Bâ-hong

Bâ-hong (Eng-gí: Hansen's disease, kán-siá HD, ì-sù: Hàn-seng--ê Pēⁿ), mā sī Thái-ko-pīⁿ. I sī bâ-hong koáiⁿ-khún (Mycobacterium leprae) a̍h-sī mî-bān-sèng bâ-hong hun-ki koáiⁿ-khún (Mycobacterium lepromatosis) chō-sêng ê bān-sèng thoân-jiám-pēⁿ.

Nā jiám-tio̍h, khó-lêng chō-sêng sîn-keng, hì-kńg, phôe-hu kah ba̍k-chiu tio̍h-siong. Sîn-keng sún-siong ē hō͘ thiàⁿ-thàng ê kám-kak siau-sit, khó-lêng chō-sêng sù-chi hoán-hok tio̍h-siong a̍h-sī khang-chhùi siū kám-jiám khiok bô hoat-hiān, soah tì su-iàu pō͘-hūn chia̍t-chi. Kám-jiám-chiá mā khó-lêng chhut-hiān kun-bah bô-la̍t, ba̍k-chiu khòaⁿ bē chheng-chhó ê chèng-thâu. Chèng-thâu tāi-khài tī jiám-tio̍h liáu-āu chi̍t-tang í-lāi tō ē khai-sí, m̄-koh mā ū lâng chèng-chōng ài 20 tang í-siōng chiah ê hoat-seng.