Tjörnin

Tjörnin er ein innsjø i sentrum av Reykjavík på Island. Tjörnin byr på eit rikt fugleliv; meir enn 80 fuglearter er observert, mellom anna bergand, grågås, snadderand, stokkand, raudnebbterne og ærfugl. Nær 50 av dei oppheld seg der regelmessig. Om vinteren blir ei råk halden open for fuglane ved tilførsel av varmt vatn.

Fleire viktige institusjonar og byggverk omkransar Tjörnin. Ved nordenden ligg Reykjaviks monumentale rådhus frå 1992, Ráðhúsið. Her ligg også det tradisjonsrike teaterhuset Iðnó, bygd som handverkarane sitt hus i 1896, i dag restaurant. Mot nord ligg også det islandske parlamentet, Alþingishúsið og Reykjavik domkyrkje. Ved den austre stranda ligg Frikyrkja og Islands nasjonalgalleri. Nasjonalgalleriet (Listasafn Íslands) held til i ein bygning (Íshúsinu) som fyrst blei brukt til å lagre is som i tidlegare tider blei skore på Tjörnin. Bygningen fekk sin nåverande utsjånad ved Guðjón Samúelsson i 1916. Omkring den sørlege, smalare delen ligg byparken Hljómskálagarðurinn, mellom anna med ein skulptur av Bertel Thorvaldsen. Sør for parken ligg Islands universitet.