Senterpartiet

Alle dei norske partia har politikk for korleis dei meiner samfunnet skal vere. Senterpartiet er kjent for

• å vere mot EU
• at dei vil gi meir pengar til Forsvaret og politiet
• at dei vil ha færre ulv i Noreg, så sauer ikkje blir drepne av ulv
• at fleire saker skal avgjerast nærare der folk bur, i kommunestyra, ikkje på Stortinget
• at dei vil ha politi, sjukehus, ambulanse og brannvesen over heile landet

Saker som er viktige for alle politiske parti i Noreg er for eksempel politikk for skatt, og politikk for klima og miljø.

Senterpartiet vil bruke ganske mykje pengar på skule, helse og andre tenester over heile landet. Derfor vil dei òg at folk og bedrifter skal betale nokså mykje skatt. Dei vil likevel at dei som tener lite, skal betale mindre skatt.

Partiet vil produsere meir miljøvennleg energi, som vasskraft og vindkraft. Dei vil likevel halde fram med å leite etter, og hente opp, olje. Dei vil at dei som jobbar med olje framleis skal ha jobb, og at staten skal tene pengar på oljen.

Ei viktig sak for Senterpartiet er at folk skal ete meir norsk mat. Dei meiner at den norske maten er trygg og sunn, og at det er miljøvennleg å ete mat som ikkje har reist så langt. Dei vil at staten skal gi meir pengestøtte til bønder og fiskarar. Dei vil òg at det skal bli dyrare å kjøpe mat frå utlandet.

Senterpartiet sit i regjering saman med Arbeidarpartiet. Leiaren for Senterpartiet, Trygve Slagsvold Vedum, er finansminister i regjeringa, og har ansvar for statsbudsjettet.

I stortingsvalet i 2021 blei Senterpartiet det tredje største partiet på Stortinget.

Like mange kvinner og menn stemmer Senterpartiet. Dei er mest populære utanfor dei store byane.

Senterpartiet blei til i 1920. På denne tida var mange i Noreg bønder. Først heitte partiet Bondepartiet. Det blei populært og fekk mange stemmer. I 1959 var ikkje like mange i Noreg bønder lenger, og partiet skifta namn til Senterpartiet, for å vise at dei ikkje berre var eit parti for bønder.

Senterpartiet har samarbeidd med mange ulike parti gjennom historia. Dei siste åra har dei samarbeidd mest med Arbeidarpartiet og Sosialistisk Venstreparti.

Ungdomsorganisasjonen til partiet heiter Senterungdommen. Han blei starta i 1949.

• politisk parti
• Stortinget
• val
• demokrati