Please Please Me (canción)
| «Please Please Me» | |||||
|---|---|---|---|---|---|
| Canción de The Beatles | |||||
| do Álbum Please Please Me | |||||
| Lanzamento | Reino Unido - 11 de xaneiro de 1963 Estados Unidos - 30 de xaneiro de 1964 | ||||
| Formato | Sinxelo 7", 45 RPM | ||||
| Gravada | 26 de novembro de 1962— EMI Studios, Londres | ||||
| Xénero musical | Beat, Rock and roll | ||||
| Lingua(s) | {{{lingua}}} | ||||
| Duración | 2:04 | ||||
| Discográfica | Parlophone (GBR) Vee-Jay Records (USA) | ||||
| Produtor(es) | George Martin | ||||
| Escritor(es) | Lennon—McCartney | ||||
| Cronoloxía | |||||
| |||||
| Miscelanea | |||||
Please Please Me foi o segundo sinxelo lanzado polo grupo de rock británico The Beatles no Reino Unido, e o primeiro publicado nos Estados Unidos. Tamén é o tema que dá título ao seu primeiro LP, que foi gravado para capitalizar o éxito do sinxelo.[1] Era orixinalmente unha composición de John Lennon,[2][3][4] aínda que a súa estrutura definitiva viuse significativamente influenciada por George Martin.[5]
O 22 de febreiro de 1963, a canción alcanzou o n.º 1 nas listas de sinxelos do New Musical Express (a táboa de éxitos do momento máis recoñecida) e do Melody Maker, pero só chegou o posto n.º 2 na lista do Record Retailer, que evolucionaría despois en lista oficial do Reino Unido reflectindo este último dato.
O sinxelo, que se lanzou inicialmente con «Ask Me Why» na cara B, non foi moi exitoso nos Estados Unidos, pero cando se reeditou o 30 de xaneiro de 1964 (esta vez con «From Me to You» na cara B) alcanzou o n.º 3 no Hot 100 de Billboard.
Composición
[editar | editar a fonte]The Beatles xa lograran un modesto éxito co seu sinxelo debut «Love Me Do», pero fóra de Liverpool e Hamburgo seguían sendo descoñecidos. Parte do problema consistiu en que a finais de 1962, o grupo iniciara unha última xira en Hamburgo, nese tempo, o sinxelo «Love Me Do» fixo a súa aparición nas listas de éxitos británicas, polo que non estiveron dispoñibles para promocionar activamente o sinxelo na súa terra de orixe.[6] Con todo, o seu produtor George Martin sentía que era un inicio prometedor, e decidiu seguir adiante cun segundo sinxelo. Martin declarou que a versión orixinal do tema era «bastante mala», «demasiado lenta» e, polo tanto, tiña poucas posibilidades de darlle un éxito á banda; insistía en que mellor deberían editar «How Do You Do It?», unha composición de Mitch Murray. Martin pensaba que era a mellor alternativa para conseguir o interese por parte do público. O grupo respondeu que só estaban interesados en gravar o seu propio material.[5] McCartney dixo: «Había como un sinal no grupo de que debiamos rexeitar 'How Do You Do It?'». Ringo Starr comentou: «Recordo que todos nós estabamos dispostos a defender a idea de 'escribimos estas cancións e imos traballar con elas'.» En última instancia, George Martin seguía apelando á canción, pero máis tarde declarou: «[Eu] aínda publicaría 'How Do You Do It?' si eles non me convenceran de escoitar outra versión de 'Please Please Me'.»[7]
Orixinalmente, «Please Please Me» foi composta para o xénero musical blues, con ritmos demasiados lentos. Respecto diso, o seu autor principal comentou:
«Recordo o día en que a escribín (...) Oía a Roy Orbison cantar 'Only the Lonely', ou algo así. E sempre estivera intrigado polo xogo de palabras dunha canción de Bing Crosby que era: 'Please lend a little ear to my pleas', o que me interesou nela foi o dobre uso da palabra please. Así que foi unha combinación musical entre Roy Orbison e Bing Crosby».John Lennon
Orixinalmente, a canción era vocalmente escasa, non contiña ningunha harmonía vocal, e tampouco a introdución do só de harmónica. George Martin escoitouna por primeira vez nas sesións de gravación de «Love Me Do», o 11 de setembro de 1962, e na súa opinión eran necesarios varios axustes.[8] Martin pediu ao grupo que se fixesen cambios importantes nela, incluíndo aumentar a súa velocidade. Cando se volveu a interpretar no estudo o 26 de novembro de 1962, a canción modificarase radicalmente, de tal xeito que George Martin predixo que a canción sería o primeiro grande éxito da banda.[9]
Gravación
[editar | editar a fonte]
A gravación de «Please Please Me» realizouse durante unha sesión de tres horas no estudo dous de EMI, o 26 de novembro de 1962.[10] O grupo chegou ás 6:00 pm ao estudo e comezou a ensaiar durante unha hora, despois iniciaron as gravacións da canción. Graváronse 18 tomas de «Please Please Me», incluíndo dobraxes do só de harmónica de John Lennon.[10]
Inicialmente McCartney interpretaba as notas altas, mentres que Lennon mantíñase na harmonía, un truco que a banda aprendeu co éxito de The Everly Brothers «Cathy's Clown», en abril de 1960.[2] McCartney dixo: «Fixen o truco de permanecer na nota alta mentres que as melodías deslizábanse por baixo de ela».[11] Ringo Starr afirmou que os períodos de gravación de «Please Please Me» forón moi diferentes aos de «Love Me Do» en relación á súa capacidade musical.[9] O apoio dos afeccionados locais con «Please Please Me» axudou a que fose unha innovación,[12] especialmente a que The Beatles realizasen as súas primeiras xiras no Reino Unido e que fosen capaces de aparecer en influentes programas de televisión nacional como Thank Your Lucky Stars,[13] onde «Please Please Me» foi elixida a única canción que o grupo interpretaría naquela actuación.[14] «Please Please Me», xunto coas demais cancións orixinais súas pertencentes o seu álbum debut, foi acreditada como McCartney-Lennon. Isto cambiaria nos LP posteriores do grupo, nas que foron acreditadas a Lennon-McCartney.
Lanzamento orixinal estadounidense
[editar | editar a fonte]Capitol Records, a etiqueta de EMI nos Estados Unidos, recibiu a oferta de lanzar «Please Please Me» nos Estados Unidos, pero rexeitouna.[15] Logo de varios rexeitamentos de distintas empresas discográficas, a gravación foi ofrecida a Vee-Jay Records, quen finalmente aceptou publicar «Please Please Me» nos Estados Unidos.[15] A data exacta do lanzamento nos Estados Unidos perdeuse durante décadas, pero unha investigación publicada en 2004 mostrou que o sinxelo «Please Please Me»/«Ask Me Why» foi publicado por Vee-Jay o 7 de febreiro de 1963, un ano antes da primeira visita de The Beatles aos Estados Unidos.[16]
Dick Biondi, un disc jockey da estación WLS en Chicago e amigo do executivo de Vee-Jay Ewart Abner, tocou a canción na radio, quizais o 8 de febreiro de 1963, converténdose así no primeiro DJ que tocaba unha canción de The Beatles nos Estados Unidos.[17] Art Roberts, DJ lendario e director musical nese momento, comentou como a gravación foi tocada por primeira vez na estación de radio:
«Déixame que che conte a historia de 'Please Please Me'. A canción foi lanzada polo selo Vee-Jay. Era unha compañía discográfica local de Chicago. O propietario, Ewart Abner, trouxo un exemplar da gravación á WLS. Eu era o director musical nese momento e escoitei a súa historia sobre un grupo, e mirei as fotos dunhas revistas para adolescentes que trouxo de Inglaterra. Pensei, e si este grupo chega a ser tan popular nos Estados Unidos como o son en Inglaterra e Europa? Así que agreguei a gravación na lista de reprodución».
Significado da letra
[editar | editar a fonte]Sobre o significado da letra da canción, algúns vírona como máis atrevida do que ao principio parecía. Para o crítico musical Robert Christgau, certas frases referíanse claramente ao sexo oral, especialmente o verso «You don't need me to show the way, love» (Non me necesitas para mostrarche o camiño, o meu amor,) e o verso «Please please me, oh yeah, like I please you» («Compráceme, oh, si, como eu te comprazo a ti»).[18] O mesmo opinou Tim Riley, que a chamou «a primeira canción pop sobre o sexo oral». Non obstante, aínda que Lennon habería de deslizar a miúdo insinuacións sexuais nas súas cancións posteriores como «Happiness is a Warm Gun», parece que aquí non foi de forma voluntaria. Os Beatles en todos os casos sempre negaron este sentido.[19] O xornalista Steve Turner, ao igual que outros críticos, vírono simplemente como unha celebración da igualdade para o pracer sexual.[18]
Recoñecementos
[editar | editar a fonte]A información respecto dos recoñecementos atribuídos a «Please Please Me» Esta adaptada de AcclaimedMusic.net[20]
| Publicación | País | Lista | Ano | Posición |
|---|---|---|---|---|
| Bruce Pollock | Estados Unidos | As 7.500 cancións máis importantes dos anos 1944-2000 | 2005 | * |
| Paul Williams | Estados Unidos | Rock and roll: Os 100 mellores sinxelos de todos os tempos | 1993 | * |
| Rolling Stone | Estados Unidos | As 500 mellores cancións de todos os tempos | 2004 | 184 |
| Rolling Stone | Estados Unidos | As 500 mellores cancións de todos os tempos (lista revisada) | 2010 | 186[21] |
| Spin | Estados Unidos | Os 100 sinxelos máis grandes de toda a historia | 1989 | 93 |
| Stephen Spignesi e Michael Lewis | Estados Unidos | As 100 cancións máis grandes de The Beatles | 2004 | 71 |
| Mojo | Reino Unido | As 101 mellores cancións de The Beatles | 2006 | 24 |
| Uncut | Reino Unido | As 50 cancións máis grandes de The Beatles | 2001 | 48 |
| Toby Creswell | Australia | 1001 cancións | 2005 | * |
(*) listas designadas sen unha orde establecida.
Persoal
[editar | editar a fonte]O persoal utilizado na gravación da canción foi o seguinte:
- The Beatles
- John Lennon - voz, guitarra rítmica, harmónica.
- Paul McCartney - voz, baixo eléctrico.
- George Harrison - harmonía vocal, guitarra solista.
- Ringo Starr - batería.
- Equipo de produción
Notas
[editar | editar a fonte]- ↑ (Norman 1993, p. 169)
- ↑ 2,0 2,1 (MacDonald 2005, p. 62)
- ↑ (Harry 1992, p. 528)
- ↑ (Miles 1997, p. 91)
- ↑ 5,0 5,1 (The Beatles 2000, p. 90)
- ↑ (Norman 1993, p. 163)
- ↑ (The Beatles 2000, p. 77)
- ↑ (Lewisohn 1988, p. 20)
- ↑ 9,0 9,1 (Lewisohn 1988, p. 23)
- ↑ 10,0 10,1 "Recording: Please Please Me single". The Beatles Bible (en inglés). 2008-2009. Consultado o 18 de decembro de 2009.
- ↑ (Miles 1997, p. 92)
- ↑ (Norman 1993, p. 159)
- ↑ (Harry 1992, p. 648)
- ↑ (Riley 1989)
- ↑ 15,0 15,1 (Spizer 2004, p. 14)
- ↑ (Spizer 2004, p. 15)
- ↑ (Spizer 2004, p. 17)
- ↑ 18,0 18,1 Turner 1999, p. 35
- ↑ Rybaczewski, Dave. ""Please Please Me" History". beatlesebooks.com (en inglés). Consultado o 26/08/ 2013.
- ↑ "The Beatles - Please Please Me". acclaimedmusic.net. Arquivado dende o orixinal o 27/07/2013. Consultado o 7/11/2013.
- ↑ "500 Greatest Songs of all Time". Rolling Stone (en inglés). Consultado o 7/11/2013.
Véxase tamén
[editar | editar a fonte]Bibliografía
[editar | editar a fonte]- The Beatles (2000). The Beatles Anthology (en inglés). Londres: Cassell & Co. ISBN 0-304-35605-0.
- Harry, Bill (1992). The Ultimate Beatles Encyclopedia (en inglés). Londres: Virgin Books. ISBN 0-86369-681-3.
- Harry, Bill (2000). The Beatles — Encyclopedia. Revised and updated (en inglés). Londres: Virgin Publishing. ISBN 0 7535 0481 2.
- Lewisohn, Mark (1988). The Complete Beatles Recording Sessions (en inglés). Londres: Hamlyn. ISBN 0-600-55798-7.
- MacDonald, Ian (2005). Revolution in the Head: The Beatles' Records and the Sixties (en inglés) (2ª edición revisada ed.). Londres: Pimlico (Rand). ISBN 1-844-13828-3.
- Miles, Barry (1997). Paul McCartney: Many Years From Now (en inglés). Nueva York: Henry Holt & Company. ISBN 0-8050-5249-6.
- Norman, Philip (1993). Shout! — The True Story of the Beatles (en inglés). Londres: Penguin Books. ISBN 0-14-017410-9.
- Riley, Tim (1989). Tell Me Why — The Beatles: Album by Album, Song by Song, The Sixties and After (en inglés). Vintage Books. ISBN 0-6797-2198-3.
- Spizer, Bruce (1998). Songs, Pictures and Stories of the Fabulous Beatles Records on Vee-Jay (en inglés). Nueva Orleans: 498 Productions. ISBN 0-9662649-0-8.
- Spizer, Bruce (2004). The Beatles Are Coming! The Birth of Beatlemania in America (en inglés). Nueva Orleans: 498 Productions. ISBN 0-9662649-9-1.
- Turner, Steve (1999). L'Intégrale Beatles: Les Secrets de toutes leurs chansons, nouvelle édition augmentée (en francés). París: Hors Collection. ISBN 2-258-04079-5.
Ligazóns externas
[editar | editar a fonte]- Letra de «Please Please Me»Arquivado 05 de novembro de 2013 en Wayback Machine.
