策略思考

  提示：呢篇文講嘅唔係策略計劃。

呢幅相影到有個人喺度捉圍棋；佢諗「要點樣行先至可以贏」嘅思考過程，屬於策略思考。

策略思考（粵拼：caak3 loek6 si1 haau2）係指一個個體諗出一套策略嘅思考過程。做策略思考嘅人會集中精力追求達到目的（目的好多時係要打低對手），包括事前計劃要做乜、預測對手會點行動、仲有係喺競爭開始後做決策。策略思考可以係由人腦做嘅，不過廣義上可以包埋人工智能做嘅策略思考——教人工智能玩遊戲嘅研究表明，人工智能都可以展現出策略思考噉嘅行為。

主要步驟

睇埋：策略同決策

對於策略思考要點做，唔同人有唔同見解，不過一般嚟講，做策略思考通常都要諗以下呢啲嘢：

1. 理解規則：玩遊戲（想像捉象棋）嗰陣，玩遊戲嘅人實要理解遊戲嘅規則，包括理解遊戲嘅目的係乜（例如捉象棋係要食咗對方隻將軍）同埋有乜嘢限制。就算唔係玩遊戲，策略思考都必然會涉及一定嘅專家知識，思考者要對「呢種呢種行動，傾向會引致咩後果」有返咁上下熟。
2. 分析現狀：思考者實要理解現狀；達成遊戲目的，基本上就係要將現狀變成理想狀態（理想狀態：自己贏嘅狀態），包括係搵出環境當中有咩機會可以利用，自己有咩弱點，對手有咩強點，仲有係資源喺咩地方... 等等。可以睇埋強弱危機分析嘅概念。
3. 策略計劃：思考者要制定長遠同短期嘅目標，例如喺一隻戰略遊戲當中，長遠目標可能係要擴張自己嘅領土，而短期目標可能係要搜集資源，為領土擴張做準備；喺呢個過程當中，思考者有需要諗吓唔同嘅短期目標「邊個重要啲」，而且仲要有彈性，諗吓有邊啲情境係大機會發生嘅，以及係自己要點樣應對呢啲情境。可以睇睇情景計劃或者係博弈論講嗰啲策略。
4. 預測對手行動：思考者亦有必要估計對手會做乜，知道對手嘅動機係乜，並且就每一個「對手有機會採取嘅行動」準備定對抗手段；有關呢樣嘢要點做，可以睇吓最大最小化同埋其他博弈論概念。
5. 做決定：喺競爭進行途中，思考者要做一路評估現況，估算每個可能行動有咩風險同可以帶嚟咩回報。
6. 學嘢同適應：一般認為，成功嘅策士會不斷噉 updateap1 dei1 自己嘅所知；事實表明，遊戲規則、現狀以及「邊種行動最有利」等嘅變數都有可能隨時間而變化，策士有必要不停噉作出適應。

有學者同智庫工作者指，老練嘅策士可以習慣噉作出呢啲思考過程。

策士之間交手嗰陣，望落垂手可得嘅回報好多時都係陷阱，例如國際象棋嘅誘餌戰術就涉及犧牲自己一隻棋，引誘對方為咗食嗰隻棋而將自己嘅棋移去不利嘅位置嗰度。策士要防範自己因為衝動想達到短期目的，而一嘢踩落對手嘅陷阱。

數據點用

睇埋：數據科學

有好多學者同智庫工作者都認為，策略思考重點係要整合已有嘅數據，多過搵數據，例如加拿大管理學者亨利·明茨伯格就噉講：

粵文翻譯：（策略思考）係整合（將啲點點連埋一齊）多過分析（搵啲點點出嚟）。做呢樣嘢旨在要獲取管理者由所有資訊源（包括由佢同佢身邊嘅人嘅個人體驗而嚟嘅軟性洞見，以及由市場研究等來源嚟嘅硬數據）攞咗資訊，再將學到嘅嘢結合成一個大方向，指導間公司應該向邊個方向前進。

而廿世紀上半嘅法國將軍兼軍事家安德烈·博福就噉講：

粵文翻譯：（策略思考）係一種心智過程，又抽象又理性，要求諗嘢嘅人能夠結合心理同物質方面嘅數據，識得分析同結合。

睇埋

• 策略家
• 博弈論
• 有限理性
• 批判思考

外拎

• （英文） 咩係策略思考？，harvardbusiness.org