Recordiau Cambrian
| Enghraifft o'r canlynol | cwmni record, label recordio annibynnol  |
|---|---|
| Daeth i ben | 1980 |
| Dechrau/Sefydlu | 1967 |
| Genre | Pop Cymraeg, cerddoriaeth boblogaidd, côr, Canu gwerin |
Label recordiau Cymreig oedd Recordiau Cambrian (weithiau hefyd Label Cambrian neu Recordiau Cambria) neu Cambrian Records yn Saesneg. Lleolwyd y cwmni ym Mhontardawe, dan arweiniad Josiah Jones. Fe'i cysylltir gyda lledaeniad canu pop Cymraeg ysgafn o'r 1960au canol ymlaen. Sefydlwyd y cwmni yn 1967 a daeth yn ran o grŵp Decca yn 1974,[1] gyda recordiau i’w gweld ar label Cambrian tan tua 1980 pryd ddaeth y label i ben (Ymddengys i Cambrian gyhoeddi cofnodion o 1967 tan tua 1980).[2] Sefydlwyd y cwmni gan Josiah Jones ("Josh Cambria").[1] Lleolwyd hwy ar 18, Stryd Fawr, Pontardawe,[3] ac yn 1968 rhoddwyd eu cyfeiriad fel 5, Primrose Rd, Pontardawe.[4]
Hanes a Chyd-destun
[golygu | golygu cod]Bu Josiah Jones yn gweithio rhywfaint i gwmnïau Recordiau Qualiton a Welsh Teldisc cyn gadael Teldisc yn 1967 i gychwyn cwmni Cambrian.
Bu i Cambrian gyhoeddi tua 120 o LPs, 90 EP a thua 45 sengl, yn ôl y drefn rhifo. A chopïau ar gasét o rai ohonynt, er bod y rheini'n fwy prin. Recordiau Cymraeg oedd cynnyrch pennaf y cwmni, ac ambell i record Saesneg gan unigolion a grwpiau o Gymru.[1]
Fel y labeli mawr eraill yng Nghymru - Recordiau Qualiton, Recordiau'r Dryw, Welsh Teldisc a Sain - ni chafodd Cambrian lawer o sylw yn y byd cerddoriaeth Brydeinig ond roedd yn sylfaenol bwysig i fyd cerddorol Cymru. Nodir bod y recordiau'n cael eu gwasgu gan gwmni Orlake, a’i fod yn dosbarthu ei recordiau ei hun drwy’r post.[2]
Rhoddwyd dosbarthiad ehangach i rai recordiau: nododd ‘RR’ ar 15 Tachwedd 1969 fod sengl gan y Triban, ‘Leaving On A Jet Plane’ (CSP-707) ar gael trwy Lugton a H.R. Taylor, tra bod rhifyn y 7 Mawrth 1970 yn dweud bod yr un ddau ddosbarthwr yn trin albwm gan yr Hennessys.
Is-label Glenwood
[golygu | golygu cod]Am gyfnod gymharol fyr, roedd yna is-label o’r enw Glenwood.[2]
Roedd yn arbenigo mewn caneuon gwerin neu gorawl, a phop canol y ffordd, er bod rhywfaint o ganu gwlad yn y catalog yn ystod y ddwy neu dair blynedd olaf. Er syndod, mae 'Buona Sera', ochr 'B' sengl Keith Gordon 'Myfanwy' (CSP-744), mewn arddull jazz draddodiadol.[2]
Artistiaid
[golygu | golygu cod]Artistiaid Cymraeg a Chymreig oedd mwyafrif catalog Cambrian. Roeddynt yn cynnwys rhai o enwau mawr canu poblogaidd Cymraeg yr 1960au hwyr a'r 70au cynnar, megis Iris Williams, yr Hennessys, Max Boyce, Hogia Llandegai, Hogia Bryngwran, Hogiau'r Deulyn, Y Perlau, Y Cwiltiaid, Y Derwyddon a Richie Thomas. Recordiau Cambrian bu hefyd yn gyfrifol am ryddhau'r hyn a ystyrir y sengl roc Gymraeg gyntaf gan grŵp Y Blew yn 1967.
Llwyddiant Brydeinig
[golygu | golygu cod]Y brif reswm mae'r label yn adnabyddus i bobl y tu allan i Gymru yw ei fod wedi cyhoeddi sawl record gan Mary Hopkin, a gafodd hit Rhif 1 gyda 'Those Were The Days' yn 1968 ar label Apple y Beatles.
Recordiau Sain
[golygu | golygu cod]Ymddengys i Recordiau Sain brynu catalog caneuon Recordiau Cambria gan ailryddhau nifer fawr o'r caneuon megis 'Pererin Wyf' gan Iris Williams a ryddhawyd yn wreiddiol gan Cambrian yn 1971.[5]
Cambrian Records newydd, wahanol
[golygu | golygu cod]Yn ddryslyd sefydlwyd label arall o'r enw Cambrian Records, heb gysylltiad â'r Cambrian Records wreiddiol. Maent wedi eu lleoli yng "Nghanolbarth Cymru".[6]
Gweler hefyd
[golygu | golygu cod]Dolenni allanol
[golygu | golygu cod]- Erthygl ar Cambrian ar Y Blog Recordiau Cymraeg (2021)
- 'Cambrian' erthygl y label ar wefan 'Seventies Seven'
Cyfeiriadau
[golygu | golygu cod]- ↑ 1.0 1.1 1.2 "Cambrian". Y Blog Recordiau Cymraeg. 1 Tachwedd 2021. Cyrchwyd 8 Ebrill 2024.
- ↑ 2.0 2.1 2.2 2.3 "Cambrian". Seventies Seven. Cyrchwyd 8 Ebrill 2024.
- ↑ "Cambrian". Discog. Cyrchwyd 8 Ebrill 2024.
- ↑ "Y Perlau". 45cat. Cyrchwyd 18 Ebrill 2024.
- ↑ "Pererin Wyf". Sianel Irish Williams recordiad oddi ar Y Caneuon Cynnar / The Early Recordings 2000 Sain (Recordiau) Cyf. 2010-07-01. Cyrchwyd 8 Ebrill 2024.
- ↑ "Cambrian Records". Twitter @cambrianrecords. 2 Chwefror 2024.
