法國

法國國旗

法國地圖

法國（粵拼：faat3 gwok3），又叫法蘭西（faat3 laan4*1 sai1；法文：France）係歐洲一國，正名叫法蘭西共和國faat3 laan4*1 sai1 gung6 wo4 gwok3（法文：République française）。除咗歐洲部份之外，佢重有好多海外屬土。法國本土喺地中海同英倫海峽及北海之間，由萊茵河伸展到大西洋。法國人叫佢本土做L'Hexagone，皆因佢本土似六角形咁解。法國同比利時，盧森堡，德國，瑞士，摩納哥，安道爾，西班牙接壤嘅。因為法國有海外屬地，所以佢又同巴西同蘇里南（法屬圭亞那）、荷屬安的列斯（聖馬丹，法文：Saint-Martin）接壤。而北面嘅英國同法國雖然無接壤，但係喺英吉利海峽之中，有一條英法海底隧道連接住英國同埋法國。

由於法國係第一次世界大戰同埋第二次世界大戰嘅戰勝國，因此佢係聯合國安全理事會五個常任理事國嘅成員。另外，法國又係歐洲聯盟同埋北大西洋公約組織嘅創始國兼會員國。亦都係神根公約嘅成員。

史

早喺一百八十萬年前舊石器時代，法國地域已經有人住.。

法國人嘅祖先就係居住喺今日嘅意大利、比利時、法國、荷蘭、德國、萊茵河北部嘅高盧人。佢哋喺古羅馬時代，畀羅馬政府視為野蠻人。佢哋亦都有過反抗羅馬軍團入侵嘅光榮歷史，但最後都打唔過羅馬軍團。法國同埋其他歐洲北部嘅地方最後都成為羅馬帝國嘅領土。

而法國呢個國家出現嘅時期就係喺十世紀。當時嘅查理曼帝國開始分裂，東部領土形成德意志，中部領土形成勃艮第，而西部嘅領土就形成法蘭西。

喺十四世紀至十五世紀期間，法國同英格蘭因為法國國王嘅繼承權嘅紛爭而爆發咗一場持續成百幾年嘅戰爭，呢場戰爭就係所謂嘅英法百年戰爭。喺呢場戰爭嘅初期同埋中期，法國軍隊不斷失利。而英格蘭軍隊就愈戰愈勇，佔領咗大半個法國。就喺毫無希望之下，一位日後舉世皆知嘅英雄人物終於出現，佢就係聖女貞德。貞德係一個嚟自農村嘅女仔，佢聲稱自己喺十六歲嘅時候，係村莊入面嘅一樖大樹下面見到三個天使：聖彌額彌、聖瑪嘉烈、聖凱瑟琳。三位天使帶咗一個神諭畀佢，入面話畀貞德知，佢將要率領法國軍民趕走英格蘭軍隊。就係呢個神諭呼召之下，佢決定到當時查理王儲居住嘅地方—希農城去見查理王儲。因為只有咁樣，佢先可以得到兵權，去帶領軍隊反抗英格蘭人。最後佢成功見到查理王儲，而呢次會面嘅結果係，查理王儲容許畀一支軍隊佢，要佢帶領軍隊趕到當時畀英格蘭軍隊圍困嘅城市—奧爾良，打一場幫奧爾良城軍民解圍嘅仗。但由於佢當時只係一個農村女子，冇錢冇武器。所以，佢嘅馬匹、長劍、軍旗、盔甲、頭盔、侍從都係人哋出錢幫佢買。

貞德喺呢場戰爭入面亦不負所託。英格蘭軍隊本身擁有極大優勢，奧爾良呢個城市畀佢哋佔領只不過係時間問題。但係當貞德同埋佢嘅部隊只係用咗九日嘅時候，就將英格蘭人趕走。成功解除英格蘭人對奧爾良城嘅封鎖。跟住，愈來愈多本身反對貞德嘅法國將領，都轉而支持貞德，貞德支軍隊嘅人數愈來愈多。佢嘅部隊成功創出一次又一次嘅輝煌戰績。但係一四三零年五月二十三號嘅一場小戰鬥入面。貞德畀勃艮第人俘虜。勃艮第人將貞德交畀英格蘭人。英格蘭人對貞德進行一次又次一次唔公平嘅審判之後，最後對貞德作出十二條指控。一四三一年五月三十號，英格蘭人判處貞德火刑，呢場火刑喺盧昂進行。貞德就咁離世，離世嘅時候只有十九歲。但亦因為佢嘅死，激起法國人嘅鬥志。喺佢離世之後二十二年，法國人成功將英格蘭人趕出法國。百年戰爭因為法國贏咗而結束。

十五世紀末，法國逐漸變成一個以中央集權制、君主專權制為主嘅國家。而十五世紀至十八世紀入面，最著名嘅法國國王就係路易十四。呢種情況一直發展到法國大革命期間嘅一七九二年，法蘭西第一共和國建立先至完。

法蘭西第一共和國只係運作咗幾年，拿破崙喺一七九九年靠政變得到法國控制權，後來做埋皇帝（法蘭西第一帝國）。之後法國一路擴張，差唔多吞晒成個歐洲大陸，而歐洲多國亦結盟同法國打過，直到一八一四年歐洲多國打贏法國，拿破崙被放逐，喺法國大革命冇咗江山嘅波旁王朝復辟為止。一八一五年拿破崙捲土重來，但好快又打輸咗（滑鐵盧戰役），並再一次被放逐，波旁王朝再一次復辟。

一八三零年，波旁王朝再次被推翻（法國七月革命），之後嘅七月王朝亦只係維持咗十八年，就俾法蘭西第二共和國取代。一八五二年，拿破崙個姪拿破崙三世建立法蘭西第二帝國，一八七零年法國打輸畀普魯士，法國第三次成為共和國。

踏入二十世紀，法國參與過兩次世界大戰，其中喺第二次世界大戰期間法國打輸畀軸心國，並分裂成德國佔領區同埋同軸心國合作嘅維希法國，直至軸心國打輸場仗。一九四九年，法國第四共和國成立，一九五八年再變成今日嘅法蘭西第五共和國。

政區

法國政區

法國政區 (2016)

法國有27個大區（法文：région），本土有22個，海外有5個。行政區可以細分做101個部（法文：département），部又可以再細分做341個細區（法文：arrondissement）。

本土大區：

• 亞薩斯 （法文：Alsace）
• 亞基坦 （法文：Aquitaine）
• 奧維涅 （法文：Auvergne）
• 下諾曼第 （法文：Basse-Normandie）
• 勃艮第 （法文：Bourgogne）
• 布列塔尼 （法文：Bretagne）
• 中央 （法文：Centre-Val de Loire）
• 香檳亞丁 （法文：Champagne-Ardenne）
• 科西嘉 （法文：Corse）
• 法朗什孔泰 （法文：Franche-Comté）
• 上諾曼第 （法文：Haute-Normandie）
• 大巴黎 （法文：Il-de-France）
• 朗格多克鲁西雍 （法文：Languedoc-Roussillon）
• 利穆贊 （法文：Limousin）
• 洛林 （法文：Lorraine）
• 南庇里牛斯 （法文：Midi-Pyrénées）
• 北加萊海峽 （法文：Nord-Pas-de-Calais）
• 羅亞河畔 （法文：Pays de la Loire）
• 皮卡第 （法文：Picardie）
• 波杜莎宏特 （法文：Poitou-Charentes）
• 普羅旺斯阿爾卑斯蔚藍海岸 （法文：Provence-Alpes-Côte d'Azur）
• 隆河阿爾卑斯 （法文：Rhône-Alpes）

海外大區：

• 法屬圭亞那 （法文：Guyane française）
• 瓜德羅普 （法文：Guadeloupe）
• 馬提尼克 （法文：Martinique）
• 馬約特 （法文：Mayotte）
• 留尼旺 （法文：Réunion）

出面網頁

• 〈国家概况 — 中华人民共和国外交部〉 (簡體中文)。中華人民共和國外交部。
• 〈法蘭西共和國 French Republic - 歐洲地區 - 中華民國外交部 - 全球資訊網 Ministry of Foreign Affairs, Republic of China (Taiwan)〉 (繁體中文)。中華民國外交部。
• フランス基礎データ ｜ 外務省 （日文）
• "France - United States Department of State" (英文). 美國國務院.
• 法國喺中央情報局《世界概況》嘅資料 （英文）
• 〈フランス共和国 ｜ 外務省〉 (日文)。日本外務省。
• "France - Department of Foreign Affairs and Trade" (英文). 澳洲外交貿易部.