Gaan na inhoud

Top (Arabiese kleredrag)

in Wikipedia, die vrye ensiklopedie
Arabiese mans met tops in Oman.

’n Top[1] (Arabies: ثَوْب, thawb; Engels: thawb of thobe) is ’n tradisionele, gewoonlik wit kledingstuk met sy oorsprong in Jemen. Dit word algemeen in die Arabiese wêreld, maar ook in ander lande soos Suid-Afrika, gedra en is onder verskillende name bekend soos kandoora, dishdasha en qamiis. Dit is ’n enkellengtekledingstuk, gewoonlik met lang moue, soortgelyk aan ’n kaftan. ’n Soort broek of sarong word gewoonlik daaronder gedra.

Agtergrond

[wysig | wysig bron]
Koning Faisal van Saoedi-Arabië, in 'n wit top en swart bisjt met goue strepe, en president Richard Nixon van Amerika skud blad tydens samesprekings in 1974.

Die woord thawb is die gewone Arabiese woord vir "kledingstuk" en is tradisionele drag vir mans. Dit word gewoonlik van katoen gemaak, maar swaarder materiaal soos wol kan ook gebruik word, veral in kouer klimaatstreke soos Irak en Sirië.[2] Die styl van die top wissel effens van streek tot streek. Die moue en kraag kan gestyf word om dit ’n formeler voorkoms te gee.

In die Levant en Oman is disjdasja die algemeenste woord; in die Verenigde Arabiese Emirate word kandoera gebruik. In Marokko neig die moue om veel korter te wees en word dit ’n gandora genoem. Die nek is soms ook oper en dit is dikwels geborduur. Dit kan ook geen knope hê nie. Dit staan in Swahili ook as ’n kanzu bekend en word algemeen aan die Swahilikus gedra.

’n Top word soms saam met ’n bisjt (بِشْت) gedra, wat ook as ’n misjlah (مِشْلَح) of ʿabāʾ (عَبَاء) ("mantel") bekend is. Dit word gewoonlik op seremoniële geleenthede of deur amptenare aangetrek. Veral geestelikes dra ’n bisjt, maar dit word ook gesien op troues, Eids en begrafnisse.

Die term thawb kan ook na ’n soortgelyke vroulike kledingstuk verwys.[3]. Dit het voor die Soedannese onafhanklikwording in 1956 baie gewild in dié land geraak.[4] Die tradisionele lang Palestynse tuniek vir vroue word ook so genoem. Dit is ryklik geborduur en het verskillende kleure en patrone om verskillende aspekte van die draer se sosiale posisie te weerspieël.[5] Rashida Tlaib, ’n lid van die Amerikaanse Demokratiese Party van Michigan en die eerste Palestynse vrou wat tot die party verkies is, het op 3 Januarie 2019 een na haar inhuldigingseremonie gedra.[6] Dit het verskeie Palestynse en Amerikaans-Palestynse vroue geïnspireer om foto's op sosiale media te deel met die hutsteken #TweetYourThobe.[7]

Verwysings

[wysig | wysig bron]
  1. ↑ (af) (en) The Cape Muslim Vernacular – ek soembain gou dot kom. Geargiveer vanaf die oorspronklike op 24 Oktober 2019. Besoek op 24 Oktober 2019.
  2. ↑ Jirousek, Charlotte (2004). "Islamic Clothing". Art, Design, and Visual Thinking. Charlotte Jirousek. Geargiveer vanaf die oorspronklike op 7 September 2019. Besoek op 25 Mei 2019.
  3. ↑ Campbell, Kay Hardy; Corman, Leela (Maart–April 2016). "The Gown That Steals Your Heart". Aramco World. 67 (2): 24–25.
  4. ↑ "'Khartoum at Night' looks at Sudanese history through fashion". University of Kansas Department of History (in Engels). University of Kansas. 9 Augustus 2017. Geargiveer vanaf die oorspronklike op 30 Mei 2020. Besoek op 25 Mei 2019.
  5. ↑ Debre, Isabel (12 Februarie 2019). "Iconic Palestinian robe fashions a new political symbol". AP News (in Engels). Geargiveer vanaf die oorspronklike op 25 Mei 2019. Besoek op 25 Mei 2019.
  6. ↑ Jennings, Rebecca (4 Januarie 2018). "Rashida Tlaib's thobe and Ilhan Omar's hijab are making congressional history". Vox (in Engels). Geargiveer vanaf die oorspronklike op 20 Mei 2020.
  7. ↑ Zrarick, Karen (3 Januarie 2018). "As Rashida Tlaib Is Sworn In, Palestinian-Americans Respond With #TweetYourThobe". The New York Times (in Engels). Geargiveer vanaf die oorspronklike op 22 April 2020.

Eksterne skakels

[wysig | wysig bron]


Ontsluit van "https://af.wikipedia.org/w/index.php?title=Top_(Arabiese_kleredrag)&oldid=2683903"