Kosterövo

Kosterövo
Костерёво

Lidnanznam	Flag
Valdkund	Venäma
Eläjiden lugu (2021)	7,113 ristitud
Pind	14,33 km²
Pämez'	Marina Klimova (reduku 2019—)
Telefonkod	+7−49 243-xx-xxx
Avtokod	33
Aigvö	UTC+3 (MSK+0)

Kosterövo (ven.: Костерёво) om Venäman lidn da lidnankund Vladimiran agjan suvipäivlaskmas. Se om Petuškan rajonan kaikiš penemb lidn eläjiden lugun mödhe koumen kesken.

Istorii

Eländpunktan aluz om pandud vl 1890 kuti Kosterövo-žilo raudtestancijanke ühtes. Se om nimitadud stöklantegimen Nikolai i Ivan Kosterövad-pidajiden kanzannimen mödhe. Kosterövo kändihe radnikžiloks vl 1938. Radnikžilo sai lidnan statusad vn 1981 30. päiväl heinkud.

Kosterövo šingotase tehnižen plastmassan pästandal (severz'-se edheotandoid, ende kombinat) i mecan ümbriradmižel.

Geografijan andmused

Lidn sijadase Sur' Lipn'-jogen randal (ven.: Большая Липня 55 km pitte, Kläz'man hura ližajogi, Volgan bassein), 115 m ü.m.t. keskmäižel korktusel.

Matkad Kläz'man randhasai om üks' kilometr suvhe, Vladimir-lidnhasai — 52 km pohjoižpäivnouzmha. Matkad lähembaižhe Petuškad-lidnhasai om kuz' kilometrad päivlaskmha sijaližedme avtotedme. «Volg»-avtote (M7) mäneb koume kilometrad pohjoižhe lidnan keskusespäi.

Tobmuz

Kosterövo om lidnankundan üks'jäižeks eländpunktaks.

Lidnankundan tobmuden pämez' om sen Rahvahandeputatoiden nevondkundan ezimez'. Edeližed lidnan pämehed (nevondkundan ezimehed) oma Oleg Räbov (tal'vku 2018 — reduku 2019), Jelena Volodina (reduku 2017 — tal'vku 2018), Valerii Turihin (Валерий Турыхин, kezaku 2016 — reduku 2017). Lidnan Administracijan pämez' om Vladimir Proskurin vn 2017 kül'mkuspäi. Edeline Administracijan pämez' om Lüdmila Žil'cova, radoi vn 2017 kül'mkuhusai.

Eläjad

Vn 2010 Venäman rahvahanlugemižen mödhe lidnan eläjiden lugu oli 9 073 ristitud, vn 2021 — 7 113 ristitud. Kaik 8 340 eläjad oli lidnas vl 2017. Kaikiš suremb lidnan ristitišt oli enamba 11 tuhad eläjid vll 1979−1996 (11 777 rist. vl 1989).

Ortodoksižen hristanuskondan kahten pühäpertin arhitekturine ansambl' sijadase lidnas, om saudud 19. voz'sadan ezmäižes poles.

Lapsiden opendusen aluzkundad oma koume päivkodid, kaks' keskškolad (nomer 1 i 2), čomamahtoiden škol (muzikškol edel 2011. vot). Professionaližen opendusen aluzkundad ratas lähembaižiš lidnoiš.

Transport

Ühtennimine Kosterövo-raudtestancii sijadase «Moskv — Vladimir»-raudtekeskustal. Kaks' avtobusmaršrutad (nomer 1 i 2) ratas lidnas. Avtobusad ühtenzoittas lidnad rajonkeskusenke, ezilidnelektrojonused — Moskvanke i Vladimiranke.

Galerei

• 
  Eläban Eziauguižen Stroican (ezimal) i Ristan Zdviženjan jumalanpertid, vn 2010 nägu
• 
  Puine pertišt (2010)
• 
  Kosterövo-päraudtestancijan sauvuz vl 2010

Irdkosketused

• Lidnan tobmuden sait (kosterevo.ru). (ven.)