Latina (lingua)

Latina (Lingua latina, latinō)
Parlada en:	Impero Roman e Europa ueste asta la Eda medieval.
Area:
Tota parlores:
Ordina:
Familia:	Linguas italica
State ofisial
Lingua ofisial de:	Site Vatican
Regulada par:	Opus Fundatum Latinitas
Sifras
ISO 639-1	la
ISO 639-2	lat
SIL	LAT
La estende masima de la Impero Roman.
Vide ance: Lingua – Lista de linguas

Latina (lingua latīna, AFI: [ˈlɪŋɡʷa laˈtiːna]) ia es la lingua parlada orijinal par la romanes e la otra poplas de Latium (en Italia moderna) tra multe sentenios aec, e la popla de la Impero Roman tra multe sentenios ec. Latina ia es parlada en la eda medieval par eruditas e pretes, e es aora la lingua ofisial de la eglesa catolica. Latina es ance la lingua asendente de la linguas romanica, incluinte franses, espaniol, portuges, italian, romanian e rumans. Multe parolas tecnical es composada de radises latina.

Ante fini de la tarda de la Republica Roman (75 aec), latina antica ia es normida a en latina clasica. Latina poplal ia es la forma demotica cual ia es parlada en la mesma tempo e ia es videda en enscrives e la obras de autores teatral como Plauto e Terensio. Latina tarda ia es la lingua scriveda de la sentenio 3, e latina medieval ia es la lingua usada entre la sentenio 9 e la Renase, cual ia usa latina de la Renase. Plu tarda, latina temprana contempora e latina contempora ia evoluida. Latina ia es usada como la lingua de comunica internasional, eruditia e siensa asta la tarda de la sentenio 18, en cuando demoticas ia comensa recambia lo. Latina eglesal permane como un lingua ofisial de la Seja Santa e rituo santa de la eglesa catolica.

Oji, multe studiantes, eruditas e eglesores catolica parla latina fluente como un lingua liturjial. Lo es enseniada en scolas prima, liseos e universias tra la mundo.

Latina es un lingua cual infleta multe, con tre jeneros, sete casos per nomes, cuatro conjugas per verbos, ses tempos, tre persones, tre modas, du voses, du aspetas e du numeros.

Istoria

• Latina antica
• Latina clasica
• Latina demotica
• Latina medieval
• Latina de la Renase
• Latina Nova
• Latina contempora

Fonolojia

La pronunsia antica de latina ia es reconstruida. La datos usada per reconstrui inclui declaras clar sur pronunisa par autores antica, malspeles, bromas de parolas, etimolojias antica e la spele de parolas presetada latina en otra linguas.

Consonantes

La fonemes consonantal de latina clasica es mostrada en la table seguente:

	labial		dental		palatal		velal		velal labial		glotal
plosiva	p	b	t	d			k	ɡ	kʷ	ɡʷ
fricante	f		s	z							h
nasal	m		n				(ŋ)
vibrante			r
prosiminte			l		j				w

En latina antica e clasica, la alfabeta latina ia ave no distingui entre leteras major e minor, e la leteras ⟨J U W⟩ no ia esiste. ⟨I V⟩ ia es usada en loca de ⟨J U⟩. ⟨I V⟩ ia representa e consonantes e vocales. La plu de la formas de la leteras ia es simil a la leteras major moderna.

La sistem de spele usada en disionarios latina e en publicis moderna de testos latina usa normal ⟨i u⟩ en loca de la ⟨I V⟩ de la eda clasica. Alga sistems usa ⟨j v⟩ per la sonas consonental /j w/, estra en la combinas ⟨gu su qu⟩ per cual ⟨v⟩ es nunca usada.

A su es alga notas sur la alfabeta latina en compara a la alfabeta elefen:

Notas

Grafem latina	Fonem latina	En elefen
⟨c⟩	[k]	Como c en elefen, no como c en linguas romanica cual ave comun pronunsias "dur" e "mol" per esta
⟨t⟩	[t]	Como t en elefen
⟨s⟩	[s]	Como s en elefen, no como otra linguas cual a veses pronunsia s como /z/
⟨g⟩	[ɡ]	Como g en elefen, no como g en linguas romanica cual ave comun pronunsias "dur" e "mol" per esta
	[ŋ]	Ante ⟨n⟩, como ng en bumerang
⟨n⟩	[n]	Como n en elefen
	[ŋ]	Ante ⟨c⟩, ⟨x⟩, e ⟨g⟩, como ng en bumerang
⟨l⟩	[l]	Cuando duplida ⟨ll⟩ e ante ⟨i⟩, como l en elefen (l exilis)
	[ɫ]	En cada otra locas, como "l oscur", pe en la parola engles "bowl" (l pinguis)
⟨qu⟩	[kʷ]	Como cu ante vocales
⟨u⟩	[w]	A veses a la comensa de un silaba, o pos ⟨g⟩ e ⟨s⟩, como u consonante, nunca como v
⟨i⟩	[j]	A veses a la comensa de un silaba, como i consonante, nunca como j
	[jj]	Duplida entre vocales, como i i en ai iac
⟨x⟩	[ks]	Un letera cual repersenta un combina de ⟨c⟩ e ⟨s⟩: como cs en fucsia

En latina clasica, como en italian moderna, consonantes duplida ia es pronunsiada como sonas consonantal longa, cual no es la mesma de la varias corta de la mesma consonantes. Per esemplo, la nn en la parola latina clasica annus "anio" (e en /anno/ en italian), no es pronunsiada la mesma de la n en anus "ano" (e /ano/ en italian).

Vocales

Vocales simple

	fronte	sentral	retro
cluida	iː ɪ		ʊ uː
media	eː ɛ		ɔ oː
abrida		a aː

En latina clasica, ⟨U⟩ no ia esiste como un letera distinguida de V; la forma scriveda ⟨V⟩ ia es usada per representa e un vocal e un consonante. ⟨Y⟩ ia es adotada per representa upsilon en parolas prestada de elinica, ma ia es pronunsiada como ⟨V⟩ o ⟨I⟩ par alga parlores. Lo ia es ance usada en parolas nativa de latina par causa de confusa con parolas elinica cual ave sinifias simil, per esemplo sylva and ὕλη.

Latina clasical ia distingui entre vocales longa e corta. A acel tempo, vocales longa, con eseta de ⟨I⟩, ia es marcada comun con la apico, cual ia es a veses simil a la sinieta agu ⟨Á É Ó V́ Ý⟩. La vocal longa /iː/ ia es scriveda como un varia de ⟨I⟩ plu alta, nomida i longa "I longa": ⟨ꟾ⟩. En testos moderna, vocales longa es comun marcada par un sinieta longa ⟨ā ē ī ō ū⟩, e vocales corta es comun nonmarcada estra cuando on ave nesesa per distingui entre parolas, en cuando los es marcada con un sinieta corta: ⟨ă ĕ ĭ ŏ ŭ⟩.

Vocales longa en latina clasica ia es pronunsiada con un cualia separada de vocales corta e ia es plu longa.

Un leteral vocal segueda par ⟨m⟩ a la fini de un parola, o par ⟨n⟩ ante ⟨s⟩ o ⟨f⟩, ia representa un vocal longa e nasal, per esemplo en monstrum /mõːstrũː/.

Diftongos

Latina clasica ia ave alga diftongos. La du cual ia es la plu comun ia es ⟨ae au⟩. ⟨oe⟩ ia es alga rara, e ⟨ui eu ei ou⟩ ia es multe rara, a la min en parolas nativa de latina.

La vocales no ia representa diftongos a veses. ⟨ae⟩ e ⟨oe⟩ ance ia representa un serie de du vocales en silabas separada en la parolas aēnus [aˈeː.nʊs] "de bronze" e coēpit [kɔˈeː.pɪt] "ia comensa". ⟨au ui eu ei ou⟩ ia represente series de du vocales o un vocal e un de la semivocales /j w/ en la parolas cavē [ˈka.weː] "garda se", cuius [ˈkʊj.jʊs] "de ci", monuī [ˈmɔn.ʊ.iː] "me ia averti", solvī [ˈsɔɫ.wiː] "me ia relasa", dēlēvī [deːˈleː.wiː] "me ia destrui", eius [ˈɛj.jʊs] "de el (mas)" e novus [ˈnɔ.wʊs] "nova".

Latina antica ia ave plu diftongos, ma la plu de los ia cambia a en vocales longa en latina clasica. La diftongo ⟨ai⟩ e serie ⟨āī⟩ de latina antica ia deveni ⟨ae⟩ en latina clasica. ⟨oi⟩ e ⟨ou⟩ de latina antica ia deveni ⟨ū⟩ en latina clasica, estra en alga parolas en cual ⟨oi⟩ ia deveni ⟨oe⟩. Esta du cambias aveni a veses en parolas separada con la mesma radis: per esemplo, la parolas poena "puni (nom)" e pūnīre "puni (verbo)" de latina clasica. ⟨ei⟩ en la temprana de latina antica ia cambia comun a ⟨ī⟩ en latina clasica.

En latina poplal e la linguas romanica, ⟨ae au oe⟩ ia deveni la mesma como ⟨e ō ē⟩. Un pronunsia simil ia esiste ance en la periodo de latina clasica par parlores con min educa.

Diftongos categori par la sona prima

	fronte	retro
cluida		ui /ui̯/
media	ei /ei̯/ eu/eu̯/	oe /oe̯/ ou /ou̯/
abrida	ae /ae̯/ au /au̯/

Leteratur

Article xef: Leteratur latina

Alga poesistes latina famosa es Vergilio, Horatio, Catulo e Ovidio.

Per mostra, on ave asi la Prea de la Senior en latina:

Pater noster, qui es in caelis,

sanctificetur nomen tuum.

Adveniat regnum tuum.

Fiat voluntas tua,

sicut in caelo, et in terra.

Panem nostrum quotidianum da nobis hodie,

et dimitte nobis debita nostra,

sicut et nos dimittimus debitoribus nostris.

Et ne nos inducas in tentationem,

sed libera nos a malo.

Amen.

Un otra esemplo:

In principio erat Verbum et Verbum erat apud Deum, et Deus erat Verbum… omnia per ipsum factum est. – Joan 1:1.

Vide ance

• Latina (gramatica)