五旬節

Pentecoste

五旬節（拉丁化希臘文：Pentecost，意思係 ｢五十｣），又叫七七節、收穫節、新果實節。五旬節同七七節兩個名都係源於猶太教，但係因為基督宗教叫五旬節，而今猶太教淨係用七七節呢個名。喺基督宗教嘅傳統逾越節被復活節取代，所以基督宗教嘅五旬節係復活節之後第七個星期日，基督教又叫聖靈降臨節，天主教又叫聖神降臨節。

五旬節起源

五旬節又叫七七節，以色列人要從尼散月18日，佢哋嘅大祭司將一捆新熟嘅大麥獻畀耶和華作為初熟果子嘅嗰日，計起七個星期。一共係49日，然後佢哋會喺第50日守七七節。當後嚟一班猶太人將聖經譯成希臘文嗰陣，希臘文嘅「第50」（日）一字係賓特哥斯提（pentecostē′）。因此，講希臘話嘅猶太人就將七七節稱為賓特哥斯特（英文Pentecost，五旬節）。

五旬節係從逾越節（紀念祖先以色列人從古埃及離開嘅日子）開始計起嘅第50日（一旬為10日），所以稱之為五旬節。喺猶太教，呢一日係摩西喺西奈山領受上帝畀佢《十誡》嘅日子，亦係「感謝律法嘅紀念日」。呢個節日同時亦用嚟感謝上帝賜與嘅收獲，所以又稱收割節同初熟節，係猶太人嘅三大節期之一。

聖靈降臨節

對基督教嚟講，五旬節就係《使徒行傳》第二章記載聖靈降臨喺眾門徒身上嘅日子。當聖靈傾注喺門徒身上，門徒就得到力量同勇氣，並得到講方言傳福音嘅恩賜。因為噉樣，亦有人認為係早期基督教會成立嘅日子。但關於聖靈降臨節嘅慶祝，最早記載係喺四世紀末，由西班牙修女以塞利亞所寫嘅《朝聖記》記載。聖靈降臨節亦係聖靈降臨期嘅開始。