FPL REVIEWER M2

     Ang buod ay isang pinaikling bersyon ng isang orihinal na teksto, o paglalagom ng mga

impormasyon, detalye o mga pangyayari mula sa materyal o pinanggalingan ng mga impormasyon.
Ito ay nagpapahayag ng mga  pangunahing punto na madalas na ginagawa sa obhetibong
paraan at gamit ang sariling pananalita ng manunulat; ngunit dito ay marapat na nananatili ang
diwa at mahahalagang detalye ng orihinal na pinanggalingan, at may pangunahing layunin na
mapadali at mas mapabilis ang pag-unawa sa tinatalakay na paksa. 

          Kung iisipin ay parang madali lamang ang pagbubuod, lalo pa at gawain na ito sa lipunan,
ngunit ang mga akademikong sulatin ay naiiba sa ibang mga babasahin. Halimbawa nito ang mga
pananaliksik na madalas ay may 5,000 na salita o higit pa, at ang kailangan para mabuo
ang abstrak ay 200-250 na salita. Kompleks din ang ibang akademikong sulatin, kahit ang hindi
pananaliksik, kaya madalas na nangangailangan ng dalawa o higit pa na pagbabasa para lubos na
maunawaan.

Aralin 3.1: Mga Uri at Nilalaman ng Buod

May tatlong pangunahing uri ang buod:

1. DESKRIPTIBO - buod ukol sa teksto na ibinabahagi ang mga pangunahing elemento o punto at

mahahalagang detalyeng sumusuporta. Ilan sa mga halimbawa nito ay ang mga buod sa pampanitikan
na mga sulatin: tula, kwento, pelikula, artikulo, sanaysay atbp., at ang executive summary na
inilalarawan ang isang proyekto, isang partikular na kurso ng aksyon, o isang panukala sa negosyo. 

2. IMPORMATIBO - buod ukol sa nilalaman ng teksto na kailangang tumpak na naghahatid ng

impormasyong nakapaloob sa isang teksto o sa iba pang uri ng mapagkukunan "nang walang mga
personal na opinyon sa paglalahad ng mga ideya sa pinagmulang teksto". Ito ay madalas na ginagawa
sa mga akademikong sulatin, at ilan sa mga ito ay ang:

a. MGA BALANGKAS - ipinakikita nito ang pagkakasunud-sunod at ang kaugnayan sa pagitan ng

mga bahagi ng nakasulat sa materyal. Halimbawa: TALAAN NG NILALAMAN

b. ABSTRAK - ipinakikita nito ang pangunahing punto ng mahahabang piraso ng teksto o isang

artikulo na tumutulong sa mga mambabasa na magpasya kung gusto nilang basahin o hindi ang mas
mahabang teksto. Madalas itong nakikita sa mga pananaliksik.

May Uri ang Abstrak

 Impormatibo - nilalaman nito ang halos lahat na impormasyon sa pananaliksik: ang

motibasyon, suliranin, pagdulog at pamamaraan, resulta, kongklusyon, na madalas ay binubuo
ng 200 na salita. Madalas itong ginagawa o ginagamit sa Siyensa at Engineering.

 Deskriptibo - ito ay mas maikli kaysa sa impormatibo, na may 100 na salita, at naglalaman

lamang ng suliranin, layunin, pamamaraan, saklaw at limitasyon. Madalas itong ginagawa o
ginagamit sa Humanidades, Agham Panlipunan, at Sikolohiya.
c. SINOPSIS - ipinakikita nito ang pagkakasunod na paglalarawan ng isang makasaysayang
kaganapan, kaganapan sa balita, o iba pang mga karanasan habang umuunlad ang mga ito.

3. EVALUATIVE - buod na nangangailangan ng pagsusuri ng manunulat upang maipakita ang

pagiging kapaki-pakinabang  at bisa ng materyal (maaaring pelikula, artikulo, sanaysay atbp.), lakas
ng argumento, at iba pang mahahalagang elemento. Halimbawa nito ang pinakamakabagaong uri
ng abstrak, tinatawag na Kritikal na Abstrak, na may pagkakatulad sa kongklusyon ng rebyu, at
naglalaman ng  impormasyon patungkol sa kasapatan, kawastuan, at kaangkupan ng mga
impormasyon sa pananaliksik.

    Kaakibat ng pagbubuod ng akademikong sulatin ang kritikal na pagbasa. Ito ang pagbasa na may

layunin na malalim at malawak na masuri at maunawaan ang impormasyon o mensahe na nais
iparating ng may akda, at ang kahalagahan nito sa mambabasa batay sa pagtalakay nito.

I. Bago Bumasa.

1. Dapat nababatid at malinaw na ang layunin, kinakailangan, at gustong

matutunan sa isasagawang pagbabasa. Nakakatulong ito para madaling makita
kung akma o kailangan ang nakitang babasahin. 
2. Maaaring tignan ang pamagat, paunang salita, at ang huling mga pangungusap upang
malaman ang pangunahing impormasyon. 
3. Dapat ding suriin ang awtor, publication date, listahan ng reperensya; kung angkop at
wasto ang lahat ay magkaroon ng hinuha/tanong bago basahin ang kabuuan ng
sulatin.

II. Habang Nagbabasa.

1. Isulat o ihaylayt ang mga susing salita, mahahalagang impormasyon, pangunahing

ideya o argumento, at ang mga pantulong na kaisipan, pahayag, at impormasyon.
Madalas na nakikita ang mga pangunahing kaisipan sa unahan, gitna, at huling bahagi
ng sulatin.
2. Maaari ding maglagay ng tanong at reaksyon sa mga pahayag, argumento, at iba pa.
Nakakatulong ang pagtatanong upang maging malinaw ang pag-unawa sa binabasa, at
walang makaligtaan.

III. Pagkatapos Bumasa.
1. Pagnilayan ang mga natutunan sa pagbasa.
2. Balikan ang mga naka-haylayt at isinulat na tanong, reaksyon, at iba pa. 

          Kapag malalim na ang pag-unawa sa sulatin, maaari na ang pagsasaayos ng mga salita at
organisasyon ng mga ideya upang maging epektibo ang pagsulat nito. 

1. Ipangkat at ihanay ang mga salita at ideya sa pamamagitan ng pagbuo ng balangkas.

2. Pag-isahin ang magkaugnay na salita at ideya para mabuo ang sariling mga pangungusap.
Matiyak na walang kinopya na pangungusap mula sa orihinal na teksto/sulatin.
3. Pagsamahin ang mga magkaugnay na mga pangungusap para maging talata, at para
mabuo ang burador. Gumamit ng angkop na mga transitional devices (Sa katunayan, Bukod
sa, Gayunpaman, atbp.) upang mapabuti ang kaisahan o magkaroon ng lohikal na daloy.
4. Basahin at iwasto ang burador (maling baybay, bantas, atbp.). Tanggalin ang mga malabis
o paulit-ulit na ideya. Tandaan din na ang buod ay pinaikling bersyon at dapat
tiyak/espesipiko.
5. Paghambingin ang nagawang buod at orihinal na bersyon para walang makaligtaan at
matiyak ang katumpakan.
6. Huwag kaligtaan ang pagkilala sa sors. Kunin sa orihinal na bersyon/sulatin ang Pangalan
ng Awtor, Petsa ng Paglalathala, Pamagat, Pangalan ng Naglathala, Lugar kung Saan
Inilathala, at ang URL (kung online). Hindi isinasama ang pahina sa pagbuo ng sanggunian.
Halimbawa: Llenaresas, J.B. (2022, Hulyo 30). Pagsulat ng Buod. New Era University Press
& Publications Office. New Era University.
 Iba't Ibang uri ng Sitasyon o Pagsisipi (Mga Pangunahing Ginagamit)

 Ang APA (American Psychological Asspciation) ang  madalas na

ginagamit na estilo sa akademikong pagsulat dahil madalas na
tumutukoy sa mga paksang panlipunan (social science) at teknikal.
Mas pinahahalagahan nitong estilo ang petsa, at sa kasalukuyan, ang
ginagamit na ay ang APA 7th Edition (2020). 
 Ang MLA (Modern Language Association) ay may pokus sa awtor,
at malimit na ginagamit sa mga paksa o kursong may kaugnayan sa
lenggwahe at humanities.
 Ang CMS (Chicago Manual of Style) ay malimit na sa mga paksa o
kursong may kaugnayan sa Kasaysayan dahil pinahahalagahan ng
lubos ang pinagmulan ng ideya o impormasyon. Madalas ito na
may footnote o endnote.

KATANGIAN NG ISANG MAHUSAY NA BUOD

          May iba’t ibang uri o istilo man ang buod ay may pareho naman na inaasahang katangian sa
pagsulat at pagsusuri nito. Masasabi na mahusay ang isang buod kung taglay ang mga sumusunod:
1. May Pokus o Pangunahing Tuon. Ito ang pagbibigay ng diwa o pangunahing impormasyon
sa nais iparating ng orihinal na teksto, pahayag o bersyon. Hindi lumilihis sa orihinal na akda;
walang dagdag na paliwanag, kaisipan, impormasyon o halimbawa. Madalas, nakatuon sa
thesis statement at pangunahing ideya o paksang pangungusap na dapat maisalin sa mga
mambabasa.
2. Obhetibo.  Ito ang tiyak na pagbibigay ng diwa ng orihinal na teksto, pahayag o bersyon.
Maaaring masagot ang mga tanong na ano, sino, kailan, paano, gaano, bakit, at iba pa na
makakatulong sa mambabasa.
3. Napananatili ang orihinal na mensahe gamit ang sariling pananalita ng
manunulat. Binibigyang diin na dapat ay walang halong sariling kritik o ideya ang pagsulat
ng buod, at walang kinopya na pangungusap mula sa orihinal na teksto/sulatin.

KAHALAGAHAN NG BUOD AT PAGBUBUOD

          Mula sa mga hakbang at katangian, tunay na ang buod ay may malaking maitutulong upang
mapadali ang pag-unawa sa mga orihinal na akda. Ang mahaba na mga teksto ay maipaparating ng
maigsi at sa madaling maunawaan. Sa mga gumagawa nito, hindi man madali, ay nahuhubog ang
kanilang kaisipan at kasanayan sa:
1. pagtukoy sa mga pangunahing salita at parirala na dapat tandaan upang makuha ang
mahahalagang ideya at mga mahahalagang detalye na sumusuporta dito;
2. paggamit at pagsasama-sama ng mga pangunahing salita at parirala sa teksto upang mabuo
ang pinaikling bersyon nito; at
3. pagkuha ng malaking seleksyon ng teksto at bawasan ito sa mga pangunahing punto.

        Sa akademya, isang karaniwang kasanayan ang pagbubuod ng isang argumento at mga

natuklasan, kaya ang buod ay may malaking maitutulong sa pagkuha ng mga pangunahing
impormasyon na kinakailangan upang maibigay ang lahat o sapat na impormasyon sa punto o paksa
na pinag-uusapan. Nakakatulong din ang buod sa mga hindi pa interesado o hindi pa makapag-
desisyon kung babasahin o papanoorin ang isang materyal. 
BUOD NG ARALIN

Ang buod ay isang pinaikling bersyon ng isang orihinal na teksto, o paglalagom ng mga

impormasyon, detalye o mga pangyayari mula sa materyal o pinanggalingan ng mga impormasyon.
May tatlong pangunahing uri ito: 

1. Deskriptibo - buod ukol sa teksto.

2. Impormatibo - buod ukol sa nilalaman ng teksto.
3. Evaluative - buod na nangangailangan ng pagsusuri ng manunulat.
          Kaakibat ng pagbubuod ng akademikong sulatin ang kritikal na pagbasa. Ito ang pagbasa na
may layunin na malalim at malawak na masuri at maunawaan ang impormasyon o mensahe na nais
iparating ng may akda, at ang kahalagahan nito sa mambabasa batay sa pagtalakay nito. Kapag
malalim na ang pag-unawa sa sulatin, maaari na ang pagsasaayos ng mga salita at organisasyon ng
mga ideya.

          Sa pagsulat ng buod, inaasahan na ito ay (1) may pokus at pangunahing tuon, (2) obhetibo,

at (3) napananatili ang orihinal na mensahe gamit ang sariling pananalita ng manunulat. Sa
pagsasagawa nito, tunay na mahuhubog ang kaisipan at kasanayan ng manunulat, at mapapadali ang
pag-unawa sa mga orihinal at mahaba na akda. Nakakatulong din ang buod sa mga hindi pa interesado
o hindi pa makapag-desisyon kung babasahin o papanoorin ang isang materyal.

Aralin 4: PAGSULAT NG SINTESIS

   Maliban sa pagbubuod, isa pa sa mga kasanayang pang-akademiko na kailangan na malinang upang
maging mahusay sa akademikong pagsulat, ay ang sintesis. Ito ay nagmula sa salitang Griyego
na syntithenai na sa Ingles ay put together o combine (Harper, 2016). Bilang isang sulatin, ang
sintesis ay tumutukoy sa  pinagsama-samang mga impormasyon, mga akda, punto, at
argumento na nakapagbibigay kaalaman at makahihikayat sa pinapanindigang punto de bista
hinggil sa isang paksa. 

          Ano ang pagkakaugnay ng buod at sintesis?

          Mula sa venn diagram, tunay na may kaugnayan ang buod at sintesis; parehong nagtatampok ng
pangunahing punto, at nangangailangan o gumagamit ng kritikal na pagbasa at kasanayan sa pagsulat.
Kaya kung ang ibubuod ay hindi lamang isang sulatin o materyal, at madagdagan pa ng iba pang buod
o pangunahing impormasyon mula sa kaugnay na sulatin o materyal, ito ay makapagbibigay pa ng
malawak at sapat na kaalaman at impormasyon sa punto o paksa na maaari pang humantong sa
bagong kaisipan. Ito ay lubhang makakatulong sa mambabasa lalo na sa mag-aaral (iskolar) na
makuha ang mga pangunahin at magkakaugnay na impormasyon upang mapalalim ang pag-unawa sa
kung bakit nangyayari ang isang bagay at kung saan eksaktong pupunta ang mga bagay.

Aralin 4.1: Iba't ibang Anyo at Uri ng Sintesis

Karagdagan, iba din ang sintesis sa paghahambing o pagsusuri, kahit na magkapareho sila ng buod na
nagtatampok ng pangunahing punto, at nangangailangan o gumagamit ng kritikal na pagbasa at
kasanayan sa pagsulat. Ang sintesis ay naglalahad ng matatag na posisyon sa pagtukoy ng mga
ugnayan sa pagitan ng mga impormasyon upang makatulong sa pagpapasya at sa pagbuo ng
mga patakaran. Upang mas lalong maunawaan ito, narito ang iba’t ibang anyo ng sintesis:

1. Nagpapaliwanag o explanatory synthesis. Ito ang pagbibigay linaw sa paksa sa

pamamagitan ng pagbibigay deskripsiyon o paglalarawan sa paksa upang maibigay ang mas
malinaw na kaisipan. 
 2. Argumentatibo o argumentative synthesis. Ito ang paglalahad ng mga makatotohanang
impormasyon mula sa iba’t ibang sors sa paraang lohikal upang suportahan at ilahad ang
pananaw o punto ng may akda. 

          Narito naman ang ilan sa mga uri ng sintesis:

1. Background Sintesis. Ito ang pagsasama-sama ng mga sanligang impormasyon ukol sa

paksa, at karaniwan itong inaayos ayon sa tema at hindi ayon sa sanggunian.

Halimbawa:
Karaniwang Pananaliksik - pangangalap ng mga inisyal na impormasyon ukol sa paksa (ito
ang madalas na ginagawa bago isulat ang pananaliksik ng bagong kaisipan)

2. Thesis-driven Sintesis. Ito ay halos katulad ng background synthesis ngunit

nagkakaiba lamang sila sa pagtuon, sapagkat sa ganitong uri ng sintesis hindi lamang
simpleng pagpapakilala at paglalahad ng paksa, ito ay nagbibigay ng malinaw na pag-uugnay
ng mga punto sa tesis ng sulatin.

Mga Halimbawa:
Mga Sanaysay at Pananaliksik na May Tiyak na Tesis 

NOTA: Ang tesis ay madalas na sumasalamin sa isang opinyon o paghatol mula sa isang
pagbabasa o personal na karanasan.

3. Sintesis para sa Literatura. Ito ang pagbabalik-tanaw o pagrebyu sa mga naisulat nang

literatura ukol sa paksa. Karaniwang isinaayos ang sulatin batay sa mga sanggunian ngunit
maaari rin namang ayusin ito batay sa paksa, at ito ay may pagsusuri mula sa manunulat o
mananaliksik.

Mga Halimbawa:
- Mga Kaugnay na Literatura at Pag-aaral (Review of Related Literature)
- Rebyu sa mga Magkakaugnay na Literatura sa panitikan 

Aralin 4.2: Mga Hakbang sa Pagsulat ng Sintesis

Sa pagsulat ng ganitong sulatin ay kinakailangang na may malawak na kaalaman gayundin ang

maraming oras sa paggalugad sa mga hanguang kailangan at may kaugnayan sa sulatin. Ang mga
sumusunod na hakbang ay isinaayos kasama ang ibinahagi ni John McNiel sa kanyang Step-by-Step
Synthesis (2020):

I. BAGO SUMULAT

1. Tukuyin at Linawin ang Layunin sa Pagsulat. Ang magiging layunin ng manunulat ang

magbibigay direksyon o gabay sa kanya kung anong uri, anyo ang kanyang gagamitin, para
saan ito gayundin ang paggalugad sa mga gagamiting reperensya o sanggunian kaugnay dito.

2. Piliin ang Sangguniang Aangkop sa Layunin. Ang pagtatagumpay ng sulating ito ay

nakasalalay sa tiyak na layunin at angkop na sangguniang gagamitin dito. 

3. Basahin at Unawain ang mga Sanggunian. Basahin ang bawat artikulo, kabanata o iba pang
mapagkukunan nang maraming beses na may iba't ibang layunin para sa bawat pagbasa. 

Ø  Sa unang pagbasa ay  makuha ang pangkalahatang-ideya ng materyal at maging pamilyar

sa mga pangunahing kaalaman.

Ø  Sa ikalawang pagbasa ay mapalalim ang pagkaunawa sa materyal at mamarkahan ang

 mga pangunahing konstruksyon, natuklasan o argumento na nauugnay sa iyong claim.
Maaaring gumamit ng iba't ibang kulay ng highlighter upang madali makita ang
magkakaugnay na impormasyon.

Ø Sa ikatlong pagbasa  ay magkaroon ng pagbabalik-aral at lubusan na pagtatala ng mga

pangunahing ideya at kaugnay na mga detalye.

4. Kunin ng organisado ang mga tala sa bawat pinaghanguan ng impormasyon. Maaaring

isabay ito sa ikatlong pagbasa, kung saan nagkakaroon na ng pagtatala sa bawat pahina o
sanggunian  na may label (may-akda at taon sa itaas).  Maaari rin na isagawa ito ng
may table na nahahati sa dalawa: ang una ay naglalaman ng mga pangunahing salita o parirala
upang makuha ang pangunahing konsepto at ang ikalawa ay mga detalye. 

5. Buuin ang Tesis ng Sulatin (Thesis-driven Sintesis). Kailangang tiyak ang tesis ng sulatin

sapagkat ito ang magiging pangunahing ideya ng awtput. Ilahad ito sa pamamagitan ng buong
pangungusap.

6. Tukuyin ang mga kaugnay na konsepto at pansuportang mapagkukunan. Kapag maayos

na ang mga sanggunian at tala, tukuyin na ang mga konseptong makikita sa mga ito (hal. mga
partikular na natuklasan sa paksa o pananaliksik, mga kahulugan ng mga termino, mga
implikasyon sa hinaharap at iba pang mga ideya na hinihimok ng layunin ng iyong papel).
Tandaan lamang na hindi lahat ng pinagmulan/sanggunian ay tutugon sa bawat konsepto,
kaya maaaring sa una ay gumawa muna ng master list ng lahat ng mga konsepto at
sanggunian, at pagkatapos ay hanapin ang lahat ng mga magkakaugnay at mapagkukunan na
sumasaklaw sa bawat partikular na konsepto sa artikulo o kabanata. 

7. Isaayos ang tala. Sa pagsasaayos ng tala, isipin na ito ay pinuputol at inaayos ayon sa
inaasahang artikulo; ikinakategorya ang mga ito ayon sa konsepto at isulat/i-paste ang mga ito
sa isang bagong pahina. Habang inililipat ang mga tala, bigyang-pansin kung aling mga may-
akda ang sumasang-ayon at kung alin ang nagtataas ng mga natatanging ideya na nauugnay sa
konsepto; makakatulong ito sa paggawa ng mga koneksyon habang sumusulat.. 

8. Ayusin ang mga konsepto sa isang balangkas. Ito ang pagsasaayos ng batayan ng papel
gamit ang nabuong tala ng konsepto at koneksyon. Dito nagpapasya kung paano
makahulugang pagsasama-samahin ang mga konsepto sa ilalim ng mas malalaking tema. At
ang teknik sa pagbuo ng sintesis ay nakaayon sa bubuuing balangkas ng manunulat.
Mayroong iba’t ibang teknik sa pagbuo ng sintesis tulad ng pagbibigay  halimbawa o
ilustrasyon, strawman technique, konsesyon, pagbubuod, pagdadahilan, komparison at
contrast gayundin ang pagdadahilan. 

Ø  Pagbibigay halimbawa o ilustrasyon- Tinutukoy dito ang partikular na halimbawa o

ilustrasyong ginamit sa sanggunian. Sa paglalahad nito ay inilalagay kung sino ang nagsabi at
saan nanggaling ang impormasyon.

Ø  Strawman technique- Ito ay isang di pangkaraniwang teknik kung saan nagbibigay ang

manunulat ng argumentong kontra tesis ngunit sinusundan agad ito ng pagbibigay kahinaan
ng nasabing argumento.  Sa bahaging ito ay napapawalang-saysay ang nilahad na kontra-
tesis. 

Ø  Pagbubuod- Pinakamadaling paraan ng pagsulat ng sintesis kung saan nilalagom lamang

ang mga impormasyon sa sanggunian.

Ø  Pagdadahilan- Sa pagsulat nito ay iniisa-isa ang dahilan kung bakit totoo at mahalaga ang
nailahad na tesis. Sa bahaging ito ay inilalahad ang mga impormasyong nagpapatibay sa
iniharap na paniniwala.
 II. HABANG SUMUSULAT
9.  Isulat ang Burador. Isulat ang sintesis gamit ang teknik na angkop sa sulatin ngunit maaring
gumamit ng iba’ ibang teknik kung sa tingin ng manunulat ay mas epektibo ito para sa mga
mambabasa.

10. Ilista ang mga Sanggunian. Gamit ang pormat na prineskrayb ng guro, ilista at ayusin ang
mga ginamit na sanggunian. Isang mahalagang kasanayan ang pagbibigay  ng pagkilala sa
anomang akda o sinomang awtor na pinaghanguan ng impormasyon sa ginagawang
akademikong sulatin.

11. Rebisahin ang Sintesis. Basahing muli ang sintesis at tukuyin ang mga kahinaan nito.
Hanapin ang mga kamalian sa pagsulat at higit sa lahat ang nakitang punto na dapat baguhin.

III. PAGKATAPOS SUMULAT

12. Isulat ang Pinal na Sulatin. Pagkatapos marebisa ang ginawang burador ay maari nang buuin ng
manunulat ang kanyang pinal na sintesis.

Aralin 4.3 Mga Katangian at Kahalagahan ng Sintesis

KATANGIAN NG ISANG MABISANG SINTESIS

        Madali man ang pagsasama-sama ng mga magkakaugnay na pangunahing impormasyon upang

maipakita ang koneksyon sa pagitan ng mga bagay, ngunit hindi lahat ay nagiging mabisa. Upang
maging mabisa ito, inaasahan na ang sintesis ay nagtataglay ng mga katangian:

1. May Pokus o Pangunahing Tuon. Ito ang pagbibigay ng diwa na madalas na nakatuon sa

pahayag na tesis (thesis statement) o pangunahing ideya na dapat maisalin sa inaasahang
madla o mambabasa.
2. Obhetibo. Tiyak ang pagbibigay impormasyon at  detalye. Laging may batayan ayon sa
totoong pangyayari, datos, pag-aaral, at pananaliksik.
3. Mapananaligan. Dapat na angkop at wasto ang mga impormasyon at datos mula sa mga
sanggunian. Dapat na napagtitibay nito ang pangunahing ideya, tesis, at layunin ng sintesis.
4. Tumpak. Akma ang mga hakbangin, metodo, at disiplina sa pagsulat ng datos at
impormasyon. Sapat din ang mga impormasyon at eksplanasyon upang mapasang-ayon ang
madla.
5. Malinaw. Malinaw ang ang pag-uugnay-ugnay ng mga datos, pahayag, at detalye gamit ang
angkop na mga transitional devices. 
6. Organisado. Ito ang maayos na pagkakasalansan ng impormasyon sa kabuuan ng sulatin
upang madaling makita ang koneksyon ng mga pahayag at maunawaan ang paksa o pahayag
na tesis (thesis statement) ng malalim.

KAHALAGAHAN NG SINTESIS
          Ang sintesis ay lubhang mahalagang kasanayan at gawain. Mula dito ay nakabubuo ng
bagong kaisipan mula sa mga pinagsama-sama na magkakaibang pag-aaral o resulta na may
magkakaugnay na pag-unawa. Katulad na lamang ng pagsubok at pagpapatunay sa
mga hypotheses sa tulong iba't ibang pag-aaral na humahantong sa mas mataas na pag-unawa at
resulta. Sa pagsasagawa din nito ay mas nauunawaan ang mga pangunahing proseso, at
nakakabuo ng isang mahusay na disenyo para sa marami pang pag-aaral. Tunay na mahahasa
ang  kakayang pampag-iisip at paghahabi ng sulatin sa pagbuo nito.