海盜博弈

海盜博弈（英文：Pirate game）係一個數學博弈，係最後通牒博弈嘅多玩家版本。

遊戲規則

有五個理性嘅海盜甲、乙、丙、丁、戊得到100個金幣，想諗辦法分配。

呢五個海盜有嚴格嘅等級制度：由高至低，甲 > 乙 > 丙 > 丁 > 戊。

佢哋分配金幣嘅方法並唔係平均分配，而係咁嘅：由最高級嘅海盜開始，佢提出一個分配方案，然後由全部海盜投票決定通唔通過個方案（自己都有得投），只要獲得一半或以上嘅票數支持，提議就會通過，海盜就會根據提議分配。如果唔通過，提議人就會被掉落海，然後由剩低最高級嘅海盜再提出新嘅分配方案，直到有方案獲得通過爲止。

啲海盜會根據以下三個條件去決定佢哋嘅策略：首先，自己唔會被人掉落海；其次，自己攞到越多金幣越好；最後，如果其他條件相同，優先選擇掉其他人落海。