mou wa atu piameneya mea tigotokoa layo
pitikatekoyake nitoi.
4
Akolaliyopa one poanele tane edelo ali-kiti wipitia ta pataka-pete kiwi kibu mouno,
nepiamene wa eya taneya. Poane take moa wetekakomepa yomiyomu ti mati kakene koa-
kiti keneke moa pitikaneya. Nipa one edelo yatene ali-kitike Akolaliyo ela moamokome
taneya.
5
Ni pade namolo namolo one peku noamadete wakene yename waye wa okolika
ueme nidikoa moa-kala pomotoa wakeneya. Nitoapa eya ago Noa ali atoame kiyo akenele
toatekoile i i wa mo wia kakene ago ni one yatene ali atoa tatono (7) kakoa-pala kiwi meati
wa eni yene odene toa motaneya.
6
Ni papete Sodome Gomora tata toeme napemotoa
wakilepa one peku noamadete wakoi yene peya kiwi kibu mou wa eni wipitikome toateka
adeka pikome taneya.
7-8
Wene kiyo akene ago Lote einago Sodome take mekome enekale
eni take meane yename pamoko atoa koua pia ni ali yatene wa atoa latikoa koua pia enika
eni poanele tokoli enekome wene poaneya meaneya. Nipa eni yene pakeke mekilepa ta
pataka abuna poanele toa poanemo oa toa kakoli enoa yakoa tokome Lote einago tepe we
tokale meaneya. Nitane agoka Akolaliyo toa motaneya.
9
Nitaneyano, opika onekele takoa
meki yene ke enekakolo mekika toa moa ni poanele toa meki-kiti kipa wipitia ta pataka-pete
kibu mouno nepiamene wa pikoa kawa tamele tadeko.
10
Kibu eni motokomepa kini poane
wene witako toa toada wa ele kule poanele toa ni ta talo tiki yene paya tetepo takoa wawa
tiki ali-kiti takoa dika dika toamene tete meademe toko.
Eni kapene tikisa ali-kiti kabe teleme wia piki toa tekete a tibuke meki edelo ali-kitika
taumada tamene piti moameneya meki.
11
Edelo ali-kitame ele kule telekole tekete eni kapene
tikisa ali-kiti oyake moa patukamele tokoyake ete taumada toamiki. Nipa kini poanele tikimo
i i wa edelo ali-kitame kapene tikisa ali-kiti koiso akakilepa Ali Muno kakakoa potimo oa
tiki.
12
Eni kapene tikisa ali-kiti yoko keneya yawa pitiki. Yoko eyapa alime wako yukoa
labakoa moa tukadete tikilika paya nou toa kini wene witako toa-kama litia tiki. Edikaki toa
eni kapene tikisa ali-kitame emo kumo wene toamikimopa pamo tetepo takoa tea oa tikilepa
Akolaliyo kibu moa atukademe tokoloka paya nou toa tiki.
13
Eni yename yete pade ali atoa
tete mema yakike tete oto wa moadete tiki. Loyo mekete bia ue nee eya nokoa kakilepa kini
wa wene epetekatekole enino tatoe wa tiki. Dikaki yename anu oya-lawe kipalaka mekete
nee nato wa koukoa mea potokakete kiwi ya takakala tiki.
14
Nipa atoake lene kaki ali-kiti
tokome poanele toa-kala kawa kilikoa meamele toamokolo yaki. Ni Keraisu patu wedoa
kautakoa kawamiki ali atoa likoa enekala tiki. Ni kamoya eya tepi-kama moa kakete eya
kuya motekete toatikile wene toa mokala tiki. Akolaliyo kiwi kote tokolo waku wa wia
atukateko ali-kiti eni.
15
Nitima yakilepa Akolaliyo yametane ka kiyo akene ka pa pimotoa
etepea puku pekete toa tiki. Nipa eyago Belame Biono mana agome kue moadene poanele
oyake tuku wa wene pia tane toa tiki.
16
Belame einagome poanele eni tokale enekome one
mea pekene dogi kaimepa alime agale oko toa mena wa kikoa akaneya. Nipa Akolaline agale
to awea akane ago Belameyo leau akeneya mekome tanele one dogi kaime ketekakome
akeneya.
17
Eni kapene tikisa ali-kiti eya tou toa tiki. To a yoa teigane ue lene keneya ni
pupulegemepa popokoa aua pekene wedo keneya ele kule tikilepa pale-kama tiki. Dikane
yenepa Akolaliyo yomiyomu ti matike mea kamotou wa wene toopianeya.
18
Dikane yename
agale muno pewe kakoa akene tetepo takoa ikilepa pamo-kama iki. Nipa poanele toma yaki
yene pene tewitikoa wakene ali atoa likoa enekete ekete mone koua piamatiki yene oyake
koua piamele toko wa eni poane peku lawetekala tiki.
19
Nipa kini wene witako toa-kama
atiki toa tamele tokono, tamene wa olaukoa ikilepa kini wene moa koiganeleme moa
labakaneya meketeke iki. Panago one tokoleme pinali one wene moa labakakolopa nipa
enile toko patu kolago taneya meko.
20
Ae, panagome-kiti Ali Muno toto toa motoko ago
Yesu Keraisunomo yakoa mootokoa itonole ele kule poanele tewitikoa petoa pokoyake wa
enika eni poaneleme einago wa moa kautakolopa eya toko. One namolo poanele patu
mekome tete motokana toa moa patukoa dika dika toamene tete motoko.
21
Ae, einagome
Keraisu yoto pitia kiyo akenele toma poateko ka ludu pegene kakoa wakome one totono
tewitikoa puku pokome toapa dika dika toamene tete eni moatekoyano, nitikaya tokale eni
ka ludu poamoo tokapa epetoo toka.
22
Dikakilekepa eya wa pedoa ikimo uku. Tueme-kiti
one nee kapelogoa pomepa wa naniko einata wa wakapea pome nopoko. Ni kai-kiti
yapu piimotokome one peke pia kakota wakapea pome waka peke pipokala toko.
2 Pita 2 Pita
<<
22
>>
2 Pita 2 Pita
<<
33
>>
3
Ali Muno Ago Wakapeane Nou Wa Oa Pianemo
1
Anu kolitini yene i pipia kiwike wini wiane wetekakilepa taku takoane wiane
wetekaku-ye. Nipa odene wene pianeya memotoane tekene kini yakoa motokoinakamo wa
wene takoane uku.
2
Nipa papete Akolaliyo one wa takoa motane ali-kitame one agale
to awea akanemo ni toto toa motoko ago tone Ali Muno agome tamene wa okana toa kini
Aposelo ali-kitame i i wa oa metekoinakamoka wene takakene uku-ye.
3
Titikenepa eya wene taneya meamene wane uku. Wipitia ta patateka tigotokale pade
ali-kitame kini weneke e ku poanele witaka toa litia tokala toi. Nitoapa kiwi mekika wida
nekete eya wa tegene matoa oi.
4
Einagopa wakapeane nou wa oa pikana toa taatekoa noko
patu. E 'e, noamoo. One nomotoa toneketai-laweme nepia mea wete tukala taneya. Ni itono
patu pia kawa toko peyapa Akolaliyo tititikakome latia pia kakoa tane toa eko adini
moameneya pa pia kawa tokono, weneya latiademe Keraisu edoa nomotoa-pe wa pade-
kitame oi.
5
Dikane yename nimo ikilepa Akolaliyo eya tanele wene teketeke toamene tetepo
takoa oi. Namolo namolo Akolali one oka agaleme a tibu latia pianeya. Ni itono latikilepa ue
moa latia pianeya. Nitoa ue meeloganeta ate witakoa muke koukoa pianeya.
6
Wa naniko eya
ago Noa meane-pete eina uemepa itono kautawia atukatapeneya.
7
Opi tibu itonota-pala
padele toameneya pa pimotoa one eina agaleme pa yopia mekilepa eya toateko wene
toopikome toko. Wipitia ta patakale ali atoa takoa eneka-pete onekele takamene yene
wawane atukoanepa tibu itonota toeme napetapemotou wa wene toopia yopia meko.
Nitikono, Akolaliyo one oka toa-kama taatekoa toamoko wa pade-kitame ikilepa kapene
agale eni iki.
8
Anu kolitini yene kime eya wa agopa moameneya meamene. Ali Muno agome ta
pataka odenepa ege wakala kadukoa penane (1,000) mali tetepo takoa ni ege wakala
kadukoa penane (1,000) malipa ta pataka odene tetepo takoa meko.
9
Nitikoyake pade-
kitame eni wene toamekete eya wa iki. Ali Muno agome tou wa papete oa pikana toa wete
taatekoa tokoya mena wa iki. Etene taatekoa toatekoyake kiwi odene agoka tua atukaya
tokolo ali atoa peya kini poane wene wia wamotoa nepia mekilepa tigotokoa layo wete
pitikamokome poti nepia-kala meko.
10
Ali Muno agopa nitane agono, wakapea noo-li. Kode ago likonu yomiyomu keneke
kotikatapea noko toa noo. Nitika-pete a tibu bu wa kiliwia takoa poo. Ni tibu ludu pia kawa
toko peyapa toeme noa kakale takoa pootapeoo. Itono ni itono patu pia kawa toko peya-
pala toeme napetapeoo.
11
Enika eniya peyapa toeme napetapekale takoa poono,
Akolalinele-kama takama pato wa kiyo akenele toma pamene.
12
One noateko ta wete pata
pata wa edikoa nepia-kala meamene. One eni noka-pete a tibu toeme nootapeoo. Ni tibu
ludu pia kawa toko peya ue latia takoa pootapeoo.
13
Nitatekoyake Akolaliyo tou wa oa
pikana toa taatekoa tokale weneya tibu itonota witoo. Nitoono, eidapa kiyo akenele toatekoi
peku-kama nakoi yene mea kaweino, ke wa totome nepia-kala meko.
14
Anu kolotini yene kimepa enile tokale nepia mekete tikino, Akolaline leneke kakete
kini wene moa koiganele toamoa ni ete yename padeya namike akoa agale oatikile toamoa
tato wa one-pala odene wene piitikoa meamene.
15
Ali Muno agome tigotokoa layo
pitikamokomepa nipa kini poane wene wia wakoli toane mou wa wene pikome ni toko wa
wene taneya meamene wane uku. Tone oyago Polo einagomepa Akolaliyo wene takane toa
kiwike odenemo wini wia wetekanemo uku.
16
Polo einagome pipia wia mekakome-kama
enika enimo oa mekala toko. Enika enimo oa metekilepa keleyo pitiganeya piamokomoka
oa meteko. Poloyo eni keleyo pitiganeya piamokomo oa metanemopa wene toamene yene
ni wene takuta pia tiki-kitame moa koigoa olaukaki. Nipa Akolaline agale padekapa moa
koigoa olaukaku pekete tiki toa Poloyo oa metanemoka moa koigoa olaukaki. Nitoa mea
tua atuadete tiki.
17
Ae, anu kolotini yene kipala i ukumopa kime wete yatekoinano, kiwi poapeneya
kakita Akolaline totono tetekoa poanele tiki-kitame kapene agale oa kiwi etepea lia aua
pokayano, wedoa meamene-ye.
18
Nitoapa tone Ali Muno Yesu Keraisu toto toa motoko
agome pewe witikome peku laweteko toa noa toma pamene. Opika naniko nanikoka one kei
pia-kala katoane uku-ye. E e nimini.
Opa anu agale eni.
2 Pita 2 Pita
<<
33
>>
2 Tesalonaika
00
11
22
33
<<
00
>>
^
2 Tesalonaika
Akolaliyo Ali Atoa Takoa Enekilepa
Kiyoke-kama Tokomo
Akolali-pala Pine Wia Poi Teigo Ago
Poapeneya Kamene
Poloyo One Kowitikamene Wa Akenemo
Loyo-kala Meamea Wa Mane Mane Akenemo
<<
00
>>
<<
11
>>
2 TESALONAIKA
Poloyo Tesalonaika Yeneke
Taku Takoa Wia Wetekane Pipia
1
1
I pipiapa no Polo Sailasita Timosi toa wia wetekako-ye. Nipa toneketai Akolali Ali
Muno Yesu Keraisuta kita patu kautakoa kaki-kiti kini Tesalonaika take mekika wini
wetekako-ye.
2
Toneketai Akolali Ali Muno Yesu Keraisutame kiwi pewe wia tepe kolotini kilikoa
pikoa toe wa kini kowitikako-ye.
3
Tone oya-lawe kiwike Akolali-pala ke wa-kama amedeko. Yesunole takama pote kini
kini wene mekanali yoa tikilepa kini namolo tokoinakale moa patukoa wedoa toomoa pikete
tikili tekete ni oko-ye.
4
Widikakilekepa Akolaline ali atoa koukoa meki toa totome eya wa
mate agale ou toa oma yako. Ete yename kipala poi te ia eni ke enekakolo mea tete-pala
moma yaketeke Akolalike wedoa wene tugoa mea onekele takoa togoa tiki wa totome kiwi
kei pia oma yako-ye.
Akolaliyo Ali Atoa Takoa Enekilepa
Kiyoke-kama Tokomo
5
Kiwi widikoa mekino, Akolaliyo ali atoa kiyoke-kama takoa enoo tadekolo uku. One
talo tuku take noatiki yene takoane eneku wa wini ke enekakolo mekete tikile Akolaliyo
enekakolo ni uku.
6
Akolaliyo edikoa kiyoke-kama tikilepa kiwi toa potokaki yene kibu moa
too.
7
Nitoapa tete mokoa kaki-kiti kiwi ko meamene wa toto-pala ko mekoo. Ali Muno
Yesu a tibu kawa noka-pete nitoo. One nikilepa one telekole toma yaki edelo ali-kiti-pala
opia noo.
8
Nitoa toe itipono-pala oa kakeneya nokome eya too. Akolali kote tokale wene
toameneya mekoi-kiti ni tone Ali Muno Yesunomo litia toamadete wakoi-kiti kini eni tokoike
nami wia kibu mootapeoo.
9
Nitoa kibu motokale moa atukatapeneya mea kawei. Nipa Ali
Munono lene timini enameneya mea one telekole tokome pa tootapeneya mekata ketekaneya
pa mea kawei.
10
Enipete Ali Muno wakapea nikilepa one ali atoame one kei pia ni oneke
wene tugoa mekoi peyame ke wa ka oa kawa tomotoa too. Kimeka Yesunomo wini oa
metekoonakamo yakoa motokoina tekete nitoi.
11
Eni wene taneya mekete tone Akolali-pala eya wa kini kowitikakala toko-ye. Neke
kayo oa motokana yene mea epetekatiki toa Tesalonaika yeneka mea epetekamotono ta wa
kini kowitikako-ye. Nipa padele padele epetanele tou wa kime wene pia ni Yesuke wene
tugoa mekete ile tou wa wene piki toa-kama toa togamotono, neke tele lukoa auapekala
tamene wa kini kowitikako-ye.
12
Eni kowitiko toa mea epetekakete kini Ali Muno Yesuno
peku noa tokoile enekete ete yename Yesu dikane ago tadeko wa one kei pia kawei. Nipa
toneketai Akolali-pala Ali Muno Yesu Keraisutame kiwi pewe-kama witikoile enekete ke wa
kiwika kei pikala toi.
<<
11
>>
<<
22
>>
2
Akolali-pala Pine Wia Poi Teigo Ago
1
Anu oya-lawe tone Ali Muno Yesu Keraisu oto wakapea nokome toto moa
koukatekamo olaukaketepa kipala eya wa oko-ye.
2
Ali Munoyo ali atoa takoa enateko ta
wete patadeko wa emo kumo okoimo kugu yateketepa eina eina wene bebo oa ka oa piti
moameamene. Nipa panagome Akolaliyo akamene wa oka toane uku wa eni kugu yakoaka
ni padame mo wia kakamo kugu yakoaka ni panagome no Polo-laweme pipia wia
wetekakome oka toane uku wa eni kugu yakoaka e e nimini wa yakoa moameamene.
3
Pade-
kitame enika enimo oa yotokakayano, eya wa wene taneya meamene. Eni ta wete
patameneyake ali atoa peya matiyame Akolaline totono tagama yawei. Eya agoka Setanuno
peku pine wia nootapea poanele-kama toko agoka keleyo witanoo. Akolaliyo moa
atukateka agoke uku.
4
Einago nokome eya too. Ali atoame iya godeke eya godeke lodo
yato wa lodo yotokoiya gode-kiti-pala poi te ia paya tetepo takoa waoo. Ni ali atoame iya
kowitato wa kowitikoiya peya paya tetepo takoa poi te ima poo. Nitoa wipitikome onepa
Akolali kaku wa Akolaline tobou losu yapu pome mepoo.
5
Inapa kipala wida mekene okounakamo ukuno, nimini ukutu-pe.
6
Einago noateka oi
ponokale taatekoa noatekoyake papete panagome ka ketekako. One keleyo noateka ka
ketekako agopa kime wene tekete tiki.
7
Akolaline totono kautoa enoai tikilepa opi paigakoa
mea toko. One noateko ka ketekoa kako agopa wete tewitikoa poameneyake nitoa meko.
8
Wa naniko tewitikoa pokale eni poanele-kama tokago keleyo kawoo. Nitoa kakaka Ali
Muno Yesu wakapea nokome moa atukoo. Nipa one oka poomeme wia tukoa one pa teleta
tootapeneya nokame moa kautoa too.
9
Nitatekoyake papetepa eni poanele-kama tokago
Setanu patu kautakoa kakome ele kule kapene telekole toka matiyame ali atoane wene
kainya pikakala too.
10
Nipa padele padele poanele tokome tua atua poatekoi yene tolopi
tokala too. Eni yename Yesuke nimini akenemopa yateketeke ke wa wene mekamekete kiwi
toa moatekale kote moa wakete tekete tua atua poi.
11
Nikepa eni yename kapene agale
yakoa momotoa tokome Akolaliyo kini wene moa bebo akatapeoo.
12
Eina niminimo yakoa
moamadete wakete poanele tato wa wedia mea tokoi peya kibu moademe nitoo.
Poapeneya Kamene
13
Tone oya-lawe Ali Munono kolotini yene kiwikepa Akolali-pala ke wa-kama
amedeko. Totome ke wa ikilepa Akolaliyo eya tanele-kitike toko. Tibu itonota wete
latiameneyake kiwi toane mou wa takoa motaneya. Nipa one Epetane Yominiyo wene
takaka toa itonole wawa onekele takama pote ni one niminimo yakoa moa tokoli toane mou
wa takoa motaneya.
14
Nitou wa eni wene toopikana toa taatekakome eya toka.
Keraisunomo totome oa aua yakomo yakoa momotoa tokome kiwi kayo oa motoka. Nipa
tone Ali Muno Yesu Keraisu pa teleta tootapeneya meko peku kime noati wa kayo oa
motoka.
15
Nitikanano, anu oya-lawe kipala eina okoonakamopa kabunume oa mea pipia
wia wetekakete oa tokoonakamo wedoa pikoa kato wa poapeneya kamene wa totome oko-
ye.
16-17
Akolali totoke wene mekoa mekome tokome eya toko. Tone wene weye-kama
akoa ni kiwi auapekene dikouno, nepia meamene wa pewe wia kako. Nitikono, tone Ali
Muno Yesu Keraisu toneketai Akolalita-pala eya wa kini kowitikako. Padele padele
epetanele toa pademo pademo epetanemo oa tomotono, wene weye akoa auapeamene wa
kini kowitikako-ye.
<<
22
>>
<<
33
>>
3
Poloyo One Kowitikamene Wa Akenemo
1
Tone oya-lawe kipala eya wa wipitia oko-ye. Tone kowitikakilepa Akolali-pala eya
wa kowitikamene. Ali Muno agonomo wete oa pupitikamotono ta. Onekemo kime yakoa
motekete ke wa kei pia tokoonakale ete take pitiki yenameka yakoa tomotono ta wa
kowitikamene-ye.
2
Ali atoa peyame Keraisunomo yakoa moamikiyano, eya waka
kowitikamene. Poanele toa etepea yaki-kitame toto-pala padele poanele tokoli toa moamene
wa tone kowitikamene-ye.
3
Ali Muno agome tou wa okale-kama toko. Nitane ago tokome kiwi poapeneya
kamotoa yopia mekome poane ago Setanu ete pedeka pedeka too.
4
One patu kautakoa
kakete eya wa oko-ye. Tamene wa totome kipala okoona toa-kama kime yakoa litikete tiki.
Ni padeleka tamene wa okoo toa-kama litikala toino wene totome toko-ye.
5
Ali Muno Keraisu-pala eya wa kini kowitikoa oko-ye. Akolali kiwike wene mekoa
mekole ni onekele neme poti takoa togakole i i wa yame yame tamene wa kini kowitikako-
ye.
Loyo-kala Meamea Wa Mane Mane Akenemo
6
Anu oya-lawe eya tamene wa Ali Muno Yesu Keraisu patu kautakoa kakete oko-ye.
Kini oya-lawe padeka-kitame tone olaukakoona toa litia toamoa loyo-kala mekete tikino,
dikane yenepa titi toma yamene.
7
Totome tokoonakale kime litia tamedeko wa kime wene
tekete tiki. Kiwi pakeke wida meketepa loyoka meamokoona.
8
Nipa kini yapu note
menoketepa kini nee eya pa moa nakoona mena. Nitameneya kinikiya pa oia moamato wa
kinikiya pade mouketepa ete pia oto pia pupu tokoa kakoo.
9
Nipa kinikiyapa pa oia
moamele tokoyake oia moamokoona. Nipa kini Keraisunole takakete toatekoi adeka pia
teketepa onekemo pa oma yakoona.
10
Kiwi pakeke mekete eya wa olaukakoona. Pupu
toamou wa wene pikagopa nipa nepa nee noameneya pa meamene wa olaukakoona. Ni
edoa-mo.
11
Opi i take mekete yatekolo kiwi padeka-kiti loyo-kala meketeke ete yene pupu tikika
pekete ile ta ile ta wa pale toa kaki wa akedikili yateko.
12
Ali Muno Yesu Keraisuno agale
patu kautakoa kaketepa eya tamene wa totome edikaki yene mane oa moa pubu oa toko-ye.
Kini noatiki nee eya moadetepa poti kilikoa mea pupu tokala tamene.
13
Anu oya-lawe kime yete pade ali atoa auapekala tikilepa koome tukene waku wa
wawameneya pa toa togamene.
14
I pipia wini wia wetekakete tamene wa okoomo
panagome litia toamokolopa nipa onepa dikane ago tadeko wa titi toma yamene. Poanele
eni tekene tadeku wa ya momotoa tekete ni oko-ye.
15
Dikane agopa kipala poi te iane ago
tetepo takamekete kini oyago tetepo takoa mane oa moamene-ye.
16
Kini tepe kolotini kilikoa pikako ago Ali Munagome enabuna ele kule tokome kini
tepe kolotini kilikoa pikamotoa kini kowitikako-ye. Ali Muno ago kiwi peya-pala opia
memotoa waka kowitikoa oko-ye.
17
I wipitiane lionate ukumopa noanu yoname witiku-ye. Noanu pipia witikene-kama ipa
Poloyo witaneya tadeko wa ali atoame oi motekete wene tomotoane tekene nitikala tuku.
18
Ali Muno ago Yesu Keraisuyo kiwi peya pewe wia yopimotoane uku-ye.
Opa anu agale eni.
<<
33
>>
2 Timosi
00
11
22
33
44
2 Timosi 2 Timosi
<<
00
>>
^
2 Timosi
One Poyo Ago Tou Toa
Keraisunole Wedoa Takamene
Wipitia Ta Pene Patameneyake
Tepe Witanele-kama Witatekamo
Poloyo Timosi Wipitikome Mane Mane Akenemo
Poloyo Pade Ali-kitike Akenemo
2 Timosi 2 Timosi
<<
00
>>
2 Timosi 2 Timosi
<<
11
>>
2 TIMOSI
Timosike Taku Takoa Wia Wetekane Pipia
1
1
Polo nopa Keraisu Yesuno Aposelo agome Timosi nepala uku. Nipa Akolaliyo ali
atoa toto Keraisu Yesu-pala lipua mekete mea kama poatekoo wene toopiane toane
taatekoane akama yakene uku.
2
Anu kolotini ago Timosi nepa anu mana tetepo takoane eya wane neke kowitikaku-
ye. Atai Akolali tone Ali Muno Keraisu Yesutame einago Timosi pewe wia mama moa tepe
kolotini kilikoa pikoa toe wane neke kowitikaku-ye.
3
Noanume Akolalinele takakilepa anu kaua-mikitame tane toane kiyo akene wene
pianeya mekene tuku. Nipa ete pia oto pia kowitikilepa ne wene taneya mekene ke wane
Akolali kowitikala tuku.
4
Ne tewitikoane pokouna-pete ne komo yoa kakana wene taneya
meku. Ae, no wediane tagatapeneya meadene ne enadiya wane wene tokoane meku.
5
Ni
neke Keraisuke wene tugoa mekana wene taneya meku. Papete eya atoata neke kaua Yunisi
neka ua Loisita Yesuke wene tugoa mekoina toa neka oneke wene tugoa mekono wene
tekene uku.
6
Nitoa mekono, eya tamene wane uku. Anu yono neeke pikolu Akolaliyo ne
yametekanakale toe pukoa natekou toa pupu lene kakoa litia tamene. Ni edoa-mo.
7
Akolaliyo one Epetane Yomini toto metekilepa ete yene piti moa memotoa taneya mena.
Ele kule telekole toa eko ali atoake wene mekoa poti utanele toa memotoa tokome ni taneya.
8
Nitaneyano, Ali Muno agonomo to awea amene ya tokale meameamene. Ni no
onekele takama yakouke po yapu pitikaneya meku ago-pala ya moameamene. Nitameneya
Keraisunomo to awea okooke tete oyake moato wa Akolaline tele patu kautakoa kakete oma
patoane uku.
9
Akolali einagome toto toa moa ni onekele kiyo akenele takamotoa tokome
one wa kayo oa motikilepa tone padele epetekoa tokoonakaleke taneya mena. One papete
wene toopikounakale taatekoane tou wa one weneme toto pewe witikome taneya. Nipa tibu
itonota wete latiameneyake enilepa Keraisu Yesuke tou wa wene toopikana toa taatekoa
taneya.
10
Einapa papete kaukoa mema nekeneyake toto toa motane ago Keraisu Yesu
taatekoa nokome to awea akaneya. Einago nokomepa ali atoa tua atua pomotoa tokoya moa
agopa takatapeneya. Ni ali atoane wene epetekakome toatekamo oa metekilepa toto mea
kama poateko toa i i wa keleyo oa metaneya.
11
Enimo Yesunomopa Akolaliyo no i ago neme mo wia olaukoa tamene wa one
Aposelo ago takoa moa kakaka.
12
One okana toane tokoukepa no po yapu i pitikaneya
mekene tete motukuyake ya taneya meamuku. Nitameneya Akolalike-kama wene tugoane
meku. Akolaliyo ile tamene wa yametekanakale toane togamotoa tokome no auapekala too.
Onepa nitamele toko agono wene tuku. Ali atoa takoa enademe noka-peteka nitoa-kala
kawoono, edekolo ya taneya memotoa-pe.
13
Ne kiyo ootokoa meke toatekale olaukakouna
toa wene taneya mea tamene-ye. Nipa Keraisu Yesu-pala lipua meke Akolalike wene tugoa
mea neke oya ali atoake wene mekoa mea tamene.
14
Nika Akolaliyo Timosi ne
yametekanakeyapa one nimini agale wedoa pikoa kamene. Totoke awinome meko Epetane
Yominiyo ne auapeademe tokono, nitamene.
15
Eya wa wene teke toko. Esia ta piko peyake Yesunomo yakoa motane yene peyame
no tewitikoa wakoi. Eya agotameka Piselasi Emosenisitameka nitikoi.
16
Nitikoiyake eyayo
Onesiporasiyo no wene weye akakala tokano, Akolali neme einagono mati atoa mama moa
talo toa kamene wane kowitikaku. No po yapu pitikaneya mekoluka einagome no-pala ya
moamokome eya toka.
17
Lome take nome mekome eina eina no Polo manika meko patu
wa tuku tokoa kawa enamutuka.
18
Nitikano, Ali Muno ne wakapea nekepa Onesiporasi
einago ela moamene wane Ali Muno ago kowitikoane uku. Epesase take pone mekolu
einagome ele kule toa no auapekala tokana. Enipa Timosi ne wene tokomo uku.
2 Timosi 2 Timosi
<<
11
>>
2 Timosi 2 Timosi
<<
22
>>
2
One Poyo Ago Tou Toa
Keraisunole Wedoa Takamene
1
Anu mati Timosi nepa Keraisu Yesuyo pewe witikome tele lukoa kakono, one tele
patu kautakoa kama pamene.
2
Ali atoa peya mati kakakoane olaukakounakamopa eko ali
atoa olaukakala tamene. Nipa tou wa iki toa-kama tiki-kiti takoa moa olaukakilepa yete pade
ali atoaka wene toa olaukatiki yene takoa moa olaukamene.
3
Poi wedoa tokoa kawou toa teke ke enekakale mekeka Keraisunole wedoa takama
pamene.
4
Poyo agome-kiti poi tikilepa ipe yapu eyake wene piitikaneya kakome tokoya
mena. Nitamokome one poi tobou agono wene epetekademe tokome poi tokome
toatekoleke-kama wene piitikaneya kako.
5
Pade yene-pala teyapea pome moa patukanali
yotoko agome-kiti yopikagome tamene wa oka toa-kama litia toamokomepa nipa ete ali
peyado moa patukakomeka sili oyake moamele toamoko.
6
Ni ipe wedoa tokoa kakene
agome-kiti ipe kakoya nee wakoa moa nakilepa ete yene naniko moa nomotoa pinago
oneme namolo takoa moa namedeko.
7
Nepala ina pedoane ukumopa wene kibutukoa
mema yamene. Ali Munagome pine ina ina wa wene taka taka toono, nitamene.
8
Keraisunomo eya wane oane auane yakumo wene taneya meamene. Yesu Keraisu
tuaneya pikata Akolaliyo moa kamotokaneya. Ni agopa Depidi-loeke tageneya.
9
Nimo oane
auane yakouke pade-kitame kini totono tetekoane akene tetepo takoa mea no tete meapa po
kakoa po yapu pitikakoi. Nitiketeke Akolaline agale oyake moa lutua ketekamele toamoko.
10
Nipa Akolaliyo one wa takoa motane ali atoa auapekene eni tete moane mekilepa eni
yeneka Keraisu Yesuyo toa moa togakale one a tibuke pa tootapeneya mea kama
pomotoane tekene tuku.
11
Etene nimini okala tanemo ukuno yakamene. One-pala odeneka tukete tuou toa tonekele
wawa toameketepa nipa onepala odeneka mea kama poadete toko.
12
Ni tete
mokoa kaketeka onekele pa takama peketepa nipa one-pala odeneka tobou ali
atoa mea talo toa kawadete toko. Nitameneya one kote tokolo wakolopa totoka
kote moa wawademe toko.
13
Onekele takoake wawa toamokoloka Keraisu
einagome tonekele pa takoa meko. Toto auapeateko wene wia wamele
toamokolo tokome ni toko.
14
Wini ali atoa olaukakepa nepala ina okouna wene takoa eya wa pubu oa tamene.
Pamo agale ikimoke agale to onali yoameamene. Edikaketepa nipa enika eni agale yatekoi ali
atoa auapeamekete toa potokoino, wamene-ye wa Akolaline leneke kake pubu amene.
15
Akolaliyo ne kei pimotoa toa enoa kawa one wene moa epetanele toma pamene. Nipa
onekele takoane potokakene tadeku wa one leneke ya tokale kakayano, one niminimo pine
to a oa mekala tamene.
16
Emo kumo pamo iki yene titi toa wamene. Edikaki yename etepea
poanele toma poi tokolo ni uku.
17
Nika kedime noa natipu takama pou toa kini eni okoi
agale ta piko peya moa makatapeoo. Eya agota Aimeniasi Pailitasitameka nitoa kaki.
18
Nipa
niminimo ete pimotoa wawa eya wa iki. Akolaliyo tuane ali atoa moa kamotokoa peya
takaneya wa iki. Nimo ikili yatekete pade-kitame ekete Yesuke edeya weike wene tugoa
meko patuno, tokamotato wa wene bebo akatapeneya meki.
19
Nitikiyake Akolaliyo yapu
wiatekota kue petene-kiti moa tatilogou toa one yatene poapeneya memotoa tokome yopia
meko. Nilekepa eya wa wia mekaneya piko. Ali Muno agome one yatene ali atoa i i wa
wene taneya meko. Ni Ali Muno agono ibini wedekoa iki peyame kini poanele tewitikoa
wamediki wa wia mekaneya piko.
20
Kamo agono yapu piko okolo eyapa golo silepa enika eniyame-kama latianeya
mena. Nitameneya padekapa mete yomo eyame latianeya pia ni padekapa kamo itonome
latianeya pia toko. Ni padekapa etene epetaneya-kiti pia ni padekapa pa paya wane-kiti pia
tokolo uku.
21
Panagome-kiti ele kule poanele tewitikoa wawa wene kiyo akeneya
mekomepa nipa okolo epetane mati tetepo taneya meko. Nitoa padele padele epetanele
toateko toa nodokaneya pikolo pinagome enekomepa iyame padele toatekuyano, moada wa
moademe toko.
22
Nitademe tokono, tuali yatene kini paya wene witako toa mekamotokete
pitakete litia toameamene. Nitameneya wene kiyo akeneya mea ni Akolalike wedoa wene
tugoa mea ni yete pade ali atoake wene mekoa mea ni tepe kolotini kilikoa pimotoa mea
tamene. Nipa epene wene pianeya mekete Ali Muno auapea ta wa one kayo oa kowitoai tiki
yene-pala lipua mea nitamene.
23
Emo kumo pamo ete oto wa topo takoa iki-kiti titi toma
yamene. Wipitikete neno oa pili pili toino wene teke tokono, titi toma yamene.
24
Ali Muno
agonole takama yako agome dikoa meamedeko. Neno wamokome ali atoa peya mama moa
auapeamedeko. Nitoa mane mane oa olaukakilepa potile-kama toa tamedeko.
25
Nitoapa one
agale oa ketekaki yene mane oa motikilepa potimo-kama oa tamedeko. Nipa Akolaliyopa
kini namolo wene wia wakete one niminimo yakoa momotoa toko patu wa mane oa
moamedeko.
26
Ni Setanuyo one wene pikole litia tomotoa moa labakaneya mekita mekete
poane wene wia wawa petoa piki patu wa Ali Munagonole takama yakagome dikane yene
poti mane oa mokala tamedeko.
2 Timosi 2 Timosi
<<
22
>>
2 Timosi 2 Timosi
<<
33
>>
3
Wipitia Ta Pene Patameneyake
Tepe Witanele-kama Witatekamo
1
Eya waka wene taneya meamene. Wipitia ta patateka tigotoka-peteke tepe witanele-
kala too.
2
Nipetepa ali atoame eya toma yawei. Eya kuya oboane moadiya wa kinikiya
kamu toa mea ni ete yene paya tetepo takoa mate agale-kala oa ni tea agale oa ni kini etene
ninetame okoi agale tagoa toamoa ni panagonoke padeya motikilepa ke wa wameneya moa
ni Akolalinele takamoa toi.
3
Ni ete ali atoake wene mekamoa ela moamoa ni akoa agale oa
ni uutukoa poti yawamoa ni lene pianele toa ni ele kule epetanele kote tokale wawa
4
ni
pade-kiti-pala poanele toadeteke lede oya patu pia ni kabe teleme wia pia tuku pekete toa ni
ako ago meku wa ete yene paya tetepo takoa ni ko la utukole-kama tato wa Akolalike wene
piitikameneya mea toi.
5
Nitima yaki-kitame Akolalinele takama yakene tetepo takoake one
tele patu kautamadete wawa pa lede takoa mekino, dikane yene titi toma yamene.
6
Dikane
ali padeka-kiti eko ali-kitane yapu pote mekete kini iki agaleme paya wene pianeya meki
atoapa moa labakakala tiki. Dikane atoa kini poaneleme kini wene moa kautakolo mekete
kini wene witako toa litiku pekete toa poanele etepea toma yaki.
7
Nitoapa pademo pademo
yakadiya wa yatekala teketeke Akolaline niminimo pine piko toa wene toamiki.
8
Eya
agotame Yanisi Yabisitame papete Mosesene agale kote moa one-pala neno oa tane toapa
dikane atoa moa labakaki ali-kitame Akolaline nimini agale kote tokale tagoa toamiki.
Nitoapa wene moa koiganeya mea Yesunole kapene wakoa takakili tokome Akolaliyo kote
moa wako.
9
Eni yename nitima yaketeke edikoa toa togamele toamoko. Ni edoa-mo.
Naniko kini tokoile keleyo witakale enekete peyame e e inapa Yanisi Yabisitame papete tane
toa pale tekete tadiki wa kini okoimo yakamoi.
Poloyo Timosi Wipitikome Mane Mane Akenemo
10
No Poloyo edikoane meamokou. Anu toma yakounakale ne wene taneya meko.
Nipa pademo pademo olaukoane ni padele padele toatekou wene toopikouna toane
taatekoane toane ni Keraisuke wene tugoane meane ni poti ko akene wene pianeya meane ni
ali atoake wene mekoane meane ni ke enekaka-peteka Keraisunole pa takoane togoane
11
ni
ete-kitame nopala poi teigoli meane ni tete moane meane tokouna ne wene taneya meko.
Eya ta-mene Adioke Aikoniameta Lisera toa eni ta ludu yawane pitikene tete motokouna
mati ne wene toko. Nitiku pekene tokouka Ali Muno agome no toa mokala toka.
12
Keraisu
Yesu-pala lipua meketepa Akolalinele takama pou wa wene pia tiki peyame eni tete-kala
moma yawei.
13
Ni poanele toa kapene wakoa olaukaki-kitame poanele tubele ate toma
yawei. Nitoa mea eko ali atoa oa yotokakoli Setanuyo kiwika oa yotokoo.
14
Totome olaukakoona einapa nimini akediki wa neme wedoa litia teke toko. Ne
olaukakoona ali atoa toto i i wa neme wene tokono, einaka einamo neme yakoa motokana
pa litia toomoa pamene.
15
Ne dee mati deyake laigoa Akolaline bokuke kiyo akene agale
yakoa moma noka. One eni agaleme neka ete ali atoaka wene muno mekamele toko. Nipa
Keraisu Yesuke wene tugakilipa Akolaliyo kiwi toa moateko ka i wa wene takamele toko.
16
Akolaline bokuke wia mekane agalepa Akolaliyo-kama wene takane toa wia mekane
agaleno, toto auapeatekomo eni. One agaleme toto eni auapekilepa pademo wene
toamokokolopa i i wa wene takoa ni padele poanele tokolopa mena mena wa mane oa moa
ni wene kiyo akeneya mekete toatekole i i wa yamea toko.
17
Nipa Akolalike lukoa mekete
onekele takateko toa ele kule epetanele-kama wene toa tomotoa tokome ni toko.
2 Timosi 2 Timosi
<<
33
>>
2 Timosi 2 Timosi
<<
44
>>
4
1
Keraisu einagome padeya padeya peya yopia-kala kawademe oto wakapea noo
tokolo tekene eya tamene wane uku. Nipa eya agotame ali atoa peya tua pokoi-kitika
tuameneya pa mekoi-kitika takoa enatekago Keraisu Yesu-pala etene Akolalitame yakakoane
eya tamene wane uku.
2
Yesunomo mo wima pamene. Nipa ali atoame yakoa moamoi
tadekaleka yakoa moi tadekaleka oada wa to awea okala tamene. Akolaline agale pine piko
toa litia toameadekolipa mane oa moa ni poanele tadekolipa kikoa akoa ni wene keda taneya
meadekolipa wene weye akoa tamene. Nitoa mama moa olaukakilepa poti ko akene wene
pia nitamene.
3
Ali atoame eya toatiki tigotoma nokolo tekene ni uku. Akolaline nimini agale
yakamadete wawei. Nipa kini wene motekete emo kumo taba po pitikakete okoi ali-kiti
yakato wa edikakoi ali-kiti moa koukoa yakakala toi.
4
Nipa niminimo pa pimotoa tewitikoa
wakete la agale eyake wene piitikaneya mea yakakala toi.
5
Neme pade edikameamene.
Padele padele tikilepa wedetekoa tokala tamene. Ke enekale meka-peteka ko wameneya poti
meamene. Nitoa Keraisunomo oa aua yawa ni Akolalinele takake toateko toa-kama toa
togamene-ye.
6
Akolalike sipi sipi kai eya meane lodo you toane anu kamate ponane tetepo taneya
mekene uku. Nipa no tuane poateku tigotoko wane ekene uku.
7
Akolalinele takakilepa poyo
alime-kiti poi tewitikoa poamou toane tokou. Ni ali-kiti teyapea moa patukanali you toane
tekene pegene kakamoane poatekouta pitimoane teyapeane pone tugapokou. Nipa
Akolaliyo tamene wa yametekanakale toane togakou.
8
Nitikouya tokolo ali atoa kiyoke-
kama takoa enekago Ali Munoyo no wene kiyo akene ago tetepo takoa mekome eya toko.
Wipitia ta pataka-pete no Polo kei pikene sili meou wa wene toopia mekome anu sili pikoa
metekako. One wakapea noka-pete one eni pikoa metekakoya ina wa no meoo. Nipa one
wakapea nokale enadiya wa nepia mekoi peya ke wa kei pia sili mekala too.
Poloyo Pade Ali-kitike Akenemo
9
No i mekuta oto wete noke enamene wane ne kowitoane uku-ye.
10
Eya ago Dimasiyo
itonole tobou kakoa mekome tokome no tewitikoa wawa Tesalonaika take pome mepoka
tokolo ni uku. Eya ago Keresene Galesia take pome mepoka. Ni Taitasi einago Dalemesia
take pome mepoka.
11
Luke odene no-pala opia meko. Make einago enemopoke oto no
mekuta aua namene. Akolalinele takamotoa no auapeamele tokono, enemotokapamene.
12
Eya ago Tikikasi Epesase take poano pa wane moane wetekakou-ye.
13
Timosi ne nekepa
anu tokoo kawatekou mamina petene moa aua notokamene. Teroase take eya ago Kapasi
neme pikoa metekamene wane meane pokouna maminake uku. Anu boku-kitika aua
notokamene. Meme kai kepeneme latiane boku-menepa wene kayapekileka toamoa oto aua
notokamene-ye.
14
Kapa wene toa latia toko ago Alekesadayo nopala poanele tubele mati toka. One eni
poanele tokake Ali Muno agome kibu motokademe toko.
15
Einagome nepalaka poanele
takayano, lene kia wedoa meamene-ye. Einagomepa tone oa aua yako agale kotimi luaneya
meka matiyame teiga teiga toka tokolo ni uku.
16
Anu koiso Lome take pegetoa akakoi-pete pinali anu wa kei piane kakolu odene
agoka no lono nikile toamoka. Peyame no tewitikoa wakoi. Kini eni tokoike po letu
mekameamene wane Ali Muno ago kowitikoane uku.
17
Peyame no tewitoa wakoiyake Ali
Muno ago no lono nome kakome mape moa tele lukoa toka. Nipa onekemopa mone yatene
ali atoa peyame yakamotono, to awea akoa togamene wa toka. Nitoapa layone kai kimeme
tanianeya to a mou toa no toa motoka.
18
Nitikano, ele kule poanele witakaleka Ali
Munagome edikoa no wa toa mokala too. Nitoa nopala padele toamomotoa tokome yopia
mea wipitikomepa a tibuke one talo toko take moa kakoono, one kei pia kama patoane uku.
E e nimini.
19
Eya adona Perisila Akuwilata enekepa wete meamene wa akamene-ye. Ni eya ago
Onesiporasine mati atoa-pala wete meamene wa akamene-ye.
20
Eya ago Erasetasi Korine
take pa mekome toko. Ni eya ago Teropimasi ne yeneme tukono, Mailitase take wida mea
latoa kamene wane tewitikoane pokou.
21
Niti tane tokene-mene wete witameneyake no
mekuta oto wete noke enamene-ye.
Eya yename Yubulasi ni Peyudenesi ni Lainasi ni Kelodia ni neke ete oyali-kiti
peyameka Timosi ne wete meamene wa okala tiki.
22
Ali Munago neke yomini-pala opia memotoane neke kowitikoane uku-ye.
Nepala wida meki-kiti kiwi peya pewe wia yopimotoaneka kowitikoane uku-ye.
Opa anu agale eni.
2 Timosi 2 Timosi
<<
44
>>
3 Yone
00
11
3 Yone 3 Yone
<<
00
>>
^
3 Yone
Yoneyo Gaiasi Kei Pikome Akenemo
Yoneyo Wipitikome Lionate Akenemo
3 Yone 3 Yone
<<
00
>>
3 Yone 3 Yone
<<
11
>>
3 YONE
Yoneyo Tebolo Takoa Wia Mekane Pipia
1
1
Yone nopa Keraisuno ali atoa yopiku agome uku.
I pipia i i wane wiane mekakenepa anu kolotini ago Gaiasi nepala uku-ye.
2
Anu
kolotini ago nepa wene epetaneya-kama mekono wene tuku. Nitikuno, ne tigini kakale
wedoa memotoane tekene neke kowitikaku-ye.
3
Tone oya ali pade-kiti wida kawa nekete
eya wa okoi. Ne einago Gaiasiyo Akolaline nimini peku noa tokome toko. Akolaline
niminimo namolo yakoa tokana toa pa tokome toko wa onokoli yatekene wediane kakou.
4
Anu mati-kitame Akolaline nimini peku noa tiki ko yatekene-kama ke wane wediane
tagatapeku.
Yoneyo Gaiasi Kei Pikome Akenemo
5
Keraisuno ali-kiti mone padeka ta lono kawa niki yeneka ke wa neme makutukoa moa
auapekala teke toko. Widikakilepa neke toateko toa wedoa teke toko.
6
Eni ali-kiti oto
neketepa kiwike wene mekoa meke toka ko i i wa i losu yapuke oboai tiki yene-pala to awea
okoi. Eni ali-kiti ne mekota wida wakapea note meemotekete padeka poadete kakolipa nipa
poatino poe wa auapeamene. Akolaline wene moano, nitamene.
7
Eni ali-kitame
Keraisunomo oma pato wa kini ta tewitikaketepa Keraisuke wene tugamene yenaneke
padeya deyaka oia moameneya pa pekeneyano, auapeamene.
8
Dikane ali-kiti tone yapu
noatino noe wa makutukoa moamedeko. Akolaline niminimo oa aua pomotono, eni yene-
pala kibutua auapeatoane uku-ye.
9
Wini losu yapuke oboai tiki yeneke pipia pade wiane wetekakouyake eya ago
Daioterepisiyo anu wiane mekakene okoumo yakamademe wakome toko. Onepa ako odene
mekene kiwi yopiou wa wene pikome toko.
10
No wida nekenepa winagome nooke
poanemo-kama i i wa kapene wakoa akedekomo to aweane ootapeou. Einagome one eni
tokana poanele moa patukakome eyaka tokome toko. Tone oya ali-kitika makutukoa
moamademe wakome toko. Ni wini ali atoa padekame kini yapu noe wa tone oya-lawe
makutukoa moadete tikilipa einagome one losu yapuke wa noamoatino poe wa litikala
tokome toko.
11
Anu kolotini yene dikanele ele kule tiki poanele kotukoa toamoano, epetanele tiki
yename tikile kotukoa tamene. Epetanele toma yaki yenepa Akolaline mana kono-mikiti eni.
Poanele toma yaki yename Akolali enekileka toameneya.
12
Eya ago Demiteriasi one ko
peyame ikilepa epenemo-kama iki. Nipa Akolaline nimini totono litia tokole enekete one kei
pikala tiki. Totomeka one kei piko. Enipa totome nimini akediki wa kime wene tekete tiki.
Yoneyo Wipitikome Lionate Akenemo
13
Nepala pademo pademotaka oadiyano wene pikounake i pipiake wiane mekamuku.
14
Ne kakakoane ou. Nipa neke lene timini enoukene wida wete nou.
15
Akolaliyo ne tepe kolotini kilikoa pikamotoane neke kowitikaku-ye. Neke oya-lawe i
take meki-kitame ne meamene wa iki-ye. Tone wini oya-lawe odene odene wa ibini oa yono
motokakala tamene.
Opa anu agale eni.
3 Yone 3 Yone
<<
11
>>
Aposelo
00
11
22
33
44
55
66
77
88
99
10 10
11 11
12 12
13 13
14 14
15 15
16 16
17 17
18 18
19 19
20 20
21 21
22 22
23 23
24 24
25 25
26 26
27 27
28 28
Aposelo Aposelo
<<
00
>>
^
Aposelo
Yesu ATibuke Moa Aua Pekenemo
Yudase Luku Mataiasi Takoa Kakanemo
Epetane Yomini Ali Atoake Awinameno
Pitayo Mo Wia Kakome Akenemo
Yesuno Peku Nakene-kiti Mekete Tanemo
Kawata Lepo Taneya Meane Ago Epetekanemo
Pita Tobou Losu Yapu Kakome Akenemo
Pita Yoneta Kanosolo Ali-kitane Leneke
Kakete Akenemo
Yesunomo Yakoa Motane Ali Atoame
Akolali Kowitikete Akenemo
Yesuno Ali Atoame Kinikiya Moke Tanemo
Ananaiasi Sapairatame Toa Potokanemo
Aposelo Ali-kitame Toma Yakenemo
Aposelo Ali-kitame Tete Motanemo
Kanosolo Ago Gamalieleyo Akenemo
Ali Tatono Kakoa (7) Takoa Moa Kakanemo
Sitipene Dekoa Motanemo
Sitipeneyo Kanosolo Ali-kiti-pala
Akenemo
Sitipene Kueme Ka ua Wia Tukanemo
Soloyo Yesuno Ali Atoa Tete Metanemo
Yesunomo Sameria Take Oa Pupitikanemo
Pilipiyo Isiopia Take Tobou Ago
Yesunomo Pine To awea Oa Metanemo
Solo Yesuke Wene Tuganemo
Damasikase Take Soloyo Yesunomo
Mo Wia Kakome Akenemo
Solo Yerusaleme Take Pokome Tanemo
Pita Lida Dopa Tatake Pokome Tanemo
Pita Koniliasi Mekata Pokome Tanemo
Pitayo Koniliasi Yatene-pala Oa Metanemo
Pa Yatene Ali Atoake
Epetane Yomini Awinanemo
Pita Yerusaleme Ta Wakapea Pokome One
Toma Yakanakamo To awea Akenemo
Adioke Yene Yesuke Wene Tuganemo
Pita Po Yapu Pitaneya Toa Motanemo
Erode Tukome Tuanemo
Banabasi Solotame Yesunole Takama
Yamotoa Takoa Moa Wetekanemo
Saiperase Take Tanemo
Pisidia Ta Keneke Piko Adioke Take Tanemo
Polo Banabasitame Yesunomo
Pa Yatene Ali Atoa-pala Oa Metanemo
Aikoniame Take Tanemo
Lisira Debi Tatake Tanemo
Solo Banabasita Siria Ta Keneke Piko
Adioke Take Wakapea Pekenemo
Aposelo Ali-Kiti Yerusaleme Take
Koukoa Mekete Akenemo
Pa Yatene-kitike Pipia Wia Wetekanemo
Polo Banabasita Pilitakutukakete Tanemo
Polo Sailasita-pala Timosi Opia Pekenemo
Polo Teroase Take Mekome Pulete Enanemo
Pilipai Take Eya Atoa Lidia
Yesuke Tepe Kolotini Pekoa Pianemo
Polo Sailasita Po Yapu Pitanemo
Polo Sailasitame Tesalonaika Take Tanemo
Polo Sailasita Beria Take Mekete Tanemo
Poloyo Atena Take Mekome Tanemo
Polo Korine Take Ponome Mekome Tanemo
Polo Adioke Take Wakapea Pekenemo
Apolosi Epesase Korine Tatake Tanemo
Polo Epesase Take Ponome Mekome Tanemo
Sipane Mana-mikitame Tanemo
Epesase Take Ali Atoa Oa Kamotokanemo
Polo Masedonia Geriki Tata Ludu Yakenemo
Polo Teroase Take Pome Mepokome Tanemo
Poloyo Teroase Ta Tewitikoa
Mailitase Take Pome Mekome Tanemo
Poloyo One Epesase Oya-mikiti Kiwi
Wa Enamou Wa Lionate Oomotokome Pekenemo
Polo Yerusaleme Take Pekenemo
Polo Yame Mekata Ugu Pekenemo
Polo Tobou Losu Yapuke Dekoa Motanemo
Polo Pinali One Wa Kei Pikome Akenemo
Poloyo Yerusaleme Yu Yene-pala Akenemo
Onepa Lomane Yatene Ago
Wa Polo Pinali One Wa Kei Pianemo
Polo Kanosolo Yenane Lene Yoto Kakenemo
Polo Wia Tukatekoi Oi Pedoa Pianemo
Polo Sisaria Take Moa Wetekanemo
Yu Yename Polo Koiso Akakete Akenemo
Poloyopa Ako Tobou Ago Sisayo One Koiso
Yatekamotoa Akenemo
Polo Tobou Ago Ageripane Leneke
Kakome Akenemo
Ageripane Leneke Kakome Polo Pinali
One Wa Kei Pikome Akenemo
Polo One Tepe Kolotini Yesuke Pekoa
Pianeleke Akenemo
Polo Lome Take Ue Dipike Mea Pekenemo
Pupulege Tadalita U u Wa Noka Matiyame
Ue Dipi Kusa Ue Matanuke Wia Mataloganemo
Molita Take Mekete Tanemo
Molita Ta Tewitikoa Lome Take Pekenemo
Polo Lome Take Mekome Tanemo
Aposelo Aposelo
<<
00
>>
Aposelo Aposelo
<<
11
>>
APOSELO
Aposelo Ali-kitame
Yesunole Takama Yakete Tanemo
1
1
Anu oyali Tiopilasi, Yesuyo titikome tane-pala wipitikome taneta ni titikome
olaukane-pala wipitikome olaukaneta i i wane neke namolo bokuke kabe koukoane wiane
mekakakou.
2
Nipa Akolaliyo a tibu pene ate moa aua poameneyake Epetane Yomini patu
kautakoa kakomepa one takoa motane Aposelo ali-kiti tamene wa oa tanemoka wiane
mekatapekou.
3
Yesuyo tete-kala mootokoa tukale moa kamotokatekaneyake one tuake
kamotadeko wa one Aposelo ali-kitame wene tomotoa tokome ele kule toa pono
yametekala taneya. Nipa ta pataka padeka noi kakoa (40) ponoka toapa Akolaliyo ali atoa
pawe toa talo toko ko-pala oa mekala taneya.
4-5
Wa padepete one oya-lawe-pala opia
mekome nee noa mekome okome Yerusaleme ta tewitikoa poameamene. Agetaiyo kiwi
auapeou wa okanakale taatekoa tomotoa eida nepia meamene. Yoneyopa ali atoa pa ue
motokama yakoyake Agetaiyopa one Epetane Yomini kiwike awinomotoa moa wetekoo.
Kiwike noo wane oane pikolu yatekoina ago awinoateko tigotokono, Yerusaleme tewitikoa
poameneya eida nepia meamene wa akeneya.
Yesu A Tibuke Moa Aua Pekenemo
6
Wa naniko odeneya koukoa mekete one yatekete ekete Ali Muno tone takepa mone
yene yopinaneyano, i taapa pine yene tone yopiatono, mone yene neme litia wetekoa eni
luku Yu yene totome yopimono wene piko-pe wa yatekoli okome
7
padele padele witateko
oipa Agetaiyo one wene litia oi pedoa pikala toko. One eni pedoa piko toa kime oyake
wene toamiki.
8
Eni wene toamikiyake Epetane Yomini kiwike awinome meoo. Nitikalepa
one tele patu kautakoa kakete eya toma yawei. Anume toma yakoule kime enekoinapa ta
piko peyake oa pupitikama yawei. Nipa Yerusaleme Yudea Sameria yeka yukuka takeka
nitoi wa Yesuyo akeneya.
9
Nimo okalepa o yename enekakoa Yesu a tibuke moa aua
pekeneya. Nipa enekoa kakoli wedome agopa takaneya.
10
Nitaneyake a tibuke nepikoa pikoli ali takuta ake tane mamina kakeneya kiwi kakoiya
liti kotikatapea note kananeya.
11
Nitikete ekete kiwi Galili yene a tibu dekolo pa nepikoa
piki-pe. Ina Yesupa ate tibu moa aua pokanakago tibuke pokana toa dikoa wakapea nokale
enoi wa edelo agotame akeneya.
Yudase Luku Mataiasi Takoa Kakanemo
12
Nitaneyake Yesuno oya-lawe Olipe-pini tono keti toa Yerusaleme take wakapea
pekeneya. Olipe-pini tono Yerusaleme tata pake odene (1) kilomita pianeya.
13
Yesuno oya-
mikiti Yerusaleme take eni peketepa ako yapu kini oboai tane yapu pote mepaneya. Eidapa
eya ali-kiti oboa meaneya. Pita Yoneta mea ni Yame Aderuta mea ni Pilipi Tomasita mea ni
Batolomiu Matiuta mea ni Alepiasine mana Yame mea ni Saimone one pade ibini Selote wa
ibini akene ago mea ni Yamene mana Yudase mea taneya.
14
Eni ali peya lugutukoa odeneya
oboa mekete Akolali kowitikala taneya. Nipa Yesuno nine Maria ni pade atoa-kiti ni Yesuno
wamene-mikiti eni yene-pala koukoa mekete kowitikala taneya.
15
Einapetepa eni yene ege takupeta kadukoa wa lene kolo kakoa (120) ali atoa koukoa
mekoita kini lene makono Pita kamokoa kakome okome
16
anukameyo kipala ukumo
yakamene. Papete Epetane Yominiyo wene takakale Depidiyopa Yudaseyo toatekamo
Akolaline bokuke wia mekapianeya. Yesu wimotoa moa metekanakagoke uku. Einago
Yudaseke papete wia mekapiane toa taatekamedekale taatekoa toka.
17
Yudase einagopa
Yesuyo onekele takamotoa takoa motokale toto-pala opia yakona wa Pitayo akeneya.
18
(Yudasepa one toka poaneleke kue mootokoapa itono pade topo toa motaneya.
Nitoapa aka mati kawa pitakale tepe kolotini to okolokaneya.
19
Eni tanemo Yerusaleme take
mekoi peyame yakatapeneya tokome eni itonopa Akeledama wa ibini akeneya. Akeledama
wapa lokeyo itono wa ekete akeneya.)
20
Enilekepa Pitayo okome okome lo akene bokuke eya wa wia mekaneya piko.
Einagono itonopa tumu tokaneya pimotono, odenagoka eida meamomotono toe wa wia
mekapianeya.
Eya waka wia mekapianeya.
Einago pupu luku panagome tomotato wa wia mekapianeya.
21
Eni wia mekapiane toa taatekoa taneyano, einago luku eya ago moa kakato. Ali
Muno Yesu toto-pala opia yaka toa-kama kagekama yakanakago pade takoa moa kakato.
22
Nipa Yoneyo ali atoa ue motokama yakale laigoa toto-pala opia yawa ni Akolaliyo Yesu
tibuke ate aua pokaleka pa kagekama yawa tokanakago pade Yudase luku moa kakatoane
uku. Yesu tukale Akolaliyo moa kamotokakale enekoonakamopa dikane ago pade toto-pala
yakome oma pomotoane tekene ni uku wa Pitayo akeneya.
23
Nitikale nitato toe wa ootokoa ali takutane ibini takoa akeneya. Panagopa Yosepe,
Basabasi waka ibini akeneya. One pade ibinipa Yasasi. Padena agopa Mataiasi.
24
Einagotane ibini takoa oa Akolali kowitikete ekete Ali Muno ali peyane tepene wene
pikolepa neme lekoa enamele tokono, neme takoa motokagopa i wa totome wene tomotono
ta.
25
Yudase one poatekata poademepa Aposelo ago mea Yesunole takoake wakanano,
one luku panagome Yesunole takakome memotoono, neme mainago takoa motoko-pe wa
kowitoa kakeneya.
26
Nitoapa einagono ibini moadete gutu lua kea mea Mataiasine ibini i
tadeko wa enoa einago moa kakaneya. Nipa ali tuku melepu kakoa (11) ali-kitipa Aposelo
ali-kiti wa akene toa einagoka Aposelo ali wa akeneya.
Aposelo Aposelo
<<
11
>>
Aposelo Aposelo
<<
22
>>
2
Epetane Yomini Ali Atoake Awinameno
1
Pedikose wa ibini akene ta patakalepa Yesuno oya-mikiti peya odeneka oboa
meaneya.
2
Nitikoika a tibuke pupulege mati u u oa kawa nekene tetepo tootapekome eni
yene odeneya koukoa mekoi yapu lobutua tagatapeneya.
3
Nitikale eni yene ete oto enete
tokoli toe itipono keneya kini kini tobouke tete tete toa pitakolokakale enaneya.
4
Epetane
Yomini kiwike awia tagatapekome wene taka taka tokale ta padeka padeka yakoa akene
agale-kitike pademo pademo oa kakala taneya.
5
Einata einapete ta piko peyake mea Akolalinele wedoa takama yakene Yu yene
Yerusaleme take toge kikoa mekoika note oboa meaneya.
6
Eni u u okamo yatekete eni Yu
yene eida eni u u okata obomoa pote kapaneya. Pote kakete yatekoli Yesuno oya-mikitame e
yene kini kini take mekete yakoa akene agale-kitike Akolalinemo oa kakoli yatekete wene
kainya pianeya kakeneya.
7
Nitoa ka oa kakete ekete i yene peyapa pa Galili yenameke ikino,
8
tone tone ta-kitike mekete yakoa oko agale-kitikepa okala tikili totome yateko. Edoa wene
toa iki patu.
9
Totopa eya ta-kitike kawa nokoya wa kini kini ta ibini takoa okala taneya.
Pasia ni Midia ni Ilame ni Mesopotemia ni Yudea ni Kapadosia ni Podase ni Esia
10-11
ni
Perisia ni Pabilia ni Idipi ni Sairini ta liti piko Libia ni Lome enika eni ta kawa nokoo. Toto
padeka-kiti etene Yu yene mea ni padeka-kiti namolo pa yateneke Yu yene-pala lipua mea
tokoo. Ni toto padeka-kiti Keriti Arebia tata kawa noko. Totopa ta piko peyake tutu tutu wa
kawa noko. Opi tone yakoa oko agale-kitike i yename Akolaliyo tubele toma pokomo i i wa
mo wia kakili totome yateko.
12
Nitoa wene kainya pianeya kakete kini kini yakaate tekete
ekete opi-la, edele toatekolo iki-pe wa ka oa kakeneya.
13
Nitikolipa padeka-kitame tea agale
kikoa ekete beita ipa gerepi po ku ue noa pia tekete leau oa kakete iki wa akeneya.
Pitayo Mo Wia Kakome Akenemo
14
E yename enimo okoli Pita one tuku melepu kakoa (11) oya-mikiti-pala kamokoa
kakome telo okome okome no yatene Yu ali-kiti ni i Yerusaleme take pitiki peya kime
yatekimopa pine to aweane ukuno, wedoa yakoe.
15
Totome gerepi po ku ue nokoa pia
tekete leau oa kaki wa kime ikino, opi lou pini 9 kilokokepa totome gerepi po ku ue sisoake
edoa moa nokoa pimotoa-pe.
16
Totome pade nitamokoo. Ipa eya ago Yoeleyo papete oa
piane toa taatekoa toko. Eya wa oa pianeya.
17
No Akolaliyopa wipitia ta patateka tigotokale toatekoumo ukuno yakoe. Ali atoa
peyake anu Epetane Yomini moane wetekakolu kini tepene lobutua
tagatapeoo. Nitikalepa kini mana kono-mikitamepa anu agale to awea akoi.
Kini tuali-kitamepa pulete keneya padele padele yametekoule enoi. Kini ada
yatename pule pitikoita pule enekala toi.
18
Enipete-menepa anu Epetane
Yomini anu pupu yeneke moane wetekakolu ali-kitikeka atoa-kitikeka awia
tagatapekale anu agale oa pupitikakama poi.
19
A tibukepa ele kule tubele
witakoane itonokepa padele padele telekole witakoane tekene anu tele pine
yametekala tou. Nitikolupa kamate yokoa kawa toe nokoa kawa lodome eya
kuya peya agopa takoa too.
20
Ni lou moa yomiyomu takatapeoo. Tokeneka
kamate pagene tetepo taneya kawoo. Nipa Ali Muno pa teleta tootapeneya
noateka tigotokale enika enile too.
21
Nitikalepa Ali Muno wa-ye wa kowitikoi
peya Akolaliyo toa moo wa Yoeleyo wia mekaneya.
22
Pitayo nimo ootokoa okome Iserele yene kipala i ukumo yakoe. Kiwi pakeke ele
kule telekole toma yakanakago Nasarese Yesuke uku. Einagome Akolaline peku noa tadeko
wa kime wene tomotoa tokome Akolali patu kautakoa kakome enika enile toma yakana.
23
Akolaliyo papete wene toopiane toa taatekoa tekete Iserele yene kime one-pala eya
tokoina. Poane peku nakene yename yomo lekaneyake wia dekakamotoa moa metekoina.
24
Nitikoinake Akolaliyo moa kamotokaka. Nipa wakome labakaneya kawou toa Yesu tuane
ali atoa tete mokoa kaki take pome mepaneyake Akolaliyo toa motoka. Eida labaneya
kamele toamokale tokome toka.
25
Enilekepa Depidiyo Akolaline bokuke papete eya wa wia
mekapianeya.
Ali Muno Akolalipa anu lene timini takakoane pikou lono-kama kakale enekou. Anu
nimini yono lono kakome no yopikolo tokome padelemeka no toa potokamele
toamoko.
26
Nitikono, kolotini nakolo wediane meane ke wane uku. Nipa tukile
toatekuyake Akolaliyo toatekole nepiane meane wediane mekene uku.
27
Tuane
ali atoa pote meki take anu yomini mea kamotoa neme wawamoo tokolo tekene
ni uku. Nipa nekele-kama takamotoa takoa motokago noanu tigini lomumotoa
wawamoo.
28
Pa meane kama poateku kaapa i wa neme no wete yamepikana.
Nopala odenekata opia yakilepa nipa wediane meane tagamotoa teke too wa
Depidiyo papete wia mekapianeya.
29
Pitayo nimo ootokoa okome anukameyo tone kaua Depidi-loeke eya wane ukuno,
yakoe. Einago tua pokale oloyo taneya. One oloyo tane lukupa tone take pa pia kakeneya.
30
Einagomepa Akolaliyo toatekamo papete to awea wia mekapikala taneya. Nitane ago-pala
Akolaliyo eya wa akeneya. Neeke ta wateka ago pade ne luku ako odene mekome ali atoa
pawe toa talo toa kawoo wa oa togotaneya. Akolaliyo nitoo wa Depidiyo wene tokome eya
taneya.
31
Akolaliyo toatekale papete enepikomepa Keraisu moa kamotokatekamoke eya wa
wia mekapianeya. Einagopa tua pekene ali atoa pitikoika mea kamotoa Akolaliyo
wawamoka. One tigini lomumotoa wawamokome moa kamotokaka wa Depidiyo wia
mekapianeya. Nipa enile wete tane tetepo takoa wia mekapianeya.
32
Eni wia mekapiane toa
Akolaliyo taatekakomepa ina Yesu wete moa kamotokaka. Enipa toto peyame leneme
enekoomo uku.
33
Einagopa Akolaline nimini yono lono ate moa kakaneya kakome opi eya
toka. Oneketaiyo one Epetane Yomini ne meou wa papete oa togotopikana toa taatekoa
metekale moapa one Epetane Yomini toto mea tagatapeka. Nitikale tone tepene lobutua
tagatapekolo tokome totome imo oa ika ile tokolo kime yakoa enoa tiki.
34-35
Depidi-loe a
tibuke wete poameneyake eya wa akeneya.
Ali Muno Akolaliyo anu Ali Muno-pala eya wa oka. Nepala poi te ia meki yenepa moane
kawikoane neke kawane komo pikouno, anu nimini yono lono nooke
menamene wa oka wa Depidiyo wia mekapianeya.
36
Iserele yene kiwi peya-pala eya wane ukuno, yakoa moe wane uku. Ina Yesu kime
lekane yomoke wia dekakoinapa Akolaliyo moa Ali Muno wa oa Keraisu wa oa kakaka wa
Pitayo akeneya.
37
Pitayo nimo okale yatekete e Yu yene tepe tebemo tebemo toa kakeneya. Nitoapa
Pita-pala ete Aposelo ali-kiti-palaka ekete ame-loe poanele eni tekete tadeko. Tone toatekole
agopa tokono, edele tomotoa iki-pe wa okoli okome
38
kini poanele toma yakoinake
Akolaliyo po letu mekakanapa keetapea poanele wia mitikakamotono, kini poanele tewitikoa
Yesu Keraisu patu kautakoa kakete ue moamene. Nitikolipa Akolaliyo one Epetane Yomini
metekale kiwike awinoo.
39
Akolaliyo one Epetane Yomini meou wa papete oa
togotokomepa kiwika kini mana kono-mikitika ta tetemada pitikoi yeneka metekene meou
wa oa pianeya. Nipa tone Ali Muno Akolaliyo one takoa moa kayo oateko yene peya one
Epetane Yomini meademe oko wa Pitayo e Yu yene-pala akeneya.
40
Nitoapa e yene mama
motokome pademo pademo okome okome i take poane peku lawetane yenepa kini poanele
toma yakoike Akolaliyo kibu moono, eni poanele tokoi yene-pala odeneka dekoa kibu
motokaya tokolo pilia wawati wa Pitayo pubu oa kakeneya.
41
Enika enimo oa kakale ali
atoa kainya matiyame yakoa moa ue motaneya. Nipa eina ta pataka-pete ege egeta kadukoa
(3,000) ali atoa tadiya Yesuno yatene-pala lipuaneya.
Yesuno Peku Nakene-kiti Mekete Tanemo
42
Eni yenamepa Aposelo ali-kitame olaukane toa litima pekete odene wene piitikoa
koukoa mekala taneya. Nitoapa palawe wane popimoa moke toa noa Akolali kowitoa tokala
taneya.
43
Aposelo ali-kitame telekole toma yakoile enekete peyame ka oa kakete ekete
Yesuno tele patu kautakoa kakete tadiki wa okala taneya.
44
Yesunomo yakoa motokoi
peyapa odeneya koukoa mea kinikiya ete oto wa tatikamu taneya.
45
Nipa kini oya-lawe
padeya toamokale enekete kini itono eya topo toa kue moa moke toa mekala taneya.
46
Nitima pekete ta pataka abuna tobou losu yapuke obopokala taneya. Nitimotekete kini
yapu-kiti obopekete palawe wane popimoa moke toa nokala taneya. Nipa kolotini nakale
odene wene-kama pianeya mekete taneya.
47
Nitoa mea Akolali kei pia kakoli enekete ete
peyame ke ke wa kiwi pewe wiai taneya. Nitikakoa Ali Munoyo ta pataka abuna ali atoa toa
moma pokomepa one yatene-pala moa lipukoai taneya.
Aposelo Aposelo
<<
22
>>
Aposelo Aposelo
<<
33
>>
3
Kawata Lepo Taneya Meane Ago Epetekanemo
1
Wa pade-pete lou wegoukaka (lou pini 3 kilokoke) Pita Yoneta tobou losu yapu
pekeneya. Nipa Yu yene tobou losu yapu pote kowitoai tane-pete pekeneya.
2
Nitoata
pekete enekoli kawata lepo taneya opiane agopa one oya ali-mename tobou losu yapu kago
ludu mekadete leyo leyo toa aua ponokoli enaneya. Ta pataka abuna koniyo kago wa ibini
akene kagoke tuapea tobou losu yapu ponokoi yenaneke kue oia mokala tomotoa eida aua
pote mekoai taneya.
3
Eina mekoai taneta Pita Yoneta tobou losu yapu lobutadete tokoli
enekome einagome kue mano wa okale
4
Pita Yonetame einago nepikakete Pitayo okome
tota nepikamene wa okale
5
padeya mouno wene pikome nepikaneya.
6
Nitikale Pitayo
okome silepa kue golo kueka toamokoyake padeledo ne auapeane touno,
7
Nasarese Yesu
Keraisu patu kautakoane kakene ukuno, kamokoa pa wa ootokoa one nimini yono moa
katekamotokale eina eina one kawata one kawa lamenetaka tele tootapeka.
8
Nitikale tigoa
kamokoa kakome opi yamele toko wa yakeneya. Nitoa Pita Yoneta-pala tobou losu yapu
opia pome Akolali kei pia tigawineya pekeneya.
9-10
Nitima pokale enekete peyame ekete
ekee i agopa tobou losu yapu koniyo kagoke-kama mekome kue oia mekanakagono, ke ke
wa one-pala tokanakaleke ka oa kakeneya.
Pita Tobou Losu Yapu Kakome Akenemo
11
Pita Yonetame latekakoinakagomepa einagota yono mokoa kakaka ali atoa
wapokamoa pote unukamoa kakeneya. Nipa Solomono wa yomini kayo oa ibini akene lono
ka akeneya teyapea pote kakeneya.
12
Nitikoli enekome Pitayo e yene-pala okome Iserele
yene anu oya-lawe edekolo wene kainya pianeya kakete tota lene wikoa kaki-pe. Totame
Akolalinele wedoa takama yakete tekete i agopa tone teleme kamotokakoono wene pikete
tiki-pe. Tone teleme pade latekamele toamokoyake
13
Akolaliyo latekaneya. Nipa one patu-
kama kautakoa kako ago Yesupa ali atoame kei pimotoa tokome taneya. Tone kaua-mene
Eberame Yekobeta Aisake toa yopikoa kako Akolalike uku. Eni Yesupa Pailaseyo pitia
yakakamotoa kime aua pote mepokoina. Nitikoli pitia yakatekoa i ago po kotokoane
wetekou wa okake Yu yene kini Yesu tumotono wene pikete wakoina.
14
Nipa Akolaliyo
one wa takoa moa kakapikago Yesu wene kiyo akeneya-kama mekago eni wakoina. Nitoapa
ali-kiti wia tukakala tane ago Barabasi po kotokoa wetekaka-ye wa okoina.
15
Nitoapa ali
atoa poome mekoa wene takoa latikagopa kime wia tukakoli tua pokanake Akolaliyo moa
kamotokakale kamoa poka. Enipa Yone totame enekoomo uku.
16
Ina kawata lepo taneya
mekanakago kime i enoa wene tiki agopa Yesuno ibinike wene tuganeya tokome weye
akatapeneya. Nipa Yesuno ibini wedekoa one patu kautakoa kakete latekatapeneya kime eni
enekina.
17
Ame-loe Yesu einakago wia tukakoinapa kimeka kini tobou ali-kitameka wene
toamekete tokoinano wene tekene uku.
18
Einapa Akolaliyo wene takane toa one agale
to awea akane ali-kitamepa Keraisuyo tete moa tuatekamo papete wia mekapikala taneyano,
kime Yesu wia tukakilepa Akolaliyo papete wene toopiane toa taatekakete tadiki.
19
Nipa
kini toma yakoi poanele Akolaliyo moa kogamotono, kini namolo poane wene wia wawe.
20
Nitikolipa Ali Munoyo kiwi weye akoa pewe wia too. Nitoapa kiwi auapeou wa one takoa
moa kakapikanakago eina Yesu wa lokoa oto wetekoo.
21
Nitatekoyake papete Keraisu a
tibuke nepia meoo. Nipa Akolaliyo one agale papete to awea akane ali-kiti wene takakana toa
taatekakome one namolo latikanakeya peya weneya latimotoa Keraisu a tibuke nepia meoo.
22
Moseseyo einago Keraisuke papete eya wa oa pianeya. Kini Ali Muno Akolaliyo one
agale to aweane akamotoa no moa kakakana toa naniko kini wamene ago pade one
agale to awea akamotoa moa kakoo. Nitoono, einago taatekoa nokome toe wa okale-
kama tamene.
23
One nokome oka toa yakoa moamokagopa Akolaliyo one yatene pakeke
katekoa atukoo wa Moseseyo oa pianeya wa Pitayo e Yu yene pubu okome akeneya.
24
Nimo ootokoa kakome okome totome ipete taatekoa toatekoomopa eya ago
Samueleyoka to awea oa pianeya. One eina to awea oa piane toa Akolaline agale to awea
akane ali peya lokama nekete akeneya.
25
Kini papete to awea akapianele ni Akolaliyo kiwi
yatene auapeou wa kini kaua-mikiti-pala papete oa togotaneleka kime pikoa kakete opi
taatekakolo enoa yakoa tiki. Enipa Eberame neeke ta amoa pokoi ali atoake tekene e ku
yatene ta piko peyake ta ma pote mekoika talo toane pewe wiou wa Akolaliyo Eberame-
pala oa togotopiane toa taatekoa tokoleke uku.
26
Akolaliyo papete oa togotopikana toa
taatekakomepa onekele-kama takama pokago kiwike namolo takoa moa wetekakana. Nipa
kini toma yaki poanele tewitikoa wawe wa kiwi pewe wia kamotoa moa wetekakana wa
Pitayo akeneya.
Aposelo Aposelo
<<
33
>>
Aposelo Aposelo
<<
44
>>
4
Pita Yoneta Kanosolo Ali-kitane Leneke
Kakete Akenemo
1
Pita Yonetame e Yu yene-pala pa ko oa kakoika Akolalike lodo yotokoai tane ali-
kitika tobou losu yapu talo tane yene yopikagoka Sadusi yeneka einagota kakoita nekeneya.
2
Nipa Yesu tua pokome wa kamoa pokale tokome ali atoaka tua potepa wa kamoa poi wa
einagotame olaukanemoke kotimi yoa tekete nekeneya.
3
Nitoa einagota dekoa motekete
ekete opi ta wete likono, kini koiso podolio akato wa po yapu pitikapaneya.
4
Nitaneyake
einagotame okoimo yakane yene peya matiyame kini okoimo yakoa motaneya. Nitaneyake
Yesunomo wete yakoa motane yene-pala eni yene kibutukoa oi moapa ali-kama takoa oi
motokoli ege egeta wakala kadukoa (5,000) kakedekoi.
5
Podolikama Akolalike lodo yotokoai tane ako tobou ali-kiti Kanosolo ali-kiti Yu
yenane totono pine to a olaukane ali-kiti enika eni ali peya Yerusaleme take odeneka koukoa
meaneya.
6
Ako odene mekome Akolalike lodo yotokoai tane tobou ago Anasika one
wamene-mikitika Kaiapasika Yone Alesadataka eida koukoa meaneya.
7
Eni yename Pita
Yoneta kini lene yoto moa kakoa pitia yatekete ekete kitame abela tokoinakalepa tene tele
patu kautakoa kakete tokoiya-mo. Tene ibini wedekoa epetekakoiya-mo wa okoli
8
Pita one
tepene Epetane Yomini lobutua tagatapeneya kakome okome tobou ali-kiti Kanosolo ali-kiti
kipala i ukumo yakoe.
9
Kawata lepo taneya mekanakagopa Yone totame auapea
epetekakoopa edoa epetekakoiya-mo wa kime tota pitia yatekino,
10
kipalaka Iserele yene
peya-palaka eya wane ukuno, yakamene. Kime yomo lekaneyake wia dekakoli tuaneyake
Akolaliyo moa kamotokane ago Yesu Keraisuno ibini wedekaneya tokome i ago kini leneke
latekatapeneya kako.
11
Yesu einagokepa Akolaline bokuke eya wa wia mekaneya pikono,
yakoe.
I yomopa poadeko wa yapu wiane yene kime paya tetepo takoa wakeneyake panagome i
yomopa yapu pigi wa moa wianeya wa wia mekaneya piko.
12
Ta piko peya pitiki ali atoa toa motokagopa einago odene. Pade lokoaka mena. Kiwi toa
momotoa one ibini wedekoa oatiki agopa einago odene wa Akolaliyo one ibinipa Yesu wa
akeneya wa Pitayo akeneya.
13
Nimo okale yatekete e yene oote tekete ekete i agotapa pa agotano, mane mane pine
pitia yakoa luamene agotameke piti toamokolo kakete imopa i ikino, einakago Yesu-pala
opia yakoi agota tadeko wa akeneya.
14
Nitoapa einagotame latekane ago kita-pala opia
kakale enekete tekete pademoka ete topo takoa wameneya.
15
Nitoapa einagota Kanosolo
yapu meaneya moa akolono wetekatekoa pedoa pikete ekete
16
i agota-pala edele tato patu.
Padele telekole ina tokoi. Ae, kini ina tokoimopa Yerusaleme take pitiki peyame
yakatapekete tikino, kauatiyake oyake kauamele toamokono,
17
eya tato. Kini ina
tokoinakamo ta peyake oa pupitikaya tokolo einakago Yesuno ibini patu kautakoa kakete
odene agoka wa pade olaukameamene wa ato wa oa tukaneya.
18
Nitoapa oto noe wa Pita Yoneta kayo oa motekete ekete einakagono ibini patu
kautakoa kakete pademoka wa pade olaukoa wameamene-koli
19
Pita Yonetame ekete
Akolaline leneke kawapa totame edele tomotoa iki-pe. Kini wene litia tomotoa iki-pe.
Akolaline wene litia tomotoa iki-pe. Kini takoa oe-na.
20
Totame pade tone leneme enoa
kaleme yakoa tokoomo kauameneya to awea oo wa akeneya.
21
Nitikoli Kanosolo ali-kitame
einagota wa kikoa ootokoapa poe wa wetekaneya. Nipa edele toa kibu moo wa wene
kibutua mekoiyake ete ali atoa peyame einagotame tokoinakaleke Akolali kei pia kakoli
tokome kibu moamele toameneya pa poe wa wetekaneya.
22
Mali padeka noi kakoa (40)
ponoka toa pa lepo taneya meane agoke latekakoiya tokome ete peyame ke wa Akolali kei
pia kakeneya.
Yesunomo Yakoa Motane Ali Atoame
Akolali Kowitikete Akenemo
23
Kanosolo ali-kitame kita wete poe wa wetekakoli Pita Yoneta kini oya-mikiti mekoita
pata wa pekete Akolalike lodo yotokoai tane tobou ali-kitameka Kanosolo ali-kitameka kita
kikoa okoinakamo to awea opaneya.
24
Nitikoli yatekete kabunu kokotukoa ekete tone Ali
Muno Akolali tibuka itonoka kusa ueka enika eniyake meki peya neme latikoya.
25
Nitikago
neme to awea okana toa Epetane Yominiyo wene takakale tone kaua ago Depidi-loe nekele
takama pokagome eya wa wia mekapianeya.
E ku yatenepa tepene poto witoa kotimi yotaneya mea tikilepa edekolo tiki-pe. Ali
atoamepa pata pale toatiki oi pedoa pikilepa edekolo tiki-pe.
26
Ta piko peya
ako tobou meki-kitame poi kamotokoa ni kiwike lokoa tobou meki-kitameka Ali
Muno-pala one Keraisu-palaka poi topato wa poi kibutuai toniki wa Depidiyo
wia mekapianeya.
27
Eina wia mekapiane toa etene taatekadeko. Nipa nekele takama pomotoa takoa moa
kakapikago Yesu itonoke nokale Erode Podiase Pailaseta pa yatene-kiti-pala Iserele yatene-
palaka koukoa mekete one wia tukatekoi oi pedoa pikoina. Tone i Yerusaleme take
koukalogoa nitikoina.
28
Enile tokoinapa Akolali ne tele tootapeneya meke wene
toopikanakale taatekoa tokoina.
29
Eni yename toto tete meatekoi agale a moa okoinano,
neke pupu yene toto piti moameneya kakete nekemo atiki toa akoono, auapeano ta.
30
Nipa
nekele takama pomotoa moa kakanakago Yesu one ibini patu kautakoa kakete yene tane ali
atoa latekoa ele kule telekole toma poono, auapeano ta wa kowitoa meaneya.
31
Nitoa
kowititikoa mekoli kiwi oboa mekoi yapu muku muku tootapekale Epetane Yomini kiwike
awia tagatapeneya. Nitikale peyame Akolaline agale i i wa piti moameneya kakete to awea
akaneya.
Yesuno Ali Atoame Kinikiya Moke Tanemo
32
Yesunomo yakoa motane yene peya odene wene-kama pianeya meapa kinikiya-kiti
anukuya mati wa wamato, odeneya pikoa mekete moke tato wa tatikala taneya.
33
Aposelo
ali-kitamepa padele padele telekole toma yakete Ali Muno Yesu tua pokale Akolaliyo moa
kamotokanemo wedoa oma yakoli Akolaliyo pewe-kama wia yopia kakeneya.
34
Nitaneyake
Yesuno ali atoa ponopeneya mekileka toameneya. Nipa itono pine yenameka yapu pine
yenameka kini itono yapu eya topo toa kue moomotekete
35
Aposelo ali-kitike aua pokala
tokolipa padeya toameneya pa mekoi ali atoa moke toa tatikakala taneya.
36
Saiperase take Lipai yatene ago Yosepeyo einakale taneya. Einagopa Aposelo ali-
kitame Banabasi wa ibini akeneya. (Banabasi wapa ali atoa wene weye akakago wa ekete
akeneya.)
37
Einagome one itono pade topo toa kue moomotokome Aposelo ali-kiti mekoita
aua pome meetapeneya.
Aposelo Aposelo
<<
44
>>
Aposelo Aposelo
<<
55
>>
5
Ananaiasi Sapairatame Toa Potokanemo
1
Pade ago Ananaiasiyo one natono Sapaiara-pala oi pedoa pikana toa tokome itono
pade topo toa kue moapa kue padeka te ia moa one wa pa pikoa pianeya.
2
Nitoapa keku
kue Aposelo ali-kiti mekoita aua pome mepaneya. Nipa kue peya aua nome metane tetepo
takoa taneya.
3
Nitikale Pitayo okome Epetane Yomini-pala kapene wakake kue padeka te ia
moa pikoa piake peya iya auane nuku wa wini okopa Setanuyo eni poane wene edekale
moa lukamotoa toka-pe.
4
Eni itono wete topo toameneka nekeya-kama pianeya. Nipa eni
itonome topo toa motoka kue peya pa pikoane meada wa wene pioo tokapa itonoka kueka
nekeya-kama tokome oyake pikoa kawoo toka. Neke kapene wakateka oipa edeyake pedoa
pikato-pe. Neme kapene wakoa ikilepa pa ali-kiti toto-pala wamoka. Akolali-palapa oka wa
Pitayo okale
5
yatekome eina eina one kakata aua witipitakome tuaneya. Nitaneyake einago-
pala tanemo yatekoi peyame ekee wa piti tuuloganeya meaneya.
6
Nitaneyake tuali-kiti nekete
tukanakago katekamoa maminame ewetemotekete aua pote oloyo topaneya.
7
Lou pini tebolo tadiya ponotokaneyake natonoka onekane-pala tanemo yakameneya
atiki toa nekeneya.
8
Nokale Pitayo yatekome okome kini itonome topo toa motokoi kuepa
nekaneyo kotu kakoa aua noka-pe-kale okome e eno, eni kue peya aua nokome toka-kale
okome
9
Epetane Yomini-pala kapene wakoa enatekoi oipa edeyake pedoa pikoti-pe.
Nekane oloyo topokoina tuali-kiti wakapea note a kago ludu kakete ikino, yaka. Neeka
dikoa aua pote oloyo topoi wa okale
10
eina eina natonoka one kakata aua witipitakome
tuaneya. Nitaneyake eina tuali-kiti nekete ina atoaka tuadeko wa moa aua pote odene
oloyoke lewitikatakutukoa pipaneya.
11
Nitaneyake Yesunomo yakoa motane yename ete ali
atoa peyameka enimo yatekete ekee wa pitime tuuloganeya meaneya.
Aposelo Ali-kitame Toma Yakenemo
12
Aposelo ali-kitame padele padele telekole toma yakilepa Akolaline tele patu kautakoa
kakete tadiki wa ali atoame ka oa kamotoa taneya. Yesunomo yakoa motane yene peyapa
tobou losu yapu keneke Solomono wa yomini kayo oa ibini akene lono oboai taneya.
13
Ete
yename eni yene-pala lipua meadete piti moteketeke ke ke wa kiwi kei pikala taneya.
14
Nitoapa pade ali atoa Ali Muno agoke wene tugaketepa one agale yakoa motane yene-
pala lipuai lipuai taneya.
15
Enika enile tanelekepa ali atoame kini yene pitane-kiti moa
akolono aua pote ka ludu tomo tatia mekakala taneya. Nipa Pita one yomini takoa ponokale
latoa poi wa moa mekakala taneya.
16
Yerusaleme ta liti piane take pitikoi ali atoameka yene
pitane-kitika ipono awitaneya mekete tete mokoa kakene-kitika koukotukoa aua nokoli peya
epetekatapeneya.
Aposelo Ali-kitame Tete Motanemo
17
Aposelo ali-kitame nitima yakoileke ako odene mekome Akolalike lodo yotokoai
tane tobou agomeka one Sadusi oyali-kitameka eya taneya. Ali atoame kiwi tewitikoa
Aposelo ali-kiti litiei wa wene poaneya mekete tekete
18
Aposelo ali-kiti dekoa moa po yapu
pitikapaneya.
19
Nitaneyake likonu Ali Munoyo moa wetekane edelo ago nokome po yapu
kago pea Aposelo ali-kiti akolono aua pokome okome
20
ali atoa mea kama poatiki totono
wenele toatikimo-kama tobou losu yapu pote olaukapamene wa oa pekeneya.
21
Nitikale ta
pene patakaka edelo agome oka toa tekete tobou losu yapu pote olaukoa kakeneya.
Nitaneyake ako odene mekome Akolalike lodo yotokoai tane tobou agomeka one oya-
mikitameka ete Kanosolo ali peya koukoa noe wa moa obokaneya. Iserele Kanosolo ali
peya eni koukoa mekete ekete po yapu pitiki Aposelo ali-kiti enemotokapoe wa poyo ali-kiti
moa wetekaneya.
22
Nitikoli pekete enekoli po yapu meameadekoli enekete wakapea nekete
ekete po yapu kago loko pitikoa keteaneya kakale enekoo.
23
Ni kago yopia kakoina ali-
kitame e kago akolono nepikoa kakoli enekoo. Nitoa kago pea enekolo padeka
meameadeka wa akeneya.
24
Nitikoli tobou losu yapu talo tane ali-kiti yopikagomeka
Akolalike lodo yotokoai tane tobou ali-kitameka edoa pokoti patu wa wene kibutukoa
mekoika
25
pade ago nokome okome kime moa po yapu pitikakoina ali-kitipa tobou losu
yapu kunu kakete ali atoa olaukoa kakina wa onaneya.
26
Nitikale tobou losu yapu talo tane
ago one poyo ali-kiti-pala opia pokome Aposelo ali-kiti moa Kanosolo yapu aua nekeneya.
Nipa ali atoame kue katekamoa witikaya wa piti motekete tekete poti moa aua nekeneya.
27
Aua note Kanosolo ali-kitane lene yoto moa kakakoli eyago ako odene mekome
Akolalike lodo yotokoai tane tobou agome okome
28
Yesunomo wa pade olaukameamene
wa totome oa tukakoonake onekemo Yerusaleme take oa pupitikatapeadiki. Nipa Yesu wia
tukanepa toto aukakala toa ni iki wa okale
29
Pita-loeme ete Aposelo ali-kitameka ekete tone
Akolaliyo ta wa okole-kama litia toono, pa ali-kitane wene litiamoo.
30
Tone kaua-mikiti
yopikago Akolaliyopa Yesu tuaneya pikata moa kamotokaka. Kime yomo lekaneyake wia
dekoa tukakolika moa kamotokaka.
31
Nitoapa ali atoa toa momotoa tokome oneke lokoa
Ali Muno latikoa one nimini yono kounoke moa kakaneya. Enipa Iserele yename poanele
toma yakoike po letu mekakouna keetapeane waou wa taneya. Nipa tepe kolotini pekoa
pikolipa nitou wa taneya.
32
Kipala i okopa Aposelo ali-kiti tone leneme enekoomo oko.
Epetane Yominiyoka enimopa wene takakala toko. Akolaliyo one agale litia tiki yeneke awia
memotoa wetekane Yominike oko wa Aposelo ali-kitame akeneya.
Kanosolo Ago Gamalieleyo Akenemo
33
Aposelo ali-kitame enimo okoli yatekete e Kanosolo ali-kiti kotimi wene mati luaneya
tekete kiwi wia tukadete akeneyake
34
Kanosolo ago pade Gamaliele wa ibini akene agome
eya taneya. Einagopa Parisi ago Mosesene totono pine to a olaukakago ete peyame kei
piane ago kamokakome okome i ali-kiti akolono tekei meati wa moa wetekoe wa okale
35
wetekakoli okome Iserele ali-kiti kipala i ukumo yakoe. Ina ali-kiti-pala toateko oipa poti
pedoa piato. Kini toma yakilepa kinikile tiki patu, Akolalinele takaki patu.
36
Namolo eya ago
Tiudasiyo tube ago i kakuno, noe wa poi kamotokakale ege kadukaka ketepome kadukoa
kakoa (400) ali-kiti one lono takoa pokoi. Nitikolipa poi keneke poyo yename einago wia
tukakete one agale litia tane ali-kitika wia tadekatapekoi.
37
Naniko Galili Yudaseyo eya toka.
Ali atoame takesi kue pitikamotoa kini ibini bokuke wia mekane-pete Yudase kote tokale
okome itapa tepe kikono, poada wa ete takoa pokome ali atoaka wia lokoa iyawea aua
poka. Nitikale poyo yename einago wia tukakete one agale litia tane yeneka wia
tadekatapekoi.
38
I Aposelo ali-kitipa kini tikile pa kini weneme tadekolipa wete edikoa
tadatapeoino, toa kamotono toe.
39
Kini tikilepa Akolali patu kautakoa kakete tadekolipa
kime oyake ketekamele toamoo. Nipa Akolali-palaka dekoa poi teigete toi wa Gamelieleyo
akeneya.
40
Nimo okale yatekete ete Kanosolo ali-kitame ekete nitoono ta wa eina Aposelo ali-
kiti noe wa kayo oa motekete eya taneya. Layo tiginame wiati wa poyo ali-kiti metekoli
witikoli wa motekete ekete Yesuno ibini patu kautakoa kakete onekemo wa pade
wameamene wa wetekaneya.
41
Nitikoli Kanosolo ali-kiti mekoita tewitikoa pekete wedikete
ekete eina witikoinapa Yesuno ibini wedekoa onekele takakoonakaleke totome oyake ya
momotoa Akolaliyo ni tadeko wa pekeneya.
42
Nititikaneyake ta pataka abuna tobou losu
yapuka kini kini yapu luduka obopokala tekete Keraisu Yesunomo one epetane ko i i wa
oma yakeneya.
Aposelo Aposelo
<<
55
>>
Aposelo Aposelo
<<
66
>>
6
Ali Tatono Kakoa (7) Takoa Moa Kakanemo
1
Einapete-mene ali atoa kainya matiyame Yesunomo yakoa mootokoa one yatene-pala
lipuai lipuai taneya. Yesuno yatene eni tubetema pekene-pete Geriki agale yakoa akene Yu
yename Iberu agale yakoa akene Yu yene-pala ko oa kakete ekete ta patako abuna nee eya
tatia meteketepa tone nepo atoa wanakala tiki wa wene pokete akeneya.
2
Nitaneyake
Aposelo ali-kitame Yesuno agale yakoa motane yene peya noe wa moa obokoa mekete
ekete toto Aposelo ali-kitame kini nee eya tatikadetepa Akolalinemo olaukoa wamele
toamokono,
3
nee eya tatikamotoapa kini oyali-kiti tatono kakoa (7) takoa moamene. Nipa
Epetane Yomini awia tagatapeneya mea epetane peku noa tikileke ete-kitame kei piki ali-kiti
takoa moamene. Nitikolipa toto luku kakete nee eya tatikamene wa totome moa
kakatekoapa
4
eni pa pupu wa toameneya Akolali kowitoa mea Yesunomo oma yawa too
wa Aposelo-kitame akeneya.
5
Nitikoli peyame ke wa wedia mekete nee eya tatikatekoi ali-
kiti tatono kakoa (7) takoa motaneya. Einali-kiti dikoa. Panago Sitipene einagopa Yesuke
wedoa wene tugoa meane ago. Eingoke Epetane Yomini awia tagatapeneya. Ni Pilipi ni
Perokorasi ni Naikena ni Taimone ni Pamena ni Nikolasi. Nikolasi einagopa Adioke take pa
yatene ago meake Yu yene-pala lipuaneya.
6
Ete yename o ali-kiti takoa mootokoa Aposelo
ali-kiti mekoita aua pokoli Aposelo ali-kitame Akolali kowitoa yono pianeya.
7
Nitaneyake
Akolaline agale oa pupitikatapeneya. Yerusaleme ali atoa peya matiyame Yesunomo yakoa
mootokoa one yatene-pala lipuai toa kakeneya. Akolalike lodo yotokoai tane ali kainya
matiyameka Yesuke wene tugoa mea onekele takama pekeneya.
Sitipene Dekoa Motanemo
8
Sitipene einagopa Akolaliyo pewe wia tagatapekale one tele patu kautakoa kakome
telekole toma yakale enekete ali atoame ekete padameka toamatikilepa i tokono, enatoe wa
ka oa kakeneya.
9
Nitaneyake Libetine wa ibini akene losu oboai tane ali-kiti Sitipene-pala
wene poaneya mekete one-pala agale to onali yoa kakeneya. Eni losu oboai tane Yu ali-kitipa
eya ta-mene Sairini Alesaderia Silisia Esia enika eni ta kawa nekeneya.
10
Eni yename
Sitipene moa patukadete wili toa kawa teko tokale wakeneya. Nipa Epetane Yominiyo wene
takakale agale muno pewe kakoa oa kakale tokome one moa patukamele toameneya.
11
Nitoapa kapene wakoa oatekoi ali-kiti tuku toa kawa motekete kue laukakete ekete i
agomepa Mosese Akolalitake poane agale okale kime yatekoo wa akoa amene wa kue
metaneya.
12
Nitikolipa eina kapene wakoa agale okoli yatekete ali atoaka tobou ali-kitika
Mosesene totono pine to a olaukane ali-kitika wene pokete kamotokoa Sitipene kakata pote
dekoa moomotekete Kanosolo ali-kiti koukoa mekoita aua pekeneya.
13
Nitoapa eina kapene
wakoa oatekoi ali-kiti Kanosolo ali-kitane lene yoto moa kakakoli kapene wakakete ekete i
agomepa tone Akolaline takoa wikakakoona tobou losu yapukeka Mosesene totonokeka
poane agale oma yako.
14
Eya waka okale yatekoo. Nasarese Yesuyopa tone tobou losu
yapu ke awea tadekatapea ni toto Yu yename litia toateko totono Moseseyo yametane
totono katekoa weneya totono yamea too wa i agome okale yatekoo wa akeneya.
15
Nitaneyake Kanosolo yapu mekoi peyame Sitipene nepikakoli one lene timinipa
edelo agono lene timini tetepo tootapekale enaneya.
Aposelo Aposelo
<<
66
>>
Aposelo Aposelo
<<
77
>>
7
Sitipeneyo Kanosolo Ali-kiti-pala
Akenemo
1
I agome dika dika wa kapene wakoa okoli yatekome eya ago ako odene mekome
Akolalike lodo yotokoai tane tobou agome Sitipene yatekome okome i yename neke
tanemo-kala ikino, nimini ikiti-pe-kale Sitipeneyo okome
2
atai ame-lawe agale pade oane
metekuno, yakoe. Tone kauago Eberame Arane take wete to a pome mepameneyake one
opiane ta Mesopotemia ta pa eida mekalepa pa teleta tootapeneya meko Akolali pono
yamenokome okome
3
ne yemeateku take mepoano, nekameyo-mikiti tewitikoa neke ta-pala
to ano pa wa akeneya.
4
Nitaneyake one Kaledia ta to a pome Arane take mepaneya. Oneketai
eida mea tukalepa Akolaliyo wini ta to ano pa wa okale tewitikoa kiwi i pitiki take nome
menaneya.
5
Einata einapete Akolaliyo one itono nateya dedeyaka yameameneyake okome
naniko neeka neeke ta amoa pokoi yeneka eni take meo wane mekoane yameou wa
Akolaliyo oa pianeya. Eberameyo one mati odeneka wete opiameneyake ni akeneya.
6
Nitikome okome neeke ta amoa pokoi yenepa mone take pote mepokoli eni ta pine yename
kinikile-kama takamotoa kiwi tika tika toa tete mea toi. Nitikoli mali ketepome kadukoa
(400) ponoka toa pa edikoa meku pekete toi.
7
Nitoa mekoli enekene kiwi yopikoa
potokakoi yene kibu motokakolupa neeke ta ma pokoi yename eni mone ta tewitikoa oto
wakapea note mekete anukule takama yawei wa Akolaliyo Eberame-pala oa pianeya.
8
Nitoapa ne yatene auapeouno, dikamene wa oa togotokome one eina auapekome toateka
adeka pikome ali yatene kepene teigakete toatekoile yametaneya. Nitaneyake Eberameyo
Aisake opia pikome ketepo kakoa (8) ta pataka-pete matiyane kepene teiganeya.
Aisakeyoka mana Yekobe opia pikome einakale taneya. Yekobeyoka one ali mati tuku
kakoa (12) opikome-kama einakale tokala taneya.
9
Wa naniko tone kaua-mikiti Yosepe-pala wene poaneya mekete eya taneya. Idipi take
panagono pupu-kama takamotoa dekoa moa topo toa kue motaneya. Nitaneyake Akolaliyo
einago Yosepe mama moa yopikoa kakome
10
tete motane-pete-kama toa mokala taneya.
Nitoapa Idipi ako odene meane tobou ago Perouyo i ago Yosepe wene muno kakene ago
tadeko wa wene tomotoa tokome one peku lawetekala taneya. One eni peku noa toma
yakale enekome Perouyo one Idipi ta one yapulu yene peya neme yopikoa kamene wa
oneke lokoa tobou ago moa mekaneya.
11
Wa naniko Idipi Kenane tatake kobu igi noka
matiyame ali atoa kobume tukete welea meaneya. Tone kaua-mikitameka kini noatekoi
neepa piamokale tuku tokoa kawa teko tokale wakeneya.
12
Nitoa mekete Idipi take nee
pade piko wa okoimo kugu yatekome Yekobeyo one mana-mikiti Idipi take noatekoo nee
topo toa mopoatino poe wa wetekakalepa tone kaua-mikiti enipete titimoa Idipi take
pekeneya.
13
Wa taku takoapeta Idipi take pokoli Yosepeyo one Yosepe kaku wa one ibini
to awea akeneya. Nititikaneyake Idipi ako meane tobou agome inapa Yosepe yatene nekete
tadiki wa wene taneya.
14
Nitaneyake Yosepeyo etene Yekobe laine wamene-mikiti peya
noatino noe wa agale oa wetekakale keti note menaneya. Eina yene kakoi toa oi motokolipa
ege odepeta kadukoa wa timini mukitini patukoa padeka pagini (75) kakoa ali atoa
kakedekoi.
15
Yekobe Idipi take eida nome mea tuaneya. One mana-mikitika eida mea tukala
taneya.
16
Tone kaua-mikiti eida mea tukala taneyake kini tigini leyo leyo toa ta pine lono
Sekeme take aua pote tuane ali atoa piai tane kotake pipokala taneya. Eina kotapa
Eberameyo Emono mana-mikitaneke kueme topo toa motaneya.
17
Akolaliyo Eberame-pala neeke ta wateko yatene auapekene ile tou wa papete oa
piane agale wete taatekameneyake tone kaua-mikiti Idipi take eida ta amoata nekeneya. Wa
naniko one einagale taatekateka tigotokalepa
18
Yosepe wene toamene tobou agome Idipi ta
yopia meaneya.
19
Einagome toto yatene oa yotokoa talo toa potokaneya. Nipa kini mati-
kitipa tumotono, opitikoa paka lono pote pipokala toe wa tone kaua-mikiti tete motokoa
kakeneya.
20
Einapetepa pade adoname koniyo mati Mosese opikete akolono pipameneya
kini yapu tokene teboloke pa ukoa mekete adu lawetaneya.
21
Wa naniko akolono moa
pikoli Idipi ako tobou agono koname enamutukome one mana mati latikoa tubetekaneya.
22
Nitikalepa Idipi take mane luane-kitame kini peku-mene ya amoa lawetekoli noa tokome
agale muno kakoa oa padele padeleta wene toa toma pekeneya.
23
Mali timini mukitini patukoa padeka noi kakoa (40) ponokale Mosese one Iserele
yeneke ugu pou wa wene pia meaneya.
24
Nitoapa ugu pokome enekale Idipi agome Iserele
ago witikale enekome Iserele ago auapekome Idipi ago kibu motokoa wia tukaneya.
25
Nipa
one yenamepa no i agome kiwi toa momotoa Akolaliyo moa kakapiadeko wa wene tikino
wene pikome taneya. Eni wene pikanake one yatename wene taneya mena.
26
Wa
podolikama Mosese eida wakapea pome enekale Iserele agota takuta poita tootakutukoa
kakoli enekome okome anu oyata kita wameneta edeyake tete meetakutukoa kaki-pe wa
kawikoa enaneya.
27
Nimo okale tete metane agome Mosese-pala wene pokome ete
pedekakome okome tota yopia ka wa teyo okale teke toko-pe.
28
Neme abela Idipi ago
pade wia tukadeko toa noka opi wia tukade oko-pe wa okale
29
Moseseyopa abelana
tokounakamo peyame yakatapeadiki wa piti tokale Idipi ta to a pekeneya. Nitoapa Midiane
take to a pome mekome one matita takuta eida opia kakaneya.
30
Mali lene timini togoikoa padeka noi kakoa (40) ponokale eya taneya. Mosese Kati
Sainai tono liti ali piamene take pome meane-pete de yomo deyake toe itipono okoa kaka
pakeke edelo ago pade pono yamenokale
31
enekome wene kainya pianeya tokome pinele
pome enepaneya. Nitoa pome yatekale Akolaliyo agale okale yakaneya.
32
Yakakoa kakale
Akolaliyo okome okome neke kaua ali-mene Eberame-loe Aisake-loe Yekobe-loe einago-
mene yopiane kaku Akolali no i kakuna wa okale yatekome tokome enamene piti tokale
kolu kolu moa kakeneya.
33
Nitoa kakale okome ne wini kakotapa tipi tanetano, neke kawa
yene kotokoa pia.
34
Eya wane ukuno, yaka. Anu yatene Idipi take tete moa kakili enoane
komoka oa kakili yakoane tekene toane moadene i nukuno, opi nepa Idipi take wakapea
poano pa wane ne moane wetekada wa Akolaliyo akeneya.
35
Mosese einagopa one yatename wakete ekete toto yopia koiso akoa ta wa teyo
okale teke toko-pe wa wakene ago. Ni agome toto yatene toa moa talo tomotoa tokome
Akolaliyo takoa moa Idipi take eni wetekaneya. Einapa Akolaliyo one edelo ago Mosese
kakota imo akapa wa oka toa pome yomo deyake toe itipono okoa kaka pakeke kakome
akaneya.
36
Nitaneyake padele padele telekole ali atoa wene kainya pikanele toma pokome
one yatene Idipi ta tewitikoa aua pokome Kiane Ue ketoa ali piamene take aua pekeneya.
Nitoa ali piamene ta ludu aua yakilepa mali lene timini togoikoa padeka noi kakoa (40)
ponoka toa padele padele telekole toma yakome taneya.
37
Mosese einagomepa Iserele
yene-pala papete oa pikome okome Akolaliyo no takoa moa kakakana toa tokome kiwi
pakeke meka ago pade one agale akamotoa takoa moa kakoo wa oa pianeya.
38
Mosese
einagopa ali piamene take ali atoa-pala koua meaneya. Ni Kati Sainai tonoke agale akanane
edelo ago-pala opia kakeneya. Ni tone kaua-mikiti-pala koua meaneya. Ni ne yatename
yakamotono ta wa Akolaliyo toto mea kama pomotoa toko agale i i wa Mosese
yametaneya.
39
Mosese nitane agoke tone kaua-mikitame one agale litia toameneya. Nipa kini
wenepa Idipi take pianeya mekete one wakeneya.
40
Nitoapa Erone-pala ko oa kakete ekete
toto Idipi ta tewitikoa aua yakanakago Mosesepa Sainai tonoke kawa kakono, one-pala
tokale agopa tokono, tuko patu, tuamoko patu. Tone kowitateko gode-kiti latikoano ta.
Nipa i ta ludu namolo kakoa toto aua yawatiki gode-kiti adeka pia yomini latikoano ta wa
akeneya.
41
Einapetepa eina yename pitimekawe kai tine yomini latia kakakete Akolali tetepo
takoa padeya-kiti aua note mea lodo yoai taneya. Nipa kini yoname latikoinakeyake ke ke
wa wedia kakeneya.
42
Nitaneyake Akolali mukiti yamea mekomepa eina yename a tibuke
kakene lou tokene eya etepea kowitima pomotoa wakeneya. Einapa Akolaline agale akane
ago padame eya wa wia mekane toa taneya.
Iserele yene kipala ukumo yakoe. Mali lene timini togoikoa padeka noi (40) kakoake ali
piamene ta ludu pima yakete kini pitimekawe kai sipi sipi kai eya wia lodo
yoma pokoi. Eni lodopa nooke yotokoiya mena.
43
Moloko einagono mamina
yapu latia aua yakete eina yapu keneke lodo yoai tokoi. Ni kini kowitiko ago
Lepane one tagoi tibuke a kakona wa one tagoi adeka pia yomini latia aua
yakoi. Moloko Lepaneta kowitato wa kini yominike lodo yoma yakoinano, kini
ta pine lono ete takoane lititapeane Babilone take ete moane wetekou wa
Akolaline agale akane ago padame wia mekaneya.
44
Tone kaua-mikiti ali piamene ta ludu pima yakete meme kai kepeneme latiane yapu-
pala aua yakeneya. Nipa Akolaliyo Mosese kotua ko oai tane yapu-pala aua yakeneya. Eina
yapupa Akolaliyo Mosese-pala adeka pia akene toa latianeya.
45
Eina yapu-pala aua yawa
tua pekete kini mana-mikiti laukoa pekeneya. Wa naniko Akolaliyo Kenane take pitane
yatene-kiti ete takoa lititapekale tone kaua-mikiti tobou ago Yosua-pala Kenane take pote
awia meketepa eina yapu-pala aua pote kakapaneya. Nitoapa kini mana-mikiti eida opia
kakoa tuma note wipitiketepa Depidi opiane-peteka eina yapupa eida pikoa kama pekeneya.
46
Einago Depidi Akolaliyo pewe wia yopikale okome ne meateko yapu oyake wikakou-pe
wa yatekale
47
Akolaliyo neme mena wa akeneyake mana Solomono one luku tobou ago
mekome wikakaneya.
48
Nitaneyake Ali Muno Akolalipa alime wikakane yapu mekilepa toamoko. Enikepa
Akolaline agale akane ago padame Akolaliyo okamo wia mekakome okome
49
Tibupa anu tene pogakoane mekuya. Itonopa anu kawa pogakoane mekuya. Anu
edeya yapu wikakadete iki-pe. Alime wikakane yapu kenekepa no edoane
memotoa-pe.
50
Tibu itono enika eniya peya anume-kama latiane pikouya.
Eina akenepa Akolaliyo papete akenemo uku wa Sitipeneyo oa kakeneya.
51
Nimo ootokoa Sitipeneyo e Kanosolo ali-kiti-pala okome kepene teigamene pa
yatene meki toa kini kabe ko akameneya meki. Nipa kini kaua-mikitame tane toa kimeka
Epetane Yomini ete pedekakala tiki.
52
Kini kaua-mikitame Akolaline agale akane ali peya
padeka katekameneya tete mema-kala nekeneya. Ni wene kiyo akeneya-kama meko ago
noatekamo to awea oa piane ali-kitika wia tukama-kala nekeneya. Einago taatekoa nokalepa
one wia tukakoe wa mone yenane yonoke kime moa pikoina.
53
Akolaline totonopa one
edelo ali-kitame papete to awea akoa metaneyake kime pikoa kaketeke litia toamekete enile
tokoina wa Sitipeneyo oa kakeneya.
Sitipene Kueme Ka ua Wia Tukanemo
54
Sitipeneyo nimo okale yatekete e Kanosolo ali-kiti kotimi yotokoi matiyame one-pala
eei wa kime kolukoa kakeneya.
55
Nitikolika Sitipenepa oneke Epetane Yomini awia
tagatapeneya kakome tibu ate nepikakale Akolali tele pa ta tootapeneya kakale enoa ni
Yesuka one nimini yono kounoke kakale enoa taneya.
56
Nitikome okome tibu kene peaneya
pikolo enoane ni Ali Yatenane Oyago Akolaline nimini yono kounoke kakolo enoane
tukuno, enoe-kale
57
e yename agale ta yo ootapea kini kale kene yoname ketekoa one
unukamoa dekoa motaneya.
58
Nitoapa Yerusaleme ta kago ketepono patukoa lia pitikakete
kueme ka ua wia tukaneya. Nipa i ago Sitipeneyo Akolali taumada toa okale yatekoo wa
akoa akene ali-kitame one wia tukadete kakete kini tokoo kakene mamina kotokoa pala
pitikaneya. Nipa tuali pade Solo wa ibini akene agono kawane pala pitikaneya.
59
Nitikakoa
Sitipeneyo kowitikome okome Ali Muno Yesu neeke nukuno, anu yomini moa ta wa
kowititikoa
60
neuwe tukuketikakome agale telo okome okome Ali Muno i yene kini i
poanele tikileke nami wia kibu motokameamene wa ootokoa atu piou toa tukome tuaneya.
Eni yename Sitipene wia tukamotoa kakome eyago Solo kipala odene wene-mene pia
kakeneya.
Aposelo Aposelo
<<
77
>>
Aposelo Aposelo
<<
88
>>
8
Soloyo Yesuno Ali Atoa Tete Metanemo
1
Sitipene wia tukane ta pataka-pete eina eina titimoa ete yenamepa Yerusaleme take
Yesunomo yakoa motane-kiti dika dika toamene tete meai taneya. Nitaneyake Yerusaleme ta
to a Yudea Sameria tata piko peyake tadoa pekeneya. Nitaneyake Aposelo ali-kiti to a
poamekete pa eida meaneya.
2
Nitikakoa Yesunole wedoa takama yakene ali padeka-kitame
Sitipenene tigini moa aua kotake pipekete oneke komo ka ta pitikoa kakeneya.
3
Solo einagome Yesunomo yakoa motane yene wiane atukou wa wene pikome kini
kini yapu yapu mekoi toa tuku toma pome enamutukome akolono lia pitikoa alika atoaka po
yapu pitikakala taneya.
Yesunomo Sameria Take Oa Pupitikanemo
4
Yesunomo yakoa motane yenepa Yerusaleme ta to a ta piko peyake tadoa pekete
Yesunomo mo wima pekeneya.
5
Pilipi oneka Sameria take pokome Keraisunomo i i wa mo
wia kakeneya.
6
One eni okamo yakoa one telekole tokale enoa tekete ali atoame one oka
agale wedoa yakakoa kakeneya.
7
Einata einapete ali atoake awitane ipono-kiti ka akeneya
takoa pokala taneya. Ni kawa yono tau taneya meane-kiti ni kawa okeaneya meane-kiti
kainya mati epetekatapeneya.
8
Nitaneyake Sameria take pitikoi ali atoa wedia kakala taneya.
9
Sameria takepa Saimone wa ibini akene ago meaneya. Einago koto mati otoi ago
mekome taneleme ali atoa wene kainya pikakala taneya. Einagopa ibini akene ago kaku wa
mate okala taneya.
10
One nitane ago tokale kamo yene ponopene yene peyame ekete i
agopa Akolali keneyano, Akolaline tele patu kautakoa kako wa one okagale-kama wedoa
yakakoa kakala taneya.
11
Nipa koto mati otoi ago mekome taneleme kini wene kainya
pikaneya tokome one agale wedoa yakakala taneya.
12
Wa naniko Pilipi eida nome mekome
eya epetane ko Akolaliyo ali atoa talo tokome toko ko ni Yesu Keraisuno ibini oa mekala
taneya. Nitikale yakoa motekete ali atoa peyame ue mokala taneya.
13
Saimone einagomeka
Pilipiyo okamo yakoa moa ue mootokoapa Pilipi pokaka litima pekeneya. Litima pome
enekale padele padele telekole toa ali atoa wene kainya pikoa tokale enekome wene kainya
pianeya meaneya.
14
Aposelo ali-kitipa Yerusaleme take eida pa meketepa Sameria yename Akolaline
agale yakoa motokoi wa akedekoimo yakatekoa Pita Yoneta takoa moa Sameria take
poatino poe wa wetekaneya.
15
Wetekakoli note meketepa Epetane Yomini eni yeneke
awinome memotoa kowitikaneya.
16
Nipa papete eina yename Yesuno ibini wedekoa ue
motaneyake Epetane Yomini kiwike wete awinameneya tokome ni kowitikaneya.
17
Nitoa
kini mataike yono pikoli Epetane Yomini awinaneya.
18
Aposelo agotame eni yenane mataike yono pikoli Epetane Yomini awitikale enetekoa
Saimoneyo einagota kue metekome okome
19
kitame wini telekole tiki toane toada. Nipa
anume takoane mataike yono pikou-kitike Epetane Yomini awinomotouno, yameatino toe
wa kue metaneya.
20
Nitikale Pitayo okome neke kue-pala aua iponane poane take pamene
wane uku. Epetane Yomini Akolaliyo nami kakameneya pa mekala tokoyake neke kueme
topo toane mou wa neme wene pika tokolo ni uku.
21
Akolaline leneke wene kiyo wameneya
kake tokanano, Akolaline pupu tota-pala odeneka takama yamele toamoko.
22
Wini poanele
tokake Akolaliyo po letu mekakana oneme kea mitikademe toko patu. Kea mitikakamotoa
toa enoano, neke wini poane wene wia wawa one kowitamene.
23
Ae, neke tepene poane
wene mati alatapekome nime ne labakome tadeko wa Pitayo okale okome
24
poanele tekene
tadekuno, neke wini okole-kiti nopala takayano, Ali Muno kowitikamene wa akeneya.
25
Nitaneyake Pita Yonetamepa Keraisuyo toma yakale enekoinakamoka Ali Munono
agaleka mo wima yawa peya takamotekete eni ta tewitikoa Yerusaleme take wakapea
poadete pekeneya. Nitoa Sameria ta ludu pekete ali atoa pitikoika Yesunomo oa mekutu
toma pekeneya.
Pilipiyo Isiopia Take Tobou Ago
Yesunomo Pine To awea Oa Metanemo
26
Wa naniko Pilipi Sameria take eida pa mekakoa Ali Muno agono edelo ago Pilipi
mekata nokome okome wete kamokoa pa. Yerusaleme take titimoa Gasa take keita witane
bateteke pamene wa wetekaneya. Eni batetepa ali piamene ta ludu pianeya.
27
Edelagome
oka toa tokome Pilipi kamomotokome eni bateteke poademe pokome Isiopia take ago
kotuaneya. Einagopa ibini akene tiobago. Isiopia take ako odene meane tobou atoa
Kadesike lokoa tobou ago mekome einatoane kamoya peya yopikoa kakeneya. Einagome
Akolali kowitademe Yerusaleme take pome mepaneya.
28
Pome mea kowitimotokome
Isiopia take wakapea poademe pekeneya. Nipa osi kaime lia aua pokaya waneke mea
poademe pokomepa Akolaline agale akane ago Aisaiayo wia mekane boku lewea oi moma
pekeneya.
29
Nitikaka Epetane Yominiyo Pilipi-pala okome eni osi kaime lia aua pokoya
waneke mea ponokago kotua pamene wa okale
30
teyapea kotua pokome yatekale einagome
Akolaline agale akane ago Aisaiayo wia mekane agale oi moa mekale yakaneya. Yatekome
okome neme wini oi motoko agalepa wene toko-pe-kale okome
31
eni agale pine to awea
oateko ago pade enamukuyano, edoane wene tuku patu wa ootokoa mekome okome
nopala odeneya mea patono, lewia meno wa okale nitaneya.
32
Nitoa mea enekale einagome
oi moma pome tugane agalepa dikoa wia mekaneya enaneya.
I to aweane uku agopa padame sipi sipi kai wiademe lia aua pou toa pade ali-kitame
one wiadete lia aua pekeneya. Sipi sipi kai tine pine pitukoa kakili agale
wametekaneya pa kako toa einagoka agale wametekaneya pa kakeneya.
33
Einago koiso akoa ya motokakoli padameka one kei piameneya. Itonoke mea
togameneya pa tekei mekale po tewitikale pekeneyano, oneke ta ma pokoi yene i
i wa teyo to awea omotoa-pe.
Eni akenelepa wete tane tetepo takoa Aisaiayo papete wia mekapianeya.
34
Einagalepa tobou agome oi moa mekome tokome Pilipi-pala okome Akolaline agale
akane agome teeke akeneya patu. Pinali oneke akeneya patu. Panagoke akeneya patu wane
ne yatekene uku-kale
35
Pilipiyopa einagome eina oi moma pome tugakata titimoapa Yesu
ko oa meaneya.
36
Nitoa batete ludu opia mea potepa ue meaneya liti witakete tobou agome
Pilipi-pala okome ue i meadekono, ue mouno, anume ue momotoa padeleme ketekako
patu-kale okome
37
poome toameneya Yesuke wene tugoa mekepa oyake moamele toko-
kale okome e eno, Yesu Keraisu onepa Akolaline mana wane wene tuku wa ootokoa
38
osi
kai yopikago-pala okome no ponene meouno, osi kai witimoa kamotono ta wa akeneya.
Nitoapa eniya waneke mea katepitoa Pilipi-pala uele keti pome kakale Pilipiyo ue
motokaneya.
39
Ue motokakale Isiopia ago Pilipita ue matanuke ate pogatekoa pote kakoika
eina eina Epetane Yominiyo Pilipi takoa moa aua pekeneya. Nitikalepa tobou agome Pilipi
wa pade enameneya one ta pine lono wedianeya pekeneya.
40
Nitaneyake Pilipi Asedose
take witakome eida titimoa pima yakomepa pitikali latia pitikoi ta piko peyake Yesunomo oa
mekutu toma pome Sisaria take tugapaneya.
Aposelo Aposelo
<<
88
>>
Aposelo Aposelo
<<
99
>>
9
Solo Yesuke Wene Tuganemo
(Aposelo 22:6-16, 26:12-18)
1
Sitipene tuutukaneyake Ali Munono agale yakoa motane yene keteane wiou wa Solo
kotimi yoa meaneya. Nitoapa ako odene mekome Akolalike lodo yotokoai tane tobou ago
mekata pokome eya wa akeneya.
2
Damasikase takepa Keraisunole takama piki yene tuku
toane enamutukene ali-kitika atoa-kitika po kakoane oto Yerusaleme take liimoane auane
nouno, enile toateku pipia pade eni take losu yapu yopikali-kiti yamepouno, pipia wia
meano ta wa opaneya.
3
Nitoa pipia moomotokome Damasikase take poademe tigotokakoa
pokata odepeta a tibu laigoa to awineya noka pa me one payapono pia unukakale
4
itonoke
aua pitalogakale agale ludu nokome okome Solo Solo nepa no edekolo tete mekala toko-pe
wa okale yatekome okome
5
Ali Muno nepa te kake oko-pe-kale okome neme tete mekala
toko ago Yesu kakene ukuno,
6
Damasikase take wete poke mepamene. Poke mekalepa
neke toatekale panago nome to awea onoono, wete kamoa pa wa akeneya.
7
Nimo okaka
Solo-pala opia nekene ali-kiti witimoa kakete agale wametekoa pa nepia kakeneya. Agalepa
eina okake alika enaneya mena.
8
Nitaneyake Solo kamokakome lene kikoa enoake one
leneta liitapeneya tadekale enamele toamokale tokome one oya-laweme yono moa aua
Damasikase take pekeneya.
9
Nitikoli nome mekale ta tebolo-peta lia patakale padeka
enameneya ue neeka wawa pa meaneya.
10
Damasikase takepa Yesunomo yakoa motane ago pade Ananaiasi one eida mekata
Ali Munoyo pule menokome okome i ago Ananaiasi wa okale okome nopa i kakuno,
yakouno oano ta-kale okome
11
eya yapu kiyo akeneya piko wa ibini akene batete kebonoke
kako yapu Yudasene yapu poke eya wa yakapamene. Tasase take Solo neke i yapu nome
meko-pe wa yakapa. Solo einago eni yapu mekome no kowitoa mekome tokono, one
mekata wete kamokoa poano pa.
12
Solo einagome one pulete enekale panago one ibini
Ananaiasi nepa one mekata nokome one lene wa kikoa enekamotoa yono piademe nokale
enekano, one lene kikakapamene wa Ali Muno agoyo akeneya.
13
Nimo okale okome ekee Solo einagome Yerusaleme take neke agale yakoa motane
yene dika dika toamene tete motokama yako wa akedekoimo yatekou.
14
Ika Damasikase
takeka ne kowitoai tiki yene peya po kakoa po yapu pitikamotoapa Akolalike lodo yotokoai
tiki tobou ali-kitame one pipia pade wia metekoli eni pipia-pala oto aua nekedeko wa okale
15
Ali Munoyo okome wete poano pa. Einagopa noanume takoane motokou ago. Ni agome
e ku pa yateneka kini ako tobou ali-kitika anu Iserele yeneka enika eni yene pitiki toa anu
ibini i wa to awea oma pomotoane tekene takoane motokou.
16
Nipa nooke toa dika dika
toamene tete moma poatekoya one ooyamepiadene tukuno, one mekota wete pa wa Ali
Muno agome okale
17
yakamotokome pome one meka yapu keneke tuapea pome Solo
enekome yono pikome okome ame Solo Damasikase take noade nokale ne pono yameteka
ago Ali Muno Yesuyo wetekakolo nuku. Nipa neke leneta wa kikoa enoa Epetane Yomini
awia tagatapeneya mea tomotoane nuku wa okale
18
eina eina Solo one lene kidonome
keneya ketekalogane toe takoa pitakale lene kikoa enaneya. Nitoa kamokakome ue
motaneya.
19
Nititikoa nee pade moa nakale popeyo nekeneya.
Damasikase Take Soloyo Yesunomo
Mo Wia Kakome Akenemo
Soloyo Damasikase take ta pataka-mene Yesuno agale yakoa motane yene-pala opia
meaneya.
20
Nitoapa Damasikase losu yapu kako toa Yesu onepa Akolaline mana wa oma-
kala yakeneya.
21
One eni okamo yatekoi peyame ekete ekee i agopa Yerusaleme take Yesu
kowitoai tokoi yene wia atukakanakago patu. Ikaka edikaki yene po kakamotokome
Akolalike lodo yotokoai tiki tobou ali-kiti mekita liimoa aua poademe nokagomeke imopa i
oko wa ka oa kakeneya.
22
Nitaneyake Solo Akolaline tele patu wedoa kautakoa kama
pokome okome Yesu einakago onepa eina papete Keraisu wa ibini oa piane ago tadeko wa
onekemo pine to awea oa kakale Damasikase take Yu yename one-pala agale topo takoa
amele toameneya.
23-24
Soloyo Damasikase take nitoa mekale eina Yu yename one wia
tukatekoi oi pedoa piitikoa Damasikase ta kago keteponoke ta ete patakakete oto likakete
toa poi piai taneya. Nitaneyake panagomepa Yu yename ne wiadete tiki wa Solo mekata
pome pubu opokale
25
likonu one oya-laweme Solo moa pawe tobou waneke pote kakete
tube ka keneke uuketikoa makoke po kakoa widoa keneke akolono pomotoa keti
tukaketikaneya.
Solo Yerusaleme Take Pokome Tanemo
26
Nitaneyake Solo Yerusaleme take pokome Yesuno agale yakoa motane yene-pala
lipuademe wili toa mekale peyame i agopa Yesuno agale yakoa motokago mena wa piti
motekete one wakeneya.
27
Nitaneyake Banabasiyo one-pala oya kakatekoa Aposelo ali-
kitike aua pokome okome i agopa Damasikase take poademe pokome Ali Muno Yesu
enekale Yesuyo one-pala ko oa kakeneya. Wa naniko Damasikase take pome mekome Yesu
patu kautakoa kakome onekemo atiki toa to awea akeneya wa Banabasiyo Solo kei pia
kakeneya.
28
Nitaneyake Solo Yerusaleme take eni yene-pala ete oto wa opia yakome Ali
Muno patu kautakoa kakome onekemo atiki toa to awea oma yakeneya.
29
Nitoa Geriki agale
yakoa akene Yu yene-pala agale topo takoa okale eni yename one wiadete tuku toa
kakeneya.
30
One wia tukatekoi oi pedoa pikoimo yakatekoa one oya-laweme Solo moa
Sisaria take nabisike wetekapekete ekete neke Tasase take wakapea poano pa wa ue dipike
mekoa wetekaneya.
31
Nitaneyake enipete-mene Yesuno ali atoa Yudea Galili Sameria ta-meneke mekete
tete moameneya poti kilikoa meaneya. Nipa Epetane Yominiyo auapekale Akolalike nate
wene pianeya mea onekele wedoa takama yakeneya. Nitaneyake ete ali atoa Yesuke wene
tugoa mea kipala lipuai lipuai taneya.
Pita Lida Dopa Tatake Pokome Tanemo
32
Pita ta piko peya pima yakome padepete Yesuno ali atoa Lida take mekoika ugu
pome mepaneya.
33
Pome mekome enekale eya ago Iniasi yono kawata tau toomotaneya
pikale enaneya. Einagopa mali ketepo kakoa (8) ponoka toa-kama pa dikaneya walaike pia
kakeneya.
34
Pitayo einago enekome okome i ago Iniasi nepa Yesu Keraisuyo latekakono,
neke yene pitike tatikoa pitikoya wete moa ewetoano, kamoa wa okaka eina eina kamokoa
kakeneya.
35
Nitaneyake Lida Sarone tatake pitikoi peyame eina latoa pokago enoai tekete
tepe kolotini pekoa pia Yesuke wene tuganeya.
36
Einapete Dopa take Yesuno agale yakoa motane atoa Tabisa wa ibini akene atoa
tuaneya. Tabisa Geriki agaleke eketepa Dokasi wa ibini ikiya. Einatoapa epetanele-kama toa
ali atoa auapekala tane atoa.
37
Einatoa yene pia mea tukale one oya-laweme ueme abe
kogatekoa ako yapu moa pipaneya.
38
Lida taapa Dopa ta namike pikale tokome Yesuno
agale yakoa motane yename ekete Pita Lida take ponome mekome tokono, wida
meameneya tone Dopa take wete noo wa Pita enemopoe wa ali takuta moa wetekaneya.
39
Nitikoli pekete ne noo wa kowitikoli nipa patoe wa Pita einagota-pala opia pekeneya.
Nitoa tumai yapu nokale einagotame ako yapu aua pokoli nepo meane atoa-kitame Pita
unukamoa kakete kini tigini mamina eya pikoa kakete ekete ika iyapa i tuane atoame tone
takoa mekala toka wa Pita yamea kakete komo oa kakeneya.
40
Nitikoli Pitayo peya akolono
moa wetekatekoa neuwe tukua Akolali kowitaneya. Nitoa peketapekome tuane atoa
enekakome okome Tabisa wete kamoa wa okaka leneta kikatapeneya. Nitoa Pita enekome
kamokoa meaneya.
41
Nitikale one yono moa katekamotokome nepo meane atoa-kitika ete
Yesuno agale yakoa motane-kitika noe wa kayo oa motokome einatoa i latoa kakona wa
yametaneya.
42
Nitaneyake Pitayo tanemo Dopa take oa pupitikaneyake eni take mekoi peya
mati Ali Munoke wene tuganeya.
43
Pita onepa Dopa take eida pa mea kakeneya. Nipa kai
kepeneme padeya padeya latia tane ago Saimonane yapu meaneya.
Aposelo Aposelo
<<
99
>>
Aposelo Aposelo
<<
10 10
>>
10
Pita Koniliasi Mekata Pokome Tanemo
1
Sisaria takepa Koniliasi wa ibini akene ago meaneya. Einagomepa Itali wa ibini akene
poyo yatene yopia meaneya.
2
Einagomeka one yapu meane ali atoameka Akolalinele
takama pote oneke nate wene pia lukoa meaneya. Nitane ago tokome onekeya-kiti
ponopene Yu yene tatikoa mekala toa Akolali kowitoai toa taneya.
3
Wa padepete lou
wegoukakaka (lou pini teboloke) tadiya pule pitikome enekale Akolaline edelo ago pade
nokale enaneya. Edelo ago eni nokome okome i ago Koniliasi wa okale
4
piti tokale nepikoa
pikome okome Ali Muno edade noke kake oko-pe-kale okome Akolaliyopa neke kowitike
okamo yakoa nekeya-kiti tatia metekale enoa tokome ne wene taneya mekono,
5
Saimone
Pita enemotokapoe wa neke pupu ali pade-mene Dopa take moa wetekamene.
6
Einagopa
kai kepeneme padeya padeya latia toko ago Saimonane yapu tube kusa ue liti mekome
tokono, nitamene wa edelo agome akeneya.
7
Nimo oomotokome pokale Koniliasiyo eya
taneya. One pupu ali takuta ni oneke lukoa meane poyo ago pade Akolalinele wedoa
takama yakene ago einago-mene noe wa kayo oa motokome
8
one pulete enekanakamo-
kama to awea okome okome Dopa take Pita enemotokapoatino poe wa wetekaneya.
9
Podolikama einago-mene Dopa take tigotokakoa nokoika Pitayo Akolali kowitademe
one meka yapu yalini waneke ate lewia pome mepaneya. Nipa lou mataike ponome kakale
taneya.
10
Nitoa mekome kobu tokale nee noademe akeneya. Nitane-pete yapu pine yename
nee noatekoi nodokakete kakoika
11
Pita pule pitikome enekale tibu peaneya pikata mamina
petene nami-meneke po kakoa itonoke tukaketikakale enaneya.
12
Eni mamina kagonoke eya
kuya kai kaya ini lobutaneya pikale enekakoa
13
agale ludu nokome okome Pita ne wete
kamoa eniya-kiti moa wia namene wa okale okome
14
Ali Muno wini okolepa toamou. Neme
yametekoya-kitipa toto Yu yename kekaneya latikoa noamokoya-kiti toko-la. Enika eniya
pade wete noamokouya tekene noamou-kale
15
agale ludu wa nokome okome ika iya
nomotoane latikakou wa Akolaliyo yametekaya-kitipa neke kekaneya wa wamea. Eniyapa
moa na wa akeneya.
16
Enilepa tebolopeta tokala taneya. Nititikaneyake eina mamina petene
a tibuke wete katekamotaneya.
17
Nitikale Pita atu kamokoa mekome eni pulete enekuyapa edoa tokoto patu wa wene
kibutua mekaka Koniliasiyo moa wetekane ali-mename Saimone one yapu manika kako-pe
wa pitia yakatekoa one meka yapu kago keteponoke note kananeya.
18
Nitoa kayo ekete
ekete Saimone one pade ibini Pita wa iki ago wida meko-pe wa yakaneya.
19
Nimo kayo
ekete kakoika Pitayo one pulete enekanakale wene kibutua mekale Epetane Yominiyo one-
pala okome ali tebolome ne tuku toma note kei kagoke kakete tikino,
20
wete kamoa kotua
pa. Poome toameneya eni ali-mene-pala opia pamene. Anume oto wetekakolu tokome ni
nikino, opia pamene wa okalepa
21
Koniliasiyo moa wetekane ali-mene kakoita pokome
okome kime tuku toniki agopa no i kakuno, edekolo tuku toniki-pe-kale ekete
22
poyo
yatene tobou ago Koniliasiyo poe wa wetekakale nokoo. Einagome epetanele-kama toa
Akolalike poti wene pia lukoa mekagopa Yu yene peyame one kei piai tiki. One mekata
Akolaliyo one edelo ago pade wetekakale nokome okome Pita oto nomotono ta. One
nokome okamo neme yakamotoane ukuno, one mekota neke pupu ali pade-mene
wetekamene wa edelo agome Koniliasi-pala oka toa toto ni nokoo-koli okome
23
nipa i yapu
piatono noe wa makutukoa motaneya.
Pimotokome podolikama Pita einago-mene-pala opia pekeneya. Dopa take Yesuno
agale yakoa motane ali pade-kitika kipala opia pekeneya.
24
Pita eni yene-pala Sisaria take
noademe nokale Koniliasiyo one wamene laine-mikiti one oya-lawe enika eni ali atoa
obokoa yapu nepia meaneya.
25
Nitaneyake Pita one yapu eida tuapea noademe nokaka
Koniliasi kotua pokome Pitane kawane keti pekoa pitakome ke wa one kei pianeya.
26
Nitikale Pitayo one yono moa katekamotokome okome noka pa agono, winile toameano,
kamokoa ka wa moa katekamotaneya.
27
Nititikoa one-pala ko oma pome yapu pokome
enekale ali atoa peya mati eida oboa mekoli enaneya.
28
Enekome okome no Yu yatene tone
kaua-mikitame kitau laukane toa pa yatene ali-pala opia poamoa yapu-kitika ugu poamoa
toko. Eni kitau noanumeka laukoane mekouyake Akolaliyo pule metekome okome odene
agoka pa yatene ago wa wamoa kitau laukameamene wa oka.
29
Nitikale tekene Koniliasiyo
moa wetekane ali-mene no mekouta nokoli ko amoane wete oto nukuno, no enemonomotoa
einago-mene edekale moa wetekakoiya-pe wa Pitayo yatekale
30
Koniliasiyo okome eko
ikouna ipetepa lou pini teboloke Akolali kowitoane mekolu panago yati yati tane mamina
kakeneya anu lene timini lono kotikatapea nome kaka.
31
Nitikome okome Akolaliyopa no
neke kowitoai teke okamo yakoa nekeya-kiti tatia ponopene ali atoa mea tokale enoa
tokome ne wene taneya mekono, eya toano ta.
32
Dopa take Saimone one pade ibini Pita wa
iki ago eya agono yapu pitimekawe kai eya kepeneme padeya padeya latia toko ago
Saimone one yapu tube kusa ue matanu liti ponome mekome tokono, einago enemopoe wa
neke pupu ali pade-mene moa wetekamene wa edelagome okale
33
eina eina ne oto
nomotoane anu pupu ali pade-mene moane neeke wetekakou. Ne epetekoa teke opi
nokono, ke wane uku. Akolaliyo neme a wa oka toa yakoono, Akolaline leneke toto peya i
oboa mekono, wete a wa Koniliasiyo akeneya.
Pitayo Koniliasi Yatene-pala Oa Metanemo
34-35
Koniliasiyo nimo okale Pitayo okome papetepa Akolaliyo no Yu yatene odene one
wa takoa moa yopikoa mekono wene pianeya mekou. Opa e ku pa yatene oneke nate wene
pianeya lukoa mekete kiyo akenele toma yaki peyaka Akolaliyo one wa pawe toa talo toko
wane wene tuku.
36
One agalepa Iserele yene mekoika oa memotoa Akolaliyo Yesu Keraisu
moa wetekaneya. Nitikale nokome Akolali-pala poi teigoa wawa odene wene pianeya
meatekoimo i i wa oawineya yakeneya. No Yu yatene e ku pa yatene peyaka yopia meko
Ali Muno Keraisu Yesuyo nitaneya.
37
Kipala i uku agalepa Yudea ta piko peyake oa
pupitikanemo kimeka yatekete tokoi. Yoneyo ali atoame ue moatekoimo oma yawa ue
motokatekaneyake Galili take titimoa oa pupitikanemoke uku.
38
Enipa Akolaliyo Nasarese
Yesuke Epetane Yomini moa awitikoa tele lukoa tokale ele kule epetanele toa ni Setanuyo
moa kautane yene peya latekama yawa taneya. Akolaliyo one auapekala tokale nitaneya.
39
Yu yatenane ta piko peyake Yerusaleme takeka Yesuyo padele padele toma yakale-
kama tone leneme enekooya tekete dika dika wa to awea amele tokolo uku. Yesuyo
nitaneyake tobou ali-kitame dekoa moa yomo lekaneyake wia tukakoi.
40
Nitikolipa ta tebolo
takoa pataka-pete Akolaliyo Yesu moa kamotokatekoapa ali atoa mekoika pono
yamepomotoa taneya.
41
Nitaneyake ali atoa peya pono yametaneya mena. One toma yakale
enemotoa Akolaliyo takoa kakapikana yene odene pono yametekala toka. Nipa one kamoa
pootokaneyake onepala opia mekete nee ueka nokala tokoo yene toto odene pono
yametekala toka.
42
Nitikome okome onekemo ali atoa-pala i i wa akama yamene. Ni wipitia
ta pataka-petepa ali atoa peya tua pokoi-kitika yomini meaneya mekoi-kitika kini koiso
akoane omotoa Akolaliyo one moa kakapika wa akama pamene wa pono yamenokome
oka.
43
Einagokepa Akolaline agale papete to awea akane ali peyame eya wa ekete akeneya.
Oneke wene tugoa mekoi peyapa Akolaliyo kini poanele toma yakoike po letu mekakana
keetapea mitikoo. Nipa Yesuno ibinike tokome nitoo wa Pitayo akeneya.
Pa Yatene Ali Atoake
Epetane Yomini Awinanemo
44
Pitayo nimo oa kakaka one agale yakakoa mekoi peyake Epetane Yomini awinaneya.
45
Nitikale enekete eya yene Yesuke wene tuganeya mea Pita-pala opia nekene Yu ali-kiti
wene kainya pianeya. Nipa Akolaliyopa Epetane Yomini kiwike namolo awitikakana toa i pa
yatenekeka awitikadeko wa wene kainya pianeya kakete akeneya.
46
Eni yename agopa tane
agaleke Akolali kei pia kakoli yatekete tekete ni akeneya.
47
Nitikoli Pitayo okome Epetane
Yominipa totoke namolo awinokana toa i pa yatenekeka awinadekono, ue motokameo wa
teyo omotoa-pe.
48
Yesu wedekoa ue moamene wa okome eni yene ue motokaneya.
Nitikale Koniliasiyo one yenameka ue mootokoapa kipala opia mea kamene wa Pita
kowitikoli tokome ta pataka pade-meneke eida pa meaneya.
Aposelo Aposelo
<<
10 10
>>
Aposelo Aposelo
<<
11 11
>>
11
Pita Yerusaleme Ta Wakapea Pokome One
Toma Yakanakamo To awea Akenemo
1
Mone pa yenameka Akolaline agale yakoa motiki wa akedekoimopa Aposelo ali-
kitame yakaneya. Yude ta piko peyake Yesuke wene tugoa meane yene peyameka
yakatapeneya.
2
Wa naniko Pita Yerusaleme take ate wakapea nome mekale eina ali padeka-
kitame one kikoa akeneya. Nipa Akolaline mati-kiti latiadetepa ali mati yatene kepene
teigamedeko wa akene yename Pita kikoa ekete ekete
3
nepa kepene teigamene pa yatene
agono yapu poke one yene-pala opia meke nee nakeneya.
4
Nitikoli Pita one yakome
tokanakamo titikome toka-pala wipitikome tokata eya wa to awea akeneya.
5
Dopa take Akolali kowitoane mekene pulete keneya enekolu a tibuke padeya mamina
petene nami-meneke po kakoa no pitikou pitia ketipea tukaketikakale enekou.
6
Leneme
nepikoane pikolu eya kuya yo tane kai eteya egetamene kai kaya ini enika eniya peya
lobutua pianeya enekou.
7
Nitoane yatekolu agale ludu nokome okome Pita ne wete kamoa
eniya-kiti moa wia na wa okale
8
yatekene ekene Ali Muno wini okolepa toamou-li. Neme no
yametekoya-kitipa toto Yu yename kekaneya latikoa noamokoya-kiti. Enika eniya pade wete
noamokouya tekene noamou-kolu
9
agale ludu wa nokome okome Akolaliyo nomotoa
latikaneya-kitipa neke kekaneya tokolo noamuku wa wamea wa oka.
10
Enilepa tebolopeta
tokala taneya. Nititikaneyake eni mamina petene a tibuke ate katekamotaneya.
11
Nitikale eina
eina ali tebolo no mekou yapu kotikatapea note kakoi. No enemonomotoa moa
wetekaneyake Sisaria ta kawa nokoi.
12
Nitikoli Epetane Yominiyo nopala okome poome
toameneya wini ali-mene-pala opia pamene wa okale opiane pokou. Nitikolupa Yesuke
wene tugoa mekoi ali ko melepu (6) kakoa nopala Siseria take opia pokoi. Einali-kiti i note
kaki. Toto peya pote Koniliasine yapu tuapea pokolo
13
Koniliasiyo one pulete enekana toa
kekome okome edelo ago pade one yapu nome kakome okome Saimone one pade ibini
Pita wa iki agopa Dopa take mekome tokono, enemotokapoe wa neke pupu ali pade-mene
moa wetekamene.
14
Einago nome mekomepa neeka neke yapu pitiki-kitika toa moateko
agale oa meoo wa edelo agome oka toa Koniliasiyo nopala oka.
15
Nitikale agale titikene
okouka Epetane Yomini eni yeneke awia tagatapeka. Nipa totoke namolo awinokana toa
toka.
16
Nitikale enekene inapa Yesuyo namolo wa oa pikanakale taatekoa tadeko wane
wene tokou. Nipa Yoneyo ali atoa ue motokaneyake oneme ue motokou toane Epetane
Yomini kiwike awitikou wa oa pikana wene tokou.
17
Nipa Yesuke wene tugakoo-kiti totoke
Akolaliyo one Epetane Yomini awitikakilepa nami kakameneya tokana toa eni pa yenekeka
awitikakano, ipa Akolaliyo tadekono, one wene pika toane tagamedekale eni yene ue
motokakou wa Pitayo e yene-pala akeneya.
18
Nimo okale yatekete e yename Pita wa kikoa wameneya Akolali kei pikete ekete pa
yatene ali atoaka mea kama poadetepa oneke tepe kolotini pekoa pimotoa tadeko wa
Akolali kei pia kakeneya.
Adioke Yene Yesuke Wene Tuganemo
19
Yu yename Sitipene wia tukatekoa ete ali atoa tete motokakala tokolipa Yesuke wene
tugoa meane-kiti Yerusaleme ta to a Pinisia Saiperase Adioke ta-meneke tadoa pekete Yu
yene takoa Yesunomo oa mekala taneya.
20
Eni yene padeka-kiti Saiperase Sairini tatake
opiane ali-kiti Adioke take pote mekete Ali Muno Yesunomo pa yatene ali atoa-palaka oa
mekala taneya.
21
Nipa Ali Munoyo auapea yopikale oa mekala tokoli eni pa yatene ali atoa
peya matiyame yakoa motekete oneke tepe kolotini pekoa pia lukoa meaneya.
22
Nitaneyake Yerusaleme take Yesuke wene tugoa meane-kitamepa eni tanemo
yatekete tekete Banabasi takoa moa Adioke take poano pa wa wetekaneya.
23
Nitaneyake
Banabasi Adioke take nome mekome enekale Akolaliyo eni yene pewe witikome tadekale
enekome wedia mekome okome Ali Munagole wedoa takama pamene wa kini wene weye
akakala taneya.
24
Banabasi einagopa epene wene pianeya meane ago. Epetane Yomini
oneke awia tagatapeneya tokome Yesunole wedoa takama yakeneya. Nitane ago Adioke
take eida mekakoa eni yene peya mati Ali Muno-pala lipukala taneya.
25
Wa padepete Banabasiyo Solo enemopou wa Tasase take tuku topaneya.
26
Tuku
toa kawa enamutukome Adioke take pata wa wakapea aua pekeneya. Nitoa Adioke take
poteta mekete odene malike Yesuke wene tugoa meane yene-pala obokala taneya. Obokala
tekete ali atoa peya mati olaukoa kakeneya. Yesuke wene tugoa mekoi-kitipa Keraisuno ali
atoa wa ibini ikilepa eida Adioke take titia taneya.
27
Einapete pake Akolaline agale akane ali pade-kiti Yerusaleme kawa Adioke take keti
note menaneya.
28
Note meketepa eya ago Agabasiyo okome ta piko peyake kobu igi mati
noo wa oa pianeya. Nipa Epetane Yominiyo wene takaka toa akeneya. (Eni kobu igi mati
taatekakilepa Lomane ako tobou ago Kelodiasiyo ta piko peya yopia meane-pete taneya.)
29
Agabasiyo nimo okale yatekete Yesuke wene tugoa mekoi peyame kini Yudea take meki
oya-mikiti auapeato wa padeya-kiti kini pikoi toa takoa oboa pikakala taneya.
30
Nitatekoa
Banabasi Solota metekete ekete Yudea take Yesuke wene tugoa meki yene yopiki ali-kiti
metekapoatino poe wa wetekaneya.
Aposelo Aposelo
<<
11 11
>>
Aposelo Aposelo
<<
12 12
>>
12
Pita Po Yapu Pitaneya Toa Motanemo
1
Eina-pete laigoa tobou ago Erodeyo Yesuke wene tugoa mekoi yene padeka-kiti tete
motokakala taneya.
2
Nitikomepa one poyo ali-kitame Yonene wamene ago Yame kabe
teigamotoa taneya.
3
Nitikale tokome Yesuke wene tugamene Yu yene wedia mekoli
enekome ena toane Pitaka mou wa one poyo ali-kitame dekoa motokamotoa moa
wetekaneya. Enilepa Yu yename mono mono akamene palawe yoa nakene wa ibini akene
toge kia mekoi-pete taneya.
4
Nitikale Pita dekoa moa aua note po yapu pitikakoli one poyo
ali-kiti tuyono tuyono wa yopikakala tomotaneya. Nipa Yu yename eni toge kia nootokoa
mekoika Pita moane eni Yu yenane lene yoto kakoane pitiane yakou wa Erodeyo wene
pikome taneya.
5
Nitikale Pita po yapu eida pia mekalepa Yesuke wene tugoa mekoi-kitame
Pitane kowitikoai taneya.
6
Erodeyo podolikama Pita moane pitiane yakou wa wene pia pitikakoa Pita po yapu
pitikome atu pitikata poyo ago takuta one kouna takoa dekamoa pitaneya. Nipa kapa pota
takuta kakoa kebetoa pitikaneya. Akolono kago keteponokeka poyo ali pade-kiti eida
kakete yopikoa kakeneya.
7
Nitikakoa Ali Muno agono edelo ago Pita pitikata kotikatapea
nome kakale one po yapu pitikata pa toa kakeneya. Nitaneyake edelo agome Pitane podene
wia kamotokakome okome wete kamokoa kamene wa okaka one yonoke kakane kapa pota
kotokoa pitaneya.
8
Nitikale edelo agome okome neke matiu moa kawa neke kawa yeneka
moa mekoa ta wa okale nitaneya. Nitikale okome neke tokoo mamina peteneka
lobutukoano, no pukuka namene wa oa pekeneya.
9
Nitikale Pitayo litima pokomeke edelo
agome tokalepa niminile toko wa wene toameneya. Nipa ipa pulete tukutu patu wa wene pia
pekeneya.
10
Nitoa edelo ago Pitata poyo ali tuyonome yopia kakoi kago patukoa penaneya.
Wa eina toa poyo ali tuyonomeka pade kago yopia kakoita patukoa ponetekoa kapame
latiane kago keteponoke tugoa kapaneya. Nitikoli ena kago one weneme pekale akolono
witoata pekeneya. Nitoa batete ludu pote ka katepake edelo agome Pita tewitikoa pekeneya.
11
Pokalepa Pita one-pala tokale niminile tadeko wa wene tokome okome Erodeyoka
Yesuke wene tugamene Yu yenameka no i ago tete meou wa wene pokoinake Akolaliyopa
one edelo ago moa wetekakale toa motokome tadeko wa akeneya.
12
Nitoa eni wene kibututukoapa Yone one pade ibini Make einagono nine Mariane
yapu pekeneya. Eni yapu keneke ali atoa peya mati oboa mekete Pitane kowitikoa meaneya.
13
Pita eni yapu kagoke pome kakome wi wi tokale yatekome yapu pupu atoa pade Rodayo
kago pekademe nome yatekale
14
Pitayo okomokale yatekome wedikome tokome kago
pekameneya yapu kouna lono teyapea pokome okome Pita kago kene akolono ku nome
kakome toko-kale ekete
15
leau eke oko-koli okome e 'e mena. Pita kagoke ku kakome toko
wa okala tokale ekete ni tadekopa Pita one edelo ago latia nome kakome toko wa wene
toamekete akeneya.
16
Nitikakoa Pitayo akolono kago wi wi toa kakale note kago
peetapekete enekete ekete ekee inapa Pita tadeko wa ka oa kakeneya.
17
Nitikoli Pita yoname
kawikatekoa kakomepa Ali Munoyo edelo ago moa wetekakale po yapu nome akolono aua
pokanakamo i i wa to awea akeneya. Nimo ootokoa kakome okome kipala i ukumo Yameka
anu ete oya-mikitika mekoika to awea akapoe wa oomotokome padeya pekeneya.
18
Podolikama pene ta patakaka poyo yename ekete ekee inakago Pita manika pokome
pokato patu wa poome kau kau yakeneya.
19
Erodeyopa einago wete tuku topoe wa okale
tuku tokoa kawa teko tokale wakoli eya taneya. Ete piapa Pita yopia kakoina poyo ali-kiti
pitia yakatekoapa einago yopia potokadeki wa ootokoa kakome i poyo ali-kiti wia tukoe wa
ete poyo ali-kiti moa metaneya. Nitimotokome Erode Yudea ta tewitikoa Sisaria take keti
pome mepaneya.
Erode Tukome Tuanemo
20
Erodeyopa Taia Saidone tatake pitikoi yene-pala kotimi yoa meaneya. Nitikalepa eni
yene koukoa nekete one pitika yapu luku talo tokago Bilasasiyo kiwi auapemotoa oya
kakatekoa Erode mekata nekete ekete tone noateko neepa neke take-kama topo toa
monokala tokono, odene wene piato wa kowitaneya.
21
Nitaneyake ipete wa namene wa oi
metekana-pete eni yene wa nokoli Erodeyo tobou ago kawateka mamina-mene moa kawa
tobou ago meateka walaike pome mekome eni yene-pala agale oa metaneya.
22
Nitikale
yatekete kayo ekete ekete inapa alime oko toa mena. Akolaliyo oko toa eni okono, yakatoe
wa kayo oa kakoli
23
eina eina Akolaline edelo ago padame one winaneya. Erodeyopa ipa
Akolaliyo wene takako toane uku wa Akolali kei piamokale tokome taneya. Nitikalepa
pukiname tepe noa te ianeyake tukome tuaneya.
24
Nitaneyake Akolaline agale ta piko peyake
oa pupitikama pekeneya tokome ali atoame yakoa moma-kala pekeneya.
25
Banabasi Solotame Yerusaleme pekete tatikoa metekatekoiya-kiti tatikoa
meemotekete Adioke take wakapea pekeneya. Nipa Yone one pade ibini Make einago-pala
aua pekeneya.
Aposelo Aposelo
<<
12 12
>>
Aposelo Aposelo
<<
13 13
>>
13
Banabasi Solotame Yesunole Takama
Yamotoa Takoa Moa Wetekanemo
1
Adioke take losu yapu oboai toa Akolalinele takakoi-kitipa padekame one agale
to awea akoa padekame onekemo pine to a olaukoa taneya. Eya yename nitoa meaneya.
Banabasi ni Simione ni Lusiasi ni Maneyene ni Solo. Simione one pade ibini Naisa wa
akeneya. Lusiasi onepa Sairini take ago. Maneyene einagopa Erode-pala tau takoa egetane
ago. Eni Erodepa tubetoa wetini toa kakome Galili ta yopia kakeneya.
2
Eni yename
Akolalinele takoa mekete nee wawa mekoika eya taneya. Epetane Yominiyo kiwi wene
takakome okome Banabasi Solotame anu pade pupu takamotoane kayo okouno, anu eni
pupu takamotoa einagota moa kakamene wa akeneya.
3
Nitikale eni yename nee wawa
kowititikoapa nitato wa yono pia wetekaneya.
Saiperase Take Tanemo
4
Epetane Yominiyo okana toa tekete wetekakakoli Banabasi Solota Selusia take keti
pote pipaneya. Piimoteketepa tube ue dipike peapetekoa mea Saiperase take pote
mepaneya.
5
Saiperase ta keneke piko Salamise take pote mekete Yu yenane losu yapu kaka
toa Akolalinemo oa mekutu toma pokoli tuali Yone opia pokome auapema pekeneya.
6
Saiperase ta ludu pima yawa eka matanu lono Pepose take pekete otoi ago pade Ba-
Yesu wa ibini akene ago kotuaneya. Einago Yu yatene agomepa Akolaline agale akama
yakuna wa oa meake otoi ago mekome ali atoa oa yotokakala taneya.
7
Einagopa Saiperase
ta yopia kakago Sesiasi Polasi-pala opia-kama yakene ago. Eni ta yopikago Sesiasi Polasi
wene muno meane ago tokome Akolaline agale yakademe okome Banabasi Solota oto
nomotoa wa agale oa wetekakale nekeneya.
8
Nitikoli tobou agome kini agale yakoa
motokaya tokale Elimasi wa ibini akene agome kita-pala neno oa kakeneya. (Einago Geriki
agaleke Elimasi wa ibini ikilepa otoi ago wa ekete iki.)
9
Nitikale Solo one pade ibini Polo wa
akene agome eya taneya. Epetane Yomini oneke awia tagatapekale kakome eina otoi ago
nepikakome okome
10
nepa nipa Setanuno peku noa tokagono, padele padele kiyo akenele-
kiti moa agopa takade wili tokoa kawa poanele-kama toa ali atoa oa yotokoa toko.
Akolaliyo nimini akene agale pamo tetepo takoa koigaku peke toapa manipete wako patu.
11
Akolaliyo ne kibu moono, nepia. Opii-mene neke leneta liitapeneya yake lou pa ka
enameneya pa yawa meoo wa Poloyo okale eina eina one lene libu takatapekome
yomiyomume agopa takaneya. Nitikale one yono moa aua yawatekago tuku toa kakeneya.
12
Nitikale enekome ta yopikagome okome Ali Muno agonomo i agotame olaukoa kakipa
etene nimini akediki wa wene kainya pianeya kakome yakoa motaneya.
Pisidia Ta Keneke Piko Adioke Take Tanemo
13
Nitaneyake Poloyoka one oya-mikitameka Pepose ta tewitikoa ue dipike peapetekoa
mea pote Pabilia ta keneke piko Peka take witapeneya. Eidapa Yoneyo o yene tewitikoa
Yerusaleme take wa wakapea pekeneya.
14
Nitaneyake o yename Peka ta tewitikoa Pisidia ta
keneke piko Adioke take pote mepaneya. Eidapa ko mea pupu toamene-pete losu yapu
tuapea pote witipitoa meaneya.
15
Nitoa mekoli Mosesene agale tiginika Akolaline agale
papete to awea akane ali-kitame akene agale tiginika oi moa peya takakete losu yapu talo
tane ali-kitame eya taneya. Agale wetekakete ekete oya-lawe i oboa meki ali atoa auapeatiki
agale oa meadete eketepa yakamotono oe wa akeneya.
16
Nitikoli Polo kamokoa kakome
yono pitikakome okome
Iserele ali-kitika Akolalike nate wene pia one kowitoai tiki pa yatene ali-kitika kiwi
peya-pala i ukuno yakoe.
17
Iserele yenane Akokaliyo tone kaua-mikitipa one wa takoa
motaneya. Nitaneyake mone Idipi take pote mea kakoli pewe wia kakale eida pitikali opia
tagatapeneya. Wa naniko Akolaliyo padele padele telekole toa eni ta tewitikoa aua
pekeneya.
18
Nipa mali padeka noi kakoa (40) ponoka toa-kama tone kaua-mikiti mama moa
ali piamene take egetoa aua yakeneya.
19
Nitimotokome Kenane ta ludu pitane yatene tatono
kakoa (7) yatene wia atukoa eni yatenane ta tone kaua-mikiti kini wa yametaneya.
20
Nipa
mali ege kadukaka pogime kadukoa (450) mali ponoka toa edikoa pewe wia yopia
kakeneya.
Nititikaneyake kini tanele takoa enoa akatekoi ali-kiti Akolaliyo moa kakama pome
wipitikomepa one agale akane ago Samuele moa kakaneya.
21
Nititikaneyake tone kaua-
mikitamepa kini Ali Muno meatekago neme takoa moa kakakamene wa Akolali kowitoai
tokoli Bedamine yatene ago Kisene mana Solo takoa moa kakakaneya. Nitaneyake mali
padeka noi kakoa (40) ponoka toa Solo einago Ali Muno mekome talo toa kakeneya.
22
Akolaliyo einago Solo katekatekoa one luku Depidi kini Ali Muno moa kakakaneya.
Nitoapa Depidi kei pikome okome i agopa Yesine mana Depidi nota odene wene pianeya
yakagono, anu wene pikule-kama too wa one kei pianeya.
23
Wa wipitikome toto Yu
yatene toa momotoa tikilepa einago Depidike tagakago Yesu moa kakaneya. Nipa kiwi
yatene auapekene dikou wa papete oa pikana toa taatekoa taneya.
24
Yesu wete taatekoa
noameneyake Yone namolo takoa nokome Iserele yene peya kini namolo poane wene wia
wawa tepe kolotini pekoa piatino, ue moamene wa mo wima yakeneya.
25
One eni pupu toa
peya takateka tigotokale kakome okome nopa edane ago kakuno wene piki-pe. Papete oa
piane toa taatekoa noatekagopa no mena. Nopa einago menake one naniko nomotoane no
namolo takoane nuku. Einago nokolopa one auapekilepa toatekuyake pa ago tekene one
kawa yeneka oyake kekamele toamoko wa Yoneyo oka.
26
Anu oya-mikiti Eberameke tagene yeneka Akolalike nate wene pia kowitoai tiki mone
yeneka Akolaliyo ali atoa toa moateka agale oa wetekakilepa totoke oa wetekaneya.
27
Yesu
taatekoa nokale Yerusaleme take pitikoi yenameka kini tobou ali-kitameka einago eni
nekedeko wa wene toameneya. One wene toamekete koiso akakoipa nipa oneke papete oa
piane toa taatekoa taneya. Einapa kini ko mea pupu toamiki-pete-kama Akolaline bokuke
oneke wia mekane agale oi mokala tikiyake taneya. Nipa Akolaline agale papete to awea
akane ali-kitame oneke papete wia mekapiane agale oi mokala tikiyake nitaneya.
28
Einagopa
Pailase mekata aua pekete i ago wia tukakoano ta wa akeneya. Nipa one wia tukatekoi nami
kawameadekaleka pa puputua taneya.
29
Nitoapa Akolaline bokuke oneke papete wia
mekapianele-kama toa peya takatekoapa one tigini yomo lekaneyake wia dekaneya to a
moapa tukoi-kiti piadete kokapiane kotake moa pipaneya.
30
Nitaneyake one eni tuaneya
pikata Akolaliyo moa kamotokaneya.
31
Nititikaneyake eya yene Galili ta laigoa onepala opia
yawa Yerusaleme take pokoina oya-lawe pono yametekala taneya. Nipa ta kainya mati
pataka toa tokala taneya. Nitikale enekoiya tekete one eni oya-laweme toto Iserele yatene-
pala dika dika wa to awea oma yaki.
32-33
Einapa Yesunomo kini wene epetekateko ko
totome eya wa to awea oko. Akolaliyo kiwi yatene auapekene dikou wa tone kaua-mikiti-
pala papete oa pikana toa taatekoa tokomepa kiwike tagene yene toto kako-pete Yesu
tukale moa kamotokaneya. Eni toatekalekepa Akolaline bokuke taku takoa samo lo agale
eya wa wia mekaneya piko.
Nepa anu mana. Opi nopa neketai latiane meku wa Akolaliyo mana-pala akene toa wia
mekaneya piko.
34
Akolaliyopa one tukale moa kamotokakale tigini wa lomuamatekaleke eya wa akeneya.
Auapekene dikou wane Depidi-pala kiyo akenele toatekoumo oane pikouna toane ne
auapekene taatekoane tou wa Akolaliyo mana-pala akeneya.
35
Enilekepa panagome Akolaline bokuke eya waka papete wia mekaneya.
Nekele-kama takama pomotoa takoa motokago tukalepa lomumotoa neme wawamoo wa
wia mekapianeya.
36
Depidiyo Iserele yene yopia mekome Akokalinele takoa peya takatekoa tua
pekeneya. Nitaneyake one kaua-mikiti oloyo toai tanetake one yename oneka oloyo tokolipa
one tigini eida lomuaneya.
37
Depidipa nitaneyake Akolaliyo moa kamotokane agopa
lomukile toameneya.
38
Nipa anu oya-lawe kiwi eya wane wene takakene uku. Einago
Yesuyo tokalekepa Akolaliyo kini poanele toma yakoike po letu mekakana keetapea mitikoo
wa totome kipala to awea oko.
39
Akolaline leneke poanele toamene yene meadete Mosesene
totono litia tootapeato wa kime wili toa kawa teko tokolo tetekoa poanele pa tiki. Nitikiyake
Yesuke wene tugoa meki peyapa Akolaliyo poanele toamene yene tetepo takoa wene
keaneya meko. Yesu tukaleke ni toko.
40
Akolaline agale papete to awea akane ali-kitame
pubu akene toa kipala takayano, wedoa meamene. Akolaliyo akene toa eya wa pubu
akeneya.
41
Tedu mea ya takoa tiki-kiti kipala eya wane uku. Anume tukule enoa ka oa tuati. Kiwi
meki-petepa padameka namolo toamokoinakale toadene tekene ni uku.
Enilepa i i wa panagome to awea okaleka kime yakoa moamoi wa akeneya wa
Poloyo e yene-pala oa kakeneya.
42
Nitaneyake Polo Banabasitame eni losu yapu tewitikoa poadete kakoika e yename
ekete ye pupu toamatiki-pete wakapea note enika enimo wa oa menamene wa kowitaneya.
43
Nitoapa kini losule toa peya takatekoa padeka-kiti Yu ali-kitameka Yu yene-pala lipuane
pa yatene ali-kitameka Polo Banabasita litia pekeneya. Litia nokoli e yene-pala ko oma
pekete ekete Akolaliyo kiwi pewe wima pomotono, onekele wedoa takamoa pamene wa
oma pekeneya.
Polo Banabasitame Yesunomo
Pa Yatene Ali Atoa-pala Oa Metanemo
44
Wa ye ko mea pupu toamatekoi-petepa eni take pitane ali atoa pa natetekoa kamotoa
ete peyame Ali Munagonomo yakadete koukoa nekeneya.
45
Koukoa note kakoli enekete Yu
yene wene mati poologaneya kakete Polo-pala neno oa tea agale oa taneya.
46
Nitikolika
Polo Banabasitame piti moameneya kakete ekete Akolalinemo oa metekilepa Yu yene kipala
namolo takoa ato wa totome oa metekoyake kote tokolo waki. Nipa kipa Akolaline take
mea kamele toamene tetepo takakete ikili tokome kiwi tewitikoa wawa mone pa yeneke poo.
47
Tone Ali Muno agome tamene wa oka toa toadete toko. Eya wa oka.
E ku mone pa yatene-kiti pa takalogamene wane kiwi moane kakapikouna. Nipa e ku
yatene ta piko peya pitiki toa pekete kiwi toane motukumo oa
pupitikakamotoane tekene tokouna wa Ali Muno agome oka wa Poloyo
akeneya.
48
Nimo okale yatekete e pa yatene ali atoame ke wa Ali Munono agale kei pia kakeneya.
Nitaneyake Akolaliyo mea kama pomotoa takoa moopiane ali atoa peyame Yesunomo
yakoa motaneya.
49
Ali Munono agale eni ta piko peyake oa pupitikatapeneya.
50
Nitaneyake Yu
yenamepa Polo Banabasitane agale yakamatoe wa Akolalinele takama yakene ibini akene
atoa-kitika eni take tobou meane ali-kitika oa kamotokama yakeneya. Nitoapa einagota tete
meetekoa kini ta tewitikoa poe wa tikatapeneya.
51
Nitikoli einagotame kiwika tewitikoa
wako wa kini kawake kakene kege tadamotekete Aikoniame take pote mepaneya.
52
Nitaneyake Yesunomo yakoa motane yename ke wa wedia meaneya. Nipa Epetane
Yomini kiwike awia tagatapeneya kolotine meaneya.
Aposelo Aposelo
<<
13 13
>>
Aposelo Aposelo
<<
14 14
>>
14
Aikoniame Take Tanemo
1
Adioke take tokoinakale Aikoniame takeka wa einakale taneya. Polo Banabasita Yu
yenane losu yapu pote kakete Akolaline agale wedoa oa metekoli yatekete Yu yeneka mone
pa yeneka peya matiyame e e, nimini iki wa Yesuke wene tuganeya.
2
Nitaneyake kini agale
yakamadete wakoi Yu yenamepa i agotame ikimo yakamatoe wa mone pa yene oa
kamotokakoli mone yenameka einagota-pala kotimi yoa meaneya.
3
Nitikolika eida mea
kakete Ali Munagonomo oa metekilepa piti moameneya taneya. Nipa Ali Munoyo ali atoa
pewe wia talo tokome tokomo eni oa mekala tanepa ina okoinapa nimini akediki wa e
yename wene tomotoa tokome Ali Munoyo einagota tele lukakale padele padele telekole
toma yakeneya.
4
Nitaneyake eni take pitane yene padekamepa Yu yenane totono litia tato
wa oa wa padekamepa i Aposelo agotane agale yakoa litiato wa puutakutukoa meaneya.
5
Nitaneyake Yu yenameka mone pa yenameka kini tobou ali-kiti-pala koukoa mekete
einagota tete mea kueme ka ua tukatekoi oi pedoa pianeya.
6
Eina koina tanemo kugu
yateketepa einagota wete kamokoa Aikoniame ta tewitikoa eya ta ludu to a yakeneya.
Likionia ta keneke piko Lisira Debi tatake ni eni tata liti kebono piko ta-kitikeka to a
yakeneya.
7
Nitoa to a yawa Yesunomo-pala oa aua yakeneya.
Lisira Debi Tatake Tanemo
8
Lisira takepa niname kawata lepo taneya opiane ago pade kawa kautoa pikileka
toamene ago eida meaneya.
9
Einagomepa Poloyo agale okale yakakoa meaneya. Nitikale
Poloyo one nepikoa pikale Akolaliyo one epetekamele toko wa einagome wene piadekale
enekome telo okome okome
10
neke kawata kiyotokoa kamokoa ka wa akeneya. Nitoa
okaka tigatapekome yawa kakeneya.
11
Poloyo enile tokale enekete e yename kini Likionia
take akene agaleke ekete pule alita tone yagono ali latitapea toto pakeke i note kaki wa ka oa
kakeneya.
12
Nitiketepa Banabasi tobou pule ali Siasi wa ibini oa wa Polo Emesi wa ibini oa
taneya. Polo mo wia kakago tokale Emesi wa ibini akeneya.
13
Pule ali Siasike lodo yoai
tane yapupa Lisira ta eko keneya wikakaneya kakeneya. Eni yapu talo tokagomeka ete
yenameka i agotake lodo yatoe wa akeneya. Nitoapa talo agome yomo tidiyo pilia moa
poke apetoa pitimekawe kai-meneka moa ta keteponoke aua pekeneya.
14
Kitake lodo yoadete tokoimo yatekete Polo Banabasita wene poaneya kakete kini
kakene mamina iyatapeneya. Nitoapa eida oboa kakene yene pakeke teyapea kayo oawineya
pekete ekete
15
ame-lawe dekolo tiki-pe. Totapa kini yagono alita, pule alita menano, lodo
yoa enile paya nou toa mekete tikile tewitikoa wawa Akolalike tepe kolotini pekoa piati wa
kipala oko-ye. Einago Akolali pa mea kama nokagome tibu itonota tube ue toa latia eniya-
meneke yakoiya-kitika latia taneyano, oneke wene tugamene.
16
Einago Akolaliyopa namolo
papete ta piko peya pitane yatename kinikile etepea toma yamotoa yopia kakeneya.
17
Kinikile toma yakolika wawamokome eya toa pewe wima nekeneya. Kini pagu ama aua
eya mekateka ta nomotoa toa ni nee noatekoi kotuke mea kolotini kakoa taneya. Ipa
Akolaliyo tokome toko wa wene tomotoa ni taneyano, oneke odene wene tugoa meamene
wa Aposelo agotame akeneya.
18
Nimo okolika e yename kitake lodo yoo-li wa neno oa
kakoli poti oa kawikoa motokoli wakeneya.
19
Wa naniko Yu yene Adioke Aikoniame tata kawa nekete i agota wia tukatono toe wa
Lisira take ali atoa awitikatapea Polo dekoa moa kueme ka ua tukaneya. Nitoapa tukome
tukono wene pia tayo lono lia aua pote pipaneya.
20
Nitaneyake one oya-lawe one pikata
unukapia kakoli kamokamotokome Lisira take wakapea pekeneya. Podolikama Solo
Banabasitame Lisira ta tewitikoa Debi take pote mepaneya.
Solo Banabasita Siria Ta Keneke Piko
Adioke Take Wakapea Pekenemo
21
Debi take Yesunomo eni epetane ko einagotame oa kakoli ali atoa peya matiyame
yakoa motaneyake kini nokoina toa wakapeata pote Lisira Aikoniame tata pima pote Pisidia
ta keneke piko Adioke take tugapaneya.
22
Nitoa pimata pekete kini agale yakoa motokoina
yene mama motekete ekete Akolalinele wedoa takamoa yamene. Ni tone Akolaliyo talo toko
take poadetepa ke enekakale-kama mea poo wa omata pekeneya.
23
Kini losu yapu kaka
peyakeka kiwi talo toatekoi ali-kiti takoa moa kakakala taneya. Nitoa nee wawa mea Ali
Muno kowitikakete ekete i yene neeke wene tugoa mekino, talo toa kamene wa kini
kowitikakala taneya.
24
Nitoapa Pisidia ta ludu pimata pote tewitikoa Pabilia take pote mepaneya.
25
Pabilia
ta keneke piko Peka take Ali Munagonomo oa meemotekete Atalia take keti pote mepaneya.
26
Eni ta tewitikoa ue dipike peapetekoa mea pote Adioke take wakapea nekeneya. Nipa i
agotame nekele takama poadete tikino, neme talo toa pewe wima pamene wa kowitikakoina
take kini eina pupu toa peya takamotekete wakapea nekeneya.
27
Note meketepa Yesuke wene tugoa meane yene peya moa obokaketepa Akolali patu
kautakoata kama pekete tokoinakamo i i wa to awea akeneya. Ni e ku mone yatename
Yesunole takamotoa Akolaliyo ka patekoa yametanemoka to awea akeneya.
28
Nititikoapa
Yesuke wene tugoa meane yene-pala eida mea kakeneya.
Aposelo Aposelo
<<
14 14
>>
Aposelo Aposelo
<<
15 15
>>
15
Aposelo Ali-Kiti Yerusaleme Take
Koukoa Mekete Akenemo
1
Polo Banabasita Adioke take eida pa mekakoa pade ali-kiti Yudea ta kawa nekete
Yesuno agale yakoa motane ali-kiti olaukakete ekete Mosesene totono litikete kini kepene
teigamotono toe. Toamokolipa Akolaliyo kiwi toa moamoo wa olaukaneya.
2
Nitikoli Polo
Banabasitame eni yene-pala agale liitakutukakoli Adioke yene koukoa mekete eya taneya.
Polo Banabasita Adioke ali pade-meneka takoa moa kakakete ekete Aposelo ali-kiti Yesuno
yatene yopiki ali-kitika Yerusaleme take mekika eya wa yatekapoe. Toto pa yatene ali-
kitameka Moseseyo akene toa kepene teigamotoa iki-pe wa yatekapoe wa wetekaneya.
3
Wetekakoli Pinisia Sameria tata ludu pima yaketepa pa yatene-kiti Akolalike wene
tuganemo to awea oma pekeneya. Nitikoli yatekete eni tatake Yesuno agale yakoa motane
yename ke wa wedia meaneya.
4
Nitaneyake kutu pima yawa Yerusaleme take pote kakoli
Aposelo ali-kitameka Yesuno yatene yopikoi ali peyameka einago-mene makutukoa
motaneya. Nitikolipa Akolali patu kautakoa kakete tokoinakamo i i wa to awea okoli
5
yatekete eya ali-kiti Parisi totono litia toake Yesuno yatene-pala lipua meane ali-kiti
kamokoa kakete ekete pa yatene eya wa olaukamene. Yesunomo yakoa mootokoapa ali
yatene kepene teigoa Moseseyo yametane totono litia toa tamene wa olaukamene wa
akeneya.
6
Nitaneyake Aposelo ali-kitika Yesuno yatene yopikoi ali-kitika koukoa mekete edemo
ato patu wa wene kibutukoa meaneya.
7
Nitoa ete oto wa agale takoa meapa Pita
kamokakome okome ame-loe agale pade ukuno, yakoe. Akolaliyo namolo namolo kiwi
pakeke no takoa motikilepa pa yatene mekoika Yesunomo oane mema pomotoa toka. Nipa
eni pa yename Yesunomo yakoa moa oneke wene tugamotoa tokome ni toka.
8
Ali atoa
peyane tepene piko wene tetoa enekago Akolaliyopa one Epetane Yomini eni pa yenekeka
awipomotoa wetekaka. Nipa totoke namolo takoa awinomotoa wetekakana toa toka. Einapa
mone pa yeneka oneme takoa motokome tadeko wa totome wene tomotoa tokome ni toka.
9
Edikakomepa toto Yu yatene eni pa yateneta midi pikoa toka. Nitoa eni pa yatene ali
atoane tepene poane wene takoa koikakilepa pa Yesunomo yakoa moa oneke wene
tugakoike ni toka.
10
Nitikano, tone kaua-mikitame toma nekenele tamene wapa edekoli iki-
pe. Tone kaua-mikitameka totomeka Moseseyo akene toa kepene teigatekoa one totono litia
toadete wili toa kakilepa edoa litia tootapeko patu wa wene keda taneya mekete tokoo. Eni
pa yatene alime Mosesene totono litia tamene wa ikilepa Akolali toa enekete tikino,
11
wameo. Tone Ali Munago Yesuyo toto Yu yene toa motikilepa eni pa yatene toa
motokome toko toa toko. Nipa one weneme pewe witikome toa motoko wa totome wene
toko wa Pitayo akeneya.
12
E koukoa mekoi peyame agale wametekoa Banabasi Polotame okoi agale pa
yakakoa mekolipa o agotame Akolali patu kautakoa kama pekete pa yatene mekoika padele
padele telekole kini wene kainya pikakoile toma yakoinakamo i i wa to awea akeneya.
13
Nitoa oa peya takakoli Yame kamokakome okome ame-loe agale pade ukuno, yakoe.
14
Akolaliyo pa yatene-kitika mama motokome eni yene padeka-kiti one wa pegetoa takoa
motokome tanemo Pitayo ina to awea okano,
15
Akolaliyo edikakomepa one agale papete
to awea akene ali-kitame oa piane toa taatekoa tadeko. Eya wa wia mekaneya piko.
16
Nititikaneyake wakapeane nekene eya tou wa Akolaliyo oka. Depidine yapu kilia
tadoa tumu pikake eni-mene wa moane awitikakoane wikou.
17
Nitikolupa ete
yene e ku pa yatene peyame no tuku toma noi. Nipa anu wane takoane moane
kakapikou-kitame nitoi.
18
Kipala i ukupa i i wane namolo namolo wene
takapikou ago Ali Munoyo uku wa one agale akane ago padame wia mekakaneya
wa Yameyo akeneya.
19
Yameyo nimo ootokoa okome ile tatoane uku. Akolalike tepe kolotini pekoa piane
pa yatene ali atoane wene moa keda takakayano, ile tamene ele toameamene wa tika tika
toamato.
20
Nitameneya eyado tewitikoa wamene wa eni yeneke pipia wia wetekatoane uku.
Paya gode-kitike lodo yotane nee tawe eya wawa noameamene. Koua piamatiki ali atoa-pala
koua piameamene. Kamate ponamomotoa tokome kabe dekoa tukane sipi sipi kai tu eya
eniya melepu moa noameamene. Kamateka moa noameamene wa pipia wia wetekatoane
uku.
21
Ali atoa ta pitikoi peyake namolo namolo titimoa Mosesene totonopa mo wia oma
nekeneya. Opika ko mea pupu toamiki-pete-kama losu yapu kako toa one totono oi moa
to awea okala tikino, ta piko peya pitiki pa yatename one totono wete yakatapekete tiki wa
Yameyo akeneya.
Pa Yatene-kitike Pipia Wia Wetekanemo
22
Yameyo nimo okale ete Aposelo ali-kitameka Yesuno ali atoa yopiane ali-kitameka
Yerusaleme take losu oboai tane yene peyame oa togotokakete ekete agalepa widikoa wia
wetekato. Polo Banabasita-pala opia pote Adioke take pipia-pala aua potokamene wa tone
oyagota takuta takoa moa wetekato wa oa tukaneya. Nitoapa Yudase one pade ibini
Basabasi einago-pala Sailasita takoa motaneya. Ibini akene agota eni takoa motaneya.
23
Nitoa pipia wia wetekakete eya wa akeneya.
Yesuke wene tugoa meki-kiti Adioke Siria Silisia ta-meneke mekika kini pipia wia
wetekako-ye. Nipa Aposelo ali-kiti Yesuno ali atoa yopiki ali-kiti kini oya-mikiti totome wia
wetekaketepa mea epetekamene wa oko-ye.
24
Toto-pala opia mekoi ali padeka-kiti kini ta-
meneke ugu note mekete kini wene potokoa bebo akatapea tadikimo totome yateko-ye.
Einapa totome amene wa okoomo wamekete pa kini wene kibutua akediki.
25
Nitadikili
yatekete ali takuta takoa moa tone kolotini agota Banabasi Polota-pala wida wetekato wa
totome oa togotokakoo-ye.
26
Einagota Banabasi Polotame tone Ali Muno Yesu
Keraisunole takama yakilepa tukaya wa piti moamekete atiki toa taneya.
27
Einagota totome
oi pedoa pikoona toa tekete eyagota Yudase Sailasita takoa moa wida wetekako-ye.
Einagota wida neketepa tone pipia wia wetekakomo kini kabunume kotukoa oa meoi.
28
Eyado tewitikoa wamene wa Epetane Yominiyoka totomeka kipala oadete oko-ye. Kini
wene keda takakaya tokolo pademo-kitika wamoko.
29
Paya gode-kitike lodo yotane nee
eya wawa noameamene. Kamate moa noameamene. Kamate ponamomotoa tokome kabe
dekoa tukane sipi sipi kai tu eya eniya melepu moa noameamene. Koua piamatiki ali atoa-
pala koua piameamene. Enika enile takaya kekatekoa yaketepa nipa epetekoa mekete toi.
Tone agale eni peya tokono, wete kamene-ye wa wia mekaneya.
30
Nitoapa kini takoa motokoina alita i pipia-pala aua poatino poe wa mea wetekakoli
Adioke take pekeneya. Nitikete Yesuke wene tugoa meane yene peya obokoa eina pipia
ya wa metaneya.
31
Nitikoli moa oi mootokoa ekete ipa wene yapeateko agaleno, ke wa
wedia kakeneya.
32
Einagota Yudase Sailasitapa Akolaline agale to awea akane agota tekete
Yesuno ali atoa eida mane mane oa kaketepa tele lukoa wene weye akoa taneya.
33
Nitoata
mea kakolipa kita takoa moa wetekakoina yene mekoita wakapea poatino, tepe kolotini
kilianeya poe wa kini oya-laweme ete wa wetekakoli
34
(Sailasiyo wakapeane poamou wa
eida pa meaneya.)
35
Polo Banabasitaka Adioke take eida mea kakete ali atoa olaukoa Ali
Munagono agale-pala to awea akoa taneya. Pade ali kainya matiyameka einagotame tane toa
taneya.
Polo Banabasita Pilitakutukakete Tanemo
36
Wa naniko Poloyo Banabasi-pala okome tone namolo pote Ali Munagono agale oa
metekoona ta-kitike einaka eina ali atoa edoa meki patuno, wakapea enema pato wa
akeneya.
37
Nitikale Banabasiyo eya ago Yone Make-pala aua pato-kale
38
Poloyo wakome
okome namolona einagomepa tota-pala Akolalinele takama yawake Pabilia take pegene
kakalogoa wawa pokana wa wakeneya.
39
Nitoa neno oa letetakutukaneyake Banabasiyo
Make-pala aua tube ue dipike peapetekoa pome mea Saiperase take witapaneya.
40
Nitaneyake Poloyo Sailasi takoa moa poademe kakale kini oya-kitame i agota pewe wia
talo toa kamene wa Akolali kowitikakoli
41
Sailasi-pala aua pome Siria Silisia tata ludu pima
pekeneya. Nitoa eni ta-kitike Yesuno ali atoa koukoai tane toa pokomepa Akolalinele wedoa
takama pomotoa mane mane oma pekeneya.
Aposelo Aposelo
<<
15 15
>>
Aposelo Aposelo
<<
16 16
>>
16
Polo Sailasita-pala Timosi Opia Pekenemo
1
Poloyo nitima yakome Debi take pome mepaneya. Wa naniko eni ta tewitikoa Lisira
take pome mepaneya. Eidapa Yesunomo yakoa motane ago pade one ibini Timosi
meaneya. One ninepa Yu atoa Yesuke wene tugoa meaneyake one etenepa Geriki yatene
ago.
2
Lisira Aikoniame tatake mekete Yesunomo yakoa motane ali-kitame einago Timosi
kei piai taneya.
3
Poloyo one pukuka Timosi-pala auane pouno wene pikome tokome
Timosine kepene teigamotaneya. Nipa eni take pitikoi Yu yene peyame Timosine etenepa
mone Geriki ago wa wene tekete Timosi aue pa ia titi tokaya tokale nitaneya.
4
Nitimotokome
eni ta ludu ali atoa pitikoika Timosi-pala pima yakome eya taneya. Yerusaleme take
Aposelo ali-kitameka Yesuno ali atoa yopiane ali-kitameka pa yatene-kitame Yesunole
takama pekete toatekoi oi pedoa pikoina totono dika dika wa oa mema yakeneya.
5
Nitikolipa Yesuke wene tugoa meane yename Yesunole wedoa takamoa pokoli ete ali atoa
kainya mati Yesuno ali atoa-pala lipuai lipuai taneya.
Polo Teroase Take Mekome Pulete Enanemo
6
Poloyo one oya-lawemeka eni ta tewitikoa Esia ta ludu agale oma poadete tokoli
Epetane Yominiyo mena wa ka ketekakale Perisia Galesia tata ludu pima yakeneya.
7
Nitoa
pima yawa Misia ta kebonoke tugoa Bisinia ta ludu kutu poadete tokoli Yesuno Yominiyo
mena wa okale
8
Misia ta patukatapea pote Teroase take keti witoa pekeneya.
9
Eida ta likale
Polo pule pitikome enekale Masedonia take ago pade kakome kowitikome okome
Masedonia take toto auapenamene wa kowitikale yakoa enaneya.
10
Nitoa Polo pia
kamokakome pule kekale totome yatekete ekete einapa eni take pitiki yene-palaka totome
Yesunomo onomotoa tokome Akolaliyo kayo oa akedekono, patoe wa Masedonia take
poatekole nodokoa kakoo.
Pilipai Take Eya Atoa Lidia
Yesuke Tepe Kolotini Pekoa Pianemo
11
Nitoapa ue dipike peapetekoa pote mea Teroase ta tewitikoa Samoterese take pote
witakoo. Piimotekete podolikama Niapolise take pote mepokoo.
12
Eni ta tewitikoa ka ludu
pote Pilipai take mepokoo. Pilipai taapa Masedonia ta pikoka Lomane yatene awia note
latiane ta. Eni ibini akene takepa ta pataka pade-mene toto mea kakoo.
13
Eida meketepa ko
mea pupu toamatekoo-pete eni ta kago ketepono patukoa eka yotane ue matanuke pokoo.
Nipa ali atoame eida kowitoai tekete tiki wa tuku toma pokoo. Nitoa enamutukete witipitoa
mekete eida oboa kakoi atoa-kiti-pala ko oa mekoo.
14
Tone ko okoomo yakakoa kaka atoa
pade one ibini Lidia. Einatoapa Taiataira take kudulu ue paigene mamina latia taneya. Onepa
pa yatene atoameke Akolali kowitoai taneya. Nitane atoa Ali Munagome wene takakale
mekome Poloyo okamo yakoa motoka.
15
Yakoa mootokoapa one yapu pitikoi yene peya-
pala ue motaneya. Nitikome okome kime no i atoapa Ali Munagoke wene tugoa meko wa
wene piketepa nipa anu yapu meatono noe wa toto kowitikale nipa pato wa one yapu pote
mepokoo.
Polo Sailasita Po Yapu Pitanemo
16
Wa padepete eina kowitoai taneta poadete pokolopa kueme topo toa moa egetane
atoa padame toto kotuka. Einatoa ipono awitaneya mekomepa naniko witatekole papete
to awea oa pikala taneya. Nipa e ku ali atoa-pala toatekale to awea oa pikome kinike kue
moapa one egetane ali-kiti kamo takaneya.
17
Einatoamepa Polo-loe toto pokooka litia kayo
oma nokome okome ako odene meko Ali Muno Akolaline pupu takama yaki ali-kiti i
pinikino, enoe. Akolaliyo toto toa motokome toko agale oa mema pinikino, yakoe wa kayo
oma noka.
18
Ta pataka pade-mene enile toma nokale Poloyo yakama pome teko tokale ete
peketapekome ipono-pala okome Yesu patu kautakoane kakene ukuno, einatoa takoa pa wa
okaka eina eina takoa poka.
19
Nitikale one egetane ali-kitame ekete ae i atoame naniko
toatekomo opi amele toamokono, tone kamo edoa toko patu wa wene poaneya kakete Polo
Sailasita dekoa motaneya. Dekoa moa makesike liimoa aua pote Kanosolo yenane lene yoto
kakapokoi.
20
Nitoa koiso yatekakoi-kiti mekoita aua pote kakakete ekete i agotapa Yu
agotano, tone i take pitiki yene eya toa kamotokaki.
21
Toto i take pitiko yenepa Lomane
yateneke i agotame kini totono pianele olaukoa tikino, tone kekanele tomotoa tekete ni tiki
wa akoa okoi.
22
Nitikolipa eida oboa kakoi-kitame eni yene-pala kibutua kakete winagota
wiatoe wa kayo oa kakoli koiso yakakakoi yename Polo Sailasita poyo ali-kitike metekete
ekete i agotane mamina kotokoa pia layome wiamene wa moa metekoi.
23
Nitikoli moa wiai
toa kawa po yapu pitikapekete po yapu yopikago-pala ekete winagota wedoa nepikoa
kamene wa pekeneya.
24
Nitaneyake po yapu yopiane agome einagota moa ekolo yapu
keneke pome pitikapokome kini kawata tau toologoa pekeneya.
25
Nititikaneyake tube likonu Polo Sailasitame Akolali kowitoa lo oa mekoli ete po
yapu pitane-kitame yakakoa mekoika
26
momani toka matiyame eni po yapu lokokoa aua
yakome kago-kiti peya odepeta wia peetapekala taneya. Po yapu pitane-kiti kini yono
kawatake kakane kapa po-pala kotokoa pitaneya.
27
Nitaneyake po yapu yopiane ago pia
kamokoa pokome enekale po yapu kago peya peetapeneya pikale enekome okome ekee po
yapu pitane-kiti wete pitoa pootapekete tiki wa one kepete tue witimoa pinali one wa wia
tukademe kakeneya.
28
Nitikale enekome Poloyo kayo telo okome okome toto peya i
kakono, pinali neke wa wia tukamea wa kayo akeneya.
29
Nitikale yopiane agomepa tole udukoa aua noo-ye wa kayo oa moomotokome po
yapu keneke teyapea pokome Polo Sailasitane kawane aua pitaneya.
30
Kolu kolu nokale aua
pitoa mea kamokakome einagota akolono moa aua pokome okome kamo koniyalita
Akolaliyo no toa momotoanepa edele tou-pe-kale ekete
31
Ali Munago Yesuke wene
tugamene. Nitikalepa Akolaliyo neeka neke yapu pitiki peyaka toa moo wa ootokoapa
32
po
yapu yopikago one yapu pitikoi peya Ali Munagonomo oa metaneya.
33
Oa peya tokale
tube likonu po yapu yopikagome einagota moa kiwi layome witaneta kamate ko a
togotokaneya. Nitoa eina eina einagomeka one mati atoa peyameka ue motaneya.
34
Ue
mootokoapa yopikagome Polo Sailasita one yapu aua pokome kini nee takoa lawetaneya.
Nitaneyake einagoka one mati atoaka Akolalike wene tugakete tekete ke wa wedia meaneya.
35
Podolikama likonu witia koiso Kanosolo ali-kitame kini poyo ago-mene moa po
yapu yopiane ago mekata wetekakete ekete winagota poe wa wetekamene wa akapoe wa
wetekaneya.
36
Nitikoli pote akapokoli po yapu yopikagome Polo opokome okome koiso
Kanosolo ali-kitamepa Sailasi kita wetekakamene wa oa wetekadikino, tepe kolotini kilikoa
pimotono pamene-kale okome
37
abelapa Sailasi totame tokoomo pitia yakamekete ali
atoane lene yoto pa puputua layome wikala tokoi. Totapa Lomane yatenagotake tokoi.
Nititikoa po yapu pitikakoina. Opa tota paigakoapa edoa pomotoa iki-pe. Paigakoa
poamoo-li. Eina ali-kiti oto nekete Sailasi tota ka ludu wetekamotoane uku wa Poloyo
akeneya.
38
Nitikale poyo ago-mene koiso Kanosolo ali-kiti mekoita wakapea pekete Poloyo
okanakamo to awea opokoli ekete ekee einagotapa Lomane yatene agotake witikete tadeko
wa piti moa kakeneya.
39
Nitoa po yapu pekete einagota-pala ekete poanele tekete tadekono,
ela toko wa akolono wetekapaneya. Nitikete ekete tone i ta tewitikoa pamene wa kowitikoli
40
po yapu tewitikoa pote einakatoa Lidiane yapu pekeneya. Nitoapa kini oya-mikiti eida
enekete piti moatoane toamuku wa kini wene epetekoa mea pekeneya.
Aposelo Aposelo
<<
16 16
>>
Aposelo Aposelo
<<
17 17
>>
17
Polo Sailasitame Tesalonaika Take Tanemo
1
Polo Sailasitame Pilipai ta tewitikoa Abipolise Apolonia tata patukoa pote
Tesalonaika take tugapokoi. Eni takepa Yu yenane losu yapu pade eida kakeneya.
2
Eidapa
Polo one tanele tokome losu yapu pokala toka. Nipa Yu yene ko mea pupu toamatekoi ta
tebolo pataka toa-kama pome kakome Akolaline bokuke wia mekane agaleke eni yene-pala
agale topo takoa okala toka.
3
Nipa Akolaline bokuke Yesuke wia mekapiane toa pine
to awea okome okome Keraisu tete moa tuake kamoa pikilepa nipa Akolaliyo wene toopiane
toa taatekoa tamedekale taneya. Kipala i to aweane uku ago Yesu onepa eina papete Keraisu
wa ibini oa piane ago wa Poloyo okala toka.
4
Nitikale e Yu yene padeka-kitame one agale
yakoa moa Polo Sailasita lono takanokoi. Akolalike nate wene pia lukoa meane pa yatene ali
atoa peya matiyameka ibini akene atoa padeka-kitameka einagota-pala lipunokoi.
5
Nitaneyake Yu yename einagota-pala wene poaneya meapa nego noma yakene ali-kiti
makesike loyo mekoika tuku toa moomotekete yapu ludu eni take yene oa kamotokama
pote eya ago Yesone one yapu pekeneya. Nipa einagota moa akolono ali atoane lene yoto
moa kakato wa tuku topaneya.
6
Nitoa tuapetapea tuku toa teko tokale yapu pinago Yesone
dekoa motaneya. Keraisuno agale yakoa motane ali padeka-kitika dekoa moa lia aua
Kanosolo ali-kiti mekoita pekeneya. Nitoa kayo ekete ekete ta piko peyake ke enekawineya
yaki agota opa tone take tugoa note mekete tiki.
7
Einagotapa Yesoneyo makutukoa
motokome one yapu pikoa meko. Einagotameka kini oya-mikitameka ako tobou ago Sisane
totono tetekakete ekete toto peya lukoa meateko tobou ago pade meko. Einagono ibinipa
Yesu wa iki wa kayo oa kakeneya.
8
Nitikoli yatekete eida oboa kakoi-kiti Kanosolo ali-
kitika ekee wa tepe ate keti enoai toa kakeneya.
9
Nitaneyake Kanosolo ali-kitame Yesone
einago one oya-mikitika kikoa ekete ekete wa dikamoatino, opi kini oto toatiki kue meo wa
okoli metekoli kini yapu ludu poe wa wetekaneya.
Polo Sailasita Beria Take Mekete Tanemo
10
Ta likaka Yesuke wene tugoa meane ali-kitame Polo Sailasita Beria take poe wa moa
wetekakoi. Nitikoli pekete eni take Yu yenane losu yapu wete eni pokoi.
11
Eni take pitane
Yu yenepa Tesalonaika Yu yene keneya mena. Epene wene pianeya mekete Yesunomo
wete yakoa motekete ekete i ago Poloyo imo ikilepa Akolaline boku keneke piko agale
kotuke oko patuno, tuku toa enato wa Akolaline boku ta pataka abuna lewea enoai toa
kakoi.
12
Nitoapa padeka-kitame nimini eni akedeko wa Yesuke wene tugakoi. Ibini akene
Geriki atoa padeka-kiti Geriki ali padeka-kitika Yesuke wene tugakoi.
13
Nitaneyake Poloyo
Beria take Akolaline agale oa mekala toko wa akedekoimo yakamotekete Tesalonaika Yu
yene nekete Beria take ali atoa oa kamotokakoi.
14-15
Nitikolipa Sailasi Timosita Beria take
pa kamotoa Yesuke wene tugoa meane yenamepa Polo ne ita meamoano, kusa ue matanuke
wete pa wa Polopa ka ludu Atena take wetekapaneya. Wetekamotekete Beria take wakapea
nokoi. Nipa Poloyo Sailasi Timosita one mekuta oto nomotoane ukuno, akapoatino poe wa
wetekakale nokoi.
Poloyo Atena Take Mekome Tanemo
16
Sailasi Timosita nomotoa Polo Atena take eida nepia mekome wene keda taneya
meaneya. Nipa iya-kiti kowitato wa padeya padeya adeka pia latia kakane yomini-kiti eida
kaatapekale enekome tepe we tokale meaneya.
17
Tepe we tokale mekome tokome eya
taneya. Yu yenane losu yapu pokome kakome Yu yene-palaka Akolalike nate wene pia
lukoa meane pa yene-palaka agale topo takoa okala taneya. Makesikeka ta pataka abuna
pokome ali atoa kotua enekome agale topo takoa oa kakeneya.
18
Nitikalepa Epikuriane
totono litia tane ali-kitame Sitoike totono litia tane ali-kitameka Polo-pala agale topo takoa
okala taneya. Nitoapa padekame ekete i pamo okagome edemo okome oko patu wa oa wa
padekame ekete mone gode-kitike oko patu wa oa taneya. Nipa Yesu tua pekeneyake
Akolaliyo moa kamotokanemo yatekete tekete ni akeneya.
19
Nitoa Polopa Ariopagase wa
ibini akene Kanosolo yapu aua pekete ekete neke eina okanapa namolo yakamokoonamo
okanano, pine yakadete oko.
20
Neke kuka kake okanapa monekemo ena okanano, pine
to awea oano ta wa akeneya.
21
(Atena ta pine yene to a nekene yeneka loyo-kama mekete
eya taneya. Padele padele weneleke agale topo takoa oa ni titia oko agale-kitika yakoa
tokala taneya.)
22
Polo eni Ariopagase wa ibini akene Kanosolo yapu eida pokome eni yenane lene
yoto kamokoa kakome okome anu oya-lawe Atena take meki-kiti agale pade oane
metekuno yakoe. Kini yapu ludu yakene enekolu e ku gode-kitike lodo yotokoile enekou.
23
Nitikene kini yoname latia kakoa kowitane gode-kiti enema penekene eyaka enekou. I
agoke lodo yotikilepa one ibinipa wene toameketeke toko wa wia mekanemo oi motokou.
Eina wene toameketeke kowitiki godepa paya nou toa kowitikiyake noanumepa wene tuku.
Onekemo ouno, yakoe.
24
Einago Akolaliyopa itono latia eniya patu witoa kakoya peya latia
taneya. Einagopa tibu itonota yopia meko Ali Munagono, alime wikakane losu yapu keneke
meamele toamoko.
25
Einagomepa ali atoa toto wene takoa poome mekoa padeya padeya
peya kini wa latia pikaneyano, one auapeato wa tone yoname mitikoa latikoonakeya edoa
meamoo.
26
E ku yatene peyapa odenago Adameke ta wa ta piko peyake alama pomotoa
oneme taneya. Eni yatene peyapa kini titimoa alama noatekoi oi kini atua tadatekoi oika
oneme pedoa pianeya. Kini tutu tutu wa ta latia pima poatekoikaka oneme oto pikapianeya.
27
Nipa e ku yatename one tuku toma yakete tugawineya lau lau enoa enamumotoane tuku
wa taneya. Nipa tone tone mekoya liti mekomeke taneya.
28
Enikepa panagome eya wa
akeneya. Akolaliyo totopa wene takoa poome mekoa tokono, one patu-kama kautakoa
kama yako wa akeneya. Eni akene toa kini lo agale wene kibutua akene yenameka eya wa
akeneya. Totoka Akolaline mati-kiti wa akeneya.
29
Totopa Akolaline mati-kitino, golo silepa eya kamo kue pa kueka moa one adekapa i
wa totome edoa latiato-pe.
30
Namolopa ali atoame one adeka pia eya kuya yomini latia
kowitikilepa one wene toamekete tekete ni tiki wa Akolaliyo kibu moameneya. Opa ali atoa
peya kini poanele tikile tewitikoa wawe wa oa tukako.
31
Nipa ali atoa peya kini toma yakoile
kiyoke-kama takoa enoa akateka oi Akolaliyo wete meepianeya tokome ni oko. One takoa
moa kakapiane ago one patu kautakoa kakome takoa enoa akoo. Nimini eni akedeko wa
toto peyame wene tomotoapa one eni moa kakapikanakago tua pokale Akolaliyo moa
kamotokaneya wa Poloyo oka.
32
Tuane ago moa kamotokanemo okale yatekete padeka-kitame one yau takoa kakoi.
Nitaneyake padeka-kitame ekete neke wini okomo wa yakoono, padepete wa onamene wa
okoi.
33
Nitikoli Poloyo eni Kanosolo yapu tewitikoa poka.
34
Pokalepa eni yene padeka-
kitame einapa nimini oka wa one-pala lipua mea Yesuke wene tugakoi. Nitane yenepa
panago Ariopagase Kanosolo ago Dayonisiasi ni padatoa one ibini Damarisi. Pade ali
atoaka Polo lono takanekete Yesuke wene tugakoi.
Aposelo Aposelo
<<
17 17
>>
Aposelo Aposelo
<<
18 18
>>
18
Polo Korine Take Ponome Mekome Tanemo
1
Nititikaneyake Poloyo Atena ta tewitikoa Korine take pome mepokome
2
Yu ago pade
eida kotuaneya. Einagopa Podase take opiane ago Akuwila wa ibini akene ago. Einagopa
Lome take to a pome mepaneyake ako tobou ago Kelodiasiyo Yu yene peya Lome ta
tewitikoa poe wa tikatapekale Akuwila one natono Perisila-pala Lome ta to a Korine take
pome mepaneya. Einago Akuwila adonane yapupa Polo ugu pome mepaneya.
3
Akuwila
adoname mamina yapu latia taneya. Polo one odene pupu tokago tokome eida kita-pala
mekome mamina yapu latia meaneya.
4
Nitoa mekome ko mea pupu toamatekoi-pete-kama
losu yapu pokome Yu yene-palaka Yu yene lono takanane Geriki yene-palaka agale topo
takoa okala taneya. Nipa Yesunomo yakoa momotoa toa enekala taneya.
5
Wa naniko Sailasi Timosita Masedonia ta kawa note mekoli Poloyo eni pa pupu
tewitikoa wawa Yesunomo-kama Yu yene-pala oa mekala toka. Nipa Yesu onepa eina
Keraisu wa papete ibini oa piane ago taatekoa nekeneya wa oa mekala toka.
6
Nitikale e Yu
yene one-pala neno oa poanemo oa kakoli one tokoo kakene mamina petekakoa kakome
okome Keraisunomo oane metekolu yakamadete wakoike Akolaliyo nami wia kibu moono,
nepio. Enipa kini kogono. Opi titimoane Keraisunomo e ku pa yatene pitikika oma pukuno,
Yu yene kiwi pa tuati wane tewitikoane wakuna wa oka.
7
Nitoa e Yu yene tewitikoapa kini
losu yapu kakaya liti kakene yapu pome mepoka. Nipa eya ago Tisiasi Yasasi Akolalike
lukoa mea kowitikagono yapu eni pome mepoka.
8
Wa naniko eina Yu yenane losu yapu
talo tane ago Kerisipasi einago one mati atoame Poloyo okamo yakoa moa Ali Munagoke
wene tugakoi. Korine take mone pa yatene ali atoa peya matiyameka Poloyo okamo yakoa
mootokoa ue mokala tokoi.
9
Wa padepete ta likale Ali Munoyo Polo pule metekome okome piti moamemeneya
agale wedoa oa meemoa pamene. Agale teigoa wawameamene.
10
Ne auapeane kouane
pekene tekene ni uku. I take pitiki ali atoa kainya mati nooke lukoa mekino, ete-kitame ka
ketekoa ne tete metekileka toamoi wa akeneya.
11
Akolaliyo eina okana toa Polo Korine take
eida mekome ali atoa olaukoa meka. Nipa tokene kalabe kakoa (18) ponoka toa Akolaline
agale olaukoa meka.
12
Eina-pete-mene Lomane yename eyago Galio neme Geriki ta talo toa meamene wa
moa kakakoli talo toa mekakoa Yu yene koukoa Polo dekoa mootokoa Galioyo koiso
yopia mekata aua pokoi.
13
Nitikete ekete i agomepa toto Yu yene Akolalike nate wene pia
kowitikete toatekole olaukakomepa tone totono piko toa toamokono, neme pitia yatekoano
ta-koli
14
Poloyo agale a wa oademe kakaka Galioyo e Yu yene-pala okome kipala i ukumo
yakoe. I agome padele poaneleka tone totono tetekaneleka tokaledo nooke lia aua noi
tokapa nipa kipala poti ko ootokoane winago pitiane yatekou toka.
15
Nitikou tokake kimepa
pa natele deyakeka kini totono tetekanekeka i ago pa puputua lia aua nikino, enika eni
dikane notokanemopa yakamouno,
16
kini pitia yakoatino, poe wa one koiso yapuke
tikatapeka.
17
Nitikale kini losu yapu talo tane ago Sosenisi dekoa mootokoapa koiso yapu
eko kamotoa layo toua wikala taneya. Nitoa kamotoa Galio paya nou toa meaneya.
Polo Adioke Take Wakapea Pekenemo
18
Polo Korine take eida pa mea kakeneya. Wa naniko Siria take wakapeane pukuno,
poti kamene-ye wa one oya-mikiti-pala oomotokome ue dipike peapetekoa pome mea
Korine ta tewitika. Nipa Perisila Akuwilata-pala opia pokome Senekeria take pome dekoa
pipokome eya toka. Ile tou wa Akolali-pala papete oa pikana toa taatekoa tokome one
tobou pine eida pitukamotoka.
19
Nitoapa ue dipike peapetekoa pome mea Epesase take
witapaneya. Eidapa Akuwila adona tewitikatekoapa Yu yenane losu yapu pome kakome eni
yene-pala agale topo takoa kaka.
20
Nitikale eni yename kiwi mekota poti mea kamene wa
kowitikoli waka.
21
Wawa tewitikoa poademe kakome okome Akolaliyo pa wa wetekakalepa
nipa nani oto none menou wa oomotokome ue dipike peapetekoa pome mea Epesase ta
tewitikoa Sisaria take witapeka.
22
Nitoa Sisaria take ete katepitoa ka ludu pome Yerusaleme ate pome mepoka. Eida
Yesuno yene-pala ko oa meemotokome Adioke take keti pome mepoka.
23
Eidapa Polo
mea kawa pome Galesia Perisia tata ludu pima yakomepa Yesuno ali atoa peya wene weye
akama yaka.
Apolosi Epesase Korine Tatake Tanemo
24
Yu ago pade one ibini Apolosi Alesaderia take opianeyake to a nome Epesase take
menaneya. Einagopa agale muno pewe kakoa oa kakene agome Akolaline bokuke wia
mekane agale wene agopa moameneya tepene yakoa luaneya.
25
Ali Munagonole takama
pokome toatekale olaukane ago tokome Yesunomo i i wa kiyoke-kama wedoa olaukakala
taneya. Einagomepa Yoneyo ali atoa ue motokama yakome olaukanemo yakoa motaneyake
Yesuyo Epetane Yomini ali atoake awitikanemo wete yakameneya.
26
Nitane ago Yu yenane
losu yapu pokome olaukakilepa piti moameneya taneya. Nitikale yatekete Akuwila
Pirisilatame kini yapu aua pekete Akolalinele takakome toateka ko pine to a olaukoa
kakeneya.
27
Wa naniko Apolosi Geriki take poademe okale one oya-laweme auapekete eya
taneya. Geriki take Yesuke wene tugoa meane yene meateka pipia wia mekakete ekete i ago
Apolosi wida nokale wedoa makutukoa moamene wa wia mekakaneya. Nitoa metekoli
Apolosiyo moomotokome Geriki take pome mekome eya taneya. Akolaliyo pewe wia
kakale tekete Yesuke wene tugane-kiti wedoa auapekala taneya.
28
Nitikome okome Yesu
onepa Keraisu wa papete ibini oa piane ago wa Akolaline bokuke Keraisuke wia mekane
agale pine to awea akeneya. Nipa kini lene yoto kakome Yu yene-pala agale muno pewe
kakoa oa kakale ete agale topo takamele toameneya.
Aposelo Aposelo
<<
18 18
>>
Aposelo Aposelo
<<
19 19
>>
19
Polo Epesase Take Ponome Mekome Tanemo
1
Apolosi einago Korine take mekakoa Polo tono tono pake ka ludu pima yakome keti
Epesase take ponoka. Nitoapa Yesuno agale litia tane yene eida kotukome yatekome
okome
2
Yesuke wene tugakolipa Epetane Yomini kiwike awinoka-pe-kale ekete e 'e mena.
Eni Yomini ko yatekileka toamokoo-koli okome
3
ue motikilepa tene agale litia tokoi-pe wa
okale ekete Yonene agale wa okoli
4
Poloyo okome Yoneyo ali atoa ue motokakilepa kini
poanele tewitikoa wamotoa taneya. Nipa one liti naniko nokagoke wene tugamene wa oa
taneya. Eni akenepa Yesuke okome akeneya wa Poloyo oka.
5
Poloyo enimo okale yatekete
eni yename Ali Munago Yesuno ibini wedekoa ue motokoi.
6
Nitikoli Poloyo kini mataike
yono pikale Epetane Yomini kiwike awinokale agopa tane agaleke emo kumo oa ni Akolaline
agale to awea akoa tokoi.
7
Enilepa ali tuku kakoame (12) tadiya tokoi.
8
Polo Yu yenane losu yapu pokome Akolalinemo i i wa piti moameneya kakome oa
mekala toka. Nipa Akolaliyo ali atoa talo tokome tokomo yakoa momotoa agale muno
pewe kakoa oa mekala toka. Tokene tebolo ponoka toa nitikala toka.
9
Nitikale eni yene
padeka-kitame Poloyo okamo kote tokale yakamadete wakete ali atoa kakakoa Yesunolepa
pale tane tetepo takoa tea agale oa kakoi. Nitikoli Poloyo e yene tewitikakome one agale
yakoa motokoina yene takoa moa eya ago Tiranasi one sukili yapu pato wa poka. Nitoapa
ta pataka abuna eida-kama one eina oya-lawe-pala agale topo takoa oa kakala toka.
10
Mali
takutake Poloyo nitikala taneyake Esia take pitikoi Yu ali atoa mone pa yatene ali atoa
peyame Ali Munago Yesunomo yakatapekoi.
Sipane Mana-mikitame Tanemo
11
Polo Akolali patu kautakoa kakome ele kule telekole toma yaka.
12
Nitikalepa
Epesase yenamepa Poloyo pikoa kakene pue nateya wane-kiti moa aua pote yene tane ali
atoa tiginike letetekapokoli kini tane yene takoa pootapekala taneya. Ali atoake awitane
ipono-kitika takoa pokala taneya.
13
Ipono takoa wetekakala tane otoi ali padeka-kitame Ali Munago Yesuno ibini
wedekoa ipono takoa wetekoa enekala taneya. Nipa ipono-pala ekete one agale to awea
akama pomotoa Polo moa kakapiane ago Yesu einagono ibini wedekoa eya wa oko-ye.
Winago takoa pa wa okala taneya.
14
Sipa wa ibini akene Yu agono mana tatono kakoame
(7) enile taneya. Sipa einagopa Akolalike lodo yotokoai tane tobou ago.
15
Einagono mana-
mikitame Yesuno ibini wedekoa okoli ipono padame okome Yesu wene toane Poloka wene
toane tukuyake kiwi wene toamukuno, mainali-kitame iki-pe wa okale
16
one
awitikanakagome eina ali-kiti aukamoa pokome wia atukaneya. Nitikale yapu mea akolono
wititapekete teyapea pitoa pekeneya. Nipa kini mamina kawameneya kamate tuawineya
pekeneya.
17
Eni tanemopa Epesase take meane yene Yu yeneka pa yeneka eni yene peyame
yakatapeneya. Yakatapekete piti motaneya mekete Ali Munago Yesuno ibini kamotokaneya.
18
Nitaneyake Yesuke wene tugoa meane ali atoa peya matiyame kini poanele pa kaukoa
toma yakoinakamo i i wa to awea akeneya.
19
Otoi ali padeka-kitame kini boku-kiti oboa moa
pala pitikoa wakete ali atoane lene yoto toele yotaneya. Kini boku-kiti motekete wetekane
kue oi moteketepa ege egeta kadukoa (50,000) silepa kue lene wetekadekoi.
20
Enika enile
tanele-kitikepa Ali Munagonomo ta piko peyake oa pupitikatapea Setanuno peku moa
kautakama pekeneya.
Epesase Take Ali Atoa Oa Kamotokanemo
21
Nititikaneyake Poloyopa Masedonia Geriki tata ludu pima yawane Yerusaleme take
pone mepou wa wene pianeya mekome okome Yerusaleme take pone meemotekene Loma
takeka pou wa oka.
22
Nimo ootokoa eya agota one auapea koua yakoi agota Timosi
Erasasi kita namolo takoa pote mepoatino poe wa Masedonia take wetekatekoa Esia take
one pa eida meaneya.
23
Einapetepa Esia take meane yene Ali Munagonoleke poane wene pianeya mekete ali
atoa oa kamotokaneya.
24
Eni poane wenepa Demiteriasiyo pine wia titianeya. Einagomepa
silepa kueme pule atoa Atemisine losu yapu adeka pia yapu yomini deya latikala taneya. Eni
de yapu-kiti kenekepa eni take yename pule atoane yomini moa kakoa kowitoai taneya. Pule
atoane losu yapu yomini latia topo teketepa Demiteriasi einagomeka one eni pupu takane
ali-kitameka kamo toma pekeneya.
25
Einagome one pupu takane ali-kitika eni odene pupu
tane ali-kitika moa obokakome okome pule atoa Atemisikepa tone kamo toma poko.
26
Nitikoyake tone ika iyapa Poloyo paya tetepo takama pokolo kime enoa yakoa tiki.
Enilepa Epesase take odene toamoko. Tone Esia ta piko peyake pima yakome okome pule
ali atoa eyane yomini kini yoname mitikoa latikoinakeya-kitipa Akolaline yagono mena wa
oma yako. Nipa ali atoa peya matiyame one agale etepea litia tomotoa tokome toko.
27
Nitikono, ali atoame tone toko pupupa poane pupu wa wakete pule atoa Atemisika one
tube losu yapuka paya tetepo takoi. Esia ta keneke pitiki yene ete ta piko peya pitiki yene
toto peyame einatoanele takama pokoyake nitoi tokolo uku wa Demiteriasiyo akeneya.
28
Nimo okale yatekete e yene kotimi wene luaneya kakete agale telo oa kakete ekete
toto Epesase yenane pule atoa Atemisi ako atoa meko wa u u kayo okoa kakeneya.
29
Nitaneyake Epesase ta piko peyake ali atoa u u kayo oma yakete ete patuka oto patuka toa
kakeneya. Nitoapa Masedonia agota Gayasi Arisakasita Polo-pala opia yakene agota dekoa
moa kini oboai taneta lia aua pekeneya.
30
Nitikolipa Poloyo eni yenane lene yoto kakene
agale oukene eida pou wa okale one agale yakoa motokoina yename poamea wa agaleme
lauane lauane tokoi.
31
Esia take Polo-pala oya kakane tobou ali padeka-kitameka Poloke
agale oa wetekakete ekete ani yene oboa kakita poamea wa okoi.
32
Eida oboa kakoi yene wene bebo ootapeneya kakete padekamepa pade kayo oa
padekamepa pade kayo oa taneya. Nitaneyake padeka yene peya matiyame edekale nokotu
patu wa wene kibutua kakeneya.
33
Nitaneyake Yu yename Alesada takoa moa eni yenane
lene yoto kakakoli pade ali-kitame one-pala kayo okolipa ina poto witakanapa i tokaleke
taneya wa Alesadayo oademe yoname kawikoa enekale ekete
34
beita i agopa Yu ago tadeko
wa peyame eya wa u u kayo oa kakeneya. Toto Epesase yenane pule atoa Atemisi einatoapa
ibini akene atoa wa kayo okala taneya. Nipa lou pini takutake pa einakamo-kama kayo oa
kakeneya.
35
Nitaneyake Kanosolo yapu yopiane agome eni yene kawikoa motokome okome
Epesase yene ame-loe kipala agale pade oane metekuno yakoe. Ibini akene pule atoa
Atemisi one losu yapupa toto Epesase yename talo toa meko. A tibu pia ketipea pitane
kuepa ipa pule atoane adeka tadeko wa totome enamua moa talo toko. I ukumopa ta piko
peya pitiki-kitame wene taneya meki.
36
I ukumopa padameka kapene agale winipa oko wa
wamoino, padele tikilepa mekamotekete pitoa toameneya poti kilikoa mea toati.
37
Kime i
alita oto lia aua nikilepa tone losu yapu keneke pikoya-kiti kode noamoa pule atoa Atemisi
taumada toamoa tokoinake tokoi.
38
Eya ago Demiteriasiyoka one pupu ali-kitameka
padagono koiso akouketedo tadekolipa nipa koiso oatekoi-pete Kanosolo ali-kiti oboa
mekoita koiso akamotono toe.
39
Padele tanemoka pitia yatekamotoapa nipa Kanosolo ali-
kiti-pala ali atoa peya oboa mekoi-pete kini koiso aua namene.
40
Opi ali atoa oa
kamotokakilepa kime tokoi wa Lomane tobou agome toto kikoa akaya tokolo uku. Totodo
kikoa okalepa tone kei pia oatekomo toamoono, wawe wa einagome eina yene moa
kawikaneya.
41
Nimo ootokoa kakome eni yene poe wa wetekaneya.
Aposelo Aposelo
<<
19 19
>>
Aposelo Aposelo
<<
20 20
>>
20
Polo Masedonia Geriki Tata Ludu Yakenemo
1
Eni yename agale oa kawitikaneyake Poloyo Yesuno agale litia tane yene moa
obokakome kini weneke tele lukoa mea opi pukuno poti meamene wa Masedonia take
poka.
2
Masedonia ta ludu pima yakome ali atoane wene epetekoa pademo pademo oma-
kala pome Geriki take tugapoka.
3
Geriki take tugapokome tokene teboloke eida mea kaka.
Nitoapa Siria take ue dipike mea poademe tokaka Yu yename one wia tukatekoi oi pedoa
piadekoimo yakatekoapa Masedonia ta ludu eka patukoane pou wa poka.
4
Pokale eya ali-
mene one-pala opia pokoi. Beria take opiane ago Pirasine mana Sopata ni Tesalonaika take
opiane agota Arisakasi Sekadasita ni Debi take meane ago Gayasi ni Timosi ni Esia take
opiane agota Tikikasi Teropimasita eina ali-kiti Polo-pala opia pokoi.
5
Nipa toto naniko
nomotoapa einali-kiti Polo-pala ka ludu opia pote Teroase take tugoa nepia meaneya.
6
Nitikakoa totome eya tokoo. Pilipai takepa yisi kugu pitikamene palawe wa ibini akene
toge kiatekoi oi nokale eni toge nee noomotekete ue dipike peapetekoa pote mea Pilipai ta
tewitikoo. Nitoapa ta ko kakoa (5) pataka-pete Teroase take e ali-kiti wete pote mepokoita
witoa nekete ta tatono (7) kakoa-peta patamotoa eida mea kakoo.
Polo Teroase Take Pome Mepokome Tanemo
7
Toto Teroase take eida meapa ta pataka egeme palawe wane popimoa noadete oboa
mekoo. Poloyo podolikama poademe tokome agale oa-kama kawa tube likonu teigakaka.
8
Toto eida oboa mekoota ako yapukepa labo peya mati udukaloganeya noa kaka.
9
Tuali
pade one ibini Yutikasi eida widoa waneke yakakoa meka. Poloyo agale oa-kama kakakoa
einago atu togoikoa mea widoa waneke pitiku pokome toa togoikamotokome itono keita
pitaka. Nipa eni yapu kibutate toa walai tebolo tatima pekeneyake ako yapuke pia
togoikamotokome pitaka. Nitikale o yename keti toa pekete ekete ae tuadeko wa
kamotokoa motokoi.
10
Poloka keti toa pokome einago patu aua pitakome tebea motokome
okome i agopa tuameadekono, mama moameamene wa oomotokome
11
ate wa ako yapu
pome mekome palawe wane popimoa nootokoa e yene-pala agale wa topo toa-kala kawa ta
patakakoa poka.
12
Nitaneyake eina tuali tuake wa latoa kakalepa pade-kitame one yapu
koua pokoi. Nitoapa peyame ke wa wene weye akeneya meaneya.
Poloyo Teroase Ta Tewitikoa
Mailitase Take Pome Mekome Tanemo
13
Nitaneyake Poloyo one naniko Asose take ka ludu nouno, kiwi namolo takoa
mepoatino poe wa toto-pala okale nipa Asose take kotua ue dipike ne enemonoo wa ue
dipike peapetekoa pote mea Asose take witapokoo.
14
Asose take pote mekooka Polo ka
ludu pima nome toto kotukale ue dipike moa aua pote Mitiline take witapokoo.
15
Podolikama pupulegeme popokoa aua pokale ue dipike mea pote Kiose ta eka pimotoa
oka patukoa pokoo. Nitoa pote podolikama Samose take witapokoo. Eida piimotekete
podolikama ue dipike mea pote Mailitase take witapokoo.
16
Mailitase take witapikilepa Esia
ta keneke piko Epesase ta aka pimotoa keika lono kokotoa pote witapokoo. Nipa Pedikose
wa ibini akene ta patakilepa wete toameneyake Poloyo Yerusaleme take wete pone
mepouno, Esia take oyake pone meamele toamoko wa wene pianeya tokome Mailitase take
pitimoa pokoo.
Poloyo One Epesase Oya-mikiti Kiwi
Wa Enamou Wa Lionate Oomotokome Pekenemo
17
Polo Mailitase take pome mekomepa eya ali-kiti Epesase take Yesuke wene tugoa
meane yene yopiane ali-kiti noe wa agale oa wetekakale
18
note mekoli Poloyo eya wa oka.
Kini Esia take kiwi pakeke namolo laigoane toma-kama nokouna pupupa kime wene tiki.
19
Yu yename no wiatekoi oi pedoa pikala tokoli ke enekakaleka Ali Munagoke nate wene
pianeya meane komo oane meane tekene onekele takama yawane togakouna.
20
Nipa kiwi
epetekoa mekete toatekoimopa natemoka kipala kauane wamokouna. Enimopa ali atoane
lene yoto kakene oane kini yapu ludu pone kakene oane tokouna.
21
Nipa Yu yeneka mone
pa yateneka kiwi peyame padele padele poanele tewitikoa wawa Akolalike tepe kolotini
pekoa pia tone Ali Munago Yesuke wene tugoa meamene wane oma yakouna.
22
Opi
Epetane Yominiyo pa wa wetekakolo tekene Yerusaleme take poadene tuku. Nipa eni take
meki yename nopala toatikile agopa tokolo mekeneke poadene tuku.
23
Eni wenepa
toamukuyake ali atoa tube take pitikika yaku toa Epetane Yominiyo eya wa wene takakala
toko. Pade-kitame no nepa dekoa moa po yapu pitikoa ke enekoi wa no wene takakala
toko.
24
Nitoi tokoloka anu kepene mama moamukuno, tuadekolupa tuou. Ali Munago
Yesuyo ta wa no ooyametekale-kama peya takadene uku. Nipa Akolaliyo ali atoa pewe
wima pokome tokomo Yesunomo to aweane akama pone togadene uku.
25
Kiwi pakeke
Akolaliyo ali atoa talo tokome tokomo i i wane mo wima yakounano, anu lene timini kime
wa pade enamoi.
26
Kiwi panagomedo poanele toa etepea tua atupekedekalepa padame no i
ago neme eni yene edekale pubu wamokato-pe wa amele toamoo. Ni edoa-mo.
27
Akolaliyo
wene piko toane-kama wina peetapeane okouna.
28
Akolaliyo manane kamateme topo toa
motane yenepa eni ali atoa sipi sipi kai tetepo takoa yopia kamene wa Epetane Yominiyo
kiwi takoa moa kakakanano, talo toa yopikakete paya nou toameamene. Kiwika etepea
poinalino, wedoa yamene.
29
Kiwi tewitikoane pootokaneyake poane ali-kiti kiwi pakeke
note menoi. Nipa lene pianeya yo tane tueme-kiti sipi sipi kai mama moameneya tania wia
tadekou toa kiwi toa potokoino wene tekene uku.
30
Anu oya-lawe kiwi padeka-kitameka
poanele tagoa Akolalinemo moa koigoa uku pekete toi. Ali atoame kiwi litimotoa tekete toi.
31
Nitikaya tokale tekene mali tebolo ponoka toane-kama kiwi peya pubu okala tokouna.
Nipa ete pia oto pia ta pataka abuna komo okoane kakene pubu okounano, lene kilikoa
piameneya wedoa meamene.
32
Opa Akolaliyo yapu wiou toa kiwi pewe witikome peku lewetemotoane uku. One
peku noa toma pote wipitiketepa a tibuke Akolaliyo one wa takoa moma poko ali atoane
pikoa katekakoya pine enoa moi.
33
Kiwi pakeke yawane mekenepa panagono kue mamina
eya eniya moadiya wane tepi moameneya yakouna.
34
Nopala opia yakoina oya-lawe tone
noateko neeka tone kawateko maminaka enika eniyapa anu yoname pupu toane kue
mootokoane topo toane mokala tokouna. Enipa kime wene tiki.
35
Padele padele toma
yakilepa dikoa pupu wedoa toa ponopeneya-kiti mama moa auapeatoane uku wane
oyamema yakouna. Nitikouna toa litia teketepa nipa Ali Munago Yesuyo akene toa wene
taneya mea tamene. Eya wa akeneya. Panagome panagonoke padeya moa pikoa mekomepa
wedia meko. Wa einagome onekeya pade nami kakameneya eko ago pa metekome
metekomepa etene wedoa kolotine meko wa Yesuyo akeneya wa Poloyo oka.
36
Poloyo enimo ootokoapa eni yene peya-pala neuwe tukupia mekome Akolali
kowitoa meka.
37
Nitikale peyame komo okoa kakete Polo tebea moa nunu oa kakoi.
38
Nipa
one lene timini kime wa enamoi wa eina okanakamoke e yene elame tuaneya kakete tokoi.
Nititikoapa one mea poateka ue dipi pikata wetekapokoi.
Aposelo Aposelo
<<
20 20
>>
Aposelo Aposelo
<<
21 21
>>
21
Polo Yerusaleme Take Pekenemo
1
Totome eni yene poti kamene wa lionate ootokoa ue dipike peapetekoa pote mea
Kose take pitimoa pote witapokoo. Eida piimotekete podolikama Lodese take pote
witapokoo. Lodese take piimotekete Patara take pote witapokoo.
2
Eida ue dipi nome piai
tokata peketepa Pinisia take poateka ue dipi pade enamutukete peapetekoa pote mea
pokoo.
3
Nitoa Saiperase ta eka pikale nami enemotekete eni taapa ewa yono lono eka
pimotoa pote Siria ta keneke piko Taia take witapokoo. Nitoa witapekete ete katepitoa
pokoo. Nipa eina ue dipike moa pikoina kopapu pupu ali-kitame ya wa moa piatekoi ta eni
witapeketepa katepitoa pokoo.
4
Eida Yesuno agale litia tane yene tuku toa enamutuketepa
ta pataka tatono (7) kakoake eni yene-pala mea kakoo. Nitikolopa Epetane Yominiyo wene
takakale tokome eni yename Polo nepa Yerusaleme poamea wa pubu okoi.
5
Nitikoiyake
tone poatekoo oi nokalepa eni ta tewitikoa pokolo e yename wetekapekete kini mati atoa-
pala ta kago ketepono patukoa kusa ue matanuke tugapokoi. Nitikete toto peya neuwe
tukua pia Akolali kowitikoo.
6
Nititikoapa tebetagutukoa kawa ue dipike lewia pote kakete
wete kamene-ye wa ootokoa pogatapea mekolo kini kini yapu yapu wakapea pokoi.
7
Nitikolipa Taia ta tewitikoa pote Tolemesi take witakete ete katepitoa potepa
Yesunomo yakoa motane yene kotukete ke wa tebetekoo. Nitoapa ta pataka odeneke eni
yene-pala eida mekoo.
8
Wa podolikama eni ta tewitikoa ka ludu pote Sisaria take pote
mepokoo. Nipa Yesunomo oa aua yakene ago Pilipi one yapu pote mepokoo. Namolopa
ponopene ali atoa auapea yopikamotoa tatono (7) kakoa ali-kiti takoa motikilepa einago
takoa motaneya.
9
Einagono kono tuyonopa alike wete poamene atoa one-pala eida mea
Akolaline agale to awea akakala taneya.
10
Kini etenane yapu ta pataka pade-mene toto pa
eida mekooka Akolaline agale to awea akane ago pade Yudea ta kawa noka. Einago one
ibinipa Agabasi.
11
Einago nome kakome Polono matiu kotokoa moa pinali one kawa
yonota matiume tau toologaka. Nitikome okome Epetane Yominiyo okana toanepa
Yerusaleme Yu yename i matiu pinago poome lutua pa yatenane yonoke moa piatiki adeka
pikene tuku-kale
12
yatekete eida pitikoi yene toto peyame Polo kowitikete ekete Yerusaleme
poamea wa kowitikolo okome
13
edekolo komo oa anu wene keda mati takoa iki-pe.
Yerusaleme yename no poome lutukolika oyake lutumotou. Tuadekolupa Ali Muno Yesuke
oyake tuou wa okale
14
totome poamea wa kowitikoa kawa teko tokale ekete nipa Ali
Munagono wene pikole taatekakoano pa wa okoo.
15
Wa naniko tonekeya-kiti moa nodokatekoa Yerusaleme take poo wa poadete
tokolopa
16
eina Sisaria yene padeka-kitame pekete pato wa eya agono yapu Yesunole koto
kakome takama yakene ago Nesone one yapu toto wetekapokoi. Nipa einago Saiperase
take opiane ago-pala toto meatekooya tokale ni one yapu wetekapokoi.
Polo Yame Mekata Ugu Pekenemo
17
Yerusaleme take witakolopa tone oya-mikitame ke ke wa toto makutukoa motokoi.
18
Wa podolikama Yame enepato wa Poloyo toto-pala koua pome enekale Yesuno ali atoa
yopia meane ali peya one mekata eida oboa meadekoi.
19
Kini oboa mekoita eida pome
kakome Poloyo e yene yono mootokoapa i i wa e ku pa yatene mekoika Akolali patu
kautakoa kakome toma yakanakamo to awea oka.
20
Nitikale yatekete e yename Akolali kei
pia kakoi. Nitoapa Polo-pala ekete ame i take toto Yu yatene ali atoa ege egeta wakala
kadukoa Yesuke wene tugoa meketepa Mosesene totono wedoa litia tiki.
21
Ete Yu ali-
kitame eni yene-pala eya wa akeneya. Ne einago Poloyo e ku pa yatenane take to a pote
meki Yu yene eya tamene wa olaukama yakome toko. Mosesene totono tewitikoa wawa
kini ali matiyane kepene teigamoa kini kaua-mikitame tanele litia toamoa tamene wa
olaukama yakome toko wa ne akoa iki.
22
Opi ne noke mekomo yakoino, edato-pe.
23
Ne
einagome Mosesene totono litia tadeko wa eni Yu yene wene keaneya memotoa teke eya
tamene. Tone oya ali-kiti tuyonome ile too wa Akolali-pala oa togotokoina toa tekete
padeya-kiti kekoa wawa noamoa tobou pine pituameneya meki.
24
Einali-mene-pala kibutua
kake Akolaline leneke poanele takoa koikatapeneya meadete toatikile tamene. Nitoa oneke
padeya lodo yoatikiya motokoa meamene. Nitikalepa einali-mename Akolali-pala ile too wa
papete oa togotokoina toa toa peya takaketepa kini tobou pine pitutapeamele too. Neme eni
yene auapea enile tokale enekete peyame eya wa oi. Ne i agome Mosesene totono litia
tokono, ete yename ne akoa okoinapa kapene wakoa akediki wa oi.
25
Yesuke wene tugoa
meki pa yatene ali atoame edikoa toatiki toa mena. Nipa eya-mene odene kekoa wawa
noameamene wa totome oi pedoa pikoona toa pipia wia wetekakoo. Iponole toa toge kiane
neeka kamateka noamoa ni kamate kakeneya kabe dekoa tukane kai tawe eya kia
noameamene. Ni pamoko toameamene wa e ku pa yatene-kitike pipia wia wetekakoo wa
Yesuno ali atoa yopiane ali-kitame Polo-pala okoi.
26
Nitaneyake podolikama Poloyo einali-mene moa aua poka. Nitoapa Akolaline leneke
poanele takoa koikatapeneya meadete toatekoile einali-mene-pala odeneka toomotokome
tobou losu yapu poka. Nitikome okome Akolaline leneke poanele takoa koikatapeneya
meadete toatekole ipete toa peya takadete toko. Ipete kime lodo yotokate tomotoa tone
tone sipi sipi kai eya aua note menoo wa Akolalike lodo yotokoai tane ali-kiti-pala eina oi
mepaneya.
Polo Tobou Losu Yapuke Dekoa Motanemo
27
Ta tatono (7) kakoa patakale enile toa pea takatekoi tigotokale Polo tobou losu yapu
pome kaka. Nitikale enekete Esia ta kawa nekene Yu yename eida kakoi peya oa kamotokoa
Polo dekoa motokoi.
28
Nitoa kayo ekete ekete Iserele yene tone ame-lawe toto wete
auapenoe. I agomepa ta piko peyake ali atoa olaukama yakome toto Yu yene akoa agale oa
tone totonoke poanemo oa tone i tobou losu yapuka paya tetepo takoa olaukama yako.
Opi i tobou losu yapu keneke pa yatene ali-mene moa aua nikilepa tone kekanele eni toko
wa kayo oa kakoi.
29
(Kime eni tokoipa Epesase take opiane ago Teropimasi Yerusaleme ta
ludu Polo-pala opia yakale enekoiya tekete Poloyo eni pa yatene ago kini tobou losu yapu
aua nokome toko wa wene pikete ni tokoi.)
30
Nitikolipa Yerusaleme take mekoi peya timini nakale padeka padeka kawa teyapea
nekete Polo tobou losu yapu kakata note one dekoa motokoi. Dekoa moa akolono lia
pitikakoli eina eina yopikoi-kitame kago-kiti ketekala tokoi.
31
Nitaneyake one wia tukadete
wili toa kakolipa ako tobou meane poyo agomepa Yerusaleme take meki-kiti kotimi yoa
kamokolokaki wa okoimo yatekome
32
eina eina oneke lokoa poyo ali-kiti yopiane ago-
meneka pa poyo ali-kitika moa kepoke ketipea teyapea kikilikoa aua eni Yu yene oboa
kakoita pekeneya. Nitikale enekete e yename Polo ikimu wia wakoli
33
tobou ago pinele
pome Polo dekoa motokome okome i agopa kapa po takuta kakoa kebetamene wa
ootokoa kakome okome i agopa mani ago-pe. Edele tokale tokoiya-pe wa yateka.
34
Nitikale
eida oboa kakoi-kiti padame pade oa padame pade oa ate keti toa kakoli tokome pine pitia
yakamele toamokale kakome okome i ago ate poyo yene tone pawe kago ka wa motane
yapu aua patepoe wa poka.
35
Nitikale Polo a yapu ate poademe tili waneke keku keneya
kakale e Yu yename apua takoa kobeyo pote edelogakoli tokome poyo ali-kitame kini
yoname leyo toa Polo yonoto yonoto toa aua pokoi.
36
Nitoa aua pokoika eni yename litima
note kayo ekete ekete winago wia tukakoe wa awitikama nokoi.
37
Nitaneyake poyo ali-kitame Polo a yapu tuapea aua poadete tokoika Poloyo ako
tobou poyo ago yatekome okome nepala agale pade ukuno, ne oyake yateko pe-kale
okome ekee Geriki agale wene toa oko.
38
Nipa nepa eya ago toameadeko. Ali atoa wia
tukakala tane ali ege egeta kadukoa (4,000) poi kamotokoa moa ali piamene take aua pekene
Idipi ago ne toameadeko wa okale
39
Poloyo okome nopa Yu yatene ago Silisia ta keneke
piko Tasase take opiane ago. Nopa eni ibini akene take agono, e Yu yene-pala agale pade
ouno, oyake-pe-kale okome
40
e eno, amene wa okale Polo tili waneke kakome yoname e
yene kawikoa kakale agale kawilogakoli Iberu agaleke eya wa oka.
Aposelo Aposelo
<<
21 21
>>
Aposelo Aposelo
<<
22 22
>>
22
Poloyo Yerusaleme Yu Yene-pala Akenemo
1
Ame atai-loe pinali anu kei piane oatekumo ukuno, yakoe wa okale
2
yatekete ekete
ekee i agome tone Iberu agaleke eni oko wa agale te itoa wawa kakoli okome
3
nopa Yu ago
Silisia ta keneke piko Tasase take opianeyake Yerusaleme take tubetoane kakene eya ago
Gamelielene sukilike pokouya. Einago Gamelieleyo tone kaua-mikitame litia toma nekene
totono litia olaukatapekale yakoane tokou. Nipa kime Akolalinele wedoa takama niki toane
noanumeka wedoane takama nuku.
4
Nitikenepa i weneya totono litia tiki yene tete meane
wiane tukoane alika atoaka kebetoane po yapu pitikoane tokou.
5
Kipala i ukumopa ako
odene mekome Akolalike lodo yotokoai toko tobou agomeka ete Kanosolo ali peyameka
no einagome nimini eni oko wa no kei pia amele toko. Eni tobou ali-kitame kini oya-mikiti
Damasikase take mekika i pipia meamene wa pipia wia metekoli moomotekene Damasikase
take pokou. Nipa weneya totono litia tiki-kiti kibu momotoane oto Yerusaleme take liane
auane nou wane pokou.
6
Damasikase take poadene pekene tigotokakoane witapokouta lou mataike pene
kelema ponokale a tibuke pa toa kaka matiyame keti to awineya nome no ewetemoa pikale
7
itonoke auane pitakene yatekolu padame agale okome okome Solo Solo no edeyake tete
mekala toko-pe wa okale
8
yatekene ekene Ali Muno nepa te kake oko-pe-kolu okome neme
tete mekala tokago Nasarese Yesuyo uku wa oka.
9
Nitikake nopala opia nokoi ali-kitame
eni toka pa eneketeke nopala agale oa kakamo yakamokoi.
10
E yename yakamokolika ekene
Ali Muno anume edele tomotoa oko-pe-kolu okome Damasikase take poke mepamene.
Poke mekale neke toatekale Akolaliyo kotukapikale-kama i i wa panagome nokome oono,
wete kamoa poano pa wa oka.
11
Eni toka pa me anu leneta likaneya tokome nopala opia
nokoi ali-kitame anu yono moa aua pote Damasikase take mekapokoi.
12
Eni takepa Mosesene totono wedoa litia tokago Ananaiasi meaneya. Damasikase Yu
yene peyame one kei piai taneya.
13
Einago no mekouta nokome okome ame Solo neke
leneta wa kikoa ena wa okaka eina eina leneta kikakatapeneya enekolu einago kakale
enekou.
14
Nitikolu okome ame tone kaua-mikitane Akolaliyopa eya tomotoa ne moa
kakapianeya. One wene pikole wene toa toa ni wene kiyo akeneya-kama mekago enoa ni
einagome nepala agale a wa okale yakoa tomotoa tokome ne moa kakapianeya.
15
Nitaneyano, neke leneme enoa kaleme yakoa tokanakamo ali atoa pitikoi toa pima yake i i
wa akama poo.
16
Edoa ita nepia meade-pe. Neke poanele ko a mitikakamotono, Yesuno
ibini wedekoa ue moamene. Wete kamoa wa Ananaiasiyo oa poka.
17
Nitaneyake Yerusaleme wakapeane none mekou. None mekene tobou losu yapu
pone kowitikoane kakene pulete keneya enekolu
18
Ali Muno no kakouta nokome okome
anukumo neme oa metekolo i take meki-kitame yakamadete wakino, i ta wete tewitikoa pa-
kale ekene
19
Ali Muno papete losu yapu kaka toane pikilepa neeke wene tugoa mekoi-kiti
po wapime wiane po yapu pitikoane toadene tokouno, i take meki-kitame anu eni toma
yakounakamo yatekete tokoi.
20
Neke agale akama pokago Sitipane ete Yu yename wia
tukakoina-pete noka e yene-pala opiane kakene oyakeno toe wane eya tokou. E Yu yename
einago wia tukadete kini tokoo mamina kotokoa pitikakoita eni mamina nepikoane kakou
wane Ali Muno-pala okou.
21
Nimo okolu okome e ku pa yatene ta tetemada mekika ne pa
wane ne wetekouno, wete pa wa Ali Munoyo nopala oka wa Poloyo oka.
Onepa Lomane Yatene Ago
Wa Polo Pinali One Wa Kei Pianemo
22
Poloyo agale okoa kakale e Yu yename yakakoa meaneyake one wipitikome okale
yatekete agale telo oa kamotokakete ekete i agopa katekoa wato. Wete wia tukato wa ka oa
kakoi.
23
Nitikete kini tokoo kakene mamina kotokoa kogoa itono kugue-pala moa ate
tadekoa tokoi.
24
Nitikakoa ako tobou poyo agome okome Yu yename i ago-pala wene
pokete u u kayo oa kakino, one tanemo tete nakome omotono, tone a yapu aua pote layo
toua wipoe wa oa poka.
25
Nitikale e poyo ali-kitame aida aua pekete wiadete kebetelogakili
Poloyo kiwi yopikago one lutukoiya liti kakale eya wa yateka. Lomane yatene agopa one
tanemo-kiti koiso yopikagome wete pitia yakameneyake oyake layo toua wiamele toko-pe
wa okale
26
yakamotokome einagome ako tobou poyo ago mekata wete pokome okome
mone i agopa Lomane yatene ago tadekono, edoa layo toua wimotoa-pe wa okale
27
tobou
ago Polo kakata nokome yatekome okome nepa Lomane yatene ago-pe-kale okome e eno,
nopa Lomane ago kaku-kale okome
28
ae nopa pa yatene ago opianeyake tubetoane kakene
Lomane yatene ago latiadene kue peya mati metekou wa okale Poloyo okome Lomane
agome no opianeya wa oka.
29
Nimo okalepa one pitia yakatekoi ali-kiti ete witimoa kakoi.
Ako tobou poyo agoka i agopa Lomane yatene agoke kapa po kakakou wa pitime tuaneya
kaka.
Polo Kanosolo Yenane Lene Yoto Kakenemo
30
Podolikama ako poyo tobou agome eya toka. I agome edele taneyake Yu yename
akoa agale ikiti patuno, pine to ane pitiane yakou wa Polo kakane kapa po kotokaka.
Nitoapa Akolalike lodo yotokoai tane tobou ali-kiti ete Kanosolo ali peya koukoa noe wa
agale oa wetekakale koukoa note mekoli Polo moa aua pome kini lene yoto kakapoka.
Aposelo Aposelo
<<
22 22
>>
Aposelo Aposelo
<<
23 23
>>
23
1
Poloyo e Kanosolo ali-kiti nepikoa pikome okome anu oya-mikiti tubetelaukene
Akolaline leneke tepeme epetanele ta wa okale-kama toma nokou. Opi-kitika pa edikoane
toma yaku wa oka.
2
Nimo okalepa ako odene mekome Akolalike lodo yotokoai tane tobou
ago Ananaiasiyo Polo kakaya liti kakoi ali-mene-pala okome winago kabunu kugutukoa wia
wa okale
3
Poloyo okome yapu ekolopa kego nakeneya kamotoake akolono kegelepa
koniyo takoa peno yotokou toa wini toko. Mosesene totono litia neme no pitia
yakamedeko. Nitameneya eni totono tetekake eke no i ago wio wapa wini meke okono, pale
wini tokona wa Poloyo okale
4
one kakaya liti kakoi ali-kitame Polo-pala ekete ako odene
mekome Akolalike lodo yotokoai toko tobou ago-pala wini oa potokako-koli okome
5
ae
anukameyo einagopa ako tobou ago mekono wene toamekene okou. Neke ako tobou ago-
pala poanemo wameamene wa Akolaline bokuke wia mekaneyake tokou. Ela toko wa
Poloyo oka.
6
Nimo ootokoa enekale e Yu yene padekapa Sadusi yene wa padekapa Parisi yene
kakedekoli enekome kayo okome okome anu oya-lawe noka Parisi ago. Agetaika Parisi
ago. Tua pekene ali atoa kamoa pomotoane nepikoane mekene wediane mekuleke pade-
kitame no koiso akaki wa okale
7
yatekete eina eina Parisi ali-kiti Sadusi ali-kiti ete oto agale
oa pilia puutakutukoa kakoi.
8
(Einapa Sadusi totono litia tiki Yu yenamepa tua pokoi ali
atoa wa kamoa poamoi wa olaukoa ni edelo ali-kitika ali atoane yominika meamiki wa
olaukakiya. Nitikiyake Parisi yenamepa tua pokoi ali atoa kamoa poi wa olaukoa ni edelo
ali-kitika ali atoane yominika meki wa olaukakiya.)
9
Poloyo oka agaleke e yename agale telo
oa kamotokakoi. Nitoapa Yu yenane totono pine to a olaukane ali padeka-kitipa Parisi yene
tekete kamokoa kakete agale telo ekete ekete i agome poanele padeleka toameadeko. Edelo
agomeka yomini padameka onepala ko akeneya patu wa okoi.
10
Nitikoli peyame u u wa ete
oto wa pili pili toa kakoli enekome ako tobou poyo agomepa e yename Polo kawa yono
tekea tadekakaya tokale one poyo ali-kiti keti wetekakome okome kei ago odoa moa tone
poyo yapu oto aua noatino poe wa keti wetekaka.
11
Podolikama ta likaka Ali Muno one pono Polo yamenokome okome anukumopa
Yerusaleme wini akama pokana toa Lomane takeka akama poano, piti moameneya wedia
meamene wa oka.
Polo Wia Tukatekoi Oi Pedoa Pianemo
12
Podolikama ta patakaka Yu ali pade-kitame Polo wia tukatekoi oi pedoa pianeya.
Nipa one wete wia tukameneyake ue neeka wawa noamato wa taneya.
13
Eni oi pedoa
pikilepa padeka noi kakoa (40) alime taneya.
14
Nitimotekete Akolalike lodo yotokoai tane
tobou ago-kitika Yu yene yopiane ali-kitika oboa mekoita pekete ekete Polo wia tukateko oi
pedoa pia noko. One wete wia tukameneyake ue neeka wawa noamato wa oi pedoa
pikooyano,
15
eya tamene. Ete Kanosolo ali peya kime tobou poyo agoke agale wia
wetekakete ekete winago Polo one tanemo pine to a pitia yakoono, Kanosolo yapu oto keti
aua namene wa agale oa wetekamene. Polo einago oto noameneka kutu dekakoa poi pia
wipoono, einago oto nomotono, agale oa wetekakamene wa onaneya.
16
Polo wiatekoi oi piadekoimo Polono awene matiyame yatekome poyo ali-kitane
yapu pome awene pubu opaneya.
17
Nitikale yatekome Poloyo poyo ali-kiti yopikago pade
nepala agale pade ouno, wete no wa kayo oa motokome okome i matiyamepa neke ako
tobou ago-pala agale pade oademe tokono, one mekota aua pa-kale
18
tobou ago mekata
aua pokome okome po yapu pitikago Poloyo no kayo oa motokome okome i tualime
tobou ago nepala pademo oono, ne mekota aua pa wa okolo auane nuku wa akeneya.
19
Nitikale tobou poyo agome matiyane yono moa paka witimoa aua pome yatekome
okome nopala edemo oade noka-pe-kale okome
20
Yu yename kini oi pedoa piane toa eya
wa oa toi. Winago Poloyo tanemo pine to a pitia yakoono, podolio winagopa oto keti
Kanosolo ali-kiti koukoa mekoota aua namene wa ne oa yotokoa agale oa wetekoino,
21
kini
okoimo yakameamene. Padeka noi kakoa (40) ali-kitame one wiadete poi pia mekete tiki.
Nipa agetai tia one wete wia tukameneyake nee ueka wawa noamato wa oi pedoa piane toa
poi pia mekete tiki. Ipete auane nou wa neme oi metadekamo yakoukete nepia mekete tiki
wa matiyame akeneya.
22
Nimo okale tobou agome okome wini okagalepa eko ali-kiti
enekepa tobou ago-pala imo wane okou wa wamoano pa wa wetekaneya.
Polo Sisaria Take Moa Wetekanemo
23
Nititikoa tobou agome oneke lokoa tobou meane poyo ali takuta wete noe wa kayo
oa motokome okome ka ludu kawame poatiki poyo ali kadapime kadukoa (200) takoa moa
ni osi kai patu mea poatiki poyo ali ege odepeta kadukoa wa kapidi kakoa (75) takoa moa
ni lama tigine poatiki poyo ali kadapime kadukoa (200) takoa moa tamene. Ta likaka 9
kilokoke eni poyo ali-kiti-pala Sisaria take aua poatino, wete takoa mopamene.
24
Polo mea
poateko osi kai-meneka takoa moamene. Nitoapa onepala padele takaya tokale osi kai patu
mekoa wedoa yopikoa-kama aua pamene. Nipa ta yopikago Pilikisi mekota aua pamene wa
akeneya.
25
Nititikoapa Sisaria ta yopikago Pilikisike pipia wia wetekakome okome
26
nopa
Kelodiasi Lisiasiyo i pipia wiane mekaku. Kamo koniyali Pilikisi neeke agale deya wiane
wetekakene eya wane ukuno, yakamene.
27
Ne mekota moane wetekaku agopa Yu yename
dekoa moa wia tukadete tokoiyake toane mopokou. Nipa one Lomane yatene ago tadekale
yakamotekene anu poyo ali-kiti-pala auane pone toane mopokou.
28
Nitoanepa i agopa
koiso edeyake akoa iki-pe wane pitiane yakadenepa Yu yenane Kanosolo ali-kiti oboa
mekoita auane pokou.
29
Nitoane pitiane yatekolupa one po yapu pitikakene one wiane
tukakene toatekoule piameadeka. Yu yene pa kini totono i agome tetekakala toko wa ni
koiso akoa akedekoi.
30
Wa naniko Yu yename einago poi pia mea wioukete oi pedoa
pianemo yatekenepa eina eina ne mekota i ago moane wetekou wane neeke wetekaku. One
koiso akaki yeneka ne mekota koiso akapoatino poe wane neeke wetekakuna. Anu agale eni
peya. Wete meamene-ye wa ako tobou poyo agome ta yopia meane agoke eni pipia wia
wetekaneya.
31
Tamene wa akenele litia teketepa likonu poyo ali-kitame Polo-pala aua pote
Adipaterise take dekoa pipokoi.
32
Piimotekete podolikama osi kai patu mea nokoina poyo
ali-kitame Polo-pala Sisaria take aua pote-kama kamotoapa kawame nokoina poyo ali-kiti
Yerusaleme take kini poyo yapuke wakapea pokoi.
33
Nitikoli o yename Polo-pala aua pote
Sisaria take witakoi. Nitoapa ta yopiane ago Pilikisi mekata pekete pipia metekete einago
Polo ina wa metekoi.
34
Nitikoli ta yopiane agome pipia moa oi mootokoa Polo ne mani take
ago-pe wa yatekale okome Silisia ago kaku-kale okome
35
ne koiso akatekoi yene oto
nokolipa neme tanemo pitiane yakou wa ootokoa kakome one poyo ali-kiti-pala okome i
agopa Erodeyo Yu yene talo tokome meko yapu aua pote mekoa yopikoa kamene wa
meteka.
Aposelo Aposelo
<<
23 23
>>
Aposelo Aposelo
<<
24 24
>>
24
Yu Yename Polo Koiso Akakete Akenemo
1
Ta ko kakoa (5) patakalepa ako odene mekome Akolalike lodo yotokoai tane tobou
ago Ananaiasi Kanosolo ali padeka-kiti-pala koua Sisaria take keti nekeneya. Lomane
totono wene toa koiso akene ago Tetalasi einagoka eni yene-pala opia nekeneya. Enika eni
yenepa ta yopikago Pilikisi mekata note Polo koiso akananeya.
2
Nitaneyake koiso yopikagome Polo ne noo wa kayo oa motokale Tetalasi
kamokakome agale titikome okome kamo koniyali Pilikisi nemepa tone ta talo toa
epetekakolo tokome toto peya kotona kilikoa meko. Ele kule poaneleka neme oa pilia
motokakana tokome toto peya mea epetekako.
3
Ta pataka abuna eka kuka meko toa
totome nepala ke-kama oko.
4
Agaledo ludukiya okolupa ne koome tukayano, pa tigini
ouno, toto ela moa yakamene.
5
Winago Polo enekakole-kama tokagopa Yu yene pitiki toa
pima yakome oa kamotokama yako. Nasarini totono litia tiki yene kini tobou ago pade wini
kako.
6
Winagome tobou losu yapuka toa potokoa eneka. Nitikalepa tone totono litikete
pitia yakoa koiso akato wa totome dekoa motokolo
7
ako tobou poyo ago Lisiasi one poyo
yene-pala teyapea nome einago telo odoa moa poka.
8
Nititikoapa winago Polono koiso
akako-kiti toto ne mekota koiso aua poatino poe wa wetekakale nokoo. Winagome toma
yakole totome ni koiso akakopa inapa nimini akedeki wa wene toadepa one tanemo neke
pitia yakamene wa Tetalasiyo oka.
9
Nitikale e Yu yene peyameka Polo koiso akakete ekete
e eno, Tetalasiyo nimini oko wa oa kakoi.
10
Nitikolipa Polo pinali one wa kei pimotoa tokome tobou ago Pilikisi kabe
togoikakale Polo kamokakome okome nemepa toto Yu yenane ta kotona yopikoa
kakanano, pinali anu wa kei pikilepa atiki tootapeane tuku.
11
Yerusaleme take Akolalinele
takoane kowitoane toadene i ta tewitikoane pone mekilepa ludu pitikoane meamokou. Ta
tuku (12) kakoa wete patameneyake oto wa nokou. Einapa nimini akedekolu neme oyake
pitia yakou.
12
Aida Yerusaleme take pone mekenepa tobou losu yapu keneke ete Yu ali-kiti-
pala mokota wamoane kini sinokoke losu yapu-kiti kenekeka kini yapu luduka ali atoa oane
kamotokamoane tokou. Enile toma yakoule i Yu yename enekoiya mena.
13
Nopa neme
poanele dikoa tokale enekou wa padameka neke leneke kakete oyake to awea wamoi.
14
Eya
wane to aweane ukuno, yakamene. Yu yene tone kaua-mikitane Akolali onekele takama
nekenepa weneya totono litiane tuku. Eni weneya totonopa i yenamepa kapene totono wa
iki. Mosesene totonoka Akolaline agale to awea akane ali-kitame wia mekane agaleka eni
agale peya noanumeka yakoane motokouyake iki.
15
I yename Akolaliyo taatekoa toatekole
nepia meki toane noanuka kolotine mekene nepiane meku. Nipa epetanele toma yawa tuane
yeneka poanele toma yawa tuane yeneka Akolaliyo moa kamotokamotoane nepiane meku.
16
Nitikenepa Akolaline lenekeka ali atoane lenekeka kiyo akenele-kama tou wane toane
enekala tuku.
17
Mali pade-mene ta tetemada pima yawane Yerusaleme take wakapeane nokou. Nipa
no yatene ponopene ali atoa kue eya tatikoane Akolalike padeya lodo yoane toadene
nokou.
18
Eida tobou losu yapu keneke Akolaline leneke poanele koikatapeneya kakene enile
toane kakouka Yu yename no enamutukoi. No eida kakouka ali peya mati kawamoa u u wa
oa kawamoa tokoi.
19
Einata einapete Esia ta kawa nekene Yu yeneka kakoi. Eni yename
padeya namike no koiso akatekoimo piadekalepa ne mekota koiso akanoi tokano,
noameadiki.
20
Eni yenepa oto noameadikino, i note kaki Yu yenamepa no Yerusaleme take
Kanosolo ali-kitane lene yoto kakolu pitia yakoai tokoino, no poanele tadekolupa eni
poanele tokoumo neme yakakakolo to awea omotoane uku.
21
Yu yename anu koiso
akakilepa eya tokouleke tiki. Kanosolo ali-kitane leneke kakene kayo ekene ekene Akolaliyo
tua pekene ali atoa moa kamotokoo wane okounakamoke anu koiso akaki wane kayo okou.
22
Polono koiso yatekakago Pilikisiyo eina weneya totono wene tane ago tokome poti
yakakoa meka. Nitoapa Poloyo enimo okamo yatekome okome koiso opipa eida nami
kakalogoa watoe. Tobou poyo ago Lisiasi oto nokalepa neke tanemo pitiane yakatapeou
wa oka.
23
Nitoapa one poyo ali-kiti yopikago Polo yametekome okome i ago Polo po yapu
wa pitikapekepa mama moa nepikoa kamene. Nipa padeya-kiti toamokalepa one oya-
mikitame motokoa aua nomotamene wa oa poka.
24
Ta pade-mene patatekaneyake Pilikisi one natono Derusila-pala eida nekeneya.
Einatoapa Yu atoa. Pilikisi eni nokomepa Polo oto nomotamene wa kayo okale nokome ali
atoa Keraisu Yesuke wene tugakete toatekoimo to awea okale yakakoa meka.
25
Nipa ali atoa
wene kiyo akeneya mekete toatekoimo ni ua moa yawatekoimo ni Akolaliyo ali atoa takoa
enoa akatekamo Poloyo i i wa to awea okale yakakoa mekome Pilikisi tepe lagotokale piti
tokale mekome okome wa padepete padele-kiti toamekene yakameledo toka-petepa
namene-ye wane kayo ouno, opi pa wa wetekaka.
26
Pilikisi einagome Polo kayo oa moa
yakoa mekilepa Poloyo one yapu poukome kue memotoa ni taneya. Eni wene pianeya
mekomepa ipete kue meteko patu wa lugutukoa kayo oa moapa one-pala ko lede okala
taneya.
27
Mali takutake Pilikisiyo edikakala taneya. Nitaneyake one luku eya ago Posiasi
Pesasi Yudea ta yopiademe nokale Pilikisiyo Yu yenane wene epetekadene tuku wa Polo
po yapu eida pa memotoa wawa poka.
Aposelo Aposelo
<<
24 24
>>
Aposelo Aposelo
<<
25 25
>>
25
Poloyopa Ako Tobou Ago Sisayo One Koiso
Yatekamotoa Akenemo
1
Pesasi einago Yudea take nome mekomepa ta tebolo takoa patakale Sisaria ta
tewitikoa Yerusaleme take ate pome mepaneya.
2-3
Nitikalepa Akolalike lodo yotokoai tane
tobou ali-kitika ete tobou ali-kitika Pesasi mekata nekete ekete Polono koiso akoono, oto
Yerusaleme take nomotono, agale oa wetekoano ta wa akeneya. Nipa Polo nokata poi pia
mea wiadete ni akeneya.
4
Nitikoli Pesasiyo agale topo takakome okome Polo einago Sisaria
take pa eida mea kamotou. Sisaria take keti poateku tigotokono,
5
einagome poanele
tadekalepa one koiso akadete kini tobou ali padeka-kiti nopala opia keti nomotamene wa
Pesasiyo akeneya.
6
Ta pataka ketepo (8) kakoa patu noi (10) kakoa patu Pesasi eni Yu yene-pala
Yerusaleme eida mea kawa Sisaria take keti wa wakapea pome mepaneya. Nitoapa
podolikama koiso yopikago meateka walaike pome mekome kunago Polo oto aua noe wa
okale
7
Polo nome kakale Yerusaleme kawa nokoi Yu yename one kakata unukoa kakete
ekete i agome dika dika toamene poanele toka wa okala tokolika kini eni akoa okoimopa
niminimo wameadekoi.
8
Nitikoiyake Polo pinali one wa kei pikome okome toto Yu
yatenane totonoka tone tobou losu yapu totonoka tetekamoane ako tobou ago Sisane
totono tetekamoane tokou wa oka.
9-10
Nitikale Pesasiyo e Yu yenane wene epetekademe tokome Polo-pala okome i
yename nepala akoa ikimopa Yerusaleme take pekene pitiane yakouno, patoa-pe wa okale
okome e 'e, mena. Tobou ago Sisayo anu koiso Lome take pitia yatekamotoane uku. Noanu
koisopa Lome take eida akamediki. Yu yene toane potokakileka toamokou. Enipa neme
wene toko.
11
Lomane yatenane totono tetekakouleke no wia tukameledo tokalepa nipa no
wia tukamotoane keku. Yu yename nopala akoa ikimopa niminimo wameadekolipa nipa i
Yu yenane yonoke teyo no moa meoo tokolo-pe. Ako tobou ago Sisayo anu tokoumo
Lome take eta pitia yatekamotoane ukuno, koiso opi ita wamato wa Poloyo oka.
12
Nitikale
Pesasi one koiso auapekoi ali-kiti-pala oboa mekome dikou wa oa togotokakome Polo-pala
okome tobou ago Sisayo neke tokoumo pitia yatekamotoane uku wa wini okono, tobou
ago Sisa mekota moane wetekou wa oka.
Polo Tobou Ago Ageripane Leneke
Kakome Akenemo
13
Ta pade-mene patatekaneyake tobou ago Ageripa natono Benaisi-pala Sisaria take
ugu nome menaneya. Nipa Pesasine yono moa agale akademe nekeneya.
14
Ageripa adona
ta pade-mene pataka toa eida meetekaneyake Pesasiyo tobou ago-pala Polo ko oa kakome
okome Pilikisiyo i Yudea ta yopia mea tewitikakomepa padago po yapu pa mea kamotoa
wawa poka.
15
Noanupa ate Yerusaleme pokolupa Akolalike lodo yotokoai tane tobou ali-
kitika ete Kanosolo ali-kitika no mekouta nekete einagono koiso akakete ekete Polo winago
pitia yakatekoa kibu motokamene wa akanokoi.
16
Nitikoli ekene toto Lomane yatenane
totonopa dikakoya. Koiso yakoa meketepa odene lono yakamoko. Nipa pade-kitamedo
panagono koiso akakilipa einago nokome pinali one kei pia enemotoa toko. Nipa one koiso
akaki yenane yonoke toto Lomane yatename pa moa pikoya mena wane okou.
17
Eina Yu
yene nopala opia oto Sisaria take nokoli podolikama koiso yopiane meatekou walaike pone
mekene einago Polo oto motokapoe wane poyo ali-mene moane wetekakou.
18
Nitikolu
einago nome kakale one akoa agale okoi-kitame kamologoa i i wa one akoa oa kakoi. Nipa
einagome padele padele poanele tanemo to awea oino wene piane yatekolu pamo-kama
akakala tokoli yatekou.
19
Nipa kini losu totonoke einago-pala agale to onali yoa ni panago
one ibini Yesu tuake wa kamoa pekeneya wa Polo einagome akenemoke wene pokete akoa
okoli yatekou.
20
Nitoane yakakoane mekenepa edoane pine to ane pitiane yakou wane wene
pikene i ago Polo-pala eya wane okou. Yerusaleme pekene ne wa pitiane yakouno, patoa-
pe wane okolu okome
21
e 'e, mena. Ako tobou ago Sisayo anu koiso yatekamotoane
ukuno, ita po yapu pa piane meou wa oka. Nitikalepa i ago Sisa mekota moane wetekouno,
po yapu wa pitikoa poti nepikoa kamene wane anu poyo ali-kiti metekou wa Pesasiyo
akeneya.
22
Nitikale Ageripayo Pesasi-pala okome einagome agale okale onemeka yakou-
kale okome nipa podolio yakamene wa Pesasiyo akeneya.
23
Podolikama Ageripa-pala Benaisita ali atoa koukoai taneta note menokoi. Poyo ali-
kitane ako tobou ali-kitika eni take ibini akene ali-kitika kaloa tukoa eida kibutua nokoi.
Nitikolipa Pesasiyo Polo oto aua noe wa agale oa wetekakale nokale
24
Pesasiyo okome
tobou ago Ageripa ame-loe nepalaka ita oboa kaki-kiti kipalaka agale oane meteku. Tone
leneke kakagoke ukuno, yakoe. I Sisaria takeka Yerusaleme takeka Yu yene peya nooke-
kama nekete kayo telo ekete ekete i poane agopa toto mekota meamele toamokono, neme
wia tukakamene wa tikakoa kakala tokoi.
25
Nitikoiyake one tanemo pitiane yakatapekolu
one wiane tukatekoule oneme pade toameadeka. Nika tone ako tobou ago Sisayo one koiso
yatekamotoane uku wa i agome oka tokolo Sisa mekota moane wetekakuno wene pikene
uku.
26
Sisake pipia wiane wetekatekuyake i agome tanemo i wane wiane wetekatekumo
pade piamoko. Tobou ago Ageripa nepa wene tane agono, nemedo opi pitia yakoa wane i
ago neke leneke moane kakakuno, neme pitia yakatekoa okamo yatekene i agome tanemo i
wane wene tekene pipia oyake wiane wetekou.
27
Nipa po yapu pitikago Sisake moane
wetekakilepa one koiso akoa ikimo i wane wiane wetekamekenepa nipa pale tekene tou.
Nitamedekuno, neme pitia yatekamene wa Pesasiyo Ageripa-pala oka.
Aposelo Aposelo
<<
25 25
>>
Aposelo Aposelo
<<
26 26
>>
26
Ageripane Leneke Kakome Polo Pinali
One Wa Kei Pikome Akenemo
1
Nitikale Pesasiyo Polo-pala okome pinali neke wa kei pia agale oano ta wa okale
Poloyo agale oademe yono kamotokakome pinali one wa kei pikome okome
2
ako tobou
ago Ageripa i Yu yename no koiso akoa ikili pinali anu wa kei piane ikilepa ne kakakoane
ukuno, ke wane wediane kakene uku.
3
Nipa no Yu yatenamepa kini kaua-mikitame tanele
po pitia toma pikileka emo kumo pili pili toa ikimoka neme wene tootapekolo tekene ni
ukuno, i ukumo poti yakakoa meamene.
4
No yatene pakeke mekene tokoumo tualike laigoane Yerusaleme take pone mekene
tokoumo Yu yene peyame wene tiki.
5
Nipa Parisi yename tone losu totono-kama litia
tikilepa ete Yu yene peya moa patukakete tiki toane litiane tokou. Nitima nokoule Yu
yename koto enoa wene taneya mekino, no auapeadetepa einapa nimini oko wa no kei
piatikiyano, omotono ta.
6
Opi anu koiso akoa ikilepa eyake tiki. Akolaliyo toto Yu yenane
kaua-mikiti auapeatekamo papete oa piane toa taatekakolo kolotine nepiane mekulu tokome
koiso akoa iki.
7
Enile taatekakolo toto Yu yatene tuku (12) kakoa yateneka kolotine nepia
meki. Nitoa nepia mekete onekele ete pia oto pia wedoa takama piki. Ali Muno Ageripa,
Akolaliyo oa piane toa taatekakolo nepiane mekuleke Yu yename anu koiso akoa iki.
8
Akolaliyo one eina oa pikana toa taatekoa tokomepa tua pekene yene moa kamotokamele
toamoko wa wene pikipa edekolo wene piki-pe.
9
Papetepa padele padele toane Nasarese Yesuno ibini paya tetepo takou wane wene
piane mekou.
10
Yerusaleme take nitoane mekene Yesuno agale litia tane yene peya mati po
yapu moane pitikakala tokou. Nipa Akolalike lodo yotokoai tane tobou ali-kiti patu
kautakoane kakene tokou. Nitoanepa eina ali atoa wia tukatekoi oi pedoa pikolika oyakeno,
toe wane okala tokou.
11
Losu yapu kakoka ali atoa kibu moane ni Yesuke poanemo
omotoane toane enekala tokou. Nitoanepa Yesuno ali atoa-pala kotimi yotokou matiyame
mone ta-kitike to a pekene ali atoaka tuku toane moane tete mekala tokou wa Poloyo oka.
Polo One Tepe Kolotini Yesuke Pekoa
Pianeleke Akenemo
(Aposelo 9:1-19, 22:6-16)
12
Damasikase takeka enakale tou wane pokou. Nipa enile toatekou pipia Akolalike
lodo yotokoai tane tobou ali-kitame wia metekoli moane pokou.
13
Poadene pekene enekolu
lou mataike keleponokaka a tibu laigoa pa toka matiyame pitoa no payapono pia unukakale
enekou. Kamo koni tobou ago Ageripa, eina pa pa lou pa toko toa moa patukaka. Nitika
pa me nopala opia pokoi ali-kiti toto payapono pia unukakale
14
toto peya itono aua pitakolo
panagome Iberu agaleke nopala okome okome Solo Solo no edeyake tete mekala toko-pe.
Pinagome layo toua witikolo pitimekawe kaime ete pedekaku pokome toa tete motoko toa
pinali neke wa tete motokakala toko-kale yatekene ekene
15
Ali Munago nepa te kake oko-
pe-kolu okome neme tete mekala tokago Nasarese Yesuyo ukuno,
16
opa wete kamokoa ka.
Ne pono yametekilepa anukule takama poatekago moane kakadene tekene tuku. Nitikuno,
ne pono yametekumoka ne naniko yameatekoule-kitika i i wa ali atoa pitikika to awea akama
pamene.
17
Iserele yatene pitikikaka e ku pa yatene pitikikaka anukumo akama pa wane
wetekakenepa ne auapeane yopiane-kala kawou. Nipa eni yename ne-pala padele tokolipa
toane mokala tou.
18
Eni ali atoa yomiyomu keneke mekete tikino, pa tokota meati wa kini
lene kikakoa yamema pamene. Eni ali atoa Setanuke lukoa mekete tikino, Akolalike lukoa
meponomotamene. Nitikalepa Akolaliyo eya too. Eni yene no Yesuke wene tugakolipa kini
poanele toma yakoike po letu mekakanapa keetapea poanele wia mitikoo. Nitoapa one wa
takoa motane yene odeneya moa obokakomepa onekeya-kiti kini wa yameoo wa Ali
Munoyo nopala oka wa Poloyo oka.
19
Nitikome okome tobou ago Ageripa eina pulete enekounakale tagamoane onekemo
akama yakou.
20
Onekemo akama yakilepa Damasikase ta laigoane tokou. Nititikoane
Yerusaleme takeka Yudea ta luduka pa yatene-kiti pitikikaka pima yakene ekene kini namolo
poane wene wia wawa Akolalike tepe kolotini pekoa piamene. Tepe kolotini nimini pekoa
pianeya meadiki wa ete-kitame wene tomotono, epetanele toma pamene wane oma pokou.
21
Nitikolu tokome Yu yename tobou losu yapu pone kakouta no enamutukete wia tukadete
wili toa kakoi.
22
Nitaneyake Akolaliyo no auapekala tokano, opika einaka einamo ita kakene
ikilepa ibini akene yene-pala ibini wamene yene-palaka uku. Nipa Moseseyoka Akolaline
agale to awea akane ali-kitameka papete oa piane toane ikilepa pademoka anu weneme titiane
wamekene eya wane uku.
23
Keraisu taatekoa nokome tete moa mea tuamedeka. Nome
tukomeke ali atoa naniko kamoa pomotoa one namolo takoa kamoa pamedeka. Kamoa
pokomepa Akolaliyo Yu yeneka e ku pa yateneka toa moa pa takatekamo i i wa to awea
amedeka wa Poloyo Ageripa-pala oka.
24
Polo pinali one wa kei pikome nimo oa kakaka Pesasiyo teigakome okome i ago
Polo leau oa kake wini okono, pademo pademota yakoa luaneya teke pinali neke wa wene
bebo akatapeadeko wa telo okome okale okome
25
kamo koniyali Pesasi, leau ekene
wamukuno, poti uutukoane kakene ipa niminimo uku.
26
Ako tobou ago Ageripayo anu ina
ukumopa yatekala tokome tokano, one mekakoane ikilepa atiki toane kakene uku. Ina ukule-
kitipa paigakoa taneya menano, e e nimini wa oneme wene toko.
27
Tobou ago Ageripa ne
eya wane yatekene uku. Akolaline agale to awea akane ali-kitame papete wia mekapiane
agalepa enipa nimini akediki wa neme wene toko-pe. E e nimini wa neme wene toko wa
Poloyo oka.
28
Poloyo nimo okale Ageripayo okome wini agale tigini ikilepa noanume
Keraisunole takamotoa oko-pe-kale okome
29
agale tigini ekeneka ludu pitikoane ekeneka
Akolaliyo eya tomotoane kini kowitikakene uku. Tobou ago neka anu agale opi yakoa meki-
kitika kiwi peya no keneya ago latimotono ta wane kowitikakene uku. Noanu yono kapa po
kakaneya kaku toa dikaneya kamotoane wamuku wa Poloyo oka.
30
Nitikale tobou ago Ageripa natono Benaisita Yudea ta talo tane ago Pesasi toa kipala
opia mekoi peya kamotokoa pokoi.
31
Nitoa akolono pote ootakutukakete ekete i ago wia
tukatekoleka po yapu pitikatekoleka pade piameadeko wa oma pokoi.
32
Nitikoli Ageripayo
Pesasi-pala okome ae i agomepa Sisayo one koiso yatekamotoane uku wa wamoo tokapa
padele poanele toameadekono, poano pa wa neme one po kotokoa wetekatekale pioo toka
wa oka.
Aposelo Aposelo
<<
26 26
>>
Aposelo Aposelo
<<
27 27
>>
27
Polo Lome Take Ue Dipike Mea Pekenemo
1
I yene totopa ue dipike Itali take ipete mekoa wetekato wa oi pedoa piane ta patakale
Poloka ete po yapu pitane yene padeka-kitika tobou poyo ago Duliasine yonoke moa
pianeya. Duliasi einagopa ako odene meane tobou ago Sisane poyo yatene ago.
2
Nitaneyake Esia ta matanu ludu ue dipi noai tane ta-kitike kutu pima poademe
Aderamitiame ta pia nekene ue dipike toto peapetekoa mea pokoo. Eya ago Masedonia
keneke piane Tesalonaika take opiane ago Arisakasi toto-pala opia mea poka.
3
Nitoa ue
dipike mea pote podolikama Saidone take witakoo. Eidapa Duliasiyo Polo mama
motokome okome neke oya-lawe mekita eta kokoa mepoano pa. Neke noateko nee eya
metekete toino, pa wa okale katepitoa pome mepoka.
4
Wa naniko eni ta tewitikoa pokolo
pupulegeme oto-kama popokakoa kaka. Nitaneyake Saiperase tame pupulege pedekale
popokamoka lono ete keneya pimotoa kokotoa ponokoo.
5
Kokotoma ponetepa Silisia
Pabilia tata matanu ete pimotoa kusa ue muke penekete Lisia keneke piane Maira take
witaponokoo.
6
Eni takepa tobou poyo agome toto mea poateko ue dipi pade tuku toa
kakeneya. Nitoapa Itali take kutu poademe Alesaderia pia nekene ue dipi enetekoapa pato
wa toto moa mekaka.
7
Nitikale mea pokolo ta pataka pade-mene pupulegeme oto-kama
popokakoa kaka. Nitikale Naidasi ta patukoa kutu poadete wili tokoa kawa teko tokale paka
lono Keriti take pokoo. Nitoapa Keriti tame pupulege pedeka lono kokotoa Salomone ta
patukoa ponokoo.
8
Keriti matanu eko keneya pimotoa potii wa kutu kokotoa ponete kusa
ue ko ianeka tugaponokoo. Nipa Lasia ta liti pupulege popokamoko lono ue dipi pinoai
taneta tugaponokoo.
9
Ta kainya mati patakamotoa eida mea kakoo. Mea kakooka Yu yene kini losule tekete
nee tekei wawa noamatekoi oipa wete penaneyake pupulege tadalita u u wa noka tokene
taatekoa nome kaka. Nitaneyake Poloyo eya wa pubu oka.
10
Ame-loe opido mea pokolopa
ue dipi wia ka ua kopapu atua ali-kiti tua too wa pubu oka.
11
Nitikaleka tobou poyo agome
Poloyo okamo yakamokome eya agota ue dipi yopikago ue dipi pinagota kini agale yakoa
toka.
12
Eida ue dipi pinoai tane takepa pupulege tadalita taatekoa noka tokene-mene poti
kilikoa piamele toamokale tekete ue dipike mekoi-kiti peya matiyame Pinikisi ta kutu pipote
enato wa oi pedoa pikoi. Keriti ta keneke latiane Pinikisi taapa pupulege wedoa popokoa
kawamene ta tokome ni tokoi.
Pupulege Tadalita U u Wa Noka Matiyame
13
Wa nani keneya pupulege poti kawia popokakale eneketepa kini oi pedoa pikoona
toa Pinikisi take oyake mea tugapoo wa wene pikete eni ta tewitikoa pokoi. Nitoa Keriti ta
matanu eko keneya pimotoa kokotoa ponokoi.
14
Eni ta pene tewitikoa pokooka pupulege
mati Keriti lono titimoa popokawineya noka.
15
Nitoa ue dipi dekoa popokakale pupulege
pine wia noka lono poadete wili toa kawa teko tokale wakolo pupulegeme dekoa aua poka.
16
Nitikale paka katekoa mea penekete tube kusa ue muke piane ta Kooda wa ibini akene ta
patukoa ponokoo. Eni de taame pupulege pedekale peneketepa po kakamoa lia aua nekene
ue dipi deya oto tube ue dipike liimoa kakadete wili tokoa kakoo.
17
Ate liimoa kakatekoapa
tube ue dipi pilage wia pedoa pitakaya tokale pupu yename ue dipi kouna lono poome lutua
tagatapekoi. Nititikoapa pupulegeme ue dipi Libia ta matanu liti ue kekulu kibi tono keneya
kakeneta popokoa aua pokome wia mitikoa kaugaya tokale eya tokoi. Ue dipi pigike lekane
yomoke tukane mamina petene ke awea moa pikoi. Nitikoli pupulegeme ue dipi pa popokoa
aua poka.
18
Podolikama pupulege u u wa popokoa kawa aua pokale pupu yenamepa ue dipi
yaapemotoa kopapu moa kusa uele pitikakala tokoi.
19
Wa podolikama ue dipi wa
yaapemotoa ue dipi pupu toatekoiya wane-kiti po eya moa kusa uele pitikakala tokoi.
20
Nitoapa ta pataka pade-mene lou tagoi wedome agopa takatapeneya pa mea ponokoo.
Nipa pupulege tadalita pa u u wa okoa kaka matiyame toto peya tua atuamedeko wa wene
pia mekoo.
21
Pupu ali-kiti nee wawa noameneya pa pupu tokoa kakoi pake Polo kini lene yoto
pome kakome okome ame-lawe Keriti ta opi tewitikoa poameo wane okounakale yakoa
tikinakeya. Yakoa toi tokapa nipa i ke enekakoa kawa kinikiya tadoa atua padele toamoo
toka.
22
Opi wene yaapeaneya meamene. I ue dipi uele atuatekoyake odene agoka tua atukile
toamoono, piti moameo.
23
Akolaliyo nopa one wa takoa motoka tokolo onekele takama
puku agome uku. Ete piapa oneme wetekane edelo ago no kakouta nokome okome
24
oya
Polo piti moamea. Nepa ako tobou ago Sisane leneke poke kamedeko. Nitamedekono,
Akolaliyo ne pewe witikome wini yene peyapa nekeya-kiti wa neke yonoke pikano, odene
agoka tua atukile toamoo wa edelo agome onokano,
25
wene yapeaneya meati. Akolaliyo eni
akedekopa taatekoa too wane oneke wene tugakene uku.
26
Kusa ue muke piane ta deya eni
matanuke i ue dipi pewikoa pitikatekoyake uku wa Poloyo oka.
27
Atoa leme (14) kakoa ta pataka-pete pupulege pa popokakoa kakomepa ue dipi
Ederia wa ibini akene kusa ue lono ete otota pa popokoa aukoa kaka. Nitikale tube likonu
pupu yename pade ta nami kunuka piko patu wa eya tokoi.
28
Ue kekulu piane itono pikome
tokole enadete po namike kue ua tukatekoa eina adeka pikutu toa enema pokoi. Itono
kebonoke tugakaya wa tokoi. Nitoa titikete po uele pitikoa limo limo toa motekete yonota
lido akoa kotu pia enekolipa kapidi (20) kakoa adekake itono tadeka. Kuku keneya pekete
wa pitikoa limoa enekoli wagene melepu (15) kakoa adekake itono tadeka.
29
Ue tigotoma
pekedekale eneketepa ue kekulu tube kue pikata pewikoa pitikakaya tokale eya tokoi. Ue
dipi pa lauaneya pimotoa tekete mabo kakeneya wane tuyono tene lono po kakoa uele
pitikakoi. Pitikatekoa ta wete pata pata wa kowitoa kakoi.
30
Nitoapa pupu yene tube ue dipi
to a poadete eya tokoi. De ue dipi ue talike moa tukaketikakoi. Nipa mabo kakeneya pade-
mene ue dipi timini lonoka uele pitikadete keneya lede eni yotokoa tokoi.
31
Nitikoli
enekome Poloyo poyo tobou ago kakata pokome okome wini pupu ali-kiti tube ue dipi
keneke toto-pala odeneka meamokolipa Akolaliyo kiwi toa moamoo-kale
32
poyo ali-kitame
de ue dipike kakoa tukane po-mene wakamu toa de ue dipi paka pomotoa wakoi.
33
Ta pene patama nokaka Poloyo e yene kowitikome okome ta pataka atoa leme (14)
kakoa-peta ke enekakale mea nee noameneyano, nee pade opi moa noe.
34
Kipala padeleka
toamoono, ue dipi katepitoa poadetepa nee noatino noe wa ootokoapa
35
e yene kakakoa
palawe wane moa Akolali-pala ke wa oa popimotokome naka.
36
Nitikale enekete peyame ke
wa wedia mea moa nakoi.
37
Eni tube ue dipike toto meko yene ege kadukaka oi moapa
koome kadukoa wa lene timini togoikoa kolo (276) kakoa meadekoo.
38
Nee adekoa
nootokoapa pupu ali-kitame ue dipi wa yaapetekakoi. Nipa ue dipi keneke lobutua pikoina
witi ku moa kusa uele pitikakoi.
Ue Dipi Kusa Ue Matanuke Wia Mataloganemo
39
Ta patakale enekoli e taapa maida ta patu wa padeka lono kusa ue ko ianeka kibi
piitapekale enekete ue dipi kuka tugakoa pia enato wa eya tokoi.
40
Ue dipi lauaneya
pimotoa uele pitikakoinakeya-mene po wakamu toa wakoi. Nititikoapa ue dipi kiyotokoa
pomotoa tene lono poome kebetoa kakane yomo peteneta po keetapekoi. Timini lonoka
mamina petene pigike lekane yomoke ate moa tukakoi. Pupulegeme ue dipi matanuke
popokoa aua pomotoa tekete ni tokoi.
41
Nitikoli pupulegeme ue dipi popokoa aua pokome
ue kekulu kibi tono keneya kakeneta wia matalogaka. Tene anakoa kamotoa wago ue kibike
wia mataloganeya kaka. Nitikale tene lonopa ueme lokokoa kawa pedoa tadekakolokaneya.
42
Nitaneyake poyo ali-kitamepa po yapu pitikatekoi yene yonoto pia paka petoa pokayano,
wia tukato wa wene pikolipa
43
kiwi yopikagome Polo toane mouno wene pikome tokome
wia tukameo wa oka. Nitikome okome uele yonoto pia wene tiki-kiti kiwi namolo takoa uele
pitoa matanuke yonoto pia poe.
44
Ete-kiti kipa yomo pilage-kitika ueme wia pedekolokane
yomo-kitika tebetaneya pia pamene wa oka. One eni okana toa petoa peketepa padeka ue
nakameneya peya matanuke witoa pokoi.
Aposelo Aposelo
<<
27 27
>>
Aposelo Aposelo
<<
28 28
>>
28
Molita Take Mekete Tanemo
1
Toto matanuke eni petoa pote kaketepa eni taapa Molita ta tadeko wa wene tokoo.
2
Eni take meane yename toto mama moa wedoa auapekala tokoi. Nipa ta nokome niti-pala
tokale tokome toe moa yotokakete kiwi peya noe wa makutukoa motokoi.
3
Nitikakoa
Poloyo toe adali wekotoa moa toele pitikakale toe potome kiimotokale tokome ali wia
tukako kaya yomo adali pake meaneya witimotokome nokome Polono yono waneke
tanianeya tuka.
4
One yono waneke tanianeya tukale enekete eni take yename ekete ekee i
agopa ali wia tukane ago tadeko. Ue nakameneya petoa nokanake kayame tania
tukamedekale tuoono, enato wa enekakoi.
5
Enekakoli Poloyo kaya toe pake tadekatekoa
kakale one-pala padeleka toamoka.
6
Nitikale one tigini yoa lobutuko patu, one kakota aua
pitakome tuko patu wa nepikoa kakoiyake padeleka toamokale enekete kini wene wia
wakete ekete i ago tuamokono, pulali tadeko wa okoi.
7
Eniya liti eya ago Pabiliasi one itono-mene pianeya. Einagopa Molita ta talo toa
meane ago. Einagome toto makutukoa motokome ta pataka teboloke one yapu moa mekoa
nee epetaneya takoa lawetekala toka.
8
Einagono etene tepe moa poto yene taneya pianeya.
One yene taneya pikata Polo pokome Akolali kowitikoa yono pia epetekaka.
9
Nitaneyake
eni kusa ue muke piane ta deyakepa yene pitane ali atoa Polo mekata note-kala kakoli
epetekakala toka.
10
Nitaneyake eni yename ke wa toto peya pewe wia kakoi. Wa naniko ue
dipi padeke mea poadete mekooka tone mea pekete noatekoya eya ue dipike moa pikoai
tokoi.
Molita Ta Tewitikoa Lome Take Pekenemo
11
Molita ta tokene teboloke mea kawa pade ue dipike lewia pote mea pokoo. Eni ue
dipipa Alesaderia ta pia Molita take nekeneya. Nipa pupulege tadalita taatekoa noka tokene-
meneke pa eida pianeya. Eni ue dipipa pinagome pulali Susine manata yomini kayo ekete
Kasito Polokosita wa ibini akeneya.
12
Ue dipike peapetekoa mea pote Sairakuse take
witapekete ta pataka teboloke eida mekoo.
13
Eida mea tewitikoa pote Risiame take
witapokoo. Podolikama pupulege toto nokoo lono titia popokaka. Nitoa popokoa kawa
aua pokale ta pataka takutake Puteoli take witapokoo.
14
Eidapa Yesunomo yakoa motane
yene kotukolo ekete ta pataka tatono (7) kakoa-peta kipala opia meato wa makutukoa
motokoi. Nitikoli eida mea kawa tewitikoa Lome take pokoo.
15
Nitoa ka ludu poadete
pokolopa Lome take mea Yesunomo yakoa motane yename toto noatekomo yakamotekete
kotua nokoi. Padeka-kitame Apiase Makesike kotua note wa padeka-kitame eni ta patukoa
Pasidia Yapu Tebolo wa ibini akene take kotua note tokoi. Nitikoli enekete Poloyo Akolali-
pala ke wa oa wene weye akeneya kutu poademe poka.
16
Toto Lome take pote kakolo
Lome ta yopia meane yename Polo po yapu pitikamekete yapu pade keneke one yopiateka
poyo ago-pala meamele toko wa moa mekakoi.
Polo Lome Take Mekome Tanemo
17
Ta tebolo takoa patakale Poloyo Lome take meane Yu yenane tobou ali-kiti kiwi noe
wa agale oa wetekakale obomoa nokoli okome anukameyo toto Yu yatene-pala padeleka
toamoane tone kaua-mikitane totonoka tetekamoane tokoluka Yerusaleme Yu yename no
dekoa Lomane yenane yonoke moa pikoi.
18
Nitikoli no pitia yakatekoa no i ago wia
tukatekole piameadekono, neke yapu pa wa wetekadete tokoli
19
Yu yename mena-kama
okoi. Nitikoli ekene kini koiso tokamotono, ako tobou ago Sisayo anu koiso pitia
yatekamotoane uku wane okou. Nipa Yu yatene koiso akoane ouno wene piamekeneke
okou.
20
Ina ukulekepa anu oya-lawe kipala agale oadene tekene oboa noe wane agale oane
wetekakouna. Ete Iserele yename Akolaliyo taatekoa tokale nepia mekete wedia meki toane
noanumeka nepiane mekuleke kapa poo kakoa kebetaneya kaku wa Poloyo oka.
21
Nimo okale ekete Yudea Yu yenameka nekemo pade oto wia wetekamoa toto
mekota nekene Yu yenameka enika enimo wamoa ne akoa akene agale pademoka wamoa
tokoi.
22
Enilepa toamokoiyake ta piko peya pitiki-kitame eni weneya totono litia tiki yene
akoa ikino, pinali neke wa kei piatekomo yakoono,
23
ipete wa oto nekete yakoo wa oi mea
pokoi. Eni oi nokale eina ali peya mati Polo mekata obomoa nokoli Poloyo Akolaliyo ali
atoa talo tokome tokomo i i wa to awea oka. Nipa Moseseyoka Akolaline agale to awea
akane ali-kitameka Yesuke papete oa piane toa pine to a olaukakome okome Yesu onepa eina
Keraisu wa papete ibini oa piane ago wa onekemo olaukoa meka. Nipa Yesuke wene
tugamotoa toa enekome likonu witia titimoa olaukoa mea ta likaka.
24
Nitikale padeka-kitame
winipa nimini oko wa one okamo yakoa moa wa padeka-kitame yakoa moamadete wakoi.
25
Nitoa odene wene piameneya tewitikoa pokoika Poloyo agale pade oa metekome okome
ae Epetane Yominiyopa tone kaua-mikiti-pala oatekamo Akolaline agale to awea akane ago
Aisaia wene takakome eya wa akeneya.
26
I yatene kini kaleme yakoa meake yakoa moamoa leneme enoa meake enoa moamoa
toi.
27
I yatene kolotini lupi taneya mekete kaleme wedoa yakamele toamokolo
mea lene-pala lakaputukoa yawa tiki. Enipa leneme enoa moa kaleme yakoa
moa teketepa ipa Akolaline pekuno, noa tato wa nookedo tepe kolotini pekoa
pikolipa latekou wa Aisaiayo to awea akaneyano, enipa nimini akedeko.
28
Kipala i ukumo yakoe. Akolaliyo ali atoa toa motokome tokomo e ku pa yatene
pitiki toa oa pupitikaneya. Nitaneyake eni pa yename one eni tokomo yakoa moi wa Poloyo
oka.
29
(Nimo okale yakamotekete e Yu yene one mekata tewitikoa pote agale tetoa oma
pokoi.)
30
Polo mali takutake Lome take mekilepa one pitika yapu pinago kue mea topo
tootokoa meka. One eni yapu nokoi peya Poloyo ke wa makutukoa mokala toka.
31
Nitoapa
Akolaliyo ali atoa talo tokome tokomo Ali Muno Yesu Keraisunomoka i i wa atiki toa mea
olaukakala toka. Nitikalepa enika enimo olaukamea wa padameka wamokoi.
Aposelo Aposelo
<<
28 28
>>
Kolosi
00
11
22
33
44
Kolosi Kolosi
<<
00
>>
^
Kolosi
Poloyo Akolali-pala Ke Wa Kowitanemo
Akolaline Yagono Ago Keraisuke Akenemo
Akolaliyo Polo Takoa Moa Kakanemo
Keraisu Patu Kautakoa Kama Pamene
Keraisu-pala Lipua Mekete Toatekomo
Namolole Tewitikoa Wenele Toma Pamene
Keraisuno Ali Atoa Mekete Toatikimo
Poloyo Wipitikome Mane Mane Akenemo
Kolosi Kolosi
<<
00
>>
Kolosi Kolosi
<<
11
>>
KOLOSI
Poloyo Kolosi Yeneke Wia Wetekane Pipia
1
1
Polo nopa Akolaliyo one wene toopikale tokome Keraisu Yesuno agale oane auane
yamotoa moa kakaka Aposelo ago i mekene uku.
2
Tone oya ago Timosi totamepa Kolosi
take Akolaline ali atoa Keraisuke wene tugoa meki-kiti tone oya-lawe kiwike i pipia wini wia
wetekako-ye.
Toneketai Akolaliyo kiwi pewe wia tepe kolotini kilikoa pikoa tomotoane kini
kowitikoane uku.
Poloyo Akolali-pala Ke Wa Kowitanemo
3
Kini kowitikakete-kama tone Ali Muno agono etene Atai Akolali-pala ke wa okala
toko.
4
Keraisu Yesuke wene tugoa mea Akolaline yatene meki peyake wene mekoa tekete
tikimo yatekooya tekete ni oko.
5
Widikakilepa kini mea kakete moatekoya-kitipa Akolaliyo
a tibuke pikoa katekako wa kolotine nepia mekete ni tiki. One eni tokomo titia yatekilepa
Akolaline niminimopa Keraisunomo yatekoi-pete einapete titia yatekoi.
6
Keraisunomo kiwi
wini mekoika oa aua nekeneya yatekoimopa ta piko peyakeka pupitikama poko. Nitikolo
yatekete eni take meki-kitame kinikinakale tewitikoa epetekoa mema yakete tiki. Nipa anu
oya-lawe kime einakamo titia yatekoi-pete laigoapa ipa Akolaliyo ali atoa pewe witikome
tokomo tadeko wa kinikinakale tewitikoa epetekoa mema yakete tiki toa tiki.
7
Einakamopa
tone kolotini ago Epaperasiyo i i wa kiwi olaukaneya. Keraisunole toto-pala odene wene pia
takama yako agoke uku. Tou wa okole-kama tokala toko. Einagopa toto luku wida nome
mekome Keraisunomo olaukaneya.
8
Einago oto nokome kiwi ko eya wa oka. Epetane
Yomini kiwike awinaneya tokome yete pade ali atoake wene mekoa mekete tiki wa oka.
9
Nikepa kiwi mekete tokoimo titikene yatekou-pete laigoane kini kowitikoane-kala
meku. Eya wane oane kowitikakala tuku. Akolali neke wene pikole adekake kakoa wene
tootapemotoapa Epetane Yomini e yene kiwike awia tagatapekome i i wa wene takamotono
ta wane kini kowitikaku-ye.
10
Nipa Ali Munagono wene moteketepa one wene epetekatiki
toa ele kule epetanele-kama toomoa pomotoane ni uku. Epetane ku tuou toa ele kule
epetanele-kama toa ni Akolali mekome tokole i i wa ate toa wene tomotoane tekene Akolali-
pala eya wane kowitikaku.
11
E yene kiwi neke tele patu kautakoa kamotono, a tibuke pa
tootapeneya meke telekole toko peku lawetoano ta. Ele kuleme ke enekakale meake nekele
poti wene pia takoa togakete wedia memotono, nitamene wane kini kowitikoane uku.
12
Kiniketai Akolali-pala ke wa omotoane uku. One wa takoa motane yename one a tibuke
pa takalogakota moatikiyapa kimeka moamele toko wa one mana kono-mikiti moa
latikakano, ke wa amene wane uku-ye.
13
Totopa Setanuke lukoa mekete yomiyomu keneke
yakooka toa mootokoapa one kolotini ago Keraisuyo talo toko take moa kakaka.
14
Keraisu
einagome tokake toto eni toa motikilepa tone poanele tokooke po letu mekakana keemu
tokome toka.
Akolaline Yagono Ago Keraisuke Akenemo
15
Akolali einagopa tone leneme enamele toamokoyake one yagono ago Keraisu Yesu
ali latia toto mekota nekeneya. Akolaliyopa one latikanakeya-kiti peya i agoke-kama lukoa
memotoane tuku wa Keraisu einagopa one namolo opiane mana tetepo takoa ako odene
tobou meateka ago latia kakaneya.
16
Akolaliyo eya kuya peya latiou wa wene
kibutukapikana toa Keraisu-palapa kelepitikoa latianeya. Nipa tibukeka itonokeka tone
leneme enamokoya-kiti ni tone leneme enekoya-kiti ni tibu talo toa meki edelo ali-kiti ni
kiwike lokoa tobou meki-kiti enika eni peyame onekele takamotoa Keraisuyo-kama latikala
taneya.
17
Eya kuya peya wete latiameneyake onepa pa mea kama nekeneya. Eniya peya pia
kawa toateko toa pia kawa tomotoa oneme yopimoa noko.
18
Akolaline ali atoa totopa one
tigini. Onepa tone tobou wane. Mea kama pikilepa one patu-kama kautakoa kakete toko.
Akolaliyo tuane yene moa kamotokakilepa einago namolo takoa moa kamotokaneya. Ako
odene tobou meateka ago memotoa nitaneya.
19
Ni agopa Akolaliyo one kotuke-kama
memotada wa one peku lawetetapeneya.
20
Nitoapa a tibukeka itonokeka meki peya one-
pala odene wene pianeya memotoa eya taneya. Mana Keraisu lekane yomoke tuaneya
kakata kamate ponokale tokome poi piato wa teigoa wakeneya.
21
Papete kipa poanele toma yakoiya tekete Akolali-pala wene poaneya mekete ete pilia
wakeneya.
22
Opa mana Keraisu yomo lekaneyake wia dekakoli tukale tokome Akolaliyo
kiwi oya kakoa meko. Nipa kime eya toa memotoa tokome taneya. Onekele-kama takoo wa
one leneke poane wene takoa koikatapeneya mekete padeya namike akoa agale oatekale
toamomotoa tokome taneya.
23
Edikoa meadetepa Keraisuke wedoa wene tugoa mea one
patu kautakoa kakete poapeneya kamene. Nipa onekemo oa metane toa taatekoa toatekale
nepia mekoina toa nepia mema pamene. Onekemo wane ukupa ta piko peyake oa
pupitikanemoke uku. Einakamo oa aua yamene wa Akolaliyo Polo noka takoa moa kakaka
tokolo uku.
Akolaliyo Polo Takoa Moa Kakanemo
24
Opi tete mokoane kakilepa kiwike toane motukuno, ke wane wediane meku. Nipa
Keraisuyo one yatene ali atoa totopa one tigini wa tetepo takakome kiwike tuku wa tete
pegetoa moma yakene toane moma pone togou wane tete moma yaku.
25
One yatene meki-
kiti kiwi auapemotoa tokome Akolaliyo noka takoa moa kakaka. Nipa onekemo pine ina ina
wa to aweane akatapemotoa ni toka.
26
Papete mali ponoka toa-kama itonoke pitikoi peya-
pala one eni taatekoa toatekamopa kaukoa mema nekeneyake opa one wa takoa motane
yene peetapea oko.
27
Keraisu kini tepene nome mekomo kamo takou toa eni peetapea
ikilepa e ku pa yatene-kitika one take pa tootapeneya mea kamotoa taatekoa tokomo eni
okome toko.
28
Nitikono, Keraisu einago ko-kama totome oma yako. Nipa Akolaliyo wene
takako toa ali atoa peya mane mane oa olaukoa tikilepa Keraisu patu kautakoa kakete
epetekoa meatiki kotuke kakoa meemoa pomotoa tokome toko.
29
Nitimotou wane pupuke-
kama pebetekaneya wili toane kakilepa Keraisuno tele patu kautakoane kakene tuku.
Kolosi Kolosi
<<
11
>>
Kolosi Kolosi
<<
22
>>
2
1
Kipala imo ikilepa kiwika Leodisia take meki-kitika anu lene timini enameneya meki-
kitika mama mati motekene tekene kiwi peyanele wedoane takaku pekene tukumo wene
tomotoane uku.
2
Kini wene weye akaneya mea odene wene pianeya meato wa wene
mekanali yoa tomotadiyano wene pikene ni uku. Edikoa mekolipa Akolaliyo kiwi kamo
takatapeou toa eya too. One papete wene toopianemo kaukoa mema nekene toa taatekoa
tane agopa Keraisu tadeko wa kime wene tootapemotoa too.
3
Etenane peku nootapeane
agoke uku. Akolali wene muno meaneya mea pademo pademota wene taneya mea toko toa
i i wa oneme-kama to awea okoya. Nipa potipiane kamoya-kiti ya wa meou toa tokolo uku.
4
Panagome agale muno pewe kakoa i i wa kiwi oa yotokakaya tokolo ni uku.
5
Ta padeka
mati mekeneke kiwi pakeke none menou toane mekene enekulu kipa odene wene pianeya
mea Keraisuke wedoa wene tugoa mea tikile enoane tekene wediane meku.
Keraisu Patu Kautakoa Kama Pamene
6
Keraisu Yesupa kini Ali Muno wa pegetoa lukoa mekete tokoina toa one patu
kautakoa kama pamene.
7
Yomo pade pema itonoke epetekoa witakome teke yukuka
yekeikata wetekou toa eya toma pamene. Kiwi olaukanele tekete Keraisu patu poapeneya
kautakoa kakete onekele wedoa takama yamene. Akolali-pala ke wa-kala oa nitamene.
8
Pade ali-kitamepa kini kaua-mikitame emo kumo pamo olaukama nekenele litia tato
wa pa itono peku lawetoa kiwi oa yotokakayano, wedoa meamene. Dikane yene Keraisuno
agale patu kautakoa kawameneya nitoino, yakameamene.
9
Keraisu einago tono melepu
kakeneya nikilepa etenane peku-kama nakene ago eni nekeneya.
10
A tibukeka itonokeka
mea telekole toa yopiki peya oneke-kama lukoa meki. Keraisu einago-pala anu oya-lawe
kiwi lipua mekili tokome Akolaliyo one eni nakene peku lawetoa tagatapeko.
11
Nika kiwi
mone pa yeneke Akolaliyo kepene teigane yene tetepo takoa one wa takoa motikilepa
Keraisu einago-pala lipua mekike toko. Kini tepene witako poanele Keraisuyo moa kogamu
taneyake ni toko. Nipa pa alime pa tokoo kepene teigoa adeka pianeyake tokoya mena.
12
One yene kime ue motikilepa Keraisu-pala odeneka dekoa oloyo tane tetepo taneya mea
tokoi. Nika Keraisu-pala odeneka dekoa moa kamotokane tetepo taneya mea tokoi. Nipa
Akolaliyo telekole toa moa kamotokamele toko wa oneke wene tugoa mekete nitikoi.
Keraisu tuaneya pikale moa kamotokane agoke uku.
13
Papete kepene teigamene pa yene
kini namolo poane wene litikete Akolaline totono tetekaku pekete tokoli Akolaliyo tuane
yene tetepo takoa wakeneya. Nitaneyake opa mea kama poati wa Keraisu-pala lipukoa
mekaneya. Nipa tone tokoo poaneleke po letu mekakana keemu tokome taneya.
14
Nipa
Moseseyo yametane totono tetekaku pekete tokooke po letu pima nokana toa kibu moo
tokake Akolaliyo eni letu keemu taneya. Eni totonopa yomo lekaneyake wia dekou toa
katekoa wakome taneya.
15
Nitoapa a tibuke Setanuno peku noa telekole toa meki-yene-pala
eya taneya. Poi tobou agome-kiti ali atoane lene yoto kakome po kakoa lia aua pou toa eni
yene moa kawikatapeneya. Keraisu yomo lekaneyake tukale tokome taneya.
16
Nitaneyano, pade ali-kitame ue nee eya padeya kekaneya latikoa ni malikeka tokene
kabepo kaka-peteka ko mea pupu toamoko-peteka kini losule toko toa mone pa yene kime
litia toamiki wa kikoa akakolipa yakoa toameamene.
17
Enika eni losule tikilepa Akolaliyo
nani taatekoa toatekale pa tekei toa adeka pima nekene toa tiki. Keraisu wete nome taatekoa
taneyake tiki.
18
Dikaki yene kini wa lede keku meane ali-kiti tetepo takakete edelo yenanele
takama yato wa kiwi oa yotokakayano, yakameamene. Nipa pulete ele kule enekou agome
ukuno, yakoa tamene wa mate agale ou toa ikilepa pa itono peku noa tekete iki.
19
Nilepa
tone tobou kakago Keraisu-pala moa lipukaneyake wawa etepea yakete tiki. One tigini
kakaku wa Akolaliyo toto katea pitakaya wa Keraisu oneke-kama dekamoa lipukoai toko
ago eni pilia wakete tiki.
20
Kipa Keraisu-pala odeneka yomo lekaneyake wia dekaneya kawa tuou toa pegetoa
nakoina itono pekupa wakoinake edoa wa naki-pe.
21
Nipa iya pikoa kawamoa eya noamoa
padeya mitikamoa tamene wa papete olaukanelepa edoa wa litia toadete-pe.
22
Enika eni pia
kawamatekoya-kiti kekoa wakilepa ali-kitame kini weneme wene kibututukoa olaukanele litia
tiki. Enika eni ue nee eya nootokoapa wa pade oyake moa namele toamokoyano, enika
eniyamepa kini wene edoa moa koigoo-pe.
23
E yenamepa kini losule wedoa toa ni nate
wene pianeya mea ni kini tigini wa tete meou toa eya kuya wawa noamoa tiki. Nipa wene
muno meane yename olaukanele tuku wa tekete tiki. Padele poanele-kiti kini weneke wa
witakoa kibutua toamoo wa wene pia tikiyake pata pale tekete tiki.
Kolosi Kolosi
<<
22
>>
Kolosi Kolosi
<<
33
>>
3
Keraisu-pala Lipua Mekete Toatekomo
1
Kipa Keraisu-pala odeneka moa kamotokane tetepo taneya meki. A tibukepa
Akolaline nimini yono kounoke Keraisu tobou ago mea kakono, aida meane kawateku peku
noada wa wene pianeya meamene.
2
A tibuke mea kakete toatikileke-kama wene piitikaneya
meamene. Pa itonoleke wene piitikaneya meameamene.
3
Kipa Keraisu-pala odeneka tuane
tetepo taneya meki. Tuane alime-kiti itonolepa edoa wa tomotoa-pe. Opi Keraisu Akolali
mekota mekome one yono tatonoke meati wa kiwi potipia yopikoa kako.
4
Kiwi mea
kakako ago Keraisu wakapea nokale kipa onepala odeneka kakete one kaka toa pa teleta
takatapeneya kawei.
Namolole Tewitikoa Wenele Toma Pamene
5
Kipa Keraisu meko toa meoino, pa itonole eya toadiya wa wene pikile tewitikoa
wamene. Atoa liou abele tou enika eni poanele ele kule toane potokou ni eya kuya ako-
kama mou wa wene pia toameamene. Eya kuya ako-kama mou wa itonoya-kiti tobou
kakakilepa Akolali odene tobou kakamele tokoyake tiki.
6
Ali atoame enika enile toma yakili
enekome Akolaliyo kibu mou wa kotimi yoa meko.
7
Papete kimeka enika enile toadiya wa
wene pia mea etepea tuku pekete tokoi.
8
Opi pade kinikinakale tewitikoa waketepa eya-kiti toameamene. Kotimi yoa ali atoa-
pala bu oa lene pia eko pade ali atoa-pala akoa agale oa tiyo moa toameamene.
9-10
Ete oto
wa kapene agale wameamene wane uku. Kini namolole poanele toma yakoinakalepa namolo
mamina takoa wawa eina luku weneya mamina moa kawou toa poane wene wawa epetane
wene pianeya yakili tekene ni uku. Widikoa memotoa toko ago Akolali kotu kakoa meadete
poti toma peketepa one wene tootapeneya meoi.
11
Nitoino, Akolaliyo pa yatene agoka Yu
yatene agoka takoa enamoa ni kepene teigamene yateneka kepene teigane yateneka takoa
enamoa toko. E ku pa yateneka kueme topo toa moa egetane yeneka ta pine yeneka takoa
enamoko. Ako odene kako Keraisu toto peyake awinaneya mekono, Akolaliyo toto peya
odene yatene tetepo takoapa Keraisuno yatene wa oko.
12
Akolaliyo onekele takamotoa kipa one kolotine yene wa takoa motaneyano, eya
toma pamene. Yete pade ali atoa mama moa auapeamene. Ni nate wene pianeya mea
uutukoa poti yawa tamene.
13
Nipa kiwi padamedo poanele tokalepa poanele ete topo
takamekete eina poanele tokake po letu mekakoina keetapea wawa ete oto wa mama
moamene. Nipa Ali Munoyo kini poanele-kala tokoike po letu pima nokana kemu toa
wakene toa tamene.
14
Nitoapa eya tobou kakoa tamene. Ete oto wa wene mekanali yoma
pamene. Nile teketepa epetekoa meatiki toa odene wene-kama pianeya meoi.
15
Keraisuyo
one peku lawetekome yametekana toa wene odene pianeya mea tepe kolotini kilikoa
pimotoa meamene. Akolaliyo kipa one wa takoa kayo oa motikilepa edikoa meemoa
pomotoa tokome taneya. Nipa odene ago Keraisu-pala-kama moa lipukoa odene tigini
tetepo takoa taneyano, ke wa okala tamene.
16
Kamoya-kiti mou toa Keraisunomo-kama
yakoa moamene. Akolaliyo wene takako toa ete oto wa olaukoa mane mane oa tamene.
Nitoa eya kuya lo agaleka Same agaleka ikilepa kini tepene meaneya ya wa Akolali-pala ke
wa oa tamene.
17
Ele kule toa emo kumo oa tikikaka Ali Muno Yesuno ibini-kama wedekoa
one patu kautakoa kakete tamene. Nitiketepa Atai Akolali-pala ke wa okala tamene.
18
Atoa yatene kinikaneke poti lukoa meamene. Ali Munoke wene tugoa meketepa
edikoa meamedikili ni uku.
19
Ali yatene kinikatuke wene mekoa mema pamene. Tete eya
meameamene.
20
Mati-kiti kiniketai kinika uatame okoi toa-kama litia tamene. Nile tadekolipa
Ali Munagono wene epetekatekoile tekete toi.
21
Etene yatene kini mana kono-mikiti timini
natekatikile toameamene. Kini wene keda taneya mea etepea pokaya tokolo ni uku.
22
Kueme topo toa moa egetane ali atoa kini pine yename okoi toa-kama tamene. Pinago
kakakoane no wa kei pimotoane tekene onekele wedoane takatekuyake opi kote aumoane
tuku wa pale toameamene. Nitameneya Ali Munagoke poti wene piitikaneya mea kinikile
wedoa takamene.
23
Nipa pupu pinagonole takaketeka ipa Ali Munagonole takou toane tuku
wa wedoa takakala tamene.
24
Nipa kime edikakolopa Ali Munagome topo takakome one
mana kono-mikiti latikakome kini moatekoya kotuke kakoa meoo wa wene taneya mea
tamene. Ali Muno Keraisunole takama yakiya.
25
Poanele tiki yene-pala Akolaliyo topo
takoa kibu moademe toko. Nipa eni yene peya midi pikoapa kini tane toa nami wia kibu
mokala too.
Kolosi Kolosi
<<
33
>>
Kolosi Kolosi
<<
44
>>
4
1
Ta pine yene kini kueme topo toa moa egetane yene talo tekete toatiki toa epetekoa
talo tamene. Nipa kiwi talo toko agopa a tibuke meko wa wene tekete tamene.
2
Akolali-pala kowitikala tamene. Nipa kote au moameneya kowitiketepa one-pala ke
wa oa kowitamene.
3
Toneka kowitikamene-ye. Akolaliyo ile tou wa papete wene toopia
kaukoa mema nekenele Keraisuyo taatekoa taneya. One eni tanemo totome i i wa oma
yakookepa po yapu po kakaneya pitikuno, onekemo to awea akateko ka yamea ta wa tone
kowitikamene.
4
Nipa no einagome einakamo keleyo to awea akateka toa omotono ta wa anu
kowitikamene-ye.
5
Keraisunomo yakoa moamene yene pakeke meketepa wene muno meaneya
meamene. Keraisunomo oatikika-kama onekemo i i wa to awea okala tamene.
6
Dikane yene-
pala ko ikilepa kini wene kakoa epenemo-kama oa tamene. Nitiketepa e yene-pala agale
topo takoa auapeatiki toa wene kibututukoa mea okala tamene.
7
Eya ago Tikikasi wida nokome anu toma yaku ko peya akanoo. Einago tone nimini
oya agome Ali Muno agonole toto-pala odeneka takama yakomepa wedoa-kama takako.
8
Nitane ago kiwi mekita wida wetekakilepa toto mea tokomo wene takoa ni kini wene weye
akoa tomotoane tekene tuku.
9
Einago Tikisasi-pala eya ago Onisimasi neka opia pamene
wane wetekaku-ye. Einagopa kiwi Kolosi yatene ago toto oya kakoa wene mekoa meko ago
oneme tou wa okole-kama toko. Einagota kiwi mekita wida nekete i Lome take tanemo-
kama akatapeoi.
10
Eya agota no-pala odeneka po yapu pitiko ago Arisakasi ni Banabasine pewenago
Make einagotamepa kiwi epetekoa meamene wa iki-ye. Make einago wida nokalepa
makutukoa moamene. Onepala tamene wane papete oane wetekakounakamo kime wete
yatekete tokoi.
11
Ni Yesu one pade ibini Yasasi einagomeka kiwi epetekoa meamene wa
oko-ye. Akolaliyo ali atoa talo toa mekomo i Lome take mekene oane meku-mene eni Yu
ali-mename odene no mape moa meki. Nitoa auapekete anu wene weye akoa meki. Ete Yu
yename Yesuno agale yakoa moake no auapeamiki.
12
Kiwi Kolosi yatene ago pade Epaperasiyoka kiwi epetekoa meamene wa oko-ye.
Einago Keraisu Yesunole takama yako agome ete pia oto pia eya wa kini kowitikako.
Akolali neke wene pikole toa meatiki toa toa togamotono ne patu kautakoa poapeneya
kakete nitimotono ta wa kini kowitikakala toko-ye.
13
Nitoa kiwi Kolosi yene auapeou wa
wedoa kowitikoa kakilepa eya tatake Leodisia Irapolise tatake meki-kitaneka kowitikako-ye.
Enipa etene nimini uku.
14
Eya agota tone kolotini ago dokosa ago Luke Dimasita kitameka
kiwi epetekoa meamene wa iki-ye.
15
Tone oya-lawe Leodisia take meki-kiti-pala epetekoa meamene wa akamene. Eya
atoa Nimepa one-palaka one yapu keneke losu toa koukoai tiki ali atoa-palaka epetekoa
meamene wa akamene-ye.
16
I wiane wetekaku pipiapa Yesuno ali atoame yakamotono, oi
motokamene-ye. Nitoa oi mootokoapa Leodisia take meki-kitameka yakamotono, eni take
moa wetekamene. Ni Leodisia take wetekaku pipiapa Kolosi yene kime oia moa oi
moamene.
17
Eya ago Akipaisi-pala eya wa akamene-ye. Nepa Ali Muno agome
oyametekana toa onekele takoa togamene wa akamene.
18
No Poloyopa kiwi wete meamene wane wipitiane ukumopa noanu yoname i witiku-
ye. No po kakaneya po yapu pitiku wa wene taneya meamene. Akolaliyo kiwi pewe wia
kamotoane kowitikoane uku-ye.
Opa anu agale eni.
Kolosi Kolosi
<<
44
>>
^^
<<
>>
The New Testament in the Witu Language (also known as the
Wiru Language) of Papua New Guinea
Nupela Testamen long tokples Witu long Niugini
copyright 1990, 1992 Wycliffe Bible Translators, Inc.
Language: Witu
Dialect (if applicable):
Language in English: Wiru
Print publisher: World Home Bible League
Electronic publisher: PNG Bible Translation Association
Translation by:
Wycliffe Bible Translators
This translation is made available to you under the terms of the Creative Commons
Attribution-Noncommercial-No Derivative Works license. In addition, you have
permission to port the text to different file formats, as long as you don't change any of
the text or punctuation of the Bible.
Pictures included with Scriptures and other documents on this site are licensed just for
use with those Scriptures and documents. For other uses, please contact the respective
copyright owners.
You may share, copy, distribute, transmit, and extract portions or quotations from this
work, provided that:
You include the above copyright information and that you make it clear that the
work came from http://pngscriptures.org/.
You do not sell this work for a profit.
You do not make any derivative works that change any of the actual words or
punctuation of the Scriptures.
Permissions beyond the scope of this license may be available if you contact us with
your request. If you want to revise a translation, use a translation in an adaptation, or use
a translation commercially, we will relay your request to the appropriate copyright
owner.
If you have further questions about this web site or the Terms of Use, please contact us.
Tok Orait
Dispela Buk Baibel i kamwantaimtok orait na lo bilong Creative Commons Attribution-
Noncommercial-No Derivative Works license. Em i tok olsem yu ken givim kopi long
narepela manmeri. Yu ken wokim kopi na givim long husat i laikim. Tasol, yu mas tok
klia dispela samting i kamlong http://tokplesbaibel.org. Yu no ken kisimmani na salim
dispela. Yu mas givim nating. Na tu, yu no ken senisim Tok.
Ol piksa i kam wantim ol Baibel na narapela buk i stap long dispela sait i gat tok orait
long usim wantaim dispela samting tasol. Sapos yu laik narapela tok orait, yu mas askim
husat i papa bilong copyright long dispela ol piksa.
Sapos yu laik stretim samting i no orait long dispela tok orait, stretim tok, salim Buk
Baibel, o tainim Tok bilong God long nupela tok ples, yu ken askimmipela.
Olgeta tok orait na lo long tok ples English i stap long
http://creativecommons.org/licenses/by-nc-nd/3.0/legalcode.
Sapos yu gat askim long dispela, plis askimmipela.
2012-11-26
^^
<<
>>
^^
<<
>>
Go!
The New Testament in the Witu Language (also known as the
Wiru Language) of Papua New Guinea
Nupela Testamen long tokples Witu long Niugini
copyright 1990, 1992 Wycliffe Bible Translators, Inc.
Language: Witu
Dialect (if applicable):
Language in English: Wiru
Print publisher: World Home Bible League
Electronic publisher: PNG Bible Translation Association
Translation by:
Wycliffe Bible Translators
This translation is made available to you under the terms of the Creative Commons
Attribution-Noncommercial-No Derivative Works license. In addition, you have
permission to port the text to different file formats, as long as you don't change any of
the text or punctuation of the Bible.
Pictures included with Scriptures and other documents on this site are licensed just for
use with those Scriptures and documents. For other uses, please contact the respective
copyright owners.
You may share, copy, distribute, transmit, and extract portions or quotations from this
work, provided that:
You include the above copyright information and that you make it clear that the
work came from http://pngscriptures.org/.
You do not sell this work for a profit.
You do not make any derivative works that change any of the actual words or
punctuation of the Scriptures.
Permissions beyond the scope of this license may be available if you contact us with
your request. If you want to revise a translation, use a translation in an adaptation, or use
a translation commercially, we will relay your request to the appropriate copyright
owner.
If you have further questions about this web site or the Terms of Use, please contact us.
Tok Orait
Dispela Buk Baibel i kamwantaimtok orait na lo bilong Creative Commons Attribution-
Noncommercial-No Derivative Works license. Em i tok olsem yu ken givim kopi long
narepela manmeri. Yu ken wokim kopi na givim long husat i laikim. Tasol, yu mas tok
klia dispela samting i kamlong http://tokplesbaibel.org. Yu no ken kisimmani na salim
dispela. Yu mas givim nating. Na tu, yu no ken senisim Tok.
Ol piksa i kam wantim ol Baibel na narapela buk i stap long dispela sait i gat tok orait
long usim wantaim dispela samting tasol. Sapos yu laik narapela tok orait, yu mas askim
husat i papa bilong copyright long dispela ol piksa.
Sapos yu laik stretim samting i no orait long dispela tok orait, stretim tok, salim Buk
Baibel, o tainim Tok bilong God long nupela tok ples, yu ken askimmipela.
Olgeta tok orait na lo long tok ples English i stap long
http://creativecommons.org/licenses/by-nc-nd/3.0/legalcode.
Sapos yu gat askim long dispela, plis askimmipela.
2012-11-26

HTML generated 4 Jul 2014 fromsource files dated 3 Jul 2014
^^
<<
>>
Epesase
00
11
22
33
44
55
66
Epesase Epesase
<<
00
>>
^
Epesase
Keraisu-pala Lipua Meki-kitipa
Akolaliyo Pewe Wia Yopikomo
Poloyo One Oya-lawene Kowitikanemo
Keraisu Patu Kautakoa Kakete
Meemoa Poatekomo
Akolaliyo Yu Yeneka Pa Yeneka
Keraisu-pala Lipukoa Yopikome Tokomo
Polo Einagopa Pa Yatene Meane Toa Mekome
Keraisunomo Pine To awea Oma Yakene Ago
Poloyo Kowitikome Akenemo
Odene Wene Pianeya Meamene
Wenele Toma Yakomo
Pa Keneke Mekete Toatekomo
Mati-kitikeka Etene Ninetakeka Akenemo
Egitini Yene Ta Pine Yenetake Akenemo
Epesase Epesase
<<
00
>>
Epesase Epesase
<<
11
>>
EPESASE
Poloyo Epesase Yeneke Wia Wetekane Pipia
1
1
Polo nopa Akolaliyo one wene litikome Keraisu Yesunomo oane auane yamotoa
takoa kakaka Aposelo ago i mekene uku.
Epesase take Keraisu Yesu-pala lipua mekete onekele-kama takama yaki-kitike i agale
wini oane wetekaku-ye.
2
Eya alita toneketai Akolali-pala Ali Muno Yesu Keraisutame kiwi
pewe wia tepe kolotini kilikoa pikamotoane kowitikoane uku-ye.
Keraisu-pala Lipua Meki-kitipa
Akolaliyo Pewe Wia Yopikomo
3
Akolali tone Ali Muno Yesu Keraisuno etene one kei piato wane uku-ye. Totopa
Keraisu-pala lipua mekolo one tibuke meou toa meamene wa pewe witikome one peku
lawetekala tokolo ni uku-ye.
4
Nitikagome itono wete latia piameneyake Keraisu-pala lipua
memotoa tokome toto takoa moateka wene toopianeya. Nipa one leneke epetanele-kama
toa ni ete-kitame akoa oatekoile toamoa tomotoa taneya.
5
Nitoapa Yesu Keraisuyo
toatekaleke kipa one mana kono-mikiti latikou wa wene toopikilepa papete dikou wa one
epene wene litikome taneya.
6
One kolotini ago Keraisu-pala lipua mekolo tokome toto nami
kakameneya pewe-kama wia kako. Nipa totome one peku noa toma yakole enekete ete-
kitame onepa dikane ago tadeko wa one kei pimotoa tokome toko.
7
Manane kamate ponaneya tokome totopa one wa oto toa motokome tone poanele
tokooke po letu mekakana keemu toa wako. Nipa kamo takou toa pewe-kama witikome
toko.
8
Nitikomepa padele padeleta wene toa toa pademo pademota wene toa oa toko toa
kabe koukoa eni toko.
9
One eni toatekamo papete kaukoa mema nekeneyake opi i i wa toto
wene takakomepa one epene wene toopikana toa tokome mana Keraisuyo taatekoa
toatekamo eni wene takako.
10
One eni wene toopikana toa taatekoa toateka oi ponokalepa a
tibukeka itonokeka pia kawa tokoya peya Keraisu einagoke-kama lukoa memotoo.
11
Totopa Keraisu einago-pala lipua mekolo Akolaliyo one wa takoa motikilepa dikou
dikou wa wene toopikana toa-kama taatekoa tokagome papete wene toopikanakale eni
taatekoa toka.
12
Nipa Keraisu wete noameneyake one noatekoya pegetoa nepia meatekoo-
kiti tone toma yakooleke ete-kitame one kei piai tomotono wene pia toka.
13
Kiwi toa moatekamo eina niminimo kini wene epetekanemo pa yatene kimeka yakoa
mootokoa Keraisuke wene tugakoi. Nitikolipa Akolaliyo kiwika one yene wa oa kini tiginike
one adeka pia tetou toa one Epetane Yomini kiwike moa wetekaneya. Nipa dikou wa papete
oa pikana toa taatekoa taneya.
14
Nipa kipa one yene wa kiwi oto toa moateka adeka eni
pikilepa a tibuke one peku lawetatekale nami yametekome taneya. Ali atoame one pa teleta
tootapeneya mekome tokaleke kei piai tomotoa tokome taneya.
Poloyo One Oya-lawene Kowitikanemo
15
Nikepa kini Ali Muno Yesuke wene tugoa mea ni Akolaline yene peyake wene
mekoa mea tekete tikimo titiane yatekou-pete laigoane
16
Akolali-pala ke wane okala tuku.
Nitoane kiwi wene taneya mekene eya wane kowitikaku.
17
Tone Ali Muno Yesu Keraisuno
Akolali pa teleta tootapeneya meko Atai wa kei piateko ago neke kakole wene
takatapemotono, neke Yomini Epesase yeneke moa wetekamene. Nipa wene muno
mekamotono ta wane kini kowitikakala tuku.
18
Akolaliyo kiwi pewe-kama wiademe tokome
noatino noe wa kiwi kayo oa motaneya. Ni one takoa motokana yene kamo takou toa one
pa tootapeneya mekome toko peku kiwi lawetou wa one mana kono-mikiti latikaneya. One
eni tanele kini leneme keleyo enemotoa tou toa tokome one Yominiyo i i wa kiwi wene taka
taka tomotoane tekene kini kowitikoane uku-ye.
19
Ni oneke wene tugoa meko-kiti toto
yopia kakome telekole mati tokole wene takamotoane kowitikoane uku.
20
One eni
telekolepa Keraisu tuaneyake a tibuke one nimini yono lono kounoke wa moa kakakome
tokana telekole kekutu.
21
Keraisu einago aida opi pa kakomeka naniko wa wakapea
nokomeka ako odene mekome e ku tobou yene ibini akene yene edelo yene peya talo toa-
kala mema poko.
22
Nipa kiwi peya Keraisu einagoke-kama lukoa meamene wa Akolaliyo
one etene ako tobu meatekago latia kakakilepa onekemo yakoa motane yene peya one losu
yatene auapeou wa taneya.
23
One eni yenepa Keraisuno tigini tetepo tootapeneya meki. Eni
yene eya kuya peya einago lobutua tagatapeko.
Epesase Epesase
<<
11
>>
Epesase Epesase
<<
22
>>
2
Meemoa Poatekomo
1
Kipa papete Akolaline totono tetekoa poanele toma yakete tekete tuane ali atoa tetepo
tokale meaneya.
2
Papete nitima yaketepa pa itonole-kama toma yakoi. Nipa tibu tiginalo
mea potokaki yene yopikoa kako agome toe wa okale-kama litia tokoi. Akolaline totono
tagoa toamiki yene peku laweteko ago Setanu kekutu.
3
Papete toto peya eni yene-pala opia
mea odenele toa mekete tone poane wene ponoka toa litiapa ele kule poanele toadiyano
wene pia toma yakoo. Nipa ete yename etepea tuku pekete tokoi toa tone weneme-kama
Akolaliyo kibu moatekale toma yakoo.
4
Nitikoyake kaku metekaya wa ela mati moa meko ago Akolali totoke wene mekoa
meko matiyame eya toka.
5
One totono tetekama pokooke tone yomini takoa pome atupane
tetepo tokale meaneyake mea kama pamene wa toto Keraisu-pala moa lipukoa kamotokaka.
Nipa pa pewe witikome toto toa motoka.
6
Keraisu-pala eni moa lipukoa kamotokakomepa
one-pala odeneka a tibuke mea kawatekota i wa yamepika.
7
Enipa Keraisu Yesu-pala lipua mekolo toto edikoa mama moa pewe-kama wia
tokamopa mali ponoka abuna peyame yakamoata pomotoa tokome ni toka.
8
Akolaliyo kiwi
toa motikilepa kini Keraisuke wene tugakoileke ni pewe witikome taneya. Kini padele
epetanele tokoike nami tukukome taneya mena. One weneme pa pewe witikome taneya.
9
Padele epetanele tokouke ni toka wa kime mate agale akaya tokale ni taneya.
10
Nitika
agome one latikanakeya totopa Keraisu Yesu-pala moa lipukakilepa ele kule epetanele toma
pomotoa tokome toka. Nipa tone padele padele epetanele toatekoole papete i i wa wene
toopikana toa toma pomotoa toka.
Akolaliyo Yu Yeneka Pa Yeneka
Keraisu-pala Lipukoa Yopikome Tokomo
11
Nipa eya wa wene taneya meamene. Papete kiwi mone yatene-kiti etepea pa mekoi.
Nitimotoa Yu yene kini wa kei piketepa kepene teiganeya meko yene wa oapa kiwi mone
yenepa kepene teigamene yene wa paya tetepo takoa wakoi. Yu yename kepene teigilepa
kini kaua-mikitame toma nekenele litikete kini tiginike tokoo pa yoname adeka pia teiganeya.
12
Eya waka wene taneya meamene. Papete Keraisu-pala lipuameneya meketepa Iserele
yene-pala pilia mekoi. Nipa Akolaliyo Yu yene auapekene yopiou wa papete oa pikana toa
taatekoa tokomepa kiwi mone yatene-kiti wakome auapeameneya. Nitaneyake oneme
auapemotoa nepia meamele toamokale kiwi pa yename Akolali meamene tetepo takoa
mekoi.
13
Papete kipa ta tetemada meou toa Akolali-pala lipuameneya mekoiyake opi
Keraisu Yesuno kamateme oto toa motaneya mekili uku.
14
Papete kiwi pa yename Yu yene-pala poi te ia mekoiyake poi teigoa wawe wa
Keraisuyo odene wene moa pikaneya. Nitane agomepa odene yagono yateneta meati wapa
toto ete oto wa pilia memotoa olege tane mamina iyakatapeneya.
15
Nipa Yu yename litia
toatekoi totonopa Keraisuyo eni katekakilepa one tigini lekane yomoke dekaneya kakale
taneya. Nipa poi teigoa wamotoane tuku wa ali takutake odene ago latiou toa toto yateneta
pinali one-pala moa lipukademe ni taneya.
16
Nipa yomo lekaneyake eni tukomepa eni
yatenetame Akolali nepala poi teigoa wamotoane tukuno, odene yatene tetepo takoa
moamene wa Akolali yametaneya.
17
Keraisu einago itonoke eni nokome toto yateneta mone
pa yatene-pala Yu yateneta poi teigoa wawe wa mo wima yakeneya. Nipa kiwi pa yatene ta
tetemada meou toa Akolali-pala lipuameneya meki-kitika ni one take meki Yu yeneka odene
wene moa pikaneya.
18
Ni ago Keraisuyo taneleke Akolaline Yomini toto yatenetake
awinome mekomepa Atai Akolali mekota poatiki ka i wa toto yametekala toko.
19
Nikepa Akolaliyo kipa pa yene wa wamoa one Yu yene pakeke pa tekei meatiki yene
tetepo takamoa toko. Nitamokome one takoa motokana yene-pala kikilikoa yapulu yene wa
yopia meko.
20
Nika kipa yapuya wa moapa eya toko. One agale papete to awea akane ali-
kitika one Aposelo ali-kitika motene wa oa Keraisu Yesupa pigi wa oa tokome kiwi pa yene
eni yene patu kautakoa meamene wa yapu wiko.
21
Nipa Akolaliyo toto peya Keraisu-pala
moa lipukoai tikilepa Ali Munagono tobou losu yapu wikakama pou toa eni toko.
22
Ni kiwi
pa yatene ali atoaka einago-pala moa lipukoai tikilepa Akolaliyo one Yomini nome meateko
yapu wikakakome toko.
Epesase Epesase
<<
22
>>
Epesase Epesase
<<
33
>>
3
Polo Einagopa Pa Yatene Meane Toa Mekome
Keraisunomo Pine To awea Oma Yakene Ago
1
Kipala ina ukulekepa no Polo Akolali kakakoane neuwe tukuane kowitoane meku.
Nipa Keraisu Yesunole takou wane einakamo kiwi pa yatene ali atoa oane metekouke po
yapu pitikaneya mekeneke kini kowitikakoane meku-ye.
2
Akolaliyo kiwi pa yatene pewe
witikome tokomo oane memotoa no takoa motokamopa kime yatekete tokoi.
3
Akolaliyo
one eni toateka wene toopikanakamopa papete one kaukoa mema nekeneyake no-pala i i wa
to awea oka. Kipala einamo tigini deya wete wiane wetekakounakamo kekutu.
4
Nimopa i i
wane pipiake wiane wetekakolu wida nokale moa oi moteketepa nipa Keraisu nokome
toatekamo eina papete kaukoa mema nekenemo no einagome wenepa i tadeko wa oi.
5
Eina
toatekamopa papete tone kaua-mikiti-pala kaukoa mema nekeneyake one Epetane
Yominiyopa one takoa motane Aposelo ali-kitika one agale to awea akane ali-kitika eya wa
wene takakala taneya.
6
One kaukoa mema nekenemo pine to aweane ukuno, yakamene.
Kipa pa yateneke Akolaliyo one peku mati wa oa one Yu yene-pala dekoa odene yatene
tetepo takoa toko. Ni one Yu yene auapekene dikou dikou wa papete oa pikana toa
taatekakome kiwika kikilikoa toa mokala toko. Nipa Keraisu Yesunomo yakoa mootokoa
oneke wene tugoa mekili tokome toko.
7
Keraisunomo pa yatene-kiti pitikoika oane auane yamotoa Akolaliyo no takoa moa
pewe witikilepa eni toatekou tele lukoa toka.
8
One takoa motane yene peya ako kamotoane
no etene keku agoke toka. Nipa pa yatene ali atoa kini weneme tuku toa moamatekoi kamo
takou toane Keraisunomo oane auane yamotoa tokome toka.
9
One eni kaukoa mema
nokana toa taatekakome toatekale i i wane ali atoa peya pine to aweane omotoaka tele
lukaka. Padeya padeya peya latiane ago Akolaliyo nitika.
10
Nitoa wipitikomepa eya toka.
One ali atoa pa yatene-kitameka Yu yatenameka Keraisunole odeneka takakete takakoile
enekete a tibuke tobou meane yenameka ibini akene yenameka Akolaliyo ele kule tikilepa
wene muno kakenele-kama tadeko wa wene tomotoa toka.
11
Itono tibuta wete latiameneya
mekome nitimotou wa wene toopiane toapa tone Ali Muno Keraisu Yesu taatekoa nokome
taneya.
12
Keraisu einagoke wene tugoane meku wa one-pala lipukete tekete Akolali mekota
tugoa pamele toko wa piti moameneya atiki toa meko.
13
No ke enekakolo mekumo
yateketeka onekele takoa wawameamene. Nipa no Polo po yapu ina pitikaneya mekilepa
totoke toa pitikaneya mekome toko wa wene tele taneya meamene.
Poloyo Kowitikome Akenemo
14
Kipala ina ukulekepa Atai Akolaline leneke wadini tukuane meku.
15
Onekepa a
tibukeka itonokeka e ti ku ti wa iki yatene peya odene ibini oologoapa Akolali ti wa oko. Ni
ago-pala eya wane kini kowitikoane uku-ye.
16
Akolali eya kuya peku wedoa laweteko ago
eni yene kiwi kamo takou toa teke neke peku lawetamene. Kini yomini weye akaneya mema
pomotono, neke Epetane Yomini awia mepa wa moa wetekamene wane kowitikoane uku-
ye.
17
Keraisupa oneke wene tugakoike kini tepene lobutua memotoane uku. Nipa yomo-kiti
teke itono kekulu ete oto wa wetekou toa Akolali patu kautakoa poapeneya kakete ete oto
wa wene mekanali yoma pomotoane tekene kini kowitikoane uku-ye.
18
Ina kowitikakene
ukuna toa teketepa nipa Keraisu kiwike wene mekoa mekome kinikile ele kule takakole i i wa
wene toi. Nipa Akolaliyo takoa motane yene peya-pala kikilikoa wene toi.
19
Keraisu einago
kiwike wene mekoa mekome tokolepa i i wa kini weneme oyake wene toamatikiyake Akolali
neme wene takamene wane kini kowitikoane uku. Nipa one peku-kama lawetekale noa
tagatapemotoane tekene ni kowitikoane uku-ye.
20
One peku noa tomotoa laweteko agomepa one eni telekole tokome tone kowitikomo
yakoa tikilepa akole-kama toko. One eni toatekolepa adekake kakoa tomotoa edoa kowitiko
patu wa toto agopa tokolo mekoyake one weneme toko.
21
Nitikono, one peku laweteko
toapa one yatene totome noa tokolekeka ni Keraisu Yesuyo noa tokolekeka peyame Akolali
onepa dikane ago tadeko wa mali ponoka toa-kama one kei pia-kala mema pomotoane uku.
Epesase Epesase
<<
33
>>
Epesase Epesase
<<
44
>>
4
Odene Wene Pianeya Meamene
1
Kipala ina ukulekepa eya tamene wane wedoane kowitoane uku-ye. Nipa Ali Muno
agonole takama yakouke po yapu moa pitikaneya meku agome uku. Akolaliyo onekele
takakete toatekoile i i wa kiwi kayo oa moa yametekana toa wedoa takama pamene.
2
Nipa
oneke nate wene pia ua mootokoa poitali atoa mema pamene. Nitoa poanele ete topo
takamekete ete oto wa wene mekoa auapenali yoma pamene.
3
Epetane Yominiyo kiwi
odene wene moa pikoa yametekana toa edikoa pa mema pote enato wa poi teigoa wawou
toa odene wene pianeya mema pamene.
4
Enipa Akolaliyo kiwi peya kokotukoapa odene
tigini tetepo takoa meko. Ni one Epetane Yomini odene ago kiwi peyake awinome meko. Ni
Akolaliyo noe wa kiwi kayo oa motikilepa nipa padele toatekale odeneleka tobou kakoa
nepia memotoa tokome toka.
5
Ni tone Ali Muno wa oko agopa odene ago Yesu Keraisu
kako. Ni oneke wene tugoa mekilepa toto peya odene wene pia toko. Ni ue motikilepa toto
peyame odenele toa motoko.
6
Ni Akolali ali atoa toto peyame atai wa oateko agopa odene
ago kako. Ni agopa oneke-kama toto peya lukoa meateko ago toto peya-pala lipua
mekilepa one patu kautakoa kama pomotoa toko.
7
Toto peya edikoa odene yagono-mikiti mekoloka Keraisuyo one peku lawetekilepa
one peku odeneya peku-kama lawetekoya mena. Nitamokome one peku lawetemo
lawetemo toateka wene toopikana toa tokome panago padeya peku lawetoa wa pade ago
padeya peku lawetoa toka.
8
One eni toatekalekepa Akolaline bokuke agale dikoa oa
pianeyano, yakamene.
I to aweane uku agopa a tibuke atepea pokomepa po yapu pitane yene peya mati noe wa
moa pekeneya. Ali atoa eya kuya peku-pala lawetekala taneya wa enile wete
tane tetepo takoa papete wia mekapianeya.
9
Atepea pekeneya wapa edekale akeneya-pe. Enipa einago namolo takoa tibu mea itonoke
ketipea noo tokale okome akeneya.
10
Eina ketipea nekene ago wane ikilepa itono tibutake
meetapeademe tokome tibu patukatapea ate wakapea pekene agoke uku.
11
Ni agome ali
atoa eya kuya peku lawetekilepa padeka-kiti takoa Aposelo ali-kiti latia kakoa ni padeka-kiti
one agale to awea akamotoa takoa moa ni padeka-kiti onekemo oma yamotoa takoa moa ni
padeka-kiti ali atoa yopia olaukoa tamene wa takoa moa kakoa taneya.
12
Nipa Akolaline ali
atoame Keraisu einagonole ele kule takaketepa one tigini pewe kakeneya kamotoa tokome
eni yene takoa peku lawetekala taneya.
13
One eni peku noa toma pote togaketepa nipa
oneke-kama wene tugoa mea ni Akolaline mana one mekole i i wa wene taneya meoo. Wene
odene pianeya mekete nitoa meoo. Nipa wetini ali atoa meatiki toa mekilepa Keraisu meko
toa kotu kakoa meoo.
14
Nitikete nana mati mekete tokoona toa wawa toamokolopa pa agale wene
kibututukoa okoi-kitame toto tolopi toa oa yotokamele toamoo. Nipa ueme-kiti ue tagi
nidikoa aua poko toa ni pupulegeme-kiti do popokoa aua poko toa toto ete oto wa liku
pekete tamele toamoo.
15
Edikoa meamekete yete pade ali atoake wene mekoa mea
niminimo-kama oma pato. Nitoapa Keraisu tone tobou wane tou toa ako meko ago one
adeka piane toa-kama litikete one-pala lipua-kala mema pato.
16
Ni ago Keraisuyo toto kipa
one lene timini yono kawa eya wa tetepo takoa yopia mekome one-pala lipua piateko toa
moa pia kibutukakala toko. Nipa tone tone ete oto wa auapea wene mekanali yoma pekete
one tigini la ama pomotoa toko.
Wenele Toma Yakomo
17
Nikepa Ali Munono ibini wedekoane eya tamene wane ukuno, yakamene. Mone pa
yatene ali atoame paya wene kibututukoa tiki toa wawa toameamene.
18
Dikane yenepa kini
wene yomiyomume moa agopa takatapeneya meki. Kini wene logonipa keteaneya tokome
Akolalinemo yakoa moameneya pa meki. Nipa one patu kautakoa kawamekete pata paka
etepea yaki.
19
Nitiki yename ya tanele tamene ya moameneya mekete abele toada wa ele
kule poaneleke-kama wene piitikaneya mea tokala tiki.
20
Kime pade Keraisunole takakete toatekoimo yatekilepa enika eni poanele litia
toatekoimo yatekoina mena.
21
Onekemopa one nimini peku noa tanele i i wa totome
olaukakolo yatekoina.
22
Ele kule poanele toada wa papete wene pia tokoinakaleme kini
wene moa koiganeyano, kiwi olaukane toa tekete eni poane wene wia wawe.
23
Kini namolo
tepene pikoi wene wawa wenele litia tamene.
24
Nipa Akolali kako toa adekake kakoa
weneya ali atoa latitapeneya mekete kiyo akenele-pala epetaneleta toomoa pamene.
25
Toto peyapa odene ago Keraisuno tigini tetepo tootapeneya mekono, kapene wakoa
agale wawa ete oto wa niminimo-kama oma pamene.
26
Yete pade ali atoa-pala kotimi
yoteketeka Akolaline totono tetekoa poanele toameamene. Lou wete pipameneyake eni
kotimi yotokoina teigamene.
27
Setanu kiwi pakeke lukoa menokayano, one ka pikatekole
pade toameamene.
28
Kode ago nepa kodeya motikilepa wa toameamene. Nitameneya
ponopene ali atoa auapeou wa neke yoname nimini pupu tokoa kawa auapekala tamene.
29
Kini kabunumepa pademo poanemo kailapagale eya a wa ikileka toameamene. Nitameneya
yete pade ali atoa auapekete oatikimo amele tokalepa mane mane oa auapeamene.
30
Akolaliyo papete kipa one wa oto toa moateka adeka kini tiginike pia tetou toa Epetane
Yomini kiwike moa wetekaneyano, one Yominine wene potokameamene.
31
Nika yete pade
ali atoa-pala wene poaneya meamoa ete oto wa kotimi yoonali yoamoa timini yoamoa bu
neno wamoa akoa agale wamoa tamene. Enika enile peya tewitikoa wamene.
32
Nitoapa kini
kini ete oto wa oya kakoa mama moa tamene. Nipa Keraisuyo taneleke Akolaliyo kini tokoi
poaneleke po letu mekakana keemu tane toapa kini kini ete oto wa poanele tokoike po letu
mekatakutukakoina keetapea wamene.
Epesase Epesase
<<
44
>>
Epesase Epesase
<<
55
>>
5
Pa Keneke Mekete Toatekomo
1
Nipa Akolaliyo kipa one kolotini yene wa yopia mekono, one meko toane meadiya
wa wili toa meamene.
2
Keraisu totoke wene mekoa mekome tukilepa Akolaline takakome
ka lono takoa one wa lodo yotane tetepo takoa tuaneyano, one meadeko toa kini kini wene
mekanali yoomoa pamene.
3
Pamoko mea abeyale toa eya kuya ako-kama mou wa wene pia enika eni poanele
tikimopa Akolaline yatename kotukamoa ko wamatikimono, enika enile toameamene.
4
Nika
agale ko oa kaketepa ali atoa ya takatikimo emo kumo pamo ikimo kailapagale enika eni
wamatikimopa wamoa Akolali kei pikala tamene.
5
Nimini ukuno, yakamene. Pamoko mea
abeyale toa eya kuya ako-kama mou wa wene pia tiki yenepa Akolali Keraisutame kini talo
toko take mea kawatino noe wa oto toa moamoi. Eya kuya ako-kama mou wa wene
pikilepa nipa Akolali keku kakoa pa itonoya-kiti tobou kakoa mea tiki.
6
Pade-kitame kiwi oa yotokaketepa enika enilepa poanele mena wa pamo oa
yotokakayano, yakameamene. Enika eni poanele tokoike Akolaliyo one agale edikoa tagoa
toamiki yene-pala kotimi yoa mekome etene kibu mokala too.
7
Nitoono, dikane yene-pala
oya patu pia yawameneya kini tokoile titi toma yamene.
8
Papetepa kipa yomiyomu keneke
yawa pitikoiyake opa Ali Muno-pala moa lipukaneya tokome pa takatapeneya mekete tikino,
pa pinagono yatene yawa pitikete toatiki toa yawa piamene.
9
(Pa ke yaketepa nipa ku
epetaneya tuou toa ele kule epetanele toa wene kiyo akeneya mea niminimo-kama oa tikiya.)
10
Ele kule teketepa Ali Munono wene edoane motuku patu wa one wene pikole tetoa
enamene.
11
Yomiyomu keneke yawa pitiki yename pale tiki toa toamoatino, titi toma
yamene. Kini tikilepa poanele eni tadeku wa wene tomotono, mea epetekamene.
12
Eni
yename paigakoa tikilepa etene ya tanele-kama tikino, kini eni tanele i i wa ko ikilepa
toamatoane uku.
13
Eni yenedo pa takatapeneya meketepa nipa kini tanele poanele eni
tadeku wa wene tekete pa pine agono peku noa toi.
14
Pa tokoyamepa padeya padeya peya
keleyo witakakala toko. Nikepa Akolaline bokuke agale dikoa oa pianeyano, yakamene.
Atu pia meko agopa kamokoa kamene. Ne tuaneya pikota kamoa pamene. Keraisuyo ne
pa takalogoono, nitamene wa panagome papete wia mekapianeya.
15
Nipa kiwika etepea pokayano, kinikile wedetekoa toma pamene. Paya peku
noamoano, nimini peku-kama noa tamene.
16
Opi-menepa poanele-kala witako-peteno, loyo
pa meamoano, padele epetanele toa ali atoa auapeatikita pikalepa auapeamene.
17
Nipa paya
wene piameneya Ali Munagono wene moada wa one wene pikole tetoa enamene.
18
Kini
wene moa bebo akakayano, leau akateko po ku ue eya nokoa kawameamene. Nitameneya
Epetane Yomini kiwike awia mea tagatapemotono,
19
oboa mekete-kama losu lo oa Samo lo
oa Akolali kei pikiya lo oa tamene. Nipa Akolaliyo yakamotono, lo oa mo yo eya wia tikilepa
kini tepene meaneya ya wa one kei pia tamene. Etene wedoa oa tamene.
20
Nipa kipala
padele padele tokaleke Ali Muno Yesu Keraisuno ibini wedekoa enabuna Atai Akolali-pala
ke wa amene.
21
Keraisuke poti wene pianeya mekete tekete kini oya-laweke oyake lukoane meamele
toko wa keku ali atoa tetepo takoa meamene.
22
Atoa yatene Ali Muno agoke poti wene
pianeya lukoa meatiki toa kinikaneke poti wene pianeya lukoa meamene.
23-24
Ni edoa-mo.
Keraisuyo Akolaline ali atoa toto kokotukoapa one tigini wa tetepo takoa toa monaneya.
Nitane agopa tone tobou wane tetepo takoa oneke-kama lukoa meamedeko. Nitamedeko
toa atoa yatene kinikaneke lukoa meamene wane uku.
25
Ali yatene kinikatuke wene mekoa mea mama moamene. Keraisu einago Akolaline ali
atoa totoke wene mekoa mekome tuane toa nitamene. Einagome eya wa wene pia tuaneya.
26
Akolaline ali atoame poanele tanele peya kogatapekilepa eni yene Akolaline takoane
motokadene touno, one agale yakoa mootokoa ue momotou wa wene pikome taneya.
27
Nipa Akolaline ali atoapa one tuupiane atoa tetepo takoane mou wa wene pia tukilepa ipu
pia tebo toa enika eni tokoya takatapeane etene koni atoa latiane mou wa taneya. Nipa
padameka akoa oatekoile toameneya kiyo akenele-kama toa memotou wa taneya.
28
Edikoapa ali yatene kini natonoke wene mekoa mekilepa kini tigini wa mama motekete tiki
toa tamene. Panago one natonoke wene mekoa mama motikilepa pinali one wa wene mekoa
mama motokome toko.
29
One tigini wa kote motikilepa odene agomeka tokoya mena.
Peyame kini kepene mama moapa nee moa naki. Enipa Keraisuyo Akolaline ali atoa mama
motokome talo toko toa tiki. Ni edoa-mo.
30
Keraisuyo Akolaline ali atoa mama motokome
talo tikilepa eni yenepa one lene timini yono kawa eya wa tetepo takoa mekome ni toko.
31
Ina ukulekepa Akolaline bokuke agale pade wia mekapiane toa tokome panagome-kiti
one atoa mootokoapa one etene nineta mekoita tewitikoa pome one atoa-pala lipua
meoo. Papete letetakutukoa meake enipete odene tigini latitapeneya kawou toa
liputakutukoa meoi.
32
Enipa pine i i wa tone weneme oyake to awea amele toamoko.
Akolaline ali atoa toto-pala Keraisu liputakutukoa mekomo uku.
33
Nipa eya wane ekene
uku. Ali yatene kini wa wene mekoa mea kepene mama moa tiki toa kini natonoke wene
mekoa mama moamene. Atoa yatene kiwika kinikaneke poti lukoa meamene wane uku.
Epesase Epesase
<<
55
>>
Epesase Epesase
<<
66
>>
6
Mati-kitikeka Etene Ninetakeka Akenemo
1
Mati yatene kipala eya wane ukuno, yakamene. Kini etene ninetame agale okoli
yateketepa Ali Muno agono wene pikole tou toane yakoane tamedeku wa litia tamene.
2
Nipa Akolaline bokuke wia mekane toa kini etene nineta kei pia poti lukoa meamene.
(Akolaliyo yonota tua agale oa metekilepa einagaleme titikome ali atoa mea epetekakete
toatekoimo-pala lua akeneya.)
3
Eya wa akeneya. Meane epetekou wa wene pia ni itonoke
ludu pitikoane meou wa wene pia meketepa nipa etene nineta kei pia poti lukoa
meamene.
4
Etene yatene kini mati-kiti timini natekatikile toameamene. Nitameneya Ali Muno
agonole takakete toatikile olaukoa mane mane oa tamene.
Egitini Yene Ta Pine Yenetake Akenemo
5
Kueme topo toa moa egetane yene kini pupu pine yename tamene wa okoi toa litia
tamene. Nipa Keraisuyo tamene wa akene tetepo takoa kinikile wedoa takamene. Nipa kiwi
kikoa akakaya wa piti motekete pine yeneke nate wene pianeya meamene. Kinikile edikoa
takakilepa odene wene pianeya mea tamene.
6
Pupu pine ago kakakoane kei pimotoane
tekene onekele wedoane takatekuyake opi kote aumoane tuku wa paya wene pia
toameamene. Kipa Keraisuyo moa egetane yeneno, Akolaline wene pikole toa e yenanele
wedoa takama pamene.
7
Nipa panagono pupu takakilepa ipa Ali Muno agono takou toane
tuku wa epene wene pia tamene.
8
Eya waka wene taneya meamene. Ta pine yenameka kini
kueme topo toa moa egetane yenameka ele kule epetanele tiki toa Akolaliyo kei pia
epetanele topo takakala toademe toko.
9
Edikako toapa ta pine ago neke moa egetane yene kaku wia tika tika toameneya eya
wa wene taneya mea talo toa epetekamene. Kueme topo toa moa egetane yeneka ta pine
yeneka kiwi peya lukoa meki ago a tibuke mekome kiwi peya odene yagono-mikiti tetepo
takoa talo toa meko.
10
Eya wane wipitiane uku-ye. Ali Muno ago-pala lipua mea one tele patu kautakoa
kamene.
11
Setanuyo kiwi tolopi toateka wene kibututukoa mea ele kule tokale ete
pedekadetepa eya tamene. Poi tikilepa iya-kiti moa kawa poi tamene wa Akolaliyo
yametekanakeya peya moa tamene.
12
Totome eni poi tikilepa pa tono melepu kakene yene-
pala poi toamekete eya yene-pala toko. Setanuke lokoa ta padeka padeka tatite toa yopia ni
padele padele telekole toa ni ele kule poanele witakoa meki tobou yene-pala poi toa kako.
Nipa a tibuke Setanuno peku noa tiki ipono yatene-pala totome poi toa-kala kako.
13
Nipa
enika eniya-pala poi wedoa tomotoa Akolaliyo yametekanakeya peyapa wete moa kamene
wane uku. Setanuno yatename kipala poi tonokoli poapeneya kakete ete pedekamu toa
kamene wane ni uku.
14
Nitoa poi toadete kawou toa eya tamene. Matio wedoa moa kamene. Enipa
Akolaline nimini peku noa tamene wane ekene uku. Ni palanu kauatiki kapa petene moa
kamene. Enipa wene kiyo akeneya meamene wane ekene uku.
15
Ni kawa yene moa
mekamene. Enipa Akolaliyo ali atoa-pala poi teigoa wakomo kini wene epetekakomo oada
wa to awea oma pamene wane ekene uku.
16
Ni poane ago Setanuyo itipono okoa kakene
wata yodokale kotokoto moa ua ete pedekatapeamene. Enipa Keraisuke wene tugoa
meamene wane ekene uku.
17
Ni tobou kauatiki kapa nunagu moa wateamene. Enipa
Keraisuyo kiwi toa motaneleke wene piitikaneya meamene wane ekene uku. Ni Epetane
Yominiyo yametane kepete tue moa pikoa kamene. Enipa Akolaline agale yakoa
mootapeamene wane ekene uku.
18
Nipa Epetane Yominiyo wene takako toa ete pia oto pia
emo kumo yakoa kowitikala tamene. Auapeano ta wa Akolaline ali atoa peyane wedoa
kowitikama pamene.
19
Anuka kowitikamene-ye. Nipa Akolaliyo papete kaukoa mema
nekenemo Keraisu taatekoa nokome tanemo oane meatekouta Akolaliyo amene wa oka
toane piti moameneya to aweane ouno, no einago auapea ta wa Akolali kowitikamene-ye.
20
Onekemo oane auane yakouke po yapu pitikaneya mekene uku. No nitaneya meku agome
Keraisunomo piti moameneya wedoane akateku toane akamotono ta wa anu kowitikakala
tamene.
21
I take mekene tukoumo ni i take mekolu nopala tanemo eya ago Tikikasi kiwi mekita
wida nokome oo. Einagopa anu kolotini agome Ali Muno agonole takama yawateko toa
wedoa takama yako.
22
Ni ago kiwi mekita poano pa wane wetekakilepa totome tokomo oa
kini wene-pala weye akoa tomotoane tekene ni tuku.
23
Anu oya-lawe kiwi peyane eya wane kowitikakene uku. Kini tepe kolotini kilikoa
pianeya mea wene mekanali yoa tomotono, kinikile-kama takama pomotono toe wane Atai
Akolali tone Ali Muno Yesu Keraisuta kowitikoane uku.
24
Tone Ali Muno Yesu Keraisuke
wene mekoane meane tuou wa one tewitikoa wawamiki yenepa neme pewe wia yopia
kamene wane Akolali kowitikoane uku-ye.
Opa anu agale eni.
Epesase Epesase
<<
66
>>
Galesia
00
11
22
33
44
55
66
Galesia Galesia
<<
00
>>
^
Galesia
Polo Aposelo Ago Takoa Moa Kakanemo
Ete Aposelo Ali-kitame
Polo Makutukoa Motanemo
Poloyo Adioke Take Pita Kikoa Akanemo
Yu yeneka Pa Yeneka Yesuke Wene Tugakilekepa
Akolaliyo Toa Motokomo
Mosesene Totonome Moa Lauaneya Meamekete
Keraisuke Wene Tugoa Meatekomo
Mosesene Totonokeka Ni Akolaliyo Eberame
Yatene Auapeou Wa Oa Pianemokeka Akenemo
Papete Ali Atoa Etepea Pokaya Tokale
Mosesene Totonome Moa Kolago Tanemo
Papete Egetiniya Meake
Opi Akolaline Mati-kiti Mekomo
Poloyo Galesia Yene Mama Motokome Akenemo
Eeka Seratame Ali Mati Opikala Tanemo
Kolago Tokale Mekoinata Wakapea Poameo
Epetane Yominiyo Wene Takako Toa Teketepa
Mosesene Totonoke Lukoa Meateko Toa Mena
Ali Atoa Peya Auapeatekomo
Poloyo Pubu Oa Lionate Oa Tanemo
Galesia Galesia
<<
00
>>
Galesia Galesia
<<
11
>>
GALESIA
Poloyo Galesia Yeneke Wia Wetekane Pipia
1
1-2
No Poloyoka nopala odeneka meki oya-lawemeka Keraisuno ali atoa wini Galesia ta
ludu meki-kiti kiwike i pipia wini wia wetekako-ye. I agale oane wetekakilepa pa ali-kitane
agale patu kautakoane kakene ukuna mena. No Aposelo ago takoa moa kakakilepa pade ali-
kitame taneya mena. Eya agotame Yesu Keraisu ni one tuaneya pikale moa kamotokane ago
Akolalitame tokoi.
3
Toneketai Akolali-pala Ali Muno Yesu Keraisutame kiwi pewe wia tepe kolotini
kilikoa pikoa tomotoane kini kowitikakene uku-ye.
4
Keraisu einagomepa ipete poanele toomoa piki-kiti etepea pomotoa wakome anu
oya-lawe toto toa moademe tone poanele tokooke nome tuaneya. Nipa toneketai Akolaliyo
wene toopiane toa taatekoa taneya.
5
Nitaneyano, Akolali kei pia-kala katoane uku-ye. E e
nimini.
6
Ae, Yesunomopa wida pene yakoa mootokoake pade olaukanemo etepea yakoa
litikete tiki. Nipa Akolaliyo kiwi eni yene pewe wia oto toa motakapoano pa wa Keraisu
moa wetekaneyake onekemo tewitikoa wakete tiki. Nitikili tekene wene kainya mati pianeya
mekene uku.
7
Pade olaukanemo wane ukumopa Keraisunomo mena. Pade-kitame kini wene
moa bebo akakete tiki. Nipa onekemo moa koigoapa pademo pamo olaukadete wili toa
kakete tiki.
8
Yesunomo kipala namolo olaukakounakamopa panagome moa koigoa
olaukakalepa nipa Akolaliyo einago wakome wamotoane uku. Noanumeka a tibu kawa
noko edelo alimeka onekemo moa koigoa olaukadekolopa Akolaliyo wakome wamotoane
uku.
9
Kipala ina namolo okouna toane wa lokoane uku. Keraisunomo kime namolo yakoa
motokoinakamopa panagome moa koigoa olaukakalepa Akolaliyo einago wakome
wamotoane uku-ye.
10
No Poloyo eni ukupa nipa Akolaliyoka ali atoameka no kei
pimotoane tekene ni uku wa wene piki-pe. Ali atoamedo no kei pimotoane enoane tekene
tou tokapa nipa Keraisunole kapene wakoane takou toka.
Polo Aposelo Ago Takoa Moa Kakanemo
11
Anu oya-lawe kipala i ukumo yakamene. Yesunomo oane auane yakumopa alime
wene kibututukoa mea to awea akenemo mena.
12
Nika panagome oa metekale yakoane
motokoumo mena. Panagome-kiti imo yakoa moa ta wa no olaukakoya mena. Kipala i
ukumopa edikanemo menake Yesu Keraisuyo i i wa no-pala to awea oka.
13
Ete Yu yename Akolalinele takama piki toane noanumeka wedoane takama
pokoumo kime yatekoimo wa wene takadene ukuno, yakamene. Papete einakale tekene
Yesunomo yakoa motane ali atoa ela moameneya kiwi wiouno nepio wane wiane atukadene
wili toane kakou.
14
Ni toto Yu yatenanele takakenepa anu yagono-mikiti peya mati moane
patukoane anu kaua-mikitane peku-kama nootokoane wedoane toomoane pokou.
15
No nitatekou ago agauayo pene opiameneyake Akolaliyo one wa takoa mootokoa
no pewe witikome kayo oa motokagome eya wa oa toka.
16
One managono peku noa
tamene wa no kayo oa moa kakaka. Nipa onekemo mone pa yatene pitiki toane mo wima-
kala pomotoa tokome ni toka. Nitikalepa Yesunomo wete yakoa motane ago mekata-kiti
poamoane
17
ni Akolaliyo namolo takoa moa kakane Aposelo ali-kiti Yerusaleme take
koukoa mekoitaka poamoane tokou. Nitameneya Arebia take wete pone mepokou. Eidapa
Yesuyo onekemo i i wa no olaukatapeka. Wa naniko Arebia ta tewitikoane Damasikase take
wakapeane pone mepokou.
18
Nitoanepa tebolo takaka malike Pita mekota ugu pone mepou
wane wene pikou toane Yerusaleme take pone Made takutake one-pala eida opiane mekou.
19
Einata einapete eya ago Yesuno wamene ago Yameka enekouyake ete Aposelo ali-kiti
enamokou.
20
Kipala i oane wiane mekakene ukumopa niminimo-kama uku. Akolaliyo yakakoa
kamotoane kapene wakamuku wane uku-ye.
21
Yerusaleme take meemotekene Siria Silisia tata ludu pima yakou.
22
Eina-petepa
Yesuno ali atoa Yudea take pitikoi-kiti anu lene timini wete enameneya meketepa
23
ete-
kitame no ko okoimo odene yakakala taneya. Nipa no einagome Yesuno ali atoa kiwi tete
meemoa yakoyake opi Yesunomo oa aua yako wa ete-kitame no ko okoimo yakakala
taneya.
24
Nitoa yakatekoapa anu eni tokouleke Akolali kei pia kakeneya.
Galesia Galesia
<<
11
>>
Galesia Galesia
<<
22
>>
2
Ete Aposelo Ali-kitame
Polo Makutukoa Motanemo
1
Wa mali ali leme (14) kakoa ponetekaneyake Banabasi-pala opiane Yerusaleme take
wa wakapeane pone mepokou. Taitasi einagoka pato wane moane auane pokou.
2
Nipa
Akolaliyo no wene takakale tekene eya toadene pokou. Yesuno yatene ibini akene ali-kitame
yakamotoane Yesunomo mone pa yatene-kiti mekika oane auane yakene ukumo to aweane
oadene pokou. Nitoanepa Yesunole wete takakouleka enipete takakouleka pata pale takaya
tokale eni ali-kiti-pala paka witimoane pone mekene i i wane to aweane ootapekou.
3
Nitikolu
ekete nipa nemepa Keraisunole wedoa takama yake tadekono, i ago Taitasi mone Geriki
agoke Mosesene totono piko toa kepene teigateko toa mena wa one makutukoa motokoi.
4
Nipa Yu yatenane totono litia tokoi ali pade-kitame Yesunomo yakoa motane tetepo takoa
eya tokolika makutukoa motokoi. O yename Taitasine kepene teigamotoa toa enadete toto
pakeke lede note menokoi. Ni pade Yesuno ali-kiti totome kini totono tewitikoa Yesunole
atiki toa takakete tokoole enadete tokoi. Nipa kini tanele-kama litia tomotoa kini totonoke
moa labakadete tokoi.
5
Nitikolipa Yesunomo Galesia yene kiwi olaukakounakamo moa
koigakaya tokale o Yu yename okoimo pademoka yakamokou.
6
Nitikene ibini akene tetepo tane Aposelo ali-kiti pakeke mekeneke pa atiki toane
mekou. Toto takoa enateko agopa Akolali odene tokale tekene atiki toane mekou.
Nitoanepa kiwi pa yatene ali atoa Yesunomo oane metekouna toane e yene-pala i i wane
to aweane okolu yatekete no neme onekemo pademo katekoa wameadeko wa wameneya
eya wa okoi.
7
Akolaliyopa toto Yu yatene pitiko toa Keraisunomo oa aua yamotoa takoa
Pita moa kakaka. Einakale tokome Polo neme onekemo e ku pa yatene pitikoi toa oa aua
yamotoa takoa moa kakaneya tadeko wa okoi.
8
Keraisunomopa Pita neme Yu yatene pitiki
toa oa aua yawano ta wa takoa moa tele lukaka ago Akolaliyo no Polo neme e ku pa yatene
pitiki toa oa aua yawano ta wa no takoa moa tele lukaka tokale ni okoi.
9
Nitikete Yame
Pitata Yone toa tobou meane tetepo tane ali-mename ekete e e nimini okono, Polo neme
winile tomotoa pewe witikilepa Akolaliyo tadeko wa ootokoa kakete eya tokoi. Banabasi
tota kini yagono agota latikete tone yono motekete ekete nipa ete Aposelo ali-kiti kime Yu
yatene pitiki toa Yesunole takama poono, Banabasi kitame e ku pa yatene pitiki toa onekele
takama poatino poe wa okoi.
10
Nimo ootokoa kakete ekete eya odene wene
kayapeameneya toatino toe. I take ponopeneya meki-kiti mama moa auapema pamene wa
okoi. Einapa tou wane wene pianeya-kama mekouyake okoi.
Poloyo Adioke Take Pita Kikoa Akanemo
11-12
Wa naniko Pita toto mekoota Adioke take nome mekome eya toka. Yameyo moa
wetekane Yu yene wete noameneyake mone pa yatene ali atoane yapu pome nee nopokala
toka. Wa naniko eni Yu yene note mekoli einapete titimoa pa yatene ali atoa mekoika
pamene kote tokale waka. Eni Yu yename eya wa okoiya. Pa yatene alime Yesunomo yakoa
mootokoa kini wa kepene teigamotoa toamokolipa titi toa wamene wa okoiya. Pitayo kini
eina paya wene litiane tetepo takakome kepene teigamene ali-kiti-pala mekome nee namene
piti tokale waka. Nitikalepa one ponoke kakene ekene widikoapa toa potokako wane
kikoane akakou.
13
One eni paya wene pia toka toapa one Yu yatene oyali-kitame eni pene
nokoi Yu yene piti motekete tekete kini okoile litikala tokoi. Nitikoli enekome Banabaseyoka
etepea litia toka.
14
Nitoa Yesunomo one niminimo pine piko toa litia toameadekoli enekene
e yenane lene yoto kakene Pita-pala eya wane okou. Pita nepa Yu agomeke o Yu yene wete
noameneyake pa yatene ago tetepo takoa mekanano, pa yatene ali-kitame toto Yu yenane
totono edoa litia tomotoa-pe. Litia toatiki toa mena wane okou.
Yu yeneka Pa Yeneka Yesuke Wene Tugakilekepa
Akolaliyo Toa Motokomo
15
Nimo ootokoane Pita-pala eya waneka okou. I ago Pita totapa Iserele yatene agota.
Mone pa yatene agota mena.
16
Nitane agotame eya wa wene toko. Akolaliyo one ali atoapa
poanele toamene yene tetepo takoa wene keaneya mekilepa Mosesene totono litia
tootapekileke tokoya mena. Enipa pa Yesuke wene tugakileke toko. Totameka Yu yatenane
totono litia tootapeamele toamokoyake Keraisu Yesuke wene tugoa meko. Akolaliyo totapa
poanele toamene agota tetepo takamotoa tekete ni toko. Ni edoa-mo. Mosesene totono
litiki yene Akolaline leneke poanele toameneya meane tetepo taneya meamele toamoko.
17
Akolaliyo totopa poanele toamene yene tetepo takoa wene keaneya memotoa toa enekete
Yesuke wene tugoa meketeka e ku pa yatename poanele tikina toa totomeka poanele
tadekolopa nipa totome poanele pa tomotoa Keraisuyo enoa wako-pe. Enoa wawamoo-li.
18
Namolo yapu ke aweane waou toane tekene no Yu yatenane totono ete pimotoane wakou.
Nitikouyake enimene wa moane awitikakoane wiou toane tekene eni totonodo wa litiane
tootapeane enekenepa nipa ae nopa Akolaline totono tetekaku ago tadeko wane ou.
19
Yu
yatenane totono litiane tuku pekene toanepa ae tootapeamele toamokono, nopa tuateku ago
tadeko wane litiane toaneke wakou. Nipa Akolali patu kautakoane mema pou wane nitikou.
Opi Keraisu-pala yomo lekaneyake odeneka wia dekane tetepo taneya meku.
20
Nitikuno,
itonoke pa mekuyake Keraisu nopala lipua meko. Nipa itonoke pa mekeneka nooke wene
mekoa mekome tuademe nekene agoke wene tugoane meku.
21
Edikakenepa Akolaliyo no
pewe wia talo toko ka tewitikoane wakuya mena. Panagome-kiti Akolaliyo one poanele
toamene ago tetepo takamotoa tokome Mosesene totono litia tootapeamele too tokapa nipa
Keraisu totoke tukilepa pata pale too toka.
Galesia Galesia
<<
22
>>
Galesia Galesia
<<
33
>>
3
Mosesene Totonome Moa Lauaneya Meamekete
Keraisuke Wene Tugoa Meatekomo
1
Ae, wini Galesia take wene meameneya meki-kiti kini wene teyo moa bebo akaneya-
pe. Yesu totoke yomo lekaneyake tuanemo wedoane to aweane okolu yatekilepa one eni
tukale kini leneme enoa mou toa yakoa motokoinake opi yakane tetepo toameneya mekete
tiki.
2
Nitikete tikino, eyado yakouno amene. Akolaliyo one Epetane Yomini kiwike moa
wetekakilepa Mosesene totono litia tootapekoinake taneya-pe. Yesunomo kipala to aweane
okounakamo yakoa motokoinake taneya-pe.
3
Yesu einagonole titia takakilepa Epetane
Yomini patu kautakoa kakete tokoinano, opi onekele takoa togadetepa kini weneme touno
wene pia tikiti-pe.
4
Ae, ele kuleme ke enekakale meketeka Yesunole poti takama yakilepa pa
pata pale tokoti-pe.
5
Akolaliyo one Epetane Yomini kiwike wetekatekoa kiwi pakeke padele
padele tubele witakakala tikilepa nipa Mosesene totono litia tootapekoinake toko-pe. E 'e
mena. Yesunomo kipala to aweane okounakamo yakoa motokoinake ni toko.
6
Nipa Akolaliyo Eberame-pala-kiti tanemo wene kibutua meamene. Akolaliyo ne
auapekene ile tou wa okalepa nimini taatekoa toademe oko wa Eberame oneke wene
tugoa meaneya. Nitikale tokome Akolaliyo Eberame poanele toamene ago tetepo
takaneya.
7
Nitaneyano, eya wene toa wane uku. Akolaliyopa one oka toa-kama taatekoa
too wa oneke wene tugoa meki-kiti Yu yeneka pa yeneka Eberamene mana kono-mikiti
tetepo takoa meko.
8
Akolaliyopa e ku pa yatene oneke wene tugoa mekoike poanele
toamene yene tetepo takoa pewe wiatekamo i i wa Eberame-pala papete oa pikome okome
e ku yatene ta piko peyake pitikoi toane pewe wiane kawou. Nipa ne nooke wene tugoa
mekoleke nitou wa Eberame-pala akeneya. One bokuke papete wia mekapianemo eni uku-
ye.
9
One oka toa-kama nimini taatekoa too wa Eberame Akolalike wene tugoa meane toa
meki-kitipa Akolaliyo Eberame-pala kikilikoa pewe witikome poanele toamene yene tetepo
takoa meko.
10
Akolaline wene kekadene Mosesene totono litiane tootapeou wa wene pianeya meki-
kitipa Akolaliyo wawa kibu moademe tokolo uku. One bokuke eya wa wia mekanemoke ni
uku. Panagome-kiti Mosesene totono litia tokomeke odeneleka katekoa toamokolopa
Akolaliyo wawa kibu moademe toko wa panagome wia mekaneya.
11
Mosesene totonome
moa lauane ago odeneka Akolaline leneke poanele toamene tetepo taneya kamele
toamokolo uku. Akolaline bokuke eya wa wia mekanemoke ni uku. Akolaliyo poanele
toamene tetepo takaneya meki-kiti oneke wene tugoa mekete tekete ni mea kama piki.
12
Mosesene totonomedo moa lauaneya kaketepa nipa Keraisuke wene tugoa meatiki toa
mena wane uku. Moseseyo tamene wa akenele-kama litia tokagopa one eni totono patu
mea kamedeko wa Akolaline bokuke wia mekaneya pikolo tekene ni uku.
13
Totome eni totono litia tootapeamokolo tokome Akolaliyo kipa poane yene wa
waoo tokake Keraisuyo oto toa motaneya. Nipa etename oneka poane ago tetepo takakome
wamotoa tokome toto luku tuaneya. Eni tuatekalekepa Akolaline bokuke eya wa wia
mekaneya piko. Yomo lekaneyake tuko agopa Akolaliyo poanele tane tetepo takoa
wakene ago eni wa wia mekaneya piko.
14
Keraisu Yesu edikoa tukilepa Akolaliyo Eberame
nepala titiane tokouna toane tekene pa yatene ali atoaka ta piko peyake pitikoika pewe wiou
wa okana toa taatekamotoa tokome tuaneya. Nipa oneke wene tugoa mekolo tokome
etename Epetane Yomini totoke wetekateka wene toopikana toa taatekamotoa ni taneya.
Mosesene Totonokeka Ni Akolaliyo Eberame
Yatene Auapeou Wa Oa Pianemokeka Akenemo
15
Anu oya-lawe kipala ina ukuna pine piko toane wene takadene eya adeka pikene
ukuno yakamene. Ali takutame-kiti dikoa auapenali yato wa oa togotokoimo wia
mekakolipa padekagome pademoka katekamele toamoa wa eni pake pademoka lukoa wia
mekamele toamoa toko.
16-17
Eya wane ekene uku. Akolaliyo Eberame-pala ne yatene
auapekene dikou wa oa piane toa adini moameneya pa pia kako. Nitikono, ege kadukaka
mali pogi kakoapeta (430) ponaneyake Moseseyo yametane totonome eina oa piane agale
pademoka katekoa wamele toamoko. Akolaliyopa dikou dikou wa one yono timinike
pitikou toa oa pikome Eberame-palaka oneke ta watekago-palaka akeneya. Nipa Eberameke
ta wateka ago wa panagome Akolaline bokuke wia mekakilepa Eberameke ta watekoi yene
peyake wamokome odene ago Keraisuke akeneya.
18
Akolaliyo toto toa motikilepa
Mosesene totono litia tootapekooleke too tokapa nipa Eberame-pala dikou wa papete oa
pikana toa taatekoa tokome ni toa motoko wa totome oatekoole piamoo toka. Nitoo tokake
Akolaliyo toto one mana kono-mikiti latikoa toa motikilepa Eberame pa pewe witikome
dikou wa one-pala papete oa pikana toa taatekakome ni toka.
19
Moseseyo one totono yametekilepa edekale taneya-pe. Papete poanele-kitipa i i wa
Iserele yename wene tomotoa tokome ni yametaneya. Ni pade Akolaliyo mone pa yeneka
toane motikilepa neeke ta watekago kitake tou wa Eberame-pala kikilikoa akene ago Keraisu
nokaleka papete pa tekei litia tomotoa yametaneya. Eina totonopa Moseseyo one yatenane
pikoa katekamotono, one kakata akapoatino poe wa Akolaliyo one edelo ali-kiti moa
wetekaneya.
20
Papete Akolaliyo Eberame-pala i i wa e ku pa yatene ali atoaka toa moateka
totono yametekomepa panago neme yametekoano pa wa takoa moa wetekaneya mena.
Nitameneya Akolali oneme pome yamepaneya.
Papete Ali Atoa Etepea Pokaya Tokale
Mosesene Totonome Moa Kolago Tanemo
21
Moseseyo naniko yametane totonome Eberame-pala papete akene agale moa
kautako wane ekene ukutu-pe. E 'e mena. Akolaliyopa ali atoame totono pade litia
tootapekoike meemoa pamene wa poanele toamene yene tetepo takoa toa moamele too
tokapa nipa eni totono litia tane yene takoa toa moo toka.
22
Nitoo tokake itonoke meki
peya poaneleme moa labaneya meki wa panagome Akolaline bokuke wia mekakomepa eya
wa okome akeneya. Meemoa pikilepa odene agoka one weneme tamele toamoko. Tamele
toamokoyake Akolaliyo Eberame-pala papete oa piane toa tekete ali atoa Yesu Keraisuke
wene tugoa meketepa meemoa pamele toko.
23
Papete tone wene tugoa meateko ago wete taatekoa noameneyake Akolaliyo toto
etepea pokaya tokale eya taneya. Mosesene totonome moa kolago taneya memotoa
yopimoa nekeneya. Keraisuke wene tugoa meatekoi ka nani yameou wa taneya.
24
Nipa
padane mati-kiti moa egetekane agome tou toa tokome papete Mosesene totonome i i wa
toto Keraisuke poatekoo ka yamema nekeneya. Nipa Keraisu nokalepa oneke wene
tugakolo Akolaliyo totopa poanele toamene yene tetepo takamotoa tokome nitaneya.
25
Opi
Yesuke wene tugoa meateko oipa nekedekono, Mosesene totonome Keraisuke poateko ka i
wa yameateko toa mena.
26
Nipa kiwi peya Keraisu Yesuke wene tugoa mekili tokome Akolaliyo one mana
kono-mikiti latikako.
27
Keraisu-pala lipua mea ue motokoi-kiti kiwi peya weneya mamina
moa kawou toa Keraisu keneya meki.
28
Nitaneya meki-kiti kiwi peyapa Akolaliyo midi
pikoa mekome Yu yeneka Geriki yeneka ta pine yeneka ta pine yename moa egetane yeneka
ali yateneka atoa yateneka takoa enamokome odene yatene tetepo takoa yopiko. Keraisu-
pala lipua mekili tokome ni toko.
29
Nipa Keraisuno yatene ali atoa mekili tokome Akolaliyo
kiwi peyapa Eberameke tagene yene tetepo takoa meko. Nitoapa onekeya-kiti ne meou wa
Eberame-pala papete oa pikana toa taatekoa tokome kiwika meademe toko.
Galesia Galesia
<<
33
>>
Galesia Galesia
<<
44
>>
4
Papete Egetiniya Meake
Opi Akolaline Mati-kiti Mekomo
1
Eya wane ekene okou. Etename-kiti onekeya peya mana agome mootapemotoane
uku wa kadimo oa mea tukoyake papete matikepa wetini yename egetinago tetepo takoa
yopiki.
2
Nipa etename i ago wetinago kakale one moatekoya peya meetapeamene wa
metane oi wete noameneyakepa papete wetini yename eni matika one moatekoyaka etename
okana toa tekete yopikoa kaki.
3
Eina toa totoka papete Keraisu wete noameneyake mati
keneya mekete itono peku noa tokoi yeneke lukoa mekoo.
4
Wa naniko one metane oi noka-
pete Akolaliyo mana Keraisu atoane tepene mea nomotoa moa wetekaneya. Poano pa wa
moa wetekakale nome mekome Yu yenane totonoke lukoa meaneya.
5
Nipa totoka papete
Yu yenane totonome moa lauaneya meko-kiti oto toa moademe tuaneya. Akolaline mana
kono-mikiti latikademe ni taneya.
6
Kiwika one mana kono-mikiti meko wa wene tomotoapa Akolaliyo manane Yomini
kini tepene lobutuano pa wa totoke moa wetekaneya. Nipa Atai Atai wa kayo okala toko
Yomini eni wetekaneya.
7
Nitaneyano, kipa one mana kono-mikiti meki. Pa egetini mati-kiti
keneya meamiki. Nipa Akolaliyo kipa one mana kono-mikiti moa latikakilepa onekeya-kiti
kiwi meou wa toko.
Poloyo Galesia Yene Mama Motokome Akenemo
8
Papete kime Akolali wene toameneya mekete paya gode-kitipa Akolali tetepo takoa
eniya-kitike egetiniya keneya lukoa mekoi.
9
Opi pade nitameneya Akolali wene taneya meki.
O'o, Akolaliyo kiwi wene taneya meko wane ikinakeya. Ae, nitaneya meki yename kini
namolole tewitikoa wakoinake opi wa tekete tiki. Eni paya-kitike egetini mati keneya wa
lukoa meadete iki patu.
10
Nitoa kini namolo losu tanele tekete i ta pataka-pete ile tato, i
tokeneke ile tato, i malike ile tato wa toge kia lodo yoa enika enile etepea tuku pekete tiki.
11
Ae, kiwi pakeke Yesunole takama yakounake ipe yolo enadene keneya einapa pata pale
tekene tadeku wane wene pikene uku.
12
Anu oya-lawe kime Yesunomo yakoa momotoane tekene Yu yatenane totonoke
lukoane meaneke waatekoane kiwi pa yene mekoina toane mekounano, opi anu tukule-mene
tamene. Kime no-pala padele poanele tokoina mena.
13
Namolona wida none mekene
Yesunomo to aweane ikilepa no yene tokale tekene pade-mene meane to aweane okouna.
Enipa nimini ukutu-pe.
14
No yene taneya mekolu eneketepa ae ni edato patu wa no kote
moa paya tetepo takamokoi. Nitamekete eyaka tokoi. Akolaline edelo ago nekene tetepo
takoa makutukoa motikilepa no Keraisu Yesu tetepo takoa tokoi.
15
Ae, kiwi namolo
kolotine mekoinake opi edikoa meamekete tikino, edekolo tikiti-pe. Namolona anu wene
epetekadetepa kini lene to a moa meamele too tokapa kini leneka no meoi tokake opipa pade
wene pianeya mekete tiki.
16
Niminimo oane metekulu tekete nopa kipala poi te iane ago
tetepo takoa waki-pe.
17
Einapa no oa ketekakoina yename kiwi oya kakoa enekilepa pale toatiki wene
pianeya meketeke tekete tiki. Nipa no ete pilia wawa kinikile wedoa takama pomotoa tekete
ni tiki.
18
Wini yename kiwi oya kakoapa kipala epetanele toatiki wene pia tikipa nipa toa
epetekaki. Kiwi pakeke mekoluka padeka mekoluka enabuna wini yename edikoa toa
epetekamotoane uku.
19
Anu mati deya niname-kiti mati opiademe welea kawou toane kiwi
Keraisuno yagono-mikiti wa latikou wane wene keda taneya meku.
20
Ta padeka mekene i
pipia wiane wetekakilepa kiwi kakakoane ko oadiya wane wene pikene tuku. Nipa kime
tokoileke wene kainya mati pianeya mekene kipala edemo uku patu wane tuku.
Eeka Seratame Ali Mati Opikala Tanemo
21-22
Kiwi padeka-kiti Mosesene totonoke wa lukoane meou wa wene piki-kiti kipala
eya wane yateku. Mosesene totono wia mekaneya pakeke Eberameyo opiane ali matita
takutake akenemo wene tiki patu. Pade matipa one kueme topo toa moa egetekale pupu
takane atoa Eekayo opikaneya. Padena matipa ta pine atoa Serayo opikaneya.
23
One pupu
takane atoa Eekayo Eberamene mati opikakilepa atoa yatename mati opikina toa epene atoa
mekome opikaneya. Nitaneyake padena atoa ta pinatoa Serayo one mati opikakilepa
Akolaliyo papete oa pikana toa taatekoa taneya.
24
Eina atoatame mati opikala tanepa eya
adeka pikene uku. Akolaliyo ali atoa auapeane talo touno dikamene dikamene wa oa
togotane totono takuta adeka pikene uku. Eeka wane ibini uku atoapa Mosese Sainai tono
waneke kakome motane totono adeka pikene uku. Oneke tagene tetepo takaku yenepa
egetini yatename ta pine yenane pupu-kama takou toa Mosesene totonoke lukoa meemoa
niki.
25
Eeka einatoaka oneke tagene tetepo takaku yeneka egetiniya meou toa Mosesene
totonoke lukoa meki. Dikane yeneke ikilepa Arebia take kakene Sainai tono wane adeka
pikene uku. Sainai wane ukupa Yu yenane Yerusaleme ta wane koniyo wene pikakene uku.
26
A tibuke piko Yerusaleme ta wane ikilepa ta pine ago Akolaline peku mati tagene ta wane
adeka pikene uku. Eni taapa tone nine tetepo takoane uku.
27
A Yerusaleme wane adeka
piane uku atoakepa Aisaiayo Akolaline bokuke eya wa wia mekaneya.
Tiobo atoa nepa wedia meano ta. Mati mukiti nakolo welea opiamekeke Akolali-pala ke
wa kayo oa kolotine meano ta. Tiobo atoameke mati opikala tikilepa ete atoa-
kiti moa patukoa too tokolo ni uku wa wia mekaneya.
28
Akolaliyo papete oa piane toa taatekoa peku mati Aisake opiane toa anu oya-lawe
kiwi mone pa yeneke one peku mati-kiti latikaneya meki.
29
Atoa yatename mati opikina toa
opiane ago Eekane mana agomepa eya taneya. Niname Epetane Yominine tele patu
kautakoa mekome opiane ago Aisake tete meai taneya. Eina toa opika Mosesene totonoke
lukoa meki-kitamepa Epetane Yominiyo Akolaline peku mati latikane yene tete meai tiki.
30
Nikepa Akolaline bokuke agale dikoa piko.
Kueme topo toa moa egetane atoa-pala one matita paka lono moa pitikamotoane uku.
Etename kadimo oa meatekoya-kitipa ta pine atoane mana agome
mootapemotoane tekene ni uku. Padena atoane mana agome padeyaka
moamoo wa Akolaliyo akene toa panagome wia mekaneya.
31
Nipa ina adeka pikene ikilepa eya wane ekene uku. Anu oya-lawe totopa eina egetane
atoake ta ma noko yene mena. Totopa ta pine atoake ta ma nokoya.
Galesia Galesia
<<
44
>>
Galesia Galesia
<<
55
>>
5
Kolago Tokale Mekoinata Wakapea Poameo
1
Totopa kueme topo toa moa egetaneya meou toa Yu yenane totonome kolago taneya
keneke mekoo. Nitaneya mekolo Keraisuyo oto toa motaneya. Eni kolago taneya keneke
mekoinata panagome wa moa kakakayano, poapeneya kamene-ye.
2
Nikepa no Poloyo eya wane uku. Yu yename kini ali yatene kepene teigamene wa
okoile teketepa Keraisuke edeya weike wene tugoa meki-pe.
3
Enipa wa lokoane uku. Kiwi
pa yatene ali-kiti kepene teigamedeko wa teketepa nipa Yu yenane totonome tamene wa
akene toa-kama litia tootapeamediki.
4
Ae, Akolaliyo kipa poanele toamene yene tetepo
takamotoa enoa tekete Mosesene totonoke lukoa meketepa nipa Keraisu ete pilia wakete
tiki. Nika Akolaliyo kiwi pewe witikome talo tokota tewitikoa wakete tiki.
5
Totome pade
nitamekete eya toko. Akolaliyo totopa poanele toamene yene tetepo takamotoa one Epetane
Yomini patu kautakoa kakete nepia meko. Nipa oneke wene tugoa mekete wedia mea nepia
meko.
6
Totopa Keraisu Yesu-pala lipua mekolo Akolaliyo poanele toamene yene tetepo
takakilepa kepene teigane agoka kepene teigamene agoka midi pikoa toko. Nipa Keraisuke
wene tugoa mekete ete oto wa wene mekanali yotokoke ni toko.
7
Ae, papetepa Yesunole wedoa takama pokoinano, opa eina nimini okouna toa litia
toake wamotoa teyo toka-pe.
8
Kiwi oneke noe wa kayo oa motokago Akolaliyo tokoya
mena.
9
Edikakilekepa Yu yename eya wa pedoa agale ikina. Yisi kugu dedeyaka palawe
keneke pitikakiyake pupitikoa kotuke kaatapeko.
10
Ali Muno patu kautakoane kakene mane
oane motukumo kime yakoa toino wene tekene uku. Kini wene moa bebo akakagopa ibini
akene ago tadekaleka pa ago tadekaleka Akolaliyo kibu moo.
11
Anu oya-lawe, Akolaline wene kekadetepa ali yatene kepene teigamene wane
wamuku. Nimo wane ekene ou tokapa Yu yename no tete meemoa poamoi toka. Ni Yesu
yomo lekaneyake totoke tuanemopa ya tanemo wini oko wa nopala wamoi toka.
12
Kiwi pa
yene ali yatene kepene teigamene wa kini wene bebo akoa tika tika tiki Yu ali-kiti kini wa eya
tomotoane uku. Pine yene kini kepene wa teigilepa kini mu-kitika wa te ia mitikamotoane
uku.
Epetane Yominiyo Wene Takako Toa Teketepa
Mosesene Totonoke Lukoa Meateko Toa Mena
13
Anu oya-lawe Akolaliyo kipa one wa kayo oa motikilepa eina kolago taneya keneke
mekoinata tewitikoa pomotoa tokome taneya. Nitaneyano, opa eina namolo totonome
laukameneya atiki toa meamele toko. Atiki toa meamele tokoyake ele kule poanele tou wa
wene ponoka toa litia toameamene. Nitameneya ete oto wa wene mekoa mea auapenali
yoma pamene.
14
Eina totonome tamene wa akenemo peyapa agale tigini odeneme kabe
koukaloganeya piko. Pinali neeke wa wene mekoa meko toa eko ali atoakeka wene mekoa
meamene wa akenemo kekutu.
15
Nitamekete tue yatename-kiti ete oto wa tani-nali yoa tiki
toa toma peketepa nipa kini kini wia atutakatapeoi.
16
Eya wane ekene uku. Epetane Yominiyo tamene wa okale-kama toma peketepa nipa
ele kule poanele toada wa wene ponoka toa litia toamoi.
17
Kini poane wene witakole
Epetane Yominiyo tamene wa okole eni takutale ete oto wa poi tootakutukakolo tokome
padele epetanele tou wa wene pia toa teko tokolo wakala tiki.
18
Epetane Yominiyo tamene
wa oka toa litia toma peketepa nipa Mosesene totonoke lukoa meatiki toa mena.
19
Poane wene witako toa litia teketepa nipa ele kule poanele toma piki. Nipa moamene
atoa-palaka pamoko atoa-palaka koua pia abele toa potokoa eya kuya ya tanele toa
20
ni kini
yoname latikoinakeya Akolali tetepo takoa kowitoa ni nakeneya tomo eya moa ali wia tukoa
ni ete yene-pala kotimi yoa ni agale oa takakete pili pili toa ni panagoneya mou wa one-pala
wene poaneya mea ni lene pia bu oa ni ako ago kawou wa kinikile-kama toa ni neno oa ni
ete oto wa puutakutukoa pilitapea
21
ni panagoneya tepi moa ni leau ue eya nokoa kawa ni
eniya ue nootokoa agale telo oa edikanele toma piki. Enika enileke papete pubu okouna
toane wa lokoane uku. Dikama yaki yenepa Akolaliyo one talo tuku taapa kinino noe wa
yameamoo.
22
Epetane Yominiyo tamene wa oko toa litia toko agome eya toma poko. Ete ali
atoake wene mekoa mea ni kolotine mea ni tepe kolotini kilikoa pimotoa mea ni padame
one-pala poanele tokaleka poti wene pianeya mea ni epetekoa mea ni ne auapekene dikou
wa oa piko toa-kama taatekoa toa
23
ni poti ko akene wene pia ni utanele-kama toa poti
yawa toko. Nile toma poko agopa winile toamea wa one eni tokole-kiti teyo enoa kekanele
latikamotoa-pe.
24
Yesuke lukoa meko-kiti totomepa tone poane wene witika toa ele kule
poanele toadiya wa wene pikoonakale peya yomo lekaneyake wia dekou toa
tewitikatapekoo.
25
Epetane Yomini patu kautakoa kakete meemoa peketepa nipa oneme tamene wa
okole-kama toomoa pato wane uku.
26
Nipa anume tuku toa kimeka tamene wa tone wa kei
pia mate agale oa ni i ago meko toane noka meada wa one-pala wene poaneya mea edikoa
ete oto wa wene potokanali yoamato.
Galesia Galesia
<<
55
>>
Galesia Galesia
<<
66
>>
6
Ali Atoa Peya Auapeatekomo
1
Anu oya-lawe kiwi panagome padele poanele tadekalepa nipa Epetane Yomini patu
wedoa kautakoa meki-kiti dikane ago mane oa moamene wane uku. Nipa Setanuyo kiwika
likoa enekayano poti mama moa tamene.
2
Nitikaya wa ke enekakale mekete kini kini
auapenali yoma pamene. Nitiketepa Keraisuno totono litia toatekoi toa tekete toi.
3
Panagopa pa agomeke ibini akene ago meku wa wene pikomepa pinali one wa eni oa
yotokakome toko.
4
Kini toma yakilepa kini wa takoa enekala tamene. Nitiketepa ipa
epetanele tadeku wa wene piketepa kini wa kei piamele tokoyake anume tuku toa kimeka
tamene wa mate agale wameamene.
5
Kini wene moa keda takanele eya witakoyapa keda
tane kopapu tetepo takoa kini kini wia apua pamene.
6
Keraisunomo olaukane agomepa one kamoya eya one tikisa ago tatia meamedeko.
7
Ele kule tikilepa eya wa wene taneya mea tamene. Padameka Akolali oa yotokamele
toamoko. Ipe pinagome-kiti eya kuya matakoya wakoa moa nou toa panagome epetaneleka
poaneleka tikilepa nami wia enatekoyano.
8
Panagome-kiti one poane wene witako toane ele
kule poanele toada wa wene pia tokopa nipa pinali one wa wia atukademe toko. Wa
panagome-kiti Epetane Yomininele takama yakolopa Epetane Yominiyo topo takoa mea
kama pomotoa toko.
9
Nitikono, ete pia oto pia yete pade ali atoa auapekala tamene.
Koome tukene waku wa tewitikoa wawamokolipa nipa Akolaliyo nami wiateka oi ponokale
tone moatekoya meoo.
10
Nitatekoyano, eko ali atoa-pala padele epetanele tamele toka-pete-
kama peya-pala epetanele tato wane uku. Nipa Keraisuke wene tugoa meki ali atoa takoa
padele padele epetanele wedoa tato wane uku-ye.
Poloyo Pubu Oa Lionate Oa Tanemo
11
I pipiapa i i wane oane mema mema tuku toa panagome wia mekakoyake opi
wipitikene noanu yoname wiane mekaku. E e nimini, uoya eni wia mekaneyano, Poloyo wia
mekaneya tadeko wa wene tomotoane tekene tukuno, enamene.
12
Kiwi pa yene kini ali yatene kepene teigamotono tamene wa tika tika tikilepa wini Yu
yenamepa lede eko Yu ali-kitame kiwi kei pimotoa tekete tiki. Nika eko Yu yename Keraisu
yomo lekaneyake tuanele ya tanele tetepo takoa mekete kiwi tete metekaya wa piti motekete
tiki.
13
Wini Yu yenepa kini kepene teiganeya mekete Mosesene totono litia
tootapeamikiyake pa yene kini ali yatene kepene teigamotono tamene wa tika tika tekete tiki.
Mone pa yename Yu yatenane totono litia tiki wa mate agale oadete ni tekete tiki.
14
Noanume anu tukuleke mate agale wamekene Ali Muno Keraisu Yesu yomo lekaneyake
tuaneleke-kama ou. Yomo lekaneyake eni tukilepa nipa itono-pala noota yomo lekaneyake
one-pala odeneka dekoa witane tetepo takoa tuaneya. Nitaneyano, ele kule itonoleme no wa
moa koigamele toamoko.
15
Opi Akolaliyo totopa poanele toamene yene tetepo takakilepa
tokoo kepene teiganeyaka teigameneyaka takoa enamokome toko. Totopa weneya yene
latitapeneya tokome ni toko.
16
Kipala ina okounakale litia tiki-kitipa Akolali neme ela moa
tepe kolotini kilikoa pikoa tamene wane kini kowitikakilepa Akolaline ali atoa peyane
kikilikoane kowitikoane uku-ye.
17
Opi eya wane wipitikene uku. Pade-kitame no wikala taneyake anu tigini ipu taneya
mekuno, Yesuno adeka pia tetane tetepo taneya mekuno, padameka no wa tete memotoane
wamuku.
18
Anu oya-lawe Galesia take meki-kitipa Ali Muno Yesu Keraisu kipala opia
yakome kini yomini pewe wia kamotoane kowitikakene uku-ye.
E e nimini.
Opa anu agale eni.
Galesia Galesia
<<
66
>>
Iberu
00
11
22
33
44
55
66
77
88
99
10 10
11 11
12 12
13 13
Iberu Iberu
<<
00
>>
^
Iberu
Akolaline Mana Etenane Peku Noa Tanemo
Mana Agome Edelo Ali Peya Moa Patukako
Akolaliyo Toto Toa Motikilepa
Padele Tubele Tokome Tanemo
Toto Toa Motane Agoke Akenemo
Yesuyo Ali Atoa Toa Motikilepa
Moseseyo Tane Toa Moa Patukakome Tanemo
Ko Memotoa Yametane Take Poatekomo
Akolaline Ali Atoa Ko Meatikimo
Keraisuyopa Ako Odene Mekome
Akolaline Wene Kekakanemo
Yesunole Takama Peketepa
Pegene Kakoa Tewitikoa Wawameamene
Akolaliyo Oa Pianele Etene Taatekoa Too
Akolalike Lodo Yotane Ago Melekisedeke
Melekesideke Keneya Ago Keraisuyo
Akolaline Wene Kekakakome Tanemo
Ako Odene Mekome Lodo Yotokako Ago
Tou Toa Yesuyo Akolaline Wene Kekakako
Meme Kai Tabeme Wikakane Yapu Keneke
Akolalike Lodo Yoa Kowitanemo
Tone Wenele Toateko Totono Yametanemo
Papete Akolalike Lodo Yoma Neketeke
One Wene Kekatapeamele Toamenemo
Akolalike Tegetekoa Meatekomo
Poapeneya Kamene
Namolo Ibini Akene Ali Atoa
Akolalike Wene Tugoa Meanemo
Ebele Inoketa Noa Toa Akolalike
Wene Tugoa Meanemo
Eberame Akolalike Wene Tugoa Meanemo
Aisake Yekobeta Yosepe Toa
Mosese Akolalike Wene Tugoa Meanemo
Ete Yene Akolalike Wene Tugoa Mekete Tanemo
Toneketai Akolaliyo Toto Mane Oa Motoko
Mane Mane Oa Pubu Oa Tanemo
Akolaline Wene Epetekakete Toatekomo
Wipitikome Akenemo
Iberu Iberu
<<
00
>>
Iberu Iberu
<<
11
>>
IBERU
Iberu Yeneke Wia Wetekane Pipia
1
Akolaline Mana Etenane Peku Noa Tanemo
1
Namolo papete Akolaliyo tone kaua-mikitame one agale yakamotoapa one agale
to awea akane ali-kiti i i wa akamene wa ele kule toa wene takama-kala nekeneya.
2
Nitaneyake wipitikome manago i i wa akapoano pa wa wetekakale itonoke nokome
etenanemo-kama i i wa toto yatene-pala to awea akaneya. Etenane peku nootokoa tibu
itonota latia piane agome nitaneya. Tibu itonota ludu pia kawa tokoya peyapa nekeno,
yopikoa-kala kamene wa etename moa kakane ago kekutu.
3
Einagome Akolali pa
tootapeneya mekome lawetane peku noa tagatapeneya. Nitane ago tokome Akolali kako toa
kotuke-kama kako. Tibu itonota ludu padeya padeya peya pia kawa tomotoapa one tele
tane agaleme-kama yopia meko. Nitiko agopa ali atoa tone poanele tokooke tuumotokome
a tibuke wa ate wakapea pome ako odene meko ago Akolaline nimini yono lono witipitoa
meaneya.
Mana Agome Edelo Ali Peya Moa Patukako
4
Akolaliyo one edelo ali peya keku kakoa einagopa ako ago kakoa taneya. Nipa
einagopa one mana wa ibini oapa one agale aua yaki yatene keku ibini oa edelo yatene wa
ibini oa taneya.
5
Nitikome okome
i ago nepa anu manago. Opi nopa neketai i kakene uku wa akeneya.
Nimopa edelo ago odene-palaka wamokomeke mana Keraisu-pala akeneya. Ni Akolaliyo
one edelo ago odenekeka eya wa wameneya.
Nopa i agono etene kawadene tuku. I agopa anu manago kawademe toko.
Nimopa edelo ali-kitike wa wamokomeke Yesuke akeneya.
6
Nika one mana namolo ago
itonoke moa wetekademe kakome eya wa akeneya.
No Akolali anu edelo ali peya i agoke lukoa mea neuwe tukua meoi wa akeneya.
7
Wa Akolaliyo one edelo ali-kitike ikilepa eya wa akeneya.
No Akolaliyo anu edelo ali-kitipa anu agale oa aua yamotoane tekene pupulege keneya
latiane ni anukule takama yamotoane tekene toe itipono keneya latiane tuku
wa one pupu yene moa kakaneya.
8
Nitaneyake one manago moa kakakomepa eya wa akeneya.
I ago nepa Akolali. Tibu itonota ludu pia kawa tokoya peyapa neme talo toa-kala kama
poko. Nitoa talo toa mekilepa ki yoke-kama talo toa meko.
9
Nitoa epetaneleke-
kama wene piitikaneya meapa poanele-kiti peya kote tokolo kotimi yoa meko.
Nitoa mekokepa no neketai Akolaliyo ne takoane motekene eya tokouna. Neke
oya yene keku kamotoane ne ako moane kakakilepa ne wedoane wedikoane
tokouna wa akeneya.
10
Eya waka akeneya.
Namolo namolo tititikake ne Ali Munoyo itono latia pia neke yoname tibu latia tokana.
11
Tibu itonota takoa pootapekaleka nepa pa mea kama poo. Tibu itonotapa
mamina kego noma pou toa keneya wetini toma pokaleka neme eya too.
12
Tokoo kakene mamina kotokoa tukua piitikoa weneya mamina moa kawou toa
tibu itonota wawa weneya latia pioo. Nitatekoyake nepa papete mekana toa
pa mea kama pekepa wetini toma poamoo wa Akolaliyo mana Yesu-pala
akeneya.
13
Akolaliyo mana-pala eya waka akeneya.
Nepala poi te ia meki-kiti kawikama pone neke kawane moane pitikoai tou. Nitouno, anu
nimini yono lono noke nepia menamene wa Akolaliyo Yesu-pala akeneya.
Nitaneyake one edelo ali odene-palaka edikoa akeneya mena.
14
Nipa edelo yatenepa edane yatene patu. Eni yatename Akolalinele takama piki. Enipa
Akolaliyo one toa moateko-kiti toto auapeatino poe wa wetekakolo auapenokala tiki. Nipa
tone leneme enamoko yenameke tibu mea note auapenokala tiki.
Iberu Iberu
<<
11
>>
Iberu Iberu
<<
22
>>
2
Akolaliyo Toto Toa Motikilepa
Padele Tubele Tokome Tanemo
1
Keraisu einagopa edikane agono, eya tato wane uku. Toto etepea pokaya tokolo tone
yakoa motokoonakale wedoa toa pikoa meato.
2
Papetepa edelo ali-kitane agale tetekane
yene peya Akolaliyo kibu mokala taneya. Nipa einagale litia tootapeamedikiyake padele
katekoa toameadiki wa kibu mokala taneya.
3
Opa mana agome tubele tokome ali atoa toa
motanemodo totome yakamadete wakolopa Akolaliyo wedoa kibu moo. Kibu
moamomotoa tekete manika petoa pomotoa-pe. Ali atoa toa moatekamopa Ali Muno ago
oneme titia to awea akeneya. One eni okale yakane yenamepa einapa nimini eni akedeko wa
toto-pala oa mekala tokoi.
4
Onekemo eni oa aua yakoika Akolaliyo ali atoane wene kainya
pikanele ele kule tubele witakakala toka. Nipa ekee, Akolaline tele patu kautakoa kakete
ikino, nimini eni akediki wa totome yakoa momotoa toka. Nitimotou wa Akolaliyo eyaka
toka. Ele kule toatekoo peku tutu tutu wa lawetekamotoa one Epetane Yomini totoke moa
wetekaka. Nipa one wene litikome toka.
Toto Toa Motane Agoke Akenemo
5
Akolaliyo weneya itono latiateka wene toopia mekomepa edelo ali-kiti kime
yopiamene wa yamepianeya mena. Ali atoame yopiatekoi wene toopianeya.
6
Nikepa
Depidiyo Akolali-pala eya wa akeneya.
Ae, toto pa keku mekono, edeyake neme wene taneya meko-pe. Totopa pa ali atoano,
dekolo mama moa meko-pe.
7
Neme ali yatene latikilepa pa nateyame edelo
ali yatene ako kakoapa ali yatene keku keneya kakoa toka. Nitoake pa teleta
tootapeneya meku toa meamene wa ali yatene kei wedoa pika.
8
Nitoapa
padeya padeya peya yopia kamene wa neme ali yatene yamepika wa Depidiyo
Akolali-pala akeneya.
Padeya padeya peya yopia kamene wa yamepianeyake ikilepa odeneyaka katekameneya
peya kikilikoa yamepianeya wa okome akeneya. Peya yamepianeyake opa ali yatename
padeya padeya peya wete yopikoa kawameadiki.
9
Ali yatename padeya padeya peya wete
yopiamikiyake Yesu taatekoa nome yopia-kala kako. Pa nateyame edelo ali-kiti ako kamotoa
Yesu einago ali latia itonoke nekeneya. Enipa Akolaliyo ali atoa pewe wiateka wene toopiane
toa taatekoa tokome ali atoa toto peyake tuaneya. Nitikale tokome Akolaliyopa one a tibuke
pa teleta tootapeneya meku toa ne meamene wa one kei pia kakeneya.
10
Padeya padeya
peya latitikoa yopia-kala meko ago Akolaliyo one mana kono-mikiti peya mati one pa
tootapeneya mekuta nomotou wa eya taneya. Nitou wa oa pikana toa taatekakomepa mana
Yesuyo tete moa kamotoa itonoke moa wetekamedekale moa wetekaneya. Nipa toto toa
moateka ka patekane agome poanele padeleka toameneya mekome onekele takoa togateka
kotu kakoa tomotoa nitaneya.
11
I ali atoapa Akolaline takoane motekene tuku wa tone poanele kogatapea tuane
agoka eni ali atoa totoka Akolaliyo odene yatene ali atoa tetepo takoa meko. Nitikono,
Yesuyo totopa onekameyo wa amene ya motokoya mena. Ni edoa-mo.
12
Yesu einagome
etene Akolali-pala eya wa akeneya.
Atai Akolali ne ko ikilepa anukameyo-pala ou. Ne kowitadete koukoa mekoi peyane lene
yoto kakene ne kei piane kawou wa akeneya.
13
Eya waka akeneya. Akolalike-kama wene tugoane meou wa akeneya. Nimo ootokoa
kakome okome Akolaliyo no yametekana mati-kiti-pala i opiane kakene uku wa Yesuyo
akeneya.
14
Akolaline mati-kiti wa akene yene totopa tone kaua-mikitike tama noko toa Yesu
einagoka tono melepu kakeneya nikilepa ali atoa tukina toane oneka tuou wa nekeneya. Nipa
ali atoa tuatiki peku laweteko ago Setanu moa kawikademe eni nome tuaneya.
15
Nipa ali
atoa toto tukaya wa piti motaneya-kama meko take eni nikilepa piti takoa wawano, atiki toa
poe wa toa moademe nekeneya.
16
Nitane agome edelo ali-kiti auapekoya mena. Eberameke
tagene ali atoa toto auapekoya.
17
Nitadene kei ali-kitane yagono ago latitapeneya
meamedeku wa tono melepu kakeneya nikilepa eya toademe nekeneya. Ali latitapeneya
mekomepa ako odene mekome lodo yotokako ago tou toa ali atoa ela mati motokome
Akolalinele wedoa takademe nekeneya. Nipa Akolaliyo ali atoa tone tokoo poaneleke po
letu mekakana keemu toa wene keaneya memotoa tokome totoke tuademe nekeneya.
18
Itonoke eni nome mekale Setanuyo likoa enoai tokale ke enekakale meaneya. Nitaneyake
Setanuyo likoa eneko-kitipa oneme wene toa auapeko.
Iberu Iberu
<<
22
>>
Iberu Iberu
<<
33
>>
3
Yesuyo Ali Atoa Toa Motikilepa
Moseseyo Tane Toa Moa Patukakome Tanemo
1
Nikepa anu oya-lawe no tukuna toa Keraisunole takama yaki-kiti kipala eya wane uku.
Akolaliyo kipa one tibuke noatino noe wa kayo akene-kiti Yesuke-kama wene piitikaneya
meamene. Ako odene mekome lodo yotokako agome tou toa one wene kekamotoa teke
onekemo akapoano pa wa Akolaliyo moa wetekane agoke uku.
2
Yesu einagomepa one
moa kakakanakagome tamene wa okana toa-kama tokala taneya. Nipa papete Moseseyo
Akolaline yapu yopikou toa Iserele yatene yopikome toateka toa toa togatapeane toa
taneya.
3
Nitaneyake Akolaliyo einagota kei pikilepa Mosese keku ago tetepo takoa Yesu
etene ako ago tetepo takoa toko. Nipa yapu-kiti epetaneya kakale eneketepa i yapupa
epetaneya wa totome kei piketeke yapu wiko ago kei wedoa piko toa toko.
4
Yapu pade
wianeya kakale eneketepa panago i agome wianeya wa oko. Eya kuya pia kawa tokoya
peyapa Akolaliyo-kama latianeya.
5
Moseseyo Iserele yenepa Akolaline yapu tetepo takoa
mekome pa pupu agome tou toa one eni yapulu yenanele wedoa takoa meaneya. Nipa
Akolaliyo naniko oatekamo Mosese einagome i i wa papete to awea akaneya.
6
Keraisu
taatekoa nokome Akolaline yene talo toa meaneya. Nipa yapu pinagono mana tokome
etename okana toa-kama tootapeneya. Nitane agome wipitikome pewe witikale nepia meato
wa onekele atiki toa takoa togaketepa one yapulu yene too.
Ko Memotoa Yametane Take Poatekomo
7
Kipala ina ukulekepa Epetane Yominiyo papete oa piane toa litia tamene. Eya wa oa
pianeya.
Opi Akolaline agale yateketepa
8
kolotini lupi tootokaneya meameamene. Papete kini
kaua-mikiti ali piamene ta ludu yaketepa no Akolaliyo tokale enato wa anu
agale yakamene kote tokale wakala tokoi, kime pade nitameamene.
9
Kini
kaua-mikitame edikoa no toa enekala tikilepa mali padeka noi kakoa (40)
ponoka toane ele kule telekole tokoule eneketeke tokoi.
10
Nitikoli eina yene-
pala wene poaneya mekene ekene i yenepa kini wene piki toa litia etepea-kama
yaki. Nipa anu wene pikule litia toamiki wane okou.
11
Nitoane kotimi yotekene
ekene kiwi ko meamene wane yametekouna take nomotoane wamuku wane
okou wa Epetane Yominiyopa Akolaliyo okamo yakoa akeneya.
12
Anu oya-lawe kini tepene Akolaline agale yakamatiki poane wene witakomepa
meemoa poko Akolali tewitikoa etepea pokayano, wedoa meamene-ye.
13
Nipa ele kule
poanele tekete kini wa oa yotokoa kolotini lupi takakaya tokale ta pataka abuna ete oto wa
auapea mane oa moma pamene. Naniko mena. Akolaliyo ipete wa metane oi taatekako-
mene nitamene.
14
Keraisuke pegetoa wene tugoa mekoona toa wedoa wene tugoa mea
togaketepa nipa Keraisuno yapulu yene too.
15
Akolaliyo akene toane ina wiane
mekakumopa lokoane ukuno, yakamene.
Opi no Akolali anu agale yateketepa kolotini lupi tootokaneya meameamene. Papete kini
kaua-mikiti ali piamene ta ludu yaketepa no Akolaliyo tokale enato wa anu
agale yakamene kote tokale wakala tokoi. Kime pade nitameamene.
16
Akolaline agale yakatekoapa litia tamene kote tokale wakilepa mani yename taneya-
pe. Moseseyo Idipi ta tewitikoa pato wa aua pekene yene peyame nitaneya.
17
Akolaliyopa
mali padeka noi kakoa (40) ponoka toa kotimi yoa mekilepa mani yatene-pala kotimi yoa
meaneya-pe. Ali piamene ta ludu ele kule poanele toma yakene yene-pala kotimi yoa
meaneya. Eni yenepa eni ta ludu yawa tukolokaneya.
18
Ni Akolaliyo i yenepa kiwi ko
meamene wane yametekouna take nomotoane wamuku wa yono timini mukitinike pitikou
toa ikilepa mani yeneke akeneya-pe. One agale tagoa toamene yeneke akeneya.
19
Nimo
akeneyake totome eya wa wene toko. Eina Iserele yename Akolaline agale yakamadete
wakete tekete eina yametekana ta lobutua pamele toameneya.
Iberu Iberu
<<
33
>>
Iberu Iberu
<<
44
>>
4
Akolaline Ali Atoa Ko Meatikimo
1
Akolaliyopa kini ko mepatiki taapa i wa yamepianeya. Kiwi ko meatiki wene wia
wawamokono, kiwi pade pata paka pokaya wa piti motaneya meamene.
2
Eina epetane ko
totome yatekilepa tone kaua-mikitame papete yakanemo eni yatekoo. Eina yename
yateketeke Akolalike wene tugamekete tekete pata pale toa yakaneya.
3
Nitaneyake
Akolalinemo yakatekoa oneke wene tugakoo-kiti totopa one ko mekota oyake lobutua
pamele toko. Nitamele tokoyake oneke wene tugamene-kitike Akolaliyo eya wa oa ka
ketekaneya.
Yono timini mukitinike pitikou toane eya wane kotimi yoane meane tukakou. I yene kipa
no ko mekouta etene lobutua nikileka toamoi wa akeneya.
Tibu itonota latia mea peya takane-pete laigoa one ko meemoa nokomeke akeneya.
4
Akolaliyo tatono (7) takoa ta patakale tanemoke one bokuke panagome eya wa wia
mekaneya. Tatono (7) takoa ta pataka-pete Akolaliyo one pupu toa peya takatekoa ko
meaneya wa wia mekaneya.
5
Akolaliyo tone kaua-mikitike akene toa eya waka wia
mekaneya piko. No ko-kama mekouta nikileka toamoi wa wia mekaneya.
6
Ali atoa padeka-kiti eida pote mepatekoiyake onekemo namolo yakane-kitame
yakamadete wakete tekete pote mepameneya.
7
Nitaneyake nani mati Akolaliyo ali atoa
padeka-kiti eida ko mepatekoi oipa ipete wa pade oi metekome akeneya. Nipa Depidi-pala
okome okome ipeteka no Akolaline agale yateketepa kini kolotini lupi tootokaneya
meameamene wa akeneya.
8
Namolo namolo eya ago Yosuayo Iserele yene ko meatekoi take aua poo tokapa nipa
Akolaliyo Iserele yene kini ko meatekoi-petepa ipete wa oi pade naniko meamoo toka.
9
Eina oi taatekoa noka-pete one yene toto Akolali-pala ko meamele too. Nipa Akolali
tatono (7) takoa ta pataka-pete laigoa ko meemoa nekene toa nitamele too.
10
Akolali ko
mekata poka agomepa nipa one pupu tewitikoa wawa poo. Nipa Akolaliyo papete one
pupu toa peya takatekoa ko mea-kala kako toa nitoo.
11
Tone kaua-mikitame Akolaline agale
yakamadete wakete etepea pekene toa toto padeka-kiti pata paka etepea pokayano, eida ko
meemoa pouketepa wili-kama tokoa katoane uku.
12
Akolaline agalemepa yomini meaneya tou toa ele kule telekole tokala toko. Nipa eka
okata olo kakene tueme-kiti tono puou toa aline wene yominita oyake moa leteamele toko.
Ele kule toada wa tone wene pikole-pala tetoa enetapeamele toko. Nipa peyane tepene piko
wene i i wa keleyo yameamele toko.
13
Akolaliyo latikanakeya odeneyaka oneme enekaya
kekoa potipiamele toamokolo uku. Einago tone koiso pitia yakateko agomepa padeya
padeya peya keleyo-kama enetapeko.
Keraisuyopa Ako Odene Mekome
Akolaline Wene Kekakanemo
14
Ako odene mekome Akolalike lodo yotokako ago tou toa ibini akene ago Akolaline
mana Yesuyo tone kowitikademe a tibu patukatapea etene mekota pome mepaneyano, Yesu
einagoke wene tugoane meku wa pegetoa to awea oa wene tugoa mekoona toa oneke wedoa
wene tugoa meemoa patoane uku.
15
Ako odene mekome Akolalike lodo yotokou toa
kowitikako agomepa i ali atoapa taba ali atoano, waye wa Akolaliyo yakakoa tone
kowitikakala toko. Nipa Setanuyo ali atoa toto likoa eneko toa oneka likoa enaneya tokome
toto mama moa kowitikakala toko. Nipa likoa enoai tokaleka poanele padeleka toamene
agome toko.
16
Nitikono, ali atoa pewe-kama witikago Akolali one mekoya liti pote
kapamele toko wa one leneke atiki toa kakete kowitatoane uku. Ke enekakale mekoo-pete-
kama toto ela motokome auapeoono, nitatoane uku.
Iberu Iberu
<<
44
>>
Iberu Iberu
<<
55
>>
5
1
Ako odene mekome Akolalike lodo yotokamotoa takoa motane ali-kitike uku. Dikako
ago tukale one luku panago moa kakakilepa Akolaliyo ete ali-kiti takoa wawa odene ago
takoa moa kakako. One yatene ali atoame tokoi poaneleke padeya-kiti mea lodo yoa
kowitikamotoa ni toko.
2
Einagomepa wene toamene ali atoa etepea pote poanele tokoike
lodo yotokakilepa ae kime tiki toane onemeka poanele tuku wa eni yene mama moa toko.
3
Nipa Akolalike lodo eni yotokakilepa oneka poane ago tokome pinali one poanele tokake
lodo yokala too.
4
Nipa one weneme ako ago mekene tou wa tokoya mena. Akolaliyo takoa
moa kakane ago tokome ni toko. Nipa papete Akolaliyo eya ago Erone takoa moa kakakale
mekome tane toa toko.
5
Keraisuyoka ako odene mekene enakale tou wa taneya mena. Nitaneyake Akolaliyo
one-pala eya wa akeneya.
I ago nepa anu manago. Opi nopa neketai latiane meku wa Akolaliyo mana-pala akene
toa panagome one bokuke wia mekaneya.
6
One boku padeke Akolaliyo mana-pala eya waka akene toa padame wia mekaneya.
Anu wene kekakadepa lodo you toa teke ali atoane kowitikama poo. Eya ago
Melekisedekeyo papete tokana toa nemeka too wa Akolaliyo akeneya.
7
Yesu tono melepu eya kakeneya itonoke nome mekome Akolali kowitikilepa komo
ka ta oa kakome taneya. Nipa one tukale moa kamotokatekago kowitaneya. Nitoa yoti
mitikatekoa mekome kowitikale tokome Akolaliyo yakoa taneya.
8
Keraisu einagopa
Akolaline mana kakilepa taneyake etename oka toa-kama wene toa litia tootapeademepa ele
kuleme ke enekakale mekome poti utanele-kama toomoa pekeneya.
9
Nitoapa etenane wene
pika toa kotuke kakoa tootapeneya tokome one agale yakoa tiki peyapa one patu kautakoa
kakete mea kama pamele toko wa toa motoko.
10
Nitikago-pala Akolaliyo okome one wene
kekadepa lodo you toa ako odene meke ali atoane kowitikama poo. Melekisedekeyo papete
tokana toa nemeka too wa Akolaliyo mana-pala akeneya.
Yesunole Takama Peketepa
Pegene Kakoa Tewitikoa Wawameamene
11
Kipala ina ukuna i i wane oane togatekuyake kini yakatiki toane pine ina ina wane
amele toamokolo waku. Kipa tugi ootapeneya mekili tekene ni uku.
12
Kipa Yesuke wene
tugakilepa wete mati titia tokoina. Nitikoina tekete eko ali atoa oyake olaukamedikiyake
Akolalinemo pegetoa olaukanemo wene kayapeaneya mekino, panagome kiwi wa
olaukamedeko. Ae, nana matiyame keneya ipe kakoya nee eya noameneya adu-kama nou
toa Akolaline agale wedoa yakameneya meki.
13
Panagome-kiti adu-kamado nakomepa nipa
nana matiyame tokole eni toko. Einagome ali atoa wene kiyo akeneya mekete toatekoile
olaukanemo wene toamoko.
14
Wa panagome-kiti Keraisunomo yakoa motokomepa nipa
ipe kakoya nee nako agome tokole eni toko. Nipa Akolaline agale pine piko toa pitia
enekala tokoya tokome epetaneleka poaneleka wene toa tetoa eneko.
Iberu Iberu
<<
55
>>
Iberu Iberu
<<
66
>>
6
1
Keraisunomo nana mati olaukou toa pegetoa olaukanemo-kiti totome adekoa
yatekoo. Eya wa olaukanemoke uku. Tone namolo pale tokoonakale tewitikoa wawa
Akolalike wene tugoa meatekoomo
2
ni ue moatekoomo ni tobou waneke yono pia
kowitatekoomo ni Akolaliyo tuane ali atoa moa kamotokatekamo ni poanele toma pokoi
yene poane take mea kama poe wa Akolaliyo koiso akatekamo enika enimopa totome
adekoa yatekoono,
3
Akolaliyo ka yametekalepa Keraisunomo emo kumo peya yakoa
moateko toa yakoa moato.
4
Keraisunomo yakoa mootokoa onekele takoake wakoi yenepa kini poane wene wia
wawe wa panagome edoa wa mane mane omotoa-pe. Pegetoapa eni yene pa takalogou toa
Akolaliyo pewe witikome one peku noa toatino toe wa lawetekale Epetane Yomini awia
nome menaneya.
5
Nitane yename meke tane nee nou toa Akolaline epetane agale yakoa ni
one weneya tibu itonota talo tokome telekole toatekale nami enoa taneya.
6
Nitaneyake kote
tokolo wawa etepea peketepa nipa Akolaline manapa yomo lekaneyake wa lokoa wia dekou
toa tekete tiki. Nipa ali atoane leneke wa tegene matou toa tekete tiki. Padameka eni yenane
poane wene wia wawatiki ka i wa lokoa yameamele toamoko.
7
Itono pikoka-kiti ta pitakala tokolo ko akaneya pikolo tokome pinagono noa meateko
nee wedoa witako. Nitikoka Akolaliyo pewe wia yopiko. Enipa Akolaline ali atoa totoke
uku.
8
Wa pade itono pikoka tonipo paya ke eya witakopa nipa tonipo pitaneya tokome
Akolaliyo pewe wiamokome poanemo oa wako. Nitoa wipitikome toeme nomotoa
wawademe toko.
9
Anu kolotini yene kiwi edikoane pubu oane pedoane agale ukuyake kipa tonipo
pitane itono keneya wane wamuku. Akolaliyo kiwi pewe wia togakomepa toa moademe
tokono wene tekene ni uku.
10
Akolaliyo kini tikile pitia enekilepa kiyoke-kama toko.
Nitikono, kini wini epetekoa toma yakile oneme wene kayapeamoo. Oneke wene mekoa
mekete tekete one wa takoa motane yene auapekoina toa wida pa auapekete tikino,
Akolaliyo wene kayapeamoo.
11
Kini papete epetekoa toma yakoinakale kiwi peyame wedoa
toa togamene wane uku. Nipa Akolaliyo kiwi pewe witikome auapeoo wa one eni tokale
kime nepia mea enemotoane ni uku.
12
Onekele kote au keneya moa takameamene wane
uku. Kiwi yatene auapekene dikou wa Akolaliyo papete oa togotokana toa taatekoa tokale
nepia mea enemotoane ni uku. Nipa one wipitikome meatekoya-kiti moato wa oneke wene
tugoa mekete poti nepia mea togaki-kitame tikile kotukoa toma pamene.
Akolaliyo Oa Pianele Etene Taatekoa Too
13
Akolaliyo ne auapekene ile tou wa Eberame-pala oa pikilepa one eni agale tele
takakome pinali one ibini wedekakome akeneya. One moa patukoa ako kako agoka
kawamokale tokome pinali one ibini wedekakome nitaneya.
14
Nipa ne pewe wiane kakilepa
neeke ali atoa peya mati ta ma pomotoane tekene tou wa oa togotaneya.
15
Nitikale
Eberameyo e e nimini oko wa poti nepia mea kakakoa Akolaliyo tou wa one-pala okana toa
taatekoa taneya.
16
Panagome-kiti ile tou wa one agale tele takakome ikilepa one moa
patukoa ako meko agono ibini wedekoa okala toko. Koisoke-kiti kakome i i wa ako ago
padane ibini wedekakome okalepa ete-kitame e e nimini oko wa one okomo yakoa motiki.
17
Akolaliyoka kiwi auapekene ile tou wa one yatene-pala ikilepa one ibini wedekakome
akeneya. Nipa one eni toateka wene wia wawamoo wa wene tomotoa nitaneya.
18
One eni
toatekale toto poome toameneya nepia memotoa tokome Akolaliyo takutale eni taneya. Ile
tou wa one kabunume oa pia ni pinali one ibini wedekoa oa taneya. Nileta tanelepa kapene
wakamele toamokolo tokome one wene wia wawamademe toko wa oneke poti lukoa
meadete to a pokoo-kiti totome amele toko.
19
Nitoa Akolaliyo wipitikome toatekale
wedianeya nepia mekilepa ue dipi-kiti mabo kakeneya waname uele lauaneya piou toa
poapeneya nepia meko. Nipa tone yomini meaneya etepea poamomotoa tokome Keraisuyo
eya taneya. Tobou losu yapu keneke Akolali meko lono wa ibini akene yapu luku olege tane
mamina patetoa pome kawou toa a tibuke pome meko.
20
Nitoapa toto naniko nomotoa
Yesu eni namolo takoa pome mekome tone kowitikako. Nipa ako odene mekome Akolalike
lodo yotokoai tane ago Melekisedeke einagome papete tane toa tone kowitikoa-kala kama
poko.
Iberu Iberu
<<
66
>>
Iberu Iberu
<<
77
>>
7
Akolalike Lodo Yotane Ago Melekisedeke
1
Melekisedeke einagopa namolo namolo Saleme ta tobou ago mekome ako odene
meko Akolalike lodo yotokoai taneya. Nitane agome eya taneya. Eberameyo one-pala poi
te iane tobou ali-kiti litimoa pome wia atukamotokome wakapea nokale kotupokome
Akolaliyo ne mea epetekamotoane uku wa makutukoa motaneya.
2
Nitikale Eberameyo eni
tobou ali-kitaneke wia motokanakeya-kiti moke tikilepa lu takutake odeneme pakitikoa-kala
(9) one pikome odene ipa neke wa Melekisedekene pikakala taneya. Tone agalekepa tobou
ago Melekisedeke wapa kiyoke-kama yopia epetekako ago wa ekete oa ni Saleme tobou
ago wapa ali atoane tepe kolotini kilikoa pikoa yopiko ago wa ekete oa too.
3
Einagopa one
etene ninetapa i ago i atoa wa padameka wene toamoa ni one kaua-mikiti i i wa wene
toamoa tiki. Ni one opiane-petepa ipete wa padameka wene toamoa ni one tukilepa ipete
taneya wa wene toamoa tiki. Ni agopa Akolaline mana keneya mekomepa ali atoame
Akolaline totono tetekaneleke oneke lodo yoa wene kekakoa-kala kama poko.
4
Melekisedeke einagopa nitane ago-yo. Toto Yu yatene tagaane ago Eberameyoka poi
keneke tobou ali-kitaneke wia motokanakeya-kiti moke toapa lu takutake odeneme
pakitikoa-kala (9) one pikome odene ipa neke wa Melekisedekene pikakala taneya. Nipa
einagopa etene ibini akene ago tetepo takoa nitaneya.
5
Nititikaneyake Moseseyo one totono
yametekome tamene wa akene toa tekete Akolalike lodo yotokamotoa moa kakane Lipai
yatene ali-kitame eya tiki. Malikeka ete Yu yatene-kitame kini kamoya eya moke toapa lu
takutake odeneme pakitikoa-kala (9) kini wa pikete odene katekamoa Lipai ti kinino moati
wa pikakala tomotoa tiki. Ete yatene-kitika odene ago Eberameke ta ma nekeneyake tiki.
6
Papete Melekisedeke einagopa Lipaike tagene ago menake Eberameyo einakeya-kiti lu
takutake odeneme pakitikoa-kala (9) one pikome odene katekamoa Melekisedekene
pikakala taneya. Akolaliyo ne auapekene dikou wa oa togotokale yakane ago Eberameneke
Melekisedekeyo einakeya motaneya. Nitane agomepa Akolaliyo ne pewe wimotoane uku wa
Eberame makutukoa motaneya.
7
Akolaliyo ne pewe wimotoane uku wa panagome-kiti
ikilepa nipa ako agome keku ago-pala okoya. Nipa Melekisedeke einagopa etene ibini akene
ago wane ekene uku.
8
Opika Lipai time ete Yu yatene-kitaneke kinikiya-kiti pade edikoa
motikilepa nipa tuatiki ali-kitame tiki. Papete Melekisedekeyo Eberameneke padeya-kiti
motikilepa nipa Akolaline bokuke wia mekane toapa tuamateka agome tou toa taneya.
9
Nitaneyano, totome eya wa amele toko. Lipai time ete Yu yatene-kitaneke kinikiya-kiti pade
edikoa moatekoiyake papete Eberameyo onekeya-kiti pade Melekesideke ipa neke wa kei
pikome metekilepa oneke ta wateka ago Lipai-pala odeneka dekoa kei pikome meou toa
metaneya.
10
Lipai einago one kaua ago Eberamene tepene meane tetepo taneya mekakoa
Melekisedekeyo Eberame kotupaneyake ni uku.
11
Akolaliyo one totonopa Lipai time-kama pikoa kamotou wa Lipaine mana Erone
namolo takoa moa kakaneya. Eni totono litia toatekoi adekake kakoa litia tomotoa Lipai
timedo ete Iserele yatene oyake olaukamele too tokapa nipa Akolaliyo Eroneke tama nekene
ali-kiti luku weneya ago Melekisedekene yagono ago moa kakamele toamoo toka.
12
Nitamele toamoo tokake Akolaliyo eni totono pikoa kakene yatene wawou wa weneya ali
moa kakakomepa kini pikoa kakene totonoka wakome weneya totono yameamele taneya.
13-14
Weneya alipa Yesu Keraisuke uku. Ni ago tagilepa Lipaike taneya mena. Onepa
Yekobene mana pade Yudake tageneya. Papete Yuda-loeke tagene ali-kiti padameka Yu
yename poanele tokoike Akolalike lodo yotokameneya. Moseseyoka Akolalike lodo
yotokateka yatene i wa takoa ikilepa Yuda yatene wameneya. Yuda yatene takoa
wameneyake Yuda-loeke tagene ago Yesu Lipai time tanele toademe nekeneya.
Melekesideke Keneya Ago Keraisuyo
Akolaline Wene Kekakakome Tanemo
15
Kipala ina okouna pine to aweane ouno, yakamene. Akolalike lodo yotokou toa one
wene kekakane ago pade Melekisedekene yagono ago taatekoa nekeneya tadeko.
16
Lipai
yatene ali-kitame Akolalike lodo yoa one wene kekakakilepa nipa kaua ago Lipaike tageneya
tekete tiki. Kiwi luku Akolaliyo pade ago moa kakakilepa einago etene telekole toa mea
kama poko ago tokale ni taneya.
17
Nitatekalekepa Akolaliyo akene toa panagome wia
mekakome okome lodo yotokago tou toa anu wene kekakakilepa pa mea kama peke too.
Nipa Melekisedekeyo toka toa nemeka too wa wia mekapianeya.
18
Namolo totono
Akolaliyo edikoa katekoa wakilepa ali atoa toto auapeamele toamene totono tokale ni
taneya.
19
Eni totonomepa odene agono weneka oyake moa kiyo akatapeamele toameneya.
Nitamele toameneyake Akolaliyo one mekuta noatiki ka pade epetane ka ino, noatino noe
wa toto yametaneya. Nitaneyake Yesu pitia poadete wedia meko.
20-21
Lodo yotokakago tou toa one wene kekakoa ka patekoa yopimotoa moa
kakakilepa Akolaliyo Yesu-pala eya wa oa lutua moa kakaneya.
No Ali Muno agomepa neke toateko wene toopikumo luutukoane ukuno, yakamene. I ago
nepa lodo yotokakago tou toa teke anu wene kekakoa ka patekoa yopia kama
poo. Neke nitateko wenepa wiane wawamou wa Akolaliyo oa togotaneya.
One namolo totono pikoa kamotoa Lipai yatene takoa moa kakoaka enimopa eni yatene-
pala wameneyake Yesu-pala akeneya.
22
Nimo oa togotokaneya tokome totome eya wa
wene toko. Yesu einagome i wa eni ka patekoa yametekoa yopiko totonopa etene epetane
mati totono tadeko.
23
Lipai yatene ali-kitame namolo totono pikoa kakilepa peya matiyame taneya. Eni
totono pikoa kawa mea tuma-kala nekeneya tokolo ni uku.
24
Keraisu einago tuameneya
mekome weneya ka yopia-kala kama poko.
25
Nitiko ago tokome Akolali mekota poadete
one yoto pitia piki peyapa oneme-kama toa mokala toko. Nipa i yene kini poanele tokoike
po letu mekakana kemu toa wamene-ye wa Keraisuyo kini kowitikama-kala poko.
26
Akolalike lodo you toa tone kowitikateko ti toko agopa Yesu tadekolo uku. Onepa
kiyo akenele-kama toa ni ete-kitame akoa agale oatikileka toamoa ni wene moa koigameneya
mea tokolo uku. Nitikagopa Akolaliyo tone poanele toa mekota pilia moa etene ako tibuke
ne ako ago mea wa moa mekaneya.
27
Ako odene mekete Akolalike lodo yotokoai tane
tobou ali-kitame Akolaline wene kekakakilepa ta patako abuna sipi sipi kai wia lodo yokala
tiki. Nipa pinali-kiti kini poanele tokoike nami wia lodo yootokoapa ete-kitame poanele
tokoike nami wia lodo yotokakala tiki. Yesuyo pade nitameneya. Poanele toamene ago
tokome sipi sipi kai tetepo tootokoa pinali one wa lodo you toa tukomepa Akolaline wene
kekakatapeneya. Wa pade tuamoo.
28
Mosesene totono piane toa ako odene mekete
Akolalike lodo yotokamotoa moa kakane tobou ali-kitamepa ete yene peyame tiki toa
poanele tokala tiki. Eina totono yametekaneyake naniko Akolaliyo ile tou wa oa
togotokanakale taatekoa tokome mana ago moa kakaneya. Nipa mea epetekateka kotuke
kakoa mekatapeane ago ne mea kamene wa moa kakaneya.
Iberu Iberu
<<
77
>>
Iberu Iberu
<<
88
>>
8
Ako Odene Mekome Lodo Yotokako Ago
Tou Toa Yesuyo Akolaline Wene Kekakako
1
Ina ukunapa eya wane ekene uku. Ako odene mekome lodo yotokako tobou ago tou
toa tokome Akolaline wene kekoa tone kowitikako agopa Yesu tadeko. Einakagopa a
tibuke ako odene mekome talo toa meko ago Akolali meko walai nimini yono lono pome
mepaneya. Opika eida pa meko.
2
Eida mekome Akolaline yapu eteneya keneke onekele-
kama takoa meko. Yapu eteneya wane ukupa alime wiane yapuke ukuya mena. Ali Muno
mekotake uku.
3
Ako odene mekome lodo yotokako tobou ago moa kakakilepa Yu yene peyane eya
takamotoa tiki. Kini kowitikakome Akolalike padeya-kiti mea sipi sipi kai wia lodo yomotoa
tiki. Lodo yotokou toa tone kowitikako agomeka Akolalike padeya meamele taneya.
4
Ni
agopa itonokedo pa mekome too tokapa Akolalike padeya mea lodo yoamoo toka. Lipai
ali-kitame Mosesene totono litiapa enile tokala tikino, oneme pade nitamoo toka.
5
Lipai ali-
kitame edikakilepa one a tibuke tokole adeka pia tokala tiki. Nipa pa tekei tokala tiki wane
uku. Moseseyo Akolaline mamina yapu wikakademe kakale Akolaliyo eya wa akenemoke ni
uku. Ne Kati Sainaike kake enekale a tibuke no Akolalineya adeka piane
yametekounano, anu mamina losu yapu wikakakilepa eina yametekouna adeka pia
wikakamene wa akeneya.
6
Keraisuyo toto auapekome toatekale i i wa Akolaliyo lutua yametekilepa Lipai
yename tekei toatekoile yametekanakale moa patukoa akole toatekale eni yametaneya.
Edikane toapa Akolaliyo ali atoa weneya totono lutua yamemotoa Keraisuyo tikilepa eina
namolo totono Mosese-pala lutua yametanele moa patukoa epetane totono yamemotoa
taneya wane uku. Ni edoa-mo. Akolaliyo eni weneya totono tele takakome i i wa ikilepa
Mosese-pala agale oa epetekakana toa moa patukoa Keraisu-pala agale wedoa oa
epetekaneya.
7
Eina namolo totonopa ali atoame kiyoke-kama litia toatekoi totono yameoo tokapa
nipa eina totono luku weneya totono yameatekale pade piamoo toka.
8
Nitatekale pade
piamoo tokake Akolaliyopa one Iserele yename eina namolo totono tetekakala taneke eya
wa kikoa akaneya.
No Ali Muno agome ukuno, yakamene. Iserele yatene Yuda yateneta kini weneya totono i
i wane lutuane yameadene tuku. Eni toateku tigotoma noko.
9
Eni totonopa
namolo namolo kini kaua-mikiti Idipi ta tewitikoa poe wane liane auane
pekene yametekou totono keneya mena. Eina yename namolo totono litia toake
wakoli kote tokale wakou.
10
Nitikouyake no Ali Muno agome eya waneka
ukuno, yakamene. Weneya totono Iserele yatene yameatekou oi ponokalepa i i
wane wene takoane kini tepene-pala lukoane tou. Nipetepa nopa kini Akolali
mekene yopiou. Kipa anu yatene ali atoa nooke lukoa meoi.
11
Nitoa mekete
panagome-kiti no Ali Muno ago ko i i wa one oya-mikiti-pala amele toamoo.
Ali atoa peya ponopene ali atoameka ibini akene ali atoameka kini weneme no
Ali Muno agopa dikane ago tadeko wa wene tootapeoi.
12
Nipetepa kini
poanele tokoike po letu mekakouna keane wawane wene kayapetapeou wa Ali
Muno agome weneya totono yameademe okome akeneya.
13
Weneya totono wa ikilepa Mosesene totonopa namoleya tetepo takoane waku wa okome
akeneya. Nitaneyano, padeya namoleya kego noma pou toa eina namolo totono takoa
poademe toko.
Iberu Iberu
<<
88
>>
Iberu Iberu
<<
99
>>
9
Meme Kai Tabeme Wikakane Yapu Keneke
Akolalike Lodo Yoa Kowitanemo
1
Akolaliyopa one Iserele yene kiwi yopiouno, dikamene wa one namolo totono lutua
yametekilepa oneke lodo yoa kowitikete toatekoile yamea ni itonoke one kowitatekoi yapu
wikakakete toatekoile yamea taneya.
2
Eina yametane toa meme kai tabe moa yapu
wikakakilepa luku takuta motokoa wikakaneya. Yapu luku padekapa Akolaline yapu luku
wa motokoa wikakoapa eya-mene tebolo moa pianeya. Labo ni Akolaline yotokane palawe
piai tane walai ni eniya palawe moa pianeya.
3
Eni yapu luku kago keteponokepa maminame
olege taneya kakeneya. Ni padena yapu luku ali atoa kutu ponamomotoa maminame olege
tikilepa Akolali meko lono wa motokakete wikakoa taneya.
4
Eni yapu luku Akolalike
padeya ka lono taneya lodo yoai tane walai moa pianeya. Eni walaipa golo kueme latianeya.
Ni yomome latitikoa golo kue pa atapeane bokosi pianeya. Akolaliyo lutua yametane totono
adeka pia latiane bokosike uku. Eni bokosi keneke eya-mene moa lobutaneya. Golo kueme
latiane mete deya moa lobutuaneya. Maana nee moa kapetekane mete deyake uku. Ni eya
ago Erone one iti weneya tata pitikane iti moa lobutaneya. Ni Akolaliyo yonota tua agale wia
mekane kue petenetaka moa lobutaneya.
5
Eni bokosi patupa malikeka sipi sipi kai kamate
tadekaneya. Akolaliyo ali atoame tane poanele kogamotoa taneya. Eni bokosi patupa
kerubime wa ibini akene edelo alita yomini latia kakaneya. Nipa kini pawenata petene takoa
liputakutukakete todo takamotoa latia kakaneya. Enika eniyake ikilepa oyake ukuno,
pademo pade opi wamuku.
6
Akolaliyo tamene wa akene toa enika eniya nodokatekoa Lipai yatene ali-kiti ako
yapu lukuke-kama pote lodo yoa enile topokala taneya.
7
Eko lukukepa ako odene mekome
lodo yotokane tobou ago odene pekeneya. Einago pikilepa malikeka odepeta pokala
taneya. Paapa poameneya. Sipi sipi kai wia kamate okolo kagonoke mekoa aua pekeneya.
Nipa pinali one tane poaneleka ali atoa kini wene toamekete tane poaneleka takoa
kogamotoa nitipaneya.
8
Enilekepa Epetane Yominiyo eya wa wene takako. Meme kai eya
tabeme wikakane losu yapu ako luku keneke Lipai yatename lodo yoa enile pa toomoa
pikilipa nipa eka luku Akolali meko lono wa ibini akene luku pa ali atoa wete ponamele
toamoko wa wene takako.
9
Eni meme kai eya tabeme wikakane yapupa toto ipete meko ali
atoame toatekoole adeka pianeya. Eni losu yapu keneke Akolalike eya kuya mea sipi sipi kai
wia lodo yokala taneya. Nitiketeke kini tepene piane wene oyake moa kiyo akatapeamele
toameneya.
10
Opika enika enile tikilepa padeya nee ue eya kekaneya latikoa wawa noamoa
padeya moa noa ni tigini eya abe ko a tokala tiki. Nipa Akolaliyo eina namolole katekoa
wawa wenele yametekaleka papete enika enile pa tekei tokala tiki.
11
Keraisu taatekoa nokomepa Akolaliyo ali atoa pewe-kama witikome tokole i i wa ka
patetekoa yameademe one wene kekakaneya. Nipa ako odene mekome lodo yotokako
tobou ago tou toa eni taneya. Nitou wa ali-kitame meme kai tabeme wikakane yapu tuapea
ponokome taneya mena. A tibuke yapu eteneya tuapea ponokome taneya. Eniyapa itono
patu latia pianeya wane mena.
12
Nipa Akolali meko lono eni pinikilepa odepeta tuapea
penaneya. Enile wa lokoa toponamoko. Nitoapa meme kai pitimekawe kai tine wia kamate
okolo kagonoke mekoa aua ponameneya. Pinali one penane kamate moa aua ponokomepa
ali atoa a tibuke mea kamotoa tokome oto toa motaneya.
13
Papete panagome tuane agono
tigini-kiti mitikoa enile losu kekanele tokalepa nipa Akolaliyo einagopa kekanele toamene
ago tetepo takamotoa tokome oneke lodo yotane agome eya taneya. Meme kaika ali kai
pitimekaweka wia kamate moa ni atoa kai pitimekawe wia lodo yoa kuku moa einagono
tiginike tadekaneya.
14
Keraisu einagopa pa mea kako Yomini patu kautakoa kakome pinali
one kamate ponomotoa tikilepa one tigini Akolalike mea lodo you toa tukome taneya. One
poanele padeleka toamokomeke taneya. Nitaneyano, one kamateme tone tepene pale
toateko wene takoa koikakilepa eina papete losu toma nekenele moa patukoa padele akole
eni toko. Nipa totome pa mea kama poko ago Akolalinele takama pomotoa tokome ni toko.
Tone Wenele Toateko Totono Yametanemo
15
Keraisu tukilepa Akolaliyo ali atoa weneya totono lutua yamemotoa taneya. Nipa
Akolaliyo one wa kayo oa motokana yenepa one mana kono-mikiti latikoane pewe wiane-
kala kawou wa papete oa pikana toa taatekoa tomotoa taneya. Eina namolo totonoke lukoa
mekete tokoi poaneleme pine yene kiwi moa labakaneyake Keraisu einago tukome oto toa
motokome nitaneya.
16
Panagome kadimo oka toa moatekoi ali-kitame einagoneya papete moamatekoiyake
einago tuadekalepa oyake moamele too.
17
Panagome-kiti kadimo ootokoa tuameneya pa
mekomepa nipa onekeya-kama pa pikoa kawoo. Wa einago tukalepa one kadimo oka toa
moatekoi ali-kitame onekeya tatia mokala toi.
18
Edikoapa Akolaliyo Iserele yene kiwi
auapekene ile touno dikamene wa one namolo totono yametekome akene toa taatekamotoa
tikilepa kini witane sipi sipi kai kamateme taneya.
19
Akolaliyo eni totono yametekome
tamene wa okana toa-kama Moseseyo i i wa to awea ootokoa kakome eya taneya.
Pitimekawe tine moa wia eniya kamate okolo kagonoke mekoa ue-pala eletekaneya.
Nititikoapa kikome kiane sipi sipi kai pine-pala yomo isope yenene deyata moa okolo
kagonoke tadaneya. Nitoapa eni totono wia mekane bokukeka eida kakene ali atoakeka
tadekatapeneya.
20
Nitikome okome i kamate kiwike tadekakilepa Akolaliyo lutukoa
yametekana totono tele takakene tuku wa Moseseyo akeneya.
21
Einakale toa Moseseyopa
meme kai eya tabeme wikakane yapuke kamate tadekoa ni eni yapu keneke Akolalinele
takadete latia pikaneya peyakeka tadekoa taneya.
22
Opika Iserele yename eni namolo totono
litiketepa enika eniya pa natetekoa katekoa eteya peya abe kawamene tetepo taneya pimotoa
tekete kamate moa tadekaki. Einakale toa Akolaliyo ali atoame poanele tokoike po letu
mekakana kea wamotoa tikilepa kamateme-kama tiki.
23
Enika eniyapa Akolalineya a tibuke pia kawa tokoya adeka pia latitikoapa abe
kawamene tetepo taneya pimotoa tokome Moseseyo kamate moa tadekamele taneya.
Nitamele taneyake a tibuke pikoya-kiti abe kawameneya pimotoa tokome eina papete
kamate tadekane toa moa patukamedekale Keraisuyo eya taneya.
24
Toto auapekome
kowitikademepa Iserele yename wikakane losu yapu pome kapaneya mena. Eteneya adeka
pia pa tekei wikakane yapu poamokome a tibuke etene Akolali mekota pinele pome
kapaneya.
25
Nitou wa oomotokome pikilepa ako odene mekome lodo yotokako tobou
agome toko toa taneya mena. Einagome malikeka sipi sipi kai kamate okolo kagonoke
mekamotokome Akolali meko lono wa ibini akene yapu luku aua pokala toko. Keraisuyo
pade nitameneya pinali one kamate Akolali mekata lugutukoa aua poameneya.
26
Ako odene
mekome lodo yotokako agome tokala toko toa tamele too tokapa nipa itono latia piane-pete
titimoapa lugutukoa tete moa tukala tamele too toka. Nitamele too tokake eya taneya. Itono
takoa poateko tigotoma noko wa ali atoame tokoi poanele moa kogatapeademe taatekoa
nekeneya. Nipa pinali one tigini Akolalike mea lodo you toa tuademe nekeneya. Enakale
toademe wapa nikileka toamoo.
27
Akolaliyo wene toopiane toa ali atoa toto odepeta tukala
too. Tuutukaneyake Akolaliyo takoa enekala too.
28
Keraisu einagoka odepeta tukilepa
taneya. Nipa ali atoa peya matiyame tokoi poanele kogademe tukilepa pinali one tigini
Akolalike mea lodo you toa tuaneya. Wa lokoa nikilepa poaneleke tuademe noamoo. One
wakapea nomotoa wedianeya nepia mekoi-kiti toa moademe ni noo.
Iberu Iberu
<<
99
>>
Iberu Iberu
<<
10 10
>>
10
Papete Akolalike Lodo Yoma Neketeke
One Wene Kekatapeamele Toamenemo
1
Moseseyo eina namolo totono yametekilepa Akolaliyo padele padele epetanele
naniko taatekoa toatekale adeka pia yametaneya. Eni toatekale keleyo yameameneya. Ue
mine takane yomini keneya yametaneya. Nitane totono piane toa Yu yename malikeka
Akolalike lodo yoa kowitima neketeke pine yene kini wene oyake moa kiyo akatapeamele
toameneya.
2
Lodo yoa enile tokoilemedo edikoa kowitikoi-kitane wene moa kiyo
akatapeoo tokapa nipa lodo wa yoamoi toka. Nipa kini poanele moa kogatapeadeko wa
Akolalike lodo wa yoamoi tokake
3
ae, poanele pa toma yakete ni toko wa malikeka lodo
yotuku pekete tikili uku.
4
Ali kai pitimekawe kamatemeka meme kai kamatemeka kini tokoi
poanele oyake moa kogatapeamele toamokolo ni uku.
5
Nikepa Keraisu itonoke noademe mekome Akolali-pala eya wa akeneya.
Atai, kei ali-kitame neke wene kekadetepa sipi sipi kai eya wia ipe nee eya moa mea
tikilika neme kote tokolo wake eya toko. Kei yeneke tuano pa wa no kawateku
tigini latia nodokakapiko.
6
Kei yename sipi sipi kai eya lodo yoa kini
poaneleke padeya padeya mea tikili enoake neme ke wa wedia moamoko.
7
Eni wene tekene nepala eya wane okouna. Akolali neke leneke no i kakene uku.
Neke wene pikole toadene nekene ni uku. Nipa neke bokuke nooke papete wia
mekapiane toane taatekoane tuku wa Keraisuyo etene-pala akeneya.
8
Nipa enimo titikome ikilepa eya wa akeneya. Kei yename sipi sipi kai eya wia lodo yoa
eya kuya mea tikile neme kote moa wako. Padeya lodo yoa ni kini poaneleke padeya mea
tikilika neme ke wa wedia moamoko wa akeneya. Nipa Moseseyo eina namolo totono
yametekilepa enile tamene wa yametaneyake akeneya.
9
Enimo ootokoa eya waka akeneya.
Akolali neke leneke i kakene uku. Neke wene pikole toadene nekene ni uku wa akeneya.
Nipa Akolaliyopa sipi sipi kai eya witikoile kote tokale wakome eni luku Keraisu pinali one
tigini lodo you toa tumotoa toka wa Keraisuyo okome akeneya.
10
Akolaline wene pikale eni
litia tokomepa ali atoa toto Akolaline takoa motokome tone tokoo poanele moa
kogatapeneya. Nipa pinali one tigini Akolalike mea lodo you toa tukome taneya. Edikoapa
wa pade tuamoo.
11
Akolalike padeya mea lodo yotiki ali peyame kini losule eni teketepa ta patako abuna
odenele-kama toa sipi sipi kai eya wia lodo yokala tiki. Ali atoame tokoi poanele edikoa
moa kogamele toamokoyake tiki.
12
Keraisuyo pade nitameneya. Ali atoame tokoi poaneleke
odepeta one tigini lodo you toa tukome moa kogatapeneya. Ali atoa peyake eni tukomepa
wa pade tuamoo. Nitoa tuumotokome Akolali mekata nimini yono lono pome mepaneya.
13
Opika eida pa meko. Nipa Akolaliyo ne-pala poi te iane yene neeke lukoa memotou wa
onepala oa pikana toa taatekoa tomotoa nepia meko.
14
Keraisu pinali one tigini lodo you
toa odepeta eni tukomepa Akolaline takoa motane yene wene kiyo akaneya meatekoi toa
meemoa pomotoa toa peya takaneya.
15
Enilekepa pine ina ina wa Epetane Yominiyo toto wene takakilepa Akolaline bokuke
wia mekane toa eya wa titikome akeneya.
16
Ali Muno agome ukunu, yakamene. I meteku oi noka-petepa Iserele yatene nooke
lukoa mekete toatikile i i wane lutuane yameou. Nipa anu eni weneya totonopa
kini tepene lukoane kiwi wene takoane tou wa Epetane Yominiyo Ali Muno
agome okamo wene takakome oko.
17
Nimo ootokoa Ali Muno agome eya wa okomoka oko.
Anu totono tetekoa ele kule poanele toa tokoike po letu mekakounapa keane wakene wene
kayapetapeou wa oka wa Epetane Yominiyo oko.
18
Ali atoa kini poanele edikoa moa kogatapeneya meketepa nipa kini poanele tokoike
padeya-kiti wa lokoa mea lodo yoatiki toa mena.
Akolalike Tegetekoa Meatekomo
19
Nikepa anu oya-lawe kipala eya wane ukuno, yakamene. Akolali meko lono wa ibini
akene yapu lukuke pou toa one mekota Yesuno kamate yoto ludu toto atiki toa pitia pamele
tokolo
20
mea kama pato wa weneya ka ludu poadete poko. Nipa Akolali meko lono wa
ibini akene yapu luku olege taneya tuane mamina Yesu einagome patetoa Akolali mekata
pekene toa toto pitia poko. Patetoa pekene mamina wane ukupa one lagotane tiginike uku.
21
Nika Yesu ako odene mekome Akolalike lodo yotokakago tou toa Akolaline yapulu yene
toto talo takoa kakono,
22
Akolali kowitadete eya tatoane uku. Odene wene-kama pia ni
oneke wedoa wene tugoa mea ni tone tepene poane wene takoa pomotoa ue tadatapeneya
meou toa mea ni tone tiginika ue epetaneyame abe ko otapeneya mea Akolalike tegetekoa
mepatoane uku.
23
Akolaliyo tou wa oa pianele i i wa taatekoa tomotoa wedianeya nepia
meketepa etepea poamato wane uku. Kiwi auapekene dikou wa oa piko agomepa nitou wa
oka toa-kama taatekoa tootapeoono, poapeneya meato.
24
Ete oto wa wene mekanali yoa
ele kule epetanele toa tatoe wa tone tone oa kamotokateko wene kibutukoa meatoane uku.
25
Akolaline losu yatene obokala toatiki toa pade-kitame toake wakino, totome pade
nitamato wane uku. Wene weye akanali yatoe wa losu yapu oboai tamene. Ali Muno ago
wakapea noateko oi tigotoma nokono, nitato wane kiwi kowitoane uku-ye.
26
Keraisu totoke tuanemopa eina niminimo yakoa mootokoake tone namolo poanele
tokoonakale pa toomoa pato wado wene pia tokolopa nipa tone tokoo poanele wa
kogademepa te tuoo tokolo-pe.
27
Nipa abe meaneya tukolo Akolaliyo kipa one-pala poi
te iane yeneno, kibu mou wa toe mine moa pitikoa atukoo wa totome piti motaneya meoo.
28
Panagome-kiti Mosesene totono mukiti yamea wakale enekete ali takuta tebolo-wame i i
wa one eni tanemo to awea okolipa nipa koiso yopiane agome einago ela moamokome wia
tukamotoa wakeneya.
29
Panagome-kiti Akolaline manado paya tetepo takoa wakomepa
nipa Mosesene totono wakene agome tete motane toa moa patukoa dika dika toamene tete
moo. Weneya totono piane toa ali atoake Keraisuno kamate penaneyake paya tetepo
takakale tokome Akolaliyo kibu moapa dika dika toamene tete meoo. Nipa Keraisuno
kamateme einagono wene moa kiyo akaneyake paya tetepo takoa wawa ni pewe-kama
witiko Epetane Yomini tegene matoa tea tokale tokome dika dika toamene tete meoo.
30
Eya
wa akene agopa Akolali tadeko wa totome wene toko. Panagome nepala poanele
tokalepa noanume nami wiane kibu motokouno, neme kibu moameamene wa akeneya.
One bokuke eya wa akenemoka wia mekaneya piko. Ali Muno agomepa one yatene ali
atoa takoa enoa akakala too wa wia mekaneya piko.
31
Ae, tuameneya meemoa poko ago
Akolaliyo ali atoa dekoa moa kibu motikilepa piti tanele toa toono, enile takaya wa piti
motaneya meamene.
Poapeneya Kamene
32
Kiwi pa takaloganemo Akolalinemo papete yakoa mootokoa mekete ele kuleme ke
enekakale meake pa poapeneya mekoina wene kibutukoa meamene.
33
Nipa padepete-kiti
pade-kitame kipa ali atoane lene yoto moa kakakete tegene matoa tete mea tokoi. Ni
padepete-kiti dikane tete motokoi-kiti wene weye akato wa eni yene-pala kibutua kakoi.
34
Ni
po yapu moa pitikane-kitipa ela moa auapekala tokoi. Ni pade-kitame kinikiya odomoa
pokolika a tibuke kinikiya odoa moa poamatikiya etene epetaneya pa pia kakale enoono,
tokamota wa wene epetaneya mekoi.
35
Keraisunolepa widikoa atiki toa takama yakoinano,
onekele takoa wawameamene. Ataine take nami wia epetaneya-kama meoo tokolo ni uku.
36
Ele kuleme ke enekakale meketeka one wene pikale-kama toa togamene. Nitikolipa
Akolaliyo one yene auapekene dikou wa oa pikana toa taatekoa tokome pewe-kama wia
kawoo.
37
Nikepa Akolaline bokuke Akolaliyo akene toa eya wa wia mekaneya pikono,
yakamene.
Eya toateko tigotoma noko. Eina noo wa papete oa piane ago noademe toko. Nokomepa
pepe meameneya wete noademe toko.
38
Wene ki yo akeneya meko agopa nipa
nooke wene tuganeya meemoa poo. Nitateko agomeke piti motokome pegene
kakoa no tewitikoa wakalepa makutukoane moamou wa wia mekaneya piko.
39
Anu oya-mikiti totopa pegene kakoa Akolali tewitikoa wawa atuateko yene mena.
Akolalike wene tugoa meato wa toa motaneya meko.
Iberu Iberu
<<
10 10
>>
Iberu Iberu
<<
11 11
>>
11
Namolo Ibini Akene Ali Atoa
1
Akolalike wene tugoa mekilepa nipa Akolaliyo papete oa pikana toa taatekoa tokale
enou wa totome wedianeya nepia mea toko. Nipa one yameatekoya-kiti opi leneme
enamukuyake nani enou wa wene tugoa meko.
2
Namolo namolo papete tone kaua-mikiti
oneke edikoa wene tugoa mekoikepa Akolaliyo kei pia kakeneya.
3
Oneke edikoa wene tugoa meketepa eya wa wene toko. Itono tibuta ludu pia kawa
tokoya peyapa Akolaline agaleme-kama witakakala taneya. Nipa enika eniya peya tone
leneme enekoya-kiti eni latikilepa tone leneme enamokoya moa latia pianeya wa wene toko.
Ebele Inoketa Noa Toa Akolalike
Wene Tugoa Meanemo
4
Ebele Akolalike wene tugoa mekome tokome oneke padeya mea lodo yotikilepa
wamene ago Keine moa patukoa lodo yoa epetekaneya. Oneke wene tugakome eni tokale
enekome Akolaliyo one kei pikilepa poanele toamene ago tetepo takoa taneya. Ebele
einagopa namolo papete wia tukaneyake tone Akolalike wene tugoa mekete toatekoole eni
yamepianeya.
5
Eya ago Inoke Akolalike wene tugoa mekome tokake i ago tumotoane wamuku wa
Akolaliyo a tibuke moa pekeneya. Einago edoa pokato patu wa ete yename tuku toa kawa
teko tokale wakeneya. Akolaliyo moa pekeneya tokome enamuameneya. Enilekepa
Akolaline bokuke eya wa wia mekaneya piko. Inoke einagopa a tibuke wete poameneyake
Akolali wedikaneya.
6
Akolalike wene tugoa meamoko agomepa Akolali wedikakile tamele toamoko.
Akolalike tegetekoane mepou wa wene piko agomepa eya wa wene toko. Akolali wa iki
agopa nimini meko. Ni agomepa one tuku toa meki-kiti pewe wia kako wa wene toko.
7
Eya ago Noa Akolalike wene tugoa mekome eya taneya. Akolaliyo papete pubu
oopiane toa wete taatekameneyake one yapulu yene toa moademe ue dipi wane latipianeya.
Edikakilepa ete ali atoa kini poanele toa mekoile Noayo pitigamu taneya. Nitaneyake
einagopa nooke wene tugoa mekono, anu mati moane latikou wa Akolaliyo poanele
toamene ago tetepo takoa yopianeya.
Eberame Akolalike Wene Tugoa Meanemo
8
Eberame einago Akolalike wene tugoa mekome eya taneya. Akolaliyo ta pade nee
yameouno, wini ta to a poano pa wa kayo okalepa nitouno ta wa pegetoa poamene take to a
pekeneya.
9
Nitoapa Akolalike wene tugoa mekome eyaka taneya. One eni yametane takepa
mone take mepou toa monekago tetepo taneya pome mepaneya. Nipa meme kai eya
tabeme tekei yapu wia yawa pitikilepa mana Aisake kaua mati Yekobeta-pala opia yawa
pitaneya. Akolaliyo eina ta Eberame yametekilepa einakagota kikilikoa kini wa
yamepianeyake edikoa odeneka yawa pitaneya.
10
Eberame nitima yakilepa Akolaliyo wene
kibutukoa mea latiane take wipitikene pone mepou wa taneya. A tibuke pia-kala kawateko
taake uku.
11
Ni Akolalike wene tugoa mekome Eberameyo mana Aisake opianeya. One ada toa
mea natono Sera tiobo atue deya mea tekete mati opiamele toameneyake kitame mati
opimotou wa Akolaliyo oa pikana toa etene taatekoa too wa wene tugoa mekome mati
opianeya.
12
Einago ada toa tuateka ago oneke-kama Iserele ali atoa ege egeta wa-kala
kadukoa ta ma nekeneya. Nitaneyake a tibuke kako tagoi ni kusa ue matanu piko ue kibi pia
toko toa ta ma nekene matiyame wa oi moamele toameneya.
13
Eina namolo ali atoapa Akolaliyo kiwi auapekene dikou wa oa pikana toa nimini
taatekoa too wa oneke wene tugoa mea tuma-kala nekeneya. Nipa keleyo taatekoa tokale
enameketeke padeka mati kakete nami enou toa keneya ke wa enoa moa tukala taneya. Nipa
kipa itonoke pa tekei meateko yene wa monekali atoa tetepo taneya mea tukala taneya.
14
Opi enika enimo iki yenamepa itonopa kini pine ta mena wa ekete iki. Nipa kini pine ta pa
tuku tokoa kako wa ekete iki.
15
Nitane yene kini wenepa kini mea togane take pimotoa note
kepene pa meoi tokapa nipa eni take wakapea pamele tokale poi toka.
16
Nitoi tokake kini
eina take wene piitikameneya mekete a tibuke latiane ta epetaneyake wene piitikaneya
meaneya. Nitaneyake Akolaliyopa eni yename onepa kini Akolali wa kei pia okoli yatekaya
wa ya motokoya mena. Kini mea kama poatekoi taapa oneme latia pikaneya tokome ya
motokoya mena.
17-18
Eberame Akolalike wene tugoa mekome eyaka taneya. Akolaliyopa mana Aisake
moa oneke lodo yamene wa Eberame-pala ikilepa papete Aisake einagoke neke ti ali atoa
ege egeta kadukoa ta ma poi wa oa pianeyake akeneya. Oneke wene tugoa mekome tokale
tetoa enademe ni okale Eberameyo nitouno ta wa mana Aisake moa lodo yoademe taneya.
One peku mati odene agoke taneya.
19
Nipa Akolaliyo tuane alika oyake moa kamotokamele
toko wa wene kibutukoa mea yoademe taneya. Nitademe tokale enekome Akolaliyo
oyakeno wa wa ketekakome tuane ago moa kamotokou toa mana Aisake Eberame ete wa
metekome metaneya.
Aisake Yekobeta Yosepe Toa
20
Aisake einago Akolalike wene tugoa mekome eya taneya. Manata Yekobe Isota kini
mea epetekatikile i i wa kinita wedoa meatekoi agale oa pianeya.
21
Ni Akolalike wene tugoa
mekome eyaka taneya. One tuateka tigotoka-pete Yosepene manata takuta wedoa memotoa
tokome agale oa epetekaneya. Nitoapa iti tigine kakome Akolalike nate wene pia
kowitaneya.
22
Ni einago Yosepe one tuateka tigotokale mekomepa Iserele yene Idipi ta to a
poatekoimo i i wa oa pianeya. Nipetepa one tono-pala aua pamene wa oa pikilepa Akolalike
wene tugoa mekome akeneya.
Mosese Akolalike Wene Tugoa Meanemo
23
Mosesene etene nineta Akolalike wene tugoa mekete eya taneya. Idipi ako odene
meane tobou agomepa Iserele yene kini pene opiane ali mati peya wia tukamotoa akeneyake
eina adoname one akenemo piti moameneya meaneya. Nipa mati opia pikete enekoli koniyo
mati tadeko wa eneketepa tokene teboloke potipianeya.
24
Mosese Akolalike wene tugoa mekome eya taneya. Wetiniya kakomepa Idipi ako
odene meane ago Perouno kono kamo atoane mana wa ibini amene kote tokale wakeneya.
25
Nipa Idipi yene kini kolotini natekaneleke wene piitikaneya mea etepea poanele toma
pokoile pa tekeika litia toamademe wakeneya. Nitoapa Akolaline yatename tete motiki toane
onemeka mou wa kipala kibutua tete motaneya.
26
Ete-kitame one tegene matoa poanemo
okolika naniko taatekoa noatekago Keraisuke toa eni tete motaneya. Nipa Akolaliyo one
kamo takou toa pewe wimotoa nepia mekome Idipi yenane kamoya paya tetepo takoa
wakeneya.
27
Nitoapa Akolalike wene tugoa mekome eyaka taneya. Idipi ako tobou ago Perouyo
tete metekaya piti moamokome Idipi ta to a pekeneya. Nipa leneme enamateka ago Akolali
one-pala opia pokale enane tetepo takoa pekeneya.
28
Ni Akolalike wene tugoa mekomepa
edelo ago patukane wa ibini akene toge yopikome Iserele yene-pala eya wa pubu akeneya.
Akolaliyo Idipi take moa wetekateko edelo ago kini kini meki yapu patukatapea pomotono,
sipi sipi kai kamate kagoke tadekamene. Kini namolo takoa opiane ali mati yatene wia
tukakayano, nitamene wa pubu akeneya.
29
Ni one Iserele yene Akolalike wene tugoa mekete Kiane Kusa Ue ketakilepa itono
matanu ludu pou toa ketoa pekeneya. Nitikoli Idipi poyo yene kiwika ketoa poo wa muke
litimoa pokoli ueme atukatapeneya.
Ete Yene Akolalike Wene Tugoa Mekete Tanemo
30
Ni Iserele yene Akolalike wene tugoa mekete eya taneya. Kue pawe kago
unukatapeane Yeriko ta pitikaline taapa ta pataka tatono (7) kakoapeta kawa pitikoa yawa
unukakala taneya. Nitaneyake eina pawe kago bu wa kilikatapeneya.
31
Nipetepa pamoko
atoa Reabe Akolalike wene tugoa mekomepa ete Yeriko yene Akolaline agale tagoa toamene
yene-pala dekoa tuaneya mena. Papete Iserele ali takuta poi katepa te ia Yeriko take nokoli
enekome one yapu noe wa makutukoa moa potipikanake Iserele yename one wateaneya.
32
Ina ukuna toane pa okoane piane-pe. Eya ali-kiti Gidione ni Barake ni Samesone ni
Yepesa ni Depidi ni Samuele ni Akolaline agale papete to awea akane ali-kiti enika eni ali
peya mati Akolalike wene tugoa mekete tokala tanemo oateku pake piamoko.
33
Nipa
Akolalike wene tugoa meketepa eya toma-kala nekeneya. Pitikali-pala poi toa moa kawikoa
ni kini yene talo toa epetekoa ni Akolaliyo papete kiwi auapekene dikou wa oa pikana toa
taatekoa tokale enoa ni laione kai moa kawikoa atiki toa mea
34
ni tube toe mineke moa
pitikaneya kakete toe tugoa moa ni tueme kagoiyake petoa pote ni taba taneya meake
popeyo nokale telekole toa ni pitikalime poi toma nokolika poi lene kianeya kakete ete
pedekoa lititapea taneya.
35
Ni pade atoa-kiti Akolalike wedoa wene tugoa mekoli kini mati
tukala taneyake moa kamotokaneya.
Ni Akolaline totono litia toamene yename pade-kiti po yapu moa pitikakete ekete
Akolalinele takoa wakolipa kini yapu wetekoo-koli ekete tuake kamomotekete a tibuke mea
kama poono, nitamoo wa tete mokoa kawa tukala taneya.
36
Ete yenamepa pade-kiti tegene
matoa ni po wapime wia ni pade-kiti po yapu pitikou wa kapa po kakoa
37
ni pade-kiti kue
pitikoa wia ka ua ni pade-kiti soome te itakutukoa ni pade-kiti tueme ka wa tukoa taneya. Ni
pade-kitipa pa ponopene ali atoa sipi sipi kai meme kai eya tabeme latiane mamina kakeneya
yawa pitaneya. Nipa ele kuleme ke enekakale mea tete moa yawa pitaneya.
38
Enika eni yene
ali piamene ta luduka tono tono kakene ta luduka kota kene pikokaka koa kene pikokaka
yawa pitaneya. Eni yename kiyo akenele toma yakete tekete ete ali atoa-pala opia meamele
toameneya.
39
Dikane yene peya Akolalike wene tugoa mekete taneleke kei pianemo one bokuke
wia mekaneyake kiwi yatene auapekene dikou wa papete oa pikana toa taatekoa tokale
enameneya pa mea tuma-kala nekeneya.
40
Ni edoa-mo. Akolaliyo eni yene auapeateka wene
toopia mekomepa ipete meko-kiti toto peya odene kikilikoa auapekene auapeou wa wene
toopianeya. Nipa toto peya mea epetekateko kotu kakoa memotoa tokome one namolo
wene toopikanakale moa patukoa padele akole toateka wene toopianeya.
Iberu Iberu
<<
11 11
>>
Iberu Iberu
<<
12 12
>>
12
Toneketai Akolaliyo Toto Mane Oa Motoko
1
Ali atoa peya mati Akolalike edikoa wene tugoa mema-kala nekeneya. Nitoapa opi
toto ipete meko-kitipa edoa meki patu wa wedo pia unukatapeou toa kakete enekete tiki.
Nitikete tikino, eni yene meane toa meato wa teyapea moa patukanali you toa eya tato. Ele
kuleme ka ketekakoya peya tewitikoa wato. Nipa tone poanele tokoleme toto lakabele
takakoya-kiti wawa tone poatekota pitimoa pato.
2
Nitato wa Yesu enekoa patoane uku.
Yesu einago Akolalike wene tugoa mea tagatapeneyano, one pitia patoane uku. Yesu
einagome wipitikenepa kolotine meou wa wene toopianeya tokome eya taneya. Yomo
lekaneyake wia dekaneya kakomepa ete yename tedu mea ya motokoa tomotoake ko
wameneya tuaneya. Nitoa tuumotokomepa Akolali meko walai waneke nimini yono lono
pome mepaneya.
3
Ae, poanele tane ali-kitame one kote motekete ele kule toa tete memotoake ko
wameneya poti mekome tanele wene taneya meamene. Kipa tepe we taneleke pitime tuku
wa Akolalinele takoake wakaya tokolo ni uku.
4
Akolalike wene tugoa mekete ele kule
poanele ete pedekama nokoli kiwi padeka wete wia tukameneyano, onekele edoa takoa
wawadete-pe.
5
Akolaliyo kipa one mana kono-mikiti latikoa mama motokome oa pianemo
one bokuke wia mekaneyake wene kayapetapea meki-pe. Eya wa akeneya.
Anu mana nepala ukumo yakamene. No Ali Muno agome ne kibu motekene mane oane
motokoumo pamo tetepo takameamene. Ni ne kikoane akakolupa no i agonole
edeya weike takaku patu wa wene keda taneya meameamene.
6
Anu kolotini
yene kikoane akoane ni anu mana kono-mikiti latikoane yopiku-kiti kibu
moane tuku wa Akolaliyo akeneya.
7
Nitaneyano, ke enekakale mekoi-pete-kama inapa Akolaliyo nopa one mana tetepo takoa
mane oa moa tadeko wa ko wameneya meamene. Etename-kiti one matiyame poanele
tokolopa kibu moa mane oa moa toamoko patu.
8
One mana-mikiti talo toapa peya kibu
moa mane oa mokala too-li. Akolaliyo kiwido mane oa moamokomepa nipa one mana-
mikiti tetepo takamokome pakele mati-kiti tetepo takakome too.
9
Itonokepa toneketai-
laweme toto peya kibu moa mane oa mokala tokoi. Nitikoli kote tokolo yakoane moamuku
wa wamekete kiwi kei pia kakoo. Nitikoono, toneketai a tibuke mekome toto mea kama
pomotoa mane oa motokolopa yakoa moamoko patu. Etene yakoa moo-li.
10
Toneketai-
laweme kibu moa mane oa motikilepa pa tekei tokoi. Nipa toto auapeatekoi wene kibutukoa
mea tokoi. Akolaliyo toto mama motokome kibu moa mane oa motikilepa one wene kiyo
akeneya meko toa memotoa tokome toko.
11
Edikoa kibu motokoloka inapa tone wene
keda takanele witako wa wedia meamoko. Wa naniko kibu moa mane oa moa togakale
yakoa motokoi yenepa witi ku tumia witakome ku wedoa tuou toa itonoke tepe kolotini
kilikoa pimotoa wene kiyo akaneya meoi.
Mane Mane Oa Pubu Oa Tanemo
12
Nitaneya meoino, yono kawa weye wameneya meou toa Akolalinele wedoa takama
poamiki yenepa kini yono kawa weye akaneya mea onekele wedoa takama pamene.
13
Kawa
okeaneya yawou toa Akolalinele wedoa takama yawamiki yene paka pokaya tokolo kini
poatiki ka kiyo akoa nodokakapiamene. Kini kawa epetekou toa tekete Akolalinele takatikile
i i wa yameamene.
14
Yete pade ali atoa-pala odene wene pia enekala tamene. Ni wene kiyo akeneya mea
epetanele toadete wili toma pamene. Edikoa meamoko agomepa Akolali enekile toamoko.
15
Kiwi padeka-kitamepa Akolaliyo ali atoa pewe wia talo tokota petekatapekayano, wedoa
yamene. Ni kiwi ete oto wa wene poaneya memotoa tokoyapa kiwi pakeke witakome peya
matike weamutukayano, wedoa meamene.
16
Ni pamoko mea enile poanele takayano, wedoa
yamene. Ni itono peku-kama nakene ago Isoyo tane toa toameamene. Iso einago namolo
ago tokome etenaneya pine wia moatekoyake kobu tokale meane-pete etene luku kakome
moatekaya-kiti paya tetepo takoa eya taneya. Wamene ago Yekobene nee moa noademepa
one eni moatekaya-kiti topo toopia wakeneya.
17
Wa naniko Akolaliyo one pine wia pewe
wimotono, kowitikamene wa Isoyo etene Aisake kowitaneya. Komo oa kowitoa kawake
one eina namolo tokanakale oyake moa koikamele toameneya. Enipa nimini uku-pe.
18
Opi kimepa Akolali kakakoa kowitikilepa tone kaua-mikiti kini Kati Sainai kakoya liti
kakete tane toa tikiya mena. Einapete Kati Sainaike toe itipono okoa kakene matiyameke
yomiyomume agopa takoa pupulege mati popokoa tokale tepene piti wia lukaneya yakoa
kakeneya.
19
Nitoa yatekoli bera pia agale ludu oa tokale yatekete ekete agale oyake
yatekoono, wa-ye wa tone kaua-mikitame kowitoa kakeneya.
20
Nipa agale ludu nokome
okome kiwika kini pitimekawe kaika i tono kakoya liti nokolipa kue pitikoa tukamotoane
ukuno, noameo wa Akolaliyo okale pitime tuaneya kakete kowitaneya.
21
Moseseyoka piti
tanele enekene kolu kolu motuku wa piti mea taganeya kakeneya.
22
Anu oya-lawe kime Akolali kowitikilepa Kati Sainai kakoya liti kakene tetepo takoa
tikiya mena. Opa Kati Saione note kakene tetepo takoa meki. Nipa Akolaline edelo ali ege
egeta wa-kala kadukoa koukoa wedia mekika nekene tetepo taneya meki. Kati Saione wane
ukupa tuameneya meemoa poko Akolaliyo a tibuke latiane Yerusaleme take uku.
23
Nipa
one namolo mana kono-mikiti kini ibinipa one a tibuke piko bokuke wia mekane-kiti koukoa
mekika pote mepane tetepo taneya meki. Ni ali atoa takoa eneko ago Akolali mekota ni
wene moa kiyo akane yene a tibuke mea epetekatekoi kotu kakoa mea epetekaneya mekika
pote mepane tetepo taneya meki.
24
Ni Akolaliyo tone weneya totono yamemotoa tokome
tuane ago Yesu one mekota meane tetepo taneya meki. Nipa one kamate kiwike tadekaneya
meki. Yesu einagono kamate ponokomepa eya ago Ebelene kamate ponokome tane toa
moa patukoa etenane wene kekakaneya.
25
Kiwi mane oa motoko ago Akolaliyo okamo yakoa moamokayano, wedoa
yakamene. Papete itonoke Kati Sainaike agale ludu nokome okale kini kaua-mikitame yakoa
moamokoli Akolaliyo yono lukoa meamokome kibu motaneyano, opi a tibuke mekome i i
wa toto pubu okale yakoa moameketepa nipa edoa petoa pato-pe.
26
Papete Akolaliyo agale
ikilepa itono muku takoa akeneyake opi eya wa pubu oko. Wa padepete itono moane
muku takakenepa tibuka odeneka moane muku takouno, nepio wa oko.
27
Padepete wa
ikilepa one moa muku takatekoya eya kuya oneme latia pianeya-kiti takoa pomotou wa
okome oko. Muku takamatekoya-kiti pa pia kamotoa tokome nitoo.
28
Muku takamatekoya-kiti wa ikilepa Akolaliyo toto oneke lukoa memotoa talo toa-
kala kawateko ta eni yameademe okome okono, ke wa one kowitoa meateko toa oneke nate
wene pia piti-pala moa kowitatoane uku.
29
Tone Akolaliyo poanele tiki ali atoa kibu
motikilepa toeme nootapeou toa kibu moa atukoo tokolo ni uku.
Iberu Iberu
<<
12 12
>>
Iberu Iberu
<<
13 13
>>
13
Akolaline Wene Epetekakete Toatekomo
1
Anu oya-lawe kini kini ame wa wene mekanali yotekete tiki toa wedoa toomoa
pamene-ye.
2
Monekali atoado kiwi mekoika nokolipa nee noatino noe wa makutukoa
moamene. Namolo namolo pade ali-kitamepa Akolaliyo moa wetekane edelo ali-kiti
makutukoa motikilepa i agopa edelo ago tadeko wa wene toameketeke tokala taneya.
3
Ni
po yapu pitiki yene wene kayapeameamene. Kiwika po yapu odeneka pitane tetepo takoa
mekete eni yene ugu pote kini wene weye akapokala tamene. Ni tete mokoa kaki-kitika wene
kayapeameamene. Kimeka tete mokoa meane tetepo takoa mekete ela moa auapekala
tamene.
4
Ali atoata adona mekilepa Akolaline leneke kiyo ootokoa-kama meamene. Nipa mone
pade ali atoa koua piameamene. Koua piamatiki ali atoa koua pikolipa Akolaliyo kibu
moono, toameamene.
5
Ni kueke-kama wene piitikaneya meameamene. Kinikiyapa oyake piko wa tepe
keaneya meamene wane uku. Akolaliyo kiwi tewitikoane wakilepa toamou wa akeneyake ni
uku.
6
Akolaliyo nimo akeneyano, totome eya wa amele toko.
Akolali einagopa no auapeko agono, ete-kitame nopala poanele tokoilekeka piti
moameneya meou wa toto atiki toa mekete amele toko.
7
Eya ali-kiti kiwi papete talo toa mekete Akolalinemo olaukane ali-kiti wene taneya
meamene. Kini Akolalinele takama pote tuanemoka wene taneya meamene. Nitoapa kini
Keraisuke-kama wene tugoa mekete tanele kotukoa mea epetekamene.
8
Yesu Keraisu epene
wene-kama piko agopa one eni wene wia wakilepa toamoo. Namolo namolo opi opi naniko
naniko epene wene-kama pianeya meko.
9
Pade-kitame emo kumo monekemo titia okoli
kime yakoa etepea pokayano, yakameamene. Toto pewe witikome wene weye akakago
Akolaline tele patu kautakoa kama pato. Pade-kitame nitameneya padeya nee kekaneya
latikoa wawa ni padeya takoa noa tikilepa pata pale tikino, enile toamato.
10
Keraisu pinali one tigini lodo you toa yomo lekaneyake tukilepa toto toa moademe
taneya. Meme kai tabeme wikakane yapu keneke kakene tetepo taneya kakete Akolalike
lodo yotokaki ali-kitame sipi sipi kai wia lodo yoteketeka toto-pala oyake lipua meamele
toamoko.
11
Ako odene mekome lodo yotokako ago Akolali meko lono wa ibini akene yapu
luku pikilepa ali atoa peyame tiki poaneleke sipi sipi kai eya wia kamate okolo kagonoke
mekoa aua poko. Nitoapa eni sipi sipi kai tigini moa ta ketepono patukoa pome akolono
yopoko.
12
Enile tou toa Keraisu tukilepa ali atoa pitikoika eko pimotoa ta ketepono patukoa
pome akolono tupaneya. Nipa ali atoame tokoi poanele kogatapeademepa one kamate
ponomotoa tuaneya.
13
Nitaneyano, ta ketepono patukoa akolono one ya takoa wia
dekaneta pote kapou toa one-pala dekoa ya tokale meato.
14
Itonokepa tone meemoa
poateko ta piamokoyake weneya take pia kawateko take meemoa poadete toko wa nepia
meko.
15
Nipa Akolaline wene kekadetepa oneke padeya mea lodo you toa tekete Yesu patu
kautakoa kakete Akolali kei pia-kala katoane uku. One ibini wedekoa nitikala tato.
16
Nitoa
epenele-kama toa kinikiya-pala tatia mekala tamene. Nitikolipa Akolaliyo enipa oneke
padeya mea lodo yotane tetepo takoa wedia meoo.
17
Kiwi talo toa meki-kitame tamene wa okoi toa litia tikilepa kiwike poti lukoa mea
tamene. Kipala padele takaya tokale talo tikilepa eya wa wene taneya mea tiki. Akolaliyo ali
atoa takoa enekomepa eni yene kime talo toa epetekakoi-pe wa pitia yakoo wa wene taneya
mea tiki. Kini kolotini to aneya mea talo tomotono, tamene wa okoi toa litia tamene. Kini
wene keda takaneya meketepa kiwi edoa talo toa auapemotoa-pe.
18
Totome ele kule tikilepa ete-kitame padeya namike akoa oatikileka toamoko. Tone
tepeme tamene wa oa epetekako toa-kama toko.
19
Kiwi mekita wida wete wakapeane
nomotoa tekete Akolali wedoa kowitikakala tamene.
20
Ali atoa tone tepe kolotini kilikoa pikako ago Akolaliyo tone Ali Muno Yesu tuaneya
pikale moa kamotokaneya. Nipa ali atoa toa moateka oi pedoa piane totono pa pia kako
totono tele takakome one kamate ponomotoa tuaneyake moa kamotokaneya. Nitaneyano,
kipa one sipi sipi kai wa ako odene mekome toto talo toa-kala meko.
21
Nitikono, Akolali-
pala eya wane kini kowitikoane uku. Eni yename neke wene pikole-kama tomotono, ele kule
toa epetekatiki peku lawetetapeamene. Nipa neke kolotini nakeneya memotoapa Yesu
Keraisu patu kautakoa kakete epetanele-kama tomotono ta wane Akolali kowitoane uku.
Keraisu einago kei pia-kala kama patoane uku-ye. E e nimini.
Wipitikome Akenemo
22
Anu oya-lawe kiwi mama motekene mane mane ikilepa pa tigini wane wiane
mekakene ukuno, panagome moa oi motokakalepa poti yakakoa meamene-ye.
23
Tone
oyago Timosi po yapu pitaneyake yopiko agome ne pa wa po kotokoa wetekaneya. Einago
no i mekuta wete nokalepa nipa kiwi mekita pata wane one-pala wida opiane nou.
24
Kiwi talo tiki yene peya ni Akolaline ali atoa peya poti meamene wa akamene wane
uku. Kini oya-lawe i Itali take pitiki-kitameka kiwi peya wete meamene wa iki-ye.
25
Akolaliyo kiwi peya pewe wia yopimotoane kowitikoane uku-ye.
Opa anu agale eni.
Iberu Iberu
<<
13 13
>>
Go!
Download and unzip
wiu_html.zip to read
this offline.
Linguistic publications
Ethnologue

HTML generated 4 Jul 2014 fromsource files dated 3 Jul 2014
Matiu Matiu
Make Make
Luke Luke
Yone Yone
Aposelo Aposelo
Lomane Lomane
1 Korine 1 Korine
2 Korine 2 Korine
Galesia Galesia
Epesase Epesase
Pilipai Pilipai
Kolosi Kolosi
1 Timosi 1 Timosi
2 Timosi 2 Timosi
Taitasi Taitasi
Pailimone Pailimone
Iberu Iberu
Yame Yame
1 Pita 1 Pita
2 Pita 2 Pita
1 Yone 1 Yone
2 Yone 2 Yone
3 Yone 3 Yone
Yude Yude
Yamepianele Yamepianele
1990, 1992 Wycliffe Bible 1990, 1992 Wycliffe Bible
Translators, Inc. Translators, Inc.
Yame
00
11
22
33
44
55
Yame Yame
<<
00
>>
^
Yame
Ke Enekakale Mekete Toatekomo
Padele Toatekale Agopa Tokale Mekepa
Akolaliyo Wene Takamotono Kowitamene
Ponopene Yene Kamo Yene Mekete Toatikimo
Ponopene Ali Atoa
Paya Tetepo Takameamene
Yesuke Wene Tugoa Mekete
Epetanele Toatekomo
Kini Keke Wedoa Talo Tamene Wa
Mane Mane Oa Olaukanemo
Akolaline Peku Noa Toatekomo
Itonoleke-kama Wene Piitikaneya Meketepa
Akolali-pala Poi Te ia Mekomo
Mate Agale Wameamene
Kamo Ali Atoa-pala Pubu Akenemo
Ali Muno Wakapea Nomotoa
Poti Wene Piitikoa Nepia Meatekomo
Yame Yame
<<
00
>>
Yame Yame
<<
11
>>
YAME
Yameyo Yu Yateneke Wia Wetekane Pipia
1
1
Yame nopa Akolali Ali Muno Yesu Keraisutanele takama yaku agome uku. Iserele
yene tuku kakoa (12) yatene ali atoa padeka-kiti kini pine ta to a eka kuka mone take pote
mepane-kiti kiwike i agale wini oane wetekakenepa mea epetekamene wane uku-ye.
Ke Enekakale Mekete Toatekomo
2
Anu oya-lawe ele kuleme ke enekakolo meketepa nipa kolotini noatekole tetepo takoa
eya wa wene taneya wedia meamene-ye.
3
Yesunole poti takoa togakete toatikile wene toa
tomotoapa Akolaliyo ele kule ke enekakole witakakala tokono, ke wa wedia meamene.
4
Yesunole edikoa takatiki kotu kakoa toma pamene. Nitou wa one eni takatiki peku nateya
deyaka katekameneya noa tagatapeamene.
Padele Toatekale Agopa Tokale Mekepa
Akolaliyo Wene Takamotono Kowitamene
5
Anu oya-lawe panago neke toatekale agopa tokale mekepa Akolaliyo wene
takamotono, kowitamene. Ali atoa peya onekeya keda takoa mekala toko ago tokome nepa
wene toamene ago kake kowitiko wa kikoa akamokome neke kowitikale-kiti yakoa tokala
too.
6
Nitoono, yakoa too tadeko wa oneke wene mataneya meke poome toameneya
kowitamene. Poome taneya mekome kowitiko agopa nipa kusa ue-kiti pupulegeme
popokakolo ete pato oto pato toa pewikou toa einago wene wili walai akeneya meko.
7
Dikoa kowitiko agopa Ali Muno agome onekeya pade edoa yakoa memotoa-pe. Padeya
dedeyaka meamoo-li.
8
Wene takuta pianeya meko agome ele kule tikilepa pata pale-kama
toko.
Ponopene Yene Kamo Yene Mekete Toatikimo
9
Ponopene ago ame wane uku ago nepa Akolaliyo ako ago tetepo takakono, ke wa
wediamene.
10
Kamo ago ame wane uku ago nepa Akolaliyo keku kakoa ponopene ago
tetepo takakono, ke wa wediamene. Ke tidiyo odepeta atua poko toa kamo ago neka atua
poo tokolo tekene ni uku.
11
Lou witia nokome eni ke lunopa lou potome totokakale tidiyo-
pala okoa pitoo. Namolopa kalaneya kawake wete enipete atutapeoo. Nitiko toa kamo
agome one kamo toma pokome one kamoya-pala dekamoa atua poo.
12
Ele kuleme ke enekakoa kakaleka Yesunole takama poka agopa etene wedia meoo.
One eni tokale enekomepa Ali Munagoyo i ago onekele takoa togateko ago tadeko wa kei
pia mea kama pomotoo. Nipa oneke wene mekakoi-kiti mea kama pomotou wa papete oa
pikana toa taatekakome nitoo.
13
Nitoono, ele kuleme ke enekakoa kakale meketepa inapa
Akolaliyo no likoa enekome toko wa wameamene. Ni edoa-mo. Padameka one likoa
enamele toamoko. Ni pade Akolaliyo ali atoa likoa enekileka toamoko.
14
Akolaliyo pade
nitamokoyake pine yene tone tepene piko wene kamokakome toto wa likoa enekala toko.
Lede pa totome poanele tomotoa ni toko.
15
Eni poane wenepa atoa one mati kakeneya
meou toa tone tepene mati keneya kakeneya mekoname toko. Wa naniko atoame mati
opiou toa tone weneke poanele witako. Eni poanele tubetema pome wipitikomepa pine ago
wia tukakako.
16
Anu kolotini yene kipala i ukumopa wene kayapekayano, wedoa yakamene.
17
Tone
epetaneya motokoya peyapa Akolaliyo-kama latia pikoa ni tone mea epetekateko pekupa
oneme-kama lawetoa toko. Pa tokoya-kiti a tibuke latia kakane agoke uku. One eni pa
tokoya-kiti wedome agopa takakolo pa toamokoyake one pade nitamoko. Pa tokoa-kala
kawou toa one wene wia wawamokome epetaneya-kama takoa mekala toko.
18
Ni agome
one weneme-kama totopa i i wa one mana kono-mikiti moa latikakilepa one nimini peku
lawetekome toka. Yete pade ali atoa naniko moademeke namolo takoa totopa one mana
kono-mikiti moa latikaka.
19
Nitikano, anu kolotini yene agale yakadetepa kale pimotoa meamene. Agale oa
metekilepa poti wene kibututukoa amene. Tepene kotimi wene ponokalepa wete ya atapea
wameamene.
20
Timini luaneya kaketepa Akolaline kiyo akene wene pikole tamele toamoko.
21
Nitamele toamokono, kini poane wene-kitika ele kule poanele toma pokoileka wakete
wamene. Nititikoapa Akolaliyo kiwi toa moateko peku kini tepene moa lukakana yakoa
moamene. Oneke nate wene pianeya mea nitamene.
22
Toamadeteke paya nou toa
yateketepa kini wa oa yotokoino, wedoa yakoa tamene.
23-24
Panagome-kiti toamademeke
one agale paya nou toa yatekilepa eya tou toa toko. Ali pade pinali one lene timini kakole
wene kayapeademeke yomini pokoke enetekoa pou toa toko.
25
Akolaline totono kabe
koukoa piane boku panagome-kiti lewea enoai toa wene kayapeameneya litia toma
pokomepa etene kolotine meoo. Akolaline totono wane ukupa ali atoa kini tokoi poaneleme
kiwi moa kautaloganeya mekita bulukoa toa moateko totonoke uku.
26
Panagome-kiti Akolalinele takama yaku wa wene pikomeke one keke wedoa talo
toamokomepa pinali one wa oa yotokako. Dikako agome Akolalinele takakilepa pata pale
toko.
27
Pade alime nitameneya Akolalinele takakomepa eya toko. Etene nineta tuaneyake
egetiniya meki mati-kitika ke enekakolo wene keda taneya meki nepo atoa-kitika mama moa
kiwi mekika ugu pome auapekala toko. Ni itono peku noa tiki-kitame tikile oneke weamuoo
kekoa titi toma yako. Atai Akolaliyo dikako ago kei pikome okome i agome onekele
takakilepa poane wene takoa koikatapeneya mekome kiyoke toko wa oko.
Yame Yame
<<
11
>>
Yame Yame
<<
22
>>
2
Ponopene Ali Atoa
Paya Tetepo Takameamene
1
Anu oya-lawe tone Ali Muno Yesu Keraisu pa teleta tootapeane ago Akolaline peku
nakene ago einagonole takama peketepa kamo yeneka ponopene yeneka takoa enameneya
midi pikoa makutukoa moamene.
2-3
Kiwi oboa mekita-kiti kamo ago ponopene agota
nikilipa edeki patu. Yonoke kamo kue wane mekoa mamina epetaneya kawa noko ago
makutukakete ekete kamo koni ali i epetaneya waneke noke menamene wa iki patu.
Nitiketeke padena ago pilia tadane mamina kawa noko ago-pala ekete kuka pa kaponamene
wa-kiti oa anu kawane itonoke pa menamene wa-kiti iki patu.
4
Edikakipa nipa einagota midi
piane tetepo takamekete poane wene pianeya meapa takoa enoa potokakete tiki.
5
Anu kolotini yene kipala i ukumo yakamene. Ete-kitame ponopeneya tetepo takoa
wakene yenepa Akolaliyo kamo takou toane anukule takatiki peku lawetou wa takoa
motoko. Nipa oneke wene mekoa meki-kiti one ta yameou wa wene toopikana toa
taatekakome eni ponopene yene one mana kono-mikiti latikako.
6
Anu oya-lawe kime pade
nitameneya ponopene ali atoa paya tetepo takoa wakete kamo yene kei pikala tiki. Kamo
yename kipa tete mea koisoke lia aua pokala tikiyake nitiki.
7
Anu oya-lawe kipa Keraisuno
ibini pianeyake e kamo yename one ibini paya tetepo takoa taumada tiki. Enipa nimini
ukutu-pe.
8
Akolaline bokukepa one tobou kakoa oa metane totono dikaneya piko. Pine yene
kini wa mama motekete tiki toa yete pade ali atoa mama moma pamene wa akeneya. Eni
akene toa yakoa tootapeketepa nipa epetanele eni tekete toi.
9
Nitameneya kamo yeneka
ponopene yeneka midi piane tetepo takameketepa poanele eni tekete toi. Nipa one eni akene
agale wene kibutukoa meketepa ae Akolaline totono tetekakene tadeku wa oi.
10
Panagome-
kiti eni totono litia toma pokomeka padele nateleka katekoa toamokolopa Akolaliyopa
einagome one totono peya tetekatapeane tetepo takoa meko.
11
Akolaliyopa mone padane
atoa koua piameamene wa oa ali atoa wia tukameamene waka oa taneya. Nitaneyano,
anu oyago neme-kiti padane atoa koua piamekeka ali pade wia tukakepa nipa Akolaline
totono peya neme eni tetekatapeko.
12
Eya wa wene taneya meamene. Akolaliyo ali atoa
takoa enekilepa kini tokoi poaneleme kiwi moa kautaloganeya mekoita bulukoa toa moateka
totono piane toa takoa enoo. Nitoono, epenemo-kama oa epetanele-kama toa tamene.
13
Ete
ali atoa ela moamokome kini poanele tokoike nami wia kibu motokagopa Akolaliyo oneka
ela moamokome kibu moo. Wa pade ete yene ela motokome kibu moamoko agomepa
Akolaliyo kibu moamene piti moateko toa mena.
Yesuke Wene Tugoa Mekete
Epetanele Toatekomo
14
Anu oya-lawe kipala eya waneka uku. Panagome-kiti Yesuke wene tugoane meku wa
oake epetanele toma poamokomepa pata pamo eni okome too. Yesuke edikoa paya wene
tugoa mekalepa nipa Akolaliyo einago edoa toa momotoa-pe.
15
Kini oya ali atoa pade
epetane mamina kawamoa noateko nee-pala piamoa kobu taneya kakolo enekome
16
panagome-kiti okome tepe mataketikoa pamene. Tigini poto takateko mamina kawa nee
noa tagoa kitipu poti pamene wa-kiti oake one eni mamina pade meamoa one noateko nee-
pala lawetamoa pa oa wetekakomepa nipa pata pamo eni okome toko.
17
Nitiko toa
panagome-kiti Yesuke wene tugoane meku wa oake ali atoa ela moamoa auapeamoa
tokomepa nipa tukome tuane ago tetepo tokolo Yesuke wene tugakilepa pata pale toko.
18
Panagome eya wa-kiti oko. Panagome Akolalinele takakilepa pa oneke wene tugoa
mekome toko, wa padekagome onekele takakilepa ali atoa mama moa auapekome toko wa-
kiti oko. Nimodo okalepa eya wane ou. Neme-kiti ali atoa auapekile toamekeke pa Akolalike
wene tugoa mekolepa enouno, yamea ta. No i agopa Akolalinele takako ago tadeko wa
neme wene tomotoanepa ali atoa mama moane auapekule yameou wane ou.
19
Einago-pala
eya waneka ou. Akolali wa oateko agopa odene ago kakono wene tuku wa neme oko. Ae,
ipono-kitameka wini okana nimini oko wa wene tiki. Eni wenepa tekete pa kolu kolu luaneya
meki.
20
Beita, paya wene pia oko ago ne-pala i ukumo yakamene. Panagome-kiti ete yene
auapeamoa pa Akolalike wene tugoa mekomepa nipa tukome tuane ago tetepo tokolo pata
pale toko wa neme wene tomotoane tekene eya wane uku.
21
Akolaliyopa tone kaua ago
Eberame einagopa poanele toamene ago tetepo takoa wene keaneya mekilepa edekale
taneya-pe. Eberameyo lodo yoademe kue moa latiane walaike mana Aisake moa pia oneke
lodo yoademe tokale taneya. Enipa nimini uku-pe.
22
Akolaliyo enile tamene wa okale
Eberameyo litia tokomepa Akolalike wene tugoa meateka kotu kakoa taneya. One nitane
ago tadeko wa Akolaliyo Eberame einagopa poanele toamene ago tetepo takoa meaneya.
23
Nipa one bokuke wia mekapiane toa taatekoa taneya. Enipa eya wa wia mekaneya.
Akolaliyopa Eberame poanele toamene ago tetepo takakilepa oneke wene tuganeleke
taneya. Nitaneyake Eberame ko ikilepa einagopa Akolaliyo oya patu piane ago wa akeneya.
24
Nipa Akolaliyopa panago-kiti poanele toamene ago tetepo takakilepa pa oneke wene
tugakoleke tokoya mena. Einagopa oneke wene tugoa mekome one wene pikole-pala toma
pokolo tokome ni toko wa wene toa wane uku.
25
Pamoko atoa Reabeyo enile keneya eya taneya. Tobou ago Yosuayo ali takuta
yukuka Yeriko ta katepa te ia enepoe wa wetekakale pokoli one yapu noe wa Reabeyo
makutukoa motaneya. Nitikome one yename einagota poi pia mea wia tukakaya tokale kini
nokoina lono koekoa padeka lono wakapea poe wa wetekaneya. Einatoapa nitane atoa
tadeko wa Akolaliyo poanele toamene atoa tetepo takoa meaneya. Enipa nimini uku-pe.
26
Ali pade one yomini takoa pokome pootapekomepa tukome tuoo. Edikoa panago-kiti
Akolalike wene tugoa meake yete pade ali atoa auapeamokomepa nipa oneke wene
tugakilepa pata pale toko. Nipa tuane agome keneya eni toko.
Yame Yame
<<
22
>>
Yame Yame
<<
33
>>
3
Kini Keke Wedoa Talo Tamene Wa
Mane Mane Oa Olaukanemo
1
Anu oya-lawe tikisa ago meou wa togo togo wameamene. Wipitia ta pataka-pete
Akolaliyo tikisa ali-kiti toto pitia yatekome tone natemo okoomo natele tokoole peya pine
to a akoo tokolo ni uku. Ete yene edikoa pitia yakamoo.
2
Padele padele tikilepa toto
peyame lugutukoa petekakete pale tokala toko. Panagome-kiti poanemo ikileka
toamokomepa nipa one mea epetekateko kotu kakoa mekome pinali one yono kawa eya
wedoa talo tamele toko.
3
Osi kai tone wene pikoka pomotoa one kimane kene kapa tigini
deya tanikakoa eniya po kakoa lauaneya talike mea poko. Dedeyameke yeka pome yukuka
pome tomotoa eni po ete oto li li toa mea poko.
4
Ue dipi-kiti tube mati pikoyake pupulege-
pala u u okoa kako matiyame popokoa aua poademe tokaleka yopikagome one wene litia
pomotoa yomo tigini wane dedeya ue dipi tene lono uele tukaketikaneya kakome ete peke
oto peke tokome aua poko.
5
Nitiko toa tone kekepa nateya deyameke ele kule tubele mati
toane kamotokaku wa mate agale okala toko.
Yakoe, toe kagalia dedeyameke kau taneya pakeke pome pitakomepa itipono oa yomo
kakoya eya odepeta napetapeko.
6
Kekemeka toeme eni toko toa poto tanele kamotoka
kamotoka toko. Tone yono kawata tigini wago eya pake kako ago tone keke oneke padele
padele poanele tagome tigini eya peyake weamutukakome toa potokakala toko. Tobou
iponame one poane peku lawetekolo panago-kiti noa toma pokopa nipa toe witakome eya
kuya peya noawineya pou toa kekemepa pinali one wa toa potokama poko.
7
Yoko tue ini kaya mou eya kuya peyapa alime oiake moa kawikamele tokolo padeka-
kiti takoa moapa kini agale yakoa tomotoa egetekala tiki.
8
Nitikiyake odene agoka pinali one
keke wa kawikamele toamoko. Kekemepa eteleka otoleka koiga koiga tokome kayame ali
tania tukou toa enile toko.
9
Tone kekemepa padepete Ali Muno Atai Akolali kei pia wa
padepete panago-pala poanemo oa toko. Akolaliyo one keneya kamotoa latiane ago-pala
poanemo eni oko.
10
Tone kekemepa kei pikomoka poanemoka okala toko. Anu oya-lawe
totome edikoa meameamedeko.
11
Ue lene togilepa meke tane ue-pala poane ueta edoa
odeneka lene to a yomotoa-pe. Nitamele toamoo-li.
12
Yomo pikikepa yomo olipe ku oyake
tuamele toko-pe. Nitamele toamoo-li. Gerepi po ludukepa yomo piki ku oyake tuamele
toko-pe. E 'e mena. Edikoapa poane ue wa meke tane ue latia yoamoo.
Akolaline Peku Noa Toatekomo
13
Anu oya-lawe kiwi pakeke wene muno meane ali-kitika pademo pademo wene toa iki
ali-kitika meketepa nipa ete-kitame e eno, kipa dikane ali-kiti tadeko wa wene tomotono, mea
epetekamene. Nipa wene muno meane yene meatiki toa nate wene pianeya mekete padele
padele epetanele toma yamene.
14
Nitameneya ete yene-pala kotimi yoa wene poaneya
mekete ako ago kawou wa ete oto pilinali yoma yaketepa kini wa kei piameamene. Akolaline
nimini peku edikoa moa agopa takatapeoino, nitameamene.
15
Dikane ago one nako pekupa
Akolaliyo lawetane peku mena. Eni pekupa kini kaua-mikitame lawetane peku. Epetane
Yominine weneke titianeya mena. Tobou iponame titia lawetekoya.
16
Ete oto wa wene
poaneya mekete ako ago kawou wa wili toma peketepa nipa wene wili walai akeneya mekete
ele kule poanele-kama toawineya pekete toi.
17
Akolaline peku nako agome nitameneya eya
toko. Titikomepa poane wene takoa koikaneya meko. Nitoa mekome poi te iane yene odene
wene pikoa ni poti ko akene wene pia ni ete yename kowitikoile yakoa toa ni eko ali atoa ela
moa tagatapea ni ele kule epetanele toa ni ponopene yeneka kamo yeneka takoa
enamokome ali atoa peya midi piane tetepo takoa ni odene wene-kama pia meko.
18
Poi wia
pitikatiki peku laweteki yenamepa nipa nee lene ipele wedoa witou toa ali atoane tepene
wene kiyo akenele-kama witakakala tiki.
Yame Yame
<<
33
>>
Yame Yame
<<
44
>>
4
Itonoleke-kama Wene Piitikaneya Meketepa
Akolali-pala Poi Te ia Mekomo
1
Kako poi toa wa kini kini pili pili toa mokota ikilepa edoa titia witakala tokoto-pe. Ele
kule poanele toada wa ete oto wa koiga koiga tikilepa tepene eida-kama titia toko.
2
Panagoneya moadiya wa wene piapa moadete wili tokoa kawa teko tokolo pinago wia
tukakete moato wa wene pianeya meki. Eya kuya mou wa moamele toamokolo kako poi
toa mokota okala toa kaki. Nipa eniya-kiti moameneya pa mekilepa Akolali neme mano wa
kowitamekete tekete pa meki.
3
Wa pade-pete Akolali kowitiketeke padeya dedeyaka
moamele toamokolo pa mekilepa nipa Akolaline wene piko toa litia toamekete tekete pa
meki. Nipa kinikile wedia tato wa paya wene pia kowitikete tekete ni moameneya pa meki.
4
Beita, kipa pamoko keneya mekete eya wapa wene toamiki-pe. Pa itonole toma yaki yene-
pala-kama oya patu pia meketepa nipa Akolali-pala poi te ia mekete tiki. Itono peku naki-kiti-
pala oya patu piou wa wene piko agopa Akolali-pala poi te iane ago eni.
5
Kime nitikala
teketepa nipa Akolaline bokuke eya wa wia mekanemopa pamo akeneya wa wene pia tiki
patu. Akolaliyo totoke moa wetekane Yomini einagomepa one odene kiwike awiane meou
wa toto ko la ua meko wa wia mekaneya piko.
6
Totome toa potokakoloka Akolaliyo akole
tokome pewe wedoa wima poko. Nikepa Akolaline bokuke eya wa wia mekaneya piko.
Anume tukule kimeka toati wa mate agale iki yenepa Akolaliyo ete pedekama pokomeke
nate wene pianeya meki yenepa pewe-kama wia kako wa wia mekaneya piko.
7
Nitikono, Akolalike-kama nate wene pia lukoa meamene. Tobou ipono Setanupa ete
pedekakolipa nipa kiwi wete tewitikoa pitoa poo.
8
Akolalike note tegetekoa mekolipa nipa
Akolali kiwike nome tegetekoa meoo. Ae, poanele toma yaki-kitame kini yonoke kakene
kege ueme ko kitikou toa kini poanele tewitikoa wamene. Wene takuta pianeya meki-kiti kini
poane wene wia wamene.
9
Ke enekakolo tumai meou toa komo ka ta pitikoa meamene. Yau
toa meki-kiti yau teigoa wawa komo amene. Wedianeya meki-kiti wedikile teigoa wawa
wene keda taneya meamene.
10
Ali Munono lene yoto oneke nate wene pianeya mekolipa
nipa kiwi kei pia ako moa kakoo.
11
Anu oya-lawe kini kini ete oto wa akoa agale wameamene. Panagome-kiti one oya
ago kikoa akakilepa nipa Akolaline totono dekoa kikoa akakome toko. Nitoa akakilepa eni
totono litia toatekole piamene tetepo takoa mekome litia toamoko.
12
Totome litia toateko
totono yameteko agopa Akolali odene. Einagome odene ali atoa padeka-kiti toa moamele
toa wa padeka-kiti wia atukamele toa tokono, einago luku kake anu oya neme eko aline
tanele edoa pine to a akade-pe. Pine to a akakilepa Akolaliyo-kama toko. Padame pade
mena.
Mate Agale Wameamene
13
Topo lene kianeya meki-kiti kime eya wa-kiti iki. Pitikalime latia pitiki ta padeka pone
mali odeneke eida mekene eya kuya topo toane kue moane kamo ago meouno, opi puku
patu, podoliyo puku patu wa oi pedoa pikala tiki.
14
Eni oi pedoa pia ikilepa podoliyo
witatekolepa agopa tokolo meketeke iki. Wedo pikomepa pa tekei pia takoa poko toa
kiwika itonoke pa tekei mea tukala tikino,
15
eya wapa amediki. Akolaliyodo oyakeno enile-
kiti toe wa okalepa nipa tuameneya meketepa ele kule tato wapa amediki.
16
Nitamedikiyake
mate agale oa kini wa kei pia tiki. Edikakilepa poanele-kama tiki.
17
Nipa panagome-kiti one epetanele toateko wene tokomeke toamokolopa Akolaliyo
einagopa poanele tane ago tetepo takoa meko.
Yame Yame
<<
44
>>
Yame Yame
<<
55
>>
5
Kamo Ali Atoa-pala Pubu Akenemo
1
Kamo ali atoa kipala i pubu ukumo yakamene. Dika dika toamene tete-kama mokoa
kawatikiyano, komo ka ta pitikoa kamene.
2
Kini kamoya lomutapeneya pia kini mamina-pala
tiome te ia tadekatapeneya pia
3
ni kini golo kue leneka silepa kue leneka lame
yotokatapeneya pia toko. Eni kuepa tatiamoa kamu tokoa mekoli tokome ni lame
yotokatapeneya tadeko wa peyame enekete oi. Eni lamepa pine yene kiwike weamutukome
toeme keneya noa te ikolokoo. Kinikiya toeme napetapeateko tigotoma nokoyake kamo
toma piki.
4
Kini ipe pupu takaki yene yotokakete eni pupu takakoinake nami wia kue
meamikili tekete kini kueke komo oa mekino, yakoe. Kini ipe kakoya nee motokane yename
komo oa kakimo eya ago edelo ali-kiti lukoa meki ago Ali Munoyo yakakoa meko.
5
Kamo
ali atoa itonoke meketepa kini wene witika toa epetaneya-kama takoa moa obokete wedia
meki. Nipa oinoke wiatiki kai paya nou toa la wa kawou toa kamo yene kiwika wipitia ta
patakoa kibu moateko oi paya nou toa kakete kamo toma piki.
6
Nitiki yenamepa nami
kawamene ali atoa wia tukatekoi oi pedoa pia pa wia tukakala tokoi. Nipa kiwi ete wa
pedekamokolika odene lono pa puputua wia tukakala tokoi.
Ali Muno Wakapea Nomotoa
Poti Wene Piitikoa Nepia Meatekomo
7
Kamo yename nile-kala tikiyake anu oya-lawe kimepa Ali Muno wakapea nomotoa
poti nepia meamene. Ipe toko agome-kiti nee lene matoa kadukatapeapa nodokoa
kibutukoa kamotoa poti nepia meko. Nipa namolo takoa noka taame nee lene tumikoa wa
naniko noka taame ku tumotoa poti nepia meko.
8
Ali Muno wakapea noateko tigotoma
nokono, one nomotoa nepia mekilepa edikoa poti nepia mea togamene.
9
Anu oya-lawe kini kini ko oa akoa wameamene. Akolaliyo kime poanele tadiki wa kini
nami witikaya tokolo ni uku. Koiso pitia yakateko ago yapu kago tuapea noademe dekama
nokono, nitameamene.
10
Anu oya-lawe Ali Munono agale to awea akane ali-kitame one ibini
patu kautakoa kakete tanele wene taneya meamene. Eni yename one agale akama yakete
tete-pala moma neketeka onekele poti takama pote toganeyano, kimeka edikama pamene.
11
Ke enekako-peteka Akolalinele takama pote togaki-kitipa Akolaliyo wedikako yene wa
totome okoya. Eya ago Yobe one tanemo kime yatekoinakamo uku. Ke enekakale
mekomeka ko wameneya poti meaneya. Ke enekakale memotoa wawake wipitikomepa
Akolaliyo one papete wene toopikana toa taatekakome Yobe einago pewe wia kakeneya.
Enipa kime wene tikimo uku. Akolali einagome ali atoa ela moa mama moa tagatapeko.
12
Anu oya-lawe eya tobou kakoane ukumo yakamene. Ipa nimini uku waka oa ile tou
waka eketepa nipa agetai tia tibu tia itono tia enika eniya tia wa wedekoa wameamene.
Padele toadetepa e e tou wa oa tamene. Toamadetepa e 'e toamou wa amene. Eni tia pia
okoile toamokolipa Akolaliyo kibu moono, iya tia eya tia wa wameamene.
13
Kiwi panago ne-kiti ke enekakale mekepa nipa Akolali kowitamene. Panago ne-kiti
kolotine yakepa nipa Akolali kei pia lo oa tamene.
14
Panago ne-kiti yene taneya pitikepa
nipa Keraisuno ali atoa talo tiki ali-kitame neke kowitikanomotono, agale oa wetekamene.
Nitikale nekete neke kowitikakete Ali Munono ibini wedekoa olipe yomo ku ue neeke pekoa
yotokakoa kowitikoa toi.
15
Akolaliyo yakoa too wa kowitikakolipa nipa yatekome yene tane
ago latekoo. Latekakomepa einagome poanele tokake po letu mekakana keemu toa waoo.
16
Kiwi yene taneya pitiketepa Akolaliyo latekamotono, kini poanele tokoimo i i wa ete oto
wa to awea oa ni kini kini ete oto kowitikoa tamene. Wene kiyo akeneya meko agome
kowitikakolopa nipa one kowitikakamo taatekoa too.
17
Ilaida toto keneya alimepa ta
noamomotoa wedoa kowitikale Akolaliyo yakoa taneya. Nitikalepa mali tebolo ponome wa
tokeneka ko melepu (6) kakoa ponomotoa ta pitakileka toameneya.
18
Nitaneyake wa
kowitikale ta loboa pitakale itono patu padeya padeya eina yano kakoa wa witatapeneya.
19
Anu oya-lawe kiwi panago Akolaline nimini ka pimotoa etepea toma pokale eina
tewitikoa wakanakale litia wa tomotoa aua nokagopa eya wa wene takamene.
20
Panagome
poanele toma pokale one eni poane wene wia wamotoa tekepa nipa one tua atua
poamomotoa neme toa moteke too. Nipa einagome ele kule toka poanele peya mati
Akolaliyo moa agopa takatapemotoa teke too wa wene takamene.
Yame Yame
<<
55
>>
Yone
00
11
22
33
44
55
66
77
88
99
10 10
11 11
12 12
13 13
14 14
15 15
16 16
17 17
18 18
19 19
20 20
21 21
Yone Yone
<<
00
>>
^
Yone
Akolaline Agale
Ali Atoa Ue Motokama Yakene Yoneyo
Oma Yakenemo
Akolaline Sipi Sipi Kai Tine
Yesuyo Namolo Takoa Motane Oyali-mene
Yesuyo Pilipi Natanieleta Enoa Motanemo
Kena Take Panagono Atoa Motokanemo
Yesu Tobou Losu Yapu Pekenemo
Yesuyo Ali Atoa Peyane Tepene Piko Wene
Tetoa Enekomo
Yesuyo Nikodimasi Olaukakome Akenemo
Yesuke Akenemo
ATibu Kawa Nokago
Yesuyo Sameria Atoa-pala Ko Oa Kakenemo
Yesuyo Tobou Agono Mana Epetekanemo
Tau Tootokaneya Piane Ago Epetekanemo
Mea Kama Poadetepa
Yesu Patu Kautakoa Kamene
Yesu Kei Piki-kiti
Yesuyo Ege Egeta Kadukoa (5,000) Ali
Nee Lawetanemo
Yesu Ue Mine Tali Ludu Yakenemo
Ali Atoame Yesu Tuku Tanemo
Yesu Onepa Ali Atoa Mea Kama Pomotoa
Toko Nee Wa Adeka Pikome Akenemo
Ali Atoa Mea Kama Pomotoa Toko Agale
Yesuno Wamene-mikitame One-pala Akenemo
Yerusaleme Take Aga Kelekoa Yapu
Wia Toge Kia Mekoita Yesu Nokome Tanemo
Yesu I Agopa Keraisu Taatekoa Noko Patu
Yesu Dekoa Motokapomotoa Poyo Yene
Moa Wetekanemo
Ue Lene To a Ue Yokoa Kama Poatekomo
Ali Atoa Ete Otota Puutakutukanemo
Tobou Ali-kiti Yesuke Wene Tugamenemo
Parisi Yename Motane Atoa Eko Ali-pala
Koua Pitikale Enekete Tanemo
Yesuyo Itonoke Meki-kiti Pa Takakoya
One Poatekouta Kiwi Oyake Noamoi
Wa Yesuyo Akenemo
Eberameke Tagene Yeneke Akenemo
Leneta Lianeya Opiane Ago Epetekanemo
Parisi Yename
Leneta Lianeya Mekanakago Pitia Yakanemo
Sipi Sipi Kai Talo Agoke Pedoa Akenemo
Yu Yename Yesu Kote Moa Wakenemo
Lasarusi Tuaneyake Moa Kamotokanemo
Yesuyo Komo Oa Kakome Akenemo
Yesuyo Lasarusi Kamotokanemo
Yesu Wia Tukatekoi Oi Pedoa Pianemo
Besani Take Yesuke Padeya Ka lono Taneya
Pekoa Yotokanemo
Yesu Yerusaleme Take Noademe Nokale
Ali Atoame Ke Wa Kei Pima Nekenemo
Yesuyo One Tuatekamo Oa Pianeya
Yu Yene Yesuke Wene Tugameneya Meanemo
Yesuyo One Oya-lawene Kawake Kakene
Kakene Koganemo
Yudaseyo Yesu Mone Yenane Yonoke
Moa Piatekamo
Wenele Toatikimo
Pitayo Yesu Akoa Wawatekamo
Oneketai Mekota Ponadetepa One Yoto
Pitia Namene Wa Yesuyo Akenemo
Epetane Yomini Wini Noo Wa Oa Pianemo
Yesu Onepa Gerepi Po Pine
Itono Peku Noai Tokoi-kitame Yesuno
Oya-lawe-pala Kotimi Yoa Meatekoimo
Epetane Yominiyo Tokomo
Yesuno Oya-lawe Wene Keda Taneya Meake
Wedia Meatekoimo
Itono Peku Noai Tiki-kiti Moane
Kawikatapeku Wa Yesuyo Akenemo
Yesuyo One Oyali-kitane Kowitikanemo
Yesuyo Ali Atoa Peyane Kowitikanemo
Yesu Dekoa Motanemo
Yesu Anasi Mekata Aua Nekenemo
Pitayo Yesu Wakenemo
Anasiyo Yesu Pitia Yakanemo
Pitayo Winago Wene Toamuku Wa
Yesu Akoa Wakala Tanemo
Pailaseyo Yesu Pitia Yakanemo
Yesu Yomo Lekaneyake Wia Dekanemo
Yesu Tukome Tuanemo
Yesuno Modono Lamame Lagotanemo
Yesuno Tigini Moa Kota Keneke Pipanemo
Yesu Tuaneyake Moa Kamotokanemo
Yesuyo Magadala Maria Pono Yametanemo
Yesuyo One Oya-mikiti Pono Yametanemo
Yesuyo Tomasi-pala Akenemo
Yesu Taibiriase Ue Mine Nokome Tanemo
Yesuyo Pita-pala Akenemo
Wipitia Wia Mekanemo
Yone Yone
<<
00
>>
Yone Yone
<<
11
>>
YONE
Yesunomo Yoneyo Wia Mekaneya
1
Akolaline Agale
1
Namolo namolo titikome padeya deyaka wete latia piameneyake panago pa mea
kakeneya. Einago one ibinipa Akolaline Agale. Akolaline Agalepa Akolali-pala opia-kama
meaneya. Akolaline Agalepa oneka Akolali.
2
Namolo namolo einagopa Akolali-pala
odeneka meaneya.
3
Padeya padeya peya Akolaline Agaleyo Akolali patu kautakoa kakome
latianeya. Padeyaka one weneme titia alaneya mena. Akolaline Agaleyo-kama latikala taneya.
4
Padeya padeya peya alama nikilepa Akolaline Agale patu-kama kautakoa kakete alama
nekeneya. Eniya peya alakakagome ali atoa pa takoa meko.
5
Yomiyomu keneke eni pa
tokoa kakolopa yomiyomume moa atukamele toamoko.
6
Panagopa Akolaliyo moa wetekakale taatekoa nekeneya. Einago one ibinipa Yone.
7
Einago taatekoa nokomepa eni toko pa ko oademe noka. Nipa ali atoa peyame eni oka
yakoa motekete Akolaline Agaleke wene tugamotoa tokome one ko oma noka.
8
Einagopa
pa pinago mena. Pa pinago ko oademe taatekoa noka.
9
Pa pine agome ali atoa peya pa
takalogakoya. Yone meane-pete eni pa pa itonoke noademe nekeneya.
10
Einago itonoke taatekoa nokalepa einago i nekedeko wa ali atoame one wene
toamokoi. Akolali patu kautakoa kakome itono eya latia pianeyake one latikanakeya-kitame
one wene toamokoi.
11
One yatene mekoika eni nokoyake one yename one makutukoa
moamokoi.
12
Nitaneyake one makutukoa motokoi-kiti kipa Akolaline mana kono-mikiti
meamele toko wa moa kakapika. Nipa one ibinike wene tugoa mekoi-kiti nitika.
13
Akolaliyo
one mati-kiti opiou toa eni yenepa one mana kono-mikiti moa latikakilepa one tanele tokome
toko. Nipa ali atoame mati opikete tiki toa mena. One eni mana kono-mikiti itono alike
tageneya mena. Kiniketaipa Akolali one.
14
Akolaline Agale einagopa ali latia toto pake pa tekei nome meka. Eni nokomepa
pewe wia tagatapeneya mea nimini peku-pala nootapeneya mea toka. Nome mekale enekolo
pa teleta tootapeneya mekale totome enekoo. Nipa oneketaiyo one mana odene ago eni
peku lawetekale noa toma yakale enekoo.
15
Yoneyo one ko oai toka. Nitoa kayo oma yakome okome no namolo takoa
opianago kakuluka no moa patukademe toko. No wete opiameneyake one wete mea kama
nekene ago tokome no moa patukademe toko. One naniko taatekoa nokagomeke no moa
patukademe toko wane okounakagopa einago eni wa Yoneyo kayo oma yakeneya.
16
Akolaline Agaleyo etenane peku toto peya lawetekilepa pewe wima nokome toka.
17
Ali atoame papete litia toatekoi totono Moseseyo i i wa yametaneya. Nitaneyake Yesu
Keraisu etenane peku nootokoa taatekoa nokomepa ali atoa toto pewe-kama wia niminimo-
kama oa tokome wenele litia toateko totono yameteka.
18
Padameka Akolaline lene timini
enameneyake Akolaline mana odene ago one yono kounoke kakago nokome etenanemo i i
wa to awea oka.
Oma Yakenemo
(Matiu 3:1-12, Make 1:1-8, Luke 3:1-18)
19
Yerusaleme tobou Yu yename eya ali-kiti Akolalike lodo yotokoai tane ali-kitika
Lipai yatene ali-kitika takoa moa Yone kakata poe wa wetekaneya. Nipa ne ali te-pe wa pitia
yakoatino poe wa moa wetekaneya.
20
Nitikoli pitia yakanokoli Yoneyo agale kauameneya
to atapea okome okome nopa Keraisu mena-kale ekete
21
nipa nepa ali te-pe. Nepa Ilaida-pe-
koli okome e 'e mena wa okale ekete nipa nepa Akolaline agale to awea akamotoa totome
nepia meko ago-pe wa okoli okome e 'e mena wa akeneya.
22
Nimo okale e yename ekete
toto moa wetekakoi-kiti kakita pekete oateko toa oa mano. Nepa te-pe. Ne edane ago wa
yakoai tokoli okome
23
Akolaline agale papete to awea akane ago Aisaiayo eya wa oa piane
toane taatekoane nuku.
Ali piamene ta ludu panagome eya wa mo wima yawoo. Ali Muno noateko ka
nodokakapia one yawateko ka-kitika ki yotokakapia toatino toe wa taatekoa
nokome oo wa Aisaiayo papete oa piane toane taatekoane tuku wa Yoneyo
akeneya.
24
One eni pitia yakanane yenepa Parisi ali-kitame moa wetekane yene.
25
Eni yename
Yone eya waka pitia yakaneya. Nipa nepa Keraisu mena Ilaida mena Akolaline agale to awea
akatekago mena wa ekeke ali atoa ue motokakono, edekolo toko-pe-koli okome
26
noanume
kiwi pa ue motokakuno, kiwi pakeke panago taatekoa nome kakoyake kime agopa motiki.
27
Nopa namolo takoa opianeyake moa patukatekagoke uku. One auapeane one kawa yene
kekatukuyake pa keku ago tekene kekamele toamoko wa Yoneyo akeneya.
28
Enilepa Yodane ue eko matanuke Besani take Yoneyo ali atoa ue motokoai tane take
taneya.
Akolaline Sipi Sipi Kai Tine
29
Podolikama Yone eida kakome enekale Yesu noademe nokale enekome okome
Akolaline sipi sipi kai tinepa ita noademe ku nokono, enoe. Ali atoame toma yakoi poanele
kogoa mitapeatekago enina.
30
No namolo takoa opianago kakuluka one wete mea kama
nekene ago tokome no moa patukademe toko wane okounakagopa einago eni. One naniko
taatekoa nokagomeke no moa patukademe toko.
31
Noanumepa one agopa motokou.
Nitikouyake Iserele yename one nokale enekete einago i nekedeko wa wene tomotoane
tekene ali atoa ue motokama nuku wa Yoneyo oka.
32
Nitoa Yesuke okome okome Yodane
uele kakene enekolu Epetane Yomini ini weuwe keneya a tibu mea ketipea nome oneke
awinome mekale enekou.
33
Einago papete agopa motokounake Akolaliyo ali atoa ue
motokapamene wa no takoa moa wetekakagome no wene takapikome okome Epetane
Yomini panagoke awinome mekale enade toko. Epetane Yomini ali atoake awinomotoa
einagome too wa Akolaliyo nopala oka.
34
Akolaliyo eina okanakale taatekoa tokale
enekouya tekene einagopa Akolaline mana tadeko wane to aweane ukuna-ye wa Yoneyo oka.
Yesuyo Namolo Takoa Motane Oyali-mene
35
Podolikama Yone one oyali takuta-pala opia kakome enekale Yesu ponokale
enekome okome
36
Akolaline Sipi Sipi Kai Tine ku ponokona wa okale
37
yatekete one
oyagota Yone tewitikoa pote Yesu litima pokoi.
38
Nitikoli Yesuyo ete peketapekome
enekale einagota one litima nokoli enekome okome edeya tuku toma niki-pe-kale ekete
Labai nepa manika mekato-pe wa yatekoi. (Labai wapa Tikisa ago wa ekete akeneya.)
39
Einagotame nimo okoli okome nipa enenoe-kale one meka yapu pote enepaneya. Nipa
lou wegoukaka (4 kilokoke) tadiya tokale eida mea pitaneya.
40
Yoneyo okale yakamotekete
Yesu litima pokoi agota pade Saimone Pitane wamenago Aderu.
41
Einagome wamene
Saimone tuku toa enamutukome okome Mesaia wa papete ibini oa piane agopa wete
enekoo wa opoka. (Mesaia Geriki agaleke eketepa Keraisu wa oi.)
42
Aderuyo Saimone
Yesuke aua nokale Yesuyo enekome okome nepa Yonene mana Saimone. Opii titimoa
nepa Sipasi wa ibini ato wa Yesuyo oka. (Sipasi Geriki agaleke eketepa Pita wa oi. Nipa
kakene kue wa ekete oi.)
Yesuyo Pilipi Natanieleta Enoa Motanemo
43
Podolikama Yesu Galili take pouno wene pia poademe pokome Pilipi kotukome
okome no pukuka patono no wa enemoma poka.
44
Pilipi onepa wamena Aderu Pitata-pala
Besaida take odene-mene meane ago.
45
Einago Pilipiyo eyago Nataniele enemotokome
okome Moseseyo one totono wia mekakomeka Akolaline agale papete to awea akane ali-
kitame kini boku-mene wia mekaketeka Mesaia taatekoa noatekamo dekoa wia mekaneya. I
wa papete wia mekapiane ago totome enekoo. Einagopa Nasarese Yesu Yosepene mana
tadeko wa Pilipiyo okale
46
Natanieleyo okome Nasarese take padele epetanele edoa
witamotoa-pe wa okale okome nipa einago enoano noo wa Pilipiyo akeneya.
47
Nimo okale
yakamotokome noademe nokale Yesuyo enekome Natanieleke okome etene Iserele ago ku
nokona. Pademoka oa yotokamene ago eni wa oka.
48
Nitikale Natanieleyo Yesu yatekome
okome neme nopa edoa wene toko-pe-kale okome Pilipiyo ne no wa pade wete wamokake
neke take yomo piki todoke mekale no ita mekene enekou wa Yesuyo oka.
49
Nitikale
okome Tikisa ago nepa Akolaline mana toto Iserele yene lukoa meateko ago toko-la wa
okale okome
50
nepa neke take yomo piki todoke mekale ita mekene enekou wane okounake
nooke wene tugako-pe. Ina okounapa pa nami wane okouna. Nanikodopa padele telekole i
moa patukatekole-kiti enade toko wa ootokoa okome
51
kipala nimini ukuno yakoe. A tibu
peaneya pikaya keneke edelo ali-kiti no Ali Yatenane Oyago mekouta keti nekete ate pekete
toa kakoile enoi wa Yesuyo oa pika.
Yone Yone
<<
11
>>
Yone Yone
<<
22
>>
2
Kena Take Panagono Atoa Motokanemo
1
Ta takupeta patatekaneyake Galili ta keneke piko Kena take panagono atoa
motokakoita Yesuno nineka eida pome mepaneya.
2
Einata einapetepa Yesu neke oya-lawe-
pala namene wa agale oa wetekakoli oneka noka.
3
Nome mekaka e yename gerepi po ku ue
napetapeneyake niname Yesu-pala okome kini noatiki gerepi po ku ue piamoko-kale okome
4
anu oyatoa anukule toateku-petepa opi menano, anu toatekule neme witakoa akamea wa
okale
5
niname yapu pupu takane yene-pala okome okome oneme toe wa okole-kama
tamene wa oka.
6
Yu yene kini tanele teketepa aline wene moa koigakoya i koguna wa adeka pikete nee
eya noadete mekete yono abe kogakiya. Nitimotoapa yapu yename kamo itonome toa
latiane mete uoya ko melepu (6) kakoa moa pianeya. Tone derame meteke panagome-kiti ue
nomoa eni mete odeneke pekoai tokomepa ko melepu (6) kakoa-peta nomoa pekakalepa
nipa adoo.
7
Yesuyo yapu pupu yene-pala okome okome ue nomoa i mete-kiti wete
kapetekoe-kale ue nomoa pekoai toa kapetekaneya.
8
Nitikoli okome eni mete keneke meko
ue pade nomoa moa toge kimotoa yopikago mekota aua poe-kale ue nomoa moa aua
potokakoi.
9
Nitikoli yopikagome moa yuumoa nakome okome ekee ipa epetane gerepi po
ku ue tadeko wa nakomeke nomotokoika wene toamoka. Wene toamokaleka eina ue
nomotokoi yename wene tokoi. Nitaneyake toge yopikagome atoa motokago ne noo wa
okale nokale okome
10
tone toge kikoa mekete-kama gerepi po ku ue epetane mati namolo
takoa moa laweteko. Nitikolo ali atoa noa tagoa kitipu mekoli pa gerepi po ku ue moa
laweteko. Neme pade nitamoko. Nipa neke gerepi po ku ue epetane mati pa pikoa mea opii
moa laweteko wa toge yopikagome oka.
11
Yesuyo enile tokapa ele kule telekole pene toademe enileme titika. Nipa Galili pikoka
Kena take toka. One eni toka telekole eni eneketepa one tuku (12) kakoa oya-lawe oneke
wene tugakoi.
12
Nititikaneyake Yesu Kena ta tewitikoa pokome one nine wamene-mikiti one
oya-lawe-pala Kapaneame take pa tekei pome mepoka.
Yesu Tobou Losu Yapu Pekenemo
(Matiu 21:12-13, Make 11:15-17, Luke 19:45-46)
13
Edelo ago patukane wa ibini akene toge kiatekoi tigotokale Yesu Yerusaleme take
ate pome mepoka.
14
Nitoapa tobou losu yapu pokome enekale pade-kitame pitimekawe kai
sipi sipi kai ini puluma eya topo toa mea pade-kitame kini kue piane leyo waneke kue topo
toa mea tokoli eneka.
15
Enetekoa po wapi moa eina ali-kiti kini sipi sipi kai pitimekawe kai-
pala akolono wia tikatapeka. Nitoapa kue topo toa kakene yene kini kue piane leyo-kiti moa
pekatapea kini kueka wia tadekatapea toka.
16
Nitoapa ini puluma topo tane yene kikoa
okome okome Agetaine yapupa kini makesi yapu tetepo takameo. Wini ini puluma-pala
wete aua poe wa wia tikatapeka.
17
Nitikale eneketepa Akolali neke yapu mama moane talo
tukuleke tete moane tuadene meku wa papete wia mekapiane toa eni taatekoa tadeko wa
one oya-laweme wene tokoi.
18
Yesuyo enile tokale enekete e Yu yename ekete neme wini tokolepa Akolali patu
kautakoa kake tadekalepa padele telekole toano ta-koli okome
19
i tobou losu yapu ke awea
tadekatapekolipa ta tebolo-peta lia patakale eni-mene moane awitikakoane wa wiou-kale
ekete
20
i tobou losu yapupa wia mekoli ege odepeta kadukoa (46) mali penaneyake nemepa
ta tebolo-peta lia patakale oyake moa awitikakoa wa wioo-pe wa okoi.
21
Yesuyo eni okapa
pinali one tigini-pala toatekoileke okome oka.
22
Yesu tuaneyake Akolaliyo moa
kamotokakalepa one oya-lawemepa einapa enike akedeko wa wene tokoi. Nitiketepa eina
papete wia mekapiane agaleka Yesuyo eina okana agaleka etene taatekaneya tadeko wa
wene tokoi.
Yesuyo Ali Atoa Peyane Tepene Piko Wene
Tetoa Enekomo
23
Edelo ago patukane wa ibini akene toge kia mekoi-pete Yesu Yerusaleme take nome
mekome padele padele telekole tokale enekete ali atoa kainya mati oneke wene tugakoi.
24
Nitikolika ali atoa peyane tepene piane wene tetoa enekome tokome e yene-pala oya patu
piamoka.
25
Nipa kini tepene piane wene tetoa enekago tokome i ago-kiti one tepene ede
wene piko-pe wa ete-kiti pitia yatekileka toamoka.
Yone Yone
<<
22
>>
Yone Yone
<<
33
>>
3
Yesuyo Nikodimasi Olaukakome Akenemo
1
Parisi ago pade Nikodimasi wa ibini akene agopa Kanosolo ago meaneya.
2
Ta
lianeya keneke einago Yesu mekata nokome okome Tikisago Akolaliyodo auapeamokalepa
padele padele telekole neme tokolepa padameka oyake toamoino, nepa Akolali mekota
kawa noke olaukakago tadeko-kale okome
3
nimini ukuno yakamene. Panago wa lokoa
opiamene agopa Akolaliyo talo toko ta oyake enepamoo-kale Nikodimasiyo okome
4
ali
wetini tane agopa niname edoa wa lokoa opimotoa-pe. Niname wa opimotoa tokome wetini
ago one ninane tepene oyake pamele toko wa eke oko-pe-kale Yesuyo okome
5
etene nimini
ukuno yakamene. Panagome ue moamoa Akolaline Yomini awiameneya pa mekomepa nipa
Akolaliyo talo toko take pamele toamoko.
6
Ali atoame mati opikilepa pa kini kotu pia-kama
tiki. Epetane Yominiyo Akolaline mati-kiti opikakilepa one kotu pia-kama toko.
7
Ne wa
lokoa opimotoane uku wane ukunake wene kainya piameamene.
8
Pupulege popokakomepa
one weneme-kama titia popokako. Nitoa popokakome ee okamo yateketeke titia nokota
enamoa pokota enamoa tiki. Enipa Epetane Yominiyo Akolaline mati opikakome toko
adeka eni pikene uku wa Yesuyo akeneya.
9
Nimo okale Nikodimasiyo okome neme wini okopa edoa tomotoa oko-pe-kale
okome
10
neka Iserele yenane totono olaukoa tokagomeke i ukumo wene toamoko-pe.
11
Etene nimini ukuno yakamene. Enipa tone wene tokomo oa mea tone leneme enekoya
to awea oa tokoyake ali atoa kime yakoa moamiki.
12
Itonole tikile-kitike oane metekumopa
kime yakoa moamikino, a tibuke tikile-kitike oane metekoumopa edoa yakoa moadete-pe.
13
Padameka a tibu enepikile toameneya. No Ali Yatenane Oyago a tibu kawane ketipeane
nuku agome odene aida mekene enekoumo to aweane uku.
14
Moseseyo ali piamene take
kaya yomini latia yomo ludu munoke dekoa moa kakaneya. Moseseyo eni tane toa pade ali-
kitame no Ali Yatenane Oyago dikoa yomo luduke dekoa kamotokoi.
15
Nipa nooke wene
tugoa mekoi peya pa mea-kala kama pomotoa nitoi.
16
Akolaliyopa ta piko peyake pitiki-kiti
one kolotini yene wa wene mekoa mekome tokome one mana odene agopa ali atoake
tumotoa moa wetekaneya. Nipa manake wene tugoa mekoi-kiti tuapa atuameneya mea-kala
kama pomotoa tokome taneya.
17
Moa wetekakomepa kini tanele poanele tadikino, poane
take poe wa koiso akamotoa wetekaneya mena. Toa momotoa tokome ni moa wetekaneya.
18
Manake wene tugoa meki-kiti koiso akoa kibu moamatekoyake manake wene tugamiki
yenepa poane take wetekou wa koiso wete akoa pianeya. Nipa one mana odene agono
ibinike wene tugamadete wakili tokome toko.
19
Nipa pa pinago kiwi mekoika nekeneyake
poanele pa toma pou wa wene pianeya mekete eni pa wawa yomiyomuke wene mekoa
mekino, kiwi kibu moatekulepa eni wa kini koiso wete akoa pianeya.
20
Poanele toma yaki-
kitame eni pa pa kote moa waki. Nitoapa kini poanele keleyo witakaya tokolo pa keneke
witoa noamokala tiki.
21
Nitikiyake nimini peku noa tiki yenepa eni pa keneke witoa nokala
tiki. Nipa kini tikilepa Akolali patu kautakoa kakete tadiki wa ete-kitame wene tomotoa tiki
wa Yesuyo oka.
Yesuke Akenemo
22
Nititikaneyake Yesupa Yudea take pato wa one oya-lawe-pala opia pome eida tayo
lono mea kakome ali atoa ue motokakala toka.
23
Nitikakoa Yonepa Salime ta liti piane
Inone take mekome ali atoa ue motokakala taneya. Nipa eni ta ludu ue kainya yotokale
tokome taneya. Eidapa ali atoa nekete kiwi ue motokoano ta-koli ue motokakala taneya.
24
Enilepa Yone po yapu wete moa pitikameneyake taneya.
25
Yu yename kini losule tekete abe koganelekepa Yoneyo okagale yakane ali padeka-
kitame pade Yu ago-pala ete taka oto taka toa kakeneya.
26
Nitoapa Yone kakata nekete
ekete Tikisa ago nepala Yodane ue eka lono opia kakanakago neme onekemo akakagome
ali atoa ue motokakala toko. Nitikolo peyame ne tewitikoa one kakota-kama pokala tiki-koli
okome
27
panagome Akolalinele takakilepa a tibuke meko Akolaliyo one peku lawetekolo
nakomepa oyake toko. Pa one weneme tokoya mena.
28
Nopa Keraisu wa papete ibini oa
piane ago taatekoane noamuku. One naniko nomotoa Akolaliyo no namolo takoa
wetekakolo nuku wane kipala okouna. Enipa nimini ukutu-pe.
29
Atoa tu pikagopa atoa
moatekago eni. Einatoa motokolopa one oya patu piane agome one kakoya liti kakome one
okagale yatekome wedia kako. Opa no einago keneya wediane kolotini to ane kaku.
30
Ali
atoame anu oyago Yesuno ibini kamotoka kamotoka tekete anu ibini etepea wene kayapema
pamediki wa Yoneyo akeneya.
A Tibu Kawa Nokago
31
Yoneyo nimo ootokoa kakome okome a tibu kawa noko agome ete yene peya moa
patukoapa etene ako ago kako. Itonoke alane agopa pa itono peku noa tokome one kaua-
mikitame olaukama nekenemo oa mekala toko. A tibu kawa nokagomepa ete yene peya
moa patukoa etene ako ago kako.
32
A tibuke mekome yakoa enoa tokaya-kiti i i wa to awea
onaneyake padameka yakoa moamiki.
33
Nitikiyake one to awea okomo yakoa motiki-kitame
yatekete ekete Akolalipa niminimo-kama oko ago tadeko wa iki.
34
Nipa Akolaliyo moa
wetekakale nokagome Akolaline agale-kama akakolo yatekete ni iki. Akolaliyo one Epetane
Yomini einagoke awia tagatapemotoa metekome metaneya.
35
Nitoapa einago one mana
agoke wene mekoa mea tokome padeya padeya peya one yonoke moa pianeya.
36
One
manake wene tugoa meki-kiti pa mea kama poadete tiki. One mana kote moa waki-kitame
mea kama poatiki ta enamekete pa etepea tua poadete tiki. Nitiki yene-pala Akolaliyo kotimi
yoa meko.
Yone Yone
<<
33
>>
Yone Yone
<<
44
>>
4
Yesuyo Sameria Atoa-pala Ko Oa Kakenemo
1-2
Ali atoa ue motokakilepa Yesuno oya-laweme tokoiyake Yesuyo pade nitamoka.
Yesuyo nitamokoyake pade-kitame ekete Yesuyo ali atoa ue motokakilepa Yone moa
patukoa toko wa okoi. Kini eni okoimo kugu Parisi ali-kitame yakadekoli
3
Yesuyo one oya-
lawe-pala Yudea ta tewitikoa Galili take wakapea poademe poka.
4
Galili take eni poademe
Sameria ta patukoa pamedeka.
5
Nitoa pokome Sameria ta keneke piko Saika take pome
kaka. Namolo namolo Saika ta liti Yekobeyo one itono pade oto pia mana Yosepe
yametaneya.
6
Eni yametane taapa Yekobeyo oloyo pade eida moa ue mekaneya. Nitaneta
Yesu ka ludu noka matiyame koome tukome eina oloyo kabunuke ko mepoka. Nipa lou
matai ponome kakaka (lou pini 12 kilokoke) tadiya eida pome ko mepoka.
7-8
Eida mekakoa one oya-laweme nee topo toa moadetepa ali atoa pitikoika kutu
pokoi. Nitikolipa Sameria atoa padame ue nomoademe nokale Yesuyo okome ue nouno,
mano wa okale okome
9
nepa Yu agomeke no Sameria atoa ue nouno, mano wa wini
okono, dekolo oko-pe wa akeneya. Nipa Yu yene Sameria yenetapa etene pilia kakeneya
tokome ni akeneya.
10
Nitikale Yesuyo okome Akolaliyo ne moa meatekoya wene toamoa ni
ue nouno, nomoa mano wa okago wene toamoa toko. Eni wene too tokapa nipa noateku ue
pade nouno, nomoa mano wa neme noanu-palaka oo toka. Nimo oo tokapa lene to a yoa-
kala kawateko ue meou toka-kale okome
11
kamo koniyali i oloyopa keti kokaketikaneya
mati pikono, ita ue nomoateko mete pade ne toamokono, yoa-kala kawateko uepa neme
edoa nomoa no meteko patu.
12
I oloyopa tone kauago Yekobeyo papete moa pikaneya.
Nitaneyake onemeka one mana-mikitameka one egetaneya-kitameka i oloyoke-kama ue
nonokala taneya. Yekobeyo enile taneyake neme pade ue meou wa wini okopa tone kauago
Yekobeyo tane toa moa patukake oko-pe-kale Yesuyo okome
13
i oloyo moa mekane uepa
padame nomoa nakomepa wa nodo tokala too. Nitatekoyake noanume meateku ue
nakomepa wa ue nodo toamoo.
14
Noanume meateku uepa ali atoane tepene ue lene peleou
toa yoa-kala kawoo. Nipa kiwi mea kama pomotoa too wa Yesuyo akeneya.
15
Nimo okale einatoame okome kamo koniyali wini oko uepa no nouno, mea ta. Eni
ue nakolupa wa nodo toamokale mekene i ue nomoai toamou-kale okome
16
nekane oto
noo wa kayo oano pa. One-pala oto neke namene-kale okome
17
anukane pade kawamoko-
kale okome winipa nimini oko.
18
Neke ali ko kakoake pokala toka. Opi poke mekagopa
nekane mena. Enipa nimini oko-kale okome
19
kamo koniyali winimopa nimini okono, nepa
Akolaline agale to awea akakago tadekono, eya wane ne yatekene uku.
20
Tone kaua-
mikitame yete tono waneke-kama Akolali kei pia kowitoai toma nekeneya. Nitaneyake Yu
yene kime ekete toto peyame Akolali kei pia kowitikilepa Yerusaleme take-kama tamedeko
wapa iki-kale okome
21
anu oyatoa nepala ukumo yakoa moamene. Naniko Agetai kei pia
kowitikilepa yete tonokeka Yerusaleme takeka kowitamekete kini kini mekika tokala toi.
22
Sameria yene kipa kini kei pia kowitikiyapa agopa tokolo pa etepea kowitoa meki.
Akolaliyo ali atoa toa motikilepa toto Yu yene pake titia toko. Nitikono, toto Yu yenepa
tone kei pia kowitikoyapa i wa wene toko.
23
Nitikoyake eya toatiki etene tigotoma noko.
Agetai kei pia kowitikete toatiki toa kowitiki yenepa Akolali weneke luaneya mekete nimini
peku noa tekete tepene kowitikala toadete tiki. Akolaliyo dikaki-kitame one kei pia
kowitimotoa okono, nitadete tiki.
24
Akolali onepa yomini-kama toko. Onepa nitane agono,
one kei pia kowitiki yenepa Akolali weneke luaneya mekete nimini peku noa tekete tepene
kowitikala tamediki wa Yesuyo akeneya.
25
Nitikale einatoame okome eyago Mesaia
noademe tokono wene tuku. Einago nokomepa Akolalinemo-kama toto-pala to awea akoo-
kale okome
26
neta kakome ko oa kakagopa einago eni wa Yesuyo akeneya. Einatoame
Mesaia wapa Keraisuke okome akeneya.
27
Einata einapete one oya-lawe wakapea nekete enekoli Yesuyo mone atoa-pala ko oa
kakedeka. Nitadekale wene kainya mati pianeya kaketeke edeya moade oko-pe. I atoa-pala
dekolo ko oko-pe wa Yesu yakamokoi.
28
Nitaneyake einatoame one ue mete eida piilogoa one yene pitikoika wakapea poka.
Pome kakome one yene-pala okome
29
noanume toma nokoule-kama to awea okagopa ku
mekome toko. Einagopa Keraisu wa papete ibini oa piane ago patuno, enoatino noe wa
akeneya.
30
Nitikale yakamotekete Yesuke noadete nekeneya.
31
Noadete nokoika Yesuno oya-laweme one tika tika toa kakete ekete Tikisa ago neke
nee pade moa na-koli okome
32
no noateku neepa pade pikoyake kime pade wene toamiki-
kale
33
one oya-lawe yakaate tekete ekete padame one nee pade wete moa lawetaneya patu-
koli okome
34
no moa wetekakago one wene pikole toane oneme tamene wa okole-kama
toane peya takakupa anu noateku nee eni.
35
Kime eya wa pedoa agale ikina. Tokene tuyono
patukakalepa ipe ludu kakoya nee wakoa moa yapu ludu piato wa ikino, noanume ukumodo
yakoe. Ipe kakoya-kitipa wakoa moateko toa opii nodokoa kibutua kakono, enoe.
36
Wakoa
motokako agomepa nipa mea kama poatikiya eni wakoa moma poko. Wakoa motokama
pokoka pinagome ke wa nami wia pupu poi motoko. Nipa matakago-pala wakoa
motokakagota wedikete wedia meki.
37
Kini pedoa agale ikina toapa panagome ipe matama
pekeneka padame wakoa motokama poko.
38
Nipa poliga yoameneya ipe matama
poamenekeka eniya wakoa motokama poati wane kiwi wetekakouna. Ete-kitame poliga yoa
ipe eida matama pekeneka eni yene luku pekete eni yenaneya wakoa motokama piki wa
Yesuyo oka.
39
Einatoa pitika take yenepa Yesuke wete noameneyake kainya mati oneke wene
tuganeya. Nipa noanume toma nokoule-kama kuyagome to awea oka wa einatoame okale
yatekete tekete Yesuke wene tuganeya.
40
Nitimotekete Yesu mekata nekete kowitikete ekete
toto pitiko take noke meano, noo-koli pokomepa ta taku-peta patamotoa eida mea kaka.
41
Nitoa mekome okale yatekete eni yene padeka-kitika oneke wene tugakoi.
42
Nitikete
einatoa-pala ekete namolopa nemena i agome tokale kotukoa onokanakedo oneke wene
tugakoo. Opipa i ago toto pake kakome agale oa metekolo yatekete tekete oneke wene
wedoa tugako. I agopa ali atoa toa moatekago tadeko wa okoi.
Yesuyo Tobou Agono Mana Epetekanemo
43
Ta taku-peta patatekaneyake Yesuyo eni ta tewitikoa Galili take pome mepoka.
44
Yesu eni pokapa eya wa okanake poka. Akolaline agale to awea akakagopa one take
yename paya tetepo takoa wakiya wa okana.
45
Galili nome mekale eina yename one
makutukoa motokoi. Nipa edelo ago patukane wa ibini akene toge kia mekoi-pete Yesu
Yerusaleme take pome mekome telekole tokanakale-kama enekoiya tokome ke wa
makutukoa motokoi. Nipa kiwika eina toge lobutupekete one telekole tokoinakale enekoiya
tekete one makutukoa motokoi.
46
Yesu Galili ta ludu pima yakome Kena take pome mepoka. Nipa pa ue moa gerepi
po ku ue latikana take wa pome mepoka. Nitikata ta talo tokagoke lukoa meane tobou ago
pade one mana Kapaneame take yene pimotoa wawa Yesu kotua noka.
47
Nipa Yesu Yudea
ta kawa Galili take nome kako wa okoimo yatekoya tokome noka. Yesu kakata eni
nokomepa one mana pene tuademe pikono, Kapaneame take poke epetekakoano poa ta wa
kowitikakale okome
48
Agetaine peku noane tukule padele telekole toane kini wene kainya
pikakule enameketepa nipa nooke wene tugakile toamoi-kale
49
tobou agome okome kamo
koniyali oto lukakoa tukayano, wete pata wa kowitikale okome
50
neke mana tuamoono,
poano pa wa okale einagome Yesuyo nimini oko wa wene tokome one take wakapea poka.
51
Poademe pokale one pupu yene kotua nekete ekete neke manapa tuameneya pene latoa
meko wa onaneya.
52
Nitikoli manipete lataka-pe wa okale ekete abela lou matai tetekakale
(lou pini 1 kilokoke) one poto yene te itaka-koli
53
etename wene moa pitikakome abelana
Yesuyo neke mati tuamoo wa okale eina eina latakome tadeko wa wene taneya. Nitaneyake
einago one yapu pitikoi peya-pala Yesuke wene tuganeya.
54
Yesuyo ele kule telekole
tikilepa Yudea ta tewitikoa Galili take pome mekome telekole taku takoa eida tokome enile
toka.
Yone Yone
<<
44
>>
Yone Yone
<<
55
>>
5
Tau Tootokaneya Piane Ago Epetekanemo
1
Nititikaneyake Yu yene kini losule tekete toge kia mekoi-pete Yesu Yerusaleme ate
wakapea poka.
2
Yerusaleme take sipi sipi kai wa ibini akene kago pikane lono ue mine pade
meaneya. Eni ue mine matanuke ali atoa todo takatekoya ko kakoa wianeya kakeneya. Eni
ue minepa Iberu agaleke Beteseda wa ibini iki.
3
Eni todo takatekoya keneke eya ali atoa
leneta lianeya kawa okeaneya tau tootokaneya piane ali atoa oboai taneya. Nipa ue bua bua
wa ka umotoa nepia meai taneya.
4
Padepete-kiti Akolaline edelo ago ue muke ketipea nokale
ue bua bua okala toka. Nitikalepa uele namolo takoa pome pitikagopa one tanele
epetekakale latoa pekeneya.
5
Nitanetapa panago tau tootokaneya pia mekale mali padeka
tuku kakoa (38) penaneya.
6
Einago pikata Yesu nokome enekale eida tau tootokaneya pia
kakeneyano wene tokome yatekome okome nepa latoa poade oko-pe-kale okome
7
kamo
koniyali nopa eni ue bua bua okoka auapea aua poatekago toamokolo pa piane meku. Eni
ue muke ketipeane poadene wili toane mekulu panago namolo takoa patukakala toko-kale
okome
8
wete kamokoa neke tatia pitikoya-pala moa aua pa wa okale
9
eina eina latoa
kamokakome one tatia pitikaya-pala moa aua poka. Yu yene kini ko mea pupu toamatekoi-
petepa enile toka.
10
Nitikale e Yu yename eina latoa poka ago-pala ekete opi Yu yene tone
ko mea pupu toamateko-pete kekaneya latikakole toa neke tatia pitikoya-pala aua ponokopa
tone kekanele wini toko-koli okome
11
no epetekoa wetekakagome neke tatia pitikoya-pala
moa aua pa wa okolo tuku-kale ekete
12
eni neke tatia pitikoya-pala aua pa wa okagopa te-
pe wa yakaneya.
13
Nitikolipa eina latane agome one epetekakanakago agopa motaneya.
Nipa ali atoa kabeta pake Yesu wete witimotokome pokale tokome ni agopa motaneya.
14
Naniko Yesuyo einago tobou losu yapu kakale kotukome okome anu oyali nepa opi
latoa kakono, neke namolona tane yene moa patukoa naniko wa ke tubeya enekakayano,
neke toma poka poanele-kiti wake wamene wa okale
15
yakamotokome eina Yu yene
mekoita pokomepa one latekakagopa Yesu tadeko wa opaneya.
16
Yesuyo enika enile
tikilepa Yu yene kini ko mea pupu toamatekoi-peteka tokale tokome enipete titimoa one tete
meai tokoi.
17
Nitikolipa Yesuyo okome Agetaiyopa i pupu-kama toko. Noka one peku
noane pupu-kama tuku wa oka.
18
Nimo okamoke Yu yename Yesu wia tukadete wedoa wili
toa kakeneya. Nipa kini ko mea pupu toamateko-pete kekaneya latikakole pupu eni tokono,
Akolalipa oneketai waka oa tokono, onepa Akolali-pala midi piane tetepo takakome oko wa
ni wioukete taneya.
Mea Kama Poadetepa
Yesu Patu Kautakoa Kamene
19
Nitaneyake Yesuyo okome nimini ukuno yakoe. Padeleka noanu weneme titiane
toamuku. Agetaiyo tokole enoane kotukoane tuku. Nipa Agetaiyo peku lawetekolo one
mana noanume noane tuku.
20
Agetaiyo nopa one kolotini ago one mana wa nooke wene
mekoa mea tokome one peku lawetoa tagako. Agetaiyo eni yametekana toa moa
patukakome padele padele telekole toatekoule yameoo. Nipa kini wene kainya pianeya
memotoa tokome nitoo.
21
Agetaiyo tua pekene ali atoa mea kama poati wa moa
kamotokako toane one mana noanumeka ali atoa anu weneme takoane motekene mea kama
pomotoane tuku.
22
Agetaiyo ali atoa kini toma yakoile pitia enoapa poane takeka epetane
takeka takoa wetekakoya mena. Nitameneya kini toma yakoile neme pitia enoapa poane
takeka epetane takeka takoa wetekakamene wa Agetaiyo no moa kakapika.
23
Nipa ali
atoamepa one kei piai tiki toa one mana noka kei piai tomotoa tokome toka. One mana no
kei piamiki ali atoamepa Agetai no moa wetekakago kei piamekete tiki.
24
Etene nimini
ukuno yakoe. Anu agale yakoa motekete no moa wetekakagoke wene tugoa meki-kitipa
mea kama piki. Nipa kini poanele-kala toma yakike nami wiane kibu moamukulupa poane ali
atoa tua pote atuatiki ta tewitikoa mea kama piki.
25
Etene nimini ukuno, yakoe. Tua pekene
ali atoame Akolaline mana noanu tobotobo yakakoa kawatiki tigotoma nome dekanoko.
Enilepa wete taatekoa toko. Nitikono, anu tobotobo yatekoi-kiti kamomotekete mea kama
poi.
26
Agetai one weneme mea kama noko agomepa one mana noanuka anu weneme meane
kama nomotoa toka.
27
Nipa no nepa Ali Yatenane Oyagono, one patu kautakoa kake ali
atoa takoa enamene wa moa kakapika.
28
I ukulu yatekimoke wene kainya piameamene.
Nimini taatekoa toatekomo ukuno, yakamene. Oloyo tane yene peyame Ali Yatenane
Oyago anu tobotobo yakamotekete
29
kiwi oloyo taneka tewitikoa kamoa poi. Nipa
epetanele toma yawa tukoi yene kamoapa mea kama poi. Poanele toma yawa tukoi yene
kamoa pokolipa kini poanele-kala toma yakoike nami wiane koiso akoane kibu mou.
30
Noanu weneme padeleka titiane toamuku. Nipa ali atoa takoane enekilepa Akolaliyo
olaukakome oko toane tuku. Nilepa anu wene litiane toamuku. No moa wetekakagono wene
pikole-kama tou wane tuku. Nitikuno, kini koiso yakoane ile tadiki wane ikilepa kiyoke-
kama tuku.
Yesu Kei Piki-kiti
31
Pinali anu wa keido pikenepa nimini ekene wamou.
32
Panagomepa no kei pikoya.
Einagome anukumo to awea akedekopa nimini akedekono wene tuku.
33
Pitia yakatekoi yene
Yone kakata kime moa wetekakoli nokoli Yoneyo anukumo to awea akedeko wane uku.
34
Nimo ukuyake padameka no auapea kei piatiki toa mena. Kipa nooke wene tugakoli toane
moada wane wene piane tekene Yoneyo anukumo to awea akedekomo wene takakene
ukuna.
35
Yone einagomepa labo keneya ali atoa pa takalogakoya. Nitane tokale kime one
pa ke wedia meato wa oneke tegetekapote me me tokoina.
36
Yone einagome anukumo
to awea ikilepa pa nami deya akeneya. Agetaiyo tamene wa no yametekana toane toma
yakilepa nipa ali atoame no i agopa Agetaiyo moa wetekakago tadeko wa wene tomotoane
tuku.
37
Agetai no moa wetekakagomeka anukumo to awea okoya. Kime Agetaine agale
yatekileka toamoa one lene timini-pala enekileka toamoa tiki.
38
Agetaiyo moa wetekakago
nooke wene tugamekete tekete one agale kime yakoa luamele toamoko.
39
Mea kama
poatekomo Akolaline bokuke e wia mekaneya pikono, oi moato wa kime one boku lewea
tuku tokala tiki. Ae, Akolaline bokuke wia mekane yename no ko-kama akeneyake kime no
wene toamiki.
40
Nipa mea kama poono wene piketeke nooke noamadete wakala tiki.
41
Ali atoame no kei piamikilika kei pikilika nitoa kamotoane pa atiki toane meku.
42
Kini
tepene piko wene keleyo tetoane enekulu Akolalike wene mekoa meameadiki.
43
Agetai patu
kautakoane kakene nukuluka kime no makutukoa moamikino, oneke wene mekoa
meameadiki. Ae, panago one wenemedo kiwi mekoita wini nokalepa ke wa makutukoa moi.
44
Akolali wa oko agopa odene ago kako. Einagome kiwi kei piamikilika tokamota wa paya
nou toa mekete kini kini ete oto wa kei pinali yokala tiki. Nitikino, nooke edoa wene
tugadete-pe.
45
Kini poanele-kala toma yakoilepa Agetai-pala i i wane kiwi akoane
wamouno, no i agome kiwi akoane ou wa wene piameamene. Mosese einagopa kiwi mape
moatekago wa wene pianeya mekiyake einagome kiwi akoa agale oo.
46
Moseseyo one
boku-meneke no ko oa wia mekaneya. One wia mekanemo kime yakoa moi tokapa nipa
anume ukumoka yakoa moi tokake
47
Moseseyo nooke wia mekapianemo yakoa
moamikino, anume ukumo edoa yakoa moadete-pe wa Yesuyo oka.
Yone Yone
<<
55
>>
Yone Yone
<<
66
>>
6
Nee Lawetanemo
(Matiu 14:13-21, Make 6:30-44, Luke 9:10-17)
1
Nititikaneyake Yesu Galili ue mine eka matanuke ue dipike mea pome mepoka. Eni
Galili ue minepa Taibiriase waka ibini akeneya.
2
Yesu eni pokalepa ali atoa peya matiyame
one litima nokoi. Nipa one padele padele telekole tokome yene tane-kiti epetekakale
enekoiya tekete litima nokoi.
3
Nitaneyake Yesu tono padeke ate lewia pokomepa one tuku
kakoa (12) oya-lawe-pala aida witipitoa meka.
4
Edelo ago patukane wa ibini akene toge
kiatekoi tigotokale enile toka.
5
Yesu aida mekome kabe togapia enekale ali atoa obomoa
noadete nokoli enekome Pilipi-pala okome i yene lawetateko neepa manika topo toa
motokoo-pe wa yateka.
6
Nipa nee moa lawetateka wene tokomeke pa Pilipiyo oatekamo
yakademe oka.
7
Nitikale Pilipiyo okome ege kadukaka kadapime kadukoa (200) kinado
wetekoa palawe wane-kiti motokakolopa adamoo-kale
8
yatekome Yesuno oyago pade
Aderu Saimone Pitane wamenago einagome okome
9
i kako matiyamepa bali palawe wane
ko kakoa-pala (5) mou yomo takuta toa pikoa kako. Eniya-mene moa lawetekoloka
adamoo. I ali atoa kainya mati mekino, tokamato wa oka.
10
Eidapa poma piitapeneya. Ali atoa peya pomale meetapemotono toe wa Yesuyo
okale mekatapekoi. Nitaneyake ali-kiti mekoi toa oi moteketepa ege egeta kadukoa (5,000)
tadiya meadekoi.
11
Yesuyo eina palawe wane-mene e matiyaneke moa Akolali-pala ke wa
oa popimotokome poma ludu meetapekoi yene tatikatapeka. Mou yomotaka moa einakale
tokale peyame noa tagatapea kitipu mekoi.
12
Peyame noa tagatapea kitipu mekoli enekome
Yesuyo one oya-lawe-pala okome padeyaka kateaneya pikayano, nee kugu piko wekotoa
moa pikoe-kale
13
wekotoa mootapekoi. Nipa bali palawe wane namolo ko (5) kakoa moa
lawetekoyake kugu wekotoa moa ua ka katika tuku kakoa (12) mako puputua moa pikoi.
14
Yesuyo eni telekole tokale enekete peyame ekete i agopa Akolaline agale to awea
akademe noateko ago tadeko wa okoi.
15
Nitaneyake kini Ali Muno kakadete one dekoa
monoino wene tokome tonoke wa witimotokome kidene poka.
Yesu Ue Mine Tali Ludu Yakenemo
(Matiu 14:22-33, Make 6:45-52)
16
Ta likaka one oya-lawe ue mineke ketipea pekete
17
ue dipike pogatekoa pote mea
Kapaneame take poadete pokoi. Ta wete likaka Yesu noameneyake
18
pupulege mati
nokome ue pewikamoa pitikaka.
19
Nitoa kakaka one oya-lawe ue dipike mea kilomita ko
melepu (6) tadiya ponokolipa Yesu ue tali ludu tigotokakoa nokale enekete nenei motokoli
okome
20
no nukuno, piti moameo-kale ekete
21
nipa ue dipike noke meno-koli nome mekale
eina eina ue dipi kini mea poatekoita wete eina witapoka.
Ali Atoame Yesu Tuku Tanemo
22
Podolikama oka matanuke kakoina yename eya wa wene taneya. Ete piapa ue dipi
odene ika lono nome pika. Yesupa one oya-lawe-pala eni ue dipike opia mea
poameneyano, kini-mene kidene mea pekete tadiki wa wene taneya.
23
Eni wene taneya
kakoika ue dipi-kiti Taibiriase ta pia nekeneya. Nipa Ali Munagome palawe moa ke wa
lawetekale ali atoame nakoinata liti nekeneya.
24
Nitaneyake Yesu one oya-laweka
meameadekoli enekete Yesu tuku topato wa eni ue dipi-kitike pogatekoa pote mea
Kapaneame take pekeneya.
Yesu Onepa Ali Atoa Mea Kama Pomotoa
Toko Nee Wa Adeka Pikome Akenemo
25
Eni yename Yesu eka matanuke tuku toa kawa enekete ekete Tikisa ago ika manipete
noka-pe-koli okome
26
etene nimini ukuno yakoe. Kime no tuku toma nikipa, no einagome
telekole tokale enekoonakale Akolaline tele patu kautakoa kakome tadeko wa no tuku toma
nikiya mena. Pa palawe wane lawetekolu noa tagakoinake ni tuku toma niki.
27
Pa lomuateko
nee-kama pupu toa moato wa wene piameamene. Nitamoano, pia kawateko neeka moa nato
wa eniya neeke wene piitikaneya meamene. No Ali Yatenane Oyagome lawetateku pekuke
uku. Eni pekupa one patu kautakoa kake lawetamene wa Atai Akolaliyo no moa kakapika
tokolo ni uku wa Yesuyo oka.
28
Nimo okale ekete kime Akolalinele edoa takako patu-koli
okome
29
Akolaliyo moa wetekakale nokou ago nooke wene tugoa meketepa nipa one wene
pika toa tekete toi-kale ekete
30
neke peku pine enoono, padele telekole toa yameano ta.
Neeke wene tugamotoapa edele toa yameteko-pe.
31
Tone kaua-mikiti ali piamene ta ludu
pima yaketepa maana nee moa noma yakeneya. Nipa Moseseyo a tibu pia nekene nee
lawetekale noma yakeneya. Eni tanemopa Akolaline bokuke wia mekaneya piko-koli
okome
32
nimini ukuno yakoe. Eina tibu pia nekene nee lawetane agopa Mosese mena. Tibu
nee eteneyapa Agetaiyo lawetekoya.
33
Akolaliyo laweteko neepa a tibu mea ketipea nokome
ali atoa mea kama pomotoa tokago eni wa okale ekete
34
kamo koniyali wini nee-kama
lawetekala toano ta-koli okome
35
ali atoa mea kama pomotoa toko neepa no. Nooke
nokagopa kobu tokale mekileka toamoo. Nooke wene tugoa mekagopa ue nodo tokale
mekileka toamoo.
36
Ae, kime no enekala toake wene tugamiki. Nipa kipala okouna toa
tekete no wene tugamiki.
37
Agetaiyo takoa moa nooke wetekaka peya nooke noi. Nitoa
nokoli odene agoka wiane litiamou. Ni edoa-mo.
38
A tibu meane ketipeane nekenepa anu
wene litiane tou wane nokouya mena. No moa wetekakagono wene pika toane litiane tou
wane ni nokou.
39
No moa wetekakagome no pa wa wetekakomepa oneme takoa no moa
meteka yene odeneka katekameneya peya yopima pone togamotono wene pikome
wetekaka. Nipa eni yene peya wipitia ta patakale kamotokamene wa wetekaka.
40
Agetaiyo
no pa wa eni wetekakilepa one mana no enekete wene tugakoi peya mea kama pomotoa
tokome toka. Wipitia ta pataka-pete eni yene moane kamotokou wa Yesuyo oka.
41
A tibu pia nekene neepa one wa Yesuyo okale yatekete tekete Yu yename Yesu akoa
ko oa kakete ekete
42
beita, i agopa Yosepene mana Yesu. One nine etenetapa totome wene
tokono, one a tibu meane ketipeane nuku wapa edekolo oko patu wa ko oa kakoli okome
43
kini kini oa meki ko -pala ete tewitikoa wawe.
44
Panago nooke tegetekoa nikilepa one
weneme tamele toamoko. Agetaiyo nooke oto limo limo tokolopa nipa namele toko.
Nitikolopa wipitia ta patakale takoane kamotokou.
45
Akolaline agale to awea akane ali-
kitame eya wa wia mekapianeya. Ali atoa peya Akolaliyo mane mane oa olaukoo. Eni wia
mekapiane toa Akolaliyo olaukane toa yakoa lukoi peya nooke noi wane uku.
46
Enipa
panagome Agetaine lene timini enaneya wane ekene wamuku. Akolali-pala kawane nuku ago
no odene Agetaine lene timini enoane nuku.
47
Etene nimini ukuno, yakoe. Nooke wene
tugoa meki peya mea kama poadete tiki.
48
Ali atoa mea kama pomotoa toko neepa no.
49
Kini kaua-mikiti ali piamene ta ludu pima yakete maana nee moa nakeneya. Eni nee moa
noake tukala taneya.
50
A tibu pia nekene neepa dikaneya. Panagome eni nee moa nakomepa
nipa tukile toamoo.
51
Pa pia kama poko nee wane ukupa a tibu meane nuku ago nooke uku.
Eni nee moa naki peyapa mea kama poadete tiki. Nee na wane meateku neepa anu tigini.
Enipa itonoke meki-kiti mea kama pomotoane meadene tuku wa Yesuyo oka.
52
Nimo okale e Yu yename ete taka oto taka toa kakete ekete i agome one tigini toto
edoa lawetademe okoto patu wa ko oa kakoli okome
53
etene nimini ukuno yakoe. Ali
Yatenane Oyago noanu tigini kamateta moa noameneya meketepa nipa kini weneme oyake
mea kama poamoi.
54
Anu tigini kamateta noai toko agopa mea kama poatekago eni. Dikane
ali atoapa wipitia ta patakale takoane kamotokou.
55
Anu tiginipa ali atoame noatiki nee
eteneya. Anu kamatepa ali atoame noatiki ue eteneya.
56
Anu tigini kamateta noai tokagopa
no-pala lipukoa meko. Noka one-pala lipukoane meku.
57
Mea kama noko ago agetaiyo no
moa wetekakolo nekene one patu kautakoanepa meane kama puku. Nitiku toa no noai tiki-
kitipa no patu kautakoapa mea kama poadete tiki.
58
A tibu mea ketipea nekene palawe
wanepa enina. Eni palawepa kini kaua-mikitame nakene maana nee keneya mena. Eni nee
noai toake tukala taneya. I nee noai tiki-kitipa mea kama poadete tiki wa Yesuyo oka.
59
Yesuyo einaka einamo oa olaukakilepa Kapaneame take losu yapu keneke kakome toka.
Ali Atoa Mea Kama Pomotoa Toko Agale
60
Yesuno agale wete yakoa motane yene peya matiyame einagale yatekete ekete i
olaukoa oko agale litia tamene poto tokono, teyo edoa yakoa tomotoa-pe wa okoi.
61
Nimo
ko oa kakedekoli Yesuyo tetoa enekome e yene-pala okome anu uku agalekepa wene
poaneya mekete iki-pe.
62
Ali Yatenane Oyago no kawane nokouna lono wakapeane
atepeane pokolu eneketepa ede wene pioi-mo.
63
Mea kama pomotoapa Epetane Yominiyo
toko. Tigini tele takateko peku-kama nakagopa mea kama pamele toamoko. Ina agale oane
metekilepa Yomini patu kautakoa kakete mea kama poatikimo oane metekouna.
64
Ae, eni
uku agale yateketeke kiwi padeka-kiti nooke wene tugoa meamiki wa Yesuyo oka. Nipa
namolo papete oneke wene tugamokoi yeneka one wia tukamotoa meatekagoka i i wa wene
toopia mekome tokome ni oka.
65
Nitikome okome Akolaliyo ka patekoa nooke wetekako
yene odene nooke namele toko wane okounapa enike ekene okouna wa Yesuyo oka.
66
Enipete titimoa Yesuno agale yakoa motane yene kainya matiyame Yesu tewitikoa
wawa one-pala wa lokoa yawamokoi.
67
Nitikolipa Yesuyo one tuku kakoa (12) oya-lawe-
pala okome kimeka no tewitikoa wawa poadete iki-pe-kale
68
Saimone Pitayo okome Ali
Muno ne wawa peketepa toto teeke pomotoa-pe. Mea kama poateko agale pinagopa ne
odene toko-la.
69
Nepa Akolaliyo onekemo-kama akamotoa takoa moa kakapiane ago
tadeko wa totome wene toko-kale okome
70
kiwi tuku kakoa (12) ali-kitipa anume takoane
motokounake kiwi panagopa iponane peku nakago wa Yesuyo oka.
71
Eni okapa
Saimonane mana Yudase Isekarioseke okome oka. Nipa Yesuyo one oya-lawe tuku kakoa
(12) takoa motokome einagoka motaneyake mone yename one wia tukamotoa einagome
moa meoo tokale oka.
Yone Yone
<<
66
>>
Yone Yone
<<
77
>>
7
Yesuno Wamene-mikitame One-pala Akenemo
1
Nititikaneyake Yu yename one wia tukadete tokoli tokome Yesu Yudea ta ludu
yawamademe Galili ta ludu pima yaka.
2
Einapetepa Yu yene kini losule tekete aga kelekoa
yapu wia toge kiatekoi tigotokalepa
3
Yesuno wamene-mikitame one-pala ekete tone Galili ta
tewitikoa Yudea take poano pa. Neme toma yakolepa neke agale yakoa tiki yename
enemotono pa.
4
Panagome-kiti ibini akene ago meou wa wene pikomepa one toma yakole
kebono take yawa paigakoa keneya toamokono, neke ile toma yakepa ta piko peyake
keleyo toma poano pa wa Yesu-pala akeneya.
5
Nipa one wamene-mikitika oneke wene
tugamekete okoi.
6
Nitikoli okome kini toatikilepa kini wene litiapa ipeteka kupeteka tamele
tokolo tikino, no pade nitamuku. Anu toatekule taatekoane tuku-petepa opi mena.
7
Itono
peku noai tiki-kitame kipala kotimi yoa meamele toamoko. Anumepa eni yene kini tikilepa
poanele-kama tiki wane akoane ukulu tokome nopala kotimi yoa meki.
8
A Yerusaleme
togeke kini poe. No pade poamuku. Anu toatekule taatekoane tuku-petepa opi menano,
poamuku wa Yesuyo ootokoa
9
one Galili take pa eida meka.
Yerusaleme Take Aga Kelekoa Yapu
Wia Toge Kia Mekoita Yesu Nokome Tanemo
10
One wamene-mikiti wete pote toge lobutupokoli Yesu oneka pokome keleyo
poameneya paigakoa keneya poka.
11
Nitaneyake tobou meane Yu yename toge kikoa
mekete Yesu tuku toa kakete ekete Yesupa edekato-pe wa oa kakeneya.
12
Nitikolipa pa ali
atoa kini kini oboa kakete ekote ekota oi oi wa kakete pade-kitame ekete Yesu einagopa
epetanele tokago wa oa wa pade-kitame ekete einagome ali atoa oa yotokakome toko wa oa
taneya.
13
Nimo oa kaketeke kini tobou ali-kiti piti motekete tekete Yesu ko keleyo witoa
akaya wa mama moa meaneya.
14
Toge kia meane tiginalo tadiya Yesu tobou losu yapu pokome olaukoa kaka.
15
Nitikale yatekete e Yu yename ka oa kakete ekete i agopa tone totono pine to a olaukaki
ali-kitame olaukameneyake imopa i okono, edoa wene toa okoto patu-kale Yesuyo okome
16
anu olaukoane ukumopa anu weneme pade titiane wamuku. No moa wetekakagome
akoano ta wa okomo-kama oane mekala tuku.
17
One wene pikole toada wa tiki-kitamepa
anu olaukakumopa anu weneme titiane olaukadekoluka Akolaliyo akoano ta wa okomo
olaukadekoluka oyake takoa enamele too.
18
Padago one weneme pademo pademo titia
okomepa ali atoame one kei pimotoa tokome ni oko. Ali atoame one moa wetekakago kei
pimotou wa wene pia oko agomepa pademoka kapene yokamoa niminimo-kama oa mekala
toko.
19
Moseseyo one totono yametaneyake kiwi padameka litia toamiki. Eni totonodo
litikete toi tokapa no wia tukadete wili toamoi tookano, dekolo tiki-pe wa Yesuyo okale
20
peyame ekete nepa teyo wia tukademe wili toa kako-pe. Beita, neeke ipono awinome
mekolo teke ni oko-koli okome
21
tone ko mea pupu toamateko-peteka padele telekole
toane pade ago epetekakoule kime enekoina tekete wene kainya pianeya ko oa kaki.
22
Moseseyo eya wa akeneyake tiki. Kini ali mati opiketepa one kepene teigamotamene wa
oa pianeya. Eni oa piane toa litiapa ali matiyane kepene teigatiki oi ponokolopa kini ko mea
pupu toamatiki-peteka teigakina. Nipa Moseseyo one kaua-mikitame tanele litia tokome
akene toa tikina.
23
Nipa Moseseyo akenele tetekamedekolo kini ko mea pupu toamatiki-
peteka ali matiyane kepene teigakete pupupa eni tikina. Nitikinano, opi kini ko mea pupu
toamatiki-peteka ali pade pupu toane epetekakolu tekete nopala kotimi yoa mekino, dekolo
tiki-pe.
24
Padame tanemo pine enameneya kaketepa pa akoa agale wameamene. Pine pitia
yakatapea kiyoke-kama to a okala tamene wa Yesuyo oka.
Yesu I Agopa Keraisu Taatekoa Noko Patu
25
Einapete Yerusaleme yene padeka-kitame ekete Yesu i agopa tobou ali-kitame wia
tukadete wili toa kaki ago patu.
26
Ekee, i keleyo nome kakome okoyake pademoka topo
toa ikile toamikino, tone tobou ali-kitame i agopa Keraisu wa papete ibini oa piane ago
taatekoa nekedeko wa wene tiki patu.
27
Beita, i ago one tobotoi ta totome wene toko.
Keraisudo taatekoa nokalepa one tobotoi ta i wa padameka wene toamoi wa okoi.
28
Nitaneyake Yesu tobou losu yapu eida pa olaukoa kakome agale telo okome okome
kime nopa i ago wa wene toa ni no kawane nokouna ta i waka wene toa iki. Eni wenepa
tikiyake anu weneme nokouya mena. No moa oto wetekaka agome niminimo-kama okoyake
kime pade one wene toamiki.
29
Wene toamikiyake one wenepa anume tuku. Einago mekota
kawane nuku. No ne pa wa oneme no oto wetekakono, einago wenepa tuku-kale
30
one
dekoa moadete wili toa kakoiyake one moatekoi-pete wete taatekameneya tokome one
dekoa moamokoi.
31
Nitikolika eida oboa kakoi-kiti kainya mati Yesuke wene tugakete ekete
Keraisu taatekoa nokomepa i agome telekole tokole moa patukademe toko patu. E 'e mena
wa oneke wene tugakoi.
Yesu Dekoa Motokapomotoa Poyo Yene
Moa Wetekanemo
32
Eida oboa kakoi yename Yesuke einaka einamo oi oi wa okoli Parisi yename
yakaneya. Nitaneyake Akolalike lodo yotokoai tane tobou ali-kitame Parisi yenameka tobou
losu yapu yopiane poyo ali-kiti Yesu einago dekoa motokapoe wa moa wetekaneya.
33
Wetekakoli nokoli Yesuyo okome kipala opiane me me tootokoanepa wakapeane no moa
wetekakagoke pou.
34
Pokolupa kime no tukupa teketeke oyake enamoi. No pone
kawatekutapa kiwi oyake noamoi.
35
Yesuyo nimo okale e Yu yene kini kini yakate tekete
ekete totome tuku toa enamateko takepa maida poademe oko patu. Toto yatene ali atoa
Geriki take to a pote mekika i agoka pokome Geriki agale yakoa iki yene olaukapademe
okome okoto patu.
36
I agomepa one tuku tekete enamoi wa oa one pone kawateku takeka
kiwi noamoi wa toto-pala oa tokono, edemo okome okoto patu wa oa kakoi.
Ue Lene To a Ue Yokoa Kama Poatekomo
37
Toge kikoa mea wipititapeane-pete Yu yename kini tobou kakoa kiatekoi toge eni kia
peya takakoi. Nitikolipa Yesu oneka nome kakome agale telo okome okome ue nodome
tuki-kitipa ue noukete nooke note nonamene-ye.
38
Akolaline bokuke papete wia mekapiane
toapa nooke wene tugoa meki-kiti kini tepenepa ue lene to a ue-kiti yokoa kama poo wa
Yesuyo oka.
39
Nipa oneke wene tugoa mekoi-kitike pene awinome meateka Yominike
okome oka. Einapetepa Yesu one pa teleta tootapeneya mekana take wete wa moa
kakameneya tokome Epetane Yomini ali atoake wete awinome meameneya.
Ali Atoa Ete Otota Puutakutukanemo
40
Yesuyo eni oka agale yakane yene padeka-kitame ekete i agopa Akolaline agale
to awea akatekago taatekoa nekedeko wa oa
41
wa padeka-kitame ipa Keraisu wa papete
ibini oa piane ago taatekoa nekedeko wa oa taneya. Nitaneyake padeka-kitame ekete
Keraisu wa papete ibini oa piane agopa Galili ta edoa taatekoa nomotoa-pe.
42
One
noatekalekepa panagome Akolaline bokuke eya wa wia mekapianeya. Keraisu einagopa
Depidi-loeke ta wa noo wa oa Depidi meane Beseleme take taatekoa noo wa wia
mekapianeya. Enipa totome nimini okoto-pe wa akeneya.
43
Nipa Yesuke e ali atoa ete oto
wa puutakutukoa agale to a kakoi.
44
Nitoapa padeka-kitame one dekoa moadete okoiyake
padameka dekoa moamokoi.
Tobou Ali-kiti Yesuke Wene Tugamenemo
45
Tobou losu yapu yopiane poyo ali-kitipa Akolalike lodo yotokoai tane tobou ali-kiti
Parisi ali-kitika koukoa mekoita wakapea nokoli ekete Yesu einagopa dekolo aua noamiki-
pe wa okoli ekete
46
namolo okoli yakamokoonakamo einagome oa kaka tokolo dekoa
moadete poteke wawa noko-koli
47
Parisi yename ekete einagome kiwika oa yotokakome
toka patu.
48
Tobou ali-kiti toto odene agoka oneke wene tugamoko.
49
Beita, i oboa kaki ali
atoame einagono agale yakoa motikilepa Mosesene totono wene toamekete tiki. Akolaliyo
dikane ali atoa poane take pomotoa wako wa Parisi yename akeneya.
50
Nimo okoli kini
yagono ago pade Nikodimasi namolo Yesu mekata pekene agome e yene eya wa yakaneya.
51
Tone totono litiapa panagono koiso akakete eya toamoko-pe. Pinali one kei pikome
okomo wete yakameneyake neke tanele ile tadeko wa totome akoa agale oko patu. E 'e
mena wa Nikodimasiyo okale
52
e yename ekete neka Galili ago kake teke ni oko-pe.
Akolaline boku moa lewea oi moamene. Nitikepa Akolaline agale to awea akane ago
odeneka Galili take taatekoa noameadeko wa wene too wa oomotekete
53
kini kini yapu
yapu tadoa pootapeneya.
Yone Yone
<<
77
>>
Yone Yone
<<
88
>>
8
Parisi Yename Motane Atoa Eko Ali-pala
Koua Pitikale Enekete Tanemo
1
Nitaneyake Yesu Olipe-pini tonoke pome ate lewia mepoka.
2
Wa podolikama likonu
witia tobou losu yapuke pome kapokale ali atoa peya one kakata obomoa note kakoli
witipitoa mekome olaukoa meka.
3
Nitoa mekaka Mosesene totono pine to a olaukane ali-
kitame Parisi ali-kitameka atoa pade Yesuke lia aua nokoi. Nipa motane atoa eko alike
pokome koua pitikale enemotekete aua nekete e yenane lene yoto moa kakakoi.
4
Nitikete
ekete Tikisa ago i atoame eko alike pome koua pitikale totome enekoo.
5
Moseseyo one
totono yametekomepa dikane atoa kueme ka ua wia tukakala tamene wa akeneyano, opi
neme edemo oo-pe wa yatekoi.
6
Nipa Yesu natemo omotadiya wa kakete pa likoa enekete
okoi. Nitikoli Yesu one keti itonoke waliketikakome kadapi yoname olea adekoa meka.
7
Nitoa mekale e yene pa eida kakete yaka yaka tokoli Yesu mukiti kiyotokakome okome
kiwi pake poanele toamoko ago kako patuno, einatoa kue moa pitikoa witikilepa einagome
titia tomotoane uku wa ootokoa
8
wa keti itonoke walikitikakome olea adekoa meka.
9
Nitikale e yene odene odene wa katepita katepita toa pekete ada-kiti namolo kakoa pokala
tokoi. Nipa Yesu einatoa-pala pa kamotoa pootapekoi.
10
Nitikoli Yesu wa mukiti
kiyotokakome enekale einatoa odene kakedekale enekome okome ne akoa okoina yenepa
dekoti-pe. Ne poanele tadekono, kibu mou wameneya wakoti-pe-kale okome
11
kamo
koniyali padameka no akoa wamokoi-kale okome noanumeka ne poanele tadeko wane
akoane wamuku. Neke poanele tokole wake wawano pa wa oka.
Yesuyo Itonoke Meki-kiti Pa Takakoya
12
Nititikoa Yesuyo e yene-pala agale pade okome okome nopa itonoke meki-kiti pa
takakuya. No litima niki-kitipa yomiyomu keneke yawamekete ali atoa mea kama pomotoa
toko pa keneke yawa meoi-kale
13
e Parisi ali-kitame ekete pinali neke wa kei pikopa winipa
pa oko-koli okome
14
pinali anu wa kei pikeneka nimini uku wane uku. Noanu kawane
nokounata wa pone kawatekuta pinali anu wene tekene ni uku. Nitikuyake no kawane
nokounata wa pone kawatekuta kime pade wene toamiki.
15
Kimepa panagome tanemo pitia
yakatekoa ile tadeko wa akoa ikilepa kini kaua-mikitame toma nekenele tiki. No pade
nitamekene ali atoame tanele ile tadiki wane akoane wamuku.
16
Ali atoa kini tanele pitiane
yakatekoane ile tadiki wanedo akoane ekenepa pine to ane ou. No moa wetekakago
Agetaiyo no auapekala tokolo tekene ni uku.
17
Kini totono wia mekane bokuke eya wa wia
mekanemo kiwi wene takakene uku. Takutamedo padele tokale enoa nekete i i wa odene
kotuta kakoa eketepa nimini ekete oi.
18
Nipa pinali anu wa kei piane uku. Agetai no moa
wetekakagomeka no kei pia toko. Agetai totame odene kotuta kakoa oko wa Yesuyo okale
ekete
19
neketai edekato-pe-koli okome kime no pade wene toamoa Agetaika wene toamoa
tiki. Kime no wene toi tokapa Agetaika wene toi toka wa Yesuyo oka.
20
Yesuyo nimo ikilepa tobou losu yapu keneke losu kue pitikoai tane mete pianeya liti
kakome olaukoa oka. Nitikalepa padameka one dekoa moamokoi. Nipa one moatekoi oi
wete ponameneya tokome dekoa moamele toameneya.
One Poatekouta Kiwi Oyake Noamoi
Wa Yesuyo Akenemo
21
Yesuyo eya waka oka. No ita tewitikoane puku. Pokolupa kime no tuku toa teko
tokale wakete kini poanele pa etepea toma pote tukala toi. No poatekuka kiwi pade namele
toamoko wa Yesuyo oka.
22
Nimo okale e Yu yene oote tekete ekete i agome one
poatekuka toto pade namele toamoko wa okopa pinali one wa wia tukatekomo okome oko
patu-koli okome
23
kipa kini pine taapa keti itono lono. Noanu pine taapa ate tibu lono. Kipa
kinikaua-mikitane peku noa tiki. Noanupa eni peku noane toamuku.
24
Kini poanele pa
etepea toma pote tuoi wane okouna toa taatekoa tuutapeoi. Nipa nopa i ago tadeko wa
wene toameketepa nitoi wa oka.
25
Nimo okale ekete nipa nepa ali te-pe-koli okome namolo
titikene nopa i ago wane okala tokounapa einago eni.
26
Kini toma yakoinakale pitiane
yakatekoane ile tadiki wane akoane oatekumo-kiti ete pa piko. Nitikoyake anu weneme
pademoka wamuku. No moa wetekakagome pine to a yameteka toane itonoke meki yene-
pala to aweane oadene tuku. Einagomepa niminimo-kama okolo uku wa Yesuyo oka.
27
Nitikalepa oneketaike okono wene toamokoli okome
28
no Ali Yatenane Oyago moa
yomoke wia dekoa ate kamotokatekoa kakete ae no i agopa eina noatekago tadeko wa
wene toa eya waka wene toa toi. No einagome padeleka one weneme toamokome
oneketaiyo olaukakana toa-kama oa mekala tokome tadeko wa wene toi.
29
No moa
wetekakagopa nopala odenekata yako. One wedia memotoane toateku toane-kama tukulu
tokome toko. Nipa nepa egetiniya yamene wa no tewitikamoko.
30
Yesuyo nimo oa kakaka
e yene kainya mati oneke wene tugakoi.
Eberameke Tagene Yeneke Akenemo
31
Yesuyo oneke wene tugakoi yene-pala okome anume oane meteku agale yakoa
teketepa nipa anu oya-mikiti etene meoi.
32
Nipa anu agale pine i i wa wene tootapea mekete
tekete namolo egetiniya meake peku mati-kiti latioi.
33
Yesuyo nimo okale ekete totopa
Eberameke tagene yene. Mone padane yapuke egetiniya mekileka toamoko. Nitikono, toto
egetiniya-kiti namolo meake peku mati-kiti latioi wapa dekolo oko-pe-koli okome
34
nimini
ukuno yakoe. Poanele toma yaki-kitipa kini poanele tikileme pine yene kiwi moa kautako.
Nitikolo egetiniya meane tetepo taneya meki.
35
Egetini ago pade one egetekagono yapu eida
mea kawamokoyake yapu pinagono mana eida-kama mea kako.
36
No yapu pinagono
managome kiwi egetiniya-kiti peku lawetekolupa nipa etene peku mati-kiti latioi.
37
Kipa
Eberameke ta ma nekeneyano wene tuku. Eberameke tagene yenameke no wia tukadete tiki.
Nipa anu oane meteku agale kini tepene alateko pake piamokolo ni tiki.
38
Nopa Agetai-pala
opiane kakene enoane yakoane tokou toane ukuno, kipa kiniketaiyo peku lawetekale noa
toma yaki wa Yesuyo oka.
39
Nimo okale one-pala topo takakete ekete toneketaipa Eberame-koli okome kipa
nimini Eberameke tagene yene kawei tokapa nipa Eberameyo toma yakenele toi tokake
40
no
wia tukadete iki. Nipa Akolaliyo one nimini peku lawetekome oka toane niminimo-kama
oane meteku agoke wia tukadete iki. Eberameyo niminimo akene ali-pala enile toameneya.
41
Ae, kiniketaine peku noa tiki wa Yesuyo okale ekete toneketaipa Akolali. Panago mena.
Toto pade pakeleya-kiti mena-koli okome
42
kiniketaido Akolali too tokapa nooke wene
mekoa meoi toka. Nipa Akolaline yono kounoke kawane nokolu tokome nitoi toka. No
nikilepa anu weneme noamokou. Akolaliyo pa wa wetekakale nokou.
43
No nitane ago anu
oane meteku agale dekolo wene toamiki-pe. Anu oane metekumo yakoa moamele
toamokolo ni wene toamiki.
44
Kipa kiniketai Setanuno mana-mikiti. Kiniketaine wene
pikole-kama toada wa wene pia meki. Tititikakome einagome ali wia atukama nekeneya.
Einagopa nimini patu kautakoa kawamoko. Nimini peku nakileka toamoko. Onepa kapene
wakoa oko ago. Oneke-kama kapene wakoa iki agale alama noko. Nitikono, kapene wakoa
ikilepa one tepene meane toa-kama ya wa oko.
45
Noanumepa niminimo-kama ukulu tekete
no i agome nimini oko wa nooke wene tugamiki.
46
No i agome poanele tokale enekou wa
teyo oo tokolo-pe. Padameka wamoi-li. Nipa niminimo-kama ukulupa ipa nimini oko wa
dekolo wamiki-pe.
47
Akolaline mati-kitame one agale yakama piki. Kipa Akolaline mati-kiti
mena. Nitikono, one agale yakamiki wa Yesuyo oka.
48
Nitikale e Yu yename ekete nepa mone Sameria take agono, neeke ipono awinome
mekale wini oko. Enipa totome nimini okoto-pe-koli okome
49
nooke ipono awinamoko.
Noanumepa Agetai kei piane ukuyake kimepa no taumada toa iki.
50
Nitikipa no kei piati
wane none wamuku. Panagome pade no kei piai toko. Einagopa peyame tikile pitia yakoa
kini tanele ile tadiki wa pine to a akako.
51
Etene nimini ukuno yakoe. Anu uku agale yakoa
tiki-kitipa tua pote atuameneya pa mea kama poadete tiki-kale
52
e Yu yename ekete neeke
ipono awitadekono wene totome toko. Neke agale yakoa tiki-kiti tua pote atuameneya pa
mea kama poadete tiki wapa oko. Beita, Eberameka tua Akolaline agale papete to awea
akane ali-kitika tuma-kala note taneyake oko.
53
Tone kaua Eberame wete tuaneyano, one
kakene toa ne moa patukoa ako kake oko-pe. Akolaline agale papete to awea akane ali-kitika
tuutapeneyake oko. Ne ali latike oko-pe-koli okome
54
pinali anu wa keido pikenepa nipa
pata pamo ekene tou. No kei piai toko agopa Agetai. Einagopa kini Akolali wa ikiyake
55
one wene toamiki. Nitikiyake one wenepa anume tuku. Onedo wene toamuku wane ou
tokapa nipa kime kapene wakoa iki toane ekene tou tokake one wene toane oneme okole-
kama yakoane tuku.
56
No nokoule enademe tokome kini kaua Eberame wedia kolotine
meaneya. Nokoule enekome wene yaapeneya meaneya wa Yesuyo oka.
57
Nitikale e yename
ekete nepa opitikaneyake mali ege odepetaka kadukoa (50) wete ponameneyake okono,
Eberamepa neme edoa enoa oko-pe-koli okome
58
etene nimini ukuno yakoe. Eberamepa
wete opiameneyake no pa meane kama nuku wa Yesuyo oka.
59
Nimo okale e Yu yename i
ago wiato wa kue katekamotokoli Yesu paigakoa keneya pome tobou losu yapu wawa
poka.
Yone Yone
<<
88
>>
Yone Yone
<<
99
>>
9
Leneta Lianeya Opiane Ago Epetekanemo
1
Yesu kutu ponokomepa leneta lianeya opiane ago pade enema ponoka.
2
Einagopa
Yesuno oya-laweme enekete ekete Tikisa ago i ago leneta lianeya mekopa dekale taneya
patu. Etene niname poanele tokoli taneya patu. Pinali one poanele tokale taneya patu-koli
okome
3
etene ninameka einagomeka poanele pade toamokoiyake Akolaline telekole
winagoke witakale enekamotoa ni taneya.
4
Lou pa kakolopa no moa wetekakagono pupu
totome takama pamedeko. Ta likalepa padameka one pupu oyake takamele toamoo.
5
Itonoke pa yawane mekenepa ali atoa peya pa takama pukuya wa Yesuyo oka.
6
Nimo
ootokoa itonoke tekelipu tooketikoa tekelipu kakene itono wane moa kege latia einagono
lenetake yotokaka.
7
Nitikome okome ne ue Siloame mineke poke kege koba wa wetekakale
pokome leneke kakene kege ko omotokome leneta kikatapeneya wakapea nekeneya. (Tone
agaleke Siloame wapa moa wetekaneya wa ekete oo.)
8
Nitikale one yenameka one namolo
padeya-kiti oia moa mekale enekoina ali atoameka einago enekete ekete i agopa ina namolo
padeya-kiti oia moa mekanakago patu wa akeneya.
9
Nitikoli padekame ekete e eno,
einakago i noko-koli wa padekame ekete einakago mena, one keneya ago i noko-koli
einagome okome no einago i nuku-kale ekete
10
neke leneta edoa epetekaneya-pe wa okoli
okome
11
Yesu wa ibini iki agome itono wane moa kege latia anu lenetake yotokoa
wetekakome okome ue Siloame mineke poke kege koba wa wetekaka. Nitikale pone kege
kogulu anu leneta kikatapeneya wa akeneya.
12
Nitikale ekete einagopa manika kako-pe-koli
okome agopa tokono, manika patu wa akeneya.
Parisi Yename
Leneta Lianeya Mekanakago Pitia Yakanemo
13
E yename leneta lianeya mekanakago Parisi ali-kitike aua pekeneya.
14
Yesuyo itono
moa kege latia einagono leneta epetekakilepa Yu yenane ko mea pupu toamatekoi-pete toka.
15
Einago nokale enekete Parisi yename one leneta edoa epetekaka-pe wa yatekoli okome
anu lenetake kege yotokakale kege ko otokoanepa opi enamele toko-kale
16
Parisi ali padeka-
kitame ekete tone ko mea pupu toamateko-pete kekanele eni tokano, einagopa Akolaliyo
moa wetekakago mena-koli padeka-kitame ekete enika eni telekole tokolepa poanele
tokagome edoa tomotoa-pe wa akeneya. Nitoapa ete oto wa puutakutukoa agale to a kakoi.
17
Nitoa leneta lianeya mekanakago wa yatekete ekete einagonomo neme edemo wa akako-
pe wa yatekoli okome einagopa Akolaline agale akako ago toko-la wa akeneya.
18
Leneta lianeya opianeyake opi enamele toko wa einagome okaleka e Yu yename
yakoa moamadete wakoi. Nitoapa einagono etene nineta noe wa agale oa wetekakoli nokoli
yatekete ekete
19
i agopa kini mana-pe. Kitame opia pitikaketepa leneta lianeya opikoiya-pe.
Opi wa edoa lene epetekaneya meko-pe-koli ekete
20
winagopa tone mana. One leneta
lianeya opikooya. Enido wene tokoyake
21
one leneta epetekanele wene toamoa one leneta
epetekane agoka wene toamoa toko. Winago wetinagoke taneyano, one-pala tanemopa one
oademe tokono, kini pitia yakoe wa akeneya.
22
Nipa Yu yenane tobou ali-kiti piti motekete
akeneya. Eni tobou yename wetena oi pedoa pikete ekete Yesu einagopa Keraisu wa papete
ibini oa piane ago taatekoa nekedeko wa okoi-kitipa losu yapuke wa noamomotato wa oi
pedoa pianeya.
23
Nitaneyake einagono etene ninetame ekete one wetinagono, one pitia
yakoe wa etene niname akeneya.
24
Nitikoli wa lokoa Parisi ali-kitamepa leneta lianeya opianeya mekanakago ne no wa
kayo oa motekete ekete Akolaliyo yakakoa nimini oano ta. Neke leneta epetekakagopa
poanele tokagono wene totome toko-koli okome
25
one poanele tokago patu. No wene
toamuku. Eni wenepa toamukuyake namolo leneta lianeya mekounake opi leneta
epetekakaneya kakuno wene tuku-kale ekete
26
oneme edele toka-pe. Neke leneta edele toa
epetekaka-pe wa yatekoli okome
27
anumena namolo okouna yakamoake wa dekolo yateki-
pe. Kimeka one agale litia too wa wene pikete iki-pe wa okale
28
poanemo oa kakete ekete
nepa eni pa agono agale litia tokoyake totomepa Mosesene totono litia toko.
29
Akolaliyo
Mosese-pala ko oa kakeneyano wene totome tokoyake eni pa agopa one kawa noko lonoka
totome wene toamoko-koli okome
30
ae, kime einago akakipa no wene kainya pikoa kakina.
Einagome anu leneta epetekakaleka one kawa nekene lono pade wene toamekete iki.
31
Akolaliyopa poanele toma yaki-kitame kowitoa ikimo yakoa toamoko. Nitikoyake one
wene pikole toada wa oneke nate wene pia kowitiki-kiti kini kowitoa ikimo yakoa toko wa
totome wene toko.
32
Itono tibuta latiane-peteka opika leneta lianeya opiane agono lene
epetekakaneya wa akenemo padameka yakameneya. Namolo yakamokoonakale einagome
titia toko.
33
Einagopa Akolaliyo moa wetekamoo tokapa enilepa oyake toamoo toka wa ena
leneta lianeya mekanakagome okale
34
e yename agale topo takakete ekete nepa poaneleke
alaneyake toto moa olaukade oko-pe wa ootokoa einago dekoa moa losu yapu akolono
pitikapaneya.
35
Einago losu yapu akolono moa pitikaneya wa okoimo Yesuyo yakatekoa pome
kotukome okome nepa Ali Yatenane Oyagoke wene tugako-pe-kale okome
36
kamo koniyali
winagoke wene tugoane meouno, one te-pe wa yatekale okome
37
einagopa neme wete
enekona. Opi neta ko oa kako-kale okome
38
Ali Muno neeke wene tugaku wa neuwe
tukupia one kei pia kaka.
39
Nitikale Yesuyo okome itonoke nikilepa ali atoa takoane enoane
akadene nokou. Nipa leneta lianeya meki-kiti epetekoane ni leneta kianeya meki-kiti leneta
likoane toadene tekene nokou wa oka.
40
Yesuyo nimo okale yatekete one-pala eida opia
kakoi Parisi ali-kitame ekete tone lenetaka lianeya kakolo oko-pe-koli okome
41
kini lenetado
lianeya kaketepa nipa kini tiki poanele wene toamekete tiki. Eniledo wene toamekete tikilipa
koiso akoane oateku pade piamoko. Leneta liameneya mekete oyake enamele toko wa ikili
yatekene tekene kini poanele tanepa wene teketeke tadikino, koiso akoane oateku pade pa
piko wa Yesuyo oka.
Yone Yone
<<
99
>>
Yone Yone
<<
10 10
>>
10
Sipi Sipi Kai Talo Agoke Pedoa Akenemo
1
Yesuyo okome okome etene nimini ukuno yakoe. Panagopa sipi sipi kai-kiti kolago
taneya kakita kago pikaneta noameneya eko pata paigakoa lewia nokomepa nipa sipi sipi
kai-kiti kode mou wa wene pia noko.
2
Kago pikaneta noko agopa sipi sipi kai-kiti talo
tokago eni.
3
Einago nokolo kagoke payaponago kako agome kago pekakolo lobutunoko.
Nitoa lobutua kakome okolo sipi sipi kai-kitame yakakoa mekili kini ibini odene odene wa
oa moa akolono aua poko.
4
Nitoa peya akolono aua pomepa one namolo kawa pokolo one
sipi sipi-kiti kawatuku pitoa pokala tiki. Nipa talo tokagono tobotobo yatekete tekete one
pokoka litima piki.
5
Nitikiyake mone pade ago nokolopa litima poameneya paka pitoa piki.
Nipa mone pade ali-kitane tobotobo wene toamekete tekete pitoa piki wa Yesuyo oka.
6
Yesuyo nimo pedoa okalepa e yename ike oko wa wene tokoiya mena.
7
Nitoa agopa
moa mekoli Yesuyo lokoa okome okome etene nimini ukuno yakoe. Sipi sipi kai-kiti kolago
taneya kakita lobutatiki kago keteponopa no.
8
No wete noameneyake pade ali-kiti nikilepa
sipi sipi kai-kiti kode moato wa noai taneya. Nitaneyake sipi sipi kai-kitame kini agale
yakameneya.
9
Sipi sipi kai-kiti kolago taneya kakita lobutatiki kago keteponopa no. Ali atoa
anu kawane eni note lobutunokoli pawe toane mou. Nitikolupa akolono wititapekete pote
nee noa yawa kawa oto wa lobutunokala toi.
10
Kode ago nokomepa eya kuya kode moa ali
wia atukoa enika enile-kama toademe noko. Nitikoyake noanu nekenepa ali atoa mea kama
pomotoane tekene nokou. Nipa pewe wia tagatapeneya mea kama pomotoane tekene
nokou.
11
Nopa sipi sipi kai talo toane epetekaku ago. Talo toa epetekakagopa sipi sipi kai-
kitike tuademe toko.
12
Ipa kue moadene tuku wa talo tokagomepa eya toko. I sipi sipi kai-
kitipa one mena wa talo toa mekome enekolo lene piane tue tubeyame sipi sipi kai-kiti wia
noademe nokolo enekomepa sipi sipi kai-kiti tewitikalogoa pitoa poko. Nitoa pitoa
pokolopa tueme sipi sipi kai-kiti deka deka toa wia noa tadekatapeko.
13
Einagopa kueke-
kama wene piitikaneya mea talo tokome tokome sipi sipi kai-kiti mama moameneya pitoa
poko.
14
Nopa sipi sipi kai talo toane epetekaku ago. Anu sipi sipi kai-kiti wene taneya
meku. Anu sipi sipi kai-kitame no wene taneya meki.
15
Nipa Agetaita tone wene toko toa
anu sipi sipi kai-kiti tone tone wene toa meko. Nitoanepa anu sipi sipi kai-kiti talo toane
meane tuou.
16
Anu sipi sipi kai padeka-kiti anu kolago tukuta wete koukoa note kawamiki.
Eni sipi sipi kai-kitika oto auane namedeku. Nitikolupa anu agale yakakoa meoi. Nipa kiwi
talo tuku ago nooke-kama lukoa meoi.
17
Agetaiyo no wene taneya mekilepa eya toatekuleke
toko. Kamoane poadene tekene anu sipi sipi kai-kiti talo toane meane tuou.
18
Padameka no
oyake wia tukamatikiyake pinali anu weneme tuou. Tukileka kamoane pikileka anu weneme
tuku. Nipa Agetaiyo ta wa oka tokolo tuku wa Yesuyo oka.
19
Yesuyo eni okagaleke e Yu yene ete oto wa puutakutukoa agale to a kakoi.
20
Nitoa
kainya matiyame ekete oneke ipono awinome mekome leau akakolo ni okono, one okomo
yakamatoe wa okoli
21
pade-kitame ekete ipono awitane agomepa enika eni agale oyake
amele toamoko. Leneta liane agopa iponame one leneta edoa kikakamotoa-pe wa okoi.
Yu Yename Yesu Kote Moa Wakenemo
22
Yu yename tobou losu yapu kago peane oi pikoa mekete toge kia meaneya. Niti tane
tokene-mene pakeke nitaneya.
23
Eni toge kia mekoi-pete Yesu tobou losu yapu nokomepa
Solomono wa yomini kayo oa ibini akene lono eida yawa meka.
24
Nitikaka Yu yene Yesu
kakata koukoa nekete ekete neme toto wene kainya pikoa-kala mekona, nepa Keraisu wa
papete ibini oa piane ago tadekalepa wete to awea a-na wa okoli okome
25
namolo to aweane
okounake nooke wene tugoa meamiki. Agetai patu kautakoane kakene toma yakule kini
leneme enekipa nopa einakago tadeko wa kime wene tomotoane tukuyake
26
nooke wene
tugoa meamiki. Kipa anu sipi sipi kai-kiti toamekete tekete ni wene tugoa meamiki.
27
Anu
sipi sipi kai-kitamepa anu tobotobo yatekala tiki. Nitikino, anu sipi sipi kai-kiti i i wane wene
taneya meku. Nitikulu tokome no litima niki.
28
Anu eni sipi sipi kai-kiti atua poameneya mea
kama pomotoane tuku. Nitikuno, padameka anu yono tatonoke odoa moamele toamoko.
29
Eni yene nekeno, talo toano ta wa no metekago Agetaiyo ete yene peya moa patukoa ako
kako. Nitane agono yono tatonoke padameka sipi sipi kai-kiti odoa moamele toamoko.
30
Agetaita tone odene wene pia liputakutukoa meko wa Yesuyo oka.
31
Yesuyo nimo okale yatekete e Yu yename i ago wiatoe wa kue wa katekamotokoi.
32
Nitikoli okome Agetai patu kautakoane kakene ele kule epetekoane tikilepa kiwi
kakakoane tokounano, edele tokounakaleke no wia tukadete kue katekamotiki-pe-kale ekete
33
neke epetekoa tokanakaleke pade ne wiadete kue katekamotokoya mena. Nepa pa
agomeke Akolali latike okanano, Akolali-pala tea agale eina okanakamoke ne wiadete toko-
koli okome
34
kipa Akolaline yagono-mikiti wane okou wa Akolaliyo akenemo one bokuke
wia mekaneya piko. Enipa nimini ukutu-pe.
35
One agale oa metekale yakane yenepa
Akolaline yagono-mikiti wa eni wia mekaneya piko. One bokuke wia mekane agalepa
niminimo-kama wia mekane agaleno, padame pademoka oyake katekoa wawamele
toamoko.
36
Akolaline mana kaku wane ukulu kime ekete enipa Akolali paya tetepo takake
oko wa iki. Nipa Agetaiyo onekele-kama takamotoa takoa moa wetekakale nokou agoke
ikino, dekolo iki-pe.
37
Agetaiyo ta wa okale-kitido tagoane toameadekolupa nipa nooke
wene tugameamene wane uku.
38
Nipa oneme ta wa okole-kama takama yakeneke uku.
Enipa nimini oko wa anu uku agale yakoa moameketeka anu toma yakule-kitike wene tugoa
meamene. Nitoa wene tugoa meketepa nipa Akolali noo-pala lipua mekolo nopa one-pala
lipuane mekuno wenepa toi wa Yesuyo okale
39
e Yu yename one wa dekoa moadete wili
toa kakoli paka petoa poka.
40
Nitoapa wakapea pome Yodane ue ketoa Yoneyo pegetoa ali atoa ue motokoa
kakana lono enika pome mepoka.
41
One eni pome mepokata ali atoa peya mati nekete ekete
Yone einagomepa ipa Akolaline tele patu kautakoane kakene tuku wa padele telekole
toamokanake i agonokemo akakana-kama nimini akedeko wa okoi.
42
Nitoapa e ali atoa
kainya mati einata einapete Yesuke wene tugakoi.
Yone Yone
<<
10 10
>>
Yone Yone
<<
11 11
>>
11
Lasarusi Tuaneyake Moa Kamotokanemo
1
Besani take eya ago Lasarusi one lainatoata Maria Masata-pala meaneya. Einagopa
eida yene pia meaneya.
2
Eina yene tane agono lainatoa Masayo padeya ka lono taneya
Yesuke pekoa yotokatekoa one kawata pinatoa one pineme kogane atoa.
3
Laine ago
yeneme tuupitakale one lainatoatame Yesuke agale oa wetekakete ekete Ali Muno neke oya
patu piane ago opi yene pia meko wa agale oa wetekaneya.
4
Einago tuko wa akedekoli
yatekome Yesuyo okome yene taneya piake tuamoo. One yene tokopa ali atoame Akolali
kei pimotoa tokome toko. Ni Akolaline mana no one patu kautakoane kakene tokoule
enekete noka kei pimotoa tokome toko.
5
Yesuyo Masa wamena lainago Lasarusi toa wene mekoa meaneya.
6
Nitaneyake
Lasarusi yene pia meko wa akedekoli yatekome one mekata ta takupeta patamotoa pa eida
meka.
7
Nititikoa one oya-lawe-pala okome Yudea take wakapea pato-kale ekete
8
ekee,
Tikisa ago nepa ikonona pakedopa ne wiadete Yu yename kue katekamotokoina take wa
poade oko-pe-koli okome
9
e eno, pou toe. Ta pataka abuna lou nome kakome yateta matai
teteponome wa keika ponome kakala toko. Nipa lou pini tuku kakoa (12) ponokala toko.
Enipa nimini ukutu-pe. Panago loyo yawa mekomepa lou pa enoa yakome tugala toamoko.
10
Nitameneya yomiyomu keneke yawa mekomepa one poka ka ludu pa takatekoya
toamokolo tokome tugala toko wa Yesuyo oka.
11
Nimo ootokoa kakome okome tone
oyago Lasarusipa pa atu pitikome tokono, kamotokapuku-kale
12
one oya-laweme ekete atu
pia meapa one weneme latoa poademe toko wa okoi.
13
Nipa Lasarusi tukome toka wa
Yesuyo okome okoyake o yename wene toamekete okoi.
14
Nitikoli Yesuyo keleyo okome
okome Lasarusi tukome toka.
15
No ita nepiane mekakoa einago tukome tokano, ke wane
wediane meku. Nipa kiwi nooke wedoa wene tugamotoane tekene wete poameneya nepiane
mekuno, opi one tuaneya pikota pato wa okale
16
eya ago Tomasi one pade ibini Didimasi
wa okala tane agome one oya-lawe-pala okome Besani take Yesu-pala tukete tupatono,
one-pala opia patoe wa oka.
17
Yesu Besani take pome kakome yatekale Lasarusine tigini kota keneke moa
piitikaneyake ta tuyono-peta lia patakala toka wa okoimo yateka.
18
Besani taapa
Yerusaleme ta liti piane ta. Eni taata pake kilomita tebolo tadiya pianeya.
19
Masa Mariatane
lainago tukome tuaneyake ete Yu yene kainya matiyame kini wene epetekadete Besani take
tumai menaneya.
20
Yesu noko wa okoimo yakamotokome Masa pome Yesu kotupaneya. Nipa Maria
yapu memotoa wawa pome kotupaneya.
21
Nitoa kotua enekome okome Ali Muno nedo ita
wete noke meoo tokapa anu anai ago tuamoo toka.
22
One tuaneya pikoyake neme oa
kowitikole-kama Akolaliyo yakoa tokono wene tuku wa Masayo okale okome
23
neke anai
tuake kamoa poo-kale
24
einatoame okome nimini wini oko. Wipitia ta pataka-pete Akolaliyo
tuane ali atoa moa kamotokakalepa anu anai agoka kamoa poo wane wene tuku-kale okome
25
nopa tuane ali atoa moane kamotokakuya. Ali atoa mea kama pikilepa no patu-kama mea
kama piki. Nooke wene tuganeya meki-kiti tuake mea kama poadete tiki.
26
Nooke wene
tugoa mea no patu kautakoa kakete mea kama piki-kitipa tua atukileka toamoi. Ina okouna
agalepa no i agome nimini oko wa wene toko-pe wa okale okome
27
e eno, winimopa nimini
oko. Ali Muno, nepa Keraisu wa papete ibini oa piane ago. Akolaline mana noo wa oa
piane ago ne taatekoa nekedeko wa Masayo oka.
Yesuyo Komo Oa Kakome Akenemo
28
Nimo oomotokome Masa wakapea wamenatoa Maria mekata ete keneya kakome oi
oi ootokoa okome Tikisa ago wete nokome ne noo wa akapa wa wetekakolo nuku wa
okaka
29
Maria wete kamokoa Yesu mekata noka.
30
Yesu Besani take wete nome
kawameneya Masayo one kotua enepokata eida pa meka.
31
Maria wete kamokoa pokale
enekete one wene epetekadete tumai menane yename pato wa litima nokoi. Nipa laine ago
pipane kotake komo opademe toko wa wene pia nokoi.
32
Maria Yesu mekata eni nokome one kawane aua pitakome okome Ali Muno anu anai
agopa wete tuameneyake nedo ita noke meoo tokapa tuamoo toka wa oka.
33
Nimo
ootokoa komo oa kawa ni one-pala opia nokoi Yu yeneka komo oa kawa tokoli enekome
Yesu tepe we tokome wene keda mati taneya kakome okome
34
one tigini maida pipokoi-pe
wa okale ekete Ali Muno ne noke enenoo-koli
35
Yesu komo loboa pitikaka.
36
Nitikale
enekete e Yu yename ekete i agopa Lasarusike wedoa wene mekoa meaneya tadekono,
enoe wa okoi.
37
Nitoapa padeka-kitame ekete i agomepa eina leneta lianeya meane agono
leneta epetekakanano, ina Lasarusi wete tuameneyake noo tokapa oyake tuamomotoo toka
wa okoi.
Yesuyo Lasarusi Kamotokanemo
38
Yesu wa ela mati tokale Lasarusi pipaneta poka. One eni pipaneta kota kabunupa
kue makai matiyame ketekaloganeya.
39
Yesu eida pome kakome okome kue ete moa
pedeka wa okale tuane agono laine Masayo okome Ali Muno einago tuutukaneyake ta
tuyono-peta lia patakala taneyano, kotimi too wa okale okome
40
dekolo oko-pe. Nepa
nooke wene tugoa mekepa Akolaliyo padele telekole tokale enoo wane okouna wene
kayapeaneya kake oko-pe wa okale
41
pade-kitame kue ete moa pedekakoi. Nitikoli Yesuyo
a tibu enekakome okome Atai anume kowitoane ukule neme wete yakoa tokono, ke wane
uku.
42
Anu kowitikule-kama neme yakoa tokono wene tekene uku. Nipa ina ikilepa no i
agopa neme moa wetekakale nekedeko wa i oboa kaki yename wene tomotoane tekene uku
wa Yesuyo ootokoa
43
kayo telo okome okome Lasarusi wete kamokoa noo wa okale
44
tuane agopa one kawa yonota pueme togotapeneya kawa one lene timini pade mamina
tigini pa atapeneya kawa taneya kamokoa noka. Nitikale Yesuyo e yene-pala okome pa
pomotono, togotane pue kekatapeo wa oka.
(Matiu 26:1-5, Make 14:1-2, Luke 22:1-2)
45
Maria mekata ugu nekene Yu yene kainya matiyame Yesuyo eni tokale enekete tekete
oneke wene tugakoi.
46
Nitikolika padeka-kiti Parisi ali-kiti mekoika pekete Yesuyo tokamo i
i wa kotukapaneya.
47
Nitikoli yatekete eni Parisi ali-kitameka Akolalike lodo yotokoai tane
tobou ali-kitameka ete Kanosolo ali-kiti peya koukoa noe wa agale oa wetekakoli nokoli
ekete edele tato patu. Einago Yesuyo telekole toma yakono,
48
enile toma yamotoa
totomedo wakolopa ali atoa peya oneke wene tugoai toi. Nitikolipa Lomane yatename tone
tobou losu yapu toto yatene peya-pala wia tadekatapeoi wa akeneya.
49
Nitikoli Kanosolo
ago pade Kayapasi eni malike ako odene mekome Akolalike lodo yotokoai tane tobou
agome okome kime nimo ikilepa nateya weneka toamekete iki.
50
I agodo ali atoa peyake
tumotokolopa nipa epetoo. Nitamokolopa Lomane yename toto yatene wia atukakolipa
nipa poo wa Kayapasiyo akeneya.
51
Nimo ikilepa one weneme titia wameneya. Eni malike
ako odene mekome Akolalike lodo yotokoai tane tobou ago tokome Akolaliyo wene takane
toa oa pianeya. Nipa Yesu Yu yateneke tuatekamo eni oa pianeya.
52
Ni Yu yateneke odene
tuameneya, Akolaline mana kono-mikiti e ku yatene ta piko peyake pilikolokaneya mekoika
Yesuyo toa motokome odeneka koukoa mekatekamoka oa pianeya.
53
Nitaneyake enipete
titimoa Kanosolo ali-kitame Yesu wia tukatekoi oi pedoa pima pekeneya.
54
Nitaneyake
Yesu Yu yene pakeke keleyo yawameneya ali piamene ta liti Epereime wa ibini akene take
pome mepaneya. Nipa one tuku kakoa (12) oya-lawe-pala opia pome mepoka.
55
Einapete edelo ago patukane wa ibini akene toge kiatekoi tigotokale tekete Yu yene
kini kini pitikoika kawa a Yerusaleme take penekete eya taneya. Kini losule tekete tigini yono
mamina mete eya uele tadakala taneya. Nipa kini wene moa koigakoyapa i koguna wa adeka
pikete taneya.
56-57
Papete eya yene Akolalike lodo yotokoai tane tobou ali-kitameka Parisi
yenameka ekete Yesu nome mekata eneketepa toto Kanosolo ali-kiti onamene wa oa
tukaneya. One dekoa moadete ni akeneya. Nitaneyake ali atoame Yesu tuku toa kawapa
tobou losu yapu pote kakete kini kini yakate tekete ekete ede wene piko-pe. Yesu einagopa
togeke noamoko patu, noko patu wa okala taneya.
Yone Yone
<<
11 11
>>
Yone Yone
<<
12 12
>>
12
Besani Take Yesuke Padeya Ka lono Taneya
Pekoa Yotokanemo
(Matiu 26:6-13, Make 14:3-9)
1
Edelo ago patukane wa ibini akene toge kiatekoi ta pataka ko melepu (6) kakoa ete
pimotoa Yesu Besani take Lasarusi mekata pome mepoka. Lasarusi einagopa tuaneyake
Yesuyo moa kamotokane ago.
2
Lasarusi mekata Yesuno nee takaketepa Masayo eni nee
moa Yesu one oya-laweka lawetekala toka. Lasarusi oneka Yesu-pala nee pikane walaike
odeneka opia meka.
3
Eida mekakoa Mariayo padeya ka lono taneya mete keneke mekoa aua
noka. Eniya motokakome kue peya mati wetekoa motokaneya. Einakeya aua nome Yesuno
kawatake pekoa yotokatekoa one pineme kogaka. Nitoa mekale yapu mekoi peyake
einakeya ka lono tootapeka.
4
Nitaneyake Yesuno oyago pade Yudase Isekariose Yesu
wimotoa moa meatekago ko okome okome
5
ina ka lono taneya ete wa topo teketepa kina
ege kadukaka ko melepume kadukoa (300) moa ponopene yene tatikoa meamedekoyake i
atoame paka pale tadeko wa oka.
6
Nipa ponopene yene mama moamokomeke oka. Yesu
one tuku kakoa (12) oya-lawene kue ka Yudaseyo ukoa yakome eni kue kode noma
yakeneyame oka.
7
Yudaseyo ko oa kakale Yesuyo okome oyakeno wa. Anu tigini kota
keneke moa piei tokolo i atoame enakeya pa pikoa kamotono, wa
8
Ponopene yenepa
enabuna kiwi pakeke mekala tikino, noanupa kiwi pakeke pa tekei mekuno, i atoame enilepa
toa kamotamene wa Yesuyo oka.
9
Yesu Besani take nome meko wa okoimo yakamotekete Yu yene peya mati eida
obomoa nokoi. Eni nikilepa Yesu odene enadete nokoiya mena. Tuaneyake Yesuyo moa
kamotokakanakago Lasarusika enadete nokoi.
10
Nitaneyake Akolalike lodo yotokoai tane
tobou ali-kitame Lasarusi oneka wia tukatekoi oi pedoa pianeya.
11
Nipa Lasarusi
einagokepa Yu yene kainya matiyame kiwi tewitikoa wawa Yesuke wene tugoa mea litikoli
tekete taneya.
Yesu Yerusaleme Take Noademe Nokale
Ali Atoame Ke Wa Kei Pima Nekenemo
(Matiu 21:1-11, Make 11:1-11, Luke 19:28-40)
12
Podolikama Yesu Yerusaleme wini noademe noko wa okoimo yakamotekete eina
toge lobutunekene yene pote
13
yo tali tewia moa aua Yesu nokaka kotua nokoi. Nitoa kayo
oma nekete ekete Akolali kei piatoe. Ali Muno patu kautakoa kama noko ago i noko. I
agopa toto Iserele yene lukoa meko agono, Akolali neme pewe wia yopiamene wa kayo
oma nokoi.
14
Yesu eni nikilepa Akolaline bokuke papete oa piane toa taatekakome dogi kai
tine pade enoa moa one patu mea noka.
15
Eina papete oa piane agalepa dikoa wia
mekaneya piko.
Saione take pitiki yene kipala ukuno, yakoe. Opi kiwi lukoa meatekago dogi kai tine patu
mea wini nokono, piti moameo wa wia mekaneya piko.
16
Eina papete wia mekapiane toa Yesuyo taatekoa tokale eneketeke one tuku kakoa
(12) oya-laweme wene toamokoi. Wa naniko Yesu tukale Akolaliyo moa kamotokatekoa a
tibuke one pa teleta tootapeneya mekanata ate aua pome mekakaleka eina oa piane agale wa
wene moa pitikoa wene tokoi. Nipa Yesuke dogi kai moa aua nokolo mea pokanapa
Akolaline bokuke oneke oa pianele eni taatekakoona wa wene tokoi.
17
Yesupa Lasarusi kota keneke pipaneta pokome ne noo wa kayo oa kamotokakale
odeneya kakete enekoi-kitame kini eina enekoinakamo ta piko peyake oa pupitikatapeneya.
18
Nitaneyake Yesuyo eni telekole tokamo yatekoiya tekete Yerusaleme noademe nokata ali
atoame patoe wa obomoa kotua pokoi.
19
Nitikoli enekete Parisi ali-kiti kini kini oote tekete
ekete ta piko peyake pitiki-kiti one pokoka litikala tikino, totome i ago oyake katekamele
toamoko wa akeneya.
Yesuyo One Tuatekamo Oa Pianeya
20
Akolali kei pia kowitadete Yerusaleme take toge lobutunokoi yene padeka-kitipa
Geriki agale yakoa akene yene.
21
Eni yenepa eya ago Galili ta keneke piko Besaida take
opiane ago Pilipi kakata nekete ekete kamo koniyali totopa Yesu enadete oko wa onokoi.
22
Nimo okoli Pilipi pome Ederu opokale Aderu Pilipita pote Yesu opokoi.
23
Nitikoli
Yesuyo okome okome Agetaiyo no Ali Yatenane Oyago pa teleta tootapeneya mekounata
ate moa kakateko-pete opi toko-la.
24
Nimini ukuno yakoe. Witi ku wane deya yapu tateke-
kiti kidene pa pikomepa nipa kidene eni pa pioo. Nitatekoyake itonokedo padame moa
pitikakalepa keti lomukome ate witoa ku peya mati tukala too.
25
One kepene mama
motokome tukaya wa piti motaneya mekagopa etepea tua poo. Nitameneya one kepene
mama moamoko agopa Akolaliyo toa motokale a tibuke mea kama poo.
26
Anu pupu
takama poko agopa no litima namene wane uku. Anu pupu takama yako agopa nopala
odenekata yatoane ni uku. Anukule takama yaki-kitipa Akolaliyo kiwi kei pia kawoo.
27
Opi
anu wene keda tane matiyame kakene ukuno, edemo wane uku patu. Tete metekoi-pete
Agetai neme eni tete ete moa pedekamene wane uku patu. O'o mena. Eni tete moadene
nokouya tekene enimo wamou.
28
Atai ne pa teleta tootapeneya meke peku laweteka toane
tokoule ali atoame enekete ne kei pimotono ta wa Yesuyo okale a tibuke agale ludu nokome
okome nitimotoane wete tokouyano, wa lokoane toadene tuku wa oka.
29
Nitikale eida kakoi yene padeka-kitame yatekete ekete tono tadiya witiko-koli
padeka-kitame ekete e 'e mena. Edelo agome tadiya onepala ko okome toka wa okoiyake
30
Yesuyo okome einagale ikilepa noanume yakamotoa tokome wamokanano, kime
yakamotoa tokome okana-la.
31
Akolaliyo itonoke meki-kiti takoa enoa akateko-petepa opi
toko. Itono yopia mekago Setanu Akolaliyo wia litiademe toko.
32
No dekoa moa ate
kamotokakolipa ali atoa peya noanuke limo limo toane mou wa Yesuyo oka.
33
Yesuyo
nimo ikilepa one tukome toatekaleke okome oka.
34
Nitikale e yename agale topo takakete
ekete tone totono bokuke eya wa wia mekanemo oi motekete oko. Mesaia einago taatekoa
nokomepa pa mea kama poo wa wia mekapianemo oi motokoo. Nitikoono, Ali Yatenane
Oyago yomoke wia dekoa kamotokoi wa wini okopa edemo wa eke oko-pe. Ali Yatenane
Oyago te-pe wa yatekoli
35
Yesuyo okome kiwi pakeke pa pa me me tootokoa poademe
toko. Eni pa tokoa kakoka pa yawa-kala kamene. Pa yawa kakoika ta likaya tokolo uku.
Yomiyomu keneke yaki-kitipa ka yomiyomume agopa takatapekolo tugama yakili tekene ni
uku.
36
Kiwi pakeke pa pa tokoa kakono, eni pa ke wene tugoa meamene. Nitiketepa eni
pa ne mana kono-mikiti latioi wa Yesuyo oka.
Yu Yene Yesuke Wene Tugameneya Meanemo
Yesuyo enimo oomotokome eni yene tewitikoa wawa paigakoa mepoka.
37
E yene kakakoa Yesuyo enika eni telekole toma yakaleka e yene oneke wene
tugamokoi.
38
Nipa Akolaline agale to awea akane ago Aisaiayo papete oa piane toa taatekoa
tokoi. Eya wa oa pianeya.
Ae, Ali Muno totome oa metekoo agale teyo yakoa motaneya patu. Ali Munagome padele
padele telekole yametekale teyo enoa motaneya patu wa enilepa wete tane
tetepo takoa oa pianeya.
39
Aisaiayo eya waka oa pianeya tokome e yene oneke wene tugamele toamokale pa mekoi.
40
Akolaliyo kini leneta likoa kolotini lupi takoa taneya. Nipa enekoiya enoa moamoa
yatekoiya yakoa moamoa tomotoa ni taneya. Enipa oneme uku agale yatekete
tekete oneke tepe kolotini pekoa pikete ekete kiwi latekoano ta wa akaya tokolo
tuku wa Akolaliyo okolo uku wa Aisaiayo papete wia mekapianeya.
41
Nipa Yesuyo etenane peku noa padele padele telekole tokale Aisaiayo papete enepikome
tokome Yesunomo eni wia mekaneya.
42
Asaiayo nimo papete oa pianeyake Yu yenane tobou ali-kiti kainya mati Yesuke
wene tuganeya. Nitiketeke eya taneya. Parisi ali-kitame kini losu yapu-kiti oto wa
noameamene wa wia litikaya tokale kini Yesuke wene tugakoinakamo witakoa wameneya.
43
Nipa ali atoame kiwi kei pimotadiyano wene wedoa pianeyake Akolaliyo kiwi kei
pimotadiyano wene wedoa piameneya. Nitikete kini Yesuke wene tugakoinakamo to awea
wameneya pa kini luaneya meaneya.
44
Yesuyo kayo telo okome okome panago nooke wene tugakomepa nipa no moa
wetekaka agokeka wene tugakome toko.
45
Panagome no enekomepa nipa no moa wetekaka
ago eni enekome toko.
46
No itonoke pa tootapeneya nikilepa nooke wene tugoa meki-kiti
yomiyomu keneke pa yawa meamomotoane tekene tokou.
47
Anu agale yatekomeke
toamokagopa one koiso akoane kibu moamou. Itonoke nikilepa ali atoa takoane enoane
akadene nokouya mena. Ali atoa toane moadene tekene ni nokou.
48
No wawa anu agale
yakamoko agopa one koiso akoa ikilepa eyame toademe toko. Wipitia ta pataka-pete
anume okouna agalemepa einago koiso akoa oademe toko.
49
Anu oane metekouna agalepa
anu weneme titiane wamokouna. No moa wetekakago Agetaiyo anume ekene toatekou toa
imo amene, imo amene wa mane oa olaukoa toka.
50
Agetaiyo one totono litia tamene wa
ikilepa ali atoa mea kama pomotoa tokome ni oko. Nitikono, agale oane metekilepa oneme
amene wa oka toane-kama uku wa Yesuyo oka.
Yone Yone
<<
12 12
>>
Yone Yone
<<
13 13
>>
13
Yesuyo One Oya-lawene Kawake Kakene
Kakene Koganemo
1
Edelo ago patukane wa ibini akene toge podolikama kiadete Yu yename nodokoa
meaneya. Nitaneyake Yesu i ta tewitikoane Agetaike poateku tigotoko wa wene taneya
meaneya. Eni wene tokome one oya-lawe itonoke mekika kiwike tuou wa wene mekoa
meateka kotuke kakoa wene mekoa mea togaka.
2
Ta likale Yesu one oya-lawe-pala opia mekome nee nakaka Setanu Saimonane mana
Yudase Isekarioseke wete awinome meaneya. Awinome mekome Yesu mone yenane
yonoke moa piateka wene moa pitikaneya.
3
Nitaneyake Yesuyopa oneketaiyo padeya
padeya peya one yonoke moa piadeko wa wene toa ni Akolali-pala kawane none wa oneke
wakapeane puku waka wene toa tokome eya toka.
4
Nee takoa piane walai liti mea
kamokakome one tokoo kakene mamina kotokoa pia mamina pade moa tene lutulogoa eya
toka.
5
Ue nomoa okolo kagonoke pekoa pia one oya-lawene kawake kakene kege kogoa
one tene lutane maminame ue kogama poka.
6
Nitoa kogama pome Saimone Pita mekata
tugakale Pitayo okome nepa Ali Muno agomeke anu kawake kakene kege kogade toko-pe-
kale okome
7
i takakulepa opi wene toameke okoyake naniko wene toade toko-kale Pitayo
okome
8
nopa pa alino, kawake kakene kege kogamoano, kogamea wa okale okome neke
kawake kakene kege kogamokolupa nipa nepa anu oyali toamoo-kale
9
Saimone Pitayo
okome Ali Muno nipa anu kawake odene kogameneya, yono wagokeka takake takoa ta-kale
okome
10
panago kege ko omotokome one yapu pokomepa one kawake kakene kege odene
wa ko amedeko. Opi kiwi kege kogatapeneya mekiyake odene agodo abe kogameneya
meko wa Yesuyo oka.
11
Nipa one wimotoa moa meatekago i wa wene toopikome tokome
odenagodo kege kogameneya meko wa oka.
12
Nitoapa Yesuyo one kotokoa pikana mamina wa moa kawa one mea nokana walai
waneke pome mepoka. Nitikome okome kini ina takakoulepa pine i wa wene tiki-pe.
13
Kime
nopa Tikisa ago wa oa Ali Muno wa oa tiki. Enipa oa epetekakili uku. Nopa edikane agono,
nimini ekete iki.
14
Nopa kini Ali Muno wa oa kini Tikisa ago wa oa tiki agomeke kini
kawake kakene kege kogakouna. Nitikouna toa kini kinika kawake kakene kege ete oto wa
kogakala tamene wane uku.
15
Kinikile takakounapa nipa kinikile dikoa ete oto wa takakete
toatikile adeka piane metekene tokouna.
16
Nimini ukuno yakoe. Pupu agome-kiti one tobou
ago oyake moa patukamele toamoko. Panagono agale aua yatekako agomeka one moa
wetekako ago oyake moa patukamele toamoko.
17
Ina okounakale opi wene taneya meki.
Eni wene taneya mekete litia tokolipa Akolaliyo pewe witikale kolotine meoino, wedoa litia
tamene wane uku.
18
Enipa kiwi peyake ekene wamuku. Kipa anume takoane motokou-kiti
kini tepene piki wene tetoane enoane tekene ni uku. Nipa Akolaline bokuke eya wa papete
wia mekapianemo taatekoo tokolo ni uku. Nopala opia mekome nee nakagomepa no ne
wiou wa kawa tapia witiko wa wia mekapianeya.
19
Enilepa wete taatekameneyake uku. Wa
naniko taatekakale enekete ekete ina okana agalepa opi eni taatekakono, onepa i ago wa
okana nimini akedeka wa wene toi.
20
Etene nimini ukuno yakoe. Anume moane wetekakolu
nokago makutukoa moteketepa nipa nopala dekoa eni makutukoa motekete toi. No
makutukoa moteketepa nipa no moa wetekakago-pala dekoa makutukoa motekete toi wa
Yesuyo oka.
Yudaseyo Yesu Mone Yenane Yonoke
Moa Piatekamo
(Matiu 26:20-25, Make 14:17-21, Luke 22:21-23)
21
Yesuyo nimo ootokoa one wa ela mati tokale kakome okome etene nimini ukuno
yakoe. Kiwi padame no mone yenane yonoke moa pioo wa okale
22
one oya-lawe kini kini
enete tekete onepa teyo moa piatekoyake oko patu wa okoi.
23
Einata Yesuno oyali pade
Yesuno kotomaneke lewikoa meka. Einagopa Yesuno kolotini ago.
24
Einagopa Saimone
Pitayo lene lagatikamotokome okome enipa teeke oko-pe wa neme yakoa a wa okale
25
einago Yesuno kotomaneke lewikoa mekome okome Ali Muno neme teeke oko-pe-kale
okome
26
i nee kugu moane okolo kagonoke uele pitikatekoane laweteku agopa einago eni
wa ootokoa moa uele pitikatekoa Saimonane mana Yudase Isekariose ne na wa meteka.
27
Nitikale motokaka Setanu Yudaseke awinaneya. Nitikale Yesuyo okome neke toatekole
wete ta wa oka.
28
Nitikalepa Yesu-pala walaike opia mekoi-kiti padameka inapa ike oka wa
wene toamokoi.
29
Nipa Yudase kini kue ka ukoa yaka ago tokale kini toge kia noateko nee
topo toa motokapa wa Yesuyo okoto patu. Ponopene yene auapea padeya-kiti mepa wa
okoto patu wa wene pikoi.
30
Nitaneyake Yudaseyo eina nee kugu moa noomotokome wete
wititapekome poka. Ta eina lia tagatapeneya.
Wenele Toatikimo
31
Yudase pootokaneyake Yesuyo okome Ali Yatenane Oyago no wipitiane tukule
enekete kei piatiki-pete opi toko-la. Ni Akolaline peku noane wipitiane tukule ali atoame
enekete Akolalika kei pikala toi.
32
Enilepa pa teleta tootapeneya meko Akolali patu
kautakoane kakene tukupa nipa Akolaliyo one pa teleta tootapeneya meku peku noa ta wa
no lawetademe toko. Enilepa opii toko.
33
Anu mati deya-kiti kipala me me tootokoane
puku. Pokolupa kime no tuku toa kawa teko tokale wawei. Yu yene-pala okouna kipala opi
lokoane uku. No poatekuka kiwi oyake namele toamoko.
34
Namele toamokoyake kini
wenele toatiki totono opi oane metekuno, yakoe. Kiwike wene mekoane mekene tuku toa
kini kinika edikoa wene mekanali yoma pamene.
35
Kini kini wene mekanali yoma pokoile
eneketepa peyame no inakagono agale litima tikina wa wene toi.
Pitayo Yesu Akoa Wawatekamo
(Matiu 26:31-35, Make 14:27-31, Luke 22:31-34)
36
Saimone Pitayo Yesu-pala okome Ali Muno nepa manika poade oko-pe-kale okome
no pukuka opi pade ne oyake litia noamoo. Nanikodopa oyake litia noade toko-kale okome
37
Ali Muno opi anume ne litiane toamuku wapa dekolo oko-pe. Neeke toane oyake tuadene
uku-kale okome
38
nooke toapa nimini tuade oko-pe. Etene nimini ukuno yaka. Ali ogadame
ka wameneka no wini agopa enamuku ago wa no tebolo-peta akoa waoo wa Yesuyo oka.
Yone Yone
<<
13 13
>>
Yone Yone
<<
14 14
>>
14
Oneketai Mekota Ponadetepa One Yoto
Pitia Namene Wa Yesuyo Akenemo
1
Wene keda taneya meameamene. Akolalike wene tugoa meapa nookeka wene tugoa
meamene.
2
Agetaine yapukepa yapu luku peya mati piko. Nile toamokome too tokapa nipa
yapu luku peya piamoko wane ou tokake nopa kiwi note meatikita nodokakadene puku.
3
No pone kini meatikita nodokakatekoanepa wakapeane nekene anu yapu noe wane
enemonou. Nipa no mekouta nopala meatoane mou.
4
No eni take poateku ka kime wene
tiki wa Yesuyo okale
5
Tomasiyo okome Ali Muno ne poke meateko taapa i wa totome
wene toamokono, ne poateko ka totome edoa wene tomotoa-pe wa okale okome
6
Agetaike
poatiki kaapa no. Akolaline nimini pekupa no. Ali atoa mea kama pikilepa no patu-kama
kautakoa kakete tiki. Agetaike ponadetepa padameka no koekoa ponamoino, no yoto pitia
namene.
7
Nodo wene tekete toi tokapa nipa Agetaika wene toi toka. Nitoi tokake opi
titimoa Agetai wene toa one lene timini enoa tiki wa Yesuyo oka.
8
Yesuyo nimo okale Pilipiyo okome Ali Muno neme Atai wa oko agopa yameano ta.
Yametekalepa wene keaneya meoo-kale okome
9
kipala kotona opiane yawane kakounake
Pilipi neme no wene toameke oko-pe. Kime no eneketepa nipa Agetaika eni dekoa eneki.
Neketai yamea ta wapa edekolo oko-pe.
10
Nopa Agetai-pala lipuane meku. Agetaipa nopala
lipua meko. I ukumopa no i agome nimini oko wa wene toamiki-pe. Kipala oane meteku
agalepa anu weneme titiane wamuku. Agetai nopala lipua mekome onekele toma pokome
oko toane uku.
11
Agetai nopala lipua meko. Nopa Agetai-pala lipuane meku. Eni ukupa no i
agome nimini oko wa wene toati wane uku. Kipala i ukumo yakoake no wene toameketeka
Akolalinele takama yakuleke nooke wene tugamene.
12
Etene nimini ukuno, yakoe. Nooke
wene tugoa meki-kitipa anume toma yakule-kiti kimeka toi. Nipa Agetai mekota pokolu
tokome anu toma yakou toa moa patukoa padele padele tubele-kiti toma poi.
13
Anu ibini
wedekoa kowitikoile-kama yakoane tou. Nipa agetai patu kautakoane kakene auapekolu
tekete ali atoame kee wa one kei pimotoane tekene tou.
14
Anu ibini wedekoa kowitikoile
etene yakoane tou wa Yesuyo oka.
Epetane Yomini Wini Noo Wa Oa Pianemo
15
Yesuyo nimo ootokoa kakome okome kiwi nooke wene mekoa meketepa nipa
anume tamene wane okoule-kiti yakoa toi.
16
Nitikolipa kini kowitikakolu Agetaiyopa kiwi
auapeateka Epetane Yomini kipala opia meemoa pomotoa wetekoo. Niminimo-kama oko
Yominike uku.
17
Itono peku noai tiki yename eni Yomini enamoa wene toamoa tekete
oyake makutukoa moamele toamokolo pa meki. Nitikiyake anu oya-lawe kime eni Epetane
Yomini wene tiki. Kipala opia yawa kiwike awinome mea tokolo tekete ni wene tiki.
18
Kiwi
egetiniya kamotoane tewitikoane poamou. Nitamekene kiwi oto wa enemonou.
19
Nani
keneya itono peku noai tiki yename anu lene timini wa enamatikiyake anu oya-lawe kime wa
enoi. No meane kama pokolu tokome kiwika dikoa mea kama poi.
20
Kipala ina ukule
taatekaka-petepa no inakago oneketai-pala lipua meko wa wene toa ni kiwi nopala lipua
meko wa wene toa ni no inakago kipala lipua meko wa wene toa toi.
21
Anume tamene wane
uku toa yakoa toma poko agopa nooke wene mekoa meko ago eni. Nooke wene mekoa
mekagokepa Agetai wene mekoa meoo. Noanuka einagoke wene mekoane meane anu pono
yamekala tou wa Yesuyo oka.
22
Nimo okale Yudaseyo yatekome okome Ali Muno itono peku noai tiki yene
katekoane kiwi odene pono yamenokala tou wapa edekolo oko-pe wa oka. Einagopa
Yudase Isekariose mena.
23
Yudaseyo enimo okale Yesuyo okome nooke wene mekoa
meko agomepa anume oane meteku agale yakoa too. Nitikalepa Agetai einagoke wene
mekoa meoo. Einagokepa Agetai tota note awia menoo.
24
Nooke wene mekoa meamiki
yenamepa anume uku agale yakoa toamiki. Eni ukumo yatikinapa anu weneme titiane
wamuku. No moa wetekakagome amene wa okamo-kama okala tuku.
25
Ina okounapa
kipala pa opiane mekene ukuna.
26
Kiwi auapeateko agopa Agetaiyo moa wetekakilepa no
patu kautakoa kakome auapemotoa wetekoo. Nitikale awinome mekomepa pademo
pademo peya olaukoa ni kipala okouna peya i i wa wene taka taka too.
27
Tepe kolotini
mataketikaneya meatiki peku lawetoane puku. Nipa no kilikoane meku toa kiwika kilikoa
meamene wane puku. Kini kaua-mikitame pa itono peku lawetane toane lawetamukuno,
wene keda taneya meamoa piti wia mitapeamene.
28
Oto wakapeane noadeneke kiwi
tewitikoane puku wane okolu kime yatekoina. Nitikoinano, kiwi nooke wene mekoa
meadekolipa nipa no i ago one etene mekota pome kapademe oko wa wedia meoi. Nipa
oneketai one moa patukoa ako odene meko ago mekota eni pome kapademe toko wa
wedia meoi.
29
Kipala ina ukule-kiti wete taatekameneyake opi oane piku. Nipa taatekakale
eneketepa enapa i tadeko wa nooke wedoa wene tugamotoane tekene ni uku.
30
Kipala ko
okoane piamele toamokolo uku. Itono yopikago Setanu noademe nokolo tekene ni uku.
Setanu einago nokoyake oneme no yopiatekole pade toamokolo uku.
31
Eya waneka uku.
Ta piko peya pitiki-kitame eya wa wene tomotou. No i ago oneketaike wene mekoa
mekono, oneme tamene wa okole-kama toa togako wa wene tomotou. Opi kamoa ika
tewitikoa patoane uku wa Yesuyo oka.
Yone Yone
<<
14 14
>>
Yone Yone
<<
15 15
>>
15
Yesu Onepa Gerepi Po Pine
1
Yesuyo eya wa pedoa okome oka. Etene gerepi po pinepa no. Agetai onepa gerepi
po ipe talo toa lati lati tokago.
2
Nooke agetamu toa tatia piko gerepi po yenene ku
tuamokolopa talo tokagome te ia mitikakala toko. Tatia piko gerepi po yenene ku tukolopa
ku wedoa tuma pomotoa tokome a eyo wia kakoya te ia lati lati toko.
3
Anume oane
metekouna agalemepa kini tokoi poanelepa a eyo wia kakoya te ia waou toa kogoa kiwi wete
epetekaneya.
4
Kipa nopala lipua mekolipa nopa kiwi-pala lipuane meou. Po yenenedo pine-
pala lipua meamokomepa nipa one weneme ku tuamele toamoo. Kiwika dikoa nopala lipua
meameketepa nipa ku tuamele toamokale pa meoi.
5
Gerepi po pinepa no. Kipa po yenene-
kiti. Panago nopala lipua mekolo wa no onepala lipuane mekulupa nipa toneta liputakutukoa
mekolo einago ku wedoa tuma poo. No ete kamotoa wawa kini tutu wa meketepa kini
weneme padeleka toamoi.
6
Talo agome pa yenene te ia yawe pitikakolo ala toa kau
tootapeko. Nitikolo oboa pia toele pitikakolo toeme napetapeko. Nopala lipua meake wako
ago-pala enakale too.
7
Nopala lipua mea kiwi olaukakouna tepene moa mekoa tokolipa kini
wene litia kowitikoile-kama Akolaliyo yakoa too.
8
Kipa ku wedoa tuou toa mea
epetekakolipa ete-kitame no inakagono peku kime nakedikino, ke wa Agetai kei pikala toi.
9
Agetai nooke wene mekoa meko toane kiwike wene mekoane meku. Kiwike wene
mekoane mekene pawe toane talo toa memotoa tekete nopala lipua meamene.
10
Agetaiyo ta
wa oko toane takama yakilepa agetai nooke wene mekoa mekome pawe toa talo toa
memotoane tuku. Ena toa noanume tamene wane uku toa kime takama yaketepa nipa kiwike
wene mekoane mekene pawe toane talo toane memotoa tekete toi.
11
Kipala i ukupa no
wediane meku toa eni yano kakoa kiwi wedia mea kadukama pomotoane tekene ni uku.
12
Eya tamene wane uku. Kiwike wene mekoane meku toa kini kini wene mekanali yoma
pamene.
13
Panago one oya-laweke wene wedoa mekoa mekomepa nipa one oya wateaneya
kamotoa oneka wiamene wa ketekako. Eni wene mekoa mekome tokolepa padameka oyake
moa patukamele toamoko.
14
Anume tamene wane uku toa teketepa nipa anu oya-lawe
kakete tiki.
15
Opi titimoane kipa anu pupu yene wane wamuku. Pupu agomepa one pupu
pinagonole takakilepa pinagono tepene piko wene tetoa enamokome tokolo tekene ni uku.
Opi kipa anu oya-lawe wane uku. Nipa Agetaiyo no peku laweteka toane kiwi lawetekouna
tekene ni uku.
16
Kipa kini weneme no takoa moa litikoina mena. Noanume kiwi takoane
motokouna. Nipa kawa kawateko ku wedoa tuma pomotoane tekene takoane motokouna.
Ku wedoa tuma pokolipa nipa anu ibini wedekoa kowitikoile-kama Agetaiyo yakoa too.
17
Kipala ina okounapa kini kini wene mekanali yoma pamene wane ekene okouna.
Itono Peku Noai Tokoi-kitame Yesuno
Oya-lawe-pala Kotimi Yoa Meatekoimo
18
Itono peku noai tiki-kitame kipala kotimi yoa meadekolipa nipa nopala namolo
kotimi yoa mekoina toa tiki wa wene taneya meamene.
19
Anu oya-lawe kime itono peku
noai tekete toi tokapa eni yename kipa kini yagono-mikiti wa kiwike wene mekoa meoi toka.
Nitoi tokake kipa kini yagono-mikiti mena wa kotimi yoa meki. Nipa eni yene pa kamotoane
wawane anu oya-lawe kipa anu wane takoane motokouya tokome kipala kotimi yoa meki.
20
Nitikino, kipala papete eya wane okouna wene taneya meamene. Pupu agome-kiti one
yopikago oyake moa patukamele toamoko wane okouna. Nipa pade ali atoame noodo tete
meteketepa naniko kiwika dikoa tete mekala toi. Ni anu agaledo litia teketepa kini agaleka
yakoa moi wane okouna.
21
Kipa anu oya-lawe tokale tekete kipala kotimi yoa mea tete
mekala toi. Enipa no moa wetekakago wene toameneya mekete ni toi.
22
No none eni yene-
pala ko wamou tokapa nipa i yename poanele tikilepa wene toamekete tokoino, nami wiane
kibu moateku toa mena wane ou toka. Nitou tokake no none olaukakoumo yatekoiya tekete
ae poanele tikilepa wene toamekete tokoo wa kini wa kei piamele toamoko.
23
Dikane
yename nota kotimi yoa meketepa nipa Agetai-pala dekoa kotimi yoa meki.
24
Kiwi pakeke
padame namolo toamokoinakale ele kule telekole toamou tokapa nipa kini poanele tikilepa
wene toamekete tokoino, nami wiane kibu moateku toa mena wane ou toka. Nitou tokake
ele kule telekole tokoule eneketeke Agetai tota-pala kotimi yoa meki.
25
Nipa nopala kotimi
yoa mekilepa pa puputua tiki wa kini totono bokuke papete wia mekapiane toa taatekoa
tiki.
26
Kiwi mama moa auapeateko Epetane Yomini Agetai-pala opia mea kako ago taatekoa
nokome no ko oademe toko. Niminimo-kama oko Yominike uku. Eni Yomini anu oya-lawe
kiwike awinome memotoane wetekakolu Agetai mekata mea noo.
27
Anu oya-lawe kimeka
no ko oma poi. Nipa Akolalinele titiane takakouna-pete laigoa nopala opia yakoina tekete ni
toi wa Yesuyo oka.
Yone Yone
<<
15 15
>>
Yone Yone
<<
16 16
>>
16
1
Yesuyo nimo ootokoa kakome okome kipala ina okounapa nooke wene tugoa meake
tewitikoa wakaya tokale okouna.
2
Yu yename kini losu yapu-kiti oto wa noameamene wa
kiwi wia litikala toi. Wa naniko kiwi wia tukaketepa kini Akolalinele takaku wa wene pia wia
tukakala toi.
3
Nipa Agetai tota wene toamekete tekete nitoi.
4
Eni toatekoile taatekoa tokoli
eneketepa ena okana eni taatekako wa wene tomotoane tekene ni papete oane piku.
Epetane Yominiyo Tokomo
Akolalinele titiane takakouna-pete enimo wamokouna. Nipa kipala pa opiane meadene
mekene tekene wamokouna.
5
Papete wamokounake no moa wetekakago mekota
wakapeane poateku tigotokolo tekene enimopa opi to aweane uku. Nitikuyake ne manika
poade-pe wa padameka wamiki.
6
Enimo ukulu yatekete kini wene keda mati taneya kaki.
7
Nimini ukuno yakoe. Kiwi tewitikoane pikilepa kiwi auapeou wane tuku. Kiwido
tewitikoane poamokolupa nipa kiwi mama moa auapeatekago noamoo. Kiwi tewitikoane
pekenepa nipa kiwi mama moa auapeateko ago kiwike awinomotoane moane wetekou.
8
Nitikolu nokomepa Epetane Yominiyo eya too. Itono peku noai tiki-kitame kini tikile
epetekoa tokoo wa wene pikoinake poanele tekete tadeko wa wene tomotoa too. Ni
kiyotokoa mekete toatekoleka ni Akolaliyo ali atoa takoa enatekoleka kime wene toko wa
wene pikoinake wene toamekete tadeko wa wene tomotoa too.
9
Nipa no Keraisuke wene
tugamadete waketepa epetekoa tokoo wa wene pikoinake ae poanele tekete tadeko wa itono
peku noai tiki yename wene tomotoa too.
10
Ni no inakago wene kiyo wameneya meane ago
tetepo takakilepa paya wene pia tekete tadeko waka wene tomotoa too. Nipa Agetai mekata
wa ate wakapeane pokolu tokome anu oya-lawe kime anu lene timini wa enamoi tokolo
tokome nitoo.
11
Ni no koiso akoa eketepa epetekoa tokoo wa wene pikoinake Akolaliyo
itono yopia mekago Setanuka koiso wete akoa okome tadeko wa itono peku noai tiki
yename wene tomotoa too.
12
Kipala pademo pademota oane meatekuyake opi kime oyake
yakoa moamele toamoko.
13
Niminimo-kama oko Epetane Yomini nokome niminimo-kama i
i wa wene taka taka too. Nipa one weneme pademoka titia wameneya one yatekamo-kama
to awea oo. Padele padele nani toatikileka i i wa to awea oo.
14
Nitoapa no nakouna peku
kime noa tomotoa tikilepa ali atoame no kei pimotoa tokome too.
15
No nakouna peku
kimeka noa tomotoa Epetane Yominiyo too wane okouna. Nipa Agetaiyo onekeya peya
nekeno yopiamene wa one peku no lawetekale tekene ni okou wa Yesuyo oka.
Yesuno Oya-lawe Wene Keda Taneya Meake
Wedia Meatekoimo
16
Yesuyo nimo ootokoa kakome okome one lene timini enamatiki tigotoko. Wa nani
keneya one lene timini kime wa enoi wa okale
17
one oya-lawe padeka-kiti kini kini yakaate
tekete ekete one enamatiki tigotoko wa oa wa nani keneya one lene timini kime wa enoi wa
oa toka. Oneketaike puku waka okanano, edemo wa okome okoto patu wa ootokoa ekete
18
tigotoko wapa edemo wa okome oko patuno, totome wene toamoko wa okoi.
19
One
oya-laweme one pitia yakadete okoli Yesuyo enekome okome no enamatiki tigotoko wane
oane wa nani keneya anu lene timini kime wa enoi wane oane tokounapa edemo wane ekene
uku patu wa kini kini yakate tekete ikino,
20
nimini ukuno yakoe. Kiwi komo ue u u keneya
ka ua okoa kamotoake ete yene wedia meoi. Nitikolika kiwi wene keda taneya meake wa
naniko kolotine meoi.
21
Atoame-kiti one mati pene opiademe welea mekome wene keda
taneya meko. Nitoake naniko one mati opia pikomepa mati opiane pikuno wene tokome
wene yaapekale meoo. Nipa one namolo motokana tete wene kayapetapea wedia meoo.
22
Kiwi mekete tikileke mati kakene atoa adeka pikene uku. Opi wene keda taneya mekiyake
wa kotuane enekolupa wene yaapekale kolotine meoi. Wene yaapekale eni mekoile
padameka oyake kautoa agopa takamoi.
23
Kipala ina ukule taatekoa toka-petepa kime no
padelekeka pitia yakatiki toa mena. Etene nimini ukuno yakoe. Anu ibini wedekoa
kowitikoile-kama Agetaiyo yakoa too.
24
Papete padeya mano wa anu ibini wedekoa
kowitikileka toamokoinano, opi titimoa padeya mano wa anu ibini wedekoa kowitikolipa
Akolaliyo yakoa too. Wedia meatiki kotuke kakoa wedia meadetepa dikoa kowitikala
tamene wa Yesuyo oka.
Itono Peku Noai Tiki-kiti Moane
Kawikatapeku Wa Yesuyo Akenemo
25
Yesuyo nimo ootokoa kakome okome ina okounapa pedoane agale-kama
okounano, naniko pedoane agale teigoane wakenepa Agetai ko keleyo to aweane ou.
26
Enipetepa Agetai kowitikilepa anu ibini wedekoa kowitikala toi. Nitikolipa Atai kini
kowitikile yakoa ta wane wamou.
27
Agetai kiwike wene mekoa mea tokome one weneme
kini kowitikoile yakoa too. Nipa anu oya-lawe kiwi nooke wene mekoa mea ni no i ago
etene Akolali-pala opia-kama mea nekedeko wa kime wene toa tikili tokome kiwike wene
mekoa meko. Nitikono, kini kowitikoile yakoa too.
28
Agetai mekata meane itonoke nokou.
Opi itono tewitikoane Agetai mekota wakapeane puku wa Yesuyo oka.
29
Yesuyo nimo okale one oyali-kitame ekete opi pedoa agale wamokono, enipa keleyo
to awea oko.
30
Padeya padeya peya neme wene tootapekono, tone pitia yakatekomo ne
wete yakamokoyake neke weneme to awea okono, nepa Akolali-pala opia-kama mea
nekedeko-koli okome
31
ina okounapa no i agome nimini oko wa nooke wene tugakete iki
patuno,
32
pade-kitame kiwi moa tadekakolipa no kidene kamotoa kini kini yapu yapu tadoa
pootapeoi. Eni toatiki tigotoma noko. Kime no tewitikoa wakolika Agetai nota opia
meoono, anu kidene kawamou.
33
Ina okouna oane pikilepa kiwi nopala lipua mekete kilikoa
memotoane tekene okou. Itonoke meketepa ke enekakale mea tete-kala moma yawei.
Nitatikiyake itono peku noai tiki-kiti noanume wete moane kautakouyano, piti moameneya
atiki toa meamene wa Yesuyo oka.
Yone Yone
<<
16 16
>>
Yone Yone
<<
17 17
>>
17
Yesuyo One Oyali-kitane Kowitikanemo
1
Yesuyo nimo ootokoa tibuke atepea enekakome okome Atai enapetepa opino. Ne pa
teleta tootapeneya meke peku lawetekale noane toane wipitiatekule ali atoame enekete no kei
pimotono ta. Nipa ali atoamepa nepa dikane ago tadeko wa neka kei pimotono ta wane uku.
2
Atai, ali atoa peya nooke-kama lukoa memotoa teke no moa kakaka tokolo ni uku. Nipa
neme takoa moa no metekanakeya peya noanu ne patu mea kama pomotono ta wa no moa
kakaka.
3
Atai nepa nimini Akolali. Neke yagono ago pade kakileka toamoko. Neme moa
wetekakago Yesu Keraisu no i kakene uku. Ali atoa mea kama pikilepa Atai tota wene
taneya mekete tiki.
4
Neke pa teleta tootapeneya meke peku laweteka toane noane tekenepa
nipa ali atoame nepa dikane ago tadeko wa ne kei pimotoane tekene tokou. Ni neke
takatekoule i i wa neme yametekana toane peya takakene uku.
5
Atai itono tibuta wete
latiameneyake nepala opiane meane kakolu ne pa teleta tootapeneya meke peku lawetekale
noane tokouna. Opi ne patu kautakoane kakene enakale wa toane meouno ta.
6
Itono peku noai tiki-kiti katekoa wawa neme takoa moa no metekana ali-kiti-pala neke
ibini i wane to aweane okou. I ali-kitipa nekeke neme no moa metekale neke agale yakoa
litikoi.
7
Yakoa litikete tekete opi eya wa wene tiki. Neme no lawetekana peku peya neeke-
kama titiadeko wa wene tiki.
8
Neme no mane oa olaukakana toane i ali-kiti-pala i i wane
to aweane okolu yakoa motokoi. Nitoapa no nepala opiane meane kawane nekedeku wa
wene toa ni nemepa no moa wetekadeko waka wene toa tiki.
9
I ali-kitane kowitikakene uku.
Nipa neme takoa moa no metekana ali-kitane kowitikakene uku. I ali-kitipa neke tokolo ni
uku. Nitikuyake pa itono peku noai tiki yenane kowitikakene wamuku.
10
Anukuya-kama
neke. Nekeya-kama anu. Anu peku lawetekulu i ali-kitame noa tikilepa ete ali atoame no kei
pimotoa tiki.
11
Opi i ali-kiti itonoke pa mekete kamotoane tewitikoane neeke nuku. Atai
nepa epetanele-kama tokagono, neme takoa moa no metekana yene neke ibini kautakoa
kawa kamotono, pawe toa talo toa kamene. Nipa toneta odene wene piitikoa mekete toko
toa anu oya-laweka edikoa odene wene piitikoa memotono ta.
12
Neme takoa moa no
metekana oya-lawe-pala opiane yakenepa neke ibini kautakoa kawa kamotoane talo toane
mekou. Eni yene talo toma nekenepa atuatekago odene katekaku. Enipa neke bokuke
padame papete wia mekapiane toa taatekamotoa einago katea poka.
13
Opi neeke nuku. Anu oyali-kitipa no wediane meku toa kotuke kakoa wedia
memotoane tekene itonoke pa mekenepa imo to aweane uku.
14
Neme oa metekana agalepa
anu oya-lawe-pala to aweane akakou. Nitikouyake itono peku noai tiki-kitame i yenepa kini
yagono-mikiti mena wa kotimi yoa meki. Nipa noanume itono peku noane toamuku toa anu
oya-mikitameka noa toamikili tekete kipala kotimi yoa meki.
15
Nitikili tekene anu oya-lawene
kowitikakilepa itonoke meaneya moa a tibuke kakoano ta wane kowitikamukuno, Setanuyo
toa potokademe tokale pawe toa talo tamene wane ni kowitikaku.
16
Noanupa itono peku
noane toamuku toa anu oya-mikitameka noa toamiki.
17
Neke agalepa nimini pekuno, anu
oya-mikitipa takoa moano ta. Nipa neke nimini peku laweteke nitoano ta.
18
Atai nekele
takamotoane itonoke moa wetekakana toanepa anu oya-laweme neke agale oa
pupitikakamotoane moane wetekakou.
19
Anu oya-mikiti auapeadenepa Atai nekele-kama
takou wane ne patu kautakoane kaku. Nipa anu oya-mikitame neke nimini peku noa nekele-
kama takama pomotoane tekene tuku.
Yesuyo Ali Atoa Peyane Kowitikanemo
20
Anu oyali-kitane odene kowitikakene wamuku. Anu oya-mikitame neke agale oa
mema pokoli yakoa moa nooke wene tugakoi peyane kowitikakene uku.
21
Eni yene peya
odene wene-kama piitikoa memotono ta. Atai toneta liputakutukoa meko toa eni yene peya
tota-pala lipua memotamene. Nipa itono peku noai tiki-kitame no inakago neme moa
wetekadeko wa wene tomotono nitamene.
22
Ne pa teleta tootapeneya meke peku
lawetekana toane anu oya-mikiti lawetekala tokou. Nipa toneta odene wene piitakutukoa
meko toa kini kinika odene wene piitakutukoa memotoane tekene tokou.
23
Edikoa mekolipa
nipa nopa kipala lipuane mekolu nepa nopala lipua meoo. Anu oya-mikiti kini kini odene
wene piitakutukoa meatiki kotuke kakoa memotono ta. Nitoa mekoile enekete itono peku
noai tiki-kitame eya wa wene toi. Neme no inakago moa wetekadeko wa wene toa ni ne
nooke wedoa wene mekoa meko toane anu oya-lawekeka wene mekoane meku waka wene
toi.
24
Atai neme takoa moa no metekana-kitipa no wida none meatekuta nopala opia
memotoane uku. Itono tibuta wete latiameneyake ne nooke wene mekoa mea teke neke
peku lawetekana. Eni peku noane pa teleta tootapeneya meane tokouna toane wida wa
meane tokolu anu oya-mikitame enemotoane uku.
25
Atai nepa wene kiyo akeneya-kama
meko. Itono peku noai tiki-kitame nepa dikane ago wa wene toamikiyake noanume wene
tuku. Anu i oya-lawemepa ne dikane agome no moa wetekadekono wenepa tiki.
26
Ne ko i i
wane anu i oyali-kiti-pala to aweane okala tokou. Nitikouno, wa to aweane oma pou. Enipa
ne nooke wene mekoa meko toa anu oya-mikiti kini kini wene mekanali yoma pomotoane
tekene tou. Nipa nopa kipala lipuane meadene tou wa Yesuyo Akolali-pala oka.
Yone Yone
<<
17 17
>>
Yone Yone
<<
18 18
>>
18
Yesu Dekoa Motanemo
(Matiu 26:47-56, Make 14:43-50, Luke 22:47-53)
1
Yesuyo Akolali-pala einaka einamo oomotokome pome one oya-lawe-pala Kiderone
wa ibini akene ue ketoa poka. Ketoa pome one oyali-kiti-pala yomo olipe ipeke mepoka.
2
Yesupa one oya-lawe-pala eni ipeke lugutukoa koukoa mepokale tokome one wiateka oi
pedoa pianago Yudaseyo kini eni pokoita wene taneya.
3
Eni wene tokome Yudase eida
nikilepa poyo ali-kiti-palaka tobou losu yapu talo tane ali-kiti-palaka koua noka. Nipa
Akolalike lodo yotokoai tane tobou ali-kitameka Parisi ali-kitameka moa wetekaneyake
nokoi. Neketepa peti tole labota udukoa kibutua lama eya-pala aua nidikoa nokoi.
4
Nitaneyake Yesuyopa onepala toatekoile peya wene toopianeya tokome eni yene kotua
pokome yatekome okome te tuku toniki-pe-kale ekete
5
Nasarese Yesu wa okoli okome ni
agopa no toko-la wa oka. Eni nokoi yene pakeke Yesu wimotoa moa meatekago Yudase
oneka kaka.
6
Yesuyopa ni agopa no toko-la wa okaka e yene kutu witimotekete itono aua
pitakolokakoi.
7
Nitikoli Yesuyo wa lokoa yatekome okome te tuku toniki-pe-kale ekete
Nasarese Yesu-koli okome
8
ni agopa no toko-la wane okounano, kime no dekoa moadete
tuku tonadekolipa nipa anu oyali-kiti pa pomotono toe wa oka.
9
Eni okapa Atai neme moa
no metekana yene peya talo toane odeneka katekakile toamuku wa papete oa pikana toa
taatekamotoa ni oka.
10
Saimone Pitayo one kepete tue luaneya kakome padago wiou wa witimoa kagome
nimini yono lono kapidi pine takoa pitikaka. Einagopa ako odene mekome Akolalike lodo
yotokoai tane tobou agono pupu ago. Einago one ibinipa Malakasi.
11
Einagono kapidi pine
takoa pitikakale Yesuyo Pita-pala okome neke kepete tue wa ete lua. Agetaiyo no noatekou
ue mete keneke mekoa metekilepa no tete moatekolu toka. Eni tete edoane momotoa
wamoko-pe wa Yesuyo oka.
Yesu Anasi Mekata Aua Nekenemo
12
Poyo yeneka kini tobou agoka tobou losu yapu talo tane ali-kitika enika eni yene
peyame Yesu dekoa moa yonotake kapa po kakamotekete
13
Anasi mekata namolo takoa
aua pokoi. Anasi onepa Kayapasine natonane etene. Eni malikepa einago Kayapasi ako
odene tobou ago mekome Akolalike lodo yotokoai taneya.
14
Kayapasi einagome Yesu
tuatekamo ete Yu yene-pala papete oa pikome okome ali atoa peyake odenagodo tukalepa
nipa epetoo wa akene ago.
Pitayo Yesu Wakenemo
(Matiu 26:69-70, Make 14:66-68, Luke 22:55-57)
15
Eya agota Saimone Pita-pala Yesuno pade oyagotapa Yesu aua pokoika litima
nokoi. Ako odene mekome Akolalike lodo yotokoai tane tobou agomepa Pita-pala opia
noka ago wene tokale tokome einagome Yesu koua ako tobou agono yapu pomale pome
mepoka.
16
Nitikalepa Pita akolono kago keteponoke pa nepia kaka. Nepia kakalepa ako
tobou agome wene tane ago akolono pokome kago ketepono yopia kaka atoa-pala agale
ootokoa Pita enemoa yapu keneke aua noka.
17
Nitikale eina kago yopia kaka atoame Pita-
pala okome neka einagono oyali-pe-kale Pitayo okome e 'e mena wa oka.
18
Niti tokale tokome tobou losu yapu talo tane ali-kitameka poyo yenameka totoi moa
koukoa toe yokoa kakete kini yono toe yame yame toa kakoi. Nitikoita Pitaka niti paletoa
kaka.
Anasiyo Yesu Pitia Yakanemo
(Matiu 26:59-66, Make 14:55-64, Luke 22:66-71)
19
Ako odene mekome Akolalike lodo yotokoai tane tobou agome Yesu one oya ali-
kitikeka one olaukanemo-kitikeka pitia yakoai tokale
20
Yesuyo okome ali atoane lene
makono-kama kakenepa olaukakala tokou. Nipa sinokoke losu yapu-kitikeka Yu yene
peyame oboai tiki tobou losukeka kakene olaukakala tokou. Nitoanepa pademoka
paigakoane wamokouna.
21
Nitikounano, no edekolo pitia yateko-pe. Anu agale yatekoina
yename anu olaukakouna wene tekete tikino, eni yene pitia yaka wa oka.
22
Yesuyo nimo
okaka one kakaya liti kaka poyago padame Yesu yoname witikome okome tobou ago-pala
widikoa wamea wa kikoa okale
23
okome oane potokadekolupa anu oane potokakoumo i
wa a-na. Oane potokameneya nimini akedekolupa no edekale witikato-pe wa oka.
24
Nitikalepa Anasiyo i ago Yesu ako tobou ago Kayapasike aua poe wa one poyo ali-kitike
moa metekale kapa po pa kakeneya aua pokoi.
Pitayo Winago Wene Toamuku Wa
Yesu Akoa Wakala Tanemo
(Matiu 26:71-75, Make 14:69-72, Luke 22:58-62)
25
Pita one yono toe poto yame yame toa kakaka padame yatekome okome neka
einakagono oyali-pe wa okoli okome e 'e, no mena wa oka.
26
Nitaneyake ako odene
mekome Akolalike lodo yotokoai tane tobou agono pupu ago pade Pitayo kapidi pine
takoa pitikane agono wamenago einagome Pita enekome okome nepa einakago-pala ena ipe
kakale enekouno, nimini ukutu-pe-kale
27
Pitayo wa lokoa mena wa okaka eina eina ali
ogada ka oa kaka.
(Matiu 27:1-2,11-14, Make 15:1-5, Luke 23:1-5)
28
Yu yename Kayapasine yapu tewitikoa pote kini ta talo toa meane ago Pailasene
yapu Yesu-pala aua pokoi. Nipa likonu witia pokoi. Nitoapa edelo ago patukane wa ibini
akene toge nee noadete mekete tekete mone Lomane tobou agono yapu poamadete wakoi.
Nipa kini kekanele tekete toge nee noamokaya tokale mone yatene agono yapu poamadete
wakoi.
29
Nitikolipa Pailase eni Yu yene kakoita akolono pokome okome edeya namike i
ago koiso akoa iki-pe-kale ekete
30
i agopa poane ago toamoo tokapa nipa ne kakota aua
noamoo toka-koli
31
Pailaseyo okome kini totono piko toa kini pitia yakoatino, aua poe-kale
ekete toto Yu yename ali pade oyake pitia yateketeka wia tukamelepa toamoko wa okoi.
32
Nimo ikilepa Yesuyo one tukene toatekoule i wa oa pika taatekamotoa tokoi.
33
Nitikoli Pailase one yapu keneke wakapea pokome Yesu ne noo wa kayo oa
motokome okome nepa Yu yene peya lukoa meki tobou ago-pe wa yatekale okome
34
winimopa neke weneme titia yateke oko-pe. Ete-kitame no ko okoimo yakoa teke pitia
yateko-pe-kale
35
Pailaseyo okome nopa Yu ago wene pike oko-pe. Beita, neke Yu
yenameka Akolalike lodo yotokoai tiki tobou ali-kitameka ne dekoa moa nooke aua nikino,
neme edele tokake tikiti-pe-kale okome
36
noanume itono talo tukuya mena. Noanumedo
itono talo tekene tou tokapa Yu yename no dekoa moamomotoa tekete anu oya-laweme poi
kamotokoi toka. Nitoi tokake pade ta talo tukuya tokolo poi kamotokamiki-kale
37
Pailaseyo
okome nipa nepa ako tobou ago wa eke oko-pe-kale okome nopa ako tobou ago wa neme
wini okona. Nopa ako tobou ago memotoa ni opianeya. Ni nimini peku lawetadene tekene
itonoke opiane mati latitapeane nokou. Nimini peku noai tiki-kitame anu agale yakoa motiki
wa okale Pailaseyo okome
38
nimini peku wapa edemo wa eke okoto patu. Pailaseyo Yesu-
pala nimo ootokoapa Yu yene kakoita akolono wakapea pokome okome i agopa one wiane
tukatekule pade piameadekono,
39
eya wane uku. Malike-kama edelo ago patukane wa ibini
akene toge kikoi-pete kini totono litiane po yapu pitane ago pade po kotokoane wetekakala
tukuna. Opi kiwi Yu yenane ako tobou ago po kotokoane wetekamotoa iki-pe wa Pailaseyo
okale
40
e Yu yename ete wa kayo telo ekete ekete winago menano, Barabasi moa wetekaka-
ye wa kayo okoi. Barabasi einagopa poi kamotokane ago.
Yone Yone
<<
18 18
>>
Yone Yone
<<
19 19
>>
19
1
Nitaneyake Pailaseyopa i ago po wapime wiamene wa one poyo ali-kiti Yesu moa
meteka.
2
Metekale one poyo yename kagani kakene po ludu moa makatikoa one wago
lobutukakoa ni kikome kiane mamina petene moa kakoa tokoi.
3
Nitoapa one kakata nekete
ekete Yu yenane ako tobou ago nepa kawa kamene-ye wa one kabunu kugutukoa wikala
tokoi.
4
Nititikaneyake Pailase Yu yene oboa kakoita akolono wa wakapea pokome okome i
agopa wiane tukatekule piameadekolo tekene kiwi kakita oto auane nukuno, enoe wa oka.
5
Nitikale Yesu one wago kagani kakene po makai lobutukaneya kawa ni kikome kiane
mamina petene kawa taneya akolono witoa noka. Nitikale Pailaseyo e Yu yene-pala okome
einakago ino, enoe wa oka.
6
Yesu eida nome kakale enekete Akolalike lodo yotokoai tane
tobou ali-kitameka tobou losu yapu talo tane ali-kitameka kayo ekete ekete winago yomo
lekaneyake wia dekaka-ye wia dekaka-ye wa kayo okala toa kakoi. Nitikoli Pailaseyo okome
one wiane tukatekule piamokono, kini moa yomo lekaneyake wia dekapoe wa okale
7
e Yu
yename ekete i agopa Akolaline mana kaku wa oka. Nimo ikilepa toto Yu yenane totono
paya tetepo takakome tokano, tone eni totono litiapa dikane ago wia tukamedeko wa
Pailase-pala okoi.
8
Nimo okoli yatekome Pailase pitime tuane matiyame
9
wa wakapea yapu keneke Yesu
kakata nokome okome ne manika kawa noka-pe-kale Yesuyo agale wametekoa pa kaka.
10
Nitoa kakale Pailase okome ne po kotokoane wetekamele toko. Ni yomo lekaneyake wia
dekamotoane moane meamele toko. Nepala eni toateku wene toameke teke agale
wametekako-pe wa okale okome
11
Akolaliyodo neme enile tomotoa wamokalepa neme
nopala padeleka toatekale toamoo. Nikepa wia tukakamotoa no neeke moa wetekakago
Kayapasi one eni poanele tokoleme neke i poanele tokole moa patukako wa Yesuyo oka.
12
Nimo okale yakatekoapa Pailaseyo i agopa po kotokoane wetekamedekuno, edoane tuku
patu wa wene kibutukoa meka. Nitikale e Yu yename kayo ekete ekete nemedo winago po
kotokoa wetekakepa nepa Ali Muno Sisane oyali toamoko. Ako tobou ago meku wa
okagopa Sisa luku tobou ago kawou wa okome oko. Nimo okagopa agopa Sisa-pala poi
te iane ago tadeko wa okoi.
13
Nimo okoli yakatekoa Pailaseyo Yesu akolono aua pokomepa
koiso yopikome meateka walaike witipitoa meka. One eni pome mekatapa kue yaupea
tatianeya piko poma wa ibini ikiya. Iberu agalekepa eni pomapa Gabasa wa ikiya.
14
Einapetepa edelo ago patukane wa ibini akene toge podolikama kiadete nodokoa meane-
pete. Nitane-pete lou matai pene teteponademe tokaka Pailaseyo e Yu yene-pala okome
kiwi Yu yenane ako tobou ago ino enoe wa okale
15
kayo ekete ekete winago aua pa. Yomo
lekaneyake wia dekakoano, witika-ye wa kayo okala tokoi. Nitikoli Pailaseyo okome kini
ako tobou ago yomo lekaneyake wiane dekakamotoa iki-pe-kale Akolalike lodo yotokoai
tane tobou ali-kitame ekete tone ako tobou agopa Sisa odene. Winago mena-koli
16
yatekome Pailaseyo Yesu yomo lekaneyake wia dekamotoa moa meteka.
(Matiu 27:32-44, Make 15:21-32, Luke 23:26-43)
Nitikale poyo yename Yesu dekoa moa aua pokoli
17
Yesuyo one lekane yomo moa
aulogoa ali tobou wa ibini akene take poka. Eni ta ibini Iberu agaleke eketepa Gologosa wa
ikiya.
18
Eidapa Yesu yomo lekaneyake wia dekaketepa pade alitaka eka okata yomo
padetake wia dekakakala tokoi.
19
Nititikaneyake yomo lekaneya munoke dekatekoi pipia
Pailaseyo eya wa wia mekaneya. I ago Nasarese Yesupa Yu yenane ako tobou ago wa wia
mekaneya.
20
Nipa Iberu agaleke Latine agaleke Geriki agalekeka eina odenemo-kama wia
mekaneya. Yesu wia dekanetapa Yerusaleme ta liti piane ta tokome ali atoa peyame einagale
enema ponokala tokoi.
21
Nitikoli enekete Akolalike lodo yotokoai tane tobou ali-kitame
Pailase-pala ekete i agopa Yu yenane ako tobou ago wa neme wia mekamikinakeya. Eya wa
wia mekoano ta. I agome okome onepa Yu yenane ako tobou ago kaku wa oka wa wia
mekoano ta-koli okome
22
eni wiane mekakouna pa taneya kamota wa oka.
23
E poyo ali-kitame Yesu yomo lekaneyake wia dekatekoa kakete one kakeneya-kiti
moa kini-mene kakoi toa tuyonome tatite toa kakoi. Nipa one mamina pade petene mati ete
pimotoa tokoi. Eni mamina petenepa lipukile toameneya pa odene petene mati.
24
Odene
petene mati tokome poyo ali-mename oote-mene tekete ekete i mamina petene pilite
toamatono, tadu toa enatoe wa okoi. Nipa eya wa papete wia mekapiane toa taatekakoi.
Anu kakuya-kiti moa tatite toa anu mamina petenepa tadu toa moa tokoi wa panagome
wia mekapianeya.
Eina wia mekapiane toa poyo ali-mename taatekoa tokoi.
25
Yesu wia dekaneya kaka yomo liti one nine eida kaka. One ninane wamenatoa
Kelopasine natono Maria ni Magadala Mariataka eida kakoi.
26
One kolotini oyago one nine
kakaya liti kakale enekome Yesuyo nine-pala okome anuyatoa neke mana wini wa oa
27
ni
one oyali-pala okome neka ua wini wa oa toka. Nimo oka-pete titimoa one oyagome
einatoa-pala one yapu aua pome mekoa talo toa meka.
Yesu Tukome Tuanemo
(Matiu 27:45-56, Make 15:33-41, Luke 23:44-49)
28
Yesuyo nimo ootokoapa padele padele one toatekule toane peya takaku wa wene
tokome eya toka. Akolaline bokuke oneke wia mekapiane toa taatekamotoa tokome okome
ue nodome tuku wa oka.
29
Eidapa mete pade kou tane gerepi po ku ue kapetaneya pianeya
tokome pade ali-mename ue takamoatekoi obi wane moa eni gerepi po ku uele tadamoa
yomo isope luduke kakamoa one kabunuke udakoa lawetekoi.
30
Nitikoli Yesuyo
mitumotokome okome opa anu toatekule toane peya takaku wa ootokoa one kabe
waliketikakome one yomini takoa pomotoa tukome tuka.
Yesuno Modono Lamame Lagotanemo
31
Einapetepa edelo ago patukane wa ibini akene toge kiadete nodokoa meane-pete Yu
yename Pailase mekata pekete ekete eni wia dekane ali-menane kawa pedoa tukoa yomo
lekaneyake kitapea momotono ta wa akeneya. Nipa podolikama ko mea pupu toamatekoi-
pete ibini akene ta pataka-pete tokome einago-mene yomo lekaneyake pa dekaneya kakoli
enekaya kekatekoa ni akeneya.
32
Nitaneyake Pailaseyo moa wetekane poyo ali-mene
neketepa Yesu-pala odeneka wia dekane alitane kawata pedekaneya.
33
Nitoapa Yesu wia
dekaneya kakata pekete enekoli one wete tuadekale enekete one kawata pedekamokoi.
34
Pedekamekete poyo ago padame one lama moa Yesuno modono lagotoka. Nitikaka eina
eina kamate ueta odeneka ponoka.
35
(Enile tokale enekagomepa one eni enekana to awea
oka. One to awea okamo einapa nimini uku wa einagome wene taneya meko. Kiwika Yesuke
wene tugamotoa tokome ni oko.)
36
Enika enile tikilepa Akolaline bokuke papete eya wa wia
mekapiane toa taatekamotoa taneya. I to aweane uku agopa one tono odeneka pedekamoi
wa wia mekapianeya.
37
Enilekepa Akolaline bokuke eya waka wia mekaneya piko. Kini
lamame wia lagotokoinakagopa nepikoa piei.
Yesuno Tigini Moa Kota Keneke Pipanemo
(Matiu 27:57-61, Make 15:42-47, Luke 23:50-56)
38
Nitaneyake Arimasia take meane ago Yosepe einago Pailase mekata pokome Yesuno
tigini mou ta wa kowitipaneya. Eni Yosepepa Yesuno agale litikomeke ete Yu yene piti moa
mekome tokome Yesu litiku wa to awea wameneya. Einago Yosepeyo Yesuno tigini mou ta
wa kowitikale Pailaseyo nipa mopa wa yametekale pokome to a moa aua pekeneya.
39
Nitoa
aua pokaka Nikodimasi koua pekeneya. Einagopa ta lianeya keneke Yesu enepane ago.
Einagome Yesuno tigini ka lono takatekaya de yomota mire alouta page-pala aua pekeneya.
Nipa keda tube mati taneya padeka kapidi kakoa (30) kilo moa aua pekeneya.
40
Nitoa
pekete einagotame ake tane mamina yagalogoa kakete Yesuno tigini to a moa pianeya.
Nitoapa eina ka lono taneyata pekoa yotokoa ewetoa togotaneya. Nipa Yu yename tanele
taneya.
41
Yesu wia dekaneya kakeneka yamanu pade pianeya. Eidapa tuane ali atoa piai
toatekoi kota pene kokapianeyake tuane ago odeneka wete pipameneya.
42
Ko mea pupu
toamatekoi nodokoa meane-pete tokome Yosepe Nikodimasitame ekete kitau oono,
Yesuno tigini wete pipata wa eni kotake moa pipaneya. Nipa one wia dekaneya liti piane
kota tokome taneya.
Yone Yone
<<
19 19
>>
Yone Yone
<<
20 20
>>
20
Yesu Tuaneyake Moa Kamotokanemo
(Matiu 28:1-8, Make 16:1-8, Luke 24:1-12)
1
Egeme ta pa lianeya keneke Magadala Maria Yesuno tigini pipane kotake nekeneya.
Nokome enekale kota kabunu ketekalogane kue petene ete koketekoa piadekale
2
enemotokome wa wakapea eyagota Pita-pala Yesuno kolotini oyagota mekoita teyapea
pokome okome tone Ali Munono tigini kota keneke pianeta pade-kitame moa aua pekete
tokoi. One aua pote pipokoika toto agopa toko wa Mariayo opoka.
3
Nitikale Pita-pala
Yesuno pade oyagota Yesu piane kotake teyapea pokoi.
4-5
Nitoa teyapeata pekete padena
agome Pita moa patukoa namolo kakoa pome kota kabunuke kakome watekoa eneka.
Enekale Yesuno tigini togotane ake tane pue pa pikale enekomeke kota keneke tuapea
poamoka.
6
Nitaneyake Pita one naniko nome kota keneke wete tuapea pokome enekale ena
ake tane pue eneka.
7
Wago togotane pueka eneka. Enekale tigini togotane pue-pala
odeneka piameneya eko keneya ewetaneya pikale eneka.
8
Nititikaneyake kotake namolo
kakoa nome kakagoka tuapea pome enekome ipa Yesu kamoa pokome tadeko wa wene
toka.
9
Nipa ipa Akolaline bokuke wia mekapiane toa taatekoa tokome tadeko wa
einagotame wete wene toamokoiyake toka.
10
Nitoapa Yesuno oyagota kini yapu wakapea
pokoi.
Yesuyo Magadala Maria Pono Yametanemo
(Matiu 28:9-10, Make 16:9-11)
11
Nitikakoa Maria ako lono kota kabunu liti pa kakome komo oa watekoa enekale
12
edelo ago takuta ake tane pue kakeneya mekoli enaneya. Nipa panago Yesuno wago
piane luku mea padena ago one kawata piane luku mea tokoli enaneya.
13
Enoa kakale edelo
agotame Maria-pala ekete anuyatoa ne komo edekolo oko-pe-koli okome pade-kitame anu
Ali Muno moa pekediki. Nitadikiyake one moa pote pipokoika agopa tokolo komo oane
kaku wa ootokoa
14
peketapekome enekale Yesu kakale enaneya. Enekile tokomeke Yesu
kakono wene toameneya.
15
Nitikale Yesuyo okome anuyatoa ne komo edekolo oko-pe. Te
tuku toko-pe wa okale einatoame i agopa yamanu tokago wa wene pikome okome anuyali
nemedo Yesu moa padeka pipadekalepa one moa pikatapa i wa oano ta. One tigini
mopouno, yamea ta-kale
16
Yesuyo okome Maria wa okale peketapekome Labonai wa
akeneya. Nipa Iberu agaleke akeneya. Labonai wapa Tikisago wa okome akeneya.
17
Nimo
okale Yesuyo okome Agetai mekota wete atepeane poamukuno, adekoa tebekoa kakono,
wa. Nitamoano, anu wamene-mikiti mekita eya wa akapoano pa. Agetai kiniketai mekota
atepeane wakapeane puku. Anu Akolalike kini Akolalike ate wakapeane puku wa akapoano
pa wa oa wetekaneya.
18
Nitikale Maria Yesuno oya-mikiti mekoita pokome okome Ali
Muno enoane nuku wa ootokoa kakome okome i ukumopa Yesuyo no enekome okamo
uku wa oka.
Yesuyo One Oya-mikiti Pono Yametanemo
(Matiu 28:16-20, Make 16:14-18. Luke 24:36-49)
19
Eina ta pataka-pete egeme ta lianeya keneke Yesuno oyali-kitame ete Yu yene piti
motaneya mekete tekete odene yapu keneke kago loko tooketikoa odeneya oboa mekoi.
Nitoa mekoika Yesu kiwi pakeke nome kakome okome kilikaketikoa meamene wa ootokoa
20
one modono one yono tatonotaka enoe wa yameteka. Nitikale one oya-laweme kini Ali
Muno enekete kolotini naka matiyame wedia mekoi.
21
Wedia mekoli Yesuyo wa lokoa
okome okome kilikaketikoa meamene. Agetaiyo onekele takamotoa no moa wetekaka toane
noanume kiwi dikoa Akolaline agale oa pupitikakamene wane wetekaku wa oka.
22
Nimo
ootokoa one oyali-kiti mekoi patu poome pukapekome okome Epetane Yomini kiwike
awinome memotoane tuku.
23
Nitikuno, ali atoa padekapa kini poanele tokoike Akolaliyo po
letu mekakana keetapemotoane uku wa kime takoa okolipa nipa po letu keetapekale nami
kawameneya meoi. Wa ali atoa padekapa kini poanele tokoike Akolaliyo po letu mekakana
keemotoane wamuku wa kime takoa okolipa po letu keamokale nami kakeneya meoi wa
Yesuyo oka.
Yesuyo Tomasi-pala Akenemo
24
Yesu one oyali-kiti pakeke eni nokalepa one oyago pade Tomasi katekoa meamoka.
Einago one pade ibinipa Didimasi. Didimasi wapa wamene-pala odeneka opiane ago wa
ekete ikiya.
25
Einago naniko nokale o ali-kitame ekete tone Ali Muno enekoo-koli okome
one yono tatonoke pitime wianeta kodo enamoane eni lukuke yono pitikamoane lama
lagotane lukukeka yono pitikamoane tokouya tekene Ali Muno kamotadeko wane wamou.
Eniledo tekenepa kamotadeko wane ou wa Tomasiyo oka.
26
Wa ta pataka tatono kakoa (7) ponotekaneyake eina toa Yesuno oyali-kiti eni yapu
keneke odeneya oboa mekoi. Nipetepa Tomasika eni pakeke meka. Nitoa kago loko
tooketikoa mekolika Yesu one oyali-kiti pakeke nome kakome okome kilikaketikoa
meamene wa ootokoa kakome
27
Tomasi-pala okome neke kadapi yono i pia anu yono
tatono enoa ta. Anu modonokeka neke yono pitikoa ena. Nipa poome toameneya nooke
wene tugoa meamene wa okale okome
28
nipa nepa anu Ali Muno, nepa anu Akolali wa
okale
29
Yesuyo okome Tomasi neme no i eneke teke no i ago kamotadeko wa wini oko.
Anu lene timini enameketeke no einago tuake wa kamotadeko wa nooke wene tugoa mekoi-
kitipa etene wedia meoi wa Yesuyo oka.
30
Yesuyo one oyali-kiti kakakoa padele padele telekole toma pokanakamo peya i
bokuke wiane mekamele toamokolo padele-kiti tokamo katekoane wiane mekamuku.
31
Nipa
i boku wiane mekakilepa Yesu onepa Keraisu wa papete ibini oa piane agono, onepa
Akolaline Mana tadeko wa kime wene tomotoane tekene tuku. Nika one ibini patu kautakoa
kakete mea kama pomotoane tekene tuku.
Yone Yone
<<
20 20
>>
Yone Yone
<<
21 21
>>
21
Yesu Taibiriase Ue Mine Nokome Tanemo
1
Naniko Yesu Taibiriase ue mine matanu one oyali-kiti mekoita nokome pono wa
yameteka. Nipa enile taneya.
2
Eya ali-kiti Saimone Pita ni wamene-pala odeneka opiane ago
Tomasi ni Galili ta keneke piane Kena take ago Nataniele ni Sebedine manata ni Yesuno
oyali padeta eida odeneya oboa mekoi.
3
Eida mekome Saimone Pitayo o yene-pala okome
nopa mou tagi topada wa okale ekete nipa pato wa ue dipike peapetekoa pote mea ue muke
mou tagi topokoi. Nitoapa padeyaka moameneya pa tagi toa ta patakakoi.
4
Nitikolipa ta
pene patakaka Yesu ue mine matanuke nome kakalepa one oyali-kitame yuku agopa Yesu
wa wene toamokoi.
5
Nitikoli Yesuyo kayo okome okome anu oya-mikiti mou pade
motokoi-pe wa okale ekete e 'e, mena wa okoli okome
6
kini tagi ka moa nimini yono lono
moa pitikoa enoe wa okale eina okana lono moa pitikakoi. Nitoapa mou kedame wa oto lia
moamele toameneya.
7
Enile tokalepa Yesuno kolotini agome Pita-pala okome ipa Ali Muno wa oka. Ipa Ali
Muno wa okale yatekome Saimone Pita one mamina-mene kotokoa pianeya tokome one
tokoo kawateka mamina wa moa kawa uele tigapitaka.
8
Nitikale o yename ue dipike mea
tagi ka moume kapetaneya lia aua matanuke nokoi. Nipa ue mine matanu ete keneya (90
mita) pimotoa ue dipike mea pekete uele pitikapokoi tagi ka lia aua nokoi.
9
Nitoa matanuke
katepitoa kakete enekoli palawe wane-kiti mou yomo-kitika toe totoike yotaneya pikale
enekoi.
10
Nitikoli Yesuyo one oyali-kiti-pala okome kini tagi toa motokoi mou pade-mene
takoa aua noe wa okale
11
Saimone Pita ue dipike pome kakome tagi ka tube moume kapea
pitaneya lia aua matanuke noka. Eni mou oi moapa ege tebolo-peta kadukoa (153) mou
utadeka. Mou kainya matiyame kapetaneyake tagi ka piliameneya.
12
Nitaneyake Yesuyo
kiwi-pala okome nee nonoe wa okale peyame ne te-pe wa yakamene piti moa kakoi. Nipa i
agopa Ali Muno wa wene tekete ne te-pe wa yakamokoi.
13
Nitikoli Yesu toele nee pikata
pokome palawe wane-kiti moa tatikoa mouka moa tatikoa toka.
14
Nipa Yesu tukale moa
kamotokatekaneyake one oyali-kiti pono tebolo takoa yametekilepa enile tokome toka.
Yesuyo Pita-pala Akenemo
15
Nee nootokoa mekoli Yesuyo Saimone Pita-pala okome Yonene mana Saimone i
yene nooke wene mekoa meki toa neme moa patukoa nooke wedoa wene mekoa meko-pe
wa yateka. Nitikale okome Ali Muno neeke wene mekoane mekuno neme wene toko-kale
okome nipa anu sipi sipi kai tine-kiti egetekamene wa Yesuyo oka.
16
Nitoa wa lokakome
okome Yonene mana Saimone ne nooke wene mekoa meko-pe wa okale okome Ali Muno
no neeke wene mekoane mekuno neme wene toko wa okale Yesuyo okome anu sipi sipi
kai-kiti egetekamene wa oka.
17
Nitoapa tebolo takakome okome Yonene mana Saimone ne
nooke wene mekoa meko-pe wa yateka. Yesuyopa ne nooke wene mekoa meko-pe wa
tebolo takakome okamoke Pita wene keda taneya kakome okome Ali Muno neme pademo
pademo peya wene tootapekono, neeke wene mekoane mekuno weneka toko-kale okome
anu sipi sipi kai-kiti egetekamene.
18
Nimini ukuno yakamene. Ne tuali mekepa neke matio
moa kaamotekepa neke wene ponoka toa yakala toka. Nitikala tokoyake ne ada mekepa
neke yonota lido ootapea kakale panagome lutua tau toologoo. Nititikoapa ne poamateka
lono moa aua poo wa Yesuyo oka.
19
Eni okapa ali atoame Akolali kei pimotoa tokome Pita
tukome toatekaleke okome oka. Nimo ootokoa kakome okome no litima namene wa oka.
20
Yesuyo nimo okale Pita peketapekome enekale Yesuno kolotini agome litima nokale
eneka. Einagopa Yesuno ete oyali-kiti-pala opia nee noa mekome Yesuke ete lewikakome
okome Ali Muno ne wimotoa moa meatekago te-pe wa yatekanakago.
21
Einago enekomepa
Pitayo Yesu yatekome okome i ago-palapa edele toko patu wa okale
22
Yesuyo okome
wakapeane nokoluka i agodo pa mea kamotou wane wene toopikolupa neke pupu menano,
no litima namene wa Yesuyo oka.
23
Yesuyo nimo okamokepa one agale yakoa motane
yene pitikoika eya wa oa pupitikaneya. Einagopa tuamoo wa oa pupitikaneya. Yesuyo nimo
pade wa wamokake taneya. Eya wa oka. Wakapeane nokoluka i agodo pa mea kamotou
wane wene toopikolupa neke pupu mena wa Yesuyo Pita-pala oka.
24
Einago Yesuno oyagome enika enimo peya i i wa to awea oa i bokuke koukoa wia
mekoa toka. One eni to awea okamopa niminimo-kama akedekono wene totome toko.
Wipitia Wia Mekanemo
25
Yesuyo padele padeleta toma yakamo peyado bokuke wia mekaketepa boku peya
mati wia mekama poo. Nitikolopa eni boku-kitame itono edea takatapeoono wene piku wa i
boku wia mekakago no i mekene uku.
Yone Yone
<<
21 21
>>
Yude
00
11
Yude Yude
<<
00
>>
^
Yude
Yudeyo Kapene Wakakoi Yeneke Akenemo
Yudeyo Pubu Oa Mane Mane Oa Tanemo
Yude Yude
<<
00
>>
Yude Yude
<<
11
>>
YUDE
Yudeyo Wia Wetekane Pipia
1
1
Yude nopa Yesu Keraisunole takama yaku agome i pipia i i wane wiane mekakenepa
Atai Akolaliyo wene mekoa one wa kayo oa motane yene-pala uku. Nipa Yesu Keraisuyo
pawe toa talo toko yene-pala uku.
2
Akolali kiwike wene mekoa mea ela moa tepe kolotini kilikoa pikoa tomotoane kini
kowitikaku-ye.
Yudeyo Kapene Wakakoi Yeneke Akenemo
3
Anu kolotini yene toto peya Akolaliyo toa motanemo pine to aweane oadiyano wene
pikounake eni wene wiane wakene eya waneka uku-ye. Akolaliyo one wa takoa motane yene
i i wa onekele takakete toatekoi totono pademoka katekameneya yametapeane toa wedoa
litia tamene. Nitoa poi wedoa tou toa tekete one agale wakene yene-pala agale to onali
yamene wane uku.
4
Pade ali-kiti kiwi pakeke paigakoa keneya lua meaneya tokolo tekene ni
uku. Eni yenepa Akolaliyo wia atukoa wawoo wa papete wia mekapianeya. Nitane yename
eya wa kapene yokakete iki. Akolaliyo kiwi pewe-kama witiko. Nitane ago tokome kiwi kibu
moamoono, ele kule poaneleka atiki toa mekete tamele toko wa etepea poanele toma yakete
tiki. Nipa ali atoa toto peya lukoa meateko Ali Muno Yesu Keraisu kote tokolo wakete tiki.
5
I oatekumopa kime wete yakatapeneayake eya wane wene takoane uku-ye. Toto
yatene Idipi take labakaneya mekoli Akolaliyo toa motaneyake wa naniko padeka-kiti oneke
wene tugoa meamokoli enekome kiwi wiou wa wia tukatapeneya.
6
Eya waka wene taneya
meamene. Akolaliyo one edelo ali-kiti eka kuka ta talo takamene wa tatimo tatimo toa
yametekana toa padeka-kitame toa wakete etepea pekeneyake yomiyomu toologaneta moa
pitikaketikaneya. Nipa wipitia ta patakale ali atoa takoane enoane akakou-pete kiwi wiouno
nepiamene wa kapa po kakoa nitaneya.
7
Eina edelo ali-kitame tane toa eya tata Sodome
Gomora tatake pitane yene ni eniya liti piane ta-kitike pitane yene ali yatene wa atoa latikoa
koua pia ele kule toamatekoile toa meaneya. Nitaneyake Akolaliyo kibu motokome toe
mineke mea kama poati wa moa pitikakilepa kiwika kibu mouno, edikameamene wa ete
yene peya pubu okome taneya.
8
Opika kiwi wini oa yotokaki ali-kitamepa eina yename tuku pekete tanele tekete tiki.
Nipa pulete enekoule tuku wa kini tigini wa toa potokoa Akolaline agale tagoa toamoa ni
one peku noa tiki edelo ali-kitika taumada toa tiki.
9
Ako meane tobou edelo ago Maikeleyo
Mosesene tigini mou wa one tigini litiyo Setanu-pala agale to onali yoa kakilepa Setanu
taumada tamene kote tokale eya wa akeneya. Ali Munoyo ne kikoa akamotoane uku wa
akeneya.
10
Kiwi wini oa yotokaki ali-kitame nitamekete kini wene toamikile-kiti pale tane
tetepo takoa taumada tekete tiki. Nitoa meapa yokome one weneme-kama ele kule lene
pianele wene toa toko toa wini poane yename tekete tiki. Nitiku pekete toa kini wa moa
atukakete tiki.
11
Ae, wini yename dika dika toamene tete moadeteke eya ali-mename papete
pale tane toa tekete tiki. Keine wamene ago Abele-pala wene poaneya mekome wia tukoa ni
Belameyo kue moademe Iserele yatene etepea lia aua pome ni eyago Kora Moseseke lukoa
meamademe wawa tane toa tekete tiki. Wini yename kiwi edikoa oa yotokakilepa tua atua
poadeteke tiki.
12
Ae, anu oya-lawe kini losule tekete odene wene pia toge kia mekoika wini
yename nee noa tagatapea kitipu meato wa paya nou toa note mekete kini wa lawetekilepa
kini toge toa potokakete tiki. Nipa ali atoa ko akamoko kalepeta nou toa note kiwi toa
potokakete tiki. Ni yomo pade ku tuateka-peteka ku tuamokale pinagome to a mitikakale ala
tootapeneya piou toa wini yename pale toa meki.
13
Ni kusa ue leau oa pewikanokome
matanu ludu lako aumoa mitikou toa ele kule ya tanele tekete tiki. Ni tagoi-kitika likonu pa
yawa-kala meou toa pa toamokota yomiyomu keneke-kama mea kama poati wa Akolaliyo
kiwi oa yotokaki yene wete moa kakapianeya.
14
Wini yename toatekoilekepa eya ago Inoke namolo ago Adameke titimoa opia
kakama nekene toa tatono takoa (naba 7) opiane ago einagome eya wa papete pubu oa
pianeya. Ali Munoyo one wa takoa motane edelo ali ege egeta wa-kala kadukoa moa aua
noo.
15
Nitoa nokomepa ali atoa peya takoane enoane akou wa eya too. Akolaline peku
noamene-kitame onekele takamene kote motuku wa ele kule poanele etepea toma pote ni
oneke poanemo oa tokoike nami wia kibu mootapeoo. Nitoono, nepiamene wa Inokeyo
pubu oa pianeya.
16
Dikane yenamepa ko -kama oa akoa agale oa ele kule poanele tou wa
wene piki toa etepea litikete eya kuya mate agale oa kawa ni ete yename kini wene pikile
tomotoa lede taba po pitikoa oa yotokoa tiki.
Yudeyo Pubu Oa Mane Mane Oa Tanemo
17
Anu kolotini yene Ali Muno Yesu Keraisuno Aposelo ali-kitame papete kipala eya
wa pubu oa pikoina wene taneya meamene.
18
Wipitia ta patateka tigotoka-pete kiwi
taumada tokoi yene taatekoa nekete taumada toa ni ele kule poanele tou wa wene pikoi toa
etepea litia toma poi wa pubu oa pikoina.
19
Nitatekoi yename kiwi ete oto wa
puutakutukamotoi. Pa itono peku noai tekete nitoi. Epetane Yominiyo takoa wakene yeneke
uku.
20
Anu kolotini yene Keraisunomo oneke kiyoke-kama olaukanemo kime titia yakoa
motokoina toa pa yakoa moa togamene. Ni Epetane Yomini awinaneya mekete kowitikala
tamene.
21
Akolali kiwike wene mekoa mekome pawe toa talo tokota pa eida-kama
meamene. Tone Ali Muno Yesu Keraisuyo kiwi ela motokome pa mea kama pamene wa ka
yameademe tokono, nepia meamene-ye.
22
Keraisunomo pomeme tuaneya mekete yakoa motiki yene ela moa auapeamene.
23
Ni
ali atoa toe mineke meane tetepo taneya meki yene odoa toa moamene. Ni pade-kiti ela moa
auapekilepa eni yene kini poanele pine yene kini maminake weamutane tetepo takoa
auapeamene. Nipa eni yenane maminaka mitikamene kote moapa auapeamene.
24
Akolali-pala eya wa oa kei pia-kala katoane uku. Toto pata paka poamomotoapa
neme-kama yopia kako. Nitoapa totopa poanele toamene yene tetepo takoa meke ne pa
teleta tootapeneya mekota kolotini natekoa aua poke kakamele toko.
25
Tone Akolali wa
oateko agopa ne odene meko. Toto toa motikilepa neme toko. Nepa pa patu-kama mea
etene ako odene tobou ago mea ele kule telekole-kama toa ta piko peya talo toa toko.
Nilepa itono tibuta wete latiameneyake laigoa neme toma nekeneyano, opika nanikoka
widikakoa-kala kama pamene.
E e nimini.
Opa anu agale eni.
Yude Yude
<<
11
>>
Luke
00
11
22
33
44
55
66
77
88
99
10 10
11 11
12 12
13 13
14 14
15 15
16 16
17 17
18 18
19 19
20 20
21 21
22 22
23 23
24 24
Luke Luke
<<
00
>>
^
Luke
Lukeyo Yesunomo Tiopilasine
Wia Mekakaneya
Yone Opiatekamo Edelo Agome
Sekaraia-pala To awea Akeneya
Mariayo Yesu Opiatekamo
Edelo Agome Oa Pianeya
Maria Elisabesi Mekata Ugu Pekenemo
Mariayo Lo Akene Agale
Elisabesiyo Yone Opianemo
Sekaraiayo Lo Akene Agale
Mariayo Yesu Opikome Tanemo
Edelo Agome Sipi Sipi Kai Talo Tane
Ali-kiti-pala To awea Akenemo
Sipi Sipi Kai Talo Tane Ali-Kitame
Yesu Tuku Toa Enanemo
Matipa Yesu Wa Ibini Akenemo
Simione-pala Anatame Tobou Losu Yapu
Kakete Yesu Enekala Tanemo
Nasarese Take Wakapea Pote Mepanemo
Yesu Tuali Mekome
Tobou Losu Yapu Pekenemo
Yone Taatekoa Nekenemo
Erodeyo Yone Po Yapu Moa Pitikanemo
Yesuyo Ue Motanemo
Yesuno Kaua-mikiti Adameke Titimoa Opia
Tagama Nekenemo
(Matiu 1:1-17)
Setanuyo Yesu Likoa Enanemo
(Matiu 4:1-11, Make 1:12-13)
Nasarese Yename Yesu Akoa Wakenemo
Yesuyo Panagoke Awitane Ipono
Takoa Wetekanemo
Yesuyo Pitane Natonane Nine Latekanemo
Yesuyo Ali Atoa Peya Mati Latekanemo
Yesu Losu Yapu Kaka Toa Pokome
Akolalinemo Oa Mekala Tanemo
Yesuyo One Oyali Tuyono-mene
Kayo Oa Motanemo
Yesuyo Kedi Pitane Ago Latekanemo
Muku Toameneya Pia Kakene Ago Latekanemo
Yesuyo One Pukuka Patono Noo Wa
Lipai Takoa Motanemo
Akolali Wedoa Kowitadetepa Nee Eya
Tekei Wawa Noamikileke Pitia Yakanemo
Yu Yename Kini Koo Mea Pupu Toamene-pete
Ele Kule Tane Pupu Kekoa Wawa Toamenemo
Ko Mea Pupu Toamene-pete Yono Lokane Ago
Epetekanemo
Yesuyo One-pala Opia Yawatekoi Ali
Tuku Kakoa (12) Takoa Motanemo
Yesuyo Ali Atoa Olaukoa Kini Tane Yene
Latekoa Tanemo
Poi Te iane Yename Tokoile
Topo Takakete Toatekomo
Yete Pade Ali Atoa Kikoa Akameamene
Yomo Ku Tukoke Pedoa Akenemo
Yapu Epetaneyaka Poaneyaka Wikete Tanemo
Tobou Poyo Agono Pupu Ago Latekanemo
Yesuyo Neeni Take Tuane Ago Kamotokanemo
Yesu Pitia Yakamotoa Yoneyo Alita Takuta
Moa Wetekanemo
Poanele Toa Meane Atoame Yesuno Kawatake
Padeya Ka lono Taneya Pekoa Yotokanemo
Pade Atoa-kitame Yesu Auapema Nekenemo
Nee Lene Pitikama Pekene Agoke
Pedoa Akenemo
Akolaliyo Ali Atoa Pawe Toa
Talo Toatekale Papete Kaukoa Meaneya
Nee Lene Pitikama Yakene Agoke Pedoa
Akene Agale Pine To awea Akenemo
Labo Toeleke Pedoa Akene Agale
Yesuno Nine Wamene-mikitike Akenemo
Pupulege Tadalita U u Okoa Kakeneya
Kawikanemo
Yesuyo Ipono Awitane Ago Latekanemo
Tobou Agono Kono Tuaneyake Kamotokanemo
Yesuyo One Oya-lawe Tuku Kakoa (12)
Akolalinele Takama Pomotoa Wetekanemo
Erodeyo Yesunomo Yakanemo
Nee Lawetanemo
Pitayo Yesu Nepa Keraisu Wa
To awea Akenemo
Yesuyo One Tete Moa Tua Toatekamo
Toa wea Oopianemo
Yesuno Lene Timini Eya Pa Tootapenemo
Ipono Awitaneya Meane Mati Latekanemo
Yesuyo One Tuatekamo Lokoa Akene Agale
Kiwi Kako-kitipa Mainago Ako Ago-pe
Wa Oa Takoa Pili Pili Toa Kakenemo
Kipala Poi Te iamoko Agopa
Kipala Kibutua Kako Ago Eni Wa Akenemo
Sameria Yename Yesu Wakenemo
Yesu Litima Pekete Toatekomo
Yesuyo One Oya-lawe 72 Takoa Motokome
Akolalinemo Oa Pupitikamotoa Wetekanemo
Korasine Besaida Kapaneame Ta-meneke
Pitikoi Yename Yesu Wakeneyake Akenemo
Moa Wetekane Ali-kiti Wakapea Nekenemo
Yesu Wedia Kakome Akolali Ke Wa Akenemo
Sameria Take Agome Yu Ago Auapeanemo
Maasa Mariatane Yapu Yesu Ugu Pekenemo
Kowitikete Oatekomo Olaukanemo
Yesu Belesebule Patu Kautakoa Kakome
Ipono-kiti Takoa Wetekako Wa Akenemo
Ipono One Mekanata Wakapea Nekenemo
Ali Atoa Kolotine Meatikimo
Yesuyo Padele Tubele Tomotoa
Likoa Enanemo
Labo Toleke Pedoa Akenemo
Parisi Ali-kitika Mosesene Totono Pine
To awea Olaukane Ali-kitika Kikoa Akenemo
Wene Takuta Pianeya Meki Yeneke Akenemo
Akolali Piti Moamene
Kamo Ago-pala Pubu Akenemo
Akolalike Wene Tugoa Mekete Toatekomo
ATibuke Pia Kawateko Kamoyake Akenemo
Tobou Ago Wakapea Nomotoa Nepiamene
Panagotame Panagono Pupu Takakete
Taneleke Pedoa Akenemo
Ali Atoa Puutakutukoa Mekimo
Padele Tokale Eneketepa Ile Toatekolo
Toko Wa Wene Toa Oatekomo
Poi Te iane Ago-pala
Odene Wene Pia Enamene
Kini Namolole Wawa Tewitikameketepa Tuei
Ku Tuamene Yomo Pikike Pedoa Akenemo
Yesuyo Mukiti Tukuane Atoa Latekanemo
Kalipe Lene Deyake Akenemo
Nateya Edetekane Kagoke Pedoa Akenemo
Yesuyo Yerusaleme Ela Motokome Akenemo
Toge Lobutupote Mekete Toatekomo
Togeke Noamadete Wakene Yeneke Akenemo
Yesu Litiadete Tonekeya Wawatekomo
Paya Kusake Akenemo
Katepitoa Pekene Sipi Sipi Kai
Atuane Kue Leneke Pedoa Agale Akenemo
Atupane Ago Eteneke Wakapea Nekenemo
Kepene Mama Motokagoke Pedoa Akenemo
Kue Pikoa Mekete Toatekomo
Yesuyo Akenemo-mene
Kamo Ago-pala Lasarusitake Akenemo
Ali Atoa Likoa Eneki Yeneke Pubu Akenemo
Akolalike Wene Tugoa Mekete Toatekole
Tobou Agono Pupu Takakete Toatekole
Yesuyo Kedime Nakene Ali-kiti Latekanemo
Akolaliyo Ali Atoa Pawe Toa Talo Toateka
Tigotokale Toatekale
Koiso Yateka Agome Nepo Atoa Auapeanemo
Parisi Ago Takesi Kue Motokane Agotake
Pedoa Akenemo
Yesuyo De Mati Deya-kitike Akenemo
Kamo Tane Agoke Pedoa Akenemo
Yesuyo One Tuatekamo Tebolo Takoa
Oa Metaneya
Yesuyo Leneta Lianeya Mekome Eya Kuya
Oia Meane Ago Latekanemo
Sakiasiyo Tanemo
Tobou Agono Pupu Takane Ali-kitame
One Kue Pikoa Metekakete Tanemo
Yesu Yerusaleme Nokale Ali Atoame
Ke Wa Wedia Kakete Makutukoa Motanemo
Yesuyo Yerusaleme Ela Motanemo
Yesu Tobou Losu Yapu Pokome Tanemo
Te Patu Kautakoa Kako-pe
Wa Yesu Pitia Yakanemo
Panagono Gerepi Po Ipe Yopikoa
Potokane Ali-kitike Akenemo
Mone Lomane Ako Tobou Agono Takesi Kue
Pitikakato-pe Wa Pitia Yakanemo
Tuane Yene Kamoatikike Pitia Yakanemo
Keraisu Onepa Tene Mana
Nepo Meane Atoame Onekeya Peya
Akolaline Takoa Metanemo
Tobou Losu Yapu Tumu Tokatekamo
Ke Enekakale Mekete Tete Moatekoimo
Yerusaleme Ta Wia Tadekatapeneya
Tumu Tokatekamo
Ali Yatenane Oyago Wakapea Noatekamo
Yomo Pikike Pedoa Akenemo
Taatekoa Toatekale Wedoa Nepikoa Meamene
Yesu Moa Meateka Oi Pedoa Pianemo
Edelo Ago Patukane Wa Ibini Akene Toge
Kikete Tanemo
Yesuyo Palawe Wane Gerepi Po Ku Ueta
Moa Lawetekome Akenemo
Yesuno Oya-lawe Ako Odene Meadete
Togo Togo Oma Pekenemo
Pitayo Yesu Wawa Akatekamo
Yesuyo Olipe-pini Tonoke Pome Kakome
Kowitanemo
Yesu Dekoa Monanemo
Pitayo Yesu Akoa Wakenemo
Poyo Ali-kitame Yesu Tea Agale Akenemo
Yesu Koisoke Lia Aua Pote Kakanemo
Yesu Pailase Mekata Lia Aua Pekenemo
Yesu Erodeke Aua Pekenemo
Yesu Yomo Lekaneyake Wia Dekamotoa
Pailaseyo Moa Metanemo
Yesu Tukome Tuanemo
Yesuno Tigini Kotake Moa Pipanemo
Yesu One Tuaneya Pianeta Kamoa Pekenemo
Yesu One Oyata Takuta-pala Emease Take
Opia Poademe Pokome Akenemo
Yesu One Oya-lawe Pakeke Nome Kakenemo
Yesu ATibuke Ate Kamotokoa Aua Pekenemo
Luke Luke
<<
00
>>
Luke Luke
<<
11
>>
LUKE
Yesunomo Lukeyo Wia Mekaneya
1
Lukeyo Yesunomo Tiopilasine
Wia Mekakaneya
1
Kamo koni ali Tiopilasi neke i boku wiane mekakakuno, yakamene. Padele padele
toto pakeke Akolaliyo taatekoa tanemo pade ali-kitame dika dika wa wete wia mekoa
enekala taneya.
2
Nipa Yesuyo tititikakome toma yakale enema yakene-kitame Yesunomo
toto olaukama yakete okoi toa wia mekakala taneya.
3
Noanumeka enika enile-kama titianeta
laigoane wedetekoane pitiane yakama nokouya tekene neke takoane i i wane wiane
mekakene uku.
4
Pade-kitame ne wete olaukakoimo-kiti etene inapa nimini akedeki wa neme
wene toa wane ni tuku.
Yone Opiatekamo Edelo Agome
Sekaraia-pala To awea Akeneya
5
Erodeyo Yudea ta yopia meane-pete Akolalike lodo yotokoai tane ago pade Sekaraia
Abaia ti yatene ago eida eni take meaneya. One natonopa Eronoke tagene atoa Elisabesi wa
ibini akeneya.
6
Sekaraia adona Akolaline leneke wene kiyo akeneya meapa Yu yenane
totonoka Ali Munoyo ile tamene ile tamene wa yametane agaleka tagameneya mea
epetekaneya.
7
Tiobali atoata tokome Elisabesiyo mati opiamele toamokale ada atueta pa
meaneya.
8-9
Wa padepete Akolalike lodo yotokoai tane yatene-kiti tutu tutu wa yotokama
nekene toa Abaia time lodo yoa meatekoi oi nokale one time tadu toa enetekoa ekete opi i
ago neke-peteno, lodo yotokapa wa takakoli Sekaraia tobou losu yapuke pome lodo
yotokapaneya.
10
Einata einapete palima keneya padeya Akolalike ka lono takoa lodo yotane-
pete ali atoa akolono oboa nekete Akolali kowitoa kakeneya.
11-12
Nitikakoa Akolaliyo moa
wetekane edelo agopa Akolalike palima keneya padeya lodo yotokoai taneta nimini yono
lono eida nome kakale Sekaraiayo enekome wene kainya pianeya tokome pitime tuaneya
kakeneya.
13
Nitaneyake edelo agome okome okome piti moamea. Neme kowitike okamo
Akolaliyo yateka tokolo neke atue deya Elisabesiyo neke mati opikademe tokono, eni mati
opikalepa Yone wa ibini amene.
14
Eni mati opikete wene yapekale kolotine meoi. Ete ali
atoa peya matiyameka ke wa wedikoa meoi.
15
Eni mati tubetoa kakomepa Akolaline leneke
ibini akene ago kawademe toko. Nitikagome gerepi po ku ueka leau akateko ueka nakile
toamoo. One ninane tepene meaneya Epetane Yomini oneke awinokome tepene lobutua
tagatapeoo.
16
Iserele yatene ali atoa peya mati kini Ali Muno Akolali tewitikoa wawa
pekene-kiti einagome oto toa moo.
17
Nipa telekago Akolaline agale papete to awea akane
ago Ilaidayo tele tane toa too. Nitoa etene mana-mikitipa odene wene pikoa ni Akolaline
agale tagoa toamiki yenepa wene kiyo akeneya meki-kiti mea tiki toa nimini peku noa
tomotoa too. Enipa Ali Muno ago noatekoya tokolo ali atoame nepia memotoa tokome
edikoa nodokakama yawoo wa edelo agome akeneya
18-19
Nimo okale Sekaraiayo okome nopa ada toane koto kakou ago, anu natonoka
atue deya mekono, neme wini okopa nimini toatekomo okono edoane wene tuku patu-kale
okome nopa Geberiele Akolali-pala opiane-kama kaku agome uku. Akolaliyo i epetane agale
no neme to awea akapa wa neeke wetekakolo nekene uku.
20
Eni to aweane ukule taatekateko
oi ponoka-pete nimini taatekoa toatekoyake neme yakoa moamoko. Nitikoya teke enile wete
taatekoa toameneyakepa neke kekeme agale amele toamokale agale wametekoa pa meoo wa
edelo ago Geberieleyo akeneya.
21
Nitikakoa ali atoame Sekaraia akolono witoa nomotoa nepia kakeneya. Nipa einago
edekolo wete noamoko patu wa nepia kakeneya.
22
Wa naniko einago akolono witoa
nokome ali atoa-pala agale amele toamokale pa kakeneya. Nitoa yoname agale adeka pia oa
kakale enekete tobou losu yapu kakome pulete keneya padele enadeko wa enoa wene
taneya.
23
Sekaraiayo tobou losu yapu Akolaline pupu takoa mea peya takateka oi ponokale
one yapu wakapea pome mepaneya.
24
Wakapea pome mea natono koua pitikale mati
kakeneya. Elisabesi mati kakeneya meapa tokene ko kakoa (5) ponomotoa witimoa one
yapu eida pa meaneya.
25
Nitoa mekome okome namolopa no tiobo atoa meane tekene
yame tuaneya mekouyano, opipa Akolaliyo no auapekolo tekene eni ya teigoane waku wa
Elisabesiyo akeneya.
Mariayo Yesu Opiatekamo
Edelo Agome Oa Pianeya
26
Elisabesi one mati kakeneya meaneyake ko melepu (6) tokene nome kakaka
Akolaliyo edelo ago Geberiele Galili ta keneke piane Nasarese take poano pa wa moa
wetekaneya.
27
Nipa ali poameneya tuatoa mekata eni wetekaneya. Eina atoapa Depidike
tagene ago Yosepeyo moademe tu pia kakene atoa one ibinipa Maria.
28
Einatoa mekata
edelo ago nokome okome kamo koni atoa Akolaliyo pewe wia kakene atoa Ali Muno
agome ne auapea yopiko wa okale
29
yatekome one eni oka agaleke wene kainya pianeya
kakome no-pala ina okana agalepa edemo wa okato patu wa wene kibutua kakeneya.
30
Nitoa kakaka edelo agome okome okome anu oyatoa Maria piti moamea. Akolaliyo ne
pewe wia kakono, piti moamea.
31
Ne mati kakeneya meade toko. Neke eni opika matipa
Yesu wa ibini oa piamene.
32
Eni matipa ibini akene ago kawoo. Ako odene meko Akolaline
mana wa peyame ibini oi. Ali Muno Akolaliyo neke kaua ago Depidiyo talo tane taapa ne
tobou ago meke yopia-kala mea wa eni mati yameoo.
33
Nitoa yametekale Yekobeke ta ma
nokoi-kiti yopia-kala kama pokomepa wipitiameneya pa talo toa-kala kama poo wa edelo
agome akeneya.
34-35
Nitikale okome nopa ali poameneya mekuno, mati edoane opimotoa-pe wa okale
okome Epetane Yomini neeke awinademe toko. Nipa ako odene meko Akolali one
telekoleme ne kaunoademe toko. Nitikale tokome neme opikateka matipa Akolaline mana
wa peyame ibini oi.
36
Neke wamene atoa Elisabesika mati kakeneya meko. One atue
deyameke mati kakeneya meko. Namolo tiobo atoa-kala akeneyake opipa mati kakeneya
meko. Nipa tokene ko melepu kakoa ponomotoa mati kakeneya meko.
37
Enilepa Akolaliyo
padele padeleta peya tamele toko agome ni toko-kale okome
38
nopa Akolaline pupu takaku
atoano, neme wini okolepa nimini taatekoa tomotoane uku wa okale edelago tewitikoa
pekeneya.
Maria Elisabesi Mekata Ugu Pekenemo
39-40
Einapetepa Mariayo Sekaraiane yapu pou wa one yapu Yudea take tono tonota
kakeneka wete pekeneya. Nitoa one yapu tuapea pokome Elisabesi-pala ke wa oa tebea
motaneya.
41
Nimo okale Elisabesiyo yatekaka eina eina Elisabesine tepene kakene mati
tepene peloa toa kakale Epetane Yomini Elisabesike awia tagatapeneya.
42-43
Nitikale
Elisabesiyo telo okome okome ete atoa peya pa memotoa Akolaliyo ne takoa pewe wia
kako. Neke opiateko matika pewe wia kawademe toko. Ae, anu Ali Muno agono nine nepa
anu yapu opi noke kako. Ne dikane atoa no pa atoa mekuta edekolo noko-pe.
44
Neme no
tebemoa kake okamo yakakakounaka eina eina anu tepene kakene mati wedikome tokome
peloa toa kaka.
45
Ali Muno agome oa wetekapiane agale yakoa motoko atoa nepa kolotine
meoo. Nepala eina oa pianele nimini taatekoa too wa yakoa moteke tokale tekene ni uku wa
Elisabesiyo akeneya.
Mariayo Lo Akene Agale
46
Nimo okale Mariayo eya wa lo oa kakeneya.
Anu tepene meaneya ya wane Ali Muno kei pikene uku.
47-48
Anu yomini-pala kolotine mekene no toa motokago Akolali-pala ke wane oane meku.
Ni edoa-mo.
One pupu takaku atoa pa ponopeneya mekuyake takoa moa pewe wia kako. Nitikono, opi
titimoa ali atoa opia tagama pokoi peyame i atoa nopa Akolaliyo pewe wia
kakene atoa wa no kei pia oi.
49
Telekago Akolaliyo padele padele tubele mati toa no auapekala toka. Onepa kiyo akenele-
kama toko agono, one ibinipa paya tetepo takamikiya.
50
Ali atoa oneke nate wene pianeya mea opia tagama piki toa oneme ela moa yopia meko.
51
Akolaliyo ele kule telekole-kama toma nekeneya. Nipa pine yene kini wa kei pia mate
agale okoi-kitipa wia tadekatapeneya.
52
Ni eka kuka take mea telekole toa yopiane tobou ali-kitipa keku mekoa ponopene ali atoa
ako moa kakoa taneya.
53
Ni kobume tuaneya meane-kiti nee epetaneya lawetaneyake kamo tane ali atoa wanakome
poe wa wetekaneya.
54
Kiwi yatene ela moane auapeou wa oa pikana toa wene taneya mekome onekele takama
nekene Iserele yatene auapea yopia kakeneya.
55
Nipa tone kaua-mikiti-pala oa pikana toa eni taatekoa taneya. Enipa Eberameka oneke
ta ma pokoi yeneka kiwi peya ela moane auapeane-kala kama pou wa oa pikana
toa taatekoa taneya wa Mariayo lo oa kakeneya.
56
Tokene tebolo tadiya ponomotoa Maria Elisabesine yapu pa eida meaneya. Nitoa
meemotokome one yapu wakapea pome mepaneya.
Elisabesiyo Yone Opianemo
57
Elisabesi one mati opiateka oi nokale ali mati opianeya.
58
Nitaneyake Ali Muno
agome Elisabesi ela mati motokome mati opimotoa tanemo yatekete one oya yene one
yatene ali atoa peya wedia meaneya.
59-63
Wa ta pataka ketepo (8) kakoake eina matiyane kepene teigakoli enadete nekene
yename one etenane ibini Sekaraia wa ibini ato wa okoli niname okome e 'e mena. Yone wa
ibini ato-kale ekete kita yatene ago Yone wa ibini akene ago odeneka kawamokono, Yone
wa ibini okopa edekolo oko-pe wa akeneya. Nitoapa matiyane etene-pala yoname adeka pia
pitia yatekete ekete i matipa te wa ibini oo-pe-koli agale wiane mekatekuya manoe wa
yoname adeka pia moa witikome i mati one ibinipa Yone toko-la wa wia mekakale enekete
wene kainya pianeya kakeneya.
64
One ibinipa Yone toko-la wa wia mekakaka eina eina one
kabunu yapekome kekeme agale amele tokale Akolali kei pia kakeneya.
65
Nitikalepa eni take
meane yene peya piti tokale meaneya. Nitaneyake eni tanemo Yudea tono pake pake piane
ta ludu oa pupitikatapeneya.
66
Einaka einamo yakane-kitame wene kibutua mekete ekete i
matipa tubetoa kakomepa edoa kako patu wa wene kibutua meaneya. Ali Munono yono
tatono piadeko wa wene tekete ni akeneya.
Sekaraiayo Lo Akene Agale
67
Nitaneyake Sekaraia Epetane Yomini oneke awia tagatapeneya kakome Akolaliyo
taatekoa toatekamo eya wa oa kakeneya.
68
Toto Iserele yatene yopiko ago Ali Muno Akolali kei piato. Kiwi auapeou wa one ali atoa
toto oto toa motaneyano, nitato.
69
Nipa kei yene toto toa mopamene wa telekole-kama tokago moa kakakomepa onekele
papete takane ago Depidi-loeke tagene ago eni moa kakaneya.
70
Nipa namolo namolo papete one agale to awea akane ali-kiti-pala dikou dikou wa oa
pikana toa to awea akanele eni taatekoa taneya.
71
Nipa kiwi yatene-pala poi te ia mekoi-kitika kipala kotimi wene lua mekoi-kitika ete pedeka
pedeka toane kiwi toane mou wa oa pikana toa taatekakome einago moa
kakaneya.
72
Nile tikilepa tone kaua-mikiti ela moane yopiou wa oa pikana toa taatekoa taneya. Ni
neeke ta ma pokoi yene auapekene dikou dikou wa Eberame-pala papete oa
pikana toa wene kayapeameneya mea taatekoa taneya.
73-74
Toto eni auapeatekamopa tone kaua ago Eberame-pala oa togotopianeya. Nipa kipala
poi te ia mekoi-kitike kiwi toane motokolu onekelepa atiki toa takama pomotou
wa oa togotaneya.
75
Nipa oneke ta ma pokoi yene toto mea epetekateko toa mea ni wene kiyo akaneya mea
tomotoa tokome nitaneya. Enipa one leneke-kama mea kama pekete tomotou wa
Akolaliyo toto auapeatekamo Eberame-pala papete oa togotopianeya.
76
Nitaneyano, anu i mati deya nepa ako odene meko Akolaline agale akako ago wa peyame
oi. Ali Muno noateka ka nodokakapikilepa one naniko nomotoa ne namolo takoa
peke nodokakapima poo.
77
Nipa ali atoa Akolaliyo kiwi toa motikilepa kini poanele toma yakoinake po letu mekakana
keetapea too wa neme wene takama-kala poo.
78
Tone Akolaliyo one ali atoa ela moa poti ko akene wene-kama pianeya mea tokome toto
toa moateko ago a tibu mea noateko ta patakademe toko.
79
Yomiyomu keneke meemotekete tua poateko-kiti totoke pa eni takalogakilepa tepe
kolotini kilikoa pimotoa meateko ka yamea too wa Sekaraiayo lo oa kakeneya.
80
Eni mati tubetema pokome tigini kawa yomini-pala tele taneya meaneya. Nipa Iserele
yenane leneke kakome Akolaline agale akateka oi wete noameneyake ali piamene ta ludu
pima yakeneya.
Luke Luke
<<
11
>>
Luke Luke
<<
22
>>
2
Mariayo Yesu Opikome Tanemo
(Matiu 1:18-25)
1
Einaka einapete ako odene meane tobou ago Sisa Ogasasiyo eya taneya. Ta piko
peyake pitiki ali atoane ibini bokuke wia mekoatino toe wa oneke lokoa ta talo tane yeneke
agale oa wetekamu taneya.
2
Ali atoa mekoi toa oi eni motikilepa eya ago Kuwiriniusiyo Siria
ta talo toa meane-pete titia taneya.
3
Nitane-pete ali atoa kini kini opiane take-kama ibini oa
pipokala taneya.
4
Yosepe einagoka nitaneya. Nipa Galili ta keneke piane Nasarese ta kawa
Yudea ta keneke Beseleme wa ibini akene take pekeneya. Depidi-loeke ta ma nekene ago
tokome Depidi opiane Beseleme take ibini eni oa pipaneya.
5
One moademe tu pia kakene
atoa Maria-pala opia pome nitaneya. One eni atoapa mati kakeneya mepaneya.
6
Eni takepa
one mati opiateka oi nokale ali mati opia pianeya.
7
One namolo mati eni opikome mamina
ludume togototapea pitimekawe kai eya nee pikoai taneya waneke moa pianeya. Nipa ali
atoa dekoa piai tane yapu edea takatapeneya tokome eida paka lono mea mati opia pianeya.
Edelo Agome Sipi Sipi Kai Talo Tane
Ali-kiti-pala To awea Akenemo
8
Einaka einata ta likale sipi sipi kai talo tane ali pade-kitame kini sipi sipi kai li ludu talo
toa kakeneya.
9
Nitikakoa Ali Munoyo moa wetekane edelago kiwi kakoiya liti kotikatapea
nome kakale Ali Muno agono pa toologaneya. Nitaneyake pitime tuaneya kakoli okome
10
ali
atoa peya wedikateko agale oane metekuno, piti moameo.
11
Opi Depidi opiane takepa kiwi
toa moateko ago opianeya piko. Ali Muno Keraisu wa oatiki agoke uku.
12
Ena mati ino
enoe wa wene tomotoane tekene one adeka i oane meteku. Mamina ludume togotane matipa
pitimekawe kai eya nee pikoai taneya waneke wini pioono, enoatino poe wa edelo agome
akeneya.
13
Nitikaka eina eina edelo ago kakata one a tibuke meane yagono-mikiti
kotikatapea obomoa note kaatapea Akolali kei pikete ekete
14
ako tibuke pa tootapeneya meko Akolali-pala ke wa one kei piato. Itonokepa one wa
takoa motokome pewe wia yopikolo meki-kiti poi wia pitikaneya mekino, ke wa
oa kakeneya.
Sipi Sipi Kai Talo Tane Ali-Kitame
Yesu Tuku Toa Enanemo
15
Nimo oomotekete edelo yatene a tibuke wakapea pekeneya. Nitaneyake sipi sipi kai
talo tane ali-kitame oote tekete ekete Ali Munoyo ina wetekakale nome okanakale Beseleme
take enepatoe wa
16
teyapea pote enekoli Maria Yosepeta eida kakoli enaneya. Eina matika
pitimekawe kai nee pikoai taneya waneke pikale enaneya.
17
Nitoa enemoteketepa edelo
agome kiwi-pala eina matike to awea onokanakamo i i wa oa pupitikama pekeneya.
18
Kini
eni oa pupitikanemo yatekoi peyame i ikino yakatoe wa wene kainya pianeya yakakoa
meaneya.
19
Nitaneyake Mariayo einaka einamo one lukoa mekome enilepa edele toatekolo
toko wa wene kibutukoa meaneya.
20
Sipi sipi kai talo tane ali-kiti kini kawa nokoina lono
wakapea pikilepa Akolali-pala ke wa oa one kei piawineya pekeneya. Nipa edelo agome
kiwi-pala eina to awea onokanakale peya taatekatapeadekale ni taneya.
Matipa Yesu Wa Ibini Akenemo
21
Ta pataka ketepo (8) kakoakepa matiyane kepene teigamotoa aua poatekoi oi nokale
Yesu wa ibini akeneya. Nipa Maria mati wete kawameneyake edelo ago nokome ibini
to awea oa pikana toa taatekoa nitaneya.
Simione-pala Anatame Tobou Losu Yapu
Kakete Yesu Enekala Tanemo
22
Moseseyo one totono yametekome tamene wa akene toa eya taneya. Mariayo mati
pene opimoa tokome enipete-mene mati pikoa pia pa witimoa meaneya. Nitoa mea
teigakomepa Maria Yosepetame eni mati Akolaline takoa meadete Yerusaleme take aua
pekeneya.
23
Nipa namolo takoa opiane ali mati Akolaline takoa meamene wa Ali Muno
agono totono wia mekaneya piane toa litia taneya.
24
Nitoa aua pote metekete Akolalike
padeya mea lodo yotaneya. Nipa ini takuta mayapu takutaka puluma inideya takutaka
mea lodo yamene wa Ali Muno agono totono wia mekaneya piane toa nitaneya.
25
Yerusaleme take eya ago Simione meaneya. Einagopa wene kiyo akatapeneya
mekome Akolalinele-kama takoa meaneya. Nitoa mekomepa Iserele yene ela moa
auapeatekago taatekoa nomotoa nepia meaneya. Nitane agoke Epetane Yomini awinaneya.
26
Awinome mekome okome Ali Muno agome moa kakapiane ago Keraisu taatekoa nokale
ne tuameneya mea enoano, poti nepia meamene wa papete wene takapianeya.
27
One eni
papete okana toa taatekakome Epetane Yominiyo tobou losu yapu poano pa wa Simione
wetekakale pokome enekale Maria ana Yosepetame Mosesene totono piane toa tekete mati
Yesu Akolaline takoa meadete
28
aua nokoli enaneya. Enetekoa moa tebemoa kakome
Akolali kei pia kakome okome
29
Ali Muno ago neme no-pala papete oa pikanakale opi taatekoa tokono, nekele takama
nuku ago nopa tepe mataketikaneya tuane pou-ta-la.
30-31
E ku yatene kakakoa ali atoa toa moade nodokakole anu leneme i enekene tekene ni
uku.
32
Ali Muno neke toma pokolepa i matiyame e ku mone yatene i i wa pa takalogou toa wene
takakala too. Nitikale eni yename ke ke wa Iserele yene kei pia kakala toi wa
Simioneyo Akolali kei pia kakeneya.
33
Nimo okale yatekete etene nineta wene kainya pianeya kakeneya.
34
Nitaneya kakoli
Simioneyo kini kowitikakome okome i ali atoata i mati toa pewe-kama wia kamene wa
Akolali kowititikoa Maria-pala eya wa akeneya. I matiyamepa Iserele yene padeka-kiti ka ia
logamotoa toa ni padeka-kiti ate kamotokoa too. Akolaliyo one yatene nani toa moateka
adeka pikome i mati moa kakapianeyake padeka-kitame one akoa wawei.
35
Nitaneyake ali
atoa peya mati kini tepene pikoi wene keleyo witoo. Neepa kepete tueme lagotaneya meou
toa wene kedame tuaneya meoo wa Simioneyo Maria-pala akeneya.
36
Akolaline agale pine wene toa to awea akane atoa pade Aana wa ibini akene atoa
Yerusaleme take eida meaneya. Einatoapa Aasa ti ago Panuelene kono.
37
Einatoa mali
tatono (7) kakoa ponomotoa ana-pala meaneya. Wa naniko ana tukale nepo atoa mekome
tobou losu yapuke-kama pome mekala taneya. Nipa ta ete likoa oto likoa Akolalinele takoa
mekome nee tekei wawa Akolali kowitikala taneya. Eina atoapa mali ege odepeta kadukoa
wa pagini kakoa (84) ponomotoa mea kakene atoa.
38
Einata einapete einatoa nokome
Akolali-pala ke wa oa kakeneya. Nitoapa Akolaliyo Yerusaleme yene oto toa moatekale
nepia meane ali atoa-pala eni mati koo oa kakeneya.
Nasarese Take Wakapea Pote Mepanemo
39
Ali Muno agono totono pianele toa peya takamotekete Maria ana Yosepetame mati-
pala aua kini Galili ta keneke piane Nasarese take wakapea pote mepaneya.
40
Eidapa eni
mati tubetoa kakeneya. Nipa tigini kawa wene muno mea tagatapeneya mea tokale Akolaliyo
pewe wima pekeneya.
Yesu Tuali Mekome
Tobou Losu Yapu Pekenemo
41
Edelo ago patukane wa ibini akene toge oi penane toa-kama Yesuno etene nineta
Yerusaleme take eni toge lobutupokala taneya.
42
Yesu opitikaneyake mali tuku kakoa (12)
ponokale eni malikeka einakale toa one-pala Yerusaleme take aua pote toge lobutupaneya.
43
Nitoa mea togamotekete kini take wakapea poadete pekeneya. Wakapea pomotoa mana
Yesuyo kita wameneya Yerusaleme take pa eida meaneya.
44
Etene ninetamepa Yesu kita-
pala opia yakoina-kiti pake lukoa nokono wene pia pote ta likakete kini oya-mikiti kini
yatene ali atoa pake tuku tokoa kaketeke enameneya.
45
Nitimotekete Yerusaleme take
wakapea pote tuku topokete
46
ta pataka teboloke tuku tokoa kakeneya. Nitoa tobou losu
yapu pote enekoli Akolaline agale olaukane ali-kiti pakeke lukoa mekale enaneya. Nipa eni
ali-kitame okoimo yakakoa mea pademo pademo pitia yakoa mea tokale enaneya.
47
One eni
oka agale yakane yene peyame ekete pademo pademota i wene toa togatapekono, one topo
takoa oko agale yakatoe wa ka oa kakeneya.
48
Eida nitoa meadekale enekete etene nineta
wene kainya mati pianeya kakete niname okome anu mati neketai totame ne mama motekete
tuku tokoa kakono, dekolo tota wameneya widikoa pa ita meke toka-pe-kale okome
49
dekale tuku toa kakoiya-pe. Agetainele one yapu kene mekene takamedekuno,
50
enipa
wene toamekete iki-pe-kale one eni oka agale edoa okoto patu wa wene toameneya.
51
Yesu etene nineta-pala wakapea Nasarese take nome mekome kitame okoile-kama
litia taneya. Nitima nekenemo-kama Maria pa one luaneya mekome wene kibutukoa
meaneya.
52
Yesu eida tubetema pikilepa tigini kawa wene muno meaneya mea taneya.
Nitawineya pokale enekete Akolalika ali atoaka oneke wene mekoa meaneya.
Luke Luke
<<
22
>>
Luke Luke
<<
33
>>
3
Yone Taatekoa Nekenemo
(Matiu 3:1-12, Make 1:1-8, Yone 1:19-28)
1-2
Sekaraiane mana Yone ali piamene take meaneya Akolaliyo i ago neke toatekole
toano ta wa oi metane-petepa eya tobou ali-kitame Yu yene talo toa meaneya. Ako odene
tobou meane ago Taibiriase Sisayo e ku yatene peya talo toa mekale mali wagene melepu
(15) kakoakepa oneke lokoa eya ali-mene ta tutu tutu wa yopia mekala taneya. Podiase
Pailaseyo Yudea ta yopia ni Erodeyo Galili ta yopia ni one wamene ago Pilipiyo Ituria
Terakonaise tata yopia ni Laiseniasiyo Abilini ta yopia mea taneya. Nitikala tokoika Anasi-
pala Kayapasitapa ako odene mekete Akolalike lodo yotokoai taneya.
3
Eni malikepa Yone
one mekata tewitikoa pokome Yodane ue liti piane ta ludu eya wa mo wima yakeneya. Kini
tokoi poaneleke Akolaliyo kiwi wiou wa po letu mekakana keetapemotono kini poanele
tewitikoa wawa ue moamene wa oma yakeneya.
4
Nipa Akolaline agale to awea akane ago
pade Aisaiayo papete wia mekapiane toa taatekoa nokome akeneya. Aisaiayo eya wa wia
mekapianeya.
Ali piamene ta ludu panagome eya wa mo wima yawoo. Ali Muno ago wini noono, one
noateko ka nodokakamene. One yawateko ka-kitika ki yotokakapiamene wa
taatekoa nokome oo.
5
Tubeya kako tono-kitika dee tono-kitika kilikoa odene
kotu kakatapeneya kawoo. Eni pake kagono pikokaka ogotapeneya pioo. Ka
ko ianeya pikokaka ki yo akatapeneya pia ka poaneya pikokaka epetetapeneya
pia too.
6
Nipa Akolaliyo ali atoa toa motokome tokale peyame enoi wa
Aisaiayo papete wia mekapianeya.
7
Ali atoame ue moadete one mekata-kama obomoa nokoli Yoneyo enekome okome
beita, kayane yagono-mikiti kipa Akolaliyo kibu moateko tigotoma nokono petoatino, oto
ita poe wapa teyo pubu okolo niki-pe.
8
Kini namolonakale tewitikoa wakedekolipa ete-
kitame enemotono, epetanele toma pamene. Nipa eya wa wameamene. Kipa Eberamene
kaua-mikiti mekono, Akolaliyo kiwi edoa kibu momotoa-pe wa wameamene. Akolaliyo i
piko kue wane-kiti moa Eberamene kaua-mikiti oyake latikakamele toko. Nitamele tokono,
kipa Eberamene kaua-mikiti kako wa edoa mate agale oadete-pe.
9
Yomo-kiti ku
tuameadekale enekomepa pinagome tue moa ka wa toele pitikoo. Kipa tueme ka wa
pitikateko tigotokolo tekene ni uku wa akeneya.
10
Yesuyo nimo okale ekete ae, totome edeko patu-koli okome
11
panago neke tigini
mamina takuta-kiti pikalepa nipa ponopenago pade pa kakale enekepa pade tatia einago
meamene. Ni panago neke noateko nee pikalepa nipa panago nee toameneya pa mekale
enekepa neke nee tatia meamene wa Yoneyo akeneya.
12
Nitikale takesi kue motokama
yakene ali padeka-kitika Yone mekata ue moadete nekete ekete Tikisago totomepa edeko
patu-koli okome
13
ali atoa-kitaneke takesi kue moteketepa takesi kue moatiki kotuke-kama
moamene. Ako pade oa yotokoa moameamene wa akeneya.
14
Poyo ali-kitameka Yone pitia
yatekete ekete totome edoo-pe-koli okome ali atoa-kitaneke kue odoa moamoa yete pade
ali atoa-pala pa akoa agale wamoa tamene. Ni kini poyo pupu tokoike kue moteketepa ko
wameneya moateku toane i oyake motukuno, ke wa moamene wa akeneya.
15
Nitaneyake peyame one wipitikome toatekale nepia kakeneya. Nipa wene kainya
pianeya kakete ekete i ago Akolalinele takamotoa moa kakapiane ago Keraisu taatekoa noko
patu wa wene kibutua meaneya.
16
Nitikoli okome noanumepa kiwi pa ue motokakala
tukuyake no keku kamotoa panagomepa ele kule telekole toa noademe toko. Nokolopa
auapeane one kawa yene kekatukuyake no pa ago tekene oyake kekamele toamoko. Einago
nokome ali atoa pa ue motokamokome Epetane Yomini-pala toeta motokademe toko.
17
Einago nokome eya tou toa ali atoa takoa moo. Witi ku takoa motokagome-kiti one
tapepora katekamoa nokome witi ku kugu witikatekoapa yaku pupulegeme popokoa aua
pomotoa ate tibu pokotoa pitikakala too. Nitoapa ku one kakata wa pitoa auma kakale witi
ku lobutua piko yapu keneke moa pitikoai too. Nititikoa yakupa koukoa moa pa nokoa-
kama kako toe mine aua pitikoai too wa Yoneyo akeneya.
18
Nitikomepa emo kumota oa metekome ali atoane wene epetekateko toa Akolalinemo
edikoa oa mekala taneya.
Erodeyo Yone Po Yapu Moa Pitikanemo
(Matiu 14:3-5, Make 6:17-20)
19
Wa naniko Galili ta yopiane ago Erodeyo wamene Pilipi natono Erodiasi kode moa
one natono latikaneya. Nitaneyake Yoneyo Erode kikoa okalepa
20
poanele ate toawineya
pome wipitikome Yone po yapu moa pitikaneya.
Yesuyo Ue Motanemo
(Matiu 3:13-17, Make 1:9-11)
21
Yoneyo ali atoa peya ue motokatekaneyake Yesuka nokome ue motaneya. Ue
mootokoa Akolali kowitoa kakaka tibu peaneya pikale eya taneya.
22
Epetane Yomini ini
weuwe tetepo takatapea nome oneke pitoa awinokale a tibuke agale ludu nokome okome i
ago neepa anu mana anu kolotini ali. Neke tokoleke kolotine meku wa akeneya.
Yesuno Kaua-mikiti Adameke Titimoa Opia
Tagama Nekenemo
(Matiu 1:1-17)
23
Yesuyo Akolalinemo olaukama yakilepa mali padeka kapidi tadiya kakoa (30)
penaneyake titikome taneya. Yesu einagopa Yosepene mana wa ali atoame wene pianeya.
Yosepa onepa Ilaine mana.
24
Ilai onepa Masatene mana. Masate onepa Lipaine mana. Lipai
onepa Melekaine mana. Melekai onepa Yanaine mana. Yanai onepa Yosepene mana.
25
Yosepe onepa Matataiasine mana. Matataiasi onepa Emosine mana. Emosi onepa
Neamene mana. Neame onepa Eselaine mana. Eselai onepa Nakaine mana.
26
Nakai onepa
Measine mana. Measi onepa Matataiasine mana. Matataiasi onepa Semene mana. Semene
onepa Yosekene mana. Yoseke onepa Yodane mana.
27
Yoda onepa Yoanane mana. Yoana
onepa Resane mana. Resa onepa Serabapelene mana. Serabapele onepa Sialetielene mana.
Sialetiele onepa Neraine mana.
28
Nerai onepa Melekaine mana. Melekai onepa Edaine mana.
Edai onepa Kosamene mana. Kosame onepa Elemadamene mana. Elemadame onepa Erene
mana.
29
Ere onepa Yosuane mana. Yosua onepa Eliesane mana. Eliesa onepa Yorimene
mana. Yorime onepa Masatene mana. Masate onepa Lipaine mana.
30
Lipai onepa
Simionene mana. Simione onepa Yudane mana. Yuda onepa Yosepene mana. Yosepe
onepa Yonamene mana. Yoname onepa Elaiakimene mana.
31
Elaiakime onepa Meliane
mana. Melia onepa Menane mana. Mena onepa Matasane mana. Matasa onepa Nesanene
mana. Nesane onepa Depidine mana.
32
Depidi onepa Yesine mana. Yesi onepa Obedene
mana. Obede onepa Boasine mana. Boasi onepa Salemonene mana. Salemone onepa
Nasonene mana.
33
Nasone onepa Aminadapene mana. Aminadape onepa Ademinene
mana. Ademine onepa Anaine mana. Anai onepa Eseronene mana. Eserone onepa Peresine
mana. Peresi onepa Yudane mana.
34
Yuda onepa Yekobene mana. Yekobe onepa
Aisakene mana. Aisake onepa Eberamene mana. Eberame onepa Tirane mana. Tira onepa
Neono mana.
35
Neo onepa Serakene mana. Serake onepa Reuno mana. Reu onepa
Pelekene mana. Peleke onepa Ebene mana. Ebe onepa Selane mana.
36
Sela onepa
Kenanene mana. Kenane onepa Apakesadene mana. Apakesade onepa Siemene mana.
Sieme onepa Noane mana. Noa onepa Lameka mana.
37
Lameke onepa Metusalane mana.
Metusala onepa Inokene mana. Inoke onepa Yaredene mana. Yarede onepa Malalene mana.
Malale onepa Kenanene mana.
38
Kenane onepa Inosono mana. Inoso onepa Setene mana.
Sete onepa Adamene mana. Adame onepa Akolaline mana.
Luke Luke
<<
33
>>
Luke Luke
<<
44
>>
4
(Matiu 4:1-11, Make 1:12-13)
1
Yesupa Epetane Yomini oneke awia tagatapeneya mea Yodane ue tewitikoa
pekeneya. Nipa Epetane Yominiyo Yesu ali piamene ta ludu aua yakaka ta pataka padeka
noi kakoa (40) ponaka toa eida pima yakeneya.
2
Eida pima yakaka Setanu nokome likoa
enekala taneya. Enipete-menepa nee nakileka toametekoa enika pima yawa wipitikomepa
one kobume tuaneya meaneya.
3
Kobu tokale meaneya Setanuyo nokome likoa enekome
okome ne Akolaline mana tadekalepa nipa i piko kue wanepa neke noateko palawe wane
latiano ta-kale okome
4
Akolaline bokuke eya wa wia mekaneya pikono yaka. Mea
kawadetepa pa nee-kama moa noameamene wa wia mekaneyano, wini okole toamou wa
Yesuyo akeneya.
5-6
Nitaneyake Setanuyo Yesu tube tono tobouke moa aua pokome kakapaneya.
Nitoapa ako tobou ali-kitame yopiane ta piko peya odepeta yametapekome okome eni ta
piko peya ni eni ta-kitike koniyoya peya ne ako odene tobou ago meke talo toa wane ne
yametapeou. Enika eniya peyapa noanume yopiane memotoa yametaneyano, anu wene
litikene takoane moane yameateku ago oyake yameou.
7
Anu kawane witipitake kowitikalepa
enika eniya peya ne yameouno ta wa likoa enekale okome
8
Akolaline bokuke eya waka wia
mekaneya pikono, yaka. Neke Ali Muno Akolalike odene nate wene piitikoa kowitamene.
Losule tikilepa onekele odene takoa tamene wa wia mekaneya pikono, wini okole toamou
wa Yesuyo akeneya.
9
Nitikale Yesu Yerusaleme take aua pome tobou losu yapu munoke moa kakakome
okome ne Akolaline mana tadekalepa nipa ita kawa keti tiga-na.
10
Neekepa Akolaline
bokuke eya wa wia mekaneya pikolo tekene ni uku.
Akolaliyo ne i agopa wedoa yopia kamene wa one edelo yatene yameoo.
11
Nitikale ne
tugoa ogo eya nakaya tokale kini yoname lekanamoi.
Enimopa Akolaline bokuke wia mekaneya pikono, nepala padeleka toamoono, tigaketika.
12
Setanuyo nimo okale Yesuyo okome neke Ali Muno Akolali likoa enameamene wa wia
mekaneya pikono, wini okole toamou wa wakeneya.
13
Nitaneyake Setanuyo padele padele
ta-la wa likoa enoai toa teko tokale naniko wa likoane enou wa tewitikoa pekeneya.
(Matiu 13:53, Make 6:1-6)
14
Yesu Galili take wakapeane pou wa Epetane Yominine tele patu kautakoa kakome
pekeneya. Nitaneyake one toma pekenemo eni ta piko peyake oa pupitikaneya.
15
Nipa losu
yapu kaka toa Akolalinemo olaukama pokaka peyame imopa i okono yakatoe wa one kei
pia kakeneya.
16
Yesu one tubetekane take Nasarese take pome mepaneya. Eida koo mea pupu
toamene-pete one tanele tokome losu yapu pome Akolaline agale oi moademe kamokakale
17
panagome Aisaiayo wia mekane boku ina wa moa metaneya. Nitikale moa eya agale wia
mekaneta tuku toa lewea enekome oi motokome okome
18
Ali Muno Agono Yomini nooke awinoka. Nipa eya toma pomotoa no moa kakakome
toka. One epetane agale ponopeneya-kiti oane meane ni poo yapu pitiki-kiti
kini yapu pamele tokono poe wane oane ni leneta lianeya meki-kiti kini
lenetame enamele tokono enoe wane oane ni wene moa kautakaneya meki-kiti
wene yapetekakuno poe wane oane
19
ni Ali Muno agome one ali atoa toa
moateka oi meane tomotoa no moa kakapika wa papete wia mekanemo Yesuyo
oi moa kakeneya.
20
Eni oi mootokoa kakome Yesuyo boku ewetetekoa losu yapu yopiane ago ete wa
metekome witipitoa meaneya. Nitikaka losu yapu mekoi peyame one nepikoa pianeya.
21
Nitikoli okome wini oi moane metekounakale opi taatekako. Kime yakakoa mekika
taatekako wa okale
22
peyame koniyo agalepa ina to awea oko wa one kei pia kakeneya.
Nitoa wene kainya pianeya kakete ekete i agopa Yosepene mana agomeke imopa i oko-la
wa oa kakeneya.
23
Nitikoli okome kini pedoa ikina agale no-pala to opitikakete eya wa oi. Dokosago
pinali neke wa latekamene wa oa ni eya waka oa toi. Kapaneame take neme toma pekenemo
totome yakakole-kiti neke pine take ikaka toa ta wa no-pala oi.
24
Nitoino, kipala i ukumo
yakoe. Akolaline agale to awea akakagopa one take yename one makutukoa motikileka
toamiki.
25
Nimini ukuno yakoe. Akolaline agale akane ago Ilaida Iserele take mekakoa mali
teboloke ta pitamoa wa mali tuyono takaka tiginalo ta wete pitameneyake kobu igi mati
nokoa kakeneya. Nitane-pete Iserele take nepo atoa peya mati meaneya.
26
Einapete
Akolaliyo Iserele nepo meane atoa-kiti pa memotoa Ilaida pa wa wetekakomepa mone
Saidone ta liti piane Sarepase take meane nepo atoa odene auapeano pa wa wetekaneya.
27
One agale akane ago Ilaida Iserele take mekakoa one eni take kedime nakene ali atoa
kainya mati meaneya. Nitaneyake Ilaidayo one ta pine yene odeneka latekameneyake mone
Siria take ago Nemane latekaneya wa Yesuyo akeneya.
28-30
Nitikale losu yapu mekoi peyame kiwi yatene Iserele yatene paya tetepo takakome
oko wa Yesu-pala kotimi luaneya mea kamomotekete tayo lono wia lititapeneya. Kini ta liti
tono tobouke pala padaneta pedekoa keti pitikatoe wa lia aua pekeneyake kiwi pake pa
patukoa pekeneya.
Yesuyo Panagoke Awitane Ipono
Takoa Wetekanemo
(Make 1:21-28)
31
Nitimotokome Galili ta pikoka Kapaneame take keti ko a pome mepaneya. Eida
mekomepa ko mea pupu toamene-pete Akolalinemo i i wa eni yene olaukoa kakeneya.
32
Nitikale ekete agale pinagome i okono yakatoe wa ka oa kakeneya.
33
Einata einapete poane ipono awitaneya meane ago losu yapu mekome agale telo
okome okome
34
Nasarese Yesu nepa toto mekota edade noka-pe. Toto wiade noka-pe.
Nepa Akolaliyo one wa takoa moa kakapiane ago toko-la wa ta yo ootapekale Yesuyo ipono
kikoa okome okome agale wia te iano,
35
wini ago tewitikoa wete takoa pa-kale einago ali
atoa pake moa pitikatekoa wa padele toameneya takoa pekeneya.
36
Nitikale enekete peyame
oote tekete ekete one oko agalepa edane agale patu. Agale pinagome i okono, Akolaline tele
patu kautakoa kakomepa takoa poe wa okolo ipono-kitameka yakoa takoa pokala tiki wa ka
oa kakeneya.
37
Nitaneyake one tanemo ta piko peyake oa pupitikatapeneya.
Yesuyo Pitane Natonane Nine Latekanemo
(Matiu 8:14-17, Make 1:29-34)
38-39
Yesu eina losu yapu tewitikoa pome Saimonane yapu tuapea pome mepaneya.
Eidapa Saimonane kaue one natonane nine poto yene tane matiyame tuaneya pianeya.
Nitaneyake Yesu i atoa neme latekamene wa kowitikakoli one pianeta pome poto tane yene
kikoa okome okome takoa pa-kale takoa pokale eina eina kamokakome kini nee takoa
lawetaneya.
40
Lou pipokaka eya kuya yene tane ali atoa kini oya-laweme Yesu mekata aua nidikoa
pokala tokoli yono pia latekamu taneya.
41
Ipono-kitika ali atoa peya mati takoa pote kayo
oa ekete nepa Keraisu Akolaline mana toko-la wa takoa pokoli agale wameneya poe wa
Yesuyo kikoa akeneya. Nipa i agopa Keraisu tadeko wa wene tekete okoli ni akeneya.
Yesu Losu Yapu Kaka Toa Pokome
Akolalinemo Oa Mekala Tanemo
42-43
Ta patakale Yesu ali piamene take kidenali witimoa pekeneya. Nitaneyake ali
atoame tuku tokoa kawa one mekata note kakete ekete tone pitiko ta tewitikoa poamea wa
kowitoa wili toa kakoli okome Akolaliyo ali atoa talo tokome tokomo eni epetane ko ete
yeka ye ta ludu pitiki ali atoaka oane mema pamedeku. Taatekoane einagale akamotoa ni
moa wetekaneya tokolo tuku wa Yesuyo akeneya.
44
Nitoapa Yudea ta ludu kutu pima
yakome losu yapu kaka toa Akolalinemo oa mema pekeneya.
Luke Luke
<<
44
>>
Luke Luke
<<
55
>>
5
Yesuyo One Oyali Tuyono-mene
Kayo Oa Motanemo
(Matiu 4:18-22, Make 1:16-20)
1
Wa padepete Yesu Genesarete ue mine matanu pome kakata ali atoamepa
Akolalinemo olaukakomo yakatoe wa apua takatapeneya.
2-3
Nitikoli enekale ue dipi takuta
ue mine matanu liti pianeya enaneya. Nipa pine yename eina ue dipita pa pimotoa mou tagi
ka abe ko a kakoli enetekoa ue dipi padeke pogatekoa pome mepaneya. Nitoapa i ue dipi ue
talike ete keneya modono takoa piano ta wa okale pinago Pita nokome modono takoa
pikale mekome olaukoa meaneya.
4
Nitoa olaukatekoa mekome Saimone-pala okome mou tagi tatono, ue muke pote tagi
ka pitikapoe-kale okome
5
mou tagi toa ta patakakoonake mou odeneka motikile toamokoo.
Moamokoyake ta wa okalepa nitou wa
6
one oya-lawe-pala mea pome tagi ka wa
pitikapaneya. Nititikoa mou kobeyo kobeyota tagi kake moa ua ue dipike oto lia kakoika
mou kedame ka piliamele tokale enekete
7
padena ue dipike mea nekene oya-lawe auapenoe
wa lene lagatikamotaneya. Nitikoli nekete tagi ka poti limo limo toa motokoli kini ue dipita
moume edea takatapeneya.
8
Edea takatapea ue kekulu atukademe tokale enekome Saimone Pita Yesuno kawane
witipitakome okome Ali Muno nopa poanele tuku agono, no tewitikoa poano pa wa
akeneya.
9
Nipa mou kobeyo kobeyota tagi kake moa utukete tekete Pita one-pala opia mea
nekene ali-kitika wene kainya pianeya meaneyake ni akeneya.
10
Sebedine manata Yame
Yoneta Saimone-pala kibutua mou tagi tokala tane agotaka wene kainya pia kakeneya.
Nitikoli enekome Yesuyo Saimone-pala okome piti moamea. Opi titimoa mou tagi tou toa
ali atoa moma poade toko wa akeneya.
11
Nitikale ue dipita mou-pala ue mine matanuke lia
aua nekete kinikiya peya tewitikalogoa Yesu-pala opia pekeneya.
Yesuyo Kedi Pitane Ago Latekanemo
(Matiu 8:1-4, Make 1:40-45)
12
Ali atoa pitikoi ta pade pome mekaka kedi pitane ago pade Yesu kotuaneya. Kotua
enekome aua pitalogoa kowitikome okome Ali Muno neme no epetekouno wene pikepa
nipa oyake epetekoano ta-kale
13
yoname one mitikatekakome okome nitouno ta. Kedime
nakeneya neke yene takoa pomotoane uku wa okaka eina eina one kedime nakene yene
takoa pootapeneya.
14
Nitaneyake Yesuyo okome okome pade ali atoa enekeka anume ne
latekakumo to awea wamea. Nitameneya eyaka tamene. Ne i agopa kedi pitaneya mekanake
opi i latoa kakona wa yete pade ali atoame wene tomotoapa Moseseyo tamene wa papete
oa pianele topamene. Nipa Akolalike lodo yotokako ago mekota peke padeya Akolalike
lodo yotokatekoya mepamene wa wetekaneya.
15
Nimo wa oa wetekakaleka one tanemo ta piko peyake oa pupitikatapeneyake one
agale yakapato wa ali atoa kini tane yene-pala latekamotoa one pome meane toa obonokala
taneya.
16
Nitaneyake Yesu ali piamene ta-kitike lugutukoa pokome Akolali kowitikala
taneya.
Muku Toameneya Pia Kakene Ago Latekanemo
(Matiu 9:1-8, Make 2:1-12)
17
Wa padepete Yesuyo olaukoa kakaka Parisi ali-kitika Mosesene totono pine to a
olaukane ali-kitika eida meaneya. Nipa Galili Yudea tata piko peya kawa Yerusalemeka
kawa note menaneya. E yene mekakoa Yesu Ali Munono tele patu kautakoa kakome yene
tane ali atoa latekakala taneya.
18
Nitikaka muku muku toameneya pa pia kakene ago pade
one oya-laweme leyo leyo toa aua nekete yapu keneke Yesuno kawane moa piadete tuku
toa wili toa kakeneya.
19
Nitaneyake ali atoa edea takatapeneya tokome pake piameadekale
yapu yalinike leyo leyo toa lewia aua pote kakeneya. Nitoapa yalini ke atapea kene pikatekoa
einakago leyoke pikoa leyo nami-meneke poo kakoa ali atoa pake Yesu kaka pitia
tukaketikaneya.
20
Yesu i agome kini oyago oyake latekamele toko wa wene tekete tadekoile
enekome yene tane ago-pala okome okome anu oya neke padele padele poanele toma
nokake mekane po letu keetapeku wa akeneya.
21
Nitikale yatekete Mosesene totono pine
to a olaukane ali-kitameka Parisi ali-kitameka eya wa wene pia kakeneya. Ali atoa kini padele
padele poanele toma nokoike mekane po letu keetapekilepa Akolaliyo-kama tokono, beita i
agome Akolali latitapea one paya tetepo takakome oko wa wene kibutua kakeneya.
22
Kini
eni wene pikoile tetoa enekome Yesuyo okome wini tepene wene kibutukoa mekipa dekolo
tiki-pe.
23
I ago-pala edemo wane omotoa iki-pe. Neke padele padele poanele toma nokake
mekane po letu keetapeku wane omotoa iki-pe. Wete kamokoa pa wane omotoa iki-pe.
24
No Ali Yatenane oyago itonoke mekenepa ali atoame poanele toma pokoike mekane po
letu keetapeane wamele tadeko wa kime wene tomotoanepa i ago-pala eya wane uku. Ne
aua nokoina leyo-pala moa aua neke yapu poano, kamokoa pa wa eni pa pia kakene ago-
pala okale
25
eina eina e yenane leneke kamokakome one eina aua nokoina leyo katekamoa
Akolali kei pima pome one yapu mepaneya.
26
Nitikale enekete peyame ekete ekee,
namolona enamokoonakale ilepa i tokono, enatoe wa Akolalike nate wene pia kei pia
kakeneya.
Yesuyo One Pukuka Patono Noo Wa
Lipai Takoa Motanemo
(Matiu 9:9-13, Make 2:13-17)
27
Nitaneyake Yesu eida tewitikoa pokome enekale eya ago Lipai wa ibini akene agopa
takesi kue motokoai tane yapu mekale enaneya. Enekome okome no pukuka tone patono
noo wa oma ponokale
28
onekeya peya tewitikalogoa wawa Yesu pokaka litima pekeneya.
29
Lipaiyo one yapu Yesuno toge mati kikakakale ali peya mati nekete kita-pala opia
mekete nee nakeneya. Takesi kue motokama yakene ali-kitika ete ali-kitika note mekete
nakoli enekete
30
Parisi yenameka Mosesene totono pine to a olaukane ali-kitameka Yesuno
oya ali-kiti-pala eya wa ko oa kakeneya. Takesi kue motokama yaki yene tone totono litia
toamiki yeneka toge nee wini opia mekete nakino, dekolo tikiti-pe wa ko a oa kakeneya.
31
Nitikoli yatekome Yesuyo e yene-pala okome okome dokosa agomepa yene toameneya
meku wa iki-kiti edoa nome latekanomotoa-pe. Yene taneya piku wa iki-kitipa nipa nome
latekanoo.
32
Nipa poanele toamuku wa iki-kiti kini namolo wene wia wawe wane oane
auapeadene nokouya mena. Poanele tuku wa iki-kiti odene kini namolo wene wia wawe
wane oane auapeadene nokou wa Yesuyo akeneya.
Akolali Wedoa Kowitadetepa Nee Eya
Tekei Wawa Noamikileke Pitia Yakanemo
(Matiu 9:14-17, Make 2:18-22)
33
Yesuyo nimo okale e yename ekete Yonene agale litia tiki-kitame padepete-kiti
Akolali wedoa kowitadetepa nee eya tekei wawa noameneya pa mekala tiki. Parisi ali-
kitameka dikakiyake neke oya-mikitame toamikino, dekolo toamikiti-pe wa okoli okome
34
panagono atoa motokakili atoa motoko agono oya-lawe one-pala wedikete wediapa nee
eya edoa wawa noameneya pa memotoa-pe.
35
Wa naniko ete yename atoa motokago
padeka aua poatiki wini tigotoma nokona. Nipetepa wene keda taneya mekete nee wawa
noameneya pa meoi wa Yesuyo akeneya.
36
Nimo ootokoa agale pade pedoa okome okome namolo pue pilikalepa panagome
wene pue petene moa pade wane pilimoa namolo pue pilikata lapukoa lipuko patu. E 'e
mena. Eniledo tokalepa wene pue pilianeya piake eni wene pueke pilimotane wanepa
namolo pue-pala odele taneya piamoo wa Yesuyo akeneya.
37
Gerepi po ku ue weneya
mekalepa pinagome meme kai kepeneme latiane mete namoloyake oyake pe ia moamoo.
Eniyakedo peikalepa gerepi po ku ue weneya tokome lako yati kawa mono mono okome
ka ua paka yoa pootapeoo. Nipa meme kai kepeneme latiane mete namoloya tokome oyake
pukoa mono mono amele toamokale kaugale gerepi po ku ue pata paka ponoo.
38
Nitameneya gerepi po ku ue weneya mekalepa nipa meme kai kepeneme latiane mete
weneyake-kama pe ia mokala too.
39
Panagome-kiti gerepi po ku uepa mete keneke mea
kakene mati moa nakomepa iyapa mea kakeneya tokome etene meke toko wa nako.
Nootokoapa gerepi po ku ue weneya noamademe wakala too wa Yesuyo akeneya.
Luke Luke
<<
55
>>
Luke Luke
<<
66
>>
6
Yu Yename Kini Koo Mea Pupu Toamene-pete
Ele Kule Tane Pupu Kekoa Wawa Toamenemo
(Matiu 12:1-8, Make 2:23-28)
1
Ko mea pupu toamene-pete pade Yesu witi ku ipe ludu pokaka one oya-laweme witi
ku deya kotia moa yoname puputua yaku takoa pukapea noma pekeneya.
2
Nitikoli enekete
Parisi ali-kitame ekete Yu yene tone ko mea pupu toamateko-pete kekoa wawa toamatekole
wini tikino, ku kotia eni pupupa dekolo tikiti-pe-koli okome
3
tobou ago Depidiyoka one-
pala to a yakene ali-kitameka kobu tokale tanemo oi moamokoiya-pe.
4
Eya taneya. Depidi
kobume tuaneya meaneya tokome Akolaline wikakane losu yapu tuapea pokome Akolaline
pikane palawe wane-kiti moa nakeneya. Nootokoa one-pala to a yakene-kiti-pala i nee
noatino noe wa tatikoa metaneya. Nipa Akolalike lodo yotokoai tane ali-kitame odene
dikane palawe wane namele taneyake taneya.
5
No Ali Yatenane Oyagomepa ali atoa ko mea
pupu toamiki-pete mekete toatikile i i wane oyameane talo toane tuku wa Yesuyo akeneya.
Ko Mea Pupu Toamene-pete Yono Lokane Ago
Epetekanemo
(Matiu 12:9-14, Make 3:1-6)
6
Ko mea pupu toamene-pete pade Yesu losu yapuke pokome Akolalinemo olaukoa
kakeneya. Eidapa nimini yono lokane ago pade meaneya.
7
Nitane ago mekale enekete
Mosesene totono pine to a olaukane ali-kitameka Parisi ali-kitameka Yesuyo i ago epetekako
patu wa lene wikaneya. Nipa kini pupu toameneya koo meko-pete kekanele tomotadiya wa
kakete lene wikaneya.
8
Nitikoli kini tepene pikoi wene tetoa enekome yono lokane ago-pala
okome tone lene yoto noke kanoo wa okale kamokakome kini leneke nome kakeneya.
9-
10
Nome kakale okome kipala i ukumo yakoe. Tone ko mea pupu toamoko-petepa edele
tokala tato-pe. Ali atoa-palapa padele padele epetanele tato-pe, poanele tato-pe. Tuamele
toko agopa toa moato-pe, wia tukato-pe wa e yene leneme enoa unukamu tootokoa
kakome okome neke yono kutu lido akoano ta wa okale lido akoa enekale one yono
epetekatapeneya.
11
Nitaneyake e yename Yesu-pala kotimi wene mati luaneya kakete one-
pala toatekoi oi pedoa pia kakeneya.
Yesuyo One-pala Opia Yawatekoi Ali
Tuku Kakoa (12) Takoa Motanemo
(Matiu 10:1-4, Make 3:13-19)
12
Enipete-mene Yesu tono tobouke Akolali kowitipou wa pome mekome kowitoa ta
patakaneya.
13
Ta patakale one agale yakoa motane yene one mekuta ate kanoatino noe wa
kayo oa mootokoa mekome ali tuku kakoa (12) one wa takoa moa one Aposelo ali wa ibini
oa metaneya.
14
Eya ali-kiti takoa motaneya. Saimone einago motokome one pade ibini Pita
wa oa metaneya. One wamene ago Aderu moa ni Yame Yoneta ni Pilipi Batolomiuta
15
ni
Matiu Tomasita Alepiasine mana Yame toa moa ni Saimone one pade ibini Selote ago moa
16
ni Yamene wamene ago Yudase moa ni Yudase Isekariose one wia tukamotoa moa
meateka ago moa taneya. Mootokoapa one Aposelo ali-kiti wa ibini oa metaneya.
Yesuyo Ali Atoa Olaukoa Kini Tane Yene
Latekoa Tanemo
(Matiu 4:23-25)
17
Yesu one eni Aposelo ali-kiti-pala keti ko a pokome kotu kakoa piane take kakeneya.
Eidapa one agale yakoa motane yene peya mati ete ali atoa peya mati-pala oboa kakeneya.
Nipa Yudea ta piko peya Yerusaleme taka kusa ue matanuke piko Taia Saidone tataka kawa
one agale yakadete note oboa kakeneya.
18
Kini tane yene-pala latekamotoa note kakeneya.
Poane ipono awitaneya mekete tete mokoa kakene-kitika nokoli kini ipono takoa poe wa
latekakala taneya.
19
One telepa ali atoake weamutukakala tokome latekamu tokale tekete
peyame one mitikada wa wili toa kakeneya.
(Matiu 5:1-12)
20
Einata einapete Yesuyo one oyali-kiti nepikakome okome
kiwi ponopeneya pa meki-kiti kolotine meati wane uku. Akolaliyo one pawe toa talo toko
eni taapa kinino noe wa kiwi yameoo tokolo tekene ni uku.
21
Opi kobume tuaneya meki-kitika kolotine meati wane uku. Wipitikete ulu yau toa meoi
tokolo tekene ni uku.
22
Ete yename kipala kotimi wene luaneya mea ete pilia kawa tea agale oa tikilika kolotine
meati wane uku.
Nipa no Ali Yatenane Oyagono agale kime litia tikile enekete i ali atoa kime poanele-kama
tiki wa kiwi paya tetepo takoa wakilika kolotine meati wane uku.
23
Eni yename nitikolika a tibuke pine epetaneya-kama enatikiyano, nitoa kamotono ke
wa kolotine mea tigawineya yamene. E yename kipala enika enile teketepa nipa kini kaua-
mikitame papete Akolaline agale to awea akane ali-kiti-pala toma nekenele tekete toi.
24
Ae, kamo tiki-kiti Akolaliyo kiwi kibu moono, nepiamene. Itonoke kini moatekoiya wete
mootapeneya tokome a tibuke wedianeya mea kawamoi.
25
Ae, opi nee noa tagatapeneya meki-kiti wipitiketepa kobume tuaneya meoi.
Ae, opi paya nou toa ulu yau toa yaki-kiti wipitiketepa tumai mea komo ka ta pitikoa kawei.
26
Ae, ali atoa peyame kiwi kei pikili yakakoa kakete eya wa wene tamene. Papete Akolaline
agale akama nuku wa oake agale oa yotokane ali-kitipa kini kaua-mikitame ke wa
kei pikala taneya.
Poi Te iane Yename Tokoile
(Matiu 5:38-48, 7:12)
27
Anu agale yakoa tiki-kiti kini mekete toatikimo ukuno yakoe. Kipala poi te iane
yeneke wene mekoa meamene. Kipala kotimi wene luaneya meki-kiti auapekala tamene.
28
Kiwi tea agale iki yene-pala agale epetekoa topo takoa oa ni kiwi tete mekala tiki-kitane
kowitikakala tamene.
29
Panagome-kiti neke nimini yono-lono wane witikalepa ewa yono
lono waneka wia wa yameamene. Ni panagome-kiti neke tokoo mamina petene odomoa
pokalepa tigini maminaka moa wa meamene.
30
Panagome-kiti nekeya pade mano wa
oikiledo tokalepa nipa one eni oikoya meamene. Ni panagome-kiti nekeya pade mano wa
wameneya pa moa pokaleka oto wa moameamene.
31
Eko pade ali atoame neke wene
momotoapa nipa kini weneka moamene.
32
Kiwike wene mekoa meki yene takoa kini kolotine yene wa ete oto wa wene
mekanali yotikilipa Akolaliyo kiwi edoa kei pimotoa-pe. Akolaline agale tagoa toamiki
yeneka ete oto wa wene mekanali yokala tiki.
33
Ni kipala epetanele tiki yene takoa ete wa
epetanele topo takakilipa Akolaliyo kiwi edoa kei pimotoa-pe. Akolaline agale tagoa toamiki
yenameka edikakala tiki.
34
I agome onekeya nani oto memotoane tuku wa nekeya pade
nami kakoa metekolopa Akolaliyo ne edoa kei pimotoa-pe. Akolaline agale tagoa toamiki
yenameka edikoa padeya padeya ete oto wa mea nami kakanali yokala tiki.
35
Kime pade
nitameamene. Kipala poi te iane yeneke wene mekoa auapekala tamene. Kinikiya pade tatia
meteketepa nani oto memotoane tuku wa nami kakakileka toameamene. Pa metekete
meamene. Nitikolipa ako odene meko Akolaliyopa kipa one mana kono-mikiti mekete ni
tikino, ke wa kiwi pewe-kama wioo. Nipa panagoneya moapa ke wa wameneya pa motiki
yeneka poanele tiki yeneka ela moa auapeko ago tokome nitoo.
36
Kiniketai Akolaliyo ali
atoa edikoa ela moa auapeko toa yete pade ali atoa ela moa auapekala tamene.
(Matiu 7:1-5)
37
Yete pade ali atoa kini tanele poanele tadeko wa kikoa akameamene. Nitikalepa
Akolaliyo neeka edikoa kikoa akamoo. Yete pade ali atoa akoa agale wamokalepa Akolaliyo
neka akoa agale wamoo. Yete pade ali atoame nepala poanele tokoike mekakana po letu
neme keetapekalepa nipa Akolaliyo neke poanele tokake po letu mekakana keetapekala too.
38
Nekeya nami kakameneya pa metekalepa nipa Akolaliyo topo takoa yano kakoa meoo.
Nipa neke meteka toa yete pade ali-kitame ako-kama tetekoa keda takoa ete mekala toi.
Neme meteka toa Akolaliyo ete wa topo takoa mekala too. Nitoono, nekeya keda takoa-
kama mekala tamene wa Yesuyo akeneya.
39
Nimo ootokoa agale pade pedoa okome okome leneta lianeya meane ago padame
leneta lianeya meane ago pade moa aua yamele toko-pe. E 'e mena. Tugama yakeneya
tokome einagota odeneka kobuke pitaketeta pitoi.
40
Sukili matiyame-kiti one tikisago moa
patukamele toamoko. Nitamele toamokoyake tikisagome padele padeleta olaukatapekalepa
oyagome adekake kakoa tamele too.
41-42
Anu oyago neke leneke yomo pudunukau pomotoake neme wene toamokoyake
neke oyagono lenekedo kugu deya pekeneya eneke eya wa-kiti oko. Neke leneke kugu deya
pekeneyano to ane motokada wa-kiti oko. Dekolo oko-pe. Wene takuta pianeya meko ago
neke leneke pudunukau pekene yomo pinali neke wa namolo takoa to a moamene.
Mootokoapa neke leneme wedoa enamele tokolo meke neke oyagono lene pekene kugu
deya oyake to a motokamele toko.
Yomo Ku Tukoke Pedoa Akenemo
(Matiu 7:16-20, 12:33-35)
43
Yomo epetaneyapa nipa one ku poaneya tuamoo. Wa yomo poaneyapa nipa one ku
epetaneya tuamoo.
44
Yomo-kiti ku tukole eneketepa ipa epetadeko ipa poadeka wa takoa
enamele toko. No yokepa yomo piki ku kotia moamele toamoa ni tonipo pookepa gerepi po
ku kotia moamele toamoa toko.
45
Epetane agomepa one tepene epetane wene piane toa
ya wapa epetanemo witakoa oko. Poane agomepa one tepene poane wene piane toa ya wapa
poanemo witakoa oko. Enipa tepene piko toa kabunumepa witakoa okala toko.
Yapu Epetaneyaka Poaneyaka Wikete Tanemo
(Matiu 7:24-27)
46
Nopa Ali Muno Ali Muno wa okala tikino. Kipala tamene wane ukule litia
toameketeke ikino, Ali Muno wapa dekolo iki-pe.
47
Nooke tegetekoa mea anu agale yakoa
toko agomepa nipa eya tane agome tane toa toko.
48
Panagome-kiti yapu epetekoa wikilepa
itono wetiketikoa kue yaupea mati piadekata kue petene wane-kiti moa kibutukoa pia eni
waneke yapu wianeya. Nitaneyake ta loboa pitikoa ue leau akoa yoa yapuke
pewikapokomeke muku muku takoa kilikoa aua pamele toameneya. Kue yaupea matike
wianeya tokome pa kakeneya.
49
Anu agale yatekomeke litia toamoko agomepa nipa eya
tane agome tane toa toko. Panagome-kiti yapu wikilepa ue kibi wetiketikoa kue yaupea
enamoa pa kibike tokoo yapu wianeya. Nitaneyake ta loboa pitikoa ue leau akoa yoa
pewikapokome yapu odepeta kilikoa aua pekeneya. Bu wa wia tadekoa kikilikoa aua
pootapeneya wa Yesuyo akeneya.
Luke Luke
<<
66
>>
Luke Luke
<<
77
>>
7
(Matiu 8:5-13)
1
Ali atoame yakakoa Yesuyo enika enimo oa peya takamotokome Kapaneame take
pome mepaneya.
2
Eidapa tobou poyo ago pade meaneya. Einagono pupu ago pade one
kolotini ali tuademe yene taneya pianeya.
3
Yesu nome meko wa okoimo yakatekoapa poyo
agome eya taneya. Yu yatene tobou ali pade-mene moa wetekakome okome anu pupu ago
latekakoano noo wa kowitikapoe wa Yesuke moa wetekaneya.
4-5
Nitikale nekete ekete
tobou poyo agome toto yateneke wene mekoa mekome tone losu yapu pade wikakakano,
one auapekilepa tamele tokono, one pupu ago latekakoano noo wa kowitikakoli okome
6
nitouno patoe wa opia pekeneya. Nitoa tigotokakoa pome kakale tobou agome one oya
ali-mene moa wetekakome okome eya akapoatino poe. Ali Muno no pa ago mekuno, anu
yapu ne noo wane edoane omoto-pe. Tokamota.
7
Ne kakota widaka noamouno wene
pikene ukuno, nepa pa wida kake wete latoa kamene wado okalepa anu pupu ago latoa
kawoono, nitoano ta.
8
Nopa tobou ago padeke lokoane mekene ta wa okole-kama tuku. Ni
nooke lukoa meki poyo ali-kitamepa toe wane ukule-kama yakoa tiki. Panago ne pa wane-
kiti ukulupa yakoa poko. Wa panago no mekuta oto noo wane-kiti ukulupa yakoa noko.
Anu pupu ago-pala ile ta wane-kiti ukulupa yakoa ukule toko. Edikoapa anu pupu ago latoa
ka wa okalepa latoa kawoo wa Yesu akapoe wa poyo agome one oyali-mene moa
wetekaneya.
9
Nitikale note akanokoli yatekome Yesu wene kainya pianeya kakome one-pala
obomoa nokoina yene-pala ete peketapekome okome imopa i akedekono yakoe. Mone
agomeke ipa akedeko. Iserele ago odeneka nooke edikoa wene tugoa meadekole enamuku
wa Yesuyo akeneya.
10
Nimo okale yakamotekete eina oa wetekakale nekene ali-kiti tobou
agono yapu wakapea pote enekoli pupu ago latoa kakedeka.
Yesuyo Neeni Take Tuane Ago Kamotokanemo
11
Naniko keneya Yesu Neeni take poademe pokale one oya-lawemeka ete yene peya
matiyameka one-pala opia pekeneya.
12
Eni ta pawe kago keteponoke tigotokoa witanokaka
pade-kitame tuane ago oloyo topadete akolono leyo leyo toa aua pekeneya. Aua pokoli
take yene peya matiyame tuane agono nine-pala opia pekeneya. Eina tuane agopa nepo
meane atoane loma mati.
13
Leyo leyo toa aua pokoli enekome Yesuyo einatoa ela
motokome okome komo wamea wa ootokoa
14
tuane ago auane eina leyo pome mitikakale
leyo aua pekene ali-kiti witimoa kakoli okome tuali wete kamokoa wane uku wa okale
15
kamokoa mekome agale oa meaneya. Nitikale Yesuyo nine-pala okome neke mana ina wa
metaneya.
16
Nitikale enekete e yene peya tepene piti lobutukale kakete Akolali kei pikete
ekete toto pake Akolaline agale akakago tubele mati toko ago i nokono, Akolali one yatene
toto mekota ugu nokono, ke wa oa kakeneya.
17
Nitaneyake Yesuyo eni tanemopa Yudea
takeka eni ta unukoa piane ta-kitikeka oa pupitikatapeneya.
Yesu Pitia Yakamotoa Yoneyo Alita Takuta
Moa Wetekanemo
(Matiu 11:2-19)
18
Yonene agale yakoa motane yename Yesuyo eni tanemo-kama i i wa Yone akanokoli
19
one oyali takuta noe wa Yoneyo kayo oa mootokoa Ali Muno Yesuke wetekakome
okome nepa i wa ibini oa piane ago taatekoa noko-pe. Panago taatekoa noo tokolo totome
nepia kamotoa oko-pe. Oano ta wa akapoatino poe wa wetekakale
20
nekete ekete ali atoa
ue motokama yako Yoneyo eya akapoatino poe wa wetekakale nokoo. Nepa eina
noatekago taatekoa noko-pe. Einagale taatekoa panago noo tokolo totome nepia kamotoa
oko-pe wa akapoatino poe wa Yoneyo wetekakale nokoo wa akananeya.
21
Nitikoli einata
einapete Yesuyo eya kuya yene tane ali atoa kini tanele-kiti latekoa ni kiwike awitane ipono-
kitika takoa poe wa wetekoa ni leneta lianeya meane-kitika leneta kikakoa enika enile toa
kakeneya.
22
Nitoapa einagota-pala okome Yone mekata wakapea pekete kini enoa yakoa
tokoinakale i i wa akamene. Leneta lianeya mekoina-kiti lene kikatapeneya yawa ni kawa
okeaneya yakoina-kiti pogoa kautoa pote ni kedime nakeneya mekoina yene kini kedi yene
takoa pokolo latoa kawa ni kale keneta keteaneya mekoina-kiti kale pekaneya yawa ni tuane
yene kamotokaneya kawa ni ponopene ali atoame Akolalinemo yakakoa mea tiki wa Yone
akapamene.
23
No i agoke wene tugoa mea wawamoko ago kolotine meoo waka akapamene
wa Yesuyo einagota Yone mekata kutu wa wetekaneya.
24
Yoneyo moa wetekane agota wakapea pokoli Yesuyo eida oboa kakoi yene-pala
Yoneke okome okome kime ali piamene take Yone enepeketepa edanele enadete pokoiya-
pe. Tauwe wata pupulegeme muku muku toa kakale enepokoiya-pe. E 'e mena.
25
Nipa
edane ago enadete pokoiya-pe. Panago mamina epetaneya kakeneya kakale enepokoiya-pe.
E 'e mena. Mamina epetaneya-kama kawa kamoya moologoa tiki-kiti ako tobou ali-kitane
yapu-kala meki.
26
Nipa edaneya enadete pokoiya-pe. Akolaline agale akama yakago enadete
pokoiya-pe. E eno, Yonepa nitane ago. Akolaline agale papete to awea akane ali peya keku
kamotoa Yone einago ako ago kako.
27
Yone einagokepa Akolaliyo mana-pala papete
akenemo wene takakale panagome Akolaline bokuke eya wa wia mekapianeya.
Ne naniko pomotoane anu agale oa aua yawateko agopa namolo takoane moane wetekou.
Nitikolu einago pokome ne poateka ka nodokakapima poo wa panagome wia
mekapianeya.
28
Kipala i ukumo yakoe. Papete atoame opiane ali peya keku kamotoa Yone einagopa ako
kako. Onepa nitane agoke eya wane uku. Anu uku agale yakoa mootokoa Akolalike lukoa
meki-kitipa keku ali atoameke Yone moa patukako wa Yesuyo akeneya.
29
Yesuyo okamo
eni yatekete ali atoa peyameka takesi kue motokama yakene ali-kitameka e e nimini okono,
Akolaliyo kiyoke-kama tokono, ke wa Akolali kei pia kakeneya. Yoneyo kiwi ue
motokaneyake ni akeneya.
30
Parisi ali-kitameka Mosesene totono pine to a olaukane ali-
kitameka nitameneya. Nipa Akolaliyo kini toatekoile wene toopiane toa toamadete
wakeneya. Yoneyo kiwi ue motokameneya tokome nitaneya.
31
Nitaneyake Yesuyo eya wa akeneya. No kaku-pete meki-kitipa kini tikileke ikilepa
edeya adeka piane uku patu. Eya adeka piane ukuno, yakoe.
32
Mati-kiti makesike ulu
toonali yotokete padeka-kitame eka e mati-kiti-pala kayo ekete ekete
tiabu toa kawati wa totome tulutu eya pukapekokolo yateketeke toamokoi. Nitamokoile
enekete toto tumai meou toa komo lo oa kakoloka enika enileka kote tokale
tumai meamadete wakoi wa ulu tootapekete akeneya wa Yesuyo pedoa agale
akeneya.
33
Nitoapa pine to awea okome okome Yone einago nokome padeya neeka gerepi po ku
ueka noameneyake ipono oneke awitaneya tokome ni toko wa kime tea agale oa kakoi.
34
No Ali Yatenane Oyago eya kuya neeka gerepi po ku ueka nakule enekete ekete no i
agopa nee kitipu kakoa noa gerepi po ku ue noa pia toko. Takesi kue motokama yaki ali-
kiti-palaka Akolaline agale tagoa toamiki yene-palaka no i agome oya patu piko wa kime
akoa agale iki.
35
Nimo wapa ikiyake tone agale yakoa motiki peyame ekete mone inapa
Akolaline peku noa tadiki wa Yesuyo akeneya.
Poanele Toa Meane Atoame Yesuno Kawatake
Padeya Ka lono Taneya Pekoa Yotokanemo
36
Parisi ago padame Yesu one yapu nee noano noo wa okale nipa pata wa einagono
yapu pome mekome nee nakeneya.
37
Eni takepa poanele toa meane atoa pade meaneya.
Yesu Parisi agono yapu ponome mekome nee nako wa akenemo yatekome padeya ka lono
taneya aua Yesu mekata nekeneya. Nipa alabase wa akene kueme latiane mete keneke
mekoa aua nekeneya.
38
Nitoapa Yesuno mukiti lono nome kakome komo oa kakeneya.
Yesuno kawatake komo loboa pitikakome tege takaneyake one ludukiya witane pineme
kawake pitane komo ko a one kawata nunu oa eina ka lono taneya pekoa yotokoa taneya.
39
Nitikale enekome one yapu meatono noo wa Yesu-pala akene Parisi ago tepene
wene kibutukome okome i agodo Akolaline agale akako ago meadekalepa nipa i one kawata
mitikamotoko atoapa poanele toa meane atoa wa wene too wa wene kibutukoa meaneya.
40
Nitikale Yesuyo einago-pala okome okome Saimone nepala agale ouno, yakamene wa
okale okome Tikisago nipa yakouno, amene-kale okome
41
ali takutame odenagonoke kue
nami kakoa oia motaneya. Nipa panagome kina egeme kadukoa (50) nami kakoa oia
motaneya. Ni padena agome kina noime kadukoa (500) nami kakoa oia motaneya.
42
Wa
naniko einagota kini eni nami wiatekoi oi nokale kue toamokale enekome pinagome onena
kue oto wa moamou wa kinike eina kue oto moameneya. Nile tokalekepa panago kue
pinalike wene mekoa keneya memotoa padena ago oneke wedoa wene mekoa meaneyano,
kue pinalike wedoa wene mekoa mekago mani ago-pe wa pitia yatekale
43
Saimoneyo
okome kue tubeya nami kakoa oia motokagopa pinalime oto wa tubeya moameneyano,
einago tadia pinalike wedoa wene mekoa meaneya wa okale okome wini okopa nimini oko
wa Yesuyo akeneya.
44
Yesuyo nimo ootokoa einatoa lono peketapekome Saimone-pala okome i atoa i
mekono ena. Nopa neke yapu tuapeane ugu nokouna-pete anu kawake kakene kege
ko atekouna uepa pelesi kagonoke neme pekoa pikamokana. Nitamokanake i atoamepa anu
kawake kakene kege one komo ueme tege takoa one pineme kogoa tokana.
45
Nemepa no
nunu wamokanake i atoamepa neke yapu nokounata titimoa anu kawata pa nunu okoa
meko.
46
Nemepa anu wagoke welo eya pekoa yotokamokanake i atoamepa anu kawatake
padeya ka lono taneya pekoa yotokatapeka.
47
Nitikakano, nepala ukumo yakamene. I atoa
one i wene wedoa mekoa mekome tokolepa one poanele padele padele toma nokake
mekane po letu wete kekamu taneya tokome ni toko. Wa panago one poanele natele tuku
wa wene piko agopa one poanele tokake mekane po letu keaneya mekomepa nipa one eni
po letu kekane agoke wene wedoa mekamoko wa Yesuyo akeneya.
48
Nimo ootokoa Yesuyo einatoa-pala okome neke poanele toma nokake mekane po
letu kekamu taneya wa okale
49
one-pala opia mekoi-kitame oote tekete ekete i agomepa i
atoame poanele toma nokake mekane po letu kekamu tuku wa okome okopa edane ago
mekome oko patu-koli
50
Yesuyo einatoa-pala okome nooke wini wene tugoa meke
tokolekepa ne toa motaneya mekono, tepe kolotini mataketikaneya poano pa wa
wetekaneya.
Luke Luke
<<
77
>>
Luke Luke
<<
88
>>
8
Pade Atoa-kitame Yesu Auapema Nekenemo
1
Naniko keneya Yesu ali atoa pitikoika tubeya takeka nateya takeka kutu pima
yakomepa Akolaliyo ali atoa talo tokome tokomo kini wene epetekanemo i i wa mo wima
yakeneya. Nitima pokaka one oya-lawe tuku kakoa (12) ali-kitame koua pekeneya.
2
Pade
atoa-meneka koua yakeneya. Einatoa-kitipa namolo ipono awitaneya mea eya kuya yene
taneya mea taneyake Yesuyo kini tane yene latekoa ipono-pala takoa poe wa latekaneya.
Pade atoapa Maria one pade ibini Magadala. Einatoake ipono tatono kakoa (7) awitaneyake
Yesuyo takoa poe wa wetekaneya.
3
Pade atoapa Yoana. Einatoapa eyago Kuusa natono.
Einagopa ako tobou meane ago Erode onekeya-kiti yopikoa kakene ago. Pade atoapa
Susana. Einatoameka pade atoa-kitameka Yesu one oya-laweka auapeatono pato wa opia
yakete kinikiya tatia auapema yakeneya.
Nee Lene Pitikama Pekene Agoke
Pedoa Akenemo
(Matiu 13:1-9, Make 4:1-9)
4
Ali atoa peya mati Yesu kakata obonaneya. Nipa ta pitikoi peya kawa obomoa note
kakala taneya.
5
Nitaneyake Yesuyo agale pade pedoa okome okome ipe pinagome ipe ludu
nee lene pitikama pekeneya. Nitima pokaka nee lene padekapa ka ludu paka tadoa pitaneya.
Nitaneta ali atoame kawame kautoa kugutukaneya pikata ini pitoa note napekala taneya.
6
Ni
nee lene padekapa kue yaupea patu paka tadoa pitaneya. Nitaneta tumiake itono kau
tootapeaneta tokome wete eni tototokoa tuaneya.
7
Ni nee lene padekapa tonipo pake tadoa
pitaneya. Nitaneta tonipo nee lene-pala odeneka dekoa witakome tukatapeneya.
8
Ni nee lene
padekapa itono epetaneyake pitakome leau akatapea witakome ku tukilepa ege kadukaka
tatigime kadukoa (100) tukala taneya wa Yesuyo akeneya. Nimo ootokoa telo mati okome
okome kipala ukumo yakou wa kale piiyakoa kaki-kiti kime yakoati wane uku wa akeneya.
Akolaliyo Ali Atoa Pawe Toa
Talo Toatekale Papete Kaukoa Meaneya
(Matiu 13:10-17, Make 4:10-12)
9
Nitaneyake Yesuno oya-laweme neke ina pedoa okana agale pine edoa piko-pe wa
pitia yatekoli okome
10
Akolaliyo one ali atoa talo tokome tokolepa papete kaukoa mema
nokoyake opi kiwi keleyo oyameteku. Nitikuyake ete ali atoa-palapa pedoane agale-kama
oane meteku. Enipa kini leneme enekile enoa moamoa kaleme yatekimo yakoa moamoa
tomotoane tekene ni tuku wa Yesuyo akeneya.
Nee Lene Pitikama Yakene Agoke Pedoa
Akene Agale Pine To awea Akenemo
(Matiu 13:18-23, Make 4:13-20)
11
Ina pedoane okouna agale pine dikoa pikono, yakoe. Ipe nee lenepa Akolaline agale
toko-la.
12
Nee lene ka ludu tadoa pitane adeka pikounapa eya tiki yeneke okouna. Akolaline
agale yakatekoa pa mekilika Setanu nokome einagale kini tepene meaneya katekamoa poko.
Nipa einagale yakoa motikili Akolaliyo toa motokaya tokolo ni katekamoa poko.
13
Padeka
nee lene kue yaupea patu tadoa pitane adeka pikounapa eya tiki yeneke okouna. Pade ali
atoame eina agale yakoapa ke wa lukoa wedia meki. Nitiketeke einagale kini tepene teke
wetekameneya tokome Akolalinele pa tekei takoa meki. Wa naniko kiwi etepea pomotoa ele
kuleme likolopa Akolalinele takoake tewitikoa waki.
14
Padeka nee lene tonipo pake tadoa
pitane adeka pikounapa eya tiki yeneke okouna. Pade-kitame einagale yakoa motikiyake
kinikiya mama moa ni kini kamoya-kitike wene piitikoa mea enika enile tikileme Akolaline
agale moa kautako. Nitane yene tokome ku tuamou toa etepea yaki.
15
Padeka nee lene itono
epetaneyake pitane adeka pikounapa eya tiki yeneke okouna. Pade-kitame einagale
yatekilepa wene epetaneya mea yakoa motiki. Nipa ipe kakoya nee ku wedoa tuou toa
Akolalinele takoa togaki wa Yesuyo akeneya.
Labo Toeleke Pedoa Akene Agale
(Make 4:21-25)
16
Panagome-kiti labo toele udukoa yapu aua nokomepa eya toamoko. Okolo moa
kaulogamoa ni walai kenekeka piamoa toko. Nitameneya ali atoa yapu tuapea nikita pa
keleyo witamotoa tokome labo piatikiya waneke-kama udukoa piko.
17
Padele padele
kaukoa toma yakolepa naniko keleyo witatekole toko. Padeya padeya paigakoa pikoya-kiti
naniko keleyo pikale peyame enetapeoi.
18
Nipa Akolaline agale paya nou toa yatekayano,
wedoa yakoa moamene. Akolali one i peku wedoa nako agopa nipa Akolaliyo one pekupa
wedoa lawetema poo. One peku alekoa nakagopa nipa one alekoa nakene pekupa wene
toane noane tuku wa wene pikoyake Akolaliyo agopa takoa atukoo wa Yesuyo akeneya.
Yesuno Nine Wamene-mikitike Akenemo
(Matiu 12:46-50, Make 3:31-35)
19
Einapetepa Yesuno nine wamene-mikitika nokoli ali atoame edea takatapeneya
tokome one kakata lekoa poatekoi kene piameadeka.
20
Nitoa pa kakoli enekome panagome
neka ua nekameyo-mikiti ne enadete akolono note kakina wa okale okome
21
Akolaline agale
yakoa tiki ali atoapa aga uaka anu wamene-mikitika eni wa Yesuyo akeneya.
Pupulege Tadalita U u Okoa Kakeneya
Kawikanemo
(Matiu 8:23-27, Make 4:35-41)
22
Padepetepa Yesu one oyali-kiti-pala ue dipike peapetekoa pome mepokome okome
ue mine eka matanuke mea patoe wa okale mea pekeneya.
23
Mea pokoika Yesu mea atu
pitaneya. Atu eni pitikakoa ue mine pupulege tadalita u u oa ketipea awitikanokome ue-pala
pewikanokome ue dipi patua pitoa atukademe taneya.
24
Nitademe tokale one oyali-kiti one
pitikaya liti tegeteka tegeteka toa mekete kamotokakete ekete Ali Muno Ali Muno toto ueme
atukamedekono, kamoa wa okoli kamokakome pupulege-pala pewikakoa kakene ueta kikoa
okome okome kapakoa wa wa okaka teigalogakome tooko lapa eyaka wametekoa kilikoa
meelogaka.
25
Nitoa te itatapekale one oya-lawe kikoa okome okome nooke wedoa wene
tugamekete tadiki wa okale oote tekete ekete pupulege ue minetameka i agome ta wa okole
eni yakoa tokono, Yesupa edoa ali kakome tokoto patu wa piti tokale ka oa kakeneya.
Yesuyo Ipono Awitane Ago Latekanemo
(Matiu 8:28-34, Make 5:1-20)
26
Galili ue mine eka matanuke ue dipike eni mea pote Gegesa yenane take witapaneya.
27
Galili ta-pala eni tata eni ue mineme oto piitakutukaneya. Yesu eni ta matanuke
katepitakaka ipono awitane ago pade ali atoa pitikoika kawa kotua nekeneya.
28
Einagopa
koto mamina kawamoa yapu kilikoa piamoa taneya. Nipa ali atoa oloyo toai taneka pa
yakeneya. Ni ago Yesu kotukome one kawane pitakome ka telo okome okome ako odene
meko Akolaline mana Yesu nepa nopala edele toade noka-pe. No tete meamoano, wa-ye
wa kowitaneya.
29
Nipa Yesuyo poane ipono ne winago takoa pa wa okale tokome
kowitaneya. Eni ipono einagoke lugutukoa awinokale ete ali-kitame dekoa moa kapa po
kakoa kapa tepo mekoa tokala taneya. Nitikolika kugutukoa tadekatapekale iponame einago
ali piamene ta ludu leau akoa aua yakala taneya.
30
Nitane ago Yesuyo yatekome okome
neke ibini te-pe wa okale okome anu ibinipa pitikali wa akeneya. Nipa oneke ipono peya
mati awikolokaneya tokome ni akeneya.
31
Nitaneyake ipono-kitame Yesu kowitikete ekete
ge yo nine piane koa keneke wetekamea wa kowitaneya.
32
Nipete einakeya liti tono kebonoke kai peya mati kimi ke noa kakeneya. Nitaneyake
ipono-kitame kowitikete ekete toto opi kunuka kunu kaike awiponoono, wetekoa ta-koli
okome
33
nipa poe wa okale takoa pootapekete e kai-kitike awipaneya. Nitikoli einaka eina
kai tono payaneke kawa palake ketipea kikilikoa pote atutapeneya.
34
Nitikoile enekete einaka eina kai egetane yene pitoa pootapekete ali atoa ta latia
pitikoikaka tayo yapu luduka eni tanemo oa pupitikama pekeneya.
35
Nitikoli yatekete edele
taneyake ikiti patu wa enadete nekeneya. Nitoa Yesu kakata note enekoli ipono takoa
pootapeane ago mamina kakeneya Yesuno kawane wene kiyo akaneya mekale enekete ekee
wa piti mati tokale kakeneya.
36
Nitikoli eida kakete enile tokale enane yename ete dika dika
wa Yesuyo ipono awitaneya yakanakago latekanemo to awea akeneya.
37
Nitikoli yatekete eni
Gegesa take mekoi peyame kini ta tewitikoa pa wa Yesu kowitoa kakeneya. Nipa tepene piti
lobutukale kakete ni akeneya. Nitikoli ue dipike peapetekoa poademe kakaka
38
ipono takoa
pootapeneya mekagome Yesu ne-pala odenekata yatono pato wa kowitikale okome
nitamatono,
39
neke yapu poano pa. Akolaliyo ne-pala tokamo tubele eni tokana ali atoa
eneke to awea oano pa wa wetekakale ali atoa ta latia pitikoika pokome Yesuyo tubele toa
one latekoa tanemo i i wa oa pupitikama pekeneya.
Tobou Agono Kono Tuaneyake Kamotokanemo
(Matiu 9:18-26, Make 5:21-43)
40
Yesu Galili ue mine oka lono wakapea nokale ali atoame ke wa wedia makutukoa
motaneya. Nipa peyame one nomotoa nepia kakete ni taneya.
41
Nitoa kakoika Dairasi wa
ibini akene ago losu yapu yopikago nokome Yesuno kawane witipitakome one yapu wete
noo wa kowitoa kakeneya.
42
One konakoma one odene opiane kono tuademe yene taneya
pikale ni akeneya. One kono opitikaneyake mali tuku kakoa (12) tadiya ponokale tuatoa
meaneya.
Einagome ne noo wa kowitikale nitouno patoe wa Yesu poademe pokale ali atoame
Yesu apua takoa unukamoa pekeneya.
43
E ali atoa pakeke eya atoaka mali tuku kakoa (12)
ponoka toa kamate yokoa kakene atoaka Yesu litima nekeneya. Papete einatoa dokosa ali
mekoika latekamotoa pokala taneyake padameka one latekakile toameneya.
44
Nitaneyake
einatoa Yesuno mukiti lono lekama nokome one tokoo kakene mamina nami
mitikatekaneya. Nitikale eina eina one kamate pegetoa yotokana toa yoameneya
teitatapeneya.
45
Nitikale Yesuyo noanu teyo mitikakato-pe wa okale peyame no mena wa
okoli Pitayo okome Ali Muno ali atoa apua takoa ne unukamoa mitikakoa tikino, dekolo
oko-pe-kale okome
46
padame no mitikakile toka. Anu tele padeke weamutukome tadekolo
ni uku wa Yesuyo akeneya.
47
Nitikale inakeya teitakale akedekono, i ago mitikakoule one-
pala kaukoane meamele toamoko wa einatoa kolu kolu nokale Yesuke nokome kawane
witipitaneya. Nitikome e yene kakakoa eya takamotoane yoname mitikatekakou wa one
mitikatekakale eina eina latekakanakamo to awea okale okome
48
anu kono nooke wini wene
tugoa meke tokoleme ne latekakolo uku. Neke tepe kolotini kilikoa pimotono pa wa
wetekaneya.
49
Yesuyo nimo oa kakaka tobou agono yapu pitikakago pade nokome okome neke
konakoma tukome tukano, mone i tikisa ago polipo takakoa kawamea wa okale yatekome
50
Yesuyo tobou ago-pala okome okome no i agome neke kono oyake latekamele toko wa
piti toameneya mekalepa latoa kawoo wa oomotokome
51
yapu pome kakome okome Pita
Yoneta Yame toa akomane etene ninetaka no-pala opia namene. Ete yene akolono meati wa
tuapea pekeneya.
52
Nitaneta tumaike nekene ali atoa peya tuatoake komo ka ta pitikoa
kakeneya. Nitikoli enekome Yesuyo okome i akoma tukome tuaneya menano, pa atu pia
mekono, komo wameo wa okale
53
peyame i akoma etene tukome tukano wene tekete
tokome Yesu yau takaneya.
54
Nitimotoake eina akoma tukome tuaneya pianeta pokome one
yono mootokoa kayo okome okome anu akoma wete kamoa wa okaka
55
one yomini
wakapea nokale wete kamokoa kakeneya. Nitoa kakale okome one nee wete takoa lawetoe
wa Yesuyo akeneya.
56
Nitaneyake etene nineta wene kainya pianeya kakoli okome anume i
tukumo to awea wamea. Pa kini lukoa meati wa oa tukaneya.
Luke Luke
<<
88
>>
Luke Luke
<<
99
>>
9
Yesuyo One Oya-lawe Tuku Kakoa (12)
Akolalinele Takama Pomotoa Wetekanemo
(Matiu 10:5-15, Make 6:7-13)
1
Yesuyo one oya-lawe tuku kakoa (12) one kakuta oboa noe wa kayo oa motokome
okome noanu tele patu kautakoa kakete eya toma poatino poe. Ali atoake awitane ipono
takoa poe wa wetekatapea kini tane yene latekoa toma poatino poe wa moa wetekaneya.
2
Nipa Akolaliyo ali atoa pawe toa talo tokome tokomo i i wa oa aua yawa kini tane yene
latekoa tomotoa wetekakome okome
3
kiwi eni peketepa pa pima yamene. Nipa iti toua
moamoa ka ua poamoa palawe waneka kueka ua poamoa tamene. Kini tigini mamina odene
kakeneya pekete pade-pala aua poamoa tamene.
4
Nitoa pima yawa ta padeka pote
meketepa yapu yapu yawameneya eida odene yapu-kama mea kawa pokala tamene.
5
Nitima
yakoli pade yapu pitikoi-kitame kini yapu noe wa makutukoa moamokolipa nipa kini yapu
tewitikoapa Akolaliyo kiwi kote motokolo tuku wa kini kawake kakene kege ko ketikoa
tewitikoa pokala tamene wa Yesuyo wetekaneya.
6
Nitaneyake ali atoa ta latia pitikoika pima
yakete Akolalinemo i i wa mo wia kawa kini tane yene latekoa toawineya pekeneya.
Erodeyo Yesunomo Yakanemo
(Matiu 14:1-12, Make 6:14-29)
7
Tobou ago Erodeyo enika enile tanemo-kama yakatekoapa wene kainya pianeya
meaneya. Yesukepa pade-kitame ekete ali atoa ue motokama yakana Yone tukome
tuaneyake wa kamoa noko wa oa,
8
wa pade-kitame ekete Ilaida taatekoa noko wa oa wa
pade-kitame ekete Akolaline agale papete akane ago tukome tuaneyake kamoa noko wa
agale oa takoa pilia kakeneya. Nimo okoimo yakatekoa Erode wene kainya pianeya
meaneya.
9
Nitikome okome Yone kabe teigamotoane tokounano, i tanemo-kama yateku
agopa te patu wa Yesuno lene timini enademe akeneya.
Nee Lawetanemo
(Matiu 14:13-21, Make 6:30-44, Yone 6:1-14)
10
Yesuno Aposelo ali tuku kakoa (12) Yesu mekata wakapea nekete kini toma
yakoinakamo i i wa ootapekoli okome nipa padeka poti witimotekete patono noe wa
Besaida wa ibini akene take aua pekeneya.
11
Nitaneyake Besaida take pekete tiki wa
akenemo yakamotekete ali atoa one eni mekata litia nokoli oneme makutukoa motaneya.
Nitoapa Akolaliyo ali atoa talo tokome tokomo i i wa to awea oa kini tane yene latekoa
taneya.
12
Lou eni pene pipademe tokaka one oya-lawe tuku kakoa (12) one kakata eida nekete
ekete ipa ali atoa piamene taano, ali atoa ta latia pitikika tayo yapu luduka pote nee topo toa
pipoatino poe wa wetekamene-koli okome
13
nitamouno, kini noatiki neepa kime motokoa
lawetamene-kale ekete tone neepa palawe wane ko kakoa-pala mou yomo takuta toa eni-
mene odene pikono, i ali atoa adekoa noatiki toa totome nee edoa topo toa
motokapomotoa-pe wa akeneya.
14
Nipa e yene kakene toa oi motokoli ali ege egeta
kadukoa (5,000) tadiya kakedekoli ni akeneya. Nitaneyake i yene ege kadukako toa-kama
(50) payapono pia mekala tomotono toe wa Yesuyo okale
15
e yene peya edikoa kilikoa
mekatapeneya.
16
Nitikoli palawe wane ko kakoa-pala mou yomo takuta toa moa pikoa
kakome ate tibuke nepikakome Akolali-pala ke wa ootokoa popimotokome i ali atoa
tatikoatino poe wa one oya-lawe mekala taneya.
17
Metekale moa tatika tatika topokoli
peyame moa noa tagatapea kitipu meaneya. Nitaneyake kugu paka pitaneya wekotoa moa
ua ka katika tuku kakoa (12) mako puputua moa pianeya.
Pitayo Yesu Nepa Keraisu Wa
To awea Akenemo
(Matiu 16:13-19, Make 8:27-29)
18
Wa padepete Yesu witimotokome pome mekome kowitikata one oya-lawe one-pala
eida opia mekoli pitia yatekome okome ali atoame no te kaku wa ikiti-pe wa okale ekete
19
pade-kitame ne einagopa ali atoa ue motokama yakanakago Yone wa oa ni pade-kitame ne
einagopa Ilaida wa oa ni pade-kitame ne einagopa Akolaline agale papete to awea akane ago
tuutukaneyake wa kamoa nokome toko wa iki wa okoli okome
20
nimo wapa akedikiyake
kime no te kaku wa iki-pe-kale Pitayo okome nepa Keraisu Akolaliyo one wa papete takoa
kakapiane ago wa akeneya.
Yesuyo One Tete Moa Tua Toatekamo
Toa wea Oopianemo
(Matiu 16:20-28, Make 8:30-9:1)
21
Nitaneyake Yesuyo okome okome Pitayo ina okamo odene ago-palaka to awea
wameamene wa ootokoa okome
22
no Ali Yatenane Oyagome tete-kala moane kawou. Nipa
Kanosolo ali-kitika Akolalike lodo yotokoai tiki tobou ali-kitika Mosesene totono pine to a
olaukoa tiki ali-kitika enika eni ali peyame no kote tokale wawa wia tukoi. Nitikolika ta
tebolo takoa pataka-pete Akolaliyo moa kamotokoo wa Yesuyo akeneya.
23
Nimo ootokoa
e yene peya-pala okome no i ago litima nou wa wene pikagopa nekele tewitikoa wamene.
Nipa ne wia dekatiki yomo aua nou toa tete mokoa kakeka no litima namene.
24
One kepene
mama motokome tukaya wa piti motoko agopa etepea tua poo. Nitameneya no einagoke
toane tuou wa one kepene mama moamoko agopa pa mea kama poo.
25
Panagome-kiti one
yomini atukome atumotoake itonoke pia kawa tokoya peyado mootapeadekalepa edeya
weike moamoo.
26
Panagome noka anu olaukakou agaleka ya motokome wakalepa nipa no
Ali Yatenane Oyago telekole toane wakapeane nekene oneka ya moane waou. Agetaika one
wene kiyo akeneya meki edelo ali-kitika pa teleta tootapeneya meki toane meane wakapeane
nekene nitou wa Yesuyo akeneya.
27
Nimo ootokoa okome ita kaki-kiti padeka-kiti wete
tuameneya mekete Akolaliyo ali atoa pawe toa talo tokole enoi wa Yesuyo akeneya.
Yesuno Lene Timini Eya Pa Tootapenemo
(Matiu 17:1-8, Make 9:2-8)
28
Yesuyo einaka einamo ootokaneyake ta pataka ketepo kakoa (8) tadia ponokale
paka witimotokome pome tono tobouke Akolali kowitademe ate lewia pekeneya. Nipa Pita
Yameta Yone toa aua pekeneya.
29
Aida kowitoa kakaka one lene timini padele tootapea one
kakene maminaka yati yati toa ake tootapea taneya.
30
Nitaneya kakata ali takuta Mosese
Ilaidata kotikatapea nekete one-pala ko oa kakeneya.
31
Nipa pa teleta tootapeneyata
kaketepa oneke papete oa piane toa taatekakome Yerusaleme take pokome tuateka ko oa
kakeneya.
32
Nitoa kakoika Pita one oyagotaka pia kadukatapea mea kamokoa enekoli Yesu
pa tootapeneya kakenele enoa one-pala opia kakene agotaka enoa taneya.
33
Einagotame
Yesu tewitikoa poadete pokoika Pitayo okome Ali Muno kiwi ko oa kakita toto odeneya
kakono, epetekono, neme nitika wa okalepa nipa aga yapu tebolo Mosese kita Ilaida toa
kini wikakakala too wa akeneya. Enipa wene bebo akatapeneya kakome wene toamokome
akeneya.
34
Enimo oa kakaka wedome agopa takoa kauma nokale Pita one oyalitaka piti
tokale kakeneya.
35
Nitoa piti tokale kakoika wedo keneke agale ludu nokome okome wini
agopa anu mana anu takoane kakapikou agono, one oka toa yakoa tamene wa okale
36
yakoa enekoli Yesu odene kakedeka. Nitaneyake kini eni enekoinakamo enipete-mene pa
kini luaneya mea odenago-pala i i wa to awea ikileka toameneya.
(Matiu 17:14-18, Make 9:14-27)
37
Podolikama eni tono tobou wane ko a pokoli ali atoa peya mati obomoa Yesu
kotunaneya.
38
Nitoa oboa kakoita panagome kayo okome okome Tikisago, anu manago i
pikono, ena. Onepa anu odene opikouna agono, enoa latekakamene.
39
Oneke ipono
awinokolo ka wa telo ootapekala toko. Nitane ipono awinokome peteka peteka tokolo
timini kabunuke lako ka ua yotokoa kakala toko. Nipa mati tewitikoa poamademe wakala toa
dika dika toamene tete mekala toko.
40
Nitikala tokolo tekene neke oya-laweme eni ipono
takoa wetekakoe wane auane nokounake takoa wetekaku pekete wili toa wakoi wa etename
akeneya.
41
Nitikale yatekome Yesuyo okome ae ipete meki-kiti kime Akolalinele takamoa
wene moa koiganeya mea tikino, kini eni poane wene tewitikoa wamotoane edoane nepiane
meamou wa ootokoa matiyane etene-pala okome neke mana mati no kakuta aua noo wa
okale
42
manago noka noka ipono awinokome itonoke telo moa pitikoa peteka peteka
takaneya. Nitoa kakaka takoa pa wa Yesuyo ipono takoa wetekakome mati latekaneya.
Nitoapa neke mati ino moa wa etene metaneya.
43
Nitaneyake Akolaline tele patu kautakoa kakome tokale enekoi peyame ilepa i tokono
enatoe wa ka oa kakeneya.
Yesuyo One Tuatekamo Lokoa Akene Agale
(Matiu 17:22-23, Make 9:30-32)
Yesuyo padele padele tokaleke e ali atoa peya wene kainya pianeya kakete ka oa
kakoika Yesuyo one oya-lawe-pala okome
44
kiwi-pala i ukumo wedoa yakoa moa wene
taneya meati. No Ali Yatenane Oyalipa pade ali-kitame wimotoa panagome ete moa
meademe toko wa okale
45
yateketeke kini wene agopa takatapeneya tokome wene
toameneya. Nika neme wini okopa edemo wa eke oko-pe wa yakamene piti tokale meaneya.
Kiwi Kako-kitipa Mainago Ako Ago-pe
Wa Oa Takoa Pili Pili Toa Kakenemo
(Matiu 18:1-5, Make 9:33-37)
46
Yesuno oya-laweme kiwi kako-kitipa mainago ako tobou meateko ago-pe wa oa
takoa pili pili toa kakoika
47
kini tepene pikoi wene tetoa enekome mati pade motokome one
kakaya liti kakakome okome
48
panagome-kiti dikane de mati deya nooke toa makutukoa
motokomepa nipa no eni dekoa makutukoa motoko. Ni panagome-kiti no makutukoa
motokomepa nipa no moa wetekaka ago dekoa makutukoa motoko. Anu oya-lawe kiwi
keku agopa Akolaliyo ako ago tetepo takoa meko wa Yesuyo akeneya.
Kipala Poi Te iamoko Agopa
Kipala Kibutua Kako Ago Eni Wa Akenemo
(Make 9:38-40)
49
Yoneyo Yesu-pala okome okome Ali Muno anu ukumo yakamene. Panagome neke
ibini wedekoapa ali atoake awitane ipono-kiti takoa wetekakala tokale totome enekoo.
Einago toto-pala opia yako ago toamokolo tokome wa pade dikamea wa kikoa okoo-kale
okome
50
toa kamotono, wa pade edikoa kikoa wameamene. Kiwi-pala poi te iamoko agopa
kiwi-pala oya kakoa auapeko ago eni wa Yesuyo akeneya.
Sameria Yename Yesu Wakenemo
51
Akolaliyo Yesu a tibuke aua poateka tigotokale Yerusaleme poada wa pitimoa
pekeneya.
52
Nitoa poademe pokome ali pade-mene patepoe wa wetekakale pote Sameria
yenane ta padeke Yesu noatekale nodokakadete pekeneya.
53
Nitikoli eni take yename ekete
einago Yesu mone Yerusaleme take poademe pokono, Yu ago tadekono, makutukoa
moamato wa wakeneya.
54
Nitikoli enekete one oyalita Yame Yonetame ekete Ali Muno toe
a tibuke itipono akeneya pitakome i yene wia nootapemotono ta wa totame Akolali
kowitikamotoa oko-pe wa okoli
55
Yesuyo ete peketapekome wawe wa einagota kikoa
oomotokome
56
one oya-mikiti-pala pade take pekeneya.
Yesu Litima Pekete Toatekomo
(Matiu 8:19-22)
57
Yesu one oya-laweka ka ludu kutu potokakoa panagome Yesu-pala okome okome
ne pokoka litima pou-kale okome
58
yanai ini eya kini piatiki yene pikoyake Ali Yatenane
Oyago pade no naliyomo mokoane piatekuyaka toamoko wa akeneya.
59
Wa panago-pala
one pukuka litima namene-kale okome agetai tuaneya pikono, oloyo toomotekene nee litima
nou-kale okome
60
Akolalinele takamekete tuaneya piou toa pa meki-kitame tuane ali atoa
oloyo tomotono, tokamota. Akolaliyo ali atoa pawe toa talo tokomo oa pupitikapoano pa
wa Yesuyo akeneya.
61
Wa panagome okome Ali Muno ne pokoka litima noadene tukuno,
nitadeneke namolo takoane anu yapu pitiki-kiti tebeane lionate opou-kale okome
62
panago
one nokana lono kabe takakoa pou toa tokome one namolo tokanakaleke wene piitikaneya
mekomepa nipa Akolaliyo talo toko take pamele toamoko wa Yesuyo akeneya.
Luke Luke
<<
99
>>
Luke Luke
<<
10 10
>>
10
Yesuyo One Oya-lawe 72 Takoa Motokome
Akolalinemo Oa Pupitikamotoa Wetekanemo
1
Wa naniko Ali Munoyo one oya-lawe ege odepeta kadukoa wa lene kolo kakoa (72)
ali-kiti takuta takuta wa takoa moa wetekakala taneya. Ali atoa ta latia pitikika tayo yapu
luduka one nani noateku toa kiwi namolo takoa pima yawatino poe wa wetekaneya.
2
Wetekakome okome ipe nee kakoya wakoa momotoa nodokoa kibutukakoa kakoyake eni
ipe ludu wakoa moatiki yene natetekoa kakino, Akolali eya wa kowitikamene. Ipe nee
kakoya wakoa mou toa neke ali atoa motokamotono, neke pupu yene wete takoa moa
wetekoano ta wa Akolali kowitamene.
3
Poatino poe wane wetekakilepa lene pianeya yo
tane tue-kiti yakika sipi sipi kai tine moane wetekou toane tukuno, eya toma pamene.
4
Kue
ka ua poamoa ni padeya-kiti uatiki kaka ua poamoa ni kawa yeneka mekoa poamoa tamene.
Pake pake ali atoa kotuketeka ko wameneya pa ponokala tamene.
5
Yapu pade tuapea
peketepa i yapu pitiki-kiti tepe kolotini mataketikoa meamene wa namolo takoa amene.
6
Nitoa ootokoa kakete enekoli wene ko akeneya mekago meadekalepa kini okoi agale
einagoke weamutukome one tepe kolotini mataketikoa mekoo. Dikane ago pade eida
meameadekalepa nipa kini oa metekoi agale pedekome pinali-kiti kiwike weamuoo.
7
Panagono yapu tuapea peketepa pa eida-kama meamene. Nee ue eya takoa metekoiya moa
namene. Ni edoa-mo. Panagome-kiti panagono pupu takakolopa one eni pupuke kue eya
moateko toa pupu pinagome meamedekolo ni ukuno, yapu yapu pima yawameamene.
8
Ali
atoa ta latia pitikoika pokoli makutukoa motekete ue nee eya takoa lawetekoli padeya
kekaneya latikameneya peya moa namene.
9
Nitoapa yene taneya pikoi-kiti kini tane yene
latekoapa eya wa oa tamene. Akolaliyo ali atoa pawe toa talo toateko tigotokama noko wa
amene.
10
Wa ta padeka pokoli makutukoa moamokolipa nipa kini yapu ludu patukakete
ekete
11
kini ta ludu piko doo tone kawake kakeneya opi tadekakilepa kiwi pubu ekete
tokono, eya wa wene taneya meati. Akolaliyo ali atoa pawe toa talo toateko tigotoma noko
wa eni yene tewitikoa pamene.
12
Ae, wipitia ta pataka-pete Akolaliyo ali atoa takoa enoa
kibu motokomepa kiwi makutukoa moamokoi yene dika dika toamene tete meoo. Nipa
Sodome take yename poanele tubele-kama tokoike nami wia tete meteka toa moa patukoa
tete ako mati meoo wa Yesuyo akeneya.
Korasine Besaida Kapaneame Ta-meneke
Pitikoi Yename Yesu Wakeneyake Akenemo
(Matiu 11:20-24)
13
Ae, Korasine ta-pala Besaida tata pitiki yene kiwi pubu ukumo yakoe. Kiwi pakeke
ele kule tubele mati toma yakounakale mone Taia Saidone tata ludu toma yawou tokapa
nipa kini namolole tewitikoa wakete palu watea kuku yotokatapea toi toka. Mone yenameke
dikoa wete toi tokake kime pade nitamokoina.
14
Akolaliyo ali atoa takoa enoa kibu motoka-
petepa mone Taia Saidone tata pitane ali atoa tete meoo. Ae, eni tete meteka toa moa
patukoapa Korasine Besaide tata pitiki yene kiwi dika dika toamene tete meoono,
nepiamene.
15
Ae, wini Kapaneame take pitiki yenepa Akolaliyo kiwi a tibuke moa
kamotokoono wene pianeya meki-pe. Akolaliyo nitameneya poane take poe wa kiwi moa
pitikoo.
16
Anu oya-lawe kini agale yateki yenamepa anu agale-pala dekoa yateki. Kini agale
yakamoa kiwi waki yenamepa anu agale-pala dekoa yakamoa no waki. Anu agale yakamoa
no waki yenamepa no moa wetekaka agono agale-pala dekoa yakamoa one waki wa
Yesuyo akeneya.
Moa Wetekane Ali-kiti Wakapea Nekenemo
17
Yesuyo ege odepeta kadukoa wa lene kolo kakoa (72) moa wetekane ali-kiti one
mekata wedianeya wakapea nekete ekete Ali Muno neke ibini wedekoa ta wa okoole poane
ipono-kitameka yakoa tokoi-koli okome
18
Setanu a tibu kawa pitakitikakale enekou. Nipa
katiapale tane tetepo tootapekome pitakale enekou.
19
Yakoe. Ali tania tukako kaya-kitika
ka ala-kitika wia kautakoa ni kiwi-pala poi te iane ago Setanuno tele moa kawikoa toino, anu
tele patu kautakoa kakete nitoi wane eni toatekoi tele lukakouna. Nitikounano, padameka
kiwi toa potokamele toamoo.
20
Takoa poe wa ikili ipono-kitame yakoa tikike wedia
kawameamene. Nitameneya, Akolali a tibuke mekome kini ibini one bokuke wia
mekaneyano, kee wa wedoa wedia kamene wa Yesuyo akeneya.
Yesu Wedia Kakome Akolali Ke Wa Akenemo
(Matiu 11:25-27, 13:16-17)
21
Einata einapete Yesu Epetane Yomini patu kautakoa kakome wedikome okome Atai
Ali Muno itono tibuta yopia kako ago nepala ke wane uku-ye. I uku agalepa pa nana mati
keneya meki-kiti i i wa neme wene taka taka tokoyake itono peku wene toa naki-kiti wene
takameke pa neke luaneya mekono, ke wane ni uku. Atai, neke widikakepa neke epene
wene-kama piko toa litiapa dikou wa wene toopikanakale taatekoa toko wa Yesuyo Akolali-
pala akeneya.
22
Nimo ootokoa okome Agetaiyo one tele patu kautakoa kama pamene wa
one peku no lawetetapeka. Nopa dikane ago wa padameka wene toamikiyake Atai
Akolaliyo wenepa toko. Atai Akolali onepa dikane ago wa padameka wene toamikiyake one
mana noanume wene tuku. I alime i atoame Agetai wene tomotou wane takoane moane
kakaku-kitameka Atai Akolali wene tiki wa Yesuyo akeneya.
23
Nimo ootokoa kakomepa ete-kitame yakamomotoa one oya-lawe kakoi lono ete
peketapekome okome kime i enoa kakile-kiti enoa motiki ali atoapa kolotine meoi.
24
Kipala
i ukumo yakoe. Kini leneme enoa kaleme yakoa tikiya-kiti ali kainya matiyame enoane
yakoane toadiya wa papete nepia meaneya. Nipa Akolaline agale to awea akane ali-kiti ni ako
meane tobou ali kainya matiyame nepia meake enoa yakoa toameneya mea pa tuma-kala
nekeneya.
Sameria Take Agome Yu Ago Auapeanemo
25
Mosesene totono pine to a olaukoa tane ago pade Yesu kakata nokomepa i agopa
wene meane ago patu wa pitia yatekome okome Tikisago, edele tekene meane kama pou-
pe-kale okome
26
neme wini okolekepa Moseseno totonoke edemo wa wia mekaneya-pe.
Eni agale oi motikilepa edemo wa wia mekanemo oi motoko-pe-kale okome
27
neke Ali
Muno Akolalike wedoa wene mekoa meamene. Nipa neke tepe kolotinime toa neke
yominime toa neke teleme toa neke weneme toa tamene. Ni pinali neke wa wene mekoa
mama motoko toapa yete pade ali atoakeka wene mekoa mama moamene wa wia
mekaneya piko wa okale okome
28
neme wini okopa nimini eke okono, wini okana toa toma
pekepa nipa mea kama poo wa akeneya.
29
Yesuyo nimo okale one wene muno meaneya mekome akene tetepo takamotoa
okome okome Moseseyo yete pade ali atoake wene mekoa mama moamene wapa edane ali
atoake okome akeneya-pe wa okale Yesuyo eya wa pedoa agale akeneya.
30
Panago-kiti
Yerusaleme ta piimotokome Yeriko take keti poademe pekeneya. Poademe pokomepa ali
wia kinikiya odomoa pokala tane ali-kiti kotukale one mamina eya odoa moa layo toua
witaneya. Nitikete einago tuademe pimotoa pekeneya.
31
One eni tuademe pikata Akolalike
lodo yotokoai tane ago pade ka ludu naniko nokome enetekoake pa pimotoa eka kebonoke
kokotokoa patukoa pekeneya.
32
Wa naniko Lipai yatene ago pade einata einago tuademe
pikata nokome enetekoake eina toa pa pimotoa eka kebonoke kokotokoa patukoa
pekeneya.
33
Nitikala taneyake mone Sameria take ago ka ludu nome enekale einago
tuademe pikale enetekoapa ela moa
34
pinele pome one witaneka peto-pala gerepi po ku ueta
pekoa yotokatapea togotokaneya. Nititikoa one dogi kai tali waneke mekoa ali atoa dekoa
piai tane yapuke aua pome pikoa meaneya.
35
Nitoapa podolikama tewitikoa poademe
kakome eni yapu talo tane ago kina takuta metekome okome i ago pikoa meano ta. Nee ue
eya lawetekoya-kiti i kueme topo toa motokakale adameadekalepa nipa oto wakapeane
nekene nami wiane kue pade meou wa pekeneya.
36
Eni witane ago tuademe pikata ali tebolo
nokala taneyano, odene agome einagopa one oyago tetepo takaneyano, mani ago-pe-kale
okome
37
one ela moa auapeka agopa einago eni wa okale okome nipa one eni tane toa
toomoa pamene wa Yesuyo akeneya.
Maasa Mariatane Yapu Yesu Ugu Pekenemo
38
Yesuyo pato wa one oya-lawe-pala kutu pome ali atoa ta latia pitikoi take
witapaneya. Nitikale atoa pade Maasa wa ibini akene atoame one yapu ne noo wa
makutukoa motaneya.
39
Nitaneyake eina atoane wamene atoa Maria wa ibini akene atoa
Yesuno kawane nome mekomepa one olaukoa oka agale yakakoa meaneya.
40
Nitoa
mekaka Maasa one pupu nami namita kakale tokome tepe we taneya mea Yesu mekata
nokome okome anu wamene atoame anu kidene nee eya takoane pupu tomotoa wawa i
nome mekono, neme no ela motekepa nipa no neke wamene atoa auapeano pa wa
wetekamene wa okale okome
41
ae, anu oyatoa Maasa ne-pala ukumo yakamene. Pa pupu
toatekoya-kala tokoa kake teke wene keda taneya mea tepe-pala we tokolo winipa oko.
42
Padele epetaneledo katekoa neme toameadeko. Enilepa Mariayo anu i laweteku peku
noada wa yakakoa meko. One i yakoa motokoya padame katekoa moamele toamoko wa
Yesuyo Maasa-pala akeneya.
Luke Luke
<<
10 10
>>
Luke Luke
<<
11 11
>>
11
Kowitikete Oatekomo Olaukanemo
(Matiu 6:9-13, 7:7-11)
1
Wa padepete Yesu padeka kowitoa meaneya. Kowititikoa mekale one oyago pade
nokome okome Yoneyo one ue motokane yene kowitikete toatekoile olaukane toa toto
olaukoa ta-kale okome
2
Akolali kowitiketepa eya wa kowitikala tamene.
Atai, neke ibinipa ali atoame paya tetepo takameneya kei pimotono ta.
Neke ali atoa pawe toa talo toano ta.
3
Ta patako toa-kama tone noateko nee moa lawetekala tamene.
4
Tone tokoo poaneleke po letu mekakana keetapeamene.
Toto-pala poanele tokoi yene peya kini eni tokoi poaneleke totome po letu mekakoo toa
keetapekete tekete ni oko.
Padele padeleme toto etepea liamomotono, yopikoa kamene wa Akolali kowitikala tamene
wa Yesuyo akeneya.
5-6
Yesuyo enimo ootokoa okome anu oya-lawe kiwi panago tube likonu ta likale-kiti
neke oyagono yapu peke eke anu oyago pade padeka poademe anu yapu dekoa pinoko.
Nitikoyake one lawetateku nee piamokono, palawe wane tebolo nami kakoane mouno mea
ta wa neme kowitikale okome
7
anu kago keteaneya kako. Anu mati-kitika no-pala atu pia
mekino, kamoane meamele toamokono, teko takamea wa-kiti oo.
8
Nimo okaleka mano wa
neme oai toa kakale enekome kamoa nokome neke moateko toa-kama moa menoo. Nipa ne
i agopa one oyago kakono, moane menada wa moa menokoya mena. Pa neme mano wa
oai toa kakaleke nitoo.
9
Nipa kipala eya wane ukuno yakoe. Akolali kowitoa kakolipa yakoa
too. Padeya-kiti tuku toa kaketepa enamuoi. Kago wi wi toa kakolipa pinagome kago
pekanokale tuapea poi wane uku.
10
Eni uku toa kowitoa kaka agomepa nipa one eni
kowitikaya moo. Padeya tuku toa kaka agomepa nipa one eni tuku tokaya enamuoo. Kago
wi wi toa kaka agopa nipa pinagome pekanoo.
11
Anu oya-lawe kiwi panago neke mana
agome mou pade nouno mea ta wa-kiti okalepa ali tania tukako kaya pade neme yotokoa
meoo-pe.
12
Ogada mu nouno mano wa-kiti okalepa ka ala pade yotokoa meoo-pe.
Nitamoo.
13
Kiwi poanele-kala tiki-kitameke kini mati-kiti epetaneya takoa mekala tiki.
Epetaneya takoa moa mekala tiki toa moa patukakome a tibuke meko kiniketaiyopa one
Epetane Yomini kiwi meoo. Nipa one kowitikoi ali atoake awipoano pa wa moa wetekoo
wa Yesuyo akeneya.
Yesu Belesebule Patu Kautakoa Kakome
Ipono-kiti Takoa Wetekako Wa Akenemo
(Matiu 12:22-30, Make 3:20-27)
14
Wa padepete Yesuyo panagoke awitane ipono takoa pa wa wetekaneya. Agale
amele toamene ipono eni takoa wetekaneyake eina agale wamene agome agale titia okale
yatekete e ali atoa wene kainya pianeya kakeneya.
15
Nitikete padeka-kitame ekete beita ipa
ako odene meko tobou ipono Belesebulene tele patu kautakoa kakome ipono-kiti takoa
wetekako wa akeneya.
16
Wa padeka-kitame likoa enekete ekete neke tokolepa Akolali patu
kautakoa kake tadekalepa a tibuke padele tubele witakamotono ta wa akeneya.
17
Nitikoli
kini tepene pikoi wene tetoa enekome okome ako odene meko tobou agoke lukoa meki
yenedo kako poi toa meketepa wete atutapeoi. Odene yapu keneke pitiki-kitika ete oto wa
puutakutukoa meketepa nipa yapu-kiti kilia tadatapeou toa tadoa pootapeoi.
18
Edikoapa
Setanuno yatene puutakutukoa meketepa edoa mea kamotoa-pe. Mea kawamoi. Noanupa
eni tobou ipono Belesebulene tele patu kautakoane kakene ipono takoa poe wane
wetekakala tuku wa wini iki.
19
Noanupa Belesebulene tele patu kautakakene ipono-kiti
wetekaku wa ikino, kini totono litia tiki ali-kitame ipono-kiti takoa wetekaketepa te patu
kautakoa kakete tiki-pe. Anume takoane wetekakene tukuna toa tikino, kime no ina akoa
kakinapa kapene wakoa akediki.
20
Akolali patu kautakoane kakene ipono-kiti takoa poe
wane wetekakala tukuno, Akolaliyo one ali atoa pawe toa talo tokotapa kiwi pake wini
witadeko.
21
Telekagome tue poyo dolo eya mana patu pikoa mekome yapu yopikalepa onekeya
peyapa kode moameneya pa eida pia kawoo.
22
Wa one tele moa patukoa tele tube mati
tane ago nokome einago moa kautakome eya too. Einagome one tue poyo eya ika iyamepa
ete yene wiane litiou wa pikoa kakanakeya-kiti odoa moa onekeya-pala kode moa aua
pokome one yene tatia meetapeoo.
23
No-pala lipua meamoko agomepa nipa no-pala poi eni teigome toko. No auapeamoa
no mekuta ali atoa koukoa mekamoko agomepa nipa ali atoa tadekoa litikome toko wa
Yesuyo akeneya.
Ipono One Mekanata Wakapea Nekenemo
(Matiu 12:43-45)
24
Ipono pade panago takoa pokomepa eya toko. One koo meatekota ta pitamene ta
ludu tuku toa kawa teko tokolo wako. Nitoa wakomepa one takoane wawane nokounata
wakapeane pone mepou wa wene piitikoa
25
wakapea pome enepokolo einata do pokoa
kalotokaneya kakedeko.
26
Nitaneya kakolo enemotokome tuku topokome ipono-kiti tatono
kakoa (7) one poanele natele tomotoa poanele pine wia tagoa tiki ipono-kiti enamua einata
aua noko. Aua nokolo einakagoke awitikete awitikili tokome one namolo poanele nateleka
toa meake wipitikomepa poanele tubele-kama toma yako wa Yesuyo akeneya.
Ali Atoa Kolotine Meatikimo
27
Yesuyo enimo ootokoa kakale atoa pade ali atoa oboa kakoita kakome kayo okome
okome i ago ne opia pikoa mea adu tanikakoa meane atoapa kolotine meko-kale okome
28
winipa nimini okoyake kolotine wedoa meki-kitipa Akolaline agale yakatekoa toma yaki-
kiti eni wa Yesuyo akeneya.
Yesuyo Padele Tubele Tomotoa
Likoa Enanemo
(Matiu 12:38-42)
29
Ali atoa Yesu kakata note-kala apua takoa kakoli enekome okome ipete kaki yename
poanele wedoa toma yakina. Nipa no i ago Akolali patu kakedekalepa padele tubele mati
witakamotono ta wa likoa enekina. Nitikiyake Yona einago-pala tubele mati tane toa tokale
enoi. Padele pade enamoi.
30
Akolaliyopa i ago Yona one patu kautakoa kakedeko wa
Ninepa yename wene tomotoapa Yona einago-pala padele tubele mati taneya. Eina toa
Akolaliyopa one patu kautakoane kakedeku wa ipete kaki yename wene tomotoapa Yona-
pala tokanakale no Ali Yatenane Oyago-palaka padele tubele mati toono, nepiamene.
31
Ae,
Akolaliyo ali atoa takoa eneka-pete Siba take ako meane tobou atoa kamokoa kakome
okome Yesu kaka-pete mekoi Yu yene kime toa potokaneya wa kiwi akoa agale oo. Ni
edoa-mo. Eina atoa mone atoameke Solomonono peku noademe ta padeka mati mea
nekeneya. Nitaneyano, kipala ukumo yakoe. Tobou ago Solomono keku kamotoane no ako
ago nukuyake kime pade anu peku noamadete waki.
32
Ae, Akolaliyo ali atoa takoa eneka-
pete Ninepa take yeneka kamokoa kakete ekete Yesu kaka-pete mekoi Yu yene kime toa
potokaneya wa kiwi akoa agale oi. Ni edoa-mo. Yonayo Akolaline agale Ninepa ta ludu mo
wima pokale yatekete eni yene Akolalike tepe kolotini pekoa piitapeneya. Mone yenameke
nitaneya. Nitaneyano, kipala ukumo yakoe. Yona einago keku kamotoane no ako ago
nukuyake Yu yene kime pade anu peku noamadete waki wa Yesuyo akeneya.
Labo Toleke Pedoa Akenemo
(Matiu 5:15, 6:22-23)
33
Panagome-kiti one labo udukakomepa nipa bokosi wane keneke potipiamoa okolo
petene moa pekoa kautamoa tokome eya toko. Labo piatiki walaike-kama moa piko. Nipa
ali atoa yapu tuapea nekete eni pa pa keleyo toa kakale enemotoa ni toko.
34
Eina toa labo
toele yapu pa takalogou toa kini lenetame tepe kolotini eya pa takalogako. Lenetado
epetaneya kakepa nipa tepe kolotini pa takatapeneya kawoo. Ae, neke leneta poaneyatado
kakepa nipa tepe kolotini yomiyomume agopa takatapeneya kawoo.
35
Tepe kolotini pa
takatapeneya meku wa oake yomiyomu keneke mekaya tokale wedoa meamene.
36
Yomiyomu dedeyaka toameneya tepe kolotini pa takatapeneya mekopa nipa labome pa
takalogou toa ne pa takatapeneya kawoo wa Yesuyo akeneya.
Parisi Ali-kitika Mosesene Totono Pine
To awea Olaukane Ali-kitika Kikoa Akenemo
(Matiu 23:1-36, Make 12:38-40)
37
Yesuyo nimo oa kakaka Parisi ago padame one yapu nee noano noo wa okale nipa
pata wa pokome nee mekome nakeneya.
38
Nee noa mekale Parisi agome enekale one yono
uele tadameneya pa mekome nakale enekome wene kainya pianeya meaneya.
39
Nitaneyake
Ali Muno agome okome ne-pala ukumo yakamene. Parisi ali-kiti kini mete okolo eya abe
kogilepa ekolo abe pa kamotoa lede tokoo abe ko otapekala tiki. Nipa kepeneme epeteku
wa oake kini tepene panagoneya moadiya wa tepi moa enika eni poanele toma yaki.
40
Ae,
paya nou toa mekete tiki. Akolaliyo tokoo pikoya-kiti latikilepa ekolo pikoya-kitika latikome
latia pianeya. Nitaneyano, tokoo ekoloka abe ko otapeamediki. Enipa nimini uku-pe.
41
Kini
mete okolo kagono keneke pianeya-kiti tatikoa ponopene ali atoa meteketepa nipa kini mete
okolo eya abe ko otapeneya piou toa mea epetekoino, nitamene.
42
Ae, Parisi ali-kiti kime dika dika toamene tete moino, nepiamene. Ni edoa-mo. Kini
yamanu ludu witakoya nee deya-kiti pilia moa oi moteketepa yonota tua pikolopa odene
katekamoa ipa Akolalineya wa takoa pikakala tiki. Ae, ali atoame tanele kiyotokoa takoa
enoa Akolalike wene mekoa mea enika enile tobou kakoa tamedikiyake toamekete pa natele
tokala tiki.
43
Ae, Parisi ali-kiti kime dika dika toamene tete moino, nepiamene. Ni edoa-mo. Losu
yapu peketeka ibini akene yene meatikita meada wa pote mepokala tiki. Makesikeka ali
atoame Tikisa ago Tikisa ago ke wa kiwi kei pimotada wa yakala tiki.
44
Ae, Parisi ali-kiti
kime dika dika toamene tete moino, nepiamene. Ni edoa-mo. Kipa tuane yene oloyo toai
taneka tetepo taneya meki. Nitimotoake ali atoame enameneya paya nou toa teteponokala
tiki wa Yesuyo akeneya.
45
Nitaneyake Mosesene totono pine to a olaukane ago padame Yesu-pala okome Tikisa
ago winipa anu yagono-mikiti-pala dekoa akake oko-kale okome
46
Ae, Mosesene totono
pine to a olaukaki ali-kiti kime dika dika toamene tete moino, nepiamene. Ni edoa-mo. Ali
atoa padeya padeya keda tokoya kini kotomaneke moa aukou toa kini wene keda takakala
tiki. Nitikiyake eni keda nateya deyaka yapetekoa ate motokamiki.
47
Ae, dika dika toamene
tete moino, nepiamene. Ni edoa-mo. Akolaline agale papete to wea akane ali-kiti oloyo
taneka kalotokoa yapu deya wikakakala tiki. Kini kaua-mikitame eni ali-kiti wia tukama
nekeneyake tiki.
48
Nipa kini kaua-mikitame tanelepa epetanele tane tetepo takoa tiki. Kini
kaua-mikitamepa Akolaline agale to awea akane ali-kiti wia tukama nekeneya. Kimepa eni ali-
kiti oloyo taneka kalotokoa pikala tiki.
49
Kime nitoi wa Akolali wene muno meaneya
mekome eya wa oa pianeya. One agale akatiki ali-kitika one agale oa aua yawatiki
Aposelo ali-kitika kiwi mekoika moane wetekakala tou. Nitikolu nokoli enekete Yu yene
kime padeka-kiti wia tukoa wa padeka-kiti tete mekala toi wa oa pianeya.
50
Namolo
namolo titimoa kini kaua-mikitame one agale akane ali peya wia tukama-kala nekeneya. Eni
wia tukama nekeneke nami papete wiameneyake opi kabe koukoa nami wiapa ipete kaki-kiti
kiwi Akolaliyo kibu moono, nepiamene.
51
Titikilepa wamene agome Ebele wia tukaneya.
Wipitikilepa tobou losu yapu keneke Sekaraia wia tukaneya. Nipa eyata pake Akolalike lodo
yoai tane walai-pala tobou losu yapu olege takoa tipi tane yapu lukuta eniyata pake Sekaraia
wia tukaneya. Eni ali-kiti wia tukama nekeneke nami papete wiameneyake opi kabe koukoa
nami wiapa ipete kaki-kiti Akolaliyo kibu moademe toko.
52
Ae, Mosesene totono pine to a olaukaki ali-kiti kime dika dika toamene tete moino,
nepiamene. Akolaliyo talo toko take one peku nopadete ali atoa kago ketepono patukoa
ponadete tokoiyake eni kago peatekoi kii kime to a pokoina. Nipa kiwi patukoa poamadete
wakoiyake ete ali atoa patukoa ponomotoa papukamokoina wa Yesuyo akeneya.
53
Nimo oomotokome pokale Mosesene totono pine toa olaukane ali-kitika Parisi ali-
kitika one-pala timini luaneya i i wa pitia yakoai toma pekeneya.
54
Nipa natemoka
omotadiya wa kakete one likoa enoai toma pekeneya.
Luke Luke
<<
11 11
>>
Luke Luke
<<
12 12
>>
12
Wene Takuta Pianeya Meki Yeneke Akenemo
(Matiu 10:26-27)
1
Eina ali atoa ege egeta kadukoa apua takakete ete oto wa muku muku toa kakoli
enekome Yesuyo one oya-lawe-pala okome Parisi ali-kiti kini yisi kugu kiwike weamutukaya
kekatekoa yamene wane uku. Enipa wene takuta pianeya mekike ekene uku.
2
Padele padele
kaukoa toma yakenele peya naniko keleyo witatapeoo. Padeya padeya paigakoa pianeya-
kitika naniko keleyo pikale peyame enetapeoi.
3
Nipa likonu kakete okoi agalepa ali atoa lou
pa ke kakete yakatapeoi. Ekolo kini yapu keneke kago keteketikoa kakete oi oi wa okoi toa
pade-kiti yapu yalini lewia kakete i i wa to awea ootapeoi.
Akolali Piti Moamene
(Matiu 10:28-31)
4
Anu oya-lawe kiwi-pala i ukumo yakoe. Yete pade ali-kitame kiwi wiou wa lama moa
lagotoa tukatekoapa wa naniko kiwi-pala padeleka tamele toamoo. Dikaki ali-kiti piti
moameamene.
5
Kini piti moatiki agopa eya ago. Akolaliyo panago wia tukatekoa poane
take pa wa moa pitikamele tokono, Akolali einago piti moamene wane uku.
6
Dee ini deya ko kakoa (5) topo toa kue motikilepa dedeya tuane kue takuta odene
mokala tiki. Enipa nimini ukutu-pe. Dikane ini deyapa dedeyaka Akolaliyo odeneka
katekameneya peya talo toa kako.
7
Ni ago Akolaliyo anu oya-lawe kini wagoke witako
pineka kako toa oi moa talo toa kako. Ni agome ini deya-kiti mamapa moake paya tetepo
takakome kipa one kolotini yene wa wedoa mama moa talo toa kakono, ete-kitame kipala
padele toatikilekeka piti moameamene wa Yesuyo akeneya.
8
Kiwi-pala i ukumo yakoe. Panago ali atoane leneke kakome no i agono peku noane
tuku wa to awea okalepa eina toane no Ali Yatenane Oyago Akolaline edelo ali-kitane leneke
kakene einagopa anu peku noa tokago wane to aweane ou.
9
Wa panago ali atoane leneke
kakome no i ago kote tokolo waku wa okalepa eina toane no Ali Yatenane Oyago Akolaline
edelo ali-kitane leneke kakene einagopa kote tokolo waku wane waou.
10
Panagome-kiti no Ali Yatenane Oyago tea agale akakalepa one eni poanele tokake
po letu mekakana Akolaliyo oyake kekile too. Wa panagomedo one Epetane Yomini tea
agale akakalepa nipa one eni poanele tokake po letu mekakana Akolaliyo kekile toamoa
etene kibu moo.
11
Anu oya-lawe kipa ete-kitame kini losu yapukeka tobou ali-kiti mekoikaka Kanosolo
ali-kiti mekoikaka lia aua poi. Nitikoli peketeka edemo uku patu, edemo topo takoane uku
patu wa tepene li li wa kamotoa meameamene wane uku.
12
Nitikoi-petepa Epetane
Yominiyo kini oatiki toa i i wa wene taka taka too tokolo tekene ni uku wa Yesuyo akeneya.
Kamo Ago-pala Pubu Akenemo
13
Ali atoa kabeta pake kakome panagome Yesu-pala okome Tikisa ago, agetaiyo
kadimo okana toa anu wamene agome toameneya toneketaineya tatia no meamokono,
neketaiyo kadimo okana toa ta wa neme akamene wa okale
14
Yesuyo kikoa okome okome
kini koiso yatekamene wa no teyo moa kakaneya-pe. Kinikiya tatikatakutukamene wa no
teyo takoa motaneya-pe. Padame pade mena wa Yesuyo ootokoa kakome okome
15
padeya
padeya moadiya wa tepi motokayano, wedoa yamene. Panagome-kiti one kamoya moa
auma kakakomepa one eniya patu edoa kautakoa mea kamotoa-pe wa Yesuyo akeneya.
16
Nimo ootokoa kakome agale pade pedoa okome okome kamo tokago pade one ipe
nee kakoya witakome leau akatapeneya.
17
Nitaneyake one nee kakoya wakoa moa lobutua
piatekata toamokale tokome edeku patu wa wene kibutukoa mekome okome
18
ile tou.
Namolo yapu-mene ke aweane eni-mene moomoane awitikakoane liapeane wiou.
Nititikoanepa witi ku anukuya eya kuya peya lobutuane piane tagatapeou.
19
Nitikene ekene
anukuya tubeya eni pikuno, mali peya mati ponomotoane eniya patu kautakoane kama
puku. Opi poti kilikoane mekene nee ue eya noane piane wediane meou wane ou wa kamo
agome akeneya.
20
Nimo akeneyake Akolaliyo one-pala okome paya nou toa meke wini
okono, opii ta likale tuke tuoono, neke nodokapike lobutukapianeya teyo moa noo-pe.
Pinago ne noamoo wa Akolaliyo akeneya.
21
Nipa panagome one kamoya moa auma
kakakomeke Akolalinele takamokalepa Akolaliyo one peku alekoa nakene ago tetepo takoa
waoo wane ekene uku wa Yesuyo akeneya.
Akolalike Wene Tugoa Mekete Toatekomo
(Matiu 6:25-34)
22
Yesuyo one oya-lawe-pala okome okome kini kepene mama moameamene. Nipa
noateku neepa edoane moane naku patu, kawateku maminapa edoane tatepe toane motuku
patu wa edikoa wene keda taneya meameamene.
23
Akolaliyo kini tigini yominita tobou
kakoa mama moapa kini noatiki nee mamina eya kekuya tetepo takoa yopiko.
24
Ini
pukaneya yakete tikile enekoapa eya wa wene taneya meamene. Nipa edikakiya. Nee lene
matamoa ipe kakoya nee wakoa moamoa kini nee moa piatiki yapu eya wiamoa tikiyake
Akolaliyo talo toa egeteko. Akolaliyo ini eya kekuya tetepo takoa mama moapa anu oya-
lawe kiwi akoya tetepo takoa wedoa mama motoko.
25
Anu oya-lawe kiwi panago tukina
toane tuamekene lou pini odeneka pa meou wa tepe ate keti enoai tekeka padele tamele
toamokolo tukina toa tuoo.
26
Natele eni tamele toamokono, eteleke edoa mama moamoo.
27
Taage kaluga eya witakole enekoapa eya wa wene taneya meamene. Nipa edikakoya. Po
itia mamina latia toamokoyake wedoa kalaneya witako. Ako odene meane tobou ago
Solomonoyo mamina epetaneya-kama moa kakome wedoa kalakitikoa kakala taneyake tage
kaluga eya kalaneya moa patukamele toameneya.
28
Taage kaluga eya ei li ludu pa tekei
witako. Nipa opi tou toa tekei witakoyake podolikama alime wakoa moa toele pitikako.
Edikoa pa tekei witakoloka Akolaliyo talo toa kalotokako. One dikane ago tokome kini
kawatiki mamina moa meoono, dekolo wene keda taneya meki. Ae, Akolalike inapa wedoa
wene tugameneya mekiya tadiki.
29
Nee eya edoane moane naku patu, ue eya edoane
nomoane naku patu wa enika eniya mama moameamene. Nipa wene keda taneya
meameamene.
30
Ta piko peyake mone yatene ali atoame enika eniya mama moma yakino,
kime pade nitameamene. Anu oya-lawe kini wenepa kiniketai Akolaliyo moademe tokoto-
mo.
31
Nipa one talo toko take mekene toateku peku noada wa wene piitikaneya meamene.
Nitoa mekolipa kini noatekoi nee mamina eyaka Akolaliyo motokoa meoo wa Yesuyo
akeneya.
32
Anu oya-lawe kipa sipi sipi kai keneya natetekoa mekino, kiniketai Akolaliyo one
talo toko taapa kinino noe wa yameademe okono, one epene wene piko toa litia tokome
tokono, piti tokolo meameamene wa Yesuyo akeneya.
A Tibuke Pia Kawateko Kamoyake Akenemo
(Matiu 6:19-21)
33
Kinikiya peya topo toa kue moa ponopene yene tatia meetapeamene. Kini kue uatiki
kapa kego noamateko ka-kama takoa moamene. Nipa kini kamoya a tibuke auma kakou toa
epetanele toma pamene. Kini eni kamoya a tibukepa kode agome kode moamoa tiyome te ia
noamoa toko.
34
Eni ukupa, ali atoa kini kamoya piko takepa wene piitikaneya yakili tekene
ni uku. Nipa kini kamoya a tibuke auma kakane tetepo takoa meamene wane ekene uku.
Tobou Ago Wakapea Nomotoa Nepiamene
35
Tobou agonole takada wa matiu deka deka toa kawa labo-pala udukoa wedoa
nodokoa kamene.
36
Nipa eya yename tiki toa tamene. Tobou ago pade panagono atoa
motokakete toge kikoita lobutupome mea wakapea nomotoa one pupu yename wedoa
nepikoa kaki. Nipa one nokome kago wi wi tokoka eni eni kago pekapadete nepikoa kaki.
37
Atu piameneya wedoa nepikoa kakili enekome tobou agome eya toademe toko. One
pupu mamina moa kakome nee noatino noe wa kayo oa moa mekatapekome kini nee takoa
lawetademe toko. Nipa ke wa kini kolotini natekademe toko.
38
Likonu toe lene taku takoa
motiki-peteka tebolo takoa motiki-peteka tobou ago nokome enekolo wedoa nepikoa kakili
enekome ke wa kini kolotini natekademe toko.
39
Enikepa eya waneka ukuno, yakamene.
Yapu pinagome-kiti onekeya kode moa poatekago ipete noo wa wene too tokapa yapu
bulukoa onekeya-kiti kode motokaya tokale lene kia wedoa nepikoa kawoo toka.
40
Eina
toane no Ali Yatenane Oyago kotikatapeane nouno, wedoa nepikoa kamene wa Yesuyo
akeneya.
Panagotame Panagono Pupu Takakete
Taneleke Pedoa Akenemo
(Matiu 24:45-51)
41
Yesuyo nimo okale Pitayo okome Ali Muno neme wini pedoa oko agalepa neke oya
tone takoa oa meteko patu. Ali atoa peya kikilikoa oa meteko patu wa okale Ali Muno
agome okome
42
tobou agonole-kama wedoa wene toa takako agoke ukuno, yakamene.
Tobou agome dikane ago-pala eya wa oa too. One ali atoa neme yopikamene wa oapa kini
nee eya noatekoi toa oneme-kama tatia lawetekamotoa moa kakoo.
43
Nitimotokome ta
padeka pome mea wakapea nokome enekale tamene wa oa pokanakaledo pa takama
pekedekale enekomepa ke wa one kolotini natekoo.
44
Nipa onekeya peya neme-kama
yopikamene wa moa kakoo. Enipa nimini uku.
45
One pupu takakagomedo onekele takoa
potokakomepa eya tadiya too. Tobou ago wete wakapea noamoo wa tobou agono pupu
takakoi ali atoa layo toua wia nee bia ueka nokoa pia leau oa yawa too.
46
Paya nou toa
nitoa mekaka tobou ago wakapea kotikatapea nokome einago dika dika toamene tete meoo.
Nipa tobou agonole takoa potokane yene pitikoika moa kakoo.
47
Tobou agono wene pikale wene tokomeke nodokoa meamoa one okaleka toamoka
agopa tobou agome kibu motokome layo toua wedoa wikala too.
48
One wene pikale wene
toamoka agome padele kibu moatekale tokalepa tobou agome kibu motokome layo toua
wedoa wiamoo. Nipa Akolaliyo padele padele toatekale yametekagomepa one eni
yametekanakale wedoa toma pamedeko. Pade-kitame kinikiya keda takoa metekoli
motokagomepa one eni motokana toa ete wa metekome etene ako meamedeko. Nipa ako
mano wa okoli ako-kama meamedeko wa Yesuyo akeneya.
Ali Atoa Puutakutukoa Mekimo
(Matiu 10:34-36)
49
Itono ludu toe pitikadene nekene uku. Ae, toe wete udukamotadiyano wene pikene
uku.
50
Ue mou toane dika dika toamene tete moadene meku. Ae, enile wete
taatekameneyake wene keda mati taneya meku.
51
Noanumepa ali atoa poi teigoa wawa poti
kilikoa memotoane nekedeku wa wene piki-pe. Nopa nitateku ago mena. Ali atoa
puutakutukoa memotoane tekene ni nokou.
52
Opi titimoa odene yapu pitiki ali atoa ko
kakoa (5) tadiya puutakutukoapa takutame pade wene pia tebolome pade wene pia
puutakutukoa meoi.
53
Etena-kiti etene pade wene pia mana pade wene pia ete oto wa
letetakutukoa mea ni nina-kiti nine pade wene pia kono pade wene pia letetakutukoa mea ni
atoa-pala anane nine one kaua atoata ete oto wa letetakutukoa mea tokala toi. Ali atoa nitoa
memotoane ni nuku wa Yesuyo akeneya.
Padele Tokale Eneketepa Ile Toatekolo
Toko Wa Wene Toa Oatekomo
(Matiu 16:2-3)
54
Yesuyo eida oboa kakene ali atoa-pala eya waka akeneya. Lou pipoko lono wedo
witoa nokolo eneketepa ta eni noo tadeko wa ikina. Nimo ikina toa taatekoa ta eni noko.
55
Ni pupulege keika lono titimoa nokolo eneketepa nipa poto tubeya too tadeko wa ikina.
Eni ikina toa taatekoa poto eni toko.
56
Ae, wene takuta pianeya meki yene kipala i ukumo
yakoe. Itonokeka a tibukeka padele witakole eneketepa ile taatekoa toatekolo toko wa kime
tetoa eneki. Nitikiyake ipete kiwi pakeke witakolepa ile taatekoa toatekolo toko wa tetoa
enamiki wa Yesuyo akeneya.
Poi Te iane Ago-pala
Odene Wene Pia Enamene
(Matiu 5:25-26)
57
Ipa poanele tadeko ipa epetanele tadeko wa kini weneme dekolo takoa enamiki-pe.
58
Panagome-kiti i ago neme poanele tokanano, pata wa koiso yatekakago mekata aua
pokalepa eya tamene. I ago ame koiso wamatono, odene weneta piata wa oa enamene.
Nitameneya eniledo toamokalepa koiso pitia yatekakago mekata lia aua pokale pitia
yatekatekoa one poyo ago metekale moa ne po yapu pitikoo.
59
Nitikale neke take oto
noateka kuedo odene tuane kue waneka katekoa wete meameneyake nepa eida pa pioo wa
Yesuyo akeneya.
Luke Luke
<<
12 12
>>
Luke Luke
<<
13 13
>>
13
Kini Namolole Wawa Tewitikameketepa Tuei
1
Einata einapete Galili yene-pala tanemopa eida kakoi ali padeka-kitame Yesu-pala
to awea akeneya. Nipa Galili yename kini sipi sipi kai wia Akolalike lodo yoa kakakoa
Pailaseyo wia tukapoatino poe wa one poyo ali-kiti moa wetekanemo i i wa to awea
akeneya.
2
Nitikoli yatekome Yesuyo okome Galili takepa ete yename poanele tane toa moa
patukoa o yename poanele tubele taneya tokome tete mati ni motaneyano wene piki-pe.
3
Kipala i ukumo yakoe. Kini namololedo tewitikoa Akolalike tepe kolotini pekoa pia
toameketepa kimeka dika dika toamene tete moa tuei.
4
Siloame takepa ludu yapu ta
enapeatekoiya yapu kilikome tanemo yakamokoiya-pe. Kalabe kakoa (18) ali atoa eni
kilikome witaneya. Yerusaleme takepa ete yename poanele tane toa moa patukoa o yename
poanele tubele taneya tokome ni kilikome witaneyano wene piki-pe.
5
Kini namolole
tewitikoa Akolalike tepe kolotini pekoa pia toameketepa kimeka dika dika toamene tete moa
tuei wa Yesuyo akeneya.
Ku Tuamene Yomo Pikike Pedoa Akenemo
6-7
Yesuyo nimo ootokoa kakome agale pade pedoa okome okome ipe pinago pade
one gerepi po ipe pakeke yomo piki pade eida mataneya kakeneya. Ku wete tuko patu wa
enepokale ku tuameadeka. Nitadekale ipe talo takaka ago-pala okome mali tebolo ponokale-
kama ku tuko patu wane enenokala tokounake ku wete tuamokala tokono, dekolo ipe
pakeke pa kamotoa toko-pe. Wete ka wa pitikamene wa okale
8
talo agome okome Ali Muno
opa ka wa pitikamato. Tokene tuku kakoa (12) ponomotoane wedoane lati lati toane kai te
tagolota moane pitikoai tou.
9
Nitikoludo ku tukale enekepa pa kamota. Nitameneya ku
tuamokalepa nipa ka wa pitikato wa talo agome akeneya wa Yesuyo akeneya.
Yesuyo Mukiti Tukuane Atoa Latekanemo
10
Ko mea pupu toamene-pete pade Yesu losu yapu pade pome olaukapaneya.
11
Eida
atoa pade meaneya. Einatoapa ipono awitaneya tokome mali kalabe kakoa (18) ponoka toa
mukiti tukuaneya kiyotokakamele toameneya meaneya.
12
Einatoa enekome Yesuyo nee noo
wa kayo oa motokome okome anu oyatoa neke taneya mea kakene yenepa opi takoa
pokolo uku wa
13
one yono einatoake pikale eina eina mukiti kiyotokakaneya kawa Akolali
kei pia kakeneya.
14
Nitikale enekome losu yapu yopikagomepa i ago Yesuyo tone ko mea
pupu toamateko-peteka i atoa eni latekako wa wene poaneya meaneya. Nitoapa e yene-pala
okome okome tone pupu tikilepa ko melepu (6) kakoa-peta-kama tokoyano, enipete-kama
oyake latekamotoa namele tokono, tatono takoa (7) ta patako-petepa tone pupu toamateko-
pete nitamele toamoko wa wene pokome okale
15
Ali Munagome eni yene peya kikilikoa
okome okome winipa wene takuta pianeya meki. Tone ko mea pupu toamateko-peteka kini
pitimekawe kai dogi kai eya kolago taneta akolono ue mekoka ue nomotoa aua pokala tiki.
16
I atoapa Eberameke taagene atoa mali kalabe kakoa (18) ponoka toa eina yene taneya mea
kamotoa Setanuyo moa labakaneya. Nitaneyano, tone pupu toamateko-peteka one pa pia
kakene yene dekolo takoane wetekamotoa wamiki-pe wa okale
17
one-pala wene poaneya
meane-kiti yaame tuaneya kakeneya. Nitaneyake ete peyame one tubele toma pekeneleke ke
wa wedia kakeneya.
Kalipe Lene Deyake Akenemo
(Matiu 13:31-32, Make 4:30-32)
18
Yesu pa eida kakome okome Akolaliyo one ali atoa pawe toa talo tikilepa edoa toko
patu. Edeya wane adeka piane uku patu.
19
Kalipe lene deya panagome-kiti yamanu moa
pitikakalepa tumia witakome wetini tootapeneya kaka. Nitaneya kakalepa ini pukaneya note
yeneneke yene wikala taneya wa Yesuyo akeneya.
20
Yesuyo eya waka akeneya. Akolaliyo ali atoa pawe toa talo tokolepa edeya wane
adeka piane uku patu.
21
Pade atoame-kiti yisi kugu deya moa palawe kugu odene bekoke
pitikoa eletekaneya. Nitikalepa palawe kugu keneke alama pokome eina palawe mono mono
akatapeneya wa Yesuyo akeneya.
Nateya Edetekane Kagoke Pedoa Akenemo
(Matiu 7:13-14, 21-23)
22
Yesu Yerusaleme poademe pokome pitikali pitikoikaka ali atoa natetekoa pitikoikaka
pima pekeneya. Nipa Akolalinemo i i wa olaukama pekeneya.
23
Nitima pokaka panago
oneke nokome okome Ali Muno eya wane ne yatekene ukuno, yakamene. Akolaliyo ali atoa
toa motikilepa natetekoa toa motoko patu-kale okome
24
Akolali mekota poatiki ka
keteponopa kago nateya edetekaneya kakono, eni kago keneke patukoa ponadetepa wili toa
kamene wane uku. Ali atoa peya matiyame patukoa ponadete wili toa kawa teko tokale
wakala toi tokolo ni uku.
25
Yapu pinago kamoa pokome kago ketepono loko pitikoo.
Nitikale kago keteaneya kakale ali atoa kiwi eida note akolono kago koloikoa kakete ekete
Ali Muno Ali Muno i kago wete pekanamene wa okoli okome manika kawa niki-pe. Kiwi
wene toamuku wa oo.
26
Nitikale ekete nepala odeneya opia mekete nee ue eya nakoonano,
nepa tone yapu ludu noke olaukanokala tokonano, wene toamuku wapa dekolo oko-pe wa
okolika yapu pinagome okome
27
kiwi kawa nikita wene toamukuno, poanele-kala toa kaki-
kiti no wete tewitikoa poe wa wia lititapeoo wa oo.
28
Eidapa komome kabe kawamokale
komo ka ta pitikoa kawei. Nipa Eberame-loe Aisake-loe Yekobe-loe Akolaline agale to awea
akane ali-kiti eni yene peya Akolaliyo talo toko ta eida e kaki wa enoa kagoke poadete note
kakolika wa kiwi etepea wia lititapeoo.
29
Yu yene kipa oyake patukoa ponamele
toamokaleka e ku mone yatene-kitipa lou witia noko lonoka lou pipoko lonoka yekeika
yukukataka kawa note eni kago keneke patukoa ponete Akolaliyo talo toko take toge
lobutukala toi.
30
Ali atoa padeka-kiti ketea kawake wa namolo ponete kaponoi. Wa padeka-
kiti namolo kawake wa ketea kawa ponete kaponoi wa Yesuyo akeneya.
Yesuyo Yerusaleme Ela Motokome Akenemo
(Matiu 23:37-39)
31
Einata eina-pete Parisi ali padeka-kiti Yesu eni kakata nekete ekete ako tobou ago
Erodeyo ne wia tukademe okono, i ta wete tewitikoa pa-koli okome
32
wini agale oa
yotokako agokepa agale pade oane wetekakuno, akapoe. Opi podoliyotapa ali atoake
awitane ipono takoane wetekoane yene tane ali atoa latekoane toane wa ta tebolopeta
patakale anu toatekoule peya takoane wipitiou.
33
Nipa opi podoliyota eko patepeyo-kitika
enile toma pekene Yerusaleme take pamedeku. Ni edoa-mo. Akolaline agale papete to awea
akane ali peya Yerusaleme ta eida-kama wia tukakala taneyano, noka eida tuadene eni
pukuna.
34
Ae, Yerusaleme ta neke wida pitikoi yenamepa Akolaline agale to awea akane ali-kiti
wia tukama-kala nekeneya. Ni Akolaliyo neeke wida moa wetekane ali-kitika kueme ka ua
tukakala tane toa opii pa tiki. Nitaneyake ogadame idini-kiti pawena keneke lumoa pitikou
toane tekene neke wida meki yene pawe toane moadene tokounake ko ite katite toa wakala
tokoina.
35
Ae, Yerusaleme ta nepa pa tumu tokamotoa neke wida pitiki yene to a
pootapeadete tiki. Ae, no papete wa enekileka toamoo. Nipa no i agopa Ali Muno patu
kautakoa kama nokono, Akolali neme wedoa mekamene-ye wa no wete wa makutukoa
moameneyake anu lene timini wa pade enamoo wa Yesuyo Yerusaleme ta-pala akeneya.
Luke Luke
<<
13 13
>>
Luke Luke
<<
14 14
>>
14
1
Yu yene ko mea pupu toamene-pete Yesu ibini akene Parisi ago padane yapu nee
noademe pome mepaneya. Nitikale eida oboa meane yename lene tuaneyame wia meaneya.
2
Eidapa tigini yoa lobutukatapeneya meane ago Yesuno leneke nome kakeneya.
3
Nitikale
enekome Yesuyo Mosesene totono pine to a olaukane ali-kitika Parisi ali-kitika pitia
yatekome okome Mosesene totono litiapa tone ko mea pupu toamateko-pete yene tane-kiti
oyake latekamele toko patu-kale
4
agale waametekoa pa mekoli yoname moa latekakome opi
poano pa wa wetekaneya.
5
Nititikoa okome kiwi panago one pitimekawe kai dogi kai eya
koa pokalepa pinagome edoo-pe. Ko mea pupu toamateka-peteka eni eni pokome one kai
ate lia motokomepa pupu eni tokome too. Enipa nimini uku-pe-kale
6
agale topo takamele
toameneya.
Toge Lobutupote Mekete Toatekomo
7
Wa padepete Yesuyo agale pade pedoa akeneya. Nipa toge nee nonamene wa agale
oa wetekaneyake nekene ali-kitame ibini akene yene meatekoi walai tuku toa pote mepokoile
enekome tokome ni akeneya.
8
Nitikome okome panagome manane atoa motokakomepa
toge kikakakuno noe wa agale oa wetekakale nekepa ibini akene ago meateka walai poke
mepameamene. Ni edoa-mo. Ne keku kamotoa ako tobou meka agopa toge yopikagome ne
noo wa agale oa wetekakale noka patu.
9
Ako ago nekedekale toge yopikagome ne poke
mekata nokome okome i ago ako ago meatekota ne wini mekono, i ago wida memotono, ne
pa wa okalepa nepa yaame tuaneya poke etene keku ago meatekata mepoo.
10
Wa tobou
agome ne no wa agale oa wetekakale nekepa keku ago meatekata mepamene. Nitikalepa
toge yopikagome ne mekata nokome okome anu oya ne ako walaike no mekuya liti
menamene wa oo. Nipa ne-pala eida odeneya mekete nee nakoi peya mekakoa yopikagome
ne kei pioo.
11
Nipa pinali one wa ako ago tetepo takakalepa Akolaliyo one keku ago tetepo
takoo. Pinali one wa keku ago tetepo takakalepa Akolaliyo ako ago tetepo takoo.
12
Yesuyo nimo ootokoa mekomepa ne noo wa agale oa wetekakanakago-pala okome
toge kikepa neke oya-laweka nekameyo-mikitika neke take kamo yeneka toge kikakakuno,
noe wa kayo oa moameamene. Ni edoa-mo. Enika eni yenamepa naniko toge kikakakuno,
noo wa neke nami wiei.
13
Toge kikepa ponopeneya mea yono poaneya mea kawa okeaneya
mea leneta lianeya mea tiki-kiti noe wa kayo oa moamene.
14
Dikane yename neke nami wia
lawetatikiya toamokale tokome neke nami wiamele toamoo. Nitamele toamokaleka
Akolaliyo ke wa neke nami wioo. Nipa wene kiyo akeneya meane yene moa kamotokaka-
pete ke wa neke nami witikale kolotine meoo wa Yesuyo akeneya.
Togeke Noamadete Wakene Yeneke Akenemo
(Matiu 22:1-10)
15
Yesuyo nimo okale yatekome one-pala eida opia mekome nee naka ago padame
okome Akolaliyo talo toko take mekete nee nakoi yenepa kolotine meoi-kale
16
Yesuyo
agale pedoa okome okome panagome-kiti toge mati kikakouno, ipete noe wa ali atoa peya
matike agale oa wetekaneya.
17
Eni oi ponokale tobou agome pupu ago-pala okome namene
wane agale oane wetekakouna-kiti nee nodokoa pikono, noe wa akapoano pa wa moa
wetekaneya.
18
Nitikale peyame namele toamoko wa waamu taneya. Panagome okome itono
pade pene topo toane motukuno, enepadene noamukuno, ela toko wa wakeneya.
19
Wa
panagome okome kogono pitimekawe kai yonota tuane (10) pene topo toane motukuno,
eni kai toane enepadene wida noamukuno, ela toko wa wakeneya.
20
Wa panagome okome
anu atoa pene motukuno, namele toamoko wa wakeneya.
21
Peyame nitoa wakoli pupu ago
tobou agoke wakapea nokome eina wakete akenemo i i wa to awea onaneya. Nitikale yapu
pinago kotimi wene mati luaneya mekome pupu ago-pala okome tone pitiko ta piko peyake
batete luduka ka luduka wete pa. Nipa ponopeneya mea yono poaneya mea lene lianeya
mea kawa okeaneya mea tiki-kiti enemopoano pa wa wetekaneya.
22
Nitikale enemoa aua
nokome okome Ali Muno neke okale toane enemoane nokounake ali atoa meatikita pa
pikono, deku patu-kale okome
23
ta kebonokeka tayo tayotaka pa pitiki ali atoa noe wa tika
tika toa aua noo. Anu yapu edea takatapemotoane ukuno, enemopa.
24
Eina namolo takoane
noe wane oane agale wetekakolu wakoina-kiti anu toge nee nomotoane wamuku wa tobou
agome akeneya wa Yesuyo akeneya.
Yesu Litiadete Tonekeya Wawatekomo
(Matiu 10:37-38)
25
Yesu pokaka ali atoa obomoa litima nokoli Yesu ete peketapea kakome okome
26
panagome-kiti etene nineta mati atoa wamene laine-mikiti kote motane tetepo takameneya
tewitikoa wawamokomepa no oyake litia namele toamoko. One kepene mama moa tuamene
piti motaneya mekomepa no oyake litia namele toamoko.
27
Ni one wia dekatiki yomo-pala
aua poamademe wawou toa anukule takama pokome tete-pala moamademe wakomepa nipa
no oyake litia namele toamoko.
28
Kiwi panagome one ta enapeateko yapu ludu yapu wiademe-kiti eni yapu wiane peya
takateku kue oyake piko patu wa wene kibutukapia meoo.
29
Eniledo toamokomepa nipa
itono pedoa yapu wete wia peya takameneyake one kue pootapeoo. Nitikale enekete ete
peyame ekete
30
i agome one yapu titia eina wikanake oyake wia peya takamele toamokolo
pa pegene kakalogoa wako wa ya motokoa oi.
31
Ni tobou ago padame eko tobou agono yatene-pala poi toademe-kiti namolo takoa
eya too. Eko yatene wia litikome toateka oi pedoa pia mekomepa one yatene
natetekoameke eni yatene pitikali oyake kutu litiku patu wa wene kibutukoa meoo.
32
Pitikali
oyake kutu litiamele toamoko wa wene pikomepa eya too. Pitikali ta padeka mati nome
dekakoa pitikota one oyago-mene moa wetekakomepa poi pia enepamene wa moa
wetekoo.
33
Eina toa kinikiya peya tewitikoane waou wa wene kibutua meameketepa no
oyake litia namele toamoko wa Yesuyo akeneya.
Paya Kusake Akenemo
(Matiu 5:13, Make 9:50)
34
Kusa eni nakiyapa epetaneya tokolo uku. Nitaneyake me pekene kusapa edoa wa
meke takamotoa-pe.
35
Dikane kusapa ipe luduka nee yabunu kai te eya pitikoai tikitaka moa
mitikatekole toamokolo pinagome paka miitapeko. Kale piiyakoa kaki-kiti kipala i ukumo
yakoa moamene wa Yesuyo akeneya.
Luke Luke
<<
14 14
>>
Luke Luke
<<
15 15
>>
15
Katepitoa Pekene Sipi Sipi Kai
(Matiu 18:12-14)
1
Takesi kue motokama yakene ali-kiti Mosesene totono tagoa toamene yene peyame
Yesuyo okamo yakadete one mekata obonokala taneya.
2
Nitikoli Parisi ali-kitameka
Mosesene totono pine to a olaukane ali-kitameka Yesu akoa lubulubu pikakete ekete i
agomepa Mosesene totono tagoa toamiki yene makutukoa moa odeneya opia mekome nee
nako wa okoli
3
Yesuyo eya wa pedoa agale akeneya.
4
Kiwi panagome sipi sipi kai ege
takupeta kadukoa (100) egetekale-kiti odenedo katepitoa pokalepa pinagome ete (99) sipi
sipi kai ali piamene take koukoa kakoika pa kamotoa eina katepitoa atupokana kai pitia tuku
toma poo.
5
Nitoa enamua motokome wedia kawa kotomaneke wia apulogoa wakapea noo.
6
Yapu eni nome kakome one oya-lawe one yapu liti mekoi peya kayo oa motokome okome
auna katepitoa atupokana sipi sipi kai enamuane moane nekene ukuno, wedikete wediatono
noe wa kayo oo. Enipa nimini uku-pe.
7
Eina toa Mosesene totono tagoa toamene ago
odenemeka one namolole poanele tewitikoa wakalepa a tibuke mekoi peya wedia kawei.
Nipa pade ali-kiti ege takupeta kadukoa (99) kini namolole poanele wete tewitikoa wakeneya
tekete wene kiyo akeneya mekoi yeneke wedekilepa teketeke einago odene agoke wedoa
wedikete kolotine meoi wa Yesuyo akeneya.
Atuane Kue Leneke Pedoa Agale Akenemo
8
Pade atoame-kiti one kue lene yonota tua pikoyake wa pade odeneka atukolopa nipa
eya toko. One labo udukoa yapu do wedoa pokama pokome tuku toa kawa enamua
motoko.
9
Enamua motokome one oya-lawe one yapu liti meki peya-pala okome auna
atuane kue lene enamuane motukuno, wedikete wediatono noe wa kayo oa motoko.
10
Eina
toapa Mosesene totono tagoa toamokome etepea pome atupoka ago odeneka one
namolole poanele tewitikoa wakalepa Akolaline edelo ali-kitame ke wa wedoa wedia kawei
wa Yesuyo akeneya.
Atupane Ago Eteneke Wakapea Nekenemo
11
Yesuyo eya waka pedoa akeneya. Panagono manata takuta kakeneya.
12
Padepete
putunagome etene-pala okome atai neme kadimo oa no tatikoa meatekoya-kiti opi mouno,
wete tatikoa meano ta-kale etename tatikoa metaneya.
13
Nitaneyake ta pade-mene lia
patakale putunagome onekeya peya moa ta tetemada pome mepaneya. Nitoa pale toa
mekome onekeya peya paka wetekamu taneya.
14
Wetekamu taneya pa mekale one eida
mekata kobu igi mati witaneya. Nitaneyake kobume tuaneya mekome tokome
15
ta pinago
pade mekata pokome okome neke takateku pupu pade piko-pe wa yakapokale tayo lono
one kai kakane lono one kai egetekapa wa wetekaneya.
16
Eida egetekakoa mekata kobume
tukomepa kai naki neepa nou wa wene pianeyake padameka one noatekaya lawetekile
toameneya.
17
Nitaneyake one poane wene wia wakome okome Agetaine pupu takaki yene
peya nee noa kitipu-kama mekiyake nopa nee noamoane kobume tuaneya i mekuno,
18
agetai mekota wete wakapeane poada. Pekene ekene atai, Akolaline leneke kakene
poanele tokou. Ne-palaka poanele eina tokou.
19
Nopa dikane agono, neke mana wa neme
amele toamokono, neke pupu ago tetepo takoa pa pupu yameano ta wane opou wa
20
kamomotokome oneketai mekata poademe pekeneya.
Nitoa noademe nokale etename enekome elame tuku wa teyapea pome kotua tebea
nunu oa kakeneya.
21
Nitikale mana agome okome Akolaline leneke poanele tokou.
Nepalaka poanele eina tokouno, nopa neke mana wa neme amele toamokono, pa pupu ago
tetepo takoa pupu pade yamea ta wa kowitaneya.
22-24
Nitikaleka etename pupu yene-pala
okome manago atupane ago i nokono, tuaneyano wene pikounake i nome kakono, one
kawateko mamina epetane mati wete moa kakakoa one yonoke makai wane moa mekakoa
kawa yeneka moa mekakoa toe. Togeke wiadete la motoa egetekoona pitimekawe kai tine
wete moa wia kikakamene. Toge kia wedikete wediatoe wa okale toge nodokoa pia wedia
kakeneya.
25
Nitoa kakakoa namolo ago ipe toa kawa wakapea nome yapu liti kakome yatekale
tulutu oa kawa pitikoa wedia kakoimo yakaneya.
26
Nitoa yatekome one pupu ago pade ne
noo wa kayo oa motokome okome i yatekumopa edele tekete ikiti-pe-kale okome
27
neke
wamene opi noka. Nitikale neketaiyo one tuamoa padeleka toameneyano ke wa wedia
kakomepa tone togeke kiadete la motoa egetekoona pitimekawe kai tine wia kikakakome
toko wa okale
28
yatekome kotimi wene luaneya kakome kini wedia kakoita poamademe
wakale etene ako lono one kakata pokome ne noo wa kowitikale
29
okome atai, mali peya
mati ponomotoane neke agale odepetaka tagameneya meane neke pupu pa takoane kakou.
Nitikouyake meme kai tine i metekuno, neke oya-lawe-pala wia kia noa wedia kawati wa
odeneka meamokana.
30
Nitamokanake neke mana putunago wakapea nokalepa togeke
kiadete la motoa egetekoona pitimekawe kai tine wia toge kikakaka. Neke kamoya-kiti moa
pokome pamoko atoa-pala opia mekome paka wetekamu taneyake toka-kale
31
etename
okome tota odeneyata mea kakoona. Anukuya peyapa nekeno, dekolo wene poaneya kake
oko-pe.
32
Neke wamene ago tuane tetepo taneyake opi i noko. Atua pekeneyano wene
pikounake opi i eneku. Nikepa ke wa wedia mekilepa tamele toko wa etename akeneya wa
Yesuyo akeneya.
Luke Luke
<<
15 15
>>
Luke Luke
<<
16 16
>>
16
Kepene Mama Motokagoke Pedoa Akenemo
1
Yesuyo one oya-lawe-pala eya waka pedoa akeneya. Kamo agome-kiti onekeya neme
yopikamene wa panago moa kakaneya. Nitikale yopikoa meaneyake pade-kitame ekete
winagome nekeya-kiti paka wetekamu toa talo toa potokakako wa to awea onokoli
2
kamo
agome ne noo wa yopikaka ago kayo oa motokome okome neme toa potokanemo-kiti
onikino, anukuya-kiti neme yopikake oi pima neke tadekale enouno, eni wia pika boku aua
namene. Anukuya-kiti neme wa oyake yopikamele toamokolo uku wa kamo agome
akeneya.
3
Nitaneyake one toateka wene kibutua mekome okome kamo agome no ne pa wa
wetekademe toko. Itono wetiane ipe enika eni pupu toateku tele meamoko. Eko pade ali-
kitaneya oiane moamene ya motukuno, deku patu.
4
Kamo agome pa wa wetekakale pa
pima yakenepa ali atoame kini yapu ne noo wa no makutukoa momotoane tekene ile tou wa
wene kibutukapianeya.
5
Nititikoapa one Ali Muno agonoke padeya-kiti nami kakoa motane
yene peya odene odene wa kayo oa mokala taneya. Nitoapa panago-pala okome neme
tobou agono nami wia ete meatekoyapa edela piko-pe-kale okome
6
olipe yomo ku uepa
mete keneke mekoane ege takupeta kadukoane (100) nami wiane meamedeku wa okale
okome eina ete meateko oipa bokuke wiane mekakouna pade pilia wawa koikoa eni lukuke
ege odepeta kadukoa (50) oi wia mekamene wa akeneya.
7
Nitoapa padago-pala okome
tobou agono nami wia ete meatekoyapa edela piko-pe wa yatekale okome witi ku kake uane
kite toane ege kadukaka kapidime kadukoane (1000) nami wiane ete meamedeku wa okale
okome eni oipa bokuke wiane mekakouna pade pilia wawa koikoa eni lukuke ege kadukaka
wageneme kadukoa kakoa (800) oi wia mekamene wa akeneya.
8
Einagome dikoa toa potokakaleka tobou agome okome pinali neke kepene mama
moteke toatekale wedoa wene kibutukapiadeko wa one kei pianeya wa Yesuyo akeneya.
Nimo ootokoa okome itono peku noa tiki-kitame kini yagono-mikiti-pala toatikile wedoa
wene toa tikilepa pa keneke Akolalinele takama yaki-kiti moa patukoa tiki wa Yesuyo
akeneya.
Kue Pikoa Mekete Toatekomo
9
Yesuyo nimo ootokoa okome kini kamo tikilepa yete pade ali atoa-pala tatiane oya
kakoane tou wa tamene. Nipa eni kamoya wetekamu tootokoa pa mekepa mea kawateko
take namene wa makutukoa momotoa teke nitamene.
10
Panagome-kiti one natele toatekale
epetekoa tokomepa nipa tubele toatekaleka epetekoa too. One natele toatekale toa
potokakomepa nipa tubele toatekaleka toa potokoo.
11
Nipa itonoke kamoya-kitipa kime
pikoa mea potokadekolipa nipa one epetaneya pia kawateko kamoya talo takamene wa teyo
edoa memotoa-pe.
12
Panagoneya talo takoa potokadekalepa nipa one kamoya pade ne pa
metekene metekuno, moa ta wa teyo edoa memotoa-pe.
13
Panagome yono tatikatakutukoa ali takutane pupu oyake takamele toamoko. Nitoado
tokomepa panago-pala kotimi wene luaneya mekome wa padena agoke wene mekoa
mekome pupu takakala too. Ni panagoke wene tugoa mekome wa padena ago paya tetepo
takoa too. Nipa Akolalinele takakilepa kamolekeka wene piitikaneya mea tamele toamoko
wa Yesuyo akeneya.
Yesuyo Akenemo-mene
(Matiu 11:12-13, 5:31-32, Make 10:11-12)
14
Yesuyo nimo okale Parisi ali-kitame yakakoa kaketeke tea agale oa kakeneya. Nipa
kini kueke-kama wene piitikaneya mekete ni taneya.
15
Nitikoli okome ali atoame kiwi kei
pimotoa tekete kini leneke wene kiyo akeneya meane tetepo takoa mekilika Akolaliyo kini
wini tepene piko wene tetoa eneko. Ali atoame tobou kakoa kei pikiya-kitipa Akolaliyo kote
motuku wa kotimi wene luaneya meko.
16
Papete Moseseyo one totono i i wa yamea wia mekaneya. Akolaline agale to awea
akane ali-kitameka one agale i i wa to awea akama nekeneya. Wa naniko Yone taatekoa
nekene-pete titimoa weneya totono Akolaliyo ali atoa talo tokome tokomo kini wene
epetekakomo oa aua yakili e ku ali atoa Akolalike lukoa meadete togo togo oa kakili uku.
17
Nimopa wane ekeneke eya waneka uku. Itono tibuta oyake takoa pamele tokoyake
Mosesene totono pademoka katekamele toamoko.
18
Panagome one natono wawa eko pade atoa motokomepa nipa mone moamateko
atoa eni motoko. Aname wakene atoa panagomedo motokomepa nika mone moamateko
atoa eni motoko wa Yesuyo akeneya.
Kamo Ago-pala Lasarusitake Akenemo
19
Yesuyo agale pade pedoa okome okome kamo ago pade ta pataka abuna
kamokakome kudulu pagene mamina eya kawa nee epetaneya-kama noa taneya.
20
Einagono
kago keteponoke ponopene ago pade one ibini Lasarusi tono pageneya nome piai taneya.
21
Nipa kobume tuaneya mekome kamo agono walai keneke pitaka nee kugu noadiyano
wene pia taneya. Nitikata tue-kiti nekete one tono li abetoai taneya.
22
Ponopene ago nitoa
pa mea tukale edelo ali-kitame a tibuke moa aua pote Eberamene yono kounoke
kakapaneya. Kamo agoka tukale oloyo taneya.
23
Nitaneyake poane take pome mekome
dika dika toamene tete mokoa kakome ate enapekome enekale ta padeka mati Lasarusi
Eberamene yono kounoke kakale enekome kayo okome okome
24
atai Eberame noanu ela
moamene-ye. Toe itipono okoa kakota i kakene tete dika dika toamene mokoane kakuno,
winago Lasarusi one kadapi yono munoke ue takamoa anu keke ko akakanomono, pa wa
oto wetekamene-ye wa kayo okale
25
Eberameyo okome anu mana ne itonoke mekepa
epetaneya-kama motokana. I ago Lasarusi nitameneya edawe mekana. Opa i ago wedia
mekoyake nepa tete mokoa wini kako.
26
Nika ne-pala toto-pala kobu tubeyame pilikaneya
mekono, ika meko-kiti winika nouno wene piketeka winika namele toamoa winika meki-kiti
oto namele toamoko-kale
27-28
yatekome kamo agome okome winimopa nimini okoyake eya
tamene wane ne kowitikene uku-ye. Agetaine yapu anukameyo-mikiti ko kakoa (5) mekete
tikino, no tete i mokoane kakuta note menokayano, wini ago Lasarusi eni yeneke
wetekakamene-ye. Nipa kini tiki poanele tewitikoa wawati wa pubu akapomotono ta wa
kowitikaneya.
29
Nitikale Eberameyo okome Mosesene totonoka Akolaline agale papete
to awea akane ali-kitane agaleka pa kini oi momotono ta-kale okome
30
ae, atai Eberame
anukameyo-mikitame enimo oi moamoi-li. Tukome tuane agodo kamomotokome kini
mekoita pome pubu opokalepa kini poanele tewitikoa waweino, wini ago wetekakoa ta-kale
okome
31
Moseseyoka Akolaline agale papete to awea akane ali-kitameka wia mekane agale
yakoa moameketepa nipa tukome tuane ago kamomotokome mekoita pokome okamoka
etene yakamoi wa Eberameyo akeneya wa Yesuyo akeneya.
Luke Luke
<<
16 16
>>
Luke Luke
<<
17 17
>>
17
Ali Atoa Likoa Eneki Yeneke Pubu Akenemo
(Matiu 18:6-7, 21-22, Make 9:42)
1
Yesuyo one oya-lawe-pala okome okome ali atoame poanele tomotoa padele padele
witakala too. Ae, poanele tomotoa likoa enekoi yename tete mokoa kawei.
2
I mati deya-kiti
odeneka padame likoa enekalepa nipa Akolaliyo kibu motokome dika dika toamene tete
meoo. Ae, eni tete mea kibu moamomotoapa papete mati wete likoa enameneyake pade
alimedo laukakoa tube kue matiyame one kabe kautoa kusa ue muke keti pitikakalepa
epetoo.
3
Kipalaka enile takayano, wedoa meamene.
Neke oyago padame ne-pala padele poanele tokalepa kikoa oa moamene. Nitikale one
poane wene wia wakalepa nipa one poanele tokanake po letu mekakana keetapeamene.
4
Nipa ta pataka abuna tatono (7) kakoapeta poanele ne-pala one tokala toake wa tatono (7)
kakoapeta ne-pala poanele eina tekene tadeku wa one poane wene wia wakala tokalepa one
poanele tokala tokanake po letu mekakana kekala tamene wa Yesuyo akeneya.
Akolalike Wene Tugoa Mekete Toatekole
5
Yesuno oyali-kitame one-pala ekete Ali Muno Akolalinele akole-kama takama poono,
mane mane oano ta-koli
6
Ali Muno agome okome kalipe lenepa dedeyameke witakome leau
akatapea witako. Akolalinele edikoado takama peketepa nipa i kako yomo sikamine yomo
teke to omoa poke kusa ue muke kapa wa okale to omoa poo wa Yesuyo akeneya.
Tobou Agono Pupu Takakete Toatekole
7
Kiwi padago neke pupu takako agomepa neke ipe takoaka neke kai egetekoaka toa
peya takamotokome neke yapu wakapea nokale eneke nee wete nonamene wa neme oo-pe.
8
E 'e mena. Eya wa oo. Nee ue eya nouno, mamina pade moa kawa nee takoa lawetoano ta.
Nee nootokoane mekolu neke nee ue eya noano ta wa neme oo.
9
Enile tamene wa okale
einagome yakoa tokalepa ke wane uku wa neme oo-pe. E 'e mena.
10
Akolalinele dikoa
takamene. Oneme tamene wa oka toa-kama yakoa teketepa one-pala eya wa amene. Tone
toatekole pa eina tokoono, toto pa yene-pala ke wa edoa oade-pe wa amene wa Yesuyo
one oya-lawe-pala akeneya.
Yesuyo Kedime Nakene Ali-kiti Latekanemo
11
Yesu Yerusaleme take poademe pokome Galili Sameria tata otoke pake yakeneya.
12
Nitoapa ali atoa pitikoi ta pade pome kakaka kedime nakene ali noi kakoa (10) one
kotuadete eka mati witimoa kakete
13
kayo telo ekete ekete Tikisa ago Yesu toto ela
moamene-ye wa kayo oa kakeneya.
14
Nitikoli enekome okome Akolalike lodo yotokoai tiki
ali mekita pekete kini lene timini yameatino poe wa wetekakale poadete pokoika eina kedime
nakene yene takoa pootapeadeka.
15
Takoa pekedekale enekome odene ago Yesu kakata
wakapea nekeneya. Nipa Akolali kei telo oa pima nokome
16
Yesuno kawane aua pitakome
ke wa akeneya. Einagopa mone Sameria take agomeke nitaneya.
17
Nitaneyake Yesuyo
okome kiwi kedime nakene ali noi (10) kakoapa kiwi peya latamokoi-pe. Latekakilepa
taneyano, eina pogi kakoa (9) ali-kiti edekoti-pe.
18
Ae, e ali-kiti Akolali kei pinamikiyake o
ago odene mone agomeke Akolali ke wa one kei pinoko wa Yesuyo ootokoa einago-pala
okome
19
kamokoa pa. Nooke wini wene tugoa mekoleme ne eni latekaneya tokolo uku wa
Yesuyo akeneya.
Akolaliyo Ali Atoa Pawe Toa Talo Toateka
Tigotokale Toatekale
(Matiu 24:23-28, 37-41)
20
Parisi ali-kitamepa Akolaliyo ali atoa pawe toa talo tikilepa manipete too-pe wa
yatekoli okome Akolaliyo eni talo tokoyapa kini leneme enemotoa keleyo witamoo.
21
One
talo tokoyapa ku witakono enoe, e witakono enoe wa padameka wamoi. Akolaliyo talo
tokoyapa kiwi pakeke wete witaneya tokolo ni uku wa Yesuyo akeneya.
22
Nimo ootokoa one oya-lawe-pala okome no Ali Yatenane Oyago wakapeane none
meatekou ta pataka odene enadiya wa kime wene pia meketeke wa pade enamoi.
23
Enipetepa pade-kitame winago oto noademe ku nokono, enoe wa oa, wa pade-kitame e
nokono enoe wa oa toino, eni yene litia poameamene.
24
No Ali yatenane Oyago wakapeane
nekenepa katiapale a tibu eka kukata keleyo piatapeko toane pa tootapeneya nokolu peyame
enekete enoi.
25
Nitatekuyake namolo takoanepa tete-kala mokoane kawou. Nitimotoa no
kaku-pete meki-kitame no tewitikoa wawadete tiki.
26-27
Eya ago Noa meane-pete ete mekoi peya paya nou toa mekete gerepi po ku ue
eyake wene piitikaneya mekete alime atoa moa atoa alike pote tokala taneya. Nipa Noa one
tube ue dipi keneke pome mepokaleka edikoa paya nou toa meaneya. Nitoa mekoika ue
mea tagatapekome eni yene wia atukatapeneya. Eina toa ali atoa paya nou toa mekakoane
no Ali Yatenane Oyago wakapeane nekene kotikatapeane nou.
28
Eyago Loto meane-peteka
ete mekoi peyame nee noa eya kuya topo toa moa ipe lene matoa yapu wia enika enile toma
nekeneya.
29
Nitoa mekoika Loto one Sodome ta tewitikoa pokale eina eina Akolaliyo tibuke
toe-pala itipono okoa kakene kuguta pitikoa wia atukatapeneya.
30
No Ali Yatenane Oyago wakapeane nokou-pete mekoi ali atoameka einago Loto
meane-pete tanele pa enile tokoa kawei.
31
Enipetepa panago neke pikoya-kiti yapu keneke
pimotoa yapu liti koo meapa nipa mopada wa yapu keneke poameamene. Eida mea pitoa
pamene. Panago neke ipe toa kawapa wa yapu wakapea poameamene. Eida kawa pitoa
pamene.
32
Loto einagono natono-pala tanele kipalaka takayano, kakoika wete tewitikoa
pitoa pamene.
33
Nipa onekele-kama tokome tukaya wa piti tokolo kepene mama motoko
agopa one yomini-pala etepea tua poo. Wa padekagome one kepene mama moamokome
tukaya wa piti moamoko agopa tukomeka Akolaline take mea kama poo.
34
Eya waneka
ukuno yakamene. Enipetepa adona odene walaike atuta pitikoita-kiti pade eida pimotoa
Akolaliyo padena takoa moa poo.
35
Atoa takuta kini witi ku kugutukoata kakoita-kiti
padatoa eida pa kamotoa Akolaliyo padena atoa takoa moa poo wa Yesuyo okale
37
ekete
Ali Muno neme wini okotapa manika patu wa okoli okome ali tuaneya lomua kakota kego
naki ini-kiti odepeta koukoa note puka puka toa yaita kawei wa Yesuyo akeneya.
Luke Luke
<<
17 17
>>
Luke Luke
<<
18 18
>>
18
Koiso Yateka Agome Nepo Atoa Auapeanemo
1
Yesuyo agale pade pedoa ikilepa Akolaliyo yakoa toatekole nepia mea wawamekete
one kowitoai toatiki adeka pikome eya wa akeneya.
2
Pitikali ta latia pitikoi take koiso
yakateka ago pade eida meaneya. Einagopa Akolaliyoka ali atoameka one akakaya wa piti
moameneya atiki toa meaneya.
3
Eni take nepo meane atoa pade einago mekata nokome
okome panagome no-pala poi te ia mea toa potokakono, no auapea anu koiso yatekoano ta
wa kowitoai taneya.
4
Nitikale pade-mene yakameneya meake wa naniko wene kibututukoa
mekome okome Akolaliyoka ali atoameka no akakaya wane piti moameneya atiki toane
mekuyake
5
i atoamepa no teko takakoa kakono, no mekuta-kama one koiso yatekoano ta
wa kowitoa-kala kakayano, auapeane one koiso yatekada wa akeneya.
6
Ali Muno agome nimo ootokoa kakome okome koiso yatekakagome okomo
yakamene. Wene kiyo wameneya mekomeke okono.
7
Akolaliyopa one wa takoa motane-
kitame ete pia oto pia one kowitoai toa kakolipa kini koiso yatekamoo-pe. Koiso
yatekatekoa wete auapeamoo-pe.
8
Kini koiso wete yatekoa auapekala too. Nitatekoyake no
Ali Yatenane Oyago wakapeane nekene enekolu ali atoa nooke wene tugoa meadekoli enou-
pe wa Yesuyo akeneya.
Parisi Ago Takesi Kue Motokane Agotake
Pedoa Akenemo
9
Yesuyo agale pade pedoa ikilepa pade ali atoa wene kiyo akeneya meku wa kini wa
kei piketeke ete-kiti paya tetepo takoa meaneleke eya wa akeneya.
10
Eyagotame Parisi ali
takesi kue motokama yakene agotame Akolali kowitadete tobou losu yapu pekeneya.
11
Pote kakete Parisi agome one one kakome mate agale keneya oa one tepene kowitikome
okome Akolali ne-pala i ukumo yakamene. Ete-kitame pade ali-kitaneya oa yotokoa moa ele
kule poanele toa atoa lia moa nitoa tikiyano, noanumepa nile toamuku. Kuna agopa takesi
kue motokama yako ago ku kakono, nopa einago keneya menano, ne-pala ke wane uku.
12
Ta patako tatono kakoa (7) ponoko toane-kama takupeta nee wawane pa mekala tuku.
Anu motukuya peya yonota tuane pikala toane pade katekoane moane neke pikakala tuku
wa kowitoa kakeneya.
13
Takesi kue motokama yaka agome nitamokome ete witimoa
kakeneya. Nitoa ate tibuke nepikamene ya tokale kakome one palanu wi wi toa kakome
okome ae, poanele-kala tuku agome ukuno, Akolali no ela moamene-ye wa kowitoa
kakeneya.
14
Nitoa kowitane agopa Akolaliyo poanele toamene ago tetepo takaneyake yapu
pekeneya. Padena ago mena. Nipa pinali one wa kei piko agopa Akolaliyo keku ago tetepo
takoo. Wa pinali one wa paya tetepo takako agopa Akolaliyo kei pioo wa Yesuyo akeneya.
Yesuyo De Mati Deya-kitike Akenemo
(Matiu 19:13-15, Make 10:13-16)
15
Wa pade-pete pade-kitame kini de mati deya-kitika yoname mitikakamotoa Yesu
kakata aua nokoli one oya-laweme noameo wa kikoa okoli
16
Yesuyo okome wini mati-kiti
oto nomotono, etoe. Akolaliyo one talo tuku taapa kinino noe wa yametekilepa dikane mati-
kiti yametekono, oto nomotono toe.
17
Nimini ukuno yakoe. Panagopa mati deya-kiti
Akolalike lukoa mekete tiki toa lukoa meamademe wakomepa nipa Akolaliyo talo toko take
oyake pamele toamoko wa Yesuyo akeneya.
Kamo Tane Agoke Pedoa Akenemo
(Matiu 19:16-30, Make 10:17-31)
18
Tobou ago padame Yesu yatekome okome epetanele toko Tikisa ago, edele tekene
meane kama pou-pe wa okale okome
19
nopa epetanele toko ago wapa wini okono, edekolo
oko-pe. Epetanele-kama toko agopa Akolali odene kako. Wa pade lokoaka kawamoko.
20
Moseseyo tamene wa papete wia mekanemo neme wene toko. Eya wa wia mekaneya.
Mone padane atoa lia moamoa ni ali wia tukamoa ni monekeya kode moamoa ni
panago-pala pa puputua akoa agale wamoa ni neketai neka uata kei pia mama moa
tamene wa Moseseyo akeneya wa okale okome
21
eni akenele-kama tualike laigoane
yakoane toma nuku-kale okome
22
wenepa eni tadekoyake odeneledo katekoa toameadeko.
Neke pikoya peya topo toa kue mootokoa ponopene ali atoa tatia meetapeamene. Nitikepa
neke kamo toatekoyapa a tibuke auma kakeneya enoo. Nitatekoyano, no litima namene wa
Yesuyo akeneya.
23
Nimo okale yatekomepa uu kamo tane ago tokome wene keda taneya
kakeneya.
24
Nitikale enekome Yesuyo okome ae kamo tiki yene Akolaliyo talo toko take
pamene poto tube mati toko.
25
Kamelo kaido noi keneke-kiti patukoa ponokomepa nipa
wedoa wili toa kawamoapa patukoa ponoo. Kamo tane ago Akolaliyo talo toko take
ponokomepa nipa wili tokoa mati kawapa ponoo. Nipa one take pamene poto mati toko wa
Yesuyo akeneya.
26-27
Nimo okale yatekoi-kitame ekete kamo yeneke winimodo nimini
akedekalepa nipa Akolaliyo mainali atoa toa moo tokolo-pe wa okoli okome ali atoame
toamatikilepa Akolaliyo oyake tamele toko-kale
28
Pitayo okome totomepa tone yapu
tewitikoa wawa ne litima noko-kale okome
29
nimini ukuno yakoe. Panagomepa Akolaliyo
ali atoa pawe toa talo tokomo oa mema poademe tokome one yapu one natono
onekameyo-mikiti one etene nineta one mati-kiti tewitikoa wakomepa
30
nipa itonoke enika
eniya luku ako-kitika mokala too. Nitoa mea tukale Akolaliyo one talo tuku take mea kama
pamene wa moa kakoo wa Yesuyo akeneya.
Yesuyo One Tuatekamo Tebolo Takoa
Oa Metaneya
(Matiu 20:17-19, Make 10:32-34)
31
Yesuyo pato wa one oya-lawe-pala eko keneya aua pokome okome kipala i ukumo
yakoe. Opa toto ate Yerusaleme take poadete poko. Pote kakolopa Akolaline agale papete
to awea akane ali-kitame no Ali Yatenane Oyagoke wia mekapiane toa-kama aida taatekoo.
32
Nipa ete Yu yename no dekoa moa mone yenane yonoke moa pikoli paya tetepo takoa
tea kawa tekelipu toa yotokoa
33
po wapime wia toi. Nitoa wia tukolika ta tebolo takoa
pataka-pete kamoane pou-kale
34
one oya-laweme nateya weneka toameneya. Nipa eni
okamo kaukoa keneya okale tokome eina agale pine agopa tokale meaneya.
Yesuyo Leneta Lianeya Mekome Eya Kuya
Oia Meane Ago Latekanemo
(Matiu 20:29-34, Make 10:46-52)
35
Yesu Yeriko ta tigotokakoa witapademe nokaka leneta liane ago pade eida one
ponatekaya liti kue eya oia moa meaneya.
36
Nitoa mekome yatekale ali atoa peya obomoa
ponokoimokamo yatekome okome ipa edele tikiti-pe-kale ekete
37
Nasarese Yesupa wini
ponoko-koli kayo okome okome
38
Depidi-laweke taagene ago Nasarese Yesu neme no ela
moamene-ye wa ka wikoa kakeneya.
39
Nitikale namolo kawa penane-kitame kikoa ekete
ekete oyakeno, wa wa okolika kayo telo kamotokoa okome okome Depidi-laweke taagene
ago no ela moamene-ye wa kayo akeneya.
40
Nitikale yatekome Yesu witimoa kakome
okome winago no kakuta aua noe wa okale one kakaya liti pinele nome kakale Yesuyo
yatekome okome
41
anume edele takamotoa oko-pe-kale okome Ali Muno anu leneta
kikakoa wane uku-kale okome
42
nooke wene tugoa mekolemepa neke leneta epetekakono,
neke leneta kikoa yeka ete ena wa okale
43
eina eina one leneta kikatapeneya. Nitaneyake
Akolali kei pia kawa Yesu litima pekeneya. Enile tokale enekete peyame Akolali-pala ke wa
kei pia kakeneya.
Luke Luke
<<
18 18
>>
Luke Luke
<<
19 19
>>
19
Sakiasiyo Tanemo
1
Yesu Yeriko ta nome patukoa ponokaka
2
uu kamo ago Sakiasi eida nepia kakeneya.
Einagopa takesi kue motokama yakene yene yopiane ago.
3
Yesu edane ago patu wa nepia
kakale ali atoame Yesu ponatekaka apua takoa edetapeneya. Nitaneyake totono ago tokome
one lekoa pokome kawateka kene piameadeka.
4
Nitadekale teigoa teyapea pome Yesu
ponatekaya liti kakene yomo sikamo yomoke lewia pome nepia meaneya. Nipa Yesu
enademe taneya.
5
Eida nepia mekata Yesu nokome lene ate pitikoa enekome okome Sakiasi
neke yapu opi no pipato. Wini yomo ko a wete noo-kale
6
nipa pata wa ko a nome one yapu
wedia aua pekeneya.
7
Nitikale enekete e yene peyame Yesu oa lubu lubu pikakete ekete
poanele toko agono yapu eni pome pipoko wa ko oa kakeneya.
8
Nitaneyake Sakiasi one
yapu nome kakome Yesu-pala okome Ali Muno anukuya peya tatitakutukoane padekapa
ponopeneya-kiti meou. Wa namolopa pade ali-kitaneke kini kue oane yotokoane kode
keneya motadekolupa nipa pine yene kini nami wianepa eni oane yotokoane motokouna
toane tuyonopeta kadukoane ete mekala tou-kale okome
9
opi neke yapu pitiki-kiti Akolaliyo
toa motoko wa ootokoa okome i agopa etepea pekene agoke Akolaliyo oneka Eberame-
laweke taagene ago wa toa motoko.
10
Nipa no Ali Yatenane Oyagome paka etepea pekene
yene tuku tou wane toane moadene nokou wa Yesuyo akeneya.
Tobou Agono Pupu Takane Ali-kitame
One Kue Pikoa Metekakete Tanemo
(Matiu 25:14-30)
11
E yename einaka einamo yakakoa kakoika Yesuyo agale pade pedoa akeneya. Nipa
one Yerusaleme take tigotokakoa witanokono, Akolaliyo ali atoa pawe toa talo tokoyapa
itonoke opii witako wa e yename wene pikoli tokome ni akeneya.
12
Nitikome okome tobou
ago pade ta tetemada meane yename kini ako tobou ago moa kakamotoa poademe eya
taneya.
13
One pupu ali-kiti noi kakoa (10) noe wa kayo oa motokome kini kini kakoi toa
kina kapidi kakoa (20) tatikoa mekala taneya. Metekome okome oto noadene pukuno, i
kueme tine pikoa motokamene wa meemotokome pekeneya.
14
Nitaneyake one eina take
mekoi yename one-pala kotimi wene luaneya mekete pade ali-kiti moa wetekakete ekete
winagome toto talo tamene kote tokolo wako wa akapoe wa wetekaneya.
15
Wa naniko ete take mekoi-kitame einago kiwi yopiateko ago ne mea wa moa
kakatekaneyake one ta pine lono wakapea nekeneya. Nokome pupu ago pade-pala okome
kue metekouna ali-kiti enemotokapa. Auna kueme tine pikoa motokakoimo yakouno,
enemotokapa wa moa wetekaneya.
16
Nitikale namolo ago nokome okome Ali Muno
nemena mea pokana kina kapidi kakoa (20) kina moane tine pikoanepa ege kadukaka
kadapime kadukoane (200) kina motokakouno, ina wa metekale okome
17
epetekoa neme
eni tadeko. Eni pupupa nateleke neme wedoa tadekono, pupu pade tubele yameou. Pitikali
ta latia pitikika noi kakoa (10) ta-kiti ne tobou ago mea yopikamene wa yametaneya.
18
Wa
taku takoa noka ago nokome okome Ali Muno nemena mea pokana kina kapidi kakoa (20)
kina moane tine pikoanepa ege kadukaka tatigime kadukoane (100) kina motokakouno, ina
wa metekale okome
19
nipa pitikali ta latia pitikika ko kakoa (5) ta-kiti ne tobou ago mea
yopikamene wa yametaneya.
20
Wa panago nokome okome Ali Muno nemena mea pokana
kina kapidi kakoa (20) kina mootokoane mamina moane togotoane potipikakou.
21
Nepa
telekago teke padeya-kitipa nekeya menake pa neme mokala toko. Panagono ipe neme
padeyaka matamokoyake noa meko. Nepa dikane agono wene tekene piti tokale mekene
neke kue pa potipikakouno, ina wa metekale
22
Ali Muno agome okome nepa poanele toko
agomeke oko. No telekago padeya-kiti anukuya menake mokala toane ni panagono ipe
padeyaka matamukuyake noane meku wa nooke winipa ko okono, neme wini oko toane
padele telekole toane ne kibu mouno, nepia.
23
Ne meane pokouna kuepa bage edekale moa
pikamoka-pe. Bage pikoo tokapa anu kueme tine pikane kue-pala oto mou tokake nitameke
padeleka toameneya pa potipiadeko wa kikoa akeneya.
24
Nitoapa eida yakakoa kakoi yene-
pala okome winagonoke one kina kabidi kakoa (20) pikoa kako kina moe. Mootokoapa
kina ege kadukaka kadapime kadukoa (200) kina pikoa kako ago metekapoe-kale ekete
25
ouo, oyagome one kina ege kadukaka kadapime kadukoa (200) kina pikoa kakoyake
okoto-pe wa okoli okome
26
kipala i ukumo yakoe. Akolaline peku wedoa nakagopa nipa
Akolaliyo one peku wedoa lawetema pokale kamo toma pou toa wedoa toma poo. One
peku alekoa noma pokagopa nipa onekeya nateyaka eniya peya Akolaliyo takoa wa
mootapeoo.
27
Kiwi talo tamene kote motoko wa no-pala poi te ia mekete wakoina yene
wete dekoa motokapoe. No kakakoa wia tukoatino, dekoa motokapoe wa tobou agome
akeneya wa Yesuyo akeneya.
Yesu Yerusaleme Nokale Ali Atoame
Ke Wa Wedia Kakete Makutukoa Motanemo
(Matiu 21:1-11, Make 11:1-11, Yone 12:12-19)
28
Yesuyo nimo omotokome one oya-lawe-pala patono noe wa Yerusaleme take ate
witapademe pekeneya.
29
Nitoa pome Olipe-pini wa ibini akene tonoke latiane tata Besepase
Besani tatake tigotokakoa witapademe kakome one oyalita takuta moa wetekakome okome
30
kuka ku take poatino poe. Pote witoa kaalaukete enekoli dogi kai tine po kakoa
kebetaneya kakale enoi. One patu panagoka wete mea yawameneyano, po kotokoa oto aua
notokamene.
31
Kotokoa moadete tokoli enekome panagome okome dekolo kotokoa
motiki-pe wa okalepa eya wa akamene. Ali Munoyo padele toatekole pikolo ni motokoa
poko wa akamene wa Yesuyo oa wetekaneya.
32
Nitikale pote enekoli Ali Muno agome
okanakale tadeka.
33
Nipa po kotokamotokoika pine yene nekete ekete i dogi kai tinepa
edeyake po kotokoa motiki-pe-koli ekete
34
Ali Muno agome padele toatekole pikolo ni
toko wa moa pekeneya.
35
Nitoa Yesuke aua nekete kini tokoo kakene mamina petene
kotokamoa tali waneke tatikoa Yesu mekoa aua pekeneya.
36
Nitikoli mea pokaka kini
mamina kotokoa one eni mea poatekaka pia tatikakawineya pekeneya.
37
Nitaneyake Olipe-
pini togoikoa ketipea ko a poademe tigotokoa kakata one agale wete yakoa motane yene
one-pala obomoa pote eida titimoa Akolali kei telo pima pekeneya. Nipa Yesuyo telekole
toma pokale enekoinakalekeka ke wa Akolali kei pima pekete ekete
38
Ali Muno patu kautakoa kako tobou ago i nokono, Akolali neme pewe wia yopiamene-
ye. A tibuke meki-kiti tepe mataneya mekete tikino, Akolali kei piatoe wa oma
pekeneya.
39
Nitaneyake e yene pakeke obomoa nekene Parisi ali padeka-kitame one-pala ekete
neke oya-mikiti wawe wa oa kawikamene-koli okome
40
kipala i ukumo yakoe. I yenedo
kawia mekolipa nipa i piko kue wane-kitameka ke wa wedia kayo oi wa Yesuyo akeneya.
Yesuyo Yerusaleme Ela Motanemo
41
Nitoapa Yesu Yerusaleme tigotokoa nome enetapekome komo loboa pitikoa
kakome okome
42
ae, opika kini tepe mataneya poatiki kaapa kini leneme keleyo pikolo
enemotadiyano wene pikuyake opa kauaneya tokome oyake enamele toamoko.
43
Ae,
Yerusaleme ta nepala poi te ia mekoi-kiti wini nekete kobu moa unukatakutukoa dekali toa
meoi.
44
Nitoapa neeka neke wida pitikoi peyaka moa ka ua kugu witikoi. Nipa neke yapu
pawe eya latia kakene kue peya ke awea tadekamu toi. Ae, Akolaliyo kiwi auapeademe wida
nekedeko wa wene toamokoli tokome nitoi wa Yesuyo komo oa kakeneya.
(Matiu 21:12-17, Make 11:15-19, Yone 2:13-22)
45
Nimo oomotokome Yesu Yerusaleme take tobou losu yapu pome kakome eya kuya
eida-kama padeya padeya topo toai tane ali-kiti wia tikatapekome okome
46
anu i yapupa
no Akolali ali atoame kowitoai toatiki yapu wa wia mekaneyake kimepa kode yename
kodeya paigakoa moa piai tane kota tetepo takakino, poe wa wia tikatapeneya.
47
Ta pataka abuna Yesu tobou losu yapu pome olaukakala taneya. Nitaneyake
Akolalike lodo yotokoai tane tobou ali-kitika Mosesene totono pine to a olaukane ali-kitika
ete tobou yene-pala koukoa mekete one katekoa wia tukatekoi oi pedoa pia kakeneya.
48
Nitikolika ali atoa peyame one oko agale yakatoe wa yakakoa kakeneya tokome one wia
tukatekoile toamokale wakeneya.
Luke Luke
<<
19 19
>>
Luke Luke
<<
20 20
>>
20
(Matiu 21:23-27, Make 11:27-33)
1
Wa pade-pete Yesu tobou losu yapu pokome ali atoa olaukoa ni Akolalinemo kini
wene epetekanemo i i wa mo wia kawa tokale Akolalike lodo yotokoai tane tobou ali-kitika
Mosesene totono pine to a olaukane ali-kitika one kakata nekete ekete
2
ne tokolepa te patu
kautakoa kake toko-pe. Teyo ta wa okole toko-pe wa pitia yatekoli okome
3
kipalaka
yakatekumo pikono, yakoe.
4
Yoneyopa ali atoa ue motokama yakilepa tene peku noa toka-
pe. Akolaline peku patu. One kaua-mikitane peku patu. Yakouno, oe-na-kale
5
kini kini
yakaate tekete ekete Akolaline peku noa toka wado okolopa nipa einagome oka agale
edeyake yakoa moamokoi-pe wa oono, nimo wamato.
6
Nitameneya one kaua-mikitane
peku noa toka wado okolopa ali atoame kue katekamoa pitikoa wia tukoi. Ali atoame Yone
einagopa Akolaline agale akakago wa wene pikete tekete nitoino,
7
enimoka wamato wa ete
Yesu-pala ekete Yoneyo mainaline peku noa toka patu. Wene toamoko-koli okome
8
nipa
noanu toma yakulepa i ago patu kautakoane kakene tuku wane kipala to aweane wamou wa
Yesuyo akeneya.
Panagono Gerepi Po Ipe Yopikoa
Potokane Ali-kitike Akenemo
(Matiu 21:33-46, Make 12:1-12)
9
Yesuyo e yene-pala agale pade pedoa okome okome panagome one ipe toa gerepi
po matatekoapa one ipe kime yopikamene wa pade ali-mene yamemotokome ta padeka
pokome eida mea kakeneya.
10
Wa naniko eina ipe gerepi po ku putua kibutukakoa kaka-
pete eya taneya. One pupu ago pade moa wetekakome one ipe yopikaki ali-mename one
moateku toapa moke toa memotono pa wa wetekaneya. Nitikale nokale one ipe yopikane
ali-mename layo tiginame moomoa pitikoa pupuli wia padeyaka meameneya pa pomotoa
wetekaneya.
11
Nitaneyake pinagome pade pupu ago moa wetekale einagoka layome wia
kawa ya motokatekoa pa pomotoa wetekaneya.
12
Nitaneyake pinagome tebolo takoa ago
moa wetekaneyake einagopa wia kamate ponokoa paka lono moa pitikaneya.
13
Nitaneyake
ipe pine agome edeku patu wa wene kibututukoa kakome okome anu kolotini ago anu mana
moane wetekou. Einagodo nokale eneketepa one kei pia makutukoa moi wa moa
wetekaneya.
14
Nitikale nokale one ipe yopikane ali-mename oote tekete ekete pinagono
mana ku nokona. Etename one pikoa pokaya-kiti kadimo okome kunu agono pine
pikademe tokono, one moatekoya-kiti toto moatono, one wia tukatoe wa
15
tayo lono aua
pote wia tukapaneya.
Nitikala taneyake ipe pinagome eni yene-pala edele tonoo-pe.
16
Nipa eya too.
Wakapea nokome one ipe yopikoa potokane ali-mene wia tukatapea kiwi luku pade-mene
kime yopikamene wa yameo wa Yesuyo okale e yename ekete ae wini okole Akolaliyo
taatekoa toamomotamene wa okoli
17
leneme nepikoa pikome okome Akolaline bokuke eya
wa wia mekanemo pine edoa piko-pe.
I yomopa poadeko wa yapu wiane yename paya tetepo takoa wakeneyake panagome i
yomopa yapu pigi wa moa wianeya wa panagome wia mekaneya.
18
Eni yomo pigike pitakoi ali atoa ka ua kugu witikatapeneya piei. Wa eni yomo pigi
panagoke pitakome katua tawele takatapeoo wa Yesuyo akeneya.
Mone Lomane Ako Tobou Agono Takesi Kue
Pitikakato-pe Wa Pitia Yakanemo
(Matiu 22:15-22, Make 12:13-17)
19
Yesuyo nimo okale yatekete Mosesene totono pine to a olaukane ali-kitameka
Akolalike lodo yotokoai tane tobou ali-kitameka ekete i agome ina pedoa okana agalepa
totoke akedekono, dekatapea moatoe wa einapete einata one moadete wili toa kakeneya.
Nitiketeke e kakoi yene piti motekete tokome wakeneya.
20
Nitoapa eya toatekoi oi pedoa
pia taneya. Ta yopia meko agome koiso pitia yakakamotono, i ago moa meato wa pade ali-
kiti Yesu kakata moa wetekakoli nekete one oka agale yakoa motane tetepo takoapa natemo
omotadiya wa kakeneya.
21
Nitikete ekete neme mane oa olaukoa tikilepa kiyoke-kama toko.
Nipa ali atoa peya midi pikoapa Akolalinele takama pekete toatikile kiyoke-kama olaukako.
Nepa nitane agono wene tekete ido pitia yakoono, yaka.
22
Tone totono litiapa ako odene
tobou meko ago Sisane takesi kue pitikamato-pe, pitikato-pe. Yakoono oa ta-koli
23
one eni
labatekoi wene pikoile tetoa enekome okome
24
kue lene pade enouno, yameo wa okale
yametekoli okome i kue lene tiginikepa padane lene timini-pala agaleta wia mekaneyano,
eniyatapa teneta patu wa okale ekete
25
tobou ago Sisa one wa okoli okome nipa Sisa
meatikiyapa one takoa mea, Akolali meatikiyapa ni Akolali takoa mea tamene wa okale
yateketepa
26
ali atoa kakakoa i agome natemo omotato wa kamele toameadeko wa one eni
okamoke wene kainya pianeya tekete agale wametekoa wakeneya.
Tuane Yene Kamoatikike Pitia Yakanemo
(Matiu 22:23-33, Make 12:18-27)
27
Sadusi totono litiane ali padeka-kiti Yesu kakata nikilepa agale palene yakadete
nekeneya. Eni yene kini totono litiapa tuane ali atoa wa kamoamoi wa iki. Nitane ali-kiti
Yesu kakata nekete likoa enekete ekete
28
Tikisa ago, Moseseyo one totono wia mekakome
okome panagono atoame one mati opikameneyakedo einago tukalepa one wamene ago
neme moa neke natono latikamene. Nipa tukanakago lukuke kawatiki mati-kiti opikamotono,
nitamene wa Moseseyo akeneya.
29
Nipa odene aline mana-mikiti tatono kakoa (7)
kakeneya. Namolo agome one atoa moapa mati opiameneya one mea tuaneya.
30
Nitikale
one liti taku takoa opiane agome einatoa moapa mati opiameneya mea tuaneya.
31
Tebolo
takoa opiane agomeka einatoa moapa mati opiameneya mea tuaneya. Eni wamene tatono
kakoame (7) einatoa kibutua moma-kala nekeneyake panagonoka einatoame mati
opikameneya. Peya tiobali mea tukala taneya.
32
Nitikala taneyake wipitikomepa einakatoaka
tuaneya.
33
Eina wamene-mikitame einatoa edikoa kibutua moma-kala nekeneyano, tuane ali
atoa Akolaliyo moa kamotokaka-pete einakatoapa mainagono natono wa tugoa meoo-pe
wa likoa enekoli okome
34
opi meki-kitipa alime atoa moa atoa alike pote edikatakutukakala
toa meki.
35
Nitikiyake tua potepa weneya take mea kawatiki-kiti eida mea kaketepa alime
atoa moamoa atoa alike poamoa toi.
36
Eidapa edelo yene keneya mea kawei. Nipa tukolipa
Akolaliyo moa kamotokakale one mana kono-mikiti mea kawei. Nitoa mea kakete wa tukile
toamoi.
37
Tuane ali atoa Akolaliyo moa kamotokakamo Moseseyoka wia mekaneya. Nipa
itipono oa kakene yomo deyake Akolaline agale ludu nokome akenemo wia mekakomepa
Ali Muno agoke eya wa wia mekaneya. Ali Muno einagopa Eberame Aisaketa Yekobe toa
einago-menane Akolali wa wia mekaneyano,
38
onepa tuane ali atoane Akolali mena. Mea
kama piki ali atoane Akolali wa okome akedeko. Ali atoa one patu-kama kautakoa kakete
mea kama piki wa Yesuyo okale
39
Mosesene totono pine to a olaukane ali padeka-kitame
ekete Tikisa ago, agale muno kakoa wini okana wa akeneya.
40
Nipa one-pala agale pade wa
pitia yakamene piti tokale akeneya.
Keraisu Onepa Tene Mana
(Matiu 22:41-46, Make 12:35-37)
41
Nitaneyake Yesuyo e yene-pala okome Keraisu wa papete ibini akene agoke ikilepa
Depidi-loeke ta wateko ago wa ikino, dekolo iki-pe.
42-43
Papete Depidiyo Akolaline bokuke
lo agale pade wia mekakomepa Keraisuke eya wa wia mekaneya.
Ali Muno Akolaliyo no lukoane meku Ali Muno-pala eya wa oka. Ne-pala poi te ia meki-
kiti moane kawikoane neke kawane komo pikouno, nepia meamene wa
Akolaliyo oka wa Depidiyo wia mekaneya.
44
Nipa Depidiyo Keraisu einagopa one lukoane meku Ali Muno wa akeneyake kimepa
Keraisupa Depidi-loeke ta wateko ago wa ikino, dekolo iki-pe wa Yesuyo e ali-kiti-pala
akeneya.
45
Nitaneyake ali atoa peyame yakakoa kamotoa Yesuyo one oyali-kiti-pala okome
46
Mosesene totono pine to a olaukaki ali-kitame toma yakile titi toma yamene. Eni yenepa
kini ludu mamina epetaneya wititapea kakeneya yawa ni makesike ali atoame ke wa
walikitikakete yono momotada wa yawa ni losu yapukeka tobou ali-kiti meatikita meada wa
mepokala tiki. Toge kikoikaka ibini akene yene meatikita meada wa mepokala tiki.
47
Ni
nepo atoa-kiti oa yotokoa kini yapu eya kode keneya motikiyake eka ali atoame kiwi kei
pimotoa lede kowitikete kutupea pa agale likoa pikala tiki. Ae, Akolaliyo dikaki yene kibu
motokomepa dika dika toamene tete meoo wa Yesuyo akeneya.
Luke Luke
<<
20 20
>>
Luke Luke
<<
21 21
>>
21
Nepo Meane Atoame Onekeya Peya
Akolaline Takoa Metanemo
(Make 12:41-44)
1
Yesu kabe togapia ate enekale tobou losu yapu keneke kue pitikoai tokoita tobou
yene nekete kue eya pitikakala tokoli enaneya.
2
Nitaneyake nepo atoa pade ponopene atoa
nome tuane kueta takuta pitikananeya.
3-4
Nitikale enekome okome nimini ukuno yakoe. I
kamo yene peyamepa kinikiya tubeya pa pimotoa keku-mene odene moa pitikakala tokoina.
I atoamepa onekeyapa nateya deyake one piko toa eni moa pitikatapeka. One nee eya topo
toa moateka kue eni pitikakome tokome e yene peya moa patukaka wa Yesuyo akeneya.
Tobou Losu Yapu Tumu Tokatekamo
(Matiu 24:1-2, Make 13:1-2)
5
Pade-kitame tobou losu yapuke ekete ipa todolo yapu. Kue epetaneyameka Akolaline
takoa metaneyameka koniyo takoa wianeya kakono, enoe wa okoli
6
Yesuyo okome kime i
enekoa kakiya-kitipa eni wiane kue odeneka kibutukoa piameneya peya wia tadekatapeneya
pa tumu tokaneya pioo wa Yesuyo akeneya.
(Matiu 24:3-14, Make 13:3-13)
7
Yesuyo nimo okale eida kakoi-kitame ekete Tikisa ago neme ina okanakalepa
manipete taatekoa toko patu. Enile toatekale tigotoma nokale edeya wa adeka piipioo-pe wa
okoli okome
8
ina okounakale wete taatekoa toameneyakepa pade-kitame anu ibini lede
wedekoa nekete ekete Keraisu taatekoane nukuno, noe wa oa ni pade-kitame enile taatekoa
toateko tigotokoa nokono, noe wa kiwi oa yotokoino, wedoa lene kia nepikete yakoa
poameamene.
9
Nipa kini ta ludu u u wa poi toa kakoimo yakoa ni pade take poi tago wa
okoimo kugu yakoa toino, piti moameamene. Enilepa taatekoa namolo takoa toatekoyake
wipitia ta pade tigotokoa wete patamoo tokolo ni uku wa Yesuyo akeneya.
10
Nimo
ootokoa okome e ku yatename poi tato wa kamoa poi te itakutukakala toi. Ni e ku tobou
agoke lukoa meki yatene ete oto wa poi toa winali yoi.
11
Momani-kala tube mati toa eka
kuka takeka kobu igi nome poane yene igi nome tokala too. A tibukeka ali atoa piti
takatekole-kiti witoa ni Akolaliyo one toateka adeka piipikomepa padele padele tubele mati
witakakala too.
12
Enilepa wete taatekoa toameneyake ete-kitame kiwi dekoa moa tete mekala toi. Nipa
kini losu yapuka po yapuka lia aua pokala toi. Ni ako odene tobou mekoi ali-kiti mekoika
eni ali-kitike lokoa ta yopikoi ali-kiti mekoika lia aua pote koiso akakala toi. Anukule takama
pokoileke nitoi.
13
Nitikoi-petepa kini lene yoto kakete anukumo i i wa to awea akakala toi.
14
Nipa edemo wane uku patu wa kini wa kei piatekoimo wene kibutukapiameamene.
15
Noanumepa kiwi wene taka taka tokolu tokome agale muno kakoa okoli kipala poi teigoi
yename moa kautakamele toamoa agaleka topo takamele toamoa too.
16
Kiniketai kinika ua
kinikameyo kiwi-pala po piane yene kini oya-mikiti enika eni yene peyameka ete ali-kitane
yonoke kiwi moa pikala toi. Nitima pekete kiwi padeka-kiti wia tukakakileka toi.
17
Nipa kipa
no-pala odene ibini pedane ali atoa tokome ete yene peya kiwi-pala kotimi yoa meoi.
18
Nitiketeke kiwi-pala padeleka tamele toamokale tobou witako pine odeneka toa
potokamele toamoo.
19
Eni ke enekakale meake nooke wene tugoa mea togaketepa kini wa
toa moino, poapeneya kamene wa Yesuyo akeneya.
Yerusaleme Ta Wia Tadekatapeneya
Tumu Tokatekamo
(Matiu 24:15-21, Make 13:14-19)
20
Poyo yatene Yerusaleme take obomoa note dekali toa unukatapea kakoli eneketepa
Yerusaleme ta wia tadekatapeneya tumu tokateko oi tigotokoa nekedeko wa wene toi.
21
Nitikoi-petepa Yudea ta ludu pitikoi-kitipa nipa tono pake pake to a pitoa pote paigakoa
mepamene. Yerusaleme pitikoi-kitipa nipa kini eni ta wete to a pitoa pamene. Tayo kakoi-
kitipa nipa Yerusaleme take pitoa poameneya paka lono pitoa pamene wane uku.
22
Enipetepa Akolaliyo ali atoa kibu motikilepa one bokuke papete wia mekapiane toa-kama
taatekoa too tokolo ni uku.
23
Ae, mati kakene atoa-kitika mati adu tanikakoa mekoi atoa-
kitika eni tete witaka-pete manika edoa petoa pomotoa-pe. Ae, enipetepa itonoke dika dika
toamene tete witoo. Akolaliyoka one Yu yatene-pala kotimi wene luaneya meoo.
24
Nitaneyake kipala poi te iane yename kiwi padeka-kitipa tueme ka wa tukoa ni padeka-
kitipa e ku yatenane ta piko peyake tadekamu toa aua pootapeoi. Yerusaleme taapa mone
pa yatene-kitame kautoa wia tadekatapekoli pa tumu tokaneya pioo. Nipa Akolaliyo eni
mone yatene-kiti kiwika wiou wa moa atukateka oi ponokaleka pa tumu tokaneya pioo wa
Yesuyo akeneya.
(Matiu 24:29-31, Make 13:24-27)
25
Nitaneyake a tibukepa lou tokene tagoi moa padele padele tokale eneketepa ae ile
toatekolo toko wa enekala toi. Kusa ue mekokaka u u okoa kawa pewikoa kawoo.
Itonokeka e ku yatene tepe we tokale wene kainya pianeya meoi.
26
Nipa itonoke padele
padele wipitikome toademe tokale nepia meketepa pitime tukete pitakala toi. A tibuke tele
taneya mekiya peteka peteka tokale enekete nitoi.
27
Enika enile toka-petepa no Ali Yatenane
Oyago wedo patu meane pa teleta toawineya noadene nokolu enoi.
28
Enika enile titia
witakale eneketepa nipa Akolaliyo kiwi toa moateko oi tigotokama noademe toko wa wene
weye akeneya meamene wa Yesuyo akeneya.
(Matiu 24:32-35, Make 13:28-31)
29
Yesuyo agale pade pedoa okome okome yomo piki eteya yomoka witakoleke
ukunu, yakamene.
30
Luno pitikakolo eneketepa poto toko tokene-mene tigotatekolo toko
wa kime wene tiki.
31
Eina toa anume ina okounakale-kiti witakale eneketepa Akolaliyo ali
atoa pawe toa talo toateko eni tigotokona wa wene toi.
32
Etene nimini toatekomo ukuno,
yakamene. Ipete meki-kiti peya wete tuutapeameneyake kiwi-pala ina okounakale peya
taatekoa too.
33
Nipa itono tibuta takoa pootapekolika anu agalepa pa pia-kama kawoo wa
Yesuyo akeneya.
Taatekoa Toatekale Wedoa Nepikoa Meamene
34
Ina okounakale pubu wameneya odepeta wako pitigatapekome toko toa taatekoa
toademe tokono, wedoa meamene. Nipa pale paleta toa ni bia ue nokoa pia ni kini
toatekoile nami namita kakale wene keda taneya mekayano, wedoa meamene.
35
Enika enile
taatekoa tokomepa ali atoa ta piko peyake pitikoi toa taatekoa too.
36
Enika enile-kama
taatekoa toka-pete no Ali Yatenane Oyago kakouta katepitoa note kanadetepa lene
tuaneyame wia mea Akolali kowitima pamene. Nipa katepitoa noatekoi tele lukamotoa
kowitamene wa Yesuyo akeneya.
37
Ta pataka abuna Yesu tobou losu yapu pome olaukapokala taneya. Nitimotokome
likonupa Olipe-pini wa ibini akene tonoke ete wa pome pipokala taneya.
38
Nitaneyake one
eni olaukakome oka agale yakadetepa ali atoa peya likonu witia tobou losu yapu-kama note
obonokala taneya.
Luke Luke
<<
21 21
>>
Luke Luke
<<
22 22
>>
22
(Matiu 26:1-5, Make 14:1-2, Yone 11:45-53)
1
Edelo ago patukane wa ibini akene toge kikete pa palawe yisi kugu pitikamoa yotane
palawe yoa noatekoi oi tigotokoa nekeneya.
2
Nitaneyake Akolalike lodo yotokoai tane
tobou ali-kitameka Mosesene totono pine to a olaukane ali-kitameka Yesu edoa katekoa
wiato wa wili tokoa kakeneya. Nipa ete ali atoa piti motekete taneya.
(Matiu 26:14-16, Make 14:10-11)
3
Yesu-pala tuku kakoa (12) opia yakene ali-kiti pade Yudase einagoke Setanu
awinaneya. Einagopa one pade ibini Isekariose.
4
Einagopa Akolalike lodo yotokoai tane
tobou ali-kitika tobou losu yapu talo tane tobou ali-kitika koukoa mekoita pokomepa Yesu
kini yonoke moa piateka oi pedoa pianeya.
5
Nitaneyake wedia mekete ekete nipa nee kue
meoo-koli okome
6
nitikouno toe wa tewitikoa pokomepa Yesu moa metekome toatekale
wene kibutuma yakeneya. Nipa ali atoane kabeta pake kawamokale nitou wa wene kibutuma
yakeneya.
Edelo Ago Patukane Wa Ibini Akene Toge
Kikete Tanemo
(Matiu 26:17-25, Make 14:12-21, Yone 13:21-30)
7
Yu yename yisi kugu pitikameneya pa palawe wane-kiti yoa toge kikilepa sipi sipi kai
tine-pala moa wia kikala taneya. Nipa edelo ago Idipi ta patukakale Akolaliyo Iserele yene
toa motane oi wedekoa nitaneya.
8
Eni sipi sipi kai wiateka oi nokale Yesuyo Pita Yoneta
moa wetekakome okome edelo ago patukane toge kiatono, eni toge nee wete
nodokakapoatino, poe wa wetekakale ekete
9
eni toge nee manika nodokatoa-pe wa okoli
okome
10
Yerusaleme take pote kaalaukete enekoli ali pade one wagoke ue mete kakalogoa
aua nome kotukale enoino, einago litima pote one tuapea poka yapu tuapea pamene.
11
Tuapea pote yapu pinago enekete ekete Tikisa agome okome one oya-lawe-pala opiane
mekene toge nee nouno, neke ugu yene note meai tiki yapu luku yameano ta wa oka wa
akamene.
12
Kitame nimo okoli yatekome pinagome ako yuane yapu luku yametekilepa toto
meateko walai eya nodokapianeya yameoono, eidapa tone toge nee eya nodokakoatino,
poe wa Yesuyo one oyali-kiti takuta moa wetekaneya.
13
Nitikale pote enekoli Yesuyo eina
okanakale tadeka. Nitadekale einata kini toge kia noatekoiya nodokaneya.
Yesuyo Palawe Wane Gerepi Po Ku Ueta
Moa Lawetekome Akenemo
(Matiu 26:26-30, Make 14:22-26, 1 Korine 11:23-25)
14
Nee noatekoi-petepa Yesu nokome one Aposelo ali-kiti-pala walai waneke lewitoa
meaneya.
15
Nitoa mekome okome anu moatekou tete wete moamekenepa edelo ago
patukane toge kiko-pete kipala opiane mekene nee noadiyano wene-kama piane mekou.
16
Edelo ago patukane toge nee nakilepa Akolaliyo talo toko take mekene toateku adeka
pikene tuku. Papete wa pade noamadeneke tuku wa ootokoa
17
gerepi po ku ue mete
mekaneya katekamoa Akolali-pala ke wa ootokoa okome kiwi peya tatia noatino noe.
18
Nipa gerepi po ku uepa Akolaliyo talo toko ta wete witameneyake papete wa pade
noamou wa akeneya.
19
Ni palawe waneka moa Akolali-pala ke wa ootokoa popimotokome tatia metekome
okome ipa anu tiginino, kiwike toane i metekuno, moa noe. Noe wane metekilepa i mekete
toko toapa no wene taneya mea toma pamene wane meteku wa metaneya.
20
Nitaneyake nee
nootokoa mekete eina toa Yesuyo okome i gerepi po ku ue meteke mekaneya noe wane
metekilepa kiwike toane anu kamate ponateko adeka piane meteku. Nipa Akolaliyo oi pedoa
pikana toane tekene kini wenele litia toatiki totono kadimo oane yametekene uku.
21
Nimo
wanepa ukuyake eya waneka ukuno, yakoe. Mone yename no wia tukamotoa moa meateko
agopa one yono i walaike anu yono-pala odeneka pianeya.
22
No tukilepa Akolaliyo papete
wene toopikana toane taatekoane tuou. Ae, no wimotoa moa meateko agome dika dika
toamene tete moo-kale
23
one oya-lawe ete oto wa yakaate tekete ekete ina okanapa
mainagome toademe tokolo oko patu wa oote toa kakeneya.
Yesuno Oya-lawe Ako Odene Meadete
Togo Togo Oma Pekenemo
24
Yesuno oya-laweme agale oa takoa pili pili toa kakete ekete totopa mainago ako ago
meko patu wa togo togo oa kakoli
25
Yesuyo okome mone pa yatenane tobou ali-kitame
kiwike lukoa meki-kiti pupu toe toe wa tika tika tiki. Nitikilipa kiwike lukoa meki-kitame kipa
toto auapeki yeneno, ke wa kiwi kei piki.
26
Anu oya-lawe kime pade edikameamene.
Nitameneya ako ago nepa pene ago tetepo takoa meamene. Tobou ago nepa pa pupu ago
tetepo takoa meamene.
27
Ali takutapa panago nee mekome nomotoa padena agome one
nee takoa lawetekolo-kiti ako agopa mani ago-pe. Nee mekome nako agopa ako ago eni.
Noanupa kini pupu ago mekene uku.
28
Ke enekakale mema yakouka anu oya-lawe kime no kagekama yakoinano,
29
Agetaiyo no ne tobou ago mea wa ali atoa yopiane meatekou ta yameteka toane tekene
kime ali atoa yopia meatiki ta opi yametekene uku.
30
Nipa anu talo toateku ta no-pala opia
mekete nee ue eya nomotoane nitiku. Eni uku toapa tobou ali meatekoi walai-kitike eida
mekete Iserele yatene tuku kakoa (12) tatite toa takoa enoa akakala toi wa Yesuyo akeneya.
(Matiu 26:31-35, Make 14:27-31, Yone 13:36-38)
31
Saimone Saimone ne-pala ukumo yakamene. Ali-kitame witi ku yaku-pala eletekoa
pianeya peteka peteka tiki toa Setanuyo ne i agopa edikoane toadene mano wa Akolalineke
oia motokome akeneya.
32
Nitaneyake Akolalinele takama pokeke tewitikoa wakaya tokale
neke kowitikakene uku. Wa naniko pale toake eni wene wia wakepa neke oya-lawene wene
weye akakala tamene-kale okome
33
Ali Muno ne po yapu pitikakolika wia tukakolika noka
po yapu pitikoa wia tukoa tomotoane uku-kale okome
34
ne-pala i ukumodo yakamene. Opi
ali ogada ta patameneka wete ka wameneyake nemepa no i ago wene toamuku wa tebolo-
peta akoa wakala too wa Yesuyo akeneya.
35
Yesuyo nimo ootokoa okome namolopa Akolalinemo oa pupitikapekete kue ka nee
uatekoi kaka uameneya kawa yeneka mekameneya pa toma poe wane wetekakounake pa
pima yakoi-pe-kale ekete e 'e mena-koli okome
36
opidopa kini kue uatiki kaka nee eya uatiki
kaka pikolopa nipa moa aua pamene. Tue pade toamokolopa nipa tokoo kakene mamina
takoa topo toa moa lua pamene. Ni edoa-mo.
37
Ete-kitame i agopa Akolaline totono
tagoa toamoko ago wa akoa wawei wa wia mekapiane agalepa nooke tugoa
taatekamedeko. No toatekoumo wia mekapiane agale taatekateko tigotoma noko wa
Yesuyo akeneya.
38
Nitikale ekete Ali Muno tue takuta i pikono, ena-koli okome nipa oyake
toko wa pekeneya.
Yesuyo Olipe-pini Tonoke Pome Kakome
Kowitanemo
(Matiu 26:36-46, Make 14:32-42)
39
Yesuyo nimo oomotokome one tanele tokome Olipe-pini tonoke pekeneya. Eni
pokaka one oya-lawe litima pekeneya.
40
Nitoa eida pome kakome kipala okome kiwi likoa
enekaya wa Akolali kowitoa kamene wa ootokoapa
41
alime kue mitapeko kotuke keneya
pome neuwe tukupia kowitoa meaneya. Nitoa kowitikome okome
42
meteke no noateku ue
enekupa no tete mati moatekulu enipa tokono, Atai neme ete wia pedekamedekalepa
nitikamene. Nipa anu wene pikule toa wane ekene wamukuno, neke wene pikole tou wa
Yesuyo kowitoa meaneya.
43
Nitoa kowitoa mekaka edelo ago pade one weye akademe tibu
kawa nekeneya.
44
Nitaneyake tepe we toka matiyame wedoa kowitoa mekale poliga kamate
wane keneya pilipita pilipita toa kakeneya.
45
Nitoa kowitatekoa kamomotokome one oya-
lawe mekoita wakapea pokome enekale elame tuaneya tokome atu pia meadekoi.
46
Nitadekoli okome dekolo atu pia meki-pe. Setanuyo kiwi likoa enekaya wa kamokoa
kowitoa kamene wa Yesuyo akeneya.
Yesu Dekoa Monanemo
(Matiu 26:47-56, Make 14:43-50, Yone 18:3-11)
47
Yesuyo nimo oa kakaka ali peya mati obomoa nekeneya. Yesuno oyago pade
Yudaseyo eni yene lia aua nokome Yesu nunu oademe pinele nekeneya.
48
Nitoa nunu
oademe tokale Yesuyo okome no Ali Yatenane Oyagopa pa yename motokamotoa nunu
eke toko-pe wa akeneya.
49
Nitaneyake Yesu-pala toadete tokoile enekete one oya-laweme
ekete tone tueme wia litiato-pe wa oa
50
one oyago padame panagono kapidi pine takoa
pitikaneya. Nipa Akolalike lodo yotokoai tane ako tobou agono pupu ago nimini yono lono
kakene kapidi pine takoa pitikaneya.
51
Nitikale enekome Yesuyo okome oyakeno wa wa
einagono kapidi luku mitikatekoa ete wa kakakaneya.
52
Nititikoapa Akolalike lodo yotokoai
tane tobou ali-kitika tobou losu yapu talo tane tobou ali-kitika Kanosolo ali-kitika one eni
dekoa moadete nekene yene-pala okome kini tue lua layo tigini-pala nidikoa aua nikino,
nopa ali wia kode moa toko ago tetepo takoa tiki-pe.
53
Ta pataka abuna tobou losu yapu
keneke kiwi kakakoane eida-kama pone olaukakounake dekoa moamokoina. Opi i dekoa
monikilepa yomiyomu yopikago patu kautakete toatiki-pete tokome ni tiki wa Yesuyo
akeneya.
(Matiu 26:57-58, 69-75, Make 14:53-54, 66-72, Yone 18:12-18, 25-27)
54
Nitaneyake eni yename Yesu dekoa moapa ako odene mekome Akolalike lodo
yotokoai tane tobou agono yapu aua pekeneya. Aua pokoika Pita kutu mati kawati toma
nekeneya.
55
Eina tobou agono yapu pawe keneke pade-kitame pomale toe yoa payapono
pia unukoa meaneya. Pita oneka eni yene pake pome lukoa mepaneya.
56
Nitaneyake tobou
agono pupu atoa padame enekale Pita toe pa ake mekale leneme nepikoa pikome okome i
agoka Yesu kuyago-pala opia pima yakome taneya wa okale okome
57
anuyatoa, no winago
wene toamuku wa akeneya.
58
Naniko keneya panagome Pita enekome okome neka Yesuno
oyago-kale okome e 'e, nopa one oyago mena wa akeneya.
59
Lou pini odene tadiya
ponotekaneyake padekagome okome i agopa Galili agono, Yesu kuyago-pala opia pima
yakeneya tadeko-kale okome
60
winipa pa okono, neme wini oka agale agopa tokolo meku
wa oa kakaka eina eina ali ogada ka oa kakeneya.
61
Nitikale Ali Muno ago Pita kakata
peketapekome nepikoa pianeya. Nitikalepa Ali Muno agome eya wa okana opi ali ogada ka
wameneka neme no einago wene toamuku wa tebolo-peta akoa waoo wa okana wene
ponokale
62
akolono pokome komo ka ta pitikoa kakeneya.
Poyo Ali-kitame Yesu Tea Agale Akenemo
(Matiu 26:67-68, Make 14:65)
63
Yesu eida yopia kakene ali-kitame one tegene matoa layo toua wikala taneya.
64
Mamina nateyaka moa one lene timini mutuapa one wane kapidi eyake kala dekoa witikete
ekete ne teyo witikato-pe wa wikala taneya.
65
Nitoa pademo pademoka oa potokoa tea
agale okoa kakeneya.
Yesu Koisoke Lia Aua Pote Kakanemo
(Matiu 26:59-66, Make 14:55-64, Yone 18:19-24)
66
Ta patakaka Yu yenane Kanosolo ali peya Kanosolo yapu koukoa meponaneya.
Nipa Akolalike lodo yotokoai tane tobou ali-kitika Mosesene totono pine to a olaukane ali-
kitika eida koukakoita pade ali-kitame Yesu-pala aua note kakakoli ekete
67
nepa Keraisu wa
papete ibini oa piane ago tadekalepa wete a-na wa okoli okome e eno, nopa einago wane
okoluka kime yakoa moamoi.
68
Noanumedo kiwi agale palene yatekolupa agale topo takoa
wamoi.
69
Nopa einago tadeko wa yakoa moamokolika opi titimoane no Ali Yatenane
Oyagopa telekole-kama toko Akolaline nimini yono lono meane kama poukene tuku wa
okale peyame ekete
70
nipa Akolaline mana kaku wa eke oko-pe-koli okome nopa einago wa
wini ekete iki-kale ekete
71
one koiso akoa oatekomopa pinali one kabunume ina okanano,
one pademo okamoka wa pade yakateko toa mena. Oyake yatekoona wa oa tukaneya.
Luke Luke
<<
22 22
>>
Luke Luke
<<
23 23
>>
23
Yesu Pailase Mekata Lia Aua Pekenemo
(Matiu 27:1-2 11-14, Make 15:1-5, Yone 18:28-38)
1
Nimo ootokoa eni yene peya kamomotekete Yesu Pailase mekata lia aua pote
kakapaneya.
2
Nitikete one akakete ekete i agome Yu ali atoa peya paka paleke lia
motokome eya wa okale yatekoo. Tobou ago Sisane takesi kue pitikameo wa oa ni onepa
ako tobou meateku ago Keraisu taatekoane nuku waka oa potokakale yatekoo wa Yesu
akakete okoli
3
Pailaseyo Yesu yatekome okome nepa Yu yene peya lukoa meki tobou ago-
pe wa okale okome nopa einago wa wini okana wa akeneya.
4
Nitikale Pailaseyo Akolalike
lodo yotokoai tane tobou ali-kiti ni eida oboa kakoi peya-pala okome i agome padele
poaneleka toameadeko wa okale
5
e yename Yesu wedoa akakete ekete Yudea ta piko
peyake i agome i i wa olaukoa ali atoa oa kamotokama yako. Nipa kebono ta Galili take
laigoa tone i Yerusaleme take tugoa nitiko wa one akoa akeneya.
Yesu Erodeke Aua Pekenemo
6
E yename Galili ta ibini okoli yatekome Pailaseyo okome i agopa Galili ago-pe wa
yakaneya.
7
Nitoapa Yesupa Erodeyo talo toko take meane ago tadeko wa wene tokome i
ago Erode neme pitia yakakamene wa one Yerusaleme take ugu nome mekata moa
wetekaneya.
8
Nitaneyake Erodeyo i agopa Yesu toko-la wa wedia kakeneya. Nipa Yesuyo tubele
toma yakenemo yakatekoapa one mekuta padele tubele nokome tokale onemeka enadiya wa
nepia meapa opi nekedeko wa wedia kakeneya.
9
Nitikome pitia yakoai tokale Yesuyo
agaleka wametekoa pa kakeneya.
10
Nitoa kakaka Akolalike lodo yotokoai tane tobou ali-
kitameka Mosesene totono pine to a olaukane ali-kitameka dika dika wa one wedoa akoa
kakeneya.
11
Erodeyoka one poyo ali-kitameka one paya tetepo takoa tegene matoa taneya.
Nitaneyake mamina epetane mati moa kakoapa Pailase mekota aua poe wa kutu
wetekaneya.
12
Einapetepa Pailase Erodeta oya kakoa liputakutukaneya. Namolopa poi te ia
meetakutukoake nitaneya.
Yesu Yomo Lekaneyake Wia Dekamotoa
Pailaseyo Moa Metanemo
(Matiu 27:15-26, Make 15:6-15, Yone 18:39-19:16)
13
Nitaneyake Pailaseyo Akolalike lodo yotokoai tane tobou ali-kitika Kanosolo ali-
kitika one mekuta noatino noe wa kayo oa motokome okome
14
i agopa no mekuta lia aua
nekete ekete i agomepa Lomane yateneke lukoa meamato wa kiwi Yu yatene oa
kamotokama yako wa akoa okoina. Kiwi kakakoane one pitiane yatekeneka kini akoa
okoina toa padeleka toameadeko.
15
Erodeyoka one pitia yakatekoapa one koiso akatekale
piameadekale oto wetekakona.
16-17
Yakoe. One wia tukatekole piameadekono, eya tatoane
uku. Poyo agome po wapime wikala tomotoane tootokoane po kotokoane wetekou wa
Pailaseyo okale
18
kini kabunu koukotukoa kayo ekete ekete winago wia tukakamotono ta.
Eyago Barabasi po kotokoa oto wetekaka-ye wa ka telo okoa kakeneya.
19
Barabasi
einagopa Lomane tobou agome po yapu pitikakilepa Yerusaleme take Lomane yene-pala
poi kamotokoa ali wia tukoa taneyake pitikaneya.
20
Nitane ago po kotokoa oto wetekaka-ye wa kayo okolika Pailaseyo Yesu po
kotokoane wetekou wa wene pikome kini wene wia wamotoa oa enekale
21
ete wa kayo
ekete winagopa yomo lekaneyake wia dekakamotoa wia dekakamotoa wa kayo okala tokoli
22
Pailaseyo tebolo takakome okome i agome padele poaneleka toamedekono, one wiane
tukatekule piamoko. One poanele edele taneyake iki-pe. Pa po wapime poyo agome wikala
tomotoane tootokoane po kotokoane wetekou wa okale
23
agale telo oa kamotokakoa
kakeneya. Nipa one wia dekakamotoa tika tika tekete nenome moa patukakoli
24
Pailaseyo
nitikou toe wa eya taneya.
25
Eyago Lomane yene-pala poi kamotokoa ali wia tukoa
taneyake po yapu moa pitikane ago Barabasi po kotokoa wetekaneya. Nipa e Yu yenane
wene litia taneya. Nitoapa i ago Yesupa moa kini wene litia topoe wa Yu yene moa
metaneya.
(Matiu 27:31-44, Make 15:21-32, Yone 19:17-27)
26
Nitikale aua pokoika Sairini take ago Saimone tayo lono kawa nome kotukale dekoa
motaneya. Nipa one mukitike eina lekane yomo aukakete ekete Yesu i ago namolo kawa
pomotono, iyapa neme lia aua notokamene wa dekoa moa aukaneya.
27
Yesu eni pokaka ali
atoa obomoa litima nekeneya. Nipa atoa-kitika one elame tukete komo ka ta oawineya litima
nekeneya.
28
Nitikoli peketapekome okome Yerusaleme atoa-kiti nooke pade komo
wameamene. Nitameneya kini mati-kitikeka pinatoa-kiti kiwikeka komo oa kamene.
29
Ae,
dika dika toamene tete moatiki tigotoma noko. Enipetepa eya wa oi. Kini mati-kitame eni
tete motokaya tokale mati opiamoa adu tanikakoa meamoa pa tioboya meki atoa-kiti
kolotine meamele toko wa oi.
30
Nitoa tube tono-pala kayo oa ekete kilikete toto wio-ye wa
oa ni de tono-pala kayo oa ekete kilikete toto kauta-ye wa kayo oa toi.
31
Ae, yomo
weneyake dikoa tikino, kau toa tuaneya kakalepa edele toi-pe wa Yesuyo akeneya.
32
Yesu wia tukadete aua peketepa poanele tane agotaka wia tukadete aua pekeneya.
33
Nitoa ali wago wa ibini akeneta tugoa kakete Yesu eida yomo lekaneyake wia dekaneya.
Poanele tane agotaka yomo padetake wia dekaneya. Nipa panago one nimini yono lono wia
dekoa padena ago one ewa yono lono wia dekoa taneya.
34
Nitoa kakoli Yesuyo
kowitikome okome Atai wene toamekete tikino, kini i tikike po letu mekoa kibu
moameamene wa kowitikaneya. Nitaneyake poyo ali-kitame one mamina-mene tatiato wa
tadu toa tatite taneya.
35
Pa ali atoa eida kakete nepikoa kamotoa tobou ali-kitame tegene matakete ekete i
agome ete ali atoa toa motaneyake i dekaneya kako. I agopa Akolaliyo one wa takoa moa
kakapiane ago Keraisu tadekalepa nipa pinali one wa toa moono, tokale enato wa tea agale
oa kakeneya.
36
Poyo ali-kitameka one tegene matakoa pinele nekete kou tane gerepi po ku
ue ne na wa metekete ekete
37
nepa Yu yene peya lukoa meki tobou ago tadekalepa pinali
neke wa toa moa-na wa ya motokakete akeneya.
38
Yesu eni wia dekakete one wago pitia
lekane yomo munoke pipia eya wa wia mekoa dekaloganeya. I agopa Yu yene peya lukoa
meki tobou ago wa wia mekoa dekaloganeya.
39
One-pala odeneka wia dekane ago poanele tane ago padame Yesu-pala oa
potokakome okome nepa Keraisu patu. Nepa einago tadekalepa pinali neke wa toa
motekepa totaka toa moa-na wa oa potokaneya.
40
Nitikaleka padena agome o ago kikoa
okome nepa i ago-pala wia tukatekoi oi pedoa pia wia dekaneyano, Akolali piti moameke
oko-pe.
41
Totapa tone tokoo poaneleke nami wia kibu motaneyano, i agome padeleka
toameneyake pa wia dekaneya kakono, dekolo oa potokako-pe wa kikoa ootokoa
42
Yesu-
pala okome Ali Muno neke talo toko take poke mekepa no wene taneya meamene-kale
okome
43
nimini ukuno, yaka. Opi nepa no-pala ali atoa mea epetekaki take Paradaise take
odeneka meoo wa Yesuyo akeneya.
Yesu Tukome Tuanemo
(Matiu 27:45-56, Make 15:33-41, Yone 19:28-30)
44
Einapete lou matai ponome kakaka (lou pini 12 kilokoke) tadiya ta lia kadukaneya.
Lou pene webokaka (lou pini 3 kilokoke) ta pa likatapeneya. Lou pa toameneya tokome
taneya.
45
Kuna tobou losu yapukeka eya mamina Akolali meko lono wa akene luku olege
toa ketekalogane mamina ete oto iyawea tukaketikaneya.
46
Nitikaka Yesuyo telo
ootapekome okome Atai anu yominipa takoa pomotoane ukuno, neme moa ta wa ootokoa
tukome tuaneya.
47
Enile tokale enekome tobou poyo agome okome i agopa nami kawamene ago
tadeko wa Akolali kei pia kakeneya.
48
Einali-mene wia dekakete tokoile enadete obomoa
nekene yename enika enile tokale enemotekete kini kini yapu yapu wakapea pekeneya. Nipa
tepe we tokale kini palanu wi wi toma pekeneya.
49
Yesuno oya-lawe peyaka one-pala Galili
ta kawa Yerusaleme take opia nekene atoa-kitika eka mati kakete enika enile tokale enekoa
kakeneya.
Yesuno Tigini Kotake Moa Pipanemo
(Matiu 27:57-61, Make 15:42-47, Yone 19:38-42)
50-51
Panago Arimasia take ago Yosepe Kanosolo agomeke ete Kanosolo ali-kitame
Yesu wia dekatekoi oi pedoa pianele litia toameneya. Einago wene kiyo akeneya mekome
epetanele-kama tane ago tokome Akolaliyo ali atoa pawe toa talo tokale nepia meaneya.
52
Einagome Pailaseke pokome okome Yesuno tigini mouno, mea ta wa opokale
53
nipa
mopoano pa wa yametekale pokome to a motaneya. Nitoapa ake tane mamina petene moa
tatilogoa Yesuno tigini pia ewetetapeneya. Nitimotokome pome pala padaneta kokapiane
kota keneke moa pipaneya. Nipa tuane ago odeneka wete moa pipameneta eni moa
pipaneya.
54
Yu yene ko mea pupu toamatekoi oi tigotokale nodokoa meane-pete enile
taneya.
55
Yesuno tigini eni moa pipokalepa eya atoa-kiti Yesu-pala Galili ta kawa Yerusaleme
take opia nekene atoa-kitame einago Yosepe litima pekeneya. Nitaneyake eni kota keneke
one tigini pikome tokale enemotekete
56
Yerusaleme take wakapea pekete one tigini ka lono
takatekoiya nodokoa pianeya. Nitoapa Mosesene totono piane toa tekete ko mea pupu
toamene-pete yapu pa ko meaneya.
Luke Luke
<<
23 23
>>
Luke Luke
<<
24 24
>>
24
Yesu One Tuaneya Pianeta Kamoa Pekenemo
(Matiu 28:1-10, Make 16:1-8, Yone 20:1-10)
1
Egeme ta tu ei teigaka einatoa-mename eina ka lono taneya ete pia nodokoa pianeyapa
aua pato wa Yesuno tigini pipaneta pekeneya.
2
Nitoa pekete enekoli one pipaneta kota
kabunu ketekalogane kue ete koketekaneya kakedeka.
3
Nitoa tuapea pote kakete enekoli Ali
Muno Yesuno tigini piameadeka.
4
Nitoa wene kainya pianeya kakoika alita takuta mamina
yati yati tane mati kakeneya kotikatapea kini kakoiya liti note kananeya.
5
Nitikoli enekete piti
moa keti walikoa kakoika einagotame ekete i kota kenekepa tuane ali atoa piai toatikiyano,
yomini meane ago dekolo oto tuku toa niki-pe.
6
Kime tuku toniki agopa wete kamoa poka.
One Galili take kakome kipala okana agale wene kayapeaneya tokome ni niki-pe.
7
Eya wa
okana. Panagome Ali Yatenane Oyago moa poane ali-kitane yonoke pikale yomo
lekaneyake wia dekoi. Nitikolika ta pataka teboloke piane kamoane pou wa okana wa
einagotame okoli
8
e winimopa nimini akediki wa one eina okana wene kibutukete akeneya.
9
Nitoapa Yesu pipaneta tewitikoa one tuku melepu kakoa (11) oyali mekoita pekete
kini enoa yatekoinakamo i i wa one oya-lawe-palaka ete yene-palaka to awea akeneya.
10
Nipa Yesuno Aposelo ali mekoita pote to awea opikilepa eya atoa-mene Magadala Maria
Yoanata Yamene nine Maria toa ni kiwi-pala opia pekene atoa-kiti enika eni atoa-kitame
to awea opaneya.
11
Nitikoli yatekete pamo akene tetepo tokale yakoa moameneya.
12
Nitaneyake Pita kamomotokome Yesu pipaneta teyapea pome kota kabunuke kakome
watekoa enekale tigini togotane mamina odene pa pikale enaneya. Nitoapa edele taneya patu
wa wene kibutuma pome wakapea pekeneya.
Yesu One Oyata Takuta-pala Emease Take
Opia Poademe Pokome Akenemo
(Make 16:12-13)
13
Einapetepa Yesuno oyata takuta Emease take poadete pekeneya. Emease ta
Yerusaleme tata pake tuku melepu kakoa (11) kilomita tadiya pianeya.
14
Emease take eni
poadete pekete Yerusaleme take tanemo koota oma pekeneya.
15
Nitoa koota oma pokoika
Yesuyo moa tikitikamotokome opia pokale
16
one lene timini agopa motekete pade eina opia
pokono wene pia pekeneya. Nipa padeleme kini leneta likatapeane tetepo taneya pekeneya.
17
Nitikoli opia pokome okome koota wini oma pikimopa edemota iki-pe-kale weneta keda
taneya witimoa kakeneya.
18
Nitoa kakete panago Keliopasi wa ibini akene agome okome
okome Yerusaleme meki peyame wene tomotoake neme odene abela ikonota tanemo wene
toameke oko-pe-kale ete kita-pala okome
19
edemoke iki-pe-kale ekete Nasarese Yesuke
oko. Einago Akolaline agale akakagome Akolaline lenekeka ali atoane lenekeka padele
padele toa pademo pademo oa tikilepa telekole-kama toa toka.
20
Nitima yakanake Akolalike
lodo yotokoai tiki tobou ali-kitameka tone ete tobou ali-kitameka eya tokoi. Einagopa mone
agome wia tukateka koisoke aua pokoi. Nipa yomo lekaneyake wia dekamotoa wakoi.
21
Inakagopa toto Iserele yene oto toa moatekago taatekoa nokono wene pikoonake wia
dekakoi. Eyakeka wene keda taneya meko. Einago wia dekatekaneyake ta patako tebolo eni
patukakona.
22-23
Nika ta tu ei teigaka tone oyatoa padeka-kitame one pipaneta enepokoli one
tigini piameadeka. Piameadekale enemotekete toto mekoota wakapea nekete tone wene
kainya pikakete ekete pulete keneya enekolo one pipaneta edelo ago takuta eida kakoli
enekoo. Enekolo ekete inakago kamoa poka wa okoi wa einatoa-kiti toto mekoota note
onokoi.
24
Nitikoli tone oya-lawe pade-mene one pipaneta pekete enekoli einatoa-kitame
okoina toa tadekale eneketeke Yesu pade enameneya wa einagotame Yesu-pala akeneya.
25
Nimo okoli kita-pala okome okome ae, kolotini lupi toa paya wene pianeya mekete
iki. Akolaline agale papete to awea akane ali-kitame Keraisuke wia mekapianemo lugutukoa
oi mokala teketeke yakoa moamekete tadiki.
26
Keraisuyo eni tete moa meemotokome one
pa teleta tootapeneya mekanata wakapea poo wa wene toamokoi-pe wa akeneya.
27
Nimo
ootokoapa Moseseyoka Akolaline agale papete to awea akane ali-kitameka wia mekanemoke
titimoa Keraisuke oa piane agale peya pine i i wa to a kibutukakutu toa ootapeneya.
28
Nitoa oma pomepa one oyata pote piatekoita tigotokale patukoa poademe keneya
tokale ekete
29
ta lima nokome lou-pala pipademe tokono, tone piatono noo wa kowitikoli
nipa piatoe wa yapu tuapea pekeneya.
30
Nitoapa one oyata-pala walaike opia mekome
palawe wane moa Akolali-pala ke wa ootokoa popimoa metekale
31
eina eina kini leneta
kikatapeneya i agopa Yesu tadeko wa wene tokoli agopa takatapea pekeneya.
32
Nitaneyake
oyagota ootakutukakete ekete ataiyo inakago tota-pala ka ludu ko oma nokome Akolaline
bokuke wia mekane agale pine to a kibutukakutu toa ootapekale kolotine yakama nokoo wa
akeneya.
33
Nitoa eina eina kamomotekete Yerusaleme wakapea pekete enekoli Yesuno tuku
melepu kakoa (11) ali-kiti ete ali atoa-pala koukoa mekoli enaneya.
34
Nitikoli ekete Ali
Muno Saimone Pita mekata ponokome lene timini yametaneyano, one tuake wete
kamotadeko wa e yename kita-pala akeneya.
35
Nitikolipa Yesu ka ludu opia nokome
akenemoka palawe wane popimoa metekale i agopa Yesu tadeko wa kitame wene tanemoka
i i wa to awea akeneya.
Yesu One Oya-lawe Pakeke Nome Kakenemo
(Matiu 28:16-20, Make 16:14-18,
Yone 20:19-23, Aposelo 1:6-8)
36
Kitame nimo oa kakoika Yesu kiwi pakeke nome kakome okome tepe kolotini
mataketikoa meamene wa okale
37
ekee, yomini pade nome kako wa piti moa kakeneya.
38
Nitoa kakoli okome tepene li li wa kawa pome taneya mea tikino, dekolo tiki-pe.
39
Noanu
i kakuno, anu yono kawata enoe. No yominido tokolopa nipa melepu tono eya kakeneya
kawamuku wa ootokoa
40
one yono kawata enoe wa yametaneya.
41
Nitikale wedoa wedia
kakete i agopa Yesu tadeko wa wene toake kamoa noamene tetepo takoa wene kainya pia
kakoli enekome okome no noatekuya pade piko-pe-kale
42
yotane mou kugu moa metekoli
43
kiwi kakakoa moa nakeneya.
44
Nootokoa kakome okome no wete tuamekene kipala opiane yakene eya wane
okouna wene takakene ukuno yakoe. Moseseyo one totono yamea ni Akolaline agale
to awea akane ali-kitame agale wia mekoa ni Depidi-loeme lo agale wene kibututukoa wia
mekoa tanepa no nekene toatekoumo i i wa wia mekapikala taneya. Nooke eni wia
mekapiane toa-kama taatekoa too wane okouna wa Yesuyo akeneya.
45
Nitoapa Akolaline
bokuke oneke wia mekapiane agalepa ipa iyake akeneya, ipa iyake akeneya wa wene
takatapeneya.
46
Nitikome okome eya wa papete wia mekapianeya. Keraisu taatekoa nome
tete moa mea tukomeke ta pataka teboloke kamoa poo.
47
E ku yatene-kitameka kini tokoi
poanele tewitikoa wakolipa eni poaneleke po letu mekakana Akolaliyo keetapea agopa
takatapeo. One eni toatekamopa Yerusaleme take titimoa ta piko peyake i i wa Keraisuno
ibini wedekoa oa pupitikoi wa wia mekapianeya.
48
Eni papete wia mekapiane toane
taatekoane toma nokoule anu oya-lawe kime enekoinano, i i wa oawineya pamene.
49
Agetaiyo i ago moane wetekou wa papete oa pika ago kiwike awinomotou. Einago a tibu
mea kiwike awinokome tele lukademe tokono, Yerusaleme take nepia meamene wa Yesuyo
akeneya.
Yesu A Tibuke Ate Kamotokoa Aua Pekenemo
(Make 16:19-20, Aposelo 1:9-11)
50
Nitimotokome Yesuyo one oya-lawe-pala Besani take aua pokome one yono ate
kamotokoa kakome Akolaliyo i yene pewe wia ta wa kowitoa kakeneya.
51
Nitoa kawa
tewitikoa pokale Akolaliyo moa a tibuke aua pekeneya.
52
Aua pekeneyake one oya-lawe
neuwe tukupia one kei pia kaamotekete Yerusaleme take wedianeya wakapea pote
mepaneya.
53
Nitaneyake tobou losu yapuke-kama oboa mea Akolali-pala ke wa oa one kei
piai toa kakeneya.
Luke Luke
<<
24 24
>>
Matiu
00
11
22
33
44
55
66
77
88
99
10 10
11 11
12 12
13 13
14 14
15 15
16 16
17 17
18 18
19 19
20 20
21 21
22 22
23 23
24 24
25 25
26 26
27 27
28 28
Matiu Matiu
<<
00
>>
^
Matiu
Yesuno Kaua-mikiti Opia Tagama Nekenemo
Yesu Opianemo
Lou Witia Noko Lono Mea Ugu Ali-mene
Idipi Take Pitoa Pekenemo
Dedeya Ali Mati-kiti Wia Tukanemo
Nasarese Take Wakapea Pekenemo
Ue Motokama Yakene Yoneyo Oma Yakenemo
Yesuyo Ue Motanemo
Yesu Galili Take Mea Titikome Tanemo
Mou Tagi Tane Ali-mene Takoa Motanemo
Yesuyo Ali Atoa Olaukoa Latekoa Tanemo
Yesu Tono Tobouke Pome Mekome Olaukanemo
Kusa-pala Pa take Pedoa Akenemo
Yesuyo Mosesene Totonoke Olaukanemo
Timini Nakeneleke Olaukanemo
Atoa Lia Motikike Akenemo
Atoa Wakete Pa Wa Wetekakike Olaukanemo
IyaTiaEyaTia Wa Wameamene
Toto-pala Poanele Taneleke
Nami Witikete Toatekomo
Poi Te iane Yene-pala
Ponopene Yene Mama Motekete Toatekomo
Akolali Kowitikete Oatekomo
Nee Ue Eya Tekei Wawa Noamekete
Kowitikete Toatekomo
ATibuke Kamoya Pala Pitikou Toa
Epetanele Toma Poatekomo
Kini Kepene Mama Moameamene
Akolali Kowitikete Toatekomo
Nateya Kago Keneke Patukoa Pamene
Yomo Ku Tukole Takoa Enatekomo
Yesuyo Pade Ali Atoa Kiwi Wene Toamuku
Wa Akoa Wawatekomo
Yapu Epetekoa Wikete
Potokoa Wikete Tanemo
Yesuyo Kedime Nakene Ago Latekanemo
Yesu Ne Litima Nou Wa Akene Agota-pala
Akenemo
Pupulege Tadalita Te itakanemo
Yesuyo Ipono Awitane Agota Epetekanemo
Muku Toameneya Pa Pia Kakene Ago
Epetekanemo
Yesuyo Matiu Einago Kayo Oa Motanemo
Nee Tekei Wawa Noamenemo
Tukome Tuane Akoma Kamotokanemo
Leneta Liane Agota Lene Kikakanemo
Agale Amele Toamene Ago Latekanemo
Yesuyo Ali Atoa Ela Motokome Akenemo
Aposelo Ali-kiti Moa Wetekanemo
Akolalinele Takoa Togamene
Akolali Piti Tokale Meamene
Yesuyo Ali Atoa Ete Oto Wa
Puutakutukamotoa Nekenemo
Akolaliyo Tone Epetekoa Tokole
Topo Takatekomo
Yoneyo Yesu Pitia Yakanemo
Latiane Ta Tebolo-pala Pubu Akenemo
Koome Tuaneya Meki-kiti Yesuke Namene
Yu Yene Kini Ko Mea Pupu Toamene-pete
Kekoa Wawa Toameneleke Akenemo
Yesuyo Yono Lokane Ago Epetekanemo
Akolalinele Takamotoa
Yesu Moa Kakapianemo
Yesu Setanuno Tele Patu
Kautakoa Kako Wa Oa Potokanemo
Yomo Ku Tukole Takoa Enekike Akenemo
Yesuyo Padele Telekole Tomotoa
Lede Akenemo
Panago Takoa Pokana Ipono Einakagoke
Wa Wakapea Awinokome Tokomo
Yesuyo Nine Wamene-mikitike Akenemo
Ipe Ludu Nee Lene Pitikama Pekene Ago
Pedoa Akene Agale Pine To awea Akenemo
Ipe Nee Lene Epetaneyake Pedoa Akenemo
Kalipe Lene Deyake Pedoa Akenemo
Yesuyo Pedoa Agale-kama Oa Metanemo
Nee Lene Pakeke Ke Witaneke
Pine To a Akenemo
Potipiane Kamoya Enamutanemo
Yobo Ma yoke Pedoa Akenemo
Mou Tagi Tikileke Pedoa Akenemo
Nasarese Yename Yesu Wakete Wakenemo
Yone Kabe Teiganemo
Yesuyo 5,000 Ali-kiti Nee Lawetanemo
Yesu Galili Ue Tali Ludu Kautoa Nekenemo
Yesu Genesarese Ali Atoa Kini Tane Yene
Latekakala Tanemo
Yu Yenane Kaua-mikitame Olaukanemo
Kenane Take Atoa Yesuke Wene Tuganemo
Yesuyo Yene Tane-kiti Latekakala Tanemo
A Tibuke Padele Telekole Witakamotono Ta
Wa Yesu Likoa Enanemo
Parisi Yene Sadusi Yene
Kini Tanele Toameamene
Yesu Nepa Keraisu Tadeko
Wa Pitayo To awea Akenemo
Yesu Tuake Wa Kamoa Poatekamo
Yesuno Lene Timini Mamina Eya
Yati Yati Tootapeanemo
Yesuyo One Tuatekamo Wa To awea Akeneya
Tobou Losu Yapu Takesi Kueke Akenemo
Akolaline Take Ako Meateko Ago
Te-Pe Wa Pitia Yakanemo
Poanele Tikileke Pubu Akenemo
Katepitoa Pekene Sipi Sipi Kaike
Pedoa Akenemo
Neke Oyagome Padele Poanele Tokolo
Mane Oa Moteke Toatekomo
Pupu Agome One Odene Pupu Ago
Ela Moamokome Tanemo
Alime One Atoa Wakeneleke Akenemo
Yesuyo Mati-kitane Kowitikanemo
Uu Kamo Tane Tualike Akenemo
Pine Agome One Ipe Pupu Takane Ali-kiti
Kue Metekome Tanemo
Yesuyo One Tuateka Tebolo Takoa Akenemo
Yame Yonetane Niname Yesu Kowitikanemo
Leneta Lianeya Meane Agota Epetekanemo
Yesu Yerusaleme Ta Ate Poademe Pokaka
Ali Atoame One Kei Piawineya Nekenemo
Yesuyo Yomo Piki Kikoa Okome Akenemo
Etename Okale Manatame Yatekete Tanemo
Pinagono Gerepi Po Ipe Yopia Potokanemo
Etename Manane Atoa Motokakome Togemo
Oa Wetekakale Pade Ali-kitame Wakenemo
Lomane Tobou Ago Sisane Takesi Kue
Tuane Ali Atoa Kamoatekoile
Lede Pitia Yakanemo
Tobou Kakoa Akene Agalepa Mani-Pe
Keraisu Te-laweke Ta watekago
Wa Yakanemo
Mosesene Totono Pine To a Olaukane Yene
Parisi Ali-kiti Kini Tanele Toameamene
Wene Takuta Pianeya Mekoi-kitike Akenemo
Edikakoi Ali-kiti Akolaliyo Kibu Moo Wa
Yesuyo Pubu Akenemo
Yesuyo Yerusaleme Mama Motokome Akenemo
Tobou Losu Yapu Tumu Tokaneya Piatekamo
Tete Moatekoimo
Yerusaleme Yename Tete Moatekoimo
Yesu Wakapea Noateko Oi
Padameka Wene Toamiki
Pupu Ali Takutame Pupu Takakete Tanemo
Tuatoa Noi Kakoake (10) Pedoa Akenemo
Pupu Ali Tebolome Tobou Agono Kue
Pikoa Metekakete Taneleke Pedoa Akenemo
Wipitia Ta Patakale Ali Yatenane Oyagome
Ali Atoa Takoa Enekome Oatekamo
Yesuno Wagoke Padeya Ka lono Taneya
Pekoa Yotokanemo
Yesu One Oya-lawe-pala Opia Mekome
Toge Nee Nakenemo
Yesuyo One Oya-lawe Palawe-pala
Gerepi Po Ku Ueta Lawetekome Akenemo
Yesuyo Gesemani Take Kowitikome Akenemo
Yesu Dekoa Motanemo
Kanosolo Ali-kitame Yesuno Koiso Akanemo
Yesu Pailaseke Aua Pekenemo
Yudase Tukome Tuanemo
Poyo Yename Yesu Paya Tetepo Takanemo
Yesu Yomo Lekaneyake Wia Dekoa Tukanemo
Yesu Tukome Tuanemo
Yesuno Tigini Kota Keneke Moa Pipanemo
Poyo Ali-kitame Kota Yopikoa Kakenemo
Yesu One Tuaneya Pikata Kamoa Pekenemo
Poyo Ali-kiti Yerusaleme Take
Pekete Akenemo
Yesuyo One Oya-lawe Mekoita
Galili Take Nokome Oa Pianemo
Matiu Matiu
<<
00
>>
Matiu Matiu
<<
11
>>
MATIU
Yesunomo Matiuyo Wia Mekaneya
1
Yesuno Kaua-mikiti Opia Tagama Nekenemo
(Luke 3:23-38)
1
Ipa Yesu Keraisu one kaua-mikiti opia tagama nekenemo. Yesu onepa Depidi-loeke
tagene ago. Depidi onepa Eberame-loeke tagene ago.
2
Eberame onepa Aisakene etene. Aisake onepa Yekobene etene. Yekobe onepa
Yudaneka Yudane wamene-mikitaneka etene.
3
Yuda onepa eya agota Peresi Siratane etene.
Einagotapa nine Temayo opianeya. Peresi onepa Eserono etene. Eserono onepa Ramene
etene.
4
Rame onepa Aminadapene etene. Aminadape onepa Nasonono etene. Nasono
onepa Salomonono etene.
5
Salomono onepa Boasine etene. Boasi onepa nine Reapeyo
opianeya. Boasi onepa Obedene etene. Obede onepa nine Ruseyo opianeya. Obede onepa
Yesine etene.
6
Yesi onepa ali atoa lukoa meane tobou ago Depidine etene. Depidi onepa
Solomonono etene. Solomono one ninepa namolo Yuraiane natonoke Depidiyo motaneya.
7
Solomono onepa Riaboamene etene. Riaboame onepa Abaisane etene. Abaisa onepa
Esane etene.
8
Esa onepa Yosopasene etene. Yosopase onepa Yoramene etene. Yorame
onepa Usaiane etene.
9
Usaia onepa Yosamene etene. Yosame onepa Easine etene. Easi
onepa Esekaiane etene.
10
Esekaia onepa Manasane etene. Manasa onepa Emosine etene.
Emosi onepa Yosaiane etene.
11
Yosaia onepa Yekonaiane etene ni Yekonaiane wamene-
mikitane etene. Einapetepa Iserele yene mone Babilone take aua nidikoa pekeneya.
12
Nititikaneyake Yekonaiayo Sialetiele opianeya. Sialetiele onepa Serababelene etene.
13
Serababele onepa Abiudene etene. Abiude onepa Elaiakemene etene. Elaiakeme onepa
Esone etene.
14
Eso onepa Sedokene etene. Sedoke onepa Ekimene etene. Ekime onepa
Eliudene etene.
15
Eliude onepa Eleasane etene. Eleasa onepa Masanene etene. Masane
onepa Yekobene etene.
16
Yekobe onepa Yosepene etene. Yosepe onepa Mariane ana.
Mariayo Yesu opianeya. Yesu einagopa Keraisu wa ibini akene ago.
17
Nipa Eberameke titimoa Depidike tugoapa opia tagama nekene ali-kitipa ali leme
kakoa (14) ibini akene ali-kama wia mekaneya. Ni Depidike titimoa Yu yene Babilone take
aua nidikoa pekene-pete tugoa opia tagama nekene ali-kitipa nika ali leme kakoa (14) ibini
akene ali-kama wia mekaneya. Wa Yu yene Babilone take aua nidikoa pekene-pete titimoa
Keraisuke tugoa opia tagama nekene ali-kitika ali leme kakoa (14) ibini akene ali-kama wia
mekaneya.
Yesu Opianemo
(Luke 2:1-7)
18
Yesu Keraisu opikilepa eya taneya. One nine Maria Yosepene tu pia kakene atoa
Yosepeke wete poameneyake one mati kakedeka. Enipa Epetane Yominiyo taneya.
19
Mati
kakeneya mekale enekome one poatekago Yosepe wene kiyo akene ago tokome i atoa ya
takamouno, ne wakuno, pa wane wetekakeneka ali atoane lene yoto wetekamou wa wene
pia meaneya.
20
Nitoa mekaka Ali Munono edelo ago Yosepe pule pitikata nokome okome
Depidike tagene ago Yosepe Maria neke natono moa latikade piti moamea. Mati kakenepa
Epetane Yominiyo taneya tokolo ni uku.
21
Mariayo ali mati opikale one ibini Yesu wa oade
toko. One yatenepa kini tokoi poaneleme kiwi moa labaneya kakoita toa moo tokolo tekene
ni uku wa edelo agome oa pekeneya.
22
Enipa Ali Muno agono agale to awea akane agome
papete wia mekapiane toa taatekamotoa enika enile tootapeneya.
23
Ali poamene tuatoa mati
kakeneya mea ali mati opikale Imanuele wa ibini oi wa wia mekapianeya. Imanuele wapa
Akolali toto-pala opia meko wa ekete oko.
24
Yosepe pule pitikata kamoa pokome Ali Munono edelo agome tamene wa okana toa
tokome natono Maria enemotaneya.
25
Nitoapa mati wete opiameneyakepa koua piameneya.
Nitoa mekale ali mati opikale Yesu wa ibini akeneya.
Matiu Matiu
<<
11
>>
Matiu Matiu
<<
22
>>
2
Lou Witia Noko Lono Mea Ugu Ali-mene
1
Yesu opikilepa tobou ago Erodeyo Yudea ta talo toa meka-pete eni ta keneke piko
Beseleme take opianeya. Nititikaneyake a tibuke tagoi yakome tokale enoai tane ago-mene
lou witia noko lono ta tetemada kawa Yerusaleme take nekete ekete
2
Yu yenane tobou
meateko ago eni mati opikilepa maida taneya-pe. Eni mati opianeya tadeko wa wene
tomotoa tokome weneya tagoi pade witia nome kakale enekoya tekete one pikota wadini
tukuadete noko wa akeneya.
3
Nimo okoli yatekete Yerusaleme take ako tobou ago
Erodeyoka ete ali atoa peyameka ekete ekee enidopa edemo iki patu wa wene keda taneya
kakeneya.
4
Nitoapa one mekuta Akolalike lodo yoai tane ali-kitika kini totono pine to a
olaukane ali-kitika kiwi peya noe wa Erodeyo kayo oa motokome okome Keraisu wa
papete ibini oa piane ago mani take opianeya pioo-pe-kale ekete
5
one opiateko tapa Yudea
ta keneke piko Beseleme ta. Enikepa Akolaline agale to awea akane ago padame eya wa wia
mekapianeya.
6
Yudea ta keneke piko Beseleme ta nepa de ta deyake Yudea ta keneke eni pitikalimepa
nepa paya tetepo takameamele toamoo. Wida neeke ta wateko ago pade ako
odene meko tobou agomepa sipi sipi kai talo tou toa anu Iserele yene peya talo
takoa kawoo wa einagome wia mekapianeya wa e ali-kitame Erode-pala akeneya.
7
Nimo okoli yakatekoapa wene muno kakeneya meane ali-mene one kidene mekuta
noe wa agale poti lukatekoa oa wetekakale nokoli okome wini tagoipa manipete titia witia
noka-pe wa yakatekoa okome
8
wini matipa tuku-kama tokoa kawatino, poe. Noanuka eni
mati pikota neuwe tukupiane kei piouno, enamutuketepa wete no oto onoatino, poe wa
Beseleme take wetekaneya.
9-10
Nitikale yakamotekete pokoli lou witia noka lono titia kakale
enekoina tagoi namolo kawa pekeneya. Namolo kawa pome eni mati meka yapu pitia tibuke
yateta pome kapaneya.
11
Yateta pome kakale einali-mene mati meka yapu pote enekoli eni
mati nine Maria-pala mekale enekete wadini tukupia kei pia kakeneya. Nitoapa kini kamo
taneya kake ua nootokaneya ya wa moa mati metekilepa golo kue yomo page ka lono
taneyata mekala taneya.
12
Nitimotekete kini take wakapea peketepa Erode mekata koekoa
padeka lono katekoa pekeneya. Nipa kini pitikoita Akolaliyo pule metekanakale toa
nitaneya.
Idipi Take Pitoa Pekenemo
13
Nititikaneyake Ali Munoyo moa wetekane edelo agome Yosepe pitikata pule
menokome okome tobou ago Erodeyo wini mati wiademe tuku toa kakono, wete kamoa
wini mati nina-pala aua Idipi take to a poe. Oto wakapea ipete noe wane okou-peteka eida
nepia meatino poe wa pekeneya.
14
Nitikale Yosepeyo eni mati nina-pala aua likonu
kamomotokome pitoa pome Idipi take pome mepaneya.
15
Mekomepa Erode tukaleka pa
eida meaneya. Enipa Ali Munagome one agale to awea akane ago imo akamene wa akene toa
taatekaneya. Eya wa akeneya. Anu mana Idipi take meaneya kayo oane mou.
Dedeya Ali Mati-kiti Wia Tukanemo
16
Eni wene muno meane ali-mename Erode yotokatekoa kini take wakapea pekedekoli
yatekome Erode kotimi yotaneya kaka matiyame eya taneya. One poyo ali-kiti Beseleme
take moa wetekakome okome Beseleme takeka eni ta unukoa piko takeka meki mati-kiti
mali takuta ponamene mati peya wia tukakapoe wa wetekaneya. Nipa eni wene muno meane
ali-menamepa tagoi ipete witaka wa okoina wene tokome taneya.
17
Nipa Akolaline agale
akane ago Yeremaiayo papete oa piane toa taatekaneya. Eya wa oa pianeya.
18
Rama take padame komo okomokale yakaneya. Nipa tumai mekome komo ka oa
kakeneya. One mati-kitike Resele komo ka oa kakeneya tokome padameka one
eni ela oyake teigakamele toameneya. Nipa one mati peya tuutapeneya tokome
taneya wa Yeremaiayo oa piane toa taatekaneya.
Nasarese Take Wakapea Pekenemo
19
Erode tuutukaneyake Ali Munono edelo ago pade Yosepe pitikata Idipi take nome
pule menokome okome
20
wini mati wiadete tuku tokoa kakoina ali-kitipa tuutapeneyano,
wini mati nina kini Iserele take wa aua poano, wete kamoa pono wa pule mea pekeneya.
21
Nitikale kamomotokome eni mati nina kini Iserele take koua wakapea pekeneya.
22
Koua
poademe pokome yatekale tobou ago Erode luku manago Akeleasi mekome Yudea ta
yopia meko wa okoimo kugu yakatekoa eni take wakapea pome mepamene piti tokale Galili
take pome mepaneya. Nipa edelo ago padame Yosepe pitikata pule metekome okana toa
23
Galili ta keneke piko Nasarese take pome mepaneya. Nipa Akolaline agale akane ali-
kitamepa i to aweane uku matipa Nasarese take ago wa ibini oi wa oa piane toa
taatekaneya.
Matiu Matiu
<<
22
>>
Matiu Matiu
<<
33
>>
3
Ue Motokama Yakene Yoneyo Oma Yakenemo
(Make 1:1-8, Luke 3:1-18, Yone 1:19-28)
1
Enipetepa ue motokama yakene Yone Yudea ta pikoka ali piamene lono taatekoa
nokome eya wa mo wima yakeneya.
2
Akolali a tibu meko agome ali atoa keleyo talo
toateko tigotokono, kini tokoi poanele tewitikoa wawe wa mo wima yakeneya.
3
Nipa
Akolaline agale akane ago Aisaiayo papete eya wa wia mekapiane toa Yone taatekaneya.
Ali piamene ta ludu panagome eya wa mo wima yawoo. Ali Muno noateko ka
nodokakapia one yawateko ka-kitika ki yotokakapia toatino toe wa taatekoa
nokome oo wa Aisaiayo Yoneke oa pianeya.
4
Yone einago taatekoa nokome kamelo kai pineme latiane mamina kawa one matiuka
pitimekawe kai kepeneme latiane matiu kawa taneya. One nakene neepa apio-pala koeyapo
ego ueta-kama nokala taneya.
5
Nitane ago yakadete eya yene Yerusaleme takeka Yudea ta
keneke piko ta-kitikeka Yodane ue liti piko ta-kitikeka mekoi-kiti one mekata nokala taneya.
6
Nitoapa kini tokoi poanele i i wa to awea ootapekoli nipa ue moe wa Yodane uele kakome
ue motokakala taneya.
7-8
Einata einapete Parisi ali-kitameka Sadusi ali-kitameka ue moadete nokoli enekome
okome beita, kipa kayane yagono-mikiti. Akolaliyo kibu moateko tigotoma nokono
petoatino oto ita poe wapa teyo pubu okolo niki-pe. Kini namolonakaledo tewitikoa
wakedekolipa nipa ali atoame enemotono, epetanele toma pamene.
9
Eya wa wameamene.
Kipa Eberamene kaua-mikiti mekono, Akolaliyo edoa kibu momotoa-pe wa wameamene.
Akolaliyo i piko kue wane-kiti moa Eberamene mana-mikiti oyake latikakamele toko.
Nitamele tokono, kipa Eberamene kaua-mikiti meko wa edoa mate agale oadete-pe.
10
Yomo-kiti ku tuameadekale pinagome tue moa ka wa toele pitikoo. Kipa tueme ka wa
pitikateko tigotokolo tekene ni uku.
11
Noanumepa kini namolonakale tewitikoa wamotoane
tekene pa ue motokaku. No litimotokakome ele kule telekole toa no moa patukako ago
noademe toko. Nopa pa ago tekene one kawa yeneka oyake pikoa katekamele toamoko.
Einago nokome ali atoa pa ue motokameneya Epetane Yomini-pala toeta motokademe
toko.
12
Witi ku takoa motokagome-kiti one tapepora moa nokome witi ku witikatekoapa
yaku pupulegeme popokoa aua pomotoa tokome pokotoa ate pitikakala too. Nitoapa ku
pitoa auma kakale witi ku lobutua piko yapu keneke moa pitikoai too. Ni yaku koukoa
moapa nokoa-kama kako toe mine pitikoai too wa Yoneyo akeneya.
Yesuyo Ue Motanemo
(Make 1:9-11, Luke 3:21-22)
13-14
Yesu Galili ta tewitikoa Yodane ue yotoko lono Yone mekata nekeneya. Yoneyo
ue motokamotoa tokome ni nekeneya. Nitikale ue motokamademe wakome okome uepa
neme no motokamedekono, anume ne edoane ue motokamotoa-pe wa okale okome
15
mena, opipa ue motokoa wane i nukuna. Akolaliyo ta wa okale-kama tamedekolo tekene
ni uku-kale okome nipa nitouno ta wa ue motokaneya.
16
Nitikale Yodane ue matanu
pogatekoa pokome enekale eina eina tibu patetepikale Epetane Yomini ini weuwe keneya a
tibu mea nome oneke pitanokale enaneya.
17
Nitikale a tibuke agale ludu nokome okome
wini agopa anu kolotini ago, anu managono, one tokoleke kolotine meku wa akeneya.
Matiu Matiu
<<
33
>>
Matiu Matiu
<<
44
>>
4
(Make 1:12-13, Luke 4:1-13)
1
Nititikaneyake Epetane Yominiyo Yesu ali piamene take koua pokomepa Setanuyo
likoa enemotoa tokome aua pome mekapaneya.
2
Nitaneyake ta pataka padeka noi kakoa
(40) ponoka toa nee nakileka toameneya kobu tokale meaneya.
3
Kobu tokale meaneya
Yesu likoa enatekago nokome okome ne Akolaline mana tadekalepa nipa ika i piko kue-
kitipa neke noateko palawe wane-kiti latiano ta wa likoa enekome okale okome
4
eya wa wia
mekaneya pikono, yaka. Mea kawadetepa pa nee-kama moa noameneya Akolaliyo oka
toa-kama yakoa moamene wa wia mekaneya piko wa Yesuyo okale
5
Akolaline Yerusaleme
take aua pome tobou losu yapu muno waneke moa kakakome okome
6
ne Akolaline mana
tadekalepa ita kawa keika tiga-na. Neekepa Akolaline bokuke eya wa wia mekaneya pikolo
tekene ni uku.
Akolaliyo ne i agopa wedoa yopia kamene wa one edelo yatene yameoo. Nitikale ne
tugoa ogo eya nakaya tokale kini yoname lekamonoi.
Enimopa Akolaline bokuke wia mekaneya pikono, nepala padeleka toamoono, tigaketika wa
Setanuyo likoa enekome okale okome
7
Akolaline bokuke eya waka wia mekaneya piko.
Neke Ali Muno Akolali likoa enameamene wa wia mekaneyano, wini okole toamou wa
wakeneya.
8
Nitaneyake Setanuyo Yesu aka mati kakene tono tobouke moa aua pome
kakapaneya. Nitoapa ako tobou ali-kitame yopiane ta piko peya ni eni ta-kitike koniyoya
peya yametekome okome
9
anu kawane pitalogake no kowitikalepa nipa eni ta piko peya ne
ako odene tobou ago meke talo toa wane yametapeouno ta-kale okome
10
Setanu ne ete pa.
Akolaline bokuke eya waka wia mekaneya pikono, yaka. Neke Ali Muno Akolali einagoke
odene nate wene pianeya mea kowitamene. Losule tikilepa onekele odene takoa tamene
wa Yesuyo okale
11
Setanuyo Yesu tewitikoa pokale edelo ali-kiti one mekata note
auapenaneya.
Yesu Galili Take Mea Titikome Tanemo
(Make 1:14-15, Luke 4:14-15)
12-13
Wa naniko Yone po yapu pitikaneya wa okoimo kugu yakamotokome Yesu Galili
take wakapea pome mepaneya. Nitoapa eida me me toomotokome Kapaneame take pome
mepaneya. Eni taapa Galili ue matanuke latiane ta. Sebulane Napesalai tata keneke piko
Kapaneame eni take pome mepaneya.
14
Nipa Akolaline agale akane ago Aisaiayo papete
eya wa oa piane toa taatekoa taneya.
15-16
Sebulane ti-pala Napesalai tita kipala eya wane ukuno yakamene. Kini wini Galili
mine lonoka Yodane ue lonoka mone yatene awia note mekala tokoiyake eya
wane uku-ye. Wini take yomiyomu keneke mekete enekoli pa tokaya tubeya
wane witakale enoi. Yomiyomu katoganeya tuadete meou toa pa meki-kiti wida
mekika pa pitatapeademe toko wa Aisaiayo Akolaline bokuke papete wia
mekaneya.
17
Eni agale taatekoapa enipete titimoa Yesuyo mo wima yakome okome Akolaliyo
kiwi talo tokole keleyo witateko tigotoma nokono, kini namolo wene wia wamene wa oma
yakeneya.
Mou Tagi Tane Ali-mene Takoa Motanemo
(Make 1:16-20, Luke 5:1-11)
18
Yesu Galili ue mine matanu ludu kokotoma ponokome enekale ali takuta odene
wamename mou tagi toa kakoli enaneya. Panago Saimone one pade ibini Pita wa akene ago
wamene Aderutame kini tanele tekete mou tagi toa kakoli
19
enekome okome mou tagi toa
kawou toa ali atoa motokakete toatikile olaukouno, no litima noe wa okale
20
eina eina kini
tagi ka eida tewitikalogoa litima pekeneya.
21
Nitaneyake Yesu kutu pokome enekale odene
wamena Yame Yoneta etene Sebedi toa ue dipike mekoli enaneya. Einagota kiniketai-pala
ue dipike mekete tagi ka pilianeka lipua mekoli enekome okome yukuyagota wete noe-ye wa
kayo oma ponokale
22
eina eina einata kiniketai ue dipike memotoa Yesu litima pekeneya.
Yesuyo Ali Atoa Olaukoa Latekoa Tanemo
(Luke 6:17-19)
23
Yesu Galili ta ludu pima yakomepa losu yapu kaka toa pome olaukoa ni Akolaliyo
ali atoa talo tokole i i wa kini wene epetekanemo oma pome ni eya kuya kini tane yene peya
latekatapea taneya.
24
One eni toma yakenemo Siria ta ludu oa puputikatapeneya tokale
dikane notokane yene taneya meane ali atoa one mekata note koukoai taneya. Nipa yeneme
tukete tete mokoa kakene-kiti ni ipono awitaneya meane-kiti ni leau akeneya meane-kiti ni
kawa yonota wia mekaneya meane-kiti enika eni ali atoa kini oya-laweme Yesu kakata aua
nokala tokoli latekoa wetekakala taneya.
25
Nitaneyake ta piko peya Galili ta Dekapolise ta
Yerusaleme ta Yudea ta Yodane ue lou witia noko lono piko ta enika eni ta ludu pitane ali
atoame one litima penaneya.
Matiu Matiu
<<
44
>>
Matiu Matiu
<<
55
>>
5
Yesu Tono Tobouke Pome Mekome Olaukanemo
1-2
Eida oboa kakoi-kiti enemotokome Yesu tono pade lewia aya waneke pome
mepoka. Nitikata one oyali-lawe note mekoli one tepene meaneya ya wa eya wa olaukoa
meka.
3
Kini weneme Akolalinele nateleka takamele toamoko wa oneke-kama wene tuganeya meki-
kiti kolotine meati wane uku.
Akolaliyo one pawe toa talo toko taapa kinino, noe wa kiwi yameoo tokolo tekene ni uku.
4
Komo oa tumai keneya meki-kiti kolotine meati wane uku.
Akolaliyo kini eni ela teigoo tokolo tekene ni uku.
5
Ni poti wene pianeya mea utanele-kama toa meki-kiti kolotine meati wane uku.
Ta piko peyapa kini wa Akolaliyo kiwi yameoo tokolo tekene ni uku.
6
Ue nodome-kiti tuaneya meou toa Akolaline kiyo akene peku-kama noadiya wa wene pia
meki-kiti kolotine meati wane uku.
Akolaliyo one eni peku lawetekale noa tagatapeoi tokolo tekene ni uku.
7
Ete ali atoa kibu moameneya yono lukoa meki-kiti kolotine meati wane uku.
Akolaliyo kiwika kibu moameneya yono lukoa meoo tokolo tekene ni uku.
8
Kini tepene poane wene takoa koikatapeneya meki-kiti kolotine meati wane uku.
Eni ali atoame Akolaline lene timini enoi tokolo tekene ni uku.
9
Poi ete oto wa te itakutukoa meki-kiti wini poi wia pitikoe wa moa kawikama piki-kiti
kolotine meati wane uku.
Akolaliyo kipa one mana kono-mikiti wa oo tokolo tekene ni uku.
10
Akolalinele takama yawou wa kiyo akenele toma pikileke tete moma piki-kiti kipa kolotine
meati wane uku.
Akolaliyo one pawe toa talo toko taapa kinino, noe wa kiwi yameoo tokolo tekene ni uku.
11-12
Anukule takama yakike ete ali-kitame tea agale oa tete mea i yene kime poanele tiki
wa kapene agale oa tikilika kolotine meati wane uku. Nitikikepa a tibu pine epetaneya-kama
enatikiyano, nitoa kamotono, ke wa kolotine meati wane uku. E yename kiwi tete eni
metekipa nipa kini kaua-mikitame papete Akolaline agale to awea akane ali-kiti tete mema
nekete tane toa totoka opi nitikino, ke wa kolotine meati wane ni uku wa Yesuyo oka.
Kusa-pala Pa take Pedoa Akenemo
(Make 9:50, Luke 14:34-35)
13
Kipa ali atoane nee eyake takoa nakina to wane adeka piane uku. Too pade me
pokome meke toamokolopa edoa wa meke takamotoa-pe. One me pekeneya tokome
toatekale piamokale pinagome akolono paka ka ua mitapeoo. Nitaneya pikale tokome ali
atoame kautoa witia wawei.
14
Anu oya-lawe kimepa ta piko peya meki-kiti pa takatikiya wane adeka piane uku. Ali
atoame tono toboukedo ta latikolipa nipa keleyo eni latianeya kawoo.
15
Panagome-kiti one
labo tole udukakomepa okolo petene moa kautalogakoya mena. Nitameneya ali atoa yapu
mekita pa keleyo toa kamotoa tokome labo piatikita moa piko.
16
Eina toa yete pade ali atoa
pa takama pamene. Kini Akolalinele epetekoa takama pikile enekete a tibuke meko Atai
Akolali-pala ke wa oa one kei pia tomotono, nitamene wa Yesuyo oka.
Yesuyo Mosesene Totonoke Olaukanemo
17
Mosesene totonoka Akolaline agale to awea akane ali-kitane agaleka no i agome
katekoa wawademe noko wa wene piameamene. Enile toadene nokouya mena. Kini oa
pianele taatekoane toadene ni nuku.
18
Nipa eya wa wene taneya meamene. Tibu itonota
wete takoa poameneyake eni totono wia mekane toa etene nateya bi mekamu tane-kitika
pake katekapitikoa wawameneya pa pia kawoo. Nipa Akolaliyo papete wene toopianele
peya wete taatekameneyake pa pia kawoo.
19
Eni totono piko toa natele deyaka
katekapitikakome litia toameamene wa olaukako agopa nipa Akolaliyo ali atoa talo tokome
dikako ago etene keku ago tetepo takoo-mo. Wa eni totono piko toa natele deyaka
katekameneya peya litia tootapekome ete ali atoa kimeka litia tootapeamene wa olaukako
agopa nipa Akolaliyo ali atoa talo tokome dikako ago etene ako ago tetepo takoo-mo.
20
Akolalinele takaku wa wene piketeke kini totono pine to a olaukaki ali-kitameka Parisi ali-
kitameka onekele takakete tiki toado moa patukameketepa Akolaliyo talo toko take edoa
pote mepadete-pe.
Timini Nakeneleke Olaukanemo
21
Yete pade ali atoa wia tukameamene, ni panagome panagodo wia tukakalepa
kini take koiso yatekaka ago mekata lia aua pamene wa papete olaukama nekeneya-mo.
22
Noanume eya wane wini ukuna-ye. Panagome one oya ago-pala kotimi yotokalepa nipa
koiso yatekakago mekata lia aua pamene. Wa panagome pade ago-pala nepa lu oko ago
wa-kitido tedu metekalepa nipa tube koisoke Kanosolo ali-kiti mekoita lia aua pamene. Wa
panagome panago-pala nepa nego noma yako ago wa poanemo okomepa nipa tukome
poane take toe mine mekota poo.
23
Nekeya pade Akolalike lodo yoai tiki walaike eida aua
poke meade kakedo panagome nepala pademo oatekamo nami kakono wene tekepa eya
topamene.
24
Nekeya eida tewitikalogoa einakago mekata peke odene weneta piata wa
amene. Odene weneta piitakutukoapa wakapea noke nekeya Akolalike lodo yonamene.
25
Panagome-kiti i ago neme poanele tokanano, neke eina tokanakale koiso pitia yatekagome
pitia yatekamotono, nee noo wa enemotokale opiado pekepa eya wa oa tamene. I ago ame
koiso wamatono, odene weneta piata wa oa enamene. Nitameneya eniledo toamokalepa
nipa einagome koiso yatekakago mekata lia aua poo. Nitikale koiso yakatekoapa ne i ago
po yapu pitikapoano pa wa poyo ago moa metekale moa pitikapoo.
26
Nitikale neke take
oto noateka kuedo odene tuane kue waneka katepitoa toamokalepa eida pa pia kawoo.
Atoa Lia Motikike Akenemo
27
Mone padane atoa koua piameamene wa papete olaukama nekeneya-mo.
28
Opi
noanume eya wane wini ukuna-ye. Panagome pade atoa pa one leneme enetekoa ei einatoa
kouane piadiya wa wene pikopa nipa wete eni koua pitane tetepo takakome toko.
29
Neke
nimini yono lono kako leneme pinali ne toa potokakolopa wete to a wamene. Neke leneta
takuta kakeneya poane take moa pitikaneya mekaya tokale neke eni poane lene wete to a
wamene.
30
Neke nimini yoname pinali ne toa potokakolopa nipa eni yono te ia wamene.
Neke yonota takuta kakeneya poane take moa pitikaneya mekayano, neke eni poane yono
wete te ia wamene.
Atoa Wakete Pa Wa Wetekakike Olaukanemo
(Matiu 19:9, Make 10:11-12, Luke 16:18)
31
Neke atoa wawadepa nipa namolo takoa ne wakene wakuna wa pipia wia
meetekoapa pa wa wetekamene wa papete olaukama nekeneya-mo.
32
Opa noanume eya
wane wini ukuna-ye. Atoame eko ali kode noameneyake aname pa wado wakomepa
poanele eni toko. One atoa pade alike edoa pomotoa-pe. Atoa pade alikedo pokomepa
poanele onemeka toko. Nipa one aname tokoleke atoameka poanele eni toko. Eko agome
wakene atoado panagome motokomepa nipa mone moamateko atoa eni motoko.
Iya Tia Eya Tia Wa Wameamene
33
Eya wa papete olaukama nekeneya-mo. Padele-kiti toade iya ti a eya ti a wa neke
oka toapa kotu kakoa tamene. Padeleka wene kayapea katekameamene. Ali Muno ti a
waka neke oka toa-kama tamene wa papete olaukama nekeneya-mo.
34
Opipa noanume
eya waneka ukuna-ye. Padele toadepa iya tia eya tia wa ikile toameamene. Padele toadepa
tibu tia wa wameamene. Tibupa Akolaliyo ali atoa talo toa one mekoya tokolo tekene ni
uku.
35
Padele-kiti toadepa itono tia wa wameamene. Itonopa Akolali one kawa pogakoa
mekoya tokolo ni uku. Yerusaleme ta tia waka wameamene. Eni taapa ako odene meko
tobou agono ta tokolo tekene ni uku.
36
Wa padele-kiti toadepa neke tobou tia wa
wameamene. Neke toboukepa yo e pineka liane pine odeneka witakoa tamele toamoko.
37
Nipa padele tou wa ekepa e e tou wa oa, toamadepa e 'e toamou wa oa tamene. Pademo
kibutukakutukoa eya tia kuya tia wa okapa nipa Setanuyo wene meteka toa eke too.
Toto-pala Poanele Taneleke
Nami Witikete Toatekomo
(Luke 6:29-30)
38
Panagome eko aline lene kiime eya wia togakalepa one lene kiime eya topo takoa
wia togamene wa papete edikoa olaukama nekeneya-mo.
39
Opipa noanume eya wane wini
ukuna-ye. Nepala padele toa potokakago-pala ete poaneleme topo takameamene.
Nitameneya panagome neke nimini yono lono waneke witikalepa ewa yono lono wanekeka
wia wa yameamene.
40
Ni panagome-kiti neke tigini mamina mou wado ne koisoke lia aua
pokalepa nipa tokoo kako maminaka moa wa meamene.
41
Panagome one kopapu neme
aukoa noo wa dekoa moa aukoa kilomita odeneke lia aua pome kakome ne wakapea pa wa
wetekakaleka one kopapu-pala kilomita takutake aua pome pikapamene.
42
Panagome
nekeya pade mano wa oikiledo tokalepa nipa eni oikaya meamene. Wa panagome nekeke
padeya-kitido nami kakoa moademe okalepa e 'e, meamouno pa wa pade wameamene.
Poi Te iane Yene-pala
(Luke 6:27-28, 32-36)
43
Papetepa eya wa olaukama nekeneya-mo. Neke oya ali atoake wene mekoa
meamene. Ni nepala poi te iane yene-pala kotimi luaneya meamene wa olaukama
nekeneya-mo.
44
Opipa noanume eya wane wini ukuna-ye. Kipala poi te iane ali atoake
wedoa wene mekoa meamene-ye. Ni kipala toa potokoa tete mea tiki-kitipa Akolali neme
auapea ta wa kini kowitikamene.
45
Nipa a tibuke meko Atai Akolaliyo kipa one mana kono-
mikiti tetepo takoa yopimotono, nitamene. Akolali einagome ta piko peyake pitiki peya
pewe witikome eya toma poko. Epetanele toma piki-kitika poanele toma piki-kitika kini kini
mekika ta epetekoa patamotoa toko. Ni kiyo akenele toma yaki yeneka kiyo wamenele toma
yaki yeneka kini kini mekika ta nomotoa toko. Nitikono, eko pade ali atoa mama moa
auapeamene.
46
Kiwike wene mekoa meki-kiti takoa wene mekoa mekilipa nipa Akolaliyo
kiwi edoa kei pimotoa-pe. Beita, takesi kue motokama yaki ali-kitika edikoa ete oto wene
mekanali yoma yaki. Poane ali-kitameke nitiki.
47
Ete yene enoa wawake kini oya-lawe odene
ke wa yono mokala teketepa nipa ete yename tiki toa moa patukakete epetekoa tiki-pe. E 'e
mena. Akolaline peku noamiki yenameka edikakala tiki.
48
Kiniketai a tibuke meko agome ele
kule tikilepa epetekoa toateko kotuke-kama toko toa toma pamene. Nipa kipala poanele tiki
ali atoakeka wene mekoa meamene wa Yesuyo oka.
Matiu Matiu
<<
55
>>
Matiu Matiu
<<
66
>>
6
Ponopene Yene Mama Motekete Toatekomo
1
Yete pade ali atoa auapekilepa ali atoane lene yoto kakete toameamene. Ete-kitame
kiwi kei pimotoa tekete Akolalinele edikoa takakilipa nipa kiniketai a tibuke mekome ke wa
epetanele edoa topo takamotoa-pe.
2
Ponopeneya meki-kitido nekeya pade tatia metekepa bera eya wiameamene. Nipa i
agome ilepa i tokono enatoe wa yete pade ali atoame ne kei pia ka omotoa toameamene.
Wene takuta pianeya meki-kitame kini losu yapu-kitikeka ka katepa luduka ali atoane lene
yoto pote kakete nile-kala tiki. Nitikala tikino, a tibuke enileke kini pine edoa enemotoa-pe.
Itonokepa ali atoame kiwi kei wete pikoiya tokome wa a tibuke pade pine enamoi. Enipa
etene nimini uku.
3
Nekeya pade ponopeneya meki-kitido tatia metekepa pa neke lukoa
meamene. Ile tokou wa to awea wameamene.
4
Nitikale neketai Akolali padele padele
paigakoa tikile eneko ago tokome neke eni tokanakale keleyo topo takoa ke wa ne kei pioo
wa Yesuyo oka.
Akolali Kowitikete Oatekomo
(Luke 11:2-4)
5
Akolali kowitikoa kakepa eya ali-kitame kowitikete tiki toa toameamene. Wene takuta
pianeya meki ali-kitame kini losu yapu-kitikeka ka katepa luduka pote kakete keleyo
kowitikala tiki. Enipa yete pade ali atoame enoa kiwi kei pimotoa tiki. Enilekepa a tibuke
pine edoa enemotoa-pe. Itonokepa ali atoame kiwi kei wete pikoiya tokome wa a tibuke
pade pine enamoi. Enipa etene nimini uku.
6
Akolali kowitikepa akolono ali atoane lene yoto
kake kowitameamene. Nitameneya neke yapu luku kago ketemoa meke paigakoa poti
kowitoa meamene. Nitikale neketai Akolaliyo neke tokanakale keleyo topo takoa ke wa ne
kei pioo. Ali atoame padele padele peya paigakoa tikile eneko ago tokome nitoo.
7
Nitoa kowitoa mekepa Akolaline peku noamiki yename tiki toa kowitameamene.
Dikane yename Akolali kowitiketepa agale kutu pa wapi kakakutukoa likoa pia kowitikala
tiki. Nipa Akolaliyo yatekome kolotini nakale kini kowitikoimo etene yakoa too wa wene
pikete tiki.
8
Kime pade nitameamene. Kime wete kowitameneyake kinekitai Akolaliyo kini
kowitikete oatikimo i i wa wene toopia mekome tokome kini eni wene moademe toko.
9
One
nitane agono, eya wa kowitikala tamene.
Toneketai a tibuke mea kakago neke ibinipa ali atoame paya tetepo takameneya kei
pimotono ta.
10
Neke ali atoa pawe toa talo toano ta. Neme ta wa okole-kama a tibuke meki-kitame litia
tiki toa itonoke meki ali atoameka edikoa litia tomotono ta.
11
Tone opi noateko neepa neme moa lawetamene.
12
Tone tokoo poaneleke po letu mekakana keetapeamene. Nipa toto-pala poanele tokoi
yene kini eni tokoi poaneleke totome po letu mekakoona keetapekete toko toa
nitamene.
13
Padele padeleme toto etepea liamomotono, yopikoa kamene. Poanele-kama tokagoke
toto toa moamene wa Akolali kowitikala tamene.
14
Ete-kitame kipala poanele tokoike po letu mekakoina keetapea ete wa nami wia kibu
moamokolipa kiniketai a tibuke mekome kini poanele toma yakoinake po letu mekakana
keetapeapa nami wia kibu moamoo.
15
Ete-kitame kipala poanele tokoike po letu mekakoina
keamoa ete wa nami wia kibu motokolipa kiniketai Akolaliyo kini poanele tokoinake po letu
mekakana keamoa nami wia kibu moo.
Nee Ue Eya Tekei Wawa Noamekete
Kowitikete Toatekomo
16
Akolali kowitoane meou wa nee wawa pa meketepa eya ali-kitame tiki toa
toameamene. Wene takuta pianeya meki ali-kitame ne wawa pa mekilepa kobu lene kakene
tetepo takoa tiki. Enipa ete-kitame ataiya i agome Akolalinele wedoa takama pokona wa kei
pia ka omotoa tiki. Nitikino, Akolaliyo kiwi kei edoa pimotoa-pe. Ete-kitame kiwi kei wete
pikoiya tokome oneme pade kiwi kei piamoo. Enipa etene nimini uku.
17
Kime Akolali
kowitadete nee wawa pa meketepa kini pine tapalome liitapea petome lomukaketikamene.
18
Ete-kitamepa kini nee wawa pa meadekoile enamomotono, nitamene. Nitikolipa
kiniketaiyo ke wa oa kini tokoinakale topo takoa kiwi kei pioo. Onepa ali atoame padele
padele paigakoa tikile eneko ago tokome nitoo.
A Tibuke Kamoya Pala Pitikou Toa
Epetanele Toma Poatekomo
(Luke 12:33-34)
19
Itonokepa eya kuya kamoya tuku toa oboa piameamene. Enika eniyapa itonoke
pikota tiyome te ia noa lameka yotokatapea kode agome yapu bulukoa nome kode moa aua
pome toko.
20
Kime pade nitameneya, kini kamoya a tibuke pala pitikou toa epetanele toma
pamene. Kini eni kamoya a tibukepa tiyome te ia noamoa lameka yotokatapeamoa kode
agome yapu bulukoa nome kode moa pikile-kitika toamoo tokolo uku.
21
Kini kamoya piko
takepa kini wene piitikaneya yakili tekene ni uku.
22
Labo tole yapu pa takalogou toa kini lenetame tepe kolotini eya pa takalogako.
Lenetado epetaneya kakepa nipa tepe kolotinika pa tootapeneya kawoo.
23
Nitameneya
leneta poaneyatado kakepa tepe kolotinika yomiyomu tootapeneya kawoo. Neke tepe
kolotini pa takatekoyatapa pa toameneya kakepa nipa dika dika toamene yomiyomume
agopa takatapeneya kawoo.
Kini Kepene Mama Moameamene
(Luke 16:13, 12:22-31)
24
Panagomedo alita takutanele takakome takakomepa panago-pala kotimi yoa pupu
takoa wa padena agoke wene mekoa pupu takoa too. Nipa panagoke wene tugakoa mea
pupu takoa wa padena ago paya tetepo takoa pupu takoa too. Nipa Akolalinele takaketepa
kamole toamadete wawa onekele odene takama pamene.
25
Wa kini kepene mama moameneya meamene. Nipa noateku neepa edoane moane
naku patu, noateku uepa edoane nomoane naku patu, kawateku maminapa edoane topo
toane motuku patu wa edikoa wene keda taneya meameamene. Akolaliyo kini yomini tiginita
tobou kakoa mama moapa kini noatiki nee mamina eya kekuya tetepo takoa yopiko. Enipa
nimini ukutu-pe.
26
Ini a tibuke pukaneya yakete tikile enekaketepa eya wa wene taneya
meamene. Nipa edikakiya. Nee lene matamoa ipe kakoya nee wakoa moamoa kini noatiki
nee moa piatiki yapu eya wiamoa tikiyake kiniketaiyo a tibuke mekome talo toa egeteko.
Akolaliyo ini eya kekuya tetepo takoa mama moapa anu oya-lawe kiwi akoya tetepo takoa
wedoa mama motoko.
27
Anu oya-lawe kiwi panago tuatekou-pete tuamekene lou pini
odeneka pa meou wa tepe ate keti enoai tekeka nitamele toamokale tuateka-petepa wete eni
tuoono,
28
kawateku mamina edoane topo toane motuku patu wa wene keda taneya
meameamene. Taage kaluga eya li ludu witakole enekaketepa eya wa wene taneya meamene.
Nipa edikakoya. Po itia mamina latiamokoyake wedoa kalaneya witako.
29
Ako odene tobou
meane ago Solomono einagome mamina epetaneya-kama moa kakome wedoa kalakitikoa
kakala taneyake taage kaluga eya kalaneya moa patukamele toameneya.
30
Kaluga taage eya
ei li ludu pa tekei witako. Nipa opi tou toa witakoyake podolikama alime wakoa moa toele
pitikaki. Edikoa pa tekei witakoloka Akolaliyo talo toa kalotokako. One dikane ago tokome
anu oya-lawe kini kawatiki mamina moa meoono, edekolo wene keda taneya meki-pe. Ae,
Akolalike inapa wedoa wene tugameneya mekiya tadeko.
31
Nee edoane moane naku patu,
ue edoane nomoane naku patu, kawateku mamina edoane moane kaku patu wa enika eniya
mama moameamene.
32
Enika eniyapa Akolaline peku noamiki-kitame mama moma yaki.
Kime pade nitameamene. Anu oya-lawe kini wenepa a tibuke meko kiniketai Akolaliyo
moademe tokoto-mo.
33
Nitademeke one talo toko take wene kiyo akeneya mekete toatiki
peku tobou kakoa lawetoono, one talo toko take edikoa meadiya wa wene piitikaneya
meamene.
34
Nipa podolio edeku patu wa kini kepene mama moameamene. Podolio opita
Akolaliyo kiwi talo too tokolo ni uku. Ta pataka abuna keda enamuma pikino, podolio
enamuatiki keda pade opi wene toopiameamene wa Yesuyo oka.
Matiu Matiu
<<
66
>>
Matiu Matiu
<<
77
>>
7
(Luke 6:37-38, 41-42)
1
Yete pade ali atoa kini tanele poanele tadeko wa kikoa akameamene. Akolaliyo kiwika
kikoa akayano, toameamene.
2
Yete pade ali atoa edikoa kikoa akakete tiki toa ete wa kikoa
akakala toi.
3-4
Ae, anu oyago neke leneke yomo pudunukau pomotoake wene toameneya
mekeke neke oyagono lenekedo kugu deya pekeneya eneke eke neke leneke kugu deya
pekeneyano, to ane motokada wa-kiti oko. Neke leneke poka yomo pudunukau pinali neke
wapa to a moamatekoyake oko. Edekolo oko-pe.
5
Wene takuta pianeya meko ago neke
leneke pudunukau poka yomo pinali neke wa namolo takoa to a moamene. Mootokoapa
neke leneme wedoa enamele tokale meke neke oyagono leneke pekene kugu deya to a
motokamele too.
6
Akolaline takoa pikaneya tue-kiti kakoita moa pitikameamene. Eniledo tokolipa
nootokoa kiwika kimeme tiawea tadetapeoi. Yobo ma yoka kai-kiti kakoita moa
piameamene. Eniledo tokolipa paya tetepo takakete kawame kautoa wititapeoi.
Akolali Kowitikete Toatekomo
(Luke 11:9-13)
7
Akolali kowitikolipa yakoa too. Padeya-kiti tuku tokoa kaketepa enamuoi. Kago wi
wi tokolipa pinago nome pekapikale tuapea poi.
8
Edikoa kowitoa kakagomepa nipa one eni
kowitikaya moo. Padeya tuku toa kakagomepa nipa one eni tuku tokaya enamuoo. Kago wi
wi toa kakagopa nipa pinagome pekapinoo.
9
Neke managome palawe wane pade nouno
mano wa-kiti okalepa kue wane pade neme yotokoa moa meoo-pe.
10
Ni mou pade nouno
mano wa-kiti okalepa lene meaneya ali tania tukako kaya yotokoa moa meoo-pe. Nitamoo-
li.
11
Kipa poanele toma yaki-kitameke kini mati-kiti epetaneya-kama wene toa mekala tiki.
Epetaneya moa mekala tiki toapa a tibuke meko kiniketaiyo etene moa patukakome anu
oya-lawe kiwi epetaneya mati takoa moa mekala too. One mano wa kowitiki ali atoapa nipa
mekala too.
12
Eko pade ali atoame neke wene mokala tomotoapa nipa kini weneka neme mokala
tamene. Eni ukupa Moseseyo yametane totono pine to ane ekene uku. Akolaline agale
to awea akane ali-kitame wia mekane agaleka pine to ane ekene uku.
Nateya Kago Keneke Patukoa Pamene
(Luke 13:24)
13
Akolali mekota poatiki ka keteponopa nateya dekatekaneya kakono, eni kago
patukoa pamene. Ali atoa pote atupoatiki ka kago keteponopa etene yuane mati piko.
Nitaneya tokome ali atoa kainya mati pote weamutuketepa poane take pokala tiki.
14
Mea
kama poatiki kaapa nateya deya pia kago-kitika etene dekatekaneya kako. Eni kaapa ali atoa
natetekoame tuku toa enamutukala tiki.
Yomo Ku Tukole Takoa Enatekomo
(Luke 6:43-44)
15
Pade ali-kitame Akolaline agale akaku wa kiwi pakeke sipi sipi kai tetepo takoa
neketeke lene piane yokome keneya kimeme tiawea tadekatapekome toko toa kiwi toa
potokoa oa yotokoino, lene kia wedoa nepikoa kamene.
16
Nekete tokoile eneketepa nipa ku
poaneya eni tukono, Yesuyo oa pikanakago eni nekedeko wa wene toi. No yokepa gerepi po
ku tuamoa ni aulalukepa yomo piki ku tuamoa too.
17
Yomo epetaneyakepa ku epetekoa
tuoo. Yomo poaneyakepa ku potokoa tuoo.
18
Yomo epetaneyake ku poaneya tuamoo.
Yomo poaneyakepa ku epetaneya tuamoo.
19
Ku epetekoado tuameadekalepa pinagome tue
moa ka wa poia toe mine pitikoo.
20
Nipa Akolaline agale akaku wa oake kapene wakoa iki-
kiti nekete tokoile eneketepa ku poaneya eni tuko wa wene toi.
Yesuyo Pade Ali Atoa Kiwi Wene Toamuku
Wa Akoa Wawatekomo
(Luke 13:25-27)
21
Ali Muno Ali Muno wa no kei pia iki peyapa Akolaliyo talo toko take poi wa wene
piameamene. Agetai a tibuke mekome ta wa okole-kama yakoa tiki-kiti odene one eni take
poi.
22
Wipitia ta pataka-pete ali atoa kainya matiyame no-pala eya wa oi. Ae, Ali Muno neke
ibini wedekoanepa neke agale to aweane akoane ali atoake awitane ipono-kitika takoane
wetekoane ele kule telekole toane tokouna wa nopala oi.
23
Nimo okoli ekene kiwi nateyaka
wene toamuku. Poanele toma yakoinakeya-kiti wete poe wane wiane lititapeou wa Yesuyo
oka.
Yapu Epetekoa Wikete
Potokoa Wikete Tanemo
(Luke 6:47-49)
24
Kipala i uku agale yakoa tiki-kiti kiwike dikoane adeka piane uku. Wene muno meane
agomepa yapu wikome kue yaupea waneke motene pogoa wianeya.
25
Wia peya takaneyake
ta lobomoa pitikoa ueka leau akoa yoa pupulege awitikaka matiyameka yapu auameneya pa
kawa kakeneya.
26
Kipala uku agale yateketeke yakoa moamiki-kitike dikoane adeka piane
uku. Wene meamene agomepa yapu wikome ue kibike motene pogoa wianeya.
27
Nitaneyake ta lobomoa pitikoa ueka leau akoa yoa pupulege-kitika popokaka matiyame
yapu kawa katekoa aua pitikaneya. Bu wa aua pitikaneya wa Yesuyo oka.
28
Nimo
ootokaneyake eida oboa kakoi-kitame ekete
29
i olaukakome okopa Mosesene totono pine
to a olaukaki yename ikina toa wamokono, agale pinagomepa i okono, yakatoe wa ka oa
kakoi.
Matiu Matiu
<<
77
>>
Matiu Matiu
<<
88
>>
8
(Make 1:40-45, Luke 5:12-16)
1
Yesu tono aya wane mea keti toa pokale enekete ali atoa lewi lewita pia litima nokoi.
2
Nitikoika kedi pitane agome Yesu kotukome wadini tukua kowitikome okome Ali Muno
ago nemedo no i ago epetekouno wene pikepa nipa oyake epetekoano ta-kale
3
yoname one
mitikatekakome okome nitouno ta. Kedime nakeneya neke eni yene takoa pomotoane uku
wa mitikakome okaka eina eina takoa pootapeneya.
4
Nitaneyake Yesuyo okome okome ete
ali atoa enekeka ne latekakumo to awea ikileka toamea. Nitameneya eya topoano pa. Ne i
agopa kedi pitaneya mekanake opi i latoa kakona wa yete pade ali atoame wene tomotoapa
nipa Moseseyo tamene wa papete oa pianele topamene. Nipa Akolalike lodo yotokoai toko
ago mekota peke padeya lodo yotokatekoya aua poke mepoano pa wa wetekaka.
(Luke 7:1-10)
5
Yesu Kapaneame take pome kakale Lomane yatene tobou poyo ago pade nokome
okome
6
Ali Muno anu pupu ago pade one yapu walaike pa pia kakome muku tamele
toamokome tete-pala moa mekono, einago auapea epetekakoano ta wa kowitikale okome
7
nipa winagopa latekapouno, pata-kale okome
8
e 'e mena. Ipa pa ago kakene ukuno, anu
yapu ne pata wane edoane kouane pomotoa-pe. Pa ne ita kake einago latoa kamene wa
okalepa latoa poono, oano ta.
9
Nopa tobou poyo ago padeke lokoane mekene ta wa
okole-kama tuku. Nitiku toa nooke lukoa meki poyo ali-kitika anume toe wane ukule-kama
yakoa tiki. Panago ne pa wane-kiti ukulupa yakoa poko. Wa panago no mekuta oto noo
wane-kiti ukulupa yakoa noko. Anu pupu ago-palaka ile ta wane-kiti ukulupa nipa yakoa
ukule takako. Edikoapa anu pupu ago latoa pa wa neme okalepa latoa poo wa tobou poyo
agome oka.
10
Nimo okale yatekome Yesu wene kainya pianeya kakome one-pala obomoa
nokoina yene-pala okome imopa i okono, yakoe. Mone yatene agomeke ipa oko. Iserele
ago odeneka nooke edikoa wene tugoa meadekole enamuku.
11
Kipala i ukuno, yakoe.
Mone pade take ali atoa kainya mati lou witia noko lonoka lou pipoko lonoka yeteka
yukuka kawa Akolaliyo talo toko take note menokala toi. Nipa eya ali-mene Eberame
Aisaketa Yekobe toa toge kikoa mekoita toge nee nopato wa note menokala toi.
12
Kipa
Eberame-loeke tagene yeneka Akolaliyo eida pawe toa talo too tokake opi poe wa
yomiyomume dika dika toamene take moa pitikakale komo ka ta nina toa pitikoa kawamoi
wa Yesuyo oka.
13
Yesuyo nimo ootokoa tobou poyo ago-pala okome noanume neke pupu
ago oyake latekamele toko wa wene teke winipa okono, neke wene moadene tukuno, poano
pa wa oka. Poano pa wa okanaka eina eina one pupu ago latoa kakedeka.
(Make 1:29-34, Luke 4:38-41)
14
Yesu Pitane yapu tuapea pome enekale Pitane natonane nine poto yeneme tuaneya
pikale enetekoa
15
one yono mitikatekakale eina eina one poto yene takoa pokale
kamokakome one nee takoa laweteka.
16
Lou pipokaka ipono awitane ali atoa peya mati Yesu mekota kiwi aua poono patoe
wa kini oya-mikitame koua nokoli poane ipono-kiti wete takoa poe wa okale takoa pokala
tokoi. Eya kuya yene tane-kitika aua nokoli latekakala toka.
17
Enipa Akolaline agale to awea
akane ago Aisaiayo oa piane toa taatekoa toka. Eya wa oa pianeya. I to aweane uku ago
taatekoa nokome toto peya eya kuya tane yene takoa wetekakomepa kabe koukoa pinali
oneke wa weamutukou toa takoa wetekoo wa Aisaiayo oa pianeya.
Yesu Ne Litima Nou Wa Akene Agota-pala
Akenemo
(Luke 9:57-62)
18
Wa pade-pete ali atoa peya mati Yesu kakata unukapia kakoli enekome Yesuyo one
oyali-lawe-pala okome eka ue matanuke witatono, patoe wa okaka
19
Yu yenane totono pine
to a olaukakago pade one kakata nokome okome ne pokaka opi litima pou-kale okome
20
yanai ini eya kini piatiki yene kakoyake no Ali Yatenane Oyago naliyomo mokoane
piatekuyaka toamokono, no oyake litia noo-pe wa oka.
21
Nitikale Yesu-pala opia yaka ago padame okome okome ne opii litima noatekuyake
agetai tuaneya pikono, oloyo toomotekene ne litima nou-kale okome
22
Akolalinele
takamekete tuaneya piou toa pa meki-kitame tuane ali atoa oloyo tomotono, tokamota. Opa
nepa no litima noano no wa Yesuyo oka.
Pupulege Tadalita Te itakanemo
(Make 4:35-41, Luke 8:22-25)
23
Yesu ue dipike pome mekaka one oyali-kitame opia pato wa opia pekete pokoi.
24
Mea poadete pokoika pupulege tadalita kotikatapea u u wa noka matiyame ue
pewikanokome ekolo lobututapeneyake Yesu pa atu pia kudaka.
25
One eni pitikaya liti one
oya-lawe tegeteka tegeteka toa mekete kamotokakete ekete Ali Muno toto ueme
atukamedekono, toa moano, kamoa wa kamotokakoli
26
kamokakome okome dekolo piti
motiki-pe. Inapa nooke wene wedoa tugamekete tadiki wa kamokoa kakome pupulege-pala
pewikanoka ue-ta kikoa okale tokoo lapa eyaka waametekoa kilikoa meelogaka.
27
Nitikale
enekete wene kainya pianeya mekete ekete pupulege ue minetameka ta wa okole yakoa eni
tokono, i ago Yesupa edane ali patu wa ka oa kakeneya.
Yesuyo Ipono Awitane Agota Epetekanemo
(Make 5:1-20, Luke 8: 26-39)
28
Yesu eka ue matanuke katepitoa pome Gadara ta ludu yakaka ipono-kiti awitane alita
takutame one kotua nokoi. Nipa tuane yene oloyo toai taneka mea nokoi. Lene pianeyata
kakoi matiyamepa eni take yene peya eida poamadete tima tima toa yakeneya.
29
Nitane
agotame Yesu kotukete ka telo ootapekete ekete Yesu nepa Akolaline manano, tota-pala
edele toade noka-pe. Tota tete meateko oi wete noameneyake papete tete meade noka-pe
wa telo ta yo ootapea kakoi.
30
Nipetepa eka mati ege egeta kadukoa kakene kai kimi kee noa kakoli
31
enekete
einagotake awitane ipono-kitame Yesu kowitikete ekete toto takoa wetekakalepa kunuka ku
kai-kitike awipoono ta wa kowitikoli okome
32
nipa poe wa okale takoa pootapekete e kai-
kitike awipokoi. Nitikoli einaka eina kai-kiti payaneke kawa palake ketipea kiliti pote ue
nakoa atutapeneya.
33
Nitikoile enekete einaka eina kai egetekoina yename ekete ekee wa kini ta latia
pitikoika pitoa pootapekete ipono awitaneya yakoina agota-pala eniledopa eni toka wa kini
leneme enekoinakamo opaneya.
34
Nitikoli yatekete Yesu kotupato wa udamoa pote
kotukete ekete tone i ta tewitikoano pa wa kowitoa kakoi.
Matiu Matiu
<<
88
>>
Matiu Matiu
<<
99
>>
9
Muku Toameneya Pa Pia Kakene Ago
Epetekanemo
(Make 2:1-12, Luke 5:17-26)
1
Yesu ue dipike peapetekoa pome mea one Kapaneame take eka matanuke wakapea
pome mepoka.
2
One eida pome mekata pade ali-kitame muku toameneya pa pia kakene
ago leyo leyo toa aua note pinokoi. Yesu i agome kini oyago oyake latekamele toko wa
wene tadekoile enekome Yesuyo okome anu mana neke toma nokana poaneleke Akolaliyo
po letu mekakanapa keetapekuno, wene weye akeneya meamene wa Yesuyo oka.
3
Nimo
okale yatekete Mosesene totono pine to a olaukane ali padeka-kitame ekete beita, i agome
Akolali tekome oko wa wene kibutua kakoli
4
Yesuyo tetoa enekome okome wene wini
poaneya mekino, dekolo tiki-pe.
5
I ago-pala ukule tamele tadeko wa kime wene
tomotoanepa edemo wane omotoa iki-pe. I ago neke toma nokana poaneleke Akolaliyo po
letu mekakana keetapeku wane omotoa iki-pe. Wete kamokoa pa wane omotoa iki-pe.
6
No
Ali Yatenane Oyagome itonoke mekene ali atoame toma yakoi poaneleke Akolaliyo po letu
mekakana noanume keetapeamele toko wa kime wene tomotoanepa i ago-pala eya wane
ukuno, ne aua nokoina leyo-pala aua peke neke yapu poano, kamokoa pa wa Yesuyo
einago-pala okale
7
kamomotokome one yapu pome mepaneya.
8
Nitikale enekete eida oboa
kakoi-kiti piti tokale kakete ekete ekee, Akolaliyopa eni telekole toateka peku tone yagono
ago i ago lawetaneya tadeko wa Akolali kei pia kakoi.
Yesuyo Matiu Einago Kayo Oa Motanemo
(Make 2:13-17, Luke 5:27-32)
9
Yesu eni ta tewitikoa pokome enekale eya ago Matiuyo takesi kue motokoai tane
yapu keneke mekale enekome okome no pukuka tone patono noo wa oma ponokale Yesu
litima poka.
10
One yapu nee nopatono, pata wa Matiuyo koua pokale Yesu pome mekome nee
noa meka. Nitikale takesi kue motokama yakene ali-kitika Mosesene totono litia toamene ali-
kitika eida nekete Yesu-palaka one oya ali-kiti-palaka opia mekete nee nakoi.
11
Nitikoli
enekete Parisi ali-kiti Yesuno oya-lawe mekoita nekete ekete kini tikisagomepa takesi kue
motokama yaki ali-kiti-palaka Mosesene totono litia toamiki yene-palaka opia mekome nee
nakono, edekolo tokoto-pe wa onokoi.
12
Nimo akedekoli yatekome Yesuyo okome
dokosa agomepa yene toameneya meku wa iki-kiti edoa nome latekanomotoa-pe. Yene
taneya meku wa iki-kitipa nipa nome latekanoo.
13
Akolaliyo akenemo one bokuke wia
mekanemo ukuno, yakoe. Eya kuya nooke mea lodo yokala tikiyake kote tokolo waku.
Anu wenedo kekadetepa ete ali atoa ela moa mama moa tamene wa oka. One eni okamo
pine edoa piko patu wa wene kibutukoa meamene. Nipa poanele toamuku wa iki-kiti kini
namolo poane wene wia wawe wane oadene nokouya mena. Nitamekene poanele tuku wa
iki-kiti odene kini namolo wene wia wawe wane oadene nokou wa Yesuyo oka.
Nee Tekei Wawa Noamenemo
(Make 2:18-22, Luke 5:33-39)
14
Wa naniko ali atoa ue motokama yakene Yonene agale yakane ali-kiti Yesu mekata
nekete ekete totomeka Parisi yenameka Akolali wedoa kowitadetepa padepete-kiti nee eya
tekei wawa noameneya pa yako. Neke oya ali-kitame enile toamikino, dekolo toamikiti-pe
wa okoli okome
15
panagono atoa motokakita atoa motoko agono oya-lawe one-pala
wedikete wediapa nee eya edoa wawa tumai memotoa-pe. Wa naniko ete yename atoa
motoko ago padeka aua poatiki wini tigotoma nokona. Enipetepa wene keda taneya mekete
nee noameneya wawa pa meoi.
16
Panagome-kiti one mamina namoloya pilikalepa weneya pue moa pilikata lapukoa
lipuko patu. E 'e mena. Eniledo tootokoa uele abe kogalepa weneya pueme ete ete toa
edema pokome pilikutu too.
17
Ni gerepi po ku ue weneyapa pinagome meme kai kepeneme
latiane mete namoloyake peia moamoo. Eniledo tokalepa gerepi po ku ue weneya tokome
lako yati kawa mono mono oo. Nitikale mete namoloya tokome pukoa mono mono amele
toamokome kaugale gerepi po ku ue pata paka ponoo. Gerepi po ku ue weneyapa nipa
kepeneme latiane mete weneyake-kama peia mokala too. Nitikale uepala meteta atuameneya
pia kawoo wa Yesuyo oka. (Enipa Akolalinele-pala kini namolole-ta odeneka dekoa
toameamene wa okome oka.)
Tukome Tuane Akoma Kamotokanemo
(Make 5:21-43, Luke 8:40-56)
18
Yesuyo enimo oa kakaka tobou ago pade one kakata nome wadini tukupia
kowitikome okome anu kono akoma opi tukano, ne nooke yono pikanokalepa latoa
kawoono, kamatokakoano patono ta wa kowitinokale
19
nipa pata wa litima pokale one oya-
laweka koua pokoi.
20
Yesu eni pokaka yene tane atoa pade one mukiti lono lekama nome one tokoo
kakene mamina nami mitikatekaneya. Einatoapa kamate yokoa kakome yeneme tukome mea
potokane atoa. Mali tuku (12) kakoa ponoka toa edikoa meaneya.
21
Nitane atoa tokome
Yesuno kakene mamina namido mitikakenepa latoane pou wa wene pia mitikanokale
22
peketapea enekome okome anu kono nepa tepe kolotini kilikoa pimotono meamene.
Nooke wini wene tugake tokoleme ne latekaneya tokolo uku wa okale einatoa eina eina latoa
kaka.
23
Nititikaneyake Yesu tobou agono yapu pome tuapea kakome enekale pade ali-kiti
tumai mekete tulutu oa wa pade ali atoame agale kamotokoa oa tokoli yatekome okome
24
i
akoma deya tukome tuaneya menano, pa atu pia mekono, poe wa okale one yau takakoi.
25
Nitikoli poe wa litimotokome eina akoma tuaneya pikata pome kakome yono motokale
kamokoa latoa kaka.
26
Nititikaneyake one eni tokamo ta piko peyake oa pupitikatapeneya.
Leneta Liane Agota Lene Kikakanemo
27
Yesu eida tewitikoa yakaka alita takuta leneta lianeya meane agotame Yesu kayo oata
litima nekete ekete Depidi-loeke tagene ago tota ela moa epetekoano ta wa kayo oa litima
nokoi.
28
Litima nekete one pome meka yapu keneke tuapea note kakoli enekome okome i
agota kita anume oyake latekamele toko wa nooke wene tugakete niki-pe-kale ekete Ali
Muno neme oyake latekamele tokono wene tekete ni nokoo-koli
29
kini lene mitikakome
okome nooke wene tugakete iki toane nitimotoane uku wa oka.
30
Nimo okaka kini leneta
eina eina kikatapeneya kakoli okome kita epetekakumo pade-kiti kotuketeka etene kotukoa
wameamene wa agale telekoya oa tagaka.
31
Nitikale yakameneya eni ta piko peyake yakete
Yesu einagome tota-pala ilepa i toka wa oa kotukoa yakeneya.
Agale Amele Toamene Ago Latekanemo
32
Eina leneta liitapeneya mekoinakagota yapu tewitikoa pene ani pokoika pade ali-
kitame ipono awitaneya mea agale amele toamene ago-pala Yesu mekata aua nokoi.
33
Nitikoli Yesuyo eni ipono takoa pa wa wetekakale agale amele toamene agome agale witoa
oa kaka. Nitikale eida oboa kakoi-kitame ekete tone Iserele take namolo toamokoinakale i
agome ile i tokona wa ka oa kakoli
34
Parisi ali-kitame ekete beita, ipa ako odene meko
tobou iponane tele patu kautakoa kakome ipono-kiti takoa wetekakala toko wa tea kakete
okoi.
Yesuyo Ali Atoa Ela Motokome Akenemo
35
Yesu ali atoa ta latia pitikoika nateya takeka tubeya takeka yakome kini losu yapu
pome olaukakala taneya. Nipa Akolaliyo ali atoa pawe toa talo tokomo kini wene
epetekanemo i i wa mo wima pokomepa eya kuya yene tane-kitika kini yene peya
latekawineya poka.
36
Nitoapa ali atoa eida kakoi mati egetamene sipi sipi kai keneya wene
keda toologaneya pa yawa mekoile enekome ela matiyame tuaneya kaka.
37
Nitoapa agale
pedoa okome okome ae ipe nee kakoya wakoa momotoa nodokoa kibutukakoa kakoyake
eni ipe ludu wakoa moatiki yene natetekoa kakino,
38
eya wa kowitamene. Ipe nee kakoya
wakoa mou toa neke ali atoa toa motokamotono, pinago neke pupu yene wete takoa moa
wetekoano ta wa Akolali kowitamene wa Yesuyo oka.
Matiu Matiu
<<
99
>>
Matiu Matiu
<<
10 10
>>
10
Aposelo Ali-kiti Moa Wetekanemo
(Make 3:13-19, Luke 6:12-16)
1
Wa naniko tuku kakoa (12) one oya-lawe one kakuta noe wa Yesuyo kayo oa
motokome okome noanu tele patu kautakoa kakete ali atoake awitane ipono takoa wetekoa
kini tane yene peya latekoa toma poatino poe wa wetekaka.
2
One eni oya-lawene ibinipa
dikoa. Namolo agopa Saimone one pade ibini Pita wa okala tiki. Ni one wamenago Aderu.
Ni Sebedine manata Yame wamenago Yoneta.
3
Ni Pilipi-pala Batolomiuta. Ni Tomasi-pala
Matiuta. Matiu einagopa takesi kue motokama yakanakago. Ni Alepiasine mana Yame. Ni
Tadiasi.
4
Ni Keinane take ago Saimone. Ni Yudase Isekariose einagopa Yesu wimotoa moa
meateka ago.
5
One eni tuku kakoa (12) oyali-kiti eni moa wetekakome okome mone pade yatenane
ta ludu yawamoa Sameria yatene kini ta latia pitikoikaka poamoa tamene.
6
Iserele yenepa
sipi sipi kai-kiti paka pote kapou toa etepea mekino, kini mekika poatino poe.
7
Nipa
Akolaliyo ali atoa keleyo talo toateko tigotoma noko wa mo wima poatino poe.
8
Nitima
pekete yene tane ali atoaka latekoa ni tuane yeneka kamotokoa ni kedime nakene yene kedi
takoa wetekoa ni ali atoake awitane poane ipono-kitika takoa wetekoa tamene. Kini eni
toatiki peku lawetekenepa nami kakamoane pa lawetekuno, ete yene auapekilepa kinike kue
eya oia moameneya pa auapekala tamene.
9
Nitiketepa kue utiki kakepa golo kue waneka
silepa kue waneka pa tuane kue waneka ua poamoa
10
ni oia moa nee eya uatiki kaka aua
poamoa ni tigini maminaka kawa yeneka itika wa padeya lokoa moa aua poameamene wane
uku. Pupu agome-kiti panagono pupu takakalepa pupu pine agome nami wia one noateka
nee lawetoo tokolo ni uku.
11
Tubeya takeka dee takeka peketepa eya wa yakatekamene. I
take Akolaline agale yakoa motane ago mani yapu pitikoto-pe wa yakatekoapa nipa eni
yapu mepamene. Nipa yapu yapu yawameneya odene yapu-kama mea kawa pokala tamene.
12
Nipa yapu tuapea peketepa tepe kolotini kilikoa pimotono mea wa okala tamene.
13
Nimo
okoli yapu pitikoi yename kiwi makutukoa moteketepa nipa kina eina epetekoa okoina toa
epetekoa meoi. Nitameneya makutukoa moamokolipa nipa tokamotono, kina eina oa
metekoina agale pedekomepa kiwike oto weamumotamene.
14
Wa pade yapu pitikoi yename
kiwi makutukoa moamoa kini agaleka yakoa moamokolipa nipa pubu ou toa kini kawake
kakene kege ko ketikoa tewitikoa pokala tamene.
15
Ae, dikakoi yename tete moatikimo
ukuno, yakoe. Akolaliyo ali atoa takoa eneka-petepa Sodome Gomora tatake meane yene
kibu motokome dika dika toamene tete meoo. Kiwi makutukoa moamokoi yene kibu
motikilepa eni meteka tete moa patukoa tete ako mati meoo wa Yesuyo oka.
Akolalinele Takoa Togamene
(Make 13:9-13, Luke 21:12-17)
16
Opi anu oya-lawe kiwi poe wane wetekakilepa lene pianeya yo tane tue-kiti yakika
sipi sipi kai keneya moane wetekou toane tuku. Poanele witakale eneketepa edeku patu wa
wedetekoa yako kayame-kiti toko toa wene wedoa tetoa pia tamene. Nitiketeka taba ago ini
weuweme-kiti toko toa utanele poti toma pamene. Nipa poane yename kipala eya toa
potokakala toi.
17
Pade-kitame kiwi koiso akou wa Kanosolo ali-kiti mekoika lia aua pokala
toi. Wa pade-kitame kiwi wiou wa kini losu yapu-kitikeka layo toua wikala toi.
18
Ni anukule
takama yakoikepa ako odene tobou mekoi ali-kiti mekoikaka kiwike lokoa ta yopia mekoi
yene mekoikaka lia aua pote koiso akakala toi. Nitikolipa enika eni tobou mekoi-kitane
lenekeka e ku mone pa yatenane lenekeka kakete anukumo i i wa to awea akakala toi.
19
Kini
eni koisoke lia aua pokoika peketeka edemo uku patu, agale edoane topo takoane uku patu
wa wene keda taneya poameamene wane uku. Epetane Yominiyo kini oatikimo i i wa wene
taka taka too tokolo ni uku.
20
Nitikala tokale tekete pademo-kiti ikilepa kini weneme titia
pade wamoi. Kiniketai Akolaline Yomini kiwike awinokome a wa oka toa okala toi.
21
Enipetepa wamenagome-kiti wamene wia tukamotoa moa meoo. Etename-kiti mana
matika wimotoa moa meoo. Mana kono-mikitameka kini etene nine wia tukamotoa moa
mekala toi.
22
Anu oya-lawe kipa nopala odene ibini pedane ali atoa tokale tekete ete yene
peya kipala kotimi yotaneya meoi. Nitikolika anukule pa takama pote kutu togakolipa
Akolaliyo kipa one wa toa moo.
23
Kiwi tete metekolipa kini pitikoina ta wawa to a pote
padeka pade take mepokala tamene. Nitiketepa kini Iserele ta keneke ali atoa pitikoi toa
pade take to a pokala toa ete ete toa pote mea togameaneyake no Ali Yatenane Oyago
wakapeane nou.
24
Nipa eya wa wene taneya yamene. Sukili matiyame one tikisago moa patukamele
toamoa ni pupu takakagome one pupu pinago moa patukamele toamoa toko.
25
Tikisago
meko toko toa one sukili matika edikoa meamedeko. Pupu pinago meko toa one pupu
takako agoka edikoa meamedeko. Enipa ete-kitame yapu pinago nopa tobou ipono ago
Belesebule wa ibini ikino, eni iki toa moa patukoa anu yapulu yene kipa etene tea agale
okala toi wane ekene uku wa Yesuyo oka.
Akolali Piti Tokale Meamene
(Luke 12:2-7)
26
Eni yename kipala padele toatikilekeka piti moameamene. Ali atoame kaukoa toma
yakile peyapa naniko keleyo witatapeoo. Padele padele paigakoa tikiyapa naniko peyame
keleyo enetapeoi.
27
Kipala likonu kakene okouna agalepa lou pa ke kakete to awea
ootapeamene. Wa kipala oi oi wa okoi agalepa yapu yalinike lewia kakete i i wa telo to awea
ootapeamene.
28
Yete pade ali-kitame kiwi wiou wa lama moa lagotoa tukamele tokoyake
kini yomini pade oyake wia atukamele toamoko. Nitamele toamokono, ali-kitipa piti
moameamene. Akolaliyopa poane take poe wa okomepa nipa kini yomini-pala wia
atukakome atukamele toko. Nitikono, Akolali einago odene piti moma pamene.
29
Dee ini
deyata takuta tape kogopene topo toa kue motikilepa dedeya tuane kue wane odene mokala
tiki. Enipa nimini ukutu pe. Dikane ini odene deyaka tukome itonoke pitakolopa kiniketai
Akolaliyo ae, i ini deya eni tukona wa wene taneya meko.
30
Ni ago Akolaliyopa anu oya-
lawe kini wagoke witako pine kako toa oi moa talo toa kako.
31
Ni agome ini deya mamapa
moake paya tetepo takakome kipa one kolotini yene wa wedoa mama moa talo toa kakono,
ete-kitame kipala padele toatikilekeka piti moameamene wa Yesuyo oka.
32
Panago ali atoane leneke kakome no i agono peku noane tuku wa to awea okalepa
noanuka a tibuke meko agetaine leneke kakene i agopa anu peku noa tokago wane to aweane
ou.
33
Wa panago ali atoane leneke kakome no i ago kote tokolo waku wa okalepa eina
toane noanuka a tibuke meko agetaine leneke kakene einagopa kote tokolo waku wane
waou wa Yesuyo oka.
Yesuyo Ali Atoa Ete Oto Wa
Puutakutukamotoa Nekenemo
(Luke 12:51-53, 14:26-27)
34
Noanumepa ali atoa poi teigoa wawa poti kilikoa memotoane tekene nekedeku wa
wene piameamene. No i nukupa kako poi takoukene ni nokou.
35
Nipa panagome one etene-
pala padatoame one nine-pala wa padatoame one aline nine one kaue-pala kako poi
takoukene keku.
36
Kipala poi te ia meki-kitipa kini yapulu yene eni wane ekene uku.
37
Panago one etene ninetake wene wedoa mekoa mekomeke nooke nateya wene
mekoa mekomepa nipa nopala oyake oya kakoa litiamele toamoko. Wa panago one mana
kono-mikitike wene wedoa mekoa mekomeke nooke nateya wene mekoa mekomepa nipa
nopala oyake oya kakoa litiamele toamoko.
38
Wa panagomepa one wiatiki lekane yomo lia
aua poamademe wawou toa tokome anukule takama pokome tete-pala moamademe
wakomepa nipa no yatene ago wa amele toamoo.
39
Nipa onekele-kama tokome tukaya wa
kepene mama motoko agopa one yomini-pala etepea tua poo. Wa padekagome one kepene
mama moamoa no i agoke tuou wa wene pikagopa tukomeka wa kamomotokome Akolaline
take pome mea kama poo wa Yesuyo oka.
Akolaliyo Tone Epetekoa Tokole
Topo Takatekomo
(Make 9:41)
40
Panagome-kiti one yapu kiwi noe wa makutukoa motokomepa nipa nopala dekoa
makutukoa motoko. Panagome no makutukoa motokomepa nipa no moa wetekaka ago-
pala dekoa makutukoa motoko.
41
Panagome Akolaline agale akaka ago kotukome okome
nepa Akolaline agale akako agono, one yapu ne noo wa makutukoa motokalepa nipa one
eni tokake Akolaliyo einagoka one agale akako ago tetepo takoa pewe wioo. Wa
panagomepa wene kiyo akeneya meka ago ponokale enekome okome nepa wene kiyo
akeneya meko agono, one yapu ne noo wa makutukoa motokalepa nipa one eni tokake
Akolaliyo einagoka wene kiyo akeneya meka ago tetepo takoa pewe wioo.
42
Wa
panagomepa anu oyago pa ponopene ago ponokale enekome okome i ago nepa Yesuno
oyagono, ue nomotokapouno, nepia wa mama moa auapekalepa nipa one eni tokake
Akolaliyo etene kei pia pewe wia too wa Yesuyo oka.
Matiu Matiu
<<
10 10
>>
Matiu Matiu
<<
11 11
>>
11
Yoneyo Yesu Pitia Yakanemo
(Luke 7:18-35)
1
Yesuyo one tuku kakoa (12) oyali-kiti einaka einamo oa meemotokome Galili take ali
atoa pitikoika mo wima pokome Akolalinemo i i wa olaukakala toka.
2
Ali atoa ue motokama yakene Yone po yapu pa pia mekomepa Keraisuyo eina toma
yakenemo kugu yatekome eya taneya. One oyali padeka-kiti Yesuke moa wetekakome
okome Yesu eya wa yakapoatino poe.
3
Nepa i wa ibini oa piane ago taatekoa noko-pe.
Panago taatekoa noo tokolo totome nepia kamotoa oko-pe. Oano ta wa yakapoatino poe
wa Yesuke moa wetekaneya.
4
Wetekakale yakanokoli okome padele padele tukule kini
leneme enoa ni pademo pademo ukumoka kini kaleme yakoa tikino, Yone mekota eya wa
wakapea pote akapoatino poe.
5
Leneta lianeya mekoina yene opi leneta kikakaneya yawa ni
kawa okeaneya yakoina yene opi wedoa pogoa kautoa pote ni kedime nakeneya mekoina
yene kini kedi yene opi takoa pokolo latoa kawa ni kale keneta keteaneya mekoina yene opi
kale pekaneya yawa ni tuane yeneka opi kamotokaneya kawa ni ponopene ali atoame
Akolalinemo yakakoa meki wa Yone akapamene.
6
Eya waka akapamene. Nooke wene
tugoa mea wawamoko agopa kolotine meoo wa akapoatino poe wa Yesuyo eina ali-kiti
Yone mekata kutu wa wetekaka.
7
Wetekakale tewitikoa pokoika Yesuyo eida oboa kakoi yene-pala Yoneke okome
okome ali atoa piamene take Yone enepeketepa edanele enadete pokoiya-pe. Tauwe wata
pupulegeme muku muku toa kakale enepokoiya-pe. E 'e mena.
8
Nipa edane ago enadete
pokoiya-pe. Panago mamina epetaneya kakeneya kakale enepokoiya-pe. E 'e mena. Mamina
epetaneya kaki-kitipa nipa ako tobou ali-kitane yapu-kala meki.
9
Nipa edaneya enadete
pokoiya-pe. Akolaline agale akama yakago enadete ni pokoiya-pe. E e nimini, Yonepa nitane
ago. Akolaline agale papete to awea akane ali peya keku kamotoa einago ako kako.
10
Yone
einagokepa Akolaliyo mana-pala papete akenemo wene takakale panagome eya wia
mekapianeya.
Ne naniko pomotoane anu agale oa aua yawateko agopa namolo takoane moane
wetekou. Nitikolu einago pokome ne poateko ka nodokakapima poo wa wia
mekapianeya.
Einagale taatekoapa Yone einago eni nekedekona.
11
Kipala i ukumo yakoe. Papete atoa-
kitame opiane ali peya keku kamotoa ali atoa ue motokama yakanakago Yone ako kako.
Onepa nitane agoke eya waneka uku. Anu uku agale yakoa mootokoa Akolalike lukoa meki-
kitipa etene keku ali atoa-kitameka Yone moa patukaki.
12
Ali atoa ue motokama yakona
Yoneyo Akolalinemo titikome okaka anume opi i olaukakuka ali atoa Akolaliyo talo toko
take poadete togo togo oomoata piki.
13
Eya wane ekene uku. Akolaline agale to awea akane
ali peyamepa Akolaliyo ali atoa pawe toa talo toatekale i i wa wia mekoa tuma-kala
nekeneya. Nipa papete Moseseyo one totono i i wa titikome to awea akapiane toa lokoa
nitaneya. Wipitikome Yoneyoka einakamo to awea oma nokona.
14
Nipa Akolaliyo ali atoa
pawe toa talo toateka tigotokalepa Ilaida namolo takoa noo wa oa piane toa taatekakome
Yonepa eni nokona. E e nimini wa wene piketepa yakoa moamene.
15
Nipa yakou wa kale
piiyakoa kaki-kiti kime yakoa moamene.
16
No kaku-pete meki-kiti kini tikile adekapa edoane piane uku patu. Eya adeka piane
ukuno, yakoe. Mati-kitame makesike pa ulu toa kakete
17
eka e mati-kiti-pala eya wa kayo oa
kaki.
Tiabu toa kawati wa totome tulutu eya pukapekolo yateketeke toamokoi. Nitamokoile
enekete toto tumai meou toa komo lo oa kakoloka enika enileka kote tokale
tumai meamoukete wakoi wa eka e mati-kiti-pala ulu tootapekete iki wa Yesuyo
oka.
18
Nitoapa einagale pine to awea okome okome Yone nokome padeya neeka gerepi po ku
ueka noameneyake ipono oneke awitaneya tokome ni toko wa pade-kitame tea agale oa
kaki.
19
Ali Yatenane Oyago noanume pade nitamekene eya kuya neeka gerepi po ku ueka
nakule enekete ekete no i agopa nee kitipu kakoa noa gerepi po ku noa kawa toko. Takesi
kue motokama yaki ali-kiti-palaka Akolaline agale tagoa toamiki yene-palaka oya patu pia
tokono, enoe wa akoa agale iki. Nimo wapa ikiyake pade-kitame ekete mone inapa
Akolaline peku noa tadiki wa iki wa Yesuyo oka.
Latiane Ta Tebolo-pala Pubu Akenemo
(Luke 10:13-15)
20
Einata einapete Yesuyo Korasine Besaida tatake pitikoi yene kikoa akoa kaka. Nipa
ele kule telekole kini leneke lugutukoa toma yakanakale eneketeke kini tokoi poanele
tewitikoa wawameneyake ni toka.
21
Nitikome okome ae dika dika toamene tete moino,
nepio. Kiwi pakeke ele kule tubele mati toma yakounakale mone Taia Saidone tata ludu
toma yaou tokapa nipa kini namolole tewitikoa wakete palu watea kuku yotokatapea toi
toka. Etene dikoa toi tokake kime pade nitamokoina.
22
Akolaliyo ali atoa takoa enoa kibu
moateka-pete mone Taia Saidone tata pitane ali atoa tete meoo. Ae, eni tete meteka toa moa
patukoapa Korasine ta Besaide tata pitiki-kiti kiwi dika dika toamene tete meoono, nepio.
23
Ae, wini Kapaneame take pitiki-kiti Akolaliyo kiwi a tibuke moa kamotokoono wene pia
meki-pe. Nitameneya kiwi keti toe take poe wa moa pitikoo. Kiwi pakeke ele kule telekole
mati toma yakounakale Sodome take tou tokapa kini tane poanele tewitikoa etene waoi
toka. Nitoi tokapa Akolaliyo kini Sodome taapa moa agopa takamokale pa pioo toka.
24
Akolaliyopa ali atoa takoa enoa kibu moateka-pete Sodome take meane yene tete meteka
toa moa patukakome Kapaneame take pitiki-kiti kiwi dika dika toamene tete meoono, nepio
wa Yesuyo oka.
Koome Tuaneya Meki-kiti Yesuke Namene
(Luke 10:21-22)
25
Einata einapete Yesuyo okome okome Atai Ali Muno tibu itonota yopikoa kako ago
nepala ke wane uku-ye. I uku agalepa pa nana mati keneya meki-kiti i i wa neme wene taka
taka tokoyake Akolalinemo kini weneme wene taneya meku wa iki-kiti wene takameke neke
luaneya mekono, ke wane ni uku.
26
Atai neke widikakepa neke epene wene-kama piko toa
litiapa dikou wa wene toopikanakale taatekoa toko wa Yesuyo Akolali-pala oka.
27
Nimo ootokoa okome Agetaiyo one tele patu kautakoa kama pamene wa one peku
no lawetetapeka. Nopa dikane ago wa padameka wene toamikiyake Atai Akolaliyo wenepa
toko. Padameka Atai Akolali onepa dikane ago wa wene toamikiyake one mana noanume
wenepa tuku. I alimeka i atoameka Akolali wene tomotou wane takoane moane kakaku-
kitameka Atai Akolali wene tiki.
28
Ae, koome tuaneya mea wene kedame tuaneya mea tiki peya ko memotouno,
noanuke-kama noatini noe.
29
Kini keda taneya-kiti aulogoa poatikiya wanepa anume
latikaku. Kini kotomaneke kini moa lekoa pikete toatikile olaukouno, moa lekoa piamene.
No poti ko akene wene-kama pianeya meku agome eni toatiki peku lawetekolu noa teketepa
tepe kolotini kilikoa pimotoa aua pamele too.
30
Kini keda taneya-kiti aulogoa poatikiya
epetaneya-kama latikoane anu kopapu-kitika yaapeaneya-kama takoane meane tuku wa
Yesuyo oka.
Matiu Matiu
<<
11 11
>>
Matiu Matiu
<<
12 12
>>
12
Yu Yene Kini Ko Mea Pupu Toamene-pete
Kekoa Wawa Toameneleke Akenemo
(Make 2:23-28, Luke 6:1-5)
1
Einapete Yu yene ko mea pupu toamene-pete pade Yesu panagono witi ipe kouwoto
ludu potokakoa one oya-laweme witi ku deya tukaka kotia noma pokoi. Kobu tokale
tokome ni tokoi.
2
Nitikoli enekete Parisi yename ekete Yu yene tone ko mea pupu
toamateko-pete kekoa wawa toamokole wini tiki wa kikoa okoli okome
3
tobou ago Depidi
einagomeka one-pala to a yakene ali-kitameka kobu tokale tanemo oi moamokoiya-pe. Eya
taneya.
4
Tobou ago Soloyo Depidi-loe litia aua pokale einago one oya-lawe-pala to a
yakome kobume tuaneya tokome Akolaline wikakane losu yapu tuapea pokome Akolaline
takoa pikane palawe wane-kiti moa nakeneya. Mosesene totono piane toa Akolalike lodo
yotokoai tane ali-kitame odene dikane palawe wane-kiti namele taneyake taneya.
5
Akolalike
lodo yotokoai tiki ali-kitame ko mea pupu toamatiki-peteka sipi sipi kai tine wia eni pupu
tokala tiki. Kini kekanele eni teketeka Akolaline agale tetekamiki. Mosesene bokuke enileke
wia mekanemo oi moamokoiya-pe.
6
Tobou losu yapupa ibini akene yapu kakoyake kiwi
pakeke kaku ago etene ibini akene agome ukuno, yakoe.
7
Akolaline bokuke agale dikoa wia
mekaneyano, yakoe. Akolali noanuke lodo yomotoane wane wamuku. Yete pade ali atoa
mama momotoane uku wa Akolaliyo akeneya. Eina agale pine tetoa enoi tokapa anu i oya
ali-kitame poanele wini tiki wa kime kikoa wamoi toka. Witi ku deya kotia naketepa
Akolaline agale tetekamiki wane uku.
8
Nopa Ali Yatenane Oyagome ali atoa ko mea pupu
toamiki-pete mekete toatikile i i wane oyameane talo toane tekene ni uku wa Yesuyo oka.
Yesuyo Yono Lokane Ago Epetekanemo
(Make 3:1-6, Luke 6:6-11)
9
Yesuyo nimo oomotokome losu yapu pome kapoka.
10
Nitikata yono lokane ago
pade eida mekale Parisi yename Yesu pitia yatekete ekete tone ko mea pupu toamateko-
pete panagome dikane ago epetekakomepa tone kekanele eni toko-pe wa pitia yatekoi. Nipa
Yesu koiso akatekoimo omotadiya wa kakete akeneya. Nitikoli okome
11
kiwi panago neke
sipi sipi kai odene egetekoa mekake koa pokale enekepa edeko patu. Pupu toamateko-
peteka patu pitikoa aka moa kakako patu. E eno, eina-pete pupu toamateka-peteka aka moa
kakoo-li.
12
Akolaliyo sipi sipi kai eya mama moapa kekuya tetepo takoa yopikoyake ali
atoa akoya tetepo takoa wedoa mama moa yopiko. Nitikono, ko mea pupu toamateko-
petedo i ago epetekakenepa tone kekanele toamuku. Mosesene totono piane toane oyake
epetekamele toko wa Yesuyo oka.
13
Nimo ootokoa kakome yono lokane ago-pala okome
neke yono kutu lido akoano ta wa okale lido akoa enekale one padeka eina epetane yono-
pala odele tootapekale eneka.
14
Nitikale enekete Parisi yename i ago wiato wa akolono to a
pote one wia tukatekoi oi pedoa pia kakoi.
Akolalinele Takamotoa
Yesu Moa Kakapianemo
15
Nitadekoimo yatekome Yesu eni ta tewitikoa pokale ali atoa lewi lewita pia litima
nokoi. Eni yene padeka-kiti yene taneya nokoli enekome peya latekoa wetekakala toka.
16
Nipa onepa dikane agome ile toma noko wa pade ali atoa kotuketeka kotukoa
wameamene wa wetekakala toka.
17
Nipa Akolaline agale papete to awea akane ago Aisaiayo
papete oa piane toa taatekoa toka. Akolaliyo manake oka toa Aisaiayo eya wa wia
mekaneya.
18
I agopa anu pupu takamotoane takoane moane kakakuna. Anu i kolotini ago one
tokoleke wediane meku. Anu Epetane Yomini oneke awinomotou. Nitikolu
tokome einagome i i wa ali atoa ki yoke takoane enatekoumo e ku yatene peya-
pala akama poo.
19
Nitima yakomepa ete-kiti-pala mokota wamoa ka wamoa
too. Ka batete ludu pokomeka agale wametekoa poti yawoo.
20
Tauwe wata
tukukaneya kakale enekome oneme pade pilia moamoo. Labo tole wedoa pa toa
kamele toameneya kakale enekome ni pade tugamoo. Ponopene ali atoa edikoa
mama moma pome wipitikomepa poi moa patukou toa tokome padele padele
tane poanele wia atukatapea e ku yatene peya epetekoa talo toa kawoo.
21
E ku
yatene one ibini patu kautakoa kaketepa one nani toatekale nepia mea wedianeya
mema poi wa Aisaiayo wia mekapianeya.
Yesu Setanuno Tele Patu
Kautakoa Kako Wa Oa Potokanemo
(Make 3:20-30, Luke 11:14-23)
22
Einapete pade-kitame ipono awitane ago Yesu kakata moa aua nokoi. Ipono
awitaneya tokome leneme enekileka toamoa kabunume agale ikileka toamoa taneyake
Yesuyo epetekakale leneta kikoa enoa kabunu pea agale oa toka.
23
Nitikale enekete peyame
ekete i agopa Depidi-loeke ta watekago taatekoa noko patu wa ka oa kakoi.
24
Nimo okoimo
yatekete Parisi yename ekete beita, i agopa tobou ipono Belesebule one tele patu kautakoa
kakome tokome ipono-kiti takoa wetekakala toko wa okoi.
25
Kini tepene pikoi wene tetoa
enekome Yesuyo okome ako odene meko tobou agoke lukoa meki yenedo kako poi toa
meketepa nipa wete atutapeoi. Wa pitikalika odene yapu pia meki-kitika kako poi toa
meketepa tadoa pootapeoi.
26
Setanuyo edikoa one yagono-mikitido takoa wetekakalepa
one yatene edoa mea kamotoa-pe.
27
Noanu Belesebulene tele patu kautakoane kakene
ipono-kiti poe wane wetekaku wa ikipa nipa kini totono litia tiki ali-kitame ipono-kiti edoa
takoa wetekaki-pe. Te patu kautakoa kakete tiki-pe. Anume takoane wetekakene tukuna toa
tikino, kime no ina akoa kakinapa kapene wakoa akediki.
28
Akolaline Epetane Yomini patu
kautakoane kakene ipono-kiti takoane wetekakala tukuno, Akolaliyo one ali atoa pawe toa
talo tokotapa kiwi pake wini witadeko.
29
Telekagome one yapu pikoya pa yopia mekolopa kode agome yapu bulukoa nome
onekeya peya oyake moa pamele toamoko. Nitamele toamokoyake kode ago kotikatapeado
nokomepa telekago poome lutua piilogoa onekeya peya oyake kode moa poko.
30
No-pala lipua meamoko agomepa nipa nopala poi eni teigome toko. No auapeamoa
no mekuta ali atoa koukoa mekamoko agomepa nipa ali atoa tadekoa litikome toko.
31
Dikaki-kitikepa eya wane uku. Panagome padele padele poanele toa Akolali tea kawaka
wa nanikodo ae inapa poanele tekene tadeku wa wakalepa nipa Akolaliyo eni poanele
tokake po letu mekakanapa oyake kekile too. Nitikoyake panagome Epetane Yomininelepa
Setanunole tetepo takakalepa one eni poanele tokake po letu mekakanapa Akolaliyo etene
kekileka toamoo.
32
Panagome-kiti no Ali Yatenane Oyago tea agale akakalepa Akolaliyo eni
poanele tokake po letu mekakana oyake kekile too. Wa panagome Epetane Yomini tea
agale akakalepa Akolaliyo one eni poanele tokake po letu mekakana etene kekileka toamoo.
Einago pa mekaleka tua pokaleka kekile toamoa kibu moo wa Yesuyo oka.
Yomo Ku Tukole Takoa Enekike Akenemo
(Luke 6:43-45)
33
Yomo epetaneyapa ku tua epetekoo. Yomo poaneyapa ku tua potokoo. Yomo-kiti
ku tukole eneketepa ipa epetadeko ipa poadeko wa takoa enamele toko.
34
Parisi yene kipa
kaya keneya mea poanele toma yakino, pademo epetanemopa edoa oadete-pe. Kini tepene
meane toa-kama ya wa witakoa okala tiki.
35
Epetane wene piko agomepa one tepene meane
toa ya wapa epetanemo witakoa okala toko. Poane wene piko agomepa one tepene meane
toa ya wapa poanemo witakoa okala toko.
36
Nimini ukuno, yakamene. Akolaliyo ali atoa
takoa eneka-petepa itonoke mekete paya wene pia pamo okoinakamo peya wedoa pitia
yakatekoa kibu mokala too.
37
Nipa itonoke mekete okoinakamo toopitikoapa oa
epetekakoi-kiti kibu moamoa ni oa potokakoi-kiti kibu moa toono, pademo pademo ikilepa
wedetekoa okala tamene wa Yesuyo oka.
Yesuyo Padele Telekole Tomotoa
Lede Akenemo
(Make 8:11-12, Luke 11:29-32)
38
Yu yenane totono pine toa olaukane ali-kitameka Parisi ali-kitameka Yesu yatekete
ekete Tikisa ago neke tokolepa Akolali patu kautakoa kake tadekalepa padele telekole toano
ta-koli okome
39
Akolalinele takamoa poanele toma yakina. Nitikete ekete Akolali patudo
kakedekalepa padele telekole toano ta wa no likoa iki. Nitikiyake eya odene tokale enoi.
Akolaline agale to awea akane ago Yona-pala tubele mati tane toa tokale enoi.
40
Yona
einagopa ta tebolo-peta patoa lika toa tube mou kimane keneke pa meane toanepa no Ali
Yatenane Oyago ta tebolo patamotoane itono keneke piane meou.
41
Yonayo Akolalinemo
Ninepa ta ludu mo wima pokale yatekete eni yene Akolalike tepe kolotini pekoa
piitapeaneya. Mone pa yenameke nitaneya. Yona keku kamotoane no ako ago nukuyake Yu
yene kime pade anu agale yakoa moamiki. Ae, Akolaliyo ali atoa takoa eneka-pete Ninepa
yene kamokoa kakete kiwi akoa agale oino, nepiamene.
42
Akolaliyo ali atoa takoa eneka-
pete mone Siba take ako meane tobou atoa kamokoa kakome okome Yesu kaka-pete
mekoi Yu yene kime toa potokaneya wa kiwi akoa agale oo. Eni atoa mone atoameke
Solomonono peku noademe ta padeka mati mea nekeneya. Tobou ago Solomono keku
kamotoane no ako ago nukuyake Yu yene kime anu peku noamadete waki wa Yesuyo oka.
Panago Takoa Pokana Ipono Einakagoke
Wa Wakapea Awinokome Tokomo
(Luke 11:24-26)
43-44
Iponodo panago takoa pokomepa eya toko. One ko meatekotapa ta pitamene ta
ludu tuku toa kawa teko tokolo wako. Nitoa wakomepa one takoane wawane nokounata wa
wakapeane pone mepou wa wene piitikoa wakapea pome enepokolo einata do pokoa pia
kalotokaneya kakedeko.
45
Nitaneya kakolo enemotokome tuku topokome ipono-kiti tatono
kakoa (7) one poanele natele tomotoa poanele pine wia tagoa tiki ipono-kiti enamua einata
aua noko. Aua nokolo einakagoke awitikete awitikili tokome one namolo poanele nateleka
toa meake wipitikomepa poanele tubele-kama toma yako. No kaku-pete poanele toa meki-
kiti kimepa edikama poadete tiki wa Yesuyo oka.
Yesuyo Nine Wamene-mikitike Akenemo
(Make 3:31-35, Luke 8:19-21)
46
Yesuyo e yene-pala nimo oa kakaka one nine wamene-mikiti one agale akadete koli a
note kanokoli
47
panagome Yesu-pala okome okome neka uayoka neke wamene-mikitameka
ne agale akadete koli a note kakina-kale okome
48
aga uapa te-pe, anu wamene-mikiti te-lawe-
pe wa ootokoa okome
49
aga ua-loe anu wamene-mikitipa ika i mekina wa one oya-mikiti
yamemu toka.
50
Nititikoa kakome okome Agetai a tibuke mekome ta wa okole-kama litia
tiki-kitipa aga ua anu wamene laine-mikiti eni wa Yesuyo oka.
Matiu Matiu
<<
12 12
>>
Matiu Matiu
<<
13 13
>>
13
Ipe Ludu Nee Lene Pitikama Pekene Ago
(Make 4:1-9, Luke 8:4-8)
1
Einapetepa Yesu eina yapu akolono wititapea ue mine matanuke pome mepoka.
2
Nitikata ali atoa lewi lewita pia note-kala kakoli tokome ue dipike pogatekoa pome
mepoka. Nitoapa e yene ue matanuke ete keneya kamotoa onepa ue dipike mekome
3
pademo pademo pedoa okomepa eya wa oka.
Ipe pinagome-kiti ipe ludu nee lene pitikama pekeneya.
4
Nitima pokale nee lene
padekapa ka ludu paka tadoa pitaneya. Nitaneta ini-kiti pitoai toa napekala taneya.
5
Ni nee
lene padekapa kue pake pake tadoa pitaneya. Tokoo itono nateya deya pianeya tokome
wete tumikala taneya.
6
Wa naniko lou tigini kakale wete eni tototokoa tuaneya. Teke itono
kekulu wetekameneya tokome loume ni yoa tukatapeneya.
7
Ni nee lene padekapa tonipo
pake tadoa pitaneya. Nitaneta tonipo eni nee lene-pala odeneka dekoa witakome
tukatapeneya.
8
Ni nee lene padekapa itono epetaneyake pitakome leau akatapea witakome
ku tukala taneya. Ku tukilepa padekapa ku ege takupeta kadukoa (100) tua ni padekapa ege
odepeta kadukoa (60) tua ni padekapa timini mukitini togoikoa padeka kapidi kakoa (30) ku
tua taneya.
9
Kipala i ukumo yakou wa kale piiyakoa kaki-kiti kime yakoati wane uku wa
Yesuyo oka.
10
Nimo ootokoa kakaka one oya-lawe Yesu kakata nekete ekete ali atoa-pala ko ekepa
pedoa-kama okono, dekolo widikoa oko-pe-koli okome
11
Akolaliyo one ali atoa pawe toa
talo tokolepa papete kaukoa mema nekeneyake opi kiwi keleyo oyameteku. Nitikuyake ete
ali atoa-palapa nipa kaukoane meku.
12
Akolaline peku wedoa nako agopa nipa Akolaliyo
one pekupa wedoa lawetema pokale noa tagatapeoo. Akolaline peku pa alekoa noma poko
agopa nipa one eni lawetane peku nateya deyaka takoa pootapeoo.
13
Dikane yene-pala ko
ikilepa pedoane-kama oane meteku. Kini leneme enekile enoa moamoa kini kaleme yatekimo
yakoa moamoa anu ukumoka wene toamoa tikili tekene ni tuku.
14
Nipa Aisaiayo eya wa wia
mekapiane toa taatekoa tiki.
Padele padele kini leneme eneketeke enoa moamoa pademo pademo kini kaleme yateketeke
yakoa moamoa toi.
15
I yene kolotini lupi tootokaneya mea kaleme wedoa
yakamele toamokolo mea kini leneta-pala lakaputukoa-kama mea tiki. Enipa
leneme enoa moa kaleme yakoa moa tekete inapa Akolaline pekuno, noada wa
wene tekete nooke tepe kolotini pekoa piadekolipa anume toane mou tokake kote
tokale wakala toi wa Aisaiayo Akolaline agale eni to awea oa pianeya.
16
Anu oya-lawe kime pade nitameneya kini leneme enoa moa kini kaleme yakoa moa
teketepa kolotine meki.
17
Ipa nimini ukuno, yakoe. Padele padele tukulepa kini leneme enoa
pademo pademo ukumopa kini kaleme yakoa tikino, kini eni enoa yakoa tikiya-kitipa
Akolaline agale to awea akane ali-kitameka wene kiyo akeneya meane ali-kitameka enoane
yakadiya wa nepia meake enoa yakoa toameneya pa mea tuma-kala nekeneya.
Pedoa Akene Agale Pine To awea Akenemo
(Make 4:13-20, Luke 8:11-15)
18
Ina pedoane okouna agale pine to aweane ukuno, yakamene.
19
Nee lene padeka ka
ludu tadoa pitane adeka pikounapa eya tiki yeneke okouna. Akolaliyo one ali atoa talo
tokome tokomo pade-kitame yakoake wene toamikilipa poane ago Setanu nome eni agale
kini tepene pitikaneya pikota katekamoa poko.
20
Padeka nee lene kue pake pake pitane
adeka pikounapa eya tiki yeneke okouna. Pade ali atoame eni agale yakoapa ke wa wete
lukoa wedia meki.
21
Nitiketeke eni agale kini tepene teke wetekameneya tokome Akolalinele
pa tekei takaki. Nipa Akolaline agale yakoa tikike ele kuleme ke enekakolo mea ni ete-kitame
kipala poi te ia mekoli tekete Akolalinele takoake wete tewitikoa waki.
22
Padeka nee lene
tonipo pake tadoa pitane adeka pikounapa eya tiki yeneke okouna. Pade ali atoame einagale
yakoa moake kini kepene mama moa kini kamoya-kitike wene piitikoa mea tikili enika
enileme Akolaline agale moa kautako. Nipa ipe nee kakoya ku tuamou toa pa meki.
23
Padeka nee lene itono epetaneyake pitane adeka pikounapa eya tiki yeneke okouna. Pade-
kitame eni agale yakoapa inapa Akolaline peku wa noa tiki. Nitikipa ipe nee kakoya ku tuma
pou toa padekapa ku ege takupeta (100) kadukoa tua padekapa ege odepeta kadukoa (50)
tua ni padekapa padeka kapidi kakoa (30) tua toko wa Yesuyo oka.
Ipe Nee Lene Epetaneyake Pedoa Akenemo
24
Yesuyo agale pade pedoa okome okome Akolaliyo ali atoa pawe toa talo tokole
ooyametekene ukuno, yakamene. Ipe pinagome-kiti one ipe ludu nee lene epetaneya-kama
tadekama yakeneya.
25
Nitaneyake ali atoa pitikakoa one-pala poi te iane ago ponome ipe
ludu ke paya lene tadekamotokome pekeneya.
26
Nitaneyake nee lene tadekaneya kawa
tumia witakale ke leneka odeneka tumia witakome witoa ku -kitika tukome tukala taneya.
27
Nitikale enekete pinagono pupu yene one mekata nekete ekete kamo koniyali neke ipe
ludu nee lene epetaneya-kama tadekama yakanake ke witakala tokono, edoa tokoto patu-
koli okome
28
nopala poi te iane agome tokome toka-kale ekete eni keepa totome to a pala
kakapomotoa oko-pe-koli okome
29
e 'e mena. Nitoati wane wamuku. Eni keedo opi to a pala
kakapeketepa ipe nee kakoya-kitika odeneka to a motekete motokayano,
30
pa odenekata
witoa kamotono, wawe. Naniko wakoa momotoa nodokoa kibutukoa kaka-pete eniya
wakoa motokatiki ali atoa-pala eya wane ou. Keepa namolo takoa to a moa toe mine pitikoai
tamene. Nititikoa witi ku wakoa moapa ku pitikoai tikita aua note pitikakoai tamene wane ou
wa ipe pinagome akeneya wa Yesuyo oka.
Kalipe Lene Deyake Pedoa Akenemo
(Make 4:30-32, Luke 13:18-21)
31
Yesuyo agale pade pedoa okome okome Akolaliyo one ali atoa pawe toa talo tokole
ooyametekuno, yakoe. Panagome-kiti kalipe lene deya takoa moa ipeke pitikapaneya.
32
Eni
lenepa etene pa nateya wane deyameke eteya yomo moa patukatapea tube mati kako. Nitoa
wetini toa kakolo ini-kiti pukaneya note yeneneke pitoai tiki.
33
Yesuyo nimo ootokoa agale pade pedoa okome okome Akolaliyo ali atoa pawe toa
talo tokole ooyametekuno, yakoe. Pade atoame-kiti palawe wane mono mono akateka yisi
kugu moa palawe kugu odene bekoke eletekaneya. Nitikalepa palawe kugu keneke alama
pokome palawe mono mono akatapeneya wa Yesuyo oka.
Yesuyo Pedoa Agale-kama Oa Metanemo
(Make 4:33-34)
34
Eida oboa kakoi yene-pala einaka einamo ikilepa agale pedoa-kama oka. Nipa
pademoka keleyo to awea wamoka.
35
Nipa Akolaline agale to awea akane ago padame
papete eya wa wia mekakapiane toa taatekoa toka.
Kipala ko ekenepa agale pedoane-kama oane mekala tou. Kipala eni pedoane
oatekumopa Atai Akolaliyo tibu itonota latitikoa mekome kaukoa mema
nokamo oane meou wa einagome papete wia mekaneya.
Nee Lene Pakeke Ke Witaneke
Pine To a Akenemo
36
Nimo oomotokome Yesuyo eida oboa kanokoina yene tewitikoa yapu wa pome
mepoka. Nitoa mekale one oya ali-kiti one mekata note yakanekete ekete ipeke ke lene
pitikane neme adeka pikanapa pine edoa pikoto patu-koli okome
37
nee lene epetaneya
pitikama pekene agopa no Ali Yatenane Oyagoke ekene okouna.
38
Ipe wane oanepa ali atoa
meki take ekene okouna. Nee lene epetaneyapa Akolaliyo talo toko ali atoake ekene
okouna. Ke lene wane oanepa poane peku laweteko ago Setanuno ali atoake ekene okouna.
39
Poi te ia mekome ke lene tadekama yakene agopa Setanuke ekene okouna. Ipe nee kakoya
wakoa motokatiki-pete wane ikilepa wipitia ta pataka-peteke ekene okouna. Ipe nee kakoya
wakoa motokatiki ali atoa wane oanepa Akolaline edelo ali-kitike ekene okouna.
40
Kee
witakoya toe mine pitikoai taneleke ikilepa wipitia ta pataka-pete toatekaleke ekene okouna.
41-42
Enipetepa anu edelo yene moane oto wetekakolu nekete eya toi. Ali atoane wene moa
koiganele peya ni ele kule poanele toma yakoi peya moapa toe noa kakatake pitikoai toi.
Nitikoli toe mine mekete kime kolukoa komo ue u u keneya ka ua oa kawei.
43
Nipetepa
epetanele toa meane yenepa kiniketai Akolalike lukoa mekoi take lou tigini pa tootapeneya
kako toa kawei. Kipala i ukumo yakou wa kale piiyakoa kaki-kiti kime yakoati wane uku wa
Yesuyo oka.
Potipiane Kamoya Enamutanemo
44
Akolaliyo ali atoa pawe toa talo tokole ooyametekuno, yakamene. Kue kake kue
peya mati ua kapetekatapeneya potipianeya pikata panago nome enamutukome eya taneya.
One kamo toatekuya i piko wa eni kue ka wa potipimotokome yapu wakapea pokome
onekeya peya topo toa kue mootapeneya. Nitoapa ta pinago mekata pokome wini itono i
kueme topo toane mou wa topo toa motaneya. Nipa kolotine mekome taneya.
Yobo Ma yoke Pedoa Akenemo
45-46
Akolaliyo ali atoa pawe toa talo tokole ooyametekuno, yakamene. Panagome-kiti
yobo ma yo tuku toma pokome eteya-kiti takoa waatekoa etene koniyo taneya pade
enemotokome yapu wakapea pome eya taneya. Onekeya peya topo toa kue moomotokome
eina yobo ma yo topo toa mopaneya wa Yesuyo oka.
Mou Tagi Tikileke Pedoa Akenemo
47-48
Akolaliyo ali atoa pawe toa talo tokole ooyametekuno, yakamene. Pade-kitame
kini mou tagi ka yuane mati moa kusa ue muke pitikoa wa ate moa enekoli eya kuya mou
kapea pitakale enekete ue matanuke eka lia aua pote takoa eneki. Takoa enekete ipa
epetadekono uada wa moa ipa poadekono wawada wa mitikakala tiki.
49-50
Edikaki toa
wipitia ta pataka-petepa edelo yene nekete eya toi. Epetanele toma yakoi peya kiwi meati wa
takoa moa wa poanele toma yakoi peya toe mine moa pitikoai toi. Nitikoli kime kolukoa
komo ue u u keneya ka ua oa kawei.
51
Kipala eni ukumo yakoa wene tootapiki-pe wa okale ekete e eno, wene tootapeko-
koli okome
52
Mosesene totono pine to a olaukaki ali-kitamepa Akolaliyo ali atoa pawe toa
talo tokomo kipala i to aweane uku toa yakoa moa olaukakilepa nipa eya tou toa tiki. Yapu
pinagome-kiti one kamoya eya kuya yapu ua pikanakeya namoloyaka weneyaka moa moke
toa meou toa tiki wa Yesuyo oka.
Nasarese Yename Yesu Wakete Wakenemo
(Make 6:1-6, Luke 4:16-30)
53
Yesuyo one eni pedoa oka agale oa peya takamotokome
54
eni ta tewitikoa one pine
take wakapea poka. Nitoapa losu yapu pome olaukoa kakale yatekete e yename ekete ipa
tene peku nootokoa okoto patu. One telekole toma pokolepa tene tele patu kautakoa
kakome tokoto patu wa ka oa kakoi.
55
Nitikete ekete beita, i agopa Yosepe kodou agono
mana. One nine Maria i mea one wamene-mikiti Yame Yose Saimone Yudase einago-mene i
mea tiki.
56
One laine-mikitika tone i take mekino, imopa dikane agomeke okono, tene peku
nootokoa tokoto patuno,
57
yakamatoe wa wene poaneya kakete akoa wakoi. Nitikoli
okome Akolaline agale to awea akako agopa ete yename kei pimotoake one ta pine
yenameka one yapu pitiki yenameka one kei piamoa paya tetepo takoa wakala tiki wa
Yesuyo oka.
58
Eni oka toapa one eni take yene oneke wene tugameneya. Nitaneyake eida
mekome padele telekole kainya toamoka.
Matiu Matiu
<<
13 13
>>
Matiu Matiu
<<
14 14
>>
14
Yone Kabe Teiganemo
(Make 6:14-29, Luke 9:7-9)
1
Yesuyo toma yakenemo kugu yatekome Erodeyo Galili ta yopikoa mekome okome
2
ali atoa ue motokama yakanakago Yonepa eina wia tukamotoane tokounake wa
kamomotokome nomepa nipa one tubele mati toateko tele eni luaneya yakome toko wa one
pupu yene-pala akeneya.
3
Namolo Erodeyopa one poyo ali-kitame Yone dekoa moa kapa po kakoa po yapu
pitikamotoa tikilepa eya atoa Erodiasine wene epetekademe taneya. Erode einagome one
kale atoa wamene Pilipi natono one kode motaneyake
4
Yone Erode mekata nokome okome
neke kale atoa kode motekepa toto Yu yenane kekanele wini toka wa kikoa akeneya.
5
Kikoa okale Erodeyo Yone einago wia tukamotou wa wene pianeya meake wakeneya.
Nipa pa ali atoame i ago Yonepa Akolaline agale to awea akako ago tadeko wa one kei piai
tokoli tokome kini wene witikaya wa piti motokome wakeneya.
6
Wa naniko Erodeyopa one opiane oi ponokale eya taneya. Oneke lokoa ta yopia
meane yeneka one pupu takane yeneka kini toge kikakakuno, toge nee natono noe wa kayo
oa motaneya. Nitikale nee mekete nakoika Erodiasine kono kini lene yoto nome kakome
tiabu toa kakale enekome Erode wene epetaneya mekome okome
7
agetai tia, anukuya-kiti
pade mano wa oika toane etene meadene tukuno, a wa oano ta wa akeneya.
8
Nitikale nine
kakata pokome edeya mano wane ou-pe wa opokale niname akoano pa wa okana toa one
koname eya wa onaneya. Ali atoa ue motokama yakanakago Yone kabe teigoa one wago
wane okolo kagonoke pia oto memotoa toano ta wa onaneya.
9
Tuatoame nimo okale
yatekome Erode wene kedapa taneya mekomeke nitaneya. Nipa one-pala opia mekete toge
nee naki ali atoane lene yoto kakene ekene agetai tia wane okouna toane tamedeku wa wene
pikome
10
Yone po yapu pitikata kabe teigamotaneya.
11
Nititikoa one wago wane okolo
kagonoke pianeya ina wa eina tuatoa metekale moa ninane aua potokaneya.
12
Nitaneyake
Yonene oya-mikitame Yonene tigini monote aua pote kota keneke pipaneya. Nitimotekete
Yesu opatono, patoe wa Yesu mekata pote opaneya.
(Make 6:30-44, Luke 9:10-17, Yone 6:1-14)
13
Yone tuka wa onokoli yatekome Yesu ue dipike pogatekoa pome mea ali piamene
take kidene eka witimoa poka. Pekedekale yatekete ali atoa kini tube take pitikoika
kamomotekete one pome witatekata ka ludu pote teigoa kapokoi.
14
Eida note kakakoa
Yesu ue dipike mea nome katepitoa kakome enekome okome ae, elame tuku wa kini yene
tane-kiti peya latekakala toka.
15
Ta likaka one oyali-kiti Yesu kakata nekete ekete ipa ali piamene taano, ta-pala lima
nokono, ali atoa ta latia pitikika i yene kini noatiki nee topo topoatino, poe wa wetekoano
ta-koli okome
16
i yename i ta tewitikoa poatiki toa mena. Anu oya-lawe kini neepa kime
motokoa lawetamene-kale ekete
17
tone palawe wane ko kakoa-pala mou yomo takuta toa
odene piko-koli okome
18
nipa oto nooke aua noo wa oka.
19
Nitoapa i ali atoa poma ludu
kilikoa meetapeo wa ootokoa eina ko kakoa (5) palawe wane-pala mou yomo takuta toa
moa pikoa kakome tibuke ate nepikakome Akolali-pala ke wa ootokoa popimotoka.
Popimotokome one oyali-lawe tatia mekala tokale moomoteketepa e yene tatika tatika
topokoli
20
peyame moa noa tagatapea kitipu mekoi. Nootokaneyake kugu paka pitaneya
wekotoa moa ua ka katika tuku kakoa (12) mako puputua moa pikoi.
21
Eni nee nakoina-kiti
oi motikilepa mati atoa katekoa oi moamoa ali-kama takoa oi motokolipa ege egeta kadukoa
(5,000) nakedekoi.
Yesu Galili Ue Tali Ludu Kautoa Nekenemo
(Make 6:45-52, Yone 6:15-21)
22
Nitaneyake Yesuyo one oyali-kiti-pala okome okome ue dipike peapetekoa pote eka
matanuke mepoatino, poe. I ali atoa kini kini pitikika wetekamotekene nouno, patepoe wa
one oyali-kiti wetekaka.
23
Nitoapa eida oboa kakoi-kiti pipoatino, poe wa wetekamotokome
Akolali kowitademe kidene witimoa tono tobou ate lewia pome mepaneya. Ta likaka one
eida pa kidene meaneya.
24-25
Yesuyo kowitoa mekakoa one oya-lawe ue dipike mea puku pekete toa ue muke
ue ate ketita pewikoa pupulegemeka kiwi nokoina lono kutu wa popokoa aua poademe
tokoa kaka. Nitikoa kakale ta patademe tu ei teigaka Yesu ue tali ludu kautoa noka.
26
Kautoa
nokale enekete ae, yukupa ipono noko patu wa nenei motekete ka oa kakoli okome
27
no i
nukuno, tepe kolotini kilikoa pimotono, piti moameo wa okale
28
Pitayo okome Ali Muno
nipa ne nekedekalepa no ne kakota ue tali ludu wete noo wa oano ta-kale okome
29
nipa
namene wa okale ue dipi tewitikoa ko oketikoa Yesu kakata ue tali ludu kautoa noka.
30
Nokome enekale pupulege popokoa kakale enekome piti tokale tokome ue mine kekulu
atukapademe kakome ka okome okome Ali Muno no tuamedekuno, wete toa monoo wa ka
oa kaka.
31
Ka oa kakaka eina eina Yesuyo yono lido akoa dekoa motokome okome ae,
nooke nateya wene tugoa meko ago dekolo pomeme tuaneya noka-pe wa ootokoa
32
opia
pome ue dipike mepoka. Opia pome mekaka eina eina pupulege te itatapeka.
33
Nitikale ue
dipike mekoi-kitame one kei pikete ekete nepa nimini Akolaline mana tadeko wa wadini
tukukoi.
Yesu Genesarese Ali Atoa Kini Tane Yene
Latekakala Tanemo
(Make 6:53-56)
34
Ue mine eka matanuke ue dipike mea witapote Genesarese take ko oketikakoi.
35
Nitikoli enekete eni take yenamepa Yesu i nokono, noatino noe wa agale yekeika yukukata
oa wetekakoli yatekete kini yene tane ali atoa Yesu mekata aua nokala tokoi.
36
Aua note
kowitikete ekete i yene tane-kitame neke mamina nami mitikatekamotono ta wa kowitikakoi.
Nitikoli one mitikatekakoi peya latoa pokala tokoi.
Matiu Matiu
<<
14 14
>>
Matiu Matiu
<<
15 15
>>
15
Yu Yenane Kaua-mikitame Olaukanemo
(Make 7:1-13)
1
Einata einapete Parisi ali padeka-kiti ni Yu yenane totono pine to a olaukane ali-kiti
Yerusaleme kawa Yesu kakata note kakete ekete
2
neke oyali-kitamepa tone kaua-mikitame
tamene wa olaukama nekenele toamiki. Nipa kini wene moa koigakoyapa i koguna wa adeka
piapa kini nee noadete mekete yono abe kogala tane toa toamikino, dekolo toamikiti patu-
koli
3
Yesuyo okome kini kaua-mikitame titia olaukanele litia toadetepa Akolaliyo tamene wa
okale wakete onekele pa lede takama yakino, dekolo tiki pe.
4
Akolaliyopa neketai-pala
neka uata kei pia mape moamene wa oa eya tamene waka oa taneya. Panagome
oneketaika oneka uaka tea agale okalepa wia tukamene wa akeneya.
5
Akolaliyo enimo wa
akeneyake panagome-kiti eya wa oko. Ae, agetai agauata kita auapeane padeya
meatekuyapa meamuku. Nitikupa enika eniya Akolaline pikakene tekene ni meamuku wa
oko.
6
One etene nineta edikoa paya tetepo takoa auapeamoko agopa kime kei pikete ekete
neketai neka uata pa memotono, tokamota wa iki. Nipa kini kaua-mikitame toma nekenele
litia toadetepa Akolaliyo tamene wa akene agale ete pimotoa waki.
7
Ae, wene takuta
pianeya meki-kiti kini eni toatekoilekepa Aisaiayo eya wa papete wia mekapianeya.
8
I to aweane uku ali-kiti kini kabunume no kei pikilepa kini tepene paya wene pianeya
meketeke tiki.
9
Nitikino, kini kowitikimopa edoane yakamotoa-pe. Kini kaua-
mikitame titia olaukanele ile tamene, ile tamene wa olaukama pikino,
yakamou wa Akolaliyo oka toa Aisaiayo papete wia mekapianeya.
Enipa nimini eni akedeko wa Yesuyo oka.
10
Yesuyo e yene one kakuta noatino noe wa kayo oa motokome okome kipala i
ukumo wedoa yakoa moamene.
11
Panago one kimane keneke aka ketipea noa nokotikako
neemepa pinali one wene oyake moa koigamele toamoko. Nitamele toamokoyake one
tepene meaneya poane wene atepea kabunuke witako agalemepa pinali one wa moa
koigamele toko wa Yesuyo oka.
12
Nimo ootokaneyake one oyali-lawe Yesu kakata nekete
ekete neke winimo yatekete Parisi ali-kiti nepala wene poaneya mekino, enipa wene
toamoko-pe-koli okome
13
Agetai a tibuke meko agopa oneme matameneya peyapa ipa
oneme matamokounakeya wa to a mitikakala too.
14
Nitoono, wini Parisi ali-kiti nopala wene
poaneya mekete ikimopa oa memotono, tokamota. Wini ali-kitipa leneta lianeya yaki.
Dikane agome leneta liane yagono ali lia aua puku pokome toapa nipa takuta kobu
kagonoke pitaketeta pitoi wa Yesuyo oka.
15
Nimo okale Pitayo okome ina pedoa okana agalepa pine edoa pikoto patu-kale
okome
16
ete yename anu okounakamo wene toamikino, kimeka wene toamiki-pe.
17
Panago
nee eya moa nakolopa kimane keneke ponome tepene ponome me me toa wa te pu latia
patukatapekala toko.
18
Nitikoyake poane agale kabunu witakilepa e ku poane wene tepene
meaneya ya wa witako. Pinali one wene moa koigakilepa eni agaleme tokoya.
19
Nipa tepene
meaneya ya wa witako toa tokome ali wiane tukou ni mone padane atoa liou ni abeya toane
potokou ni mone padane pikoya-kiti kode mou ni kapene agale ou ni panago pa puputuane
akou wa wene pia
20
enika eni poanele aline tepene-kama aloa witakome pinali one wa moa
koigako. Anu i oya-laweme yono abe ko ameneya witi ku kotia nakipa pinali-kiti kini wa toa
potokakiya mena wa Yesuyo oka.
Kenane Take Atoa Yesuke Wene Tuganemo
(Make 7:24-30)
21
Yesuyo nimo oomotokome eya tata Taia Saidone tata liti piane take wete eni poka.
22
Nitaneyake Kenane take meane atoa pade Yesu kotua kayo oma nokome okome Ali
Muno Depidi-loeke tagene ago no ela moa auapeano ta. Anu kono akomake poane ipono
awinokome tete motokakoa kakono, yapu noo wa kayo oa litima nokaleka
23
Yesuyo agale
wametekoa ka ludu pa pome-kama kaka. Nitikale enekete one oya-lawe Yesuke nekete
ekete i atoamepa toto litia kayo oma nokono, pa wa wetekoa ta-koli okome
24
Akolaliyo one
pawe toane talo tukuta tewitikoa atua pokoina sipi sipi kaipa oto motokoano, pa wa no
wetekaka tokolo tekene Iserele ali atoa odene makutukoane moadene ni nokou wa okale
25
yatekome o atoame Yesuno kawane mulinita tukupia kowitikome okome Ali Muno no
auapeano ta-kale
26
Yesuyo agale pedoa okome okome tone matiyane nee takoa pikoake wa
tone mati wanoa tue-kiti kakoita eni nee moa pitikaketepa poanele eni toko wa oka.
27
Yesuyo nimo okaleka o atoame okome Ali Muno winimopa nimini eke okoyake eya
wanedo uku. Yapu pinagono nee walai takaneya pikota kugu deya pedemotokome pitakale
tue-kitika oyake namele toko wa o atoame oka.
28
Nitikale okome ae, anu oyatoa nooke
winipa wedoa wene tugoa kake okono, no-pala wini kowitike oko toa nitimotoane uku wa
okaka eina eina one konopa ipono takoa pokale latoa kakeneya.
Yesuyo Yene Tane-kiti Latekakala Tanemo
29
Yesu eni ta tewitikoa Galili ue matanu liti kokotoma pome tono pade ate lewia
mepoka.
30
One eni pome mepokata ali atoa lewi lewita pia litima nekete kini yene tane ali
atoa-pala aua nokala tokoi. Nipa kawa okeaneya ni leneta lianeya ni agale amele toameneya
ni yono totaneya enika eni ali atoa-pala aua note Yesuno kawane piai tokoli latekoa
wetekakala toka.
31
Nitikale agale amele toameneya mekoina-kiti agale witoa oa ni kawa
yoname wia mekaneya mekoina-kiti epetekaneya mea ni kawa okeaneya mekoina-kiti kawa
pogakoa kautoa ni leneta lianeya mekoina-kiti leneta kikakatapeneya yawa tokoli peyame
kee wa Iserele yene talo toko ago Akolali kei pia kakoi.
(Make 8:1-10)
32
One kakuta noe wa Yesuyo one oyali-kiti kayo oa motokome okome i oboa kaki
yene mama moane ela motekene uku. Ta tebolo pataka toa no-pala opia yakete kini noatiki
nee peya takatekoa pa kaki. Nee noameneya kini kini yapu tadoa poatino poe wanedo
wetekakolupa yapu poadete pekete pake kobume tukete witipitoino, wetekamele toamoko-
kale
33
one oya-laweme ekete i ali atoa kainya mati toko-la. Ipa ali piamene taano, ali atoa
peya mati i kakino, kini noatiki nee edoa motokoa lawetemotoa-pe-koli okome
34
ni kini
palawe wane-kiti edela piko-pe-kale ekete tatono kakoa (7) odene piko. Ni de mou deya-
meneka piko wa okoli
35
nipa poma ludu meetapeo wa e ali atoa mekatapeka.
36
Nititikoa
eina tatono kakoa (7) palawe waneka mou-meneka moa pikoa kakome Akolali-pala ke wa
ootokoa popimotokome one oyali-kiti tatia mekala tokale mootokoa e ali atoa mekoi toa
nee pikama yakoi.
37
Nitikoli peyame moa noa tagatapea kitipu mekoi. Nootokaneyake nee
kugu pika wekotoa moa ka katika tatono kakoa (7) mako puputumoa pikoi.
38
Nipa mati
atoa katekoa oi moamoa ali-kama takoa oi motokolipa 4,000 ali-kiti nakedekoi.
39
Nitaneyake Yesuyo eida oboa kakoina-kiti kini kini yapu tadoa poatino poe wa
wetekatekoa ue dipike peapetekoa pome mea Magadane take mepoka.
Matiu Matiu
<<
15 15
>>
Matiu Matiu
<<
16 16
>>
16
A Tibuke Padele Telekole Witakamotono Ta
Wa Yesu Likoa Enanemo
(Make 8:11-13, Luke 12:54-56)
1
Parisi totonoka Sadusi totonoka litia tane ali padeka-kiti Yesu mekata nekete ekete
neke toma yakole Akolaline tele patu kautakoa kake tadekalepa nipa a tibuke padele telekole
witakamotono ta wa likoa enenokoli okome
2
ta lima lima tokaka tibu yali yapu kiitapeneya
kakale enekete ekete podoliopa tape too tadeko wa ikina.
3
Likonu witia kolopa pilikakome
liane wedodo wa kiane wedo latitapekolopa opi pupulege tadalita-pala igi noo tadeko wa
ikina. Ae, wene takuta pianeya meki-kiti kipala ukumo yakoe. A tibuke witakolepa ile
toatekolo toko wa kime tetoa enekiyake no kaku-pete witakolepa ile toatekolo toko wa tetoa
enamiki.
4
Akolalinele takamoa poanele toawineya yakina. Nitikete ekete Akolali patu
kakedekalepa padele telekole toano ta wa no likoa eneki. Nitikiyake eya odene tokale enoi.
Akolaline agale akane ago Yona-pala padele tubele tane toa tokale enoino, padele pade
enamoi wa Yesuyo oa poka.
Parisi Yene Sadusi Yene
Kini Tanele Toameamene
(Make 8:14-21)
5
Yesuno oya-lawe ue dipike eka matanuke mea peketepa palawe-kiti wene kayapea ua
poameneya.
6
Nitaneyake Yesuyo okome okome Parisi ali-kitika Sadusi ali-kitika kini yisi
kugu kiwike weamutukayano, wedetekoa yamene-kale
7
kini kini yakaate tekete ekete tone
noateko palawe wane wene kayapea ua noamokoonake ni oko-koli
8
kini tepene piane wene
tetoa enekome okome palawe ua noamokoinakepa edekolo iki-pe. Nooke wedoa wene
tugoa meamekete tekete ni iki.
9
Nipa palawe wane ko kakoane (5) moane ege egeta
kadukoane (5,000) ali-kiti lawetekolu nootokaneyake kugu pika wekotoa moapa ka katika
kainya mati mako puputumoa pikoina wene kayapetapea mekete iki-pe.
10
Ni pade-petenaka
palawe wane tatono kakoane (7) moane ege egeta kadukoane (4,000) ali-kiti lawetekolu
nootokaneyake kugu pika wekotoa moapa ka katika kainya mati mako puputumoa pikoina
wene kayapetapea meki-pe.
11
Parisi yene Sadusi yene kini yisi kuguke kipala eina okounapa
edoa wene toamokoi-pe. Eina okounapa palawe waneke ekene wamokouna. Dikane aline
yisi kugu titi toma pamene wane ekene okou-kale ekete
12
ae, Parisi totonoka Sadusi
totonoka litia toametekoa titi toma poati wa inapa okome akedeko. Kini yisi kuguke okome
wameadeko wa okoi.
Yesu Nepa Keraisu Tadeko
Wa Pitayo To awea Akenemo
(Make 8:27-30, Luke 9:18-21)
13
Yesu Sisaria Pilipai take nome mekome one oya-lawe pitia yatekome okome ali
atoame no Ali Yatenane Oyagoke ikilepa no te kaku wa ikiti-pe wa okale ekete
14
padeka-
kitame i ago nepa ali atoa ue motokama yakanakago Yone wa oa ni padeka-kitame Yeremaia
wa oa ni padeka-kitame Akolaline agale to awea akako ago pade wa oa tiki-koli okome
15
nimo wapa akedikiyake anu oya-lawe kime no te kaku wa iki-pe-kale
16
Pitayo okome
nepa pa mea kama noko ago Akolaline mana one wa papete takoa kakapiane ago Keraisu
wa oka.
17
Pitayo nimo okale Yesuyo okome Yonene mana Pita nepa kolotine meko ago.
Neme wini okopa pa alime wene takaka toa wamokona. Agetai a tibuke meko agome wene
takaka tokale ni wene toa oka.
18
Eya waneka uku. Pita nepa kue yaupea wa ibini akene ago.
Eni kue yaupea waneke yapu wiou toane anu peku nakoi-kiti moane obokoane talo tou.
Nitikolu tuane yene yopia mekoi-kitame anu peku nakoi-kiti moa atukadete wili tokoa kawa
teko tokale wawei.
19
Ni Akolaliyo talo toko ta kago ketepono peateko kiipa ina wane ne
moane meou. Nipa itonokepa ile tamene, ile toameamene wa wene kibututukoa okapa a
tibuke meko Akolaline wene pika toa-kama eke too wa Yesuyo oka.
20
Nimo ootokoa
okome no Yesupa Akolaliyo takoa moa kakapika ago Keraisu taatekoane nekedeku wa ali
atoa enekete to awea ikileka toameamene wa Yesuyo oka.
Yesu Tuake Wa Kamoa Poatekamo
(Make 8:31-9:1, Luke 9:22-27)
21
Einapete titimoa Yesuyo one tuatekamo to awea okome okome Yerusaleme take pone
mekolu eya ali-kitame no tete-kala meoi. Kanosolo ali-kitika Akolalike lodo yoai tiki tobou
ali-kitika Mosesene totono pine to a olaukaki ali-kitika enika eni ali-kitame no wia tukoi.
Nitikolika ta tebolo takoa pataka-pete Akolaliyo moa kamotokoo-kale
22
Pitayo pata wa
Yesu eko keneya aua pome kakome kikoa okome okome Ali Muno nepa Akolaliyo mama
moamedekono, eni yename nitamoi-li wa okale
23
Yesuyo peketapekome Pita-pala okome i
ago Setanu anu mukiti lono kuka poneke kapono, Akolaline wene piko toane litiane takaya
tokolo ka ketekake oko. Winipa Akolaline wene piko toa wamoa pa aline wene piko toa
okono, wa wa ootokoa
24
one oya-lawe peya-pala okome no i ago litima nou wa wene piko
agopa nekele tewitikoa wamene. Nipa ne wia dekatiki yomo lia aua nou toa tete mokoa
kakeka no litima namene.
25
One kepene mama motokome tukaya wa piti motaneya
mekagopa etepea tua poo. One kepene mama moamokome no einagoke oyake tuou wa
wene piko agopa toa motaneya mea kama poo.
26
Panagomepa one yomini atukome
atumotoake itonoke pia kawa toko peya mootapeadekalepa eniya peya edeya weike
moamoo. One yominido atukome atukalepa edeyame oto wa topo toa momotoa-pe.
27
No
Ali Yatenane Oyagopa anu edelo ali-kiti-pala opiane nekenepa Agetai pa teleta tootapeneya
meko toane meane nou. Nitikenepa ali atoa peyame epetaneleka poaneleka toma yakoinake
nami wiane topo takakala tou.
28
Nimini ukuno yakoe. Ita kaki yene padeka-kiti wete
tuameneya mekete enekoli no Ali Yatenane Oyago etene ako odene tobou meatekou ago
nokolu enoi wa Yesuyo oka.
Matiu Matiu
<<
16 16
>>
Matiu Matiu
<<
17 17
>>
17
Yesuno Lene Timini Mamina Eya
Yati Yati Tootapeanemo
(Make 9:2-13, Luke 9:28-36)
1
Ko melepu kakoa (6) ta patatekaneyake Yesuyo Pita Yameta Yamene wamene ago
Yone toa kidene-mene ete witimoa aua pome tono kakene matike lewia pome kapaneya.
2
O
ali-mene aida kakakoa one-pala padele tokome one lene timini lou pa keneya yati yati
tootapea one maminaka lou pa keneya ake tootapea taneya.
3
Nitaneya kakata Mosese
Ilaidata kotikatapea nekete Yesu-pala ko oa kakeneya.
4
Nitikoli enekome Pitayo okome Ali
Muno kimene ko oa kakita toto-meneka odeneya kakono, epetekono, neme nitika wa
okalepa nipa aga yapu tebolo Mosese Ilaidata kini wikakakala too wa okaka
5
pa tootapeane
wedome agopa takoa kauma nekeneya. Nitikaka eni wedo keneke agale ludu nokome
okome anu kolotini ago anu manago wini kako. One tokoleke wediane kakuno, one oka toa
yakoa tamene wa okale
6
yatekete one oyali-mene piti mati tokale itonoke ketipea lene timini
lono aua pitaloganeya.
7
Aua pitakoita Yesu nokome yoname mitikatekakome okome piti
moameneya wete kamokoa kawe wa okale
8
ate enetekakoli Yesu odene kakedeka.
9
Tono aya wane mea keti toa pekete pake Yesu kakome okome Ali Yatenane Oyago
no tukolu wete kamotokameneyakepa kimename opi enekoinakamo pa kini luaneya mema
yamene wa okale ekete
10
Yu yene tone totono pine to a olaukaki ali-kitame eya wa olaukaki.
Keraisu naniko taatekoa nomotoa Ilaida namolo takoa noo wa olaukakiya. Enipa edekolo
ikiti-pe wa okoli okome
11
Ilaida einago namolo takoa nokome padeya padeya peya nodoka
nodoka toono, enipa nimini ikiya wane uku.
12
Nimo wanepa ekeneke eya waneka uku.
Ilaida wete wina wakapea noka. Nitikanake ali atoame ina okoinakago i nekedeko wa wene
toamekete tokome e ku wene ponoka toa litia tekete one tete mekala tokoi. Edikakoi toa no
Ali Yatenane Oyagoka tete motokakala toi wa okale ekete
13
Ilaida wa ina okanapa, ali atoa
ue motokama yakana Yoneke okome akedeko wa wene tokoi.
(Make 9:14-29, Luke 9:37-42)
14
Tonoke ketipea ko a ali atoa oboa kakoi pakeke pote kakoli ali pade Yesu kakata
nome wadini tukupia mekome okome
15
Ali Muno ne kowitikumo yakoano ta. Anu mana
mati leau okome tete mati mokoa kakomepa padepete-kiti toe mine aua pitakome uele aua
pitakome-kala toko.
16
Nitikala tokale tekene neke oyali-kiti mekoita latekakoatino toe wane
auane nokounake latekakamele toamoka. Anu mana neme elado motekepa latekakoano ta
wa kowitikale okome
17
ae, ipete meki ali atoa kime Akolalinemo yakamoa wene moa
koiganeya mea tikino, kini eni poane wene tewitikoa wamotoane edoane nepiane meamou
wa ootokoa matiyane etene-pala okome neke mana mati no kakuta aua noo wa okale
18
aua
nokale ipono kikoa okome okome i mati takoa pa wa okale takoa poka. Takoa pokaka eina
eina eni mati latoa wene epetekaneya kaka.
19
Nititikaneyake Yesuno oya-lawe one kakata kidene-mene nekete ekete ina ipono
totomepa oyake takoa wetekamele toamokano, edekome tokato patu-koli okome
20-
21
nooke pa nateya wene tugoa mekete tokome takoa wetekamele toamoka. Kalipe lene
dedeyameke witakome leau akatapea witako. Akolalineledo edikoa takama peketepa nipa i
kako tonoka to a yeta kapono wa okoli yeta ponome kaponoo. Nipa padele padele peya
kime oyake tamele tokale nitoo wa Yesuyo oka.
(Make 9:30-32, Luke 9:43-45)
22
Yesu one oya-laweka Galili take koukoa mekoi-pete pade one eni oya-lawe-pala
okome no Ali Yatenane Oyagopa pade-kitame wimotoa panagome ete moa meoo.
23
Moa
metekale wia tukakolika ta tebolo takoa pataka-pete kamoane pou wa Yesuyo okale
yatekete wene keda mati toologakale mekoi.
Tobou Losu Yapu Takesi Kueke Akenemo
24
Yesu one oya-lawe-pala Kapaneame take note mekoika tobou losu yapu takesi kue
motokama yakene ali-kiti Pita kakata nekete ekete neke tikisa agome tobou losu yapu takesi
kue pitikakoya-pe wa okoli okome
25
e eno, Yesuyo nitikoya wa one yapu wakapea pome
mekome Yesu-pala agale oademe tokale Yesuyo okome itonoke tobou meki ali-kitame
takesi kue moteketepa kini yenaneke motiki-pe. Mone pa yenaneke motiki-pe-kale okome
26
mone yenaneke odene takesi kue motiki-kale okome winipa nimini oko. Tobou ali-kitane
mana-mikitame takesi kue pitikakiya mena.
27
Nipa agetai Akolaline tobou losu yapu takesi
kue pitikateku toa menake takesi kue motokama yaki-kitane wene pokaya tokale eya
topoano ta. Galili ue mine poke mou tikoa motokoano pa. Tikakale mou eina wete tanikale
aka moa pitikoa pakunu lakapea enekale kue lene pade abutaneya enoo. Tone takesi
pitikateko kue wini pioono, moa aua poke pitikapamene wa Yesuyo okale Pitayo
nitikapoka.
Matiu Matiu
<<
17 17
>>
Matiu Matiu
<<
18 18
>>
18
Akolaline Take Ako Meateko Ago
Te-Pe Wa Pitia Yakanemo
(Make 9:33-37, Luke 9:46-48)
1
Einata einapete Yesuno oya-lawe one kakata nekete ekete Akolaliyo talo toko take
ako tobou meateko agopa te-pe wa yakanokoli
2-3
Yesuyo yatekome de mati deya pade ne
noo wa mootokoa kiwi kakoi pakeke kakakome okome kipala i nimini ukumo yakoa
moamene. Kini wini wene wia wawa i mati deya keneya meameadekolipa nipa Akolaliyo
talo toko take etene poamoi.
4
I de mati deya nate wene pianeya meko toa meko agopa nipa
Akolaliyo talo toko take ako ago meademe toko.
5
Panagome-kiti dikane mati deya nooke
toado makutukoa motokomepa nipa nopala eni dekoa makutukoa motokome toko wa
Yesuyo oka.
Poanele Tikileke Pubu Akenemo
(Make 9:42-48, Luke 17:1-2)
6
Dikane mati nooke wene tuganeya meko mati odeneka padele poanele tomotoa likoa
enoa labakagopa Akolaliyo kibu motokome dika dika toamene tete meoo. Ae, eni tete mea
kibu moamomotoapa papete mati wete likoa enameneyake panagomedo laukakoa tube kue
matiyame einagono kabe kautoa kusa ue muke pitikakale ue nakoa tukalepa nipa epetoo.
7
Ele kule poanele witakoleme ali atoa likoa enekala toko. Ae, itonoke enika eni poanele
witakile tamele toapa tokoyake padele poanele tomotoa likoa eneko agomepa dika dika
toamene tete moo. Nitikaya-nalino, wedoa meamene.
8
Neke yonameka neke kawameka pinali ne toa potokadekalepa teigoa mitikamene.
Pinali neke kawaka neke yonoka teigoa mitikoa duku yawa kakeka mea kawateko takedo
poke mea kakalepa nipa epetoo. Nitameneya yonotaka kawataka kakeneya toe noa-kala
kako takedo moa pitikaneya mekalepa nipa poo.
9
Neke lenemeka ne toa potokadekalepa
nipa lene to a wamene. Neke lene pade to otapeneya yawa kakeka mea kawateko takedo
poke mea kakalepa nipa epetoo. Nitameneya leneta takuta kakeneya toe noa-kala kako
takedo moa pitikaneya mekalepa nipa poo wa Yesuyo oka.
Katepitoa Pekene Sipi Sipi Kaike
Pedoa Akenemo
(Luke 15:3-7)
10
I de mati deya odeneka paya tetepo takameamene. Kini edelo ali-kitame dikane mati
yopikilepa Akolaline leneke-kama kakete tikili ni uku.
11-12
Panagome one sipi sipi kai ege takupeta kadukoa (100) egetekale-kiti odene
katepitoa atupokalepa pinagome edoo-pe. Nipa eya too. Ete sipi sipi kai-kiti tono payaneke
eida koukoa kakoika kamotoa eina katepitoa atupokana kai pitia tuku tokoa kawa
13
enamua
motokomepa kolotine oto noo. Nipa atupameneya ege takupeta kadukoa (99) kakene sipi
sipi kai-kitike wedikilepa tokomeke one eina tuku toa enamutukana kaike etene wedoa
wedikome kolotine meoo. Enipa nimini uku-pe.
14
Eina toa kiniketai Akolali a tibuke
mekome one i de mati deya odeneka paka atupokaya tokolo wedoa talo toa kako.
Neke Oyagome Padele Poanele Tokolo
Mane Oa Moteke Toatekomo
15
Neke oyago padame nepala padele poaneledo tokalepa nipa poti one mekata kidene
poke eke ame i poanele neme i tokona wa opamene. Nitikale okome ae, ame nimini oko wa
ela motokalepa nipa one-pala wa oya patu pike Akolaline kaake oto moa kakake too.
16
Nitameneya einagome yakamokalepa neke oyali-mene takutaka teboloka yatekanoatino
noe wa einago mekata moa aua pamene.
17
Nitikale e ali-mename okoimoka yakamademe
wakalepa losu yapu opatono noo wa nepala tokanakamo i i wa to awea opamene. Nitikale ali
atoame kokotukoa okoi agaleka yakamademe wakalepa nipa Akolalinele takamene agoka
takesi kue motokama yako agoka tetepo takoa wamene.
18
Etene nimini ukuno, yakamene. Itonokepa ile tamene, ile toameamene wa kini wene
kibututukoa okoi toapa a tibuke meko Akolaline wene pika toa-kama ekete toi.
19
Eya
waneka ukuno yakamene. Itonoke meki-kiti takutameka tebolomeka odene wene piitikoa
kowitikete okolipa Agetai a tibuke mekome kini kowitikete okoi toa-kama yakoa too.
20
Takutameka tebolomeka anu ibini wedekoa koukoa mekoi toane kiwi pakeke none
menokala touno, Agetaiyo kini kowitikoimo etene yakoa too wa Yesuyo oka.
Pupu Agome One Odene Pupu Ago
Ela Moamokome Tanemo
21
Pita Yesu kakata nokome okome anu oyagomedo no-pala padele poanele tokala
tokalepa edela-peta po letu mekamoane nami wiamoane tomotoa oko-pe. Tatono (7)
kakoa-peta patu-kale okome
22
tatono kakoa-peta wane pade wamuku. Ege kadukaka tatono
kakoa-peta (70 x 7) nepala poanele tokala toka toa po letu mekamoa nami wiamoa tamene.
23
Nipa Akolaliyo ali atoa pawe toa talo tokoleke eya wane pedoane uku. Tobou agome-kiti
one pupu ali-mene kime wina anuke padeya-kiti nami kakoa motokoinakeya-kiti wa oto anu
mouno, noe wa agale oa wetekaneya.
24-25
Nitikale titikilepa eya taneya. One pupu yene
yopiane agome pupu ago pade takoa aua nokale tobou agome okome neme aunake kina
kue ege egeta kadukoa (7,000,000 kina) motokana toa oto wa mano-kale okome ae nekena
nami wiane meateku kue toamokono, edeku patu-kale okome i agoka one mati atoaka one
yapu pikoya-kiti topo takoa auna kueke kue motokoano ta wa one pupu yene yopikane ali-
pala akeneya.
26
Nimo okale one eina pupu takakanakago one kawane witipitoa aua
pitalogoa kowitikome okome nekena kuekepa kue kotuke oboane meouno wa-ye wa
kowitoa kakale
27
tobou agome ela motokome okome nipa aunake nami kakoa motokana
kueke kue moamadene eni wakuno, opa atiki tootapea pa wa one yapu wetekaneya.
28
Nimo wapa akeneyake one eni pupu takakanakagome akolono wititapea ponokome
enekale one odene pupu ago pade ponokale enekome einago tomo po dekamotokome
okome aunake ege odepeta kadukoa (50) kina kue nami kakoa motokana wete oto nami wia
mano wa okale
29-30
one eina odene pupu ago one kawane witipitoa pitalogoa kowitikome
okome nekena kuekepa kue kotuke oboane meouno, wa-ye wa okaleka e agome okome
auna kueke kue wete nami wia oto meamokoyake ne po yapu pa pioo wa po yapu moa
pitikapaneya.
31
Nitikale enemotekete ete pade pupu ali-kiti wene keda mati tokale mea
tobou ago mekata nekete einagome tokamo dika dika wa to awea onaneya.
32
Nitikoli
yatekome tobou agome one mekuta ne noo wa einago kayo oa motokome okome nepa lene
piane ago tadeko. Aunake kue nami kakoa motokana peya oto wa moameamene wa neme
no kowitikale oto moamokouna.
33
Eina anume ne ela motekene tokouna toa nemeka neke
odene pupu ago ela motikinakeya, dekale ela moamoka-pe wa kikoa ootokoa kakome
34
po
yapu yopiane ago-pala okome i agome anu kueke kue wete nami wia oto meamokoyake po
yapu pa pia kamotono, po yapu pitikakapa. Eida layo toua wikala tamene wa moa
metaneya.
35
Ae, Agetai a tibuke mekome kipalaka enakale too. Nipa kini oyago padame
kipala padele padele poanele tokake po letu mekakoina keetapeamadete wakolipa Akolaliyo
nitoo wa Yesuyo oka.
Matiu Matiu
<<
18 18
>>
Matiu Matiu
<<
19 19
>>
19
Alime One Atoa Wakeneleke Akenemo
(Make 10:1-12, Luke 16:18)
1-2
Yesuyo enimo oomotokome Galili ta tewitikoa Yodane ue ketoa eka Yudea take
pome mepoka. Poademe pokaka ali atoa lewi lewita pia litima nokoli kini tane yene eida
latekamu toka.
3
Parisi ali-kitika nekete ekete padele tubelekeka natelekeka panagome one atoa pa wa
wakopa nipa tone totono litiapa tamele toa toko-pe wa natemo omotadiya wa kakete okoli
okome
4
namolo namolo Akolaliyo kamate meaneya-kiti titikome latikilepa ali atoata
takuta wa-kama latikala taneya. Eni tanemo one bokuke wia mekaneya kime oi
moamokoiya-pe.
5
Nitanelekepa alime atoa motokomepa etene nineta tewitikoa one atoa-
pala lipua meoo. Nipa namolo letetakutukoata meaneyake naniko odene tigini tetepo
taneya mekete liputakutukoata meoi.
6
Nitoa mekoli ipa i ago ipa i atoa wa tutu tutu wa
ibini amele toameneya tokome i adona wa odene tetepo takoa oi. Nipa Akolaliyo moa
lipukane ali atoata wa padameka moa letekatakutukamele toamoko wa Yesuyo okale
7
Parisi
ali-kitame pitia yatekete ekete panagomedo one natono wawademepa namolo takoa opi ne
eni wakene wakuna wa edikoa pipia wia meetekoapa opa pa wa wetekamele toko wa
Moseseyo akeneya-mo. Enipa edekale akeneya-pe wa okoli okome
8
Moseseyo eni akenepa
kini kaua-mikiti kolotini lupi tootapeneya mekoli tokome ni akeneya. Moseseyo nimo ikilepa
taneyake Akolaliyo padeya padeya peya titia latikome oa piane toa akeneya mena.
9
Opi
noanume eya wane uku. Pade atoa eko ali kode noameneya meaneyake anamedo ne pa wa
wetekatekoa pade atoa motokomepa mone koua piamateko atoa eni motokome toko wa
Yesuyo okale
10
one oya ali-laweme ekete ali atoa edikoa meamediki wa neme okopa nipa
alime atoa edoa moamoono, atoa moameneya tiobo ago-kama kaketepa nipa epetoo-koli
okome
11
eni ukupa ali peyame oyake litia tamele toamoko. Kipala ukulepa i agome-kiti litia
tomotou wa Akolaliyo wene pikalepa nipa oyake litia too.
12
Pade ali-kitipa ninane tepene
taneya nekene toa atoake wene kamoamokolo tiobo ali-kiti meki. Wa pade ali-kitipa alime
mu motokatapeneya tokome tiobali-kiti meki. Wa ali padeka-kitipa eya kuya peya talo toko
ago Akolalinele takama pukuno, atoa mena, moamou wa tiobali-kiti pa meki. Anu i ukule
litiane tou wa wene piko agomepa nipa edikoa mema pamene wane uku wa Yesuyo oka.
Yesuyo Mati-kitane Kowitikanemo
(Make 10:13-16, Luke 18:15-17)
13
Wa pade-pete pade-kitame kini mati-kitipa Yesuyo yono pia kowitikamotoa aua
nokoli one oyali-kitame poe wa kikoa okoli
14
Yesuyo okome wini mati-kiti oto nomotono,
etoe. Akolaliyo one talo tuku taapa kinino, noe wa yametekilepa dikane mati-kiti
yametekono, oto nomotono toe wa okale
15
nokoli yono pia kowitikamotokome padeka
poka.
Uu Kamo Tane Tualike Akenemo
(Make 10:17-31, Luke 18:18-30)
16
Wa padepete panago Yesu kakata nokome okome Tikisa ago Akolaliyo talo toko
take meane kama pouno, padele epetanelepa edele tekene meane kama pomotoa oko-pe wa
okale okome
17
epetanelekepa dekolo no pitia yateko-pe. Epetanele-kama toomoa poko
agopa Akolali odene. Meane kama pouno wene pikepa nipa Moseseyo tamene wa oa
pianele-kama toma pamene-kale okome
18
mani agale-kala litiane tomotoa oko-pe-kale
okome ali pade wia tukamoa mone padane atoa liamoa monekeya kode moamoa panago-
pala pa puputua akoa agale wamoa tamene.
19
Ni neketai neka uata kei pia mama moa ni
pinali neeke wa wene mekoa mama motoko toa yete pade ali atoake wene mekoa mama
moamene wa Yesuyo okale
20
tualime okome neme wini okole-kamapa litiane toma nukuno,
edele katekoane toamukutu-pe wa okale okome
21
Akolaliyo wene piko toane kotuke
kakoane litiane tou wa neme wene pikepa nipa nekeya peya topo toa kue moamene.
Mootokoapa ponopene ali atoa enoa tatia meetapeamene. Nitikepa neke kamoyapa a tibuke
auma kakeneya enoo. Nitatekoyano, no litima namene wa okale
22
yatekome wene keda
taneya wawa poka. Nipa uu kamo tane ago tokome taneya.
23
Nitoa pokale Yesuyo one
oya-lawe-pala okome ae kamo tane ago Akolaliyo talo toko take pikilepa etene wili tokoa
kawapa poko.
24
Kamelo kaido noi keneke-kiti patukoa ponokomepa nipa wedoa wili toa
kawamoapa patukoa ponoo. Kamo tane ago Akolaliyo talo toko take ponokomepa nipa
wili tokoa mati kawapa ponoo. Nipa one eni take pamene poto tube mati toko wa okale
25
one oya-lawe wene peya mati pianeya kakete ekete ekee, kamo yeneke winimodo nimini
akedekalepa nipa Akolaliyopa mainali atoa toa moo tokolo-pe wa okoli
26
Yesuyo
nepikakome okome ali atoame toamatikilepa Akolaliyopa oyake tamele toko. Padele padele
peya tamele toko ago tokome kamo agoka one take nomotoa ka patekamele toko-kale
27
Pitayo okome ne litima noadetepa tonekeya peya tewitikoa wawa nokoono, neme edeya
nami wia meoo-pe-kale okome
28
itono tibuta takoa pokale eni luku weneya pikalepa pa
tootapeane walaike no Ali Yatenane Oyago pone mepou. Nitateku toa anu oya kiwika
nooke lokoa tobou ali-kiti meatikiya walai tuku kakoake (12) mekete Iserele yatene tuku
kakoa (12) tatite toa takoa enekala toi.
29
Wa panagomedo ipa no Yesuke tuku wa one yapu
one etene nineta one laine wamene-mikiti one mati-kiti one ipe one ta eya tewitikoa
wakomepa nipa enika eniya lukukepa ege takupeta kadukoa (100) mokala too. Nitoa mea
tukale Akolaliyo one talo tuku take mea kama pamene wa moa kakoo.
30
Akolaliyopa ako
yene kainya mati keku kakoa wa keku yene kainya mati ako kakoa too wa Yesuyo oka.
Matiu Matiu
<<
19 19
>>
Matiu Matiu
<<
20 20
>>
20
Pine Agome One Ipe Pupu Takane Ali-kiti
Kue Metekome Tanemo
1
Yesuyo okome okome Akolaliyo ali atoa pawe toa talo tokole ooyametekuno yakoe.
Gerepi po ku ipe pinagome-kiti likonu witiane ipe takatiki ali-kiti enemopou wa mekoika
pekeneya.
2
Pokome enekome okome tebolo-wa-kama kue kina mekala touno, anu ipe
takapoi-pe wa okale ekete takapouno ta-koli okome nipa takapoatino, poe wa moa
wetekaneya.
3
Nititikoa lou pini pogi (9) kakoakeka makesike wa wakapea pome enekale
pade ali-kiti loyo mekoli enekome okome
4
kini moatiki toane kue mekala touno, anu ipe
takapoatino, poe wa moa wetekakale takapaneya.
5
Bera-peteka (12 kilokoka) lou
aukapokaka (3 kilokokeka) einakale toa pade ali-kiti enekome takoa moa wetekakala taneya.
6
Wa naniko ogopono (5 kilokoke) wa wakapea pokome enekale pade ali-kitika loyo mekoli
enekome okome i makesike likonu witia pa loyo meemoa note ta likakino, edekolo pupu
toamiki-pe wa okale ekete
7
pupu yametekago ago nikileka toamoka-koli okome nipa anu
gerepi po ku ipe takatiki pupu pikono, takapoatino, poe wa wetekaneya.
8
Ta likaka gerepi po ku ipe pinagome eni yene yopikago-pala okome okome anu wini
pupu takaki ali-kitipa kue meteke ile tamene. Wipitikene takoane motokouna ali-kiti kue
namolo takoa meawineya pamene. Ketekepa namolo takoane motokouna yene mea
wipitiamene. Wete kayo oa moa kue metekakala toano ta wa okale
9
pokome ipe pinagono
pupu ogopono titikete takane ali-kiti nokoli kina tebolo-wa-kama metekaneya.
10
Nitima
pome wipitikale namolo takoa motokana ali-kitame kue ako mouno wene pia nokoli ipe
pupu yopikagome kina tebolo-wa-kama metekaneya.
11-12
Nitikale motekete ipe pinago-pala
ko oa kakete ekete likonu wititapea tape louke pupu takamoa note ta likakoona. Nitikoonake
lou pini odeneke pupu nateya takakoina yene-pala totoka odele toa pupu takane tetepo
takoa kina tebolo-wa-kama neme meteko-koli
13
pupu pinagome pupu takane ago pade-pala
okome anu oya ne toane potokamukutu-mo. Kina tebolo meouno, anu pupu takapoo-pe-
kolu eke e eno, nitikouno ta wa neme okana. Enimopa wamokanakamo okotu-pe.
14
Kue ne i
metekene tuku toanepa keteane moane wetekakounakagoka kina tebolo meadene uku. Neke
i kuepa moano ta.
15
Anukuyapa anu wene litiane oyake tatiane meamele toko. Naniko ina
nokanakago edikoane pewe witikouna tokolo ni nopalapa wene poaneya kake oko-pe wa
ipe pinagome akeneya wa Yesuyo oka.
16
Nimo ootokoa okome wina pedoane okouna toa
Akolaliyo naniko nokoi yene namolo kakoa wa namolo nokoi yene naniko kakoa too wa
Yesuyo oa poka.
(Make 10:32-34, Luke 18:31-34)
17
Yesu ate Yerusaleme take poademe pokome one tuku kakoa (12) oyali-kiti eko
keneya witimoa aua pokome okome kipala i ukumo yakoe.
18
Opa ate Yerusaleme take
poadete poko. Pote kakolo no Ali Yatenane Oyago panagome moa eya yenane yonoke
Akolalike lodo yoai tiki tobou ali-kitika Mosesene totono pine to a olaukaki ali-kitika kini
yonoke pioo.
19
Nitikale no wiatekoi oi pedoa piitikoapa mone pa yene kime wia tukakoe wa
metekoli motekete tegene matoa po wapime wia yomo lekaneyake wia dekoa toi. Nitikolika
ta tebolo takoa pataka-petepa Akolaliyo moa kamotokoo wa Yesuyo oa pika.
Yame Yonetane Niname Yesu Kowitikanemo
(Make 10:35-45)
20
Yesu Yerusaleme take kutu poademe pokaka Sebedi natono one manata-pala
Yesuke nome wadini tukupia kowitikakome okome agale deya ou-kale okome
21
anume
edele takamotoa oko-pe-kale okome ne tobou ago meke talo tokaka i manatame ne
auapekete panago neke nimini yono lono mea padena ago neke ewa yono lono mea
yopimotoane uku-kale
22
Yesu eni wamena kakoi lono peketapekome okome wene
toameketeke ikino, no noateku tetepa kitameka noukete iki-pe-kale ekete e eno, nitato ta-koli
okome
23
no noateku tetepa kitameka eni noateku toa noi. Nitadete tikiyake ali atoa talo
toane mekouta eka oka yono lonota kita tatikatakutukoane mekamele toamoko. Eka okata
meatiki agotapa Akolaliyo i i wa wete wene toopianeyano, anume oyake oyameamele
toamoko wa Yesuyo oka.
24
Nimo wapa akedekoli yatekete o yename eni wamena-pala wene poaneya kakete ko
oa kakoli
25
Yesuyo one kakuta noe wa kayo oa motokome okome mone pa yatenane
tobou ali-kitame kini yene wete toe toe wa tika tika-kama tiki. Kini ibini akene ali-kitameka
ali atoa yopia mekilepa kinikile-kama takamotoa tiki.
26
Nitikala tikino, anu oya-lawe kime
pade edikameamene. Tobou ago meou wa wene piketepa nipa kinikile toamekete kini oya-
mikitanele takama pamene.
27
Nipa ako odene mekene talo tou wa wene piketepa nipa
pinagono pupu-kama takamotoa kueme topo toa moa egetane ago keneya meamene.
28
Noanupa Ali Yatenane Oyago taatekoane nekenepa ete yename anukule takamotoane
nokouya mena. Nitameneya ete-kitanele takoane ni ali atoa peya mati anu kamateme oto
toane moukene ni nokou wa Yesuyo oka.
Leneta Lianeya Meane Agota Epetekanemo
(Make 10:46-52, Luke 18:35-43)
29
Yesu one oya-lawe-pala opia pome Yeriko ta tewitikoa pokaka ali atoa lewi lewita
pia litima pokoi.
30
Kini ponokoya liti leneta lianeya meane agota batete matanuke eida
mekete yatekoli Yesu wini patukakona wa oma ponokoimokamo yatekete kayo oa ekete
Depidi-loeke tagene ago Ali Muno neme tota ela moamene-ye wa kayo okolipa
31
Yesu lewi
lewita pia litima ponokoi-kitame kikoa ekete ekete agale oyakeno, wawe. Kilikoa meo wa
kikoa oma ponokoi. Nitikolika einagotame kayo telo kamotokoa ekete Depidi-loeke tagene
ago Ali Muno neme tota ela moamene-ye wa ka ata wikoa kakoli
32
Yesu witimoa kakome
okome nipa noe wa okale nokoli okome anume edele takamotoa iki-pe-kale ekete
33
Ali
Muno tone leneta kikoono, epetekoano ta wa okoli
34
ela motokome kini leneta
mitikatekakale eina eina kikatapeneyata Yesu litimata pokoi.
Matiu Matiu
<<
20 20
>>
Matiu Matiu
<<
21 21
>>
21
Yesu Yerusaleme Ta Ate Poademe Pokaka
Ali Atoame One Kei Piawineya Nekenemo
(Make 11:1-11, Luke 19:28-40, Yone 12:12-19)
1
Yesu one oya-laweka Yerusaleme ta tigotokoa witapadete peketepa Olipe-pini tonoke
latiane Betepase take witakete Yesuyo eya toka. One oya ali-kiti takuta moa wetekakome
okome
2
kuka ku take poatino poe. Pote witoa kaalaukete enekoli dogi kai tine-pala eida po
kakoa kebetaneya kakoli enoi. Eni dogi kai nina po kotokoa oto aua notokamene.
3
Kotokoa moadete kakoli panagome dekolo motiki-pe wa okalepa eya wa akamene. Ali
Munoyo padele toatekole pikolo ni motokoa poko. Opi oto wa wetekademe toko wa
akamene wa Yesuyo oka.
4
Enipa Akolaline agale to awea akane ago padame eya wa papete
oa piane toa taatekamotoa tokoi.
5
I Saione take meki kono-mikiti kiwi yopia tobou meatekago wini noko. Nokomepa dogi
kai tali waneke mekome ua mootokoa patutu ootokaneya mea noko. Nipa dogi
kai tine patu mea noko wa padame oa pianeya.
6-7
Eni oa piane toa taatekakete Yesuno oya alita takutame Yesuyo okalee pote
topokoi. Nipa eni dogi kai nina aua neketepa kini kakene mamina petene kotokamoa dogi
kai patu tatikakoli Yesu mea poka.
8
Nitikaka ali atoa peya matiyame kini tokoo kakene
mamina kotokamoa one mea poatekaka bateteke pia tatikama pokoi. Wa padeka-kitame
yomo yenene deya tewia moa batete ludu tatikama pokoi.
9
Nitoa lewi lewita pia pekete
namolo kawa pokoi-kitameka ketea kawa nokoi-kitameka agale kamotoka kamotoka toa ke
ke wa oawineya pekete ekete
Depidi-loeke tagenago i ago kei piatoe. I agopa Ali Muno Akolali patu kautakoa kama
nokono, Akolali neme pewe wia yopia kamene. A tibuke meki peya one kei
piamene-ye wa kolotine togete oawineya pokoi.
10
Oawineya nomotoa Yesu Yerusaleme ta ata witakalepa ali atoa ete pato oto pato toa
kakete ekete i ago te-pe wa ka wikoa kakoli
11
lewi lewita pia nokoina-kitame ekete i agopa
Nasarese Yesu Galili ta keneke piko Nasarese take ago Akolaline agale to awea akako ago
wa topo takoa okala tokoi.
(Make 11:15-19, Luke 19:45-48, Yone 2:13-22)
12
Yesu one pa kutu pokome tobou losu yapu pome kapoka. Pome kakome eya kuya
eida-kama topo toa tane ali-kiti wia tikatapeka. Nitoa e ku take latiane kue topo toa Yudea
kue lene ete mea tokoi ali-kiti kini walai-kiti moa pekatapea ni ini puluma yoa tane yenane
walai-kitika moa pekatapea toka.
13
Nitikome okome anu i yapupa no Akolali ali atoame
kowitoai toatiki yapu wa one bokuke wia mekaneyake kimepa kode yename kodeya
paigakoa moa potipiai tane kota tetepo takakino, poe wa wia tikatapeka.
14
Yesu losu yapu pa eida kakale leneta liane yeneka kawa okeane yeneka one kakata
nokoli epetekatapeka.
15
Yesuyo ele kule telekole tokaka eida tobou losu yapu kakoi mati-
kitame ka oa kakete ekete Depidi-loeke tagenago kei piatoe wa ka oa kakoi. Nimo okoli
yatekete tekete Akolalike lodo yotokoai tane tobou ali-kitika Yu yenane totono pine to a
olaukane ali-kitika Yesu-pala wene poaneya kakete ekete
16
i mati-kitame ka okoa kakimopa
yateko-pe wa okoli okome e eno yateku. Enikepa Akolaline bokuke eya wa wia mekaneya
pikono, yakoe. Akolali ne kei piatiki toa dee mati-kitameka nana mati-kitameka kei pia
kamotoa neme toko wa Depidiyo Akolali-pala akeneya. Eni agale tiginipa kime oi
moamokoiya-pe wa Yesuyo oomotokome
17
e yene tewitikoa Besani take pome pipoka.
Yesuyo Yomo Piki Kikoa Okome Akenemo
(Make 11:12-14, 20-24)
18-19
Podolikama likonu witia Yesu Yerusaleme ta wa wakapea poademe pokome pake
kobume tukome ete enapekome enekale yomo piki pade batete kebonoke kakale eneka.
Nitoa pinele pome enekale tata pitikoa kakomeke ku tumeadeka. Nitadekale eni yomo kikoa
okome okome ku pade wa tukilepa toamea wa okale eina eina totoa ala tootapeka.
20
Nitikale enekete one oya-lawe wene kainya pianeya kakete ekete ina yomopa odepeta
totoa ala tootapekono, edoa tokoto-pe wa okoli okome
21
kipala i nimini ukumo yakoe.
Poome toameneya mea Akolalike wene tugoa meketepa nipa anume ina yomo-pala
tokounakale kimeka oyake tekete eya-kitika tamele too. I kako tono mati-pala ekete ne wete
to a kusa ue muke kuta poke kapa wa okolika oyake pome kapoo.
22
Eya waneka ukuno
yakoe. Akolali kowitiketeka oneme yakoa too wa oneke wene tugoa mea kowitikolipa
yakoa too wa Yesuyo oka.
(Make 11:27-33, Luke 20:1-8)
23
Yesu Yerusaleme tobou losu yapu pome olaukoa kakaka Akolalike lodo yotokoai
tane tobou ali-kitika Kanosolo ali-kitika Yesu kakata nekete ekete neke tokolepa te patu
kautakoa kake toko-pe. Teyo tamene wa okole toko-pe wa yakanokoli okome
24
kipalaka
yakatekumo pikono, yakoe. Oto wa topo takoa okoli yatekenepa nipa noanume toma
yakule i ago patu kautakoane kakene tuku wane ouno, yakoe.
25
Yoneyo ali atoa ue
motokakilepa tene peku noa toka-pe. Akolaline peku patu. Kini kaua-mikitane peku patu.
Yakouno, oe-na-kale kini kini yakaate tekete ekete edemo wa ato-pe. Akolaline peku noa
toka wado okolopa nipa Yone einagome okagale edeyake yakoa moamokoi-pe wa i agome
oono, nimo wamato,
26
Nimo wameneya one kaua-mikitane peku noa toka wado okolopa i
ali atoame toto wia tukatikiyano. Yone einagopa Akolaline agale to awea akane ago tadeko
wa ikiya tokome nitoino, enimoka wamato wa ete Yesu-pala ekete
27
wene toamokono,
Yone einago tene peku noa toka patu-koli okome nipa noanu toma yakulepa i ago patu
kautakoane kakene tuku wane wamou wa Yesuyo oka.
Etename Okale Manatame Yatekete Tanemo
28
Kipala eya waneka yatekene ukuno yakamene. Panagono manata takuta kakeneya.
Wa padepete namolo ago kakata einago pokome okome opi anu ipe takoano pa-kale
okome
29
no pade poamou wa ootokoake one eni wene wia wawa etenane ipe takapaneya.
30
Nitaneyake etene putunago kakata pokome namolo ago-pala okana toa okale okome
e eno, nitou ta wa ootokoake etenane ipe takapameneya.
31
Nitikala taneyano, etename okale
mainagome yakoa taneya-pe wa Yesuyo okale e yename ekete eina namolo ago wa okoli
okome nimini ukuno yakamene. Takesi kue motokama yaki ali-kitika pamoko atoa-kitika
Akolaline take pikilepa kiwi naniko nomotoa pokala tiki.
32
Nipa ali atoa ue motokama
yakana Yoneyo kiwi wene kiyo akeneya mekete toatekoile i i wa yametekanake e e nimini wa
litiamokoi. Litiamokolika eni pa ali atoamepa one okamopa nimini oko wa yakoa tokoi.
Nitikoli eneketeke kini poane wene wia wawamoa Yone einagoke wene tugamoa tokoi wa
Yesuyo oka.
Pinagono Gerepi Po Ipe Yopia Potokanemo
(Make 12:1-12, Luke 20:9-19)
33
Agale pade pedoane ukuno, yakoe. Panagome-kiti one ipe tootokoa gerepi po
matatapeneya. Nitoa pawe toa unukatekoapa one pupu yename po ku kotia pitikoa kawame
kautoa tia lobutatekoi kagono wetia latipianeya. Nitoapa payaponalime ta enapea yopia
meateka yapu atepea wipianeya. Nitoapa ali pade-mene one ipe kime yopikakamene wa
yamemotokome ta padeka pome mepaneya.
34
Nitaneyake ku putua kibutukakoa kawateka
tigotoma nokale one pupu ali pade-mene moa wetekakome okome anu ipe yopikaki-kitame
no moateku toapa meadete tikino, motokapoatino poe wa moa wetekaneya.
35
Wetekakale
nokoli enekete dekoa motekete panago layo toua wia panago wia tukoa panago kueme ka ua
tukoa taneya.
36
Nitaneyake pinagome pupu ali kainya mati moa wetekakale nokoli namolo
tokoinakale taneya.
37
Nitaneyake wipitikomepa eni ali-kitame one mana kei pia makutukoa
moi wa wene pikome mana ago ne pa wa wetekakale nokale enekete oote tekete ekete
38
pinagono mana ku nokona. Etename one pikoa pokaya-kiti kadimo okome kunagono
pikademe tokono, one eni moatekoya-kiti toto moatono, kunu ago wia tukatoe wa
39
dekoa
moa tayo lono aua pote wia tukapaneya.
40
Nitikala taneyake ipe pinagome one ipe yopikaki yene-pala edele tonoo-pe wa
Yesuyo okale
41
one agale yakakoa kakoi-kitame ekete ipe yopia potokane ali-mene dika
dika toamene tete mea wia atukoo. Nititikoapa one gerepi po ku moateko toa kiyotokoa
moke toa meatiki ali pade-mene kime yopikamene wa yameoo-koli okome
42
Akolaline
bokuke agale dikoa wia mekaneya pikono, yakoe.
Yapu wiane ali-kitame i yomopa poadeko wa paya tetepo takoa wakeneyake
padekagome i yomopa yapu pigi wa moa wianeya. Enilepa Ali Muno
Akolaliyo taneya tokome ke wa kolotine mekete one kei piato wa panagome wia
mekapianeya.
Eni wia mekanemopa kime oi moamokoiya-pe.
43
Kipala i ukumo yakoe. Akolaliyo kiwi talo
toake wakome kiwi luku one pupu wedoa takatiki yatene moa kakoono, nepio.
44
Eni yomo
pigike pitakoi ali atoa ka ua kugu wititapeoi. Wa eni yomo pigi panagoke pitakome katua
tawele takatapeneya pioo wa Yesuyo okale
45
yatekete Akolalike lodo yotokoai tane tobou
ali-kitameka Parisi ali-kitameka ekete ina okana agale-menepa totoke akedekono,
46
i ago
dekatapea moatiyake toko wa kakete eida oboa kakoi-kiti piti motekete tekete wakoi. E
kakoi ali atoame i ago Yesupa Akolaline agale to awea akako ago tadeko wa wene tokoli ni
piti tokale one dekoa moamokoi.
Matiu Matiu
<<
21 21
>>
Matiu Matiu
<<
22 22
>>
22
Etename Manane Atoa Motokakome Togemo
Oa Wetekakale Pade Ali-kitame Wakenemo
(Luke 14:15-24)
1-3
Wa naniko Yesuyo pedoa agale pade-meneka e yene-pala okome okome Akolaliyo
ali atoa pawe toa talo tokole ooyametekuno yakoe. Tobou agome-kiti one manane atoa
motokakene toge ipete kiouno, namene wa oa metane oi nokale one pupu ali-kiti moa
wetekakome okome namene wane okouna ali-kiti enemotokapoe wa wetekaneya. Nitikale
pote opokoli peyame ekete kote tokono, noamouno, poe wa waamu taneya.
4
Waamu
taneyake pade pupu ali-kiti moa wetekakome okome anu toge tu ane pikuno, manane atoa
motokadene egetekoane mekou pitimekawe kai eya wete wiane kikakakouno, wete noe wa
akapoe wa wetekakale enemotokadete pekeneya.
5-6
Wete noe wa opokoli yakamene lau lau
toa kinikileke etepea pekete eya tokala taneya. Panagome one ipe topome panagome one
sisoa yopipome wa pade-kitame tobou agono pupu ali-kiti dekoa moa ya motokoa wia
tukoa taneya.
7
Nitaneyake tobou ago timini nakale one poyo ali-kiti moa wetekakome one
pupu ali-kiti wia tukane yene wia atukoa kini yapuka yotokapoatino poe wa wetekaneya.
8
Nititikoa one pupu yene-pala okome okome manane atoa motokakene toge wete kiane
pikene namene wane agale oane wetekakouna-kiti wawa noamikino, toge nee etene
nomotoane wamukuno, kiwi lukupa eya yene enemotokapoe.
9
Batete ludu pote ali atoa
kotukete ekete tobou agome manane atoa motokakome toge kikakakono, noe wa akapoe
wa wetekaneya.
10
Nitikale batete ludu pote kotukoi peya epetanele tane yeneka poanele tane
yeneka noe wa enemoma nokoli notepa tobou agono yapu edeya takatapeneya.
11
Nitoa toge noa mekoli tobou ago nokome enekale panago paya mamina kakeneya
meadeka.
12
Nitadekale okome anu oya ali nepala ukumo yaka. Manane atoa motokakene
kiku toge noadepa weneya mamina kakeneya namene wane okounake kawameadekono,
dekale waka-pe-kale agale wametekoa mekale
13
tobou agome one pupu yene-pala okome
okome i ago kawa yonota lutua yomiyomu wa dika dika toamene take moa pitikakapoe wa
akeneya wa Yesuyo oka. Nimo ootokoa okome eidapa ali atoa komo ka ta nina toa pitikoa
kawamoi.
14
Nipa Akolaliyo ali atoa kainya mati oneke noe wa kayo okomeka pa natetekoa
takoa mokala toko wa Yesuyo oa tukaka.
Lomane Tobou Ago Sisane Takesi Kue
(Make 12:13-17, Luke 20:20-26)
15
Yesuyo nimo okale yatekete Parisi yenamepa Yesuyo natemoka omotoa likoa
enatekoi oi pedepiadete wa eko keneya witimoa mepaneya.
16
Nitoapa kini totono yakoa
tane ali-kitika Erodeke timini kakoa yakene yeneka Yesu kakata poe wa moa wetekakoli pote
lede pitia yatekete ekete Tikisa ago nepa niminimo-kama oko. Nitoa ibini akene yeneka
ponopene yeneka takoa enamoapa eni yene peya Akolalinele takama pekete toatikile
kiyooke-kama olaukama poko.
17
Nepa nitane agono wene tekete imodo pitia yatekono,
yakamene. Yu yene tone totono litiapa Lomane ako tobou meko ago Sisane takesi kue
pitikamato-pe, Pitikato-pe. Yakoono, oa ta wa okoli
18
kini poane wene pianeya kakoile
tetoa enekome okome wene takuta pianeya kakete iki-kitame nopa edeyake likoa eneki-pe.
19
Takesi pitikatiki kue lene enouno, yameo wa okale panagome moa aua nome yametekale
okome
20
i kue lene tiginikepa padane lene timini-pala ibinita wia mekaneyano, eniyatapa
teneta patuno, yakouno, oe-na-kale
21
peyame ekete tobou ago Sisa one wa okoli okome
nipa Sisa meatikiya-kiti ni Sisa takoa mea Akolali meatikiya-kiti ni Akolali takoa mea tamene
wa okale yatekete
22
ekee wa wene kainya pianeya tewitikoa pokoi.
Tuane Ali Atoa Kamoatekoile
Lede Pitia Yakanemo
(Make 12:18-27, Luke 20:27-40)
23
Einata einapetepa tuane ali atoa wa kamoamoi wa iki yatene Sadusi yatene Yesu
kakata nekete likoa enekete ekete
24
Tikisa ago, Moseseyo eya wa akeneya. Panagono
atoame one mati opikameneyakedo einago tukalepa one wamene ago neme moa neke
natono latikamene. Nipa tukanakago lukuke kawatiki mati opikamotono, nitamene wa
Moseseyo akeneya.
25
Nipa odene agono mana-mikiti tatono kakoa (7) kakeneya. Namolo
agome atoa moapa mati opiameneya mea tuaneya. Tuademe pikome one liti opiane ago-
pala kadimo okome okome mati opikamotono, anu atoapa ne moamene wa ootokoa
tuaneya.
26
Nitikale moapa mati opiameneya oneka mea tuaneya. Tebolo takane agomeka
einatoa moa mati opiameneya tuka. Eni wamene-mikiti peyame einatoa kibutua moma-kala
nekeneyake panagonoka eina atoame mati opikameneya. Peyapa tiobo ali mea tukala
taneya.
27
Nitikala taneyake wipitikomepa einakatoaka tuaneya.
28
Eni wamene-mikitame
einatoa edikoa kibutua moma-kala nekeneya. Nitaneyano, tua pokoi ali atoa Akolaliyo
kamotokaka-pete einakatoapa mainagono natono wa tugoa meoo-pe wa Yesu likoa enekoli
okome
29
kini wini ikimopa Akolaline bokuke piko agale-pala one telekole tokoleta wene
toamekete iki. Nipa pamo ekete tiki.
30
Tua pokoi ali atoa kamoa pote a tibuke mea kaketepa
alime atoa moamoa atoa ali poamoa toi. Nipa a tibuke Akolaline edelo-kiti keneya meoi.
31
Ali atoa tuapa wa kamoa pote kakimopa Akolaliyo kipala akedekonake one boku moa oi
moamokoiya-pe.
32
Eya wa akeneya. Noanupa Eberame Aisaketa Yekobe toa einago-
menane Akolaliyo uku wa akeneyano, onepa tuane ali atoane Akolali mena. Mea kama piki
ali atoane Akolaliyo uku wa okome akedeko wa Yesuyo oka.
33
Enimo okale yatekete eida
oboa kakoi peyame ekete imopa i olaukoa kakono, yakatoe wa ka oa kakoi.
Tobou Kakoa Akene Agalepa Mani-Pe
(Make 12:28-34, Luke 10:25-28)
34
Yesuyo one oka agaleme Sadusi ali-kiti moa kautakale agale ete wa topo takamele
toamoko wa akedekoli yakamotekete Parisi ali-kiti Yesu kakata obomoa nokoi.
35
Eni nokoi
yene padame Yesu likoa enekome okome
36
awa, Tikisa ago, yonota tua agalepa e tobou
kakoa akene agalepa mani-pe wa oka. Ni agopa Yu yenane totono pine to a olaukakago.
37
Nimo okale Yesuyo okome neke Ali Muno Akolalike wedoa wene mekoa mea tikilepa
neke tepe kolotinime toa neke yominime toa neke weneme toa tamene.
38
Tobou kakoa
akene agalepa enina.
39
Nike lokoapa edikane agale eya wa wia mekaneya piko. Pinali neeke
wa wene mekoa mea mama motoko toa yete pade ali atoakeka wene mekoa mea mama
moamene wa wia mekaneya piko.
40
Moseseyoka Akolaline agale to awea akane ali-kitameka
Akolaline agale akoa mema neketepa eni agaleta patu-kama kelekoa oma-kala nekeneya.
Keraisu Te-laweke Ta watekago
Wa Yakanemo
(Make 12:35-37, Luke 20:41-44)
41-42
Parisi ali-kiti eida oboa kakakoa Yesuyo yatekome okome Keraisu wa papete ibini
oa piane agopa edane ago wa wene piki-pe. Te-laweke ta watekago wa iki-pe wa okale ekete
Depidi-loeke ta watekago wa okoli okome
43
Depidiyo papete Keraisupa one Ali Muno wa
ikilepa Epetane Yominiyo wene takakale eya wa akeneya.
44
Ali Muno Akolaliyopa anu Ali Muno-pala eya wa oka. Nepala poi te ia meki ali-kiti
moane kawikoane neke kawane komo pikouno, one nimini yono lono noke
nepia menamene wa Akolaliyo oka wa Depidiyo wia mekaneya.
45
Depidiyopa Keraisu einagopa one lukoane meku Ali Muno wa akeneyake Parisi yene
kimepa Keraisu einagopa Depidi-loeke ta watekago wa ikino, dekolo iki-pe-kale
46
odenagomeka agale topo takoa wamokoi. Nitoapa einapete titimoa padameka agale pade
wa pitia yakoaka enameneya.
Matiu Matiu
<<
22 22
>>
Matiu Matiu
<<
23 23
>>
23
Parisi Ali-kiti Kini Tanele Toameamene
(Make 12:38-39, Luke 11:43,46, Luke 20:45-46)
1
Nitaneyake Yesuyo e oboa kakoi yene-palaka one oya-lawe-palaka eya wa oka.
2
Mosesene totono pine to a olaukaki ali-kitika Parisi ali-kitika Mosesene agale patu kautakoa
kama piki.
3
Nitiki yename ile tamene ile tamene wa okoile-kama litia tamene. Nimo ukuyake
eya waneka uku. Eni yename ile tamene ile tamene wa olaukaketeke pinali-kiti kini eni ikina
toa toamiki. Nitikino, kini tikile litia toameamene.
4
Eni yename padeya padeya keda tokoya
ali atoane kotomaneke moa aukou toa kini wene keda takakala tiki. Nitikiyake eni keda
nateya deyaka yapetekoa ate motokamiki.
5
Eni yename ele kule tikilepa eko ali atoame kiwi
kei pia kamotoa tekete keleyo-kama tiki. Nipa Akolaline agale tigini deya pipiake wia
mekatekoa mete kabeke lobutukoa pono yonoke pome dekoa togotoa ni kini tokoo kakene
mamina nami-menekeka padeya padeya koniyoya ua tukaketepa ludu takoa-kama ua tukoa
tiki.
6
Toge kikoikaka ibini akene yene meatikita meada wa pote mepokala tiki. Losu yapu
peketeka tobou ali-kiti meatikita meada wa pote mepokala tiki.
7
Makesikeka ali atoame
Tikisago Tikisago ke wa kiwi kei pimotada wa yakala tiki.
8
Nitikino, anu oya-lawe kime
pade edikameamene. Kiwi peya wamene-mikiti-kama meki. Kiwi talo tukulu Tikisa ago wa
kei pia oatiki agopa odene agodo no i kaku.
9
Kiniketai wa oatiki agopa a tibuke meko
Akolalino, itonoke meko ago edikoa atai wa wameamene.
10
Ete ali atoame kiwi Ali Muno
wa kei piamomotamene. Kini Ali Muno wa oatiki agopa no Keraisu odene.
11
Kiwi
panagome one ako ago kawou wado okagopa one oya-mikitanele takama pamene wane
uku.
12
Onepa ako ago kaku wa wene pikagopa Akolaliyo keku moa kakoo. Onepa keku
ago kaku wa wene pikagopa Akolaliyo ako moa kakoo.
Wene Takuta Pianeya Mekoi-kitike Akenemo
(Make 12:40, Luke 11:39-42,44,52, Luke 20:47)
13
Ae, kini totono pine to a olaukaki ali-kitika Parisi ali-kitika wene takuta pianeya
mekino, Akolaliyo kibu moono, nepio. Kini eya toma yakike ni uku. Akolaliyo talo toko
take ali atoa poadete tikili ka wia ketekatapekala tiki. Nipa one take poamouketeke tiki.
14
Ae, kini totono pine to a olaukaki ali-kitika Parisi ali-kitika wene takuta pianeya meki. Nipa
nepo atoa-kiti oa yotokoa kini yapu eya kode keneya motikiyake eka ali atoame kiwi kei
pimotoa lede kowitikete kutupea pa agale likoa pikala tiki. Ae, Akolaliyo kiwi kibu
motokomepa dika dika toamene tete meoono, nepio.
15
Ae, kini totono pine to a olaukaki ali-
kitika Parisi-ali-kitika wene takuta pianeya mekino, Akolaliyo kibu moono, nepio. Kini peku
lawetatiki agopa tuku toma pato wa ka ludu pote ue dipikeka mea pote tuku toma yaki.
Tuku toa enamutuketepa kini peku noa tamene wa lawetekili kini tiki poanele moa patukoa
poane take poko.
16
Ae, leneta lianeya mekete ete ali atoa etepea lia aua yaki-kiti Akolaliyo kiwi kibu
moono, nepio. Ali atoa olaukaketepa eya wa ikili tekene ni uku. Panagome-kiti okome
tobou losu yapu tia ile tou wa ootokoake toamokomepa kini totono tetekakoya mena wa
iki. Nipa tobou losu yapu paya tetepo takoa iki. Nitikiyake panagomepa eni tobou losu
yapu keneke golo kueme latia pianeya-kiti tia ile tou wa ootokoake toamokomepa kini
totono tetekako wa iki. Nipa eniya-kiti tobouya tetepo takoa iki.
17
Ae, leneta lianeya mekete
tiki. Eniyatapa Akolaliyo maniya tobouya tetepo takako-pe. Tobou losu yapu patu. Tobou
losu yapu keneke pianeya tokome one wa takoa motane golo kueme latianeya-kiti patu.
18
Ni
panagome-kiti Akolalike lodo yoai tiki walai tia ile tou wa ootokoake toamokomepa kini
totono tetekakoya mena wa iki. Nitikiyake panagome-kiti eni walaike lodo yotiki melepu tia
ile tou wa ootokoake toamokomepa kini totono tetekako wa iki.
19
Ae, leneta lianeya mekete
iki. Eniyatapa Akolaliyo maniya akoya tetepo takako-pe. Walai patu. Walaike pianeya
tokome one wa takoa motane melepu patu.
20
Panagome-kiti Akolalike lodo yoai tiki walai
tia ile tou wa okomepa nipa mone eni walaike lodo yotikiya-kitika kikilikoa tia pikome toko.
21
Ni tobou losu yapu tia ile tou wa okomepa nipa mone eni yapu keneke meko ago Akolali
one-kitika dekoa kikilikoa okome toko.
22
Ni tibu tia ile tou wa okomepa nipa Akolaliyo ali
atoa talo toa meko walai-pala Akolalita dekoa kikilikoa okome toko.
23
mekino, Akolaliyo kiwi kibu moono, nepio. Eya toma yakike ni uku. Kini yamanu ludu
witakoya nee deya-kiti pilia moa oi moteketepa yonota tua pikolopa odene katekamoa ipa
Akolalineya wa takoa pikakala tiki. Nipa Akolaliyo tobou kakoa yametanele wawa
toameketeke tiki. Akolaliyopa eya tamene wa tobou kakoa yametaneya. Ali atoa takoa
enekilepa kiyoke-kama tamene. Ete ali atoa mama moa auapeamene. Onekele wedoa takama
pamene wa tobou kakoa yametaneyano, enika enile tamene.
24
Ae, leneta lianeya mekete ali
atoa etepea lia aua yaki-kiti eya tou toa pale-kama tiki. Neneku uele tuaneya pikolo enekete
moa mitikatekoa nomoa naki. Nitiketeke kamelo kai ue nakakome tuaneya pikolo enekete
moa mitikameneya ue nomoa naki.
25
mekino, Akolaliyo kibu moono, nepio. Eya toma yakike ni uku. Mete okolo eya lede abe
ko otapeou toa tekete ekolo pa abe kamotoa tokoo abe ko otapekala tiki. Nipa kepeneme
epeteku wa oake kini tepenepa lene pia mone panagoneya-kiti moadiya wa enika eni poanele
toma yaki.
26
Ae, leneta pianeya meki Parisi ali-kiti kini mete abe kogilepa namolo takoa
ekolo ko otapeamene. Nitikolipa tokoo-kitika abe kawamoo.
27
mekino, Akolaliyo kibu moono, nepio. Akolaliyo kipa tuane ali atoa oloyo tane ta tetepo
takoa wako. Tokoo kalotokoa pianeyake ekolopa tono koloa kawa kepene meleputa
lomukome kego witianeyata koloko.
28
Kini kepeneme kiyo akene wene pianeya meane
tetepo tokoyake tepene wene takuta pianeya mea e ku poane weneka pianeya mea tiki.
Edikakoi Ali-kiti Akolaliyo Kibu Moo Wa
Yesuyo Pubu Akenemo
(Luke 11:47-51)
29
mekino, Akolaliyo kibu moono, nepio. Eya tikike ni uku. Akolaline agale papete to awea
akane ali-kiti oloyo taneka nateya yapu deya wikakoa ni wene kiyo akeneya meane yene
oloyo taneka kalotokoa tiki.
30
Nitikete ekete Akolaline agale to awea akane ali-kiti meane-
pete toto meoo tokapa nipa tone kaua-mikiti-pala kibutua eni ali-kiti wia tukamoo toka wa
ikilika
31
kipala eya wane uku. Akolaline agale papete to awea akane ali-kiti wia tukane yenepa
kini kaua-mikiti wa wini ikipa nitane yeneke tagooya wa ekete iki.
32
Pegetoa kini kaua-
mikitame toa potokoa nami kakalogane yano opi kime wipitiamene.
33
Kipa kayane yagono-
mikiti. Akolaliyo poane take moa pitikademe tokono, manika edoa petoa poadete-pe.
34
Dikane yene kipala eya wane ukuno yakoe. Akolaline agale to awea akane ali-kitika wene
muno meane ali-kitika one agale pine to a olaukakoi ali-kitika wini moane wetekakolu eni
yene-pala eya tokala toi. Padeka-kiti yomo lekaneyake wia tukoa ni padeka-kiti kini losu
yapu keneke layo toua wia ni kini pitikoika ete takoa litikala toi.
35
Enipa kini kaua-mikitame
papete toma nekenele opi wa kimeka tokala toi. Kini kaua-mikitame padele toamene ali-kiti
pa puputua wia tukama nekeneya. Titikilepa Keineyo wamene Ebele wia tukaneya.
Wipitikilepa pade ali-kitame Berekaiane mana Sekaraia tobou losu yapu keneke wia
tukaneya. Nipa eyata pakeke tobou losu yapu olege takoa tipi tane yapu luku-pala lodo yoai
tane walaita eniyata pakeke Berekaia wia tukaneya.
36
Kini kaua-mikitame toma-kala
nekeneke nami wiapa Akolaliyo kabe koukoa kiwi kibu moono, nepio wa Yesuyo oka.
Yesuyo Yerusaleme Mama Motokome Akenemo
(Luke 13:34-35)
37
Ae, Yerusaleme ta neke wida pitikoi yename Akolaline agale to awea akane ali-kiti wia
tukama-kala nekeneya. Ni neeke wida Akolaliyo moa wetekane ali-kitika kueme ka ua
tukakala tane toa opii pa tiki. Nitaneyake ogadame-kiti idini-kiti pawena keneke luumoa
pitikou toane tekene neke wida pitikoi yene pawe toane moadene tokounake ko ite katite toa
wakala tokoina.
38
Ae, Yerusaleme ta nepa tumu tokamotoa neke wida pitiki yene to a
pootapeoi.
39
Ae, neme no papete wa enekileka toamoo. Nipa no i agopa Ali Muno patu
kautakoa kama nokono, Akolali neme wedoa mekamene-ye wa no wete wa makutukoa
moameneyakepa anu lene timini wa pade enamoo wa Yesuyo Yerusaleme ta-pala oka.
Matiu Matiu
<<
23 23
>>
Matiu Matiu
<<
24 24
>>
24
(Make 13:1-2, Luke 21:5-6)
1
Yesu tobou losu yapu tewitikoa pokaka one oya-lawe nekete ekete i tobou losu yapu
kue pawe keneke ekolo wianeya kako yapu-kiti ena wa okoli okome
2
wini wianeya kakoya-
kiti enekamene. Enika eniya latiane kue odeneka kibutukoa piameneya peya wia
tadekatapeneya tumu tokaneya pioo wa Yesuyo oka.
Tete Moatekoimo
(Make 13:3-13, Luke 21:7-19)
3
Yesu Olipe-pini tono waneke pome mepoka. One kidene eida paka witimoa mekale
one oya ali-kiti nekete ekete neme ina okanakalepa manipete taatekoa toko patu. Wipitia ta
patakale ne wakapea noateka tigotokalepa edeya wa adeka pipioo-pe wa okoli okome
4-5
eni
okounakale wete taatekameneyake pade ali-kitame anu ibini lede wedekoa nekete ekete
Keraisu taatekoane nukuno, noe wa ali atoa peya mati oa yotokoino, wedoa lene kia
nepikoa meamene.
6
Enipetepa u u wa poi toa kakoimo yakoa ni pade take poi tago wa
okoimo kugu yakoa toino, piti moameamene wane uku. Enilepa taatekoa namolo takoa
toatekoyake wipitia ta pade tigotokoa wete patamoo tokolo ni uku.
7
Nipa e ku yatename
poi tato wa kamoa poi te itakutukakala toi. Ni e ku tobou ali-kitike lukoa mekoi yatene ete
oto wa poi toa winali yoi. Eka kuka takeka kobu igi nome momani toa tokala too.
8
Enika
enilepa atoame mati opiademe namolo takoa mukiti nako toa keneya too.
9
Enipetepa pade ali-kiti kipala kotimi yotaneya meketepa tete takoa wia tukakoatino
toe wa dekoa moa eko yeneke lia aua poi. Nipa nopala odene ibini pedane yene tokale
tekete padeka padekata mekoi peya kipala kotimi yoa meoi.
10
Enipetepa ali atoa kainya
matiyame Akolalinele takoake wakete panagome panago moa poi te iane yenane yonoke pia
eka okata kotimi luutakutukoa mema poi.
11
Ni ali kainya matiyamepa Akolaline agale
akakuno, yakoe wa ali atoa peya mati oa yotokama poi.
12
Ele kule poanelepa ate toma
ponokale tokome ali atoa kainya mati wene mekanali yoma pokoinakale tewitikoa wakala
toi.
13
Nitoa kakolika nooke wene tugoa mea togakoi-kitipa toa motaneya mea kama poi.
14
Papetepa Akolaliyo ali atoa pawe toa talo tokome tokomo ta piko peyake mekoi-kitame
yakamotoa oa pupitikatapeoi. Nititikaneyakepa wipitia ta patoo wa Yesuyo oka.
Yerusaleme Yename Tete Moatekoimo
(Make 13:14-23, Luke 21:20-24)
15
Tobou losu yapu olege takoa tipi tane yapu luku kenekepa kitau oko wa okoiya
witakale enoi. Nipa Akolaline agale akane ago Danieleyo papete oa piane toa taatekoa tokale
enoi wa Yesuyo oka. (I boku wiane mekaku agome eya wane uku. Ina wiane mekakumopa
wene taneya meamene.)
16
Yesuyo nimo ootokoa eya wa oka. Enile taatekoa tokale
eneketepa eya tamene. Yudea take meki-kitipa nipa tono-kiti pake pake to a pitoa pote
paigakoa mepamene.
17
Yapu liti ko meapa kini yapu keneke pikoina mopameneya pa pitoa
pamene.
18
Ipe toa kawapa tigini mamina kotokoa pikana mopameneya pa pitoa pamene.
19
Ae, mati kakene atoa-kitika mati adu tanikakoa mekoi atoa-kitika eni tete witaka-pete
manika edoa petoa pomotoa-pe.
20
Eni moatekoi tetedo kalepetaka pupu toameneya ko
meatekoi-peteka witakalepa manika edoa petoa pomotoa-pe. Dikane-pete witamomotoa ta
wa Akolali kowitoa kamene.
21
Dika dika toamene tete eni witakilepa itono tibuta
latitikaneyakeka toamokale-kiti too. Eni tete witatekaneyake naniko pade edikanele wa
witamoo.
22
Akolaliyo eni tete witama pomotoa yopikoa kaka pakedo teigamoo tokapa ali
atoa peya atutapeoi toka. Nitoi tokake one wa takoa motane ali atoa ela motokome tokome
pegene kakoa teigoo.
23
Enipetepa pade ali-kiti nekete ekete Keraisu ku nokono enoe, i nokono enoe wado
okolipa kapene agale eni ekete toino, yakameamene.
24
Kapene yename eya wa wini onoi.
Keraisu nuku wa oa Akolaline agale akama nuku wa kiwi oa yotokadete padele padele
telekole tokala toi. Nitikete Akolaliyo takoa motane ali atoaka tolopi toadete wili toa kakete
oyake nitamele toamokale wakala toi.
25
Enika enile wete taatekameneyake papete i agale eni
wene takapikuna.
26
Pade-kitamepa Keraisu enakagopa ali piamene ta ludu yako wa oino, yakoa
ponameamene. Ni Keraisu enakagopa yapu luku keika paigakoa meko wado okolipa eni
pade yakameamene.
27
No Ali Yatenane Oyago wakapeane nekenepa katiapale keleyo
piatapeko toane keleyo nokolu peyame enekete enetapeoi.
28
Ali tuaneya lomua kakata kego naki ini kiti odepeta koukoa note puka puka toa yaita
kawei wa Yesu oka.
(Make 13:24-27, Luke 21:25-28)
29
Enika eni tete witoa kawa peya tokale eni eni lou yomiyomu takoa tokene-kitika pa
toamoa too. A tibuke tagoi-kiti kotia pitoa too. Ni tibuke tele taneya mekiya moa peteka
peteka takoa too.
30
Nitoa kawa wipitikale eni eni Ali Yatenane Oyago noanu adekapa a
tibuke witoo. Nitikale ta piko peyake mekoi yatene ali atoa tumai keneya mekete komo ka ta
pitikoa kawa enekoli no Ali Yatenane Oyago wedo patu meane pa teleta toawineya nokolu
enoi.
31
Nika yeteka yukukataka anu papete takoane moopikou-kiti peya odeneka moa
obokamotoane tekene edelo ali-kiti moane wetekou. Nitikolupa a tibuke pu wa beta pikoa
kakomokale yatekete moa obotapeoi wa Yesuyo oka.
(Make 13:28-31, Luke 21:29-33)
32
Yomo piki witakole wene taneya meamene. Papete yeneneke page ka ua luno
pitikakolo eneketepa poto toko tokene-mene tigotatekolo toko wa wene tiki.
33
Eina toa
anume okounakale-kiti witatapekale eneketepa inakago wakapea noateko eni tigotokona wa
wene toi.
34
Etene nimini toatekomo ukuno, yakoe. Ipete meki peya wete tuutapeameneyake
kipala ina okounakale-kama taatekoa too.
35
Itono tibuta takoa pootapekolika anu agalepa
pa pia-kama kawoono, yakoa moamene wa Yesuyo oka.
Yesu Wakapea Noateko Oi
Padameka Wene Toamiki
(Make 13:32-37, Luke 17:26-30, 34-36)
36
Enika enile wipitia toatekolepa padameka ipeteka i lou pinika taatekoa too wa wene
toamiki. A tibuke meki edelo ali-kitameka wene toamiki. Akolaline mana noanumeka wene
toamuku. Atai Akolaliyo odene wene toko.
37
No Ali Yatenane Oyago wakapeane nokou-
petepa Noa einago meane-pete tanele too.
38
Noa meane-petepa ete yene paya nou toa
mekete nee ue eyake wene piitikaneya mea alime atoa moa atoa alike pote tokala taneya.
Nipa Noa tube ue dipi keneke pome mepokaleka
39
edikoa paya nou toa meaneya. Nitoa
mekoika kotikatapea ue atepea kaugu pokome toa atukatapeneya. Eina toa ali atoa paya nou
toa mekakoane no Ali Yatenane Oyago wakapeane nekene kotikatapeane nou.
40
Nipetepa
ali takuta ipe toata kakoita panago eida kamotoa Akolaliyo padena ago takoa moa poo.
41
Ni atoa takuta odenekata kawa kini witi ku kugutukoa kakoita pade atoa eida pa kamotoa
padena atoa takoa moa poo.
42
Nopa kini Ali Muno kotikatapeane wakapeane nouno,
wedoa lene kia nepikoa meamene.
43
Eya waneka ukuno, yakamene. Yapu pinagome-kiti
onekeya kode monatekago likonu ipete noo wa wene too tokapa yapu bulukoa kode agome
onekeya monamomotoa tokome atu piameneya wedoa yopia kawoo toka.
44
Eina toane no
Ali Yatenane Oyago kotikatapeane nouno, wedoa lene kia nepikoa meamene wa Yesuyo
oka.
Pupu Ali Takutame Pupu Takakete Tanemo
(Luke 12:41-48)
45
Tobou agonole-kama wedoa wene toa takako agoke ukuno yakamene. Tobou
agome dikane ago-pala eya wa oa too. One ali atoapa neme yopikamene wa oapa kini nee
eya noatekoi toa oneme-kama tatia lawetekamotoa moa kakoo.
46
Nitimotokome ta padeka
pome mea wakapea nokome enekale oneme tamene wa oa pokanakaledo pa takama
pekedekale enekomepa ke wa one kolotini natekoa too.
47
Nipa onekeya peya neme-kama
yopikamene wa moa kakoo. Enipa niminimo uku.
48-49
Tobou agonole takoa potokako
agomepa nipa eya oa too. Tobou ago wete wakapea noamoo wa oapa one odene pupu
yene layo toua wia ni bia ue nokoa pia leau akeneya mekoi ali-kiti-pala opia mekome bia ue
eya nokoa pia too.
50
Paya nou toa nitoa mekaka tobou ago kotikatapea nokome
51
einago
dika dika toamene tete meoo. Nitoapa wene takuta pianeya meki yene-pala opia mea kawati
wa kiwi pakeke moa mekoo. Eidapa ali atoa komo ka ta nina toa pitikoa kawamoi wa
Yesuyo oka.
Matiu Matiu
<<
24 24
>>
Matiu Matiu
<<
25 25
>>
25
Tuatoa Noi Kakoake (10) Pedoa Akenemo
1
No Ali Muno wakapeane nokou-pete Akolaliyo ali atoa pawe toa talo tokome tokale
ooyametekuno, yakamene. Noi kakoa (10) tuatoa-kitame eya taneya. Panagome one tu pia
kakene atoa moademe nokale ekete einago kotua patoe wa kini laboke olipe ku page peia
kapetekoa aua pokala taneya.
2-4
Ko kakoa (5) tuatoa yatenamepa aua kelea paya nou toa pa
pekete naniko peiatekoi pagepa mete padeke aua poameneyake e pade ko kakoa (5) tuatoa
yatenamepa paya nou toameneya naniko peiatekoi pagepa mete pade-mene kapetekoa aua
pokala taneya.
5
Einago noateka teigoa pekete kago keteponoke nepia kakoiyake wete
noamokale atu togoikoa mea einaka piimu taneya.
6
Pitikakoa likonu panagome kayo oa
kakome okome atoa moatekago i nekedekono, kotua wete poe-ye wa kayo oa kakomo
yatekete
7
kamoa kini labo moa nodoka nodoka tokala taneya.
8
Nititikoa ona ko kakoa (5)
paya nou toa nokoina tuatoa yatename ekete oya, tone labo pene tu ademe tokono, kini
olipe ku page pade manoe oikoli ekete mena.
9
Toto peyane labo udukateko toa kotuke aua
noamokoo patuno, kini winika tuku toa sisoake olipe ku page topo topoe wa okoi.
10
Poe
wa okoli poadete pokoika atoa moatekago nekeneya. Nokale paya nou toameneya nepikoa
kakene tuatoa-kiti einagono atoa motokadete toge kikakane yapu one-pala opia pote
mepaneya. Nitikoli panago nome kago ketekitikaneya.
11-12
Nitaneyake ona tuatoa yatene
wakapea nekeneya. Nekete ekete kamo koniyali toto i note kakono, kago pekanamene wa
kayo okoa kakoli okome kiwi wene toamuku wa pekanameneya wa Yesuyo oka.
13
Nimo
ootokoa okome atoa moatekago nokome tane toane noka edikoane kotikatapeane
wakapeane nouno, wedoa lene kia nepikoa-kama kamene wa Yesuyo oka.
Pupu Ali Tebolome Tobou Agono Kue
Pikoa Metekakete Taneleke Pedoa Akenemo
(Luke 19:11-27)
14
Akolaliyo ali atoa pawe toa talo tokole ooyametekuno, yakamene. Panago ta
tetemada poademe kakome one pupu takane ali-mene one kakuta noe wa kayo oa moapa
one iya-kiti kime pikoa metekamene wa onekeya tatikamu taneya.
15
Nitikomepa panago ko
kakoa tawisini (5,000) kina mea ni panago tatigi kakoa tawisini (2,000) kina mea ni panago
odene tawisini (1,000) kina mea taneya. Enipa kini pupu takoukete tele tane kotuke
tatikamotokome pekeneya.
16
Pokale ko kakoa tawisini (5,000) kina motokanakagome eni
kueme tine pikoapa wa ko kakoa tawisini (5,000) kina tokoo motokaneya.
17
Eina toa tatigi
kakoa tawisini (2,000) kina motokanakagome eni kueme tine pikoapa wa tatigi kakoa
tawisini (2,000) kina tokoo motokaneya.
18
Odene tawisini (1,000) kina motokanakagomepa
nitameneya one eina metekana kue moa pome itono wetia potipipaneya.
19
Kue pinago ta tetemada pome mea kawa oto wa wakapea nokome okome auna kue-
kiti pikoa metekakete edele-kala takakoi-pe wa pitia yatekale
20
ko kakoa tawisini (5,000)
kina motokanakagome one namolo motokana toa peya ete meetekoa eina nine kueme tine
pikoa motokane ko kakoa tawisini (5,000) kinaka metaneya. Metekome okome Ali Muno
nemenapa no ko kakoa tawisini (5,000) kina mea pokana. Wa ko kakoane tawisini (5,000)
kina tokoo motokakouno, ina wa metaneya.
21
Nitikale one Ali Munagome motokome
okome ouo, anukulepa neme wedoa takadeko. Enilepa nateleke neme wedoa takadekono,
opa padele-kiti tubele mati takatekole ne yameou. Opa neke Ali Muno nopala kolotine
meatoane uku wa one kei pia kakeneya.
22
Nitaneyake tatigi kakoa tawisini (2,000) kina
motokanakago nokome okome Ali Muno nemenapa no tatigi kakoa tawisini (2,000) kina
mea pokana. Tatigi kakoane tawisini (2,000) kina tokoo motokakouno, ina wa metaneya.
23
Nitikale okome ouo, anukulepa neme wedoa takadeko. Enilepa nateleke neme wedoa
takadekono, opa padele-kiti tubele mati takatekole ne yameou. Opa neke Ali Muno nopala
kolotine meatoane uku wa tobou agome one kei pia kakeneya.
24
Nitaneyake odene tawisini
(1,000) kina motokanakago nokome okome Ali Muno nekeya kamu tokolo meke eya toko.
Panagono ipe neme padeyaka matamokoyake one eni ipe kakoya nee neme wakoa mokala
toko. Wa panagome matane yomopa eni yomo ku neme kotia moa nako.
25
Nepa dikane
agono wene tekene piti tokale mekene nekena kue itono wetiane kaukalogakou. Nekena kue
ina wa ete metekale
26
Ali Munagome kikoa okome okome nepa kote au keneya moa loyo-
kala kako agomeke nooke eya wa ko okana. Panagono ipe padeya matamekeneke one eni
ipe kakoya nee wakoane moane wa panagome matane yomopa ku kotiane moane noane
tuku wa neme nooke ko okana.
27
No nitane agono kuepa bage pikapikinakeya, dekale
waka-pe. Bage pikapoo tokapa anu kueme tine pikane kue-pala oto mou toka wa kikoa
ootokoa kakome
28
one ete pupu ali-kiti-pala okome one kue moe. Mootokoapa noi kakoa
(10,000) kina pikoa kako ago metekapoe wa akeneya.
29
Nitaneyano, Akolaline peku wedoa
nakagopa nipa Akolaliyo one peku wedoa lawetema pokale kamo toma pou toa etene
wedoa toma poo. Akolaline peku alekoa noma pokagopa nipa onekeya nateyaka eniya peya
Akolaliyo takoa wa mootapeoo.
30
Pupu takoa potokako agopa yomiyomu dika dika
toamene take moa pitikamotoane uku. Eidapa kime kolukoa ali atoa komo ka ta nina toa
pitikoa kawamoi wa Yesuyo oka.
Wipitia Ta Patakale Ali Yatenane Oyagome
Ali Atoa Takoa Enekome Oatekamo
31
No Ali Yatenane Oyago a tibuke pone meane wakapeane nekenepa nipa anu edelo ali
peya-pala opiane pa teleta tootapeneya nou. Nitikene ali atoa talo tekene meatekou walaike
yati yati toologane walaike pone mepou.
32
Nitikolu anu leneke ta padeka padekata mekoi
yatene peya koukoa note-kama kanoi. Note kanokolipa talo tokagome-kiti sipi sipi kaika
meme kaika eka okata takoa moa kakako toane tou.
33
Nipa sipi sipi kai tetepo takakou ali
atoa anu nimini yono lono moane kakoane meme kai tetepo takakou ali atoa ewa yono lono
moane kakoane tou.
34
Nititikoanepa no Ali Muno nimini yono lono kakoi yene-pala ekene
Agetaiyo pewe wia kako-kiti kipa one talo toko take menoatino noe. Eni taapa Akolaliyo
itono tibuta latika-peteka kini wa nodokakapianeyano, noatino noe wane ou.
35
Nipa kime
eya toma nokoinake ni uku. Kobu tokale mekolu enekete nee moa lawetekoina. Ue nodo
tokale mekolu enekete ue nomoa lawetekoina. Mone pade take ago nokounake kini yapu
nee noano, noo wa no makutukoa motokoina.
36
Mamina kawameneya mekolu enekete i
mamina kawano, ina wa kini mamina metekoina. Yene tokale pikolu mama moa
auapenokoina. Po yapu pitikolu weye akadete ugu nokoina wane eni yene-pala ou.
37
No Ali
Muno agome nimo okolu yatekete eni wene kiyo akeneya mekoi yename eya wa oi. Ali
Muno neme eni oka toapa manipete kobu tokale mekale enekete nee moa lawetekoto-pe.
Manipete ue nodo tokale mekale enekete ue nomoa lawetekoto-pe.
38
Manipete mone pade
take ago nokale enekete moa makutukoa motokoto-pe. Manipete mamina kawameneya
mekale enekete kawateko mamina ina wa metekoto-pe.
39-40
Yene taneya pikataka po yapu
pitikataka manipete ugu nokoto-pe wa yatekoli no Ali Munoyo ekene widikoa anu
ponopeneya meane ali atoa auapekoipa nopala eina dekoa auapekoina wane ou.
41
Nititikoane kakene anu ewa yono lono moane kakakouna ali atoa-pala eya wane ou.
Akolaliyo wakome wakene yene no tewitikoa poe. Setanuka one edelo ali yateneka pote
mepomotoa nodokakapiane toe mine mepoatino poe. Kime eya tokoinake ni uku.
42
No
kobu tokale mekolu eneketeke nee moa lawetamokoina. Ue nodo tokale mekolu eneketeke
ue nomoa lawetamokoina.
43
Mone pade take ago patukakolu eneketeke no makutukoa
moamokoina. Mamina kawameneya mekolu eneketeke kawatekou mamina moa
meamokoina. Yene tokale pikoutaka po yapu pitikoutaka ugu note auapenamokoina wane
ou.
44
Nimo okolu ekete ae, Ali Muno manipete ne kobu tokale mekale eneketeke nee
wanakoto-pe. Manipete ue nodo tokale mekale eneketeke ue nomoa lawetamokoto-pe.
Manipete ne mamina kawameneya mekale eneketeke kawateka mamina ina wa meamokoto-
pe. Manipete ne mone pade take ago patukakale eneketeke makutukoa moamokoto-pe.
Manipete ne yene taneya pikataka po yapu pitikataka ugu note auapenamokoto-pe wa okoli
ekene
45
anu ponopeneya meane ali atoa auapeamokoipa nipa nopala dekoa eina
auapeamokoina wane ou.
46
Nitikoina wane wakou-kiti poane take pote mekete dika dika
toamene tete moi. Nitikoiyake wene kiyo akeneya mekoi-kiti pa mea kama poi wa Yesuyo
oka.
Matiu Matiu
<<
25 25
>>
Matiu Matiu
<<
26 26
>>
26
(Make 14:1-2, Luke 22:1-2, Yone 11:45-53)
1-2
Yesuyo einaka einamo oa peya takatekoapa one oya-lawe-pala okome okome edelo
ago patukane wa ibini iki toge kikilepa patepeyo toi. Enipa nimini uku-pe. Enipetepa mone
pa yename no yomo lekaneyake wia dekoa tukamotoa panagome Ali Yatenane Oyago no
moa meoo wa Yesuyo oka.
3
Einapetepa eya yene Akolalike lodo yotokoai tane tobou ali-
kitika Yu yenane totono pine to a olaukane ali-kitika ete Kanosolo ali-kitika koukoapa ako
odene mekome lodo yotokane tobou ago Kayapasene yapu ponete meponaneya.
4
Eida
ponete koukoa meketepa Yesu paigakoa moa wiatekoi oi pedoa pikete ekete
5
pa ali atoa
toto-pala wene poa wili walai wa kakayano, tone toge kiko-petepa dekoa moamato wa oa
tukaneya.
Yesuno Wagoke Padeya Ka lono Taneya
Pekoa Yotokanemo
(Make 14:3-9; Yone 12:1-8)
6-7
Yesu Besani take kedime nakeneya mekanakago Saimone einagono yapu meka. One
eni yapu mekome nee nakaka pade atoame padeya ka lono taneyapa epetane kueme latiane
mete keneke mekoa aua nome Yesuno wagoke pekoa yotokatapeka. One eni ka lono taneya
topo toa moapa kue ako mati wetekoa motokaneya.
8-9
Einatoame tokale enekete Yesuno
oya ali-kiti einatoa-pala wene pokete ekete ina pekoa yotokakilepa pale tokanano, edeya
weike toka-pe. Inakeyapa totome moa topo too tokapa kue tubeya moa ponopene ali atoa
tatikoo toka wa ko oa kakoi.
10
Nimo okoli yatekome Yesuyo okome i atoane wene dekolo
potokaki-pe. Einapa anu koniyole mati takakana.
11
Ponopene ali atoa enabuna kiwi pakeke
mekala tikino, no pade kiwi pakeke pa tekei meku.
12
Ina ka lono taneya anu tiginike pekoa
yotokakanapa no tuaneya piateku tigotokolo tokome nina nodokoa takapikana.
13
Nitikana
tokolo eya wane uku. Anukumo ta piko peyake oa pupitikama peketepa i atoame i
takakanakamoka oa pupitikama poi. Nipa ta piko peyake mekoi yename one wene taneya
memotoa nitoi wa Yesuyo oka.
(Make 14:10-11, Luke 22:3-6)
14-15
Yesuyo nimo okale one tuku kakoa (12) oyali-kiti pade Yudase Isekariose
einagopa Akolalike lodo yotokoai tane tobou ali-kiti mekoita pokome okome Yesu einago
kini yonoke moane piouno, kue edela meoi-pe-kale ekete nipa silepa kue lene padeka kabe
kakoa (30) meoono ta wa okoli
16
einapete laigoa Yesu moa metekome toatekale wene
kibutuma yakeneya.
Yesu One Oya-lawe-pala Opia Mekome
Toge Nee Nakenemo
(Make 14:12-21, Luke 22:7-14, 21-23, Yone 13:21-30)
17
Yu yename mono mono wamene palawe wane-kiti yoatekoi oi nokale Yesuno oya-
lawe one mekata nekete ekete edelo ago patukane wa ibini oko toge nee maida nodokoa
piatoa-pe wa okoli okome
18-19
Yerusaleme ta panago wini meoono, eya wa yatekapoatino,
poe. No Yesu wipitikene toateku tigotokolo tekene anu oya-lawe-pala opiane mekene toge
nee nouno, oyake wida nonou-pe wa yatekapoe wa wetekaka. One eni okana toa pote
yatekatekoa kini toge nee eya eida einagono yapu nodokapianeya.
20-21
Ta likaka Yesu one oya-lawe-pala eida opia mekome toge nee nakome okome
etene nimini ukuno yakamene. Kiwi padame no-pala poi te iane yenane yonoke moa pioo wa
okale
22
odene odene wa mekoi peyame ete yatekete ekete wini okolepa noanume
toatekumo eke oko-pe wa wene keda toologaneya mekete yakakala tokoli okome
23
nopala
odene okolo kagonoke nee moa tadoata nako agopa no moa meateko ago too.
24
Nipa
Akolaline bokuke Ali Yatenane Oyago nopala eni toatekamo papete wia mekapiane toane
taatekoane tuou. Ae, no witikamotoa moa meatekagome dika dika toamene tete moo. Eni
tete moamademe tokome einago opiameneya too tokapa nipa epetoo tokake opa ae wa
okale
25
one moa meatekago Yudaseyo Yesu-pala okome neme wini okagopa no patu-kale
okome e eno, nimini oko wa Yesuyo oka.
Yesuyo One Oya-lawe Palawe-pala
Gerepi Po Ku Ueta Lawetekome Akenemo
(Make 14:22-26, Luke 22:15-20, 1 Korine 11:23-25)
26
Eni nee noa mekete Yesuyo palawe wane moa Akolali-pala ke wa popimotokome
one oya-lawe tatikamu tokome okome ipa anu tiginino, moa noe wa moa laweteka.
27-
28
Nititikoapa gerepi po ku ueka meteke mekaneya katekamoa Akolali-pala ke wa ootokoa
okome Akolaliyo oi pedoa pikana toane kadimo uku. Ipa anu kamateno, ali atoa peya mati
kini toma pokoi poaneleke Akolaliyo po letu mekakana keetapeane agopa takoukenepa anu
kamate ponamotouno, kiwi peyame iya moa noe.
29
Nimini ukuno, yakamene. Atai
Akolaliyo talo toko take kipala opiane mekene gerepi po ku ue weneya wa moane nouno,
papete pade wa nakileka toamou wa Yesuyo oka.
30
Nitoapa lo pade oomoteketepa Olipe-
pini tonoke pote witapokoi.
(Make 14:27-31, Luke 22:31-34, Yone 13:36-38)
31
Olipe-pini tonoke pome mekome Yesuyo okome opi likonu kiwi peyame no wawa
tia tadatapeoi. Nipa Akolaline bokuke nopala eni toatekoileke panagome papete eya wa wia
mekapiane toa taatekoa toi.
No Akolaliyo sipi sipi kai-kiti talo tokago witikolu one sipi sipi kai-kiti tia tadoa
pootapeoi wa Akolaliyo oa piane toa panagome wia mekaneya.
32
Eina wia mekapiane toane taatekoane tukolu Akolaliyo moa kamotokakalepa kiwi naniko
nomotoane no namolo takoane Galili take pone mepou wa okale
33
Pitayo okome i ali
peyame ne wawa tia tadatapekolika noanume ne wawane poamou-kale okome
34
nepala i
ukumodo yakamene. Opi likonu ali ogadame ka wete wameneyake neme no i ago wene
toamuku wa tebolo-peta oade toko-kale okome
35
ne witikete nopala dekoa witikolika ne
einago wene toamuku wane wawamou wa okale ete peyameka eina okana toa ootapekoi.
Yesuyo Gesemani Take Kowitikome Akenemo
(Make 14:32-42, Luke 22:39-46)
36
Yesu one oya-lawe-pala Gesemani wa ibini akene take opia pome kakome okome
no yeka tutu pone kakene kowitipukuno, ita nepia meamene wa ootokoapa
37
Pita Sebedine
manata-pala aua pokome ela matiyame tuaneya tepene-pala mama mati motaneya poka.
38
Pokome okome no wene kedame tukakolo tuadene meku. Mugili-pala topelekono, tone
ita opia mekete nepikoa meatoane uku wa oomotokomepa
39
nami-takakoa eko keneya
kidene pome itonoke aua pitalogoa kowitikome okome atai meteke noateku ue enekupa no
tete moatekulu tokono, neme ete moa pedekamedekalepa nitikamene. Nipa anu wene pikule
toa wane ekene wamukuno, neke wene pikole tou wa kowitimotokome
40
one oyali-mene
mekoita wakapea pokome enekale atu pia meadekoi. Nitadekoli kamotokakome Pita-pala
okome lou pini odeneka nopala lene kia nepikamele toamoko-pe.
41
Setanuyo kiwi likoa
enekayano, lene kia mekete kowitamene. Lene kiane nepiane meou wa wene pikiyake tigini
popeyo noamokolo atu wini pia meadiki wa Yesuyo oomotokome
42
kutu keneya taku
takoapeta pome kowitipokome okome Atai neme no moateku tete ete moa pedekamele
toamokalepa nipa eni tete mootapeou wa kowitimotokome
43
wa wakapea nokome enekale
pa atu pia meadekoi. Atume moa ma leou takakale pitakoi.
44
Nitadekoli eko keneya wa
pokome one namolo kowitikanakamo tebolo takoa kowitimotokome
45
one oyali-mene
mekoita wa wakapea nokome okome pa koome tuaneya mekete atu-kala pia meki-pe. No
Ali Yatenane Oyagopa Akolaline agale tagoa toamiki yename wimotoa moa meateko ago ku
nokono,
46
wete kamokoa kawe. Kotua pekete pato wa oka.
Yesu Dekoa Motanemo
(Make 14:43-50, Luke 22:47-53, Yone 18:3-12)
47
Yesuyo nimo oa kakaka one tuku kakoa (12) oyali-kiti pade Yudase wete eina noka.
Nokale ali peya mati koukoa kepete tue layo katekamo katekamo toa obomoa nokoi. Nipa
Akolalike lodo yotokoai tane tobou ali-kitameka Kanosolo ali-kitameka Yesu einago dekoa
motokapoatino poe wa wetekakoli nokoi.
48-49
Wetekakoli nekete Yudase Yesu kakata wete
nome awa Tikisago wa ootokoa Yesu nunu oka. Enipa papete Yesu dekoa monatekoi
yene-pala oi pedoa pikana toa toka. Nipa one pone nunu opokou agopa Yesu eni toono,
dekatapea moamene wa okana toa toka.
50
Nitikale anu oya edade noko-pe wa Yesuyo
okaka Yudase-pala opia nokoi ali-kiti one kakata note dekoa monokoi.
51
Nitikoli Yesuno
oyali pade eniya liti kakome panago wiou wa one kepete tue witimoapa panagono kapidi
pine takoa pitikaka. Einakagopa ako odene mekome Akolalike lodo yotokane tobou agono
pupu ago.
52
Nitikale Yesuyo one oyago kikoa okome okome panagome kepete tue eya moa
panago ka wa tukakalepa oneka kepete tueme ka wa tukoino, neke wini kepete tue wete lua.
53
Opi agetai kowitikene ekene edelo ali ege egeta wakala kadukoa no mekuta moa weteka-
ye wanedo kowitikolupa eni eni yakoa wetekoo. Enipa wene toameke ni toka-pe.
54
Nimo
wane kowitamele tokoyake Akolaline bokuke papete wia mekapiane toa taatekamedekolo
tekene enimo wamadene waku wa Yesuyo oka.
55
Einata einapete Yesuyo e oboa kakoi yene-pala okome kini kepete tue layo tigini-
pala nidikoa aua nikino, nopa kode ago tetepo takakete dekoa moadete niki-pe. Ta pataka
abuna kiwi kakakoane tobou losu yapu keneke keleyo olaukoane mekounake no eida dekoa
monamokoina. Dekale wakoti-pe.
56
Akolaline agale to awea akane ali-kitame papete wia
mekapiane toa taatekamedekolo ni tiki wa okale one oya-lawe peyame one tia wawa pitoa
pootapekoi.
Kanosolo Ali-kitame Yesuno Koiso Akanemo
(Make 14:53-65, Luke 22:54-55, 63-71, Yone 18:13-14, 19-24)
57
E yename Yesu dekoa moomoteketepa eya agono yapu ako odene mekome
Akolalike lodo yotokoai tane tobou ago Kayapase einagono yapu aua pekeneya. Einago
Kayapasene yapu eya ali-kiti Yu yenane totono pine to a olaukane ali-kitika Kanosolo ali-
kitika wete ponete koukoa meponaneya.
58
Kini koukoa meponaneta Yesu aua pokoli Pita
kutu mati kawatati toma nome tobou agono kela pawe patukoa einagono pupu takane ali
atoa pakeke nome menaneya. Yesu-pala tokale enoa togademe ni noka.
59
Eida Akolalike lodo yotokoai tane tobou ali-kitameka ete Kanosolo ali peyameka
Yesu wia tukatekoi oi pedoa pikete ekete eya tato. Yesu i agome padele poanele tokale
enekoo wa kapene wakatiki ali-kiti tuku toa moato wa tuku tokoa kawa
60
moa kakakoli dika
dika wa kapene wakaneyake one wia tukatekoile pade piameneya. Nitaneyake alita takuta
nekete ekete
61
Akolaline wikakane tobou losu yapu oneme ke aweane tadekatekoane wa ta
tebolo-peta lia patakale eni-mene moane awitikakoane wa wiou wa okale yatekoo wa okoli
62
ako odene tobou meane ago kamokakome okome neme okale yatekoinakamo eni akoa
ikino, neme pademo topo takoa enike oo-pe wa okale
63
agale wametekoa pa kakeneya.
Nitikale ako tobou agome okome okome pa mea kama pokago Akolaliyo yakakamotono,
nepa one mana Keraisu tadekalepa wete a-na wa okale okome
64
nimini wini oko. Kiwi
peya-pala ukuno yakoe. Naniko no Ali Yatenane Oyagopa telekole-kama toko ago
Akolaline nimini yono lono kawane tibu wedo patu meane wakapeane nokolu enoi wa okale
65
ako tobou ago pinali one kakene mamina tiawea iyatapekome okome oyakeno, i agome
Akolali-pala taumada toa okolo tone kaleme yatekono, i agome toka poanele dika dika wa
akoa omotoa pade ali-kiti totome wa tuku toateko toa mena. Akolali-pala taumada toa okale
kime yatekoinano,
66
opa i ago-pala edele tato-pe-kale ekete i ago wia tukamedekona wa
topo takoa akeneya.
67-68
Nititikoa one lene timinike tekelipu toa yotokoa yumili mutoa pia wia taneya. Wa
pade ali-kitame kala witikete ekete Keraisu nepa teyo witikato-pe. Yakoono, to awea wete a-
na wa tea agale oa kakeneya.
(Make 14:66-72, Luke 22:56-62, Yone 18:15-18, 25-27)
69
Nitoa kakoika Pita akolono pomale meaneya pupu atoa pade Pita mekata nokome
okome neka Galili Yesu-pala opia yake toka wa onokale
70
e yene peya kakakoa okome
mena, neke wini oko agale yakamuku wa oomotokome
71
kago keteponoke pome kakale
pupu atoa padame enetekoa eniya liti kakoi yene-pala okome okome i agopa Nasarese
Yesu-pala opia yakago-kale
72
Pitayo okome agetai tia neme eni okagopa enamuku ago wa
akeneya.
73
Wa nani keneya eniya liti kakoi-kiti one kakata nekete ekete nepa Galili yename
iki toa okono, Yesuno oya-lawe-pala opia yakago tadeko-koli okome
74
kapenedo
wakadekolupa Akolaliyo no kibu momotouno, Akolaliyo yakakamotoane nimini ukuno, kini
wini iki agopa wene toamuku wa oa kakaka eina eina ali ogada ka oa kaka.
75
Nitikalepa
Yesuyo eya wa okana ali ogada ka wameneka neme no einago wene toamuku wa tebolo-
peta akoa wawade toko wa okana wene ponokale Pita akolono pome komo ka ta pitikoa
kapaneya.
Matiu Matiu
<<
26 26
>>
Matiu Matiu
<<
27 27
>>
27
Yesu Pailaseke Aua Pekenemo
(Make 15:1, Luke 23:1-2, Yone 18:28-32)
1
Podolikama ta patakale Akolalike lodo yotokoai tane tobou ali peyameka ete
Kanosolo ali-kitameka Yesu wia tukatekoi oi pedoa piitikoa
2
one yonoke kapa po
kakamotekete ta yopikago Pailase mekata aua pote kakapaneya.
Yudase Tukome Tuanemo
(Aposelo 1:18-19)
3-4
Yesu wia tukatekoi oi pedoa piadekoli yatekome one wimotoa moa metekanakago
Yudase yaame tukome eya topaneya. Akolalike lodo yotokoai tane tobou ali-kitika ete
Kanosolo ali-kitika koukoa mekoita pokome okome padele toamene ago wimotoane pa
puputuane moane metekouna. Poanele eni tekene tadekuno, kinike silepa kue lene padeka
kapidi kakoane (30) motokouna wa kini einoe wa ete metekale ekete enipa tone pupu
menano, neke pupu toko-la wa paya nou toa kakoli
5
eina kue tobou losu yapu keneke
pitikamotokome pome po nopaneya.
6-7
Nitaneyake Akolalike lodo yotokoai tane tobou ali-
kitame eina kue lene wekotoa motekete ekete ipa ali wia tukateko kueno, tone losu pupu
toadete oyake moamato wa wene kibututukoa mekete eya taneya. Mete latia tane agome
kamo tu a moai toake wakenetapa eina kueme topo toa motekete ekete mone pade ta kawa
note mea tukoi yene i itonoke oloyo toai tato wa topo toa motaneya.
8
Nitaneya tokome
opika eni itonopa lokeyo itono wa ibini ikiya.
9
Enile teketepa Akolaline agale to awea akane
ago pade Yeremaiayo eya wa papete oa piane toa taatekaneya. I to aweane uku agopa
Iserele yename silepa kue lene padeka kapidi kakoa (30) wetekoa moato wa oi pedoa
pianeya.
10
Eni kuemepa mete latia tane agome kamo tu a moai taneta topo toa motaneya.
Nipa Ali Muno Akolaliyo nopala oka toa taatekaneya wa Yeremaiayo oa pianeya.
(Make 15:2-5, Luke 23:3-5, Yone 18:33-38)
11
Yesupa ta yopikago Pailase einagono leneke kakale Pailaseyo pitia yatekome okome
nepa Yu yene peya lukoa meki tobou ago-pe-kale okome nopa einago wa wini okana wa
akeneya.
12
Nitaneyake Akolalike lodo yotokoai tane tobou ali-kitameka ete Kanosolo ali-
kitameka i agome dika dika wa akoa okolika Yesuyo pade agaleka wametekoa pa kakeneya.
13-14
Nitikale enekome Pailaseyo okome opa nipa padele padelepa neme tanemo-kala akoa
ikino, neke yakoa edemo oo-pe-kale Yesuyo pademoka topo takameneya agale wametekoa
pa kakale ta yopikago wene kainya mati pia kakeneya.
15
Edelo ago patukane wa ibini akene toge oi ponokale-kama ta yopikago Pailaseyo
eya tokala taneya. Yu yenamepa po yapu pitane ago pade po kotokoa one yapu wetekaka
wa takoa okoi agopa Pailaseyo po kotokoa wetekakala taneya.
16
Einapete eya ago Barabasi
po yapu pitaneya. One poanele tanemo ta piko peyake oa pupitikatapeneya.
17
Ali atoa
Pailase mekata koukoa note kakoli Pailaseyo one tanele tokome okome mani ago po
kotokoane wetekakamotoa iki-pe. Barabasi-pe, Keraisu wa ibini iki agopa Yesu-pe wa
akeneya.
18
Nipa e yename Yesu-pala aua nikilepa pa puputua wene pokete ni tokoi wa
wene tokome akeneya.
19
Nika one koiso yakoa meateka walai witipitoa mekakoa one
natoname agale wetekakome okome wini nami kawamene ago-pala padele tikileka toamoa
wane uku. Ete pia pulete enekounakaleke nopa lata potokakome wene keda mati tokolo
mekene ni uku wa pubu oa wetekaneya.
20
Nitaneyake Akolalike lodo yotokoai tane tobou
ali-kitameka ete Kanosolo ali-kitameka e oboa kakoi yene oa kamotokakete ekete Pailase-
pala eya atoe. Barabasi po kotokoa wetekakoano, winago Yesu wia tukakamotono ta wa
atoe wa oa kamotokaneya.
21
Nitikoli Pailaseyo e yene pitia yatekome okome mainago po
kotokoane wetekakamotoa iki-pe-kale ekete Barabasi wa okoli okome
22
Keraisu wa ibini iki
ago Yesupa edekamene wa iki-pe-kale ekete winago yomo lekaneyake wia dekakamotono
ta-koli okome
23
one poanele edele taneyake iki-pe-kale agale telo oa kamotokoa kakete
ekete winago yomo lekaneyake wia dekakamotoa ta wa awitikoa tika tika taneya.
24
Nitikoli
kini eni wene pilikoa kawikamotoa wili toake poi edikoa kamotokakaya wa wakome eya
taneya. Kini lene yoto kakome ue nomoa okolo kagonoke pekoa pia yono tadakome
okome i nami kawamene ago wia tukatiki pedoa pikile kote tokolo wakene tukuno, enoe.
Kini wia tukapoe-kale ekete
25
totome poanele tadekolopa nipa Akolaliyopa winago kamate
yotokake nami wia kibu motikilepa totoka tone mati-kitika oyake kibu moma pomotoa oko
wa okoli
26
Pailaseyo Barabasi neke yapu pa wa po kotokoa wetekaneya. Nitoapa Yesu po
wapime wiamene wa one poyo yene metekale witikoli yomo lekaneyake wia dekapoatino,
poe wa nitatekoi poyo ali-kitike metaneya.
Poyo Yename Yesu Paya Tetepo Takanemo
(Make 15:16-20, Yone 19:2-3)
27
Poyo ali-kitame Yesu moomotekete Pailaseyo ta talo toa meka yapu aua pote
kakapaneya. Nitoapa ete poyo ali-kiti peya one eni kakata koukoa mootokoa eya taneya.
28
One kakene mamina kotokoa piapa kikome kiane mamina petene pade moa kakaneya.
29
Nititikoa kagani kakene po ludu moa makatikoa one wagoke lobutukakoa ni tauwe wata
wakoa moa one nimini yonoke laukakoa neuwe tukupia mekete ekete Yu yene lukoa meki
Ali Muno ne mea kamene wa paya tobou ago tetepo takoa kakeneya.
30
Nitoapa oneke
tekelipu toa yotokoa one yonoke laukakoina tauwe wata odomoa one tobou wia taneya.
31
Nititikoa one tokoo kakakoina mamina petene kotokoapa one namolo kakene mamina wa
moa kakamotekete yomo lekaneyake wia dekadete aua pekeneya.
Yesu Yomo Lekaneyake Wia Dekoa Tukanemo
(Make 15:21-32, Luke 23:26-43, Yone 19:17-27)
32
Poyo yename Yesu-pala eni aua poadete pekete Sairini take ago Saimone kotukete
ekete i ago wia dekateko yomopa neme aukoano, noo wa dekoa moa aukaneya.
33
Nitoa
pote Gologosa wa ibini akene take witapeneya. (Gologosa tone agaleke eketepa ali wago
wa ekete oko.)
34
Gologosa take eni aua pote witakete gerepi po ku ue-pala kou tane
yobotonota eletekoa lawetekoli mitua enetekoa noamademe wakeneya.
35
Nitikale yomo
lekaneyake wia dekatekoa kakete one kakene mamina-mene tatiato wa tadu tootokoa tatite
taneya.
36
Nititikoa witipitoa mekete nepikoa meaneya.
37
Nitaneyake one wago pitia lekane
yomo munoke pipiake eya wa wia mekatekoa dekaloganeya. I ago Yesupa Yu yene lukoa
meki tobou ago. Enipa Yu yename one koiso akoa akenemo eni wia mekaneya.
38
Yesu wia
dekaketepa kode agota takuta eka okata yomo padetake wia dekaneya. Nipa panago
Yesuno nimini yono lono wia dekoa padena ago one ewa yono lono wia dekoa taneya.
39
Nitaneyake eida ponokoi-kitame tedu metekete ekete
40
beita, nepa tone tobou losu yapu
odepeta ke atapeanepa wa ta tebolo lia patakale eni luku wa wiou wa okanakago pinali neke
toa moa-na. Nepa Akolaline mana tadekalepa yomo lekaneya ludu ketipea ko a noo-na wa
tema ponokala taneya.
41
Eina toa Akolalike lodo yotokoai tane tobou ali-kitameka
Mosesene totono pine to a olaukane ali-kitameka ete Kanosolo ali-kitameka tea tedu
metekete ekete
42
i agome ete pade ali atoa toa motokoyake pinali one pade wa toa moamele
toamoko. Beita, i agopa Iserele yene lukoa meki tobou ago patu. One wia dekane yomo
ludu ko a nokale eneketepa i agopa Keraisu tadeko wa oneke wene tugoo.
43
I agomepa
Akolalike wene tugoane meku wa okano, Akolaliyo one toane mou wa wene piadekalepa
nitoo. Onepa Akolaline mana kaku wa okagopa Akolaliyo toa motokale enato wa tea agale
okala taneya.
44
Nimo okoi toa Yesu-pala odeneka wia dekakoina kode agotameka tea agale
okala taneya.
Yesu Tukome Tuanemo
(Make 15:33-41, Luke 23:44-49, Yone 19:28-30)
45
Lou mataike ponome kakaka (lou pini 12 kilokoke) ta peya likatapeneya. Lou pene
webokaka (lou pini 3 kilokokeka) ta pa likoa kakeneya.
46
Lou pene webokaka (lou pini 3
kilokoke) tadiya Yesuyo kayo telo ootapekome okome Eli Eli lama sabakani wa kayo
akeneya. Enipa anu Akolali anu Akolali neme no dekolo tewitikoa wako-pe wa okome
akeneya.
47
Nimo okale yatekete eniya liti kakoi-kitame ekete enipa Ilaida kayo okome toko-
koli
48
panagome teyapea pome ue takamoateka obi wane mopaneya. Mootokoapa kou tane
gerepi po ku uele tadamoa tauwe wata munoke togototokoa aua nokome mitumoa na wa
kabunuke pia lete lete taneya.
49
Nitikale ete-kitame ekete winile toameneya wa. Ilaidayo toa
monoko patu. Tokale enato wa pa eida nepikoa kakoli
50
Yesuyo agale wa telo ootapekome
one Yomini takoa pomotoa tukome tuaneya.
51
One eni tukakapa eina eina kuna tobou losu yapu keneke eya mamina Akolali meko
lono wa akene yapu luku olege toa ketekalogane mamina petenepa ete oto wa iyawea
tukaketikaneya. Itono-pala momani toa kakene kue-kitika ka utakutukaneya.
52
Tuane ali atoa
oloyo taneka peetapeneya. Peetapekalepa Akolalinele wedoa takama pote tuane yene
padeka-kiti kamotokaneya.
53
Wa naniko Yesu kamoa pokale kiwi oloyo taneka tewitikoa
Akolaline Yerusaleme take pekete ali atoa kainya mati mekoika pono yamepokala taneya.
54
Tobou poyo agomeka ete poyo ali-menameka pa eida nepikoa kakoli momani toa ele kule
toa kakale enekete ekee wa nenei motekete ekete etene i agopa Akolaline mana tadeko wa
akeneya.
55
Pade atoa-kitika kainya mati eka mati kakete enekoa kakeneya. Eni atoa-kitipa
Galili ta kawa Yesu auapema nekene atoa.
56
Eni kakoi atoa pakeke eya atoa-mene lukoa
kakoi. Padatoa one ibini Magadala Maria. Pade atoaka Maria. Eni Mariapa Yame
Yosepetane nine. Ni pade atoaka Sebedi manatane nine.
(Make 15:42-47, Luke 23:50-56, Yone 19:38-42)
57
Ta likaka kamo ago pade Arimasia take ago Yosepe Pailase mekata pekeneya.
Einagoka Yesuno oyago.
58
Einago Pailase mekata pome kowitipokome okome Yesuno
tigini moane pipouno, mea ta wa yakapokale Pailaseyo one poyo yene yopikago-pala
okome Yesuno tigini i agono motokapoano pa wa okale nitaneya.
59
Nitaneyake Yosepeyo
mootokoapa weneya ake tane mamina petene moa tatilogoa Yesuno tigini pia
ewetetapeneya.
60
Nititikoapa pala padaneta kokapiane kota keneke moa pipaneya. Pinali
one tigini naniko piatekata pene kokoa wetipikanata eni piitikoa kue makai mati uoya
koketekoa moa kabunu ketekalogoapa pekeneya.
61
Yesuno tigini eni moa pikalepa
Magadala Maria-pala padena Mariata eina kota eko keneya pimotoa meaneya.
Poyo Ali-kitame Kota Yopikoa Kakenemo
62
Toge kiatekoiya nodokane oi nokale podolikama eya ali-kiti Akolalike lodo yotokoai
tane tobou ali-kitika Parisi ali-kitika Pailase mekata koukoa pote kakete ekete
63
eina kapene
yotokakanakago wete tuameneya mekome okome one tuaneya pianeke ta tebolo takoa
pataka-petepa kamoane pou wa oka.
64
Nimo oka toa lede taatekamotoa tekete one oyali-
kitame one tigini kode moa aua pote padeka potipitikoa ekete Yesu einakagopa kamoa
pekedeko wa oadete tiki. Nitiketepa einagome ali atoa namolona oa yotokaka toa moa
patukoa oa yotokaku pekete toadete tiki. Nitikaya tokolo one tigini pipaneta neke poyo
yename ta pataka tebolo-petapa wedoa yopia kamotamene wa Pailase-pala akeneya.
65
Nimo okoli okome one oyali-kiti kota keneke poamomotoa toatiki toa topoatino poe.
Poyo ali-kiti-pala aua poe wa okale pote nitipaneya.
66
Nipa kota kabunu ketekalogane kue
eka oka kebonoke kalapage kiitikoa kini adeka mekaneya. Nititikoa poyo ali-kiti kime
yopikoa kawe wa kakamotekete pekeneya.
Matiu Matiu
<<
27 27
>>
Matiu Matiu
<<
28 28
>>
28
Yesu One Tuaneya Pikata Kamoa Pekenemo
(Make 16:1-10, Luke 24:1-12, Yone 20:1-10)
1
Yu yene kini ko mea pupu toamatekoi-pete ponokale podolikama ta tu ei teigaka
Magadala Maria-pala padena Mariatamepa Yesuno tigini pipane kota enepato wa
enepaneya.
2
Poadete pokoika momani mati taneya. Nipa Ali Muno Akolaliyo moa
wetekane edelo ago a tibu kawa nokome kota kabunu ketekalogane kue moa ete koketekoa
kakoa einakeya waneke meaneya.
3
Edelo agono lene timinipa katiapale keneya lou yati yati
tootapea, one kakene maminaka kilue kale keneya ake tootapea taneya.
4
Nitane ago enekete
kota yopikoa kakene poyo ali-kiti piti mati tokale tekete kolu kolu wa tuatekalime temotele
keneya toa pitaloganeya.
5
Wa naniko einatoata nokoli edelo agome okome okome piti moameo wane uku.
Yomo lekaneyake wia dekakoina Yesu tuku tonikino wene tekene ni uku.
6
Inakago ita
piamokono, onena papete okana toa taatekoapa kamokoa poka. One pianeta luku ino,
enoe.
7
Enemoteketepa Yesuno oyali-kiti eya wa wete akapamene. Inakago Yesu wete
kamoa pokano, kiwi Galili take naniko ate nomotoa one namolo takoa pokano, aida
penekete enoino, eneponamene wa akapamene. Kita-pala oatekumopa ina ukuno, wete
akapoe wa okale
8
akolono wete wititapeketeta piti tokaleka kolotini nakale Yesuno oyali-kiti
oadete teyapea pekeneya. Nipa wedia kawa pekeneya.
9
Nitoata pokoli Yesu kotua nokome
okome wete kamene-ye wa okale one kakata note pitalogoa one kawata tebea motekete kei
pikoli okome
10
piti moameo. Anu ame-mikiti eya wa akapoe. Ate Galili take note no
enenamene wa akapoe wa wetekaneya.
Poyo Ali-kiti Yerusaleme Take
Pekete Akenemo
11
Einatoata poadeteta pokoika eina kota yopikoa kakene poyo ali padeka-kiti
Yerusaleme ta Akolalike lodo yotokoai tane tobou ali-kiti mekoita pekete kini enekoinakamo
peya dika dika wa to awea akeneya.
12
Nitikoli eni yene ete Kanosolo ali peya-pala koukoa
mekete edato patu wa kini toatekoi oi pedoa piitikoapa poyo ali-kiti kue tubeya moa
metekete ekete
13
ali atoa kotukete-kama eya wa okala tamene. Likonu kiwi atu pitikakoa
Yesuno oya-lawe note tigini kode moa pekete tokoi wa akamene wa akeneya. Eya waka
akeneya.
14
Toto-pala i to awea ikimopa ta talo toko ago Pailaseyodo yatekome kiwi wia
tukademe tokalepa one wene kekoono, piti moameo wa oa tukaneya.
15
Nitikoli kue
moomotekete pote kipala eina okoinakale taneya. Opika einaka einamopa Yu yene mekika
oa pupitikaneya.
Yesuyo One Oya-lawe Mekoita
Galili Take Nokome Oa Pianemo
(Make 16:14-18, Luke 24:36-49, Yone 20:19-23, Aposelo 1:6-8)
16
Yesuno tuku melepu kakoa (11) oya ali-kiti one Galili take i tonoke ate kotua namene
wa papete oa pikana toa kotua ponete
17
Yesu enekete neuwe tukupia kei pia kakoi.
Nitiketeke padeka-kiti poome taneya kakoi.
18
Nitikoli one oya-lawe kakoiya liti nome
kakome okome tibu-pala itonota neme-kama yopia kamene wa Akolaliyo no moa kakakano,
eya tamene wane uku.
19
E ku yatene peyame anukumo yakoa momotono, Agetaine ibinika
one mana anu ibinika one Epetane Yominine ibinika wedekoa ali atoa ue motokama
yamene.
20
Nipa kipala tamene wane olaukakouna toa litia tamene wa olaukama yamene.
Itono takoa poateka ta pataka-peteka kiwi yopikoane-kala kama pouno, nitamene. E e nimini
wa Yesuyo oka.
Matiu Matiu
<<
28 28
>>
Make
00
11
22
33
44
55
66
77
88
99
10 10
11 11
12 12
13 13
14 14
15 15
16 16
Make Make
<<
00
>>
^
Make
Mo Wima Yakenemo
Yesuyo Ue Mootokaneyake
Setanuyo Likoa Enoai Tanemo
Yesuyo Mou Tagi Tane Ali Tuyono
One Litima Noe Wa Kayo Oa Motanemo
Ipono Awitaneya Meane Ago Latekanemo
Eya Kuya Yene Tane Ali Atoa Latekanemo
Yesuyo Galili Ta Ludu Mo Wima Yakenemo
Yesuyo Muku Muku Toameneya
Pa Pia Meane Ago Latekanemo
Yesuyo One Pukuka Matiu
Ne Litima Namene Wa Kayo Oa Motanemo
Akolali Wedoa Kowitadetepa Nee Eya Tekei
Wawa Noameneyake Pitia Yakanemo
Ko Mea Pupu Toamatekoileke
Pitia Yakanemo
Yono Lokane Ago Latekanemo
Ali Atoa Yesu Litima Nekenemo
Yesuyo One Oyali-kiti Tuku Kakoa (12)
Takoa Motanemo
Yesu Tobou Ipono Belesebulene Tele Patu
Kautakoa Kako Wa Tea Akenemo
Yesuno Nine Wamene-mikiti Oneke Nekenemo
Nee Lene Pitikama Poko Agoke
Pedoa Akenemo
Yesuyo Nee Leneke Pedoa Akene Agale
Pine To awea Akenemo
Tole Udukatekoapa Okolo Moa Kauamoi
Wa Pedoa Akenemo
Ipe Nee Kakoya Witakoleke Pedoa Akenemo
Kalipe Lene Deya Witakoleke Akenemo
Yesuyo Pupulege Tadalita Te itakanemo
Yesuyo Ipono Ti Awikolokaneya
Meane Ago Epetekanemo
Yesuyo Dairasine Konakoma Kamotokoa
Mamina Nami Mitikane Atoa Epetekanemo
Yesuyo One Oyali-kiti Ta Padeka Padeka
Moa Wetekanemo
Ali Atoa Ue Motokama Yakene Yone
Kabe Teiganemo
Ege Egeta Kadukoa (5,000) Ali Atoa
Nee Lawetanemo
Yesu Ue Tali Ludu Yakenemo
Genesarese Take Yene Pitikoi-kiti
Yesuyo Epetekanemo
Yu Yenane Kaua-mikitame Kekaneya
Latikama Nekenemo
Ali Atoa Wene Moa Koiganeleke Akenemo
Yesuke Wene Tugoa Meane Atoame Tanemo
Yesuyo Kale Kene Keteaneya Agale
Amele Toameneya Meane Ago Epetekanemo
Nee Lawetanemo
Tibuke Padele Tubele Witakamotono Ta Wa
Parisi Yename Yesu Likoa Enanemo
Parisi Yene Erode Kini Yisi Kugu Kiwike
Weamutukaya Kekatekoa Yamene Wa Akenemo
Besaida Take Leneta Lianeya
Yesu Nepa Keraisu Wa Pitayo Akenemo
Yesuyo One Tete Moa Tuatekamoke Akenemo
Tono Tobou Waneke Yesu Pa Tootapeneya
Kakenemo
Ipono Awitaneya Meane Mati Epetekanemo
Ako Meateko Agopa Mainago Wa
Agale To onali Yoa Kakenemo
Toto-pala Poi Te iamokagomepa
Nipa Toto Mape Wikome Too Wa Akenemo
Yono Kawa Lene Eyame Pinali Ne Toa
Potokakalepa Te ia Wamene Wa Olaukanemo
Alime One Atoa Wawa
Atoame One Ali Wawa Tokoleke Olaukanemo
Yesuyo Mati-kiti Epetekamotoa Kowitanemo
Kamo Tane Agoke Akenemo
Yame Yoneta Yesuke Lokoa Tobou Agota
Meoukete Akenemo
Yesuyo Leneta Lianeya Meane Ago
Batimiasi Epetekanemo
Yesu Yerusaleme Take Nekenemo
Yesuyo Yomo Pikipa Ku Wa Tuamoa Wa
Kikoa Wakenemo
Totoa Ala Tootapeneya Kakene Yomo Piki
Yesu Neke Tokole Te Patu Kautakoa Kake
Toko-pe Wa Pitia Yakanemo
Panagono Gerepi Po Ipe Yopikane-kitame
Tanele Adeka Pikome Akenemo
Takesi Kue Pitikaneleke Pitia Yakanemo
Tuane Ali Atoa Moa Kamotokatekamo
Tobou Kakoa Akene Agale Pitia Yakenemo
Keraisu Wa Papete Ibini Akene Agoke
Pitia Yakanemo
Titi Toma Pamene Wa Pubu Akenemo
Nepo Atoame Akolaline Kue Pitikakanemo
Yerusaleme Yename Ke Enekakale Mekete
Tete Mati Moatekoileke Oa Pianemo
Ali Yatenane Oyali Wakapea Noatekamo
Yomo Piki Tokoleke Pedoa Akenemo
Yesu Wakapea Nikilepa Ipete Taatekoa
Noo Wa Padameka Wene Toamiki
Yesu-pala Kotina Tanemo
Yesuno Tobouke Padeya Kalono Taneya
Pekoa Yotokanemo
Yudaseyo Yesu Moa Meateka Oi Pedapianemo
Edelo Ago Idipi Ta Patukoa Iserele Yene
Toa Motane Oi Nokale Toge Nee Nakenemo
Yesuyo One Oyali-kiti Palawe Wane-pala
Gerepi Po Ku Ueta Moa Lawetekome Akenemo
Yesuyo Pita Neme No I Ago Wene Toamuku
Wa Akoa Waoo Wa Oa Pianemo
Yesu Gesemani Take Pome Kowitipanemo
Yesu Dekoa Motanemo
Yesu Kanosolo Yenane Leneke Moa Kakanemo
Yesu Wia Tukamotoa Oa Tukanemo
Poyo Yename Yesu Taumada Toa Kakenemo
Yesu Tukome Tuanemo
Yesu Kamoa Pekenemo
Yesuyo One Lene Timini
Magadala Maria Yametanemo
Yesu ATibuke Atepea Aua Pekenemo
Make Make
<<
00
>>
Make Make
<<
11
>>
MAKE
Yesunomo Makeyo Wia Mekaneya
1
Mo Wima Yakenemo
(Matiu 3:1-12, Luke 3:1-18, Yone 1:19-28)
1
Ipa Yesu Keraisuke epetekoa akene agale titiane akakuna.
2
Namolo namolo papete
Akolaline agale akane ago pade Aisaiayo eya wa wia mekaneya. Nipa Akolaliyo mana-pala
papete oa piane toa wia mekakome okome
Ne naniko pomotoane anu agale oa aua yawatekago namolo takoane moane wetekou.
Nitikolu pokome ne poateka ka nodokakama poo.
3
Nipa ali piamene ta ludu
panagome eya wa mo wima yawoo. Ali Muno noateko ka nodokakapia, one
yawateko ka-kitika ki yotokakapia toatino toe wa einago taatekoa nokome mo
wima yawoo wa Aisaiayo papete wia mekapianeya.
4
Eina wia mekapiane toapa Yone ali piamene ta ludu taatekoa nokome eya wa mo
wima nekeneya. Kini tokoi poaneleke Akolaliyo kiwi wiou wa po letu mekakana
keetapemotono eni poanele tewitikoa wawa ue moamene wa ali atoa ue motokaneya.
5
Nipa
Yudea ta piko peyake Yerusaleme takeka ali atoa peya one mekata note kini tokoi poanele i i
wa to awea ootapekoli nipa ue moe wa Yodane uele kakome ue motokakala taneya.
6
Yone einago taatekoa nokomepa kamelo kai pineme latiane mamina kawa ni
pitimekawe kai kepeneme latiane matiu kawa taneya. One nakene neepa apio-pala koyapo
ego ueta nakeneya.
7
Nitane agome mo wia kakome okome no litimotokakome ele kule
telekole toa no moa patukako ago noademe toko. Nokolopa auapeane one kawa yene
kekatukuyake pa ago tekene meamukakene kekamele toamoko.
8
Opii kiwi pa ue
motokakene tuku. Einago nokomepa Epetane Yomini motokademe toko wa oma yakeneya.
Yesuyo Ue Mootokaneyake
Setanuyo Likoa Enoai Tanemo
(Matiu 3:13-4:11, Luke 3:21-22, 4:1-13)
9
Eina-petepa Yesu Galili ta keneke piko Nasarese ta kawa Yone kakata nokale Yodane
uele ue motokaneya.
10
Nitikale Yesu uele kawa aka matanuke pogatekoa pokome enekale
eina eina tibu patetepikale Epetane Yomini weuwe keneya tibu mea ketipea nome pinali
oneke pitanokale enaneya.
11
Nitikale a tibuke agale ludu nokome okome anu manago nepa
anu kolotini ago. Neke tokoleke no kolotine meku wa akeneya.
12
Nitikale eina eina Epetane
Yominiyo Yesu ali piamene take poano pa wa aua pekeneya.
13
Aua pekeneyake lene timini
togoikoa padeka noi kakoa (40) ta lia pataka toa Setanu nome likoa enoai taneya. Eidapa yo
tane kai eya pakeke pome mekake edelo ali-kiti note auape auape toa kananeya.
Yesuyo Mou Tagi Tane Ali Tuyono
One Litima Noe Wa Kayo Oa Motanemo
(Matiu 4:12-22, Luke 4:14-15, 5:1-11)
14
Yone po yapu moa pitikatekaneyake Yesu Galili take pokome eni ta ludu
Akolalinemo ali atoane wene epetekakome tanemo i i wa mo wima yakeneya.
15
Nitikome
okome eina oa piane agale taatekoa toateko-petepa opi. Akolaliyo kiwi talo tokole keleyo
witateko tigotoma nokono, kini namolo poane wene wia wawa kini wene epetekoane uku
agaleke wene matoa meamene wa oma yakeneya.
16
Nitoa Galili ue matanu ludu kokotoma ponokome enekale odene wamena Saimone
Aderutame kini tanele tekete mou tagi toa kakoli enaneya.
17
Enekome okome mou tagi toa
mou toa ali atoa motokakete toatikile olaukouno, no litima noe wa okale
18
eina eina kini tagi
ka tewitikalogoa Yesu litima pekeneya.
19
Yesu eniya liti kutu pokome enekale odene
wamena Yame Yoneta Sebedine manata ue dipike mekete tagi ka pilianeka lipua mekoli
enaneya.
20
Enekome okome yukuyagota wete noe wa kayo oma ponokale eina eina pupu
yeneka etene-pala ue dipike memotoa Yesu litima pekeneya.
Ipono Awitaneya Meane Ago Latekanemo
(Luke 4:31-37)
21
Yesuyo Kapaneame take pato wa einali-mene-pala opia pome mepaneya. Pome
mekomepa ko mea pupu toamene-pete losu yapu pome olaukapaneya.
22
One eni
olaukakale yatekete peyame ekete Mosesene totono pine to a olaukaki yename ikina toa i
agomepa wamokono, one weneme-kama pademo pademo tititikoa okono, opa agale
pinagomepa i okono, yakatoe wa ka oa kakeneya.
23
Einata einapete poane ipono awitaneya meane ago losu yapu mekome telo okome
okome
24
Nasarese Yesu nepa toto mekota edade noka-pe. Toto wiade noka-pe. Nepa
Akolaliyo takoa moa kakapiane ago toko-la wa ta yo ootapekale kikoa okome okome
25
agale wia te iano, winago tewitikoa wete takoa pa wa okale
26
einago itonoke aua pitikoa
petekakoa kawa ta yo telo ootapekome takoa pekeneya.
27
Nitikale enekete e yene ete oto wa
yakaate tekete ekete one eni oka agalepa edane agale patuno, one weneme-kama pademo
pademo tititikoa okoya tokome ipono-kitameka oneme okole-kama yakoa tiki wa ka oa
kakeneya.
28
Nitaneyake one tanemo Galili ta piko peyake wete oa pupitikatapeneya.
Eya Kuya Yene Tane Ali Atoa Latekanemo
(Matiu 8:14-17, Luke 4:38-41)
29
Enile toomotokome Yesu losu yapu tewitikoa pome Saimone Aderutane yapu pato
wa Yame Yoneta-pala opia pekeneya.
30
Eni yapu pene nome mekaka Saimone natonane
nine one kaue poto yene taneya piko wa okoli
31
einakatue pikata pome yono moa
kamotokaneya. Nitikale eina eina poto yene te itakale latoa kakome kini nee takoa
lawetaneya.
32
Einata einapete lou pene pipaneyake eya kuya yene taneya mea ipono awitaneya mea
tane yene peya aua pato wa kini oya-mikitame Yesu mekata aua nekeneya.
33
Eni take pitane
ali atoa peya note kago liti kolike apua takoa kakeneya.
34
Nitikoli enekome eya kuya yene
taneya nekene-kiti latekoa ipono-kitika takoa poe wa wetekoa taneya. Nipa ipono-kitame i
agopa Yesu toko-la wa wene tokoli tokome agale witoa wameo wa takoa wetekatapeneya.
Yesuyo Galili Ta Ludu Mo Wima Yakenemo
(Luke 4:42-44)
35
Podolikama ta wete patameneyake Yesu kamomotokome ali piamene take kidene
pome kowitipaneya.
36
Nitadekale Saimoneyo tuku topato wa one oyali-kiti-pala opia pome
tuku toawineya pekeneya.
37
Nitoa tuku toawineya pote enamutukete ekete nepa kuka ku ali
atoa peyame tuku toa kaki-koli okome
38
ete yeka ta ludu pitiki ali atoaka anu akama yakuna
agale oane mema pamedeku. Taatekoane eina agale akadene ni nokouno, tone opia pekete
patono noe wa pekeneya.
39
Patono noe wa pokomepa Galili ta ludu losu yapu kaka toa
Akolaline agale mo wia akama pome ipono-kitika takoa wetekoa taneya.
(Matiu 8:1-4, Luke 5:12-16)
40
Kedime nakene ago pade Yesu kakata nome wadini tukupia kowitikome okome
nemedo no epetekouno wene pikepa nipa oyake epetekoano ta wa kowitikale
41
ela
motokome yoname mitikatekakome okome nitouno ta. Neke eni yene takoa pomotoane uku
wa okaka
42
eina eina takoa pokale latoa kakeneya.
43
Yesuyo nititikoa kakome pubu okome
okome etene pade ali atoa enekeka anume ne latekakumo kotukoa ikileka toamoa.
44
Nitameneya eyaka topamene. Ne i agopa kedi pitaneya mekanake opi i latoa kakona wa
yete pade ali atoame wene tomotoapa Moseseyo tamene wa papete oa pianele topamene.
Nipa Akolalike lodo yotokoai toko ago mekota peke oneke padeya lodo yotokatekoya aua
poke mepoano pa wa wetekaneya.
45
Yesuyo nimo okale yakoake tagatapea ta piko peyake
one eni latekakanakamo oa pupitikatapeneya. Nitikale tokome ali atoa pitikoika Yesu keleyo
poukome toake ali atoa apua takakaya tokale padeka lono katekoa pome ali piamene ta ludu
pima yakeneya. Nitoa pokake ali atoa koukoa one kakata note-kala kakeneya.
Make Make
<<
11
>>
Make Make
<<
22
>>
2
Yesuyo Muku Muku Toameneya
Pa Pia Meane Ago Latekanemo
(Matiu 9:1-8, Luke 5:17-26)
1
Yesu eina-meneke yawa mea wa wakapea Kapaneame take nome menaneya. Nitikale
Yesu wa wakapea nome one yapu meko wa okoimo kugu
2
yakatekoa ali atoa
koukanokolipa keika yapu luku kawatekoi pakeka piameneya. Akolono kago ludu-kitika
nateya pakeka piameneya edeya takatapeneya. Nitaneyake yapu keneke kakome
Akolalinemo i i wa oa kakaka
3
ali tuyonome eya ago muku muku toameneya pa pia kakene
ago leyo leyo toa aua nekeneya.
4
Nipa yapu edea takatapeneya tokome Yesu kakata pinele
aua namele toamokale aka yalini ludu aua penaneya. Nitoa ponete yalini ke a po kakoa leyo-
pala keti Yesu kaka pitia tewitikaketikaneya.
5
Yesu i agome kini oyago oyake latekamele
toko wa wene tekete tadekoile enekome Yesuyo yene tane ago-pala okome anu mana neke
toma noka poaneleke Akolaliyo po letu mekakana keetapekene neke poanele kogakuna wa
okale
6
Mosesene totono pine to a olaukane ali-kiti eniya liti mekete kini tepene eya wa wene
pia meaneya.
7
Imopa i okono, edekolo oko-pe. Ali atoame toma nokoi poaneleke mekane
po letu kea wakilepa Akolaliyo odene tokono, i agome Akolali tekome oko wa wene
poaneya meaneya.
8
Kini eni wene pikoile tetoa enekome Yesuyo okome wini tepene wene
kibutukoa mekipa dekolo tiki-pe.
9
I ago-pala ukule tamele tadeko wa kime wene
tomotoanepa yene tane ago-pala edemo wane omotoa iki-pe. I ago neke toma noka
poaneleke Akolaliyo po letu mekakana keetapeku wane omotoa iki-pe. Wete kamoa ne aua
nokoina leyo-pala aua pa wane omotoa iki-pe.
10-11
No Ali Yatenane Oyago itonoke
mekenepa ali atoame tokoi poaneleke Akolaliyo po letu mekakana keetapeamele tadeko wa
kime wene tomotoanepa yene tane ago-pala eya wane uku. Ne aua nokoina leyo-pala moa
aua neke yapu poano, kamokoa pa wa akeneya.
12
Nimo oka oka e yename nepikoa
memotoa einago kamokakome one aukoina leyo-pala moa aua pekeneya. Nitoa pokale
enekete ali atoa kakoi peyame ka oa kakete ekete namoloka toamokoinakalepa i tokono
enatoe wa Akolali kei pia kakeneya.
Yesuyo One Pukuka Matiu
Ne Litima Namene Wa Kayo Oa Motanemo
(Matiu 9:9-13, Luke 5:27-32)
13
Nitaneyake Yesu Galili ue mine matanu wa pome kapaneya. One eni kakata ali atoa
peya note oboa kakoli Akolaline agale olaukoa kakeneya.
14
Nititikoa pokome enekale eya
ago Lipai Alepiasine mana takesi kue motokoai tane yapu keneke mekale enekome okome
no pukuka tone patono noo wa oma ponokale kamomotokome Yesu pokaka litima
pekeneya.
15
One yapu nee natono noo, pata wa Matiuyo koua pokale Yesu pome mekome
nee noa meaneya. Nitikale takesi kue motokama yakene ali-kitika Yu yenane totono litia
toamene ali-kitika Yesu-palaka one oyali-kiti-palaka eida opia mekete nee noa meaneya.
Dikane ali kainya mati one pokaka litima pekeneya.
16
Yesu dikane yene-pala opia mekome
nee nakale enekete Parisi ali-kitameka Mosesene totono pine to a olaukane ali-kitameka
Yesuno oya-mikiti pitia yatekete ekete Yesupa dikane yene-pala opia mekome nee noa
mekono, edekolo tokoto-pe wa yakananeya.
17
Nimo akedekoli yatekome Yesuyo okome
dokosa agomepa yene toameneya meku wa iki-kiti edoa nome latekamotoa-pe. Yene taneya
meku wa iki-kitipa nipa nome latekanoo. Nipa poanele toamuku wa iki yene kini namolo
poane wene wia wawe wane oadene nokouya mena. Poanele tuku wa iki-kiti odene
auapeadene nekene uku wa Yesuyo akeneya.
Akolali Wedoa Kowitadetepa Nee Eya Tekei
Wawa Noameneyake Pitia Yakanemo
(Matiu 9:14-17, Luke 5:33-39)
18
Wa padepete ali atoa ue motokama yakene ago Yonene agale litia tane yenameka
Parisi ali-kitameka Akolali wedoa kowitadetepa nee eya tekei wawa noamoa pa meaneya.
Nitaneyake pade ali-kiti Yesu kakata note yatekete ekete neke agale yakoa nepala opia yaki
yenamepa enile toamiki. Edekolo toamikiti-pe wa yakaneya.
19
Nitikoli okome panagono
atoa motokakita atoa motokagono oya-mikiti onepala wedikete wediapa nee eya edoa wawa
noameneya pa memotoa-pe.
20
Wa naniko ete yename atoa motokago padeka aua poatiki
wini tigotoma nokona. Eni toateko oi noka-petepa nee noameneya wawa pa meoi wa
Yesuyo akeneya.
21
Nimo ootokoa kakome pedoa agale pade okome okome panago one mamina
namoloya pilikalepa weneya pue moa namoloya eni pilikata lapukoa lipuko patu. Nitamoo-
li. Enile tootokoado uele abe kogalepa weneya pueme ete ete toa edema pokome pilikutu
too wa Yesuyo akeneya.
22
Wa agale pade pedoa okome okome gerepi po ku ue weneya
mekalepa meme kai tabeme latiane mete namoloyake oyake peia moamoo. Eniyakedo
peikalepa gerepi po ku ue weneya tokome lako yati kawa mono mono okome ka ua paka
yoa pootapeoo. Nipa eni kai tabeme latiane meteka ka ua ti ta e witapeoo. Pene po ku
kotiketepa meteka peneyake tia lobutua piamedeko wa Yesuyo akeneya.
Ko Mea Pupu Toamatekoileke
Pitia Yakanemo
(Matiu 12:1-8, Luke 6:1-5)
23
Yu yene kini ko mea pupu toamene-pete pade Yesu panagono witi ipe ludu pokaka
one oyali-kiti one-pala opia pekete witi ku deya tukaka pekete kotima pekeneya.
24
Nitikoli
enekete Parisi yename Yesu-pala ekete tone ko mea pupu toamateko-pete kekoa wawa
toamatekole eni tikino, ku kotia eni pupupa dekolo tikiti-pe-koli okome
25-26
Depidi one-pala
to a yakene ali-kitika kobu tokale tanemo oi moamokoiya-pe. Eya taneya. Tobou ago
Soloyo Depidi litia aua pokale to a yakomepa kobume tuaneya tokome Akolaline wikakane
yapuke lobutukoa kapaneya. Nitoapa Akolaline pikane palawe wane moa nootokoa one
oyali-kiti i nee noatino noe wa moke toa tatika tatika taneya. Akolalike lodo yotokoai tane
ali-kitame odene dikane palawe wane namele taneyake nitaneya. Enipa ako odene mekome
Akolalike lodo yotokoai tane tobou ago Abiasa meane-pete kini kekaneleke Depidiyo
taneya.
27
Yesuyo nimo ootokoa kakome okome Akolaliyo ali atoa auapekomepa ko mea
pupu toamatiki-pete pa ko meamene wa oa pianeya. Ko mea pupu toamene-pete padeya
padeya kekaneya latikamotoa akeneya mena.
28
No Ali Yatenane Oyagomepa ali atoa ko
mea pupu toamiki-pete mekete toatikileka i i wane oyameane talo toane meku wa Yesuyo
akeneya.
Make Make
<<
22
>>
Make Make
<<
33
>>
3
Yono Lokane Ago Latekanemo
(Matiu 12:9-14, Luke 6:6-11)
1
Wa pade-pete Yesu losu yapu wa pokome enekale yono lokane ago pade eida
mekale enaneya.
2
Nitaneyake pade-kitamepa Yesuyo i ago epetekako patu wa lene
wikaneya. Nipa ko mea pupu toamene-pete kini kekanele tomotadiya wa kakete taneya.
3
Nitikoli Yesuyo yono lokane ago-pala okome okome oto noke kanoo wa ootokoa kakome
4
e yene yatekome okome tone ko mea pupu toamoko-petepa edele tokala tato-pe. Ali atoa-
palapa padele padele epetanele tato-pe. Poanele tato-pe. Tuamele toko agopa toa moato-
pe. Wia tukato-pe wa okale agale waametekoa pa kakeneya.
5
Tepe kolotini lupi
tootapeneya kakoile enekome kotimi luaneya kawa tepe-pala we tokale kaka. Nitoapa o
yene leneme enoa unukamu tootokoa kakome yono lokane ago-pala okome neke yono kutu
lido akoano ta wa okale lido akoa enekale one yono epetekakadeka.
6
Nitikale enekete Parisi
ali-kiti Erodeke timini kawa yakene yene-pala akolono koukapeketepa Yesu wiato wa one
wia tukatekoi oi pedoa pianeya.
Ali Atoa Yesu Litima Nekenemo
7
Nitaneyake one oyali-kiti-pala Galili ue mine pato wa tewitikoa pekeneya. Eni pokaka
Galili yene peya mati lewi lewita pia obomoa nekeneya.
8
Nipa Yudea ta piko peyakeka
Yerusaleme takeka Idumea ta piko peyakeka Yodane ue eka-lono piko takeka Taia Saidone
tata liti enika eni pitane ali atoa Yesu kakata note-kala kakeneya. One toma yakenemo kugu
yatekoiya tekete nitaneya.
9
Nitaneyake ali atoata i kakoyame one dekoino, ue dipike pone
mepouno, ue dipi nodokakoa oto aua noatino poe wa one oyali-kiti-pala akeneya.
10
Nipa
yene tane ali atoa peya mati latekakale enekete ete yename kini tane yene latekamotoa Yesu
mitikada wa lekoa apua takatapeneyake ni akeneya.
11
Ipono awitaneya meane yeneka nokoli
kini eina awitane iponame Yesuno lene timini enekete one kawane aua pitakete ekete nepa
Akolaline mana wa okala taneya.
12
Nimo okoli ipono-kiti kikoa okome okome no i agopa
dikane ago wa widikoa to awea wameo wa kikoa akeneya.
Yesuyo One Oyali-kiti Tuku Kakoa (12)
Takoa Motanemo
(Matiu 10:1-4, Luke 6:12-16)
13
Nititikoa tono pade lewia pome kakome one takoa moateka ali-kiti noe wa kayo
okale nekeneya.
14-15
One-pala opia yawatekoi ali-kiti tuku kakoa (12) one Aposelo ali wa
moa kakakilepa Akolalinemo mo wia oawineya pote ali atoake awitane ipono takoa wetekoa
tomotoa taneya. Nipa one tele patu kautakoa kakete nitimotoane wetekou wa moa
kakaneya.
16
Eya ali-kiti takoa motaneya. Pade Saimone one pade ibini Pita wa oa metaneya.
17
Ni Yame Yoneta Sebedine manata. Yesuyo einagotane ibini pade Boanesisi wa ibini oa
metaneya. Boanesisi wapa tono witikagota wa okome akeneya.
18
Ni Aderu ni Pilipi ni
Batolomiu ni Matiu ni Tomasi ni Alepiasine mana Yame ni Tadiasi ni Kenane take Saimone
19
ni Yudase Isekariose. Yudase einagopa Yesu poi te iane yename wimotoa moa meateka
ago.
Yesu Tobou Ipono Belesebulene Tele Patu
Kautakoa Kako Wa Tea Akenemo
(Matiu 12:22-32, Luke 11:14-23, 12:10)
20
One oya-lawe eni takoa moomotokome Yesu wakapea yapu nome mekale ali atoa
wa obomoa note edea takatapeneya. Edeya takatapekoli Yesuka one oya ali-kitika nee
noatekoi pake toameneya.
21
Eni tanemo kugu yatekete onekameyo ekete ekee, leau akeneya
yakome tokono, enemopato wa Yesu moa pikoa kawadete nekeneya.
22
Mosesene totono pine to a olaukane ali-kiti Yerusaleme ta kawa keti note kakete ekete
Yesu i agokepa Belesebule awinome mekome toko. Ako odene meko tobou ipono
Belesebulene tele patu kautakoa kakome tokome ipono-kiti takoa wetekakala toko wa tea
agale akeneya.
23
Nitaneyake Yesuyo ali atoa one kakuta noe wa mootokoapa pedoa agale-
mene okome okome Setanu pinali one tiko wa edoa takoa wetekamotoa-pe.
24
Pitikali
puutakutukoa meketepa nipa wili walai wa tadatapeoi.
25
Wa odene yapu pitiki-kiti ete oto
wa poita toa winali yotoketepa kini eni yapu pa tumu tokaneya pimotoa wawa poi.
26
Edikoapa Setanu one yagono-mikiti-pala poi toa mekomepa nipa one tele tetoa tii ta e oa
witikatapeneya tokome one yeneka ete toa atuma poi wa Yesuyo akeneya.
27
Nimo ootokoa kakome pedoa agale pade okome okome telekagome-kiti one yapu
pikoya-kiti pa yopia mekalepa kode agome yapu bulukoa nome onekeya oyake moa pamele
toamoko. Nitamele toamokoyake kode ago kotikatapeado nokomepa telekago poome lutua
piilogoa onekeya peya oyake kode moa poo.
28
Ali atoame padele padele poanele toa Akolali tea kawaka wa nanikodo ae, inapa
poanele tekene tadeku wa wakolipa nipa Akolaliyo kini eni poanele tokoike po letu
mekakanapa keetapea wawa kibu moamoo.
29
Wa panagome Epetane Yominilepa Setanule
tetepo takakalepa Akolaliyo one eni poanele tokake po letu mekakanapa keamokome etene
kibu moo. Dikane agome toka poanelepa pa pia kakale Akolaliyo kogakileka toamoo wa
Yesuyo akeneya.
30
Enipa Parisi ali-kitame Yesu i agoke poane ipono awinome mekome
toko wa okoli tokome ni akeneya.
Yesuno Nine Wamene-mikiti Oneke Nekenemo
(Matiu 12:46-50, Luke 8:19-21)
31
Nimo oa kakaka Yesuno nine wamene-mikitika koli note kakete ekete Yesu oto noo
wa akoe wa panago moa wetekaneya.
32
Nitikoli Yesu kakaya liti oboa meane ali atoame
ekete neka ua neke wamene-mikitika koli a note kakete ne noo wa iki-koli okome
33
aga uapa
te-pe, anu wamene-mikitipa te-lawe-pe wa ootokoa kakome
34
one unukoa mekoina ali atoa
enoa unukakome okome agau a-loe anu wamene-mikitipa ika i mekina.
35
Akolaliyo ta wa
okole-kama litia tiki-kitipa agau a anu wamene laine-mikiti enina wa Yesuyo akeneya.
Make Make
<<
33
>>
Make Make
<<
44
>>
4
Nee Lene Pitikama Poko Agoke
Pedoa Akenemo
(Matiu 13:1-9, Luke 8:4-8)
1
Wa padepete Yesu Galili ue mine matanu pome olaukoa meaneya. Nitaneyake ali atoa
lewi lewita pia obomoa note-kala kakoli tokome ue dipike pogatekoa pome mepaneya.
Nitoapa e yene ue matanuke ete keneya kamotoa onepa ue dipike mekome
2
pademo
pademo oa metekilepa pedoa agale oa meaneya.
3
Nitoa olaukoa mekome okome kipala i ukumo yakoe. Ipe pinagome-kiti ipe ludu nee
lene pitikama pekeneya.
4
Nitima pokale nee lene padekapa ka ludu paka tadoa pitaneya.
Nitaneta ini-kiti pukaneya note pitoai toa napekala taneya.
5
Ni nee lene padekapa kue pake
pake tadoa pitaneya. Tokoo itono nateya deya pianeya tokome wete tumikala taneya.
6
Wa
naniko lou tigini kakale wete eni tototokoa tuaneya. Teke itono kekulu wetekameneya
tokome loume ni yoa tukatapeneya.
7
Ni nee lene padekapa tonipo pake tadoa pitaneya.
Nitaneta tonipo eya nee lene-pala odeneka dekoa witakome tukatapeneya.
8
Ni nee lene
padekapa itono epetaneyake pitakome leau akatapea witakome ku tukala taneya. Ku tukilepa
padekapa ku kapidi kakoa kakoa (30) tua ni padekapa ku ege odepeta kadukoa wa tuku
melepu kakoa (60) tua ni padekapa ku ege takupeta kadukoa (100) tua tokala taneya.
9
Kipala i ukumo yakou wa kale piiyakoa kaki-kiti kime yakoati wane uku wa Yesuyo
akeneya.
10
Naniko Yesu one kidene mekata one mekoya liti oboa mekete yatekoina yene
padeka-kitame one tuku kakoa (12) oyali-kiti-pala note eni pedoa okana agale pine pitia
yakananeya.
11
Nitikoli yatekome okome Akolaliyo one ali atoa talo tokolepa papete kaukoa
mema nekeneyake opi kiwi keleyo ooyameteku. Nitikuyake ete ali atoa-palapa nipa pedoane
agale-kama oane meteku.
12
Nipa Aisaiayo papete wia mekapiane toane taatekoane tuku.
Eya wa wia mekapianeya.
I to aweane uku yenamepa kini leneme enekoile enoa moamoa kini kaleme yatekoimo
yakoa moamoa toi. Akolalikedo tepe kolotini pekoa pioi tokapa kini poanele
tokoike po letu mekakanapa kea kibu moamoo tokake pa etepea pomotoa
wawoo wa Aisaiayo wia mekapianeya wa Yesuyo akeneya.
Yesuyo Nee Leneke Pedoa Akene Agale
Pine To awea Akenemo
(Matiu 13:18-23, Luke 8:11-15)
13
Yesuyo nimo ootokoa kakome okome ina pedoane okouna pine wene toamikino,
ete idikoane pedoane oma pokou-kitipa edoa yakoa moadete-pe.
14
Ne lene pitikama yako
ago adeka pikounapa Akolaline agale oa aua yako agoke okouna.
15
Nee lene padekapa ka
ludu tadoa pitane adeka pikounapa eya tiki yeneke okouna. Pade-kitame Akolalinemo yakoa
lukakili eina eina Setanu nome katekamoa poko.
16
Nee lene padekapa kue pake pake tadoa
pitane adeka pikounapa eya tiki-kitike okouna. Pade-kitame einagale yakoapa eina eina ke
wa lukoa wedia meki.
17
Nitiketeke einagale kini tepene teke wetekameneya tokome
Akolalinele pa tekei takaki. Wa naniko ele kuleme ke enekakale mea ni ete-kitame kipala poi
teigoli mea tekete Akolalinele takoake wete tewitikoa wawei.
18
Padeka nee lene tonipo pake
tadoa pitane adeka pikounapa eya tiki-kitike okouna.
19
Pade-kitame einagale yakoa moake
kini kepene mama moa kini kamoya-kitike wene pitikakoa mea eya kuya moadiya wa tepi
tokale mea tikili enika enileme Akolaline agale moa kautako. Nipa nee lene ku tuamou toa
keneya pa meki.
20
Padeka nee lene itono epetaneyake pitane adeka pikounapa eya tiki-kitike
okouna. Pade-kitame einagale yakoapa inapa Akolaline peku wa noa tiki. Nitikipa ipe nee
kakoya ku tuma pou toa padekapa ku padeka kapidi kakoa (30) tua ni padekapa ku ege
odepeta kadukoa (50) tua ni padekapa ku ege takupeta kadukoa (100) tua toko wa Yesuyo
akeneya.
Tole Udukatekoapa Okolo Moa Kauamoi
Wa Pedoa Akenemo
(Luke 8:16-18)
21
Panagome-kiti labo udukoapa okolo moane kaulogou wa yapu aua noko patu. Walai
kene kekulu moane piou wa aua noko patu. E 'e, edikakoya mena. Labo piatekota-kama
moa pikala toko.
22
Padele padele kaukoa toma yakolepa naniko keleyo witatekole toko.
Padeya padeya paigakoa pikoya-kiti naniko keleyo pikale peyame enetapeoi.
23
Kipala i
ukumo yakou wa kale piiyakoa kaki-kiti kime yakoati wane uku wa Yesuyo akeneya.
24
Nimo ootokoa kakome okome kipala i oane metekulu yatekimopa wedoa yakoa
moamene. Kime ete metekoi toa eni luku kotuke otoka mokala toi. Nipa ako pade-meneka
oto mokala toi.
25
Akolali one i peku wedoa nako agopa nipa Akolaliyo one peku-kama
lawetema poo. Akolaline peku alekoa noa toko agopa nipa one eni lawetane peku nateya
deyaka takoa pootapeoo wa Yesuyo akeneya.
Ipe Nee Kakoya Witakoleke Pedoa Akenemo
26
Yesuyo nimo ootokoa kakome pedoa agale pade okome okome
27
Akolaliyo one ali
atoa talo tokolepa i wane adeka piane uku. Panago ipe ludu one nee lene pitikama yakanata
eni nee lene tumia witoa kako. Nipa ta lia patako toa-kama pinago pitikome kamotokome
tomotoa toko. Tumia witakole pinago agopa tokolo mekoyake toko.
28
Pinagome nee lene
matalogoa paya nou toa mekoyake kadene tumia atepea witama nome tidiyo wia ku tua
toko. Enilepa itonome-kama toko.
29
Ku tua nodokoa kibutua kakale eina eina pinagome
wakoa mootapeoo. Nipa one wakoane momotoa toko wa epei moa nome wakoa
mootapeoo wa Yesuyo akeneya.
Kalipe Lene Deya Witakoleke Akenemo
(Matiu 13:31-32,34, Luke 13:18-19)
30
Yesuyo nimo ootokoa kakome okome Akolaliyo one ali atoa talo tokolepa edeya
wane adeka piku patu. Edemo wane pedoane agale uku patu.
31
Akolaliyo one ali atoa talo
tikilepa kalipe lene deya itonoke witako toa toko. Eni lenepa etene nateya wane deya
tokome eteya yomo leneme moa patukako.
32
Eni lene deya panagome moa itonoke
pitikakolo tumikomepa ate toa eteya yomo moa patukatapeko. Nipa yaita mati eni kakome
yenene yeteka yukukata tubeya wetekako. Yenene etene tubeya wetekakolo tokome ini
pukaneya note eni yomo todoke yene wiamele toko wa Yesuyo akeneya.
33
Yesuyo Akolaline agale i i wa e yene oa metekomepa enika eni pedoa agale okala
taneya. Nipa kini yakoa moatekoi kotuke oa mekala taneya.
34
Akolalinemo eni oa
metekilepa agale pedoa-kama oa mekala taneya. Nitaneyake one oyali-kiti-palapa kini-mene
mekete einaka eina pedoa agale peya pine ina ina wa to awea okala taneya.
Yesuyo Pupulege Tadalita Te itakanemo
(Matiu 8:23-27, Luke 8:22-25)
35
Einapete lou wete pipaneka Yesuyo one oyali-kiti-pala okome okome eka ue mine
matanuke witatono patono noe wa eina ue dipike lewia pome mekale
36
ali atoa matanuke
eida koukoa memotoa wawa one oyali-kitika eina ue dipike peapetekoa pote mea Yesu-pala
opia mea pekeneya. Mea pokoika ali atoa ue dipi pade-kitike mea opia pekeneya.
37
Mea
poadete pokoika pupulege tadalita kotikatapea u u wa noka matiyame ue pewikanokome ue
dipike patua pitoa atukademe taneya.
38
Atukademe tokaka Yesu ue dipi kuka lono nali
yomo mokoa atu pia meaneya. Nitikale one oyali-kitame one kamotokakete ekete Ae, Tikisa
ago toto ue nakoono, mama moameke atu pia meko-pe-koli
39
Yesu kamokakome pupulege
kikoa okome okome kapakoa kawia wa wa okale pupulege teigaloganeya. Ue mineka tooko
lapa eyaka waametekoa kilikoa meeloganeya.
40
Nitikale one oyali-kiti-pala okome okome
edekolo piti motiki-pe. Kipa nooke wene tugamekete pitipa motiki-pe wa okale
41
piti tube
mati motaneya tokome kini kini oote tekete ekete pupulege ue minetameka oneme okole-
kamadopa i tokono, Yesupa edoa ali kakome tokoto patu wa ka oa kakeneya.
Make Make
<<
44
>>
Make Make
<<
55
>>
5
Yesuyo Ipono Ti Awikolokaneya
(Matiu 8:28-34, Luke 8:26-39)
1
Yesu one oya-lawe-pala ue dipike eni mea pote Galili ue mine eka matanuke Gerasa
yatenane take witapaneya.
2
Witapekome ue dipike mea matanuke katepitoa pome ka ludu
yakaka poane ipono awitane ago pade one kotua nekeneya. Einagopa tuane ali atoa oloyo
toai taneka kawa nekeneya.
3
Einago tuane yene oloyo toai taneka yakene agopa padameka
dekoa moa kawikamele toameneya. Kapa poomeka lutua kawikamele toameneya.
4
Kawikoa
enekolika kapa tepo mekakakoi kugutukoa tadekatapea pitoa pome ni kapa poo kakakoi
kekolokoa pitoa pokala taneya.
5
Likonu loyoka eni ta luduka tono tono wanekeka yakome
ka oa tigini-pala aloame koboa taneya.
6
Nitima yawa kawapa padepete padeka mati kakome enekale Yesu nome kakale
enekome one kakata teyapea nome wadini tukupia mekome
7
ka telo okome okome ako
odene meko Akolaline mana Yesu nepa edade noka-pe. Akolaliyo yakakoane ukuno, no
tete meamoano wa-ye wa kowitaneya.
8
Nimo wa kowitikomepa Yesuyo poane ipono ne
winago takoa pa wa okale tokome ni akeneya.
9
Nimo okale yatekome okome neke ibini te-
pe wa okale okome i agoke toto peya mati awinote mekoya tokome ibinipa ipono ti wa
ootokoa
10
kowitikome okome toto i ta wawa padeka poe wa moa wetekamea wa kowitoa
kakeneya.
11
Nipete einakeya liti tono kebonoke kai peya mati kimi ke noa kakeneya.
12
Nitikoli tokome ipono-kitame Yesu kowitikete ekete toto kunuka kunu kai-kitike
awiponoono, moa wetekoa ta wa kowitaneya.
13
Nipa poe wa Yesuyo okale takoa
pootapekete e kai-kitike awipaneya. Nitikoli einaka eina kai tono payaneke kawa palake
ketipea kikilikoa pote atukolokapaneya. Nipa ege egeta kadukoa (2,000) tadiya kai ue nakoa
tukolokapaneya.
14
Nitikoile enekete kai egetane yene to omoa pote ali atoa ta latia pitikoikaka tayo yapu
luduka eni tanemo oa pupitikama pekeneya. Nitikoli yatekete edele taneyake ikiti patu wa
enadete nekeneya.
15
Yesu kakata eni note enekoli ipono ti awitaneya yakanakago wene kiyo
akaneya mea pue wa moa kakeneya meadeka. Nitaneya mekale enekete ekee wa piti tokale
kakoli
16
eida kakete enile tokale enekoi yename ete dika dika wa ipono awitaneya meane
ago-pala tanemo oa ni kai-kiti-pala tanemoka i i wa to awea akeneya.
17
Nitaneyake e yename
i take meameneya, wete pade take poano pa wa Yesu kowitaneya.
18
Nitikoli eni ta tewitikoa
ue dipike peapetekoa poademe kakaka ipono awitaneya yakanakagome okome nepala
odenekata yatono pato wa Yesu kowitikale okome
19
nitamatono, neke take ali atoa mekika
poke mepamene. Nipa no Ali Munoyo ne ela motekene epetekakoumo neke ali atoa to awea
oma poano pa wa akeneya.
20
Nitaneyake Dekapolise ta ludu yakome Yesuyo one
epetekakanakamo i i wa to awea oma yakale yatekete peyame ekee wa wene kainya pianeya
kakete ka oa kakeneya.
Yesuyo Dairasine Konakoma Kamotokoa
Mamina Nami Mitikane Atoa Epetekanemo
(Matiu 9:18-26, Luke 8:40-56)
21
Yesu ue dipike wa peapetekoa pome mea eka matanuke wakapea pekeneya.
Wakapea pome katepitoa kakale ali atoa peya mati one mekata koukoa note kakeneya.
22
Nitoa kakoika losu yapu talo tane ago pade Dairasi wa ibini akene ago nome Yesu
enekome one kawane witipitoa kowitikome okome
23
anu konakoma pene tuademe toko.
One latoa yamotono, tuoukome pikota ne noke yono pia epetekakoano ta-kale okome
24
nitouno patoe wa einago-pala opia pekeneya. Opia poademe pokaka ali atoa lewi lewita
pia note apua takama nekeneya.
25-26
Eni ali atoa pakeke eya atoa mali tuku kakoa (12) ponoka toa kamate yokoa
kakome yeneme tuaneya meane atoa litima nekeneya. Einatoa papete dokosa ali-kiti
mekoika epetekamotoa pokala taneyake kee-kama enekakale meaneya. Latekamotoa pokala
taneyake epetekamele toamokale one kue peya takoa wetekaneyake pa ete toa yene tube
toma pekeneya.
27
Nitane atoame Yesu toma yakenemo kugu yakaneya tokome einali atoa
pake pake Yesuno mukiti lono lekama nome one tokoo kakene mamina nami mitikananeya.
28
Nipa i agono kakene mamina namido mitikakenepa latoane pou wa wene pikome taneya.
29
Nitoa nome mitikakale eina eina one kamate pegetoa yotokana toa yoameneya kakome
eina teigome tadeko wa wene taneya.
30
Nitikale Yesuyo one tele padeke weamutukome
tadekono wene tokome eina eina kutu peketapekome ali atoane kabeta pake pitikoa okome
okome noanu teyo mitikakato-pe-kale
31
one oya-laweme ekete ali atoa apua takoa ne
unukamoa mitikakoa tikino, edekolo oko-pe wa okoli
32
one mitikanane tuku toa enademe
enapemu taneya.
33
Nitikale einakatoa one epetekakana wene tokome pitime kolu kolu
nokale Yesu kakata nokome kawane witipitakome one-pala tokanakamo to awea akeneya.
34
Enimo okale Yesuyo okome anu kono nooke wini wene tugake tokoleme ne latekakolo
uku. Neke tepe kolotini kilikoa pimotono pa. Neke tane yene teiganeya poano pa wa
Yesuyo akeneya.
35
Nimo oa kakaka tobou agono yapu pitikoi yene pade-mene nekete ekete neke
konopa tukome tukano, mone i Tikisa ago polipo takakoa kawamea wa onaneya.
36
Nimo
omotoake Yesuyo losu yapu talo tane ago-pala okome okome no i agome neke kono oyake
latekamele toko wa piti toameneya meamene wa oomotokome
37
Pita Yameta Yamene
wamene ago Yone toa koua pomepa ete yene noameo wa kini-mene pekeneya.
38
Losu
yapu talo tane agono yapu eni koua pokome enekale ali atoa ete palo oto palo toa kakete
komo ka ta pitikoa kakoli enoa yakaneya.
39
Nititikoa yapu tuapea pokome okome dekolo
kale kene natekoa komo ka pitikoa kaki-pe. I akoma tukome tuaneya menano, pa atu pia
meko wa akeneya.
40
Nimo okale yatekete e ali atoame one yau takakoli kiwi peya akolono
poe wa wia lititapeneya. Nititikoa etene ninetaka one koua nokana ali-meneka patono noe
wa einakoma yene taneya piane yapu luku pekeneya.
41
Nitoa pokome akoma-pala okome
okome Talisa kumi. Enipa tone agalekepa i akoma deya yakoa wete kamoa wane uku wa
okome akeneya.
42
Nimo oka oka kamokoa yakeneya. Mali tuku kakoa (12) penane
akomapa Yesuyo eni kamotokaneya. Yesuyo enile tokale enekete one-pala kakene yename
ekee wa ka oa kakeneya.
43
Nitikoli okome anume tukumo ali atoa enekete natemoka to awea
wameamene. I akoma nee moa lawetoe wa Yesuyo akeneya.
Make Make
<<
55
>>
Make Make
<<
66
>>
6
(Matiu 13:53-58, Luke 4:16-30)
1
Yesuyo einakoma latekamotokome one pine take wakapea pome mepaneya. Koua
pato wa one oyali-kitika pote mepaneya.
2
Eidapa ko mea pupu toamene-pete Yesu losu
yapu pome Akolalinemo olaukoa kakeneya. One eni olaukoa kakome okamo yatekoi-kiti
peya matiyame ka oa kakete ekete i agopa teyo olaukaneya-pe. Edane peku nootokoa
okoto patu. Namolo enamokoonakale padele padele telekole i agome i toko.
3
Beita, i agopa
pa kodou ago. One nine Maria i mea one wamene-mikiti Yame Yosi Yudase Saimone
einago-mene i mea tiki. One laine-mikitika tone i take meki wa one-pala wene pokete paya
tetepo takoa wakeneya.
4
Nitikoli okome Akolaline agale to awea akakagopa ete yename kei
pimotoake one ta pine yenameka one kako yenameka one yapu pitiki yenameka paya tetepo
takoa wakala tiki wa Yesuyo akeneya.
5
Nitaneyake eni take mekome padele tubele tamele
toameneya. Nilepa tamele toameneyake yene tane ali atoa yono pia latekakilepa pa natetekoa
latekaneya.
6
One take yene oneke wene tugameneya mekoileke Yesu wene kainya pianeya
meaneya.
Yesuyo One Oyali-kiti Ta Padeka Padeka
Moa Wetekanemo
(Matiu 10:5-15, Luke 9:1-6)
Yesuyo one eni ta tewitikoa pome ali atoa pitikoika yakome Akolalinemo olaukama
yakeneya.
7
Nitoapa one oyali-kiti tuku kakoa (12) one kakuta koukoa noe wa kayo oa
mootokoapa einapete titimoa takuta takuta wa moa padeka padeka wetekakome eya wa
akeneya. Noanu tele patu kautakoa kama yakete ali atoake awitane poane ipono takoa
wetekakala tamene.
8
Nitima yaketepa palawe wane aua poamoa ka ua poamoa kue lene ua
poamoa pa poatino poe.
9
Enika eniya aua poameketeke iti toua moa kawa yene mekoa
tamene. Tigini kawatiki mamina takuta aua poamoa odene kawatoa pamene.
10
Nitoa pima
yawa pade take pote meketepa yapu yapu yawameneya odene yapu-kama mea kawa pokala
tamene.
11
Wa pade yapu pitikoi ali atoame kini yapu noatino noe wa makutukoa moamoa
kini agaleka yakoa moamoa tokolipa kini eni yapu tewitikoa pekete kini kawake kakene kege
ko ketikoa pamene. Akolaliyo kiwi kibu moateko adeka pia nitamene wa Yesuyo akeneya.
12
Nimo okale e ali-kiti pote ali atoa kini namolole tewitikoa wawe wa mo wima pekeneya.
13
Nitima pekete ali atoake awitane ipono takoa wetekoa eya kuya yene tane ali atoa kainya
matike peto pekoa latekoa taneya.
Ali Atoa Ue Motokama Yakene Yone
Kabe Teiganemo
(Matiu 14:1-12, Luke 9:7-9)
14
Yesuyo toma yakenemo ali atoame otoka otoka tokoimo kugu Erodeyoka yakaneya.
Pade-kitame ekete ali atoa ue motokama yakanakago Yone tuaneyake wa kamoa nomepa
nipa tubele mati toateko tele eni luaneya yakome toko wa oa
15
wa pade-kitame ekete e 'e,
mena. I agopa Ilaida wa oa wa pade-kitame ekete i agopa Akolaline agale papete to awea
akane ago tetepo takoa meko wa oa taneya.
16
Yesuyo toma yakenemo kugu eni yatekome Erodeyo okome ekee, ali atoa ue
motokama yakanakago Yonepa kabe teigoa tukamotoane tokounake wa kamoa nokome
toko wa akeneya.
17
Namolo Erodeyopa one poyo ali-kitame Yone dekoa moa kapa po
kakoa po yapu pitikamotoa tikilepa eya atoa Erodiasine wene epetekademe taneya. Nipa
Yoneyo eya tokale tokome taneya. Erodeyo one kale atoa wamenago Pilipi natono Erodiasi
one motaneyake
18
Yoneyo Erode mekata nokala tokome okome neke kale atoa kode
motekepa toto Yu yenane kekanele wini toka wa lugutukoa kikoa okala taneya.
19
Nitikale
Erodiasi einatoa Yone-pala timini nakale mekome wia tukamotadiya wa wene pikake
enapete pade nitamele toameneya.
20
Nipa Erodeyo Yone wia tukamene piti tokale mekome
mama moa yopikale tokome nitamele toameneya. Erodeyopa Yone einago epetanele-kama
toa wene kiyo akeneya mea toko ago wa wene taneya. Eni wene tokome mama moa
yopikome one agalepa yakada wa one mekuta ne noo wa motokome yakoai taneya. Nitoa
yatekome wene kainya mati pianeya meake wedia yakakoa meaneya.
21
Nitaneyake Erodiasiyo Yone wia tukatekale pa nepikoa meaneya. Nitoa mekakoa
Erodeyopa one opiane oi ponokale eya taneya. Oneke timini kakoa yakene yeneka one
tobou poyo ali-kitika Galili take ibini akene ali-kitika kini toge kikakakuno toge nee natono
noe wa agale oa wetekakale nekeneya.
22
Kini note koukoa mekoita Erodiasine kono nome
tiabu toa kakale Erodeyoka one togeke nekene yenameka ke wa wedia meaneya.
23
Erodeyo
ke wa wedikome okome agetai tia, anukuya-kiti pade memotono wenedo pikepa nipa iya
mano wa oano ta. Anume yopiku ta kounale oto pia yamea wa okaleka oto piane yameou
wa Erodeyo okale
24
akolono nine kakata pokome okome au a edeya mano wane ou-pe wa
yatekale niname okome poke imo akapa. Ali atoa ue motokama yakanakago Yone kabe
teigoa one wago wane okolo kagonoke pia oto memotoa toano ta wa akoano pa wa niname
oa wetekaneya.
25
Nimo okale teyapea Erode mekata pokome okome ali atoa ue motokama
yakanakago Yone kabe teigoa wago wane moa okolo kagonoke pia oto memotoa toano ta
wa akaneya.
26
Nimo okale yatekome Erode elapa tube mati toa kakeneya. Nitikomeke one
namolona etene tia wa okana agale tetekakomepa one-pala opia mekete toge nee nakoi
yenane wene potokamedekale eya taneya.
27
One poyo ago pade moa wetekakome okome
Yone kabe teigoa wago wane aua notokoano pa wa moa wetekaneya.
28
Nitikale pome
Yone po yapu pitikata kabe teigoa one wago wane okolo kagonoke pia aua nome eina
tuatoa metekaneya. Nitikale moa ninane aua potokaneya.
29
Nitaneyake Yonene totono
yakoa one opia yakene yename Yone kabe teiganeya wa okoimo yatekete Yonene tigini
monote aua pote kota keneke pipaneya.
Nee Lawetanemo
(Matiu 14:13-21, Luke 9:10-17, Yone 6:1-14)
30
Yesuno oyali-kiti Yesu kakata oto wa wakapea note kini padele padele toma
pokoinakamoka agale olaukama pokoinakamoka i i wa oa mekala taneya.
31
Nitikoli okome
opi kini pupu ko meatino, ali piamene take patono noe wa akeneya. Nipa kini mekoita ali
atoa nekete pekete toa kakoli kini nee toa noatekoile toamokale tokome ni akeneya.
32
Nitoapa ue dipike peapetekoa pote ali piamene take mea pote witapeneya.
33
Nitoa pokoli ali atoa kainya matiyame enekete ekete kunu pikipa Yesu one oya-
mikiti-pala poko-la wa kini kini tubeya take pitikoika kawa one pome witatekata ka ludu
pote teigoa kapaneya.
34
Teigoa kakakoa Yesu ue dipi mea nome katepitoa kakome enekale
einali atoa eida oboa kakedekoi. Einali atoa enekome okome i ali atoa talo tokago
kawamokono, egetamene sipi sipi kai keneya meki wa ela motokome pademo pademo oa
olaukoa kakeneya.
35
Ta pene lima lima tokaka one kakata one oya-mikiti nekete ekete ipa ali
piamene taano,
36
ta-pala lima nokono, ali atoa ta latia pitikika tayo yapu luduka i yene kini
noatiki nee topo toa mopamene wa oa wetekoa ta-koli okome
37
kini noatiki neepa kime
motokoa lawetamene-kale ekete neme edemo wa oko-pe. Ege kadukaka kapidi kakoa-peta
kadukoa (1,000) kina kueme kini nee motokapote oto wa lawetemotoa oko-pe wa akeneya.
38
Nimo okoli okome kini palawe wane edela piko patuno, enepoe wa okale pote enoa
wakapea nekete ekete palawe ko kakoa-pala (5) de mou yomo deya takuta toa piko-koli
okome
39-40
i ali atoa kiwi peya poma ludu tutu tutu wa payapono pia kilikoa meetapeo wa
okale padeka-kiti ege odepeta kadukoa (50) padeya payapono pia mekala toa wa padeka-
kiti ege takupeta kadukoa (100) padeya payapono pia mekala taneya.
41
Nitikoli Yesuyo
palawe wane ko kakoa (5)-pala de mou yomo takuta toa moa pikoa kakome ate tibuke
nepikakome ke wa Akolali-pala ootokoa popimotokome one oya-mikiti metekome okome
tatikapoatino poe wa mekala taneya. Wa eina toa de mou yomo takuta popimotokome
mekala tokale moomotekete tatika tatika topokoli
42
peyame moa noa tagatapea kitipu
meaneya.
43
Nootokaneyake palawe mou kugu paka pitaneya wekotoa moa ua ka katika
tuku kakoa (12) mako puputua moa pianeya.
44
Eni palawe nakoina-kiti ali-kama takoa oi
motikilepa ege egeta kadukoa (5,000) nakedekoi.
Yesu Ue Tali Ludu Yakenemo
(Matiu 14:22-33, Yone 6:15-21)
45
Yesuyo e yene lawetetekoa kakome one oya-mikiti-pala okome okome ue dipike
peapetekoa pote eka matanuke Besaida take kiwi namolo takoa mepoatino poe. I ali atoa
kini kini pitikika pipoatino poe wane wetekamotekene nouno, patepoe wa one oyali-kiti
wetekaneya.
46
E oboa kakoi yene pipoatino poe wa wetekatekoapa Akolali kowitademe
tono tobouke lewia pome mepaneya.
47
Ta likaka Yesuno oyali-kiti ue dipike mea muke
pekete kakoli Yesu matanuke kidene kakeneya.
48
Nitoa kakome enekale pupulegeme ue dipi
kiwi nokoina lono kutu wa popokoa aua poademe tokoa kakale enaneya. Pa nitikoa kakale
ta patademe tu ei teigaka Yesu ue tali ludu kautoa nekeneya.
49
Nitoa nome patukademe
ponokale eneketepa ipono nokono wene pikete ka oa kakeneya.
50
Nipa peyame one nokale
enekete tekete piti mati motekete akeneya. Nitoa ka oa kakoika okome no i nukuno, tepe
kolotini kilikoa pimotono piti moameo wa ootokoa
51
ue dipike pome kipala opia meaneya.
Pome mekale pupulege te itatapeka. Nitikale enekete one oya-mikitame ekee wa wene kainya
pianeya meaneya.
52
Nipa Yesuyo palawe wane moa tokanakale enoake ile tokanakago wa
wene toamekete taneya.
Genesarese Take Yene Pitikoi-kiti
Yesuyo Epetekanemo
(Matiu 14:34-36)
53
Ue mine eka matanuke witapote Genesarese take katepitoa kakete ue dipike po
kakoa yomoke kebeteloganeya.
54-55
Nitaneyake eni take yename enakago eni noko wa eni ta
ludu yekeika yukukata teyapea oawineya pekete kini yene taneya pikoi-kiti leyo leyo toa one
meko wa okoita-kama aua nokala taneya.
56
Nipa Yesu ali atoa pitikoika de takeka tube
takeka tayo yapu luduka yakaka kini yene tane ali atoa makesike-kama piponokala taneya.
Nitikete ekete i yene tane-kitame neke mamina nami mitikatekamotono ta wa kowitikala
taneya. Nitikoli one mitikatekakoi peya latoa pokala taneya.
Make Make
<<
66
>>
Make Make
<<
77
>>
7
Yu Yenane Kaua-mikitame Kekaneya
Latikama Nekenemo
(Matiu 15:1-9)
1
Padepete Parisi ali-kitika Mosesene totono pine to a olaukane ali-kitika Yerusaleme ta
kawa note Yesu kakata oboa kananeya.
2
Oboa kakete enekoli Yesuno oya-lawe padeka-kiti
kini yono abe ko ameneya mekete nee nakedekoi. Nipa kini kekanele eni tadekoi.
3
Parisi
yenameka ete Yu yene peyameka kini kaua-mikitame toma nekenele tekete kini yono abe
ko otokoa nee moa naki. Pa moa nakiya mena.
4
Nipa makesi kawa yapu note nee moa
noadetepa kiwike kewenoko poanele eni koguna wa yono abe namolo takoa kogala tiki.
Kini kapoka nee yoatiki meteka kapame latiane okoloka abe ko a enile tokala tiki. Kini
kekanele takaya kekatekoa nitikala tiki.
5
Nitikiya tokome Parisi ali-kitameka Mosesene totono pine to a olaukane ali-kitameka
Yesu yatekete ekete neke oyali-kiti kini yono abe ko ameneya nee pa moa nakipa tone kaua-
mikitame kekaneya latikanele tekete tikino, edekolo tikiti-pe-koli okome
6
wene takuta
pianeya meki yene kini eni toatekoilekepa Aisaiayo papete eya wa wia mekapianeya.
I to aweane uku ali-kiti kini kabunume no kei pikilepa kini tepene paya wene pianeya
meketeke tiki.
7
Nitikino, kini kowitikoimopa edoane yakamotoa-pe. Kini kaua-
mikitame titia olaukanele ile tamene ile tamene wa olaukama pikino,
yakamou-li wa Akolaliyo wene takane toa Aisaiayo papete wia mekapianeya.
8
Ae, Akolaliyo tamene wa akenemo ete pimotoa wakete kini kaua-mikitame titia olaukanele
litia tiki.
9
Nipa kini kaua-mikitame titia tanele litia toadetepa Akolaliyo tamene wa akenele
wakete onekele pa lede takama yaki.
10
Moseseyo papete eya wa akeneya. Neketai
neka uata kei pia mape moamene. Panagome nitameneya etene nineta akoa tekalepa
einago moa wia tukamene wa Moseseyo akeneya. Nimo wapa akeneyake kime eya wa iki.
11
Panagome-kiti one etene nineta-pala okome okome ae, agetai agauata kita ada atue deyata
mekiyake kita auapeane padeya meatekuyapa kobane latikakouya tekene meamele toamoko.
(Kobane latikaku wa tone agaleke eketepa nipa Akolaline pikaku wa ekete oko.)
12
Einagome nimo ootokoake naniko einakeya etene nineta meou wa meademe tokale kime
ekete kobane latikakanano, meamea wa iki.
13
Nipa Akolaline agale ete pimotoa wawa kini
kaua-mikitame toma nekenele litikete ile tamene ile tamene wa olaukoa enile pale tokala tiki
wa Yesuyo akeneya.
Ali Atoa Wene Moa Koiganeleke Akenemo
(Matiu 15:10-20)
14
Yesuyo eida oboa kakoi yene one kakuta noe wa kayo oa motokome okome kipala i
ukumo wedoa yakoa moamene.
15
Kimane keneke aka ketipea moa nokotikako neemepa
pinali one wene oyake moa koigamele toamoko. Nitamele toamokoyake pinali one tepene
meaneya poane wene atepea kabunuke witako agalemepa pinali one wa moa koigamele
toko.
16
(Yakou wa kale piiyakoa meki-kiti kime yakoati wane uku wa Yesuyo akeneya.)
17
Nimo oomotokome yapu pome mepokale one oyali-kiti nekete ekete neke ina pedoa
okana agalepa pine edoa pikoto-pe wa yakanokoli okome
18
ae, ete ali atoame wene
toamikino, opika kime wene toamekete iki-pe. Panago one kimane keneke aka ketipea noa
nokotikako neemepa pinali one wene oyake moa koigamele toamoko.
19
Nee eya moa
nakolopa einagono kimane keneke pome tepene ponome me me toa wa te pu latia
patukatapekala toko. Nitikome tokono, one weneke patukoa koigamele toamoko wa
Yesuyo akeneya. (Nipa eya kuya nee peya Akolaliyo ali atoame nomotoa-kama latia
pikaneyano, odeneyaka kekaneya latikakile toameamene wa okome akeneya.)
20
Nimo
ootokoa kakome okome e ku poane wene tepene meaneya ya wa kabunu witakolemepa
pinali one wene moa koigakoya.
21
Nipa tepene meaneya ya wa witako toa tokome pamoko
mea ni panagoneya kode moa ni ali wia tukoa ni mone padane atoa lia
22
ni eya kuya tepi
moa ni ele kule ko ianele toa ni ali atoa oa yotokoa ni abeyale toa ni mone panagoneya po i
moa ni ete ali atoa-pala akoa agale oa ni ete yene paya tetepo takoa ni ele kule pale toa
23
enika enilepa aline tepene meaneya ya wa witako toa pine yene kiwi moa koigamele toko
wa Yesuyo akeneya.
Yesuke Wene Tugoa Meane Atoame Tanemo
(Matiu 15:21-28)
24
Yesuyo enimo oomotokome Taia ta liti piane take pekeneya. Nitoapa panagono
yapu eida pone paigakoane meouno wene pianeyake oyake nitamele toameneya.
25
Yapu
pome mekaka eina eina atoa padame Yesu nome meko wa okoimo yakoa nome one
kawane witipitaneya. One konakoma deyake ipono awitaneya tokale ni nekeneya.
26
Einatoapa Geriki yatene atoa Sairoponisia take opianeya. Nitane atoame Yesu kowitikome
okome anu konoke awitane ipono neme takoa wetekakoa ta-kale
27
Yesuyo pedoa agale ete
okome okome nee eya nako-pete-kama mati-kiti namolo takoa nee lawetamedeko. Mati-
kitane nee tatia wa padeya tue tine-kiti kakoita pitikakopa nipa poko wa Yesuyo akeneya.
28
Nimo okaleka wa ete einatoame agale topo takakome okome winimopa nimini okoyake
mati-kitame moa noa kugu pikapa nee naki walai keneke tue tine-kiti kakoita pitakale tue tine
namele toko wa okale okome
29
neke wini okomoke eya wane uku. Neke konakomake
awitane ipono wete takoa pokome tokano, pa wa wetekaneya.
30
Nitikale one wakapea
pokome enekale one akoma walai waneke kilikoa kawia pikale enaneya. Oneke awitane
ipono takoa pekedeka.
Yesuyo Kale Kene Keteaneya Agale
Amele Toameneya Meane Ago Epetekanemo
31
Yesu Taia ta tewitikoa Galili ue mine wakapea poademe pokomepa Saidone
Dekapolisi tata patukoa pekeneya.
32
Nitaneyake pade ali-kitame kale kene ketea agale liyo
liyo pitane ago Yesu kakata aua nekete ekete i ago yono pia epetekakoano ta wa
kowitinokoli
33
einago moa ali atoa kakoita wawa one kidene eko aua pekeneya. Nitikome
einagono kale kene yono pitikoa tekelipu tootokoa einagono keke mitikakatekaneya.
34
Nitoapa tibu ate enekakome kenemada ootapekome okome Epasa wa akeneya. Epasa
wapa wete peetapea wa okome akeneya.
35
Yesuyo Epasa wa okale eina eina einagono kale
kene peetapea keke epetekoa tokome one agale yapetekoa witoa akeneya.
36
Nitikale Yesuyo
e yene-pala okome ete ali atoa kotukete anume i tukumo to awea ikileka toameamene wa
akeneya. To awea ikileka toameamene wa okala taneyake one eni tanemo oa pupitikama
yakeneya.
37
Nipa wene kainya mati pianeya kakete ekete i agome ele kule tikilepa epetanele-
kama toko. Kale kene keteaneya meane-kiti epetekakolo agale yakoa ni agale amele
toameneya meane-kiti epetekakolo agale oa tiki wa ka oa kakeneya.
Make Make
<<
77
>>
Make Make
<<
88
>>
8
Nee Lawetanemo
(Matiu 15:32-39)
1
Enipete-mene ali atoa peya mati Yesu kakata wa obomoa note kananeya. Kini nee
noatekoiya toamokale enekome Yesuyo one oyali-kiti one kakuta noe wa kayo oa
motokome okome
2
i oboa kaki ali atoa mama moane ela motekene uku. Ta tebolo pataka
toa no-pala opia yakete kini noatiki nee peya takatekoa pa kaki.
3
Padeka-kiti ta tetemada pia
note kaki. Nee noameneya kini kini yapu tadoa poatino poe wanedo wetekakolupa yapu
poadete pokoika pake kobume tukete witipitoino wetekamele toamoko-kale
4
one oyali-
kitame ete Yesu-pala agale topo takoa yatekete ekete ipa ali piamene taano, kini noatiki nee
edoa motokoa lawetemotoa-pe wa okoli okome
5
ni kini palawe wane-kiti edela piko-pe-kale
ekete tatono kakoa (7) odene piko wa okoli
6
i poma ludu meetapeo wa e ali atoa
mekatapeneya. Nititikoapa tatono kakoa (7) palawe wane moa pikoa kakome Akolali-pala
ke wa ootokoa popimotokome one oyali-kiti metekome okome i ali atoa tatikapoe wa
mekala taneya. Nitikale mootokoa e ali atoa mekoi toa nee pikama yakeneya.
7
De mou-
meneka moa eina toa Akolali ke wa ootokoa popimotokome metekome okome i mouka
tatikapoe wa okale
8
pikama yakoli noa tagatapea kitipu meaneya. Nitaneyake nee kugu pika
wekotoa moa ka katika tatono kakoa (7) mako puputumoa pianeya.
9
Eni nee nakene-kiti oi
motokolipa ege egeta kadukoa (4,000) tadiya nakedekoi.
10
Eni ali atoa kini kini yapu yapu tadoa poatino poe wa wetekatekoa one oyali-kiti-pala
ue dipike wete eni peapetekoa pome mea Dalamanusa take witoa pekeneya.
Tibuke Padele Tubele Witakamotono Ta Wa
Parisi Yename Yesu Likoa Enanemo
(Matiu 16:1-4)
11
Einapete Parisi yene padeka-kiti Yesu kakata note one-pala agale ete oto topo takoa
oa kakete ekete neke toma yakole Akolaline tele patu kautakoa kake tadekalepa nipa a
tibuke padele telekole witakamotono ta wa likoa enaneya.
12
Nitikoli tepe we tokale kakome
okome ae, ipete meki yene kimepa no neke tokolepa Akolaline tele patu kautakoa kake
tadekalepa nipa padele tubele yamea ta wa ikipa edekolo likoa eneki-pe. Enile pade
yameamou wa oomotokome
13
e yene tewitikoa pome ue dipike wa peapetekoa pome mea
eka matanuke witoa pekeneya.
Parisi Yene Erode Kini Yisi Kugu Kiwike
Weamutukaya Kekatekoa Yamene Wa Akenemo
(Matiu 16:5-12)
14
Yesu eni mea pokaka one oyali-kitame palawe wane-kitipa wene kayapea ua
noameneya tuku toa kakoli odene wane piadeka.
15
Nitadekale Yesuyo one oya-lawe pubu
okome okome Parisi ali-kitika Erode einagoka kini yisi kugu kiwike weamuoono, wedoa
yamene wa okale
16
kini kini yakate tekete ekete tone noateko palawe wane-kiti wene
kayapea ua noamokoonake ni okome oko wa akeneya.
17
Nitikoli kini tepene piane wene
tetoa enekome okome kini palawe wane ua noamokoinakepa edekolo oa kaki-pe. Anume
tokoule enetekoake wene toamekete iki-pe. Kini kolotini lupi tootokaneya meki-pe.
18
Kini
lene kamotoake anu tokoule enoa moamokoi-pe. Kini kale kene kamotoake anu okoumo
yakoa moamokoi-pe. Nipa anume tokolu kime enekoinakale wene kayapetapea mekete iki-
pe. Nipa eya tokouna.
19
Palawe wane ko (5) kakoane moane ali atoa ege egeta kadukoane
(5,000) lawetekolu nootokaneyake kugu pika wekotoa moapa ka katika edela mako
puputumoa pikoi-pe-kale ekete ka katika tuku (12) kakoa mako puputua pikoo-koli okome
20
ni pade-petenaka palawe wane tatono (7) kakoane moane lawetekolu ege egeta kadukoa
(4,000) ali atoame nootokaneyake kugu pika wekotoa moapa ka katika edela mako
puputumoa pikoi-pe-kale ekete ka katika tatono (7) kakoa mako puputua pikoo-koli okome
21
eina tokoule enetekoake wene toamekete iki-pe. Eina tokouna toane wa tamele tokolo
mekene tukutumo wa Yesuyo akeneya.
Besaida Take Leneta Lianeya
22
Yesuyo Besaida take pato wa one oyali-kiti-pala pome mepaneya. Nitikale pade
yename leneta lianeya meane ago oneke aua note kowitikakete ekete i agopa yoname
mitikatekoano ta-koli
23
Yesuyo pata wa einago yono moomotokome eni ta kago ketepono
patukoa akolono pekeneya. Nitoapa one leneta tekelipu takatekoa yono pikome okome
padeya eneko-pe-kale
24
ate enekakome okome ali-kiti enekilepa tukuyake yomo-kiti yakene
tetepo toko wa akeneya.
25
Nimo okale einagono lene yono wa pikale wedoa nepikoa pikale
one leneta epetekatapekale padeya padeya peya keleyo pikolokakale enaneya.
26
Nitikale
Yesuyo okome winika wini ali atoa pitikika poameneya neke yapu patukake poano pa wa
oa wetekaneya.
Yesu Nepa Keraisu Wa Pitayo Akenemo
(Matiu 16:13-20, Luke 9:18-21)
27
Sisaria Pilipai take pato wa Yesu one oya-lawe-pala eni take ali atoa pitikoika
poademe pokome okome ali atoame no te kakulu okala tikiti-pe wa yatekale ekete
28
ali atoa
padeka-kitame ne i agopa ue motokama yakanakago Yone wa oa ni pade-kitame ekete ne i
agopa Ilaida wa oa ni pade-kitame ekete ne i agopa Akolaline agale to awea akako ago pade
wa oa tiki-koli okome
29
nimo wapa akedikiyake anu oya-lawe kime no te kaku wa iki-pe-
kale Pitayo ete topo takakome okome nepa Keraisu wa papete takoa kakapiane ago wa
okale okome
30
no Yesupa Keraisu taatekoane nekedeku wa ali atoa kotukete etene to awea
ikileka toameamene wa oa tukaneya.
Yesuyo One Tete Moa Tuatekamoke Akenemo
(Matiu 16:21-28, Luke 9:22-27)
31
Nitoapa Yesuyo one tuatekamo i i wa enipete titimoa to awea okome okome no Ali
Yatenane Oyagome tete-kala moane kawou. Nipa Kanosolo ali-kiti ni Akolalike lodo
yotokoai tiki tobou ali-kiti ni Mosesene totono pine to a olaukaki ali-kiti enika eni ali-kitame
no kote tokale wawa wia tukoi. Nitikolika ta tebolo takoa pataka-pete kamoane pou wa
Yesuyo akeneya. Nipa keleyo to awea akeneya.
32
Nimo okale Pitayo pata wa Yesu-pala eko
keneya aua pome kakome kikoa okale
33
Yesu kutu peketapekome o yene enekome okome i
ago Setanu ne anu mukiti lono kuka ponoke kapono, winipa Akolaline wene piko toa
wamoa, pa aline wene piko toa okono, wa wa kikoa akeneya.
34
Nimo ootokoa kakome one
oya-lawe e oboa kakene yene peya one kakuta noe wa kayo oa motokome okome no i ago
litima nou wa wene pikagopa nekele tewitikoa wamene. Nipa ne wia dekatiki yomo-pala aua
nou toa keneya tete mokoa kakeka no litima namene.
35
Kepene mama motokome tukaya wa
piti motoko agopa etepea tua atua poo. One kepene mama moamokome Akolaline epetane
agale-pala no i agotake oyake tuou wa wene pikagopa toa motaneya mea kama poo.
36
Panagome-kiti one yomini atukome atumotoake itonoke pia kawa tokoya peya
mootapeadekalepa edeya weike moamoo.
37
One yominido atukome atukalepa edeyame oto
wa topo toa momotoa-pe.
38
No kaku-pete meki yene Akolalinele takamoa poanele toa
mekino, kiwi panagome no-pala anu agaleta ya motokome wakalepa no Ali Yatenane
Oyagome einagoka ya motekene wawou. Nipa Agetai pa teleta tootapeneya meko toane
meane one wene kiyo akeneya meki edelo ali-kiti-pala odeneka wakapeane nekene nitou wa
Yesuyo akeneya.
Make Make
<<
88
>>
Make Make
<<
99
>>
9
1
Yesuyo nimo ootokoa kakome okome etene nimini ukuno yakoe. Ita kaki yene kiwi
padeka-kiti wete tuameneyake Akolaliyo ali atoa pawe toa talo tokome padele telekole
tokale enoi wa Yesuyo akeneya.
Tono Tobou Waneke Yesu Pa Tootapeneya
Kakenemo
(Matiu 17:1-13, Luke 9:28-36)
2
Ko melepu kakoa (6) ta patatekaneyake Yesuyo Pita Yameta Yone toa kidene-mene
ete witimoa aua pome tono kakene matike lewia pome kapaneya. Nitoapa o ali-mene
kakakoa one lene timini yono eya yati yati tootapeneya kakeneya. One kakene mamina-pala
yati yati toa ake tootapeneya.
3
One eni mamina ake tootapene toapa padameka mamina abe
ko aka edikoa ake takamele toameneya.
4
Nitaneya kakata Ilaida Moseseta aida kotikatapea
nekete Yesu-pala ko oa kakeneya.
5
Nitikoli enekome Pitayo okome Tikisa ago kimene ko
oa kakita toto-meneka odeneya kakono, ke wa oko. Neme nitika wa okalepa aga yapu
tebolo Mosese Ilaidata kini tutu tutu wa wikakoo wa akeneya.
6
Nipa one oateka agopa
tokale tokome pamo eni akeneya. Nipa Yesuno oyali-mene piti tubeya tokale tokome
akeneya.
7
Nimo oa kakaka wedome agopa takoa kauma nekeneya. Nitikaka eni wedo
keneke agale ludu nokome okome anu mana anu kolotini ago wini kakono, one oka toa
yakoa tamene wa akeneya.
8
Nimo okaka wete enetapekoli eina kakoinakagota
kawameadekoi. Kimene-pala Yesu odene einata kakedeka.
9
Wa naniko eni tonoke keti koma nekete pake Yesu kakome okome Ali Yatenane
Oyago no tuane kamoameneyakepa kimename opi enekoinakamo pa kini luaneya mema
yamene wa Yesuyo oa tukaneya.
10
Nitaneyake eni oa tukakana luaneya yawa meake Yesu
one tuaneke wa kamoane pou wa okanapa edeleke okato patu wa ete oto wa pitia yakakala
taneya.
11
Nitoapa Yesu yatekete ekete Mosesene totono pine to a olaukaki ali-kitame eya wa
olaukakala tiki. Keraisu naniko taatekoa nomotoa Ilaida one namolo takoa noo wa ikino,
enipa edekolo ikiti-pe-koli okome
12
Ilaida einagome padeya padeya peya nodokapiademe
namolo takoa noo wa papete wia mekapiane toa eni iki. Nimini ikiyake eya wane ukuno
yakamene. Ali Yatenane Oyago einagopa ete yename tete mea paya tetepo takoa wawei wa
papete wia mekapianemopa edeyake wia mekaneya-pe wa yakatekoa kakome okome
13
Ilaida einago wete wakapea nekeneyake pade ali-kiti kini wene ponoka toa litia tekete one
tete mekala taneya. Nipa Akolaline bokuke einagoke papete wia mekapiane toa taatekoa
taneya wa Yesuyo akeneya.
Ipono Awitaneya Meane Mati Epetekanemo
(Matiu 17:14-21, Luke 9:37-43)
14
Yesu one oyali-meneka one ete oya-lawe kakoita keti wakapea pote enekoli ali
atoame o yene unukamoa kakoli enaneya. Eni pake Mosesene totono pine to a olaukane ali-
kitika eida kakete o yene-pala neno oa kakoli enaneya.
15
Yesu eni nokale enekete eina eina e
ali atoa peyame ekee wa ka oa teyapea pote makutukoa motaneya.
16
Nitikoli Yesuyo e yene
yatekome okome kinipa o yene edeyake agale topo takoa oa kaki-pe-kale
17
eni pake lukoa
kakene ago padame topo takakome okome anu managoke agale wamoko ipono awitaneya
tokale neeke auane nou wane ni nokou.
18
Anu manake ipono awinokome-kama itonoke
moa aua pitikakala toa kako. Nitikale timini kabunuke lako ka ua yotokoa one kime noto
noto toa mekome one pakunu tau tokome temotele toa kako. Nitikala tokolo tekene neke i
oyali-kitame eni ipono takoa wetekakoe wane auane nokounake takoa wetekaku pekete wili
toa wakoi wa okale okome
19
ae, no kaku-pete meki ali atoa kime Akolalinemo yakoa
moamikino, kini eni poane wene tewitikoa wamotoane edoane nepiane meamou. Neke mana
mati no kakuta aua noo wa okale
20
e yename Yesuke aua nokale iponame Yesuno lene timini
enekome eina eina mati peteka peteka toa kakale itonoke aua pitalogakome welea mekale
timini kabunuke lako ka ua yokoa kakeneya.
21
Nitikale Yesuyo matiyane etene yatekome
okome eni ipono manipete titia awinaneya-pe wa okale okome wete dee matike lukakoa
taneya.
22
Nipa lugutukoa wia tukademe iponame toe mine aua pitikakome uele pitikakome
toa kakoyano, neme oyake tamedekalepa toto ela moa auapeamene wa matiyane etename
kowitaneya.
23
Nitikale Yesuyo einagome oka agale to opitikakome okome tamedekale wa
neme wini okopa nooke wene tugoa mekagomepa padele padeleta tamele tokale too-kale
24
eina eina matiyane etename telo okome okome neeke wene tugakilepa tekeneke wedoane
toamuku. Neeke wedoane wene tugoane memotono auapea ta wa kowitaneya.
25
Nitikale
kinita kakoita ali atoa teyapea koukanokoli enekome Yesuyo poane ipono kikoa okome
okome kale kene ketekoa agale wamoa toko ipono ne wini mati takoa poke wa pade
awinamea wa oa tukale
26
iponame ka telo ootapekome eni mati itonoke aua pitikoa
weletekoa kawa takoa pekeneya. Nitikale eni mati tukome tuane tetepo taneya pa pikale
enekete e yene kainya matiyame tuadeko wa okoli
27
Yesuyo mati yono moa kamotokakale
kamokoa kakeneya.
28
Yesuyo eni mati latekatekoa yapu nome mekale one oyali kidene-
mene ete witimoa kakete ekete totome eni ipono oyake takoa wetekamele toamokano,
edekome tokato patu-koli okome
29
kini weneme dikane ipono takoa wetekamele
toamokoyake Akolali kowitoa kaketepa oyake toi wa akeneya.
(Matiu 17:22-23, Luke 9:43-45)
30
Yesu one oya-laweka eni ta tewitikoa pote Galili ta ludu yakeneya. Nipa Yesuyo one
oyali-kiti olaukama pokome tokome take yename polipo takakaya tokale yotokamotokome
pekeneya.
31
Nitoa olaukama pokome okome no Ali Yatenane Oyagopa pade ali-kitame
wimotoa panagome ete moa meademe toko. Moa metekale wia tukakolika ta tebolo takoa
pataka-pete Akolaliyo moa kamotokoo wa okale
32
yatekete one oyali-kitame wene
toameketeke neme wini okopa edemo wa okato-pe wa yakapamene piti tokale pa meaneya.
Ako Meateko Agopa Mainago Wa
Agale To onali Yoa Kakenemo
(Matiu 18:1-5, Luke 9:46-48)
33
Yesu one oyali-kiti-pala Kapaneame take nome menaneya. Nitoa yapu tuapea nome
mekome one oya-lawe yatekome okome kiwi ka ludu yakete edemo oa agale to onali yoma
yakoi-pe-kale agale waametekoa pa meaneya.
34
Nipa ako tobou meateko agopa mani ago
patu wa oa takoa pili pili toma nekeneya tokome agale waametekoa meaneya.
35
Nitikoli
Yesu one witipitoa mekome one mekuta noe wa one oyali-kiti motokome okome etene ako
ago kawouno wene piko agopa nipa nepa pa keku ago tetepo takoa ete-kitanele takama
pamene wa ootokoa mekome
36
pade mati deya one oyali-lawe kakoi pake moa kakaneya.
37
Nitoa mati tebemotokome okome panagome-kiti noke toa dikane mati deya makutukoa
motokomepa nipa nopala eni dekoa makutukoa motokome too. Panagome-kiti no
makutukoa motokomepa nipa no moa wetekakago-pala dekoa makutukoa motokome too
wa Yesuyo akeneya.
Toto-pala Poi Te iamokagomepa
Nipa Toto Mape Wikome Too Wa Akenemo
(Luke 9:49-50)
38
Yoneyo Yesu-pala okome okome Tikisa ago anu ukumo ne yaka. Panagome neke
ibini wedekoa oapa ali-kitike awitane ipono takoa wetekakala tokale totome enekoo.
Einagopa toto-pala opia yakago toamokolo tokome wa pade dikameamene wa kikoa okoo-
kale
39
Yesuyo okome one tokalepa toma pomotono wa pade edikoa wameamene.
Panagome-kiti anu ibini wedekoa eni telekole tootokoapa no akoa agale wamoo.
40
Toto-
pala poi te iamoko agomepa nipa toto mape wikome too.
41
Kipala nimini ukuno yakoe.
Panagome-kiti kiwi Keraisuno ibini pedane yene kakino, ue noomotokapouno nepio wa
mama moa nomotokoa lawetekalepa one eni tokake nami noanume wiane pewe wiou wa
Yesuyo akeneya.
Yono Kawa Lene Eyame Pinali Ne Toa
Potokakalepa Te ia Wamene Wa Olaukanemo
(Matiu 18:6-9, Luke 17:1-2)
42
Dikane mati nooke wene tugoa meko mati etepea pomotoa likoa enoa labakagopa
Akolaliyo kibu motokome dika dika toamene tete meoo. Ae, eni tete mea kibu
moamomotoapa papete mati wete likoa enameneyake laukakoa tube kue matiyame one kabe
kautoa kusa ue muke keti pitikaneya too tokapa epetoo toka.
43
Nipa neke yoname-kiti pinali
ne toa potokadekalepa yono te itapeamene. Yono duku taneyake mea kawateko take poke
mea kakedekalepa nipa epetoo. Nitameneya yonota takuta kakeneya kawa poane take
pekedekalepa ae nipa poo.
44
Eidapa toe nokoa-kama kakolo tugoa moamele toamoko.
45-
46
Neke kawameka pinali ne toa potokadekalepa te itapea wamene. Neke kawa te itapea duku
yawa kakeka mea kawateko take poke mea kakedekalepa nipa epetoo. Nitameneya neke
kawata takuta kakeneya poane take moa pitikaneya mea kakedekalepa ae, nipa poo.
47
Neke
lenemeka pinali ne toa potokadekalepa lene to a wamene. Neke lene to otapeneya yakeka
Akolaliyo talo toko take poke mea kakedekalepa nipa epetoo. Nitameneya neke leneta
takuta kakeneya poane take moa pitikaneya mea kakedekalepa ae nipa poo.
48
Ae, eni poane
takepa toe nokoa-kama kakolo oyake tugoa moamele toamoko.
49
Too eni nakiyapa
epetaneya tokolo uku. Too kabuka naki nee-kitike noa puki toa ali-kitikepa dikoa toele
tadekoo.
50
Toopa epetaneyake me pokome meke toamokolopa edoa wa meke takamotoa-
pe. Kiwi too ka lono tou toa keneya ete oto wa odene wene piitikoa meamene wa Yesuyo
akeneya.
Make Make
<<
99
>>
Make Make
<<
10 10
>>
10
Alime One Atoa Wawa
Atoame One Ali Wawa Tokoleke Olaukanemo
(Matiu 19:1-12, Luke 16:18)
1
Yesuyo nimo oomotokome Galili ta tewitikoa Yudea ta ludu yawa Yodane ue ketoa
eka lono piane take pome mepaneya. Eidaka ali atoa one mekata koukoa nokala tokoli
Yesuyo one tanele tokome Akolalinemo i i wa olaukoa kakeneya.
2
Parisi ali-kitika one mekata eida note likoa enekete ekete panagome-kiti one atoa pa
wa wakomepa nipa Yu yene tone totono litiapa tamele toa toko-pe wa natemo omotadiya
wa kakete okoli okome
3
nikepa Moseseyopa edele tamene wa akeneya-pe-kale ekete
4
Moseseyo papete one totono yametekome okome padagome one atoa pa wa
wawademepa nipa namolo takoa ne wakene wakuna wa edikoa pipia wia meetekoapa pa wa
wetekamele toko wa Moseseyo akeneya-koli okome
5
Moseseyo eni akenepa Yu yene kini
kaua-mikiti kolotini lupi tootapeneya mekoli tokome ni akeneya.
6
Nimo ikilepa taneyake
namolo namolo Akolaliyo kamate meaneya-kiti titikome latikilepa ali atoata takuta wa-
kama latikala taneya.
7
Nitanelekepa alime atoa motokomepa nipa etene nineta tewitikoa
wawa one atoa-pala lipukoa meoo.
8
Nipa namolo takuta letetakutukoata meaneyake
naniko odene tigini tetepo tokale mekete liputakutukoata meoi. Nitoa mekoli ipa i ago ipa i
atoa wa tutu tutu wa ibini amele toameneya tokome i adona wa odene tetepo takoa oi.
9
Nipa Akolaliyo moa lipukane ali atoata padameka moa letekatakutukamele toamoko wa
Yesuyo oa pekeneya.
10
Nitoa yapu pome mekale one oyali-lawe note yatekete ekete eina agale pinepa edoa
pikoto-pe-koli okome
11
panagome one atoa ne pa wa wetekatekoa pade atoa motokomepa
nipa mone koua piamateko atoa motokome toko. Nipa namolo atoa eni toa potokakome
toko.
12
Atoameka onekane wawa pome eko alike pokomepa nipa koua piamateko alike eni
pokome toko wa Yesuyo akeneya.
Yesuyo Mati-kiti Epetekamotoa Kowitanemo
(Matiu 19:13-15, Luke 18:15-17)
13
Wa padepete pade-kitame kini mati-kiti one yoname mitikakamotoa Yesu kakata aua
nokoika one oya-laweme noameo wa kikoa akeneya.
14
Nitikoli enekome Yesu wene pokale
okome wini mati-kiti oto nomotono, etoe. Akolaliyo one talo tokotapa kinino, noe wa
yametekilepa dikane mati-kiti yametekono, oto nomotono toe.
15
Nimini ukuno yakoe.
Panagopa mati-kiti Akolalike lukoa mekete tiki toa lukoa meamademe wakomepa nipa
Akolaliyo talo toko take oyake pamele toamoo wa ootokoa kakome
16
eni mati-kiti tebemoa
pikoa kakome Akolaliyo pewe wia yopimotoa tokome yono pia kowitikaneya.
Kamo Tane Agoke Akenemo
(Matiu 19:16-30, Luke 18:18-30)
17
Yesu poademe tokaka panago teyapea nome wadini tukupia mekome okome
epetanele toko Tikisago nepa eya wane yatekene uku. Edele tekene pa meane kama pou-pe-
kale okome
18
nopa epetanele toko ago wapa wini okono, dekolo oko-pe. Epetanele-kama
toko agopa Akolali odene kako. Wa pade lokoaka kawamoko.
19
Moseseyo tamene wa
papete wia mekanemo neme wene toko. Ali pade wia tukamoa ni mone padane atoa
liamoa ni monekeya kode moamoa ni padago-pala pa puputua akoa agale wamoa ni
panagoneya oa yotokoa moamoa ni neketai neka uata kei pia tamene wa Moseseyo
akeneyano, enipa neme wene toko-kale okome
20
Tikisa ago eni akenele-kama tualike
laigoane yakoane toma nuku wa akeneya.
21
Nimo oa kakaka Yesuyo einago nepikakomepa
wene einagoke mekakome okome wenepa tadekoyake odenele odene katekoa wene
toameadekono, neke pikoya peya topo toa kue mootokoa ponopene ali atoa enoa tatia
meetapeamene. Nitikepa neke kamoya a tibuke auma kakeneya enoo. Nitatekoyano, no
litima namene wa okale
22
yatekome wene keda taneya wawa pekeneya. Nipa uu kamo tane
ago tokome taneya.
23
Nitikale Yesuyo one oyali-kiti enoa unukakome okome ae, kamo tane yene Akolaliyo
talo toko take pikilepa etene wili tokoa kawapa piki wa akeneya.
24
One eni oka agalemepa
one oyali-kitane wene kainya pikaneya tokome okome ae, anu mati-kiti kipala i ukumo
yakoe. Akolaliyo talo toko take pikilepa etene wili wedoa tokoa kawapa poi.
25
Kamelo
kaido noi keneke-kiti patukoa ponokomepa nipa wedoa wili toa kawamoapa patukoa
ponoo. Kamo tane ago Akolaliyo talo take ponokomepa nipa wili tokoa mati kawapa
ponoo wa Yesuyo akeneya.
26
Nimo okale yatekete wene kainya pianeya kakete pitia
yatekete ekete kamo yeneke winimodo nimini akedekalepa Akolaliyo mani ali atoa toa
moamoo wa okoli
27
one oya-lawe nepikakome okome ali atoame toamatikilepa Akolaliyo
oyake tamele toko. Padele padele peya tamele toko ago tokome kamo tane ali-kitika one
take nomotoa ka patekamele toko wa okale
28
Pitayo okome ne litima noadetepa tonekeya
peya tewitikoa wawa noko-kale okome
29
nimini ukuno yakoe. Panagome Akolaline epetane
agalekeka noanukeka tokome one yapu one etene nineta one laine wamene-mikiti one mati-
kiti one toka ipe eya tewitikoa wakomepa
30
nipa itonoke pa mekome enika eniya lukukepa
ege takupeta kadukoa (100) oto mokala too. Nipa yapu nine wamene laine-mikiti mati-kiti
ipe eya moapa tete-pala mokoa kawoo. Nitoa mea tukale Akolaliyo one talo tuku take mea-
kama kamene wa moa kakoo.
31
Akolaliyopa ako yene kainya mati keku kakoa wa keku
yene kainya mati ako kakoa too wa Yesuyo akeneya.
(Matiu 20:17-19, Luke 18:31-34)
32
Yerusaleme take poadete ka ludu pekete one oya-lawe naniko nomotoa Yesu one
namolo kawa pekeneya. Nitoa pokale one oya-lawe wene kainya pianeya litia note ete ali
atoa kutu keneya piti taneya litia note taneya. Nitikoli Yesuyo one oyali tuku kakoa (12) eko
keneya witimoa aua pome kakome i i wa ete yename one-pala toatekoimo to awea akeneya.
33
Nitikome okome kipala i ukumo yakoe. Opa ate Yerusaleme take poadete poko. Pote
kakolo no Ali Yatenane Oyago panagome moa eya yenane yonoke Akolalike lodo yotokoai
tiki tobou ali-kiti ni Mosesene totono pine to a olaukaki ali-kiti kini yonoke pioo. Nitikale no
wiatiki oi pedoa piitikoapa mone pa yeneke aua pote mepoi.
34
Nitikoli motekete tegene
matoa tekelipu toa yotokoa po wapime wia toi. Nititikoa wia tukakolika ta tebolo takoa
patatekaneyake kamoane pou wa Yesuyo oa pianeya.
Yame Yoneta Yesuke Lokoa Tobou Agota
Meoukete Akenemo
(Matiu 20:20-28)
35
Yesu Yerusaleme take kutu poademe pokaka Sebedine manata Yame Yoneta Yesu
kakata note kakete ekete Tikisago totame takamene wa okole neme takoano ta-koli okome
36
anume edele takamotoa iki-pe-kale ekete
37
ne pa teleta tootapeneya meke ali atoa pawe
toa talo tokaka neeke lokoa totaka panago neke nimini yono lono mea padena ago neke ewa
yono lono mea yopioukete oko-koli okome
38
wene toameketeke iki. Akolaliyo no ne naa
wa yametekana ue metepa no tete tubeya moatekou adeka pikano, noanu noateku tetepa
kitameka eni noateku toa noukete iki-pe. Noanume ue mou toa tete moateku toa kitameka
moukete iki-pe-kale ekete
39
nitato ta-koli okome noanume noateku uepa kitameka noadete
tiki. Noanume ue mou toa tete moateku toa kitameka moadete tiki.
40
Nitadete tikiyake ali
atoa talo toane mekouta eka oka yono lonota kita tatikatakutukoane mekamele toamoko.
Eka okata meatiki agotapa Akolaliyo i i wa wete wene toopianeyano, anume oyake
yameamele toamoko.
41
E agotame nimo akedekoli yatekete o yene Yame Yoneta-pala wene poaneya kakete
ko oa kakeneya.
42
Nitikoli Yesuyo one kakuta noe wa kayo oa motokome okome mone pa
yatenane tobou meki ali-kitame kini ali atoa wete toe toe wa tika tika-kama tiki. Kini ibini
akene ali-kitameka ali atoame kinikile-kama takamotoa yopikala tiki. Enipa nimini ukutu-pe.
43
Nitikala tikino, anu oya-lawe kime pade edikameamene. Nitameneya tobou ago meou
wado wene piketepa kinikile toamekete kini oya-mikitane pupu takama pamene.
44
Nipa ako
odene mekene talo tou wado wene piketepa nipa kueme topo toa moa egetane ago keneya
kini oya peyanele takama pamene.
45
No Ali Yatenane Oyago taatekoane nikilepa ete
yename anukule takamotoane nokouya mena. Nitameneya ete-kitanele takoane ni ali atoa
peya mati anu kamateme oto toane moadene ni nokou wa Yesuyo akeneya.
Yesuyo Leneta Lianeya Meane Ago
Batimiasi Epetekanemo
(Matiu 20:29-34, Luke 18:35-43)
46
Yesuyo nimo oomotokome one oyali-kiti-pala Yeriko take pome mepaneya. Wa
naniko pato wa eni ta tewitikoa pokale ali atoa iti itita kawa obomoa pekeneya. Kini
ponatekoiya liti leneta lianeya meane ago pade meaneya. Einagopa Timiasine mana
Batimiasi wa ibini akeneya. Nitane agome ali atoa padeya-kiti manoe-kala oia meaneya.
47
Nitoa batete matanuke eida mekome yatekale Nasarese Yesu wini ponokona wa oma
ponokoinakamo yatekome telo ootapekome okome Depidi-loeke tagene ago Yesu neme no
ela moamene-ye wa kayo oa meaneya.
48
Nimo wa kayo okale e yene kainya matiyame
einago kikoa ekete ekete oyakeno, wa wa okoli kayo telo kamotokoa okome okome
Depidi-loeke tagene ago no ela moamene-ye wa ka oa kakeneya.
49
Nitikale Yesuyo
yatekome witimoa kakome okome winago oto nomotono, akoe wa okale leneta liane ago
kayo oa ekete Yesuyo ne kayo okono, wene weye ootokoa wete kamokoa noo wa kayo
okoli
50
one tokoo kakene pue takatapea ate tigatekoa Yesu kakata nokale
51
Yesuyo
yatekome okome anume edele takamotoa oko-pe-kale okome Ali Muno anu leneta kikakoa
wane uku-kale okome
52
nopa i agome ne oyake latekamele toko wa nooke wene tugoa
mekolemepa neke leneta epetekakono, opi poano pa wa okale eina eina lene kikatapeneya
Yesu pokaka litima pekeneya.
Make Make
<<
10 10
>>
Make Make
<<
11 11
>>
11
Yesu Yerusaleme Take Nekenemo
(Matiu 21:1-11, Luke 19:28-40, Yone 12:12-19)
1
Yesu one oya-laweka Yerusaleme take tigotokoa witapadete peketepa Olipe-pini
tonoke latiane Besepase Besani tatake witakete Yesuyo eya taneya.
2
One oyali-kiti takuta
moa wetekakome okome kuka ku take poatino poe. Eni take witoa kaalaukete enekoli dogi
kai tine eida po kakoa kebetaneya kakale enoi. Eni dogi kai tine patu panagoka wete mea
yawameneyano, po kotokoa oto aua notokamene.
3
Kotokoa moadete kakoli panagome
dekolo moadete tiki-pe wa okalepa eya wa akamene. Ali Munoyo padele toatekole pikolo ni
motokoa poko. Opi oto wa i wetekademe toko wa akamene wa oa wetekaneya.
4
Nitikale
pote enekoli dogi kai tine yapu kago tiginike kebeteloganeya batete muke kakedekale
kotokoa motaneya.
5
Nitikoli eniya liti kakene yename enekete ekete mone dekolo kotokoa
motiki-pe wa okoli
6
Yesuyo oa wetekakanakamo i i wa okoli nipa nitoe wa wetekaneya.
7
Nitikoli dogi kai aua Yesuke nekete kini tokoo kakene mamina petene kotokamoa dogi kai
patu tatikakoli Yesu mea pekeneya.
8
Nitoa mea pokaka ali atoa peya matiyame kini tokoo
kakene mamina kotokamoa one mea poatekaka bateteke pia tatikawineya pekeneya. Wa
padeka-kitame li ludu pote yomo yenene deya tewia moa batete ludu tatikama pekeneya.
9
Nitikete namolo kawa pokoi-kitameka naniko ketea kawa nokoi-kitameka agale kamotoka
kamotoka toa ke ke wa oawineya pekete ekete
i agopa Ali Muno patu kautakoa kama nokono, Akolali neme pewe wia yopia kamene.
10
Tone kaua ago Depidiyo papete ali atoa talo tokome tane toa opi enakale wa
witademe tokono, Akolali neme yopia kamene. A tibuke meki peya one kei
piamene-ye wa kolotine togete oawineya pekeneya.
11
Nitawineya pokoli Yesu Yerusaleme take witakome tobou losu yapu keneke pome
kakome eida pia kawa tokoya peya enetapeneya. Nitoapa ta lima nokale tokome one oyali-
kiti tuku kakoa-pala (12) pato wa Besani take pome pipaneya.
Yesuyo Yomo Pikipa Ku Wa Tuamoa Wa
Kikoa Wakenemo
(Matiu 21:18-19)
12
Besani ta piimotekete podolikama pekete Yesu kobu tokale
13
ete enapekome
enekale padeka mati yomo piki pade tata pitikaneya kakale enaneya. Nitoapa ku tuaneya
patu wa pinele pome enepokale tata pitikoa kakomeke ku tuameadeka. Ku tuamateko-pete
tokome taneya.
14
Ku tuameneya kakale enekome kikoa okome okome ku wa tukile toamea.
Padameka neke ku wa kotia noamoi wa kikoa akeneya. Eni kikoa okaka one oyali-kitame
yakakoa kakeneya.
(Matiu 21:12-17, Luke 19:45-48, Yone 2:13-22)
15
Yesuyo yomo piki kikoa oomotokome one oya-lawe-pala Yerusaleme take pome
kapaneya. Nitoa tobo losu yapu pome kakomepa eida-kama eya kuya topo toa kue moa
tane yene poe wa wia tikatapea ni e ku take latiane kue topo toa Yudea kue lene ete mea
tokoi yene kini walai-kiti moa pekatapea ni ini puluma yoa tane yenane walai-kitika moa
pekatapea taneya.
16
Nititikoa kakome okome i tobou losu yapu ludu kini topo toatikiya wa
pade aua noameo wa agaleme oa ketekaneya.
17
Nititikoa kakome okome anu i yapupa e
ku yatename no Akolali kowitoai toatiki yapu wa oi wa papete wia mekapianeyake kimepa
kode yename kodeya paigakoa moa piai tane kota tetepo takakino, poe wa wia
tikatapeneya.
18
Yesuyo eni tanemo kugu yatekete eya ali-kitame Akolalike lodo yotokoai tane tobou
ali-kitameka Mosesene totono pine to a olaukane ali-kitameka one katekoa wia tukatekoi oi
pedoa wili tokoa kakeneya. Nipa ali atoa peyame Yesu i agome imopa i okono yakato wa ka
okala tokoli tokome one piti motekete taneya.
19
Nitaneyake ta likaka Yesu one oyali-kiti-
pala Yerusaleme ta tewitikoa pekeneya.
Totoa Ala Tootapeneya Kakene Yomo Piki
(Matiu 21:20-22)
20
Podolikama likonu witia kamomotekete penekete enekoli eina yomo piki totoa ala
tootapeneya kakale enaneya.
21
Nitaneya kakale enekome Pitayopa Yesuyo okana wene
patukakale okome Tikisa ago neme abelana kikoa okana yomo piki totoa ala tootapeneya
kakono, ena wa okale okome
22
Akolalike-kama wene tugoa meamene.
23
Ipa nimini ukuno
yakoe. Panagome-kiti poome toameneya kakome one kowitikumo taatekoa too wa wene
tugoa mekalepa eya too. I kako tono mati ne wete to a poke kusa ue mu kuta poke kapa
wado okalepa Akolaliyo yakoa too.
24
Nitoa kowitikete-kama Akolaliyo wete yakoa tane
tetepo takoa kowitikala tamene. Nitikolipa oneme etene yakoa too.
25-26
One kowitoa
kaketepa kini a tibuke meko ataiyo kini poanele-kala toma pokoike po letu mekakana kea
wakome kibu moamomotono eya tamene. Panagome-kiti nepala padele poanele tokake po
letu mekakanapa keane wakene kibu moamou wa nami ete wiameamene wa Yesuyo
akeneya.
Yesu Neke Tokole Te Patu Kautakoa Kake
Toko-pe Wa Pitia Yakanemo
(Matiu 21:23-27, Luke 20:1-8)
27
Yesuyo nimo oomotokome one oyali-kiti-pala Yerusaleme take wakapea nome
kananeya. Enipete Yesu losu yapu ludu yawa mekaka Akolalike lodo yotokoai tane tobou
ali-kitika Mosesene totono pine to a olaukane ali-kitika Kanosolo ali-kitika
28
Yesu eni yakata
nekete ekete neke tokolepa te patu kautakoa kake toko-pe. Teyo tamene wa okole toko-pe
wa yakanokoli okome
29
kipalaka yakatekumo pikono, yakoe. Oto wa topo takoa okoli
yatekenepa nipa anume toma yakulepa i ago patu kautakoane kakene tuku wane to aweane
ou.
30
Yoneyo ali atoa ue motokama yakilepa tene peku noa toka-pe. Akolaline peku patu.
One kaua-mikitane peku patu. Yakouno, oe-na-kale
31
kini kini yakate tekete ekete edemo
wa ato-pe. Enipa Akolaline peku wa totome okolopa nipa Yone einagome oka agale
edeyake yakoa moamokoi-pe wa oono, nimo wamato.
32
Nitameneya one kaua-mikitane
peku noa toka wado okolopa ete ali atoame toto wia tukatikiyano. Yone einagopa Akolaline
agale to awea akane ago tadeko wa ikiya tokome nitoino, enimo waka wamato wa ete Yesu-
pala ekete
33
totome wene toamokono, tene peku noa toka patu-koli okome nipa anu toma
yakulepa i ago patu kautakoane kakene tuku wane wamou wa Yesuyo akeneya.
Make Make
<<
11 11
>>
Make Make
<<
12 12
>>
12
Panagono Gerepi Po Ipe Yopikane-kitame
Tanele Adeka Pikome Akenemo
(Matiu 21:33-46, Luke 20:9-19)
1
Yesuyo agale pade pedoa okome okome panagome-kiti one ipe tootokoa gerepi po
matatapeneya. Nitoa pawe toa unukatekoapa one pupu yename po ku kotia pitikoa kawame
kautoa tia lobutatekoi kagono wetia latipianeya. Payaponalime ta enapea yopia meateka ludu
yapuka atepea wipianeya. Nitoapa ali pade-mene one ipe yopikamene wa yamemotokome
ta tetemada pome mepaneya.
2
Nitaneyake ku putua kibutukakoa kaka-pete pinagome eya
taneya. One pupu ago pade moa wetekakome okome anu ipe yopikaki ali-mename no
moateku toapa meadete tikino, motokapoano pa wa moa wetekaneya.
3
Nitikale nokale
enekete one ipe yopikane ali-mename einago layo tiginime moomoa pitikoa pupuli wia
padeyaka meameneya pa pomotoa wetekaneya.
4
Nitaneyake pinagome pade pupu ago moa
wetekakale nokale enekete wia wago bulukoa ya motokoa wetekaneya.
5
Nitaneyake
pinagome wa pade ago moa wetekakale nokale wia tukaneya. Nitaneyake pinagome one
pupu ali-kiti wa moa wetekakala tokale einakale toa padeka-kiti layo toua wia padeka-kiti
wia tukakala taneya.
6
Pinagome nitima pome wipitikomepa odene ago katekapitikaneya.
Einagopa one kolotini ago. One eni mana agopa kei pia makutukoa moi wa wene pikome
einago ne pa wa moa wetekaneya.
7
Wetekakale nokale enekete ipe yopikane yename oote
tekete ekete pinagono mana ku nokona. Etename one pikoa pokaya-kiti kadimo okome
kunu agono pikademe toko. One moatekoya-kiti toto moatono, wia tukatoe wa
8
dekoa
moa wia tukamotekete gerepi po ipe tayo lono lia aua pitikapaneya.
9
Nitikala taneyake ipe
pinagome edoo-pe. Nipa eya too. Wakapea nokome one ipe yopikoa potokane ali-mene
wia atukatapea kiwi lukuke pade-mene kime yopikamene wa yameademe toko.
10
Akolaline
bokuke agale dikoa wia mekaneya pikono, yakoe.
Yapu wiane ali-kitame i yomopa poadeko wa paya tetepo takoa wakeneyake
padekagome i yomopa yapu pigi wa moa wianeya.
11
Enilepa Ali Muno
Akolaliyo taneya tokome ke wa kolotine mea kei piato wa wia mekapianeya.
Eni wia mekanemopa kime oi moamokoiya-pe wa Yesuyo akeneya.
12
Yesuyo eni pedoa
okamo yatekete ekete pedoa i agome ina okana agalepa totoke akedekono, i ago dekatapea
moatikiyake toko wa kakete eida oboa kakoi ali atoa piti motekete tekete wakeneya.
Takesi Kue Pitikaneleke Pitia Yakanemo
(Matiu 22:15-22, Luke 20:20-26)
13
Wa naniko Yesu-pala poi te iane yename eya taneya. Parisi ali padeka-kiti ni Erodeke
timini kakoa yakene ali padeka-kiti moa wetekakete ekete Yesuyo natemoka omotono, likoa
enepoatino poe wa moa wetekaneya.
14
Nitikoli pote lede pitia yatekete ekete Tikisa ago
nepa niminimo-kama oko. Nitoapa ibini akene yeneka ponopene yeneka takoa enameke
Akolalinele takama pekete toatikile kiyoke-kama olaukako. Nepa nitane agono wene tekete
imodo pitia yatekono, yakamene. Yu yene tone totono litiapa Lomane yatenane ako tobou
ago Sisa one takesi kue pitikamato-pe, pitikato-pe wa akeneya.
15
Nitikolipa wene takuta
pianeya kakete akediki wa wene tokome okome kime nopa edeyake likoa eneki-pe. Kue
lene pade enouno, aua noe wa okale
16
aua note metekoli moa enekome okome i kue lene
tiginikepa padane lene timini-pala ibinita wia mekaneyano, eniyatapa teneta patuno, yakouno
oe-na-kale ekete tobou ago Sisa one wa okoli okome
17
ni tadekopa Sisa meatikiya-kiti ni
Sisa takoa mea, Akolali meatikiya-kiti ni Akolali takoa mea tamene wa Yesuyo okale
yatekete ekee wa one eni okamoke wene kainya pianeya kakeneya.
Tuane Ali Atoa Moa Kamotokatekamo
(Matiu 22:23-33, Luke 20:27-40)
18
Sadusi totono litiane ali padeka-kiti Yesu kakata nikilepa agale palene yakadete
nekeneya. Eni yene kini totono piane toa litiapa tuane ali atoa kamoamoi wa iki.
19
Nitane ali-
kiti Yesu kakata nekete likoa enekete ekete Tikisago nepala i okomo yakamene. Moseseyo
one totono wia mekakome okome panagono atoame mati opikameneyakedo einago
tukalepa one wamene ago neme moa neke natono latikamene. Nipa tukanakago lukuke
kawatiki mati-kiti opikamotono, nitamene wa Moseseyo akeneya.
20
Odene aline mana-mikiti
tatono kakoa (7) kakeneya. Namolo agome atoa moapa mati opiameneya mea tuaneya.
21
Nitaneyake one liti taku takoa opiane agome einatoa moapa mati opiameneya mea
tuaneya. Nitaneyake tebolo takoa opiane agomeka einatoa moa mati opiameneya mea
tuaneya.
22
Eni wamene ali tatono kakoame (7) einatoa kibutua moma-kala nekeneyake
panagonoka einatoame mati opikameneya. Nipa tiobali mea tukala taneya. Nitikala taneyake
wipitikome einatoaka tuaneya.
23
Eni wamene-mikitame einatoa edikoa kibutua moma-kala
nekeneyano, tua pokoi ali atoa Akolaliyo moa kamotokaka-pete einakatoapa mani agono
natono wa tugoa meoo-pe wa likoa enaneya.
24
Nimo oa likoa enekoli okome kini wini
ikimopa Akolaline bokuke piko agale-pala one telekoleta wene toamekete ni iki. Enipa
nimini ukutu-pe.
25
Tuane ali atoa kamoa pote a tibuke mea kaketepa alime atoa moamoa
atoa alike poamoa toi. Nipa a tibuke Akolaline edelo-kiti keneya meoi.
26
Ali atoa tuapa
kamoa pote mea kakimopa Moseseyo one bokuke wia mekaneya. Nipa itipono oa kakene
yomo deyake Akolaline agale ludu nokome akenemo eya wa wia mekaneya. Noanupa
Eberame Aisaketa Yekobe toa einago-menane Akolaliyo uku wa Akolaliyo oka toa wia
mekaneya. Eni wia mekanemopa kime oi moamokoiya-pe.
27
Moseseyo enimo wia
mekaneyano, onepa tuane ali atoane Akolali mena. Mea kama piki ali atoane Akolaliyo uku
wa okome akedeko. Sadusi ali-kiti kime ali atoa tuapa wa kamoa pote mea kawamiki wa
ikipa nipa ae Akolalinemo etene agopa motekete iki wa Yesuyo akeneya.
Tobou Kakoa Akene Agale Pitia Yakenemo
(Matiu 22:34-40, Luke 10:25-28)
28
Nitoa agale topo takoa kakoika Mosesene totono pine to a olaukane ago pade nome
yakakoa kakeneya. Nitoa yatekale Yesuyo eni Sadusi ali-kiti-pala agale muno kakoa oa
metekale yatekome okome yonota tua agalepa e tobou kakoa akene agalepa mani-pe wa wa
okale okome
29
tobou kakoa akene agalepa dikoa piko. Iserele yatene anu ukumo yakoe.
Tone Ali Muno Akolali wa oateko agopa Ali Muno odene meko. Oneke lokoa dikane ago
pade kawamoko.
30
Nitane ago kini Ali Muno Akolalike wedoa wene mekoa tikilepa neke
tepe kolotinime toa neke yominime toa neke weneme toa neke teleme toa tamene.
31
Nike
lokoa tobou kakoa akenepa dikoa piko. Pinali neeke wa wene mekoa mea mama motoko
toapa yete pade ali atoakeka wene mekoa mea mama moamene. Eni agaletamepa keku agale
peya moa patukaneya wa Yesuyo akeneya.
32
Nimo okale einagome okome neme wini
okopa nimini eke okono, Akolali wa oateko agopa one odene meko. Ni oneke lokoa dikane
ago pade meamoko.
33
Tone Akolalike wene mekoa tikilepa nipa tone tepe kolotinime toa
tone weneme toa tone teleme toa tagatapeamedeko. Ni pinali tone wa wene mekoa mea
mama motoko toapa yete pade ali atoakeka wedoa wene mekoa mea mama moamedeko.
Eni totonota litia teketepa nipa sipi sipi kai eya Akolalike mea lodo yotikina toa moa
patukoa epetanele-kama eni tiki wa einagome akeneya.
34
Nitoa wene muno meaneya
kakome okale yatekome Yesuyo okome nepa Akolaliyo ali atoa pawe toa talo tokota
dekama nekedeko wa Yesuyo akeneya.
Yesuyo nimo ootokaneyake padameka agale pade wa pitia yakoaka enameneya.
Keraisu Wa Papete Ibini Akene Agoke
Pitia Yakanemo
(Matiu 22:41-46, Luke 20:41-44)
35
Yesu tobou losu yapu kakome olaukakome okome Mosesene totono pine to a
olaukaki ali-kitame Keraisu wa papete ibini oa piane agoke eketepa onepa Depidi-loeke
ta wateko ago wapa olaukakala tikino, edekolo iki-pe.
36
Depidiyo papete Keraisuke
okomepa einagopa one Ali Muno wa akeneya. Eni akenepa Epetane Yominiyo wene
takakale Depidiyo eya wa wia mekaneya.
Ali Muno Akolaliyo anu Ali Muno ago-pala eya wa akeneya. Nepala poi te ia meki-kiti
moane kawikoane neke kawane komo pikouno, anu nimini yono lono noke
nepia menamene wa Akolaliyo Keraisu-pala akeneya.
37
Depidiyo enimo wia mekakome Keraisu einagopa one lukoane meku Ali Muno wa
akeneyake kimepa Keraisupa Depidike ta wateko ago wa ikino, edekolo iki-pe wa Yesuyo
akeneya.
Titi Toma Pamene Wa Pubu Akenemo
(Matiu 23:1-36, Luke 11:37-54, Luke 20:45-47)
Yesuyo nimo oa kakalepa one kakata iti itita oboa kakoi peyame ke wa yakakoa
kakeneya.
38
Nitimotoa olaukakome okome Mosesene totono pine to a olaukaki ali-kitame
toma yakile titi toma pamene. Kini ludu mamina epetaneya wititapea kakeneya yawa ni
makesike ali atoame ke wa walikitikakete yono momotada wa yawa tiki.
39
Losu yapukeka
tobou ali-kiti meatikita meada wa pote mepokala tiki. Toge kikakaka ibini akene yene
meatikita meada wa pote mepokala tiki.
40
Ni nepo atoa-kiti oa yotokoa kini yapu eya kode
moa ni eka ali atoame kiwi kei pimotoa lede kowitikete kutupea pa agale likoa pikala tiki.
Ae, dikaki yene Akolaliyo kibu motokomepa dika dika toamene tete meoo wa Yesuyo
akeneya.
Nepo Atoame Akolaline Kue Pitikakanemo
(Luke 21:1-4)
41
Wa padepete Yesu tobou losu yapu keneke kue pitikoai tokoi mete liti pome
witipitoa mekome enekale ali atoame kue pitikakala tokoli enekoa meaneya. Nitoa enekoa
mekaka kamo tane yene peya mati note kue ako mati pitikanokala taneyake
42
ponopeneya
meane nepo atoa pade nome dee kue waneta pitikananeya. Eni dee kue waneta koukoapa
tuane kue odene latiko.
43-44
Nitikale enekome Yesuyo one oyali-kiti noe wa kayo oa
motokome okome nimini ukuno yakoe. I kamo ali atoa peyamepa kinikiya tubeya pa
pimotoa keku-mene odene moa pitikakala tokoi. Nitikoiyake i atoamepa onekeya nateya
deyake one piko toa eni moa pitikatapeka. One nee eya topo toa moateka kue peya eni
pitikakome tokome e yene peya moa patukaka wa Yesuyo akeneya.
Make Make
<<
12 12
>>
Make Make
<<
13 13
>>
13
(Matiu 24:1-2, Luke 21:5-6)
1
Yesu tobou losu yapu kawa akolono witakaka one oyali padame okome okome i
tobou losu yapu-kitipa koniyoya kue epetaneyame koniyo takoa wianeya kakono ena wa
wedia kakome okale okome
2
i tube yapu-kiti wedoa enekamene. Eniya-kiti latiane kue wili
walai akatapeneya pioo. Nipa odeneka kibutukoa piameneya peya wia tadekaneya pa tumu
tokaneya pioo wa Yesuyo akeneya.
(Matiu 24:3-14, Luke 21:7-19)
3
Yesu tobou losu yapu eka waneke kamotoa Olipe-pini tono waneke pome mepaneya.
One kidene eida paka witimoa mekale Pita Yameta Yone Aderuta einago-mene note kakete
ekete
4
neme okanakalepa manipete taatekoa toko patu. Enika enile toateka tigotokalepa
edeya wa adeka pipioo-pe-koli okome
5-6
ina okounakale wete taatekameneyake pade ali-
kitame anu ibini lede wedekoa nekete ekete Keraisu taatekoane nukuno, noe wa ali atoa
peya mati oa yotokoino, wedoa lene kia nepikoa meamene.
7
Nitoa nepikoa mekoi-petepa
kini ta ludu u u wa poi toa kakoimo yakoa ni pade take poi tago wa okoimo kugu yakoa
toino, piti moameamene wane uku. Enilepa taatekoa namolo takoa toatekoyake wipitia ta
pade tigotokoa wete patamoo tokolo ni uku.
8
Ni e ku yatename poi tato wa kamoa poi
te itakutukakala toi. Ni e ku tobou ali-kitike lukoa mekoi yatene ete oto wa poi toa winali yoi.
Eka kuka takeka momani mati toa kobu igi-pala nokala too. Enika enilepa atoame mati
opiademe namolo takoa mukiti nako toa keneya too.
9
Pade ali-kitame kiwi koiso akou wa Kanosolo ali-kiti koukoa mekoika lia aua pokala
toi. Wa pade ali-kitame kiwi wiou wa kini losu yapukeka layo toua wieino, lene kia nepikoa
meamene. Ni ako odene tobou mekoi ali-kiti mekoika ni kiwike lokoa ta yopia mekoi-kiti
mekoika lia aua pote koiso akakala toi. Nitikolipa kini lene yoto kakete anukumo to awea
akakala toi.
10
Nipa wipitia ta wete patameneyake namolo takoa e ku yatene pitikoi toa
anukumo oa pupitikatapeoi.
11
Kini eni koisoke lia aua pokoika edemo uku patu wa tepene li
li wa kamotoa meameamene. Enipetepa Akolaliyo wene takaka toa okala toi. Nipa pademo
pademo ikilepa kini weneme titia pade wamoi. Epetane Yomini kiwike awinokome a wa oka
toa okala toi.
12
Enipetepa wamenagome-kiti wamene wia tukamotoa moa meoo. Etename-
kiti one matika wimotoa moa meoo. Wa mana kono-mikitame kini etene nineka wia
tukamotoa moa mekala toi.
13
Anu oya-lawe kiwi no-pala odene ibini pedane yene tokale
tekete ete yene peya kipala kotimi yoa meoi. Enika eni ke enekakale meake nooke wene
tugoa mea togakoi-kitipa Akolaliyo toa moo wa Yesuyo akeneya.
Yerusaleme Yename Ke Enekakale Mekete
Tete Mati Moatekoileke Oa Pianemo
(Matiu 24:15-28, Luke 21:20-24)
14
Kitau oko wa okoiya one kawamatekata moa kakaneya enoino nepio wa Yesuyo
pubu oa pianeya. (I boku wiane mekaku agome eya wane uku. Ina wiane mekakumopa oi
moteketepa pine to a wene taneya meati wane uku.) Yesuyo eni oa pianele taatekoa tokale
eneketepa eya tamene. Yudea take mekoi-kiti tono pake pake to a pitoa pote paigakoa
mepamene.
15
Yapu liti koo meapa kini yapu pikoina mopameneya pa pitoa pamene.
16
Ipe-
kiti toa kawapa tigini mamina kotokoa pikoina mopameneya pa pitoa pamene.
17
Ae, mati
kakene atoa-kitika mati adu tanikakoa mekoi atoa-kitika tete eni witakale manika edoa petoa
pomotoa-pe.
18
Eni tetepa kalapetaka witamomotoa ta wa Akolali kowitima pamene.
19
Eni
tete mati witakilepa itono tibuta latitikaneyakeka toamokale-kiti too. Eni tete witatekaneyake
naniko pade edikanele wa witamoo.
20
Akolaliyo eni tete witama pomotoa yopikoa kaka
pakedo teigamoo tokapa ali atoa peya atuoi toka. Nitoi tokake one wa takoa motoka ali
atoa ela motokome tokome pegene kakoa teigoo.
21
Enipetepa pade ali-kiti nekete ekete
Keraisu ku nokono enoe, i nokono enoe wado okolipa yakameamene.
22
Kapene yename
eya wa wini oi. Keraisu nuku wa oa Akolaline agale akama nuku wa oa toi. Nitoa kiwi oa
yotokadetepa padele padele telekole tokala toi. Nipa Akolaliyo takoa motane ali atoaka
tolopi toa paka aua poadete wili toa kakete oyake nitamele toamokale wakala toi.
23
Nitoino,
enika enile wete taatekameneyake papete i agale eni wene takapikuna. Lene kia wedoa
nepikoa meamene.
Ali Yatenane Oyali Wakapea Noatekamo
(Matiu 24:29-31, Luke 21: 25-28)
24
Enika eni tete witoa kawa peya tokale taatekoa eya too. Lou yomiyomu takoa
tokene-kitika pa toamoa too.
25
A tibukeka tagoi-kiti kotia pitoa too. Ni tele taneya tibuke
mekoiya peya moa peteka peteka taneya tokome ete oto wa yawa kawei,
26
Nitoa kawa
wipitikale enekoli nopa Ali Yatenane Oyago wedo patu meane pa teleta toawineya noadene
nokolu enoi.
27
Nitaneya wakapeane nekenepa lou witia noko lonoka lou pipoko lonoka
yeteka yukukataka anu papete takoane moopikou-kiti peya odeneya moa obokamotoane
tekene edelo ali-kiti moane wetekou.
Yomo Piki Tokoleke Pedoa Akenemo
(Matiu 24:32-35, Luke 21:29-33)
28
Yomo piki witakole wene taneya meamene. Papete yeneneke page ka ua luno
pitikakolo eneketepa poto toko tokene-mene tigotatekolo toko wa wene toi.
29
Eina toa
anume okounakale-kiti witatapekale eneketepa inakago wakapea noateko eni tigotokona wa
wene toi.
30
Etene nimini toatekomo ukuno yakoe. Ipete meki-kiti peya wete
tuutapeameneyake kipala ina okounakale-kama taatekoa too.
31
Itono tibuta takoa
pootapekolika anu agalepa pa pia-kama kawoo wa Yesuyo akeneya.
Yesu Wakapea Nikilepa Ipete Taatekoa
Noo Wa Padameka Wene Toamiki
(Matiu 24:36-44)
32
Enika enile toatekolepa ipete taatekoa too wa padameka wene toamiki. A tibuke
meki edelo ali-kitameka wene toamiki. Akolaline mana noanumeka wene toamuku. Atai
Akolaliyo odene wene toko.
33
Enika enile toateko-pete agopa tokolo mekino, wedoa lene
kia nepikoa-kama meamene.
34
Kipala ina okouna toane opika pedoane agale ukuno, yakoe.
Panago ta tetemada poademe one yapu kakome eya toko. One pupu takaki ali-mene pupu
tutu tutu wa takamotoa tatikamu toko. Nitoapa kagoke payaponali kako agoka wedoa
nepikamene wa kakamotokome poko.
35
Yapu pinago kotikatapea wakapea noademe
tokono, payaponali kako ago toko toa wedoa lene kia nepikamene. Piadete mekika noko
patu. Tube likonu noko patu. Titia ogada ka oko-pete noko patu. Likonu kama witia noko
patu.
36
Atu pia mekakoa kotikatapea nokayano, wedoa nepikoa kamene.
37
Kipala i
ukumopa ali atoa peya-pala kikilikoane ukuno, wedoa lene kia nepikamene wa Yesuyo
akeneya.
Make Make
<<
13 13
>>
Make Make
<<
14 14
>>
14
Yesu-pala Kotina Tanemo
(Matiu 26:1-5, Luke 22:1-2, Yone 11:45-53)
1
Yu yenamepa kini kaua-mikiti Idipi take mekakoa edelo ago patukoa wia tukamenele
oi pikoa meketepa malike-kama toge kima nekeneya. Eni toge kia mono mono akamene
palawe wane-kiti yoa noatekoi oi tigotokoa nekeneya. Eni toatekoi ta takupeta pa ete pikale
Akolalike lodo yotokoai tane tobou ali-kitameka Mosesene totono pine to a olaukane ali-
kitameka Yesu wiadete edoa yotokoa dekoa moato patu wa wili tokoa kakeneya.
2
Nitikete
ekete toge kikoo-petepa dekoa moamato. Pa ali atoame toto-pala wene poa wili walai wa
kaweino, enipete dekoa moamato wa oa tukaneya.
Yesuno Tobouke Padeya Kalono Taneya
Pekoa Yotokanemo
(Matiu 26:6-13, Yone 12:1-8)
3
Wa pade-pete Yesu Besani take kedime nakeneya mekanakago Saimone einagono
yapu meaneya. Eida mekome nee nakaka atoa padame padeya ka lono taneya alabase kueme
latiane mete keneke mekoa aua nekeneya. Eniyapa nado wa ibini akeneya. Kue ako mati
wetekoa mootokoa aua nome mete ka utukoa ka lono taneya Yesuno wagoke pekoa
yotokatapeneya.
4
Nitikale enekete pade kakoi-kiti wene poaneya kakete oote tekete ekete
ina pekoa yotokakilepa pale tokano, edeya weike toka-pe.
5
Inakeyapa totome topo toa kue
moo tokapa nipa kina kue ege kadukaka ko melepume kakoa (300) moa ponopene ali atoa
tatikoo toka wa einatoa-pala poanemo oa kakoli
6
yatekome Yesuyo okome i atoane wene
dekolo potokaki-pe. Oyakeno, wawe. Einapa anu koniyole takakana.
7
Ponopene ali atoa
enabuna kiwi pakeke mekala tikino, kini wene witikolo-kama oyake auapeamele toko.
Noanupa kiwi pakeke pa tekei meku.
8
I atoame nopala padele epetekoa toatekale eni
tokona. Ina ka lono taneya anu tiginike pekoa yotokakanapa no tuaneya piateku tigotokolo
tokome nina nodokoa takapikana.
9
Nitikakona tokolo eya wane uku. Anukumo ta piko
peyake oa aua yakoi-kitame oa pupitikama peketepa i atoame ina takakamo-kitika oa
pupitikoi. Nipa ta piko peyake mekoi-kitame one wene taneya memotoa nitoi wa Yesuyo
akeneya.
Yudaseyo Yesu Moa Meateka Oi Pedapianemo
(Matiu 26:14-16, Luke 22:3-6)
10
Nititikaneyake Yesuno tuku kakoa (12) oyali-kiti panago Yudase Isekariose
einagome eya taneya. Akolalike lodo yotokoai tane tobou ali-kiti mekoita pokome okome
Yesu einago kini yonoke moane piou wa opaneya.
11
Nimo okale yatekete wedia mekete
ekete nipa ne kue meoono, nitoa ta wa okoli einapete laigoa Yesu moa metekome toatekale
wene kibutuma yakeneya.
Edelo Ago Idipi Ta Patukoa Iserele Yene
Toa Motane Oi Nokale Toge Nee Nakenemo
(Matiu 26:17-25, Luke 22:7-14, 21-23, Yone 13:21-30)
12
Yu yename mono mono akamene pa palawe wane-kiti yoa toge kikilepa namolo ta
pataka-pete eina togeke wia kiatekoi sipi sipi kai tine-pala moa wia kikala taneya. Enile
toatekoi-petepa Yesuno oyali-kiti Yesuke nekete ekete edelo ago patukane wa ibini oko
toge nee maida nodokoa piatoa-pe wa okoli okome
13
Yerusaleme pekete enekoli ali pade
one wagoke ue mete kakalogoa aua nome kotukale enoino, einago litima pamene.
14
Litia
peketepa one tuapea poka yapu pinago-pala eya wa akamene. Tikisa agome i toge kia
noatekoyapa one oya-lawe-pala opiane mekene nouno, neke ugu yene note meatiki lono
yamea ta wa akamene.
15
Nimo okoli yatekome pinagome ako yuane yapu yametekome toto
meateko walai-kiti-pala nodokapianeya yameoono, eida pote kakete tone toge kia
noatekoya nodokamene. Nodokapoatino poe wa Yesuyo one oyali takuta takoa moa
wetekaneya.
16
Nitikale Yerusaleme take pekete enekoli Yesuyo eina okanakale nimini
tadeka. Nitadekale einata kini toge kia noatekoiya nodokaneya.
17
Nititikaneyake ta likaka Yesu one ete oya-kiti-pala eida nome menaneya.
18
Nitoapa
eina nee noa mekete Yesuyo okome etene nimini ukuno yakamene. Anu oya-lawe nopala
opia mekete nee naki-kiti kiwi padame no-pala poi te iane yenane yonoke moa pioo wa okale
19
odene odene wa mekoi peyame Yesu ete yatekete ekete Ali Muno wini okolepa noanume
toatekumo eke oko-pe wa wene keda toologaneya mekete yakakala tokoli okome
20
anu
tuku kakoa (12) oya-lawe kiwi panago no-pala opia mekome odene okolo kagonoke nee
moa tadoata nako agopa no moa meatekago too.
21
Nipa Akolaline bokuke Ali Yatenane
Oyago nopala eni toatekamo papete wia mekapiane toane taatekoane tuou. Ae, no
witikamotoa moa meateko agomepa dika dika toamene tete moono, eni tete moamademe
tokome einago opiameneya too tokapa nipa epetoo tokake opa ae wa Yesuyo akeneya.
Yesuyo One Oyali-kiti Palawe Wane-pala
Gerepi Po Ku Ueta Moa Lawetekome Akenemo
(Matiu 26:26-30, Luke 22:14-20, 1 Korine 11:23-25)
22
Eni nee noa mekete Yesuyo palawe wane moa Akolali-pala ke wa popimotokome
tatikamu tokome okome ipa anu tiginino, moa namene wa moa lawetaneya.
23
Nititikoa
gerepi po ku ueka meteke mekaneya katekamoa Akolali-pala ke wa oa one oyali-kiti
metekale peyame moa yumoa nakeneya.
24
Nitikoli okome Akolaliyo ali atoame wenele
toatekoi totono oi pedoa pikana toane kadimo oane piku. Ipa anu kamate. Ali atoa peya
matike tukene anu kamate ponomotou.
25
Kipala imopa etene nimini ukuno yakoe. Akolaliyo
talo toko take kipala opiane mekene gerepi po ku ue weneya wa moane nou. Nitatekuyake
papete pade wa nakileka toamou wa oa
26
peya takakome eni ketea lo pade oomoteketepa
Olipe-pini tono waneke pote witapaneya.
Yesuyo Pita Neme No I Ago Wene Toamuku
Wa Akoa Waoo Wa Oa Pianemo
(Matiu 26:31-35, Luke 22:31-34, Yone 13:36-38)
27
Yesuyo Olipe-pini tonoke pome mekome okome kiwi peyame no wawa tia
tadatapeoi. Nipa Akolaline bokuke nopala toatekoileke panagome papete eya wa wia
mekapiane toa taatekoa nitoi. Akolali noanume sipi sipi kai-kiti talo toko ago witikolu one
sipi sipi kai tadoa pootapeoi wa wia mekaneya.
28
Eina wia mekapiane toane taatekoane
tukoluka Akolaliyo moa kamotokoo. Nitikale kamoane kiwi naniko nomotoane no namolo
takoane Galili take pone mepou wa okale
29
Pitayo okome i ali peyame ne tia tadatapekolika
noanume ne tiane padeka poamou-kale okome
30
nepala i ukumodo yakamene. Opi likonu
ali ogadame ka takupeta wete wameneyake neme no i ago wene toamuku wa tebolo-peta
akoa wawade toko-kale okome
31
ne witikete nopala dekoa witikolika ne einago wene
toamuku wane wawamou wa Pitayo okale ete peyameka oneme eina okana toa okala
taneya.
Yesu Gesemani Take Pome Kowitipanemo
(Matiu 26:36-46, Luke 22:39-46)
32
Nimo okoli Yesuyo patoe wa Gesemani take pome mepaneya. Nitoa mekome
Yesuyo one oyali-kiti-pala okome no yeka tutu pone kakene kowitipukuno, ita meamene wa
ootokoapa
33
Yame Yoneta Pita toa aua pokome ela matiyame tuaneya tepene-pala mama
mati motaneya pekeneya.
34
Nitaneya kakome okome no wene keda mati tokolo tuadene
meku. Mugili-pala topelekono, ita nepikoa meamene wa oomotokome
35
nami-takakoa eko
keneya kidene pome itonoke aua pitalogoa kowitaneya. Nipa onepala toatekale
katekakamotoa kowitaneya.
36
Nitoa kowitikome okome Atai padele padele peya neme
tamele toko. Meteke no noateku ue enekupa no tete moatekulu enipa tokono, ete
pedekakamene. Nimo wane kowitikuyake anu wene pikule toa wane ekene wamuku. Neke
wene pikole tou wa kowitimotokome
37
one oyali-mene mekoita wakapea nokome enekale
atu pia meadekoi. Nitadekoli Pita yatekome okome atu pia meko-pe. Pa nateya opia me me
teke nepikamele toamoko-pe.
38
Setanuyo kiwi likoa enekoyano, wedoa lene kia mekete
kowitamene. Lene kiane nepiane meou wa wene pikiyake tiginipa popeyo noamokolo atu
wini pia meadiki wa Yesuyo oomotokome
39
kutu keneya wa pome kowitikome one
namolona okana toa lokoa kowitaneya.
40
Nitoa kowitimotokome wa wakapea nokome
enekale pa atu pia meadekoi. Atume moa ma leou takakale pitaneya. Nitoa atu kiyo kiyo
kamokakete one-pala oatekoi agopa tokale meaneya.
41
Nitaneyake eina toa pome mea
tebolo takoa wakapea nokome enekome okome kiwi pa koome tuaneya mekete atu-kala pia
meki-pe. Opi oyakeno. No Ali Yatenane Oyagopa Akolaline agale tagoa toamiki yename
witikamotoa moa meateko ago ku nokono,
42
wete kamokoa kawe. Kotua pekete pato wa
akeneya.
Yesu Dekoa Motanemo
(Matiu 26:47-56, Luke 22:47-53, Yone 18: 3-12)
43
Yesuyo enimo oa kakaka one tuku kakoa (12) oya ali-kiti pade Yudase wete eni
nekeneya. Nokale ali peya mati koukoa kepete tue layo katekamo katekamo toa obomoa
nekeneya. Nipa eya ali-kiti Akolalike lodo yotokoai tane tobou ali-kiti ni Mosesene totono
pine to a olaukane ali-kiti ni ete tobou ali-kiti enika eni ali peyame Yesu dekoa
motokapoatino poe wa wetekakoli nekeneya.
44-45
Wetekakoli neketepa Yudase Yesu kakata
wete nome awa, Tikisago wa ootokoa Yesu nunu akeneya. Enipa papete Yesu dekoa
monatekoi yene-pala oi pedoa pikana toa nitaneya. Nipa one pone nunu opokou agopa
Yesu eni toono, dekatapea moa tapu toa aua pamene wa oi pedoa pikana toa taneya.
46
Nitikale Yudase-pala opia nekene ali-kitame Yesu dekoa monaneya.
47
Nitikoli one kakaya
liti kakene oyago padame panago wiou wa one kepete tue witimoapa panagono kapidi pine
takoa pitikaneya. Einakagopa ako odene mekome Akolalike lodo yotokoai tane tobou
agono pupu ago.
48
Nitaneyake Yesuyo e yene-pala okome kini kepete tue lua note layo
tigini-pala nidikoa aua nikino, kode ago tetepo takakete no dekoa moadete niki-pe.
49
Ta
pataka abuna tobou losu yapuke kiwi kakakoane keleyo pone olaukoane kakounake no eida
dekoa moamokoina. Dekale wakoti-pe. Akolaline bokuke nooke papete wia mekapianele
taatekoa toono, toe wa okale
50
one oya-lawe peyame one tia wawa pitoa pootapeneya.
51
Nitikoli tuali pade odene pue petene ewetetapea kakeneya Yesu aua pokoika litima
pekeneya. Nitikale pade-kitame dekatapekoli
52
one pue laukalogakome pa pitoa pekeneya.
Yesu Kanosolo Yenane Leneke Moa Kakanemo
(Matiu 26:57-68, Luke 22:54-55, 63-71, Yone 18:13-14, 19-24)
53
E yename Yesu dekoa moomoteketepa ako odene mekome Akolalike lodo yotokoai
tane tobou agono yapu aua pekeneya. Einagono yapupa eya ali-kiti Akolalike lodo yotokoai
tane tobou ali-kiti ni Kanosolo ali-kiti ni Mosesene totono pine to a olaukane ali-kiti eida
wete ponete koukoa meponaneya.
54
Yesu einagono yapuke aua pokoli Pita kutu mati
kawatati toma nome tobou agono kela pawe patukoa one pupu takane yene pakeke nome
menaneya. Nome mekome yono toe yame yame toa meaneya.
55
Nitikakoa Akolalike lodo yotokoai tane tobou ali-kitameka ete Kanosolo ali
peyameka Yesu wia tukatekoile wili toa kawa tuku taneyake one koiso akoa wia tukatekoile
pade toameneya.
56
Nipa ali kainya matiyame dika dika wa kapene wakakete eketeke
odenemo wameneya.
57
Nitaneyake pade ali-kiti kamokoa kakete kapene wakakete ekete
58
i
agome eya wa okale yatekoo. I kako tobou losu yapu alime wianeya ke aweane
tadekatapeou. Wa ta tebolo-peta lia patakale eni pana-mene moomoane alime yono petekoa
wiamene yapu awitikakoane wa wiou wa oka wa akeneya.
59
Nimo waka eketeke padame
pade oa padame pade oa odene kotu kakameneya.
60
Nitikoli ako tobou meane ago
kamokoa e yenane lene yoto kakome Yesu pitia yatekome okome neme okale
yatekoinakamo eni akoa ikino, neme pademo topo takoa enike oo-pe wa okale
61
Yesuyo
agale wametekoa pa kakeneya. Nitikale ako tobou meane agome wa pitia yatekome okome
nepa Keraisu toto Yu yatename kei-kama piateko ago Akolaline mana-pe-kale okome
62
e eno, nopa einago. Ni naniko Ali Yatenane Oyago nopa telekole-kama toko ago Akolaline
nimini yono lono kawane tibu wedo patu meane wakapeane nokolu enoi wa okale
63
ako
tobou ago pinali one kakene mamina tiawea iyatapekome okome okome oyakeno, i agome
tane poanele i i wa to awea omotoa wa pade ali-kiti totome wa tuku toa moa kakateko toa
mena.
64
I agome Akolali taumada toa okale kime yatekoinano, edele tato-pe-kale peyame
ekete i ago wia tukamedekona wa ootapeneya.
65
Nititikoa pade-kitame Yesuke tekelipu toa
yotokoa one leneta yoname ketekakoa kawa yumili mutua pia witikete ekete nepa teyo
witikato-pe wa tea agale akeneya. Nitoapa i ago moe wa tobou agono poyo ali-kiti metekoli
motekete kala wikala taneya.
(Matiu 26:69-75, Luke 22:56-62, Yone 18:15-18, 25-27)
66
E yename ako yapu nitoa kamotoa Pita akolono tobou agono yapu pomale pa eida
meaneya. Eidapa tobou agono pupu takane atoa pade nokome enekale
67
Pitayo one yono
toe yame yame toa mekale enekome okome neka i Nasarese Yesu-pala opia yake toka-kale
okome
68
mena, neke wini oko agale yakamekene wene toamuku wa oomotokome kago
keteponoke pome kapaneya.
69
Pome kapokale eina pupu takane atoa wa nokome Pita
enekome eniya liti kakoi yene-pala okome i agoka Yesuno oyali tadeko wa okale
70
eina toa
Pitayo okome no pade one oyago mena wa akeneya. Wa naniko keneya eniya liti kakoi-
kitame Pita-pala ekete nepa Galili take agono, Yesuno oya-lawe-pala opia yakago tadeko
wa okoli okome
71
kapene wakadekolupa Akolaliyo no kibu momotouno, Akolaliyo
yakakoane etene nimini ukuno, kini wini iki agopa wene toamuku wa oa kakaka
72
eina eina
taku takoa ali ogadame ka oa kakeneya. Nitikalepa Yesuyo eya wa okana ali ogadame taku
takoa ka wete wamokaka no i ago wene toamuku wa neme no tebolo-peta akoa wawade
toko wa Yesuyo okana one wene ponokale akolono pome komo ka ta pitikoa kapaneya.
Make Make
<<
14 14
>>
Make Make
<<
15 15
>>
15
(Matiu 27:1-2, 11-14, Luke 23:1-5, Yone 18:28-38)
1
Podolikama ta pene patakaka Akolalike lodo yotokoai tane tobou ali-kitika Kanosolo
ali-kitika Mosesene totono pine to a olaukane ali-kitika eni yene peyame Yesu wia tukatekoi
oi pedoa pia meaneya. Nititikoa one yonoke po kakamotekete Pailase mekata koiso
akakamotoa aua pote kakapaneya.
2
Nitikoli Pailaseyo Yesu yatekome okome nepa Yu yene peya lukoa meki ako tobou
ago-pe-kale okome nopa einago wa wini okana wa akeneya.
3
Nitaneyake Akolalike lodo
yotokoai tane tobou ali-kitame Yesu i agome dika dika wa akoa okala tokoli
4
Pailaseyo
Yesu wa yatekome okome opa nipa padele padelepa neme tanemo-kala akoa ikino, neke
yakoa edemo oo-pe-kale
5
Yesuyo agale wametekoa pa kakale Pailase wene kainya pia
kakeneya.
Yesu Wia Tukamotoa Oa Tukanemo
(Matiu 27:15-26, Luke 23:13-25, Yone 18:39-19:16)
6
Edelo ago patukane wa ibini akene toge oi ponokale-kama Pailaseyo eya tokala
taneya. Yu yenamepa po yapu pitane ago pade po kotokoa one yapu wetekaka wa takoa
okoi agopa moa wetekakala taneya.
7
Eina toge kiane-pete Yu ali-kiti po yapu moa
pitikaneya meanepa Lomane yene-pala poi kamotokoa pade ali atoa witaneyake ni moa
pitikaneya meaneya. Nitane ago pade Barabasi po yapu eida moa pitikaneya.
8
Yu yene
Pailase mekata obomoa note kakete ekete eina tokala tokana toa opika nitoa ta wa koukoa
note onaneya.
9
Nitikoli okome Yu yene kiwi peya lukoa meki ago po kotokoane
wetekakamotoa iki-pe wa yakaneya.
10
Nipa e yename Yesu aua nikilepa pa puputua wene
pokete ni tokoi wa wene tokome akeneya.
11
Nitaneyake Akolalike lodo yotokoai tane tobou
ali-kitamepa eida oboa kakene ali atoa oa kamotokakete ekete Pailase-pala eya wa atoe.
Barabasi einago po kotokoa wetekaka wa atoe wa oa kamotokaneya.
12
Nimo wa kayo
okala tokoli Pailaseyo okome kiwi Yu yene peya lukoa meki agopa edekamene wa iki-pe wa
okale
13
winago yomo lekaneyake wia dekakamotono ta wa kayo oa kakoli okome
14
one
poanele edele taneyake iki-pe-kale agale telo oa kamotokoa kakete ekete winago yomo
lekaneyake wia dekakamotono ta wa awitikoa tika tika taneya.
15
Nitikoli Pailaseyo e yenane
wene epetekademe tokome Barabasi moa po kotokoa wetekakaneya. Nititikoapa Yesu po
wapime wiamene wa one poyo yene moa metekale witikoli yomo lekaneyake wia
dekakoatino toe wa nitatekoi poyo yene moa metaneya.
Poyo Yename Yesu Taumada Toa Kakenemo
(Matiu 27:27-31, Yone 19:2-3)
16
Nitikale poyo yename Yesu moomotekete tobou ago Pailaseyo ta talo tokome meka
yapuke aua pote kakapaneya. Nitoapa ete poyo ali peya koukoa mootokoa eya taneya.
17
Kikome kiane mamina petene pade moa kakaneya. Nititikoa kagani kakene po ludu moa
makatikoa one wagoke lobutukaneya.
18
Nitoa lobutukakoa yono wia pitikakete ekete Yu
yene lukoa meki Ali Muno ne mea kamene-ye wa taumada toa kakeneya.
19
Nitoapa tauwe
wata wakoa moa one tobou wane wia oneke tekelipu toa yotokakala taneya.
20
Edikoa paya
tobou ago tetepo takatekoapa one tokoo kakakoina mamina petene kotokoa one namolo
kakene mamina petene wa moa kakamotekete yomo lekaneyake wia dekadete aua pekeneya.
(Matiu 27:32-44, Luke 23:26-43, Yone 19:17-27)
21
Yesu-pala eni aua pokoika Sairini take ago Saimone tayo lono kawa nokome
kotukale enekete ekete i ago wia dekateko yomopa neme aukoano noo wa dekoa moa
aukaneya. Saimone einagopa wamenata Alekesada Rupusitane etene.
22
Nitoa aua pekete
Gologosa wa ibini akene take witapaneya. Gologosa tone agaleke eketepa ali wago wa
ekete oo.
23
Nitaneta Yesu-pala aua pote witakete gerepi po ku ue-pala mire yobotonota
eletekoa lawetekoli noamademe wakeneya.
24
Nitikale yomo lekaneyake wia dekatekoa
kakete ekete one kakene mamina-mene tatiato wa poyo ali-mename tadu tootokoa tatite
taneya.
25
Einata einapete lou pini pogi kakoake (9 kilokoke) Yesu wia dekaloganeya.
26
One
eni wia dekalogane yomo munokepa pipia eya wa wia mekatekoa dekaloganeya. I agopa Yu
yene lukoa meki tobou ago. Nipa one koiso akoa akenemo eni wia mekatekoa
dekaloganeya.
27
Yesu eni wia dekaketepa kode agota takuta eka okata yomo padetake wia
dekakala taneya. Nipa panago Yesuno nimini yono lono wia dekoa padena ago one ewa
yono lono wia dekoa taneya.
28-29
Nititikaneyake eida ponokoi-kitame tedu metekete ekete beita, nepa tone tobou
losu yapu odepeta ke atapeanepa wa ta tebolo lia patakale eni luku wa wiou wa
okanakagono,
30
pinali neke toa moano, yomo lekaneya ludu ketipea ko a noo-na wa tema
ponokala taneya.
31
Eina toa Akolalike lodo yotokoai tane tobou ali-kitameka Mosesene
totono pine to a olaukane ali-kitameka dikoa tedu mea oote tekete ekete i agome ete pade ali
atoa toa motokoyake pinali one pade wa toa moamele toamoko.
32
Beita, Keraisu Iserele
yene lukoa meki tobou ago one wia dekane yomo ludu ko a nokale eneketepa i agopa
Keraisu tadeko wa totome wene too wa tea agale okala taneya. Yesu-pala odeneka wia
dekane kode agotameka edikoa tea agale okala taneya.
Yesu Tukome Tuanemo
(Matiu 27:45-56, Luke 23:44-49, Yone 19:28-30)
33
Lou mataike ponome kakaka (lou pini 12 kilokoke) ta peya likatapeneya. Lou pene
webokaka (lou pini 3 kilokoke) pa ta likoa kakeneya.
34
Einapete lou pene webokaka (lou
pini 3 kilokoke) Yesuyo telo kayo okome okome Eloi Eloi lama sabakani wa kayo akeneya.
Enipa anu Akolali anu Akolali neme no dekolo tewitikoa wako-pe wa tone agaleke ekete
oko.
35
Nimo okale yatekete eniya liti kakoi-kitame ekete enipa Ilaida kayo okome toko wa
akeneya.
36
Nitoa yakatekoa panagome okome ue nodome tukome ni oko wa teyapea pome
ue takamoateka obi wane pade mopaneya. Mootokoapa kou tane gerepi po ku uele
tadamoa tauwe wata munoke togototokoa aua nome kakome mitumoa na wa kabunuke pia
lete lete tokome okome Ilaidayo i ago kiitapea monoko patuno, tokale enato wa nepikoa
kakeneya.
37
Nitoa nepikoa kakoli Yesu telo ootapekomepa tukome tuaneya.
38
One
tukakapa eina eina kuna tobou losu yapu keneke eya mamina petene Akolali meko lono wa
akene yapu luku olege toa ketekalogane mamina petenepa ete oto wa iyawea
tukaketikaneya.
39
Nika Yesu lene timini takoa piane lono kakene tobou poyo agome Yesu
tukome tokale enekome okome ae i agopa nimini Akolaline mana tadeko wa enekoa
kakeneya.
40
Pade atoa-kitika eka mati kakete enekoa kakeneya. Eni kakoi atoa-kiti pakeke
eya atoa-mene kakeneya. Pade Magadala Maria. Ni padena Maria onepa Yame Yosepetane
nine. Pade atoa one ibinipa Salomi.
41
Einatoa-menepa Yesu Galili ta ludu pima yakaka one
auapema yakeneya. Yerusaleme take Yesu-pala opia note kanane atoa-kitika eida nepikoa
kakeneya.
(Matiu 27:57-61, Luke 23:50-56, Yone 19:38-42)
42-43
Ta likaka ibini akene Kanosolo ago Arimasia take ago Yosepe Pailase mekata
pekeneya. Einagomepa Akolaliyo ali atoa keleyo talo toatekale nepia meaneya. Ni agopa
podolikama ko mea pupu toamateka-pete tokale tokome Pailase mekata atiki toa pokome
Yesuno tigini moane pipouno, mea ta wa opaneya.
44
Nimo Yesu wete tuameneyake oko wa
Pailaseyo wene pikome one tobou poyo ago ne noo wa kayo oa motokome okome Yesu
winakago tukome tuka-pe-kale okome
45
wete tukome tuka wa okale okome nipa mopoano
pa wa Yosepe yametaneya.
46
Nitikale pome mootokoapa ake tane mamina petene moa
tatilogoa Yesuno tigini pia ewetetapeneya. Nitimotokome aua pomepa pala padaneta
kokapiane kota keneke pipaneya. Nitaneta Yesuno tigini piitikoa kue makai uoya koketekoa
moa kabunu ketekalogoa pekeneya.
47
Yesu eni moa pipokata eya atoatame Magadala Maria
Yosesene nine Mariatame enaneya.
Make Make
<<
15 15
>>
Make Make
<<
16 16
>>
16
Yesu Kamoa Pekenemo
(Matiu 28:1-8, Luke 24:1-12, Yone 20:1-10)
1
Yu yene kini eina ko mea pupu toamatekoi-pete ponotekeneyake lou pipokaka eya
atoa-mene Magadala Maria Yamene nine Mariata Salomi toa Yesuno tiginike pekoa yotokoa
ka lono takatekoiya topo toa motokapianeya.
2
Nitaneyake podolikama egeme ta tu ei teigaka
kamomoteketepa Yesuno tigini moa pipane kotake pekeneya.
3
Poadete pekete kini-mene
oote tekete ekete eina ketekalogane kue teyo ete koketekoa moa pikako patu wa oma
pekeneya.
4
Nitoa pekete enekoli paka koketekaneya kakale enaneya. Eina kota kabunu
ketekalogane kuepa yau petene makai wane uoya.
5
Yesuno tigini pipane kota keneke eida
tuapea pekete enekoli tuali pade ake tane mamina kakeneya nimini yono lono mekale
enekete ekee wa piti tokale kakeneya.
6
Nitikoli einagome okome piti moameo. Eina wia
dekakoina Nasarese Yesu kime tuku tonadikiyake inakago ita piamokono, wete kamokoa
poka. One pianeta luku ino enoe wa yametaneya.
7
Nitikome okome Yesuno oyali-kitika
Pitaka yakamotono imo wa akapamene. Inakago wete kamoa poka. Kiwi Galili take naniko
nomotoa one namolo takoa pokono, eni take penekete enoi. Yesuyo kipala namolo okana
toa Galili take peketepa enoino, poatino poe wa akapamene wa edelo agome einatoa-mene-
pala akeneya.
8
Nimo okale eina kota keneke kawa akolono pitoa pekeneya. Kolu kolume
tua wene-pala kainya pianeya tokome taneya. Nitoa piti tokale tekete pade ali atoa eneketeka
to awea wametekaneya.
Yesuyo One Lene Timini
Magadala Maria Yametanemo
(Matiu 28:9-10, Yone 20:11-18)
9
Egeme ta pataka-pete lou witia nokaka Yesu kamoa pekeneya. Kamoa pokome one
lene timini Magadala Maria namolo takoa yametaneya. Namolopa einatoake tatono kakoa
(7) ipono awitaneyake Yesuyo takoa wetekakaneya.
10
Einatoame Yesu enemotokomepa
one-pala opia yakene ali-kiti komo oa tumai mekoita pome opaneya.
11
Yesu kamokoa
yakole enoane nuku wa eni opokaleka nimini okono wene piamekete pa tumai meaneya.
12
Wa padepete ali takuta padeka lono kebono takoa piane take poadete pokoli Yesu
padele tootapeane tigini kakeneya nokome one lene timini yametaneya.
13
Nitikale
enemotekete wa wakapea ete yene mekoita pote ile enekoo wa opokoli enika yakoa
moameneya.
14
Wa naniko one oyali-kiti tuku melepu kakoa (11) yene oboa mekete ne nakoita
nokome one lene timini yamenaneya. Nitinokomepa one wete tuameneyake mekome
okanakamo yakoa moamokoli tokome kikoa akeneya. One tuake kamoa nokale
enemotekete to awea onokala tane-kitame okoimoka kolotini lupi tootokaneya mea
yakamokoli tokome nika kikoa akeneya.
15
Nititikoa kakome okome ali atoa ta piko peyake
pitiki toa anukumo oa pupitikakapoatino poe.
16
Anukumo yakoa mootokoa ue motokoi
yenepa Akolaliyo toa mokala too. Nitameneya anukumo yakoa moamokoi yenepa nipa
Akolaliyo kibu mootokoa wawoo.
17
Anukumo yakoa motokoi yenamepa Akolaline tele
patu kautakoa kakete tadiki wa ete-kitame wene tomotoa eya telekole toma poi. No ibini
wedekoa ipono-kiti takoa wetekoa ni weneya agaleke pademo pademo oa
18
ni ali tania
tukakoya kaya katekamoake tuamoa ni ali tukakoya ue moa noake tuamoa toi. Ni eya kuya
yene taneya mekoi-kitika yono pikoli latoa pokala toi wa Yesuyo oa kakeneya.
Yesu A Tibuke Atepea Aua Pekenemo
(Luke 24:50-53, Aposelo 1:9-11)
19
Ali Muno Yesuyo one oyali-kiti-pala eni ko ootokoa kakale Akolaliyo one tibuke
atepea aua pokale pome Akolaline nimini yono lono mepaneya.
20
Nitaneyake one oya-
laweme Yesunomo ta piko peyake oa pupitikama pekeneya. Nipa Ali Muno agome auapea
yopia kakale ele kule telekole-pala toma yakeneya. Nitikoli enekete ali atoame inapa nimini
akediki wa Yesunomo yakoa mokala taneya.
Make Make
<<
16 16
>>
Pailimone
00
11
Pailimone Pailimone
<<
00
>>
^
Pailimone
Pailimone Ete Ali Atoake Wene Mekoa
Yesuke Wene Tugoa Mea Tanemo
Onisimasi Neke Yapu Wa Moa Mekamene Wa
Poloyo Pailimone Kowitanemo
Pailimone Pailimone
<<
00
>>
Pailimone Pailimone
<<
11
>>
PAILIMONE
Poloyo Pailimoneke Wia Wetekane Pipia
1
1
Polo nopa Keraisu Yesunole takama yakouke po yapu pitikagome uku.
Tone oyago Timosi totame tone oyago Pailimone neeke i agale wini oane wetekako-
ye.
2
Neke yapu losule toa oboai tiki yene ni tono oyatoa Apia ni tota-pala poi kibutua tou
toa Yesunole takama yako ago Akipasi kiwi peayake i agale wini oa wetekako-ye.
3
Toneketai Akolali-pala Ali Muno Yesu Keraisutame kiwi peya pewe wia tepe koltoini
kilikoa pikoa tomotoane kowitikoane uku-ye.
Pailimone Ete Ali Atoake Wene Mekoa
Yesuke Wene Tugoa Mea Tanemo
4
Neke kowitikakene-kama Akolali-pala ke wane okala tuku.
5
Nipa Akolaline ali atoa
peyake wene mekoa mea ni Ali Muno Yesuke wedoa wene tugoa mea toko wa neeke
akedikimoke ke wane ni uku.
6
Neke Keraisuke wene tugoa meke tokomopa yete pade ali
atoa eneke i i wa oa memotoane kowitikakala tuku. Toto Yesu-pala lipua mekolo Akolaliyo
kiwi pewe-kama witikene tukule i i wa ne wene takatapemotoane tekene ni kowitikoane uku.
7
Ete-kitike wene mekoa meke tokomo yatekouya tekene wene weye akeneya meane ke
wane wediane mekene uku. Akolaline ali atoa weye akake tokano, ke wane uku-ye.
Onisimasi Neke Yapu Wa Moa Mekamene Wa
Poloyo Pailimone Kowitanemo
8
Keraisu patu kautakoane kakene neke padele toatekole wete ta wane tika tika toane
tamele tokoyake edikoane wamadene waku.
9
Neeke wene mekoane mekene tekene ko
akatekoane uku. Nipa no Polo ada toanemeku ago Keraisu Yesunole takakouke po yapu
pitikene anu oyago Pailimone eya tamene wane ne kowitoane uku-ye.
10
Onisimasiyo nepala
poanele tokake po letu mekakana ke wamene. Anu mana tetepo takoane meku agoke uku.
No po yapu yonoke po kakaneya pitikene Yesunomo oane metekolu einagome yakoa
motoka tokolo ni uku.
11
Papete einagome nekele takakilepa pale tokala taneya. Opi pade
nitamokome nekele wedoane takou wa wene pikome anukule-kitika wedoa takoa meko.
12
Nitikago ne Pailimone mekota wakapea pa wane wetekakilepa anu kolotini ago eni
wetekaku-ye.
13
Nipa Keraisunole takama yakouke po yapu pitikenepa einago ne luku
kakome no auapea memotoadiya wane pikeneke tuku.
14
Nopla opia pa memotadiya wane
wene pikene ne yakameneya meamedekolo waku. Neke weneme no auapeadekalepa
epetoo. Nitameke no Poloyo ta wa tika tika tokolo tuku waneke weneme toameadekalepa
epetamoo.
15
Onisimasi einagomepa Pailimone ne nateyame tewitikoa pikilepa ne mekota wakapea
pome mekome meademeke taneya patu.
16
Ne mekota wini wakapea nome menokalepa neke
skueme topo toa moa eegetane ago tetepo takamoano, neke kolotini agoka tetepo takoa
meamene. Einagopa anu kolotini agono, einagoke wene mekoane meku toa moa patukoa
wedoa wene mekoa mea makutukoa moamene. Nekele wedoa takoa ni nepala kibutua
Keraisunole takama yawa toono, ame wa oa makutukoa moamene.
17
Neme nopala odene wene piitikoa mea Keraisunole takadekalepa nipa nopa neke
oyago wa makutukoa mou toa einagoke wedoa makutukoa moamene wane uku-ye.
18
Einagome nepala padele toa potoko ni nekeke padeya nami kakoa motokanakeya wete ee
meamokalepa noanume nami witikadene tuku, amene.
19
Inapa no Polo anu yoname witiku-
ye. Noanume nami witikadene tuku-kutu. Nimo ukuyake eya waneka ne wene takakene ku.
Ne mea kama poateka ka no Poloyo yametekouna.
20
Nitikounano, Ali Munagonole takake
anu wene moano, ipa Keraisuno takaku wa anu wene weye akoano, einago makutukoa
moamene.
21
Ina ukule neme yakoa tikilepa moa patukoa akole toono wene taneya mekene uku.
22
No none piatekuta nodokakapiamene waneka uku. Akolaliyo kini kowitikimo yakoa
tokome no ne pa wa wini noaeku ka yameteko patu wane wediane nepiane mekene ni uku-
ye.
23
Eya ago Epaperasi Keraisu Yesunole takaneleke nopala odeneka po yapu yapu
pitikagome ne Pailimone wete meamene wa oko. Eya ali-mene nopala odeneka Keraisunole
takoa meki ali-mene Make Arisakasi Dimasi Luke kimeka ne wete meamene wa iki.
24
Tone Ali Muno Keraisu Yesuyo kiwi peya pewe yopia memotoane kowitikoane uku-
ye.
Opa anu agale eni.
Pailimone Pailimone
<<
11
>>
Pilipai
00
11
22
33
44
Pilipai Pilipai
<<
00
>>
^
Pilipai
Poloyo One Pipia Oi Moatekoi Yenane
Kowitikanemo
Polo Keraisu Patu Kautakoa Kakome Tanemo
Keraisu Poti Wene Pianeya Mekome Tanemo
Tagoi Keneya Pa Tokoa Kamene
Timosi Epaperodaisitake Akenemo
Poloyo One Namolo Tokanakale
Tewitikoa Wakenemo
Pote Wipitia Meatekota
Teyapea Pitimoa Poatekomo
Pilipai Yename Kinikiya Pade Takoa Moa
Poloke Wetekakala Tanemo
Pilipai Pilipai
<<
00
>>
Pilipai Pilipai
<<
11
>>
PILIPAI
Poloyo Pilipai Yeneke Wia Wetekane Pipia
1
1
I pipiapa no Polo Timosita Keraisu Yesunole takama yako agotame wia wetekako-
ye.
Nipa Keraisu Yesu-pala lipua memotoa Akolaliyo one wa takoa motane yene Pilipai
take meki-kiti kiwi peyake wini wia wetekakilepa losu talo tiki ali-kitikeka losu pupu tiki ali-
kitikeka peyake wia wetekako-ye.
Poloyo One Pipia Oi Moatekoi Yenane
Kowitikanemo
2
Toneketai Akolali-pala Ali Muno Yesu Keraisutame kiwi pewe wia tepe kolotini
kilikoa pikoa toe wane kini kowitikaku-ye.
3
Kiwi wene tekene-kama agetai Akolali-pala ke wane okala tuku.
4
Nitoane kini
kowitikakilepa wedianeya-kama meane kowitikakala tuku.
5
Keraisu Yesunomo kipala
titikene oane metekouna-peteka opika yakoa moa no auapema nikike ni tuku.
6
Akolaliyo
kiwi pewe witikene dikou dikou wa titikome taatekoa tokana toapa Yesu Keraisu oto
wakapea nokaleka pa toa-kala kawa peya takoono wene pikene uku.
7
Kiwi mama
motukumo tepene meaneya eni ya wane ekenepa kiwi wene taneya-kama mekene tokome
tamele toko. Ni edoa-mo. Ali atoane lene yoto kakene Keraisunomo i i wane one kei piane
kakoluka opi kapa po kakaneya po yapu pitikuluka Akolaliyo no pewe witikome kiwika
dekoa pewe witikome witikolo tokome kime no mape mokala tiki.
8
Kipala i ukumopa nimini
uku wa Akolaliyo wene toko. Kiwike-kama wene piitikaneya mekene wene mekoane tikilepa
Keraisu Yesuyo toko toane tuku.
9
Kini kowitikakilepa eya wane kowitikoane uku-ye. Wene mekanali yotikilepa akole-
kama toma pomotono ta wane Akolali kowitikakala tuku. Nipa nekemo emo kumo peya
wene tomotono, ina ina wa pine piko toa-kama wene takoano ta wane kini kowitikoane uku-
ye. Ni edoa-mo.
10
Padele padele takoa enekilepa epetanele-mati toatekole i i wa kime takoa
enemotoane ni uku. Nipa Keraisu wakapea noatekoya nepia mekete toatiki toapa edikoa
poane wene piamoa ni ete-kitame akoa agale oatikile toamoa tomotoane uku.
11
Yomo pade
ku wedoa tumotoa lati lati tou toa Yesu Keraisuyo auapea yopikale ele kule kiyo akenele-
kama tomotoaneka uku. Nitikoli enekete ete-kitamepa Akolaline peku noa tadeki wa one kei
piai tomotoane ni uku-ye.
Polo Keraisu Patu Kautakoa Kakome Tanemo
12
Anu oya-lawe kiwi eya waneka wene takakene ukuno yakamene. Nopa poo yapu
pitikaneya mekulu tokome Keraisunomo oa pupitikatapeneya.
13
Nipa i ta yopiko agono
poyo ali-kitameka ete yene peyameka no Keraisunole takama pokouke po yapu pitikaneya
meku wa wene taneya meki.
14
Nika po kakaneya poo yapu pitikuke tone oya-mikiti kainya
matiyame ekete Poloyo piti moamokona toa kimeka Akolaline agale oadete piti moameneya
meato wa Ali Muno patu kautakoa kakete onekemo atiki toa oa aua yakete tiki.
15
Keraisunomo oa aua yakilepa pade-kitame no Polo einagome toko toanepa moane
patukada wa no-pala tepene poane wene pimotoake tekete tiki. Nitikilika pade-kitame epene
wene pianeya mekete tekete oa aua yakete tiki.
16
O yename onekemo oa aua yakilepa
noanume Keraisunomo i i wane one kei piane omotoa tokome Akolaliyo po yapu moa
kakaneya tadeko wa nooke wene mekoa mekete tiki.
17
E yename nitamekete Keraisunomo
paya wene pia oa aua yakilepa no po yapu pitikene ke enekakolo wene keda taneya
memotoa tekete tiki. Nipa kiwi ako ali meou wa wene pia tekete tiki.
18
Eni yename nitoa
kamotoane uku. Ni edoa-mo. Keraisunomo paya wene pia oa aua yaketeka epene wene pia
oa aua yaketeka onekemo ta piko peyake oa pupitikama yakete tiki wane wediane mekene
uku.
Eni uku toane pa wediane mema pou.
19
No po yapu pitikuyake anu oya-lawe kime anu
kowitikakete tiki. Yesu Keraisuno Epetane Yominiyoka no weye akoa yopia meko. Nipa ke
enekakolo mekuluka Akolaliyo kini kowitikakimo yatekome no oto toa moademe toko wane
wene tuku.
20
Eya toadiya wane wediane meane nepiane meku-ye. Papete tokounakale opika
onekele pata pale takamekene onekemo akamene piti moamekene atiki toane oane auane
yawou. Nipa tuadekoluka tuameadekoluka Keraisu-pala lipuane mekene tokouleke ete-
kitame one kei pimotadiyano wene piane tou.
21
Itonoke mekenepa Keraisu patu-kama
kautakoane meku. Tuadekolupa nipa Akolaliyo no pewe wia kakilepa akole-kama too wane
tuou.
22
No tigini kakeneya itonoke pa meamedekolupa nipa yomo pade ku tukome toko
toane one pupu wedoane-kama takamoane pou. Ae, one mekota tuane puku patu, onekele
pa takamoane puku patu. Agopa tokolo meku-ye.
23
Itono ete pimotoane Keraisu-pala
mekene meadene tuane poadiyano wene pikuyake
24
kinikile takadene itonoke pa
meamedeku.
25
Nitamedekuno, kime Keraisunole wedianeya mea takama yamotoane tekene
kipala pa opiane meouno wene tekene uku-ye.
26
Eni uku toane kiwi mekoita wida wa
wakapeane none mekolu tekete Keraisu Yesu-pala ke wa one kei pia wedia tagatapeneya
meoi.
27
Keraisuno ali atoa mekete toatekoi toa i i wa olaukanele toma pamene. Nitikolipa
wida none mekeneka padeka pone mekeneka eya odenemo-kama yakou. Anu oya-lawe
kime Keraisunole takakilepa poyo ali-kitame poi wedoa toa kawou toa poapeneya kakete
odene wene pianeya mea tiki wa okoimo yakou.
28
Nipa kipala poi te ia meki-kiti piti
moameneya atiki toa tamene. Nitima pokoile enekete eya wa wene toi. Akolaliyo toa moo
tokolo ni piti moamiki. Ae Akolaliyo kiwika wia atukatekolo toko wa oi.
29
Akolali
nitikagome kiwi takoa motikilepa Keraisuke wene tugoa mekete oneke toa tete momotoa
tokome ni toko.
30
Kiwi pakeke mekene poime keneya tete motokouna toane i takeka pa
mokoane kaku. Enipa kime yatekete tiki. Enika eni tetepa kimeka Keraisunole takama pekete
mokala tekete tikili ni uku-ye.
Pilipai Pilipai
<<
11
>>
Pilipai Pilipai
<<
22
>>
2
Keraisu Poti Wene Pianeya Mekome Tanemo
1
Kipa Keraisu patu kautakoa kakete tekete wene weye akaneya mekete tiki. Ni Keraisu
kiwike wene mekoa mekolo tokome mama motaneya mekete tiki. Ni Epetane Yomini-pala
odene wene pianeya meki. Ni ete oto wa ela moa auapenali yotokete tiki.
2
Nipa anu wene
epetekoa mekatiki kotuke kakoa eya-pala toma pamene. Yete pade ali atoake wene mekoa
mea padele padele tou wa wene pia tikilepa odene wene-kama pia tamene wane uku.
3
Padele padele tikilepa i ago ku ago moane patukoane ako ago kawou wa wene pia toamoa
mate agaleka wamoa tamene. Nitameneya yete pade ali atoa ako kakene tetepo takoa pinali
nepa keku kakene tetepo takoa meamene.
4
Kinikileke-kama wene piitikamoa yete pade ali
atoa-kitanele takamedeku wa wene pia tamene.
5
Keraisu Yesu itonoke epene wene pianeya mekome tane toa mema pamene.
6
Keraisu einago Akolaline yagono ago meaneyake Akolali-pala midi pianeya meou wa wene
piamokome eya taneya.
7
A tibuke mekome tane toa tewitikoa wakomepa one
weneme takoa wakeneya. Nitoapa yete pade ali atoa-kitanele takateka ago latiapa
lene timini tono melepu eya kakeneya nekeneya.
8
Nipa toto ali yatenane yagono
ago latitapeneya nokomepa pa keku ago tetepo takoa eya taneya. One etename
tamene wa okana toa litia tootapekomepa yomo lekaneyake tuou wa tuaneya.
9
Nitikale tokome Akolaliyo eya wa oa taneya. Ali atoa padeya padeya peya i ago
neeke-kama lukoa memotoane tuku wa ako odene ibini akene ago latia kakaneya.
10
Nitaneyano, a tibukeka itonokeka itono kekuluka mekoi peya oneke wadini
tukua mekete eya wa oa toi.
11
Yesu Keraisu i ago nepa Ali Munago kakoya
tadeko wa Atai Akolali kei piai toi.
Tagoi Keneya Pa Tokoa Kamene
12
Anu kolotini yene kiwi mekoita wida namolo mekene okouna toa kime litia
tokoinano, opi kipala opiane meamuku-peteka etene wedoa toma pamene. Nipa Akolaliyo
kiwi toa moa togamotoapa onekele takama pato wa pitime tuaneya meou toa oneke nate
wene pianeya mea toomoa pamene. Ni edoa-mo.
13
Akolali einagomepa kime one wene
pikole too wa wene pia tomotoa tikilepa kini tepene piko wene yopia mea toko.
14
Nitikono, padele padele tikilepa ko wamoa ete oto wa neno wamoa tamene.
15-
16
Nitameneya poane peku noa etepea toma piki-kiti pakeke mekiyake e yenamepa kime
poanele tiki wa kiwi kikoa akamomotono, Akolaline mana kono-mikitame toatiki toa kiyo
akenele-kama tamene. Nitoapa e yene kini mea kawatiki peku i lawetekuno noa tamene wa
lawetekilepa tagoi-kiti yomiyomu keneke kawou toa kakete pa takoa tamene. Yesu Keraisu
wakapea nokalepa kime tamene wane okounakale edikoa litia tadekolipa nipa Keraisu
nekelepa pata pale takameadeku wane anu wa kei piou.
17
Pine yene kini tigini Akolalike mea lodo you toa tekete ke enekakolo meketeka
Keraisunole takama yakete tiki. Kini tigini wa lodo you toa tekete tiki toane noanuka anu
kamatepa gerepi po ku ue keneya pekamotou toane eya tuku. Pade-kitame no witikilika
oyake wimotou wane kipala odene wene pianeya meane wediane meku.
18
Nitikuno, ke wa
wedikete wediatoane uku-ye.
Timosi Epaperodaisitake Akenemo
19
Ali Muno Yesuyo anu wene motokome ka yametekalepa nipa eya ago Timosi kiwike
wete moane wetekou. Nipa einago no mekuta oto wakapea nokome kiwi wida mekete tiki
ko onokome anu wene weye akanoono wene pikene tou.
20
Timosi einagome kiwi wida
edoa meki-pe wa mama moa meko. One keneya ago pade ita mekoya mena.
21
Ete yene
peyame Yesu Keraisunolepa wedoa takama yawamekete kinikileke-kama wene piitikaneya
mea tiki.
22
Timosi einagome Keraisunomo oa aua yakilepa no Polono mana ago tou toa
nopala odenekata oa aua yakono, onepa dikane ago tadeko wa kime wene tekete tiki.
23
I
poo yapu yopikagome nopala wipitikome toatekale wene tekenepa Timosi ne poano pa
wane kiwike wini moane wetekou.
24
Ali Muno agoke wene tugoane mekene noka kiwi
mekita wida wete nouno wene pikene uku-ye.
25
Anu oya ago Epaperodaisi kiwike wida wakapea pa wane wetekamedeku. Einago
Keraisuno poyo ago keneya tokome onekemo nopala odenekata oa aua yako. Kiwi
lukukepa no auapemotoa oto wetekakoli nokanakagoke uku.
26
Einago kiwike wene
piitikaneya meko. Nika one yene taneya mekomopa kime yatekoiya tekete wene keda taneya
mekete tiki wa kiwi mama moa meko.
27
Einago tuademe pianeyake Akolaliyo ela
motokome latekaka. Noka ela motokome ni toka. No wene keda mati takaya tokale nika
toka.
28
Nikepa einago kiwike wini wete moane wetekada wane wene piane meku-ye. One
wida nokale enekete ke wa wedia memotoane tuku. Nika noanu ela teigoane meadene tuku.
29
Einago wida nokale eneketepa tone oyago Ali Muno agono yatene ago i noko wa
makutukoa moamene-ye. Dikane ali-kitipa ibini akene ali tetepo takoa nitikala tamene.
30
Einagome Keraisunole takama yakome oneke toane tuou wa tuademe toake lataka. Nipa
kime no auapenamele toamokale tokome oneme auapenou wa tuamene piti moamokome
kiwi luku nome auapenoka.
Pilipai Pilipai
<<
22
>>
Pilipai Pilipai
<<
33
>>
3
Poloyo One Namolo Tokanakale
Tewitikoa Wakenemo
1
Anu oya-lawe kipala eya wane wipitikene uku. Ali Muno agoke wedia mema pamene.
Kipala pegetoane okounakamo wa amene kote moamekene uku. Kiwi etepea pokaya tokolo
ni ukuno, yakamene.
2
Yo tane tue wane paya tetepo takoane uku yene titi toma yamene. Eni
yename poanele tekete eya wa olaukakete tiki. Mone pa yene Akolaline mana-mikiti
latiadetepa kini kepene teigamotoa tamene wa pata pale tekete toatikimo olaukakete tiki.
3
Nitimotoake Akolaliyo eni yene wakome totopa one wa kepene teigane yene tetepo takoa
meko. Ni edoa-mo. Totome Akolalinele takoa one kowitoa tikilepa one Epetane Yomini
awinome wene takako toa toko. Nipa ali yatene kepene teigilepa edeya weike toamoono,
tokamota wa Keraisu-pala lipua mekete ke wa wedia meko.
4
Panagome-kiti Akolaline mati
latiadene dikaku dikaku wa pinali one wa kei pikalepa einagome toko toane moane
patukakene eya wane ukuno yakamene.
5
Nopa Isereleke ta wane nuku ago. Iserelene mana
Bedamineyo tagaane yatene Bedamine ti pitiku. Nitane ago nopa etene Iberu ago meku. No
opitikaneyake ta pataka ketepo kakoa (8) ponokale agetaiyo anu kepene teigamotoka.
Nitaneyake wetini ago kakene Yu yenane totono litikilepa Parisi yatene lono pekene tokou.
6
Nitikenepa no Yu yatenane totono wedoane toma yakilepa Yesuno yatene ali atoa tete
mema yakene tokou. Ni Moseseyo tamene wa akenele litikilepa odeneleka katekamoane
tokou.
7
Anu papete mekene tokounakalepa kamole tane tetepo takoane mekounake opi
Keraisuke lukoane mekenepa einakale pata pale tane tetepo takoane waku.
8
Nipa anu eina
tokounakaleke Akolaliyo no kei pioono wene pikounake opi anu Ali Muno Keraisu Yesu
wene tootapeane meadene enika enile peyapa pale tane tetepo takoane waku. Nitoanepa
Keraisu-pala lipuane meou wane enika enile tokouya peya doo kogopene tetepo takoane
wakene waku.
9
Akolaliyo no Keraisu-pala moa lipukamotoane ni tuku. Nitikuno, Mosesene
totono patu kautakoane kawamekene Keraisuke-kama wene tugoane mekulu tokome no
poanele toamene ago tetepo takoa moa lipukako. Nipa Keraisuke wene tugoa meki peyapa
poanele toamene yene tetepo takoa meko toa eni toko.
10
Keraisu einago wene tootapeane
meadene uku. Ni one tuaneya pikata kamoa pokome tane tele patu kautakoane meadene
uku. Ni one tete mokoa kakene toanepa one-pala odenekata tuou toane tekene one-pala
odene wene piane mekene tete noma poadene uku.
11
Nipa no tukoluka Akolaliyo moa
kamotokoo tokolo nepikene oneke nate wene piane meku.
Pote Wipitia Meatekota
Teyapea Pitimoa Poatekomo
12
Ina ukuna toane epetekoane meateku kotuke kakoane wete meane togamukuyake
Keraisuyo nopa one wa takoa motokome tamene wa yametekale toane togatapeou wane pa
toma yaku-ye.
13
Anu oya-lawe eni epetekoane meane togateku toane wete meane
togamukuno wene pikuyake eya tuku. Ali-kiti teyapea moa patukanali yotokete teyapea-
kama pote mukiti lono pekoa enamou toane tekene Akolalinele pegetoane takakoule-kitike
wene piitikameneya meane one naniko takatekule timini muno piane kutupeane wedoane
takama puku.
14
Nipa Akolaliyo Keraisu Yesuke tokome no kei pia yameatekoya monoano
noo wa kayo okolo a tibuke mopadenepa pone wipitiatekuta lene wikaneya teyapema-kama
puku.
15
Keraisunole wedoa wene toa takaki-kiti kime ina uku toa litikilepa nopala odene
wene pianeya mea tomotoane uku. Nitamekete pade wene pianeya meadekolipa Akolaliyo i
i wa mane oa moa wene taka taka too.
16
Nitatekoyake enile toateko totono namolo litia
toma nokoona toa pa litia toomoa pato. Pegene kakoa tewitikoa wawamato.
17
Anu oya-lawe Akolalinele takama poatekoi adeka piane toma yakounakale litia
toomoa pamene. Totome toma yakoona toa litia tiki-kiti kini tikileka litia tamene.
18
Kipala
lugutukoane okounakamo opi komo oane mekene wa lokoane ukuno, yakamene. Ali kainya
matiyame Keraisu yomo lekaneyake tuanemo pamo tetepo takoa waki. Nipa onepala poi
te ia mekete tiki.
19
Akolaliyo e yene wia atukoo. Kini lene tepe eyame tamene wa oka toa-
kama litia tootapekilepa Akolalike wene piitikameneya mea tiki. Eko ali atoa ya takanele eni
toake kini wa kei pia kaki. Nipa pa itonoleke-kama wene piitikaneya mea tiki.
20
Totome
pade nitamoko. Totopa a tibuke pote meateko yeneno, nitamato wa ali atoa toa motoko
ago Ali Muno Keraisu Yesu aida kawa wakapea nomotoa nepia wedia meko.
21
Einago
wakapea nokomepa tone pa tigini moa weneya tigini latikakala too. Nipa one pa
tootapeneya kako toa eni moa kakakilepa padeya padeya peya oneke-kama lukoa memotoa
toko teleme too.
Pilipai Pilipai
<<
33
>>
Pilipai Pilipai
<<
44
>>
4
1
Nitoono, anu oya-lawe kipala ina ukuna toa Ali Muno patu poapeneya kautakoa
kamene. Kipa anu kolotini yene enadiya wane kiwike kolotine yakene uku. Nipa Akolaliyo
no kei pikome sile meou toa i yene neke wa kiwi no meteka tokolo uku.
2
Anu oya atoata Yuodiya Sidikita Ali Muno-pala lipua mekete odene weneta
piitakutukoa meamene wane kita kowitoane uku.
3
Anu oya nepa no-pala tauta toa yakona
teke wini atoata auapeamene. Kitame eya tokoileke nitamene. Eya ago Kelemene ete oya ali-
kiti totome Yesunomo oa aua yakooka einatoatame toto-pala opia yawa auapekala tokoi.
Ete oya ali-kiti wane ukupa Akolaliyo mea kawatiki yene i i wa one bokuke wia mekakilepa
kini ibinika wia mekapiane ali-kitike uku.
4
Ali Munoke wedianeya-kama meamene. Enipa wa lokoane uku. Wedianeya-kama
meamene.
5
Ali atoa peyame enemotono, poti uutukoa yamene. Ali Muno wakapea noateko
tigotokolo ni uku.
6
Tepene mama moameamene. Nipa ke enekakale mea ni kinikiya pade
toamokalepa Akolali yakoa kowitamene. Ke wa yakoa kowitamene.
7
Nitikolipa kini
kowitikoimo yakoa tokome tepe kolotini kilikoa pikoo. Nipa Keraisu Yesu-pala lipua
mekete tepe kolotini kilikoa pianeya memotoa yopimoa poo. Akolaliyo edikakolepa i wa
totome wene toa amele tokoya mena.
8
Anu oya-lawe kipala i wipitiane ukule-kitike wene piitikaneya meamene. Pademo
pademo niminimo ni padele padele kei piatikile ni padele padele kiyo akenele ni padele
padele wene moa koigamenele ni padele padele koniyole ni padele padele wene epetekanele
enika enileke wene piitikaneya meamene. Nipa ele kule epetanele ni ele kule kei piatikile-
kama wene taneya meamene.
9
Kiwi i i wane mane mane oane olaukakouna toa toomoa
pamene. Nipa pademo pademo okoumo yakoa moa padele padele tokoule enoa moa
tokoina toa pa litia toma pamene. Nitikolipa tepe kolotini kilikoa pikako ago Akolali kipala
odeneka meoo.
Pilipai Yename Kinikiya Pade Takoa Moa
Poloke Wetekakala Tanemo
10
Kime no namolo mama motekete tokoinakale opi wa tikike Ali Muno-pala ke wane
kolotine meku. Papete no mama motekete auapeou wa wene pikoinake auapeamele
toamokale wakoinake opi wa tiki.
11
Kipala eni ukupa no pa yawane pitiku wane wamuku.
Padele padele witakoloka no wene togoitapeane yawane pitiku.
12
Nipa padepete-kiti
ponopene ago meane wa padepete-kiti kamo ago meane tuku. Nitane ago tekene noateku
nee adekoa piko-peteka pa pitiku-peteka ke wane oane ni anukuya tubeya piko-peteka
padeya deya toamokoloka ke wane tepe matakaketikoane yawane pitiku.
13
Padele padele
witakoloka no weye akoa tele takako ago Keraisu patu kautakoane kakene ele kule peya
adekoane tamele toko.
14
Nimo ukuyake ke enekakale mekou-pete kime no auapekoinake ke wane uku-ye.
15
Nipa Yesunomo titiane oma yakene kini wini Masedonia ta meemotekene ete ta-kitikeka
oane auane pokouka kini losuke oboai tiki-kiti kime odene no auapea kue moa wetekakala
tokoina. Ete take yename mena. Enipa nimini ukutu-pe.
16
Tesalonaika take pekene pa
mekoluka nitikete kue eya moa wetekakala tokoina.
17
Nimo ukupa eya kuya memotoane
oikene mena. Nitamekene auapea no mekala tokoinakeya Akolaliyo kiwi kei pia nami
witikakono wene pikene ni uku.
18
Eina kue eyapa Epaperodaisi neme no Polono aua
potokamene wa kime keda takoa moa wetekakilepa anu wene moa tagatapea tokoina.
Akolaliyo eniyapa oneke lodo yoa ka lono takoa metane tetepo takoa wene epetaneya meko.
19
Anu Akolaliyo kini weneka moa tagakomepa ke enekakale mea ni padeya-kiti toameneya
pa mea tokolipa kini moatekoya mekala too. Keraisu Yesu-pala lipua mekoli tokome nitoo.
20
Toneketai Akolali onepa nitane agono, one kei-kama pima patoane uku. E e nimini.
21
Anu i wetekaku pipia moa oi mootokoapa Keraisu Yesu-pala lipua meki peya wete
meamene wa akamene-ye. Nopala odeneka meki-kitameka anu oya-lawe kiwi wete
meamene-ye wa iki.
22
I Lome take Keraisu-pala lipua meki peyame wete meamene-ye wa
kabunu koukoa iki. Ako odene tobou ago Sisa one pupu takoa meki yenameka anu oya-
lawe kiwi wete meamene wa iki.
23
Tone Ali Muno Yesu Keraisuyo kini yomini pewe wia yopimotoane uku-ye.
Opa anu agale eni.
Pilipai Pilipai
<<
44
>>
Yamepianele
00
11
22
33
44
55
66
77
88
99
10 10
11 11
12 12
13 13
14 14
15 15
16 16
17 17
18 18
19 19
20 20
21 21
22 22
<<
00
>>
^
Yamepianele
Losu Yatene Tatono Kakoake Akenemo
Epesase Yeneke Pipia Wia Mekoa Wetekanemo
Semena Yeneke Pipia Wia Mekoa Wetekanemo
Pegamame Yeneke Pipia Wia Mekoa Wetekanemo
Taiataira Yeneke Pipia Wia Mekoa Wetekanemo
Sadise Yeneke Pipia Wia Mekoa Wetekanemo
Piladelepia Yeneke Pipia Wia Mekoa Wetekanemo
Leodisia Yeneke Pipia Wia Mekoa Wetekanemo
ATibuke Akolalinele Takakete Toatekomo
Ewetane Pipia Sipi Sipi Tinetake Akenemo
Ewetane Pipia Togotane Poo-kiti
Odene Odene Wa Pilikala Tanemo
Akolaliyo 144,000 Ali Atoa
One Wa Takoa Moa Adeka Piipianeya
Ali Atoa Kainya Mati Ake Tane Mamina
Kakeneya Koukoa Kakoimo
Ewetane Pipia Togotane Po Tatono Takoa
Togotane Po Pilikale Tanemo
Tatono Kakoa Bera
Ko Takane Edelo Agome Bera Pukanemo
Edelo Agome Ewetane Pipia Deya
Pikoa Kakome Tanemo
Akolaline Agale Akane Agotame Akenemo
Tatono Takaka Bera Ka Okale Toatekamo
Atoa Pade Pukupukutame Tanemo
Yo Tane Kai Keneya Agotame Tanemo
Keraisuyo Toa Motane Yename Lo Okoimo
Edelo Ali Tebolo-mene
Itonoke Mekoiya Wakoa Moatekamo
Edelo Ali Tatono Kakoame Ke Enekatekoya
Tatono Kakoa-pala Aua Nokala Tanemo
Akolaliyo Kibu Moateka Adeka Pia
Kapetekane Mete Tatono Kakoake Akenemo
Ibini Akene Pamoko Atoake Akenemo
Babilone Ta Wia Kilikanemo
Ali Atoa Peya Mati ATibuke
Kakete Wedikete Akenemo
Sipi Sipi Tineyo Atoa Moatekake Akenemo
Ake Tane Osi Kai Patu Mekagoke Akenemo
Setanu 1,000 Mali Ponoka Toa
Koa Keneke Moa Pitikaneya Meatekamo
Akolaliyo Setanu Moa Kawikatekamo
Akolaliyo Ali Atoa Takoa Enatekamo
Weneya Tibu Itonotake Oa Pianemo
Weneya Yerusaleme Taake Oa Pianemo
Ali Atoa Meemoa Pomotoa Toko Ue
Yesu Wakapea Noatekole
<<
00
>>
<<
11
>>
YAMEPIANELE
Akolaliyo Toatekale Papete Yamepianemo
1
1
I boku wiane mekakilepa one pupu takaki yename yakamotono, to awea akamene wa
Akolaliyo Yesu Keraisu-pala oa piane toane wiane mekaku. Nipa one papete wene
toopikana toa pene taatekoa toatekomopa no Yone one pupu takako ago akapoano pa wa
Keraisuyo one edelo ago pade moa wetekakale nokome okana toane uku.
2
No Yoneyo
enekoumo peya i i wane wiane mekakumopa ipa Akolaline agale Yesu Keraisuyo to awea
akakamo uku. E e nimini.
3
Akolaliyo okana toa taatekoa toatekomo i i wane wiane mekaku
toa oi motokagopa kolotine meoo. Ni i bokupa einagome oi motokale yakoa motokoi
yeneka kolotine meoi. Kipala i ukule taatekoa toateko tigotokolo ni uku.
Losu Yatene Tatono Kakoake Akenemo
4
No Yoneyopa Esia ta pikoka losu yatene tatono kakoake (7) i pipia wiane wetekaku-
ye.
Akolaliyo kiwi pewe wia tepe kolotini kilikoa pikoa tomotoane kowitikoane uku. Nipa
eya ago papete meemoa nome opika pa mea kawa naniko taatekoa nome toko ago Akolali
eni kowitikakilepa one Epetane Yomini-palaka odenemo oane kowitikoane tuku. Eya
Yomini Akolali meko walai liti one leneke kako Yominike uku.
5
Ni Yesu Keraisu-palaka
odenemo kowitikaku. Akolaliyo oka toa-kama to awea akoa ni tuane ali atoa naniko kamoa
pomotoa one namolo takoa kamoa poka agoke uku. Oneke-kama ako odene meki tobou ali
peya lukoa meki.
Einago totoke wene mekakomepa tone toko poaneleme toto moa labaneya kakoota
one kamateme toa motaneya.
6
Nipa totome ete ali atoane kowitikoa ni oneketai Akolalinele
takoa tomotoa tokome taneya. Nitimotou wa totopa one yapulu yene moa latikaneyano,
Keraisu einago ako odene mekome telekole-kama toomoa poo wa one kei piatoane uku-ye.
E e nimini.
7
Yakoe. Keraisu einago wedo patu mea noademe toko. Nitoa nokale peyame
enekilepa one tigini lagotane yenameka enoi. Eni noka-petepa ta piko peyake pitikoi-kiti
einagoke tumai meou toa keneya wene keda taneya meoi. E e nimini.
8
Ako odene mekome telekole-kama toko Ali Muno Akolaliyo eya wa oko. Padele
padele peya titianeka wipitianeka tuku wa oko. Nipa opi opi mea namolo namolo meemoa
nome naniko naniko taatekoa noateko agome oko.
9
Nopa kini oyago Yone Yesu-pala lipuane mekilepa kiwi mekina toane meku. Nipa ke
enekakolo meake onekele takoa togato wa oneke poti lukoa mekina toane meku. Akolaline
agale Yesunomota to aweane okouke po yapu pitikene tekene ni uku. Kusa ue muke piane
Patemose take i mekene uku-ye.
10
Ko mea pupu toamene-pete pade Epetane Yomini awia
tagatapeneya mekene yatekolu mukiti lono bera telo pitapeou toa agale ludu nokome okale
yatekou.
11
Agale ludu nokome okome neme wida meke eneko toa bokuke wia mekamene.
Wia mekatekoapa Yesuno ali atoa ta tatono kakoa (7) mekika wetekakala tamene. Nipa
Epesase Semena Pegamame Taiataira Sadise Piladelepia Leodisia eni ta-kitike pipia wia
wetekakala tamene wa okale yatekou.
12
Yatekene teyo oko patu wane peketapeane enekolu labo tatono kakoa (7) pianeya
enekou. Nipa golo kueme latiane labo-kiti pianeya enekou.
13
Eni labo-kiti pakeke Ali
Yatenane yagono ago kakale enekou. Einagopa kawane wititapea tukane mamina kawa one
palanu-pala golo kueme latiane po togotaneya kawa taneya enekou.
14
One lene timini one
wago pineka ake tootapeneya kakale enekou. One pinepa sipi sipi kai pine kilue kale eya
ake toko toa ake tootapeneya. One lenetapa toe itipono keneya oa kakeneya.
15
One
kawatapa berasi wa akene kapa keneya yadi yadi tootapeneya. Toe mineke yoa natekane
berasike uku. One agale ikilepa tube ue-kiti u u wa yotokome oko toa oka.
16
Einago one
nimini yonamepa tagoi tatono kakoa (7) pikoa kaka. One kabunukepa eka okata olo kakene
tue witaka. One lene timinipa lou pa toko toa pa tootapeneya.
17
Einago dikaneya kakale
enekenepa one kawane kene tuane tetepo taneya auane pitalogakou. Nitikolu one nimini
yono nooke pikome okome piti moamea. Padele padele peya titianeka wipitianeka tuku ago
i kakuno, piti moamea.
18
Noanupa anu weneme meemoane nuku ago. Tukene tukouyake
kamoane pekene meane-kala kama puku. Nitiku agome ali atoa tua pote mepokoi ta talo
toane eni ta ketepono kago peateku ki pikoane kawane tuku.
19
Nitikuno, neke enekoa
kakoya bokuke wia mekamene. Nipa opi taatekoa tokole-pala nani taatekoa toatekoleta i i
wa bokuke wia mekoano ta wa nopala oka.
20
Nimo ootokoa kakome okome i tagoi tatono
kakoa (7) pikoane kaku tagoi ni labo piatikiya tatono kakoa (7) neme enekopa eya adeka
pikoya. I tagoi-kitipa edelo ali tatono kakoa (7) adeka pikoya. Losu yatene meki toa tatite
toa yopiki edelo ali-kitike uku. Ni labo piatikiya tatono kakoa (7) kiwi losu yatene tatono
kakoa (7) adeka pikoya.
<<
11
>>
<<
22
>>
2
Epesase Yeneke Pipia Wia Mekoa Wetekanemo
1
Nimo ootokoa kakome okome anu losu yatene Epesase take mekika yopiko edelo
agoke eya wa wia mekoa wetekakamene.
No eya tuku agome uku. Nimini yoname tagoi tatono kakoane (7) pikoane kawane ni
golo kueme latiane labo piatikiya tatono kakoa (7) pakeke yawane tuku agome uku.
2
Wini
toma yakile wene taneya meku. Kini pupupa kilikoa meamekete wedoa tiki. Ni ko
wameneya poti toa togaki. Ni poanele toma yaki yene kote tokolo waki. Ni pade ali-kitame
Aposelo ago nuku wa kapene wakoa okoli pitia yakatekoapa kapene wakadeki wa waki.
3
Ni kini pupupa ko wameneya poti toa togakilepa ke enekakolo meketeka no i agoke toa
tete oyake moato wa toa togaki.
4
Widikoapa toa epetekaki wane wene tukuyake eya wane mane oane motukuno,
yakamene. Nooke namolo wene mekoa mekoina toa opi wene wedoa mekoa meamiki.
5
Nooke namolo wene mekoa mekoinakale wene taneya meamene-ye. Nitikete ae opi
etepeane yakedeku wa wini wene wia waatekoa kini namolo toa epetekakoinakale wa toma
pamene. Wini wene wia wawameadekolipa nipa kini labo piatikiya wane eko pata moane
piadene nou.
6
Nimo ukuyake kini eya tikileke kiwi kei piamedeku. Eya ago Nikolasine
totono litia tiki yene kime kotimi yoa meki. Nipa noanume kotimi yoane meku toa tiki.
7
Yakou wa kale piiyakoa kaketepa nipa Epetane Yominiyo anu losu yatene-kiti -pala
oko toane to aweane ukumo yakamene.
Poi moa patukakete anukule takoa togakoi yene meemoa pomotoane tekene Akolaline
ipeke witako yomo ku kotia namene wane yameou wa einagome oka.
Semena Yeneke Pipia Wia Mekoa Wetekanemo
8
Einagome nopala eya waka oka. Anu losu yatene Semena take mekika yopiko edelo
No eya agome padele padele peya titianeka wipitianeka tuku agome uku. Tukene
tuaneke wa kamoane meemoane puku.
9
No nitiku agomepa wida ke enekakolo ponopene
yene mekino wene tuku. Kipa ponopene yene wane oaneke kamo yene tetepo takoane uku.
Ni Yu yene padeka-kitame kiwi tegene matakete ikimoka wene tuku. Eni Yu yename kipa
Akolaline Yu yene meko wa ikiyake Yu yene tetepo takamekene Setanuno yene tetepo
takoane waku.
10
Kini tete moatikilekeka piti moameamene. Setanuyo kipa no Keraisuke
edoa wene tugoa meki patu wa pene nome likoa enenokala too. Nitikale Setanuno peku
naki-kitame kiwi padeka-kiti po yapu moa pitikakolipa ta noi kakoa (10) pataka toa tete
mokoa kawei. Tuadekolupa tuou wa nooke wene tugoa mekolipa nipa moa patukane alike
sili meou toane tekene mea kama pamene wane kiwi kei piou.
11
Yakou wa kale piiyakoa kaketepa nipa Epetane Yominiyo Akolaline losu yatene-kiti-
pala oko toane i to aweane ukumo yakamene.
Poi moa patukakete anukule takoa togakoi yene tukilepa toake ali atoa taku takoa
tuatekoi ta enamoi. Nipa poane take poamoi wa einagome nopala oka.
Pegamame Yeneke Pipia Wia Mekoa Wetekanemo
12
Einagome no-pala eya waka oka. Akolaline yatene Pegamame take mekika yopiko
edelo agoke eya wa wia mekoa wetekakamene.
Imo ikilepa eka okata olo kakene tue pikoane kaku agome uku.
13
Kini wini meki ta
wene tuku. Wini takepa ete yene Setanuke lukoa meki. Kiwi pade nitameneya anu ibini
wedekoa nooke wene tugoa meki. Wida Setanuyo yopiko take eya ago Adipasi anukumo-
kama to awea akakago wia tukane-peteka nooke wene tugoa mea no wawamokoina.
14
Nooke widikoa wene tugoa mekilika eya wane mane oane motukuno, yakamene. Kiwi
padeka-kitamepa eya ago Belameyo namolo papete pale tanele tiki. Einagome eya taneya.
Iserele yene etepea poanele toma pomotoa likoa enekome toatekale mone pitikaline tobou
ago Belake yametaneya. Eina yametekana toa tokome Iserele yene likoa enekale iponoke
lodo yotane nee moa noa ni koua piamatekoi atoa koua pikala taneya.
15
Ni kiwi padeka-
kitame eya ago Nikolasine totono litia tiki.
16
Kini wini poane wene wia wamene. Wini wene
wia wawameadekolipa nipa kiwi mekika poanele tiki yene-pala poi wete tonou. Nipa anu
kabunuke kiwi wiatekou tue witaneya kakene nitou.
17
Yakou wa kale piiyakoa kaketepa nipa
Epetane Yominiyo anu losu yatene-kiti-pala oko toane ukumo yakamene.
Poi moa patukoa anukule takoa togakoi yene eya moane meou. Akolaliyo papete
kaukoa lawetane maana nee lawetoane ni ake tane kue wane meane tou. Eni kue wanekepa
kini weneya ibini wia mekaneya pioo. Nipa ete-kitame wene toameneyake pinagome odene
weneya ibini i wa wene too wa einagome nopala oka.
Taiataira Yeneke Pipia Wia Mekoa Wetekanemo
18
Einagome nopala eya waka oka. Akolaline losu yatene Taiataira take mekika yopiko
edelo agoke eya wa wia mekoa wetekakamene.
Imo ikilepa eya agome uku. No Akolaline Mana anu leneta toe itipono akene tetepo
taneya kawane ni anu kawatapa berasi wa akene kapa keneya yadi yadi tootapeneya kaku
agome uku.
19
Kini wini take mekete tikile wene taneya meku. Yete pade ali atoake wene mekoa ni
nooke wene tugoa ni eko ali atoa auapea ni ke enekako-peteka enika enile toa wawamoa
poti toma yaki. Nipa kini titikete toma yakoinakale moa patukoa wedoa toomoa yaki.
20
Widikoa mekiyake eya wane mane oane motukuno, yakamene. Wini atoa Yesebeleyo
Akolaline agale to aweane akaku wa oake eyaka toko. Anukule takama yaki ali atoa etepea
pomotoa likoa enekala toko. Nipa pamoko mea ni iponoke lodo yotane nee moa noa tamele
toko wa wini atoame kiwi olaukakono, dekolo pa wa wetekamiki-pe.
21
Einatoa one eni
poane wene wia wako patu wane yono lukoane mekene kibu moamokounake one eni wene
wia wawamoko.
22
One wene wia wawamokono, walaike yeneme tuaneya pimotou. One
koua pikala tokoi yenameka dika dika toamene tete momotoane wawou. Eina atoame
olaukanele tewitikoa wawameadekolipa nitou.
23
Einatoane peku mati-kitika wiane tukou.
Nitikolu enekete anu losu yatene ali atoa peyame eya wa wene toi. No einagome ali atoane
tepene piko wene tetoa enekono, kini tokoo toa nami wikala toademe toko wa wene toi.
24
Ete Taiataira yene etepea pikiyake kime eni poane peku noa toamiki. Nipa Setanuyo
kaukoa olaukane toa i atoame oa metekono, yakoa toamato wa kime litia toamiki. Nitikino,
kini wene keda takakaya tokolo eya odene tamene wane uku.
25
Wida wakapeane nomotoa
nepia mekilepa kini namolo yakoa motokoinakamo wedoa pikoa kawa nepia meamene.
26-
27
Poi moa patukakete anu wene pikoule toa togakoi yene-pala eya wane oane tou. Pitikali ta
piko peya pitiki toa talo toa meamene wane yameou. Nipa agetaiyo no yameteka toane
kiwika yameou. Nitikolu kodou agome-kiti mete pade kamo itonome latianeya poadekale
enekome kapa wapime wia kugutukou toa e ku pitikali wedoa yopia kaketepa moa kawikoi.
28
Nitamene wane koobu tagoi-kitika kini wane oane yameou.
29
Yakou wa kale piiyakoa kaketepa nipa Epetane Yominiyo anu losu yatene peya-pala
oko toane to aweane ukumo yakamene.
<<
22
>>
<<
33
>>
3
Sadise Yeneke Pipia Wia Mekoa Wetekanemo
1
Einagome nopala eya waka oka. Anu yatene Sadise take mekika yopiko edelo agoke
eya wa wia mekoa wetekakamene.
Imopa no eya agome uku. Akolaline Yomini tatono kakoane (7) ni tagoi tatono
kakoane (7) pikoane kaku agome uku. Kini wida mekete tikile wene taneya meku. Kiwi mea
epetekaki wa ete-kitame kiwi kei pia ikiyake noanume kipa tuane yene tetepo takoane meku.
2
Ali pade tuateko tigotokolo meou toa keneya anukule takoake waki. Anu Akolaline leneke
mea epetekatiki kotu kakoa meamikino, atu kamou toa anukule wa wedoa takama pamene.
3
Kiwi namolo olaukanemo yakoa motokoinakamo wene taneya meamene. Nipa einakamo
wa litiane tou wa kini poane wene wia wamene. Atu kamoamokolipa kode ago keneya
kotikatapeane nouno, nitamene.
4
Wini Sadise take ali atoa natetekoame kini mamina kege
kakaya kekatekoa meou toa mea epetekaki. Ni yenepa ake tane mamina kakeneya no-pala
opia yawei. Nipa kipa nitatiki yeneno, noe wane kipala odeneka yawou.
5
Poi moa
patukakete anukule toa togakoi yene ake taneya dikane mamina kakeneya kawei. Dikane
yene kini ibinipa mea kama poatiki yene i i wa wia mekapiane bokuke pimotoane kogileka
toamou. Ni Agetaika one edelo ali-kitika kakakoane i ago i atoa wane kini ibini oane kiwi kei
pikala tou.
6
Yakou wa kale piiyakakoa kaketepa nipa Epetane Yominiyo anu losu yatene
peya-pala oko toane to aweane ukumo yakamene wa einagome nopala oka.
Piladelepia Yeneke Pipia Wia Mekoa Wetekanemo
7
Einagome nopala eya waka oka. Anu yatene Piladelepia take mekika yopiko edelo
Epetanele-kama toane niminimo-kama oane tuku agome uku. No dikane agomepa
Depidiyo yopia kako kago ketepono ki pikoane katekaku. Eni kago pekolupa padameka wa
ketekile toamoi. Ni ketekolupa padameka wa pekile toamoi.
8
Kiwi wida mekete tikile wene
taneya meku. Kipa tele tubeya toameneya meake anu agale litia toa anu ibini paya tetepo
takamoa tiki. Nitiki yene kini mea kawadete tuapea poatiki kago keteponopa noanume
pekapikouno, padameka wa ketekile toamoi.
9
I ukumo yakamene. Wini take kiwi pakeke
mekete Setanuno peku noa tiki Yu yename kipa etene Yu yene meko wa oake kapene
wakoa iki. Wini Yu yene moane kini kawane kene neuwe tukua memotou. Nipa no einago
kiwike wene mekoa mekome ni tadeko wa wini yename wene tomotoane tekene nitou.
10
Anukule ko wameneya poti takama yamene wane okouna toa kime pa tiki. Nitima yakino,
eya tou. Itonoke meki peyane tepene piko wene keleyo witakamotoa ele kuleme ke enekaka-
petepa kiwi toane mou.
11
No wakapeane noateku tigotokono, kiwi kei pikene meatekuya
wane padame odomoa pokayano, kipala okouna wedoa pikoa kamene.
12
Poi moa
patukakete anukule takoa togakoi yenepa anu Akolaline tobou losu yapu pigi tetepo takoane
one yapu moane mekou. Nipa Akolali mekota tewitikamoa eida-kama memotoane nitou.
Dikakoi yenane tiginike eya ibini-mene wiane mekakala tou. Anu Akolaline ibini wiane ni
weneya Yerusaleme wa akene ta ibini wiane mekoane tou. Weneya Yerusaleme wanepa
Akolali a tibu meko take pia ketipea noateko take ekene uku. Anu weneya ibinika dikakoi
yenane tiginike wiane mekou.
13
Yakou wa kale piiyakakoa kaketepa nipa Epetane Yominiyo anu losu yatene peya-
pala oko toane to aweane ukumo yakamene wa einagome nopala oka.
Leodisia Yeneke Pipia Wia Mekoa Wetekanemo
14
Einagome nopala eya waka oka. Anu losu yatene Leodisia take mekika yopiko edelo
Imopa no e e nimini wa ibini iki agome uku. Nipa nimini peku lawetoane Akolaline agale
to aweane akoane tuku agome uku. Ni Akolaliyo latiano ta wa oka toane-kama titiane latikou
agome uku.
15
Kini wida mekete tikile wene taneya meku. Anukule takakilepa poto toamoa
kakaale toamoa tane ue tetepo taneya mekete wedoa toamiki. Beita, poto taneyaka kakaale
taneyaka memotadiya.
16
Nipa kipa poto toamoa kakaale tomoa taneya mekili tekene noane
kapeou toane kiwi wawadene tuku.
17
Kipa uu kamo yene mekono, padameka auapeatiki toa
mena wa kini wa kei piki. Nitikiyake Akolaliyopa kipa ponopeneya mea leneta liitapeneya
mea mamina kawameneya mea tikino, elame tuku wa kinikiya padeya deyaka toamene
tetepo takoa meko. Enipa kime wene toamiki.
18
Nipa eya tamene wane mane oane motuku.
Kamo toadetepa nipa noanuke golo kue moamene. Doo eya takoa nomotoa toe mine
pitikoa yotane golo kueke uku. Mamina kawameneya wini mekino, eni ya teigadetepa ake
tane mamina topo toa moa kamene. Ni leneta kikatapemotoa lene yotokatiki yobotono topo
toa moa yotokamene.
19
Anu kolotini yene peya mane oane mokala tukuno, odene wene
piitikoa mea kini poane wene wia wamene.
20
Yapu kago keteponoke none kakene wi wi
toane kaku. Nitikulu panagome yakatekoa kago pekakolopa nipa tuapeane nekene one-pala
opiane mekene nee noadene tuku. Oneka no-pala opia mekome nee noademe toko.
21
Poi
moa patukakete anukule takoa togakoi yene kipa ali atoa talo toane mekuya waneke
meatono noe wane ou. Nipa ele kule poanele moane kawikamotekene Agetaiyo ali atoa talo
toa mekoya waneke pekene lewititakutukoa meko toa meatono noe wane ou.
22
Yakou wa kale piiyakakoa kaketepa nipa Epetane Yominiyo anu losu yatene peya-
pala oko toane to aweane ukumo yakamene wa einagome nopala oka.
<<
33
>>
<<
44
>>
4
A Tibuke Akolalinele Takakete Toatekomo
1
Einagome nimo ootokaneyake pulete keneya enekolu a tibuke kago peaneya pikale
enekou. Nitoane yatekolu eina agale ludu namolo bera piou toa keneya nopala okana agale
ludu lokakome okome nani toatekole yameouno, oto noo wa okale yatekou.
2
Nitikolu eina
eina Epetane Yomini nooke awinokale enekolu ako odene meko tobou ago ta talo toa meka
walai pianeya enoane ni eni walaike pade ago meaneya enoane tokou.
3
Eniya waneke meane
agono lene timini enekolu kikome kiane koniliane kue wane ni yasepa kue wane pa tane toa
one lene timini pa tootapeneya enekou. Ni one meka walai kokati wia unukakilepa kanu
pagene emerale kue keneya wia unukatapeneya.
4
One eni meka walai muke pimotoa ako
odene meane tobou ali-kiti mekoi walai pagini kakoa (24) pia unukatapeneya. Eni walai-kiti
piane toa tobou ali pagini kakoa (24) tutu tutu wa mea unukaneya. Nipa ake tane mamina
kakeneya mea ni golo kueme latiane nunagu wateaneya mea tokoi.
5
Muke piane wanekepa
katiapale toa tono wia toa kaka. Ni einago meka walai eko keneya pimotoa labo tatono
kakoa (7) pianeya. Nipa toele udukaloganeya noa kakeneya. Eni labo-kitipa Akolaline
Yomini adeka pianeya.
6
Ni einago walaike mekome lene timini takoa meka lono padeya
kusa ue keneya meeloganeya. Nipa gilasi keneya meeloganeya.
Ni muke eni meka walai namike eka kukata aka keikataka lene kakeneya tuyonoya-
mene kawa unukaneya. Nipa lene kakeneya kakilepa lene timini lonoka mukiti lonoka lene-
kama kaatapeneya kakeneya.
7
Namolo takoa kakeneyapa laione keneya kakeneya. Taku
takoa kakeneyapa ali pitimekawe kai keneya kakeneya. Tebolo takoa kakeneyapa ali lene
timini motaneya. Tuyono takoa kakeneyapa pukaneya yako tegu keneya.
8
Eni lene
kakeneya tuyonoya pawena ko melepu kakoa (6) kakeneya kawa ni ekoloka tokooka lene
kaatapeneya kawa taneya. Nitaneya kakete ete pia oto pia eya wa lo oa-kala kaki.
Akolaliyo epetanele-kama toko, epetanele-kama toko. Telekole akole-kama toko ago
Akolaliyo epetanele-kama toko. Ni agopa namolo namolo meemoa nome opi opi
pa mea kawa naniko taatekoa noademe tokono, ke wa eni lo oa-kala kaki.
9
Eni lene kakeneya tuyonoyamepa ako tobou agono walaike meko ago kei piato wa
eni tuameneya meemoa poko ago kei pia kaki.
10
Nitoa kei piki toa-kama eni tobou ali pagini
kakoa (24) eya tokala tiki. Eni walaike mea talo toko ago Akolali lene timini takakoa meko
lono aua pitalogakala tiki. Nitoapa ke wa eni tuameneya meemoa poko ago kei pia kaki.
Akolaliyo inoe wa kiwi kei pikome metekana nunagu-kitika lokamoa one lene timini takakoa
meko lono pitikakete ekete
11
tone Ali Muno Akolali padeya padeya peyapa neme-kama latianeya. Ni neke wene pika
toa teke eniya peya witakoa pome mekoa wene takoa taneyano, ne telekole akole-
kama toko ago wa totome ne kei pia kamedeko wa eni tobou ali-kitame one kei
pia kaki.
<<
44
>>
<<
55
>>
5
Ewetane Pipia Sipi Sipi Tinetake Akenemo
1
Eni yakatekoane enekolu ako tobou ago meateka walaike meko ago Akolaliyo one
nimini yoname ewetane pipia pikoa kakale enekou. Eni pipiake eka okata agale wia
mekatapeneya. Padame kekaya tokale poome togotikilepa poo tigini tatono kakoa (7) moa
togotokala taneya.
2
Eyaka enoane yakoane tokou. Tele tootapeane edelo ago eida kakome
agale telo ootapekome okome i ewetane pipiapa kekamomotoa poome togotaneya pikono,
eni poo tiginipa teyo pilia keamele toko-pe wa okale
3
a tibukeka itonokeka itono kekuluka
pipia keateka ago tuku toa kawa teko tokale nitateka ago odeneka kawameadeka.
4
Eni
ewetane pipia keateka ago odeneka kawamokale tekene komo ka ta nina toane pitikoane
kawamokou.
5
Nitikolu eni tobou ali-kiti padame nopala okome okome komo wamea. Eya
agome Yuda yatene ago laione wa ibini akene ago Depidi-loeke tagene ago einagome
Setanu moa kawikaneya. Nitane agome eni poo tigini-kiti oyake pilia keamele tokono, ena
wa oka.
6
Nimo okale yakatekoane enekolu Sipi Sipi Kai Tine kakale enekou. Wia tukane
tetepo taneya kakeneya. One wagokepa kime tatono kakoa (7) kawa ni lene tatono kakoa
(7) kawa taneya. Eni lenepa Akolaliyo ta piko peyake moa wetekane Yomini adeka pianeya.
Einago muke edikaneya kamotoa eya pia kawa unukaneya. Ako tobou ago meateka walai
pia ni lene kaatapeane tuyonoya-mene kawa ni tobou ali pagini kakoa (24) kawa unukaneya.
7
Eni sipi sipi kai tine ako tobou ago meateka walaike meka agoke pokome one nimini
yoname pikoa kakene pipia eni mopoka.
8
Nitikale enekete lene kaatapeane tuyonoya-mene
ni tobou ali pagini kakoa (24) Sipi Sipi Kai Tine kawane aua pitoa kei pia kakoi. Nipa
peyame padeya-kiti wapiala keneya pikoa kawa ni padeya ka lono taneya okolo kagonoke
mekaneya pikoa kawa tokoi. Ka lono taneya pikoa kakilepa Akolaline yename kowitikete
okoimo adeka pia taneya.
9
Nitoapa weneya lo eya wa oa kei pia kakoi.
I ago neme wini ewetane pipia oyake moamele toko. Padame wini pipia kekaya tokale
poome togotaneyake neme eni poo tigini-kiti pilia keamele toko. Neme eya
tokake nitamele toko. Ne wia tukaneyake neke kamateme ali atoa Akolaline oto
toa motokaka. Nipa e ku yatene e ku agale yakoa iki yene ni pitikali eka kukaka
pitiki toa ali atoa padeka-kiti neme takoa oto toa motokaka.
10
Nitoapa eni yene
tone Akolaline yapulu yene neme moa latikakilepa oneke lodo you toa one pupu-
kama takamotoa toka. Nitikale tokome eni yename itono talo toa-kala meoi wa eni
Sipi Sipi Kai Tine kei pia kakoi.
11
Nitikoli enoane yatekolu edelo ali ege egeta wa-kala kadukoa (1,000,000 tadiya) kabunu
kokotukoa one kei pia lo oa kakoli yatekou. Nitoa lo oa kakete ako tobou ago meateka
walai ni lene kaatapeane tuyonoya-mene ni tobou ali-kiti kawa unukatapea one kei pia eya
wa telo oa kakoli yatekou.
12
Wia tukane Sipi Sipi Kai Tinepa e ku yatene yopiateko peku noa ni eya kuya kamo
toateko peku noa ni wene muno meaneya oateko peku noa ni ele kule telekole
toateko peku noa tamele toko. One ibini kamotokoa one kei pia one-pala ke wa
oa tato wa lo oa kakoli yatekou.
13
Eyaka yatekou. A tibukeka itonokeka itono kekuluka kusa ueleka enika eniya ludu mekoi
peyame one kei pikete ekete
eya agota tobou ago meateko walaike meko ago Akolali Sipi Sipi Kai Tineta-pala ke wa oa
kita kei pia kini ibini kamotokoa kini tetekole tikile i i wa to awea-kala oma pato
wa peyame lo oa kakoi.
14
Nitikoli lene kaatapeane tuyonoyame e e nimini wa oa ni tobou ali-kiti one kawane aua
pitoa one kei pia tokoi.
<<
55
>>
<<
66
>>
6
Ewetane Pipia Togotane Poo-kiti
Odene Odene Wa Pilikala Tanemo
1
Nitikoli enekolu Sipi Sipi Kai Tineyo eya tokale enekou. Eina ewetane pipia togotane
poo tatono kakoa (7) togotane po-kiti pade pilika. Nitikale enoane yatekolu lene kaatapeane
tuyonoya-mene padame tono wiou toa keneya agale telo okome okome wete noo wa okale
yakoane enekolu
2
ake tane osi kai witoa nokale enekou. Eni osi kai patu mekagome poyo
pikoa kakeneya mekale enekou. Ni ako odene meko tobou agome watekoya nunagu
padame watekakale wateaneya pokome yeteka yukukata pitiki yatene-kiti moane kawikou
wa poi toma poka.
3
Nitikale Sipi Sipi Kai Tineyo eina ewetane pipia togotane po taku takane (naba 2)
togotane po pilikale enoane yatekolu taku takane (naba 2) lene kaatapeneyame wete noo wa
okale yakoane enekolu
4
pade osi kai kikome kiane osi kai witoa nokale enekou. One patu
mekagopa ali atoa kilikoa mekoika poi tagama poateka tele lukakome iyapa nekeno moa wa
Akolaliyo eka okata olo kakene tue uoya moa meteka.
5
Nitikale Sipi Sipi Kai Tineyopa pade po tebolo takane (naba 3) togotane po pilikale
enoane yatekolu tebolo takoa (naba 3) lene kaatapeneyame wete noo wa okale yakoane
enekolu likome liane osi kai witoa nokale enekou. One patu mekagomepa eya kuya keda
enatekoya wane (sikale) pikoa kakale enekou.
6
Enoane yatekolu lene kaatapeane tuyonoya-
mene kakoi pakeke agale ludu nekene tetepo tokale yatekou. Eya wa oka. Witi ku pa kueme
topo toa motikilepa nipa ta pataka odeneke pupu tootokoa motane kue meapa odene de
mete deya kapetekoa moamele too. Bali ku pa nipa de mete deya tebolo kapetekoa moamele
too. Olipe yomo ku ka gerepi po ku ka toa potokameamene wa oka.
7
Nitikale Tipi Tipi Kai Tineyo pade po tuyono takoa (naba 4) togotane po pilikale
enoane yatekolu tuyono takane (naba 4) lene kaatapeneyame wete noo wa okale yakoane
enekolu
8
kaa yotane osi kai witoa nokale enekou. One patu mekagopa tukilepa tokoya wa
ibini akeneya. Ni ago nokaka tuane yene pote mekoi ta litia noka. Nitoata nokoli ali atoa
mekoi toa tuyono tuyono wa oto piitikoapa tebolo tebolo wa katekoa wia tukamekete
odene odene wa wia tukama poati wa Akolaliyo eni toatekoi tele lukaka. Nitikale wia-ta
tukama yakoli ali atoa poime tua kobume tua yeneme tua yo tane kai eyame wia tanikoli tua
taneya.
9
Nitikoli Sipi Sipi Kai Tineyopa eina ewetane pipia togotane po ko takoa (naba 5)
togotane po pilikale enekou. Enekolu Akolalike padeya padeya mea lodo yoai tane walai
keneke eya yenane yomini Akolaline agale to awea akoa ni onekemo kei pia tokoike wia
tukane yene kini yomini eida walai keneke koukoa mekoli enekou.
10
Eida koukoa mekete
kayo telo ekete ekete ako odene meko tobou Ali Muno ne epetanele-kama toa niminimo-
kama oa toko. Kamate ponomotono, wia tukato wa itonoke meki-kitame toto wia
tukakoinake nami neme manipete wia kibu motokoo-pe wa okoli
11
kini kini mekoi toa
panagome ake tane mamina petene-kiti moa eya wa tatia mekala toka. Kipala poi te iane
yename papete kipala tokoina toapa Keraisunole takakete meki yene pa wia tukama yaki.
Kini oya-lawe wia tukama yawa togatekoi oi ponokaleka poti wida nepia meamene wa
einagome oka.
12
Nitikale Sipi Sipi Kai Tineyopa eina ewetane pipia togotane po ko melepu takoa
(naba 6) togotane po pilikale enekou. Enekolu momani tube mati toa ni lou tiginipa yomamu
pa atapeane kaa keneya likome lianeya kawa ni tokenepa kamate pa atapeneya keneya kikome
kiitapeneya kawa
13
ni pupulege mati popokoa muku muku takoa kakale yomo piki ku kotia
pitou toa keneya a tibuke tagoi-kitika kotimotekete pitoa
14
ni pipia wane moa ewetou toa
keneya tibu tigini takoa pome ni kusa ue muke piko ta peya ni tono wane wane peya
modono takoa tokale enekou.
15
Nipetepa ta piko peyake ako odene mekoi tobou ali-kiti ni
kiwike lokoa ta talo tokoi-kiti ni poyo yatene yopikoi ali-kiti ni uu kamo yene ni telekole toa
mekoi yene ni kueme topo toa moa egetane yene ni ta pine yene enika eni yene peya kota
pikakaka tono wane wane kakene kue pakekeka petoa pote loapipokala tokoi.
16
Nitoapa
tono-palaka kakene kue-palaka kayo telo ootapekete ekete toto wia kauamene-ye. Tobou
ago memotoa takane walaike mekagome enamomotono, Sipi Sipi Kai Tineyo kotimi
yotaneya kibu moamomotono, toto wia kauamene-ye wa kayo okala tokoi.
17
Nipa
Akolaliyo ali atoa-pala kotimi yotaneya kibu moateko oi taatekoa eni nokono, teyo edoa ete
pedekamotoa-pe.
<<
66
>>
<<
77
>>
7
Akolaliyo 144,000 Ali Atoa
One Wa Takoa Moa Adeka Piipianeya
1
Wa enekolu edelo ali tuyono itono kolodo piko toa kotuke yopia kaate tokoli
enekou. Nipa eni kolodoke titia noko pupulege itono luduka ue talikeka yomo kakokaka
popokamomotoa pikoa kaate tokoli enekou.
2
Nitikoli enekolu pade edelo agopa meemoa
poko ago Akolaline adeka pikoa kakeneya lou witia noko lono witoa nokome eya toka.
Akolaliyo itonoka kusa ueka toa potokatekoi tele lukane edelo ali tuyono-pala kayo telo
okome okome
3
Akolalinele takaki yenane ponoke one adeka pikakala toadete tokono,
nepiamene-ye. Toa peya takakolo itonoka kusa ueka kako yomoka oyake toa potokoi wa
edelo agome kayo oa kaka.
4
Edelo agome kayo oka toa ponoke adeka piatekoi ali atoa i i wa oi motokoli yatekolu
Iserele yatene kini kini pitikoi toa ege egeta wa-kala kadukoa (144,000) ali atoa oi motokoli
yatekou.
5
Ali atoa Akolaline takoa moa ponoke adeka pikilepa
Yuda yateneke tuku kakoa tawisini (12,000) takoa moa
ni Lubene yateneke tuku kakoa tawisini (12,000) takoa moa
ni Gade yateneke tuku kakoa tawisini (12,000) takoa moa
6
ni Ase yateneke tuku kakoa tawisini (12,000) takoa moa
ni Napesali yateneke tuku kakoa tawisini (12,000) takoa moa
ni Manasa yateneke tuku kakoa tawisini (12,000) takoa moa
7
ni Simione yateneke tuku kakoa tawisini (12,000) takoa moa
ni Lipai yateneke tuku kakoa tawisini (12,000) takoa moa
ni Isaka yateneke tuku kakoa tawisini (12,000) takoa moa
8
ni Sebulane yateneke tuku kakoa tawisini (12,000) takoa moa
ni Yosepe yateneke tuku kakoa tawisini (12,000) takoa moa
ni Bedamine yateneke tuku kakoa tawisini (12,000) ali atoa takoa moa adeka pikala tokoi.
Ali Atoa Kainya Mati Ake Tane Mamina
Kakeneya Koukoa Kakoimo
9
Wa enekolu ali atoa kainya mati koukoa kakoli enekou. Nipa tube takeka de takeka
pitikoi yatene ni liane yatene ni kiane yatene ni e ku akene agale patu mekoi yene enika eni
yatene ali atoa padeka-kiti eida koukoa kakoli enekou. Kini kakoi toa padameka oi motikile
toameneya. Eida koukoa kakoi yene tobou ago meateka walai-pala Sipi Sipi Kai Tineta lene
timini takoa kakoi. Nitoa ake tane mamina kakeneya kawa yo tali pikoa kakete
10
kayo telo
ekete ekete toto toa motikilepa eya agotame ako tobou ago meateka walaike meko ago tone
Akolali-pala Sipi Sipi Kai Tinetame tiki wa kayo oa kakoi.
11
Nitikoika edelo yatenepa tobou
ago meateka walai ni ada ali-kiti ni lene kaatapeane tuyonoya-mene muke kamotoa unukoa
kaatapekoi. Nitoapa ako tobou ago meateka walai lono lene timini takakoa aua pitakete
Akolali kei pikete ekete
12
E e nimini, tone Akolali kei piatoe. One ibini kamotokatoe. Onepa wene muno kakeneya
meko. Oneke-kama e ku yatene peya lukoa meki. Ele kule telekole toa mekono,
ke wa oa-kala kama pato wa okala tokoi.
13
Nitikoli eni ada ali-kiti padame no yatekome okome i ake tane mamina kakeneya
kaki-kiti kini kawa nokoiya ne wene toko-pe wa okale ekene
14
agopa toko. Noanu agopa
tokoyake ne pade wene toko-kolu okome i yenepa dika dika toamene tete witaka-pete tete
moa meemotekete nokoi. Kini kakene mamina ake takatapekilepa Sipi Sipi Tine kamateke
tadoa abe kogete tokoi.
15
Nitikoiya tekete Akolali walaike mekome lene timini takoa meko
lono kakete one tobou losu yapu keneke onekele ete pia oto pia takoa kaki. Nitikili tokome
ako tobou ago meateko walaike mekome ita-kama meamene wa one mamina yapu wiitikoa
moa mekoa yopiko.
16
Nitoa yopikolo tokome e yene wa kobume tuamoa ue nodome
tuamoa lou eya potome tuamoa toi.
17
Nipa Sipi Sipi Tinepa ako tobou ago meko walai
muke kakome e yenepa one sipi sipi kai tetepo takoa talo toa-kala kawoo. Nitoa mekome
mea kama pomotoa toko ue lene togoka aua pokala too. Kini komo-pala teigakome teigoo.
<<
77
>>
<<
88
>>
8
Ewetane Pipia Togotane Po Tatono Takoa
Togotane Po Pilikale Tanemo
1
Sipi Sipi Kai Tineyopa ewetane pipia togotane po pade tatono takoa (naba 7)
togotane po pilikale a tibu keneke emo kumo toa agopa tootapeka. Nipa lou pini odene
te itakutukoa (30 miniti tadiya) ponoka toa nitoa kaka.
2
Wa enekolu Akolaline leneke-kama
kaki edelo ali tatono kakoa (7) kakete kini pukapeatekoi bera odene odene wa motokoli
enekou.
3
Pade edelo agome ka lono taneya lobuateka mete golo kue pa atapeane mete
katekamoa nokome Akolalike lodo yoai tane kue walai pikata kanoka. Nitikale panagome
padeya ka lono taneya keda takoa metekome okome ipa wini golo kue pa atapeane walaike
yoano ta wa meteka. Ako tobou ago one walaike mekome lene timini takakoa meko lono
piko walaike uku. Nipa Akolaliyo one takoa motane ali atoame kowitikoimo odeneka dekoa
yatekome yakamotono ta wa einagome eni ka lono taneya metekale
4
moa lodo yotoka.
Nitikale edelo agono yono tatonoke lodo witoa kawapa ali atoame kowitikoimo dekoa
Akolaline leneke ate witoa kawa toka.
5
Nitikale edelo agome ka lono taneya lobutane mete
pikoa kakome Akolalike lodo yoai tane kue walaike toe moa mete keneke lobutuka.
Nititikoa eni toe lobutane mete itonoke pitikaketikaka. Nitikale tono wia kaliapale toa
momani toa toka.
Tatono Kakoa Bera
6
Momani eya tokale edelo ali tatono kakoame (7) bera tatono kakoa (7) pikoa kaate
tekete pukapeadete nodokoa kakoi.
7
Nitoa kakete namolo edelo agome bera pukapekale
tadali palene toeta loboa pitaka. Kamate-pala eletekoa loboa pitaka. Nitikale ta piko peyake
kaka yomo peya takuta takuta wa toe katekoa noamokome tebolo takane yomo-kama
napekala toka. Ke witakoya peyaka toeme napetapeka.
8
Nitaneyake taku takane edelo agome one bera pukapekale padeya tono keneya uo
mati itipono okoa kakeneya kusa ue muke pitikaketikaka. Nitaneyake kusa ue mekokaka
takuta takuta wa katekoa padele toameneyake tebolo takoa-kama kamate latitapeneya
meelogaka.
9
Nitikale kusa uele yakene mou eya takuta takuta wa katea pa mea tebolo takoa-
kama tukala taneya. Ue dipi-kitika takuta takuta wa katekoa padele toameneyake tebolo
takoa-kama ue nakakala taneya.
10
Nitaneyake tebolo takane edelo agome bera pukapekale tube tagoi a tibu kotikatapea
itipono oa kakeneya ka ua pitaka. Nipa yotane ue-kiti takuta takuta wa katekoa pitamokome
tebolo takane uele-kama pitakala toka.
11
Eina tagoipa kou tokoya wa ibini iki. Yotane ue-kiti
tebolo takane-kama kou takaneya tokome ali atoa peya matiyame noomoa nakete tukala
tokoi.
12
Nitaneyake tuyono takane edelo agome bera pukapekale lou tigini tokene tigini
kakoya oto piitikoa takuta lono pa taneya kamotoa odene lono yomiyomu tootapekala
taneya. Tagoi-kiti-palaka einakale taneya. Nipa loyoka likonuka lou pini oto piitikoapa takuta
takuta wa pa taneya kamotoa tebolo takane lou pini-kama yomiyomu tootapekala taneya.
13
Nitikale enoane yatekolu tegu a tibuke aka mati pukaneya yakome eya wa telo oma
yakale yatekou. Ae ae ae itonoke meki peya ke enekakale-kama meoi. Edelo ali tebolo bera
wete pukapeamene edelo ali-mename kini bera pene pukapeoi tokolo ni uku wa tegume
okale yatekou.
<<
88
>>
<<
99
>>
9
Ko Takane Edelo Agome Bera Pukanemo
1
Ko takane (naba 5) edelo agome bera pukapekale tagoi pade a tibu kotikatapea itono
patu pitane tagoi enekou. Eni tagoi wa akene ago ge yo nine piane koa peateko ki ina wa
panagome metekale
2
moa pekale toe mine lodo ka ua witako toa lodo ka ua witatapeka.
Ka ua witatapekome louka tibuka agopa takatapeka.
3
Nitikale eni lodo keneke apio iti itita
kawa itono patu pitakolokaneya. Nitaneyake panagome ka lame keneya ali wia taniateka tele
lukakome okome
4
ke luno yomo eya witakoya wia atukoa noameneya Akolaliyo ponoke
adeka piipiamene ali atoa takoa poi topamene wa wetekaka.
5
Eni wetekakilepa e yene wia
tukameneya tokene ko kakoa (5) ponoka toa pa tete meai tamene wa wetekaneya. Eni tetepa
ka lame tanikolo motiki tete keneya.
6
Tokene ko kakoa (5) ponoka toa mea eni tete motokoi
yenamepa i tete teigouno, tukene tuadiya wa wili tokoa kawa teko tokale wawa oyake
tuamele toamoo.
7
Eni apio iti itita pitakilepa poike pomotoa nodokane osi kai tetepo taneya pitaneya.
Kini wagokepa tobou agome watekoya nunagu golo kueme latianeya lobutukaketikaneya.
Kini lene timinipa ali lene timini keneya motaneya.
8
Kini pinepa atoa pine keneya ludukiya.
Kini kimepa laione kai kime keneya etene uo mati kakeneya.
9
Kini palanu pawe toa
momotoapa padeya kapa petene keneya ewetemotaneya. Ni kini pawena lagatika lagatika
toa kakilepa osi kai kainya matiyame poi dipi poike u u wa teyapea liimoa aua pekete akene
tetepo takoa tokoi.
10
Ni adapini munokepa kimeta tue ka la eya kimeta keneya kakeneya.
Nipa tue ka la eyame ali tanikome tete meteko toapa tokene ko kakoa (5) ponokale-kama ali
atoa wia taniamele taneya.
11
Eni apio wane uku yatene peya odene edelo agoke-kama lukoa
mekoi. Eni ge yo nine piane koa yopiko edelo agoke uku. One ibinipa Iberu agaleke
Abadone wa oa Geriki agaleke Apolione wa oa tiki. (Apolione wapa nipa ali wia atukako
ago wa oo.)
12
Ali atoa wene keda takanelepa namolole toa peya takaneyake takutale pa piko.
13
Ni ko melepu (naba 6) takane edelo agome bera pukapekale yatekolu Akolaline
leneke piane walai lodo yoai tane walai golo kueme latiane walai muke agale ludu nokale
yatekou. Nipa eni walai kolodo adeka pia latia kakane kime pakeke agale ludu nokome
okome
14
wini tube ue Yuperetise wa ibini akene ue kekulu edelo ali tuyono togotaneya
pikino, poatino poe wa po kotokoa wetekamene wa oka. Ko melepu takoa (naba 6) bera
pikoa kaka edelo ago-pala nimo okale
15
yakamotokome nitipoka. Nipa i mali i tokene i dei i
lou pini wa metane oi ponomotoa nepia meati wa ue kekulu moa togotane edelo ali-mene
poe wa po kotokoa wetekakilepa eya tomotoa toka. Ali atoa ta piko peyake pitikoi toa oto
pitikoa takuta takuta wa katekoa wia tukameneya tebolo takoa-kama wia tukamotoa toka.
16
Eni edelo ali-mene timine kawa osi kai patu mea poi topokoi yene kakoi toa oi motikilepa
ege egeta wa-kala kadukoa (200 milione) meadekoi.
17
Pule pitikene enekolu osi kai ni osi kai patu mea pokoi yene dikaneya enekou. Kini
palanu ewetemotane peteneya-kiti teke teke taneya enekou. Nipa toe keneya kikome kianeya
ni tubo ni salepa kugu kanu pageneya keneya teke teke taneya enekou. Ni osi kai tobou
wanepa laione tobou wane keneya. Kini kabunukepa toe witoa lodo witoa salepa kugu
itipono okoa kakeneya witoa toka.
18
Toe lodo itipono okoa kakene salepa kugu eni
witakilepa ali atoa oto pitikoa takuta takuta wa katekoa yoa tukameneya tebolo takoa-kama
yoa tukakala toka.
19
Eni osi kai tele pinepa kini kabunu adapinita. Kini adapinipa kaya
keneya. Nipa ali atoa wia tanikilepa adapini munoke kakene kimeme tokoi.
20
Nitaneyake enika eniyame katekoa wia tukameneya mekoi peyame kini yoname
latikoinakeya-kiti tewitikoa wawamokoi. Nipa ipono kowitato wa golo kue ni silepa kue ni
kanu pagene kapa ni pa kue ni yomo enika eniya moa latikoinakeya-kiti pa etepea kowitima
pokoi. Enika eni paya gode-kitame leneme enamoa kaleme yakamoa ka ludu poamoa tamele
toameneyake tokoi.
21
Nitoapa ete ali atoa wia tukoa ni ulo eya toa ni koua piamatekoi atoa-
pala koua pia ni mone panagoneya kode moa enika enile toatekoi weneka tewitikoa
wawamokoi.
<<
99
>>
<<
10 10
>>
10
Edelo Agome Ewetane Pipia Deya
Pikoa Kakome Tanemo
1
Nitaneyake pade edelo ago etene telekago a tibu kawa itonoke noademe nokale
enekou. Einago wedome ewetemotaneya eni noka. One tobou wanekepa kokati pia
unukaneya. One lene timinipa lou pa keneya pa toologaneya. One kawatapa itipono okoa
kakene yapu pigi keneya.
2
Nitane agome pipia deya one yono tatonoke keaneya pikoa
kaka. One kawata pogakilepa nimini yono lonopa kusa ue tali pogakoa kawa ewa yono
lonopa itono patu pogakoa kawa toka.
3
Nitoa kakome kayo ikilepa laione ko u okome ta
wia piou toa keneya oka. Nitikale tono witiki yatene tatono kakoame (7) ete wa topo takoa
okoi.
4
Eni tono witiki yatene tatono kakoame (7) topo takoa okoimo pipiake wiane
mekadene tokounake a tibu agale ludu nokome okome eni tono witiki yatene tatono
kakoame (7) okoina pa neke luaneya meano, wia mekameamene wa oka.
5
Nitikale eya edelo ago kusa ue tali-pala itono patuta kawa pogakoa kakale enekouna
edelo ago one ewa yono ate tibuke pitikakoa kaka.
6
Nitoa kakomepa eya ago tuameneya pa
meemoa pokome tibu-pala itonota kusa ue toa ni eniya-meneke pia kawa tokoya peya
latiane ago ibini wedekakome eya wa oka. Akolaliyo papete wene toopianele wete taatekoa
too.
7
Nipa tatono takane (naba 7) edelo agome bera pukapea kakaka one wene kibutupia
kaukoa mema nekenele taatekoa too. One agale to awea akane ali-kiti papete wene taka taka
tane toa nitoo wa edelo agome oka.
8
A tibu agale ludu nokome okale yatekouyame nopala wa lokakome okome kusa ue
tali-pala itono patuta kawa pogakoa kako edelo agono yono tatonoke pipia deya keaneya
pikono, wete mopoano pa wa okale
9
edelo ago kakata pekene mano wane oikolu okome
nipa moa na. Moa nokotikakale tepene ponokome kou toatekoyake neke kimane keneke
pikome koyapo ego ue meke tokoya keneya too wa okale
10
one yono tatonoke piane pipia
deya motokou. Moane nakilepa anu kimane keneke koyapo ego ue meke toko keneya
nakouyake tepene ponokome kou tootapeka.
11
Nitikalepa panagome okome eya yene e ku
yatene ta piko peyake pitiki yene eya kuya agale yakoa iki yene ako tobou meki ali-kiti enika
eni yene kainya mati-pala Akolaliyo toatekomo i i wa neme to awea akamene wa nopala oka.
<<
10 10
>>
<<
11 11
>>
11
Akolaline Agale Akane Agotame Akenemo
1
Nitaneyake yapu eya adeka moatekou yobaleya panagome ina wa no metekome
okome Akolaline wikakane tobou losu yapuka oneke lodo yoai tiki kue walaika adeka
mopoano pa. Eida-kama Akolali kowitikala tiki yene kaki toa oi moano ta.
2
Nitoa adeka
moma pekepa tobou losu yapu unukoa kolago taneta katekoa adeka moameamene. Eni
kolago tanetapa Akolaliyo kinino noe wa e ku pa yatene-kiti yametaneya tokolo ni uku. Eni
pa yenamepa anu wane takoane moane talo tuku Yerusaleme ta wia kautoi. Tokene padeka
ketepo kakoa (42) ponokale-kama nitoa meoi.
3
Nipetepa anu agale to awea akatekoi alita
takuta moane wetekakolu kuku pa tapeane mamina kakeneya neketepa ege egeta wa-kala
kadukoa (1260) ta pataka toa-kama anukumo to awea akama yawei.
4
Einagotapa ta piko peya yopiko ago Ali Munono leneke kakeneya-mene olipe
yomota takuta ni labo piatikiyata takuta adeka pianeya kaki.
5
Pade-kitame einagota tete mea
enekolipa einagotane kabunuke toe witakome kita-pala poi teigoi yene yoa tukakala too.
Kita-pala poanele tokoi yene edikoa tukala toi.
6
Einagotame Akolaline agale akama yakoika
one tele patu kautakoa kakete ta pitamomotoa a tibu ketekamele too. Ni yotane ueka mine
ueka kamate latiamele too. Itonokeka ali atoa eya kuya yene momotoa tamele too. Enilepa
einagotame ipete kupete kini wene witika toa nitamele too.
7
Einagotame Akolaline agale to awea akoa togakolipa yo tane kai keneya agome
einagota-pala poi tonokome moa atukoa tukoo. Eina ge yo nine koa keneke mea nokome
nitoo.
8
Nitikalepa einagotane tigini eida ibini akene take Sodome Idipi wa pedoa akene take
bateteke pa piei. Eida pitikali pitikoi taapa kini Ali Muno wia dekane take uku.
9
Eida ta
tebolo-peta lia patoa wa tuyono takoa toka pakeka eya yename e ku yatene eya kuya tigini
kakene yene eya kuya agale patu mekoi yene ta piko peyake mekoi yene enika eni yene
padeka-kitame einagotane tigini enoai toa kawake oloyo tamene kote tokale wawei.
10
Einagotame papete itono peku noai tane yene dika dika toamene tete meou toa wene keda
takakala toi. Wa naniko yo tane kai keneya agome einagota wia tukakale eni yename ke wa
wedia mekete eya kuya epetaneya ete oto wa topo toa mekala toi.
11
Nitikolika ta tuyono
takaka pakeka Akolaliyo einagotane timinita nipukakoa pome pukapekale kamokoata kakoi.
Nitikoli enekoi peya piti mea tagatapeneya kakoi.
12
Nitaneya kakakoa einagotame yatekoli a
tibu agale ludu nokome okome i agota oto noe wa okale yakamotekete wedo patu mea a
tibuke atepea pokoi. Nipa kita-pala poi te ia mekoi yename enekoa kamotoa pokoi.
13
Nitikoli eina eina momani toka matiyame eni ta muku muku tootapekale yapu kaka toa-
kama pogi kakoa-kala (9) katekoa kiliameneya odene-kala takoa kilikala taneya. Ali atoaka
ege egeta wa-kala kadukoa (7,000) tuutapeneya. Nitaneyake katea tuamokoi yene piti mea
taganeya mekete a tibu meko Akolali kei pia kakoi.
14
Ae, enipa taku takoa ke enekakoleno, tebolo takoa ke enekatekolepa tigotoma noko.
Tatono Takaka Bera Ka Okale Toatekamo
15
Tatono takane (naba 7) edelo agome one bera pukapekale a tibu agale ludu-kiti telo
nekete ekete itono talo tikilepa tone Ali Muno Akolali one Keraisutame-kama tiki. Keraisu
einagome talo toa-kala kama poo wa okoi.
16
Nimo okoli eya ali-kiti Akolaline leneke kini
walai-kitike mekoi ada yatene pagini kakoa (24) aua pitalogoa Akolali kei pia kakeneya.
Nitikete ekete
17
telekole-kama toko Ali Muno Akolali namolo namolo mea opi opi meemoa poko ago ne-
pala ke wa oko-ye. Neke telekole toatekole opi taatekoa tokome ta piko peya titia
talo tokolo ni oko.
18
Neke agale wakene yene kotimi yoa kakeneya. Opi kini
tanele topo takoa neme kotimi yoa kibu moade toko. Tuane ali atoa takoa enoa
akateko-petepa opino ta. Ni nekele takoa neke agale to awea akoa tane ali-kiti ni
neke takoa motane-kiti ni neeke nate wene pianeya mea kowitiki yene peya
ponopeneyaka ibini akene yeneka eni yene peya-pala ke wa neme pewe wia
kawatekole taatekoa toateko-petepa opino ta. Ni ta piko peyake pitiki ali atoa toa
potokaki yene kini tikile neme topo takoa moa atukateko-petepa opino ta wa a
tibu agale ludu-kiti nekete okoi.
19
Nitikoli a tibuke Akolaline tobou losu yapu kago pekale bokosi wane keleyo pikale
enaneya. Akolaliyo kiwi talo toane auapeouno, dikamene dikamene wa one yene-pala oa
togotane agale lobutane bokosi wane eni enaneyake katiapale toa tono wia momani toa
tadali palene-pala loboa pitikoa toka.
<<
11 11
>>
<<
12 12
>>
12
Atoa Pade Pukupukutame Tanemo
1
Nititikaneyake enekolu a tibu eya adeka witakale enekou. Atoa padame mamina moa
kawou toa lou moa kakeneya kakale enekou. Tokene patu nitaneya kaka. One tobou
wanekepa tagoi tuku kakoa (12) payapono pia unukaneya.
2
Einatoame mati pene
opiademepa mukiti nakale ka oa kaka.
3
Nitikale eya adeka a tibu kikome kiane pukupuku uoya witakale enekou. One wagopa
tatono kakoa (7) kawa one kimepa noi kakoa (10) kawa taneya. One wago kaka peyakepa
ako tobou meane ago watekoya nunagu noi kakoa (10) watekolokaneya.
4
Nitaneya kakome
adapini kogakomepa a tibu tagoi tebolo tebolo wa kaka toa-kama takuta-kala katekoa pa
kamotoa odene-kala takoa kotia itonoke wia pitikakala toka. Mati opiateka atoane leneke
kakome pukupukume nitoa kaka. Nipa one mati opikaka dekoane moane nou wa wene
pianeya kakome toka.
5
Nitikaka einatoame mati opikilepa pitikali ta piko peyake pitikoi toa
yopiateka mati eni opika. Kapa wapi pikoa kakome yopiateka mati eni opika. Opikale eina
eina padame mati dekoa moa Akolali ako tobou ago meateka walaike mekata aua poka.
6
Nitikalepa einatoa ali piamene take Akolaliyo one nodokakapiane take pitoa poka. Pitoa
pome mekalepa ta pataka ege egeta wa-kala kadukoa (1260) ta pataka toa pade-kitame
einatoa eida pikoa mekoi.
7
Ni pade a tibu poi tageneya. Nipa ako tobou edelo ago Maikaleyo one edelo yatene
poi kamotokoa pukupuku-pala poi topokale pukupukume one edelo yatene-pala poi tato
wa ete poi toa kaka.
8
Poi tokoa kawa teko tokale wawa aida a tibu pa meamele toameneya
tokome
9
one edelo yatene-pala dekoa moa itonoke wia pitikaketikaneya. Pukupuku wane
uku agopa kaya wa koto akene agoke uku. Kaya wanepa tobou ipono Setanu ali atoa peya
likoa enekala toko agoke uku.
10
Wa yatekolu a tibu agale ludu telo nokome okome Akolaliyo ali atoa toa moa
telekole toa pawe toa talo toa toatekole opi taatekoa toko. One moa kakapiane ago
Keraisuyo one patu kautakoa kakome enile taatekoa tokolo uku. Akolaline leneke kakome
tone oya-lawe ete pia oto pia akakago Setanu wete moa wia pitikaneya tokolo ni toko.
11
Tone oya-laweme einago Setanu-pala poi toa kawa moa kautakilepa Sipi Sipi Kai Tine
kamate patu kautakoa kawa onekemo-pala akama yawa tekete tokoi. Nipa kini kepene
mama moameketepa kipala poi te iane yename wia tukakolipa oyake tuou wa atiki toa tokoi.
12
Nitikala tokoino, a tibu meki peyame ke wa wedia kamene-ye. Nitamene wane ukuyake
itono patu ni kusa uele meki peya tumai meamene-ye. Setanu einago kiwi mekita wida noka
tokolo ni uku. One takoa poateko tigotokono wene taneya tokome kotimi mati yotaneya
wina noka.
13
Eina pukupukumepa ae itono patu wia pitikaneya meadeku wa wene tokome eina ali
mati opikana atoa wiou wa litimoa poka.
14
Nitikalepa einatoa ali piamene take pukaneya
petoa pomotoa tokome Akolaliyo tube tegu pawenata moa kakaka. Pukupukume tuku toa
enamuamateka take pukaneya pome paigakoa memotoa ni toka. Mali tebolo ponome wa
tuyono takaka pakeka ponomotoa poti paigakoa memotoa latiane take uku.
15
Einatoa eida
petoa pome mepokaleka ueme dekoa moa aua pomotou wa pukupukume ue kapea
wetekaka.
16
Nitikaleka itonome i atoa toane mou wa itono lobokome pukupukume kapea
wetekane ue einaka lobutupaneya.
17-18
Nitikale enekome pukupukume eina atoane ete mati-
kiti-pala poi topouno, nepio wa poi topoka. Einatoane ete mali-kitipa Akolaliyo tamene wa
akenele litia toa ni Yesunomo to awea akoa tiki yene. Pukupuku kusa ue matanuke kaka.
<<
12 12
>>
<<
13 13
>>
13
Yo Tane Kai Keneya Agotame Tanemo
1
Wa enekolu padeya yo tane kai keneya uoya kusa uele mea atepea witakale enekou.
Nipa kime noi kakoa (10) kawa ni wago tatono kakoa (7) kawa taneya witoa noka. One
kime kaka toa-kama tobou alime watekoya nunagu watekolokaneya. One pono-kitikeka
Akolali paya tetepo takoa akene ibini wia mekakolokaneya.
2
Anu eni enekouyapa eya-mene
keneya. One tiginipa lepade wa ibini akene pusi keneya. One kawapa bea kawa keneya. One
kabunupa laione kabunu keneya. Nitaneya witakale pukupukume one tele patu kautakoa
kake ta piko peya yopikoa kamene wa one memotoa takane walai yameteka.
3
Eni yo tane
kai keneya ago one wago-kiti pade po a kakene tetepo taneyake lataneya. Lataneya kakale
enekete itono peku noai tane yene peyame ae wa wene kainya pianeya one litima yakoi.
4
Nitoapa neuwe tukua mekete pukupuku-pala ke wa ootokoa one kei pia kakoi. Nipa eni yo
tane kai keneya ago one patu kautakoa mekome ta talo toa memotoa tokale tokome ni kei
pia kakoi. Nitikete yo tane kai keneya agoka kei pikete ekete neke yagono ago pade kakileka
toamoko. Ne-pala teyo edoa poi tomotoa-pe wa kei pia kakoi.
5
Eni yo tane kai keneya agome mate agale oa pademo pademo poanemo oa tomotoa
ka yametane toa pukupuku patu kautakoa kakome nitoa meka. Nipa tokene padeka ketepo
kakoa (42) ponoka toa-kama nitoa meka.
6
Nitoa mekome Akolalika one ibinika one
mekataka a tibu mekoi-kitika eni peya paya tetepo takoa poanemo oa kaka.
7
Eni yo tane kai
keneya agome Akolaliyo takoa motane yene-pala poi toa moa kawikamotoa ka yametane
toa pukupuku patu kautakoa kakome de take tube takeka pitikoi yatene ni eya kuya agale
yakoa okoi yatene ni liane yene kiane yene talo toa memotoa ka yametane toa talo toa meka.
8
Ta piko peya pitikoi yename one kei pia kowitoai toi. Nipa wia tukane Sipi Sipi Kai
Tineyo pikoa kakene bokuke ibini katekoa wia mekapiamene yename nitoi. Akolaliyo itono
wete latia piameneya kakome mea kama poatekoi yene i i wa kini ibini wia mekapianeyake
eni yene katekoa ibini wia mekameneya.
9
Yakou wa kale piiyakakoa kaketepa nipa kipala eya ukumo wedoa yakamene.
10
Akolaliyopa mone take po kakaneya to a pote mepatekoi yene i i wa wene toopiane toa
taatekoapa mone take to a pote mepoi. Ni tueme kageneya tuatekoi yene i i wa wene
toopiane toa taatekoapa tueme kageneya tuei. Nitoino, Akolaliyo takoa motane yene ke
enekakale meketeka onekele wedoa takoa togamediki.
11
Wa enekolu pade yo tane kai keneya ago itono kekulu mea witoa nokale enekou.
One wagokepa de kime deyata sipi sipi kai tine kime keneya kakeneya. Agale ikilepa
pukupuku tobo tobome oka toa keneya oka.
12
Nitika agome namolo yo tane kai keneya
ago one wago-kiti pade po a kakeneyake latane ago patu kautakoa kakome eya toka. Ta
piko peyake pitikoi yename namolo kai keneya ago kei pia kowitamotoa tika tika toa kaka.
13
Nitoapa ali atoa wene kainya pikanele ele kule telekole tokome eyaka toka. Ali atoame
enekakoa a tibu toe witoa itonoke pitamotoa toka.
14
Ka yametane toa namolo kai keneya
agonole telekole eni takama yakome tokome ta piko peyake pitikoi yene oa yotokakala
toka. Nitoa yotokakome okome tueme kageneyake lataneya kako kai keneya ago kei
piamene. One yomini kueme latia kakoa nitamene wa tika tika toa kaka.
15
Nitikale yomini
latia kakakolipa namolo kai keneya agono tele patu kautakoa kakome eni yomini timini
nipukakoa pome pukapekale eni yominime agale oa kaka. Nitoapa one kei pia kowitamadete
wakoi yene wia tukamotoa amele toka.
16
Nitoa mekomepa ta piko peya pitikoi yene ibini
wamene yene ibini akene yene kamo yene ponopene yene kueme topo toa moa egetane
yene ta pine yene kiwi peya nimini yonokeka ponokeka one adeka pikamotoa tika tika toka.
17
Nitaneyake one adeka moamene kote motane yene kiwi pa meati wa kini nee mamina eya
topo toa moatekoi ka ketekakale padeya deyaka topo toamele toameneya pa mekoi. One
eni adeka pikamotoa ikilepa one ibinika one ibini aue paia akene nabaka ali atoane yonokeka
ponokeka pikamotoa oka.
18
Kipala ina ukulekepa wene muno kakoa meamene. Wene muno kakene agomepa yo
tane kai keneya ago aue paia akene naba i wa wene too. One naba wane ukupa aline ibinike
uku. One nabapa eya 666.
<<
13 13
>>
<<
14 14
>>
14
Keraisuyo Toa Motane Yename Lo Okoimo
1
Wa enekolu Sipi Sipi Kai Tine Kati Saione tobou waneke aida kakale enekou. Ali
atoa ege egeta wa-kala kadukoa (144,000) one-pala aida opia kakilepa kini ponoke one
ibini-pala oneketaine ibinita wia mekaneya kakoi.
2
Nitaneya kakoli enoane yatekolu a
tibukepa ue u u wa yoa kawa tono bu wa wia tane tetepo tootapekale yatekou. Nipa ali peya
matiyame gita wia kakene tetepo tokale yatekou.
3
Gita eni witikilepa ako tobou ago meateka
walai lene timini takoa kakete tokoi. Nipa lene kaatapeane tuyonoya-mene ni ada ali-kiti kini
leneke kakete weneya lo oa witikoi. Eni loopa eya yename ege egeta wa-kala kadukoa
(144,000) itonoke Setanuke lukoa meaneya oto toa motane yename odene wene toa okoi.
Ete-kitame wene toa okoiya mena.
4
Atoa-pala koua piameneya tiobali-kama meou toa
poanele toamene yeneke uku. Ni yenepa Sipi Sipi Kai Tine pokaka litima piki. Eni yenepa
papete itonoke ete yene-pala dekoa Setanuke lukoa meaneyake Akolaliyo one wa oto toa
motaneya. Nipa ipe pine agome ipe kakoya nee pegetoa moa Akolaline pikou toa keneya
tokome eni yenepa Akolali Sipi Sipi Kai Tinetane pegetoa takoa motaneya.
5
Eni yenepa
kapene agaleka wamoa poanele padeleka toamoa taneya mekoi.
Edelo Ali Tebolo-mene
6
Wa enekolu a tibu tigini pade edelo ago pukaneya yakale enekou. Ni agome
Yesunomo pa pia kawateko agale ali atoa pitikoi toa i i wa akama yakilepa tube takeka de
takeka pitikoi yene ni eya kuya agale yakoa okoi yene ni liane yene kiane yene pitikoi toa
pukaneya yakome oma yaka.
7
Nitoapa telo okome okome Akolali piti motaneya meo. One
kei pia kawe. Akolaliyo ali atoa takoa enoa akateko oipa opino nitoatino toe. Eya ago tibuka
itonoka kusa ueka ue lene togoyaka latia pia mekoa tane ago kei pia kowitoe wa pukaneya
yakome oma yaka.
8
Namolo edelo ago noka toa edelo ago taku takoa litimoa noka. Nokome okome ae
Babilone ta kilitapeneya piko. Ibini akene Babilone take pitikali pamoko atoa tetepo takoa
mekete ta piko peya pitikoi yene one peku i lawetekuno, noa tamene wa waine ue lawetou
toa toa potokaneya wa pukaneya yakome oma yaka.
9
Eni edelo agota nokoi toa edelo ago tebolo takoa litimoa noka. Nokome telo okome
okome yo tane kai keneya ago-pala one yominita kei pia kowitoa ni one adeka kini
yonokeka kini ponokeka pikamotoa tane yenepa
10
Akolaliyo gerepi po uepa tigini ko
akateko ue-pala eletekameneya mete keneke mekoa lawetademe toko. Enipa eni yene-pala
kotimi yoa tete meatekolo toko. Eni yo tane kai keneya ago kei piki yene tete eni metekilepa
onekele-kama takaki edelo ali-kiti Sipi Sipi Kai Tine-pala kakakoa salepa wa akene kue noa
kakota toe mine moa pitikademe toko.
11
Eni toe mine mekete tete moatikita lodo kawa-kala
kama poademe toko. Eni yo tane kai keneya ago kei pia kowitoa mea ni one ibini adeka
pianeya mea tiki yename ete pia oto pia tete mokoa-kala kama poadete tiki.
12
Kipala ina ukulekepa Akolaline ali atoa oneme tamene wa akenele litia toa Yesuke-
kama wene tugoa mea tiki yenepa ke enekakolo meketeka onekele poti takoa togamediki.
13
Wa yatekolu a tibu agale ludu nokome okome eya wa wia mekamene. Opi titimoa
Ali Muno agonole takama pote tukoi yene kolotine meoi wa okale yatekou.
Nitikale Epetane Yominiyo okome enipa nimini oko. Kini pupu tokoa kawa kilikoa
meamokoiyake ko mea-kala kama poi. Tukilepa toake kini epetanele tokoile-pala kamoa aua
poi wa oka.
Itonoke Mekoiya Wakoa Moatekamo
14
Wa enekolu a tibu ake tane wedo wane pikale enekou. Eni wedo patu ali yatenane
mana keneya ago eni mekona. One wagokepa ako tobou agome watekoya nunagu golo
kueme latiane wane wateaneya. One yonamepa olo kakene kepete tue pikoa meaneya.
15
Nitaneya mekaka pade edelo ago tobou losu yapu keneke mea noka. Nokome wedo patu
meka ago-pala kayo telo okome okome itonoke mekiya wakoa momotoa nodokaneya
mekino, eniya wakoa moateko oipa opino, neke kepete tueme wakoa moamene-ye wa kayo
okale
16
wedo patu meka agome one kepete tue ta piko peyake tapia wakakilepa eniya peya
wakoa mootapeka.
17
Wa enokolu pade edelo ago a tibuke kakene tobou losu yapu keneke mea nokale
enekou. Einagomeka olo kakene kepete tue pikoa kakeneya noka.
18
Pade edelo ago tobou losu yapuke toe yomotoa yopika edelo ago lodo yoai tane
walai kawa noka. Nokome olo kakene kepete tue pikoa kaka ago-pala kayo telo okome
okome itonoke gerepi po ipe ludu ku apa apata putaneya tua kibutua kakono, neke kepete
tue moa pono te imoa mootapeamene wa okale
19
one kepete tue ta piko peyake tapia
wakakomepa ku tuka wakoa mootapeka. Wakoa mootokoapa kawame kautoa tia lobutatiki
kagono uoya waneke moa pitikoai toka. Enipa Akolaliyo one wakene ali atoa kotimi yoa
kibu moateka adeka pikome toka.
20
Kagono waneke kawame kautoa tigilepa ali atoa pitikoi
ta ete pimotoa ta kago ketepono patukoa akolono taneya. Nitaneyake gerepi po ku ue you
toa kamate mea kapea yokoa kaka. Nipa ege kadukaka ko melepu kakoa kadukoa (300)
kilomita tadiya yotikilepa osi kai kabunu kotuke keneya mea motaneya yokoa kaka.
<<
14 14
>>
<<
15 15
>>
15
Edelo Ali Tatono Kakoame Ke Enekatekoya
Tatono Kakoa-pala Aua Nokala Tanemo
1
Wa enekolu a tibu padele tubele wene kainya pikanele witakale enekou. Enipa edelo
ali tatono (7) kakoamepa wipitia toateka ke enekatekoya tatono kakoa-pala aua nokala
tokoi. Nipa Akolaliyo ali atoa kotimi yoa mea peya takatekale aua nokoi.
2
Wa enekolu gilasime latiane kusa ue toe-pala eletekane tetepo taneya meelogakale
enekou. Wa enekolu e ue mekoya liti eina yo tane kai keneya ago-pala poi toa moa patukane
yene kakoli enekou. Einagono yomini kei pia kowitamoa ni kini yonokeka ponokeka one
ibini aue pa ia akene naba wia mekamene kote tokale wawa tane yeneke uku. Ni yenamepa
Akolaliyo metane gita keneya pikoa kakala tokoi.
3
Nitoapa eya agotane lo Akolaline pupu
takane ago Mosese ni Sipi Sipi Kai Tinetane lo eya wa oa kakoi.
Akolali nepa ako odene meke telekole toko Ali Muno ago. Padele padele tikilepa telekole-
kama toa ali atoane wene kainya pikanele-kama toa toko. Ele kule tikilepa kiyo
akenele-pala niminileta-kama toko. E ku yatene peya neeke-kama lukoa meki.
4
Ali
Muno ne piti moamoko ago odeneka kawamoko. Neke ibini wedekoa ne kei pia
toamoko ago odeneka kawamoko. Poanele tikileka toamene ago ne odene meko.
Ta piko peyake pitiki yene ne mekota-kama nekete ne kei pia kowitoi. Neke kiyo
akenele-kiti keleyo witatapeneya tokome nitoi wa kabunu koukotukoa oa kakoi.
5
Nititikaneyake enekolu a tibu Akolaline yapu kago peaneya pikale enekou. Nipa
Akolali odene memotoa takane yapu luku keleyo enekou.
6
Eni yapu keneke edelo ali tatono
kakoa (7) witoa nokoi. Witoa nekete ke enekatekoya tatono kakoa-pala aua nokoi. Abe
ko otapeane mamina kakeneya nokoi. Eni maminapa ake tootapea yadi yadi taneya. Golo
kueme latiane po-pala moa palanu lutaneya nokoi.
7
Nitaneya nokoli lene kaatapeane
tuyonoya-mene padamepa golo kueme latiane mete tatono kakoa (7) inoe wa e edelo ali
tatono kakoa (7) tatikamu toka. Mete wane ukupa tuameneya meemoa poko Akolaliyo
kotimi yoa kibu moateka adeka pia kapetekane meteke uku.
8
Mete tatikamu tokale tobou
losu yapu keneke Akolaline pa teleta witatapekale lodo yoa tagaka. Lodo yoa tageneya
tokome odene agoka eida lobutua pamele toameneya. Nipa edelo ali tatono kakoame (7) ke
enekatekoya tatono kakoa-pala aua nokoi toa wete toa togameneyake eida lobutua pamele
toameneya.
<<
15 15
>>
<<
16 16
>>
16
Akolaliyo Kibu Moateka Adeka Pia
Kapetekane Mete Tatono Kakoake Akenemo
1
Nititikaneyake tobou losu yapu keneke agale ludu eya wa nokome okale yatekou.
Akolaliyo kotimi yoa kibu moateko adeka pia kapetekane mete tatono kakoa (7) itonoke
pekoa pipokala tamene wa tatono kakoa edelo ali-kiti-pala telo okale yatekou.
2
Nimo okale namolo edelo ago pome one metepa itonoke pekapoka. Nitikale eina yo
tane kai keneya agono adeka wia mekaneya mekete one kei pia kowitikoi yene kini
tiginikepa tete tane tono tumitapeka.
3
Nitikale taku takane edelo ago pome one metepa kusa ue talike pekapoka.
Pekapokale eina kusa uepa tuane agono kamate latitapeane tetepo taneya meelogakale ue
mekoiya peya tuutapekoi.
4
Nitikale tebolo takane edelo ago pome one metepa ue yotokaka ue lene togoka
peyakeka pekatapekale kamate latitapeneya.
5
Nitikale yatekolu e ku ue yopiko edelo agome
eya wa okale yatekou. Nepa namolo namoloka opi opika poanele tikileka toameneya
meemoa noko. Ne nitiko agomepa ali atoame tikile kiyoke-kama takoa enoa akakala toko.
Opika i ke enekakoya witakakilepa kiyoke topo takake toko.
6
E yenamepa neke takoa
motane yene ni neke agale to awea akane ali-kitika kini kamate ponomotatoe wa wia tukakala
taneya. Kini eni tanele opi topo takake i kamate latitapeane uepa noati wa neme yametekana.
Moke eina wa edelo agome okale yatekou.
7
Akolalike lodo yoai tane walaike agale ludu eya
wa nokome okale yatekou. Telekole-kama toko Ali Muno Akolali ali atoame tikile neme
takoa enoa akakilepa niminile toa kiyoke-kama toa toko wa oka.
8
Nitikale tuyono takane edelo ago pome one metepa lou patu pekapoka. Lou potome
ali atoa yoa tukamotoa tokome ni toka.
9
Lou potome yoa tukakale eni yename Akolaline
ibini paya tetepo takoa oa kakoi. I ke enekakole memotoapa neme toko wa poanemo oa
kawapa kini namolo poane wene wia wawamoa one kei piamoa tokoi.
10
Nitikoli ko takane (naba 5) edelo ago pome one metepa eina yo tane kai keneya ago
memotoa takane walaike pekapoka. Nitikale one yopika taapa yomiyomume agopa
takatapekale ali atoame dika dika toamene tete moa kakete tekete kini keke noa teigala tokoi.
11
Nitoapa tono tumitapea tete metekopa Akolaliyo neme toko wa poanemo oa kawapa kini
tokoi poanele tewitikoa wawamokoi.
12
Wa ko melepu takane (naba 6) edelo ago pome one metepa ibini akene Yuperetise
uele pekapokale wete tokotapeka. Lou witia noko lono mekoi tobou ali-kiti patukoa
noatekoi ka eni nodokaneya pimotoa tokome ni toka.
13
Nitikale wa enekolu poane ipono
tebolo tege tetepo taneya witoa nokoli enekou. Nipa eya-menane kimane keneke pukupuku
ni yo tane kai keneya ago ni nani toatekale kapene yokoa yameteka ago kini kimane keneke
witoa nokoi.
14
Ta piko peyake tobou meki ali-kiti mekika Akolali-pala poi topato wa padele
padele tubele toma yawatiki ipono-meneke uku. Nipa telekole-kama toko Akolaliyo ipete wa
oi meteka toa poi kamotokama yawadete tiki.
15
Ipa Yesuyo okamo ukuno yakamene. Kode ago keneya kotikatapeane nouno,
mamina kawameneya ya tokale mekayano, wedoa nepia meamene. Atu piameneya mekome
mamina kakeneya kako agopa kolotine meamele toono, wedoa nepia meamene.
16
Eni ipono-mename tobou ali-kiti poi kamotokakilepa eya take Iberu agaleke
Amagedono wa ibini iki take oa kamotokoa obokakoi.
17
Nitikoli tatono takane (naba 7) edelo agome one metepa a tibuke pekatapeka.
Nitikale tobou losu yapu keneke ako tobou ago meateka walaike agale ludu nokome telo
okome okome eina toatekale taatekoa tootapeka wa okale
18
katiapale toa tono bu wa wia
kawa momani mati toa toka. Momani mati eni tikilepa Akolaliyo ali atoa latia mekane-pete
laigoa momani toma nekene toa moa patukakome namolo toamokanakale eni toka.
19
Nitikale eni ibini akene taapa ete oto wa puutapeneya. Ta piko peyake pitikali yapu wia
mekoi toa bu wa kilitapekala taneya. Nipete Akolaliyopa ibini akene Babilone take yename
poanele-kama toma nekenele wene taneya mekome kotimi yoa kakome gerepi po ku ue
lawetou toa keneya dika dika toamene tete mea kaka.
20
Eyaka toka. Kusa ue muke piko ta
peya takoa pootapea tubeya kako tono-kitika takoa pootapea toka.
21
A tibukeka tadali
palene keda taneya-kama pitakome ali atoa wia ka utapeka. Eina pitaka palene wane pade
moa keda oi motokoli padeka noi kakoa (40) kilo tadeka. I ke enekakole memotoapa
Akolali neme toka wa eni tete mati metekake ali atoame poanemo oa kakoi.
<<
16 16
>>
<<
17 17
>>
17
Ibini Akene Pamoko Atoake Akenemo
1
Mete tatono kakoa (7) pikoa kaate tokoi edelo ali-kiti padame no kakouta nokome
okome ibini akene pamoko atoa kibu moatekale yameouno, noo.
2
Itonoke tobou mekoi ali-
kiti one-pala koua pikala tokoi. Ni ta piko peya pitikoi yename one eni peku noa tato wa
waine ue nokoa kawou toa keneya leau akeneya etepea toma pokoi. Pamoko atoa wanepa
tube ue-kiti yotokoya liti latianeya ibini akene take uku wa edelo agome oka.
3
Nimo okale Epetane Yomini nooke awinokale edelo agome pata wa ali piamene take
no moa aua pome mekapoka. Eida atoa pade kikome kiane yo tane kai patu mekale enekou.
Eni kaipa wago tatono kakoa (7) kawa ni kime noi kakoa (10) kawa taneya. One tiginikepa
Akolali paya tetepo takoa wia mekane ibini wia mekakolokaneya.
4
Einatoapa kudulu ue
pagene mamina kikome kiane maminaka kawa ni padeya padeya golo kueme latianeya kabe
pia yonoke mekoa ni eya kuya yadi yadi tane kamo kue wane deya ni kamo pilu poke
apetoa kabe pia kaloa kaka. One yonamepa golo kueme latiane mete pikoa kakilepa ele kule
ya tanele one pamoko atoa mekome toa potokaneleka mete kagonoke mekoa kabe koukoa
pikoa kaka.
5
One ponokepa aue pa ia eya ibini wia mekaneya. Ipa ibini akene Babilone ta. I
take-kama pamoko atoa aloa ele kule ya tanele titia toa ta piko peyake weamutukala toko wa
wia mekaneya.
6
Wa enekolu einatoame waine ue nokoa kawou toa ali kamate abetema
yaka. Nipa Akolaline ali atoa ni Yesunomo oa aua yakene yene wia tukama yaka.
Einatoa enekene wene kainya mati pianeya mekou.
7
Nitikolu edelo agome no
yatekome okome wene kainya pianeya mekilepa edekolo toko-pe. Eni kai patu meko atoa
eni kaita neme enekopa eya toatekolo toko. Wago tatono (7) kakoa kime noi (10) kakoa
taneya kakale enekana kaipa
8
papete meaneyake opi meamene tetepo taneya mea wa
wipitikome ge yo nine piane koa pikoka mea witoa noo. Tua atuademeke nitoo. Witoa
nokale eneketepa Akolaliyo takoa wakene yene wene kainya pianeya kawei. Akolaliyo itono
latia pikomepa meemoa poatekoi yene i i wa ibini wia mekane bokuke ibini katekoa wia
mekamene yeneke uku. Eina kaipa papete meaneyake opi meamene tetepo taneya mea wa
wipitikome witoa noo wa eni yene wene kainya pianeya mea ka oa kawei.
9
Ina ukulekepa wene muno kawa wedoa tetoa enamene. Kai wago tatono (7)kakoapa
tono tobou tatono kakoa (7) adeka pianeya kako. Pamoko atoa mekotake uku. Kai wago-
kitipa tobou ali tatono kakoa (7) adeka pianeya kako.
10
Tobou ali tatono (7) kakoa meki-
kiti ko kakoa (5) mea tua atuaneyake odene ago opi pa meko. Ni pade ago nani taatekoa
noo. Taatekoa noateka ago nokomepa pa tekei nome meoo.
11
Eya kai papete meaneyake
opi meamene tetepo taneya meko kaipa ketepo takoa (naba 8) nome meateko tobou ago
adeka pianeya kako. O tobou agopa e tatono kakoa (7) tobou ali-kitane yagono ago. Oneka
tua atuademe toko.
12
Kai tobouke kime noi kakoa (10) kakeneya neme enekapa tobou ali noi kakoa (10)
taatekoa noatikili toko. Eni tobou ali-kitipa kini yopiatekoi ta wete yameameneyake wa
naniko ali atoa pitiki toa tatite toa odene lou pinike eni kai-pala pa tekei yopikala toadete tiki.
13
Eni tobou ali noi kakoa (10) odene wene pianeya meketepa e kaipa kini tele patu kautakoa
kakome e ku yatene yopimotono tato wa oi pedoa pia toi.
14
Nitoapa Sipi Sipi Kai Tine-pala
poi topato wa poi topokolika Sipi Sipi Kai Tineyo moa patukatapeoo. Onepa ako odene
Ali Muno mea ako odene tobou ago mea tokome eni tobou ali noi (10) kakoa-pala ete wa
poi toa kawa moa patukatapeoo. Nipa one takoa moa kayo oa motokale onekele wedoa
takama yakoi yene-pala poi kibutua moa patukatapeoo wa edelo agome nopala oka.
15
Nimo ootokoa kakome okome neme enekana ue-kiti pamoko atoa kautakoa meko
ue-kitipa eya adeka pianeya yotoko. Tube takeka de takeka pitiki yene e ku yatene eya kuya
tigini kakene yene eya kuya agale yakoa iki yene kabe koukoa adeka pianeya yotoko.
16
Eni
kaimeka one tobouke noi kakoa (10) kakene kimemeka pamoko atoa-pala kotimi yoa meoi.
Nitoa kotimi yotokete onekeya wia tadekatapekilepa one mamina kawameneya kakene
tetepo taneya memotoa toi. One melepuka te ia nootokoapa natipu moa toele yoi.
17
Nile
tikilepa Akolaliyo kini tepene lukakana toa toi. Nipa e noi kakoa (10) tobou ali-kitamepa o
kai kini tele patu kautakoa kakome ta piko peya yopiateka oi pedoa pikilepa Akolaliyo
papete wene toopiane toa toi. Akolaliyo one papete oa mepiane agale taatekoa toa
togakaleka nitoa meoi.
18
Neme enekana pamoko atoapa eina ibini akene ta adeka pianeya kako. Oneke-kama
ta piko peyake ako tobou meki ali-kiti lukoa meetapeki.
<<
17 17
>>
<<
18 18
>>
18
Babilone Ta Wia Kilikanemo
1
Wa enekolu pade edelo ago a tibu ko a nokale enekou. Ele kule telekole tamele tane
ago pa tane mati nokayame itono pa toologaka.
2
Nitoa nokome kayo telo okome okome
ibini akene Babilone ta kiliadeko. Etene kilitapeneya tokako. Opi eni tumu tokaneya piko ta
ludu Setanuno yagono-mikiti poane ipono eya yawa meki. Kekaneya latikoa wakene ini
yatene poane ini yateneka eida koukoa meki.
3
Ta piko peyake pitikoi-kitame i atoane peku
noa tato wa waine ue nokoa kawou toa keneya leau akeneya etepea toma pokoi. Itonoke
tobou meane ali-kitame one-pala koua pikala tokoi. Topo lene kiane yename einatoa-pala
padeya padeyata topo toai tekete kamo tootapeneya mekoi wa oka.
4
Nimo okale wa yatekolu a tibu pade agale ludu nokome okome anu yene wini ta to a
noatino, noe. One poanele tokole kimeka toa one ke enekakolo mea tete moatekole kimeka
moa takayano, noe.
5
One toko poanele pala auma mati a tibuke pome motoko. One eni
toko poanele i i wa Akolaliyo wene taneya meko.
6
Ete yene-pala poanele toka kotuke-kama
kakoa topo takoa kibu moamene. One eni toka poanele topo takakilepa takupeta topo
takakala tamene. Einatoame poane peku lawetekana toa topo takakilepa iyapa na wa one
mete kagonoke padeya kou toko mati pekoa lawetamene.
7
Einatoa one wa ibini kamotokoa
eya kuya kamoya moologaka toa kotuke kakoa tete mea tumai mekoa tamene. One tepene
eya wa mate agale oa meko. No i atoapa ako odene tobou atoa meku. Nepo atoa meamuku.
Tumai edoane memotoa-pe wa oko.
8
Nitikono, ele kuleme ke enekakale meatekale-kama
kotikatapea witoo. Nipa odepeta tua tumai enoa kobume tua too. Nipetepa toeme
napetapeoo. One tokole takoa enoa kibu motoko agopa Ali Muno Akolali. Ni agome
telekole-kama tokome enika enile taatekoa too wa a tibu agale ludu nokome okale yatekou.
9
Einatoapa toeme nokoa kakata lodo kakale enekete eya yene one-pala koua pia
mekete eya kuya kamoya motane tobou ali-kiti tumai mekete komo ka ta nina toa pitikoa
kawamoi.
10
Nitoapa kiwika kikilikoa dikane tete motokaya wa piti motekete padeka mati
kakete ekete ae ae etene ibini akene Babilone ta pitikaline ta kibu motikilepa kotikatapea
tadeko wa oi.
11
Ta piko peyake topo lene kiane yenamepa Babilone makesike kopapu wa topo toa
kue moamele toamoo wa tumai mekete komo ka ta pitikoa kawei.
12
Nipa kini eya kamoyapa
golo ni silepa ni yadi yadi tane kue wane deya ni kamo pilu kabe pikiya ni ake tane mamina
ni kudulu pagene mamina ni kikome kiane mamina ni selika mamina ni ka lono tane yomo
eida wa yoamoi. Ni eyame latianeyaka elepade kimemeka kamo yomomeka berasi
kapameka pa kapameka teke tane kuemeka enika eniyame latianeya wane-kiti eida wa
yotikile toamoi.
13
Ni noatiki nee meke takoa pitikakiyaka lodo ka lono takoa yotokiyaka
tigini ka lono takoa yotokaki yomo pageka gerepi po ku ueka olipe yomo ku ueka palawe
kukuka witi ku ka pitimekawe kaika sipi sipi kaika osi kaika osi kaime limoa aua pikiya
waneka eida wa yoamoi. Ni ta pine yenane pupu-kama takamotoa kode motane ali atoaka
Babilone take eida wa yoamoi.
14
Eni topo lene kiane yename Babilone take mekoi yene-pala eya wa oi. Eya kuya
meke tokoya noadiya wa wene piitikaneya mekiyake piamokolo wida pa meki. Kini kamoya
kini mamina epetaneya enika eniya peya toa pootapeneya tokome wa moamoi wa oi.
15
Eni
take enika eniya topo toa kamo tokoi yene kiwika kikilikoa tete motokaya wa piti motekete
tekete padeka mati kakete tumai keneya mea komo ka ta pitikoa kawei.
16
Nitoa eya wa kayo
oa kawei. Ae ae etene ibini akene ta neke yename eya mamina ake tane mamina kudulu ue
pagene mamina kikome kiane mamina moa kawa ni eya kue golo kue yati yati tane kue wane
deya kamo pilu eya kabe pia yonoke mekoa tokoi.
17
Nitoa mekoiyake enika eniya peya
odene lou pinike takoa pootapeadeko wa oi.
Ue dipi yopia aua pokoi ali-kitika ue dipi-kitike mea pokoi yeneka ue dipike pupu
tokoi yeneka kini kopapu ue dipike pia wetekoa tokoi yeneka kiwi peya padeka mati kakete
enekoa kawei.
18
Nitoa enekoli toeme napetapekale lodo kakale enekete ka oa ekete ae
papetepa dikane ibini akene ta pade latikilepa taneya mena wa
19
wene keda taneya kakete
itono kugu moa wa kini tobouke pitikoa kawei. Nitoapa tumai meou toa komo oa kayo telo
ekete ekete ae ku ibini akene ta-pala taneleke tumai meato. Ue dipi pine yene peya eida pote
piai tekete kamo tootapekala tokoi. Nitikoiyake lou pini odeneke one eni kamoya peya
takoa pootapeneya wa oi.
20
Nitoino, a tibu meki peyamepa kei ta tumu tokaneya pikono, ke wa kolotine
meamene. Akolaliyo one takoa motane yeneka Aposelo yeneka one agale to awea akane
yeneka kiwi peya wedia meamene. Eni take pitikoi yename kiwi toa potokakala tokoinake
Akolaliyo kibu motokaka tokolo ni uku wa edelo agome oka.
21
Nitikale pade edelo ago telekole-kama toka edelo agome kue wane uoya witi ku
kugutukakiya kue makai wane keneya katekamoa kusa uele telo pitikakome okome i
tukulepa Akolaliyo ibini akene Babilone ta wia tadekateko adeka piane tuku. Eni toateko
adeka piane tukule taatekoa tokalepa padameka eni ta wa enekile toamoi.
22
Widapa mo yo
wia tulutu pukapea beta pia tokoimopa padameka wa yatekile toamoi. Emo kumo agopa
tootapeneya pioo. Ele kule kodou oa toko ago odenemeka one eni pupu wida wa tikile
toamoo. Ni kue makai wane wekotoa witi ku kugutukama pokome okamo padameka wa
yatekile toamoi.
23
Widapa padameka labo toele wa udukakile toamoi. Widapa padane atoa
motokakoi-pete ali poka atoa ni atoa motoka ali kinita wedikete okoimo padameka wa
yatekile toamoi. Widapa topo lene kianeya mekoi yename eya kuya topo toa kakilepa ete
yene peya moa patukoa tokoi. Ete take pitikoi peya neke peku lawetekilepa nakeneya tomo
ulo enika eni poanele toa etepea pomotoa oa yotokoa toka.
24
Akolaliyo Babilone ta kibu motokakilepa eni take onekemo to awea akane yeneka
one takoa motane yeneka kini kamate ponomotoa wia tukakoinake toka. Nipa ta piko peya
wia tukane yene wia tukakala tokoinake kibu motokaka.
<<
18 18
>>
<<
19 19
>>
19
Ali Atoa Peya Mati A Tibuke
Kakete Wedikete Akenemo
1
Nititikaneyake yatekolu a tibu ali atoata kakoi matiyame agale ka ua akene tetepo
tokale yatekou. Eya wa kabunu koukakete okoi. Ali atoa toa motikilepa Akolali oneme-kama
toko. Pa tikilepa oneke-kama titia toko. Onepa telekole-kama toko. Onepa dikane agono,
one kei piatoe.
2
Akolaliyo ali atoa kini koiso yatekakomepa niminimo-kama oa kiyoke-kama
takoa enoa akakala toko. Nitoapa ibini akene pamoko atoame one peku noa toati wa ta piko
peya pitikoi yene etepea pomotoa lawetekake nami wia kibu motokaka. Akolalinele takama
yakoi yene wia tukakala tokakeka kibu motokaka wa okoi.
3
Eya waka kayo telo oa kakoi.
Einatoa toeme nokoa kakata lodo ka ua-kala kama pokono, Akolali kei piato wa okoi.
4
Nimo okoli eina ada ali-kiti pagini kakoa (24) ni lene kaatapeane tuyonoya-mene kime eya
tokoi. Akolali ako tobou ago meateka walaike mekata aua pitakete one kei pikete ekete e e
nimini, Akolali kei piato wa okoi.
Sipi Sipi Tineyo Atoa Moatekake Akenemo
5
Nimo okoli ako tobou ago meateka walai agale ludu nokome okome tone Akolaline
pupu-kama takoa oneke nate wene pianeya mea tiki-kiti ibini akene yeneka ibini wamene
yeneka kiwi peyame one kei piamene wa oka.
6
Nitikale yatekolu ali atoata kakoi matiyame
agale ikilepa ue u u wa kaugome oa tono bu wa wia tou toa eya wa telo oa kakoli yatekou.
Tone Ali Muno Akolali telekole-kama toko agome talo toa-kala kama pokono, one kei pia
7
ke wa kolotine meato. Sipi Sipi Kai Tineyo one atoa moateko oi ponokolo tokome one
atoa oneke poademe kaloa nodokakoa kako.
8
I atoa i mamina neme moa kamene wa
padame ake tootapeneya yati yati tane mamina abe kawameneya moa meteka. (Ake
tootapeane maminapa Akolaline ali atoame kiyo akenele toma yakile adeka pikoya.)
9
Nitikale edelo agome eya wa no-pala oka. Imopa wia mekamene. Akolaliyo Sipi Sipi Kai
Tinane atoa motokaka-pete kini toge kikakakuno, noe wa kayo oa motoka yene kolotine
meoi wa oka. Nitoa lokakome okome ipa Akolaliyo nimini oka agale uku wa oka.
10
Nimo okale kei piadene one kawane auane pitakolu okome nopa neke yagono
agono, toamea. Neke oya-lawe Yesunomo yakoa motiki yene kiwi-pala kibutuane Yesunole
takama yaku agome uku. No pade kei pia kowitamoano, Akolali-kama kei pia kowitamene.
Yesunomo to awea akakilepa nipa papete Epetane Yominiyo Akolaline agale to awea akane
ali-kiti wene taka taka tokana toa to awea akako.
Ake Tane Osi Kai Patu Mekagoke Akenemo
11
Wa enekolu a tibu kago ketepono peaneya pikale enekou. Kago ludu ake tane osi kai
pade witia noka. One patu mea noka agopa one ibinita takuta eya wa akeneya. Dikou wa
oka toa-kama toko ago wa ibini oa niminile-kama toko ago waka ibini oa taneya. Ni agome
ali atoa takoa enoa akakilepa kiyoke-kama toko. Poi kamotokakilepa nika kiyoke-kama
toko.
12
Ni ago one lenetapa toe itipono keneya akeneya. One wagokepa ako tobou agome
watekoya nunagu-kiti watekolokaneya. One kepenekepa ibini pade wia mekaneya. Ete-
kitame one ibinipa i wa wene tikiya mena. Pinali one odene wene toko.
13
One tokoo kakene
maminapa kamate pageneya. One ibinipa Akolaline Agale.
14
Einago osi kai patu mea
pokaka tibu poyo yatene-kiti ake tane osi kai patu mea litima pokoi. Nipa ake taneya yati
yati tane mamina abe kawamene mamina kakeneya litima pokoi.
15
Einagono kimane keneke
eka okata olo kakene tue witoa noka. E ku yatene wia tukateka tue eni witoa noka. Eni
tueme e ku yatene-pala poi toa kawa moa kawikatekoa kapa iti moa tapia talo toa-kala
kawoo. Nipa telekole-kama toko ago Akolaliyo kiwi kotimi yotokome toatekale enoe wa eni
yenepa gerepi po ku kagono waneke kautoa tiou toa keneya moa kautoo.
16
Einagono tokoo
kakene maminakeka one manakeka eya ibinita takuta ako odene tobou ago ako odene Ali
Muno wa wia mekaneya piko.
17
Eyaka enekou. Pade edelo ago lou patu kakome a tibu tiginike pukaneya yakoi ini
yatene peya-pala kayo telo okome okome Akolaliyo toge mati kikakakono, koukoa noe.
18
Ali atoa lukoa meki tobou ali-kitika poyo yatene ako tobou ali-kitika telekole toma yaki
ali-kitika osi kai-kitika eni osi kai patu mea piki-kitika ali atoa peya ta pine yeneka kueme
topo toa moa egetane yeneka ibini akene yeneka ibini wamene yeneka enika eni yene
witaneyata kolokono, kini melepu noatino noe wa kayo oa kaka.
19
Nimo okale yatekene enekolu eina yo tane kai keneya agoka ta piko peya ako tobou
meane ali-kitika kini poyo yatene-kitika poi kibutua nokoli enekou. Osi kai patu mea poka
ago-pala one poyo yatene-palaka poi toadete ni kibutua nokoi.
20
Nitoa kibutua poi tokoli o
yename ete wa poi toa kawa moa patukakete yo tane kai keneya ago-pala one kapene agale
to awea akanagota dekoa motokoi. Eni kapene agopa papete yo tane kai keneya ago patu
kautakoa kakome ele kule telekole toma yakeneya. Nitikomepa yo tane kai keneya agono
adeka tiginike wia mekoa one yomini kowitoa tokoi yene oa yotokakala taneya. Einagota yo
tane kai keneya ago-pala kapene yokakagota o yename dekoa mootokoa toe mine salepa
kue itipono oa kakeneta moa pitikakoi.
21
Einagotake lukoa mea poi tokoi yeneka osi kai
patu mea pokagome wia tukatapeka. Nipa eka okata olo kakeneya one kimane keneke witoa
nekene tueme wia tukatapeka. Eina witaneyata kolokoita ini yatene pitoa note kini melepu
noa makapea tagakoi.
<<
19 19
>>
<<
20 20
>>
20
Setanu 1,000 Mali Ponoka Toa
Koa Keneke Moa Pitikaneya Meatekamo
1
Wa enekolu edelo ago pade a tibu kawa nokale enekou. Nipa eina ge yo nine piane
koa kago ketepono kii-pala tele tane kapa poota pikoa kakeneya nokale enekou.
2
Nokomepa eina pukupuku dekoa motoka. Koto mati kaya wa akene pukupukuke uku.
One ibinitapa tobou ipono wa oa Setanu wa oa taneya. Ni ago dekoa motokomepa mali ege
kadukaka kapidime kakoa (1,000) ponoka toa wida mea-kala kamene wa togototokoa
3
ge yo nine piane koa keneke pitikoa loko pitikaka. Mali ege kadukaka kapidime kakoa
(1,000) ponoka toa ali atoa wa oa yotokamomotoa nitika. One eida mea togateka oi
ponokalepa pa tekei ya ya toano pa wa padame po kotokoa wetekoo.
4
Wa enekolu ako tobou ali-kiti meatekoi walai-kiti enoane ni Akolali patu kautakoa
kakete ali atoa takoa enemotoa moa kakane yene eni walai-kitike witipitoa mekoli enoane
tokou. Yesunomo oa aua yawa Akolaline agale to awea akoa tokoike kabe teigane yenane
yomini-kitika enekou. Eina yo tane kai keneya agono yomini latia kakaneya wane kei pia
kowitamoa kini pono yonokeka one adeka wia mekamene kote tokale wakoi yenane yomini-
kitike uku. E yene kamomotekete potepa mali ege kadukaka kapidime kakoa (1,000)
ponoka toa Keraisu-pala itono talo toa-kala kakoi.
5
Akolaliyo ete yenepa mali ege kadukaka
kapidime kadukoa (1,000) ponokale moa kamotokatekoyake o yene namolo takoa moa
kamotokaka.
6
Tuaneyake namolo kamoa poatekoi yenepa Akolaliyo pewe wedoa witikale
kolotine meoi. Ali atoa taku takoa tuatekoi-pete o yene-pala padele toameneya Akolali
Keraisutake lodo you toa kinikile takama poi. Nipa mali ege kadukaka kapidime kadukoa
(1,000) ponoka toa Keraisu-pala itono talo toa-kala kawei.
Akolaliyo Setanu Moa Kawikatekamo
7
Mali ege kadukaka kapidime kadukoa (1,000) ponokalepa Setanu koa keneke moa
pitikaneya mekata tewitikoa poo. Padame po kotokoa wetekakale poo.
8
Nitoa ta piko peya
pitikoi yene oa yotokademe pokome Akolali-pala poi tatoe wa poi kamotokama yawoo.
Nipa Goko Megoketa wa ibini akene pitikali poi kamotokakale kusa ue kibi keneya ege
egeta wa-kala kadukoa one-pala kibutua poi topoi.
9
Nitoa itono ludu kawa pitikoa
pupitikama peketepa Akolaline ali atoa poi pawe kago oboa mekoita one kolotini ta unukoa
meetapeoi. Nitoa unukoa mekoika a tibu toe pitakome yoa tukatapeo.
10
Nitikalepa kiwi oa
yotokaka ago Setanu Akolaliyo dekoa moa salepa kue itipono okoa kakene mineke pitikoo.
Eina yo tane keneya ago-pala one kapene agale to awea akane agota moa pitikaneya mekoita
eni pitikakale kimename eida-kama tete ete pia oto pia moa-kala kawei.
11
Wa enekolu ako tobou ago meateka walai uoya ake tootapeane walai enoane ni eni
walaike meka agoka enoane tokou. One mekakoa tibu itonota takoa pootapekale padameka
wa enekile toamokoi.
12
Wa enekolu tuane ali atoapa ibini akene yene ponopene yeneka one
mekata lene timini takoa kakoli enekou. Nitoa kakoli boku pade-kiti moa leweaneya. Boku
pade meemoa poatiki yene i i wa wia mekapiane bokuka moa leweaneya. Nitaneyake tuane
ali atoa itonoke mekete tanemo i i wa eina bokuke wia mekane toa takoa enekala taneya.
13
Nipetepa kusa ue nakoa tuane yeneka oloyo tane yeneka tuane ali atoa pote mekoi take
mekoi yeneka kamomotekete Akolali mekata pote kaatapekoi. Nitikoli Akolaliyopa kini
itonoke mekete tokoina toa takoa enoa akakala toka.
14
Nitaneyake ali atoa tumotoa
tokoyaka ali atoa tua pote mekoi taaka moa toe mine pitikaneya. Eni toe minepa ali atoa
taku takoa tuadete poatiki ta wa ibini ikiya.
15
Meemoa poatiki-kiti i i wa wia mekapiane
bokuke ibini katekoa wia mekamene yene peya eni toe mine moa pitikaneya.
<<
20 20
>>
<<
21 21
>>
21
Weneya Tibu Itonotake Oa Pianemo
1
Wa enekolu weneya tibu itonota latianeya pikale enekou. Eina namolo tibu itonota
takoa pootapeadeka. Namolo kusa ue mekoyaka meameadeka.
2
Eyaka enekou. Akolaliyo
one wa weneya latiane Yerusaleme taapa Akolali mekata a tibu pia ketipea noademe nokale
enekou. Nipa ali poateka atoa kalotokou toa kalaneya tukaketikakale enekou.
3
Nitoane
yatekolu ako tobou ago meateka walaike agale ludu eya wa telo okale yatekou. Akolali
meko yapu wida kakono, Akolali ali atoa kipala wida odeneka mekono, enoe. Kipa one
yatene wa kipala opia mekilepa onepa kini Akolali wa oa meoo.
4
Nitoa mekomepa kini
komo kogatapeoo. Nipete kipa wa tuamoa tumai meamoa komo wamoa tete moamoa toi.
Eina namolole peya takoa pootapeneya tokolo wa edikoa meamoi wa oka.
5
Nimo okale ako tobou ago meateka walaike meka agome okome okome opi padeya
padeya peya weneya-kama latikala tuku wa oka. Eya waka oka. Nepala i ukumopa etene
niminimo-kama ukuno, bokuke wia mekoano ta wa oka.
6
Nimo ootokoa okome wipitiane
toatekule opi taatekoane tuku. Padeya padeya peyapa anume-kama titiane toane anume-
kama wipitiane toane tuku. Ue nodome tuki-kiti meemoa pomotoa ue lene togotapa ue
nomoane meou. Nipa nami kakamekene pa nomoane mekala tou.
7
Poi toa kawa moa
patukaki yene edikoane epetanele yameou. Dikakagopa one Akolali mekene talo toane
meou. Onepa anu manago meoo.
8
Nimo ukuyake eya yene kini kepene mama moa piti
taneya mea ni nooke wene tugoa meake wawa ni ele kule poanele toa ni ali atoa wia tukoa ni
mone koua piamatiki atoa-pala koua pia ni nakeneya moa wia ni ulo toa wia ni kini yoname
latikoinakeya-kiti kowitoa ni kapene yokoa tiki peyapa salepa kue itipono okoa kakene toe
mineke moa pitikaneya meoi. Eni tukilepa taku takoa toi.
Weneya Yerusaleme Taake Oa Pianemo
9
Eya edelo ago tatono kakoa (7) wipitia ke enekatekoya-kiti kapetekane mete tatono
kakoa (7) tatite toa pikoa kakoi edelo ali-kiti padame no mekouta nokome okome ali poka
atoa Sipi Sipi Kai Tinane natono yameouno, noo wa oka.
10
Nitoapa Epetane Yomini nooke
awinome aua pome tono kakene matike kakapokome Akolaliyo one wa latiane Yerusaleme
taapa one mekata a tibu pia ketipea noademe nokale yameteka.
11
Akolaline pa takaloganeya
ketipea nikilepa nipa kamo kue diyasipa wa akene kue wane tou toa keneya pa pa
tootapeneya ketipea noka.
12
Kue pawe kago uo mati ka wa unukatapeneya. Kago-kitika tuku
kakoa (12) pikoa unukaneya. Kago pikane toa edelo ali tuku kakoa (12) kaate taneya. Eni
kago-kitikepa Iserele yatene tuku kakoa (12) ibini tatimo tatimo toa wia mekaneya.
13
Eni
kago-kitipa lou witia noka lonoka lou pipoko lonoka eka lonoka kuka lonoka tebolo tebolo
wa pikakala taneya.
14
Kue pawe kago kagilepa kue yaupea petene mati tuku kakoa (12) moa
tatia Sipi Sipi Kai Tinane Aposelo ali tuku kakoa (12) ibini tatimo tatimo toa wia mekoa
taneya.
15
Nopala agale eni oa kaka edelo agome golo kueme latiane iti pikoa kaka. Nipa
weneya Yerusaleme ta ni eni ta ka wa unukatapeane pawe ni kago-kiti adeka moma poateka
iti eni pikoa kaka.
16
Eni ta latikilepa kolodo tuyono pikoa latianeya. Nipa lou witia noka
lono lou pipoko lono eka lono kuka lonoka odene kotu kakoa-kama latianeya. Yerusaleme
taapa edikoa latia yapu wima pekene toa itime adeka moma pokomepa kolodota pake-kama
kilomita ege kadukaka padeka tatigime kadukoa (2,400) tadeka. Ate wima pekene toa adeka
moma pokomepa ludukiyaka kilomita 2,400 tadeka.
17
Kue pawe kago kagete atepea
kibutawineya pekene toa itime ate toa adeka moma pokomepa ludukiya 144 mita tadeka.
Padeya padeya pia kawa tokoya adeka moma pikilepa kini tanele tekete eniya itime-kama
adeka moma pikiya.
18
Kue pawe kago atepea wia kibutuma pikilepa diyasipa, wa akene kamo kueme-kama
wianeya. Yapu wikilepa nipa doo eya takoa pomotoa toele yotane golo kueme-kama
wianeya. Golo kueme wianeyake pa pa tootapeane gilasi keneya.
19
Kue pawe kago kagilepa
kue yaupea petene mati moa tatilogoa eniya patu atepea kibutua ka ma pekeneya. Kue
yaupea petene eni moapa eya kuya kamo kue moa kalotokaneya. Eni kamo kuepa eya.
Namolopa diyasipa, taku takoapa sapaia tubo keneya. Tebolo takoapa agesi, ake
tootapeneya. Tuyono takoapa emerale, ke tata tigini keneya.
20
Ko kakoapa sadonikisi, ake
tane kiane teke teke tane kue. Ko melepu takoapa koniliame, kiane kue. Tatono kakoapa
kerisolaisi, kakai pagene kue. Ketepo kakoapa berili, tai yabunu pagene keneya kue. Pogi
kakoapa topasi, padeya kakai pagene kue. Noi kakoapa kerisoperesi, kakai pagene kanu
pagene teke teke tane kue. Tuku melepu kakoapa aiasine, padeya tubo keneya kue. Tuku
kakoapa ametisi, kudulu pagene keneya. Kue pawe kagilepa enika eni kue moa tatilogoa
eniya patu atepea kibutua ka ma pekeneya.
21
Kago tuku (12) kakoapa yadi yadi tootapeane
kamo pilume-kama latianeya. Eniya wane odene odene-wame kago latikala taneya. Ka-kitika
doo eya takoa pomotoa toele yotane golo kueme latianeya. Golo kueme latianeyake pa pa
tootapeane gilasi keneya.
22
Weneya Yerusaleme ta keneke tobou losu yapu kawameadeka. Eni ta keneke eya
agota Ali Muno telekole-kama toko ago Akolali-pala Sipi Sipi Kai Tineta eida-kama mekino,
losu yapu wiatikile piamoko.
23
Eni taapa loumeka tokenemeka pa takateko toa mena.
Akolali one pa me-kama pa takalogakoya. Sipi Sipi Kai Tinepa labo tetepo takatekoa meko.
24
Eni taake witaka pa kenekepa ta piko peya pitikoi yene yamele too. Kini ako tobou
mekoi-kitame kini kamoya aua pato wa eni take aua pokala toi.
25
Ete pia oto pia eni ta
kago-kiti peaneya-kama pioo. Eida ta likileka toamokale tokome kago ketekileka toamoi.
26
Eni taake-kama ta piko peya pitikoi yatene-kitame kini kamoya eya kuya epetaneya aua
pokala toi.
27
Padeya poaneyaka eida lobutukile toamoo. Ya tanele toa oa yotokoa toka
agoka lobutua pamele toamoo. Meemoa poatiki yene i i wa Sipi Sipi Kai Tinane bokuke
ibini wia mekapiane yene odene eida lobutua pamele too.
<<
21 21
>>
<<
22 22
>>
22
Ali Atoa Meemoa Pomotoa Toko Ue
1
Eina edelo agome iyapa ena wa ali atoa meemoa pomotoa toko ue yameteka. Eni
uepa eteki eteki tane kue keneya yoa kakilepa Akolali Sipi Sipi Kai Tineta talo toata mekoi
walai keneke ue lene to a
2
eni tube ta keneke piko polo ka ludu yoa kako. Eka oka matanu
ludu ali atoa meemoa pomotoa toko yomo kaatapeko. Eni yomo malike-kama ku tukilepa
tuku (12) kakoa-peta tukala toko. Nipa tokeneke-kama ku tukala toko. Eni yomo tatamepa e
ku yatene yene toameneya memotoa toko.
3
Ipa poaneya wa Akolaliyo kekaneya latikoa
wakeneya odeneyaka eida piamoko. Eni ta keneke Akolali Sipi Sipi Kai Tinetame talo toata
mekoi walaipa pa pia-kala kawoo. Eidapa one pupu yename one kei pia kowitoi.
4
One lene
timinika enoa toi. Akolaline ibini kini ponoke wia mekaneya meoi.
5
Eidapa ta wa likile
toamoo. Kini Ali Muno Akolaliyo-kama kiwi mekoita pa takalogakale tokome labo udukoa
lou pa witoa toatekale piamoo. Eidapa ako tobou yene mekete eya kuya peya talo toa-kala
kama poi.
6
Edelo agome no-pala eya waka oka. Wini bokuke wia mekakamopa etene niminimo.
Eni peya taatekoa tootapeoo. Ali Muno Akolaliyo one edelo ago pa wa wetekakilepa ele
kule pene toatekole i i wa one pupu yene wene takamotoa toka. One agale papete to awea
akane ali-kiti wene takaka ago Akolaliyo nitika wa edelo agome oka.
Yesu Wakapea Noatekole
7
Kipala i ukumo yakoe wa Yesuyo oko. No wakapeane noateku tigotoko. I bokuke i i
wa papete wia mekapianemo yakoa motiki yene kolotine meoi.
8
Yone nopa i mekene uku. I bokuke wia mekapiane toane-kama anu kaleme yakoane
leneme enoane tokou. Nititikoanepa i i wa enika enile yameteka edelo ago kei piane
kowitadene one kawane keneke pitalogakou.
9
Nitikolu okome noka Akolalinele takaku
agono, toamea. Onekele takakilepa nipa neke oya-lawe Akolaline agale to awea akaki yene ni
i bokuke wia mekanemo yakoa motiki yene kiwi peya-pala kibutuane onekele takakuno, no
kei pia kowitamoano, Akolali-kama kei pia kowitamene.
10
Nimo ootokoa kakome okome wini boku i i wa wia mekapikana boku poome
togotameamene. Wini wia mekapikana toa taatekoa toateko tigotokolo tekene ni uku.
11
Poanele tiki yene kini poanele pa toma poati. Ele kule ya tanele tiki yene kini ya tanele pa
toma poati. Kiyo akenele tiki yene kiyo akenele toma poati. Akolalinele-kama takaki yene
onekele-kama takama poati wane uku.
12
Kipala i ukumo yakoe. No wakapeane noateku tigotoko. Kini kini toma yakoina
toane topo takoane meatekuya-pala auane nouno, nepiamene-ye.
13
Padele padele peya
anume-kama titiane toane anume-kama wipitiane toane tuku. Padele padele titikileka padele
padele wipitikileka no patu-kama toko.
14
Kini mamina abe ko otapekoi yene kolotine meoi. Mamina abe ko otapeketepa nipa
meemoa poatiki yomo ku oyake kotia namele too. Nika kago pikoka patukoa weneya
Yerusaleme ta keneke lobutua pamele too.
15
Kago pikoka patukoa pikilepa nipa eya yene
akolono pa memotoa poi. Ya tanele toa tomo lawetoa ulo toa nakeneya moa wia pamoko
atoa koua pia ali wia tukoa kini yoname latikoinakeya kowitoa ete yene-pala kapene wakoa
oa yotokoa tiki yene akolono pa memotoa patukoa poi.
16
No Yesuyo anu edelo ago kiwike moane wetekakilepa anu losu yatene tatono kakoa
(7) meki toa i i wa to awea akatekomo akoano pa wane wetekakou. Nopa Depidi-loeke
tagene agome uku. Nopa pa wedoa toko tagoi kobu tagoi wa ibini ikiya.
17
Epetane Yominiyoka Yesuke poateko atoameka namene wa iki. Ina ukumo yatekoi
peyameka namene wa amediki. Ue nodome tuaneya meki yenameka namene wa amediki.
Meemoane poateku ue nomoane nou wa wene piki yename ue pa nomoa nomotoane
ukuno, nami tukuamatiki ue nomoa namene.
18
I bokuke wiane mekapikumo yakoa motiki yene-pala no Yoneyo eya wane pubu
ukuno, yakamene. Panagome-kiti i wiane mekapikumo pakeke one wene kibutua oka agale
lukakalepa Akolaliyo one-pala eya topo takoa too. I bokuke wia mekapiane toa taatekoa ke
enekakole-kiti einagome enemotoa too.
19
Nika panagome-kiti i bokuke wiane mekapikumo
pademo katekoa wakalepa Akolaliyo eya topo takoa too. I bokuke wiane mekapikule
taatekoa tokalepa meemoa poateko yomo ku i ago ne namele toamoko wa ka ketekoo.
Nitikale Akolaliyo one wa latiane take lobutua pamele toamokale einago etepea poo.
20
Kipala i to awea akako agomepa ipa nimini taatekoa toatekomo uku wa ikilepa eya
waka oko. One wakapeane noateku tigotoko wa oko.
E e nimini. Ali Muno Yesu nitoano ta. Wete namene-ye.
21
Ali Muno Yesuyo kiwi peya pewe wia yopimotoane uku-ye. E e nimini.
<<
22 22
>>
Lomane
00
11
22
33
44
55
66
77
88
99
10 10
11 11
12 12
13 13
14 14
15 15
16 16
Lomane Lomane
<<
00
>>
^
Lomane
Polo Lome Take Poateka Wene Pianemo
Akolali Ali Atoa-pala
Kotimi Yoa Mekomo
Yu Yene Mosesene Totonoke Lukoa Meanemo
Kiyo Akenele-kama Toko Ago
Odeneka Meamoko
Akolaliyo Ali Atoame Poanele Toameneya
Meane Tetepo Takoa Wene Keaneya Mekomo
Eberame Akolalike Wene Tuganeleke
Poanele Toamene Ago Tetepo Takanemo
Akolaliyo Dikou Wa Oa Piane Toa Tokome
Oneke Wene Tugaki-kiti Auapekomo
Akolaliyo Ali Atoa Toa Motikilepa
Kini Yesuke Wene Tugakileke Toko
Poloyo Eyagota AdamKeraisutake Akenemo
Tone Keraisu-pala Lipuaneya Mea Tukomo
Adona Mekete Toatiki Adeka Pianemo
Tone Toko Poaneleme Toto Moa Koigako
Tone Tepene Kako Poi Tokomo
Epetane Yomini Totoke Awinome Mekilepa
Meemoa Pomotoa Tokomo
Wipitikete Mea Epetekatekomo
Keraisuyo Taneleke Akolaliyo Totopa
One Kolotini Yene Wa Yopia Mekomo
Poloyo Iserele Yene Mama Motanemo
Akolaliyo Pade Ali Atoa Kote Motokome
Wa Pade Ali Atoa Ela Motokome Tokomo
Iserele Yename Yesunomo Wakenemo
Akolaliyo Iserele Yatene Mama Motanemo
Akolaliyo Ali Atoa Peya Ela Motokomo
Ali Atoame Akolali Kei Pikete Oatikimo
Akolalike Padeya Mea Lodo You Toa
Yono Kawa Eyame Onekele Takama Yamene
Ta Talo Tiki Ali-kitike Lukoa Meatekomo
Ali Atoake Wene Mekoa Mekete Toatekomo
Yesunomo Wedoa Yakoa Moamoko Ago
Ela Motekete Toatekomo
Eko Ali Atoane Wene Moa Auapeamene
Poloyo Yesunole Takakome Tanemo
Polo Lome Take Ugu Poateka Wene Pianemo
Poloyo Agale Lionate Akenemo
Poloyo Akolali Kei Pikome Akenemo
Lomane Lomane
<<
00
>>
Lomane Lomane
<<
11
>>
LOMANE
Poloyo Lome Yeneke Wia Wetekane Pipia
1
1
Polo nopa Keraisu Yesunole-kama takama yaku ago mekene uku. Akolaliyo ali
atoane wene epetekakomopa one agale patu kautakoane kakene oane auane yamotoa
tokome nopa one wa kayo oa motoka tokolo ni uku.
2
Enimopa Akolaliyo kiwi yatene auapekene dikou wa one agale to awea akane ali-kiti
namolo namolo papete wene taka taka tokale one bokuke wia mekama-kala nekeneya.
3-
4
Eni epetane ko ikilepa tone Ali Muno Yesu Keraisu ko uku. Einagopa ali latia nikilepa
Depidi-loeke ta wa nekeneya. One yomini-pala mekome epetekoa-kama tikilepa Akolaline
mana tokome taneya. Nome mea tua pokale Akolaliyo moa kamotokakilepa i agopa one
manago one tele patu kautakoa mea kakono wene tamene wa taneya.
5
Kipa one Aposelo
ali-kiti meamene wa toto pewe witikome takoa motikilepa Yesu einagome taneleke toka.
Nipa e ku yatename Yesunomo yakoa mootokoa oneme tamene wa akene toa litia toa one
kei pia tomotoa tokome toka.
6
Wini Lome take meki yene kiwi padeka-kitika Akolaliyo one
wa takoa motaneya. Nipa Yesuke lukoa memotoa tokome taneya.
7
I agale wiane mekakilepa wini Lome take meaneya Akolaliyo kipa one kolotini yene
wa takoa motane-kitike wetekou wane tuku. Kini kowitikakilepa eni yene pewe wia kilikoa
memotono toe wane toneketai Akolali tone Ali Muno Yesu Keraisuta kowitikaku-ye.
Polo Lome Take Poateka Wene Pianemo
8
I pipia titiane wiane mekakenepa Yesu Keraisu patu kautakoane kakene Akolali-pala
ke wane uku. Kiwi peyake ke wane ikilepa kini Yesuke wene tugoa mekete tikimo ta piko
peyake meki-kitame yakatapeadikili tekene ni uku.
9
Akolaline leneke kakene eya wane uku.
One kowitikene-kama kiwi wene taneya kowitikoane uku. Nipa onekele wedoane takama
yawou wane one manake epetekoa akene agale oane mema yakene uku.
10
Nitoane Akolali
kowitikenepa no Lome takeka moa wetekateko wene pikepa moa wetekoa ta wane one
kowitoane okala tuku-ye.
11
Epetane Yominiyo no wene takaka toane kiwika olaukadene
tekene kiwi enadiya wane kowitoane uku. Kipa one tele patu kautakoa kama pomotoane
tekene ni uku.
12
Nipa tone Yesuke wene tugoa mekete tokomo yakaate toa mape
wiitakutukoa meatoane ekene uku.
13
Anu oya-lawe eya wa wene taneya meamene.
Yesunomopa ete pa yatene-kiti pitikoi toane oane mema yakolu padeka-kitame yakoa
motokoi toa wini Lome takeka kime yakoa momotoane tou wane lugutukoane noadene
tokala tokou. Nitikala tokouyake papukamokale wete noamokou.
14
Geriki agale yakoa iki
yene ni Geriki agale yakamene yene ni wene meameane yene ni wene muno meane yene
enika eni yene peyame yakamotoane tekene Yesunomo ta piko peyake to aweane oma
pamedeku.
15
Nitamedekuno, wini Lome ta ludu kiwi mekika tugatekoane Yesunomo oane
meadiya wane wene piane mekene uku.
16
Yesunomo to aweane amene ya toamokolo meku. Onekemo yakoa motiki peyapa
Akolaliyo telekole tokome toa mokala toko. Ete pa yatene naniko toa moademe Yu yene
namolo takoa toa motokono, one eni tokomo edoane amene ya momotoa-pe.
17
Akolaliyo
ali atoapa poanele toamene yene tetepo takoa toa motikilepa pa kini Yesuke wene tugakileke
ni toko. One eni toko ko ikilepa Yesunomo to aweane uku. Enilekepa one bokuke eya wa
wia mekaneya piko. Akolaliyo poanele toamene tetepo takane yene meemoa pikilepa
titiketeka wipitiketeka oneke wene tugoa mekete tekete nitoi.
Akolali Ali Atoa-pala
Kotimi Yoa Mekomo
18
Akolaliyo a tibu mekome enekolo one nimini agalepa ele kule poanele toa kaukoa
agopa takatapeki yename onekele takamoa poanele-kama tikili enekome kotimi yoa meko.
19
Nipa one kakome tokole wene toatiki toa padeya padeya kiwi pakeke keleyo witakakala
tokoyake paya nou toa poanele pa toma yakili tokome kotimi yoa meko.
20
One kakome
tokole kini leneme enamele toamokoyake itono tibuta latia piane-peteka opika one latia
pianeya-kiti leneme keleyo enamele toko. Keleyo enekete tekete one tele taneya meemoa
pokona, Akolali wa amele toko wa amediki. Akolali kawamoko wa edoa omotoa-pe.
21
Akolali onepa dikane ago wa wene taneya meketeke one kei piatiki toa kei piamoa ke wa
wamoa tokoi. Nitoapa kini wenepa bebo akatapea yomiyomume agopa takatapea taneya
mekoi.
22
Nipa wene muno kakeneya meku wa oake kaua kaloa kakete tokoi.
23
Nitoapa pa
tootapeneya meemoa poko Akolali kowitoake wakete kini yoname latikoinakeya-kiti
kowitoai tokoi. Nipa eya adeka ali ini kai kaya enika eni yomini latia kakoa etepea kowitima
pokoi.
24
Nikepa ele kule poanele touno wene pikoile pa toma pomotoa Akolaliyo
wakeneya. Nipa pamoko mea kini kini tigini toa potokatakutukakete ya tanele toma-kala
pomotoa wakeneya.
25
Nitane yename Akolalinemo ete pimotoa wawa kapene peku noai
taneya. Nitoapa padeya padeya peya latia piane ago Akolali kowitamoa onekele takamoa
tekete one latia pianeya-kiti adeka pia yomini latia kakoa kowitima nekeneya. Nitaneyake ali
atoa toto peyame one kei enabuna pia-kala kamedeko. E e nimini.
26
Eni yename etepea poanele toma pokoike Akolaliyopa pamoko mea kini tigini toa
potokoa ya tanele toma pomotoa wakeneya. Nitikalepa kini atoameka toa potokakete
kinikane tebea piameneya atoa yatene kini kini wa kinikane latikoa tebea pikala taneya.
27
Alimeka kini atoa tebea piameneya ali yatene kini kini wa atoa latikoane tebeane piouno
wene kibutuma yakeneya. Nipa kini kini ete oto wa ya tanele tuku pekete toapa kini tiginike
wa kini tokoinakale nami wipitinokala taneya.
28
Nipa Akolali edeya weike wene taneya
meamoono, tokamotato wa paya nou toa mekoli enekomepa kini toamatekoile-kama toma
pomotoa wakeneya.
29
Nitaneyake kini tepene e ku poane wene witoa tagatapeneya mea eya
toma yakeneya. Poane peku noa toa ni padeya padeya tepi moa ni lenee pia ni epetanele
toma yakoi yene-pala poane wene pia ni ali wia tukoa ni neno-kama oa ni kapene wakoa ni
kotu kabunu kawa
30
ni akoa agale oa ni Akolali-pala kotimi yoa ni ete yene paya tetepo
takoa ni mate agale oa ni ele kule poanele titia toa ni etene ninetane agale tagoa toamoa
31
ni
ete ali atoake wene meameneya mea ni ne auapeane ile tou wa oake toamoa ni ete yene
mama moamoa ela moamoa tiki.
32
Enika enile tikileke Akolaliyo one totono litikome kibu
moa tukoono wene teketeke pa toma yaki. Nika kini eni tikina toa ete yename toma yakile
eneketepa epetanele tiki wa kei pikala tiki.
Lomane Lomane
<<
11
>>
Lomane Lomane
<<
22
>>
2
1
Anu oya enika eni poanele tikipa poanele mati eni tiki wa neme-kiti kikoa akakilepa
pinali neke wa kikoa eke toko. Nemeka enika eni poanele toma pekeke okono, pinali neke
wa kei piamele toamoko.
2
Enika eni poanele toma yaki-kitipa Akolaliyo kini tanemo pitia
yakoa kibu motikilepa kiyoke-kama tokono wene totome toko.
3
Enika eni poanele nemeka
pa toma yakeke ete yename poanele tikimo pitia yakoa to awea akakepa nipa Akolaliyo ete
yene kibu motokome nepa kibu moamoono wene pianeya meke toko-pe.
4
Akolaliyo ne
pewe-kama wia poti mama moa tokoyake one eni tokolepa neme pale tane tetepo takoa
meko patu. Nipa neke poanele tewitikoa oneke tepe kolotini pekamotoa nepia mekome
tokome ni pewe-kama wia kako wa neme wene toamoko patu.
5
Ae, oneke tepe kolotini
pekamade kolotini lupi taneya meke toko. Widikakolekepa Akolaliyo nepala kotimi yoa mea
kibu moo. Nipa ali atoa-pala kotimi yoa mea kiyoke takoa eneka-petepa nitoo.
6
Enipetepa
Akolaliyo ali atoa kini kini toma yakoileke nami wia topo takakala too.
7
Pade-kitame
epetanele toma yaketepa nipa Akolali pa tootapeneya meko toa kiwika meadiya wa wene pia
mea ni Akolaliyo kiwi kei piatekale toa enekala toa ni mea kama poatiki ka tuku tokoa kawa
tekete epetanele toma yaki. Nitiki yene-pala Akolaliyo ke wa topo takakome mea kama
pomotoa toademe toko.
8
Pade-kitame nitameneya kinikile-kama toa nimini agale
yakamadete wawa poane peku noa tikilipa nipa Akolaliyo topo takakome kotimi yoa mea
tete meademe toko.
9
Poanele toma yaki peya Akolaliyo eni tete mea ke enekoa mekakilepa
Yu yene namolo takoa ni Yu yeneke lokoa pa yatene ali atoa kikilikoa toademe toko.
10
Epetanele toma yaki peya Akolaliyo one pa tootapeneya meko toa memotoa tokome kei
pia tepe kolotini kilikoa pikoa toademe toko. Nipa Yu yatene namolo takoa ni kiwike lokoa
pa yatene ali atoa kikilikoa toademe toko.
11
Nipa Akolaliyo Yu yatene ali atoa e ku pa
yatene ali atoa takoa enoa akakilepa Yu yatene e ku pa yatene midi piitapeane tetepo takoa
toko.
12
Akolaliyopa Mosesene totono yakamene pa yatene ali atoame poanele tokoileke
nami wia kibu motikilepa nipa one totono ete pimotoa koiso akoa kibu moa atukoo. Eni
totono yametane Yu yename poanele tokoileke nami wia kibu motikilepa nipa eni totono
kime tetekadiki wa eni totono litikome koiso akoa kibu moo.
13
Akolaliyo ali atoa poanele
toamene yene tetepo takoa wene keaneya mekilepa Mosesene totono yatekoileke tokoya
mena. Eni totono litia tokoileke ni toko wane ekene uku.
14
Moseseyo one totono pa yatene
ali atoa yameameneyake padeka-kitame kini weneme epetanele toma yaki. Nipa eina totono
yakoa motane tetepo takoa tiki. Enipa kini tepeme epetekoa tamene wa oko toa tiki.
15
Ile
poanele tadeku ile epetanele tadeku wa tepeme takatakutukakono, Akolaliyo Mosesene
totono kini tepene lukane tetepo takoa tiki.
16
Akolaliyo ali atoa takoa enekilepa kini tepene
meaneya ya wa takoa enoa akakala too. Nipa Keraisu Yesu one patu kautakoa kakome
nitikamotoo. Enipa Yesunomo pine to ane oane metekuna toa too.
Yu Yene Mosesene Totonoke Lukoa Meanemo
17
Ae, anu oyago neme-kiti Yu ago kaku wa oa ni Mosesene totonoke tugoane meku
wa oa ni Akolaliyo Yu yatene-pala oya kakoa meko wa mate agale oa toko.
18
Eya waka
neme-kiti oko. Akolaliyo wene pikole wene taneya meku wa oa ni Mosesene totono
olaukaneya tekene epetanele-kama takoane tuku wa oa
19
ni leneta lianeya meki-kiti yono
moane ka yameane auane pone ni yomiyomu keneke meki-kiti pa takoane tuku wa oa
20
ni
Mosesene totonokepa Akolaliyo wene takanemo niminimo-kama kabe koukoa wia
mekaneya pikono, eni totonopa wene meamene-kiti i i wane olaukoane mati-kitika mane
mane oane tuku wa enika eni mate agale neme-kiti okala toko.
21
Ae, anu oyago ete yene
wini mane mane ekeke pinali neke wa mane mane wamokono, dekolo toko-pe. Panagoneya
kode moameamene wa mane mane ikilepa kode noake oko patu.
22
Mone padane atoa tebea
piameamene wa mane mane ikilepa padane atoa tebea piitikoake oko patu. Pa yene kini
yoname latia kakoa lodo yoa kowitikiya-kiti kote motuku wa neme ikilepa kini losu yapu
keneke pianeya-kiti kode moake oko patu.
23
Mosesene totonopa ne Yu yatename pikoa
kako wa neme-kiti mate agale ikilepa eni totono tetekama peke Akolali ya takatekoake oko
patu.
24
Nilekepa Akolaline bokuke eya wa papete wia mekaneya piko. Yu yene kini toma
pikilekepa pa yatene-kitame ekete ipa Akolaline yatenameke tikiti patu wa one ibini tema
piki.
25
Mosesene totono litia teke pene opiane matiyane kepene teigamotoa tokolopa nipa
Akolaliyo eni matipa one wa takoa motoko. Ae anu oyago nedo kepene teiganeya meake
Mosesene totono tetekakolopa nipa Akolaliyo nepa kepene teigamene ago tetepo takoa
meko.
26
Mone pa yatene agome one kepene teigameneya meake eni kiyo akene totonodo
litia tokolopa Akolaliyo einagopa kepene teigane ago tetepo takakome one yatene ago wa
takoa motoko. Enipa nimini uku-pe.
27
Nika dikane pa yatene agopa one kepene
teigameneya meake eni totono litia tokomepa ne-kiti eya wa kikoa akademe toko. Nepa
kepene teiganeya meko Yu agome eni totono bokuke wia mekaneya pikoa kakeke
tetekakala tadeko wa ne kikoa akademe toko.
28
Yu agopa one tepene paya wene pimotoake
kepene teiganeya mekomepa nipa one eni adekapa yoname pa tokoo pianeya pata pale
taneya.
29
Akolaliyo panago-kiti i agopa one nimini Yu yatene agono, one wa takoa motoko
agopa one adekapa kepene tokoo pianeya mena. One tepene pianeya. Eni adekapa Epetane
Yominiyo pianeya. Nipa Mosesene totono litia taneya mena. One eni tepene piane adekapa
ali atoame enoa kei piamikiyake Akolaliyo enoa kei piko.
Lomane Lomane
<<
22
>>
Lomane Lomane
<<
33
>>
3
1
Akolaliyo toto Yu yateneka e ku pa yateneka takoa enameneya midi piitapeane tetepo
takoa mekono, toto Yu yenepa edeya weike kepene teigako patuno, tokamota, pa meato wa
totome amele toko patu.
2
E 'e mena. Akolaliyo toto Yu yatene ele kule toa pewe wia yopia
meko. Tobou kakoa pewe eni witikomepa one agale pikoa kamene wa toto yatene takoa oa
metaneya.
3
Nitaneyake toto yatene padeka-kitame one agale yakoa moamokoi. Nitikoino,
Akolaliyo kiwi yatene auapekenepa dikou wa oa pikana toa taatekoa toamoko patu.
4
E 'e
mena. Ali peyamedo kapene wakoa okolipa Akolaliyo niminimo-kama oo. Enilekepa
Akolaline bokuke one-pala akenemo eya wa wia mekaneya piko.
Pademo pademo ikilepa niminimo-kama wini oko wa peyame oi. Peyamedo ne koiso
akoa eketepa padele padeleta neme tikilepa niminile-kama tadeko waka oi wa
padame wia mekaneya.
5
Totome poanele tikilepa Akolaliyo niminile tokole keleyo witamotoa tokono, tone eni
tokoo poaneleke Akolaliyo kibu motokomepa poanele onemeka toko wa totome amele
toko-pe. Enipa itono peku noai tiki-kiti paya nou toa mekete ikina toane uku.
6
Akolaliyo
nitikome toamoko. Akolali onedo kiyoke-kama meamokome too tokapa nipa ali atoa edoa
takoa enoa akamotoa-pe.
7
Panagome eya wa-kiti paya nou toa mekome oo. Yomiyomume
tole pa wedoa witakako toapa anu kapene wakoane uku agaleme Akolaline nimini agale
keleyo witakakala toko. Nitikolo peyame one kei pikala tikino, Akolaliyo eni kapene
wakoane uku agaleke edoa kibu momotoa-pe wa panagome-kiti oo.
8
Nimo wado ikilepa
epetanele witamotoa tekete poanele toma pato wa okome oo. Pade ali-kitamepa noanuka
enimo uku wa no akoa akedikili yateku. Dikoa kapene yokaki yene nami wia enatiki toa
Akolaliyo kibu moademe toko.
Kiyo Akenele-kama Toko Ago
Odeneka Meamoko
9
Nipa toto Yu yene mea epetekakete ete pa yatene moa patukakono, Akolaline leneke
atiki toa meamele toko wa totome mate agale amele toko patu. E 'e mena. Yu yeneka e ku pa
yateneka toto peyapa tone toko poaneleme moa labakaneya meko. Enipa kipala wete
olaukakounakamo uku.
10
Nikepa Akolaline bokuke eya wa wia mekaneya piko.
Ki yo akenele-kama toko ago odeneka meamoko.
11
Akolalinemo wene taneya meko ago
odeneka meamoko. Akolali mekota poateko ka tuku toa kako ago odeneka
meamoko.
12
Ali atoa peyame Akolali tewitikoa wakete etepea pale toma
pekeneya. Epetanele toko ago odeneka meamoko.
13
Nipa tuane ago pade
oloyo tootokoa itonome kauameneka kotimi atepea noko toa kini tomo pookepa
poanemo atepea witakala toko. Kini kekemepa ete yene oa yotokakala tiki. Kini
kabunumepa kayame tania tukou toa oa potokakala tiki.
14
Kini kabunumepa
ele kuleme ke enekakolo memotoa ete yene-pala poanemo oa kaki.
15
Lene pia
mekamotekete pitakete ete yene pa wia tukapokala tiki.
16
Padeka padeka
yaketeka ete yene tete mea ke enekakole toma yaki.
17
Tepe kolotini kilikoa
meamene agopa tokolo meki.
18
Akolali piti motikileka toamiki wa panagome
Akolaline bokuke wia mekaneya.
19
Moseseyopa ile tamene ile toameamene wa one totono yametikilepa eni totonoke
lukoa mekoi peya kikilikoa yametaneya. Nitaneyano, Akolaliyo koiso akaka-petepa poanele
padeleka toamene ago no i meku wa teyo oo tokolo-pe. Peyame one eni totono tetekakala
tiki.
20
Padameka eni totono litiane tootapekuya tekene Akolaline leneke poanele toameneya
meku wa amele toamoko. Eni totonomepa ali atoane poanele i i wa keleyo wene taka taka
tokolo tekene ni uku.
Akolaliyo Ali Atoame Poanele Toameneya
Meane Tetepo Takoa Wene Keaneya Mekomo
21
Opa eina namolo totono ete pimotoa Akolaliyo one ali atoapa poanele toamene yene
tetepo takoa wene keaneya mekome toko totono yameteko. Nipa Moseseyo one totono wia
mekakomeka ni Akolaline agale to awea akane ali-kitame kini boku wia mekaketeka i i wa
deka deka toa wia mekapiane toa opi taatekoa yameteko.
22
Akolaliyo one ali atoapa
poanele toamene yene tetepo takoa wene keaneya mekilepa pa kini Yesu Keraisuke wene
tugakileke toko. Nipa oneke wene tugoa meki peya midi piitapeane tetepo takakome toko.
23
Yu yateneka pa yatene-kitika toto peyame Akolaline totono tetekaketepa one mekome
tokole kotuke adekoa meamele toamokolo pa meko.
24
Nitikoyake Keraisu Yesuyo toto oto
toa moademe tuaneya tokolo Akolaliyo pa pewe witikome totopa poanele toamene yene
tetepo takoa wene keaneya meko.
25
Ali atoa kini poanele tokoike tua atukayano, neke
kamate ponomotoa tuamene wa Akolaliyo Keraisu Yesu moa wetekaneya. Nipa ali atoa
oneke wene tugakolipa kini poanele tokoike po letu mekakana keetapea wene keaneya
meademe tokome ni wetekaneya. Nitoapa kini tokoi poanele oneme enoa wawameneyake
one leneke poanele toameneya meane tetepo takakome tanele eni yametaneya. Papetepa ali
atoame poanele tokolika Akolaliyo tigotokoa layo wete pitikameneya.
26
Nitaneyano, opi
onepa poanele-kama kote motokago mekomeke tadeko wa totome wene tomotoa tokome
Keraisu tone tokoo poaneleke tumotoa moa wetekaneya. Opa Akolaliyo Yesuke wene
tugoa meki-kitipa poanele toamene yene tetepo takoa wene keaneya meko.
27
Akolaliyo toto toa momotoa tekete tone wa kei pia mate agale oko patu. E 'e mena.
Ni edoa-mo. Mosesene totono litiane tootapekene epetanele-kama tuku wa padameka mate
agale amele toamoko. Akolaliyo totopa poanele toamene yene tetepo takoa toa motikilepa
tone Yesuke wene tugoa mekoleke ni toko.
28
Nipa panagome-kiti Mosesene totono litia
tootapeamokomeke Yesuke wene tugakolopa Akolaliyo einagopa poanele toamene ago
tetepo takoa wene keaneya meko.
29
Akolaliyo pa yatene-kiti wawa Yu yatene takoa talo toa
meko patu. E 'e mena. Yu yateneka e ku pa yateneka toto peya Akolalike-kama lukoa meko.
30
Akolali wa oateko agopa one odene meko. Ni agomepa kepene teigane agoka kepene
teigamene agoka Yesuke wene tugakolopa poanele toamene ago tetepo takoa wene keaneya
meko.
31
Nipa Yesuke wene tugoane mekuno, Mosesene totono edeya weike litiku patuno,
tokamota wane ekene ukutu-mo. E 'e mena. Yesuke wene tugoa meketepa nipa Mosesene
totono wedoa pikoa kako.
Lomane Lomane
<<
33
>>
Lomane Lomane
<<
44
>>
4
Eberame Akolalike Wene Tuganeleke
Poanele Toamene Ago Tetepo Takanemo
1
Nipa tone kaua ago Eberameke edemo ato patu.
2
Eberameyo epetanele toma
pekenelekedo Akolaliyo onepa poanele toamene ago tetepo takoo tokapa nipa Eberame
pinali one wa kei piamele too toka. Nitoo tokake Akolaline leneke kakome pinali one wa kei
piamele toameneya.
3
Akolaline bokuke Eberameke eya wa wia mekaneya piko. Akolaliyo
tou wa ikilepa nimini taatekoa toatekomo eni oko wa Eberame Akolalike wene tugoa
meaneya. Nitaneleke Akolaliyo Eberame poanele toamene ago tetepopa ni takaneya.
4
Panagome-kiti panagono pupu takakolopa pupu pine agome topo toa kue eya ete
metekilepa iya pa puputuane ne pewe witikene meteku wa metekoya mena.
5
Akolaliyo pa
puputua pewe wiou toa tokome poanele tiki ali atoapa poanele toamene yene tetepo takoa
wene keaneya meko. Nitikono, panagome-kiti Mosesene totono litia tootapeamokomeke
Akolalike wene tugakolopa Akolaliyo one eni wene tugakoleke einagopa poanele toamene
ago tetepo takoa wene keaneya meko.
6
Mosesene totono litia tootapeamele toamokaleka
Akolaliyo poanele toamene tetepo takane agopa kolotine meatekaleke Depidiyo papete eya
wa wia mekaneya.
7
Akolaliyo kini poanele tokoike po letu mekakana kea wawa ni kini poanele moa agopa
takatapea taneya mekoi-kitipa kolotine meoi.
8
Nipa poanele toma yakaleka
Akolaliyo poanele toamene tetepo takane agopa kolotine meoo wa wia
mekapianeya.
9
Kolotine meoi wa ikilepa kepene teigane Yu yeneke odene akeneya patu. Kepene
teigamene yatene-kiti kikilikoa okome akeneya patu. Nikepa eya wane okouna. Eberame
Akolalike wene tuganeleke Akolaliyo one poanele toamene tetepopa ni takaneya.
10
Nipa
Eberame einagopa poanele toamene ago tetepo takakilepa Akolaliyo manipete titia taneya-
pe. Eberame one kepene wete teiganeya mekale titia taneya-pe. E 'e mena. One kepene wete
teigameneya pa mekale titia taneya.
11
Nititikaneyake Eberame pinali one wa kepene
teigamotaneya. Nipa one kepene wete teigameneya pa mekome Akolalike wene tugakale
Akolaliyo one poanele toamene ago tetepo takane adeka eni pianeya. Akolaliyopa naniko pa
yatene-kitika kepene wete teigameneya pa mekete oneke wene tugakoileke poanele toamene
yene tetepo takateka adeka eni dekoa piipianeya. Nitaneyano, eni yene peyane pinepa
Eberame.
12
Kepene teiganeya meki Yu yeneka kini pinepa Eberame. Eberame one kepene
wete teigameneya pa mekome Akolalinele takama yakene toa Akolalike wene tugoa meki Yu
yeneke uku.
Akolaliyo Dikou Wa Oa Piane Toa Tokome
Oneke Wene Tugaki-kiti Auapekomo
13
Oneme latiane pikou taapa nemeka neeke ta ma pokoi yenameka yopia mema
pomotoane yameou wa Akolaliyo Eberame-pala oa pianeya. Akolaliyo nimo ikilepa
Eberameyo one totono litia tokale tokome akeneya mena. Eberame oneke wene tugoa
mekale tokome ni akeneya. Nipa Akolaliyo Eberame poanele toameneya meane ago tetepo
takakome tokome ni akeneya.
14
Akolaliyo nitameneya eina papete oa pikana toa taatekoa
tokome kini totono litia tiki-kitido one mana kono-mikiti latikoa auapekome too tokapa
Akolalike wene tugakilepa edeya weike toko-pe wa totome oatekole pioo toka. Ni Akolaliyo
dikou wa Eberame-pala eina oa pikilepa pata pamo eni akedeko waka oatekole pioo toka.
15
Nitoo tokake padameka kini totono oyake litia tootapeamele toamokono, Akolaliyo
kotimi yoa mea kibu moo. Ae, kini litia toatiki totonodo piamokolopa Akolaliyo ali atoa kini
totono tetekakala tiki wa akamele toamoko.
16
Akolaliyo one papete oa pikana toa taatekoa tikilepa ali atoa oneke wene tugakileke
toko. Kini totono litia tikileke tokoya mena. Ali atoa auapekilepa pa pewe witikene tou wa
wene toopikana toa toko. Ni Eberameke tagoi yene peya auapeou wa wene toopikana toa
toko. Nitikome Mosesene totono litia tiki Yu yene takoa auapekoya mena. Eberame tane
toa oneke wene tugoa meki pa yeneka pa pewe witikome auapeko. Nitikono, toto peyapa
Eberamene mana kono-mikiti wane uku.
17
E ku yatene opia tagateko ago ne moane latikuna
wa Akolaline bokuke wia mekaneya pikono, Akolaliyo Eberame einagopa toto peyane kaua
ago tetepo takoa meko. Eberame wene tugoa meane ago Akolaliyopa tuane ali atoa moa
kamotokoa ni eya kuya wete witamene-kiti witamotoa kayo oa toko.
18
Akolaliyo dikou wa
oa pikana toapa edoa taatekoa tamele toko patu wa Eberameyo oake poti nepia meaneyano,
Akolaliyo e ku yatene peya mati Eberameke ta ma nekene tetepo takoa meko. Nipa neeke
ta ma pokoi yenepa tagoi keneya aloa tagatapeoi wa oa pikana toa taatekoa toko.
19
Eberame einagopa mali ege takupeta kadukoa (100) tadiya ponokale koto kawane kaku
ago tuadene meku wa wamoa ni tiobatoa Sera atue deya tokome one mati opikamele
toamoko wa wamoa tokome Akolalike wene tugoa meaneya.
20
Nipa poome toameneya
nepia mekilepa Akolaliyo oa pikana toa taatekoa toamoko patu wa wameneya one taatekoa
toatekale pa nepia meaneya. Nitoapa Akolalike-kama wene wedoa tugoa mea one kei pia
taneya.
21
Nipa Akolaliyo tou wa oa pikana toa taatekoa tamele toko wa wene taneya
meaneya.
22
One eni wene tuganelekepa Akolaliyo Eberame einagopa poanele toamene
ago tetepopa ni takaneya.
23
One wene tuganeleke poanele toamene ago tetepopa ni
takaneya wa padame wia mekakomepa Eberameke odene akeneya mena.
24
Totokeka
akeneya. Tone Ali Muno Yesu tuaneya pikale moa kamotokane ago Akolalike wene tugoa
meko-kiti totoke uku.
25
Einago Yesupa tone tokoo poaneleke tumotoa Akolaliyo moa
wetekaneya. Nitoapa totopa poanele toamene yene tetepo takoa wene keaneya meademe
tokome one moa kamotokaneya.
Lomane Lomane
<<
44
>>
Lomane Lomane
<<
55
>>
5
Akolaliyo Ali Atoa Toa Motikilepa
Kini Yesuke Wene Tugakileke Toko
1
Tone Yesuke wene tugakoleke Akolaliyo totopa poanele toamene yene tetepo takoa
wene keaneya mekono, poi pitikolo tokome poti kilikoa meamele toko. Tone Ali Muno
Yesu Keraisu nome mea tuaneleke toko.
2
Oneke wene tugakolo tokome one etename pewe
wia yopikota meamene wa yametaneyake toto eida-kama meko. Nipa a tibuke Akolali pa
tootapeneya meko toa totoka meemoa poo wa kolotine yako.
3
Ke enekakolo meake wedia-
kama meko. Nipa Akolaliyopa onekele takoa wawameneya poti takoa togakete toatekole
ooyametekono, ke wa kolotine meko.
4
Ke enekakolo meake onekele poti takoa togoo
tokolo enekome Akolaliyo totopa nitatiki yene tadeko wa kei pioo. Toto kei pioo wa wene
teketepa nipa one wipitikome toatekale taatekoa too wa nepia meko.
5
Nitoa nepia-kala
mekilepa eya wa wene taneya nepia meko. Oneme totoke wene mekoa tagatapeko wa wene
tomotoapa one Epetane Yomini totoke moa wetekaneyano, one taatekoa toatekale nepia
mekilepa po i nokotikameneya nepia meko.
6
Pinali tone wa toa moamele toameneyake toto
poanele toko-kitike Keraisu taatekoa nome mea tuaneya. Nipa Akolaliyo one tuateka oi
meepikana toa taatekoa tuaneya.
7
Panagome-kiti Mosesene totono litia kiyo akenele
tokagoke tuamou wa wene pikomeke nee epetaneya-kama lawetoa auapeko agoke tuademe
oko patu.
8
Totome poanele toma yakoloka kiwi toane mou wa Keraisu nome mea tuaneya.
Nipa kipa one kolotini yene wa wene tomotono ta wa Akolaliyo okana toa nitaneya.
9
Yesuno kamate ponokaleke Akolaliyo totopa poanele toamene yene tetepo takoa wene
keaneya meko. Nitikono, Akolaliyo ali atoa-pala kotimi yoa mekome kibu motoka-pete
Yesuyo toto kei pia toa moo tadeko.
10
Totome Akolali-pala poi te ia meko-peteka etenane
wene kekou wa manago Keraisu totoke tuaneya. Nitaneyake tone Akolali-pala odene wene
pianeya mekono, Akolaliyo toto-pala edoa kotimi yoa mea kibu momotoa-pe. Opa kiwi
toane mou wa Yesu one etene mekota mea kakono, Akolaliyo toto kibu moamoo.
11
Kibu
moamoo wa wene taneya mekete eya wa oa toko. Tone Ali Muno Yesu Keraisuyo taneleke
totopa one etene-pala oya kakoa mekono, Akolali-pala ke wa kolotine yako.
Poloyo Eyagota Adam Keraisutake Akenemo
12
Adam odene agokepa poane totono itonoke tageneya. Eida eni tageneme enipete
titimoa ali atoa tuma-kala nekeneya. Ali atoa peyame poanele toma-kala yakete tekete
nitaneya.
13
Moseseyo one totono wete yameameneyake ali atoame poanele toma yakeneya.
Nitaneyake eni totono piameneya tokome Akolaliyo kini eni poanele tokoike po letu pikoa
mea kibu moatekalee pade piameneya.
14
Nitaneyake Adameinagoke titimoa Moseseke
tugoapa ali atoa peya tuma-kala nekeneya. Kini poanele tikilepa Adameinagome Akolaline
totono tetekakome tanele toameketeke tuma-kala nekeneya.
Adameinago mekilepa naniko taatekoa noateka ago Keraisu adeka pia meaneya.
15
Nitaneyake einagotapa odenele tane agota mena. Odene ago Adam einagome poanele
tanelekepa ali atoa peya mati tuma-kala nekeneya. Wa Akolaliyo padele akole tikilepa eya
taneya. Panagome-kiti panago nami kakameneya padeya pa meou toa padena ago Yesu
Keraisu moa wetekaneya. Nitikale nokome ali atoa peya mati pewe wia tagama pekeneya.
16
Akolaliyo ali atoa nami kakamoa Keraisu pa wetekaneleka odene ago Adameyo titia tane
poaneleka odene kotu kakoa taneleta mena. Odene agome padele poanele tanelekepa oneke
tagoi peya Akolaliyo koiso akoane kibu mou wa oa pianeya. Wa ali atoame poanele-kala
toma yakolika Akolaliyo Keraisu moa wetekakilepa kipa poanele toamene yene tetepo
takoane wene keaneya meou wa wetekaneya.
17
Odene ago Adameyo poanele titia
tanelekepa ali atoa peya tuatekoi peku laweteko agoke lukoa mea tuma-kala nekeneya. Wa
Akolaliyo padele akole tikilepa ali atoa peya poanele toamene tetepo takoane wene keaneya
meada wa nami kakamoa pewe-kama wia kako. Nipa padena ago Yesu Keraisu patu
kautakoa meki-kitipa tobou ali atoa latia meemoa pomotoa toko.
18
Titia tane poanele
odenelekepa ali atoa peya kibu moamele taneya tokome tuma-kala nekeneya. Nitaneyake
padele kiyo akenele odenelekepa ali atoa peya poanele toamene tetepo taneya meamele
tokolo meemoa poadete tiki.
19
Odene ago Adameinagome Akolaline agale tetekanelekepa
ali atoa peya mati poanele tane yene tetepo taneya meaneya. Nitaneyake padena agome
Akolaliyo tamene wa okana toa litia tootapeanelekepa ali atoa peya mati poanele toamene
yene tetepo taneya meoi.
20
Moseseyo one totono yametekilepa ali atoame ele kule poanele keleyo toma
pomotoa taneya. Nitaneyake ali atoame poanele toma pekene toa Akolaliyo pewe wima
pokome moa patukatapeneya.
21
Ali atoa kini toma pekene poaneleme kiwi moa laboa
yopima nekeneya tokome tuma-kala nekeneya. Akolaliyo pewe wia yopima pikilepa ali atoa
poanele toamene yene tetepo takoane wene keaneya meou wa toko. Nipa tone Ali Muno
Yesu Keraisu patu kautakoa kakete meemoa pomotoa tokome ni toko.
Lomane Lomane
<<
55
>>
Lomane Lomane
<<
66
>>
6
Tone Keraisu-pala Lipuaneya Mea Tukomo
1
Ina okounakalekepa nipa eya wa amele toko patu. Totome poanele toma poko toa
moa patukakome Akolaliyo pewe ate toa wima poo. Pewe ate toa wima pomotono, poanele
pa toma pato wa ato-pe. Enimo wamato-li.
2
Poane peku laweteko agoke lukoa mekoota
mea tuumotekete pou toa tone namolo poane wene wia wakeneya mekono, eina namolole
edoa pa toomoa pato-pe. Enile pa toma poamato-li.
3
Anu oya-lawe totome Yesuno ibini
wedekoa ue motikilepa nipa one-pala dekoa tuou toa tokoo. Enipa wene toamikiti-pe.
4
Totome ue motikilepa one-pala dekoa tukolo moa oloyo taneya piou toa tokoo. Nipa
Akolaliyo pa teleta tootapeneya mekome Keraisu moa kamotokakana toa totoka wete moa
kamotokakale meou toa weneya totono litia toma poadete ue motokoo.
5
Tone Keraisu-pala odeneka dekoa tuou toa mekono, one moa kamotokane toa
totoka moa kamotokaneya meemoa poo.
6
Nitoono, totome eya wene toko. Tone namolo
poane wene tepene pa meaneya yomo lekaneyake Yesu-pala odeneka wia dekaneya kawou
toa mekilepa eina namolo wene wia wawadete toko. Nipa tone poaneleme toto moa
labaneya mekota tewitikoa poadete toko.
7
Ali pade tua pokolopa nipa one poaneleme one
wa moa labakamele toamoko.
8
Keraisu-pala odeneka dekoa tuou toa meketepa eya wa
wene toko. Toto tuake wa kamomotekete one-pala lipukaneya meemoa poo.
9
Keraisupa
one tukale moa kamotokaneya tokome wa tuamoo. Wa tuamateko ago tokome tukileme
one wa lauaneya piamoo.
10
One tukilepa ali atoa tone toko poanele wia atukatapea
taneyano, wa pade tuamoo. Opi Keraisu meemoa pikilepa Akolalinele-kama takoa meemoa
poko.
11
Nitikono, kipa kini tokoi poaneleme kiwi moa labaneya mekoita mea tuane tetepo
takoa meamene. Nitikete Keraisu Yesu patu kawa kelekoa mekete Akolalinele takoa mema
pamene.
12
Kini tokoi poaneleme kiwi moa labakoa talo tomotoa laukameamene. Nipa ele kule
poanele toatiki wene ponoko toa litia toameamene.
13
Kini yono kawa lene eyame poanele
tomotoa laukameamene. Nitameneya Akolali neeke-kama lukoane meou wapa tuake kamoa
pekene yene tetepo takoa meamene. Nipa yono kawa lene ika iyame nekele takakilepa
epetanele-kama tou wa oneke lukoa meamene.
14
Kini papete litia toatekoi totono litiku
pekete toa teko tokale wakoi. Opi pewe-kama wia kako agoke lukoa mekete tikino, kini
tokoi poaneleme kiwi wa moa labakoa talo tamele toamoko.
15
Ina okounakalekepa totome eya wa amele toko patu. Eina namolo totonoke lukoa
meameneya pewe-kama wia kako agoke lukoa mekono, poanelepa atiki toa tamele tokono,
tato wa ato-pe. E 'e mena.
16
Nekele-kama takouno, kueme topo toa moa egetamene wa
panagoke lukoa meketepa nipa einagome ta wa okale-kama litia toi. Enakale toa poaneleke-
kama lukoa meketepa poanele etepea toa tua poi. Nitameneya Akolali neke agale-kama
yakoane tou wa oneke lukoa meketepa one leneke poanele toameneya meane tetepo taneya
meemoa poi. Enipa nimini ukutu-pe.
17
Anu oya-lawe kiwi papete poaneleke-kama lukoa
meake opi lukoa meamekete tiki. Naniko olaukane totono pine to a litia tekete tikino, Akolali-
pala ke wane uku.
18
Kipa poaneleke-kama lukoa mekoita Akolaliyo toa motaneyano, opa
kiyo akeneleke-kama lukoa meatiki yene latitapeneya mekete tiki.
19
Anu oya-lawe kipa wene
meamene yeneno, kime yakatiki toane eya wane uku. Papete kini kawa yono lene kabunu
ika iyame poanele tou wa poaneleke lukoa mekete abeyale ele kule ya tanele toma yakoi.
Opi nitameneya kini kawa yono ika iyame kiyo akenele tou wa epetanele toma pamene.
Nipa panagome kueme topo toa moa egetaneya meou toa mekete kinikile toameneya
Akolalinele takama pamene.
20
Papete poaneleke-kama lukoa meketepa epetanele toma
pamedeku wa wene toamokoi.
21
Opi poanele-kama tekete tadeko wa ya tokolo mekete tiki.
Eni ya tanele toma yakoinake edeya nami enekoi-pe. Widikoado pa toma yaketepa padeya
epetaneya moameneya tua atutapeoi.
22
Nitatekoiyake kipa kini tokoi poaneleme moa
labakaneya mekoitake Akolaliyo toa motaneya. Opa kueme topo toa moa egetaneya meou
toa onekele-kama takama yakete tiki. Nitoapa padeya epetaneya mou toa wene kiyo
akeneya mekete mea kama poadete tiki.
23
Eya wane ekene uku. Poane pekudo noai
teketepa ku poaneya enou toa etepea tua poi. Akolaliyo kiwi pa pewe witikome peku
lawetekale noai teketepa ku epetaneya enou toa mea kama poi. Nipa tone Ali Muno Keraisu
Yesu patu kautakoa kakete nitoi.
Lomane Lomane
<<
66
>>
Lomane Lomane
<<
77
>>
7
Adona Mekete Toatiki Adeka Pianemo
1
Anu oya-lawe kipa Mosesene totono wene tiki yeneno, eya wane uku. Panago
tuameneya pa mekomepa eni totonome moa lauaneya meko.
2
Motane atoa pade one ana pa
mekolopa nipa eko tutu pade alike pamele toamoko. Anado tukolopa nipa tutu pade alike
oyake pamele toko.
3
Ana wete tuameneyake eko pade alike pokolopa nipa ete-kitame i atoa
nepa mone poamateko alike wini pokono, pamoko atoa tadeko wa iki. Wa anado tukolopa
kinita adona mekete toatiki totonome moa lauaneya meamoko. Nipa tutu pade alike
pokolopa i atoa nepa pamoko atoa wa padameka amele toamoko.
4
Anu oya-lawe kipa yomo lekaneyake Keraisuno tigini-pala odeneka wia dekane
tetepo taneya mekete tikino, Mosesene totonome moa lauaneya meamekete tiki. Opa atoa
pade ana tukolo pade alike pou toa kipa Keraisuke lukoa mekete tiki. Ku wedoa tuou toa
onekele takama pomotoa tokome Keraisu einago tukale Akolaliyo moa kamotokaneya.
5
Papete tone poane wene litia tokoo-petepa Mosesene totonome mena wa akenele ele kule
poanele toada wa totome wene pia tokala tokoo. Nipa poane ku tuou toa tua atua
poatekoole tokoo.
6
Papetepa toto poo yapu piou toa Mosesene totonome moa lauaneya
mekoo. Opa toto moa labakanele litia toa mea tuou toa mekono, Mosesene totonome moa
lauaneya meamele toamoko. Opi weneya totono Epetane Yominiyo wene takakole totome
litia tokono, eina namolo totono wia mekane toa litia toateko toa mena.
Tone Toko Poaneleme Toto Moa Koigako
7
Ina okounakalekepa edemo ato patu. Eina totonokepa poanele tageneya wa totome
amele toko patu. E 'e mena. Eina totonomepa poanele i i wa yametaneya. Mone
panagoneya tepi moameamene wa-kiti yameamoo tokapa nipa eina toadiyano wenepa
poane wene piadeku wane wene toamou toka.
8
Eina totonome mena wa okale tekene eya
kuya moadiya wane tepime tuaneya yakou. Eina totonodo piamoo tokapa poanelepa i i
wane tetoane enamele toamoo toka.
9
Papete eina totono yakameneya mekenepa epetanele
tukuno wene pianeya mekou. Wa naniko eina totono wene tokou-pete laigoapa ele kule
poanele tepene pia tagatapekale
10
ae, nopa tuane atuane poateku ago tadeko wane wene
tokou. Nipa eina totonomepa no meemoane pomotoa yamepianeyake etepeane pone tuou
wane wene tokou.
11
Anu tepene poanele witakomepa eni totono litia tootapeke meemoa
poo wa no oa yotokokale litiane tootapeane enoane meane teko tokale wakou. Teko tokale
wakenepa ae nopa tuane atuateku ago tadeko wane wene tokou.
12
Eina totonopa Akolalinele takakete toateko totono. Eina totono wia mekanepa
Akolalinele takakete toateko agale kiyo akene agale epetane agale kabe koukoa wia
mekaneya.
13
Eina epenemo-kama wia mekane totonomeke no tuane atuane pomotoa toko-
pe. Mena-li. Toto wia tukakilepa tone toko poaneleme-kama toko. Nipa no auapeateko
totonomeke no tuane atuateku ago tadeko wane wene tomotoa tikilepa anu toma yaku
poaneleke toko. Nitikono, ele kule tikilepa dika dika toamene poanele eni tekene tadeku
wane wene tomotoa toko.
Tone Tepene Kako Poi Tokomo
14
Eina totonopa Epetane Yominine weneke alaneya wa totome wene tokoyake no pa
itonole tuku ago meku. Nipa poane peku laweteko agome kueme topo toa moa egetekale
meou toane poaneleme moa lauaneya meku.
15
No nitane agome ele kule toma yakilepa
wene bebo ootapeneya meane tuku. Nipa padele epetanelepa toadiyano wene pianeke
toamoane ni padele poanelepa kote motukuno, toamou wane wene pianeke tokala tuku.
16
I
poanelepa toamouno wene pianeke wa tekenepa nipa eina totonopa epetaneya wane wene
tekeneke tuku.
17
Poanele eni tukupa anu weneme tukuya mena. Anu tepene poane wene
witakome ta wa okole-kama tuku.
18
Eya wane wene tukumoka uku. No itono peku naku
agopa anu weneme epetanele padeleka toamuku. Nipa padele epetanele toadiyano wene
pianeke tamele toamokolo wakala tuku.
19
Nipa padele epetanele touno wene pikule
toamukuyake padele poanele toamou wane wene pikule tokala tuku.
20
Poanele toamouno
wene pianeke wa tekenepa nipa anu weneme tukuya mena. Anu tepene poane wene
witakome ta wa okole-kama tukuya.
21
Edikakilepa moa koigane totono litiane tou toane tuku. Padele epetanele tou wane
wene piku-pete-kama padele poanele toateku wene patukatapekala toko.
22
Anu tepemepa
Akolalinele takou wane wediane mekuyake
23
anu lene yono kawa eyame poane totono litia
tou toa tokome tepene epene wene piku toa moa kautakala toko. Nipa lene yono kawa
eyame tane poanelemepa pinali no wa moa labakala toko.
24
Ae, no wene kedame tuaneya
mekuno, pinali no wa moa laboa atukama eni pokoya-kitike teyo toa motoko patu.
25
No
toa motikilepa Yesu Keraisu oneme toono, one tokaleke Akolali-pala ke wane uku.
Nipa Akolaline totonome moa lauaneya meada wane wene pikuyake poane peku naku
ago tekene anu lene yono kawa eyame poane totono etepea litiku pokome toko.
Lomane Lomane
<<
77
>>
Lomane Lomane
<<
88
>>
8
Epetane Yomini Totoke Awinome Mekilepa
Meemoa Pomotoa Tokomo
1
Toto Yesu-pala lipua meko-kitipa Akolaliyo tone poanele tokooke nami wia kibu
moatekole piamoko.
2
Ni edoa-mo. Papete eina namolo totono litiku pekete toapa tone
tokoo poaneleme toto etepea tuma pomotoa taneyake opi Epetane Yominine totono litia
tekete Keraisu Yesu patu kautakoa kakete meemoa poko.
3
Tone wene pikoole etepea litia
toma pokoya tokome Mosesene totonome toto oyake moa kiyo akamele toameneya.
Nitaneyake tone toko poaneleke tumotoa Akolaliyo one mana itonoke moa wetekakakalepa
toto poanele toko ali-kitane lene timini tigini eya kakeneya nome mea tuaneya.
4
Nipa ali
atoapa kini tokoi poaneleke kibu moa wia tukamedeko wa eina namolo totono wia
mekapiane toa taatekoa tokome toto luku Yesu tuaneya. Nitaneyake tone poane wene
pikole litia toamekete Epetane Yominiyo wene takako toa litia toko-kitipa Akolaliyo poanele
toamene yene tetepo takoa wene keaneya meko.
5
Kini poane wene litia itonole toma yaki-kitame kinikileke-kama wene piitikaneya yaki.
Epetane Yominine wene litia tiki-kitame Epetane Yominineleke-kama wene piitikaneya yaki.
6
Kini poane wene pianeleke wene piitikaneya yaki-kitipa kinikile etepea toa tua poi. Epetane
Yominineleke-kama wene piitikaneya yaki-kitipa meemoa pekete tepe kolotini-pala kilikoa
meoi.
7
One wene pikole-kama tokagome Akolali-pala poi te ia meko. Dikane agome
Akolaline totono litia toamademe wawa tagakala toko. One eni totono litia tamele
toamokolo tokome ni toko.
8
Kini wene pikile-kama litia tiki-kitame Akolaline wene
kekamele toamoko.
9
Anu oya-lawe kiwi pade edikoa meameneya kini namolo poane wene litia toamekete
tiki. Nipa Epetane Yominiyo wene takako toa litia tekete tiki. Akolaline Epetane Yomini
kiwike awia nome mekolopa nitikete tiki. Keraisuno Epetane Yomini awinameneya meko
agopa Keraisuno oyago mena.
10
Keraisu kipala lipua mekalepa Akolaliyo kipa poanele
toamene yene tetepo takoa mekome kini yomini-pala meemoa pomotoa too. Kini tokoi
poaneleme kini tigini wia tukakaleka nitoo.
11
Nika Yesu tukale moa kamotokane ago one
Yomini kiwike awinome mekalepa Keraisu moa kamotokane ago Akolaliyo kiwika tuaneya
pikoika moa kamotokoo. Nipa one Epetane Yomini kiwike awinome mekale tokome nitoo.
12
Akolaliyo nitoono, anu oya-lawe one Epetane Yominine wene pikole-kama totome
litia tamedeko. Tone namolo poane wene pikole litikileka toamato.
13
Kini poane wene
pikoiledo litia teketepa etepea tua poi. Nitameneya kini namolole poanele tokoilepa Epetane
Yomini patu kautakoa kakete tewitikoa wawapa meemoa poi.
14
Epetane Yominiyo wene
takako toa litia tiki-kitipa Akolaline mana kono-mikiti eni.
15
Kime papete Akolali piti
motaneya meketepa kueme topo toa moa egetane yename pinago piti motaneya meou toa
mekoi. Akolaline Epetane Yomini kiwike awinikilepa edikoa pa mea kamotoa tokome
awinaneya mena. Akolaline mana kono-mikiti latikademe ni awinaneyano, Akolali
kowitikilepa Atai wa totome kayo oa tokala toko.
16
Nitikolopa Epetane Yominiyoka tone
yominimeka kipa Akolaline mati-kiti tekete ni tiki wa toto wene takakala tiki.
17
Totopa
Akolaline mati-kitino, Atai Akolaliyo onekeya-kitipa kini wa nani yameoo. Onekeya eni
motikilepa Keraisu-pala lipua mea odeneka motekete moo. Nilepa toatekoyake papete
Keraisuyo tete mokoa kakene toa totomeka tete mokoa kako. Nipa one pa teleta
tootapeneya meko toa meadete tekete ni toko.
Wipitikete Mea Epetekatekomo
18
Atibuke Akolali pa tootapeneya meko toa meateko peku naketepa mea epetekoono,
opii-mene tete motikilepa pa nateya motane tetepo takoa moatoane uku-ye.
19
Akolaliyopa
one peku mati-kiti ino, enoe wa toto keleyo moa yameatekole one eteya latianeya peyame
nepia mekilepa eni toateko ta wete pata wete pata wa nepia meki.
20
Akolaliyo latianeya
peyapa etepea pata pale toa alama nekeneya. Nilepa kini weneme taneya mena. Akolaliyo
papete wene toopiane toa taneya. Nitaneyake Akolaliyo wipitia toatekale poti nepia mema
nekeneya.
21
Papete Akolaliyo one eteya latianeya peya poo yapu moa pitikou toa etepea
lomuma pomotoa wakeneyake wipitikome eya too. One peku mati-kiti poaneleme moa
labakanetake toa motokome toka toa tokome one eteya latianeya peya pewe wia kawa pa
takalogoo.
22
Namoloka opika one eteya latianeya peyame eni toateko ta patamotoa nepia
mekilepa mati kakene atoame mati opiademe ka oa welea meko toa toko. Enipa totome
wene tokomo uku.
23
Totomeka edikoa nepia meko. Nipa toto tuaneya pikolo Akolaliyo
moa kamotokoa one mana kono-mikiti latikatekole nepia meko. One eni toatekole titia
tokome one Epetane Yomini totoke moa wetekaka tokolo wete toa togamene wa totome
kenemada oa nepia meko.
24
Akolaliyo enika enile toa togatapeoo wa oneke wene tugoa
meketepa toto toa momotoa nepia meko. Padele toatekaledo wete taatekoa tokale
eneketepa pa nepia meamoo. Wete taatekaneya tokome nepia meateko toa mena.
25
Wa
padele toatekale wete taatekoa toameneyake nepia meato wa wedia mekilepa pegene
kakalogoa wawameneya poti nepia mea togako.
26
Epetane Yominiyoka toto auapekomo uku. Toto taba ali atoame edemo oane
kowitiku patu wa Akolali kowitadete wili toa meko. Nipa tone tepene meaneya kabunume
to awea amele toameneya mekete pa kenemada oa meko. Edikakilepa Epetane Yominiyo
mama moa auapekome kowitikakolo toko.
27
Akolaliyo takoa motane ali atoane edikoa
kowitikakilepa Epetane Yominiyo Akolaline wene pikole-kama litia toko. Nitikolo tokome
ali atoane tepene meane toa tetoa enekago Akolaliyo one Epetane Yominine wene pikole-
kama wene taneya meko.
28
Padele padele ke enekakole-kama Akolaliyo kabe koukoa talo toa mekilepa oneke
wene mekoa meki-kiti mea epetekamotoa tokome ni toko. One papete wene toopikana toa
taatekoa kayo oa motane ali atoake uku. Enipa totome wene tokomo uku.
29
Akolaliyo one
papete takoa moopiane-kitipa one mana kako toa kamotou wa moa kakapianeya. Nipa
mana Keraisuke lokoa one mana kono-mikiti memotoa taneya.
30
Mana Keraisu kako toa
kamotoa moa kakapikana yene noe wa Akolaliyo kayo oa motaneya. Nitoa memotoa kayo
oa motokana yenepa poanele toamene yene tetepo takoa meaneya. Nitane yenepa a tibuke
pa tootapeneya meemoa poatekoi peku lawetaneya.
Keraisuyo Taneleke Akolaliyo Totopa
One Kolotini Yene Wa Yopia Mekomo
31
Kipala ina okounakalekepa totome edemo oko patu. Akolaliyo edikoa auapekono,
toto-pala teyo edoa poi te ia memotoa-pe.
32
Akolaliyopa one mana pa kamotono,
wateamene wa wamokome toto peyake tumotoa taneya. Nitaneyano, toto auapekilepa
padele padele epetaneleka toa pewe-kama wia kakome too.
33
Akolaliyo one takoa
motokana yenepa poanele toamene yene tetepo takoa wene keaneya mekono, one eni ali
atoamepa poanele tiki wa teyo akoa agale omotoa-pe.
34
One eni ali atoa poane take
pomotono ta wa Akolali-pala teyo edoa akamotoa-pe. Keraisu Yesu totoke tuaneya.
Tuaneya pikale Akolaliyo moa kamotokatekaneyake etenane nimini yono lono pome
kakome waye wa toto kei pikome toko.
35
Keraisu einago totoke wene wedoa mekoa
mekono, edeyame moa letekamotoa-pe. Padele padeleme ke enekakolo mekilepa wene
kedame tuaneya mea ni tete mokoa kawa ni kobume tuaneya mea ni kawateko mamina
toameneya pa mea ni kotikaneta mea ni pade-kitame wia tukadete tikili mea tokoloka
Keraisu toto-pala lipua-kama mekono, padameka moa letekamele toamoko.
36
Enikepa
padame papete Akolaline bokuke eya wa wia mekapianeya.
Akolali, totopa ne yatene ali atoano, ta patako abuna ete-kitame kiwi wiou wa totopa
sipi sipi kai tetepo takoa wikala tiki wa wia mekapianeya.
37
Nitaneyake totoke wene mekoa meko ago Keraisu patu kautakoa kakete eni yene moa
kautalogako.
38-39
Akolaliyo kipa one kolotini yene wa totoke wene mekoa meko toa
Keraisuka totoke wene wedoa mekoa meko. Toto tua pokoloka pa mekoloka Keraisu
totoke pa wene mekoa-kala mekono, edelo ali-kitameka ipono-kitameka toto moa Keraisu-
pala pilikamele toamoko. Opi-mene witakole-kiti nani witatekole-kiti a tibuke tokole-kiti keti
itonoke tokole-kiti enika enilemeka toto moa Keraisu-pala pilikamele toamokono wene tuku.
E e nimini.
Lomane Lomane
<<
88
>>
Lomane Lomane
<<
99
>>
9
Poloyo Iserele Yene Mama Motanemo
1
Kipala imo ikilepa Keraisu patu kautakoane kakene nimini uku. Kapene yokakene
wamuku. Winimopa niminimo oko wa Epetane Yominiyo no wene takakolo tekene ni uku.
2
Nipa wene kedame tuane matiyame uku. Tepe-pala we tokolo meane kakene uku.
3
Enipa
Akolaliyo no yatene luku nopa kekaneya latikoa wawou toa no mukiti yamea tewitikoa
wamotadiyano wene pianeya mekene uku. Nipa no moa Keraisu-pala pilikoa no luku Iserele
yatene no yatene ali atoa moa lipukoa toa momotadiyano wene pikene uku.
4
Papete no
yatene ali atoapa Akolaliyo kipa one wa takoa motokome one mana kono-mikiti latikaneya.
Nitoapa kiwi pakeke one toko pa ka witakaneya. Ni kiwi auapekene dikouno ile tamene wa
oa togotoa ni kini litia toatekoi totono i i wa yamea taneya. Kini losule tekete toatekoileka i i
wa yamea ni kiwi toa moatekago moa wetekatekamo oa mea taneya.
5
Iserele yatenepa eya
ibini akene ali-mene Eberame Aisaketa Yekobe toa einago-meneke ta ma nekeneya. Einali-
meneke Keraisuka tageneya. Einagopa ako odene mekome eya kuya peya talo toa meko
ago Akolalino, one-pala ke wa oa-kala mema patoane uku. E e nimini.
6
Kipala eni ikilepa Akolaliyo tou wa papete oa pikana toa taatekoa toameadeko wane
ekene wamuku. Akolaliyo i ali atoa one wa takoa motikilepa Iserele yene peya takoa
moameneya.
7
Akolaliyo papete Eberame-pala okome okome mana Aisake ta ma pokoi
yenepa neke kaua-mikiti tetepo takoane meou wa akeneyano, Eberameke tagene yene
peyapa Akolaline mana kono-mikiti mena.
8
Eya wane ekene uku. Akolaliyo one mana kono-
mikiti i i wa takoa moa latikakilepa Eberameke ta ma nekeneya tokome tokoya mena. Ne-
loeke tagene yene auapekene dikou wa Eberame-pala papete oa togotokana tokome ni
toko.
9
One eni toatekalekepa Akolaliyo Eberame-pala eya wa oa pianeya. Nepala oane
pikouna toane taatekoane toatekou oi nokalepa oto wakapeane nokolu neke natono
Serayo neke mati opikoo wa akeneya.
10
Nika Rebekayo one matita takuta opikilepa odene ago tone kaua ago Aisakene
opikaneya.
11-12
Eni matita wete opikameneyake Akolaliyo papete odene mati one wa takoa
moopikome einatoa-pala okome namolo agome putunagono pupu takoa meoo wa oa
pianeya. Nipa eni matitame padele poaneleka epetaneleka wete toameneyake akeneya.
Akolaliyo edikakomepa kini padele taneleke taneya mena. I ago takoane mou wa wene
toopikilepa one wene litia tadeko wa ali atoa peyame wene tomotoa tokome ni taneya.
13
Akolaliyo one eni tokanakaleke akene toa panagome one bokuke wia mekakome okome
Yekobeke wene mekoane mekeneke Iso kote tokolo waku wa wia mekaneya.
14
Akolaliyo edikakomepa nipa kiyo wamenele eni toko wa totome amele toko patu.
E 'e mena.
15
Enilekepa Akolaliyo Mosese-pala eya wa akeneya. Panago ela moane
auapeouno wene pikenepa nipa ela moane auapeou. Wa panago mama moane
auapeouno wene pikenepa nipa mama moane auapeou wa Akolaliyo akeneya.
16
Nipa
Akolaliyo edikakomepa tone tokolekeka tone wene pikolekeka kipa one wa takoa
motokoya mena. Pa one wene litia tokala toko.
17
Enilekepa Akolaliyo Idipi tobou ago
Perou-pala akenemo one bokuke eya wa wia mekaneya piko. Ne tobou ago meamene
wane moane kakakilepa nepala telekole tokoule-kiti ete-kitame enemotoane tekene
tokouna. Nipa ta piko peya pitiki-kitame anu ibini kamotokamotoane tekene nitikouna
wa Petou-pala akeneya.
18
Akolali nitane ago tokome panago ela moane auapeouno wene
pikomepa nipa eni toko. Wa panagome one agale yakamademe wamotoapa one kolotini
lupi takatapeko.
Akolaliyo Pade Ali Atoa Kote Motokome
Wa Pade Ali Atoa Ela Motokome Tokomo
19
Akolali onepa nitane agono, anu oya-lawe kiwi panagome-kiti eya wa kikoa oko
patu. Akolaline wene pikole teyo edoa tagamotoa-pe. Padame pade menano, Akolaliyo
poanele wini tiki wa tone poanele tokooke koiso edoa akamotoa-pe wa oko patu.
20
Anu
oya-lawe ne-kiti pa ali kakeke Akolali widikoa kikoa ikilepa edekolo oko-pe. Panagome-kiti
kamo itono moa mete pade latikolopa one eni latiko meteme eya wa amele toko-pe. No
dikane mete edekolo latiko-pe wa kikoa amele toko-pe.
21
Mete latikagome kamo itono
wane mutua moa mete takuta-kiti latikilepa iya keneke epetaneya-kama lobutou wa latia wa
iya keneke nee yabunu eya lobutou wa latia toko. One pine ago tokome one wene
kibutukoa mea tokome padeya epetaneyaka poaneyaka oyake latiamele toko.
22
Eni toko toa Akolaliyo eya taneya. Poaneleke kotimi wene mati luaneya meaneya.
Nitoa padele padele tubele toa keleyo kibu moademeke one kibu moa wia atukateka yename
poanele tokoi tokoi kibu moamoa poti nepia meaneya.
23
Nitaneyake one ela moa yopiateka-
kitipa a tibuke one keneya pa teleta taneya meemoa pomotoa one wa takoa moopianeya.
Nipa one eni peku a tibuke lawetoane tagatapeou wa takoa moopianeya.
24
Totopa one wa
eni takoa motokomepa padeka-kiti Yu yatene ali atoa padeka-kiti ete pa yatene ali atoa
takoa motaneya.
25
Enilekepa Akolaliyo akene toa Oseayo one bokuke eya wa wia
mekakaneya.
Papete pa yatene tetepo takakene wakouna ali atoapa no yatene wane oane wa papete
wene mekamekene wakouna mone yenepa anu kolotini yene wane oane tou.
26
Papete kipa no yatene mena wane okouna takepa eida kipa meemoane puku
Akolaline mana kono-mikiti wane ou wa Oseayo wia mekakaneya.
27
Eina toa Akolaline agale to awea akane ago Aisaiayo Iserele yateneke eya wa kayo
akeneya. Iserele yene kipa ue kibi keneya oi moamele toameneya kainya mati mekolika
Akolaliyo pa natetekoa one wa toa moo.
28
Ali Muno agome ali atoa peya kini poanele
tokoike nami wiapa kotikatapea koiso akanokome kibu mootapeoo wa Aisaiayo akeneya.
29
Nipa Aisaiayo papete eya waka wia mekapiane toa too. Telekole-kama toko Ali
Munagome natetekoa kiwi meati wa ali lene moamoo tokapa nipa Sodome Gomora
tatake meane ali atoa keneya toto yateneka tua atutapeoo toka wa wia mekapianeya.
Iserele Yename Yesunomo Wakenemo
30
Nipa eya wane ekene uku. Akolaliyo kiwi poanele toamene yene tetepo takoa wene
keaneya memotoa e ku pa yatename toa enameneyake Akolaliyo eni pa yenepa poanele
toamene yene tetepo takoa meaneya. Nipa kini Keraisuke wene tugakoike taneya.
31
Nitaneyake Yu yatename Akolaline leneke poanele toameneya meato wa wili tokoa kawa
teko tokale wakeneya.
32
Edekale taneya-pe. Keraisuke wene tugamekete tekete Mosesene
totono litia tootapeadete wili tokoa kawa teko tokale wakeneya. Nipa Akolaliyo takoa moa
piane kue waneke ogo witikale ka ialoganeya.#
33
Enilekepa Akolaline bokuke eya wa wia
mekaneya piko.
Anume tukule enoe. Saione take kue wane takoane moane piku. Ali atoa ogo witikolo
ka ialogamotoane tuku. Nipa puku pekete toa tugamotoane tuku. Nitikuyake
kue wane adeka pikene uku agoke ali atoa wene tugoa meketepa oneke ya
tokale mekileka toamoi wa panagome wia mekapianeya.
Lomane Lomane
<<
99
>>
Lomane Lomane
<<
10 10
>>
10
1
Anu oya-lawe kipala ukumo yakamene. No yatene Iserele yatene Akolaliyo toa
momotadiya wane kini kowitikakala tuku.
2
No yatene ali atoame Akolalinele wedoa takadete
wili tokoa kawake one wene kekatikile agopa tokolo pata pale tiki.
3
Nipa Akolaliyo ali atoa
poanele toamene tetepo takakome tokole agopa tokolo kini weneme one leneke poanele
toameneya meoono wene pianeya mekete tiki. Nipa Akolaliyo kipa poanele toamene yene
tetepo takoa wene keaneya memotoa toatikile toamadete waki.
4
Keraisuyo Mosesene
totono litia tootapea mea tukome eni totono teiganeya. Nitaneyano, opa Akolaliyo ali atoapa
poanele toamene yene tetepo takoa wene keaneya mekilepa Keraisu einagoke wene tugoa
mekili tokome toko.
5
Papete Moseseyo one totono yametekilepa poanele toamene tetepo taneya meemoa
poadetepa nipa i totono-kama litia tootapeamene wa yametaneya.
6-7
Opa ali atoapa
Yesuke wene tugoa mekili tokome Akolaliyo poanele toamene yene tetepo takoa wene
keaneya mekoke eya wa wia mekaneya piko. Eya wa wameamene. Kipa poanele toamene
tetepo taneya meadetepa teyo Keraisu enemotoko patu. Nipa ate tibukeka tuane ali atoa
pote meki takeka teyo enemopoko patu wa wameamene. Keraisu one weneme itonoke wete
nome mea tua wa ate kamoa pekeneya wa panagome wia mekaneya.
8
Eya wa okome
akeneya. Onekemopa ta tetemada akenemo mena. Kini kabunu kenekeka kini tepeneka
wete lukaneya wa wia mekakome akeneya. Enipa Yesuke wene tugatikimo totome to awea
okomoke uku.
9
Totome eya wa to awea oko. Yesu einakagopa kini Ali Muno wa kini
kabunume peetapea oa ni einakago tukale Akolaliyo moa kamotokaneya wa eni tanemo
tepene lua tokolipa Akolaliyo kiwi toa moo.
10
Nitoono, kini tepene Yesunomo yakoa moa
luketepa poanele toamene tetepo taneya meoi. Ni kini kabunume Yesuke wene
tugakoinakamo to awea eketepa toa motaneya meoi.
11
Enilekepa Akolaline bokuke eya wa
wia mekaneya piko. Yesu einagoke wene tugoa mekoi-kitame ya moamoi wa wia
mekaneya.
12
Enipa Akolaliyo Yu yateneka e ku pa yateneka takoa enameneya odene yatene
tetepo takoa meko. Yu yatene e ku pa yatene-kitika odene ago oneke-kama lukoa meki.
One ibini wedekoa kowitiki peyapa einago Akolaliyo pewe-kama wia kako.
13
Enilekepa
Akolaline bokuke eya wa wia mekaneya piko. Ali Munono ibini wedekoa kowitikoi peya
oneme toa mokala too wa panagome wia mekaneya.
14
Einagokedo ali atoa wene tugoa meameketepa auapeano ta wa one edoa
kowitimotoa-pe. Onekemodo yakameketepa oneke edoa wene tugamotoa-pe. Ni paka
mekoika pade-kitame onekemo oa aua noamokolipa onekemo edoa yakamotoa-pe.
15
Akolaliyo onekemo oa aua yawatekoi yenedo moa wetekamokalepa onekemo yakamene
yene mekoika Yesunomo edoa oa aua nomotoa-pe. Akolaliyo eni taatekoa toatekalekepa
Aisaiayo wia mekakome okome tone wene epetekamotoa agale oa aua niki yenepa
kawame kautoa ku nikimokono, ke wa makutukoa moato wa wia mekaneya.
16
Onekemo
oa menokolika peyame yakoa motaneya mena. Enilekepa Aisaiayo wia mekakome okome
Ali Muno nekemo totome oa metekoonakamo pa natetekoame yakoa motokoi wa wia
mekapianeya.
17
Nimo ikilepa eya wane ekene uku. Ali atoa Yesuke wene tugakilepa pade
ali-kitame oa metekimo yatekete ni tiki. Enimo oa metekilepa Yesunomo-kama eni oa
meteki.
18
Nipa eya wane yatekene uku. Iserele yene paka mekete tekete onekemo
yakameneya-pe. Yakatapeneya-li. Eya wa wia mekaneya pikolo tekene ni uku.
Onekemopa ta piko peyake oa pupitikatapeneya. Kini agalepa e ku take oa
tugatapeneya wa panagome wia mekaneya.
19
Eya waneka yatekene uku. Akolaliyo kiwi wakome e ku pa yatene takoa moo wa Iserele
yename wene toameneya-pe. Wene tootapeneya-li. Akolaliyo eni papete wene toopianele
taatekoa tokale Iserele yename wene toamokaya tokale Moseseyo namolo Akolaliyo oka
toa eya wa wia mekaneya.
No Akolaliyo pa yatene mama motokoule enekete Iserele yene kime eni yatene-pala wene
poaneya meoi. Nipa wene meamene pa yatene ela moane auapekoule enekete
kotimi wene luaneya meoi wa Moseseyo Iserele yene-pala akeneya.
20
Wa naniko Aisaiayo one Iserele yatene piti moameneya mekome eya wa akeneya.
No tuku toamokoi pa yatenameke no i ago Akolali meadeko wa wene tokoi. No i ago
Akolali edane ago patu wa pitia yakameneyake eni pa yene pono yamepokou
wa akeneya.
Nipa enilepa wete taatekoa tane tetepo takoa wia mekaneya.
21
Pa yateneke nimo okomeke
Iserele yateneke eya wa akeneya. Anu yatene makutukoane moadene kawane ta
likakouyake kolotini lupi taneya mekete anu agale tagoa toamiki wa Akolaliyo akene toa
Aisaiayo wia mekaneya.
Lomane Lomane
<<
10 10
>>
Lomane Lomane
<<
11 11
>>
11
Akolaliyo Iserele Yatene Mama Motanemo
1
Akolaliyo nimo akeneyano, eya wane yatekene uku. Akolaliyo one Iserele yatene
wakeneya patu. E 'e mena. Noanupa Iserele yatene ago Eberameke tageneya. Bedamine ti
pitikene ukuno, Akolaliyo Iserele yene peya wakeneya wa edoa oadete-pe.
2
Akolaliyo
namolo namolo one wa takoa motane yatenepa wakome wawameneya. Akolaline bokuke
Ilaidayo Iserele yatename poanele-kala tokoike Akolali-pala ko oa akanemo agopa tokolo
meki-pe. Eya wa akeneya.
3
Neke i yename neke agale to awea akakoina ali-kiti wia tukoa
ni neeke lodo yoadete kue moa latiane walai-kiti wia tadekoa tokoi. Nekele takaku ago
anu kidenali meku. Eni yename noka wia tukadete wili toa kaki-kale
4
Akolaliyo edemo
akeneya-pe. Eya wa akeneya. Ege egeta kadukoa (7,000) ali-kiti nooke pa lukoa mekete
paya gode Beale einagonole takamiki. Eni ali-kiti wawamoane pa yopiane kaku wa
Akolaliyo Ilaida-pala akeneya.
5
Opika one Iserele yatene pa natetekoa one wa takoa
motikilepa pa pewe witikome tokome toko.
6
Eni yenepa one weneme pewe witikome one
wa takoa motikilepa nipa kini padele epetanele tikike nami witikome tokoya mena. Kini
padele epetanele tikilekedo takoa motokolopa nipa one weneme pa pewe witikome ni toko
wa amele toamoko.
7
Nipa eya wane ekene uku. Iserele yename kini moatekoiya tuku tokoa kawa teko
tokale wakeneya. Moameneyake Akolaliyo pa natetekoa one wa takoa motane yename
motaneya. Ete-kitipa kolotini lupi takatapeneya mekete moameneya.
8
Enilekepa Akolaline
bokuke eya wa wia mekaneya piko.
Akolaliyo eni yenane wene moa agopa takatapeneya tokome opika kini leneme enekile
enoa moamele toamoa kini kaleme yatekimoka yakoa moamele toamoa tokolo
pa meki wa wia mekaneya piko.
9
Depidiyoka dikane yeneke Akolali-pala okome okome
I yene kini toge nee mekete nakoika kini yukakoina wakoke moa labakou toa kibu
moamene. Kini toge nee eyake wene piitikaneya yaku pekete toa ogo witikale
pitamotamene.
10
Kini leneta lianeya mea etepea tugawineya yamotamene. Ke
enekakale-kama memotamene wa Depidiyo akeneya.
11
Eya waneka yatekene uku. Akolaliyo eni Iserele yene etepea tugawineya yamotoa
wakome wako patu. E 'e mena. Iserele yene etepea pikili tokome Akolaliyo e ku pa yatene
toa mokala toko. Nipa eni pa yatene toa motoko toa kiwika toa momotadiya wa Iserele
yename wene pimotoa tokome ni toko.
12
Iserele yename Yesunomo yakameneya tokome
Akolaliyo kiwi luku ta piko peya pitiki pa yatene-kiti kamo takou toa pewe wima poko.
Nipa Iserele yene kini moatiki toa moameneya pa memotoa wakomepa e ku pa yatene kamo
takou toa pewe wima poko. Wa naniko one papete wene toopikanakale taatekoa Iserele
yeneka oto wa motokomepa kiwi peya pewe wia tagatapeoo.
13
Opi kiwi pa yatene ali atoa-pala ukuno, Akolaliyo kiwi pa yatene meki toane
onekemo oane auane yamotoa no takoa kakaka tokolo ni uku. Nikepa pinali anu wa kei
piamele toko.
14
Kipala i ukupa kiwi pa yatene Akolaliyo pewe witikale mekoile enekete no
yatename kiwika dikoa meadiya wa wene pimotoane tekene uku. Nipa no yatene ali atoa
padeka-kiti toane moadene ni uku.
15
Akolaliyo one Iserele yatene tewitikoa wakomepa e ku
pa yatene-pala oya kakaneya. Nitaneyano, naniko onena yatene oto wa moa pewe
witikalepa ali atoa peya tuake wa kamoa pou toa wedianeya-kama meoi.
16
Panagome-kiti one noateko palawe yotokome pade deya Akolaline takoa pikakolopa
nipa Akolaliyo eni palawe peyapa one wa tetepo takoa wene keaneya meko. Yomo pade
pinedo Akolalineya wapa yenene-kitika Akolalineya wa kikilikoa oko.
17
Ni ipele olipe
yomodo yenene pedaneya kakolo enekomepa pinago tayo lono pome paya olipe yomo
yenene te imoa nome eina pedane luku kibutukoa lutua kakako. Eina toa Akolaliyo kiwi pa
yatene-kiti moa one yatene pakeke moa kakaneya. Nipa one matane yomo-pala moa lipukou
toa kiwi weye akoa meko.
18
Nitikono, anu oya-lawe kime eni wakene Iserele yenepa pedane
yomo yenene wa paya tetepo takameamene. Eya wa wene taneya meamene. Yenenekepa
yomo pine witakoya mena. Yomo pinekepa yenene witakoya.
19
Kime eya wa mate agale iki
patu. Pinagome eina pedane yomo yenene wakilepa kiwi moa lua kakademe ni toko. Tamele
tadeko wa iki patu.
20
Winimopa nimini ikilika eya wane uku. Akolaliyo onena Iserele yene
wakilepa Yesunomo yakoa moamokoli tokome ni taneya. Nitoapa kiwi pa yene moa lua
kakakilepa Yesunomo yakoa motokoli tokome ni taneya. Nitaneyano, kini wa kei piamoano,
Akolali piti moamene-ye.
21
Akolaliyo onena Iserele yatene wakene toa pa yene kiwika
wakayano, wedoa meamene.
22
Akolali nitane ago tokome padeka-kiti ela motokome wa
padeka-kiti kote tokolo wakome toko wa wene taneya meamene. Onekele takoake wakene-
kiti kote tokolo wakomeke anu oya-lawe kiwi ela moa yopiko. One ela moa mekome
yopikota pa mea kakilipa nipa kiwi ela moa yopia-kala meko. Mea kawameadekolipa
Akolaliyo kiwi-palaka pilia wawoo.
23
Onena Iserele yename ae poanele tekete tadeko wa
Yesunomo yakoa motokolipa oto toa motokome kiwi pegetoa kakoina luku wa moa kakoo.
One nitane ago tokome tamele toko.
24
Kipa matameneya paka witakoya olipe yomoke
te imoa one mataneya kako olipe yomoke lua togotoa kakakona. Nipa ali-kitame padele
lugutukoa toamikile Akolaliyo eni tokona. Iserele yatenepa one mataneya kako olipe
yomono, kiwi kakoina lukudo wa moa kakakomepa nipa ali-kitame kini matane yomo
yopikete lugutukoa tikile eni too.
Akolaliyo Ali Atoa Peya Ela Motokomo
25
Akolaliyo papete ali atoa-pala kaukoa meanemo to aweane uku. Anu oya-lawe kini
wa kei pia mate agale akaya tokolo ni uku. Iserele yename Yesunomo yakoa moamoa tugi
akeneya meake pa edikaneya mea togamoi. Nipa Akolaliyo takoa moopiane pa yatene ali
atoa peya oneke lukoa menokoli Iserele yene oneke wa lukoa menoi.
26
Nitikoli Akolaliyo
onena Iserele yene peya toa moo. Nipa eya wa wia mekapiane toa taatekoa too.
Kiwi toa moateka ago nikilepa Saione ta kawa noo. Eni nokomepa Yekobeke tagoi-kiti
kini Akolaline totono tagoa poanele tokoile moa kogatapeoo.
27
Kini tokoi
poanele moane kogatapekilepa nipa kiwi auapekene dikou wane papete oane
togotokouna taatekoane tou wa Akolaliyo akeneya.
28
Iserele yename Yesunomo yakoa moamikili Akolaliyo poi te ia mekilepa nipa kiwi
luku e ku pa yatene ali atoame Yesunomo yakoa momotoa tokome toko. Nitikoyake Iserele
yatene papete one wa takoa motaneya tokome kiwi opia tagaane ali-mene wene taneya mea
Iserele yateneke pa wene mekoa meko.
29
Akolali nitane agono, i yatene one wa takoa moa
pewe witikilepa one wene wia wawamokome pa toa togako.
30
Papete kiwi pa yatene ali
atoame Akolaline agale tagoa toamokoino, opi Akolaliyo eya toko. Onena Iserele yatename
one agale tagoa toamikili tokome kiwi pa yatene-kiti ela moa yopia meko.
31
Akolaliyo kiwi
pa yene ela moa yopikolo tokome onena Iserele yename Akolaline agale tagoa toamiki.
Nipa Akolaliyo kiwika eina toa ela moa yopimotoa tekete tiki.
32
Eya wane ekene uku.
Papetepa ali atoa peya one agale tagoa poanele etepea toma pomotoa Akolaliyo wakilepa
eya tou wa wene toopikome taneya. Wipitikene kini poanele tokoike nami wiameneya kibu
moamikilepa kiwi peya pa ela motekene tou wa wene toopikome taneya.
Ali Atoame Akolali Kei Pikete Oatikimo
33
Akolaliyo toto kamo takou toa edikoa pewe wia kako. Wene muno meane ago
tokome pademo pademota wene tootapeneya meko. One toateka wene toopiane toa pine
edoa to a ato-pe. One wene toopiane toa taatekoa tikilepa dikoa toko wa padameka to awea
akamele toamoko.
34
Enilekepa eya wa wia mekaneya piko.
One tepene piko wene i i wa teyo tetoa enoa to awea omotoa-pe. Ali Muno ago teyo
olaukamotoa-pe.
35
Ali Muno agome padeya tukua memotoa onekeya pade
metikilepa teyo tomotoa-pe wa wia mekaneya piko.
36
Padeya padeya peya Akolaliyo-kama latia pianeya. Enika eniya peya oneme pa yopia-kala
kako. One kei pimotoa tokome ni toko. Nitiko ago kei pia-kala mema patoane uku. E e
nimini.
Lomane Lomane
<<
11 11
>>
Lomane Lomane
<<
12 12
>>
12
Akolalike Padeya Mea Lodo You Toa
Yono Kawa Eyame Onekele Takama Yamene
1
Anu oya-lawe kipala ina okounakalekepa eya wane uku. Akolaliyo toto edikoa ela
moa mekono, one ka lono takoa padeya lodo you toa eya tamene. Tepe kolotini yono kawa
ika iyame nekele-kama takou wa one wene kekama pamene. Nitou wa onekele wedoa
takama pamene.
2
Itono peku noa tiki-kitame tiki toa toameamene. Nitameneya kini namolo
poane wene wia wawa Akolalike-kama wene piitikaneya meamene. Nitiketepa Akolaline
wene pikole wene toa toi. Nipa padele padele epetanele ni Akolaline wene kekatikile ni
onekele takakete toatikile i i wa wene toa toi.
3
Akolaliyo one agale oa aua poano pa wa no pewe wia moa kakaka tokolo kiwi peya-
pala eya wane uku. One peku kiwi tutu tutu wa laweteko toa noa teketepa odenele-kama
toameneya onekele tatite toa takoa mekino, onekele takakene tuku toa neme ta wa mate
agale wameamene.
4
Eni uku toapa yono kawa lene timini tepe kolotini eya odeneya
kaaloganeyake eniya-kitame odenele-kama toamoa ele kule tutu tutu wa tatite toa tiki.
5
Eina
toa toto Keraisu-pala lipua meko-kiti peya mati mekoyake odene ago Keraisuno tigini
kaalogane tetepo taneya meko. Nipa ete oto wa liputakutukoa meko.
6
Akolaliyo toto pewe
witikome peku tutu tutu wa laweteko toa noa teketepa odenele toamoa onekele tutu tutu wa
tatite toa takako. One agale to awea akateko peku lawetekolopa nipa onekele takakete
toatekole yameteko toa litia to awea akato.
7
Ete-kitanele takamedekolopa nipa kinikile
takama pato. Akolalinemo olaukamedekolopa nipa onekemo olaukato.
8
Ali atoame onekele
takoa togamotoa tekete kini wene weye akoa auapeamedekolopa nipa nitato. Padeya
toameneya pa meki-kiti tonekeya tatia meamedekolopa nipa keda takoa mekala tato. Ali atoa
yopia kamedekolopa nipa wedoa yopikoa kato. Ke enekakolo meki-kiti ela moa
auapeamedekolopa nipa ko wameneya wene epetaneya mea tato.
9
Tepene poane wene pimotoake pa kabunume i ago neeke wene mekoane meku wa
wameamene. Ele kule poanele peya kote moa titi toma pamene. Ele kule epetaneleke-kama
wene piitikaneya meamene.
10
Kipa Keraisuno wamene laine-mikitino, ete oto wa wene
mekanali yoma pamene. Nipa kini kini ete oto wa kei pikala tamene.
11
Ali Muno agonolepa
kote au keneya moa takameneya poga poga toa takama pamene.
12
Akolaliyo wipitikome
epetekoa tokale nepia mekilepa wedia mea nepia meamene. Nipa ke enekakale meketeka
Akolalinele poti takoa togato wa one kowitikala tamene.
13
Akolaline ali atoa padeya-kiti
toameneya pa mekolipa kinikiya pade tatia meamene. Ni pade ta kawa noka ago eneketepa
nee noano noo wa makutukoa moamene.
14
Panagome-kiti ne tete metekalepa nipa topo takoa poanemo wameamene.
Nitameneya einago pewe wia kamene wa Akolali kowitikamene.
15
Panago-kiti wedia
mekalepa nipa one-pala wediata meamene. Wa panago-kiti komo oa kakalepa nipa ela moa
one-pala komo oata meamene.
16
Wene odene kotuta kakatagutukoa meamene. Ete yene
paya tetepo takoa meamoano, ponopene yene-pala wedoa oya kakoa meamene. Ni anume
tuku toa neme ta wa mate agale wameamene.
17
Panagome-kiti ne toa potokakalepa nipa padele poanele topo takoa toameamene.
Nitameneya padele padele tikilepa ali atoane leneke epetanele-kama tamene.
18
Wene odene
kotuta kakatagutukoa meato wa ete yene-pala oya kakoa enekala tamene.
19
Panagome-kiti
ne toa potokakalepa kibu motikileka toameamene. Nipa Akolaliyo einago-pala kotimi wene
luaneya mekome kibu motokamotoa nepiamene. Eya wa wia mekaneya piko. Padele
padele poanele tokoike kibu motokilepa no Ali Munagoyo-kama nami wiane tou wa wia
mekaneya piko.
20
Akolaliyo nitoono, kibu moamoano, eya tamene. Nepala poi te iane ago
kobume tuaneya mekalepa one nee takoa lawetamene. Ue nodome tuaneya mekalepa ue
nomoa lawetamene. Nitikalepa one poanele taneke ya tokale meoo.
21
Einago kibu
moateka wene ponoka toa neke wene moa koigakayano, epetanele toma pamene. Nitikepa
poanele moa kautoo.
Lomane Lomane
<<
12 12
>>
Lomane Lomane
<<
13 13
>>
13
Ta Talo Tiki Ali-kitike Lukoa Meatekomo
1
Kanosolo Kapomane eya ali-kitame tamene wa okoi toa litia tamene. Enika eni
yenepa Akolaliyo one wene toopikana toa tokome moa kakakala taneya. Nipa e ku yatene
mekoi toa tatikamu toa moa kakakala taneya.
2
Kini okoile toamadete wawa tagaketepa nipa
Akolaliyo moa kakane ali-kiti eni wakete toi. Nitikolipa Akolaliyo koiso akoa kibu moo.
3
Epetanele toma yaketepa nipa Kanosolo Kapomane ali-kiti edoa piti moadete-pe. Poanele
toma yaketepa nipa kibu motokaya wa piti moamele toko. Piti moameneya atiki toane meou
wa wene piketepa nipa epetanele toma pamene. Nitikoli enekete ta talo tokoi-kitame ke wa
kiwi kei piei.
4
Kiwi talo toa epetekamotoa tokome Akolaliyo Kanosolo Kapomane ali-kiti
moa kakaneyano, nitoi. Anu oya-lawe kime poanele toma yaketepa nipa kibu motokaya wa
piti moamene. Kiwi kibu moatiki tele lukatapeneya kakino, kini tokoi poaneleke nami wia
kibu motikilepa Kanosolo Kapomane ali-kiti Akolali patu kautakoa kakete toi.
5
Eni yename
okoi toa litia tikilepa nipa kibu motokaya wa piti moa tamene. Ni tepeme epetekoa tamene
wa oko toane tamedeku waka litia tamene.
6
Takesi kue pitikakilepa nipa ta talo yename
Akolaline pupu takoa mekili tekene pitikamedeku wa tiki.
7
Nipa Kanosolo Kapomane ali-kiti
meatiki toa meamene. Takesi kue pitikamedekalepa takesi kue pitikamene. Kasetome takesi
kue meamedekalepa kasoteme takesi kue meamene. Panagoke nate wene pianeya lukoa
meamedekalepa oneke nate wene pianeya lukoa meamene. Ni panago kei piamedekalepa
one kei piamene.
Ali Atoake Wene Mekoa Mekete Toatekomo
8
I agome onekeya nani oto memotoane tekene anukuya pade opi meteku wa edikoa
ete oto wa nami kakanali yoameamene. Eya tamene. I ago nooke wene mekoa memotoane
tekene oneke wene mekoane meada wa ete oto wa wene mekanali yamene. Edikaketepa
nipa Akolaline totono litia toatiki kotu kakoa tekete tiki.
9
Kini totono dikakoya. Panagono
atoa-pala koua piamoa ni ali atoa wia tukamoa ni panagoneya kode moamoa ni ete ali
atoa akoa agale wamoa ni panagoneya tepi moamoa ele kule poanele peya toameamene
wa wia mekaneya piko. Enika enile toameamene wa akenepa nipa pinali neke wa wene
mekoa mea mama motoko toa ete ali atoakeka wene mekoa mea mama moamene wa
Moseseyo okome akeneya.
10
Eko ali atoake wene mekoa mekagomepa eko ali atoa-pala
toa potokakileka toamoko. Eko ali atoake wene mekoa mekomepa nipa eina totono litia
toateko kotu kakoa litia tootapekome toko.
11
Kime edikoa meketepa eina oipa opi nekedeko wa wene taneya meamene. Akolaliyo
toto toa moo wa papete Yesuke titia wene tugoa meketepa enile tomotoa poti nepia mekoo.
Opa eni toateko tigotoma nokono, atu pia meameneya kamokoa nepia meamene.
12
Kolopa
pilia ta patademe tokono, likonu poanele toma pokoonakale tewitikoa wato. Nitoapa pa
keneke poi topadete tue kotokoto eya moa pikoa kawou toa epetanele toma pato.
13
Nipa
pa keneke yakete toateko toa epetekoa meato. Bia ue eya noa piamoa ni pamoko atoa-
palaka padane atoa-palaka koua piamoa ni neno wamoa ni panagoneya tepi moamoa edikoa
toamato.
14
Nipa poi topadete moa kawatiki mamina moa kawou toa Ali Muno Yesu
Keraisu-pala lipua meamene. Wene ponoka toane ele kule poanele toada wa wene
kibutukoa meameamene.
Lomane Lomane
<<
13 13
>>
Lomane Lomane
<<
14 14
>>
14
Yesunomo Wedoa Yakoa Moamoko Ago
Ela Motekete Toatekomo
1
Panago Yesuke wene tugoa meake wedoa lipua meamokolopa nipa one-pala oya
kakaketepa one kekanele latikoa toamokoleke neno wameneya pa makutukoa moamene.
2
Yesuke wene wedoa tugoa mekagomepa padeyaka kekaneya latikoa wawamoa nee melepu
eya atiki toa moa nako. Wa panago Yesuke wedoa wene tugoa meamokagomepa one
kekanele tamene piti moa mekome kai melepu eya wawa ipe witakoya nee takoa moa nako.
3
Eya kuya peya moa nako ago nemepa kekaneya wawa noamoko ago paya tetepo
takameamene. Ipe witakoya nee odene takoa moa nako ago nemepa o ago-pala kekanele
wini toko wa kikoa wameamene. Kita odeneletapa toamiki agotake Akolaliyo kita one wa
takoa motaneya tokolo ni uku.
4
Panagono pupu takako ago one tokolepa ete-kitame edoa
takoa enemotoa-pe. Epetanele tadekaleka poanele tadekaleka one pupu pinagome odene
takoa enamele too. Nimo ukuyake pupu agome pinagonole takoa togoo. Nipa Ali Muno
agome one patu poapeneya kautakoa kamene wa one tele lukakale takoa togoo.
5
Panagome-kiti ta patako pade Akolaline takoa oi pikoa kako. Wa panagome e ku ta
patako takoa enameneya ta patako peya midi piane tetepo takako. Enipa kini kogonono,
mainagome tokole litiane tuku patu wa wedoa wene kibututukoa litia tamene.
6
Panagome-
kiti ta patako pade Akolaline takoa oi pikoa mekilepa Ali Muno agono wene pikole tuku wa
wene pia toko. Wa panagome melepu eya moa nakilepa Ali Muno agono wene pikole tuku
wa wene pia toko. Nipa Akolali-pala ke wa ootokoa nako. Panagome tawe eya wawa
noamikilepa nika Ali Muno agono wene pikole tuku wa wene pia toko. Nipa Akolali-pala ke
wa oa wawa noamoko.
7
Itonoke pa meadeteka tua poadeteka tone tone wene pikole-kama
litia tamele toamoko.
8
Totopa pa meketeka tua peketeka Ali Muno patu kautakoa kakete
toko. Nipa pa meketeka tua peketeka tone Ali Muno agoke-kama lukoa meko.
9
Einago
Keraisu tuake wa kamoa pikilepa toto pa meketeka tua peketeka Ali Muno oneke lukoa
memotoa tokome ni taneya.
10
Wipitia ta pataka-pete Akolaliyo toto peya one leneke moa
kakoa koiso akoono, neke oyagome tokolepa edoa takoa enoa akade-pe. Neke oyago edoa
paya tetepo takade-pe.
11
Eya wa wia mekaneya piko.
No tuamateku ago Ali Munoyo uku. Ali atoa peya no kakakoa wadini tukukala toi.
Peyame no Akolali-pala ke wa kei pia kawoi wa wia mekaneya piko.
12
Eni toateka oi witaka-petepa toto peya tone toma pokoonakale i i wa tone tone to awea
okala too. Akolaline leneke kakete nitoo.
13
Nitoono, papete ete oto wa akoa agale wamatoane uku. Nitameneya kini oya-
mikitame etepea poanele toma pomotoa tikile-kiti toamato wa oa togotamene.
14
Enipa Ali
Muno Yesu patu kautakoane kakene eya wane uku. Padeya nee odeneyaka totome
kekaneya latikoa wawateko toa mena. Nitoa wawateko toa menake panagome-kiti iya neepa
kekaneyano, waou wa wene piake nakomepa poanele eni tokome too.
15
Dikane ago neke
oyago kakakoa one kekaneya pade neme-kiti moa nakepa nipa one wene keda takake too.
Nipa oneke wene mekameneya meke too. Einagokeka Keraisu nome tuaneyano, einago
kakakoa one kekaneya pade moa noameamene wane uku.
16
Nipa neme-kiti eya kuya nee
kekaneya latikameneya atiki toa namele tokoyake ete-kitame kini kekanele wini toko wa ne
akoa agale akaya tokolo ni uku.
17
Akolalike lukoa meketepa nipa edikoa eya kuya nee ue
edoa takoa enato-pe. Nitameneya eya tato. Akolaliyo totopa poanele toamene yene tetepo
takoa wene keaneya memotato wa one-pala odene wene pia kilikoa mea ni Epetane Yomini
awinaneya mea tekete wedia meato.
18
Keraisunole edikoa takaketepa nipa Akolaline wene
kekatekole eni tekete too. Nitikolo enekete eko ali atoame ke wa toto kei piei.
19
Kipala ina okounakalekepa tone tepe kolotini kilikoa meatekole toa enato. Nipa
Keraisunole wedoa takadetepa ete oto wa auapenali yatoane uku.
20
Panagome-kiti
Akolalinele takoa meake wakaya tokale kini nakoi nee melepu eyake neno oa piliameamene.
Padeya padeya nee melepu eya ali atoame noatekoi toa latia pikaneya. Nitaneyake one
kekaneya wawa noamokago etepea pomotoa one kekaneya moa naketepa poanele tekete
toi.
21
Dikane ago kini oyago pade etepea pokaya tokale one kekaneya melepu gerepi po ku
ue eya titi takoa noameketepa nipa epetekoa tekete toi.
22
Padeya padeya ue nee melepu
namele toko wa wene piketepa kini wa lukoa meamene. Akolaliyo wene tokono, eya kuya
namele toko wa to awea wameamene. Panagome-kiti eya kuya nee melepu namele toko wa
wene pia tikilepa one tepeme mena wa wawameneya tokopa kolotine yawatekago eni.
23
Panagome padeya nee-kiti namele toamoko patu namele toko patu wa poome taneya
mekomeke moa nakomepa poanele eni toko. Nipa one tepeme ta wa wameneyake
tokomepa poanele eni toko. Padele padele tikilepa ipa kiyo akeneleno, tamene wa tepeme
wameneyake tokomepa poanele eni toko.
Lomane Lomane
<<
14 14
>>
Lomane Lomane
<<
15 15
>>
15
Eko Ali Atoane Wene Moa Auapeamene
1
Totopa Yesunole wedoa takama poko-kiti tonekele toameneya eya tatoane uku.
Padele padele kekanele tamene piti motaneya mekete Yesunole wedoa takama poamiki-
kitipa mama moa auapeato.
2
Eko ali atoame Yesunole wedoa takama pomotono, wene
epetekoa auapeatoane uku.
3
Keraisu itonoke nikilepa onekele toademe nekeneya mena. One
eni nokome oatekamo panagome Akolaline bokuke papete eya wa wia mekaneya. Atai,
pade-kitame nepala taumada toa ikili yatekenepa nipa no-pala odeneka dekoa poanemo
akene tetepo takoane yateku wa wia mekapianeya.
4
Akolaline bokuke wia mekanemo peya
wia mekakilepa totoka ke enekakale meake wedia memotoa olaukatekoimo eni wia
mekaneya. Nipa ke enekakale meake onekele poti takoa togane yene Akolaliyo auapekana
toa totoka auapeoo wa nepia memotoa taneya.
5
Nitaneyano, onekele poti takoa togamotoa
auapeko ago Akolali-pala eya wane kini kowitikaku. Keraisu Yesuyo nekele-kama takako
toapa anu oya-mikiti odene wene-kama pianeya mea takamotono ta wane kini kowitikaku.
6
Nipa odene wene pianeya mea kabunu koukotukoa tekete tone Ali Muno Yesu Keraisuno
Akolali oneketai kei pia kamotoane tuku.
7
Nitikuno, Keraisu Yesuyo kiwi makutukoa motane toa tekete kini kini ame anai wa ete
oto wa makutukoa moamene. Akolaline ibini kamotokamotoane tekene ni uku.
8
Enipa eya
wane ekene uku. Keraisuyo Yu yenanele takademe nokomepa Akolaliyo kiwi yatene
auapekene dikou wa tone kaua-mene-pala papete oa pikanakale taatekamotoa tokome
nekeneya.
9
Ni Akolaliyo kiwi pa yeneka ela motokome makutukoa motoko wa pa yename
Akolali kei pimotoa tokome nekeneya. Akolaliyo eni taatekoa toatekaleke eya wa wia
mekaneya piko.
Pa yatene ali atoa dekoane mekene Akolali kei piato wane ne kei piane neke ibini
wedekoane lo agale oane tou.
10
Eya agale tiginika wia mekaneya piko.
Kiwi pa yatene ali atoa Akolaliyo takoa motane Yu yene-pala wedikete wediamene wane
uku.
11
Eya waka wia mekaneya piko.
Kiwi pa yatene ali atoa peya Ali Muno kei piai tamene. Ta piko peya pitiki yene kiwi
peya nitamene.
12
Aisaiayoka eya wa wia mekapianeya.
Yesi-loeke ta wateka ago pade taatekoa noo. E ku pa yatene talo toa-kala kawademe noo.
Pa yatene-kitame one tokale nepia mekete wedia meoi wa papete wia
mekaneya.
13
Einagome tokale nepia mekete wedia memotoa toko ago Akolali-pala eya wane kini
kowitikaku. Anu oya-mikiti neeke wene tugoa meketepa tepe mataketikoa wedia memotono
ta wane kowitikaku. Nipa one Epetane Yominine tele patu kautakoa kakete kolotine mea
nepia memotoane tekene kowitikoane uku-ye.
Poloyo Yesunole Takakome Tanemo
14
Anu oya-lawe kiwi wene epetaneya-kama mea ni Yesunomo yakoa mootapea ni kini
kini ete oto wa wene toa olaukoa tikino wene tekene uku.
15
Widikoa meketeka padele
toatikile wene kayapea toamokaya tokolo pademo telekomo wa wiane wetekaku-ye.
Akolaliyo no pewe witikome moa kakaka tokolo tekene ni uku.
16
No moa kakakilepa e ku
pa yatene pitikika Yesu Keraisunole takama pomotoa toka. Nitikale tekene Akolaliyo ali atoa
wene epetekakome tokomo eni oane auane yakilepa oneme eya tomotoane tuku. Pa yatene
ali atoame onekemo yakoa motokoli Epetane Yominiyo wene moa kiyo akakome i yenepa
neke wa metekale momotoane tuku. Nipa anu padeya-kiti oneke meane lodo yotane tetepo
takoa wene keaneya mekome momotoane tuku.
17
Nilepa Keraisu Yesu-pala lipuane mekene
tuku wane pinali anu wa kei piamele tokolo uku.
18
Nitamele tokoyake eya takama pokoumo
odene kiwi wene takakene uku-ye. Pa yatene ali atoame Akolaline agale yakoa tomotoane
tikilepa Keraisu Yesu patu-kama kautakoane kakene onekemo oane onekele takama yawane
tekene tokou.
19
Nipa padele padele telekole ali atoane wene kainya pikanele toma yakilepa
Epetane Yominine tele patu kautakoane kakene tokou. Keraisunomo-kama eni oane auane
yakenepa Yerusaleme take laigoane Ilirikume take tugakou.
20
Nipa ete ali-kitame onekemo
wete oa aua pokoika poamou wane ali atoa yakameneya mekoika-kama oane auane yakou.
21
Enipa Akolaline bokuke eya wa wia mekane toane taatekoane tokou.
I uku agonomo oa aua poamene take pitikoi-kitame einago enoi. Ni einagonomo
yakameneya mekoi-kitame onekemo yakoa moi.
Polo Lome Take Ugu Poateka Wene Pianemo
22
Ete yatene eka e paka paka pitikoi toane Yesunomo oane auane yakouya tekene
Lome take wida wete noamokou.
23
Opa i ta-kitike Yesunole takoane peya takaneya meane
ni mali peya mati ponokale-kama wida ugu none menadiyano wene pianeya meane tekene
eya wane uku.
24
Sipeine take poadene kini Lome take dekoane menadene uku. Nipa anu
oya-lawe kime anu wene epetekoa auapemotoane wida me me tootokoane Sipeine take
poadene uku.
25
Nitadeneke namolo takoane Yerusaleme take Akolaline ali atoa ponopeneya
meki-kiti kue eya tatikadene puku.
26
Anu eni tatikatekuyapa Masedonia Geriki tatake
Yesunomo yakoa motane yename no takoa mekala tokoi. Nipa Yerusaleme take Akolaline
ali atoa padeka-kiti ponopeneya mekete tikino, iya aua poke tatikapoano pa wa mekala
tokoi.
27
Enipa kini weneme tokoi. Nipa papete Yu yename kamoya meou toa kini wene
epetekanemo Yesunomo oa aua mepokoinake ke wa kini tigini kamotoa tekete kinikiya kue
eya etepea meamedekoli ni tokoi.
28
Masedonia Geriki tata pitikoi yename kini eni metekoiya
peya Yerusaleme take auane pone tatikamotekene Sipeine take poadene kini Lome take
wida dekoane pinou.
29
Nipa wida nikilepa Keraisuyo no pewe wia tagatapeneya nouno
wene tekene uku.
30
Anu oya-lawe eya tamene wane uku-ye. Papete no-pala padele takayano, no auapea
wedoa kowitikamene-ye. Tone Ali Muno Yesu Keraisu patu kautakoa kakete nitamene.
Epetane Yominiyo wene takako toa tone tone ete oto wa wene mekanali yoa mekono, anu
wedoa kowitikamene-ye.
31
Nipa Yudea take Yesunomo yakoa moamene yenane yonoke no
toa momotoa tekete anu kowitikamene. Akolali-pala eya waka kowitikamene. Yerusaleme
take pekene kue eya tatikoane metekolu one yename ke wa momotono ta wa kowitikamene.
32
Nitikolipa wida Lome take kolotine none menou. Nipa Akolaliyo nitimotou wa wene
piadekalepa wida ko mekene tepe kolotini kilikoa pimotoane meou.
33
Tone tepe kolotini
kilikoa pikako ago Akolaliyo anu oya-lawe kiwi peya yopia-kala kamotoane uku-ye. E e
nimini.
Lomane Lomane
<<
15 15
>>
Lomane Lomane
<<
16 16
>>
16
Poloyo Agale Lionate Akenemo
1
Tone oya atoa Pibi wida noademe toko. Einatoapa Yesuno ali atoa Senekeria take
mekika auapeko atoa.
2
Einatoa Ali Muno-pala lipua mekono, nokalepa Yesunomo yakoa
motane yene makutukoa motekete tiki toa makutukoa moamene. One padeya-kiti
toamokalepa kinikiya pade tatia meamene. Einatoame ali atoa kainya mati auapekilepa noka
auapea tokano, nitamene.
3
Perisila Akuwilata Yesu Keraisunole no-pala kibutua takakoi ali atoata-pala wete
4
Wini ali atoatame no toa motikilepa nooke toa kita oyake tuoo
wa tokoi. Wini adoname auapekala tokoinake Yesuno pa yatene ali atoame ta piko peyake
oboa mekika kita-pala ke wa amediki. Noanume odene mena.
5
Wini adonane yapu
Yesunole takoa oboai tiki yene-palaka wete meamene wa akamene-ye.
Anu kolotini ago Epinitasi one-palaka wete meamene wa akamene-ye. Esia takepa ete
yene Yesuke naniko wene tugamotoa one namolo takoa wene tugaka.
6
Kinikile wida wedoa
takama yakana atoa Maria one-palaka wete meamene wa akamene-ye.
7
No Yu yatene agota
Aderonikasi Yuniasita no-pala odeneka po yapu pitikoinakagota einagota-palaka wete
meamene wa akamene-ye. Einagotapa ibini akene Aposelo agota. No Keraisuke wete wene
tugameneyake einagota oneke wene tugoa meaneya.
8
Eya ago Abelietasi one-palaka wete
meamene wa akamene-ye. Ali Munago-pala lipua mekolo wene mekoane meku agoke uku.
9
Eya ago Ebanasi toto-pala kibutua Keraisunole takama yakanakago one-palaka wete
meamene wa akamene-ye. Anu kolotini ago Sitekisi one-palaka wete meamene wa akamene-
ye.
10
Apelisi einagopa Yesu Keraisuke wedoa wene tugoa mekago wane uku. One-palaka
wete meamene wa akamene-ye. Eya ago Arisobulasi one yapu pitiki yene-palaka wete
11
No Yu yatene ago Erodiono one-palaka wete meamene wa
akamene-ye. Eya ago Nasisasi one yapu pitiki yene Ali Muno-pala lipua meki-kiti eni yene-
palaka wete meamene wa akamene-ye.
12
Ali Munagonole wedoa takama yaki atoata
Teraipina Teraiposata kita-palaka wete meamene wa akamene. Ali Munagonole wedoa
takama yako atoa anu kolotini atoa Pesisi one-palaka wete meamene wa akamene-ye.
13
Ali
Munagonole wedoa takama yakoleke ibini akene ago Rupasi nina-palaka wete meamene wa
akamene-ye. One niname nopa one mana tetepo takoa meko.
14
Eya ali-mene Asinekitasi ni
Peligono ni Emisi ni Patobasi ni Emasi eni ali-mene-palaka wete meamene wa akamene. Ni
eni ali-mene-pala odeneka obokala tiki oya-mikiti-palaka wete meamene wa akamene-ye.
15
Ni eya agota Pilologasi Yuliata ni eya ali atoata Neriasi laina ni Olibasi ni Akolaline ali atoa
eni yene-pala odeneka obokala tiki-kiti kiwi peya-palaka wete meamene wa akamene-ye.
16
Yesunole takoa oboa mekete-kama ke wa yono ete oto wa mokala tamene. Yesuno ali
atoamepa e ku take oboai tikika mekete ekete kiwi peya wete meamene wa agale oa
wetekakamene wa no-pala iki-ye.
17
Anu oya-lawe kipala eya wane uku-ye. Pade ali-kitamepa kime ete oto wa neno oa
pili pili toa mekete Yesunole takoa wamotoa toi. Nipa kiwi wida mane mane oa olaukane
toa tetekoa toino, dikane ali-kiti titi takama yamene.
18
Dikane yename tone Ali Muno
Keraisunole takameneya kinikile-kama tiki. Nitoa wene meamene ali atoa enekete taba po
pitikoa oa yotokakala tikino, lene kia wedoa meamene-ye.
19
Anu oya-lawe kini Yesuno agale litia tekete tikimo ta piko peyake oa pupitikaneyano,
ke wane wediane meku. Ke wane ikilepa one agale litia tekete ele kule epetanele toatikile
wene toa tomotoane uku. Ele kule poanele tamene agopa momotoane uku.
20
Tone tepe
kolotini kilikoa pikako ago Akolaliyo toto auapekilepa tone kawame Setanu kautoa
wititapemotoa pene tokono, nepiamene. Tone Ali Muno Yesuyo kiwi pewe wia yopia
kamotoane kini kowitikaku-ye.
21
Yesunole takama yakilepa no-pala kibutua tokago Timosi
einagomepa kiwi peya wete meamene wa oko-ye. No Yu yatene ali-mene Lusiasi Yesoneta
Sosipata toa einali-menameka kiwi peya wete meamene wa iki.
22
Poloyo oko toane anu
yoname wiane mekoane meku ago no Tetiasiyo wete meamene wane uku. Nipa Ali Muno-
pala lipuane mekene uku-ye.
23
Gaiasi einagomeka wete meamene wa oko-ye. One yapu ne
noo wa no makutukoa moa mekakagoke uku. One yapukepa Yesuno ali atoa oboai tiki. I
take gapomane kuse kuse ago Erasetasi ni tone oyago Kuwotasi einagotameka kiwi peya
wete meamene wa iki-ye.
24
(Tone Ali Muno Yesu Keraisuyo kiwi peya pewe wia yopimotoane uku-ye. E e
nimini.)
Poloyo Akolali Kei Pikome Akenemo
25
Akolali kei piatoane uku. Oneme eya tokoke ni uku. Yesu Keraisunomo ali atoane
wene epetekakene ukumo olaukaku toa wedoa litia tomotoa kiwi tele takoa auapekala toko.
One eni auapeatekamopa papete one kaukoa mema nekeneyake
26
one agale to awea akane
ali-kitame i i wa wia mekama-kala nekeneya. Nititikaneyake tuameneya meemoa poko ago
Akolaliyopa e ku yatene peyame yakoa moa litia tomotono, onekemo oa pupitikakama
pamene wa oa tukaneya.
27
Akolali wa oatekagopa one odene meko. Pademo pademota padele padeleta peya
oneme odene wene tokono, one kei pia-kala katoane uku. Nipa Yesu Keraisu patu kautakoa
kakete enabuna nitatoane uku-ye. E e nimini.
Lomane Lomane
<<
16 16
>>
Taitasi
00
11
22
33
Taitasi Taitasi
<<
00
>>
^
Taitasi
Taitasi Keriti Take Mekome Toatekamo
Ada Atue Mane Mane Akenemo
Tuali Yatene Mane Mane Akenemo
Kueme Topo Toa Moa Egetane Yene
Mane Mane Akenemo
Keraisuno Ali Atoa Mea Epetekatikimo
Taitasi Taitasi
<<
00
>>
Taitasi Taitasi
<<
11
>>
TAITASI
Poloyo Taitasike Wia Wetekane Pipia
1
1
Polo nopa Akolaline pupu takama yawane Yesu Keraisunomo oane auane yawane
tuku agome uku.
Akolaliyopa one takoa motane ali atoame onekele wedoa takama pomotono ta wa no
moa kakaka. Ni oneke nate wene pianeya lukoa memotono, one niminimo pine to a
olaukamene wa moa kakaka.
2
One niminimo pine to ane olaukakilepa ali atoa auapekene eya
wane olaukakuya. Akolaliyo itono tibuta wete latiameneyake one ali atoa mea kama
poatekoi wene toopianeya. Akolaliyo kapene agale wakamokagome nitou wa oa pikana toa
taatekoa too. One taatekoa tokale nepia mekilepa wedia mea nepi meamene wane
olaukakuya.
3
One eni taatekoa toateka oi nokale toto toa motokago Akolaliyo one eina
papete wene toopikana i i wa mo wima pamene wa no wene takoa moa kakaka.
4
Taitasi nepa no-pala kibutua Akolalinele takama yakolo tekene anu mana tetepo
takoane mekene i pipia wiane wini wetekaku-ye.
Atai Akolali-pala tota toa motokago Keraisu Yesutame ne Taitasi pewe wia tepe
kolotini kilikoa pikoa toe wane neke kowitikoane uku-ye.
Taitasi Keriti Take Mekome Toatekamo
5
Keriti take mekene titiane tokounakale neme toa togoano ta wane ne wida tewitikoane
pokouna. Nipa wini ta ludu ali atoame ta latia pitikika Yesuno yene talo toatiki ali-kiti takoa
moa kakakala tamene wane pokouna.
6
Nitikounano, nepala okouna toa teke dikane ali-kiti
takoa moamene. Ete-kitame akoa agale oatikile toamoa ni atoa odeneka moa koua mea tiki
ali-kiti takoa moamene. Ni kini mana kono-mikitipa Yesuke wene tugoa mea kini okoi agale
tagamoa ele kule pale toamoa tadekolipa oyake takoa moamene. Eya wa wene toa nitamene.
7
Akolaline ali atoa talo takako agomepa nipa ete-kitame padeya namike akoa agale
oatikileka toamoo. Ni bu wamoa ete yene paya tetepo takamoa ni bia ue eya nokoa
kawamoa ni lene piamoa ni eya kuya ako-kama mou wa wene piamoa too.
8
Nitamokome
talo agome eya too. One yapu ne noo wa ali atoa makutukoa moa nee takoa lawetoa ni ele
kule epetaneleke wene piitikaneya mea ni utanele toa ni wene kiyo akenele toa ni Akolalinele
takakilepa odene wene pianeya mea toa ni poti wene pia yawa too.
9
One olaukanemopa ipa
niminimono, yakoane moamedeku wa wedoa pikoa kawoo. Nitoapa one olaukane toa pine
ina ina wa ete yene mane mane oo. Wa pade-kitame yakamadete wakoli mane oa mokala
too. Enile-kala wedoa tiki ali-kiti takoa moa kakakala tamene wane uku. Ni edoa-mo.
10
Talo tiki ali-kitame tamene wa iki toa tagoa toamiki ali kainya matiyame pademo
pademo pamo oa ete yene oa yotokoa tiki. Kini losule tekete ali mati yatene kepene teigaki
Yu yename edikakilepa ete yene moa patukoa tiki.
11
Dikaki yene ete ali-kitane yapu pekete
pademo pademo wamatikimo olaukaketepa kini mati atoane wene bebo akakala tiki. Lede
kue moadete ni tiki. Nitikala tikino, kini agale wawe wa moa kawikamene.
12
Wini Keriti take
yatene ago pade wene muno meane agome one yatene ko ikilepa eya wa akeneya. Keriti ali-
kitame kapene agale oa ni yoko keneya mea ni loyo mekete nee eya nokoa kawa tiki wa
akeneya.
13
Einapa nimini akedekono, wini yename Akolalinele kiyoke-kama takama
pomotono, eya wa wedoa kikoa akamene.
14
Yu yename la agale keneya pamo ikimo yakoa
moamoa ni Akolaline agale ete pimotoa waki-kitame tamene wa ikile litia toamoa tamene wa
kikoa akamene.
15
Poane wene takoa koikatapeneya meko agomepa nipa padeyaka kitau okoya wa
wamokome eya kuya peya epetane tetepo takoa meko. Wene moa koiganeya Keraisuke
wene tugoa meamiki-kitamepa epetaneyaka poaneyaka takoa enamekete eya kuya peya
poane tetepo takoa meki. Kini wene-pala tepeta moa koiganeya mekete ni tiki.
16
Nitoapa
Akolali wene tuku wa ikiyake padele padele tikilepa Akolali meamene tetepo takoa tiki.
Dikane yenepa Akolaliyo kote tokolo wako. Padele epetaneleka tamele toamokolo ele kule
koiganele toma yaki.
Taitasi Taitasi
<<
11
>>
Taitasi Taitasi
<<
22
>>
2
Ada Atue Mane Mane Akenemo
1
Keraisuno ali atoa mea epetekakete toatekoile olaukanemo pine to a i i wa neme mane
mane oa olaukoa tamene.
2
Ada yatene-pala eya wa mane mane amene. Gerepi po ku ue eya
nokoa kawamoa ni ete-kitame kei piatikile toa ni uutukoa poti yawa ni Akolalinele wedoa
takama yawa ni ete ali atoake wene mekoa mea ni ke enekakolo meketeka ko wameneya
Akolalinele takoa togamene wa mane mane amene.
3
Eina toa atue yatene-palaka eya wa mane mane amene. Akolaliyo takoa motane atoa-
kiti mea epetekatiki toa mea ni akoa agale wamoa ni gerepi po ku ue nokoa kawamoa ni ete
atoa-kiti mea epetekatiki toa i i wa olaukoa tamene wa mane mane amene.
4
Atue yatename
tuatoa yatene i i wa ana mati-kitike wene mekoa mekete toatikile olaukoa eya waka olaukoa
tamene wa mane mane amene.
5
Uutukoa poti yawa ni eko ali-kiti leneme kode noamoa ni
yapu pupu epetekoa toa ni poti ko akene wene pia ni aname tamene wa oka toa litia tamene
wa wini atue yatename tuatoa yatene olaukamotono ta. Ete-kitame Akolalinemopa pamo
tetepo takakayano, nitimotono ta wane uku.
Tuali Yatene Mane Mane Akenemo
6
Eina toa tuali yatene uutukoa poti yamene wa mane mane amene-ye.
7
Taitasi neke
yake tokale tuali yatename litia tomotono, padele padele tikilepa epetanele-kama tamene.
Pademo pademo olaukakilepa pademo koiganemo ikileka toamoano, poti wene kibututukoa
oa tamene.
8
Nepala poi te ia meki-kitamepa nepala akoa agale wamomotono, kiyo akenemo-
kama amene. Nipa totome natemo omotadiya wa kakoike kini wa ya momotono, nitamene.
Kueme Topo Toa Moa Egetane Yene
Mane Mane Akenemo
9
Kueme topo toa moa egetane yene-pala eya wa olaukamene. Pine yename okoi toa-
kama litia tamene. Nipa neno wameneya wedoa tamene. Padele padele tikilepa pine yenane
wene epetekatikile toa enekala tamene.
10
Kinikiya kode moameamene. Nitameneya kinikiya
pikoa metekamele toko wa pine yename wene tomotono, kinikile wedoa takama pamene.
Pupu pine yename toto toa motoko ago Akolalinekemo kei pimotoa tekete nitamene wa
pupu yene mane mane amene wane uku.
11
Nimo ikilepa Akolaliyo ali atoa peya pewe witikene toane mou wa papete wene
toopikanakale taatekoa taneyake ni uku.
12
Einagome eya tamene wa toto wene takako.
Papete one agale tagoa toamoa itonole ele kule toada wa wene pia tokoinakale tewitikoa
wamene. Ni itonoke mekilepa uutukoa poti yawa ni kiyo akenele toa ni oneke nate wene
pianeya lukoa mea tamene wa toto wene taka taka toko.
13
Nitikono, tone Akolali ako odene
mekago toto toa motokago Yesu Keraisu einago pa teleta tootapeneya wakapea nomotoa
totome nepia meko. Nipa nokome toto pewe wia kawoono, ke wa wedianeya nepia meko.
14
Einago Keraisu totoke tukilepa ele kule poanele tokooleme toto moa labakaneya mekoota
toa moademe taneya. Nitoapa oneke-kama lukoa meamene wa toto takoa motikilepa poane
wene koikatapeneya memotoa tokome taneya. Nipa epetanele-kama tou wa wene pia
tomotoa taneya.
15
Wini ali atoa i i wa olaukoa ni mena mena wa mane oa moa tikilepa nipa nepala ina
ukuna toapa Akolali patu kautakoa kake tamene. Padameka ne paya tetepo takamomotono,
wedoa meamene-ye.
Taitasi Taitasi
<<
22
>>
Taitasi Taitasi
<<
33
>>
3
Keraisuno Ali Atoa Mea Epetekatikimo
1
Wini ali atoa eya tamene waka wene taka taka tamene. Ta yopiki yene Kanosolo yene
meba yene enika eni yeneke poti lukoa meamene. Kini okoi agaleka yakoa toa ni ele kule
epetanele toadete nodokoa meamene.
2
Ni odenago-palaka akoa agale wamoa potimo-kama
oa tamene. Yete pade ali atoa peya mama motikilepa poti ko akene wene pia tamene wa
wini ali atoa wene taka taka tamene.
3
Totomeka papete padele padele pale toa ni tone totono litia toamoa ni Setanuyo oa
yotokakale etepea pote ni ko la utukole-kama tou wa ele kule pale tikilepa enika enileme tone
wene moa labakaneya mekete tokoo. Nitaneya mekete ete-kiti-pala wene poaneya mea ni
eko panagoneya tepi moa tokoo. Nipa ete oto wa topo takoapa tone tone timini luunali
yoma yakoo.
4
Nitima yakooka toto toa motoko ago Akolali ali atoake wene mekoa
mekome auapeateka oi nokale
5
toto toa motikilepa tone kiyo akenele tokoole-kitike tokoya
mena. One weneme toto ela motokome toka. Nitoapa kini namolo poane wene wia
wawano, ue moamene wa one Epetane Yomini totoke moa wetekakilepa one mea kawatiki
mana kono-mikiti latikademe toka.
6
One Yomini eni moa wetekakilepa toto toa motoko ago
Yesu Keraisu yoto pitia awinome mea tagatapemotoa toka.
7
Totopa poanele toamene yene
tetepo takademe pewe eni witikome eya toka. One a tibuke mea kama poateko peku
lawetatekale nepia memotoa one peku mati moa latikaka.
8
Taitasi nepala ina okouna etene
nimini okala tanemo ukuno, i i wa wedoa olaukama pamene. Akolalike wene tugoa meki-kiti
padele padele epetaneleke wene piitikaneya mea toma pomotoane ukuno, nitamene wane
uku. Ina ukupa epenemo uku. Ali atoa peya auapeatekomo eni uku.
9
Pade-kitamepa
pademo pademo pamo oa pili pili toa ni kini kaua-mikiti tama nekenemoke agale to onali yoa
ni padele padeleke neno oa ni Mosesene totonoke pamo oa mokota oa tiki. Ali atoa
auapeamekete pata pamo eni okala tikino, enika enimo oa kakoika titi toma yamene.
10
One
agaleme ali atoa pili pili toa kamotoa toko ago-pala mena wa mane oa motokale
yakameadekalepa wa mane oa moamene. Nitikale wa yakameadekalepa einago titi toa wake
wamene.
11
Dikane ali-kitipa wene moa koiganeya mekete poanele-kala tiki. Poanele eni
tadeku wa wene teketeke tiki wa neme wene teke toko.
12
Panago Atemasi patu Tikikasi patu pa wane neeke wini moane wetekakolu nokalepa
nipa Nikopolise take noateka pake piadekalepa wete kotuatono namene. Niti tane tokene-
menekepa Nikopolise take pone mepou wane wene pikene ni uku.
13
Eya agota koiso
totono pine wene toa to a oko ago Sinasi-pala Apolosita kini poatikika pomotono, wedoa
auapeamene. Padeya-kiti toamokolopa kini moatikiya moa meamene.
14
Padeya-kiti
toamokolo pa ponopeneya meki-kiti auapeato wa tone wini oya ali atoame eya tamediki.
Padele padele epetaneleke wene piitikaneya mea toomoa pamediki. Nipa nego noma
yawameneya ta pataka abuna pupu wedoa toomoa pamediki.
15
Nopala opia meki peyame ne Taitasi wete meamene wa iki. Wini take Keraisunole
takama yakete totoke wene mekoa meki-kiti wete meamene wa akamene-ye.
Akolaliyo kiwi peya pewe wia yopia memotoane kowitikoane uku-ye.
Opa anu agale eni.
Taitasi Taitasi
<<
33
>>

Witu (Wiru) Bible Papua New Guinea

Uploaded by

Copyright:

Available Formats

Witu (Wiru) Bible Papua New Guinea

Uploaded by

Document Information

Copyright

Available Formats

Share this document

Share or Embed Document

Sharing Options

Did you find this document useful?

Is this content inappropriate?

Copyright:

Available Formats

Witu (Wiru) Bible Papua New Guinea

Uploaded by

Copyright:

Available Formats

Weneya Totono Keraisu Yesunomo

You might also like