死亡地帶

死亡地帶（紅色）喺黃石國家公園（綠色）入面嘅位置

死亡地帶（英文：Zone of Death）係喺美國西部嘅一個地方，範圍係愛達荷州境内屬於黃石國家公園嘅嗰塊大概130平方公里咁大嘅地。之所以叫死亡地帶係因為美國法律入面有條法律罅，喺呢度犯咗法嘅人理論上唔使負刑責，就算殺咗人都可以走得甩。

解釋

黃石公園風景

死亡地帶指黃石國家公園西南邊同愛達荷州重疊嘅嗰塊地，約莫130平方公里大。佢唔係一個行政分區，而只係美國其中一條法律罅嘅適用範圍。美國法學家白賴仁．高特（英文：Brian C. Kalt）發現喺呢度犯咗法可以走法律罅，就算係殺咗人都冇事。為咗帶出呢個問題有幾嚴重，佢就幫呢度改咗個英文花名叫Zone of Death，中文意譯做「死亡地帶」。

背景

根據美國憲法第三條第二款，除咗彈劾案之外，其他所有罪案都要喺案發地嗰個州入面俾陪審團審訊。而第六修正案其中一條叫做「鄰近條款」（英文：Vicinage Clause）嘅條文仲寫到明話，被告有權要求俾案發地所在嗰個州兼夾嗰一區嘅公正嘅陪審團審訊，而且審訊要迅速同公開。

美國聯邦政府對黃石國家公園有專屬管轄權，即係話任何喺黃石公園入面發生嘅罪案都要交俾聯邦地區法院去處理，州法院冇權審理。雖然死亡地帶喺愛達荷州境内，不過佢唔歸愛達荷聯邦地區法院去管，而係屬於懷俄明聯邦地區。噉係因為懷俄明區嘅範圍包嗮成個黃石公園，而公園嘅邊界伸到入愛達荷州同蒙大拿州境内，所以懷俄明區仲係美國目前唯一一個對多過一個州嘅地方有管轄權嘅聯邦地區。

法律罅

按照美國憲法嘅寫法，任何喺死亡地帶發生嘅刑事案件揾嘅陪審員都要嚟自愛達荷州兼懷俄明聯邦地區，即係話陪審員要喺死亡地帶入面揾。但係死亡地帶連一個居民都冇，更莫論揾十二個出嚟組陪審團。於是辯方律師就可以捉住呢點，拗話冇陪審團就唔可以合憲噉審訊，理論上唔可以對被告判刑，所以被告就算犯咗殺人罪都打得甩。

歷史

發現

死亡地帶呢條法律罅係由密芝根州立大學法學院教授白賴仁．高特發現嘅。佢係專門研究美國憲法嘅法學家，當時寫緊一篇文，係關於美國憲法第六修正案嘅一啲技術細節嘅。佢忽發奇想就諗話如果有個地方唔夠陪審員噉會點呢，然後諗下諗下就驚覺黃石公園愛達荷州嗰橛gyut6真係唔夠人組成陪審團。佢為咗叫政府關注呢個漏洞，就決定將論文嘅重心擺喺呢條法律罅上面。佢最後寫出嚟篇文叫《完美罪案》（英文：The Perfect Crime），喺2005年刊咗喺《喬治城法律期刊》（英文：The Georgetown Law Journal）上面。

除咗寫呢篇文之外，高特一路都有遊說美國國會同懷俄明州當地嘅議員去解決呢個問題。尤其係佢篇文出咗街之後，佢好驚有人睇到會用佢嘅方法犯法然後逃避刑責。不過無論係國會定懷俄明州議會都冇理到呢單嘢。

衍生小說

去到2007年，美國作家查理斯．占士．薄斯（英文：C. J. Box）為咗令政府警惕呢條法律罅，就用死亡地帶做背景寫咗本小說。本書叫做《自由射擊》（英文：Free Fire），劇情圍繞住喺死亡地帶入面發生嘅四單謀殺案。薄斯卒之引起咗一位議員嘅關注，不過國會一樣冇理到呢位議員。

有關案例

2005年12月，有個叫米高．包德蘭（英文：Michael Belderrain）嘅人喺黃石公園蒙大拿州嗰部分非法打獵，俾人拉咗。案發地同死亡地帶一樣，都係屬於懷俄明聯邦地區但唔屬於懷俄明州嘅。雖然黃石公園蒙大拿州嗰頭有人住，但係喺得幾十個人揀嘅情況之下，好難砌一個公平、冇偏見嘅陪審團出嚟。

懷俄明區嘅聯邦法官為咗唔俾包德蘭甩身，決定唔理第六修正案寫明嘅要求，照俾懷俄明聯邦地區法院審理呢單偷獵案。包德蘭於是引用高特篇文反對，話噉做唔啱規矩，不過俾法官駁回佢嘅反對。包德蘭最後同控方達成咗認罪協議，減刑嘅條件係包德蘭唔可以針對呢條法律罅提出上訴。亦即係話，死亡地帶呢個問題又變返懸而未決。