Hofburg

Hierdie artikel bevat nie ’n bronnelys nie, wat beteken dat die inhoud nie geverifieer kan word nie. Enige bevraagtekende inligting mag dus ook mettertyd verwyder word. Help Wikipedia deur betroubare bronne tot die artikel by te voeg.

Die Hofburg rondom 1900 vanuit 'n lugballon

Die Hofburg is 'n paleis in Wene. Dit was vanaf die dertiende eeu tot 1918 die residensie van die Habsburgse aartshertoë en later van die keisers van Heilige Romeinse Ryk en van Oostenryk. Sedert 1945 dien 'n deel van die paleis as die amptelike residensie van die bondspresident van Oostenryk. Die voormalige woonkwartiere van die keiserlike huishouding is nou 'n museum en kan besoek word. Die Oostenrykse Nasionale Biblioteek is ook in die kompleks. Gedurende die tyd van die Oostenrykse monargie het Hofburg gedien as die winterresidensie, Schloss Schönbrunn as die somerresidensie van die keiserlike familie. Sedert September 2017 is die Hofburg ook tydelik die setel van die parlement van Oostenryk. Tydens die renovasie van die parlementsgebou vergader sowel die Nasionale Raad as die Bondsraad in die Redoutensaal van die Hofburg.

Onder die Habsburgse keiser Rudolf I word in 1279 'n begin gemaak met die bou van 'n kasteel op die terrein van die Schweizerhof (Switserse Hof). In die daaropvolgende eeue word dié gebou so dikwels verbou en aangebou dat daar niks meer te sien is van die oorspronklike struktuur nie. In Middeleeuse dokumente word daarna verwys as castro wiennensi en die Alte Burg (Ou Kasteel). Die gebou sien op daardie staduim uit as 'n tipiese Middeleeuse kasteel met hoektorings en 'n groot binnehof.

Toe keiser Ferdinand I in die middel van die sestiende eeu sy residensie na Wene verskuif, begin die verbouing van die Alte Burg in die Renaissance Hofburg. Bestaande vleuels word vergroot en nuwes word gebou. Al die Habsburgse heersers wou hul stempel op die Hofburg afdruk, wat veroorsaak het dat die Hofburg verskeie argitektoniese syle deur die geskiedenis vertoon. Vleuels uit die Middeleeue, Renaissance, Barok en vleuels in die historiserende styl van die negentiende en vroegtwintigste-eeu is almal te vind in dié kompleks.

In die periode 1881–1913 met die bou van die Neue Burg vind die grootste uitbreiding van die Hofburg plaas. Die Neue Burg is 'n reusagtige geboë vleuel wat van die oue dele van die Hofburg tot aan die Ringstraße uitstrek. Vanaf die balkon van die Neue Burg kondig Adolf Hitler in 1938 die Anschluss van Oostenryk by Nazi-Duitsland aan.

Die keiserlike woonstelle rondom die Amalienburg sien vandag nog dieselfde uit as in die tyd van keiser Franss Jozef en keiserin Elisabeth (Sisi).

Besienswaardighede

In die Hofburg vind mens deesdae die volgende besienswaardighede:

• Die Neue Burg (Nuwe Kasteel) aan die Heldenplatz (Heldeplein) met daarin:
  • die Oostenrykse Nasionale Biblioteek
  • Die Weltmuseum (Wêreldmuseum – Etnografise Museum)
  • Die Ephesosmuseum (antieke versameling uit Efesos in Kleinasië)
  • Die Organisasie vir Veiligheid en Samewerking in Europa (OVSE)

• Die Alte Burg met daarin:
  • Die Albertina
  • Die Augustinerkirche (Augustynekerk), die voormalige hofkerk van die kaiserlike familie
  • Die Spanische Hofeitschule (Spaanse Ryskool)
  • Die Hofbibliothek (keiserlike Biblioteek)
  • Die keiserlike woonstelle (museum)
  • Die Sissi-Museum
  • Die Schweizerhof
  • Die kaiserlike Skatkamer

Galery

• 
  Die Michaelvleugel
• 
  Die Leopoldvleugel met daarin die kantore van die Bondspresident van Oostenryk
• 
  Die Amalienburg
• 
  Die oostenrykse kroonjuwele in die Keizerlike Skatkamer
• 
  Michaelvleugel