寫作風格
寫作風格（粵拼：se2 zok3 fung1 gaak3）係指某個或者某班人寫嘢嗰陣特有嘅風格：一個個體可以有佢嘅寫作風格，所以文壇人士可以討論「呢位呢位作家，同其他作家喺風格上有咩分別」噉嘅問題；一班個體亦可以有佢哋嘅寫作風格—文壇人士可以討論（例如）唐朝嘅人同宋朝嘅人（唔同時期）嘅人寫嘢風格上有乜分別，又或者嶺南學派同中國其他地區嘅儒學者（唔同地區）寫嘢風格上有乜分別。
風格話到明係「獨特鮮明」，就表示一套風格一定透過比較得出嘅：例如而家話某位作家有佢嘅風格（一個個體有風格），就表示佢寫或者講嘅嘢同第啲作家比起嚟，有某啲零舍唔同嘅地方；又例如而家話香港人同澳門人口頭講故仔嘅風格有啲分別（一個群體有風格）—譬如香港人可能成日夾雜嚟自英文嘅借詞，而澳門人就比較多出自葡萄牙話嘅借詞，呢啲觀察都係透過比較先至留意得到嘅。
