Dat Flerovium is wohrschienlich 1999 an’t Vereenigte Institut för Karnforschen in Dubna, Russland tüügt worrn, bi en gemeensome Arbeit vun Forschers ut dat Institut un vun’t Lawrence Livermore National Laboratory. Dat Opdecken is in’n Juli 2011 vun de IUPAC bestätigt worrn, sodat dat Element nu offiziell in dat Periodensystem vun de Elementen opnahmen worrn is
[1]. An’n 30. Mai 2012 is de Naam vun de IUPAC annahmen worrn, de in’n Dezember 2012 för dat ne’e Element vörslahn worrn is[2]. Bit dorhen harr dat den vörlöpigen Naam Ununquadium mit dat Atomteken Uuq. De ne’e offizielle Naam is to Ehren vun den russ’schen Physiker Georgi Fljorow utwählt worrn.
Dat bestännigste vun de Flerovium-Isotopen is dat sup>289Fl. Mit en Halfweertstiet vun 2,7 Sekunnen hett dat Isotop en vergliekswies hoge Bestännigkeit, wenn man naverte Elementen in’t Periodensystem bekieken deit. Dat kummt dorvun, dat de Atomtall 114 en so nöömte magische Tall vun de Karnphysik is. Nukliden mit so en Tall wiest afslatene Nukleonschalen in’n Karn op, wat jem bestänniger maakt. En Fall vun dubbelt magische Tall gifft dat bi dat Isotop 298Fl. Dor is denn ok de Neutronentall magisch, so dat de Karnforschers glöövt, dat dat Isotop noch bestänniger wesen künn. Man, bit hüüt hett dat noch nich klappt, dat Isotop to tügen.
L. Stavsetra, K. E. Gregorich, J. Dvorak, P. A. Ellison, I. Dragojević, M. A. Garcia, H. Nitsche: Independent Verification of Element 114 Production in the 48Ca+242Pu Reaction. In: Phys. Rev. Lett. 103, 2009, S. 132502, DOI 10.1103/PhysRevLett.103.132502
